نُهايتيّ أنتَ ، و نهايتكُ أنا . . ! - الصفحة 5

دااانه غير · 06-02-2013, 12:02 AM

بتحطين بارت للحين وانت ماحطتي __DEFINE_LIKE_SHARE__

بعثرهَ هَادئهُ · 06-02-2013, 11:08 AM

الفصل السادس ،

" عُمر "

أسبوع كامل ما شفته .. رافض أنه يطلع من حجرته بدون سبب .. حتى ريم ما يرمسها .. متجاهل الكل يتحسب بها الطريقه بيخلينا نخضع للي يبيه .. لازم ينسى موضوع الشكوى ع يوسف .. فارس يباله ترويض ! يبالي أروضه قبل العمليه و ينقلب حاله و ما أروم أتحكم به .. أما اليوم ! فهو يوم عرسي .. ما أحس بأي طعم أو نكهه خاصه لها اليوم أبداً ! كأنه يوم عادي بيمر .. بس بيضيف علياء فحياتي لا أكثر ..! أصلن فارس ما يخلى من تفكيري .. ما أدري إذا بي و لا لاء ! فهد راح البيت و بيشوف فارس و أنا ساير صوب القاعه .. وصلت و شليت بشتي ثبته ع إيدي و حدرت القاعه ! وقفت حذال أبويه و حذال عمي " أبو حرمتيه " .. بدو الناس أيون و يباركون و بدت الحربيه ترزف .. بس لا فارس و لا فهد يو ! تنهدت و قعدت بعد فوج من المباركين اللي يو .. باجي شهر ونص ع أمتحانات فارس ! لازم أبدا ويا الدروس بعد أسبوع .. بيكون خذ راحته كفايه .. وقفت لما دخلو ربعي .. سلمو عليه و باركولي و ما سلمت من مزحهم الثقيل اللي هب متحملنه اليوم .. طاحت عيني ع ظهر لشخص هب غريب .. قصير و صغير البُنيه .. شعره الطويل ظاهر من ورى الغتره و يلامس جتفه .. صد و حدر فهد ورى .. تنهدت براحه ! قرب فارس و باس راس أبويه و سلم عليه بجفاف و بدون أي كلمه غير " مبروك " .. سلم عليه فهد بحراره و باركلي من قلب .. أنتقلت عيوني دور ع فارس .. لقيته يالس ع طاوله بروحه ! و فهد و عيال عمي يدورون حولين الناس يتأكدون من الضيافه و يسلمون ع البعض .. شو اللي تبي توصله ي فارس ! شو ورى ها التمرد .. بس طنشت .. دام ياه أنا مرتاح .. بعدها سحبوني و خلوني أرزف وياهم حتى أبويه و عميه أبو حرمتيه رزفو ويانا .. شفت فهد يحاول يسحب فارس لكنه رافض و ما تحرك ساكن .. ها شفيه ! ليكون راسه في شي !! مشيت صوبه و فهد راح عنه .. وقفت و أنحنيت

: فارس شفيك ! ما بترزف فعرسي

تم ساكت . . !

: راسك يعورك ؟!

تم ساكت . . !

وقفت عدل و طالعت الناس اللي تارسين القاعه .. أحس بفقد أعصابي ! والله لولا راسه جان ذاك اليوم صفعته كف نسيته أسمه و أدبته .. خاطري أكفخه ! ودرته و رحت عنه .. أنا برويك ي فارس ! أحينه هب فاظي لك .. بعد ما تعشو الناس يقالولي لازم أحدر قاعه الحريم و أخذ العروس .. لكني تميت للأخر ما بحدر و الحريم تارسين القاعه .. خبرت البنات أنه بحدر أخر شي .. و فعلاً تمينا للأخر لين ما راحوا الناس تقريباً و ما بقى إلا الأهل و حدرت .. حدرت و ي أبويه و عميه و أخوان علياء ! شفتها .. كانت عروس بكامل أناقتها .. علياء بنت رقيقه و هاديه .. جمالها بسيط ! روحها جميله .. لكني ما أحس بشي حالياً .. فارس قالبني فوق تحت .. قربت منها و حبيتها ع راسها .. أبويه و أبوها و أخوانها سلمو عليها .. مسكت إيدها ! كانت ترتجف و بارده .. ضغط ع إيدها أبي أطمنها .. تصورنا كمن صوره و طلعوا الريايل .. و صعدوا بعدها خواتي و أميه و أمها .. سلمو علينا و تصورنا .. بعدها قمنا قصينا الكيكه و الحركات اللي مالها داعي .. خلاف رحنا للحجره عشان نتصور ! علياء كانت مرتبكه واايد .. و لا جني كنت أرمسها و لا جني عُمر اللي تعرفه ..

همست فأذنها أطمنها : عليا .. أششش أهدي ما بأكلج ترى

" فهد "

قالولي أنه عُمر يتصور و ي حرمته .. من يخلصون بوديهم الفندق .. طالعت فارس اللي قام ! فجأه أختل توازنه مشيت خطوتين و طاح بس عبيد مسكه قبل ما يضرب راسه ع الأرض .. قربت منه بسرعه !

ضربته ع خده : فارس .. فارسس !!

عبيد : بسم الله شو ياه ! فويرس

علي : شو صار ! بلاه فارس

: ما أدري

سحب عبيد كوب الماي و رشه عليه بس ما قام ! خفنا .. خفنا يكون ها الشي من راسه و لا صار له شي .. شله عبيد بين إيدينه و ظهر به من القاعه .. طلعنا كلنا ! من شافه أبويه تخبل و ركب وي عبيد و طلب مني ما أخبر عُمر بشي .. ي رب أستر إن شاء الله شي بسيطه .. بعد نص ساعه عُمر و حرمته طلعو .. وصلتهم القاعه بدون ما أقوله شي ! أدري به وايد يحاتي فارس و إذا قلت له يمكن يودر حرمته و يروح المستشفى .. من وصلتهم ودرت السياره و علي كان لاحقني بسيارته .. رجعنا القاعه .. أنا ركبت سيارتي و رجعنا كلنا البيت .. بس بدون فارس و أبويه !

أميه : عيل وين أبوك !

ريم : فارس ما راح العرس

: أمبله .. بس طاح هناك بأخر العرس ودوه المستشفى

أميه : بسم الله .. من شو طاح

ريم : راسه فهد ! ليكون ضرب راسه

: لاء ما ضرب راسه ما صار شي .. كان يالس فجأه طاح و تلاحق عليه عبيد قبل ما يضرب راسه

أميه : أتصل فأبوك تخبر عنه

" فارس "

فتحت عيني .. حصلت عمريه فالمستشفى .. طالعت عميه ! و السيروم .. و عبيد ! شو صاير .. أنا ليش إهنا .. صبر صببر .. هيه صح طحت .. دوخت و طحت .. رفعت عيني طالعت ويهه عميه قرب مني يطالعني بقلق واضح ..

عميه : سلامتك ما تشوف شر .. جذا تسوي ي فارس

همست : شو صار ! شو فيني

عميه : طول ها الأسبوع ما دخل حلجك غير الماي شو تتريا من جسمك ! ما تحمل

تنهدت بضيج .. هذا وقته ! وقته أطيح .. هيه عندت طول ها الأسبوع ما أبي أشوف حد و لا أكلم حد .. أدري أنه محد خسر غيري ! طالعت عميه و شفت عبيد اللي يالس يتعبث بفونه

قلت بتعب : عميه .. أنا ما بسكت ع سالفه يوسف

وقف عميه و يلس ع الشبريه : ولديه فكر عدل .. أنته بدمر مستقبل ولد عمك

: ليش هو ما فتكر فيه لما ضربني .. ليش ما يفتكر فيه كل مره يضربني فيها

عميه تنهد : أدري اللي سواه غلط .. بس هب المفروض نعالج الغلط بغلط

قلت : الغلط أنكم تسكتون عن الموضوع .. بس خلاص دامك هب راظي أنسى السالفه ..

كلها ساعتين و رجعنا البيت و الدكتور يوصي ع تغذيتي .. حرمه عميه كانت واعيه سألتني عن حالي و طمنتها و صعدت فوق لحجرتيه .. قفلت الباب و رحت بدلت و صليت و تسبحت عن ريحه المستشفى اللي عالقه فيه .. طالعت فوني ! حصلت مس كول من خلف .. تسدحت ع الشبريه و أتصلته به ..

قلت : شحقه ما رقدت ؟!

خلف : عندي أمتحان و مواصل .. شو العرس !

تنهدت : عادي ..

: اليوم أروم أشوفك ؟!

: هيه دام الحارس مشغول وي العروس

ضحك : إنزين خلينا نتشاوف

: أوك ..

: إلا تعال أنت ما تذكرت شو صار لك !

: أمبله .. طحت روحي و ضرب راسي ع المغسسله

: أيوا .. يعني محد ضربك ؟!

: لاء

ما كنت متعود أقول كل شي عن حياتي لخلف .. صحيح يشاركني سر كبير لكن ما أقوله كل شي يصير ! حطيت فوني طالعت الساعه ! كانت ست الصبح .. لازم أرقد ! ما أبي أرقد .. يمكن أبي أرقد .. أفضل إني ما أرقد .. خاطري ما أرقد .. أوف بس ! قمت من شبريتي .. كنت لابس بجامه قطنيه بنطلون وسيع و قميص وسيع ! طلعت من حجرتيه و نزلت تحت .. دخلت المطبخ ! رحت صوب الكبت اللي تفتحه ريم دوم و طلع من نسكافيه .. طلعت لي حبه .. بس تنحنت ! كيف تسويه !!!! شو تسوي بالضبط ! ي الله .. ودرته و ظهرت من المطبخ .. وقفت فنص الصاله .. شفت المرايه الكبيره اللي محطوطه فنص الصاله ! قربت منها .. قربت و عيني ع عيوني .. أطالع عيوني بالضبط لين ما قدرت أشوف خطوط عيوني الحمرا ! .. مديت إيدي للمرايه و لمست صوره عيوني بها المرايه .. تعبان ي عيوني ! قول .. أرمس .. أصرخ .. أدمع دخليك أدمع .. تعبت من الكبت .. أدمع .. لكنه ما تحرك ساكن حتى ما دمع ! أبتعدت بهدوء و صعدت فوق و حدرت حجرتيه و قفلت الباب ..

" ميثا "

مر أسبوع كامل و اليوم فارس راح المستشفى و سولو له كشف و طلع سليم و أحينه يقدر يمارس حياته اليوميه بشكل طبيعي و يرجع للمدرسه .. قال للشرطه أنه هو طاح و تسكر الموضوع ! عُمر و علياء تمو يومين فالفندق و رجعو .. و اليوم عُمر مستلم فارس فمكتبه و يدرسه و صوتهم واصل للصاله ! شوي يتهاوشون و شوي يضحكون .. أحس علياء مضايجه ! من حقها عٌمر عايش حياته كأنه عزابي .. عمور ما يفهم فالرومنسيه موول ، الله يكون فعونها ..

فجأه شفته طالع من المكتب و رافع كندورته و طاير ركيض برع و طلع ورى يصارخ : فوويرس تععال ما خلصنا .. ي ولللد

ضحكت أميه : ذبحته أميه خلي يريح شوي

عُمر مشى لباب الصاله : ماشي راحه لازم أيب فوق التسعين ها السنه

الريم : عُمر والله بهدلته خله شوي يريح حتى ما خليته يرقد الظهر اليوم راد من المدرسه هلكان

بس عُمر مول ما سمع كلامنا و ظهر يدور ع فارس اللي شرد .. طالعت علياء اللي كانت منزله راسها و تتطالع فنيان القهوه اللي بيدها ..

همست : علياء شو رايج نسولف فحجرتيه

حطت فنيانها و قمنا لحجرتيه فوق .. سكرت الباب و طالعتها بعد ما يلست ع السرير : بلاج مضايجه ؟! في عروس تتضايج بعد أسبوع من عرسها

طالعتني : و في عروس تنهمل بعد أسبوع من عرسها

يلست حذالها : لا تظلمين عُمر .. هو جاف شوي ما يعرف كيف يتعامل مع البنات تحمليه

علياء : ميثا الموضوع مش موضوع ما يعرف يتعامل و بس .. هو كل تفكيره ب فارس .. صرت أغاار منه والله

ضحكت : ما عليه هو دومه جذا .. أم فارس الله يرحمها صوته ع فارس وايد عشان جذا هو متهم فيه وايد

علياء : بس أهتمامه فيه يضايجني .. خاطري مره نتكلم عن حياتنا .. خاطري يتغزل فيه بس مول مافي ع لسانه إلا فارس و فارس

تنهدت ! شو أقولها ! .. من حقها تزعل .. أوف من ها الفارس أوف !

" محمد "

خذت نفس و بدت ملامحي للجديه و العصبيه و دخلت .. أبي أمثل جدامها بها الشخصيه اليديده عشان أبدا وياها صفحه يديده .. إذا أنا ما بديت بالخطوه بنتم جذا طول حياتنا لازم أبدا خطوه خطوه وياها .. اليوم قبل ما أطلع أمرها بصوت حازم تنقل كل ملابسي و أغراض لحجرتها اللي هي أساساً كانت حجرتنا .. و دانه بخليها ترقدها فحجرتها اللي مرتبينه لها بس ما ترقد فيها و هاذي أول خطوه .. دخلت شفت دانه يالسه فالصاله و تلعب بألعابها رحت صوبها و شليتها و طيرتها فالهواء و هي تضحك ..

همس لها : وين ماما ؟!

ردت بطفوله و هي تحرك عقالي : فالمطبخ

نزلتها و هي سحبت عقالي .. فريت غترتيه ع الغنفه و رحت صوب المطبخ .. دخلت بهدوء ! شفتها ترتب الطاوله و معطيه الباب ظهرها .. ودرتها و رحت فوق لحجرتها فتحت كل أبواب الكبت و حصلت ملابسي مرتبه و منظمه .. أبتسمت ! رحت تسبحت و لبست بجامه و نزلت تحت شفتها ترتب غترتيه و طبقها و تحطها ع الغنفه و راحت شلت دانه .. قربت منها و شليت دانه و نزلتها ع الأرض

: من اليوم و ساير لا تشلينها هي كبرت لين متى بتشلينها

: مافيها شي

: لاء .. خلاص كبرت وزنها زايد ما ترومين تشلينها

مسكتها من إيدها و مسكت دانه من إيدها و رحنا المطبخ و هي تحاول تسحب إيدها من إيدي .. لما يلست ع الكرسي ودرت إيدها .. تغدينا بهدوء و بسوالف دانه الطفوليه .. بعد الغداء صعدت فوق عشان أريح .. دخلنا تحجرتنا و تسدحت ع السرير بأريحيه و أبتسامه ع شفاتي .. برجع جواهر لي مره ثانيه و ما بتراجع .. جواهر بترجع لي بإذن الله ..

" فارس "

مسكني فهد من ذراعي و دخلني المكتب .. شها الحاله كل واحد مستلمني و يسحبني من صوب عشان يدرسني ! ما أبي ي عالم ما أبي ! ملييييت .. من البارحه و هم مستلميني .. بدأ فهد يشرح لي بعض القواعد و الأساسيات اللي حافظها و الكلمات و طلع لي كلمات صعبه عشان أعرف معانيها و طلب مني أكتب تعبير ! والله مالي خلق ..

قلت : فهد الله يخليك خليني أرقد شوي بس ساعتين خلاف بكتب التعبير

فهد تنهد : رحمتك .. قوم بس بعد الرقاد تكتبه

حبيته ع راسه : تسلم

شرد لحجرتيه بسرعه .. يت بتسدح ع السرير بس حصلت فستان ع السرير ! فستان لونه عنابي طويل طالعته بستغراب منو حطه إهنا !! شليته كان حلوو ! بس بسرعه خشيته فالكبت و حمر ويههي عن يشوفه حد ! بس منو حطه إهنا ..! فجأه تبطل الباب و حدرت الريم

قالت بحماس : شفتي الفستان

شفتي !!! : أنتي اللي حطيتي الفستان

: هيييه .. يالله متحممسه أسمعي أنا كل ما أروح مكان بشتري لج شي لوقت العمليه بيكون عندج ثياب

: ريمو ليش ترمسيني جذا

مسكت إيدي : لأنه لازم جذا أرمسج .. باجي شهر و أسسبوع ع الأمتحانات و بعد الأمتحانات بتسوين العمليه .. متحمسسسه
__DEFINE_LIKE_SHARE__

forza alain · 06-02-2013, 12:12 PM

روااااااايتج تجنننننننن طرررررررطرررريييشن والله جد عيبتني وفاااارس حرااااااام والله كاااسر خااااطري ابا ولد والله حراااام وعموري هههههه عيبني يوم ركض عسب فااارس ههه م ينلام داام ام فاارس موصيته ع فاارس وعلي ابد ابداا ابداا م حبيته والريم وميثو فدييتهم والله كوول جواهر تستهبل وااايد اففف وحمود غصبن عنها بترد لك وعليا افففففف ابد م حبيتهاااا وانتي امووووت فيج تسلمييييين ع باااااارت جمييييل شراتج ونترياج مع باااارت يديد __DEFINE_LIKE_SHARE__

الريم المزروعي · 06-02-2013, 12:48 PM

ابدااااااااااااااااع في ابدااااااااع
الرواااااية طررر طرر طرر وااايد حلوة وفكرتها يديده بصرااحة
ننتظرج حبوووبة فالبارت الييآي لا تبطييين ^^ __DEFINE_LIKE_SHARE__

بعثرهَ هَادئهُ · 06-02-2013, 07:24 PM

تسلمون حبايبي ع التواجد . .
أسمحولي ما رديت ع ردودكم واحد واحد

أحينهُ بحط بارتَ ثاني تعويضُ لأمسَ
ترى نسسيتَ أنشغلت و ما يا فبالي أحطَ البارتُ . .

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
قلْ ۈآنتٍ سآج'ـد }~	همس العشق	الإسلام والشريعة	0	09-26-2010 12:30 AM
أنتَ عنْديـۓ شَيـۓ غيرْ ۈأنتَ فيـۓ قلْبيـۓ ڪبيْر~ F6amy	~ Ƙяạzyo❥	عدسة الاعضاء , كاميرا الاعضاء	13	07-20-2010 06:20 PM
أنـآ لكَ أنتَ لي ,, [ ترحيب ]	أنـآ لكَ أنتَ لي..}	تراحيب وتهاني	7	06-27-2010 09:21 AM
حيثُ أنتَ .... 9 نيسان ..	محروم.كوم	منتدى أخبار المواقع والمنتديات العربية والأجنبية	0	04-09-2010 03:00 PM
لتكــــن أنتَ، أنتَ، فأنتَ، أنتَ!!	♕ وليد الجسمي ♕	الإستراحه العامة	7	09-12-2008 04:02 AM