من يحبك كثر ماأحبك أنا..

Grshoob Albdoo · 09-05-2008, 02:44 AM

رجع أبو غاليه من الشركه على الساعه 2، وكان مبين عليه الضيج شوي.. بس محد قاله شي.. يلس تغدا وراح الغرفه يريح، لحقته فاطمه ويلست معاه عالسرير وهو سرحان مايعرف وين الله حاطه..
أم غاليه: منصور.. شو فيك من رجعت وإنت متلخبط..!!
أبوغاليه وهو حاس بضيجه بصدره: مادري يافطيم صار شي اليوم وأنا محتار منه ومب عارف كيف أتصرف..
أم غاليه: خبرني عسى خير إن شاءالله..!!
أبوغاليه: الواحد منا لو ياله معرس لبنته يفرح وانا أشيل الهم..
أم غاليه يودت على قلبها: مــنو..؟؟
أبوغاليه: المحامي خالد..
أم غاليه: خــــالد..!!!!! هو مايعرف عن حالة غاليه..؟؟
أبوغاليه: بلى يعرف بس اليوم خطبها مني.. ويقولي إنه من شافها وهي عايبتنه ويتمناها زوجه له بالحلال..
أم غاليه: كيف..؟؟ وليش يبيها وهو يعرف إنه لو أخذها مابيقدر إييب عيال ويربيهم..!!
أبوغاليه: قلت له.. قالي اليهال آخر همي.. ولا أبي شي غير غاليه.. وقلت له ليش ماتبي الي يشيل إسمك من بعدك بعد عمر طويل، قالي مابي غير غاليه..
أم غاليه: يعني مصر..؟؟
أبوغاليه: فوق ماتتصورين..
أم غاليه: بس أنا مب مستعده أخسر بنتي..
أبوغاليه: قلت له.. وقالي بسوي كل الإحتياطات علشان ماتحمل.. ووالله أحطها بعيوني.. بس زوجها لي..
أم غاليه: لو مايحبها ماكان تمسك بها بهالقوه..
أبوغاليه: كل الي دروا عن مرضها خلوها وجرحوها في قلبها، إلا هو مصمم يوصل لها..
أم غاليه: وأنا ماتمنيت لبنتي إلا واحد مثله..
أبوغاليه: يعني موافقه..؟؟
أم غاليه: لو وافقت غاليه.. بعطيها له وأنا مطمنه عليها..
أبوغاليه: خلاص عيل العصر بنكلمها والي الله كاتبه بيصير..

على الساعه أربع ونص فاطمه ومنصور دشوا على بنتهم غرفتها، وكانت منسدحه عالسرير وتكتب في دفترها الصغير..
غاليه: لالا.. شي صاير فالدنيا يوم أحلى أبوين فالدنيا داخلين علي..
أبوغاليه: ههههههه هالبنيه محد يغلبها..
أم غاليه: طالعه على أبوها..
غاليه: لو ماأطلع على بابا حبيبي أطلع على منو..!!
أم غاليه: أممممم علي أنا مثلا..!!!!
غاليه: ياربي هالحرمه إشكثر تغااااار..
أبوغاليه: هههههههههه الله لايحرمني منكم إنتوا الثنتين..
غاليه: آآآآآآآآآمين.. أنا مضمونه الحمدلله..
أم غاليه: شو قصدج أنا الي مب وفيه..!!
أبوغاليه: بدينا بالضرابه..
غاليه: لاقصدي إني بعنس هني مب متزوجه.. بس شكلها فطيم بتطفش من العيشه وبتخلعك..
أم غاليه: أدريبج تبيم تطفشيني بس أنا يالسه عله على قلبج..
أبوغاليه: على طاري العرس.. غاليه..!!
غاليه هني حست إنه خالد كلم أبوها.. بس مالحق اليوم الصبح عطته موافقتها.. الظاهر هو مستعيل وكلم باباتي على طول..
غاليه: نعم..!!
أبوغاليه وهو يطالع حرمته ورجع يطالع بنته: أممممم في واحد اليوم متقدم لج..
غاليه ماعرفت تضحك تستحي تبكي.. المهم إنها نزلت راسها..
أبوغاليه: أدري إنج بتستغربين بس هذا الي صار.. المحامي خالد كلمني اليوم بعد ماسرتي وخطبج مني..
غاليه سوت نفسها مستغربه: وهو مايعرف عن مرضي..؟؟
أبوغاليه: بلى.. وهو شارنج ومب هامنه شي.. يبيج إنتي وبس..
غاليه: بس أنا مابي أحرمه من العيال.. وهو من حقه يصير أب، وبيلقى الي أحسن عني وتسعده طول عمرها..
أم غاليه: أبوج قاله كل هالكلام وزياده بس هو مصر عليج.. غاليه الريال والنعم فيه ومستعد يسوي كل شي علشانج..
غاليه وقفت وراحت بعيد عنهم، هي كانت مقتنعه بس ماتدري ليش كلام أهلها خلاها تخاف وتحتار..
أبوغاليه: بشو يالسه تفكرين..؟!!
غاليه: أقول يعني.. لو في يوم تمنى الياهل، شو ممكن يصير..؟؟ بيتزوج علي.. ولا.........!!!!!!!!
أبوغاليه قام ووقف في ويها ويلس يطالعها.. وحط يده على ويها وسحبها لحظنه وحظنها بكل قوته..
أبوغاليه: عمره مابيتمنى غيرج.. الي يعيش معاج ياحبيبتي يعاف الدنيا ومافيها.. شوفيني أنا وأمج مالنا غيرج ومع ذلك راضين بحياتنا ونصيبنا..
غاليه: يعني إنتوا موافقين..؟!!
أبوغاليه غاليه هز راسه بالموافقه.. ولفت غاليه على أمها الي هي الثانيه هزت راسها بالموافقه..
غاليه تركت أبوها وراحت تحظن أمها..
غاليه: لو إنتوا موافقين يعني هذا الشي لمصلحتي.. وطول عمري أوافقكم الراي لأنكم أدرى بمصلحتي..
أبوها خلاها في حظن أمها وطلع عنهم، راح وإتصل على إخوانه وطلب منهم يجتمعون عنده.. ورجع يخبر حرمته وبنته إنه إخوانه بيونهم وبيخبرهم بخبر خطبة غاليه..

بعد ساعه تقريبا كانوا الكل موجودين بميلس منصور، أبوحميد وعياله.. وأبوعبدالله وعياله.. وأبوطلال وعياله..
حطوا الفواله وتفاولوا والكل مستغربين من هالإجتماع المفاجئ..
أبوعبدالله: خير ياخوي شو السالفه..؟؟
أبوغاليه: وأنا مايستوي أجمعكم إلا بالشر..!!
أبوعبدالله: مب القصد.. بس فجأة تطلب تشوفنا طلنا.. أكيد شي صاير..!!
أبوغاليه أخذ نفس عميق: هيه في شي صاير..
ناصر: عمي ترانا على أعصابنا قول شو السالفه..
أبوغاليه: لابلف ولابدور.. السالفه ومافيها غاليه متقدم لها معرس ونحن موافقين..
عم المكان صمت فظييييع بعد كلمة بوغاليه، والكل بينه وبين نفسه كيف يبا يزوج بنته وهو أدرى بحالتها.. وأخيرا نطق أبوحميد..
أبوحميد: ولكن يابوغاليه بنتك ماتصلح للزواج.. سامحني بس هذا الصج الي كنا نعرفها..
أبوغاليه: أعرف ياخوي شو تبا تقول.. وغاليه ممنوعه عن الحمل والولاده مب الزواج..
ناصر: يعني الي بياخذها مايبي عيال..؟؟!!!!
أبوغاليه: لا.. يبي غاليه بس، والعيال مايبيهم..
حميد: لايكون بتزوجها شيبه ولا واحد متزوج.. عمي غاليه مب طايحه علشان تبليها هالبلوه..
أبوغاليه: حميد.. مب أنا الي أبيع بنتي..
عبدالعزيز: مب قصده ياعمي.. بس غريبه منو هذا الي مايبي عيال يشيلون إسمه من بعد..؟؟!!!!
أبوغاليه: ريال شارنها.. وهمته غاليه قبل اليهال..
وهني نقز هشام من مكانه وهو معصب: يوم إنك تبا تزوجها وراضي إنها تروح في نصيبها إشعنه ماتزوجها لي!! وإنت تعرف إشكثر أنا أبيها.. وعازف عن الزواج علشانها..!!!!!!!!!
أبوغاليه: هشام هدي أعصابك.. بنت خالتك كانت جدامك ومحد منعك عنها.. أنا قلت لك عن مرضها وإنت الي تركت البلاد وسافرت، ودورت ريال فيكم يضحي علشان بنتي مالقيت.. كلكم قلتوا تعيش من بينا ولا إنا نفقدها.. بس كل هذا لمصلحتكم مب لمصلحتها هي.. كل واحد فيكم فكر بنفسه قبلها..
هشام: لا..أنا فكرت فيها وللحين أبيها.. والدليل إني ماتزوجت، عمي أنا أبيها.. ومب مرخصنها تتزوج غيري وأنا ولد خالتها وأحق بها..
أبوطلال سحبه من إيده ويلسه مره ثانيه..
أبوطلال: إقعد أشوفك.. أنا الي مب موافق على زواجك منها.. ياخوي سامحني بس أنا أبا أشوف عياله وعيال عياله..
أبوغاليه: مسموح ياخوي، وأنا عارف إن هذا شعوركم كلكم.. وبنتي خلاص ياها نصيبها والله يوفقها..
ناصر: بس للحين ماقلت لنا ياعمي.. منو المتقدم لها..؟!!!!
أبوغاليه: المحامي خالد الخيلي..
الكل سكت يوم قال الإسم.. محد قدر يعترض ولا يقول شي، خالد والنعم فيه ماينعاب وينشرى بفلوس الدنيا..
هشام: بس أنــا..!!!!!!
أبوغاليه: هشام... بسألك سؤال واحد.. تقدر تصبر عن العيال خمسين سنه..؟؟ تعطيني ضمان إنك مابتتزوج عليها علشان العيال..؟؟
هشام سكت ونزل راسه..
أبوغاليه: أنا أعرف إنك تموت عاليهال.. ودايما الشباب ينادونك بوهزاع.. وإنت بعد تتمنى غاليه وتبيها زوجه لك.. بس لو إنحطيت بين هالخيارين بتختار العيال.. صح..؟؟؟!!!
هشام وهو شوي ويصيح: وحتى ولو.. المهم غاليه تكون زوجتي..
أبوغاليه: يعني ناوي تتزوج عليها عقب فترة..
خليفه: إنت إنسان أناني..
ناصر: يعني ياهشام تبا تاخذها وبعد فتره تتزوج عليها.. يعني من الحين ناويلها عالجرح..؟؟
هشام:.....................................
أبوحميد: ياخوي دامك موافق وهلك موافقين.. توكل على الله ورد عالريال.. وخلنا نفرح بوردة العيله..
الكل قاموا يهنون منصور ويباركون له.. ومنصور مستانس لفرح إخوانه له.. إلا هشام الي يالس يتجرع الألم ومحد حاسس فيه.. كان ممكن إنه ياخذ غاليه فهاللحظه.. بس مثل ماقال خليفه هشام أناني وصار مثلهم دور مصلحته قبل مصلحة غاليه
...

إنتشر خبر خطوبة غاليه من المحامي خالد، والكل بدون إستثناء فرحوا لها.. وأحمد من وصله الخبر عوره قلبه.. حس نفسه نذل لأنه ماقدر يضحي مثل خالد.. وخدع نفسه بكلمة إنه يضحي علشانها.. بس الندم بداخله قاعد ياكله.. بس شو بيسوي..!! كل شي قسمه ونصيب..
خالد ماحب يطول فالخطوبه وملج بعد أسبوعين.. وسووها حفله راهيه وحلوه في بيت منصور.. ومابقى حد من الأهل ولا الأصدقاء ماحظرها.. وماشاءالله عليها غاليه كانت قمه فالروعه والحلاوه، وحددوا العرس فالصيف يعني بعد شهرين ونص.. وكان أهم شروط غاليه إنها تكمل دراستها..
اليوم غاليه مجهزة مفاجأة حق خالد.. اليوم يوم ميلاده، راحت السوق وإشترت له أحلى الهدايا.. ورتبت الميلس والفواله وأهم شي كيكتها الحلوه..
وصل خالد وإستقبلته غاليه بكل حفاوه وترحاب.. كانت لابسه بدله حمرا وشيله بعد حمرا.. هاللون وايد يحبه خالد.. ودخلته الميلس وهو متخبل على شكلها كانت قمر 14..
يلس خالد على كنبه وهي يلست عالكنبه الثانيه.. يلس يطالعها وهي منزله راسها وتلعب بطرف الشيله..
خالد: أنا خلاص إستويت ريلج يعني تعالي إيلسي حذالي..
غاليه: مابي أستحي..

خالد: أفاااا.. تعالي عن الدلع..!!
غاليه: خالد لاتحرجني.. يوم بتعود عليك بقعد جريب منك..
خالد: ونحن مالجين من أسبوعين وكل ماييتج شردتي عني.. تعالي..
غاليه ترددت ورفعت راسها تتطالعه..
خالد وهو يأشرعلى المكان الفاضي حذاله: تعـــــالي..
قامت غاليه وراحت ويلست وخلت من بينهم مسافه بسيطه..
خالد مسك إيدها: وحشتيني..!!
غاليه سحبت إيدها: ماتشوفشي وحش..!!
خالد: هههههههههههه حياتي والله..
غاليه تغير الموضوع: أنا مساعه دقيت لك ولارديت علي..
خالد: كنت مع ربعي ونسيت التلفون فالسياره، ومن رجعت وشفت سبع مس كولات قلت فخاطري خلاص الحين وراي حرمه مب لازم أنسى تلفوني..
غاليه: هههههه زين عيل غير أسلوبك..
خالد: أممممممم وإنتي بعد لازم تتغيرين..
غاليه مستغربه: أغير شو..!! شوفيني مب عايبنك..؟؟
خالد: لا فديتج كل شي فيج عايبني.. بس كل ماشفتج ماشوف شعرج، حتى يوم الملجه حلفتي علي ماأدخل.. مادري ليش..!!
غاليه: لا عيب تشوفه قبل لانتزوج..
خالد: ههههههههههههه ونحن الحين شو..؟؟
غاليه: بس ملجه..
خالد: يعني زوجج ولا ماخلوني أهلج أقعد وياج بروحنا..
غاليه: أمممممممممم مادري..!!!!
خالد طالعها بنظره خبيثه: لو تحبيني شيلي شيلتج..
غاليه بنظرة أقوى: أنا للحين ماحبيتك..
خالد: هههههههههههههههههههههههه
خالد من كثر ماضحك شرق بالهوى..
غاليه: صحه صحه حبيبي..
خالد: كح كح.. على قلبج ياحبيبتي.. شوفي قلتي حبيبي يعني تحبيني..
غاليه: هههههههههههه
خالد مل منها: على راحتج حبيبتي.. بس خوزي عني بتفاول أحسن لي من الدلوعه..
ويلس خالد ياكل وغاليه تضحك عليه، ويوم خلص قام ورجع مكانه..
غاليه: خلك مكانك أنا بسير وبرجع..
خالد: على أمرج دلوعتي..
غاليه: دلوعتك..؟؟
خالد: مب عايبنج..!!
غاليه: بلى وايد حلو..
خالد وهو يبتسم لها: خلاص دلوعتي سيري..
راحت غاليه تييب الكيكه الي كانت محطيه عليها صورة خالد، وقالت للخدامه تجهزها لها.. وصعدت هي لغرفتها وخوزت الشيله وعدلت شعرها وحطت وردتين حمر فوق إذنها اليمين.. ونزلت وراحت الميلس وشافت أبوها ظاهر من عند خالد..
أبوغاليه: منو هالغزال..!!
غاليه بدلع: بنت منصور فديته..
أبوغاليه: حبيبتي والله.. وينج مخليه ريلج بروحه..؟؟
غاليه: الحين بسير له.. ليندا ييبي الكيكه..
أبوغاليه: ياسلام وأنا مالي كيك..؟؟
غاليه: أمممممممم بعدين..
منصور مشى عنها: الله يرحم أيام كان الغلا كله حقي..
غاليه: ههههههههه فديت باباتي كل عمري فداك..
أبوغاليه: ماظنتي الريل بيخلي حقي شي..
ودخلت غاليه الميلس وهي تدف العربه الي محطيه فوقها الكيكه، وخالد ما إنتبه للكيكه وهو يطالع غاليه الي كانت فاله شعرها القصير وكان شكلها أحلى بوااااايد..
غاليه حطت الكيكه جدامه ويلست حذاله عالكنبه.. خالد يلس يطالعها بنظرات حب وهي مستحيه..
غاليه: بس عاد نزل عينك..
خالد: ههههههههههه
خالد وهو يضحك نزل عينه وشاف الكيكه وإستغرب..
خالد: شو هذا..!!!!
غاليه: كــل عــام وريـــلي بخير..
خالد تم ساكت شوي وهو يتذكر وبعدين إبتسم لها: وإنتي بخير يابعد عمر ريلج..
غاليه: يالله مب ناوي تقطع كيكتك..؟؟
خالد: وأهون عليج تقطعيني بالسكين..!!
غاليه: تراني يايبه السكين بلاستيك علشان مايعورك..
خالد: هههههههههه على قولة أبوج مايغلبج شي..
وقطع خالد الكيك من على جهة وخلى الباجي بيوديه حق أهله، ويلس يأكلها أونه بدال حفلة الملجه الي مادخلها ولا أكلها من الكيك..
غاليه بعد ماخلصوا من أكل الكيك.. راحت وطلعت من زاوية الميلس ثلاث أكياس كبيره..
خالد: شو هذا بعد..؟؟
غاليه: مايستوي عيد ميلاد بدون هدايا..
خالد: زين ماما كان خاطري في سيارة أوتوماتيك يبتيها لي..؟؟
غاليه: هههههههههههههه
خالد: ياسلام من زمان محد دلعني..
وفتح أول كيس وكان فيه مخده كبيره عليها صورة غاليه يوم الملجه وصورة خالد.. وعليها عبارة.. عسانا مانتفارق يوم..
خالد: آمين يارب عسى الله لايفرقنا..
غاليه: يالله إفتح الي بعدها..
وفتح خالد الكيس الثاني وكان صغير شوي وكان داخله قلم وبزم الكندوره وميداليه عليها صورته..
خالد: واااااااااااايد حلو ذوقج.. تسلميلي..
غاليه: الحين وصلنا للأخيره..
وفتح خالد آخر كيس الي كان أكبر منهم كلهم، وكان داخله صندوق كبير وبداخل الصندوق مكينه صغيره لتنظيف كراسي السياره، وتعليقة على شكل آية الكرسي تتعلق فالسياره.. وعلبه صغيره داخها دبله فضيه..
خالد: زين سويتي لأني للحين ماإشتريت لي دبله..
غاليه: عيبتك الهدايا..؟!!
خالد: عيبتني وااااااااايد.. والي عيبني أكثر الأيادي الحلوه الي يابت لي الهديه.. عسى الله يخليج لي إن شاءالله..
غاليه: ويخليك لي يـــارب..
وبعد نص ساعه روح خالد وخلى غاليه بروحها تتذكر كلام خالد وتعيش أيام يديده تحس بطعمها أحلى وأحلى مع مر الأيام..

مرت الأيام على الكل حلوه وسعيده.. ناصر تزوج نجود وسافروا ماليزيا شهر العسل، وماشاءالله جميلة حامل للمره الثانيه.. وشروق مرتاحه ومستانسه مع ريلها.. وأحمد ملج وبيتزوج بعد غاليه بأسبوعين..
والأهم من كل هذا فجر أمس ولدت ويابت أحلى توأم فالدنيا.. ولد وبنت مثل القمر الله يحفظهم لأهلهم.. ولدت فالشهر السابع لأن الحمل وايد تعبها لأنها كبيره فإضطروا يسوون لها عمليه ويولدونها.. وهي للحين تعبانه بس أحسن من أمس..
غاليه: ياربيه ياعموه لو تشوفينهم إشحلاتهم يهبلون..
فجر بتعب: والله محد أهبل غيرج.. فاطمه قولي للدكتور إني تعبانه ومب قادره أتحرك..
جميله: عادي حبيبتي أنا كنت جي مثلج.. بس الحمدلله يومين وعدا الموضوع على خير..
غاليه: أشوفج مستويه دلوعه.. ماما ماعليج منها خليها تولي..
أم غاليه: حرام عليج خليها تتدلع.. وإنتي سيري نادي لها النيرس، خليها تعطيها مهدئ..
طلعت غاليه برع ونادت النيرس وهي راجعه شافت علي رايح لليهال..
غاليه: علي علي..
علي: هلا غاليه شخبارج..؟؟
غاليه: الحمدلله.. مبروك عاليهال.. يتربون في عزكم إن شاءالله..
علي: الله يخليج يابنت منصور.. شفتيهم..؟؟
غاليه: هيه شفتهم.. البنيه تشبهك والولد يشبه عمووه..
علي: ههههههه على طول طلعتي الشبه..
غاليه: تعال بنروح نشوفهم.. حرمتك يالسه داخل آي وآي تعبانه أبا مسكن.. أفففففف مللتني..
علي: ههههههه حرام عليج.. خليها تتدلع، إنتي ماشفتيها كيف كانت بتموت من الألم عالولاده، الله يعينها يارب..
وراحوا وشافوا اليهال وبعدها رجعوا للغرفه ولقوها فاضيه..
غاليه: عاد عندج ثلاث أسابيع ترتاحين فيهم، وبعدها تقومين مثل السبال أقصد الغزال..
فجر: محد سبال غيرج.. وبعدين شوعندج بعد ثلاث أسابيع..؟؟
غاليه: أفااااااااااااااااااااااا نسيتي تاريخ عرسي..؟؟ 07\07\2007
علي: ألف ألف مبروووك ياغاليه.. عساج تتهنين وتتوفقين طوووول العمر إن شاءالله..
غاليه: الله يخليك ياريل عمتي.. وعقبال عيالكم..
أم غاليه: وشو بتسمونهم اليهال..
علي: أمهم مختاره ومخلصه.. وأنا وحليلني مالي شور..

فجر: خل عنك أنا شاورتك الأسامي وإنت وافقت..
علي: هههههههههه بنسميهم حمد وهند..
غاليه: الله وايد حلوين.. الله يخليهم لكم إن شاءالله..
فجر: قوليلي خلصتي كل تجهيزات العرس..؟؟
غاليه: الحمدلله كل شي تمااااااااااام..
أم غاليه: الأسبوع الياي بنحطي زينة العرس.. وبتبتدي حشرة البنات الي بيخيسون عندنا..
غاليه: أي بنات كلهن عرسن عني.. الباجيات شذا ومروى..
أم غاليه: ويدوتج أمس إتصلت وقالت إنهم بيون هاليومين..
غاليه: فديت يدوه تولهت عليها وااااااايد..

ومرت الأسابيع الثلاث مثل البرق وغاليه مابين التجهيزات للعرس ومابين خالد.. الي بدت تتقرب منه وتحبه..
أسبوع العرس كان حافل بالعزايم والتجمعات الحلوه، ومع إنه بيت أهل غاليه هو بيت العروس والمفروض كل الذبايح والفرق عند المعرس، بس أبوغاليه من فرحته ياب فرقة حربيه ويويله.. وكل يوم يدقون لنص الليل والجو ربشه وحلوو.. وكل يوم يذبح ويسوي العشى ولا الغدا ويوم يوزع عالجيران.. ويوم عالفقراء.. ويوم للموظفين الي عنده فالشركه.. دبي كلها إرتبشت لربشة المناصير..

ووصلنا لليوم المنشود، يوم العرس.. 07\07\2007
غاليه قامت الساعه عشر وبدت تجهز الأغراض لهاليوم، وكانت مجهزة شنطة السفر والشنطه الي بتروح فيها الفندق أول يوم من أمس.. سبحت وتدخنت وتعطرت ونزلت تحت وشافت أمها الي يلست تيبب من شافتها..
أم غاليه: فديت عروسنا الحلوه.. عسى الله يهنيج طول عمرج..
غاليه حظنت أمها: الله يخليج لي إن شاءالله.. وينه بابا..؟؟
أم غاليه: برع عند اليويله.. وإنتي تجهزتي..؟؟
غاليه: هيه كل شي جاهز.. الظهر إن شاءالله بتغدا وبرتاح شوي.. وعلى العصر بسير الفندق لأن راعية الصالون بتيي لي هناك..
وفعلا على العصر غاليه كانت فالفندق وياتها الماكييره شمس من بوظبي وبدت تحطي لها المكياج من بعد ماخلصت خبيرة الشعر من التسريحه..
على الساعه سبع تقريبا غاليه كانت مخلصه كل شي ومب باجي غير تلبس الفستان..
غاليه: ياربي ليش تأخرن البنات..؟؟ الحين منو الي بيلبسني الفستان..!!
شمس: لاتلبسين الحين.. إصبري لأذان العشا.. صلي وإلبسي، علشان الله يبارك لج فحياتج..
غاليه: معاج حق.. وأصلا مب باجي وايد عن الأذان..
ومن أذن الأذان صلت غاليه ووصلت مروى..
غاليه: زين وصلتي أبا ألبس الفستان وبروحي ماأقدر..
مروى: إن شاءالله بلبسج.. بس بصلي بالأول.. وإنتي إدخلي الحمام الحين لاتتوهقين بعدين..
غاليه: هههههههههههه إن شاءالله..
وخلصوا البنات لبس فساتينهم وعدلت خبيرة الشعر التسريحه الي إختربت شوي..
شمس: ماشاءالله عليج وااايد جميله.. وإستايلج أسطوري..
غاليه: تسلمين..
مروى: من صغرها وهي تحلم بالعرس الأسطوري وشكله اليوم بيتحقق..
غاليه: الله يعدي هالليله على خير..
وصلوا باجي البنات وبدوا يتجهزون لنزلة العروس لقاعة الأفراح..
غاليه: أحس بيغمى علي..
أم غاليه: بسم الله عليج.. شدي حيلج والله بيساعدج..
غاليه: إن شاءالله..

الناس يالسين ينتظرون العروس.. وتبندت كل الأضواء وإستوى الجو هدووووء.. وإبتدت الدخله بأصوات أقدام تمشي، وبعدها صورة جرس ساعه يدق بقوه وبطء.. وبعدها إنفتح الباب وطلعوا أربع بنات صغار لابسات فساتين ورديه كيوووت ونزلوا من الدري ومشوا إلين وصلوا للكوشه ويلسوا عالمخدات الي محطينها جنب كرسي العروس، وكل هذا على صوت موسيقى هاديه كلاسيك، وبعدهم دخلوا على موسيقى أهدأ أربع راقصات باليه نزلوا وبدوا يرقصون حركات الباليه في نص القاعه.. ويوم خلصوا رجعوا للدري من تحت ووقفوا ينتظرون نزلت العروس لهم..
وفي هالحظه إنفتح الباب وكانت غاليه واقفه ورا الباب وكانت محطيه وصلة شعر على شكل رولات نازله على كتفها باللون الأحمر.. ومكياجها المتعدد الأوان على ألوان الصيف كان رهييييييب.. وفستانها كان مخصر شوي ومن تحت منفوووش.. كانت واقفه مثل الأميره الي تنتظر تنزل لشعبها.. وبدت الدخله على صوت شاعر يشعر لغاليه، وهي واقفه تنتظر يخلص..

اليوم ليله من ألف ليله وليله *** اليوم كلنا بنزف شيخة الحلوين
هللوا معي يالحضور ورحبوا*** بغاليه.. وردة ولا كل الورود
غاليه بنت القمر وأخت النجوم*** من رآها مالقى غير الفرح
يالله عسى الفرحه دايم تدوم *** وتبقى طول الدهر فحب وسعاده

ومن خلص الشاعر شعره، بدت غاليه تنزل على الدري بكل هدوء.. على أغنية عبدالمجيد عبدالله..

خل عينك تناظر شوف منهو ظهر **
بين كل العذارى له شعاع عجيب **
الله أكبر عليها والجمال الرهيب **

غاليه كانت مجهزة حق كل شي.. وطالبه هالأغنيه مخصوص علشان دخلتها.. ومن وصلت لنص القاعه قاموا راقصات الباليه يرقصون حواليها وهي واقفه تبتسم بكل هدوء وفرح..
وبعدها كملت للكوشه ويلست وكل البنات حواليها مستانسين لها.. الكل عيبتهم دخلتها وحسوها فريده من نوعها.. الكوشه كانت عباره عن قصر ملوكي بحديقته والكرسي الي يلست عليه غاليه كان على شكل مرجيحه فالحديقه..
محد مصدق نفسه إنه في قاعه أفراح.. القاعه كانت مزينه بالورود والأزهار بكل أنواعها.. كل القاعه ورود وحركات رهييييييبه..
على الساعه 12 ونص قالوا المعرس بيدخل.. طبعا غاليه مانست ريلها وكانت مجهزة له بعد أبيات شعريه يدخل عليها..
دخل خالد ومعاه إخواته البنات على صوت شاعر وشاعره..

الشاعر: اليوم جيتج يابعد كل الأحباب حامل قلبي لج هديه..
عساني أقدر أسعدج وأهنيج وكل عمري فدا روحج..

الشاعره: إنت عندي كل الوجود إنت بدنيتي حلم وتحقق..
ياعسى ربي يهنينا ونبقى حبايب طول الدهر..

ووصل خالد للكوشه ويلس يطالع غاليه فتره بسيطه وبعدها باسها على جبهتها..
خالد: عسى الله يقدرني وأسعدج طول العمر..
غاليه نزلت راسها وبعدها وقف خالد معاها وصوروا وقصوا الكيك وشربوا العصير.. وكل الأهل معاهم بفرح وسعاده.. كانت ليله من أحلى الليالي.. تكلمت عنها دبي لأسبوع كامل..
وعلى الساعه وحده ونص زفوا المعاريس لغرفتهم فالفندق وهالمره مب على صوت الموسيقى.. كان على صوت صياح أم غاليه الي محد قدر يوقف دموعها على فراق بنتها.. وبالعافيه خلوها تودر غاليه الي كانت ماسكتها بالقوو..
خالد سكر الباب بعد ماظهروا كلهم وخلصت المصوره تصوير.. وراح وفصخ بشته وحطاه على الطاوله.. وراح ويلس مع غاليه عالسرير ورفع شعرها من على ويها وباسها على خدها..
خالد: الحمدلله شفتج بشعر طويل..
غاليه وهي مسحيه: ههههههههه لاتستانس وايد.. آخر مره تشوفه جي..
خالد: فديت روحج، دلوعتي.. شو تتمنين فهاللحظه..؟؟
غاليه وهي منزله راسها: أتمنى نعيش طول العمر فسعاده..
خالد: آمين يارب.. وأنا ما أتمنى أنام وأصحى إلا على صوتج، آكل من إيدج، أروح معاج كل مكان.. حتى الدوام باخذج وياي..
غاليه: ههههههههههه مينون..
خالد: مينون حبج.. مينون في عيونج الي مدوختني.. مينون ومغرم فأحلى ماخلق ربي..
غاليه: بس عاد خالد ترى أستحي..
خالد: بعدج ماشفتي شي.. والله لا أصبحج وأمسيج بغزل.. أفرش لج الأرض ورد وزهور علشان ماتتعب ريولج الصغيره..
غاليه وهي تناظر عيونه: إنت وااايد رومانسي..
خالد: أرجع وأقول لج عسى الله يقدرني وأسعدج طول العمر..

وإنتهت ليله من الحب والفرح.. ليله توجنا فيها بطلتنا أحلى عروس.. وأحلى قمر.. وليله سعيده بتتبعها ليالي أسعد وأحلى مع قلوب حطت الحب هدفها، وبتعيش وبتموت للحب....

النهـــــــــــــايه

لحظه لحظه..

وين رايحين.. نحن للحين ماخلصنا..!!

هــذي نهاية البدايه.. ولازال المشوار أمامنا..

وأتمنى هالبارت تعيبكم..

ولاتبخلون علي بتوقعاتكم للبارت القادم..

وآسف عالتأخير.. البارت كانت جاهز بس
ضروف الجامعه هي حرمتكم من البارت

والسمـــــــوحه عالقصـــــــــور..

(غرشوب البدو) __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
قلبي يحبك وانت تدري بذلك’ عندك خبر انه يحبك ويهواك ~ new ; ฬđήч Łқ	~ Ƙяạzyo❥	عدسة الاعضاء , كاميرا الاعضاء	7	03-26-2010 10:38 PM
من كثر ماأحبك يقولون مسحور ..!!	محروم.كوم	منتدى أخبار المواقع والمنتديات العربية والأجنبية	0	12-24-2009 12:30 AM
من كثر ماأحبك يقولون مسحور ..!!	محروم.كوم	منتدى أخبار المواقع والمنتديات العربية والأجنبية	0	12-24-2009 12:20 AM
من يحبك.....	دلوعة باباتي	شعر و خواطر	14	03-17-2009 01:37 AM
لا تطلب من احد ان يحبك بل اجعله يحبك	شواقي العين	الإستراحه العامة	12	04-05-2008 08:40 PM