من يحبك كثر ماأحبك أنا.. - الصفحة 2

%كشخة% · #1 08-20-2008, 10:23 PM

يا الله بليز كمل بسرعة ...

الله يخليك لا تتاخر ...

*_^ __DEFINE_LIKE_SHARE__

♕ وليد الجسمي ♕ · 08-21-2008, 12:28 AM

تسلمين اختي على هالقصة بصراحة امبين عليها وااايد روعة

ربي يعطيك ألف عافية

نتريا البارت

الفصل الرابع __DEFINE_LIKE_SHARE__

Grshoob Albdoo · 08-21-2008, 10:55 AM

الجزء الرابع..

اليوم قررت غاليه تروح السيتي سنتر هي وربيعاتها الغاليات مرام وفتون عسب يشترون هدايا لمدرساتهم والبنات، لأن المدرسه قربت تخلص وبيبدون مذاكره لإمتحانات آخر السنه..
غاليه: انزين شو ناخذ لأبله جميله..؟؟
مرام: كل المدرسات خذتيلهم بسرعه ولا احترتي، اشمعنى أبله جميله..؟؟ خذيلها أي شي يالله خل ندخل السينما..
غاليه: لا والله أبله جميله غيييييييير، وباخذلها أحلى شي..
وقعدت غاليه تتمشى وتدور على الهديه بس مالقت شي..
فتون: غاليه شرايج تييبين لها صندوق كبير وتعدلينه وتشترين لها كذا شغله..
غاليه: حلوو بس شو أحط فيه..!!
مرام: أممممممم حطي شموع وورد وإخذيلها مجموعه كامله من العطور مع البودي لوشن..
غاليه: فكره حلوه، خلونا نروح باريس غاليري..
اشترت غاليه عطر جيفينشي والبودي لوشن مالته، وعطر إسكادا وجنيفير لوبيز.. ومعاهم شوية مكياج ولوشنات متنوعه، وخلتهم يغلفونها لها بطريقه حلوه..
مرام: والله هالهديه بروحها بجيمة كل الهدايا..
غاليه: أكيييييييييد هاذي أبله جميله مب أي كلام..
وطلعوا البنات يتمشون ويتفرفرون قبل لايبتدي الفيلم، وشافوا جدامهم شلة شباب يطالعون عروض الأفلام ويبون يختارون لهم فيلم.. غاليه عرفتهم على طول وراحت لهم..
غاليه: هااااااااااااااي
عبدالله: حي الله الحلوه..
ناصر: شو تسوين هني بروحج..
غاليه: منو قال بروحي معاي ربيعاتي..
عبدالله: أنا مب عايبني طلعاتج بروحج مع ربيعاتج بدون ريال..
غاليه: وإنتوا شفايدتكم رياييل.. احمونا..
عبدالله: يالله عيل تعالي ادخلي الفيلم ويانا.. بندخل فيلم كوميدي..
غاليه: لالالا تعالوا انتوا ويانا فيلم هيري بوتر..
ناصر: هذا حق اليهال مانبيه..
غاليه: تبون وإلا كيفكم ادخلوا الكوميدي بروحكم..
عبدالله: خلاص بندخل وياكم..

ناصر: أوكي بس أحمد تأخر وين سار..
فز قلب غاليه: هو وياكم..؟!!
عبدالله: ومنو غير الثنائي المرح نصور وإحمدوو مطلعيني من شغلي أونهم يغيرون لي الجو شوي..
غاليه: زين يسوون فيك..
مرام: غلووووي شوفي منو هني..
غاليه: منوووو؟؟؟؟؟
وشافت غاليه أبله جميله هي وولد وبنيه صغار معاها.. وراحت لها على طووول تسلم عليها..
أبله جميله: يالشياطين شو عندكم فالسينما اليوم..
غاليه: ههههههه نبي نطالع فيلم هيري بوتر اليديد..
أبله جميله: وأنا بعد ذبحوني إخواني علاوي ومرايم يبون يشوفونه.. فيبتهم اليوم.. مع منو يايه غاليه..
غاليه: أنا ومرام وفتون وعيال عمي..
أبله جميله يلست تتطالع الشباب واستحت من نظرات عبدالله لها، وغاليه بعد انتبهت له، غريبه عبدالله عمره ماطالع بنيه، الله لايكون انعجب فيها يالييييييييييت..
غاليه: أبله أبله خلينا ندخل مع بعض.. بخبر عيال عمي لأنهم ينتظرون واحد من ربعهم..
راحت غاليه للشباب وظربت عبدالله على كتفه..
غاليه: نزل عينك أحرجت الحرمه.. نحنا بندخل وياها السينما وانتوا انتظروا أحمد..
عبدالله: انزين بس ماقلتيلي منو هاااي..؟!!
غاليه: أبله جميله أحسن أبله بالمدرسه كلهاااا
ناصر: هيه صح امبينه الطيبه يايبه عيالها السينما..
غاليه: لالالالا.. هاذولا إخوانها هي مب متزوجه..
ودخلت غاليه السينما هي ومعلمتها وربيعاتها، وبعد عشر دقايق دخل عبدالله وناصر ومعاهم أحمد وواحد صغير على كرسي متحرك، غاليه قالت هذا أكيييد حمدان أخو أحمد فديته الله يشفيه يارب..
الشباب يلسوا على نفس السايد مع البنات، وعبدالله مب عارف شو الي استواله، اختبص فووق تحت وقلبه يدق طبووول، عمره ماحس بهالإحساس إلا يوم حب غدير وظل يحبها سنين طويله على أمل إنه يكون نفسه ويخطبها، بس للأسف انخطبت وماتت كل أحلامه..
ناصر حس بعبدالله بس ماتدخل ولاحب إنه يتكلم معاه الحين، قال خل نأجل الموضوع لبعدين..
وبعد ساعتين خلص الفيلم وطلعوا لبرع والبنات يلسوا يودعون أبلتهم والشباب واقفين قريب منهم يسولفون..
عبدالله: حمدان عيبك الفيلم..؟؟
حمدان: هيه وااااايد حلو كل يوم بيي وبشوفه.
ناصر: والله كان ممل لو ما الوجوه الحسنه الي كانت داخل، وإلا اشرايك ياعبدالله..
عبدالله ارتبك وكلهم يلسوا يضحكون عليه، وياتهم غاليه ومعاها البنات..
غاليه: هلا هلا بحمدان العسل..
حمدان: انتي تعرفيني..!!
غاليه: أكييييييد أعرفك، تعال بسير بشتريلك أيسكريم..
أحمد: لا غاليه بروحه مريض والوالده منبهتني ما أعطيه أيسكريم.
غاليه: أوكي عيل بنشتري حلويات وكاكاو..
حمدان: انزين، عندك اعتراض بابا أحمد..
أحمد: ههههههه لا سير وأنا بتمشى مع ربعي..
تمشوا البنات والشباب وخلصوا حواطه وردوا بيوتهم وعبدالله مب عارف شو صار له من شاف جميله، وغاليه مستانسه من طيبة أحمد وحنانه على أخوه..

باجي أسبوع على عيد ميلاد غاليه، وهي مرتبشه وااااايد.. ومحتاره وين تسوي الحفله.. فالبيت أو فالبيتزا أو أي مكان ثاني.. بس آخر شي استقرت على البيت لأنها ناويه على مخططات شريره..
قررت تسوي حفلتها وتعزم كل ربيعاتها وبنات العيله وحفلتهم تكون في السرداب.. وبعد بتعزم شباب العيله واكيييد أحمد وبتخليهم فالحديقه أو الميلس.. المهم إنها بتحاول تعزم أبله جميله وتجمعها مع عبدالله..
غاليه متعوده ترتيباتها للحفلات تكون غير.. لأنها تحب التميز وتحب الكل يرمس عن حفلتها باليوم الثاني.. فقررت هالمره تسوي شي سبيشل ويديد..
تعاقدت مع شركة تنظيم للحفلات عسب ينظمون لها السرداب بطريقه حلوه.. فحطت مكان للبوفيه وطاولات وكراسي.. ومساحه بالوسط تكون فاضيه.. وكل الديكورات والكراسي باللون الوردي الي هو لونها المفضل..
وعقب رتبت للمكان الفاضي بالوسط وسوته بشكل دائري، وزينته بالورد.. وبالوسط حطت طاوله وبتحط عليها الكيكه بطبقات على شكل شجره مثل كيك الأعراس.. وكيكه كبييييييييره عليها صورتها.. وطبعا اهم شي فالحفلات الموسيقى.. هي متعوده على الدي جي.. بس هالمره استأجرت فرقه مع مطربتها عسب تحيي لها حفلتها.. وأبوها ما إعترض على أي شي سوالها الي تبيه وأكثر بعد..
قعدت غاليه يومين تقنع أبله جميله إنها تحظر الحفله.. وأخييييييييرا اقتنعت بس بشرط إنها ماتطول بالحفله..
قبل الحفله بيومين راحت غاليه للشركه، وكان الوقت العصر، يلست عند أبوها شوي وعزمت محامي أبوها خالد على حفلتها هو وإخواته.. ونزلت تدور ناصر وأحمد..
ناصر: غاليه سمعت بتييبن فرقه في حفلتج..!!!!!!!
غاليه: منو الي قالك..؟؟ أكيد شروق الدبه والله بذبحها، تلاقيها خبرت المدرسه كلها بالسالفه.. وهذا وأنا موصيتها....
ناصر: هدي بالج مب شروق، والله إني لا أكلمها ولاشي.. بس أمس أبوج طلب مني إني احجز لج الفرقه..
غاليه: اهاااااااا.. وطبعا انتوا بعد معزومين..
أحمد: أنا اسمحيلي بيكون شكلي غلط بينكم.. لأني مب من العيله..
غاليه وهي تقلد صوته: شكلي غلط من بينكم.. أحمد شو فيك انت بتيلس مع الشباب في الميلس بعيد عنا..
ناصر: خل عنك عاد بمر عليك وبنروح مع بعض، السالفه فيها عشا ببلاش وكيك يالأهبل..
غاليه: ههههههههههههههههه
أحمد: دام السالفه فيها كيك أبشري بسعدج يابنت الأجاويد..
غاليه: هههههههههه ميانين.. خلاص بخليكم بسير السوق الحين بكمل كم من شغله..
ناصر: سؤال يراودني..
غاليه: أوهووووو شو عندك بعد..
ناصر: انتي حفلاتج جي تسوينها، باجر عرسج كيف بيكون..؟!!!
غاليه: من حكايات ألف ليله وليله.. باااااااااي
طلعت غاليه عنهم وراحت تكمل مشواريها بس قبل لاتطلع من الشركه مرت على مكتب ولد عمها عبدالله وشافته غرقان فالشغل..
غاليه: احم احم
عبدالله رفع راسه وابتسم: حي الله بنور الدنيا..
غاليه: الله يحييك ياولد عمي.. شخبارك عساني ماخربت عليك شغلك..
عبدالله: أفا عليج كل يوم تعالي وخربي شغلي، ليش انا كل يوم بشوف هالويه الحلووو..
غاليه: ههههههه انزين انا كنت ماره أأكد عليك تحظر عزيمتي عقب باجر.. وإلا بزعل عليك..
عبدالله: الله يهداج حفلة يهال شو يوديني.. وانا الشيب تارس راسي..
غاليه: انزين عيال عمامي وعموه كلهم هناك، وبتكونون بروحكم..
عبدالله: يعني الحين هالشيف إغراءات.. تراني أشوفهم كل يوم هني بالشركه..
غاليه: أمممممم برايك.. انت الخسران.. أنا غلطانه ظيعت وقتي وياك..
عبدالله: هههههههه أونج عاد تحسسيني بالذنب..
غاليه وهي عاطيته ظهرها بتطلع: لا بس حليلني عزمت أبله جميله وانت تقولي حفلة يهال..

وطلعت وعبدالله ركض وراها..
عبدالله: غاليه غاليه.. هي بتحظر..
غاليه: وانت شو يهمك دامك مب حاظر الحفله.. تشاااااااااو
عبدالله: والله بحظر بس إوقفي كلميني..
غاليه: هههههههههههه هيه بتحظر.. وياليتك تسويلك شوية برستيج ولاتفشلنا مثل هاذاك اليوم فالسينما.. هههههههههه
وراحت غاليه وهي تضحك وناصر كان توه واصل وسمع آخر الكلام..
ناصر: هااااااا أقنعتك..
عبدالله: هيه..
ناصر: هيه وإلا أبله جميله.. ههههههههههههههه
عبدالله سحب ناصر من يده: إدخل خل نرمس داخل فشلتنا تراك..
دخل ناصر ويلس على المكتب: أقولك ترا البنيه حلوه وتستاهلك، وغاليه وايد تمدح فيها..
عبدالله: ناصر..............
ناصر: قول تكلم إنطق.. والله عذبتنا سنين وانت ساكت.. حرام عليك ارحم نفسك وأهلك..
عبدالله: البنيه وايد عايبتني بس أحس إني يمكن متسرع بقراري..
ناصر: عبدالله عمرك فوق الخمسه وثلاثين.. وتقولي متسرع، عبدالعزيز جريب بيعرس.. وعمر أسمعه يزن على أمه يبي يخطب، وأنا جريب بخطب.. وحميد أخوي الي هو أصغر منك بعشر سنين متزوج وعنده بنوته، وانت تقولي متسرع..
عبدالله: بس يمكن هي ترفضني..!!!!!!
ناصر: نحنا بنجرب وبنشوف حظك.. أو بنخلي غاليه تجس النبض عسب مانتفشل ونخطب رسمي..
عبدالله: أوكي بعد حفلة غاليه بنتفاهم..
ناصر: خلاص عيل أنا بسير مكتبي وبشوفك آخر الدوام.. __DEFINE_LIKE_SHARE__

Grshoob Albdoo · 08-21-2008, 10:58 AM

اليوم الجمعة موعد حفلة غاليه، كل شي جاهز وعلى أصوله، الأكل الفرقه.. وكل شي جاهز.. أم غاليه لابسه جلابيه ورديه ومتعدله ويالسه تنظم الحفله.. وفجر عمة غاليه لابسه بدله كويتيه ورديه وفاتحه شعرها وشكلها رووووعه.. الكل كان تحت ينظمون المكان ويجهزون أنفسهم للحفله.. بس وينها نجمة الحفله غاليه المنصوري..؟؟!!!!!!
غاليه كانت بغرفتها، توها يايه من الصالون ومسويه شعرها القصير رولات ومسويه ميك أب حلوووو.. ومحطيه إكسسوارات ورديه بشعرها.. وراشه رشه بعد ورديه.. وبدت تلبس بدلتها كانت شاريه تنوره فرنسيه قصيره لتحت الركبه بشوي ورديه طبعا.. والبودي أبيض على وردي.. ولابسه بوت طويييل لفوق الركبه عسب يغطي ريولها لأن إحتمال تطلع تسلم على عيال عمها.. وأكيد أكيد البوت لونه وردي..
دخلت فجر على بنت أخوها عسب تستعيلها لأن ربيعاتها قربن يوصلن..
فجر: يالله حبيبي تعالي ربيعاتج الحين بيوصلن..
وقعدت فجر تتطالع غاليه: ماشاءالله عليج ياغاليه ولا سندريلا بزمانها..
غاليه: صج عموها حلووو لبسي وشكلي..
فجر: إلا عذاااااب.. يابختج بهالحلاه كلها..
غاليه: إالي يسمعج يقول إنج مب حلوه، أصلا أنا ماخذه الحلا كله منج ياعموووه..
فجر: إنزين يالله إنزلي.. الكل ينتظرج..
غاليه أخذت الإسكارف الوردي عسب تلبسه لو شافت حد من عيال عمها.. ونزلت مع عمتها وأول مادشت السرداب الكل التفت لها من أمها وينات عمها وعمتها والكل منبهر من جمالها..
ميعاد: ماشاءالله عليج..
شروق: رهيييييييييييبه..
أم غاليه: لاإله إلا الله.. الله يحفظج ياغاليه..
ميعاد: غلووووي تراني من من الحينه أقولج لاتحظرين عرسي بتصكين علي..
غاليه: هههههههههههه بحظره وبرقص وباكل وبسوي كل شي..
ويلسوا البنات يضحكون وهم مستانسين، ووصلوا ربيعات غاليه واحتشرت الدنيا بالغنى والرقص.. والفرقه كانت روعه تدق بطريقه حلوه والكل مرتبش..
وعند الشباب الكل كان يالس ويسولفون..
خليفه: نحنا بعد نبا نسير عندهم نرقص ونرتبش هاي بنت عمنا..
أبوعبدالله: سود الله مذهبك من ولد، تبا تقعد بين البنات بعد..
ناصر: ههههههههه لا عمي هو بس يبي يرقم كم بنيه..
خليفه: هيه صح قصدي شريف، ما أبا كل البنات، بس عشر وإلا خمسة عشر بينه..
عبدالله: ههههههههه إنت بسألك ماشبعت من البنات والمغازل..
خليفه: البنات أحلى شي بالدنيا..
عمر: لاتحاول معاه هذا طول عمره راعي بنات الله يعين حرمته إلين خذاها..
خليفه: ومنو قالك إني بعرس.. العرس خله لك ولعزوز ونصور..
أبو غاليه: قوموا نتعشى أبرك لنا من خلوف وسوالفه..
قاموا الشباب يتعشون وهم يسمعون أصوت الغنا.. وعند البنات الجو ولا أحلى.. وغاليه وربيعاتها يرقصون ويغنون مع المطربه، ووصلت أبله جميله ويلست على طرف بروحها وراحت عندها فجر..
فجر: حي الله من يانا نورتي البيت..
جميله: النور نورج.. إنتي أخت غاليه..؟؟؟
فجر: لا أنا عمتها غاليه ماعندها لا إخوان ولا إخوات..
جميله: وأنا أقول يايبه هالدلع كله من وين.. طلعت وحيده أهلها..
فجر: هههههههههههه شكلج كبيره ومب ربيعتهم..
جميله: لا أنا معلمتها بالمدرسه، وشكلي المدرسه الوحيده المعزومه..
فجر: أكيد إنتي أبله جميله، صكت راسي غاليه بالسوالف عنج..
جميله: هههههههههه حليلها غاليه..

فجر: بسير بناديها لج..
راحت فجر وجميله يلست تتطالع المكان شكلهم عيال عز ومرتاحين.. رجعت فجر ومعاها غاليه الي استانست يوم شافت أبلتها..
غاليه: أبله انا وااايد واااايد مستانسه إنج ييتي اليوم..
أبله جميله: انا أقدر أزعل بنتي الصغيره.. الحينه خذي هديتج وانا بروح لأني مخليه امي وإخواني الصغار بالبيت..
غاليه: لا أبله تو الناس..
جميله: لا حبيبتي خليها مره ثانيه..
غاليه: عيل أبله تعالي بحط لج عشا وكيك..
جميله: لالا غاليه ماله داعي..
فجر: لا.. لازم.. عيل توصلين هني ولاتتعشين وبعد ماتاخذين شي.. غاليه انا بسير المطبخ وبحط لها لعشا..
غاليه: لالا عموه انا بوديها وبخليها تشوف بيتنا بالمره..
راحت غاليه ووراها جميله، ووقفت جميله بالصاله الكبييييره وغاليه سارت عنها المطبخ.. جميله وايد مستغربه من هالبيت الكبير الي مايسكنه غير غاليه وامها وأبوها.. أبله جميله أهلها ناس فقرا وعلى قد حالهم وهي الي تصرف عليهم من راتبها بعد وفاة أبوها..
وصلت غاليه وقطعت على أبلتها أفكارها..
غاليه: أبله قعدي ليش واقفه..؟؟
جميله: غاليه بدلتج وااايد حلوه من وين ماخذتها..؟؟
غاليه: هاي طالبينها من برع، انا وعمتي نشوف الموديلات الي تعيبنا بالنت ونسوي عليها طلبيه من الشركه نفسها عسب محد يقص علينا.. وهاي البدله ماخذتنها من بريطانيا..
أبله جميله: الله يهينج يارب..
غاليه: أبله قعدي الحين الخدامه بتييب الأكل..
جميله: أنا وايد تأخرت..
غاليه: لالا أبله أنا بروح أستعيلهم..
راحت غاليه لميلس الرياييل ونادت على عبدالله الي استغرب منها..
عبدالله: إنتي مودره الحفله ويايتني ليش..!!!
غاليه: أممممممم عبدالله تعال ساعدني وشيل وياي أغراض..

عبدالله: شو شايفتني حمال..
غاليه بدلع: حراااام عبدالله أبله جميله ماتقدر تشيل الأجياس بروحها..
عبدالله من سمع الإسم على طول مشى ورا غاليه من غير تفكير.. ودخل الصاله وشاف جميله يالسه هناك وتتطالع الديكورات..
عبدالله: احم احم
أبله جميله فزت من مكانها وهي مرتبكه هذا شو يسوي هني ووينها غاليه..!!
عبدالله وهو حده مرتبك: غاليه قالت لي أشيل.. أشيل عنج الأغراض، غاليه وينج..!!
طلعت لهم غاليه: أنا هني.. ليندا حطي الأغراض هني..
أبله جميله: غاليه وليش مكلفه على الريال أنا بشيلهم..
غاليه: إنتي تتحرين بس هاي الصينيه اصبري ياينج الخير..
أبله جميله: وليش كل هذا..؟؟ الله يهداج بس..
غاليه: أفااا عليج كم أبله جميله عندي..
أبله جميله: والله بشتاق لج يوم بتتخرجين..
غاليه: هههههههههه أدري.. يالله عبدالله شيل الأغراض للسياره..
عبدالله: إنزين بدق لناصر بروحي مابقدر..
غاليه: أنا بدق له انت روح السياره وأبله جميله بدليك..
جميله وعبدالله حسوا بالحركه الي تبي تسويها غاليه، إنها تبي تجمعهم... بس هم الإثنين وايد يستحون.. جميله عمرها ماكلمت ريال غريب وعبدلله أخس عنها مايكلم إلا بنات العيله.. راح للسياره معاها ورجع وهو سااااكت.. أبله جميه تمت واقفه عند الباب تنتظر غاليه..
غاليه نادت ناصر الي سحب وراه أحمد ويلسوا ينقلون الأغراض ورا عبدالله.. بس أحمد عينه زايغه على غاليه ولا وده يروح..
أحمد حصل له فرصه يوم راح ناصر للسياره هو وعبدالله..
أحمد: يالله ياغاليه شو هالحلاه..
غاليه منزله راسها ومستحيه: أحمد خلاص روح..
أحمد: احم إنزين ارفعي راسج شوي..
بس غاليه تمت منزله راسها بالأرض..
أحمد: انزين شيلي شيلتج بخاطري أشوف شعرج..
غاليه: قسما بالله لو مارحت الحين...
أحمد: ههههههه خلاص خلاص بسير بس.... أحبج
غاليه ركضت على المطبخ وويها أحمررررر.. شوي وطلعت برع تودع جميله.. راحت أبله جميله ويات غاليه تبا ترد للحفله بس شافت عبدالله واقف يطالعها فراحت له..
عبدالله: حركتج وااااايد مكشوفه، وأحرجتي الحرمه..
غاليه: ههههههههههههه
عبدالله: تعتقدين وحده مثلها بترضى فيني..؟!!!!!!
غاليه: وليش لأ..!! انت مب ناقصك شي..
عبدالله: أممممممم خلاص برايج سيري لحفلتج وبعدين بنتفاهم..
رجعت غاليه للحفله وكملت سهرتها مع البنات وهي حدها مستانسه، وليش ماتستانس.. أحمد ومرتاحه وياه.. وأبلتها الغاليه بترتبط بولد عمها.. بس ياغاليه تعتقدين الأيام بتضحك لج على طوووول..!!!!!!!
يلست غاليه ترقص بين ربيعاتها وهي حاسه بروحها أسعد وحده فالدنيا.. بس فجأة كل الفرح الي عاشته راح بغمضة عين، وحست بألم يقطع صدرها.. قلبها.. قلبها يعورها بقووو.. وحاولت تمسك بأقرب شي لها بس ما إقدرت.. وطاحت على الأرض بين ربيعاتها وفي وسط حفلتها الي تعبت إلين سوتها..

والسموووووووحه لأني تأخرت..

ويارب تعيبكم .. البارت اليديد..

وأنتظر ردودكم الغاليه علي..

خويكم (غرشوب البدو ) __DEFINE_LIKE_SHARE__

Grshoob Albdoo · 08-21-2008, 11:13 AM

الفصل الخامس..
في المستشفى الجو كان كئييييييب بعد مانقلوا غاليه له.. أبوها القوي الي عمره ما تأثر بأي شي واقف عند باب غرفة الدكتور وينتظره يظهر له ويطمنه وهو مب قادر يخفي الألم الي بان على ويهه..
وأم غاليه أخس عنه مب قادره تمسك دموعها.. بنتها وأغلى شي بحياتها مب عارفه تساعدها..
أبوغاليه مارضى أي أحد من الموجودين بالحفله يروح معاهم المستشفى غير فجر وناصر.. وربيعاتها راحوا على بيوتهم وأهلها يلسوا ينتظرون أي خبر عن غاليه.. وبعد نص ساعه طلع لهم الدكتور وهو يضحك..
أبوغاليه: بشر عسى الله يبشرك بالجنه..
الدكتور راشد: هههههههه انت عندك بنيه مثل العسل..
أم غاليه: دكتور شو فيك بنتي مريضه وانت تضحك..
الدكتور راشد: دلع بنات يا أختي.. وبصراحه البنيه مثل الغزال مافيها شي..
أبوغاليه: أقدر أدخل عليها..
الدكتور: هيه عادي.. وكلها ساعتين وبنظهرها..
دخل أبوغاليه وأمها وفجر وناصر وشافوا غاليه يالسه تسولف مع النيرس وهي تضحك ولا كأنها كانت مريضه..
غاليه: بابا تعال إسمع آخر نكته.. ههههههههه
أم غاليه تلوي على بنتها: حبيبتي غاليه اشحالج غناتي..
أبوغاليه: انتي بخير حبيبتي.. أحسن الحين..
غاليه: عادي بابا مثل كل مره أطيح وأقوم مثل الغزال.. ههههههههه
فجر: الله يخس إبليسج نحنا ميتين من الخوف عليج، وإنتي تضحكين..
ناصر: حمدلله على سلامتج يابنت عمي..
غاليه: الله يسلمك.. حرام اختربت حفلتي..
أبوغاليه: تفداج يانظر عيني.. المهم صحتج، وكم مره قلت لج لاتجهدين نفسج.. كله ولاتعبج.. انتي تعرفين قلبج مايتحمل..
غاليه: بابا أنا أعرف إنه قلبي ضعيف، بس مايمنع إني أستانس بحياتي.. أنا عشت 18 سنه مع المرض، وبكمل المية إنشاءالله بعد وبربي عيالي وعيال عيالي بعد..
أبوغاليه حط يده على قلبه وحظن بنته.. وفجر وناصر اطلعوا برع لأن النيرس تبي تسويلها شوية تحاليل.. وبعد ساعه إلا ربع طلعت غاليه من المستشفى..
فالبيت الكل كان يالس ينتظر وصول غاليه بعد ماتطمنوا عليها، عبدالعزيز يالس حذال ميعاد ويسولف وياها.. والكل يالسين ويسولفون.. حتى أحمد مارضى يروح إلين يطمن عليها..
عبدالعزيز: ميعاد شو فيها لو تزوجنا وكملتي دراستج..؟؟
ميعاد: تو الناس عزيز، أبا أخلص دراستي وبخاطري أشتغل و..
عبدالعزيز: تقدرين تسوين كل هذا ونحن متزوجين، أنا انسان متحظر ومب مانعنج عن الشغل..
ميعاد: بصراحه أخاف أحمل ويأخرني الحمل والبيبي عن كل شي..
عبدالعزيز: الي الله كاتبه بيصير.. بس ياميعاد انتي تعرفين كم عمري، خلاص مب باجي شي عن الثلاثين، وأبا أكون وياج من الحين وأعيش وياج باجي عمري.. وعيالي أبا أربيهم وأنا بعز شبابي..
ميعاد: عزيز باجي سنتين وبخلص دراسه وبعدها.....
عبدالعزيز: ميعاد سكري على الموضوع..
ميعاد: عزيز زعلت..!!
عبدالعزيز:ما أعتقد يهمج زعلي، الي براسج بتسوينه، وأنا إنسان أبا أتزوج وأصون نفسي.. ولو ماتبين برايج..
ميعاد: شو قصدك..؟!!!!!
عبدالعزيز: قصدي أبا الملجه الأسبوع الياي، وبعد شهرين أو ثلاثه بالكثير العرس..
ميعاد: ولو أنا رفضت..؟؟؟
عبدالعزيز: بدال العروس بلقى عشر..
وقام عبدالعزيز وخلى ميعاد مصدووومه من الي قاله، معقوله يتركني ويدور على غيري..!!!!!!!
وفي هالوقت وصلت غاليه.. الكل قام لها يهنونها السلامه، الي تحظنها والي تبوسها والي تصيح..
غاليه: بس بس عرفتكم تحبوني.. ههههههههههه حرام اختربت حفلتي..

عبدالعزيز: تفداج يابنت عمي المهم وجودج من بينا..

السموحه خويكم( غرشوب البدو) __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
قلبي يحبك وانت تدري بذلك’ عندك خبر انه يحبك ويهواك ~ new ; ฬđήч Łқ	~ Ƙяạzyo❥	عدسة الاعضاء , كاميرا الاعضاء	7	03-26-2010 10:38 PM
من كثر ماأحبك يقولون مسحور ..!!	محروم.كوم	منتدى أخبار المواقع والمنتديات العربية والأجنبية	0	12-24-2009 12:30 AM
من كثر ماأحبك يقولون مسحور ..!!	محروم.كوم	منتدى أخبار المواقع والمنتديات العربية والأجنبية	0	12-24-2009 12:20 AM
من يحبك.....	دلوعة باباتي	شعر و خواطر	14	03-17-2009 01:37 AM
لا تطلب من احد ان يحبك بل اجعله يحبك	شواقي العين	الإستراحه العامة	12	04-05-2008 08:40 PM