البوح الخامس
.
بدور . ~
قمت ع حس خالد وهو يوعيني
خالد: يلا بدوور الحينة بيأذن الظهر وأنتي للحينه راقدة
أنا [ ارد أغمض عيوني ] : أحس بكسل رهيب
خالد: يمكن عشان المكان متغير عليج ترا أمس نمنا ببيت أهلي
أنا [ أفتح عيوني ] : لا حبيبي أحس بتعب بس لا تحاتيني
خالد: ليش حبيبي شو فيج ؟!
أنا: أحس بدايات زجام رأسي يعورني [ أغمض عيوني وشوي وبصيح ] أكره هالشعور ما أحبه
خالد : قولي الحمدلله ع كل حال قومي تغسلي وأنا بسويلج عصير ليمون ينشطج
.
إبتسمت له ورحت تغسلت و كنت بصلي بس أتذكرت إني مصليه الفجر لأني أمس بالليل كذا مرة أقوم
كنت بطلع من الغرفة بس خفت هو يعصب ولا يقول شيء عسب أخوانه بالبيت
فتميت شوية وعقب دخل إبتسم لي و يا صوبي بالعصير
.
خالد : يالله حبيبي إشربي
أنا [ شليت العصير وشربت شوية ] : الحمدلله
خالد: مب جي .. كامل يالله
أنا: ما يصير أشرب وأنت ما تشرب
خالد: عقب بشرب حبيبي بس إنتي إشربيه كامل
شربت العصير وأنا من داخلي مستانسة ع ريلي
خالد: اليوم لمه أعمامي ببيتنا
أنا: هيه سمعت عمي أمس
خالد: خلج مع خواتي أوكي
أنا: إن شاء الله
خالد: أقرأ بعيونج التعب
أنا: خالد تعبي نفسي مب جسدي
خالد : بسم الله عليج حبيبتي شو فيج ؟!
أنا: خالد مب حاس إنه صار لنا 3 سنوات من عرسنا وللحينه مايانا ياهل
خالد: بدوري حبيبتي هذا نصيبنا ما يصير نعترض ع نصيبنا
أنا: والله خاطري بياهل . . أشله بيدي أضمه لصدري . . ألاعبه وأسهر معاه . . أشوف التعب بعيوني وأقول فداه . . خالد والله بخاطري الياهل
خالد: أدري حبيبي بس ها أمر الله ومحد يعترض ع أمر الله وبعدين حبيبتي في ناس صار لهم 10 وماياهم ياهل
أنا: خالد إنت مب بخاطرك ياهل يزقرك باباه
خالد : شعور حلوو والله بس حبيبتي لازم نرضى بحكمة ربج
أنا: زين خالد خلنا نراجع المستشفى
خالد [ تنهد ] : بدور لا تنسي إنا راجعنا من زمان وقالت لنا الدكتورة إنه مافي عيب لا فيج ولا فيني
أنا: بس حبيبي دخيلك تكفى طلبتك خل نراجع مرة 2 يوم بنسافر لندن بنروح إهناك
خالد: زين حبيبتي بروح معاج [ وإبتسم لي إبتسامة طمنت قلبي ]
أنا: حبيبي لو ما صار عندنا ياهل ؟!
خالد: بتم وياج العمر كله بياهل ولا بدون ياهل . . أنتي القلب إنتي الجرح إنتي الغلا كله
أنا: محد مطمن قلبي غيرك والله
خالد [ لمني ] : فديتج والله وبسج من التفكير والله التفكير إييب المرض

وعقب دقايق رحت زهبته للصلاة وبخرته وعطرته
.
.
سلطان .~
أنا بالسيارة وواقف جدام المسيد وأرمس القلب . . ~
.
أنا: حبيبي إسمعيني
سمية : يعني بتروح بيت عمك
أنا: هيه بنخلص صلاة وبنروح إهناك ع طول
سمية: لا تروح
أنا [ !! ] : سمووي قلبي ليش ما أروح فشلة عمي عازمنا ومن زمان مقاطعينه لازم أروح
سمية: زين وأنا شدراني يمكن وحدة من بنات عمك تتطالعك
أنا [ فدييييييييييتها يا نااس ] : تغارين
سمية : . . . . [ سكتت وصرت بس أسمع صوت أنفاسها ]
أنا [ إنرسمت إبتسامة ع شفاتي وغمضت عيوني وأنا أستمتع باللحظة وعقب قلتلها ] : عيوني إنتي محد بيملي عيني غيرج والحينه بنزل المسيد إنزين
سمية: من تطلع من المسيد رمسني
أنا: من عيوني وإنتي روحي إقري سورة الكهف ووصلي أنزين
سمية : إن شاء الله
أنا: ربي يحفظج
وسكرت عنها ونزلت المسيد أصلي
.
.
أرجوان .~
قمت ع حس حد يتحرك يمي ويوعيني
.
. .: نانا يالله قومي اليوم الجمعة
بطلت عيوني وأجوف غاية توعيني
.
أنا: غاية شفيج خليني نايمة
غاية: نانا الحينه الساعة 12 شوي وبيأذن وبييو الرياييل من الصلاة
[ أوييييييييه الساعة 12 وانا للحين نايمة !!! ] .~
قمت بسرعة بسرعة أدور ملابسي اليوم اللمة ببيتنا سرت طلعت بدلة ذهبية وفيها ورود حمرا . قصيرة توصل لفوق الركبة . . حطيتها ع الكرفاية. . البدله قصيرة عقب يوم بطلع متسبحة بجوف شو ألبس وياها . . ~
كنت بطلع أكسسواراتي بس قلت عقب إنه بلبس ذهب اليوم والذهب مالي محطته بغرفة أبويه عشان محد يشله . . ~
ورحت أسبح [ وإنتوا بكرامة ]
.
.
نالوه .~
أمس نانا عزمتني ع بيتهم تقول إن قوم أعمامها بييون وعازمتني إنه اتعرف ع بنات عمها وبالمرة أقعد وياها . . من يوم يومها ما تحب جمعات الأهل وأغلب الأحيان تقعد شويه وعقب تروح عنهم وتكلمني بالفون أو المسن بس اليوم هي تباني أكون وياها .. أصلاً صار لها فترة طويلة قضتها بلندن وياي بدون لمة أهلها .~
طلعت من الغرفة أجوف لو أحمد موجود . . جفته توه ياي يطلع من الباب
.
أنا: أحمد
لف ع ورا : هلا منال
أنا: تقدر بعد الصلاة توصلني بيت أرجوان
أحمد[ إبتسم لي ] : إن شاء الله إنتي تجهزي ومن أخلص صلاة بمرج
أنا: مشكور والله
أحمد: ما بيننا هالشيء

.
إبتسمت له بإمتنان هو عكس أمه . . رحت غرفتي ركض أجهز قبل لا خالوه تجوفني وتمنعني من الروحه . . ~
.
.
مايد .~
.
الساعة تقريباً 8 الصبح بلندن . .
المكان : حديقة قريبة من السكن ماله . .
الجو : بارد جداً خاصة إنه الفجر كان طايح ثلج . .
أنا قمت من نومي من الصبح أصلاً أنا لحقت أرقد شوو !!
صورتها معذبتني . . و أمس يوم كلمتها تعذبت زيادة . . ~
إشتقت لها وايد . . ما أخبي عنكم أيه أحبها وأعشقها بس ماسك روحي لأنها بنت عمي ونحن بغربة
أتريا الوقت يمر عشان أرد البلاد وأطلب يدها من أبوها .~
آه يا أرجوان كيف غيرتي كياني قلبتي حالي . . وين مايد اللي سيدة والكل يعيب عليه . . أنه ما عمره لف لبنت ولا عمره فكر يرمس بنت . .
بس هذي غير هذي بنت عمي الغالية اللي مستحيل تكون مثل باجي البنات المايعات . .
متى يمر الوقت عشان تردين لندن وتكوني تحت نظري . . وأشبع من شوفج . . ~
خل أرد الشقة أحسن لي الجو بارد إهنه وأنا طبعاً لابس خفيف . . لو أرجوان إهنه جان هزبنتي من الخاطر . . ~
فديت هالطاري بس
.
.
بعد الصلاة ببيت عبدالله .~
عذبة . ~
بعد ما صلينا الظهر
لبست جلابية طويلة لونها أزرق سماوي ..لفيت شعري بربطات صغار . . ولبست أكسسوارات تتناسق مع اللون . . وطلعت نعالتي الزرقاء السطاحية لأنه ريلي بتعورني لو لبست كعب
طلعت شيلتي + عباتي وجهزتهم
لفيت لعلاية . . ~
جفتها لابسة
مخور برتقالية طالعة كشخه عليها ولامة شعرها ع فوق ومحطيه تاج صغير رافعة فيه قصتها . . ولابسة أساور برتقالية بيدها اليمين . . وشالة عباتها وشيلتها بيدها عسب تلبسهم برع
علايه: يلا خلصتي
أنا: هيه [ وقعدت ع السرير ]
علايه: ريلج تعورج
أنا: لاا [ قمت ] يالله بلبس عباتي وبنطلع
علايه : أوكي
ولبسنا العبي والشيل وطلعنا برع نجوف لو أبوي ياا من الصلاة ولا لا ؟!
جفت برع ماماه تعدل ملابس ريماني اللي كانت لابسة قميص بربري كت يوصل لين تحت الركبة بشوي وتحته لابسة هيلاهوب بيج كان مبين شكلها الكتكوت .~
وحذالهم روضة اللي كانت لابسة قميص طويل بربري و تحب بنطلون بيج وشيلة بربري
أنا: ماماه باباه مايا
أميه: لا حبيبتي بعد شوية بيوصل
روضة: زين ماماه عادي عقب نروح صوب الخيل
أميـه: رواضي نحن رايحين بيت عمج
روضة [ تترجاها ] : ماماه عشان خاطري عقب ما نخلص بنروح صوب الخيل
. . : خاطرج غالي رواضي عقب ما نخلص من الغدا بنقول لعمج نروح صوب المزرعة وبنتم لين باليل كله ولا رواضي الغالية
جفت كيف ماماه ابتسمت يوم سمعت كلام أبويه . . ورواض تشققت من الوناسة
علايه: باباه نغاار
أبويه: كلكم غالين ع قلبي فديتكم
إميـه: يالله نروح
أبويه: جاهزين
الكل: هيه
أبويه: عيل يالله نروح
.
.
وصف لبعض شخصيات روايتي بلبسهم باللمة . ~
أرجوان .~
لابسة بدلة ذهبية وفيها ورود حمرا وتحتها هيلاهوب . . لابسة سلاسل ذهبية مختلفة الطول حول رقبتها . . وحزام ذهبي عبارة عن سلاسل نفس اللي برقبتها لافتنه بنص البدلة . .
.
ومحطية أساور ذهبية بيدها . . لابسة بوت طويل لين تحت ركبتها بشوي لونه ذهبي مفتوح من تحت كموديل . . محطية بلاشر وردي ع خدودها وروج أحمر . . ومخلية شعرها مفتوح . .
.
جوري .~
لابسة نفس بدلة أرجوان بس ألوانها العكس يعني البدلة حمرا وفيها ورود ذهبية . . لابسة سلاسل نفس أرجوان والحزام نفسه [ مطقمين ] بس هي لبست أساور حمرا بيدها والبوت لونه أحمر بس نفس موديل بوت أرجوان . . وشعرها رفعته من جدام بتاج ذهبي مع أحمر ومن ورا خلته مفتوح . .
.
ديمة .~
لابسة قميص مرسوم عليه حلاوة بأشكال مختلفة كت و جينز أزرق فاتح رافعه شعرها البوي من جدام بتاج خذته من جوري ومن ورا خلته مفتوح وواصل لنص رقبتها نفس ما قلت من قبل . . مب لابسة ولا أكسسوار ولا محطية أي شيء بويهها . .
.
ذياب .~
لابس قميص أحمر طويل وجينز أزرق غامق . .
.
حمدان وسهيل .~
مطقمين لابسين كندورة كاكاوية وغترة بيضاء [ عصامة ] . .
.
حسين .~
لابس كندورة بيضاء بدون عصامة . .
.
غاية .~
لابسة جلابية فخمه لونها أخضر وأحمر وأصفر خليط يعني . . وفيها حزام بالوسط . . لبست معاه أساور بنفس الألوان . . رفعت شعرها كامل ع فوق ورتبته لها أرجوان بقباضات صغيرة بنفس لون ملابسها . . ما رضت تحط أي شيء بويهها إكتفت بحجل خفيف بعيونها . .
.
.
أرجوان .~
بعد ما لبسنا وكشخنا وطبعاً محد لبس شيلة عسب الشباب بيكونوا بالميلس الخارجي والحريم بيكونوا داخل . . ~
واقفة ع رأس أمينة والخدامات أطالع الغدا . . البنات سارو عند أهل عمومتي اللي صار لهم تقريباً ربع ساعة من وصلوا . .
.
أنا: أمينة كل شيء زاهب ما أبا أي نقص
امينة : كل حاقة متل ما أتفقنا . .
أنا : زين عيل إبدوا غرفوا الأكل وودوا للشباب أول عقب للحريم الرياييل ما يصبرون مثلنا
أمينة : إن شاء الله . .
طلعت من عندها من ورا بدون ما أمر من الصالة وسرت فوق غرفتي أتعطر . .
.
وقفت جدام المرايا أطالع روحي وأتأكد كل شيء فيني أوكي
. . : حلووة حلووة
أطالع ذياب من المرايا: أدري حلوة ماله داعي تقولي
ذياب: ما أروم على الواثق
أنا: واثقة غصب عنك أصلاً هم يقولون لك حلو عسب إنت تشبهني
ذياب: ها ها ها [ يقولها بسخرية ]
أنا: يالله أحدر عند الرياييل بيحطوا الغدا الحينه
ذياب: زين بنزل من ورا وبروح الحريم تحت . . بس نانا عقب برد غرفتج بسبح قبل لا أروح ألعب كورة السخان بغرفتي خربان ونسيت أخبر أبويه . .
أنا: أوكي يالله روح تغدى أنا بنزل للحريم
ذياب: أوكي تومي
إبتسمت له ذياب متعلق فيني أكثر . . يرتاح لي أكثر ويفتح قلبي لي أكثر . . عشان جي ما رضى يقول لحمدان ولا لحسين إنه يسبح عندهم عشان هو معاي أكثر . . فديتك توأمي الغالي .~
نزلت من الدري يوم وصلت لنص الدري حسيت كل الأنظار علي أمبيه ما أحب هالشعور . . لمحت وحده تهمس بإذن وحده ثانية [ باين إنها أمها ] وعقب بوزت شكلها نازعتها
.
خالوه عايشة [ مرت عمي ] : تعالي يمى سلمي ع هلج
أنا: السلام عليكم
الكل : عليكم السلام
ديمة [ سحبت وحده ]: هذي أرجوان أختي العودة . . [ تتطالعني ] أرجوان هذي مهوي بنت عمي علي اللي بصفي
إبتسمت لها : يعني زاد حزب الشطانة عنصر يديد [ أطالع مها ] مها باين عليج هادية حذاري يخربونج وينها أمج
إشرت ع وحدة وسرت لها : سلام عليج عمووه
أم مها : عليج السلام شحالك يمييه
أنا: الحمدلله زينة . . عمووه ترا الله يعينج ع ديمووه بتخرب بنتج بتستوي شيطانه
ديمة: نانا [ بعصبية ] بس عاد
الكل يضحك
إنتبهت أنه البنت اللي كانت تهمس يوم نزلت واقفة يم أم مها
أم مها : هذي مريم بنتي بنت عمج علي
أنا هزيت رأسي
وسلمت ع مرت عمي عبدالله . . وبناتها وعقب قعدت يم بدور اللي مستحيه
إندق الجرس
أنا: بروح أخليهم يحطوا الغدا الرياييل تغدوا من زمان
خالوه عايشة : أنا بروح خلج قاعدة
شوية جفت نالوه داخله فقمت لها وحضنتها
أنا: نالووه والله لو كنتي مب ياية كنت زعلت منج
نالوه: وأنا أقدر ع زعلج قولي زين خالوه ما جافتني وأنا طالعه
أنا: أحسن
نالوه: ههه
عقب حطوا الغدا وتغدينا وطبعاً اللي تسولف واللي تضحك . . خاصة ديمة اللي انشغلت بالسوالف مع شلتها بالسكول . .
.
.
مريم .~
أووف هذي المايعة صار لها مدة جدامي مادري ع شوو لابسة هاللبس القصير هي وأختها تحسب روحها ياهل شوو !!
لو أنا قلت بلبس جي كان قصوا رقبتي . .
.
.
جوري .~
بعد ما بدور سارت غرفتها عساس إنها تعبانة والله باين بويهها وتقول ما فيني شيء حريم أعمامي أصروا عليها تروح ترتاح وسارت
قعدنا ع طرف بالصالة نسولف أنا نانا ونالوه
إتفقنا نروح الحديقة اللي ورا نتشمس ههه أقصد نتمشى
أرجوان: أنا بروح غرفتي وبيي بلبس عباتي عشان لو شيء شباب برع ما يجوفونا
أنا: ييبي لي انا بعد شيلة وعباه
أرجوان: أوكي [وقامت ]
مريم : عادي أسير وياج
[ أول شيء كلنا إستغربنا حتى أرجوان بس عقب قالت لها ]
أرجوان: تعالي حياج
وساروا مع بعض
نالوه: تصدقين خالوه متصلة فيني بس أنا سافهتنها ما أرد عليها
أنا: عن تنازعج
نالوه: عادي ما عدت أهتم تدرين بالأحد ولا الأثنين بنرد لندن فليش أضايق بروحي
أنا: هيه أدري بس بعده أبويه ما أكد علينا لو كلنا بنسير ولا لا . .
نالوه: تعالو كلكم بنستانس بنمشيكم وبنراويكم مغامراتنا بلندن
أنا: هههه وعندكم مغامرات بعد
نالوه: هيه عيل شو ؟!
أنا: عيل بتألفون كتاب مغامرات نانا ونالوه بلندن
نالوه: هيه أصلاً كنا مقررين بس تدرين مشاغل الدنيا لهتنا
انا: احينه مشاغل الدنيا لهتج هااه وما لهتج عن مغامراتج
نالوه تضحك وضحكت وياها
.
.
ديمة .~
قعدت أنا ويا التوأم عذبة وعليا ومها وغاية. . وأخت مها الصغيرة ميرة [ اللي أضفت روح حلوة ع القعدة ]
.
عذبة : أبويه واعد روضة يوديها صوب المزرعة اليوم
أنا: صدق [ بوناسة ] وأخيرأً بجوف خيل أختج
غاية: ونتي تعرفين للخيول
أنا: لا لا ماعرف بس ما يحتاي رواض بتعلمني
علايه: جان علمتني قبل
أنا: تراج ما طلبتي منها أنا بعطيها من ذاك الزين وبتوافق
مها: شو ذاك الزين ؟!!
أنا: بمسك عليها شيء وبهددها هههه
الكل: شريررة . . !!
ميره: مهووي بقعد بحضنج
مها: حبيبتي قعدي يمي انتي كبيرة
ميرة: أنا مب كبيرة انا [ بدلع ] بيبي
أنا: أبوووووووووي البيبي [ فتحت حضني ] تعالي فديتج تعالي
[ يات برزانة وتمشي بدلع وهيه تحرك إيدها يمين ويسار وعقب قعدت ع ريلي ] !!
مها [ منصدمة ]
أنا: بلااج ههه ؟!!
مها: والله لو ببيتنا وقالت لي بقعد بحضنج وما رضيت وحد قالها تعالي عندي بدال مها بتعاند ما بترضى تسير
أنا: فديتها حبتني يعني واافديت الغلا
ميرة [ تدق خدي ] : شو أسمج ؟!
أنا: ديمة عيوني
ميرة: ديمااه انا أحبج [ وتبتسم بحيا ]
أنا: وأنا بعد أحبج [ وأبوسها ]
ميرة: تعالي بقولج شيء
أنا: قولي !!
ميرة [ تقرب من إذني ] : أبا الحلاااو اللي على القميص وايد أحبه عطيني بليز
أنا ضحكت من القلب أثاري الحب مب لله . . للحلاااااااو
أنا: ميرااانه هالحلاااو مرسووم مب صدقي عقب بوديج غرفتي وبعطيج أوكي
ميرة [ بوزت ] : بروح عند ماماه أحسن لي
مها: هيه روحي والله أحسن لج
وسارت وهي مبوزة . .
.
.
أرجوان .~
بعد ما ركبنا الدري أنا ومريم . . دخلنا غرفتي وقعدت ع سريري
شليت فوناتي اللي كنت ناستنهم . . جيكت ع الأي فون ما في شيء يديد بس تنبيهات التويتر .. وجيكت ع البيبي جفت نالوه متصلة فيني مرتين أكيد يوم كانت واصلة البيت . . جفت مس كول من ذياب بعد . .
فريت الفون مرة 2 ع السرير يم مريم وسرت صوب الكبت أطلع لي عباة
طلعت عباة مفتوحة ولبستها سكرت أول فصمة بس وخليت الباجي مفتوح . . طلعت شيلة سادة ولفيتها بإهمال ع شعري
أنا: مريم بتين وياي غرفة جوري ولا بتين
مريم: هيه بعيدة عن الدري
أنا: هيه شوية أخر شيء
مريم: لا روحي أنتي ويوم بترجعي تعالي حقي
إستغربت من ردها بس ما إهتميت كيفها والله سرت غرفة جوري وطلعت لها عبادة سادة مفتوحة وسحبت أول شيلة شفتها كانت سادة . . وطلعت من الغرفة
شهقت يوم تذكرت إنه ذياب يبا غرفتي عسب يسبح . . أكيد داق عشان هالشيء . . مشيت لغرفتي وأنا أدعي أنه ما يكون موجود . .
بطلت الباب ويوم جفت ذياب واقف وهو لابس كندورة نوم وماسك بإيده الفوطة وشعره يقطر ماي . . يطالع مريم بصدمة
غمضت عيوني كله مني المفروض ما كنت أخليها . .
أنا: مريم يالله تعالي ننزل تحت
ذياب: هاي منووه
أنا: هاي بنت عمك مريم يالله مريم ننزل قبل لا حد يشك إنكم كنتوا مع بعض بروحكم يالله
ذياب: هاي كانت تفتش فونج وتدعي عليج أنه محطيه قفل
عقدت حياتي تفتش فوني شحقه !!!
مريم [ بخوف ] : والله كنت بس بلعب والله
أنا: زين حصل خير يالله بننزل تحت ذياب ترا نحن بنروح الحديقة
ذياب: أنا بروح برقد العصر وعيني عشان اصلي وأسير ألعب كورة
وطلع . . عقب رحت لبي بي وشليته وفريت الأي فون بالدرج . . وطلعنا
رحت صوب البنات [ جوري ونالوه ]
أنا: يالله نروح برع
جوري [ شلت عبايتها والشيلة ولبستهم ]
أنا: عن أذنكم نحن بنروح برع نقعد
ديمة: نحن بنروح معاكم ما يصير تروحون بروحكم
أنا: زين يالله بتروحوا
ميرة: أنا أنا
رحت صوبها
أنا: بتروحي معانا
ميرة: هيه برووح
أنا: زين حبيبتي
أمها: خلوها إهنه بتعبكم تراها شيطانه
أنا: عادي خالوه عندنا وحده من نفس الشطانة بتتفاهم وياها [ وأطالع ديمة ]
ديمة: زعلانة [ وبوزت ]
وضحكوا عليها
وعقب إستأذنا من الكبار وطلعنا برع [ أنا . . نالوه . . جوري . . ديمة . .غاية . . عذبة وعليا . . مها . . وميرة الصغيرة ] أما الباقي تعذروا بالحر ‘ ،
طلعنا من ورا ومشينا ورا البيت كان الجو مغيم شوية وفي برودة . .
غاية : أنا برجع داخل بييب لي شيلة وبيي
أنا: اوكي عيل تعالي من جدام البيت لأنه بعد شوية بنروح إهناك
غاية: أوكي [ وراحت ] . .
جوري [ تكلم عذبة وعليا ] : ليش ما يبتوا خواتكم
عليا: مزعجات وزعلانات وحدة تبا الخيل والثانية تبا المزرعة عشان البانشيات
أنا: الله خيل
عذبة : هيه روضة تركب خيل وأبويه ياب لها الخيل من كم شهر وتتدرب ع ركوبه ما تدرين ؟!
أنا: لاا يمكن عشان أنا بلندن عسب جي
ديمة: تبين تسييرين تصورينه صح
أنا [ أطالعها بنظره ]: عفية عليج هاي اللي حاسة فيني
نالوه: يالله نروح جدام بنقعد . .
[طبعاً جدام زارعين وجي ومسوين مثل القعدات حتى ورا زارعين بس ما محطين قعدات ]
أنا: أوكي
ورحنا ويوم وصلنا سمعنا حس واحد يرمس [كان قاعد ع القعدة وعاطنا ظهره ]
. . : حبيبي عاد فرديها . . [ سكت ورد يرمس ] حبيبتي والله ما شفت حد من بنات عمي والله محد ليش ما تصدقيني . . يا عمري إنتي والله ما شفت يعني لو شفت ليش بكذب عليج هااه بقولج شفت . . سمووي أحبج [ قالها بطريقة رومنسية خخخ ] .. سمووي يعني هاا اللي كنتي تتريينه كلمة أحبج . . وأنا مب بس أحبج أعشقج ودي بقربج متى نعرس
أطالع البنات وأنا ماسكة ضحكتي بالقوو
مها: ها سلطان أخوي يرمس مرته سمية وهم مالجين
ديمة: حسبالي بس حبيبته
أنا: ههههه شكله يحبها وايد وهي تغار عليه ما تشوفونه يحلف لها إنه ما جاف بنات وهيه شكلها تقوله لا تكذب
مها: هيه هو يحبها وهيه تغار عليه وايد [ بابتسامة ] الله يوفقهم
الكل [ بصدق ] : آمين
صديت له يوم قال
سلطان: يالله الغلا صار لي نص ساعة وأنا برع بروح داخل . . هيه بروح داخل أخاف حد من البنات إتي وتعصبين علي بروح أقعد مع الشباب . . يعني حبيبتي كيف تبيني أرمسج جدام الشباب فشلة . . زين حبيبي مرة ثانية برمسج جدامهم بس عاد مو تقولين لي قول أحبج هااه . . ههههههههههه يالله مع السلامة
[ يوم قام لف ع ورا يوم سمع حد يضحك لأنه مهوي وديمة إشتغلوا بالضحك ]
سلطان [ بصدمة ] : إنتوا من متى إهنيه
ديمة: من حبيبي إفرديها ههههههههههههه
أحاول أمسك روحي : ديمة عيب إسمح لنا ولد العم
سلطان: أكيد إنتي توأم ذياب خبروني عنج
أنا: هيه توأمه بس ترا مأخذ الحلا كله مني
الكل يضحك
سلطان: هيه هيه أنا قلتله أنت الحلا مأخذنه من أختك بس هو مب مصدق
أنا: شحالها سمية
سلطان: تمام الحمدلله
أنا: عاد لا تخبرها إنك شفتنا عن تعصب هيه بس فكرة إنك تشوفنا زادت غيرتها كيف لو عرفت إنك كلمتنا
سلطان: هيه والله يالله عن إذنكم
ديمة : إذنننا وعيينننا . . خخخخ
سلطان: إنتي الياهل تتمصخرين علي
ديمة: أنا من ياهل أنا عمري 17 سنة يدتك الياهل
سلطان: بس ترا مب مبين انا عطيتج 11 ولا 12 . . الله يخليج لشبابج
ديمة: ثانكس ثانكس إنك صغرتني يالله فارق نبا نقعد
سلطان: أيا الياهل
أنا: إسمح لنا هاي لسانها فالت
ميرة [ توها تنتبه ع سلطان ] : سلطاااااااااااني
سلطان: عيون سلطاني [ يفتح حضنه ] تعالي
وتروح له ركض ويشلها وباسها . .
سلطان: أنا بشلها وياي عند الشباب خبروا امي عن تحاتيها
أنا: إن شاء الله
وساروا
مها: تراه متعلق فيها وايد حتى هيه
أنا: هيه وايد
وقعدنا نسولف ونسولف ونضحك ويات غاية وقعدت ويانا وعقب أذن العصر وسرنا صلينا
وعقب رحت غرفة خالد أشوف بدور . .
دقيت الباب وطلع خالد
أنا: إنت إهنه سوري حسبالي إنت تحت
خالد: لا بدور تعبانة شوية وقعدت معاها

أنا: شوفيها ؟!
خالد: زجام ومحمومة ولا راضية تروح المستشفى
أنا: زين عطها بندول وشوفها لو ما نزلت حرارتها وداها غصب عنها
خالد: ترا ما عندي
أنا: ويت بييب لك
ورحت غرفتي شليت بندول ورديت عطيت خالد
أنا: لو صار أي شيء طارئ خبرني
خالد: إن شاء الله مشكورة
أنا [أ دزه داخل ] : روح لمرتك ما بيننا شكر
خالد يضحك : تدزيني يا مسودة الويه
أنا: هههه فديتك والله إشتقت لك من زمان ما دزيتك
خالد يضحك ودخل داخل
كنت بنزل تحت بس تذكرت إنه ذياب قايل يباني أوعيه
رحت غرفته ودخلت ع طول بدون ما أدق الباب
جفته لابس لبس الرياضة ومتكشخ ويالس يرفع شعره بالجل ألقى علي نظرة وعقب رد يكمل شعره
ذياب: هذي اللي بتوعيني
أنا: ذيابي عمري حياتي سوري والله نسيت
ذياب [ ببسمة ] : عمري ما أزعل منج [ يسكر الجل ويرده مكانه ] حمدي ربج إني ما نمت وقمت ع طول
أنا: عيل الحمدلله
ذياب: ههه أي شيء أقوله لج تسوينه شوو !!!
أنا: هيه مو توأمي أكيد بسمع كلامك
ذياب: فديتج والله
أنا: يالله سير لربعك
ذياب [ سار صوب السرير وشل بوكه وفونه ومفتاح سيارته ]
فر علي مفتاح السيارة زين لحقت أشله قبل لا يطيح ع الأرض
ذياب: هاي مفتاح الستيشن أكيد بتقولي بمشي البنات أنا بروح ويا ربيعي
أنا: فديتك الغالي عساني فدوة لعيونك
ذياب : عيوني بس !!
أنا: هيه عيونك عسلية ياليت عيوني جي
ذياب: لا عيونج أحلى والله وهي اللي زايدة حلاج
أنا [ أرمش عيوني ] : هذا كله من ذوقك أخي الصغير
ذياب: شو أخي الصغير بعد
أنا [ أطلع من غرفته ] : ولا يهمك توأمي الغالي
ذياب : هيه هاي أحسن
ونزلت من الدري وأنا طبعاً لابسة عباتي وشالة فوني ومفتاح السيارة بيدي
أنا: هذي مفتاح الستيشن خلونا نروح نتمشى
جوري: الله عاد أنا خاطري بباسكن
نالوه: حتى أنا
جوري: قلادة وحده
نالوه: مب قلادة
جوري: قلادة
نالوه: لا
جوري: هي

أنا: كل وحده تقوم تلبس وتطلع برع أول ما تسخن السيارة بحرك بدون ما أتريا حد
نالوه: جاهزة بركض وراج
ديمة: لا بليز نحن حاطين أمل كبير أنج تصيرين مرت أخوي فبليز ما أبيه يشوفج وإنتي تركضين لا يغير رايه ويقول هاي ياهل بليز يعني
الكل يضحك
أنا: تراني بسبقكم أستأذن من أبويه ومن أهلكم . . ونتوا سيروا خبروا أمهاتكم
دخلت الميلس بعد ما دقيته . . نسيت أصلاً وجود رياييل غير ابوي وأخواني [ حطيت ببالي سهيل متعودة عليه وما عطيت أهميه للموضوع ]
دخلت وإبتسمت يوم جفت أبويه قاعد قبالي سيدة
أنا: السلام عليك أبويه
أبويه: وعليج السلام تعالي سلمي ع أعمامج
سلمت ع عمي عبدالله وعمي علي اللي أتذكره من الصور اللي شفتها عند أبويه
عمي علي: والله وكبرتي يا بنتي شحالج
أنا: الحمدلله عمي بخير
عمي عبدالله: شحال الدراسة برع
أنا: زينة عمي
عمي عبدالله: نبيج نرفعين رأسنا
أنا: رأسكم دوم مرفوع بإذن الله
أبويه: هاه بنتي شبغيتي
أنا: أووه نسيت شو أبا . . أبويه نحن البنات بنطلع مع بعض ونبا الإذن منكم
أبويه: كلكم بتروحوا
أنا: هيه كلنا
أبويه: بتكفيكم السيارة
أنا: ذياب عطاني سيارته الستيشن
أبويه: زين عبدالله علي موافقين
عمي عبدالله: هيه دام إنهم عند أرجوان فنحن مطمنين
أنا: فديتك عمي والله
عمي علي: ديري بالج عليهم
إطالعت سهيل : ترا بعد غاية بتي
سهيل: غاية إختج وأكيد بتديري بالج عليها
أنا: أكيد إن شاء الله ما بنبعد بنروح بس الباسكن وبني وبنييب لكم
ميرة [ اللي كانت عند سلطان ]: أسكريمة [ تدق خد سلطان ] أبا أسكريمة
سلطان: سيري معاها
ميرة: لا بروح معاك
سمعت حس ولد صغير أعطيه 12 سنة : والله إذا سارت ميرة أنا بسير والله
عمي علي: راشد إقعد مكانك
أنا: عادي عمي خله تعال معاي
راشد [ يقوم ] : أبويه عادي
عمي علي: عادي بس عن الشطانة
راشد: لا أنا ما أتشيطن
سلطان: دام ميرة تباني تسمحين أنا أوديكم
أرجوان: اخاف مرتك تعرف وتعصب عليك
سلطان [ بفشلة ]: زين أنتوا سيروا مع بعض وأنا وميرة بنسير رباعة
أرجوان: زين عيل وين حسين
أبويه: حسين سار ويا ذياب
أنا : زين [ إبتسمت لهم ] يالله مع السلامة
الكل : مع السلامة
طلعت وركبت السيارة أنا وراشد وسولفت وياه لين ما تسخن السيارة
أنا: راشد إنت صف كم
راشد: صف عاشر
أنا: صدق
راشد: هيه عمري 15 سنة
أنا : ما يبين حسبالي عمرك 12 سنة
راشد : هيه ونتي كم عمرج؟!
أنا: 20 سنة
راشد: تدرسين بلندن ؟!
أنا: هيه
راشد [ يطلع لسانه ] : أننننه أدري أصلاً سمعتهم مساعة
أنا أضحك
راشد : زين بقولج شيء بس لا تخبرين حد إني خبرتج
أنا: أوكي قول
راشد: سمعت مساعة أبوج وأبوي يتكلمون إنه بيحجزوا حقنا كلنا يوم الأثنين نسير لندن بنتم أسبوعين جي يعني
أنا: هيه أدري أعرف أصلا أنا لازم أرد قبلكم يوم الأحد برد أنا وربيعتي عشان الكلية عقب أنتوا بتو
راشد : دام تعرفين شحقه ما تقولين حقي
أنا: يعني أنا ما أعرفك مساعه عشان أقولك
راشد [ بتفكير ]: هيه صح . . مسموحه عيل

إطالعت جدامي شفت سلطان طالع وهو شال ميرة وساير لسيارته وركبها تم فترة عقب نزل ويا صوب سيارتي
دق الجامة
وفتحتها
سلطان : راشد تعال معاي يود ميرة
راشد [ يحط ريل ع ريل ] : شوف أنا إهنه مرتاح خبرني شو بتعطيني وأيي وياك
سلطان: بخبرك عن المزرعة اللي بنسير لها اليوم
راشد [ بفضول ]: مزرعة
سلطان : هيه يالله سير سيارتي وبخبرك
راشد [ ينزل من السيارة ويروح سيارة أخوه ]
سلطان: تراه وايد فضولي عسب جي
أنا: هههه حسيت والله زين قولي شو سالفة المزرعة
سلطان: وطلعتي فضولية أكثر عن راشد
أنا: ههه محد قالك تقول جدامي يالله قوول شو السالفة
سلطان: عمي عبدالله عازمنا ع مزرعته بس يمكن باجر نسير مب اليوم
أنا: زين نسير اليوم وبنبات إهناك ونرد باجر
سلطان: ههه متحمسة
أنا: هيه [ أتذكر ] أصلاً بنت عمي خبرتني عن المزرعة وقالت لي في خيول
عاد أنا أبا أجوف الخيول . .
سلطان: تركبين خيل
أنا: لا بس أحب أصور . . محترفة تصوير
سلطان: ما شاء الله [ يسمع هرنات من سيارته ] ها أكيد رشود السموحه بروح مع السلامة
أنا : مع السلامة
وراح سيارته وتم شوية وعقب حرك

. . إتصلت بجوري وخبرتها تطلع هي والبنات
ركبت جوري يمي هيه وديمة . . لأنهم ضعاف وايد وكرسي الستيشن وايد واسع . . عذبة وعليا وغاية ومها وروضة وريم ونالوه ركبوا ورا
أنا: لو ماشي مكان حد ينط وراا لا تضيقوا ع عماركم
نالوه: الحمدلله كلنا سلق [ ضعاف ] . . ~~
أنا: عيل الحمدلله . .
حركت سيارتي
ديمة: حطي لنا شيء نسمعه [ تبطل السدة اللي جدام ] بعد ذياب مول ما محطي ولا سي دي
أنا: أحسن له تراه يروح طريق لدبي مب زين يسمع أغاني عن يصير له شيء
جوري: هيه والله . .
تميت أسوق برزانه واسمع سوالفهم أوقات أضحك معاهم بس ما زلت أطالع الطريق ومنتبهة عليه
لين ما جفت زحمة . . وخففت سرعتي . . جفت سيارة الشرطة وإسعاف
روضة : حاااااااااااااااااااااادث . . ~
.
.
.