المشاركة الأصلية كتبت بواسطة forza alain

	باااااااااارت يجننننننننننننننننننن تسلمييييييييييييييييييييييييين صج يجنننننننننننننن منصوووووور قهرني زين انه ذياب صفعه اف ونانا فديتها حرااااااااااااااااااااام وميوود وغايه عسسسسسسسسسسل تسلميييييييييين مره 2 ومتى باارت الياي

البوح السابع عشر .~
عذبة . ~
قاعدة مع أختي علاية بالصالة ، توها أمي طلعت غرفتها تنام وريماني راقدة ما أدري شوي اينهم ع نوم الظهر . . قاعدة ع الكرسي . . من بعد العملية أحس تعبت مب مثل ما قالوا أنه الألم بيخف على طول ، كملت شهرين احينة وبعده الألم . . أحيان جد جد ما أقدر أمشي أبداً وكلهم حسبالهم إني اتمصخر وأولهم علاية . . !
علاية: فكرتي بالموضوع
أنا [ ببلاهه ] : أي موضوع ؟!
علاية [ تتجتف ] : بلا إستهبال ، خطبتج
أنا [ أطالع الجهة الثانية ]: مابي أتذكر بليز غيري الموضوع
علاية: إنزين شو السبب . .؟! عشانه غريب
أنا [ ابتسم لها ] : علاية لا ترجعين المواجع ، ترا في أشياء تذبح لا تذكرتها
علاية [ بصدمة ]: في شيء أنا ما أعرفه ؟!
أنا : هيه فيه ـ ولا تحاولين لأني ما رح اقوله لج
علاية [ بعدها مصدومة ]: من متى مخبية عني ؟!
أنا: من زمان ـ يمكن أربع خمس سنين ورا . . علاية بليز لا تردين المواجع
علاية : دام هان عليج تخشين عني هالشيء . . أكيد خاشة أشياء
سكتت، يعني شو تبيني أقولها ؟! أصلاً أنا أمي ما قلتلها كيف تبيني أقولها أصلاً مستحيل أقولها إنه الحادث اللي صارلي لما كنت صف عاشر أذاني وايد مستحيل أقولها إني صرت عقيم ولا أقدر أييب ياهل ، ما رح أصير أم !!!
علاية: وين سرحتي ؟! خلاص مابي أعرف شيء دامه يريحج
أنا [ ابتسم ] : بيي يوم وبتعرفينه
علايه : إن شاء الله
شوية وتدخل روضة , ,
روضة: السلام عليكم
أنا وعلاية: عليكم السلام
علاية: وين كنتي ؟!
روضة: بالمزرعة
علاية [ عقدت حياتها ]: نعم ؟! بروحجج
روضة [ تهز راسها ]: لا معاي حسين ولد عمي
علاية [ باستنكار ] : هو رد وياج توه !!
روضة : إيه
علاية [ بعصبية ]: ويعييه . . خير نعم وين تبين !! هذا يظل غريب عنج
روضة [ بخوف ] : مالج شغل فيني عندي أبو وأم يحاسبوني
علاية: مو هذا الدلال اللي خربج . .
أنا: علاية خليني معاها سيري فوق كملي شغلج
علاية: شو ؟!
أنا: روحي كملي شغلج أنا بتفاهم معاها
علاية: ع شوو يا حسرة ؟!!
أنا [ بحزم ]: علاية
علاية: زين زين بسير . . [ راحت فوق وهي تتحلطم على روضة ]
روضة: عذبة . .
أنا: إقعدي رواضي [ مسكت يدها وقعدتها ] إسمعي ترا وجودج مع ولد بروحكم ما يجوز
روضة: أدري بس نحن بمكان عام . .
أنا: أدري بس الناس ما عندها غير المظاهر . . باجر بتصير سمعتج ع لسانهم . .
روضة: عذووب والله ما سوينا شيء . . وبعدين والله بس كنا صوب الخيول ورجعنا
أنا [ بابتسامة ]: أدري حبيبي ، بس أنتي بنت وهو ولد والشيطان شاطر
روضة: بس
قاطعتها : أدري أنه يحبج . . وأدري أنه مستحيل يضرج ، بس وجودكم بروحكم بيضركم ما تدرين الشيطان شوب يسوي
روضة [ تبتسم ] : أدري . . السموحة ما رح أعيدها
أنا: لو تبين تشوفينه [ أغمز لها ] جدامنا خل حد من الكبار معاكم . . ولا بجمعات الأهل
روضة [ بحيا ] : هههه عذووب بس لا تحرجيني
أنا: روحي بدلي ملابسج يلا . .
روضة: أساعدج أوديج فوق ؟!
أنا: لا بتم هنيه
روضة: أوكي [وراحت ]
قعدت أفكر باللي خاطبني يقولون اسمه [ أفكر ] شو قالوا اسمه !! أصلاً رح أرفض وتدرون شو السبب ليش أفكر فيه . . !!
سهيل .~
وصلت الدوام وقعدت أشوف شغلي ، فاقد سلطان وايد المفروض نكون مع بعض . . ييت أدق له بس قطعني واحد توه يديد داخل
هو: المدير يبيك تحقق مع واحد . .
أنا: شو مسوي ؟!
هو: والله ما أدري بس الأوراق معاه
أنا: أوكي دخله وييب الأوراق [ ابتسم له ] مو تنسى
هو [ يبتسم ]: إن شاء الله
شوي وطلع ـ ورد دخل مرة ثانية ومعاه واحد . .
انصدمت يوم شفته . . !!
وقفت على طول . . أبويه !!
الشرطي : هذي كل الأوراق ..
أنا [ أقعد ] : تقدر تتفضل وأي حد ايي لا تدخله
الشرطي: إن شاء الله
أنا [ أقرأ الأوراق ]: القيادة تحت تأثير الكحول . . يعني لاحقني لين هنيه . . !
أبويه: أنا أبوك يا ولد
أنا: وأنا الحينه شرطي لازم أقدم واجبي على أكمل وجه . . لازم حد يكفلك عشان تطلع من هنيه
أبويه [ يعقد حياته ]: بتقطني بالنظارة !!
أنا: لين ما حد ايي يكفلك . . [ أعطيه تلفون المكتب ] تقدر تتصل بأي حد عشان يكفلك
أبويه: وأنته !
أنا: ما أقدر أكفلك . . [ أقرب التلفون منه ] يلا لأنه عندي شغل
أبويه [ كان يبي يقول شيء بس سكت . . قرب من التلفون وشلاه ضغط كم رقم ] . .
أبويه: ألووه . . أنا سالم . . هيه تعالي مركز الشرطة اللي ب [ . . . ] . . حاجزيني ما بيطلعوني إلا بكفالة . . ليش ؟! هااه . . أوكي برايك [ وسكر ] أتصل بواحد من أعمامك اييني
أنا: ما بتصل . . الليلة بات بالنظارة وباجر بدور لك كفيل . . [ أنادي الشرطي ] يا شرطي . .
الشرطي: نعم ؟!
أنا: وداه النظارة لين ما ايي حد يكفله
الشرطي [ حط الكلبجات بيده ]: تفضل
أبويه إطالعني بنظرة وعقب سار معاه . . سامحني يا أبويه بس أنت اللي حديتني على هالشيء !! يمكن هالشيء هو اللي بيردك لنا . .
أرجوان .~
طلعت مع ذياب بعد ما لبست شيلتي وعباتي وطبعاً ما نسيت الغشوة . . ركبت السيارة
ذياب [ يرمس بالفون ] : إسمح لي يا ريال . . والله طلعت لي شغلة مع الأهل . . خلاص بشوفك مرة ثانية . . مع السلامة [ يطالعني ] زين جي زعل الريال
أنا: يلا عاد كلها يوم واحد . . إشتقت للطلعة معاك
ذياب [ يبتسم ]: والله الطلعة معاج تسوى الدنيا وما فيها
يقوم ويسكر الجامة اللي جدام بالشمسية . .
ذياب: نزلي غشوتج محد بيشوفج
أنا [ أنزلها ]: زين وين بتوديني ؟!
ذياب [ يفكر بصوت عالي ] : مممم . . شرايج نروح نتشري للبيبي . .
أنا [ ابتسم ] : جانك حاس اني ما شريت ولا شيء أبداً
ذياب [ بصدمة ] : صدق !!
أنا : هيه
ذياب: عيل غايته . .
ساق لين المول . . وأنا بس سرحانة بالطريق . . من زمان ما طلعت ولا تأملت الشوارع !!
ذياب: وصلنا . .
صديت صوبه وعقب حطيت غشوتي ونزلت . . يا حقي جهتي ومسك ايدي ومشينا مع بعض . . لين ما دخلنا المول . . وع طول راح لمذر كير . . !
ذياب: ناويه تفلسني أختي !! حتى جنطه ما يايبه
صح ما يبت جنطة بس شليت البي بي . . أصلاً نسيته بالسيارة ههه . .
ذياب: أتمصخر بلاج بوزتي
أنا: ههه ما بوزت . . لهدرجة ولدي يهمك ؟!
ذياب: هيه طبعاً ولدج ولدي ولا نسيتي
أنا [ ابتسمت ] : كيف أنسى وأنا السبب باللي صار لك !!
ذياب [ بجمود ] : غيري الموضوع
سكتت عنه هالموضوع حساس بالنسبة حقه . . لما كنا بعمر 14 سنة بعد ما أمي توفت . . طلعت ألعب الشارع . . جي مزاج !! وذياب كان يحاول يمنعني بس منو قال أنا عنيده ورأسي يابس . . بالصدفة فجأه جي يات سيارة صوبي ولا انتبهت لها . . ف عطول يا ذياب وفرني بعيد ودعمته السيارة . . بس ما تأذى . . لأنه السايق بطأ سرعته ع طول . . عقب كم سنة قال لي في لحظة ضعف هالحادث خلاني عقيم !! كنت ألوم عمري مليون مرة اني تسبب في عقم أخويه توأمي . .
ذياب: أرجوان [ يرفع بدله بناتية ] هذي ولا هذي [ بدلة ولادية ]
أنا [ ابتسم له ] : اختار اللي يعيبك ! بجوف بتحزر ولا
ذياب [ يفر البدلة الوردية ويتم ماسك الولادية ] : ولد
أنا: صح . .
ذياب: و أحلى ولد دام امه ناناتي
ما خلى بدلة بالمحل ما شراها . . ملابس داخلية . . مراضع صغيرة كيوت . . وغيره من سوالف اليهال . . وحجز سرير لونه بني خشبي ع اساس ايي عقب يشله . . مشتراه اليوم وصل أكثر عن ألفين . .
ذياب: تعالي بنقعد بكوفي شرايج ؟!
أنا: لا خل نروح مطعم يوعانة
ذياب: إن شاء الله
مشينا للمطاعم وطبعاً هو شال الأجياس مع خلاني أشل معاه . .
واحد يقرب منا: هاه الحبيب . .
ذياب [ يطالعني ] : لحظة
ومسك هالريال ومشا معاه لشوي بعيد لكني أقدر أشوفهم . . تم معاه شوية وعقب راح
ذياب: عنلاااته والله . . [ يطالعني ] يحسبج حرمتي يقولي هاه اعتذرت مني عشان حرمتك [ يضحك ] أونه متزوج بالسر
ضحكت . . عيل ما متزوج بالسر !!
قعدنا بالمطعم في قسم العائلات . . طلبنا أكل وعقب كلنا . . !
غاية .~
بعد ما أختاروا لي بدلة ماصخة دخلت ألبسها . .
قميص طويل لين الركب لونه أحمر وفيه حزام أسود بالنص عبارة عن سلسلة ضعيفة وكمه طويل . . لبست تحته هيلاهوب شبه شفاف لأنه ما عندي غيره !
وطلعت . . ما جفت ديموه بس جنان اللي موجوده
أنا: حلو !!
جنان: حلوه ما شاء الله عليج
أنا: ترا أول مرة يشوفني بلبس قصير جي
جنان: من الله لابسة هيلاهوب تحت !!
أنا :ما علينا بتمكيجيني
جنان [ تقوم ] : هيه تعالي
أنا: لا وين بصلي المغرب أول
جنان: لا قومي توضي احينه وبحط لج ميك أب يلا
أنا : زين عيل وين ديموه ؟!
جنان: طلعت . . يلا روحي
رحت توضيت ورديت مسحت عمري وتأكدت أنه البدلة ما جاسها ماي وايد
جنان [ تسمع الأذان ] : الله أكبر وأعظم . . يلا بنصلي وبحط لج . .
وبعد ما خلص الأذان صليت ويات جنان تصلي بعد ما توضت . . وعقبها حطت لي ميك أب خفيف
خالد .~
اليوم تأخرت بالدوام لأنه منال أخت بدور عندنا فقلت أحسن أخليهم ع راحتهم شوية . .
دخلت البيت جفته هدوء والصالة ظلمة . . أكيد منال روحت وبدور بالغرفة . .
دخلت شوي شوي خفت لا تكون نايمة وأزعجها . .
جفتها لابسة لبس قصير وقاعدة ع السرير وشكلها مجهزة عمرها صدق صدق حقي . .
تقربت منها بخفة . . وهي قامت بدلع وحضنتني . .
بدور: إشتقت لك . .
ما رديت لها الحضن . . وكنت أفكر شو المناسبة !!
أنا: شو المناسبة ؟!
بدور [ وهيه بعدها حاضنتني ] : لازم مناسبة !
أنا: هيه ..
بدور [ تحرك ايدها ع رقبتي بطريقة غريبة ما تعودت عليها ] : عندي لك مفاجأه
أنا [ بتوجس ] : مفاجأه !

بدور [ تقعد ع السرير وتحط ريلها ع ريلها الثانية ]: هيه . . انا حامل
سكتت وأنا أتهجأ المفاجأة الي قالتها . . هيه حامل !! بس كييييييييييييييف ؟ ؟ ؟
أنا [ بدون إحساس ] : إنتي ما تشربين العصير ؟!
بدور [ بصدمة ]: يعني أنت السبب ؟!
أنا [ هزيت رأسي ] : بدور ليش جي سويتي ؟!
بدور: أبي ياهل . . [ بعصبية ] لين متى بنتم جي ؟!!!
أنا: بدور السالفة مب مثل ما أنتي متخيله السالفة غير !!
بدور [ بصوت واطي ] : إطلع برع . . برع
طلعت برع عنها . . ما أبي أحتك فيها وأنا معصب . . كيف يعني تغافلتني وما تشربه . . كيف حملت !
أه يا بدور ما تعرفين شو اللي ياي . . بخليج اليوم وباجر لي تصرف ثاني معاج
ديمة .~
قاعدة في الحديقة ع المريحانه وسعيد وراي . . والطرف الثاني جوري وعبدالله على الكراسي يتناقشون بالمشروع مالهم . . جوري جدية وعبدالله ماخذ الأمور لعب . .
سعيد: الله يوفقهم يارب
أنا [بجرأة ]: ونحن . .
سعيد [ يقلدني ] : ونحن . .
أنا: هيه . . نحن يعني أنا وإنت !
سعيد: ديمة تتوقعين لو خطبتج بيوافقون؟!
أنا: ليش لا . . شو ينقصك
سعيد: ديمة . .
أنا [ أطالع جوري وعبدالله ] : شو ينقصنا عنهم ؟!
سعيد: تدرين كم الفرق بيني وبينج ؟! ثلاثين سنة . . متخيلة ؟!
أنا [ أدمع ] : قول إنك ما تحبني . . ليش عيل تعلقني فيك ليش ؟!
سعيد: ديمة لا تصيحين . . خلاص أنا بتصرف . . [ يحط ايده ع جتفي ] أنا أحبج صدق !
أنا ابتسمت . . لا تلوموني . . ما أدري كيف حبيته . .
سلطان .~
قمت على صوت دق الباب . .
صرخت : زين زين . . [ بصوت أعلى ] قمت
فتحت عيوني يوم فزت سمية من حضني . .
سمية [ بصوت واطي ] : خوفتني
أنا: السموحة . .
قامت من حضني ودخلت الحمام . . وأنا رحت أفتح الباب جفت ميرة
أنا: نعم أنسة ميرة بغيتي شيء
ميرة: لي متى بتقعد وياها إشتقت لك أنا !!
أنا: ميرووه حبيبي والله تعبان أبا أنام . .
ميرة: زين تعال نام بغرفتي . . ليش اتم معاها !!
أنا: زين جوفي بروح أصلي وبيي عندج أوكي
ميرة : لو رديت ترقد عندها بضربها ترا
أنا: لا عاد كله ولا تضربيها بيي
دخلت الغرفة مرة ثانية وأنا أضحك ع ميرة !!
سمية [ تمسح ويهها بالفوطة ] : ميرة ؟!
أنا: هيه
سمية تضحك: إشتاقت لك
أنا [ أقرب منها ]: وإنتي !
سمية [ تبعدني ]: سلطان خل أصلي المغرب روحي متأخرة . .
أنا : زين صلي . . بس حسابج بعدين مب أحينه
سمية: روح صلى عن أتي ميرة مرة ثانية ما فينا ترا . .
ضحكت . . بس دخلت الحمام أتوضأ بعد ما شفت سمية تصلي . .
مايد .~
توني واصل بيت عمي سلطان عشان أشوف غاية . . جي فجأة تعلقت فيها . .
حمدان : النسيب !!
أنا [ أطالعه ] : هلا
حمدان: أبويه يكلمك
أنا :هلا عمي
عمي سلطان: شحالك دراستك ؟!
أنا: الحمدلله . . باجي لي التدريب وبتخرج
سمعت حسها وهي معصبة من ذياب . .
أرجوان: ذياب بس خلاص . . ترا وايد تأخرنا على الصلاة . . [ تنزل فونها ] أووف والله لصقة
الكل ضحك ع كلامها . .
أرجوان: أوه عندنا ضيوف [ تقربت مني ] سلام عليكم ولد العم
أنا: عليكم السلام . . شحالج [ أشوف بطنها اللي جدامها ] شخبارج ؟!
أرجوان : الحمدلله . . يلا عن إذنك بروح أصلي
أنا: تقبل الله . .
راحت فوق . . حسيت براحة لأني صرت أكلمها بدون حدود . .
أنا: عيل غاية وين ؟!
حمدان: تترياك بالغرفة اللي دوم تقعدون فيها
أنا: ومقعديني إهنيه ليش ؟!
عمي سلطان يضحك : سير يا بوي لها سير عن تموت علينا
حمدان ضحك . .
أنا [ أقوم ]: ما عليه . .
مشيت للغرفة . . ودخلت وسكرت الباب . .
جفت ملاك جدامي . . لابسة لبس قصير وايد . . أول مرة أشوفها جي !!
ومحطية ميك أب بعد . . !!
أنا: إنتي ع شو ناوية ؟!
غاية : على رضاك . .
أنا [ بهمس ]: ناوية على روحج اليوم ؟!
غاية تضحك برقة . .
أنا [ أقرب منها وأهمس ]: فديتج . . فديتج [ بصوت واطي حيل ] فديتج
وباقي ما يحتاي تعرفونه !!
مريم .~
قاعدة أكلم فارس ع المسن . .
أنا: فارس ولد خالتي خطبني . .
فارس: نعم !! ونتي شرايج
أنا : ولد خالتي ما ينعاب . . دارس برع وعنده شهادة
فارس: يعني كنتي تترينه واعتبرتيني تسلية لا غير !!
أنا: فارس
فارس: زين قلتليلي . . ولا صدمتيني
أنا: فارس أنا بوافق
فارس: وافقي . . وتكون نهاية حياتج
أنا: يعني شوب تفضحني !!
فارس: وتظنينها صعبة علي !!

سكرت المسن عنه . . صرت ما أطيقه من لما عرفت أنه صقر خطبني !!
أصلاً كيف بيفضحني هو ما يعرفني .. إسمي ما يعرفه . . الصور مب صوري . . صور مها . . وهو مسحهم !!
طلعت من غرفتي ورحت غرفة مها . . جفتها ماسكة راشد وتفهمه
مها: غريبة ياية غرفتي ؟!
أقعد وياهم ع الطاولة . .
أنا: حرام !
راشد [ بصوت خشن أول مرة ألاحظه ] : لا مب حرام بس غريبة ! بالعاده ما تنشافين
سكتت صح . . أنا غبية ضيعت قعدات أهلي بشيء فاضي . .
مها [ تبتسم ] : تعالي اقعدي . . قاعدة أشرح لها رياضيات
أنا: لا ما بعطلكم . . أنا بنزل عند أمي . . هي وين ؟!
مها: أعتقد بالمطبخ .. وقت عشاها . . !
أنا: إيه يلا [ أطالع راشد ] ذاكر عدل . .
راشد [ بصوت رجولي ]: إن شاء الله
طلعت من عندهم ونزلت الصالة . .
جفت أبويه قاعد وبحضنه ميرة اللي ما تبي تقعد معاه . . والطرف سمية وسلطان قاعدين
أنا: شو فيج ميرة ؟!
ميرة: مالج خص [ تحاول تخوز ايد أبويه اللي شادة عليها ] خووز هدني
أبويه: ماشي . . تبين تعكرين ع سلطان ومرته ماشي قلت
ميرة: ماحبك . . خووز
أبويه [ مبتسم ]: احبج أنا
اطالعت سمية اللي ماسكة يد سلطان ابتسمت . . يعني ميرة تبا سلطان . .
أنا: سمية شحالج ؟!
سمية [ تبتسم لي ] : بخير . .
أنا: شحاله النونو ؟!
سمية [ احمرت ] : تمام . .
حليلها بعدها تستحي . . !!
خليتهم وكلمت للمطبخ . . أشوف امايه تعابل بالطباخ
أنا: شو تسوين ؟!
أميه [ شهقت ]: خوفتيني !!
أنا ضحكت : يعني حرامي بيدخل مثلاً . .
أميه: بالعادة محد يدخل أبداً . . [ يقطع سلطة ] خاصة أنتي
أنا: يعني لهذي الدرجة أنا بعيدة عنكم !!
أميه [ تغير الموضوع ] : فكرتي بالي خبرتج عنه ؟
أنا [ احمريت ههه ] : أممم هيه . . اللي تشوفونه
أميه: الي نشوفه هاه . .
أنا: أمااايه . .
اميه ضحكت : الله يوفقج يارب
أنا: إن شاء الله
اليوم الثاني . . جمعة الأهل في بيت سلطان . . الكل متواجد على الغدا ما عدا خالد وبدور
وسمية وسلطان [ سلطان عنده دوام وسمية في بيت أهلها ]
أرجوان .~
قاعدين بالصالة كلنا الحريم . . بعد ما خلصنا غدا
خالوه عايشة : شحالج يا بنتي ؟!
أنا [ أمسح ع بطني ]: بخير ولو اني أحس بألم يروح ويرد من الصبح
خالوه نادية : ما عليه هذا لأنه خلاص قربتي للتاسع أنتي بأي شهر ؟!
أنا: السابع خالوه
خالوه نورا : بنت ولا ولد ؟!
أنا [ ابتسم ]: سر خالوه
خالوه نورا: الله يسهل عليج ياربي
ميرة [ تلصق فيني ] : فيج بيبي نفس سموي ؟!
أنا: هيه حبيبي
ميرة: من وين يبتيه ؟!
الكل ضحك عليها . .
خالوه نورا: ميرة عيب . . خلي البنت عن تعوريها
ميرة: زين . . [ وراحت ]
ديمة [ ماسك الريموت مال المكيف ] : أووف ما يتقصر شو هذا حر . .
انا: ديموه الجو أوكي . .
ديمة: لا حر حر
أنا: زين عقب بنزقر حد يشوفه
ديمة [ يفر الريموت ع الغنفة ] : أنا عندي تقرير منو بيسويه لي
انا: كل حد يسوي شغله روحه !!
ديمة [ تأشر ع جوري ] : عيل ليش أمس تسوي مالها ويا عبدالله
جوري [ ويانا ع الخط ] : مشترك تراه !!
جنان: تغارين !!
ديمة [ تبوز ]: يعني محد بيسويه حقي
الكل :لا
دخلت غاية وهي ماسكة الفون . . شكلها ترمس مايد
غاية: قلت لا . . لا يعني لا . . أمس شايفني . . هيه ماشي . . وبعدين خلاص ما بتشوفني لين العرس . . [ تضحك ] هيه عشان تشتاق لي . . أقول عقب برمسك .. باي
تطالع خاله نورا : ولدج لعوزني
خالوه نورا: الحب وما يسوي
ابتسمت مايد نسى حبي . . وعطا قلبه لغاية . . الحمدلله انه قدر ينساني . .
حسيت بالألم رد . . يارب هون علي . . قمت أروح غرفتي . .
زقرتني مريم . .
انا: هلا
مريم : عادي أيي معاج . . أبي أقولج شيء
أنا: أوكي حياج
ركبت لين غرفتي . . وقعدت . .
مريم: ارجوان أنا أسفة على كل الي سويته لج . .
أنا : مسموحة
مريم: والله كنت غلطانة وغبية وغافلة . .وفجأه صحيت
أنا [ ابتسم لها وأنا أحس الألم خلاص بيذبحني ] : عادي حبيبتي
فجأه صرخت وتميت ماسكة بطني
أنا: اي . . مريم [ أرص ع يديها ] روح نادي خالوه عايشة أه شكلي بربي
.
.

البوح الثامن عشر.~
عذبة .~
قعدت بحديقة قوم عمي بروحي . . أفكر أمس أمي ردت تفتح لي موضوع الخطبه الريال يصير ولد ربيع أبويه المقرب . . عشان جي هم محتفلين ويبون موافقتي . .
صديت صوب الباب لما نادتني علاية . .
علاية: عذااابي حر تعالي داخل
أنا [ ابتسم ]: عادي الجو طبيعي . .
علاية [ تصارخ ] : أي طبيعي !! تعالي داخل يلا
أنا: زين بيي . . أوف لصقه ما تروم تقعد بدوني دقيقة
ابتسمت لي ودخلت . . تميت شوية . . اليوم المفروض إني أرد الموافقة لأهلي . .
انتبهت على واحد داخل شبهته بأرجوان . . شكله هذا هو توأمها شو إسمه ؟! نسيت
هو [ فصخ النظارة وخلاها بيده ] : سلام عليكم
أنا: عليكم السلام
هو: شحالكم ؟! عيل قاعدة برع !!
أنا: هيه مليت من داخل وبعدين قلت أتنفس هوا طبيعي شوية !
هو [ قعد معاي ع نفس الطاولة بس مقابلي ] : دام السالفة فيها شوية هوا أكيد حاسة بضيق !
أنا [ ضحكت ]: شو دراك ؟!
هو [ يبتسم ] : جي . . [ يطالع الزرع ] شو فيج ؟! ويت ويت إنتي بنت عمي منو ؟!
أنا: بنت عمك عبدالله واسمي عذبة
هو: والنعم . . حلو اسمج ع فكرة . . زين شو فيج ؟!
أنا [ أول مرة أفكر أقول اللي بخاطري ]: بصراحة في واحد خاطبني ومب مرتاحة أبداً
هو: منو ؟! حد من الأهل
أنا [ هزيت راسي ] : لا ولد واحد من ربع أبويه
هو: شو اسمه ؟! يمكن أعرفه
أنا: اسم ابوه سالم ال . . .
هو [ بسرعة ]: أي واحد من عياله ؟!
أنا: حميد
هو : صدق ؟!
انا: هيه . . ليش تعرفه ؟!
هو: لا توافقين
أطالعته بصدمة
هو: هيه لا توافقي هذا عليه حركات بطالية . .
أنا: بس أبويه ربيع أبوه ويتريوون موافقتي
هو [ بعصبية ]: شكله أبوج يبي يقطج أي مكان . . لو ما يبيج ترا نحن نبيج
أنا: شو قصدك ؟! أبويه ما يبيني
هو: مادري بس المفروض يسأل عنه . . هذا عليه سوالف سكر وعربده !! وكذا مرة يطلعونه من السجب بكفالة . . لو ما تصدقيني إسالي سهيل هو يعرف
أنا: مادري
هو: أنا بكلم أبوج . . لو ما بيبج ترا أنا بخطبج . .
أنا: لا شو !!
هو: عيل تبين هذا ولد ربيع أبوج ؟!
أنا: لاا
هو: عيل خلاص . . [ قام ] أنا بكلم أبوج . .
أنا [ بإحراج ] : ممكن بس أعرف إسمك . .
هو ضحك : ذياب . . يلا سلام عليكم
تحرك صوب الميلس . . بس سمع ديمة تزقره
ديمة: ذيااااااب شغل السياااااارة بنودي إرجوان المستشفى
ذياب: شو فيها ؟!
ديمة: شكلها بتربي . . يلا روح احينه خالوه عايشة بتي
ذياب: إنزين يلا [ وراح ]
دخلت الصالة الحمدلله اليوم ريلي شوية أحسن . . جفت الكل مرتبش ومتوتر
أميه: عذبة انتبهي لخواتج نحن بنروح مع البنية
خالوه نورا: روحي نادية مع عايشة . . أنا بتم مع العيال
إميه: زين . .
بعد عشر دقايق . .
ديمة: حرام بعدها هيه عن الولادة ما أدري شو صار فيها فجأه !
أنا: عادي يصير تولد قبل موعدها إنتي بس إدعي الله يسهل عليها
ديمة: آمين .
ميرة [ تمسك مها ]: وين سارت ماما ؟!
مها: راحت فوق بتجهز أغراض عشان تطرشهم المستشفى
ميرة: اها ليش!
ديمة: لو ملانة خليها تدخل غرفة الألعاب تلعب بليستيشن
مها: ميرة شرايج نروح نلعب
ميرة [ بحماس ]: أوكي
راحت معاها تلعب . . وتمينا نسولف بأشياء ممله ههه . . بس أنا فكري مع ذياب . معقولة بيخطبني . . بس أنا مابي أظلمه معاي . . !
بدور .~
صدمتني ردة فعله وايد . . ما توقعت إنه لهذي الدرجة ما يبي ياهل مني . . إنززين ليش ؟!!
من الصبح قاعده بغرفتي وهو بالصالة ولا ياني حتى الغدا أتوقع يابه من برع ولا فكر يكلمني . .
طلعت له برع ببجامتي مال النوم وشعري معفوس . .
أنا [ بتعب ] : خالد والله صدك يتعبني زود ماني تعبانه . . محتاجة تكون معاي بهالفترة
خالد [ بزعل ]: تراج تسوين اللي تبينه ما يهمج رأيي
أنا: خالد خلاص أنا الحينه حامل . . ما رح يتغير شيء . . ولا تبيني أطيحه مثلاً . . !
خالد: الياهل بيأخذج مني يا بدور . . بيأخذج مني [ شل سويج سيارته وطلع برع ]
قعدت ع الغنفه . . كيف بيأخذني منه . . هذا تخبل ليكون بيغار من ولده ؟!
ذياب .~
قاعدين بالمستشفى تقريباً كملت داخل أربع ساعات . . وحريم أعمامي معاها داخل . . وأبويه واقف معاي في الاستراحه . .
أبويه [ يطالع منصور ياي من برع ] : منصور وصل
قام له ووايهه . .
منصور [ بعصبية ]: شو فيها ؟! بعدها عن ولادتها
أبويه: كل شيء يصير . . هيه حاسة بالويع من كم يوم بس صامدة
منصور: كم كملت وهي داخل
أبويه: أربع ساعات وشوية . .
منصور [ بتوتر ]: وايد . .
أبويه: مب وايد . . ادعى لها بالسلامة
منصور [ قعد وحط ايده ع رأسه ] . .
صدقه خايف عليها . . شوية وانتبهت على خالوه عايشة ياية . .
أبويه وفق لها : هاه بشري
خالوه: بعدها . . [ تطالعني ] ذياب تقدر تروح البيت اتيب ماي زمزم بنشربها عسى الله يسهل عليها
أنا: إن شاء الله خالوه . .
رحت البيت . . ما كلفت على روحي أبداً جفت ديمة بالدرب وخبرتها . .
ديمة : يعني أنت اللي مطرشينك ليش أنا الي ابتلش
أنا [ أضربها ع رأسها ]: كله يهون عشان اختج يا الخبلة
ديمة : شحالها ؟!
أنا: بعدها تعبانة . . يبون الماي لها
ديمة : احينه أروح
راحت . . ما كملت دقيقة اللي هي واقفة جدامي بدبة ماي زمزم . .
ديمة: أييب أكواب ؟!
أنا: شيء ؟!
ديمة :لا
أنا: غبية . .
ديمة: غبية حرمتك الي بتاخذها
أنا[ ضربتها ع خذها ]: مالج خص بحرمتي . . يلا انا بشتري أكواب بالطريق . . يلا ديروا بالكم ع روحكم
ديمة: أوكي
طلعت وصلت الماي للمستشفى وعقب قعدت بالسيارة . .
أنا وعدتها أرمس عمي . . خلاص أنا لازم أكلمه بتريا أرجوان تولد بالسلامة وعقب يصير خير
بس يا ذياب . . أنت وين وهي وين . . لازم تخبرها عن وضعك أحسن
سمية .~
قاعدة في بيت أهلي لأنه سلطان عنده دوام ..
فتحت البي بي أطالع المحادثات لأنه ملانة حدي . .
مريت ع بروفايل جوري أخت أرجوان . . كاتبة [ يارب سهل على أختي . . ]
اويه هيه بعدها على الولادة . . أنا المفروض أولد قبلها . .
سويت ping! لها . .
وكتبت .: شو فيها أرجوان ؟!
جوري: ولادة . .
أنا:حرام بعدها هيه
جوري: هيه صح . . بس ما تدرين يمكن خيرة . . الله يسهل عليها
أنا: آمين . .
سكرت البي بي . . وقعدت أفكر . .
أنا أبداً راح عن بالي شيء اسمه ولادة . . وااي تعور وايد !!!
اتصلت في سلطان أصيح . .
سلطان [ بخوف ]: شوفيج ؟!
أنا: خايفة !
سلطان: من شو ؟! صار فيج شيء ؟!
أنا: لاا
سلطان: عيل ؟!
أنا: خايفة من الولادة . .
سلطان ضحك . . من الخاطر وأنا بوزت . . يتحراني أتمصخر !!
سلطان: حبيبي انتي وينج وين الولاده بعده باجي لج شهرين !!
أنا: أرجوان بنت عمك باجي لها ثلاث شهور وهي احينه بالولادة . . ما تعرف شو ممكن يصير
سلطان: زين هي غير عنج . . لا تخافين وبعدين وقت الولادة أنا بكون معاج . . ما بخليج لحظة وحده
أنا: سوري سلطوني أزعجتك وياي . .
سلطان: احلى ازعاج حبيبي . . يلا بخليج عندي شغل
أنا: أنت برع ولا دوام ؟!
سلطان: لا برع . . بس مشغول . . [ سمعت صوته خفيف وهو يكلم حد يمه ] أقول انا بخليكم مع السلامة
سكرت الفون وأنا أدعي ربي يكون بصحة وعافية . .
ديمة .~
قاعدة على المريحانة اللي ورا البيت . . مب اللي جدام . . مع سعيد . .
سعيد: شوفيج ؟!
أنا: اسكت اسكت ما أكلمك أنا
سعيد [ بصدمة ]: ليش ؟!
أنا: جي بس . . عقاب
سعيد: عقاب !! أنا الي المفروض أعاقبج مب العكس
أنا: ليش إن شاء الله !!
سعيد: ما تبين تدرسين . . جوفي أنا مابا أخذ وحده مب متعلمة !!
أنا [ انحرجت من كلامه ]
سعيد: الليله لو قامت اختج بالسلامة بكلم أبوج
خليته ومشيت عنه لداخل البيت . . واي وناسة . . !!
منصور .~
قاعد مع عمي بالاستراحه . . وحدي متوتر لحد يكلمني لا صدق أعصب عليه
قعدت أفرك ايدي ببعض . . وعقب قمت
أنا [ بعصبية ]: يعني شو كملت 9 ساعات داخل . . !!
عمي [ يمسكني ]: إهدى يا ولدي . . ترا هذا مب أول ياهل لك
أنا: بس أول ياهل لها . . لا وقاصر بعد والله اني خايف عليها يا عمي خايف
عمي: الله بيسهل عليها . .
شوية طلعت الممرضة ووراها وحدة تصير لأرجوان . .
أنا: هاه شو ؟!
الحرمة: الله رزقك بولد . . يربى بعزك إن شاء الله
عمي : مبروك يا ولدي والحمدلله ع سلامة أمه
أنا [ أبوس رأس عمي ]: الله يبارك فيك يارب . . وهذا ولدكم بعد
عمي [ يطالع الحرمة ]: شحالها بنتي . .
الحرمة: تعبانة شوية . . بيخلوها ترتاح وايد تعبت
أنا: فيها شيء ؟!
الحرمة: لا بس الولادة اتعب . . يبالها ترتاح بس
أنا: أبا أشوفها . . [ لمحت ممرضة طالعة من الغرفة وتدز سرير في ياهل ] هذا ولدي ؟!
الممرضة: يس سير . . كيوت بيبي
أنا: هيه عطيه عين . . [ أطالعه ] فديته الأشقراني أنا . . طالع على أمه
عمي: شله أذن بأذنه
شليته . . صح أنه هذي مب أول مرة أييني ياهل . . بس حسيت الوضع غير . . هذا صغير وايد . . وأحمر أحمر ههه . . وهذا غير . . هذا الولد الغالي . . أذنت بأذنه . . وعقب رديته بالسرير وشلته الممرضة وياها
بدور .~
الحينه الساعة 1:00 بالليل وخالد للحينه ما رد . .
قمت وصديت للباب لما سمعت صوت المفتاح يدخل بالباب . .
أنا: خالد
خالد: منى فيني رقاد لا تعوريلي رأسي
سكتت . .
أنا: منى !!!
خالد [ بتوتر]: شو منى ؟!
أنا: أنت قلت منى
خالد: شكلج مب راقدة وتخربطني . . أنا قلت بدور مب منى !! منو منى أصلاً ؟!
راح الغرفة أكيد بيرقد وأنا تميت متصنمه مكاني . .
أنا متأكدة زقرني منى . . متأككده . . !!!

[ نسى اسمي و بإسم غيري ناداني
جرحني جرح ما عمري تألمته

وتأسف لي وتعذر لي و ترجاني
قال غلطه وسكت عنه ما كلمته

وش أسامح فيك تناديني بإسم ثاني
حسافه بس غلاك بالروح سكنته

اليوم اسمي باكر بكبرى تنساني
خلاص ارجوك لا تفتح باب سكرته

خلاص انا محيت اسمك من لساني
وكل اسم على اسمك تجنبته

ما عاد حبك يهز شي في وجداني
ولا انتا هذاك الطفل اللي دللته

انا ما اعرف اشيل هموم ولا اعاني
ولا اندم على انسان ادا عفته

و أدوس انا على جرحي وأحزاني
هذا اللي من الدنيا تعلمته ]
تتحسب بسكت يا خالد . . أنا وراك لين أخر منو هذي منى !!

حسيت فجأه بلوعة . . رحت أقصص لي ليمون . .
أمس منول قالت لي أنه الليمون وايد مفيد حق اللوعه . .
انسدحت على الغنفة .. لين بالباجر الصبح . .
قمت من نومي ع خرخشة بالمطبخ . .
خالد [ شال صحن اللومي ] : هذا إنتي ماكلته !
أنا: هيه . . [ أطوف من يمه أبا أكمل نومي بالغرفة ]
خالد [ يمسك ايدي ] : مينونة تدرين هذيل جم خمس مدري ست . . مينونة تاكلين هالكثر !
أنا: يخفف الوحام اللي أحس فيه
خالد: فيه أشياء ثانية تخفف الوحام واللوعه غير الليمون . . مكسرات مثلاً . . خذيلج موالح أحسن
أنا: خالد أنت من وين تعرف هالسوالف ؟!
خالد: أي سوالف . . ها شيء معروف أصلاً . .
أطالعه لابس كندورته . .
أنا: بتروح الدوام ؟!
خالد: هيه بروح احينه . . بتمين هنيه
أنا: هيه بنام . .
رحت الغرفة . . وسمعته طلع من الشقة . . انسدحت على السرير بضيق . . الله عالم باللي عندك يا خالد
جوري .~
قمت من الصبح أتدرب على العرض . . العرض تأجل لليوم . . !
رحت المطبخ سويت لي نسكافيه وشليته الصالة أكمل مراجعتي
ديمة [ تنزل وهيه لابسة عباتها ]: خلاص غيرت رأيي مابسير
عمي سعيد [ يطالعها ]: نعم !
ديمة [ تشوفه ]: ههه أنا بسير الكليه . . ليش انت شو سمعت !!
عمي سعيد : هيه أتحسب
ديمة: شيبه بعد شو !!
عمي سعيد: الشيبة . . [ قطع كلامه وشافني ] . .
ما أدري شو كان بيقول !!
أنا: عمي وينه ولدك ؟!
عمي سعيد: بيي احينه أنا وعيته
أنا: زين عشان نروح . . [ أجمع أغراضي ] أه ظهري يعورني
ديمة: أحسن دواج تستاهلين . . 24 ساعة قاعده ع اللاب ما مكلفه
أنا [ بنغزة ]: حتى أنتي 24 ساعه على الأيباد ما مكلفة . . ع الأقل انا أدرس ونتي !!!
ديمة: حماارة
أنا: طالعة عليج . . خوات نحن
عمي سعيد يضحك . .
غاية [ تنزل من فوق لأنه نايمة بغرفتنا لأنه أمها عند نانا ] : اقول ديمووه أنا بطلع مع مايد مار علي مع مها
ديمة : ويت بطلع وياكم دامنا بنفس الكلية
غايه :أترياج يلا
عمي سعيد: لا يا غاية روحوا أنا بوديها
غاية: أوكي باي [ وطلعت ]
ديمة [ تطالعه ] : ليش ؟!
عمي سعيد [ يطالعها ] : بس يوديج شيشة البترول تتشرين هم ما بودوج
ديمة [ بحماس ] : ويلوموني فيك . . [ إطالعتي وسكتت ]
شوفوا يا أنا فاصلة لأني مواصلة على العرض يا أختي فيها شيء !!!
شوية يدخل عبدالله
عبدالله: ها جاهزة
أنا: هيه . . نطلع أحينه ؟!
عبدالله: هيه بسيارتي
أنا [ أطالع ديمة ]: جوفي أنا بخلص العرض وبمر على أرجوان أشوفها
ديمة: زين . . اعرضي عدل عشان ما اتردين لي البيت وتصيحين !
أنا: حيوانة
ديمة : طالعة عليج
الكل ضحك . . حيوانة ردتها حقي يعني .!!
ركبت مع عبدالله في سيارته . . وجدام بعد ^^
فتحت المرايا اللي جدام . . وحطيت لي بودرة وزيدت الجرعة شوية عشاني مواصلة فما أبي يبين علي
عبدالله: صدق بتصيحي لو ما عرضتي عدل
أنا [ أحط جحل ] : أنا بعرض عدل بس لو تنيذل السير علينا . . ونقصني بدون قصد مني بصيح
عبدالله يضحك: تصيحي على عرض!!
أنا: على عرض . . امتحان . . اي شيء ! [ أرد الجحل والبودرة وأطلع الروج ]
وااي الروج الوردي وين ؟! أكيد ديموه شايتلنه . . دورت ما لقيت غير أحمر . . والأحمر فاقع . .
عبدلله [ يشل العطر ويتعطر ] : ههه صياحه أنتي !
تعطر وايد . . فوق 20 رشة . .تميت أعطس وأعطس 3 مرات
عبدالله يضحك بس . . : عندج حساسية ؟!
أنا: شوية . . بس انت زدت الجرعة
عبدالله [ يتحرك ]: السموحة . . [ يطالعني ] جنان راقدة عندكم ؟!
انا: هيه . . [ قعدت أحط روج وعقب خففته بالكلينكس ]
عبدالله: أنا أدورها . .
ابتسم له . . ما عرف شو أقول !
عبدالله: ما تلاحظين أبويه قريب من ديمة ؟!
أنا: هيه . . صح . . بس عادي بحسبة عمنا
عبدالله [ بغموض ] :إنتي تشوفينه بحسبة عمج بس هيه لا ؟!
أنا [ بغباء ] : منو هيه ؟!
عبدالله: فاصلة قسم بالله فاصلة
رديت راسي ع الكرسي . . صح فيني نووم . . !!
بس صدق شو يقصد من كلامه . . كيف هيه لا ؟!
وصلنا الكلية . . واتريينا دورنا لأنه كل ثنين يعرض . .
مريم .~
كنت قاعده بالكلية . . كلاسي باجي عليه أقل من نص ساعه . . وبروح
فتحت اللاب ومسن . .
جفته داخل . .
كتبت له : تراني وافقت على ولد خالتي . . وما رح تشوفني أبد بالمسن
فارس: بتندمين .!
كتبت له ضحكة طويلة .. وعقب بنجوف . .
طلعت من المسن وأنا مش ندمانة على الشيء اللي سويته . .
صح ولد خالتي ياني من الباب وما لعب علي . .
الحمدلله انه عقلي رد لي قبل فوات الأوان
رحت كلاسي وجفت جوري وياها ولد عمنا عبدالله . . هالثنائي لايقين ع بعض !!
أنا: سلام عليكم
جوري: عليكم السلام . .
أنا: أكيد عندكم عرض صح !
جوري: هيه . . دعواتج . . يلا بسرعة بنروح الكلاس
أنا: موفقين يا رب . . وركزوا أوك
جوري: أوكي
ابتسمت لها وكملت طريقي للكلاس . .
سلطان .~
توني راد من الدوام وتعبان حدي . . حتى ما مريت على سمية اييبها من بيت اهلها
قلت أريح وعقب اييبها . . دخلت سبحت وانسدحت على الكرفاية أبا أغط بنوم عميييق
جان يرن فوني . . سهيل يتصل بك
ياربي شو يبا ؟!
أنا: يعني يوم جفتني برقد اتصلت . . توني راد من عندك !