إِنَّ رُوحِـــــــيٍ قَرَرَت " البـَوّحَ " عَن أشَـــواقِها . . ~

أشواق تائهة · #1 02-13-2013, 10:38 AM

إِنَّ رُوحِـــــــيٍ قَرَرَت " البـَوّحَ " عَن أشَـــواقِها
بقلم .. أشواق تائهة

حين يكون هناك شخصٌ موجود على وجه البسيطة . . دائماً ما يحمل بين طيات جسده روحاً وقلباً يخفق

إن أبطال هذه الرواية من همسات الخيال الذي راودت روحي فحولتها لأشواقٍ تبوح بها روحي لأول مرة

لأول مرة أقرر كتابة رواية من بعثرات الخيال الشاسع الذي أشعر به . . هذه ال بعثرات غيرت كياني . . كم من أوقات شعرت بأني أعيش بهذا المكان وبهذا الخيال . . خيالي أشعر دائماً بأنه واقعٌ أعيشه بكل حذافيره . . بكل اللحظات وبكل الأوقات . . كما الأحلام

دعوني أحكي لكم عن أبطالي . . أبطال روايتي . . أصحاب القلوب والأرواح والأشواق . . كم قست روحهم وكم حنت . . كم ألفت الفرح وكم حزنت . . كم تاقت أرواحهم إلى البسمة . . كم ودت لو أن للأمل يد تلامس روحهم . . كم من حبٍ أردفوه قتيلاً على ضفافٍ أنهرٍ من الدمع . . كم من حب أفاقوه من سباتٍ عميق في كهف القلوب المعتمة . . كم من أشواقٍ تاهت في هضاب القلوب .. لأناس قسوا . . أحبوا .. تأملوا .. صافحوا قلوبهم مراتٍ ومراتٍ .. لأناس تركوا بصمةً حلوةً .. قاسية .. مفرحة .. محزنة في أرواحهم ..

هنا سأسطر هذه الأشواق وسأجعلها واضحة للعيان .. لن تتوه مرة أخرى وستصل إلى مبتغاها حالاً ..

أعلن عن

جديدي [ إِنَّ رُوحِـــــــيٍ قَرَرَت " البـَوّحَ " عَن أشَـــواقِها . . ~ ]

لا أبيح ولا أحلل من يحاول اقتلاع روايتي من جذورها في أي مكان أضعها فيه .. إلا بإذني .. أشواق تائهة

فقط كونوا بالقرب
__DEFINE_LIKE_SHARE__

أشواق تائهة · 02-13-2013, 10:43 AM

البوح الأول

في أحد أحياء المنطقة ، في فيلا فارهة من أرقى منازل المنطقة مع ساحه خارجية واسعة جداً تدل على رفاهية صاحبها وغناه ضمت عائلة من أبطال روايتي . . [ ! ]
.
.
في الدور [ الثاني ]
كعادته كل صباح
استيقظ من نومه ودخل الحمام [ مكرمين ] يتوضأ ، خرج من الحمام وناظر الساعة التي على جدار غرفته تشير تقريباً إلى5:00 دقائق قليلة ويرفع أذان الفجر ، مشى برزانته المعتادة ممسكاً عصاته بيده اليمين . متوجهاً لجناح أولاده لإيقاظهم للصلاة

[ سلطان محمد .. ~ 48 سنة ]
أب متحكم بأولاده .. المعلم الأبدي لهم .. سند وعون .. كان متزوجاً من مريم المتوفاة ولديه منها ابن واحد وتزوج بعد وفاتها جوليا البريطانية اللي توفت من 7 سنوات تقريباً .. مهتم بعائلته .. تجارته ..

همسة : هو يعمل في شركة العائلة مع أخ ثاني له يدعى عبدالله أما أخوتهم الباقين أخذوا نصيبهم ولم يعد لديهم شيء في الشركة ..
.
.

أنا قمت تقريباً من نصف ساعة توضيت ولبست شيلة الصلاة ومسكت القرآن أقرأ على ما يأذن الفجر
ابتسمت لما اندق الباب
أنا : تفضل يالغالي
ارتسمت ابتسامة ع شفاتي لما قال [ شدراج اني أنا]
حدر غرفتي وحطيت المصحف ع "الكوميدينو " يم السرير
قلت وانا امشي له: أصلا محد يحدر غرفتي بـ هالوقت إلا أنت
[ وقفت يمه وبست راسه ]
ياباه : تبوسين الكعبة إن شاء الله
أنا بوثوق : انت بتوديني
باباه : لاا إن شا الله بتروحي ويا ريلج
بوزت: باباه من قص عليك وقالك إني بعرس
باباه ضحك ع شكلي
بوزت زيادة وقلت بدلع: باباتي
مسح عراسي يجبر بخاطري وقال: يلا شوي وبأذن خل أسير اشوف إخوانج أقومهم للصلاة خلصي انتي وسيري نششي خواتج البنات
أنا : إن شاء الله يبااه الله يعطيك العافية وعلني ما اذوق حزنك بيوم يا رب
ابتسم لي وهو يطلع من غرفتي تميت فترة واكتشفت اني أناظر بطيفه وقفت يم المنظرة وكان شوي من شعري الأشقر طالع من تحت الشيلة دخلته وقفت أتأمل شكلي عيوني الملونة اللي ياية ع الرمادي تراه هذا اللون غريب صح أممم يا ترا لو كنت بلون عيون ثانية بطلع حلوة أمم يا ترا لون عيوني مناسب مع لون شعري
[ بسم الله شو هذي الأفكار اللي ياية ببالي أسميني خرفت خلني أسير أصلي أحسن لي عشان اوعي خواتي ]

[ أرجوان سلطان .. ~ 20 سنة ]
فتاة حيوية وحركية .. جريئة بعض الشي .. تدرس إدارة أعمال في بريطانيا سنه ثانية .. شعرها خليط من الأسود مع خصلات الأشقر اللي تزداد على أطرافه .. [ طالعة ] على أمها البريطانية بالضبط .. ذات العينين الرماديتين الغريب على العائلة .. لا أحد غيرها بـ [ هـ اللون ] .. والدتها لها نفس لون العينين .. ملامحها أوروبية بحتة .. هوايتها التصوير الفوتوغرافي .. عشقها الروحي والأبدي .. الاسم الدلع لها نانا
.
.

أنا قايم من رقادي من مساعة أصلاً ما لحقت ارقد إلا ساعتين بس يا دوب أريح عيوني ههه لا لا لا انا عيوني مب شرات عيون أرجوانووه انا عيوني عسلي بس تدرون أميـه أوروبية فمجبور أهتم بشكلي وبعيوني جي يعني هههه انولدت فيني هذي الأفكار من يوم صغير يمكن يمكن وارثنهن من أهل إميـه هههه يالله تراني أنا توأم أرجوان المهم ممم شو كنا نقول هيه انا اليوم عندي تسليم مشروع بالجامعة ولازم أطلع خط لدبي عشان اسلمه دعواتكم دخيلكم أبا أنجح ولا بقبل بأقل من ممتاز . . ترا هذا آخر مشروع حقي في ه الكورس ومحتاج أييب درجة حلوة عسب معدلي ما ينزل .. وعسب أستأنس بالإجازة
رفعت كمادات الماي الباردة من على عيوني لما اندق الباب ابتسمت وطلعت جفت أبوي الغالي
[ بست راسه ]
أبوية : طالع ع توأمتك ما شاء الله عليها
بوزت اوني : إبويـه الحينه أنا ريال تشبهني ببنية ليش ما تقول إنها هيه اللي طالعه علي
ابتسم لي: لأنها هيه الأكبر
أنا : تراها حشرتني حشرة وأنا ببطن إميـه عشان جذه خليتها تطلع برع بسرعة
سمعت صوت ضحكته وعقب قالي: يلا يا ولدي نسير نصلي الفجر جماعه
ابتسمت وأنا أمشي وراه [ ما ضاع من علم رجال يا أبوي ]
من يوم ونحن صغار وهو معودنا على الصلاة حتى الفجر أبد ما يخلينا نودرها ابد

[ ذياب سلطان .. ~ 20 سنه ]
توأم أرجوان .. صفاته مثل صفاتها .. يحس فيها وتحس فيه بكونهم توأم .. جرأته أكبر لأنه شاب .. حبوب .. طيوب .. يحب مساعدة الجميع .. يدرس اقتصاد بإحدى جامعات دبي سنه ثانيه .. يشبه أرجوان لكن عيونه عسلية .. شعره نفس شعر توأمه أسود مع خصل شقراء تزداد عند الأطراف .. شعره كثيف وطويل لآخر رقبته .. مهتم بشكله .. و الموضة .. [ نادر ما ينشاف بـ كندورة ] .. متعلم من والده العلوم الزينة ..
.
.

أنا لبست كندورتي البنيه وعقب وقفت جدام المنظرة أطالع شكلي وأعتصم لما خلصت من عصامتي سمعت حس أبوي وياه ذيابووه فطلعت عشان اسير أصلي الفجر معاهم بست راس أبوي وجفت ذياب قرب راسه أونه يباني أبوس راسه فـ دزيت راس ذياب
ذياب أونه يدلع : أبوك أبوك عشان جذه تبوس راسه أنا ليش تدز راسي هااه ليش ؟!
أنا: أنت اخوي عشان جذه بدز راسك [ وأطلع له لساني ]
سمعت ضحكته وضحكة ابوي
قلت لأبوي يوم جفته يعكس مساره : أبوي وين ساير؟!
أبويه: بوعي حسينووه أخووك هاا ابد ما يشبع رقاد خله يروح يصلي بالمسيد وراه عقب مدرسة اليوم آخر إمتحان عندهم
أنا: زين أبويه تباني اوعيـه
ابويه: جان زين بتسوي فيني خير
ابتسمت له ورحت غرفه حسون وهم سبقوني للمسيد

[ حمدان سلطان .. ~23 سنه ]
شاب في مقتبل العمر .. حياوي .. طيب .. يعمل في شركة والده .. تقريباً هو مستلم الشغل عنه .. يحرص على استشارته لو احتاج لأي مساعدة .. متخرج من سنة تقريباً إدارة اعمال من بريطانيا .. أحياناً يكون خارج البلاد لأنه يراجع فروع شركة والده الموجودة بكذا دولة اوروبية .. حنون على اهله .. أبوه وإخوانه .. قريب منهم .. هو بجر أمه البريطانية .. شعره أسود على ابوه .. عيونه بنية غامقة على ابوه أيضاً .. بمعنى آخر يشبه ابوه
.
.

كنت راقد بوسط نومي قاعد أحلم بذاك ال... [ كمممم بشوو بشوو ممم ] نسيت إفف منو بند المكيف
" بس ما عليه هذي حركاتكم أعرفها تحسدوني ع النومة لكن ما عليه مارح أقوم "

انقلبت الجهة الثانية و حطيت اللحاف ع راسي
سمعت صوته يقول لي: يالله قووم
أنا: خل يقولون إلي يقولوون خل الحساد يولوون
شكله ما سمع لأنه قال لي: شو تقول أنت ؟!
قلت له بصوت أعلى عسب يسمع : خل يقولون إلي يقولوون خل الحساد يولوون
حسيت فيه يهزني ويقول : أبويه انت رااااقد يالله قووم
قمت وقعدت ع السرير وأفرك عيوني وأقول له: أنت اللي رااقد أنا اخوك مب أبووك
سمعته يضحك ع شكلي أتجاهله وسرت الحمام [ عزكم الله ] أتوضأ شكله ابوي اليوم مسلطه علي
سمعت صوته وهو يبعد عن الحجرة: يلا بسبقك المسيد يا ويلك لو ما ييت
شكله طلع من الغرفة ،

[ حسين سلطان .. ~ 17 سنه ]
شاب في الصف الحادي عشر علمي .. روحه مرحة .. له لمسة خاصة .. ما تخلى قعدة يكون هو فيها من الضحك .. شاطر ما شاء الله عليه .. بس عيبه الوحيد يعني مب عيب عيب المهم هو النـــــوم .. يموت في شيء اسمه نوم .. الود وده لو يتم 24 ساعة راقد .. شعره لونه أسود على أشقر نفس التوأم بالضبط وعيونه نفس عيون ذياب .. تقريباً هو نسخة مصغرة من ذياب .. يشبه أرجوان بس الفرق العيون .. ريال يعتمد عليه بالبيت .. ناوي يدرس طب .. اونه يغير شوية بالعائلة .. ربي يوفقه
.
.

طق طق طق > الباب
قمت من نومي ع هذا الصوت
أنا: إنزين قمت
أكيد هااي نانا ياية توعينا أسميها ما بتخلينا براحنا رقوود
سمعت حسها : يالله قوموا صلوا ونزلوا تريقوا وراكم مدرسة إمتحاناات
أنا بصوت كله نوم: إن شاء الله خيتي
سمعت صوت ضحكتها تبتعد
قمت من ع فراشي صديت يميني أجوف الأخت بسابع نوومة
رحت لسريرها : قوومي
قالت لي: هااه
أنا : فديت الهااه اللي تطلع من شفاتج
فتحت عيونها وناظرتني وابتسمت بخجل
أنا: لبى العيون الخجلانة أنا
قالت لي: هههه ودريني ديمووه بروح اسبح
أنا: لا لا انا اول
[ واعطيها ركض لين الحمام عزكم الله ]
دخلت وعقب طلعت راسي شوية : زهبي مقلمتي اوكي
ابتسمت لي وفهمت بسرعه انها موافقة فوديتني افهمها وهي طايرة

[ ديمة سلطان.. ~ 18 سنة ]
فرفوشة .. القعدة معاها ربشة .. شعرها اشقر كامل قاصته بوي لين فوق كتفها بشوي .. عيونها نيلية غامقة .. لون غريب .. بس طبعاً وارثتنـه من أهل امها .. شيطانة شوية .. صف ثاني عشر علمي .. متوفقة ما شاء الله عليها .. يدلعونها ديم أو الديم

[ جوري سلطان .. ~ 19 سنة ]
أصغر من أرجوان بسنة .. بس هي قريبة من ديم أكثر من أرجوان .. تحب سوالفها .. وتنام معاها بنفس الغرفة .. قريبة من كل إخوانها تقريباً .. شعرها نفس شعر التوأم على أمها الله يرحمها .. عيونها نفس عين ديم بالضبط .. تدرس بالتقنية .. هندسة أي تي .. سنة أولى .. دلعها جوجو
.
.
همسة: وطبعاً عيال سلطان من البريطانية .. فيهم طول غير طبيعي .. ما شاء الله .. وماخذين حلاهم من أمهم

[ جوليا .. ~ ]
بريطانية كانت مسيحية وأسلمت بعد زواجها بسلطان .. جميلة وورثت جمالها لعيالها .. كانت مهتمة بعيالها إلين من الله خذا روحها .. الله يرحمها

.
.

في فيلا ثانيه بمنطقة أخرى .. لا تقل فخامة عن فيلا سلطان
.
أنا قمت من نومي من 5 دقايق تغسلت وبدلت ثيابي ولبست لبس بيت مريح كبرت لصلاة الفجر وعقبها سبحَت وذكرت ربي وسرت أوعي ريلي للصلاة وعشان يلحق يأكل شيء قبل لا يروح دوامه تراه يشتغل بالأعمال الحرة عشان جي تجوفونه من الصبح طالع من تقاعد وهو ما يحب قعدة البيت ابد
قربت منه شكله بعده غاط بنوم عميق
أنا : علي علي يلا قووم
ريلي [ علي ] : زين زين قايم
قلتله وانا أطلع من الغرفة
[ ترا ما رح أرجع مرة ثانيه بروح أوعي العيال لدواماتهم ]
رحت لغرف عيالي أوعيهم عندهم امتحانات نهاية السنة

[ نورا . .~ 46 سنه ]
أم .. مهتمة بأولادها .. مهتمة بنفسها وزوجها .. قريبة من عيالها تحسسهم انها صديقتهم مش امهم .. تحب تخدمهم بنفسها .. الخدم يشكلون فوبيا لها .. حدهم عندها التنظيف بس .. لا يدخلون غرفتها ولا غرف عيالها .. الود ودها لو تسفرهم .. =))
.
.

قمت من نومي عشان بس خاطر نورة ما أروم أخليها اترد مرة ثانيه يادوب تسير تسوي الريوق وتوعي العيال عاد كل واحد مكبر المخدة تحته وسنة لين يقوم وحليلها نورة ما تحب الخدم يسوي أي شي بالبيت هي اللي تطبخ هيه اللي توعيني هيه اللي توعي عيالها حليلها مستويه حرمه بيت
[ الله يخليها لي يا رب ]
سرت الحمام [ مكرمين ] أتوضأ عشان الصلاة

[ علي محمد .. ~ 50 سنه ]
أخو سلطان.. محترم .. يحب عياله وزوجته .. متقاعد .. يشتغل بالأعمال الحرة بدل ملل البيت ..
بس هو مقاطع أخوه بسبب .. [ زواجه من أجنبية ]
.
.

أنا يالسة ع السرير متمغطة والغرفة باردة حيل وظلمة صاير الجو رومنسي حيـِلات ومبطلة شاشة اللاب أطالع مسلسل كوري رومنسي مواصلة من أمس تقريباً باجي 4 حلقات وبخلصه
سمعت صوت إمايه ياية صوبي أكيد ياية توعينا
سكرت اللاب بسرعه وحطيته تحت اللحاف وتمددت ع السرير وتصنعت النوم
سمعت الباب ينفتح لا قصدي حد يحاول يفتحه
[ وييييييينج ليييييش قاااااافلة الباااااااااب يلااااااا ميمي قووومي ]
ضحكت بخاطري يوم سمعت صوت إميـه نسيت اني قافله الباب أمس
تصنعت صوت نعسان وقلت لها
[ إمايه قايمه ]
وسرت بطلت الباب وبست راسها وأفرك عيني اليمين أوني ومسكرة اليسار
ماماه [ بحزم ] : شحقه قافله الباب ؟!
أنا : ترا امس كنت ابدل وقفلته ورقدت شكلي نسيته
ماماه وهي رافعه حاجب ومنزله الثاني : لو عرفت شي ثاني مني مناك ياويلج مني ..
أنا فهمت قصدها بس اوني استظرف: مني مناك مثل شنو !!
ماماه ضحكت: ما أدري يلا دشي سبحي وبدلي عشان أوديج الكلية متى إمتحانج
أنا : أممم الساعة 9 ماماه
ماماه: زين عيل بودي خوانج وبرد لج و ما أوصيج راجعي
أنا: زين
ورديت داخل اونه اسبح والبس

[ مريم علي محمد .. ~ 20 سنه ]
مستهترة .. مب قد مسؤوليه أبد .. ينقص عليها بسرعه.. ما تحب حد يتحكم فيها .. شعرها أسود ليلي .. عيونها بني غامق .. متوسطة الطول .. تدرس بالتقنية هندسة أي تي سنة ثانية .. بنفس مكان دراسة جوري .. دلعها ميمي
.
.

أنا قمت من قبل شوي لما سمعت الأذان فسرت توضيت وصليت وقعدت ع السيادة أسبح وأكبر وأستغر هذي العادة إميـه علمتني إياها من لما كنت صغيرة وأراقبها بصلاتها
ابتسمت لما انحطت إيد على راسي [ ربي يرضى عليج دنيا وآخره يا بنتي ]
لفيت لها وانا تحت [ وياج يا أميه ]
ماماتي : يلا خلصي عشان تتزهبين للمدرسة
ابتسمت وأنا اقوم وألف السيادة : إنتي دعيتي لي
ماماتي : أكيد لازم أدعي لكم كلكم
هزيت راسي وأنا احط شيلة الصلاة على طرف السرير: لا لا انا اهم منهم أنا ثانوية عامة واليوم آخر يوم
قالت لي وهي ترفع يدها تدعي : الله يوقفج ويسهل عليج وينجحج إنتي و خوانج
ابتسمت لها ومسكت يديها وبستها [ يعني لازم الدعاء ينربط بي وبخواني ]
إبتسمت : لأنه كل واحد منكم عضيد للثاني
أنا : عيل ليش باباه مقاطع أخوه سلطان ؟ !
جفت كيف تغيرت ابتسامتها مرة وحده
ماماتي : هذا عند أبوج وأنا دوم أقوله الأهل هم اللي بيوقفون معاك بوقت الشده بس هو الله يهديه ما يسمعني
قلت لها وأنا عاقده العزم اني ارمس ابويـه: أنا بكلمه وبقنعه خليه علي "وأدق صدري"
ابتسمت: خلاص عليج الموضوع عيل
جفتها ياية تقوم فقاطعتها : وين سايرة
ماماتي: بسير بوعي ميراانه ورشود وبجهز ريوقكم
أنا: زين عيل انا ببدل وبتجهز وبنزل
ابتسمت لي وقعدت اطالعها لين طلعت من غرفتي
سرت صوب كبتي وطلعت مريول المدرسة والشيلة وحطيتهم ع السرير ووقفت يم المنظرة و حطيت اللوشن ع ايدي و حطيت كريم للويه عسب حبوب الشباب تأملت بشكلي تقريباً ما تم وايد بس لازم أكمل علاج لأخر شيء

[ مها علي محمد . . ~ 18 سنة ]
مراهقة صغيرة .. حياوية وايد .. ملازمة أمها .. ما تحب تحتك بأي أحد غريب .. خوافة شوية .. شعرها أسود ليلي مثل أختها .. عيونها بنية بس شوية أفتح من أختها .. ثانوية عامة .. علمي .. دلعها مهاوي
.
.

أنا كنت طالع من المسيد مصلي بركنت سيارتي جدام البيت وقعدت أفكر
أدق ما أدق أدق ما أدق
خفت أدق وتكون راقده
أخاف ما ادق أشتاق لها زياده
تنهدت هذا وانا ساير لها البارح
متى يمرن هذي الاربع شهور واتين عندي آآآه شو بيصبرني !!

[ سلطان علي محمد . . ~ 27 سنة ]
يشتغل بالشرطة .. حبوب .. غيور ع أخوانه .. محافظ ع رشاقته .. مالج ع بنت ييرانهم اللي بينهم .. قصة حب .. لووول .. اسمها مهرة .. يموت بترابها .. عرسهم مثل ما خبرنا سلطان بعد 4 شهور .. شعره أسود ليلي وعيونه بني غامق

نورا + علي عندهم بعد

[ مايد علي محمد . . ~ 23 سنة ]
حبوب وايد.. يدرس طب ببريطانيا.. يحب هـ التخصص وايد .. هو ساكن ببريطانيا بنفس بناية أرجوان بس طبعاً ابوه ما يعرف .. مهتم ببنت عمه .. يدافع عنها .. يمكن يتحول ه الاهتمام لعشق من يدري . . شعره أسود وعيونه بني غامق

[ راشد علي محمد. . ~ 15 سنة ]
طالب صف عاشر .. إنسان فضولي لأبعد درجة أي شيء يشوفه لازم يعرف شو هذا ؟! .. يحب يسولف ويسولف عن أي شيء يصير ولأي حد .. يعني بإختصار لو ما تبون خبركم ينتشر لا تقعدون يمه .. بس هو شاطر .. صف عاشر يشبه مايد أخوه بالضبط بالشكل الخارجي

[ ميرة علي محمد . . ~ 8 سنوات ]
.. آخر العنقود .. حبيبة إخوانها ودلوعتهم .. دلوعة .. عنيدة .. إللي تباه لازم يتسوى .. صف ثالث
.
.
حمدان .~
لا لا بعدني ما خلصت اللي بخاطري شليت الفون بدق لها يعيبني صوتها وهي بعدها راقده ههه
عقيت الفون من ايدي لما جفت عمي سالم ياي بيته اللي يم بيتنا وهو يترنح يمين يسار
إففف هذا بعده يشرب هالسم !!!
نزلت من السيارة وسكرتها وسرت صوبه والله خايف يسوي مصيبة بعياله وهو مب حااس
[ عمي عمي شوي شوي خلني انا بدخلك البيت ]
دزني وحاول يبعدني وهو يتمتم بأشياء ما فهمتها !!
بس طبعاً لان قبضتي اقوى وهو مب بحاسيته قدرت عليه مسكته عشان ادخله بيته
.
.

أنا كنت توني ياي أطلع ما لحقت على صلاة المسيد محد وعاني اليوم شكلها اميـه مب قادره تطلع من غرفتها عشان ابويه .. صليت وقلت بطلع أشم هواا

[ لا لا اليوم البيت مرتب وريحته خنينة ]
قلت هالعبارة وانا اطوف بالصالة اللي مبين عليها ان ابويه ما سهر فيها ولا نثر خرابيطه فيها
سمعت حس أختيـه من وراي تقولي
[ ترا ابوي ما رد امس ]
طالعتها كسرت خاطريـه وايد شكلها تعبان
أنا : شفيج ؟!
حاولت تتصنع انها بخير بس مب علي انا : ما فيني شي
اقتربت منها وحطيت عيني بعينها جفتها نزلت راسها ف تأكدت ان في شي
أنا: عيني بعينج قوليها انه ما فيج شيء
قالت وهي تحاول تحط عينها بعيني : ما فيني شيء بس "جفتها عضت شفتها السفليـة "
قلتلها "بتوجس" : بس ؟! بس شو ؟
قالت: حالنا مكسر خاطري والله أمس ما رقدت وانا افكر لين متى بنتحمل أبويـه وهو جي انا حتى ما اطلع ما البس ولا شيء وراضيه بس يوم يسألوني عن ابويه شو اقولهم !! أصلاً انا ما عندي رفيجات أخاف يسألوني عنه وأتفشل أنا ..
الصراحه سكتتني ما توقعت جي تقول كل هذا ياختي بخاطرج وساكتة كل اللي قدرت عليه اني أحضنها وارص عليها ابا احسسها بالأمان الي فاقدتنه .. !!

[ سهيل سالم محمد .. ~ 20 سنه ]

يشتغل ويا ولد عمه سلطان بنفس الشغل .. حلمه .. يكمل دراسته بس وين والبيت منو يصرف عليه .. مهتم وايد بأخته .. شايل البيت ع رـأسه .. يعتمد عليه الصراحة .. الود وده يظهر امه وأخته من البيت ويخلي ابوه .. بس وين واسمه لاصق باسم أبوه .. !!

[ غايه سالم محمد . .~17 سنه ]
خجولة .. حبوبة .. أبوها شيلها هم أكبر عنها .. تتفشل من ربيعاتها ما ودها يعرفون أنه ابوها سكير .. ما عندها ولا ربيعة .. تروح المدرسة تحضر وترد البيت ما تحتك بأي أحد .. عندها عقدة نفسية من الرياييل بس طبعاً سهيل شيخهم عندها .. ثانوية عامة .. علمي
.
.

ودرت غايه اللي سارت غرفتها عشان تتزهب للمدرسة وأنا طلعت برع قلت اشم شويه هووا وبمر المسيد بقعد شويه يمكن اللي بصدري من ضيق يروح
طلعت من باب الحوي و سمعت
" الله يابك "
صديت جدامي شفت سلطان ولد عميـه علي مساند ابويه ع جتفه اليمين
كمل : تعال شل ابوك صار لي ربع ساعه واقف اهنه ادور المفتاح يقولي ماشي ومرة يقولي هاا مب بيتنا لعوزني
ابتسمت له [ يعني ابويه لازم يفضحنا جدام عيال عمي ]
شليت ابوي من عليه اللي كان راقد أصلاً وتشكرته وهو يقول لي
[ عيال عم نحن ما بيننا هالسوالف ]
ساندت ابويه ودخلته البيت وسدحته ع الغنفة اللي بالصالة
ياي بطلع بس جفت إمـيه تتطالعني
قربت منها وجفت دموعها ع خدها رفعت أصابع أيدي اليمين عشان أمسح دموعها بس هيه كانت اسبق مني مسكت ايدي وهيه تقول شيء بس ما قدرت افهم كان كلامها متداخل مع شهقاتها
مسكتها وقلت لها: إهدي إميـه اهدي عشان اعرف شو فيج؟!
إمايه [ عقب ما هدت روحها شوية ] : غاية غاية طاحت
غايه بعد قلبي حسيت انها تعبانة خليت اميـه وراي وركضت لغرفة غاية
.
.

[ سالم محمد ..~ 46 سنه ]
أخ ثالث لعلي وسلطان .. ربعه الخمة اللي تعرف عليهم خربوه .. كان من أحسن الناس بشغله بس بسبب ربعه .. طردوه من الشغل .. همه بس الشرب .. ربي لا يبلينا .. مهمل بيته وعياله وزوجته

[ عائشة ..~ 41 سنه ]
مقطوعة من شجرة .. ع قولتهم .. وحيدة أمها وأبوها .. اللي توفوا من كم سنة .. ما عندها أحد فمجبورة تتحمل ظلم سالم وظلايمه .. عشان عيالها ..
.
.

في فيلا ثالثة .. بمنطقة أخرى قريبة .. فيلا جميلة فارهة
.
الساعة تشير إلى 6:30 قاعدين تقريباً كلنا على سفرة الأكل
سمعت ريم حبيبتي تقولي: ماما صبيلي جاي
قلتلها بابتسامة: إن شاء الله حبيبي
صبيت لها وعطيتها
" ثانكس ماماه "
روضة بعد قلبي قالت لها : لا تقولين ثانكس قولي شكراً كم مرة اعلمج هااه
عبدالله [ ريلي ] : بس عاد حبايبي ماكو ضرابة على الأكل
روضة: إن شاء الله باباه اسفة
ريم تقلدها : إيه باباه اسفة
عذبة بصوت نعسان ياربي هالبنت ما تشبع من النوم مدري عمن طالعه: باباه
عبدالله [ إطالعها ] : هلا حبيبتي
قاطعتها علاية اللي بحيوية يات وقعدت : صباح الخير
الكل : صباح النور
قلتلها: تعالي حبيبتي إكلي أصبلج جاي
علاية: ايه ماماه
صبيتلها ومديته لها
علاية: يعطيج العافية يارب
دشت ميري الخدامة يايبة الجريدة
عبدالله : هاتيها
شل الجريدة من ايدها ويلس يقراها
عذبة ضربت يبهتها بإيدها : اووه نسيت اقولك باباه شو أبا
كعلاية تنزل كوب الجاي : من الرقااد اللي تارس ويهج
الكل ضحك من تعليقها ياربي على انهم توأم إلا إنهم يضاربون كل يوم نفس السالفة
عبدالله: قولي حبيبتي شو تبي !!
عذبة: أبلة الرياضة تقول أنه تباك اتي عسب هالفصل موول ما لعبت رياضة وتقول لو ما ييت ما بترسبني بالرياضة
قلتلها : هذيج المرة انا رحت
علاية: ترا ماماه ابلة الرياضة ما تصدقها قلتلها هيه مريضة ما تروم عظامها عقب بتعورها بس ما تسمع
عبدالله: خلاص عيل انا بنزل وياكم عندها وبخبرها
قلتله: تسوي خير حبيبي
الكل قام يصفق: أووووب اوووووووب
روضة: تحبون بعض
قلتلها وويهي إنصبغ: يالله عاد ودرونا
علاية : باباه شوف خد ماماه صار وردي .. أووه قصدي أحمريكااا
الكل قام يضحك .. فقمت عنهم
قلتلهم: يالله زهبوا وتعالوا الصالة انا بقعد اهناك
عذبة: تستحي ماماه
أنا : لا ما أستحي ممم إنزين الرياضة مب محسوبة بالدرجات
علاية: هيه مب محسوبة بالنسبة بس تتحطا بالشهادة ما يصير هي تحطيها راسبة جي بدون سبب
أنا: زين عيل يالله خلصوا عسب ما تتأخرون

[ عبدالله محمد .. ~ 40 سنه ]
أخوهم الرابع .. مهتم ببناته .. شايلنهم بعيونه .. يشتغل بشركة العائلة مع سلطان .. طيب .. يحب زوجته .. زواجهم عن حب بعد .. لووول ..

[ نادية . . ~37 سنة ]
تحب زوجها .. وبناتها .. الله ما رزقها إلا ب هالبنات وعقب صارت لها مشاكل وما تقدر تحمل الحينة .. كانت تشتغل مدرسة لغة عربية بس قدمت استقالتها بسبب رحلة علاجها للمشاكل الصحية اللي واجهتها ..

[ عذبة + علياء عبدالله محمد .. ~ 18 سنة ]
توأم .. يشبهون بعض .. شعرهم بندقي .. عيونهم بنية .. قريبين من بعض .. عذبة عكس عليا لما تقوم من النوم .. عذبة ما تقوم بسرعة واتم تحس بنعاس أما علياء تتنشط بسرعة ..
عذبة عندها مشاكل بعظام ريولها .. تسبب لها آلام حادة .. فما تقدر تمشي وايد .. او تركض .. او اي رياضة تمارسها .. ه الشيء وايد يتعبها ويتعب علاية بعد لانهم يتأثرون ببعد وايد .. توأم تراهم
هم ثاني عشر .. علمي ..

[ روضة عبدالله محمد .. ~ 16 سنة ]
طفلة .. صح مراهقة .. بس للحين محافظة ع ملامح الطفولة في روحها .. تحب الشعر .. والخيل .. حلمها تصير خيالة كبيرة وتنافس بمسابقات عالمية.. شعرها أسود ليلي عيونها بنية نفس التوأم .. صف عاشر .. دلعها رواضي

[ ريم عبدالله محمد .. ~ 13سنة ]
طفلة .. تحب تقلد روضة .. بس تعاندها .. ملامحها تشبه ملامح روضة .. نفس الشعر .. نفس العيون .. نفس الخشم السيف الحاد .. بس هيه أقصر من روضة .. صف ثامن .. دلعها ريماني
.
.

قعدت على طرف السرير وأنا أناظر خالد اللي نايم
صار لي فترة اوعيه وهو مب راضي يقوم
أنا: خلوودي يالله حبيبي قووم وراك دوام
خالد [ بصوت ناعس يأسر ] : حبيبي بناام بناااااااام
أنا: والدواام
خالد" يقوم وهو فاتح نص عينه" : قمت قمت بروح الدوام أبوي يبيني ضروري اليوم بس انتي بتمين اهنيه
أنا [ بحيرة ] : هيه عيل وين أتم ؟!
خالد [ يمسح ع عيونه ] : لا لا بوديج بيت أبوي تقعدين إهناك أحسنلج من القعدة بروحج ..
أنا [ بابتسامة ] : إن شاء الله حبيبي بس انت يالله قوم نش ..
قام شل فوطته عسب يسبح [ ونتوا بكرامة ] و قبل لا تدش ياا صوبه وباسني ع خدي
أنا [ لفيت راسي بحيا ] : خلوود
خالد يضحك وهو يتوجه للحمام" عزكم الله " ..
لبست عباتي وقعدت بالصالة أترياه .. ربع ساعة جفته لابس كندورته وشعره يقطر من الماي وشال بيده كوب عصير
خالد :يالله هاج شربيه
أنا: خلوود كم مرة أقولك يوم بتطلع متسبح نشف شعرك الحينة بتمرض
خالد : خذي العصير أنا ما أمرض
أنا: هي ما تمرض خلوود ترا صدق أرمس
خالد: زين شلي العصير وشربيه لأخر شيء وبروح أنشف شعري بالغرفة يالله
ابتسمت له و شليت الكوب وشربته لآخر قطرة ..
هذي عادته من تزوجنا إييب لي عصير يصر أني أشربه وما قطع ه العادة من 3 سنوات .. ربي لا يغنيني عنه
ابتسم لي و راح للغرفة

[ بدور .. ~ 23 سنة ]
زوجة تحب زوجها .. مهتمة فيه .. تعشقه .. حياوية بزياده بس هالحيا زادها حلاة .. جسمها متناسق وشعرها أسود ليلي طويل آخر ظهرها .. عيونها بنية واسعة
.
.
[ خالد سلطان محمد .. ~ 26 سنة]
ولد سلطان من زوجته مريم .. كان صغير لما توفت أمه فتربا بحضن أبوه وجوليا .. تعرف على بدور وعاش وياها قصة حب توجها بالزواج .. رياضي .. في جسم [ معضل ] .. شعره كثيف ومطولنه بس ما يحبه يعدي وايد رقبته
< صار لهم 3 سنوات متزوجين بس للحين الله ما رزقهم بعيال >
.
.

في مكان بعيد [ خارج إماراتنا الحبيبة ] في البلاد التي لا تغيب عنها الشمس [ لندن ] ضم أحدى شخوص روايتي
.
الساعة تقارب على3 am الدنيا بعدها ظلمة و الهدوء يعم المكان الجو بارد والغرفة مظلمة إلا إني أحس بأرق شديد النوم مجافيني وحاسة بنغزات بقلبي قمت من السرير لبست روب طويل بما إني لابسة كت وبرمودا و ربطته لبست نعالي الفرو الأبيض اللي أرتاح فيه ومشيت ع أطراف ريلي لين ما وصلت للصالة شدتني صورة كبيرة وايد تقريباً بكبر اليدار معلقة تأملت الشخصين اللي فيها أبوي الغالي وأنا ابتسمت تقريباً عمري في الصورة أقل من سنة ولا قريب سنة ما أدري بس كنت بحضن أبوي أضحك وهو يبتسم يا أبوي يا كل حياتي أنت شمعتي بالدنيا يا رب لا تحرمني منه في يوم من الأيام شغلت ليت الأباجورة الصغيرة و شغلت التي في وقعدت ع الغنفة لامة ريلي حرصت إني ما أطول ع الصوت
سمعت حس أبويه وراي
أبوي: جنان شلي موعنج في ه الوقت
قلت بدون من أطالع ورا : ولا شيء ما ياني نوم قلت أطالع التي في
أبوي : عادي أطالع وياج
أنا [ هزيت راسي بدون أي صوت ]
يا قعد يمي سحبني لحضنه ولمني وهو يسمي علي ويقرأ قرآن ما حسيت إلا إني غافية بحضنه

[ جنان سعيد . ~ 20 سنة ]
إنسانة كتومة وشخصيتها غامضة .. محد يعرف شو خاشة بقلبها من هموم .. ما تحب تصادق ناس يديدة .. متعلقة بأبوها وايد .. تدرس فنون .. تحب ترسم .. ورسمها خبال . . شعرها بني فاتح لين نص ظهرها.. جسمها حلو ومتناسق .. ملامحها حلوة تشبه أبوها

[ سعيد عبدالله .~ 47 سنة ]
أب جنان .. عايش حياته لجنان وبس.. صاير لها أب وأم وأخ وأخت وكل شيء بالدنيا .. ممتنع عن الزواج عشانها .. يشتغل دكتور بالجامعة اللي تدرس فيها جنان .. مر في تجربة زواج صدمته في حياته .. ويخفي الكثير من الأسرار في أعماق قلبه

__DEFINE_LIKE_SHARE__

أشواق تائهة · 02-13-2013, 10:53 AM

البوح الأول سحتوي على تعريف بسيط عن الشخصيات .~

في حال أن أعجبكم البوح الأول سأكملها . ~
__DEFINE_LIKE_SHARE__

Al4eeb · 02-13-2013, 02:59 PM

رواية رائعه
استمري
^^
اتمنى تكون افضل من الرواية السابقة

ما شاء الله طرحج للرواية رائع __DEFINE_LIKE_SHARE__

دلع مغروره · 02-13-2013, 05:11 PM

السسلام عليكم ورحمه الله وبركاته..

بتوفيق اختي في الروايه..لج اسلوب حلو في الكاتبه,,حبيت اسلوبج وايد..
واكيد الياي مخبي ابداع راقي من صوبج..

لج كل ودي..دلع مغروره..
واستمري في البوح غاليتي..^^

في امان الله __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
المرور""""""""للايجار """"""" فالمرور """"""4 شقق.. غرفتين+3 غرف ((65الف_150الف))	محروم.كوم	منتدى أخبار المواقع والمنتديات العربية والأجنبية	0	01-20-2012 04:10 PM
بلاك بيري تورش 9860 فل تتش مع بن ممير """"""""""""""""""""""	محروم.كوم	منتدى أخبار المواقع والمنتديات العربية والأجنبية	0	10-28-2011 11:00 AM
""""""""مطلوب لكزس lx570 الدفع كاااش """"""""""	محروم.كوم	منتدى أخبار المواقع والمنتديات العربية والأجنبية	0	07-19-2010 03:50 AM
"""""""""""""""""""""""""""فساتين زفاف راقية ومميزة """"""""""&am	محروم.كوم	منتدى أخبار المواقع والمنتديات العربية والأجنبية	0	07-13-2010 12:00 AM
"""""للبيع باترول سوبر سفاري موديل 99 ديزل """""""""	محروم.كوم	منتدى أخبار المواقع والمنتديات العربية والأجنبية	0	04-28-2009 02:40 PM