روايتي الأولى/ أنا غيرك ما هويت - الصفحة 8

MozaRashid · 04-28-2014, 10:57 PM

الجزء السابع عشر

العصر مر مروان لبيت أحمد يسأل عنه وقالت له الخدامه انه مسافر وما تدري متى بيرجع .. فماحب يتكلم بالموضوع مع غير احمد لانه علاقته بسعيد مب اوكي ..

بعد سنهه بطيئة لابعد درجه وفالهسنه الكل اعتاد على فراق مهره وبدا كل شي يرجع مثل الاول .. وبعض الاحداث مثل ..

- روضه صارت قريبه من الريم وايد ومن شما وبين كل يومين تيلس معاهم وعلاقتهم بالباقين مقبوله..

- المها وهيا بدو يعتادون على فراق امهم المؤلم وهيا قامت تحاول تتناسى الي صار لها.

- نوره رجعت اتسوق عادي ..

- منال خذت الليسن وبعض التفاصيل .. والباقين حالهم مثل ما هو ..

منال : يلا ماما انا وساره رايحين الجم

عاشه : انتو ويا هالجم .. انا ما اشوف الجم سوالكم شي ..

ضحكت منال وساره وطلعوا ..

ركبت منال : ساره اتحسيني اتغيرت

ساره ابتسمت : وااايد يا منال والدكتور النفسي احسن شي سويتيه

منال : هيه الحمدلله .. انا ابد مش ويا الناس الي يعتبرون الدكتور النفسي للي ما يكون صاحي .. انا احس واايد ساعدني الشيء واليوم اخر جلسه وانا وايد مستانسه ..

( الي صار انه فهالسنه الي مرت اشغلت منال عمرها بانها تتعلم اتسوق وخذت الليسن وبعد فتره قرت فالمجله عن الطب النفسي وحست انه هالشي محتاجتنه اقترحت على ساره والي خلتها على راحتها وسارت مع ساره عند دكتور كان اماراتي الجنسيه ووايد ارتاحت عنده وحسته يعالج بآمانه وكان معارض فكرة انه يعالجها بأي دواء وجلساته كانت تعتبره منال دردشه الا انها كانت علاج غير نفسية منال للاحسن وساره كانت تروح معاها بطلب من منال وتنتظرها فالعيادة اما موضوع الجم فكان جذبه لانه منال ما حبت احد يعرف بالموضوع .. )

بعد ما وصلوا العيادة دخلت منال على الموعد وساره كالعادة تنتظرها ..

منال : السلام عليكم

الدكتور : وعليكم السلام .. كيف الحال يا منال ( وهو يأشرها تيلس )

منال : الحمدلله

الدكتور : كيف النفسيه اليوم

منال : ههههههه عال العال

الدكتور : الحمدلله .. شو شعورج وهذي آخر جلسه لج ..

منال : الحمدلله دكتور سعود انا واايد مرتاحه ومستانسه اني بخلص من العلاج

الدكتور : افاا مليتي منا

منال : ههههههههههه لا والله اني بشتاق لسوالفنا بس بعد متحمسه علشان اخلص ..

الدكتور سعود : ههههه امزح معاج ومتفهم .. منال انا اعتبرتج كأخت محتاجه لحد ينصحها ويوجهها ويساعدها فحياتها قبل لا اعتبرج مريضه ..

منال : مشكور يا دكتور وانت جد فدتني فوايد اشياء وفعمري ما بنسى الي سويتلي اياه وطول عمري بتم ادعيلك

الدكتور سعود : هذا من طيب اصلج .. والحين يا منال خلينا نشوف وين وصلنا مع الايام ..

منال وهي اتعودت على هالسؤال وجوابه : اممم المها اتمنالها الخير .. اما زايد فإن شاء الله بيي اليوم الي بقوله انه اخوي وبس .. احب نفسي بس مب لدرجة الغرور والانانيه احبها علشان ما انسى اني بحاسب عليها .. لو شفت احد محتاج لشي عندي اكييد ببديه علىي واذا بدر مني شي بعتذر ..

كان يسمعها الدكتور وهو مبتسم على انه قدر يضم لقائمة أسماء الناس الي عالجهم اسم يديد قدر يفيده بشي ويكون راضي عن عمره .. بدا ينصح منال ويسالها .. ويضحك معاها مرت الساعه بسرعه ..

الدكتور وهو مبتسم : خلص وقتنا يا منال ..

منال وهي مبتسمه : مر الوقت بسرعه وما حسيت فيه

الدكتور : هيه والله الوقت كان سريع .. ودايما الاوقات الحلوه اتمر بسرعه .. والحين يا منال ابغي اقولج انه انا بعد فرحان لج ومرتاح لانها الجلسه الاخيره بس علشان اني اشوفج اليوم انسانه مرتاحه ..

منال : الحمدلله .. مشكوور يا دكتور فعمري ما بنسى الي سويته لي ..

الدكتور : هذا قبل لا يكون واجبي كدكتور كان عمل انساني يا منال .. واظن انتهى هذا العمل وهذا لقانا الاخير .. واذا احتجتي لاي شي انا موجود ولا تتردين في انج اتكلميني .

منال : بإذن الله لا صارتلي اي مشكله انت اول انسان بلجأ له ومثل ما قلت هذا لقانا الاخير ..

الدكتور : صحيح انه لقانا الاخير بس اكيد بكون مبسوط لو شفتج فيوم با منال مب في هذي العيادة ومب كمريضه ..

منال : اكييد هالشي يا دكتور وحتى انا بستانس لو شفتك بس بعد مب كدكتور ..

ضحك الدكتور سعود وضحكت منال وبعدها ودعته وشكرته ودعتله وطلعت وهي مرتااحه شافت ساره وركض وحضنتها بالقو من الوناسه همم كبيير وانزااح صح من قبل هالجلسه هي كانت اتحس انها خلاص اتغيرت وصح ما خذا العلاج وياها فتره طويله وايد كانت 9 جلسات في 3 شهور كان الوقت بالنسبه لمنال قصير الا انه من اول جلسه وقبل لا يحدد لها الدكتور الوقت والجلسات خبرها انها بتكون مرتاحه في وقت قصير لانها اتعرف هي من شو تعاني .. طلعت من العيادة ومرت اول شي المسيد لانه كان مأذن العشى ووقت بسيط باقي على اقامة الصلاة .. صلوا فالمسيد وبعدها قررت منال تعزم كل البنات على العشى .. وقالت لساره

منال : سوييره اتصلي لشما ولالريم وخبيرهم اني بمرهم وبنطلع ..

ساره اتصلت لشما : هلا سااره

ساره : اهليين شمااا .. شحالج

شما : الحمدلله انتي شحالج

ساره : طيببه .. شماا

شما : آمريني

ساره : ما يآمر عليج عدو .. منال عازمتنج على العشا واتقولج بتمرج بعد اشوي خليج جاهزه لانها نحن عن قريب من بيتكم

شما : الله منو قدي عازميني على العشا ..

ساره : هههههههه شفتيي عاااد

شما : ههههههههههه قولي لمنول مشكوره .. بس دقايق بشوف اميه وبرد عليج ..

ساره : اوكي اترياج .. وسكرت

ساره : اتقول مشكوره و بتشوف امها وبترد عليج

واتصلت لريم ..

الريم : خير آنسه سويير اشعندج ..

ساره : أعوذ بالله .. بدال ما ترحبين فيني !!

الريم : كيفج عاد محد قالج تتصلين انا ما ارحب بحد

ساره : عادي مب شي غريب !!

الريم : له له والله واستويتي قويه اتراددين الي اكبر عنج

ساره : ههههههههههههههه ريييم ماماتي اسمعيني منال اتقولج ازهبي علشان هي عازمتنج على العشا وبتمر عليج

الريم وباستهبال : قولي حق المنااال لو تبا تعزمني لازم اتكلمني بنفسها ..

ساره : هههههههههههههههههههههههههه منول ريم اتقولج لازم اتكلمينها بنفسج ..

منال : ههههههههههههههههه حطي على السبيكر ..

وبعد ما حطت ساره : حبيبتي ريم انا كنت بكلمج افا عليج بس لاني اسوق قلت لساره اتدق

الريم : يا اميييه ما استوت عاد تراج وايد ملتزمه بقوانين السير والمرور ..

منال وساره : هههههههههههههههههههههههههههه

ساره شافت شما تتصل : الريم شما تتصل يلا ازهبي برد عليها

الريم : ما عليه ما عليه اتسكرين عني براويج انتي وهالمره بتغاضى عن سالفة انه ساره تعزمني مب منال ويلا تعالي بسرعه اترياج وسكرت ..

منال وساره : هههههههههههههههههه وردت ساره ..

ساره : سوري حبيبتي كنت اكلم الريم ..

شما : لا ما عليه ..

ساره : ها شو قالت ..

شما : قالت عادي ..

ساره : يلا انزين فايف منتز ونحن عند الباب ..

شما : اوكي ..

ومرت منال على شما اول وبعدين الريم ولما يت الريم فجت الباب الي جدام : يلا مدام سوير وراا بسرعه

ساره : نعم حبيبتي سيري انتي ورا .. انا مرت عمج لازم اتقوليلي عموه وتحترمني ..

الريم : هههههههههههههههههههههههههههههههههههههه

ضحكت شما : هههههههههههههههههههههههه

ساره : ممكن افهم شو الي يضحك ..؟؟!

الريم : والله ضحكتيني ماخذه مقلب فعمرج بس ما علييه يلسي الحين وانا عقب بتفاهم وياج .. ومن ركبت ورا

شما : افاااا ريمم سويير اتيلسج وراا افاا بسس

ساره : ههههههههههههههه شفتيي كييف انا قو ..

الريم : ما علييه برواايج انتي خليني ايودج بس ..

منال وساره وشما : ههههههههههههههههههههههههههههههه

منال : تجتليني يا ريم بمصطلحاتج والحين هدوء ابي ادق لنوره ..

الريم : اقولج لا تتأمرين علينا مب عايبنج انزلي ارمسي برع صح شمتي

شما : هيه والله

منال : هههههههه اوكي اوكي ونزلت ..

شما والريم فطسوا ضحك : هههههههههههههههههههههههههههههههههههههههههههههههههه هههههههههههههههه وساره ابتسمت

الريم : منوووول صدق مصخررره شو يعني تنزل من السياره

شما : هههههههههههههههه احيييدهااا مال مقصه بس مب جنها هالفتره واايد مستويه هبله

ساره : ما اسمحلكم يلا عاااد وحليييلهاا زين منها مسوتلكم سالفه ..

الريم : هههههههههه صدق مسكينه والله ما اتحسنها هالفتره مستويه طيبه بزياده

شما : هههههه حسسيتييي

ساره ابتسمت ( الحمدلله اتغيرت للاحسن وللي يرضيها والكل ملاحظ.. )

منال وبعد ما قالت لنوره : انزين قولي لماما بعد

نوره : انزيين ..

منال : المها صوبج ..

نوره : هيه

منال : اوكي عطيني اكلمها ..

نوره : مهاوي منال بتكلمج خذت المها الفون

: هلا حبيبتي منال

منال : هلا مهاوي .. كنت ابي اقولج اني عازمتنج على العشاء وبمر الحين البيت اوكي

المها : حبيبتي انتي مشكوره ..

منال وببراءة : عفواً ولو هيا حذالج عطيني اكلمها ..

المها : حبيبتي هيونه فوق ما عليه بخبرها انا ..

منال : خلاص اوكي .. شكرا .. مع السلامه

المها : الله يحفظج ..

ونشت نوره والمها يتلبسون ..

وبعد ما مرت عليهم منال ..

طلعوا مع بعض وكان جوهم واايد حلو ..

منال : بنات ما كلمنا روضه

الريم : روضه مش هني فبوظبي ..

منال : اووه اوكي ..

شما : انزييين منول وين بتعزمني

منال : فيستفال ..

وما سمعت غير صريخ شما والريم وهيا وياهم ..

نوره : بسم الله بلااكم !!

هيا: انا سألت ريمو وين بنسير قالت متاجر

المها وساره ومنال ونوره : هههههههههههههههههههههههههههههههههههههههههههههههههه ه

هيا : انا مش كاشخه ما ابا اسير فيستفال

شما : انا بعد مب حاطه ولا شي فويهي حتى مب متجحله ..

الريم : وانا بعد مب كاشخه حتى بوكي حاطتنه عند شما مب شاله شنطه

نوره : ههههههه عادي ريم انتي من يومج ما تكشخين

الريم : جب لا اعطيج بالنعال على راسج

منال : هههههههههههههه خلاص انزين وين تبون اتسيرون

الريم : انسير على البحيره بنسير فرايديز ..

منال : ها كلكم بتسيرون عادي ؟!

شما وساره : عادي

هيا : هيييه اي مكان ولا اسير مول وانا جيه شكلي

نوره : يحليلي انا كاشخه وشاده حيلي يلا بس عشان خاطرهم مب مشكله

المها : ههههههههه هيه والله وانا بعد متحمسه حتى عباتي يديده اول مره البسها

الريم : وييييي يالمصخررره والله طلعت قو امشي الكل

المها : ههههههههههههههههههه

نوره : نعم رييم ماماتي انزلي يلسي تحت الشيره وايد احسن

الريم : لا حبيبتي هذي سيارة مناال ومنول ما ترضى ..

نوره : هاهاهاه لا منال تسمع رمست اختها العوده ..

منال : هههههههههه .

الريم : يلااااا يلااااا الحين انتي اكيد مقهوره ..

نوره : من شو إن شاء الله

الريم : عسب منول يوم خذت الليسن خذولها سياره مب انتي فرو عليج سياره ما ادري من كم سنه ..

نوره : يااا حمااااره اصلا السياره الي عطاني اياها ابويه كانت يديده وهو يوم خذا حق منال سالني وانا قلت ماابا

الريم : عن الجذب عاااد .. حد بيسالونه تبا سياره بيقول لا !! اجذبي عدل

كلهم عدا نوره : هههههههههههههههههههههههههههههههههههههههه

نوره : مالللت اصلااا لحد يكلمني زعلت ..

المها والي كانت يالسه حذال نوره حضنتها : ههههههههههههههه خلااااص اسفييين اصلا محد له شغل فيييج صحح

نوره : صحح خلااص ما احببب غيير المهااا ..

المها : هههههههههههه

شما : عادي ..

الريم : هيه والله ما بنموت لو ما حبيتينا الله والحب عاد ..

ساره : ههههههههههههههههههههههههه

نوره : انزييين سوييير اضحكي اضحكي ..

ساره : هههههههههههههههههههه لا لا اضحك على شي ثاني

الريم : هيه اكيد ذكرت نكته قالها رشود

كلهم حتى ساره : هههههههههههههههههههههههههههههههههههههههههههههههههه هههههههههه

ساره : رييييييييم يااا عبييييطه

الريم : هههههههههههههههههه حد يتخيل رشود ينكت ..

شما : هههههههههههههههههههههه ما اتخيييل

نوره : ههههههههههههههههههههه ولاا ناااا

المهااا : هههههههههههه بس بس عيييب ..

هيا : ما عليه كل الي ضحكوا عليه بخبره عنهم ..

الريم : بنكر كل شي كيف بيصدقج انتي وحده

ساره : انا ومنال بعد بنقوله

الريم : بقوله انج جذاابه .. ومنول بعطيها 100 حق البترول وبتسكت ..

الكل عدا ساره وهيا : ههههههههههههههههههههههههههههههههههههههه

منال : الله والرشوه يا ريييم ..

المها : ههههههههههههههههه!!

هيا : هههههههههههههههههه اونه 100 حق البترول ورجعت تضحك : هههههههههههههههههههههههههههههههههههههههههههههه

الريم : خلاص انزين بس ما يضحك

هيا سكتت ثواني ومن ذكرت الجمله الي قالتها ريم : ههههههههههههههههههههههههههههههههههههههههههههههه

شما وساره : هههههههههههههههههههههههههههههههههه

المها وهي كاتمه الضحكه : محد قالج يا ريم انتي يبتي حق عمرج الكلام

نوره : ههههههههههههههههههههههههههههههه

الريم : ما عليه شمتي استويتي وياهم بععدين بلاها ال 100 نعمة كريم ليش مستهينين فيها ..

شما : هههههههههههه لا لا اصلا انا ويااج صحح شوفيها ال 100

هيا : ابدد .. يستوي انعبي بترول فيها ..

ساره ومنال ونوره : ههههههههههههههههههههههههههههه

وكملوا سوالفهم لين ما وصلوا ..

وبعد ما اتعشوا وخلصوا نوره وهي اترمس شما : اقولج تعالي الحمام بقولج شي ..

نوره : انا بروح اغسل ايدي ..

شما : يلا انا بي وياج ..

هيا : لحظه انا بعد بي وياكم ..

نوره : هاا .. تعالي ويا منول نحن بنتجدم ومشت بسرعه .. كلهم استغربوا من تصرفها حتى هيا ..

نوره وهي اترمس شما فالدرب : اقولج اليوم تاريخ 1-27 بيرثدي ريوم 29 وهيا 2-1 خلنا نيبلهم كيك ..

شما : صح فكره .. انزين انتي سيري رمسيهم بعد ما نطلع من الحمام وانا بقولهم انج سرتي ترمسين بالفون ..

دشوا ووراهم دشت منال وهيا .. ونوره قالت انها بتسير ترمس ..

وسارت وكلمتهم ووصفتلهم شكل هيا والريم عسب ايحطون الكيك جدامهم .. وهم يالسين كلهم وخلاص شلو الاكل من جدامهم ومنال بتحاسب .. يابو كيكتين صغار وحطو وحده جدام هيا ووحده الريم وقاموا يغنولهم .. والريم طول ما هم يغنون ميته ضحك اما هيا فكانت منحرجه وغطت ويهها بايدها .. ومن روحوا هيا حضنت نوره بالقو لانها كانت صوبها والكل استوعب تصرف شما ونوره ..

هيا : حبييباااتي وااايد وااايد شكرا

نوره : يا حياتي .. ادري انه بعده عن يور بيرثدي بس قلت ما دام كلنا ما بعض انسويلكم شي ..

الريم : يا حميير جان قلتولي ..

شما : لا والله وين surprise فالموضوع ..

الريم : يلا يلا بكبر ابا اشوف الاحترام عدل عقب

المها : هههههههههههههههه ان شاء الله

الريم : احم شكرا ..

هيا حضنت شمااا ...

الريم : اتطالعوا هاي بعدها متأثرره .. بس خلصت الحفله يا امي

كلهم : هههههههههههههههههههههههههه .. وبعدها الكل رد بيته وهو مستانس على هاليوم ويشكرون منال على هالطلعه الحلوه ..

شما من رجعت البيت سرحت بأفكارها ( أنا للحين ما أعتذرت من المها؟ كيف أعتذر منها وهي اتعاملني بأحسن طريقة وجنه ما صار شي من بينا أحس بالأحراج وأني أتاخرت وايد مر عن الموضوع اكثر عن سنه ؟؟ شسوي ياربي )

بس في النهايه طرشت للمها : آآآسفه على كل شي ادري وايد متأخره .. بس كنت مستحيه منج ..

المها ردت بمسج : سامحتج ..

منسدح عالسرير ما عنده مكان يسسيرله مع انه مش متعود ييلس فالبيت هالوقت .. ابتسم وهو يتذكر كل شي صار ابد ما كان يحس بالحزن لما يتذكر لانه واثق انه في يوم بيي و بيشوفها ..

في هاك الوقت كان يدرس سمر كورس وخلاص هالمادة الي بقت له وبيتخرج .. مادة كانت جدا ممله ففضل ياخذها فالصيف واتكون الاخيره .. اما هي فخذت هالماده لانه وقتها كان مناسب لها دوام 4 ايام فالاسبوع مع هالماده الي الكل يتذمر من انها ممله ففكرت تاخذها فالصيف عسب تتفرغ للمواد الباقيه السنه اليايه ..

كانو كل 4 طلاب المفروض يلخصون كتاب مع بعض .. وهي ومنصور وشابين عربيين كانو مع بعض .. كل ما يمر كلاس كان يشوف نظرات الاعجاب فعينها وكل ربعه الي وياه فالكلاس كانوا يعلقون على هالموضوع وكل ما حاولوا يتقربون منها ماكانت اتسوي سالفه لاحد غير منصور .. ولما صار موضوع تلخيص الكتاب كانت اتدقله عند كل نقطه .. وكان يستانس على مكالمتها لانه يدري انها ما تتصل عسب الدراسه تتصل عشان اتسولف .. ما كان منصور ايكلم بنات بس هيه ما يدري ليش اذا اتصلت ما يقدر يحقرها .. خلص الصيف واتخرج منصور اما هي فلا .. مع هذا كله كانت كل يوم تتصل فيه وكان يدري انها متعلقه فيه ومع انها كانت من البنات الي مش ملتزمين بالحجاب بالاصح ما كانت تتحجب ومنصور ابدا ما يحب هالنوع الا هي فكان يتغاضى عن هالشيء ويدري لو طلب منها ما بتقول لا ! الا انه ما كان حاس انه هالشي يخصه لانه ما كان عارف شو تعنيله ومع الايام .. عرفها اكثر عرف تفاصيل حياتها كلها كانت اتخبره بادق التفاصيل لدرجة انه لو بتشتري شي تشاوره .. كان يدري انها اتحبه ومتجننه عليه وما حبت قبله ومستحيل اتحب غيره وهذا ما يابه من عندها هي بنفسها قالت له هالشي وهو مصدقنه لهذا اليوم لان كل تصرفاتها كانت اتدل علر هذا .. امه هو فما يا يوم واعترف بحبه لها ! لانه ما كان عارف شو شعوره اصلا ابتسم اكثر وهو يتذكر من اول ما عرفها لين ما صار الي صار (آآه ياا نووود والله من اشوووفج بقوللج اشكثر احببببج ) ضحك على افكاره ورجع يتذكر

نود : منصور يلا غنليي ..

منصور : شو تبيني اغنييلج

نود : ابيي كلمة احبببك ..

منصور : ههههههههههههههههههههههه وانتي ما عندج الا هالاغنيه ما تمليين منهااا .. ( كان يدري انها تتمنى انه فيوم يغنيلها الاغنيه من نفسه وهي صدق تتريا هالكلمه )

نود وبنبرة صياح : منصوري انت ليش جييه لييش ما عندك رومانسيه يا حبيبي حسس فييني اشوي .. يعني متى رااح اتحبنيي انت متى !!

منصور : شو اسوي يعني انا ما فيني رومانسيه محد قالج اتحبيني

نود وهي اتصيح : اوووف منكك اوووف

منصور : رديييناا على الصياااح .. اباا افهم انتي دمووعج ما تخلص .. فاليوم عشر مرااات اتصيحين ..

نود وهي بعدها اتصييح : يعنيي ملييت منيي صحح تبيي اتقوول جيييه ادري فييك تبي الفكه مني .. مو على كييفك انزيين وما بسكر

منصور : هههههههههههههههههههههههههههههههههههههه

منصور اكثر شي يحبه فيها انه تعشقه وكل يوم اتخبره انها اتحبه مع انه ما اعترف بحبه لها ..

يذكر اخر مكالمه ..

منصور وهو توه بيرقد : هااا نوود شو عندج

نوود وبنبرة الصياح المعتادة : قووم صحصح يلا ابي اكلمك بموضوع

منصور : يا ربييه يا نوود انا نعسااان وبرقد جانجج بتيلسين اتصيحين وتتشكين واحبك وما اتحبني خلييه بعديين

نود ووخلاص ما تقدر تمسك عمرها : منصوري عواش اتقول ( عاشه اقرب ربيعتها )

منصور وهو يقاطعها : نووود نووود اسمعيني عوااش ما عندها سالفه واتخورط علييج ما علييج منهاا ارقدي انتي وباجر خير ..

نود وهي اتصييح : منصوووووووور !!!

منصور : لا اله الا الله .. نود والله مب وقت صياحج

نود ترمس بحرقة قلب منصور حس فيها : منصوور عواش اتقول انك فعمرك ما راح اتحبني واني اترياا على الفاضي

منصور وهو حاس بحرقة قلبها : وعواش على كيففها !!

نود : اهي اتقول انك بس اتكلمني عشان انا عاقه عمري عليك وانك ما راح اتحبني ابد وانك اكييد ما اتفكر فوحده مثلي كلمتك وناشبتلك ومستحييل تتزوجها ..

سكت منصور للحظات يفكر بالكلام الي اتقوله .. هو ما يدري شو مشاعره وفي عمره ما فكر فالزواج وهي بهالكلام خلته يستوعب الي يصصير ..

نود وهي ميته صياح وترمس مثل اليهال : يعنيييي صصححح ما عنددك شي اتقوووله .. ما راح اتحبني وانا غبيه واجذب على عمري .. وانت بس اتعذبني واكيييد تبييي تذبحنييي .. باجر رايحه بوظبي وعلى اساس ارجع الشارجه بس انا اقولك اني ماني راجعه ولا راح ادق مره ثانيه وراح اخلييك على رااحتك وما راح اكون نشبه واذيه ووحده فاليوم تسمع صياحهها مثل ما تقول عشر مرات وماراح ارجع لمكان انت فيه وبتشوف ولو قالولك نود ماتت كله منك انتت انزييين واحبك وما بحب غيرك والله ياخذني ويفكك مني .. وسكرت اول ما سكرت انفجر ضحك علييها وعلى اسلوبها الي يضحكه وهو واثق انه دقايق وبترجع اتدق واتقوله متى بيحبها .. لكن خاب ظنه وصدق نوود ما اتصلت فييه .. وسار اليوم الثاني شقتها ومالقى سيارتها ولما سأل عنها الحارس قال له انها سلمت مفتاح الشقه انصدم فهاك اليوم صدمة عمره وبعد فراق نود الي صارله خمس شهور اكتشف انه يحبها وهي شي مهم واساسي فحياته ولين الحين واثق انه بيشوفها وكل فتره يمر شقتها ويقوله الحارس انها ما رجعت الا انه واثق انه راح ايي اليوم الي يشوفها فيه ..

غمض عينه ورقد وهو يفكر فيها ..

الساعة 11 منال بعد ما سكرت المصحف .. شكرت ربها على كل حال .. قامت بعد ما خلصت وهي متردده الا انها مصممه على الي بتسويه دقت الباب ..

: حيااج ( كانت متوقعه انه وحده من البنات )

دخلت الغرفه وهي مبتسمه .. شافت هيا راقده بس المها يالسه على السرير وهي ميودة كتاب .. حست هذي فرصة دام هيا راقده ..

منال : مهاوي مشغوله ..

المها : لا حبيبتي .. تعالي يلسي

منال : ابغي اكلمج بس اخاف هيا اتقوم عادي تيين غرفتي ..

المها قامت وهي مستغربة : اكيييد .. مشت وراها ..

فالغرفة ..

منال : المها انا ما ادري كيف بقولج الي اباه .. متردده وخايفه

المها : حبيبتي اتطمني .. كلميني بسمعج وصدقيني بفهمج ..

منال : زاايد !!

المها وهي اتحس بنغز فقلبها ( زااايد يا منااال !! بتقولين انج اتحبينه ! ولا بتسألين لو هو يحبج ) ابتسمت وهي اتخلي عمرها طبيعيه : شو فييه ؟!

منال بتردد : انتي للحين اتكلمينه .. اا.. أقصد يعني .. ما ادري بس انتي تذكرين لما كلمتيني عنه

المها وبخوف من الي بتقوله منال : هيه اذكر !

منال : يعني ما اعرفف .. ما اعررف كيف اقولج .. انا ادري انج واايد مع زاايد وهو اكيد يثق فيج ويقولج كل شي .. انا اباج بس اتخبرينه شي ..

المها وبحزن حاولت قد ما تقدر تخفيه : اقوله انج اتحبينه !!

منال ابتسمت : لااا !!! انا ما ادري لو زايد بعده يفكر فيني ولا يحبني .. بس انا اباج اتقولين له انه ما يفكر فيني وانا ما اشوفه غير اخو !!

المها وهي مصدومه من الي اتقوله منال ما اتعرف اتحدد شعورها فهاللحظه هي مستانسه او خايفه او حزيينه !!

منال وبتردد : شو قلتي !!

المها : اا.. إن شاء الله .. لو يا الوقت المناسب انا بقوله

منال : شكرا المهااا ..

المها ابتسمت : العفو .. يلا حبيبتي انا استأذن بروح اناام ..

منال : عواافي

المها : الله يعافيج .. ظهرت من الغرفه لغرفتها بهدووء انسدحت على السرير وغمضت عيينها ( آآآه يا منااال لييش قلتييلي اناا !! لييش الحييين .. كييف اقوول لزااايد ؟؟ كييف اجرحه !! كيف اتجرأ واخبره كييف !! ليش اتحمليني هم انا ما اقدر علييه ؟ يا ربييي ساعدنييي !! يعني اقوله زايد منال ما تبييك ما اتفكر فييه ماا اتحبك !! ااه يا منال انا قلت محد يستاهل حب زاايد غييريي اناا .. انا اكثر من يحبك يا زاايد متى راح اتحس ) .. يوم الجمعه على العصر الكل ميتمع فالصاله .. عدا رااشد

الخدامه : بابا أحمد في رجال يريدك ..

أحمد بصدمه : ريال ؟! خلاص دخلييه الميلس ..

عاشه : ما قلتلي حد بييك

أحمد : والله علمي علمج ما درييت .. يلا عن اذنكم ونش

هيا وهي اتحس انها مب مرتاحه ما تدري ليش .. اما المها فما اهتمت وكانت اتسولف مع نوره وساره ..

منال : هيوونه شو فييج

هيا وهي تنتبه : لا حبيبتي ما فيني شي ..

دخل أحمد الميلس وانصدم .. بس اتدارك الموقف وسلم : حيا الله بو المهااا .. اتفضل اتفضل

يلس مروان : داام فضلك ..

أحمد : كيف الحال !! وشحالهم هلك ..

مروان : طيبين طااب حالك .. انت شخبارك .. شو علومك شو الدوام

أحمد : والله كل شي بخير .. ومد لمروان فنيان القهوه ..

مروان : مشكور ..

احمد : العفو ..

مروان سكت اشوي حس بالتوتر وعقب اتكلم : والله يا بونوره جاينك اليوم انا فموضوع ..

أحمد : خير إن شاء الله تكلم ..

مروان : خير خير بإذن الله .. يا بونوره انا مقدر فضلكم علي وعلى بناتي وادري انك حاطنهم فعيونك ومعتبرهم بناتك .. وادري بعد اني متأخر فهالكلام بس انا جاينك اليوم وناوي اني اخذ البنات وياي .. اخذهم بيت ابوهم .. صح انهم ما عاشوا وياي بس الوقت يا عشان يعيشون فبيت ابوهم ..

أحمد كان مصدووم من الي يقوله مروان : كلامك حق وصحيح .. بس انا اقول لو تيلس مع المها وهيا واتشاورهم يكون احسن

مروان ما عيبه بس ما حب يبين لاحمد انه مب مهتم لراي بناته : اكييد اكييد يا بونوره وهذا الي بيحصل ..

أحمد : خلاص عيل عن اذنك انا بقولهم انك تترياهم .. وظهر .. دش الصاله وكان يبين انه وييهه متغير

عاشه : خيير إن شاء الله !!

أحمد : المها وهيا ابوكم يباكم فموضوع ..

المها بصدمه : ابوووي ؟؟؟!!!!

هيا ( كنت حاسه انه شي بيستوي )

أحمد : هيه نعم ابوج

المها وقفت بتردد وبصوت واطي : يلا هيا .. عن اذنكم

احمد وعاشه : اذنج معاج .. طلعت ووراها هيا

أحمد وهو يكلم عاشه : يقول بياخذ البنات بيته

الكل انصدم وانصدموا من ردت فعل منال والي كانت معصبه وقالت : نعممممم !!!!!!! يعني هو ما دري عنهم من 6 سنه الحين بياخذهم بيته !! مبببب على كيييفه

أحمد وبصرامه : بسسس ولااا كللممهه عييب شو هالكلام هذا ابوهم والبنات مالهم غيره ..

منال سارت فوق وهي معصبه .. ونوره وساره لحقوها ..

نوره : ساروا هزررج صدق بيسيرون !!!

ساره : اتوقع !!!

نوره : انا كنت متوقعه بعد انه ايي ابوهم بس مش الحيين

ساره : اكيييد هذا الي كان بيصصير ..

سعيييد وبصدمه : متىىى صااار هالكلااام !!!

أحمد : من اشوي .. والحين هو يكلمهم

سعييد : لاا اتخليي البناات يتحركن ليين ما اوصل اناا ..

أحمد : صااار الغالي ..

سعيد : مسافة الدرب .. فمان الله

أحمد : فمان الكريم ..

خلود : خير سعييد شو مستوي ..

سعيد وبعصبيه : مروان ياي ويبا ياخذ بناته ..

خلود : اللهم اجعله خيير ..

نش سعيد وعلى طول لبيت أحمد

والي صا فهالوقت دشت المها ووراها هيا .. من اتوفت امهم وهم ما شافوه سلمت المها علييه بجمود وهي بس اتمد اييدها اما هيا فاكتفت بانها اتقول : السلام عليكم , ويلسوا .. مروان كان ساكت مب عارف كيف يتفاهم وياهم وهو بس ينتظرونه يتكلم .. مر الوقت ومر .. كملت خمس دقايق وهم صاخين ..

مروان : يلا يلا .. ما يحتاي انطول لموا اغراضكم مروحين من هني

المها انصدمت وما عرفت شو اتقول اما هيا فقالت بعصبيه : نعممم !!! على وين إن شاء الله

مروان انصدم من ردها : على بيت ابوكم ولا عايبتنكم اليلسه فبيت الناس

المها صااخه للابد اما هيا فمستحيل تسكت : والله هذيل مب اي ناس هذا بيت خالي وانا مب سايره وياك لاي مكان

المها وبعصبيه : هيااا !!

مروان وهو معصب : صدق انج ما تستحين اناا ابووج جيه اتكلميني

هيا : والله الحين ذكرت انك ابوي .. توه الناس

نش مروان معصب من مكانه متوجه مكان ما كانوا يالسين وقفت المها بسرعه وهيا وياها والي وقفت ورا المها بخووف ..

مروان وهو معصب وواقف جدام المها : خووزي هناااك خلييني ااادبهاا ..

المها : ما يحتاي ابوييه .. وصدت على هيا : اعتذري من ابووي ..

هيا : انا ماا قلتت شي غلطط عسب اعتذر منه ..

دز مروان المها ومسك هيا من شعرها على صدمة المها ..

المها ما تدري كيف مسكت ايده تحاول تبعده عن شعر هيا : ابووويه ودرهاااا

مروان وهو يستوعب الي سواه هدها ركضت هيا لبرع ومشت المها وهي تسمع صوت ابوها الي كان يزقرها والصدمه انه يزقرها بهيا ..

المها وهي تطلع وعلى ويهها ابتسامة سخريه ( حتى ما تعرف بناتك يا ابوي هه )

دخلت هيا الصاله وهي اتصيح وعلى طول لحضن عاشه ..

عاشه : بسم الله عليييج يا امييه لا اتصييحين لا اتسويين جيييه فعمررج ..

دخلت المها بجمود وهي اتشوف اختها فحضن عاشه سارت فوق غرفتها .. ظهرت الشنطة وبدت اتحط كل اغراضها باهمال ..

هيا : خالوو ماا ابيي اسسير ويااه ماا ابيي ..

أحمد عوره قلبه علييها وطلع بهدوء للميلس ..

أحمد : خير يا مروان شو صار ..

مروان : ماشي خلهن يلمن اغراضهم

أحمد : بس البنات ما يريدن يسيرون .. خلهم على راحتهم ..

مروان : راحتهم فبيت ابوهم ..

أحمد : ما يجوز هالكلام يا بوالمها .. كل شي ينحل بالتفاهم .. ما عليه خلهم انت اليوم وانا بيلس وياهم وبكلمهم وإن شاء الله ما يصصير الا الي يرضيك ..

مروان : اسمحلي يا بونوره بس انا ياي لين هني ومب طالع الا والبنات وياي .. ويلس احمد وهو يناقشه ويحاول يكلمه .. لين ما دخل سعيد ومروان انصدم ما كان حاب انه يقابله ..

سعيد : السلام عليكم ورحمة الله ..

مروان واحمد : وعليكم السلام ..

سعيد بدون اي مقدمات وباسلوب يناقض اسلوبه المعتاد وسياسته لانه عارف هالانسان الي اسمه مروان وعارف انه التفاهم ما ينفع معاه : خير يا مروان شو صاير

مروان : ابو وياي ياخذ بناته

سعيد : والبنات متعودين على بيت خالهم وعلى اهل امهم الله يرحمها .. لا تشتتهم بعد ما كبروا ..

مروان : البنات مكانهم بيت ابوهم

سعيد : معاك حق .. لكن بيت ابوهم يوم يكون ابوهم رباهم وكبرهم وعرفهم وعرفوه مب ابو بالاسم بس .. وبناتك مب محتاجين لك ..

مروان وبدا يصرخ : انااا مالي كلاامك ويااك انت انا كلامي ويا احمد

سعيد وبنفس نبرة صوت مروان : وبليا موافقتي البنات مب ظاهرين من بيت خالهم ..

وبدا النقاش يحتد والصوت يوصل لداخل ..

هيا فزت بخووف .. وهي تركض فوق واتصييح فتحت باب الغرفه بالقو : مهاااويي بسرعههه تعالللي خاللي يتظارب مع ابوي ركضت المها ورا هيا .. وطلعت نوره ومنال وساره من الغرفة على صوت ركيض هيا والمها لين تحت .. المها وهيا ساروا الميلس ..

منال : ماما شو مستوي

عاشه بخوف : ما ادري والله يا امي .. اعتقد عمج سعيد وصل ..

نوره وهي اتشوف ساره بخوف وهم يسمعون الصريخ ..

دشت هيا ووراها المها .. وسمعوا صرخت مروان : يلا بسرعه هاتو اغراضكم وانا انتظركم فالسياره ..

سعيد : وانا قلت لك البنات ما يطلعون من هني

هيا وهي اتصيح بخوف والمها مصدومه ..

أحمد : بو سيف لا اتكبر الموضوع البنات ما عليهم بيسيرون ويا ابوهم ..

المها : هيه خالي لا اتعصب نحن ما عندنا مشكله بنسير ويا ابوي ..

سعيد وهو يصد على هيا : ها هيا تبين اتسيرين .. هيا هزت راسها بلا ..

المها شافتها بنظره وبصوت واطي : هيا لا اتسوين مشاكل ..

سعيد : بنتك ما تبا ترجع وياك

مروان : مب على كيفها .. ومشى وهو يطلع : انا فالسياره يلا بسرعه ..

المها سارت وحضنت خالها سعيد : ما علييه يا خالي لا اتضايق عمرك أنت سويت الي عليك .. ونحن فعمرنا ما بننسى وقفتكم ويانا ..

سعيد : اسمحيلي يا امي .. ما قدرت علييه ..

هيا ركضت وحضنت خالها أحمد وعقب سعيد ..

أحمد : ما علييه يا امي ان احتجتوا لاي شي كلموني ..

هيا : إن شاء الله .. وساروا يلمون اغراضهم .. ولما نزلوا البنات فتحوا مناحة حتى عاشه دمعت .. ولا وحده منهم كان تتخيل انه هاليوم بيكون صعب لهالدرجه كلهم اتعودوا على بعض سلموا على بعض وطلعوا وكل وحده خايفه من الي ياي ركبوا السياره بالم ..

نوره اتصلت فالريم اتخبرها الي صار وتتشكى ومن سكرت الريم اتصلت فشما .

فبيت ام مروان .. بيت اليدة واليوم الجمعة الكل ميتمع كالعادة لكن هالمره كان عندهم علم بأن مروان بييب بناته والي فعمرهم ما شافوهم .. ومن انفتح الباب دش مروان وسلم ..

الكل : وعليكم السلام ..

المها من سمعت الاصوات حست بالارتباك والاحراج .. اما هيا فحست بالخوف وماكانت مستعده اتقابل ناس ما اتعرفهم ..

دش مروان الصاله وهو ايأشرلهم يدخلون .. دخلت اول المها وبعدها هيا ..

كان الكل يشوفهم باستغراب ولاوحده اتجرأت ورفعت راسها الا بعد ما قال مروان .: سيروا سلموا على يدتكم .. رفعت المها راسها لصوب ما كانوا الحريم يالسين .. وشافت حرمة وشكلها كبيره فالسن فعرفت انه هذي يدتهم اتجدمت صوبها وهيا وراها وكان المكان وااايد هدوووء سلمت المها عليها وعقب هيا ..

قالت اليده : ماشاء الله انتي المها ..

هيا وبجمود : لااا ؟! أنا هياا

ثاني كان يشوف هيا والمها بصدمة ..

والمها حست انه مش من اللباقه والادب انها ما اتسلم على الي يالسين فبدت اتسلم على وحده وحده .. وبعدين سارت صوب البنات وسلمت على الكل وهيا مثلها .. يلسوا بهدوء ورجع الوضع عادي .. أما مروان فسار ويلس قريب من اخوانه الي لا المها ولا هيا سلموا عليهم لانهم ما كانوا يعرفون اذا هذيل اعمامهم او يمكن يكون حد منهم زوج وحده من عماتهم !! اذا كان عندهم عمات بالاصل ..

كانت المها ساكته وهيا مش متقبله احد للحين ..

الوعد : يا حلواات ..

المها رفعت راسها وهي مبتسمه .. وهيا بس رفعت راسها ..

الوعد : ما ودكم نتعرف ..

المها : اكيييد نبغيي ..

الوعد : وانتي يا أموره .. ( كانت اترمس هيا )

هيا حست انها طيبه وحبوبه فابتسمت وقالت : امبلا ..

الوعد : اوكي .. انا عمتكم

هيا بصدمه : هااا !!!

الوعد : هههههههههه ما اتوقعتوا يعني !

المها : لا مش جييه بس شكلج واايد صغيره ..

الوعد : لا يغرك .. انا مو واايد صغيره عمري 24 وبعد 6شهور بصير 25

المها : جددد .. وانا بعد الحين 24

الوعد : والله حلوو .. وانتي يا هيا

هيا : انا بعد باجر بدخل19

الوعد : الله يجعلها سنة خير عليك

المها : آمين ..

الوعد : منار وشفيك ساكته ..

منار: هههههه لا ولاشي ..

المها : شكلج مصدومه

منار : هيه والله ما اخبي علييج ..

المها : ما علييه ونحن بعد مصدومات بس بنتعود إن شاء الله ..

منار : إن شاء الله ..

الوعد : أسماء وغاية وشهوده اتكلموا ..

غايه : انا غايه ..

منار: هيه والله يعينكم عليها وعلى لسانها ..

هيا ابتسمت والمها : هههههههه لا ماعليه متعودين نحن

الوعد : جد !!

هيا : هييه بنت خالي جيه بعدد شكلهاا بريء بسس لسانها أعوذ بالله منه ..

الوعد ومنار وغايه : ههههههههههههههه

منار : والله هالبنية مطلعتلي قرون

المها : انتو خواات !!

غايه : لا لا هاذي مرت الاخ ..

المها : أأووه !! ماشاء الله مايبين انج معرسه

منار استحت ..

غايه : سؤال شو الشي الي يخليج تستحين

منار : مالج شغل

المها وهيا : هههههههههههههه .. وفي هاللحظه الخدامه يابت عصير

غايه التفت ورجعت اتصد : شتتت شووفي ثااني كييف يتطالع هيا شكله انعجب فييج ...

الوعد : هههههههههههههه الله يقطع بلييسك

المها : هههههههههههههه وينه هالثاني ..

منار: الي لابس تيشيرت اسود ..

هيا صدت بفضول وانصدمت لما يت عينه فعينه اما المها فكانت تشرب العصير ولما صدت شرقت فيه : كحححح كحح ..

صد ثاني بسرعه عنهم ..

الوعد : بسم الله علييك ..

المها شافت هيا الي كان مبين عليها الخوف ..

غايه : شوفييكم بسم الله جييه مصدووماات ..

المها وهي اتحاول اترقع : لا بس شكله مش غريب اعتقد شايفتنه فمكاان

الوعد : اييه يجوز الدنيا صغيره ويمكن شفتييه من قبل ..

المها : يمكن .. حست انه هيا انجلبت فحبت اتغير السالفه

المها : انزين يا غايه كم عمرج

غايه : 21

هيا والي كانت سرحانه انتبهت وقالت : 21 ؟!!!!!

المها : انتيي 21 ؟؟!!!! مستحيييل مستحيييل

منار والوعد : ههههههههههههه ..

الوعد : انت لييه كذاا كذااابه !!

غايه : واااهاهاهااهاهها كييفييي ..

المها : ههههههههههه والله صدمتيني لانه واضح انه مستحييل

غايه : اويييه استحييي

هيا ابتسمت وهي ابد مب وياهم ..

المها : شكلج 16 ولا اصغر

غايه : هههههه هيه عمري 16 ..

المها : وماعندج خواات

غايه : لا بس ماايد الحب وحمييد النحسس ..

المها ضحكت على كلمة الحب والنحس : هههههههههههههه زيين زيين ..

المها وهي اترمس غايه بصوت واطي لانها يالسه صوبها وحاولت ما تلخبط بالاسامي الي توه سمعتهم من الوعد : شهد واسماء ليش جيه بروحمهم وما يسولفون

غايه : عادي هذيل دايما جيه تلقينهم يحشون ..

المها : ههههههههه أستغفر الله ..

المها : وانتي منار ما عندج خواات واخوان

منار: امبلا عندي شهود وميمي الصغيره يالسه مع امييه .. وحمد اخويه ..

الوعد : وأسماء هي واخوها سلطان ..

غايه : هيه وسلطان ما يستوي ترمسين عنه باي كلمه

المها : ههههه وليش ؟!

الوعد : لانه غيير ..

غايه : لا غير ولاشي بس هذا حبيب عمووه

المها ابتسمت : اهااا ..

الوعد : ومن بقى .. ثاني بسس .. وبدر وبدور توم صغار بس هم دايماً مع امهم يطلعون الجمعه فما اتشوفينهم .. واختهم من ابوهم شوق ..

المها : الله حلو اسم شووق انا واايد احبه ..

شهد ولاول مره تتكلم : صدقيني ما راح اتحبين هالانسانه

منار : عييب يا شووق ..

المها استغربت ليش جيه يقولون عنها وهالشي فتح جرح قديييم من زمان نسته ( ذكرت لما ما كانوا البنات يحبونها ) حتى هيا رفعت راسها وهي تتناسى موضوع ثاني مثل ما تناسته من شهور وانتبهت على شهد لما اتكلمت ..

هيا : ويننها شووق ؟!!

غايه : هييه ما تيلس معانا الجمعه ..

المها وبفضول : طيب ليش ؟!

شهد : انسانه معقده !!

وكلهم فزوا على حس نااعم طفوولي : السلام عليكم ..

الكل رد السلام ..

شهد وهي اتكلم اسماء : لو طارين المليون احسن .. شو يابها هذي ..

حمد شافها بصدمه من بعد هاك اليوم مرتين بس شافها وما اتوقع انها تطلع اليوم .. سلمت شوق على المها وهيا ..

هيا وهي مبتسمه : اكيييد انتيي شووق

شوق ابتسمت: هيه انا شوق ..

المها : انا المها وهذي هيا

شوق : عاش من شافكم ..

هيا : عاشت ايامج ..

ومر الوقت .. لين ما الكل اتعشى .. وبعد ما الكل سار تمت هيا والمها والوعد وشوق فالصاله .. الوعد : مهاوي حبيبتي انا وانتي بنكون في غرفه وهيا وشق فغرفه اوكي

المها : الي يريحكم ..

__DEFINE_LIKE_SHARE__

MozaRashid · 04-28-2014, 10:58 PM

تابع الجزء السابع عشر

.. فالغرفه المها طرشت لزايد مسج اتخبره بالي صار وعلى طول نامت لانها كانت تعبانه .. عند هيا وشوق .. هيا وهي تنسدح على السرير شافت شوق عاطتنها ظهرها ..

هيا وبتردد : شوق !

شوق وببرود : هلا ,

هيا : صدي عندي ,,

شوق استغربت بس صدت ..

هيا : انتي متضايجه لاني وياج فالغرفه ..

شوق : ليش هالسؤال ؟!

هيا : ما ادري احسج مب مرتاحه ..

شوق : لا انا بس كنت افكر .. انج يمكن تكرهيني

هيا وباستغراب : اكرهج ؟؟؟

شوق : هييه احس الكل يكرهني وانتي بعد بتكرهيني ..

هيا : لا اتقولين جييه لا تحكمين علي وانتي ما اتعرفيني .. بعدين ليش اتقولين هالكلام .؟

شوق ببرود : تبين اتعرفين ليش اقولج جيه ؟

هيا : هييه !!

شوق : بس انتي ما اتعرفيني ؟!

هيا : صحح .. بس نقدر انكون قراب من بعض !

شوق : كييف ؟!

هيا : لازم نوثق في بعض اول !

شوق : بس انا ما اقدر اثق فيج وانا ما اعرفج !

هيا : عطيني اييدج

شوق مدت ايدها الي مسكتها هيا بالقو وقالت : اسمعيني يا شوق انا وانتي ما انعرف اشكثر بنبقى فهالمكان ويا بعض يمكن شهر او سنه او سنيين فلازم انكون واثقين من بعض على شان انعيش مع بعض ..

شوق : يعني الحين انتي تقدرين تثقين فيني ؟

هيا : هيه ؟!

شوق : كييف !

هيا : اصارحج بشي ؟!

شوق : مثل !

هيا : اناا اكررره ابوووي !! كارهه هذا المكان !

شوق وباستغراب : ابوووج !!!!

هيا: هذا مب ابوو !

شوق : هه وانا مثللج اكره الانسان الي يسمونه ابووي واكرره المكاان هذا والبيت هذا واكككره يددووه .. انساانه ظااالمه !!!

هيا : واناا مع انيي ما اعرفهاا الي انيي كرهتهااا !!

شوق : ليش ؟!

هيا ابتسمت : لانج تكرهيينها !؟ واتقولين انها ظالمه وانا وثقت فيج ومتأكده انج ما تجذبين ..

شوق ابتسمت باستغراب : اتصدقيين احسس اني ارتحت لجج اباا اعرف كل شي عنج ..

هيا : واناا بعددد !!

شوق ابسمت بحزن : يلا إن شاء الله مع الايام كل شي بنعرفه عن بعض ..

هيا : إن شاء الله ..

شوق : تصبحين على خير هيا ..

هيا : وانتي من اهله شوق ..

وكل وحده رااحت لدنياا ثانيه.. لاحلامها وبسس ..

ام عبدالله : اتزوجت من ريال طيب ورزقها الله منه بخمس اولاد وبعد ما اتوفى اتزوجت والله رزقها ببنت وحدده منه واتوفى بعد .. بنتها الوعد الي تحبهاا مووت وما ترفض لها طلب .. ظالمه احياناً .. اتحب حمد وااايد لانها ربته لين صار عمره 3 سنين لانه امه وابوه كانو مسافرين لانه ابوه كانت يتعالج علاج طبيعي بعد ما اتعرض لحادث بسبب شغله ..

عايلة عبدالله ..

عبدالله : ريال خايف ربه .. عارف دينه وطيب ربى عياله على الحب وكان انسان مسؤول وناجح

لطيفه : زوجته .. مثل ريلها خايفه ربها وطيبه اتحب عيالها واتعامل مرت ولدها باحسن طرييقه ..

ماجد : عمره 28 سنه .. طوييل وعرييض لونه يمييل للسمار .. ملامحه عاديه .. واحلى ما فيه عيونه الوسيعه .. طييب وكاان يحب مرته " منار" من هم وصغار حميد : 17 سنه خقااق وكل الي يباه يحصله يحترم اخووه ويخااف منه .. بعد طوييل وابيض وشعره اسود..

غايه : اختهم الوحيده عمرها 16.. خريشه ولسانها طويل .. قصيره ومليانه شوي لونها مثل اخوها وملامحها عاديه ..

عايله ناصر

ناصر : ريال على نياته ويحب اخوانه واايد ومستحيل يرفض لهم طلب

مرته فاطمه : متكبره ودايماً اتشوف انها احسن من غيرها.. على خلاف مع بنتها منار من وافقت على مايد لانه ريلها وافق وهي طلبت من منار ترفض الا ان منار وافقت وهذا الشي الي سبب الخلااف

حمد : اكبر عيالها عمره 27 سنه مغرور وعصبي وموته خوااته يحبهم واايد وخصوصا شهد وما يرضى بالغلط عليهم هو طوييل وابيض نظرته اغلب الاوقات حااده .. شعره دايما لتحت اذنه ..

منار : عمرها 24 سنه طييبه وما اتحب التكبر .. اتحب الخير للكل واتحب زوجها مايد واايد ومستعده اتسوي اي شي عشانه ما اتحب تصرفات اخوانها .. متوسطه الطول و وااايد ضعييفه شعرها اسود وغليييظ لنص ظهرها وهذا احلى ما فيها بيضه وعيونها متوسطه الوسع وخدودها حمر ..

شهد :.. دلووعه وشايفه عمرها .. عمرها 15 شعرها لاخر ظهرها واسود بس خفيف .. بيضه مثل اخوانها وعيونها صغيره وخدودها

حمرر ..

مريم : آخر العنقود عمرها 6 سنين دلوعه وكتوكته .. بيضه ومليانه

عايلة سالم

محمد : له هيبه والكل يحترمه .. خايف ربه وما يرضى بالغلط شاد الظهر بولده ويحترمه واايد

منيره زوجته انسانه محترمه وراقيه باسلوبها وتعاملها فري واتحب ولدها ووحيجدها واايد .. وراضيه بالي الله كتبه وانه رزقها بولد واحد

ثاني : عمره 26 سنه .. اذا حب شي لازم يملكه .. طيب لكن تصرفاته متناقضه .. ييحب الجماال واايد .. وهو جميل متوسط الطول الا انه عرييض ومعضل .. شعره قصير وناعم . مش ابيض ولا اسمر خشمه رفيع وعيونه وسعها عادي بس لونها فاتح ..

عايلة صالح

صالح : ريال مثل ما يقولون سكانه مرته مستحيل يرفض لها طلب وحالته الماديه ضعيفه والسبه طلباتها

هدى : هيه طيبه الا انها اتحب الكشخه والخقه .. اتحب انه كل الي تباه يتوفر لها واتحب عيالها

سلطان : عمره 17 سنه طيب ومأدب ما يحب يضر حدد .. شكله مناسب لعمره شعره بني .. واسمر وملامحه لايقه عليه ..

أسماء : عمرها 15 صفاتها مثل شهد ودايماً وراها ومستحيل ترفض لها طلب بيضه .. وشعرها لاخر جتفها وبني مثل شعر اخوها .. كل شي في ويهها صغير عيونها وخشمها وفمها .. جسمها عادي ..

عايلة مروان : ريال اكثر ما تهمه فلوسه .. حب مرته الا انه حب امه وفلوسه اكثر .. ما يحس بالاهتمام تجاه بناته ولا يحس بالمسؤوليه تجاهمم واكثر شي يخاف منه زعل امه وكلام الناس عليه ..

المها وهيا وذكرتهم فالبدايه ..

عايلة جمال ..

جمال : يشبه مروان واايد فالشكل والتصرفات مش مسؤول ابدا اتزوج الخدامه قبل 20 سنه ورزقة الله بشوق بعدها طلقها وسمع بعد كم سنه انها اتوفت واتزوج سلمى : تكره شووق وكل اهل جمال ما اتحب تحتك فيهم وعندها بدر وبدور توأم عمرها سنتين ..

شوق : عمرها 19 متعقدة من حياتها وتعتبر عمرها مظلومه .. تتصرف بالبرود والتجاهل والغرور ومستحيل ترضى بحد يغلط عليها .. قصييره الا انه حجسمها حلو على قصرها بيضه وشعرها اسود وقصير لفوق جتفها وقصتها لحواجبها وستريت .. شكلها طفوولي واايد وبريء عيونها متوسطة الوسع وأنفها صغير ورفيع وشفايفها صغار وفيها غمازه خفييفه فذقنها ..

الوعد : عمرها 24 سنه .. طويله وجسمها حلو .. شعرها مصبوغ بني لين نص ظهرها وكيرلي .. جمييله وجذااابه بيضه عيونها وسسيعه ولونها فاتح وأنفها متوسط الطول ورفيع وشفايفها مليانه ومحدده فيها غمازه وحده بس على كل حركه اتبين وعندها شامه على خدها اليمين.. ماخذه الجمال من صوب ابوها ..

نهاية الجزء السابع عشر، ولكم الحرية في تخيل الأحداث
__DEFINE_LIKE_SHARE__

ALMHA · 04-29-2014, 10:16 AM

السلام عليج حبيبتي الروايه روعه استمري فديتج ولا تحاولين اتوقفيها لاني بزعل 😰 هههههه استمري فديتج ونرقبج __DEFINE_LIKE_SHARE__

3la Hoonk · 04-29-2014, 07:46 PM

الباررت ططر تسسلمم ايدجج ،،

ححاليا م عندي توقعاتت و ف انتظاررجج ! __DEFINE_LIKE_SHARE__

يتيمة حبيبي · 04-29-2014, 09:18 PM

اهلن حبوبا
ولله ما اعرف شو اقول جمال وﻻ روعة من اﻻبداع الي اقراه
تسلم ايدج حبيبي

ونتريا البارت الياي في اسرع وقت
اختج يتيمة حبيبي __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
روايتي الأولى مدري ليه انت بذات حبيتك ؟!	روح مغليكـ	استراحة قصص وابداعات الاعضاء	8	01-18-2013 04:22 PM
قصة خيالية : ⌡ جلسـآت نفسيه ..~ روايتي الأولى	al-3nedh	قصص و روايات	1	07-08-2012 09:21 PM
مشاركـ : روايتي الأولى:قلبي أنا ما أستغنى عنك	أسيرة الحنان	استراحة قصص وابداعات الاعضاء	8	04-12-2012 11:48 AM
قصة خيالية : روايتي الأولى:تحياتي لمن دمر حياتي ..	حكاية عشق مجنونه	قصص و روايات	16	12-28-2011 09:41 PM