البوح الثاني عشر .~
أرجوان.~
ابتسمت . . عدلت الغشوه . . ومشيت معاه . . كان ماسك إيدي بطريقة غريبة . . بقوة
منصور: يعني قاعدة بكوفي شوب . . شباب رايحين رادين وعاقة الغشوهه بعد !!
كانت قبضته ليدي تألم . .
طول طريقنا للسيارة وأنا أقوله . . : منصور تعورني اه هد ايدي . . اه تعورني
بس ما كان يرد علي . . ما كان يخفف مسكته ليدي
ركبت السيارة . .
أنا: منصور . .
منصور [ يتنفس بقوة ] : اسكتي . .
حاولت أتكلم بس كل مرة يسكتني . .
كان يسوق بسرعة قياسية . .
حتى أنه حسيت بأنه أقتصر المسافة للبحر اللي تقريباً ع الأقل نص ساعة خلاها عشر دقايق
وقف بالمواقف . . وتم ساكت
أنا: منصور والله ما سويت شيء . .
منصور: يعني تقنعيني محد شاف ويهج . . !
أنا: والله محد شافه . . أنا قاعدة ع طرف محد كان يقدر يشوفني غير اللي قاعدين معاي . .
منصور [ بغيرة واضحة ]: وهذا سعيد شافج . . لا تقصين علي وتقولي ما شافني . . !
أنا: منصور هذا سعيد أعتبره عمي . . عمي
منصور: بس هو مب عمج .. ولد عم أبوج . . يعني كان عادي يتزوجج
أنا: منصور تغار منه . . أنا محد يملي عيني غيرك . . محد
منصور [ بحب تملك ] : وأنا مابي حد يشوفج . . أنتي ملكي
إبتسمت له : أنا ملكك العمر كله . . العمر كله
منصور: أحبج
.
.
بدور .~
قاعدة بالمطبخ أسوي لخالد شيء يأكله . .
حابة أسوي له شيء يديد . . بس مافي شيء ببالي . .
يعني كل شيء أعرفه سويته له . .
شليت الفون ودقيت لنالوه [ أختي ] . .
دقايق وياني صوتها
: حي الله من ذكرني باتصاله . .
أنا ضحكت : أنا أذكرج دوم . . هاا ما ناوية أتين البلاد ؟!
منال: أحم عندي أجازة بس ما بيي . .
أنا : أفا ليش ؟! ما وحشنااج !
منال تضحك : وحشتوني وربي . . بس أحم أستحي ايي واقعد ببيت خالوه
أنا: ليش َ! [ سكتت ] أووه عشان أحمدوووه
منال: أحم اسمه أحمد . .
أنا : طاعً . . من أحينه تدافع . .
منال: إي . . خطيبي وكيفي
أنا: تشوفين أنه مناسب لج . !
منال: والله للحين ما صليت الاستخارة . . ولا فكرت ولا شيء . . فكري كله بدراستي . .
أنا: زين حبيبي
منال: شحالها أرجوان .!
أنا: والله ما قمت أشوفها أبداً . . خالد ما قام يروح بيت أبوه وايد
منال: عيل الصبح يخليج روحج !
أنا: لا يوديني بيت خالوه
منال: صدق !
أنا: هيه . . تدرين أحمد يداوم قبل خالد بوايد . . ويرد عقبه يعني طول قعدتي ببيت خالوه هو محد . . فضامن أنه ما يشوفني
منال: اها . !
أنا [ تذكرت ] : اويه أنا أقول شو كنت أبا !
منال تضحك : شو تبين . ؟!
أنا: اسمعي أبا طبخة حلوة وسهله أسويها احينه . .
منال: سباغيتي . . بالخضار . .
أنا: أممم خلج معاي ع الخط . . بسويها وأنتي معاي
منال: أفا عليج . .
وتمينا نتكلم وأسوي السباغيتي ع طريقة منال الغريبة . . كلها خضار . . دياي . . وحارة بعد ..
.
.
ديمة .~
قاعدة بالصالة معاهم كلهم . .
لابسة قميص وردي طويل لتحت الركب مرسوم عليه هالو كيتي وتحته ليغنز [ سكيني ] أسود
هو أصلاً لبس بيت أو للنوم بس الصراحة واسع ومريح فلبسته . .
عاقة شيلة وردية ع رأسي ومطلعة قصتي شوية . .
ماسكة الأيباد بيدي وفاتحة المسن . .
أطالع سعيد . . أباه يحدر المسن . . فيه أشياء أبا أقولها له بس المكان مب مناسب . .
وفيني دودة ماروم أصبر لباجر . . بس هو مب راضي يطالعني . .
حسين: دمدووم
أنا: هااه
حسين: هاه . . شو هالاسلوب ؟! قولي لبيه . . هلا . . مب جي بدفاشة هاه . . !
أنا [ ابتسم ] : هلا أخويه !
حسين: أرجوان ما بتي ؟!
أنا: ما أعتقد . . هيه راحت ويا ريلها . .
حسين: وعيال عمي عبدالله
أنا [ اطالعه بنص عين ] : أحيد عياله بنات . . ! شو تبا فيهم
حسين [ بتوتر ] : ماشي أسأل عنهم بس . . أصلاً عمي عبدالله واعدني يوديني صوب الخيول
أنا [ براحة ] : اها . .
أبويه: أحم . . يا جماعة بما أنه الكل متوالف احينه حاب أفتح موضوع مهم
رفعت رأسي . . جفت سعيد يطالعني بابتسامه . .
صديت عنه . . يعني أفهم ماسكة الايباد أبا اقول شيء . .
أوف . . يستانس يوم يغصص بي . .
أبويه: سبق وكلمت سهيل عن الموضوع وخبرني موافقته . . [ يطالع غاية ] وأعتقد أمج كلمتج عن الموضوع
غاية [ منزلة رأسها بحيا ] . .
أبويه: خبريني رأيج . . لا تسحتين
غاية [ بصوت واطي أشك حد سمعه ]: إلي تشوفونه
خالوه عايشة: البنت تستحي يا سلطان . . فشلتها
أنا [ بغباء ] : شو السالفة ؟! ليش تستحي . .
أبويه: ترا مايد ولد عمج خطب غاية
أنا[ بطلت حلجي ] :هاه
حسين: بقرة . . فاجه حلجج كأنج شايفه حريج . . !
أنا: جب جب . . محد خبرني عيل
سهيل: ترا صارت فجأه . . أميه ترا الولد يبا يملج . . تدرين . .
خالوه عايشة: هيه أدري . . بنجهز للبنت هالاسبوع وبيملجون . . كله ولا أبوها يعفس الموضوع
أها فهمت يعني عمي سالم بالسالفة . . ولا مايد شو يبا بغاية . . !
.
.
مريم .~
قاعدة ع المسن . . أرمس فارس
أنا: فروس . .
فارس: يا عمري كم مرة أقولج ترا أحبج . .
أنا: أدري تحبني . . بس أخاف
فارس: مها . . لين متى يعني بذل روحي . .
أنا: فارس . .
فارس: يوم بموت بتحسي فيني . . خلاص بخليج أنا
أنا: فارس وين . . !
فارس: أنتي ما تحبيني . . ولا واثقة فيني . . ليش أتم !
أنا: فاااارس .. تم
فارس: ماباا . . أنتي ما تحبيني . . تحسبيني العب عليج
وسجل خروجه . . !
بعد يومين .~
[ ملجة غاية و مايد ]
يبون يملجونهم عشان ما يكون لأبو غاية حجة عليها . . ولا وصاية
وبعد لأنه مايد ما يقدر يطول . .
تراضى مع أبوه لما عرف أنه يبا غاية . .
يظن أنه نسى أرجوان . . ما درى عن السبب الحقيقي . . !
.
.
أرجوان .~
قاعدة أفكر بمايد . .
صح أني تزوجت منصور . . وقلبي وعقلي كله معاه . .
بس هذا ما يخليني أنسى مايد . .
وكل ذكرياتي معاه . .
يعني يا مايد . . مالقيت غير أختي تأخذها . . !
غمضت عيوني بتعب . .
منصور: للحين ما تعدلتي !
فتحت عيوني . .
منصور [ يطالع ساعته ] : لا تقولي غيرتي رأايج . . الحينه المغرب بيصلوا الرياييل وبيروحوا المحكمة . . قومي تزهبي
أنا [ بتعب ]: منصور
منصور [ يطالعني ] : فيج شيء !
أنا [ هزيت رأسي وأحاول أصحصح ] : لا . . بس محتارة شو ألبس
منصور: لا تنسين الغشوه . .
أنا: زين ما بنساها . . أنا اقصد أي لون . . ترا بلبس جلابية فخمه .. ما عندي فساتين احينه
منصور: صح المناسبة يات فجأه [ يبتسم ] مب هين مايد . . [ يطالعني ] هو يحبها !
أنا [ هذا اللي معور قلبي كيف يأخذها وهو ما يحبها ] : ..
منصور: شفيج ؟!
انا: ماشي [ أقوم ] أختار أي جلابية الحمرا ولا السودا
منصور: الحمرا طبعاً . . تبين سودا جي رايحة عزا حضرتج !
أنا: منصور عاد لا تستهبل
منصور [ يعقد حياته ] : والله عند ربي صادق تلبسين اسود كأنج بعزا !!
أنا: زين روح [ أسمع الأذان ] الله أكبر وأعظم روح صلى ع ما أصلي وأتعدل وبنروح
منصور: زين . . جهزي لي كندورة ع ذوقج . .
ابتسمت له : من عيوني . .
.
.
مريم .~
قاعدة أتعدل لملجة أخويه . .
بنات عمي كل وحده ترسم مستقبلها ع واحد من أخواني . .
بس أحس غاية أرحم من أرجوان . . ع الاقل هاي ما ينسمع لها حس ..
إن شاء الله تكون أوكي . .
بلبس فستان طويل . . مع أكمام قصيرة . . لونه سماوي
طبعاً يعني حطيت ميك أب عقب ساعه من المناقشات الحادة مع أمي
تقول المكياج يخرب بشرة البنت وأنتي بعدج صغيرة على هذي السوالف .. !
مسكت اللاب وفتحت المسن . .
من ذاك اليوم وهو ما حدر .. أخاف صدق ما يبيني
والله أحبه بس أخاااف أخااف
أندق الباب
أنا: دخلوا
مها: مريوم بعدج ما لبستي !
أنا: ليش متى بنروح !
مها: بعد شوية . . يلا لبسي أنا بلبس بعد
أنا: أوكي . .
مها: نحن تحت خلصي بسرعة وتعالي
أنا: أوكي . .
.
.
جوري .~
توه روحت الحرمة مال الصالون اللي عدلتنا . .
ما شاء الله خلت غاية كأنها من الحور العين . .
الله يعين مايد يوم بيشوفها . .
جميلة . .
طلعت للغرفة اللي يجهزون فيها العروس ..
أنا: ما شاء الله عليها خالوه
خالوه عايشة [ تبتسم ] : أنا لازم أقرا عليها عن عيون الناس
أنا: هيه خالوه أقري عليها . . العين حق
خالوه عايشة: شوفيها من مساعة ما تتكلم .. ساكته
أنا: غاية عمري بلاج !
غاية: اخاف . .
أنا: أدري حبيبي هذي أول مرة . . صدقيني عقب بتتكلمين عنه عادي جدامنا وبتكلمينه عادي . . بس هذا خوف ورهبه طبيعيه وبتخوز
خالوه عايشة: خبريها . . [ تقوم ] يلا بتلبسين الفستان . .
هذا الفستان شفناه في دار الأزياء . . كان توه معروض . . والقطعه ما في منها غير وحدة . . دفعنا عليه الدبل عشان محد يعرف الموديل . .
أنا: أنا بروح صوب جنان وديمة أطالعهم وبالمرة بلبس فستاني
خالوه عايشة: ولا تنسين العباه . . لين ما تبدأ الحفلة أوكي
أنا: هيه أدري سهيل بيروح وبيرجع عليكم
خالوه عايشة: هيه عمري
أنا: خالوه ترا أنا ما بطلع للناس من غير ما ترقيني . .
خالوه عايشة: أكيد لا أنتي ولا خواتج حتى جنان
أنا: زين . . [ أطالع غاية ] هاه العروس هديتي
غاية [ تطالعني بعصبية ]
خالوه عايشة [ تضحك ] : يلا روحي خل أجابلها . .
وطلعت مريت غرفة ذياب ..
كنت ياية أدق الباب ويتبطل . .
جفته لابس بنطلون جينز مع قميص أسود عليه كتابات انجليزية
أنا: يعني حتى بمناسبة مثل هذي لابس جي !
ذياب: بمر واحد من الربع اول عقب بيي بلبس كندورة . .
أنا: اها . . عيل حسين وينه ما أشوفه
ذياب: حسين مع سهيل وحمدان يعدلون المعرس
أنا[ أضحك ] : يعدلونه
ذياب : هيه مودينه الحلاق . . يلا بروح عقب بيي وخبري نانا ترا بجوفها عقب الملجة
أنا: زين
كملت طريقي لغرفة البنات
ديمة: جوووووري ييتي والله يابج . . تعالي سكري السحاب [ عطتني ظهرها ]
سكرته لها . . وصديت صوب جنان . .
أنا: يعني جنون شحقه ما سكرته لج
ديمة: بس جي . . يعني أول ماييت أقولها انتي دخلتي
أنا: اها . . زين أنا بلبس
جنان: جوري محد من الشباب بيكون موجود صح
أنا: احينه أعتقد محد بس لازم نكون بالعباه لو طلعنا . . ما تضمنين . . بس عقب محد بيكون
ديمة: متى الملجة ؟!
انا: بعد شوية أتوقع . . بيروحوا المحكمة
أتدش نانا
نانا: أنا ييت . .
أنا: ههه أخبارج !؟
نانا [ تشل الغشوة ] : تمام . .
أنا: يعني خلاص كبرنا وقمنا نتغشى وجي
نانا: إيه جفتي كيف . .
ديمة [ بحماس ] : قومي فصخي العباة بجوف لبسج
نانا: ليش متحمسة ؟!
ديمة : بس جي يلا . .
قامت فضحت عباتها . . وتمت بجلابيتها الحمرا اللي عليها نقش أسود وذهبي . . طالعة جنااان
ديمة : وين الفستان .!
نانا: مابا فستان جي أحلى
ديمة : زين أنا بروح تحت بجوف غاية
[ ويات تطلع ]
نانا: ديمووه لبسي شيء يسترج . .
ديمة فستان عاري جداً . . يمكن أكثر وحدة فيها جي . . طبعاً من بعد العروس
فستانها طرفه فيه حمالة والثاني بدون حمالة . . لونه أصفر هادي . .
ومن جدام فيه فتحة لتحت الركب بشوي . . وهيه لابسة بوت أسود طويل يغطي الفتحه كامل . .
ديمة: أووه نسيت [ سحكت أول عباة جدامها ولبستها وحطت شيلة سودا ع شعرها ]
جنان: صدق فاصلة !
ديمة: جب . .
.
.
علياء .~
قاعدة أقنع عذبة اتي معانا الملجة . .
عذبة: يعني من أمس تقنعيني وأقولج مابي أروح . . يعني فشلة أنتوا تمشون وتتحركون وأنا أتم قاعدة
أنا: لا مب فشلة . . يلا حبيبي قومي معانا
عذبة: مابي [ تقرا من الكتاب ]
سرت وشليت الكتاب . .
أنا: قومي يلا . . [ أنادي ماما ] مامااااااااه
شوية وأجوف امي موجوده
أنا: ماماه عذوب بترو حيلا بسرعة عدليتها ترا بتلبس نفس فستاني . . [ أغمز لأمي ] اللي شريناه أمس
عذبة [ فتحت عيونها ] : متفقات يعني
أنا: عذووب يا عمري من متى انا اشتري شيء لي بروحي لازم يكون 2 لي ولج . . يلا ماما عدليها نفسي بسرعة . . أنا لو ما رحتي بزعل طول عمري وما بكلمج . . !
ابتسمت لها ورحت أجوف خواتي ..
أدري فيها ما يكون عليها زعلي . .
روضة [تدور حول نفسها ] : عليا جي أنا حلوة
لابسة فستان وردي ناعم . . حلو وخفيف ومحطيه قلوز لونه وردي ع شفاتها . .
من وراها ريم لابسة نفس روضة بالضبط . .
أنا: حلوين ما شاء الله عليكم . . أنا بقول لأمي ما تطلع إلا وهي قارية علينا . .
.
.
ديمة .~
طلعتي من الغرفة كانت عشان أدور سعيد . .
صاير يحقرني وما يكلمني . .
ولا شافني يطالعني ويبتسم . .
امسك قلبي . . شوي شوي بتفضحني والله . .
: ليش يفضحج ؟!
أنا: بسم الله . . أنا كنت أرمس بصوت عالي ؟!
سعيد: عيل مب عالي إلا عالي ونص بعد . .
أنا: سعيد . . [ سكتت شوية ] ترا أنا مب قادرة أتحمل زود . . كل شيء وله حد
سعيد: شوفيج ؟!
أنا [ أغمض عيوني ] : أنا تعلقت فيك . . كل شيء كان يمشي أوكي . . ما أعرف كيف قلبي مشا عكسي كيف يسوي شيء من غير ما يخبرني . . قلبي تهور . . وتهوره . .
[ يقاطعني ] : تهوره جميل . . وأنا بعد تعلقت فيج . .
أنا: بس كيف . .؟! محد بيرضى بهذا الشيء . . أبويه وبنتك
سعيد: ما عليج خلي كل شيء علي . .
.
.

سلطان .~
طلعت من دوامي . . رحت بدلت عشان أروح ملجة أخوي
ها الإنسان مادري بلاه مستعيل . . جي فجأه طلع لنا بسالفة العرس
لبست كندورة بيضا . . وتغترت
أتصلت بسموي . .
أنا: حبيبي
سمية: هلا
أنا: لبستي . . عشان أمرج
سمية: مابي أروح . . تعبانة
أنا [ بخوف ] : شو فيج ؟!
سمية: مافيني شيء بس تعبانة مب قادرة
أنا: أوديج المستشفى
سمية: لا مابي أروح
أنا: سموي شو تحسين
سمية: مادري كله أصيح وما أكل
أنا [ بحدة ] : ليش بالله !!
سمية [ تصيح ]: لا تنازعني . . بصييييييح
أنا: سموي قلبي ليش ؟ ! تراج حامل مب زين
سمية: أنا مابي أكل أبيييييك أنت . . !
أنا: جوفي بروح الملجة الكل يترياني . . ما بطول كلها ساعة وياي حقج
سمية: زين . .
أنا: روحي قعدي مع أمج . . لا تمين روحج أوكي
سمية: بترياك
سكرت عنها وأنا احاتيها بالقو . .
وصوتها صدق صدق تعبان . .
كل همي أخلص وأروح لها
.

مايد.~
قبل نص ساعة ملجت عليها وصرت بنظرهم معرس . .
الكل بارك لي . . أبويه اللي هجرني فوق الشهرين بارك لي . .
سلطان اخويه بارك لي . .
منصور ريل حب حياتي بارك لي . .
أبويه: يلا يا ولدي بتدخل على حرمتك
أنا [ مابا أدخل ] . . : زين
عمي سلطان: ترا نحن بندخل معاك . .
أطالع اللي وقفوا معاه . . ذياب وسهيل وحمدان . . حتى حسين وقف
انا: عمي أنت عمها وابويه عمها . . سهيل ممكن أتقبله . . [ أطالع الباقي ] الباقين ليش . ؟!
حمدان: هاي دلوعتي . .
ذياب: أختي . . وبعدين أحمد ربك بندخل معاك بنخوز عنك التوتر . .
حسين [ يضحك ] : طع ما يبينا
حمدان [ يطلع أول واحد ] : أنا أول واحد يدخل . . !
ابويه: يلا يا مايد تجدم
كنت احس روحي أمشي لموتي بريولي . .
دخلت . . ووقفوني يمها . .
كانوا مغطين راسها بشيء . .
أميه قالت لي انا أشله وابوس رأسها . . بس نسيت
أو يمكن راح عن بالي
تجدم عمي سلطان وشل اللي ع راسها وباس رأسها
والكل سوا نفس حركته . . تصوروا معاها . . وطلعوا
أمي : أقعدوا . . يلا
قعدنا . .
غاية: شحالك ؟!
هزيت لها رأسي : بخير
أميه: ويت عايشة وينج ؟! وين الذهب . .
وييه هاي السالفة المفروض تنقرض . . شو بعد ذهب وما ذهب . . قم أوقف ولبسها سلسلة ع رقبتها . . ودخل الخاتم بصبعها شو ذا ؟!!!
قربت مني امي : يلا لبسها السلسلة

تقربت أمها وشلت عنها الطقم اللي لابستها ع أساس اني ألبسها الطقم اليديد
شليته . . يعني بكون قريب منها حيل . .
بدلوا لي السلسلة وشليتها حاوطت رقبتها ويلست أحاول أسكرها . .
مرة ومرتين وثلاث .. حسيت ذبت من نظراتها . .
تهت ما عرفت شو أسوي . . !
زادت أنفاسي الحارة . . وأنا أطالع عيونها . .
شوية ونجحت في المهمة الأولى . .
أنا: بس عاد شو باجي . . ؟!
أمي: الحلق . . يلا [ بطلت لي واحد ] . .
أنا: أميه شو لي أنا بسوالف البنات
أمي: يلا البنت تتريا يلا
تقربت منها بسرعة وحطيت لها الحلق الاول والثاني . . بس كنت سريع
سلمتني أمي الدبلة . . يا ربي بمسك يدها . . بالأولى والثانية ما لمست جسمها . .
بحركة سريعة مني مسكت ايدها ودخلت الخاتم وأنا أطالع عيونها . .
عيونها ساحرة جداً . . لونها بني غامق . . تهت بنظراتها . . وهي نزلت عيونها عني . .
أمي: يلا بتلبسك هيه الدبلة
أنا [ صديت تحت ]: زين
امسكت إيدي بس معاناه . . ودخلت الخاتم بصورة سريعة . .
أنا: أميه خلاص مابا أتم وايد تعبت . .
أميه: بتدخلون الغرفة . .
امسكتني ووصلتني لغرفة ع طرف . .
كانوا مجهزين كل شيء . .
غاية: أميه مابا أدخل استحي . .
أمها: يلا الريال من متى يتريا . .
دخلت بهدوء ورزانة . . حاولت أتحاشى عيونها الساحرة . . بس ما قدرت
.
.
أرجوان .~
رجعت من الملجة بسرعة . .
حتى ما تميت وايد . . ترييت غاية تنزل وعقب اتصلت بمنصور وروحنا . .
أحس بشيء كاتم ع صدري . . مدري صيحة . . مدري غصة
منصور: دامها الساعة مايات 10 خل نطلع نتعشى بالمطعم
أنا: شحقه . ؟!
منصور: فاطمة شالة البنات وراحت بيت أهلها وأمي في بيت أخوي . . يلا قومي [ وابتسم ]
أنا : زين
يعرف كيف يقنعني . . ما أحب أعانده أبد
لبست لي لبس خفيف ولبست عباة سادة . . والشيلة وشليت الغشوة بيدي . .
أنا: يلا جاهزة
منصور: يلا أنا بشغل السيارة . . 3 دقايق ونزلي
أنا: أوكي
طلعت قبله بشوية . . ما كنت ابا اتم بالغرفة . . أبا أي شيء يلهيني عن التفكير
سمعت حسها تقوله : حبيبي وين رايح
منصور: طالع حبيبي . .
فاطمة: على وين ؟!
منصور: قاعد بروحي ملان . . قلت نطلع نتعشى برع
فاطمة: عاد ما لقيت غيرها !
منصور: شو أسوي . . ما لقيت حد غيرها ؟! انتي محد
فاطمة: كاني ييت . . يلا تعال [ سحبته معاها لفوق ] انا مخليه البنات عند أهلي عشانك
يوم مر من يمي كان بيتكلم بس هي ما عطته مجال
رجعت لقسمي . . وشليت فوني
أنا: ذياااب تعال شلني
.
.