البوح الخامس عشر . ~
خالد .~
اليوم بدور متغيرة . . صايرة تسرح . . وكل مرة أفززها من سرحانها
أنا: بدوور
بدور: هلا
أنا: وين هالمرة !
بدور: ولا مكان
أنا: لا والله
بدور: خالد لو يانا ولد شو بتسميه ؟!
انا: شو هالطاري ؟!
بدور: الله يخليك جاوب
أنا: أي شيء . . بدور غيري الموضوع
بدور: خالد ليش كل مرة جي تقولي ؟!
أنا: أووه بدور عاد [ قمت بطلع ]
بدور: والله ما تطلع خلاص سكتت
تميت قاعد . . بدور في أشياء إنتي ما تعرفينها
صعبه علي أقولها لج . . والحل الأمثل نأجل موضوع العيال
.
.
جوري .~
طلعت للشباب أبا اييب أكل . .
وانا أمشي أضطريت أني أغير طريقي عشان ما أمشي تحت المطر فطلعت من الجهة 2
مشيت شوية . . وسويت صوت الرعد . . خفت إستوى فجأه
لنقزت وحضنت الي جدامي . .
تميت ثانية ، 2 ، 3 ، 4 ، 5 ثواني
عقب إنتبهت أني بحضن [ عبدالله ] . .
أنا: عبدالله [ إبتعدت عن حضنه ] أسفة
عبدالله: لا عادي . . أصلاً حتى أنا خفت . .
أنا: والله أسفة [ بحرج ] ما انتبهت على روحي
عبدالله: عادي جوري . . وين كنتي بتروحي ؟!
أنا: كنت بتمشى . . الجو حلو
عبدالله: عادي أتمشى وياج
أنا: أوكي عادي [ أمشي ] حياك
عبدالله: لو فيها إحراج عادي
أنا: لا مافيها إحراج . . وبعدين متعودة عليك بالكلية
عبدالله: زين . . أنتي أخت ذياب وحمدان ؟!
أنا: هيه . . وحسين بعد
عبدالله: إيه . . حبوبين أخوانج
أنا: طالعين علي
عبدالله: مكارة . . المفروض إنتي طالعة عليهم
أنا: هههه اللي هو
عبدالله: عندج جرج فون . . فوني فضى
أنا: فونك جلكسي شراتي صح ؟!
عبدالله: هيه . .
أنا: عندي . . أحينه برجع وبعطيك
عبدالله: لا عادي . . عقب ما بحتاجه أصلاً
أنا: لا يمكن أهلك يحاتونك ولا شيء
عبدالله: أنا ما عندي أهل . . يحاتوني
أنا: كيف ؟!
عبدالله: أمي إطلقت من أبويه من سنين . . وتزوجت واحد ثاني ومن سنة توفت وريل أمي ما يبيني . .
أنا:[ تجرأت ] وأبوك ؟!
عبدالله: أبويه ما سأل عني حي ولا ميت
أنا: شو دراك .؟! يمكن أمك ما تخليه يسأل
عبدالله: خلاص أنا ربيت بدونه . . ما عاد له أهميه . .
أنا: تدري أبوك من ؟!
عبدالله: ولد عم أبوج . . وأعمامج . .
أنا: أنت تدري ؟!
عبدالله: هيه
أنا: عبدالله تدري عندك أخت ؟!
عبدالله: جنان توأمي . .
أنا: صدق ؟!
عبدالله: هيه
أنا: عبدالله تذكر يوم شفناك بالمول . .
عبدالله: يوم أختج تعبانة ودعمتني . . زين ما عقتني . .
أنا ضحكت : هيه . . ترا جنان كانت ويانا
عبدالله: إنتبهت لها . . تشبهني وايد
سمعنا حس من ورانا : شو تسوون ؟!
إطالعت وراي
أنا: ديمووه خرعتيني
ديمة:ههههه أحسن . .
أنا: عبدالله هذي إختي ديمة . . الي دعمتك ذاك اليوم
ديمة: لازم تسودين ويهي . .
أنا: هيه لازم
عبدالله: عيل أنا أترخص . .
أنا: بحفظ ربي . . حتى نحن بنرد داخل
ورحنا . . ونسيت سالفة الأكل . . خخخخخ
.
.
من التعب رقدوا الساعة 1 . .
الحريم بالغرفة اللي تحت ورياييلهم بالغرفة اللي مقابلة لهم
أما البنات كلهم بغرفة وحدة اللي فوق . . ومقابلهم غرفة الشباب
بس مب كل حد رقد
جوري . . الي تفكر كيف ممكن توصل عبدالله لأبوه !
حمدان . . يفكر بدانة وشو اللي رجعها الحينه !
مريم . . تفكر بفارس وكيف ممكن تكلمه !
ديمة . . تفكر بسعيد وهل راضى جنان ولا !
غاية . . تفكر بمايد وهل له علاقة بالاجنبية ولا لا !
ذياب . . يفكر بأرجوان !
سلطان . . يفكر هل هو صدق قسى على سمية ولا !
اما الباقي قدروا يرقدوا بسرعة !
[ ﺑﻌﺪ_ﻣﻨﺘﺼﻒ_ﺍﻟﻠﻴﻞ ; ﺃﻣﻨﻴﺎﺕٌ ﺣﺰﻳﻨﺔ ، ﻭ ﺇﺷﺘﻴﺎﻕٌ ﻻ ﻳﺘﻮﻗﻒ ﺃﺑﺪﺍً . ]

اليوم الثاني . . الجمعة !
أرجوان .~
قمت من النوم . . على الحمام عطول . . أرجع
أه بطني . . شوه الحالة ؟! ما كنت أعرف إنه الحمل جي متعب
منصور: شوفيج ؟!
أنا: ماشي [ أنسدح بتعب يمه ] تعبانة
منصور: [ يسحبني لحضنه ] عساه فيني ياربي
أنا: منصوري لا تقولي جي
منصور: فديتج [ تم يمسح بيده ع يدي ] نامي شوية . .
ورديت أنام بحضنه . .
.
.
جوري .~
قمت من الصبح عشان أساعد حريم أعمامي بالريوق
تدرون ما يبنا الخدم أبد . .
لبست مخورة . . وحطيت الشيلة وطلعت
خالوه عايشة: صباح الخير
أنا: صباحج نور . .
أطالع الريوق طايح .. ما لذ وطاب
أنا: هذا وأنا قايمة أساعدكم
خالوه نادية: ما له داعي حبيبتي . .
قعدت : أنا يوعانة ما علي من الباقي
خالوه نورا: إكلي حبيبتي بالعافيه . . دامه الشباب محد
قعدت أكل . . مسوين بلاليط وبيض . . خبيص . . خبز رقاق . . من زمان ما كلت هالاشياء !
بعد ساعة .~
كنا كلنا قاعدين . .
اللي يتريق واللي يسولف
راشد: إمايه اليوم بركب الدراجات مالي خص . .
عمي علي: زين بتركب بتركب
خالوه نورا: جان طحت لا اتي لي تتويع
حسين: حتى أنا بركب
عمي عبدالله: شيء وايد 6 دراجات
ذياب: من الحينه أنا حاجز لي وحدة
حسين : وأنا وحدة
راشد: أنا وحدة
أبويه: 3 للشباب و3 للبنات ونقاسموهن عاد
راشد: أنا أول واحد [ وقام طلع ]
ولحقه حسين . .
أبويه: عيل وين عبدالله وحمدان وسهيل ما نزلوا
ذياب: أحيد راقدين مادري !
أنا: أبويه بروح أواعيهم . . [ بخبث ] عادي
أبويه: الله يعينهم عيل . . روحي
ما صدقت عطاني شارة الأمان . . رحت فوق على طول وأنا ناوية على حمدان
دقيت الباب بقوة . . بدون ما أوقف . .
لين طلع . . عبدالله
فشلة حسبالي حمدان ولا سهيل بيطلعون !
عبدالله: هلا . .
كان شكله ما يوحي إنه راقد
أنا: أحم سوري . . نسيت إنك موجود
[ انا لا نسيت ولا شي !! ههه ]
عبدالله : عادي . . حمدان أخوج محموم
وا فديتك يا أخوي . . عسى فيني ياربي
عبدالله [ لز شوي عن الباب عشان أدخل ] : حياج
دخلت . . أجوف سهيل يغير الكمادات عن رأس حمدان . .
أنا: وايد مرتفعة حرارته
سهيل: من أمس . . أنا توني أنتبه له ومب راضي يروح المستشفى ويهاذي
أنا: بزقر أبويه هو اللي بيقدر عليه , ,
سهيل: أوكي
رحت خبرت أبويه . . وشلاه غصب المستشفى
.
.
بدور .~
توني قايمة من النوم ما شفت خالد بالغرفة ..
دخلت سبحت . . وبدلت وطلعت
خالد: نعيماً . .
أنا: الله ينعم عليك يا ربي
خالد [ يناولني كوب العصير ] : إشربي
أنا: إن شاء الله . . خالد عادي تروح المطبخ جوف لي شيء خبز من أمس !
خالد: أوكي . . لو ماشي بطلب لج من الدكان
أنا: أوكي . .
لما طلع . . تأكدت إنه إبتعد ورحت الحمام صبيته ورجعت بسرعة
.
.
حمدان .~
قاعد بالمستشفى . . تقريباً حرارتي نزلت
بس منوه قال .. مب راضين يخلوني أطلع
أنا: ياخي مليت . . خلاص أنا صرت زين
سهيل: بعدك تعبان . .
أبويه: هيه صدقه بعدك
أنا: أبا أطلع مابا أتم [ أحاول أقوم ] يلا
أبويه [ يدزني ] : تم مكانك أقول .. أنت ما تستاهل حد يعطيك ويه . . روحك تعبان
أنا: أبويه والله صرت زين . . [ أحط إيده ع راسي ] جوف ماشي حرارة
أبويه: تم إرتاح شوية ..
أنا: [ أرد رأسي ع ورا ] أووف
أبويه: تأفف من اليوم لباجر . . أنا برد المزرعة . . وعقب برد لكم
سهيل: خله علي عمي . .
أبويه: يلا دير بالك عليه [ وطلع ]
أنا: سهيل يلا روح أزقر الدكتور أبا أطلع
سهيل [ يقعد ] : ماشي طلعة
أنا: أوووف
سهيل: منوه القلب ؟! . .
أنا : . . .
سهيل: منوه !
أنا: ددانة . .
سهيل [ بصدمة ] : دانة ما غيرها !
أنا: هيه . .
سهيل: كلمتها . . ؟!
أنا: لا . .
سهيل:تعبك منها . . ! ياربي كيف قلبك رهيف . . !
أنا: جي شايفني بنيه . . [ أعيب عليه ] قلبك رهيف !
سهيل [ يضحك ] : ما تشوف روحك . . كيف مرضت !
أنا: جب . . ياربي متى تمر هالساعات عشان أطلع
سهيل: تتوقع ليش متصلة
أنا: ما عرف . . شو اللي رجعها احينه !!
سهيل: ريح عمرك ولا تفكر . . مافينا يتعب قلبك الرهيف
[ شليت المخدة وفريتها عليه !! ]
سهيل: ههههه . . مقبولة منك بس لأنك مريض . .
.
.
جنان .~
من أمس قاعدة بغرفتي . . ولا سأل عني باباه . .
ولا حتى يا يراضيني . . دخلت عليه المكتب . .
أشوفه قاعد على المكتب . . تقربت منه وإطالعني
تميت أتقرب منه لين وصلت له . .
بست رأسه : أبويه سامحني
أبويه: مسموحة يا بنتي . . إقعدي إنتي لازم تعرفين كل شيء احينه !
أنا: إن شاء الله
أبويه: إقعدي
أنا: لا عادي . .
أبويه: قلت إقعدي
[ رحت قعدت ع الكرسي اللي جدام المكتب ] , ,
أبويه: جنان أنتي عمرج ما سألتي عن أمج . . !
أنا: ما تهمني . . أنت كنت لي أم وأبو . . مكفني عنها
أبويه: جنان أدري إنه بخاطرج قربها . . وأدري أنج بنت في بعض الأحيان تحتاجي لها . . جنان ترا أمج توفت من سنة وشيء تقريباً . .
أنا [ بصدمه ] : صدق !
أبويه: هيه صدق . . الله يرحمها
أنا: الله يرحمها . .
أبويه: ترا لج أخو توأم . . خذته أمج معاها من سنين
أنا: هاه . .
أبويه: هيه [ ببسمة ] إسمه عبدالله . . أكيد إستوى احينه ريال . .
أنا: يعني ما كفاها حارمتني منها . . بعد تحرمني من أخويه
أبويه: تبينه !
أنا [ أدمع ] : أكيد . . في حد ما وده بأخو .. يكون سند وعضيد لي بالدنيا
أبويه: ترا بالامارات
أنا: أبويه . .أباه
أبويه: بييبه لج بإذن الله . . [ سكت ] شرايج خلاص نرجع الامارات ونستقر فيها
أنا : [ بحماس ] هيه . . ياليت والله
أبويه: لهدرجة ما تبين قربي !
أنا: حرام عليك أبويه . . بس صدق كفاية من الغربة . . خل نرجع البلاد نكون بين أهلنا وناسنا
أبويه: صح كلامج
أنا: أبويه أنا بوقف دراستي إهنه . . بكملها بالبلاد . . ولا بوقف كامل
أبويه: ليش !
أنا: تدري أنا مب ويه دراسة [ أضحك ] أنا داخله عشانك . . وبعدين إلا فنون ورسم شو يعني !
أبويه [ يضحك ] : كيفج حبيبتي سوي اللي يريحج
أنا: أبويه شرايك نرجع الحينه
أبويه [ يضحك ] : لا شو الحينه ! خل أرتب أموري أول
أنا: زين بس بسرعة . . ترا أقولك أنا خلاص ما بداوم
أبويه: ناويه صدق يعني . .
أنا: هيه ديموه عطت الفكرة ببالي . . [ أضحك ] هيه بعد ما ودها تدرس !
أبويه: دام ديموه بالسالفة . . عز الله ربحنا !
أنا: هههه أبويه حرام عليك حبوبة البنت . .
مرت ببالي لما كانو عندنا بلندن . .
إقتباس من البوح العاشر من طريقة طرح ديمة
[ أنا: يلا عاد أفرديها . . أقولج ما بتقردنيني لأبوج . . ترا حلو . . وجميل . . زوجيني له
كنت أقولها بروح فكاهية ما كنت أقصد أي كلمة . .
جنان: أفا عليج . . إذا بتفكين عنه عقدته اللي سببتها أمي . . بزوجج له . . بس ما يغرج عمره .. ترا بعده شباب

أنا: أفا عليج . . خليه علي
جنان : زين بنشوف
أنا: زين متى بتعطينه الرسمة !
جنان: بأقرب وقت إن شاء الله
أنا [ بمزح ] : عاد ما أوصيج لو تزوجت أبوج ترسميننا
جنان: من عيوني . . يا حرم أبوي المصون

]
ضحكت هالذكرى . .
أنا: أبويه شو رايك دبيمووه . . [ أغمز له ] شرايك أزوجك إياها !
أبويه [ بإبتسامة ] : ياليت والله . . !
إطالعته وأنا فاجة حلجي على الأخر . . جأني إلا بقرة شايفة حريقه !!
أبويه: جنان بصراحة أنا بخاطري ديمة .. بس كنت خايف من ردة فعلج . . ورده فعل أهلها
أنا: أبويه من ناحيتي مستحيل أعارض زواجك . . يكفي حارم روحك عشاني . . [أبتسم له ] صدقني عمري ما رح أوقف عقبة بطريقك . . بس فكر بأهلها . . رح يرضون ! وأنت وايد كبير عليها . . هيه أصغر مني !
أبويه: ما أدري . . بس صدقيني ما قادر أحرم روحي من التفكير فيها . .
أنا [أغمز له ] شكله رايح فيها الوالد
.
.
أرجوان .~
قاعدة ويا منصور . .
منصور: هاه شحاله ولدي ؟
أنا: يمكن بنت !
منصور : لا أنا أبا ولد
أنا: اللي ايي من الله حياه الله
منصور: صدقج .. أهم شيء تكوني أمه أو أمها . . وأهم من هذا بعد إن الله يقومج بالسلامة
أنا: فديتك حبيبي
منصور: تدرين لو يات بنت أباها تشبهج كامل . . شعرها أشقر نفسج . . عيونها نفسج بالضبط ولا ترا ببدلها بولد ثاني
ضحكت : هههه ليش !
منصور: قلت لج أبا تشبهج . .
أنا: منصور ما رح تتغير علي !
منصور : أبداً . .
أنا : أقرب منه وأحط رأسي ع صدره : ربي يخليك لي
منصور: ويخليج حقي . .
.
.
مريم .~
أنا: يعني شو إماية متى بنرد !
أميه: ما أعرف . .
أنا: بس أبا أرجع أحينه . . عندي شغل
جوري: إنزين حبيبتي خل نستانس نحن يايين نستانس . . ودري الشغل عنج شوية اليوم أجازة
أنا[ أطالعها ] : بليز خلج على صوب . .
اميه: مريم عيب
أنا: إميه دخيلج خل نرجع . .
أميه: بجوف .. يلا روحي شوفي أختج ميرة وين . . وإنتبهي لها
رحت أدور على ميرة وين وأنا بداخلي أغلي على فارس . . !
.
.
غاية .~
قاعدة أكلم مايد . .
مايد: ولهت عليج . .
انا [ بزعل ] : إيه قص علي
مايد: والله ما أقص عليج . . وبعدين شحقه الزعل أحيد أنا اللي مفروض أزعل مب إنتي !
أنا: شو سالفة هذيج الاجنبية
مايد: والله ما أعرفها . . حلفت أنا ليشم ب مصدقتني
أنا: خلاص صدقتك . .
مايد: أكيد ولا
أنا: لا أكيد صدقتك . . مايد بيي اليوم اللي تخليني فيه !
مايد : لا طبعاً . . مستحيل . . حد عنده زوجه شراتج ويخليها !
أنا: فديتك حبيبي
مايد : شوو ! عيديها
أنا سكتت أصلاً طلعت جي عفويه . .
مايد [ يضحك ] : فديتج يوم تكونين عفوية جي . .
أنا: . . .
مايد [ بهمس ] : لا تمين ساكته
أنا: شو تبيني أقول !
مايد: أي شيء . . قولي أحبك . . !
أنا: مايد فيك شيء !
مايد: هيه . .فيني تولد حبج بدون إحساس
أنا : هههه مايد شفيك ؟!
مايد: أحبج
.
.
بعد يومين . ~
أرجوان .~
قمت من النوم ميتة يوع . . ومشتهيه أكل فراولة
سبحت ع السريع ولبست لي لبس طويل وساتر . . وطلعت برع
نزلت من الدري لين وصلت تحت . .
أنا: السلام عليكم . . شحالكم
عموه: عليكم السلام . .
فاطمة: يعني كيف بيكون حالي وأنت سارقة ريلي عني . .
أنا: فاطمة . . بس يعني ما تعودتي
فاطمة: لاا . . أنتي لازم تطلعين من حياتي وحياة منصور
أنا: ما رح أطلع من حياتكم . . منصور ريلي مثل ما هو ريلج [ أحط إيدي ع بطني ] وأبو ولدي بإذن الله
فاطمة [ بصدمة ]: إنتي حامل
أنا: هيه حامل .. وبولد إن شاء الله
عموه: وأنا أقول ليش مطيح عندج . . قاصة عليه بالحمل
أنا [ شهقت ] : أنا ما قصيت عليه . . أنا صدق حامل
فاطمة: هيه صدقناج
أنا [ بصوت عالي ] : مب لازم تصدقوني .. أهم شيء منصور
منصور : ليش أصواتكم عالية
أنا: هلا حبيبي أنت ييت
قاطعتني فاطمة : زين أنك ييت . . تعال إسمع مرتك الي بديتها علي كيف تعلي صوتها على أمك . . وقاعدة تعصب عليها
منصور [ يطالعني ] : صدق هالكلام !
عموه : بعد تسألها هاللي ما تستحي على ويهها !!
منصور [ يقرب مني ] : صدق هالكلام أرجوان ؟!
أنا: لا ما عليت صوتي
فاطمة: هيه قصي عليه بكلمتين
عموه: هذي مب أول مرة . . كل مرة يوم تكون أنت محد تسوي نفس الشيء فيني
منصور [ يمسكني من شعري ] : أرجوان . . ترا كله ولا امي
أنا [ أحاول أبطل إيده ] : منصور حراام عليك .. اه يعور . . منصور أنا حامل
بس هو مب راضي يسمعني . . ماسك شعري ويحركني يمين ويسار . . ويقول
منصور: كله ولا أمي !!
لين ما حسيت روحي بتطلع وصرخت ..
أنا: أأأأأأأأأأأأأأأأأأه بطني . .
.
.