من يحبك كثر ماأحبك أنا..

Grshoob Albdoo · #1 08-20-2008, 01:41 AM

السلام عليكم ورحمة الله وبركاته
اليوم حبيت أنزل لكم أجدد روايات اختي التوم مني (ظنون ).. وهي من يحبك كثر ماأحبك أنا..
قصه إجتماعيه من تأليفها .. حبيت أعرض فيها العديد من القضايا والحكايات

الي تحصل في مجتمعاتنا.. وطبعا أتمنى ألقى تفاعل وتجاوب وردوود من أحلى أعضاء..

والحين أتركم مع أول جزء من أجزاء قصة اختي
وبطلتها ((غاليه))..

الجزء الأول..

داخل بيت أنيق وجميل.. تعيش أسره هادية وحنونه.. هو مب بيت بمعنى الكلمه.. هو قصر فخم يملكه التاجر العود منصور المنصوري.. تاجر كبير في دبي له تجارة واسعه في مجال السيارات والمقاولات والبورصه والأسهم.. وأشياء ثانيه كثيره تجعله من أغنياء البلاد.. هو مشهور بشدته ورزانته.. وزوجته فاطمه المنصوري الي هي بنت عمه من أطيب الناس الي ممكن نقابلهم.. ربة بيت محترمه وطيبه، كانت مديره على مدرسة البنات بس تقاعدت وتفرغت لبيتها..
فجأة الهدوء الي سكن البيت تبخر.. والطمأنينه الي عمته طارت.. تدرون ليش.. السبب بسيط.. غالية..
غاليه هي البنيه الوحيده لمنصور.. ومدلعنها لآخر درجه، غاليه عمرها 18 سنه وبآخر سنه بالثانويه.. بنيه قمه في الجمال والأخلاق.. بيضا تقولون بياض الثلج.. ويها مدور مثل القمر، وشعرها أسود فاحم ودايما تقصه، ماتحب الشعر الطويل..
دخلت غاليه مثل الصاروخ للبيت.. توها واصله من المدرسه..
غاليه: ماما.. ماما يوعاااااانه..
أم غاليه: تعالي أنا هني بالصاله، بسج من الصراخ..
ركضت غاليه وباست أمها على راسها..
غاليه: يالله أبا غدا.. والله تعبانه فيني رقاد..
أم غاليه: هههههه يالمصرقعه.. صبري أبوج في مكتبه بيخلص شغله وبيتغدا معانا و..
غاليه: أبوي هني..!!
وتركض على مكتب أبوها، وأمها تصرخ عليها..
أم غاليه: تعالي لاتسيرين أبوج عنده ضيف..
بس غاليه وصلت للمكتب ولاسمعت شي من الي قالته أمها.. وفتحت الباب بسرعه وهي تبا تنادي على أبوها بس انصدمت بالريال الي يالس مع أبوها وانحبست الصرخه بحلجها..
وتمت تتطالع الريال الي مع أبوها، شكله مب وايد عود يمكن على نهاية العشرينات، حنطاوي وملامحه وسيمه..
أبو غاليه: غلاية حبيبتي تعالي دشي.. ليش واقفه عند الباب..!!
غاليه دخلت وهي مرتبكه: سوري بابا ماكنت أعرف في أحد وياك..
أبو غاليه: لافديتج دشي عادي، تعالي بعرفج على المحامي اليديد..
وقفت غاليه بجنب أبوها وهي مستحيه، وتتطالع الريال وقلبها يدق..
أبو غاليه: أعرفك ياخالد على بنتي ووحيدتي غاليه الحلوه.. وهذا خالد الخيلي محامي اليديد بالشغل..
غاليه: اهلين.. تشرفنا.. بابا بس كان عندك شريك اسمه فهد الخيلي..!!
أبو غاليه: صح.. بس مايخصه فيه، خالد أخذ الدكتوراه من أمريكا والحينه ياي يكمل مشواره بالشغل في البلاد..
غاليه: انزين أنا يوعانه ماتبون غدا..؟؟
خالد: خلاص ياعمي أنا بسير وانتقابل العصر بالشركه انشاءلله..
أبو غاليه: ايلس تغدا ويانا ياخالد..
خالد: مشكور ياعمي، بس الوالده مستحيل تاكل بدوني..
أبو غاليه: الله يخليها لك.. خلاص عيل لقانا بالليل..
طلع خالد ووراه منصور وبنته، وغاليه مب عارفه شو الي صار لها من شافته، سلم خالد عليهم وروح على بيته.. غاليه على طول تتطالع من الدريشه تبا تشوف نوع سيارته..
أم غاليه: شو عندج..؟؟
غاليه: ماما عنده رنج سبورت عذاااااااب..
أم غاليه: سيري غرفتج بدلي ثيابج بدل هالخرابيط..
غاليه: وااااااافضيحتي..
أم غاليه: بسم الله شوفيج..!!
غاليه: شافني بثياب المدرسه، ليش ماقلتيلي إنه بابا عنده ريال؟؟
أم غاليه: انا قلت لج، بس انتي مثل الصاروخ طرتي..
غاليه: هذا مب عذر..
وركضت على غرفتها زعلانه، دخل بوغاليه..
أبو غاليه: يالله وين الغدا.. ووينها غلايه..؟؟
أم غاليه: دخلت غرفتها معصبه علي ليش خليتها تدخل عليكم وهي بملابس المدرسه..
أبو غاليه: أنا بسير براضيها، وانتوا حطوا الغدا..
راح بو غاليه يراضي دلوعته الي مايقدر على زعلها.. دق الباب ودخل لقاها يالسه على السرير وتتطالع من الدريشه..
أبو غاليه: ليش حبيبتي زعلانه..؟؟
غاليه: بابا..!! تعال ادخل..
دخل بوغاليه ويلس على السرير جنب بنته وقامت هي وحطت راسها على ريوله ونامت..
غاليه: امممم بابا.. أول مره أشوفك تتعامل مع الشباب، العاده كله مع الشياب..!!
أبو غاليه: أنا كنت أعرف أبوه قبل، ويوم تعرفت عليه حبيت أجرب الشغل وياه، وماشاءلله عليه ذكي وشاطر..
غاليه: انزين.. هومتزوج..؟؟
أبو غاليه: لا مب متزوج.. أبوه عيز وهو يقوله تزوج، بس هو مب راضي يكمل نص دينه..
غاليه: أهااا.. انزين بابا يالله نروح نتغدا..
طلعت غاليه هي وأبوها وراحوا يتغدون، وغاليه كل فكرها مع خالد..
بعد الغدا طلعت غاليه غرفتها ترتاح، بس لازم قبل الرقاد تدخل النت شوي وتلعب عليهم.. فتحت المسن ولقت إضافه من شخص غريب.. قالت يالله خل نلعب عليه شوي..
غالية أبوها: هاي..
مزيون بوظبي: هاييين.. شحالج..
غالية أبوها: بخير ربي يعافيك.. عفوا منو وياي..!!
مزيون بوظبي: أممممم واحد ويبا يتعرف..
غالية أبوها: وشو اسمك يالواحد..؟؟
مزيون بوظبي: أحمد من العين..
غالية أبوها: والنعم والله..
مزيون بوظبي: والشيخه شو اسمها..
غالية أبوها: معاك جنان من بوظبي..
مزيون بوظبي: حي الله اهل بوظبي، وايد حلو اسمج..
غالية أبوها: عيبك..؟؟
مزيون بوظبي: إلا ذبحني ذبح..
غالية أبوها: تصدق وايد ارتحت لك.. ممكن نصير ربع اوكي..
مزيون بوظبي: ياليت والله.. بس ماقلتيلي كم عمرج..؟؟
غالية أبوها: عمري 22 سنه..
مزيون بوظبي: العمر كله يارب.. وأنا عمري 25 سنه..
غالية أبوها: العمر كله، خلاص أحمد أنا بظهر وبرد ادش بالليل..
مزيون بوظبي: اوكي خلاص بنتظرج بالليل..
غالية أبوها: بااااااااي
مزيون بوظبي: باااااي
بندت غاليه وهي مستانسه في حد يديد تلعب عليه، تموت على اللعب والمصخره على الشباب.. وحطت راسها على المخده ونامت..
**__**__**__**__**

بعد يومين غاليه راحت السوق مع صديقاتها فتون ومرام، هم اعز صديقاتها من الصغر وهم مع بعض، في اللعب والسوالف والمذاكره.. طول الوقت مع بعض.. أبو فتون يشتغل موظف عند أبو غاليه، وأبو مرام بعد بس تقاعد من سنتين..
مرام: غاليه بتتسوقين وبعدين ندش السينما احسن..
غاليه: ما ادري.. انتوا شو رايكم..!!
مرام: انا من رايي ندخل السينما ويوم بنظهر نتسوق..
راحوا البنات السينما.. وقبل لايدخلون شافوا مجموعة شباب واقفين يطالعونهم..
فتون: غاليه.. شوفي شوفي.. هاذاك مب جاسم..؟؟
غاليه: منو جاسم..!!
فتون: ولد عمج..
غاليه: هيه صح.. شو الي يايبنه هني..؟؟ ومعاه بدر.. خسه الله الحينه بيقعد يتلصق بنا..
مرام: منو بدر..
غاليه: بدووور ماتذكرينه، الي يشتغل عند بابا وطول الوقت عيونه زايغه..
مرام: هيه تذكرته..( ومرام بداخلها كل الناس يتلزقون بج وعيونهم ماتشوف غيرج.. ياحظج على بيزات أبوج..)
فتون: غاليه بلييييييز عرفيني على جاسم.. شكله حلوو..
غاليه: انزين.. بس لو كلمنا.. انا مب رايحة له..
جاسم انتبه لهم وراح يسلم على غاليه..
غاليه: هلا بجاسم.. شخبارك..؟؟
جاسم: بخير الحمدلله.. شو تسوون هني..؟؟
غاليه: يايه مع ربيعاتي فتون ومرام.. وانت...؟؟
جاسم: انا ياي أتمشى مع ربعي.. وبندخل السينما..
فتون: والله..؟؟ نحنا بعد بندخل فيلم اكشن..
جاسم: أكيد توم كروز.. أدريبها بنت عمي تموت فيه..
غاليه: ههههههههه خلاص عيل اقعد قريب منا..
جاسم: إلا قولي بقعد وياكم، ويوم بيخلص الفيلم برد لربعي..
دخلوا الشباب والبنات السينما.. وجاسم يطالع فتون وشكلها عيبته.. وبدر مانزل عينه من على غاليه.. بس هي سوت له طاف..
بعد ساعتين خلص الفيلم وراحوا البنات يتسوقون، والشباب كملوا حواطتهم..
مرام: غاليه بسج من الأغراض، مابقى شي ماخذتيه..
غاليه: انزين الأغراض لي ولكم.. وبعدين عيب نظهر من المول وإيدنا فاضيه..
فتون: بس أبوي دق علي مرتين وأخاف يعصب علي..
مرام: قوليله كنت مع معزبتي ومابيقولج شي..
فتون حز بخاطرها هالكلمه، وتمت ساكته.. غاليه عصبت عليها..
غاليه: مرام.. شو معزبتها بعد..؟؟ نحنا هني ربع واخوات ومالنا شغل بآبائنا منو الي يشتغل عند الثاني.
مرام: خلاص خلاص لاتزعلين.. وياكلمه ارجعي لمكانج..
غاليه: يالله عيل خلونا نروح البيت..
طلعوا البنات وروحوا على بيوتهم.. وغاليه متعوده على السهر والتأخير لوقت متاخر بالليل.. وطبعا محد يحاسبها..
دخلت الصاله وشافت امها يالسه تنتظرها..
غاليه: هاي مامي..
أم غاليه: هلا بنور البيت كله.. غريبه رجعتي من وقت اليوم؟؟ بعدها الساعه عشر ونص..!! وباجر إجازة..
غاليه: أبو فتون حشرها بالتلفونات وروحنا البيت.. ماما وين أبوي..؟؟ شاريه حقه هديه..
أم غاليه: بس أبوج اشتريتي له..؟؟ وأنا نسيتيني,, أنا أمج الي..
غاليه: بس بس.. والله حافظه الموال.. انا أمج الي حملتج في بطني تسع شهور.. وسهرت الليالي عليج وانتي مريضه.. فديييييييت أمايه أنا.. مستحيل أنساج أكيد اشتريت لج أحلى هديه..
وباست أمها وعطتها كيس بداخله عطر مع البودي لوشن مالته، وجلابيه روووعه.. وبخور.. وساعه.. وورده حمرا..
أم غاليه: الله وايد حلوين.. بس شو مناسبة هالهدايا الحلوه..
غاليه: كالعاده انا الي أذكركم بعيد زواجكم..
أم غاليه: ههههه خلاص كبرنا على هالشغلات..
غاليه: بس بتظلون بعيوني صغار..
أم غاليه: هههههههههه احنا الي نقول هاي الرمسه مب إنتي..
غاليه: ههههههههههههههههههه المهم وين بابا..؟؟
أم غاليه: في مكتبه ومعاه خالد.. لاتقولين ماقلت لج..
غاليه ضحكت وفصخت عباتها ويلست تعدل شيلتها وسارت إلين أبوها.. ودقت الباب..أونها مؤدبه..
ويوم دخلت ضحك عليها أبوها..
غاليه: السلام عليكم.. بابا ليش تضحك..؟؟
أبو غاليه: هههههههههه وعليكم السلام.. أضحك لأنج متعوده ادشين علي مثل الصاروخ.. واليوم ادقين الباب..
غاليه وهي مستحيه: ماما قالت لي عندك ضيوف.. أستاذ خالد إشحالك..
خالد رفع راسه ويلس يطالعها وهو مبتسم بس مارد عليها..
أبو غاليه: يالله حبيبتي تعالي خبريني شو تبين..
راحت غاليه وعطت أبوها هديته.. فتحها ولقى فيه ساعه وقلم وورده حمرا..
أبو غاليه: الله.. اشحلاتهم.. بس شو المناسبه..!!
غاليه: مثل ماقلت لأمي برد أقولك.. كل سنه تنسون وأنا الي أذكركم.. اليوم عيد زواجكم..
أبو غاليه: هههههههه هيه والله دايما ننسى.. مشكوره حياتي..
غااليه: يالله بابا بسير غرفتي برتاح.. وبشوفك قبل لاترقد..
أبو غاليه: في حفظ الله يالغاليه..
طلعت غاليه بكل هدوء.. وأبوها يضحك عليها..
أبوغاليه: دايما مسويه زوبعه وحشره في البيت، بس هالفتره مستويه هاديه..
خالد: الله يخليها لك..
أبو غاليه: آمين يارب، وحيدتي ومالي غيرها بالدنيا..
خالد: عفوا عمي.. بس ليش مايبت غيرها.. انت ماشاءلله عندك خير وتبي الي يورثك بعد عمر طويل.. ويشيل اسمك..
أبوغاليه نزل راسه، وتغيرت ملامحه..
خالد: آسف ياعمي مب قصدي أضايق فيك..!!
أبو غاليه: لا ياولدي ياخالد.. بس هاي حكايه تعور لي قلبي وأكيد في يوم بخبرك فيها..
سكت خالد لأنه حس بمنصور يالس يتألم من داخله، فما حب إنه يزيد أحزانه.. واستأذن وطلع عنه.. وهو طالع شاف غاليه مع أمها بالصاله..
خالد: يالله السموووحه انا طالع..
أم غاليه: الله يحفظك ياولدي.. سلم على أمك وإخواتك..
خالد: يوصل انشاءلله..
غاليه: خالد..
خالد استغرب من الي تناديه.. والتفت لها وهو مبتسم..
غاليه: امممممم عندك اخوات صغار من عمري يعني..!!
خالد: هيه عندي خلود بالثانويه العامه.. وحنان أولى ثانوي..
غاليه: انزين خلهم يزورونا نتعرف عليهم..
خالد: انشاءلله المره اليايه بييبهم وياي.. تامرين بشي ثاني..؟؟
غاليه: سلامتك..
خالد: الله يسلمج من كل شر.. يالله مع السلامه..
طلع خالد وركضت غاليه تتطالعه من الدريشه.. وفتحت الستاره كلها عسب يعرف إنها يالسه تتطالعه..
أبو غاليه: شو عندها العسل واقفه عند الدريشه..
غاليه: بابا.. المره الي طافت كانت عنده رنج سبورت والحينه بورش.. بابا انا بعد أبا سياره يديده..
أبو غاليه: خلاص انتي باجي لج ثلاث شهور وبتكملين ال18.. ومب باقي لج غير إنج تاخذين الليسن.. وأحلى سيارة بتكون عندج..
غاليه: والله..!!
وقامت تحضن أبوها وتبوسه..
غاليه: يالله بسير حجرتي.. تصبحون على خيييييييير..
وركضت على غرفتها..وهي طايره من الوناسه.. بدلت ثيابها وفتحت النت.. ولقت أحمد أون لاين..
غاليه: هلا وغلا.. خلنا نلعب شوي..
مزيون بوظبي: نور المسن بنورج..
غاالية أبوها: تسلم.. خبرني وين سرت اليوم..
وقضتها غاليه سهرة للصبح على النت.. وهي حاسه بفرح غريب بداخلها.. يمكن لأنها بتاخذ الليسن وبتسوق بروحها، أو لأنها خلاص كبرت وبتخلص الثانويه وبتروح الجامعه.. أو... أو يمكن بسبب خالد.. الله اعلم..
**__**__**__**__**

اليوم السبت وغاليه طبعا اجازه من المدرسه، بس على غير العاده قامت من الصبح ولبست وتعدلت ونزلت الصاله تدور أمها.. ولقتها بالصاله مع خالتها مريم.. وسلمت على خالتها وباستها على راسها..
مريم: هلا والله بالحلوه غاليه.. شحالج أمايه..
غاليه: الحمدلله بخير.. شخبار البنات خالووه..؟؟
مريم: الحمدلله، كانوا بيون وياي، بس تدرين بهم اليوم إجازة وراقدات.. اكيد بالليل بيمرونج..
غاليه: حياهم الله بأي وقت.. ماما أبا أروح لأبوي..
أم غاليه: خير شو عندج وياه..؟؟
غاليه:امممممم سر..
ام غاليه: عيل ماشي طلعه إلين تقولين لي..
غاليه: خالووه اختج هاي وايد فضوليه..
مريم: هههههههههه
أم غاليه: انزين بس فضحتينا، سيري قولي للسايق يوديج..
راحت غاليه وخبرت السايق، ورجعت غرفتها تتلبس، غاليه معروفه بأناقتها، وإنها تحب تتكشخ طول الوقت، حتى بالبيت تلاقيها بقمة شياكتها..
وصلت غاليه شركة أبوها وأول مادخلت من الباب فز لها الحارس يستقبلها.. وسألته عن أبوها وقالها إنه بالدور الثالث..
ووداها بنفسه للمكتب بس السكرتيره قالت لها إنه طلع لمكتب الأستاذ خالد..
غاليه: أوكي وين مكتبه..؟؟
السكرتيره: في الدور الخامس.. بتحبي أروح معك..
الحارس: لا انا بسير وياها..
وطلعت غاليه وراحت لمكتب خالد وهي مستانسه، يالله فرصه تشوف خالد في طريجها.. دخل الحارس قبلها وقال لأبو غاليه ضيوف يدورونه بس ماقاله منو..
ودخلت غاليه وهي مبتسمه: صباح الخير باباتي..
أبو غاليه قام يسلم على بنته: هلا غلايه حبيبتي، شو هالمفاجاة الحلوه..؟؟
غاليه: أدري بتكون حلوه.. شخبارك أستاذ خالد..
خالد: الحمدلله بخير.. حياج تفضلي..
غاليه: مشكور..
وراحت ويلست مجابله خالد وأبوها: انتوا اشتغلوا وخذوا راحتكم، انا بقعد أشوفكم..
خالد: لا خلاص بنعطي الكل اليوم إجازه علشانج.. وعلشان زيارتج الحلوه..
غاليه: والله يصير..!!
أبو غاليه: هههههههه والله بتخسرنا هالبنيه، لاتقولها شي على طول بتقولي نفذه.. وأنا مستحيل أرد لها طلب..
غاليه: بابا.. أنا بنزل تحت عند ناصر، ويوم بتفضى دق لي..
أبو غاليه: اوكي حبيبي بس لاتضيعين..
ضحكت غاليه وطلعت عنهم.. ونزلت تحت تتمشى وتدور مكتب ناصر ولد عمها الي يشتغل مع أبوها، شافت واحد واقف يطالع في الملفات الي وياه.. راحت له..
غاليه: لو سمحت.. تعرف مكتب ناصر المنصوري وين..؟؟
: إيه أعرفه، تعالي بوديج..
وراحت غاليه وراه، ووصلوا المكتب ودخل قبلها.. يخبره إنه ناس يسالون عنه.. بس غاليه ماسوت له سالفه دخلت على طول..
غاليه: غاليه ماتحتاج إذن علشان تدخل على ولد عمها..
ناصر: هلا والله بغاليه.. حياج تفضلي..
غاليه: هههههه أبوي مشغول فقلت خلني أمر أسلم عليك يالقاطع..
ناصر: فيج الخير والله.. أحمد ماعرفتها هاي غاليه بنت عمي منصور المنصوري..
أحمد: والله..!! اسمحيلي ماعرفتج لأني يديد هني.. أنا أحمد مسؤول الشؤون القانونيه هني..
ناصر: وربيعي من زمان من أيام الشات والمسنجر.. تذكر يامزيون بوظبي..
أحمد: ولازلت طال عمرك.. محد يعرفني فالنت إلا بمزيون بوظبي..
غاليه انتفضت من داخلها لايكون هو نفسه الي يكلمها بالمسن..!!
غاليه: ناصر انا عطشانه..
ناصر: حاظرين طال عمرج.. قولي شو بخاطرج.. عصير شاي قهوه.. الي في بالج قوليه..
غاليه: امممممممم عصير ليمون..
ناصر: حاضر الحين بيوصلج العصير..
طلع ناصر ووراه أحمد وقعدت غاليه بالمكتب تتطالع من الدريشه، وفي بالها أحمد.. معقوله يكون هو، يعني نفس النك نيم، ونفس الإسم وأحس الأسلوب والرزه نفسها..
ناصر: سوري تاخرت عليج..
غاليه: لا عادي.. ليش يايبه بنفسك..؟؟ سوري تعبتك..
ناصر: أفا عليج.. كل يوم تعالي وتعبيني..
غاليه: ههههههه انزين بقولك.. اليوم بالليل بنات خالوووه مريم بيونا، فأبيك تخبر اخواتك إيون عندنا..
ناصر: لالالا بروحج اعزميهن اتعرفيهن خواتي..
غاليه: خلاص برايك انا بدق لهن بعد شوي..
وطلعت غاليه وراحت لأبوها، وشافتهم غرقانين بالشغل..
غاليه: بابا.. بسك من الشغل ارتاح شوي..
أبو غاليه: لو ارتحت مابتقدرين تعيشين عدل..
غاليه: اوووف على حظي.. انزين أستاذ خالد.. تذكر يوم وعدتني تييب خواتك نتعرف عليهم..؟؟
خالد: أذكر..
غاليه: اليوم بنجتمع مع بنات العيله ييبهم اليوم نتعرف عليهم..
خالد: اليوم..!! أي وقت بيكون..؟؟
غاليه: بالليل على الساعه 9..
خالد: أوكي.. بخلص شغلي وبييبهم عندج..
غاليه: أوكي.. يالله بابا أنا برجع البيت..
وراحت غاليه لبيتها ويلست تجهز لعزيمة الليله..
**__**__**__**__**

على الساعه ثمان ونص بالليل بدت الوفود توصل بيت أبو غاليه، وطبعا لازم أعرفكم على العايله الكريمه.. احم احم..
عائلة راشد المنصوري عم غاليه، عياله حميد وزوجة حميد أشواق، ناصر، خليفه، مروى وميعاد.. وزوجته متوفيه من سنين الله يرحمها.. وعنده حرمه ثانيه كاتيا لبنانيه ماخذنها من سنتين وعايشه وياهم بالبيت وماعنده عيال منها.. وبنت حميد غصون..
عائلة ابراهيم المنصوري خال غاليه، عياله عبدالله ، عبدالعزيز، عمر ، سعيد.. ، ،وزوجته سميره(أخت منصور).. وماعنده بنات..
عائلة مريم خالة غاليه وزوجها طلال بس هو مب من أهلهم.. وبناتها شروق، شذا، شيماء.. وعندها ولدين جاسم، وهشام الي مسافر يدرس في الخارج.
والأخيره فجر عمة غاليه.. عمرها 30 سنه ومب متزوجه وبعدين بتعرفون ليش.. وهي الحين مسافره دوره في البحرين..

بنات خالة غاليه شروق وشذا كانوا أول الواصلين.. وتبعوهم بنات عمها مروى وميعاد..
غاليه: شذا وين شيماء..؟؟
شذا: مابتيي، ربيعتها عازمتنها على حفلة عيد ميلادها.. وتدرين حركات اليهال بعد..

شروق: وين العشا يوعانين..!!
غاليه: اصبروا شوي.. في ناس زياده بيون..
ميعاد: أكيد فتون ومرام..
غاليه: لا ماعزمتهم..اخوات محامي بابا اليديد، قلت خل نتعرف عليهم..
بعد عشر دقايق دق الجرس وركضت غاليه تفتح لهم، شافت خالد ومعاه اخواته..
غاليه: هلا وغلا ليش تأخرتوا..؟؟
خالد: المسامحه بس خلود دلوعه تقول لازم هديه أول مره تدش بيتكم..
خلود: أصول الذوق والإتيكيت تقول جي..
غاليه: ههههه حياكم تفضلوا.. خالد بابا ينتظرك في المكتب..
دخل خالد وهو مبتسم، كانت عايبتنه غاليه اليوم كانت بسيطه بمكياجها وبدلتها الكويتيه.. صدق هالبنيه عذاب..
راحوا البنات داخل وهم متفاجئين من القصر الي دخلوه.. بيت غاليه كان طابقين وسرداب تحت، السرداب فيه حمام سباحه وغرفة ألعاب مثل البلياردو وتنس طاوله وألعاب خفيفه، والحديقه برع وااااسعه وااايد وفي النص نافورة ماي على شكل إوزتين متجابلات بالحلج ويطلع منهم ماي.. وبالليل إضاءتهم تكون رهيييبه... غاليه اختارت انهم يقعدون برع لأن الجو حلو، فيلسو على الجلسات الي مسويينها على طرف الحديقه..

غاليه: اكلوا لاتستحون..
ميعاد: أفا عليج.. شي فيه أكل لاتقولين اتفضوا..
حنان: حلو الأكل منو الي مسونه غاليه..
شذا: هههههههه عندهم بدال الطباخ ثلاثه وتقولين غاليه تطبخ..
غاليه: لافديتج أعرف أطبخ قبل أسبوعين سويت بيض وحرقته، والأسبوع الي طاف ما احترق.. هههههههههههه
مروى: على الأقل قدرتي تضبطينه..
خلود: ههههههههههه
غاليه: خلي الطباخ حق ميعاد وراها عرس..
ميعاد: خل عنج عاد، بييب لي طباخ وراي دراسه بعدني..
غاليه: الله يعينه ولد الخال عبدالعزيز بيبتلي ببقره ماتعرف الطبخ..
مروى: هههههههه قولي الله يعين مرة الخال..
ميعاد: خل عنكم عاد فديتني أعرف أطبخ..
على الساعه 11 خالد طلع وأخذ إخواته وطلعت غاليه تودعهم، وبعدها بنص ساعه روحووا البنات كلهم لبيوتهم..

******_______*******________******

هذا الجزء الأول.. وياليت يعيبكم..

وأنتظر ردودكم الحلوه..

والسموووووحه..اخوكم (غرشوب البدو ) __DEFINE_LIKE_SHARE__

رحلت عن بلادي · 08-20-2008, 02:35 AM

هااااااااااااااي ..

لييييييي الشرف انيي اكووون اول وحده ارد ع الموضوووع ..

بصرااحهــ البااارت طرررر ..

عيبتنيي شخصية غاليه ..

ونتريااا البااارت الياااي ..

السمووووحهــ .. __DEFINE_LIKE_SHARE__

Grshoob Albdoo · 08-20-2008, 02:46 PM

تسلمين

والحين راح انزل البارات

الفصل الثاني:

قامت غاليه الصبح وتسبحت وهي تتأفف وتتحرطم.. ولبست ثيابها ونزلت تحت وبعدها تتأفف..
أم غاليه: شو عندج صايره مثل العيوز تتحرطمين من وعيتي..؟؟
غاليه: والله تعبت من قومة الصبح.. متى بخلص والله باخذ كل دواماتي بالجامعه مسائي..
أبو غاليه: يالله هانت هاي آخر سنه، وعقبها سوي الي بتسوينه..
غاليه: بابا لو نجحت شو بتعطيني هديه..؟؟
أبوغاليه: الي تبينه آآآآمري وتدللي يانظر عيني..
غاليه: أمممممم أول شي طبعا باخذ الليسن وأبا سياره يديده.. أممممممم آخذ بورش وإلا...... وإلا عقب بقرر..
أبوغاليه: حاظريين والله لو تبين سياره بعشر ملايين ماتغلى عليج..
غاليه: وعقبها أبا أسافر أوروبا وباخذ وياي مرام وفتون..
أم غاليه: ولو أهلهم مارضوا..؟؟
غاليه: لالالالا بيرضون إنشاءالله.. ماما لاتحبطيني..
أبوغاليه: ههههههه انزين يالله كملي..
غاليه: أوكي وبنقعد هناك طوووول الإجازه وبنتشرى حق الجامعه.. وأهم أهم طلب ياحبايبي إني نويت أقدم بالجامعه الأمريكيه.. وأدرس إدارة أعمال..
أم غاليه: لالالالالالالا وألف لااااااااا
غاليه: مامااااااااااا
أبو غاليه: وليش لا الله يهداج، مافيها شي..
أم غاليه: شو الي مافيها شي، جامعه مختلطه ونحنا ناقصين قيل وقال..
غاليه: مامااااا نحنا في عام 2007 وانتي للحين تقولين لي مختلطه وما أدري شو.. يعني باجر لو أنا اشتغلت بمكان مختلط بتقولين لا..؟؟
أبوغاليه: فديييييت بنوتي الحلوه تبا تشتغل..
أم غاليه: انت خل عنك هالدلع، وانتي لو تبين تشتغلين شركة أبوج طايحه، وخلصي مدرسه وعقبها يصير خير فالجامعه.. والحين قوموا لأشغالكم..
قامت غاليه مع أبوها وهي تقوله: حشى فرعون ماسوا جي من قبل، انت كيف متحمل ما أدري..
أبوغاليه: الحب يابوج، أحبها من ونحنا أولاد عشر سنين، وعقب هالعشره الطويله ، كل الي تقوله مثل العسل على القلب..
غاليه: يالله لاتبلينا بحب يكسر روسنا..
أبوغاليه: هههههههه إلا قولي لاتبلينا بحب يخشعنا تخشييييع..
غاليه: هههههههههههههههه
وراحت غاليه مع السايق للمدرسه ويلست مع البنات وهي سرحانه تفكر كيف بتدرس وشو بتسوي..
مرام: حووووووووه بنت منصوور وين سرحانه..
غاليه: هااااا.. ولاشي أفكر في مستقبلي..
مرام: انتي تفكرين في مستقبلج عيل نحنا شو نقول..
فتون: هههههههههه غاليه بتروحين عيد ميلاد نجود يوم الخميس؟
غاليه: أمممممم ما أدري عموووه فجر بتيي من السفر يوم الخميس، وبعدين هالنجود ما أحبها..
فتون: ومنو يحبها، بس يا أختي تسوي حفلات عجيييبه..
غاليه: أحلى عن حفلاتي..؟؟
مرام: انتي بالمركز الأول وعقب هي..
غاليه: خلاص لو وصلت عمتي الصبح أو الظهر أكيييد بحظر الحفل، بس لو وصلت المغرب أو بالليل لا طبعا مب حاظره..
فتون: يالله نروح أشوف أبله جميله يات..
غاليه: فديتها هالأبله عذااااااب، كشييييييخه وحلييوه..
مرام: بس مالها حظ عنست وللحين ماتزوجت..
غاليه: يمكن لها ظروفها مثل عمووووه فجر..
فتون: تعالي عمتج ليش للحين ماتزوجت؟ كلما ما أشوفها أحسها تكون أحلى وأصغر.. ماااالت على العرسان..
غاليه: لالا عمتي تقدمون لها وايدين، بس هي ترفضهم وكلما سألتها تقولي باجر تكبرين وبخبرج..
وفهاللحظه وصلوا الفصل وكانت أبله جميله واقفه تنتظرهم وهي مبتسمه..
غاليه: السلام عليكم أبله جميله..
أبله جميله: وعليكم السلام يالكسلانات ليش متأخرات..؟؟
غاليه: أبله انتي أحسن وأطيب وأجمل أبله بالمدرسه..
أبله جميله: ههههههه لاتلعبين علي، أنا عارفه ألاعيب البنات..
غاليه: هههههههههههههههههه
ودخلوا الفصل وغاليه مستانسه على أبلتها، تحبها وتموت عليها..

بعد أسبوع وبالذات يوم الخميس غاليه في غرفتها تتلبس وتتعدل، لبست بنطلون جينز واسع والقميص شوي طويل، وماحطت مكياج على ويها.. وفتحت شعرها ونزلت الصاله تنتظر وصول عمتها..
أم غاليه: غاليه ليش لبستي بنطلون الحين عيال عمج وخالج بيون..
غاليه: محد قالي إنهم بيون..
أم غاليه: هاي عمتهم وخالتهم ولازم يستقبلونها..
غاليه: ماما بلبس شيله القميص طويل وساتر.
أم غاليه: لا حبيبتي عيب روحي بدلي وإلبسي شي حلو..
قامت غاليه وطلعت فوق وبدلت ثيابها ولبست تنوره سوده وقميص أسود، وحطت على خصرها حزام فضي كبير ولبست شيله فضيه، كان شكلها رهييييييب بالأسود، وأول مانزلت ضحكت أمها..
أم غاليه: وليش لبستي أسود..؟؟
غاليه: هههههه اول شي شفته بويهي يريته ولبسته..
دخل أبوغاليه: أخوي وأخوج وأختي وعيالهم وصلوا..
فزت غاليه تستقبل عيال عمها.. وخذت البنات على جهة ويلسوا يسولفون..
غاليه: ميعاد ميعاد شوفي شوفي عزوووز واقف يطالعج..
ميعاد وهي مستحيه: أول شي عزوز بعينج، وثاني شي خليه يطالع مب خطيبته ومشتاق لي..
غاليه: أونج عاد..صبري بناديه لج... عزييييييييييييز
عزيز التفت عليها وهو مبتسم فأشرت له بيدها تعال.. وراح لهم بكل هدوء، عزيز أهدأ واحد فالعيله رزين ومؤدب لأبعد درجه.. كان يمشي وعينه على ميعاد الي كانت ترتجف من المستحى..
عبدالعزيز: هلا بنت عمتي آمريني تدللي..
غاليه: مايامر عليك عدو إنشاءالله، بس شفناك تتطالع من بعيد، وقلنا خل نخلي الشوف من قريب عسب تطفي الشوق..
عبدالعزيز صد صوب ميعاد الي كانت منزله راسها..
عبدالعزيز: أي شوق الي بينظفي وهي منزله راسها..
ميعاد نزلت راسها أكثر.. والبنات ماتوو من الضحك عليها..
شذا: عزيز انت وااااايد هادي وأخذت لك وحده تقول لإبليس إقعد وأنا بكمل الشغل بدالك.. لييييييييش..؟؟
عبدالعزيز وهو مارفع عينه عن خطيبته: هههههههه لأني هادي والكل يبيني أستوي شوي شيطان، قلت آخذ لي وحده فرفوووشه عسب تغيرني شوي، بس أشوفها تغيرت واستوت أهدا عني، شكلي بغيرها..
ميعاد على طول رفعت راسها: ليش إنشاءالله شو شايفني لعبه تخطب وتودر..
انفجر عبدالعزيز من الضحك عليها، وهي من انتبهت على نفسها والي سوته شلت روحها وشردت على الحمام..
غاليه: ههههههه فجرت الصماااااام..
عبدالعزيز: ههههههه سيري شوفيها أخافها تزعل مني..
بعد ربع ساعه وصلت فجر، فجر ماشاءالله عليها قمه فالجمال والروعه الي يشوفها يقول مستحيل عمرها 30 أكثر حدها 22 سنه، دخلت عليهم وهي كاشخه ومتعدله وسلمت على إخوانها وحريمهم وأختها.. وراحت للشباب تسلم عليهم وماسلمت من تعليقاتهم وعقبها راحت للبنات الي ما اسكتوا من الأسئله.. شو سويت ووين رحتي وشو اشتريتي لنا..!!
وغاليه حاظنه عمتها طول الوقت لأنها كانت دايما وياها.. ودووم تشكيلها لو فيها شي..
تعشوا الجماعه كل بروحه, يعني الشباب بروحهم والبنات بروحهم، وبعدها اجتمعوا بالصاله يسولفون..
أبو غاليه: هاا فجر إنشاءالله توفقتي هناك..
فجر: هيه ياخوي بصراحه الدراسه هناك واايد صعبه بس بفضل الله سبحانه وتعالى توفقت وخلصت الدوره على خير..
أبو عبدالله: عيل زين ييتي الحين لأنا ناوين نملج عبدالعزيز وميعاد الشهر الياي..
ميعاد فزت من مكانها: عمي عندي امتحانات، لو نأجله للإجازه..
أبوعبدالله: والله هذا شور عزيز يقول الحين وفالصيف العرس..
أبو حميد: وانتي شو وراج، عرسي وكملي دراستج.. كل البنات جي يسوون...
فجر: أنا بطلع أرتاح فوق، بس باجر كلكم تتغدون عندنا..
أم حميد: مايبيله كلام أكييييد بنجتمع علشانج..
وطلعت فجر فوق ووراها غاليه.. والجماعه الباقيه روحوا لأن الوقت متأخر على وعد يلتقون باجر..

غاليه انسدحت ينب عمتها تسولف وياها..
فجر: غلايه عمري حياتي برقد وباجر بسولف وياج..
غاليه: عموووووووه كلميني شوي.. حرام مشتاقة لج..
فجر عطت بنت أخوها ظهرها: من أصبح أفلح..
غاليه تمت منسدحه شوي وعقبها راحت لغرفتها..

صباح اليوم الثاني غاليه قامت الساعه 10 ونص وشافت أمها وعمتها بالصاله..
غاليه: صباح الخير..
فجر وفاطمه: صباح النور..
فجر: أحلى صباح لأحلى غلااايه..
غاليه: الغدا جهز؟؟ توه ميعاد دقت لي تقول إنهم بيون عالساعه 12
فجر: ههههههه الله يعيني على هذرت البنات، حشى البارحه كلتوني بالأسئله..
أم غاليه: أنا بسير أطالع الغدا، وغاليه إلبسي جلابيه اليوم بسج من هالبدل..
غاليه: لالالالالا الجلابيات للأعياد وبسسسسس
فجر: أنا يوم كنت بعمرج فشله الوحده تطلع بالبدل جدام عيال عمها.. واليوم استوى لو بالجنز عادي..
غاليه: هههههه لاعموووه مب لهالدرجه.. أصلا وراي أم تأدب عدل.. ولو راده على أبوي حتى العبايه والشيله بفرهن..!!
فجر: ههههههههه الحمدلله أمج صالبتنج.
غاليه: يالله عمووه قومي بنغير ثيابنا، ورانا يلسه حلوه..
طلعت غاليه مع عمتها يغيرون ثيابهم، فجر البست جلابيه رااهيه وهي بنطلون بنفس الوقت.. وعلى الساعه 12 وربع وصلوا ميعاد ومروى وحرمة أبوهم كاتيا وأشواق مرة أخوهم وبنتها غصون.. وبعد دقايق وصلت شذا وشروق وشيماء ومعاهم أمهم.. والشباب بيصلون الظهر وبيون..
ميعاد: الله ياعمووه فجر إشحلاتج.. جلابيتج هاي فظيييييييعه..
فجر: تسلمين حبيبتي.. ولاتخافين يبت لكل وحده منكم نفسها..
غاليه: وأنا محد تمدح في لبسي اليوم.. صكيتي علي ياعموووه..
مروى: بالعكس غلوووي بدلتج خبااااااااال، كله ولا التنوره العذااااب من برومود صح..؟؟
غاليه: صح.. شريتها من يومين وقلت الحين فرصه ألبسها..
وعلى الساعه وحده وصلوا الشباب والشياب ودخلوا الميلس يتغدون والبنات يلسوا بالصاله يسولفون وفجر توزع عليهم هداياهم..
ناصر: هوووود هوووود يابنات وياحريم تغطن الشيوخ إوصلوا..
مروى: تعال إدخل حياكم كلنا متغطيات..
غاليه: نااااصر لو المعرس وياكم اصبر خل ميعاد تشرد..
ناصر: ههههههه وليش عاد، طول عمرها تيلس وياه..
عبدالعزيز: لا بس البارحه طلع الويه الحقيقي..
ميعاد: لا والله..!! لو ماسكت بشيل عمري وبسير بيتنا..
ناصر: ههههههه حااااره أختي اليوم..
عبدالعزيز: كله ولازعلج يالغاليه..
غاليه: من متى عزيز تعرف تقول كلام حلو..؟؟ والله وتطورنا..
عمر: ههههههه تونا معلمينه، فشلنا مايعرف يقول كلام حلو..
فجر: بسكم عاد لاتحرجون المعاريس.. تعالوا شباب بعطيكم هداياكم..
يلسوا الشباب يسولفون ويفتحون هداياهم.. وغاليه يالسه تسولف مع ناصر يوم دق تلفونه..
ناصر: هلا والله بمزيون بوظبي..
غاليه مندمجه في مكالمة ناصرتحس هالأحمد فنااان وبخاطرها تتأكد لو هو الي يكلمها بالمسن أو لأ..!!
ناصر: هههههه انزين تعال وبعطيك من الكيك الي مسويينه.. هههههههههه.. يعني منو مسونه أكيييد الطباخ.. خلاص يوم بتوصل سوي لي رنه..

غاليه: منو هذا أحمد..؟؟
ناصر: هيه خس الله إبليسه يحب الكيك والحين بيموووت ويبا من الكيك الي أنا أكلته..
غاليه: خلاص بقولهم يحطون له وخبرني يوم بيوصل..
وقامت غاليه وهي مستانسه بخاطرها تشوف أحمد بس ماتعرف ليش.. والكل يسولف ومرتبشين ولا إنتبهوا لناصر يوم قام لربيعه عند الباب ولا لغاليه الي راحت وراه بحجة اتييب له الكيك..
وصلت غاليه للباب الي برع وشافت ناصر عند الباب وهو ناااقع من الضحك وأحمد واقف وماسكنه من إيده ويهزه، ويوم وصلت سمعته يقوله..
أحمد: يالله بسرعه طلع الكيك طلعه بسرعه، حرااااااام عليك تراني أتوحم.. نصوووور بتظهر الوحمه في ولدي وحرمتي بتذ......
وانتبه لغاليه وهي ميته من الضحك.. واستحى يوم عرف إنها سمعته..
غاليه: ههههه بس بس لاتذبح ولد عمي.. بدفع لك الفديه بس خله..
أحمد: عسى الفديه كبييييره بس.. تراني مابرضى بأي شي..
غاليه: أفاااا عليك أكبر صحن يبته لك.. << وأشرت له بالصحن..
أحمد: خلاص عيل مبروووك براءه يانصووور..
ناصر: الحمدلله يابنت عمي أنقذتيني من الطاغيه..
غاليه: هههههههههههه
بس فجاة غاليه مسكت على قلبها ومبين عليها إنها تتألم..
ناصر: غاليه فيج شي..
غاليه وهي تكابر: لا بس نغزه خفيفه..
ناصر: أناديلج الوالده..!!!
غاليه: لالا الحين بدخل وبرتاح.. أحمد حياك تفضل..
أحمد: تسلمين بس مواعد أخوي الصغير أوديه الألعاب ولو تأخرت ولا كيك الدنيا كله بينقذني...
غاليه وتبا تتأكد: يحليله شو إسمه أخوك..
أحمد: حمدان..
غاليه بالقوو ابتسمت وخلتهم وراحت.. الي معاها بالشات دايما يسولف لها عن أخوه الصغير المعاق وإسمه حمدان.. وااايد يحبه ودايما يوديه الألعاب.. يعني هو نفسه أحمد.. بس هو أكيد مب حاس إنها هي ولا حتى يشك.. أمممم كيف أحسسه إني أنا..
ووصلت الصاله وشافت الكل مرتبش وفجر تحكيلهم عن المطاعم والأكل وطيبة أهل البحرين..
شذا: ونحنا الي نسافر كل سنه أوروبا بس عسب نستانس وعندنا بلدان عربيه اشحلاتهااا..
ميعاد: غلااايه شو رايج نسير البحرين والكويت فأقرب إجازه..
غاليه: هاااا ما أدري كيفكم..
فجر: حبيبي شو فيج..؟؟
غاليه: لا ولاشي.. شو رايكم نسير غرفة الألعاب..
وطلعوا كلهم مع غاليه للسرداب..

بعد أسبوع قررت غاليه تزور أبوها بالشركه وتحاول تتقرب من أحمد وتتأكد اكثر من شخصيته.. بس من وصلت الشركه مالقت غير ناصر الي متيلس يشرب الشاي..
غاليه: حرااام فيك هالراتب.. قوم اشتغل وحلل راتبك..
ناصر: ههههههههه حرام عليج توني مخلص، وانتي مطرشنج عمي تراقبيني شو..؟؟
غاليه: أممممم تقريبا.. عيل وين أحمد عنك..!!
ناصر: طرشه أبوج المحكمه يخلص أوراقنا وقضايانا..
غاليه: أهااااااا
ناصر: غاليه أباج في موضوع.. أمممممم
غاليه: شكلك تبا تخطب.. صح..؟؟
ناصر: هههههه الذكاء لاعب دور بحياتج..
غاليه: لو وحده من ربيعاتي لا بعدهن صغار.. لو وحده من الأهل على العين والراس..
غاليه: لا فديتج أنا باخذ من الأهل,, أممممم شو رايج بشروق..!!
غاليه: شروق بنت خالوو مريم.. وااايد اوكي، بس هي وياي للحين ماخلصنا الثانويه.. وبعدين هي طموحها تكمل .....
ناصر: إسكتي شوي خليني اكمل رمستي..
غاليه: خخخخخ سوري يالله كمل..
ناصر: انتي تعرفيني توه عمري 22 سنه يعني يبيلي كم سنه إلين أكون نفسي، والحينه بس أبا أحجزها أو حتى خطوبه، لأني مب من النوع المتخلف الي تعيبه بنيه ويقعد ينتظرسنين إلين يكون نفسه وبالنهايه تطير من يده ويظيع باجي عمره بالندم..
غاليه: طبعا تقصد عبدالله ولد خالي.. المهم كمل..
ناصر: هيه.. فقلت بشوفها لو محد بخاطرها وعقبها بتقدم لها ووووووووو
غاليه: بس بس ووووو بنسوي خطوبه..
ناصر: وانتي اليوم بتكلمينها وباجر بتردين علي.. وو
غاليه: أوووووكي خلاص خلني أروووح عند أبوي..
وفي هاللحظه دخل أحمد وهو مرتبش ويبا يقول شي بس من شاف غاليه سكت وابتسم لها..
ناصر: شو عندك داش علينا مثل الصاروووخ..؟؟
أحمد: لاسلامتك بس اشتقت..
ناصر: يالعيااااار توك مودرني..
أحمد: وإنت منو كلمك أكلم نظر عيني وقلبي وروحي المكيف..
غاليه: هههههههههههه
ناصر: ماعليييييه مردوووووده..
غاليه: يالله أنا بروح لأبوي,,
أحمد: بروح وياج بوديله الأوراق..
وطلعوا وهم يمشون وساكتيييييين، غاليه بخاطرها تقول أي شي بس مب قادره، وهو شكله وااايد مستحي.. ويوم وصلوا عند مكتب أبوها ومدت ايدها تبا تفتح الباب سمعته يقول لها..
أحمد: إنتي غالية أبوها..؟!!
غاليه صدت عليه وهي مصدووومه بس مالحقت ترد لأن الباب إنفتح وطلع لهم المحامي خالد الي دخلهم المكتب وراح لمكتبه..
وغاليه طول الوقت سرحاااااانه.. يعني هو عرفني..؟؟ بس كيف ولا مره لمحت له أو شي.. ومستحيل من النك نيم يخمن..
وقررت تواجهه قبل لاتطلع.. بس أبوها بخر أحلامها يوم قالها إنه خلص شغله وبيروح وياها البيت..
وراحت الغاليه البيت وهي متحرقصه تبا تسولف ويا أحمد فالمسن عسب تعرف كيف عرفها.. __DEFINE_LIKE_SHARE__

Grshoob Albdoo · 08-20-2008, 03:25 PM

الفصل الثالث:

غاليه على أعصابها تتريا الليل يحل بسرعه، لأن أحمد مايدخل إلا بالليل.. وفجر حااااسه ببنت أخوها فيها شي غريب.. بس هي ماتحب تتدخل بأي شي إلا إذا الطرف الثاني كلمها..
أم غاليه: منصور تأخر مب من عوايده يسهر مع برع هالكثر..
فجر: يمكن الحرمه الثانيه شاغلتنه اليوم.. ههههههه
أم غاليه: لالا سلامة راسج فاطمه ماينحط عليها ضره..
غاليه: ولو بابا سواها شو بتسويييين..؟!!
أم غاليه: مب مسويه شي، إلا برقص في عرسه بعد..
فجر: مستحييييييييييييييييييييييييييييييل
غاليه: صح ماما كيف ترضين بعديله تشاركج في حبيبج..؟؟
أم غاليه: أبوكم عيشني أحلى سنين عمري، عطاني كل إلي أبيه، عمره ماقصر علي بأي شي، أذكر مره طلبت منه طقم ألماس شفته فمحل جيمته مليونين، والله إنه ماكملت أربع وعشرين ساعه إلا والطقم جدامي..
فجر: ياعيني عالرومانسيه..
أم غاليه: قبل لا أنطق بالشيء يكون جدامي، كل أحلامي حققها لي، والله طووول عمري مدللني ومعززني.. وفوق هذا ماتبيني أوافق على شي يبيه وبيسعده، والله لو دخل علي فهاللحظه وقال بتزوج والله تراني حلفت إني أرقص له في عرسه..
وفي هاللحظه دخل بوغاليه: والله ياالغاليه ياأم الغاليه لو عطوني أموال الدنيا وقالولي تزوج لا أترك كل المال والحلال وأركض وراج..
وباس حرمته على راسها وتم لاوي عليها..
غاليه: الله الله خلاص مااااااااانقدر على هالحب كله..
فجر: أقوووول غلاااايه خلينا نظهر ونفضي الجو للحبايب..
وطلعت غاليع مع عمتها وراحوو غرفهم، غاليه على طول فتحت النت ولقت أحمد بس محطي الحاله عالهاتف.. فيلست تنتظره إلين يفضى، شوي وحول الحاله على مشغول، عصبت غاليه وقالت بتكلمه ولو مشغووول، بس هو سبقها..
مزيون بوظبي: السلام عليكم..
غالية أبوها: وعليكم السلام.. شفتك مشغول بس قلت لازم أكلمك..
مزيون بوظبي: لا حطيته عسب أكلمج على راحتي..
غالية أبوها: أمممممم متى عرفت إني غاليه المنصوري..؟؟
مزيون بوظبي: من أول يوم شفتج فيه..
غالية أبوها: كيييييييف !!!!!!!!!
مزيون بوظبي: أول ماعرفني عليج ناصر قلبي دق لج، وحسيت إني أعرفج من زمان، ويوم طلعتي من الشركه راح ناصر يخلص شغله.. فيلست على كمبييوتره وشفته فاتح المسن، وشيكت على الي وياه وشفت إيميلج.. وإنتي من رجعتي البيت شبكتي النت ويلست تكلمينه، ويوم سألته قالي غاليه بنت عمي.. ويومها تأكدت..
غالية أبوها: وليش ماقلت لي..؟؟
مزيون بوظبي: ماحبيت أحرجج.. والله ياغالية إني من يومها وأنا أعد الأيام بس عسب أشوفج، مطيح في مكتب نصووور بس أنتظرج تزوووورينه..
غالية أبوها: ويوم ييت بيتنا كنت ياي علشان الكيك..وإلا..؟؟
مزيون بوظبي: أمممممم بصراحه كنت أبا أشوفج وقلت بدق لناصر أدور لي أي حجه عسب أشوفج، وهو ماقصر قام يقهرني بالكيك الي أكله وهو يعرفني أحب الكيك.. قلت يالله يات منه.. منه أشوف غاليه ومنه أترس بطني..
غاليه أبوها: هههههههه شكلي بتعلم أطبخ كيك عشان خاطرك..
مزيون بوظبي: أممممممممم تحبيني..
غالية أبوها: أحبك لا.. معجبه هيه..
مزيون: يكفيني إعجابج.. أمممم بقول شي بس لاتزعلين..
غالية أبوها: هههههههه أكييييييد بترقد..
مزيون بوظبي: خلاص استويتي تعرفيني.. باجر إنشاءالله بشوفج..
غالية أبوها: خلاص باجر بيي الشركه..
مزيون بوظبي: باجر مدرسه ياحلوه..
غالية أبوها: أففففففف ذكرتني.. إنزين..
مزيون بوظبي: خلي اللقاء للظروف.. وفي أقرب فرصه بنتلاقى..
غالية أبوها: خلاص على راحتك..
مزيون بوظبي: خلاص ابا منج وعد..!!
غاليه أبوها: من عيووووووني..
مزيون بوظبي: فديت عيونج السوود.. تشدين حيلج وتذاكرين عدل، وراج جامعه ومستقبل..
غاليه أبوها: حااااااااااظر
مزيون بوظبي: تصبحين على خير.. يا يا قلبي...
غالية أبوها: وإنت من أهله.. يا يا أحمد..
مزيون بوظبي: ههههههههه باي
غالية أبوها: بـــــــــاي

بندت غاليه ويلست تتأمل نفسها في المنظره، وتتخيل الحب الي ممكن يكون بينها وبين احمد، تتخيل الحياة الي بتعيشها، كل بنات عمها وعمتها وخوالها عاشن الحب وحلاوته إلا هي.. كلما يظهر حد في حياتها يختفي فجأة..!! وفي هاللحظه تذكرت هشام ولد خالتها، الي يموووت فيها ودايما يدافع عنها من يوم كانوا يهال، بس فجأة خلاها وسافر بدون حتى لايودعها.. بدون لايوعدها إنه بيرجع فيوم ويتزوجها..
وهي كل ماحاولت تكلمه يصدها ويقولها نحنا إخوان إنسي الخرابيط الي كنت أقولها لج.. وقبله ناصر حسيته يحبني بس فجاة غير رايه وقالي أنا أكبر عنج بوااايد وما أصلح لج.. والحين ياي يبا يخطب شروق الي هي أصغر عني بشهرين.. لييييييييييش ليييييييييش!!!!!
يارب لاتغير أحمد علي، ونكمل مشوار حياتنا مع بعض..

وفي هالحظه دشت فجر..
فجر: السلام عليكم بنت أخوووي العسل.. في شو سرحانه..
غاليه: عموووووه تعالي ملاااانه بروحي..
فجر: إنزلي تحت عند أمج وأبوج..
غاليه: هههههه عقب الكلام الحلو الي استوى والبوس خلاص المعاريس تلاقينهم في حجرتهم..
فجر: ههههههههههههههه
غاليه: عموووه أنا كبرت..
فجر: مبروووك.. شو أسويلج يعني..!!
غاليه: عموووه لاتستعبطين..
فجر: غاليه حبيبتي بعدج صغيره..
غاليه: والله وغلاتي عندج ترمسين..
فجر: أممممممممممم أوكي.. إنتي طبعا تعرفين نحنا أصلنا من الفجيره، حتى يدوووه لحد الحين ساكنه هناك هي وأخوي بدر وعياله..
غاليه: هيه اعرف وبخاطري أشوفهم..
فجر: كنت بنفس عمرج، وتعرفين الحياة هناك جداااا بسيطه، يعني عادي البنيه تطلع تمشي لبيت ربيعتها بكل اماااااااان.. هذا قبل طبعا.. المهم مره كنت رايحه لربيعتي أذاكر وياها وقررنا نتقابل في مزرعة يدي الله يرحمه.. ودخلت المزرعه ويلست أدورها.. بس مالقيتها..
غاليه: وليش مادقيتي لها..
فجر: ههههههه كنا في عصر الجاهليه بعده ماشي موبايلات إلا لأقليه من الناس..
غاليه: أوكي كملي..
فجر: المهم.. وصلت لمكان جنبه حوض السباحه ويلست أفر الحصا في الحوض.. ومستانسه على عمري.. هههههههه ولا انتبهت لبيت النحل الي فوق الحوض على الجدار..
غاليه: وبعديييييييييين..
فجر: وفريت الحصا بدون لا أدري على النحل، وما أشوف لج إلا ميت نحله متجهات علي ودخلن داخل كندوووري..
غاليه: خيييييييييييييييـبه.. وبعديييييييييين..
فجر: يلست أصارخ وأصارخ وهم بعدهم لالدغوني ولاشي.. بس من الخووووف حشرت البقعه من الصراخ... وما أشوفلج إلا واحد يركض لعندي يحاول يطلع النحل بس مب عارف كيف..
غاليه: قيس بن الملوح وصل..
فجر: ههههههههه اسمعي المصيبه الي صارت، ومالقى طريقه يطلع بها النحل غير إنه يشق كندورتي..
غاليه: أبيييييييييييييييييييييه وشووووو سويتي..؟؟؟؟؟؟!!!!!!!
فجر: عاد قبل الحمدلله دايما متسترين، كنت لابسه تحت بنطلون وشلحه يعني مب وايد الي شافه..

غاليه: والله لو على زمنا الحين كان بيشوف البلاوي..
فجر: هههههه خليني اكمل.. وأنا من الصدمه يلست أصااارخ بزياده، والحمدلله طااار النحل بدون لا يأذوني.. ووقف هو يطالعني وأنا أصيح.. ويقولي لدغج.. أقوله لا.. يقولي عيل ليش تصيحين.. أقوله وثيابي المقطعه وأهلي.. وانا مب عارفه كيف أوصله الي أبا أقوله.. بس هو فهمني وراح ينادي أخته الي هي ربيعتي وخلاها تييب لي ثياب..
غاليه: يعني طلع أخو ربيعتج.. والله الصدف حلوه..
فجر: المهم.. صار الي صار وبالضرااااااابه أهلي اقتنعوا بالسالفه، لأنه مب شويه بنتهم ترجع البيت بثياب ربيعتها وتقولهم الي صار..
غاليه: هيه عاد وعقلية الآباء القديمه..
فجر: وبس ومن يومها ونحنا نحب بعض ودايما أشوفه ويشوفني وووووووووووووو وإبتدأ الحب..

غاليه: هذا الحب.. بس ليش ماتزوجتوا..؟؟!!!
فجر: عقب الثانويه رحت الجامعه اكمل دراستي وهو كان يشتغل.. وعقب سنه من دخولي الجامعه خطبني وأبوي الله يرحمه وافق، بس استوت ظروف مرض الوالد ووفاته وتأجل كل شي..
غاليه: وبعديييييييييييييين..
فجر: وبعدها أخوي منصور حول شغله كله على دبي هو وباجي إخواني وإخواتي.. بس يدوووه حلفت تعيش وتموت فالمكان الي عاش فيه المرحوم.. هي وولدها بدر الي توفت حرمته ويلس يربي عياله الين اكبروا وتزوجوا وهو الحين عايش مع يدوه بروحهم....
غاليه: المهم الحب شو صار وياه..؟؟ إلا تعالي شو إسمه..!!
فجر: إسمه علي..
غاليه: عاشت الأسامي.. يالله كملي..
فجر: وبعد وفاة الوالد بسنه رجع علي يخطبني ويذكرهم إنه الوالد كان موافق.. بس ظروف مرضه ووفاته هم الي امنعوا كل شي.. بس منصور مارضى وقاله نحنا الحين كبار وتجار وإنت حي الله موظف بسيط لارحت ولاييت..
غاليه: أبوووووووي..
فجر: أبوج ياغاليه.. أبوج هو الي حطمني وحطم أحلامي..
غاليه: بس.....
فجر: لاتدافعين.. يمكن معاه حق، يمكن كان يبيلي الأفضل.. يمكن كان يتمنالي الخير مع الي أحسن منه.. بس ماكان يدري إنه بهالشي بيكسرني وبيكسر حبي..
غاليه تمت ساكته ومنزله راسها..
فجر: وبعدها بشهر قالت لي أخته إنه سافر يكمل دراسته ويكون نفسه، ويوعدج يرجع وهو كبير ويملى عين أخوج.. وأنا للحين عايشه على هالوعد..
غاليه: وماتعرفين اخباره..؟؟
فجر: لا.. أخته تزوجت وراحت مع ريلها بوظبي وانقطعت كل أخبارها.. وهو ما أعرف عنه شي.. رجع البلاد أو لأ.. بس لو رجع أكيد كان بيوصلي خبر.. وبالذات إنه يعرف إخواني وتجارتهم تارسه البلاد..
غاليه: ما أتخيل نفسي أنتظر واحد وأضيع سنين عمري عليه، وأنا مب متأكده بيرجع لي أو لأ..!!
فجر: لو بتجربي الحب الحقيقي بتعرفين معنى الصبر والتضحيه.. والحينه قومي خلينا نطلع ونغير جو..

غاليه قعدت يومين بس تفكر كيف الحب يخلي الإنسان يضحي ويصبر وهو مب متأكد من صدق الطرف الثاني.. ولالقلت جواب لأسئلتها الحايره..!!!!!!

غالية تعودت تزور أبوها فالشركه كل ويك إند والهدف طبعا إنها تشوف أحمد، خلاص بدت المشاعر من بينهم تكبر شوي شوي، وهو مب مقصر وياها بأي شي طيب وحنووون لأبعد درجه..
بس كل الي من بينهم سوالف عالمسن وبس، يعني مايكلمون بعض بالتلفون..
اليوم الجمعة وغاليه كعادتها لبست وتكشخت وشالت عبايتها وشيلتها على إيدها ونزلت الصاله.. امها كانت يالسه ترمس بالتلفون وشكلها مضايجه شوي.. ويوم شافت غالية تبا تطلع أشرت لها تنتظر شوي.. وسكرت التلفون ويلست تتطالع بنتها..
أم غاليه: غاليه وين سايره..؟؟
غاليه: يعني وين..!! أكيد لعند أبوووي..
أم غاليه: وإنتي حظرتج مشتغله خطابه من وراي..!!
غاليه: ماما شوفيج؟ عن شو ترمسين..
أم غاليه: الحين ولد عمج يطلب منج تخطبين له شروق بنت أختي، ولا تقولين لي..
غاليه: الله يهداج يمه وناصر بعد ولد أختج المرحومه.. وبعدين كل السالفه ناصر طلب مني آخذ راي شرو......
أم غاليه: الحين يايه تقولين لي السالفه خلاص مريم خبرتني بكل شي..
غاليه: ماما وانتي ليش زعلانه.. ناصر ماقالي إخطبيها لي.. بس يبا رايها..
أم غاليه: وهذا انتوا عيال هاليوم تتشاورون وتتنقون قبل لاتخبرون الأهل.. اللهم عافنا..
غاليه: ماما حبيبتي عمري أنا بسير لأبوي ويوم برجع....
أم غاليه: بعد اليوم أبوج.. بتخبرج إنتي شو سالفتج..!!
غاليه وهي تلبس عبايتها: بعد شو سالفتي ملااااااانه وأبا أغير جو..
أم غاليه: خلاص برايج الله يحفظج..
طلعت غاليه وسارت لأبوها ويلست عنده شوي وبعدها راحت لناصر وشافته هو وأحمد وواحد ثالث وياهم..
ناصر: هلا وغلا بالغلا كلـــــــه...
غاليه: أهلين بولد عمي.. لايكون أزعجتكم..
قام ناصر يستقبلها وهو يأشر للموظف الثالث يطلع من المكتب، ووقف يكلم غاليه ويضحك وياها وغاليه اطالع أحمد الي شكله تغير من دخلت..
ناصر: شكلنا بنشغلج في الويك إند بس، وبنسويلج راتب أسبوعي..
غاليه: لا والله أنا الي بوظفك وبزيد راتبك.. نسيت إني بنت صاحب الشركه والقرارات كلها بيدي..
ناصر خيييييييييــبه بتذلنا بنت منصور..
غاليه: ههههههههه أحمد شخبارك..؟؟ ليش ساكت..!!
ناصر: يمكن خاطره بكيكه.. ههههههههههه
أحمد: صح ذكرتني بالكيكه.. البارحه على شو نحنا متراهنين.. ومنو الي فاااااااز..!!
ناصر: بس بس ذليتني.. تعرف بسير بييب الكيك وبنعزم غاليه ويانا تشاركنا الفرحه..
أحمد: هههههه أوكي وأنا بسير بخلص شغلي ودق لي أول ماتوصل..
غاليه استغربت تحرته بيقعد وياها يوم بيظهر ناصر، بس سكتت ويلست على مكتب ناصر تلعب بالكمبيوتر، ويوم إندمجت باللعبه دخل عليها أحمد وهو شايل أوراق..
أحمد: شحالج غاليه..!!
ناصر: زين تذكرت تسأل عن غاليه.. من يوم متى وأنا واقفه مع ناصر وانت في عالم ثاني.. فيك شي..؟!!
أحمد: غاليه أنا.. أنا..
غاليه: شو فيك متردد.. شو الي صاير..!!
أحمد: بصراحه.. مب عايبني لبسج اليوم..
غاليه يلست تتطالع نفسها ورجعت تشوف أحمد.. هي كانت لابسه بنطلون جينز والعبايه مفتوحه، بس هي دايما تلبس بناطلين وعمره ما إعترض..
غاليه: وشو فيه لبسي..؟؟ أنا دايما ألبس بنطلون وعادي، وبعدين هاي حريه شخصيه..
أحمد: ياعمري أنا مب متعدي على خصوصياتج، بس لو بغيتي تلبسين جينز إلبسي عبايه مسكره، ولو ماتبين إلبسي قميص طويل..
غاليه: وشو تفرق..؟؟ في كل الحالتين أنا لابسه بنطلون.. و...
أحمد: ياقلبي إفهميني.. أنا ما أحب أشوفج جي تتمشين ولبسج ضيج و.. وعيون الكل عليج.. حبي انتي استويتي كل شي بحياتي يعني من حقي أخاف وأغار عليج..
غاليه: ولو إني مب لهناك مقتنعه، بس علشان خاطرك بغير إستايلي..
أحمد: خلاص أنا بظهر عسب ناصر مايشوفني هني.. باي
غاليه: حبيبي..
أحمد: هلا..
غاليه: بشوفك بالليل..!!
أحمد: أكيد ياقلبي..
وطلع أحمد وبقت غاليه بروحها تتذكر كلام أحمد، ياربي هالإنسان كل يوم يجذبني له أكثر عن اليوم الثاني __DEFINE_LIKE_SHARE__

da1a3 · 08-20-2008, 03:39 PM

نتريا الباراااااااااااااااااااااااااااااااااااااااات __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
قلبي يحبك وانت تدري بذلك’ عندك خبر انه يحبك ويهواك ~ new ; ฬđήч Łқ	~ Ƙяạzyo❥	عدسة الاعضاء , كاميرا الاعضاء	7	03-26-2010 10:38 PM
من كثر ماأحبك يقولون مسحور ..!!	محروم.كوم	منتدى أخبار المواقع والمنتديات العربية والأجنبية	0	12-24-2009 12:30 AM
من كثر ماأحبك يقولون مسحور ..!!	محروم.كوم	منتدى أخبار المواقع والمنتديات العربية والأجنبية	0	12-24-2009 12:20 AM
من يحبك.....	دلوعة باباتي	شعر و خواطر	14	03-17-2009 01:37 AM
لا تطلب من احد ان يحبك بل اجعله يحبك	شواقي العين	الإستراحه العامة	12	04-05-2008 08:40 PM