من يحبك كثر ماأحبك أنا.. - الصفحة 27

Grshoob Albdoo · #1 09-05-2008, 02:44 AM

رجع أبو غاليه من الشركه على الساعه 2، وكان مبين عليه الضيج شوي.. بس محد قاله شي.. يلس تغدا وراح الغرفه يريح، لحقته فاطمه ويلست معاه عالسرير وهو سرحان مايعرف وين الله حاطه..
أم غاليه: منصور.. شو فيك من رجعت وإنت متلخبط..!!
أبوغاليه وهو حاس بضيجه بصدره: مادري يافطيم صار شي اليوم وأنا محتار منه ومب عارف كيف أتصرف..
أم غاليه: خبرني عسى خير إن شاءالله..!!
أبوغاليه: الواحد منا لو ياله معرس لبنته يفرح وانا أشيل الهم..
أم غاليه يودت على قلبها: مــنو..؟؟
أبوغاليه: المحامي خالد..
أم غاليه: خــــالد..!!!!! هو مايعرف عن حالة غاليه..؟؟
أبوغاليه: بلى يعرف بس اليوم خطبها مني.. ويقولي إنه من شافها وهي عايبتنه ويتمناها زوجه له بالحلال..
أم غاليه: كيف..؟؟ وليش يبيها وهو يعرف إنه لو أخذها مابيقدر إييب عيال ويربيهم..!!
أبوغاليه: قلت له.. قالي اليهال آخر همي.. ولا أبي شي غير غاليه.. وقلت له ليش ماتبي الي يشيل إسمك من بعدك بعد عمر طويل، قالي مابي غير غاليه..
أم غاليه: يعني مصر..؟؟
أبوغاليه: فوق ماتتصورين..
أم غاليه: بس أنا مب مستعده أخسر بنتي..
أبوغاليه: قلت له.. وقالي بسوي كل الإحتياطات علشان ماتحمل.. ووالله أحطها بعيوني.. بس زوجها لي..
أم غاليه: لو مايحبها ماكان تمسك بها بهالقوه..
أبوغاليه: كل الي دروا عن مرضها خلوها وجرحوها في قلبها، إلا هو مصمم يوصل لها..
أم غاليه: وأنا ماتمنيت لبنتي إلا واحد مثله..
أبوغاليه: يعني موافقه..؟؟
أم غاليه: لو وافقت غاليه.. بعطيها له وأنا مطمنه عليها..
أبوغاليه: خلاص عيل العصر بنكلمها والي الله كاتبه بيصير..

على الساعه أربع ونص فاطمه ومنصور دشوا على بنتهم غرفتها، وكانت منسدحه عالسرير وتكتب في دفترها الصغير..
غاليه: لالا.. شي صاير فالدنيا يوم أحلى أبوين فالدنيا داخلين علي..
أبوغاليه: ههههههه هالبنيه محد يغلبها..
أم غاليه: طالعه على أبوها..
غاليه: لو ماأطلع على بابا حبيبي أطلع على منو..!!
أم غاليه: أممممم علي أنا مثلا..!!!!
غاليه: ياربي هالحرمه إشكثر تغااااار..
أبوغاليه: هههههههههه الله لايحرمني منكم إنتوا الثنتين..
غاليه: آآآآآآآآآمين.. أنا مضمونه الحمدلله..
أم غاليه: شو قصدج أنا الي مب وفيه..!!
أبوغاليه: بدينا بالضرابه..
غاليه: لاقصدي إني بعنس هني مب متزوجه.. بس شكلها فطيم بتطفش من العيشه وبتخلعك..
أم غاليه: أدريبج تبيم تطفشيني بس أنا يالسه عله على قلبج..
أبوغاليه: على طاري العرس.. غاليه..!!
غاليه هني حست إنه خالد كلم أبوها.. بس مالحق اليوم الصبح عطته موافقتها.. الظاهر هو مستعيل وكلم باباتي على طول..
غاليه: نعم..!!
أبوغاليه وهو يطالع حرمته ورجع يطالع بنته: أممممم في واحد اليوم متقدم لج..
غاليه ماعرفت تضحك تستحي تبكي.. المهم إنها نزلت راسها..
أبوغاليه: أدري إنج بتستغربين بس هذا الي صار.. المحامي خالد كلمني اليوم بعد ماسرتي وخطبج مني..
غاليه سوت نفسها مستغربه: وهو مايعرف عن مرضي..؟؟
أبوغاليه: بلى.. وهو شارنج ومب هامنه شي.. يبيج إنتي وبس..
غاليه: بس أنا مابي أحرمه من العيال.. وهو من حقه يصير أب، وبيلقى الي أحسن عني وتسعده طول عمرها..
أم غاليه: أبوج قاله كل هالكلام وزياده بس هو مصر عليج.. غاليه الريال والنعم فيه ومستعد يسوي كل شي علشانج..
غاليه وقفت وراحت بعيد عنهم، هي كانت مقتنعه بس ماتدري ليش كلام أهلها خلاها تخاف وتحتار..
أبوغاليه: بشو يالسه تفكرين..؟!!
غاليه: أقول يعني.. لو في يوم تمنى الياهل، شو ممكن يصير..؟؟ بيتزوج علي.. ولا.........!!!!!!!!
أبوغاليه قام ووقف في ويها ويلس يطالعها.. وحط يده على ويها وسحبها لحظنه وحظنها بكل قوته..
أبوغاليه: عمره مابيتمنى غيرج.. الي يعيش معاج ياحبيبتي يعاف الدنيا ومافيها.. شوفيني أنا وأمج مالنا غيرج ومع ذلك راضين بحياتنا ونصيبنا..
غاليه: يعني إنتوا موافقين..؟!!
أبوغاليه غاليه هز راسه بالموافقه.. ولفت غاليه على أمها الي هي الثانيه هزت راسها بالموافقه..
غاليه تركت أبوها وراحت تحظن أمها..
غاليه: لو إنتوا موافقين يعني هذا الشي لمصلحتي.. وطول عمري أوافقكم الراي لأنكم أدرى بمصلحتي..
أبوها خلاها في حظن أمها وطلع عنهم، راح وإتصل على إخوانه وطلب منهم يجتمعون عنده.. ورجع يخبر حرمته وبنته إنه إخوانه بيونهم وبيخبرهم بخبر خطبة غاليه..

بعد ساعه تقريبا كانوا الكل موجودين بميلس منصور، أبوحميد وعياله.. وأبوعبدالله وعياله.. وأبوطلال وعياله..
حطوا الفواله وتفاولوا والكل مستغربين من هالإجتماع المفاجئ..
أبوعبدالله: خير ياخوي شو السالفه..؟؟
أبوغاليه: وأنا مايستوي أجمعكم إلا بالشر..!!
أبوعبدالله: مب القصد.. بس فجأة تطلب تشوفنا طلنا.. أكيد شي صاير..!!
أبوغاليه أخذ نفس عميق: هيه في شي صاير..
ناصر: عمي ترانا على أعصابنا قول شو السالفه..
أبوغاليه: لابلف ولابدور.. السالفه ومافيها غاليه متقدم لها معرس ونحن موافقين..
عم المكان صمت فظييييع بعد كلمة بوغاليه، والكل بينه وبين نفسه كيف يبا يزوج بنته وهو أدرى بحالتها.. وأخيرا نطق أبوحميد..
أبوحميد: ولكن يابوغاليه بنتك ماتصلح للزواج.. سامحني بس هذا الصج الي كنا نعرفها..
أبوغاليه: أعرف ياخوي شو تبا تقول.. وغاليه ممنوعه عن الحمل والولاده مب الزواج..
ناصر: يعني الي بياخذها مايبي عيال..؟؟!!!!
أبوغاليه: لا.. يبي غاليه بس، والعيال مايبيهم..
حميد: لايكون بتزوجها شيبه ولا واحد متزوج.. عمي غاليه مب طايحه علشان تبليها هالبلوه..
أبوغاليه: حميد.. مب أنا الي أبيع بنتي..
عبدالعزيز: مب قصده ياعمي.. بس غريبه منو هذا الي مايبي عيال يشيلون إسمه من بعد..؟؟!!!!
أبوغاليه: ريال شارنها.. وهمته غاليه قبل اليهال..
وهني نقز هشام من مكانه وهو معصب: يوم إنك تبا تزوجها وراضي إنها تروح في نصيبها إشعنه ماتزوجها لي!! وإنت تعرف إشكثر أنا أبيها.. وعازف عن الزواج علشانها..!!!!!!!!!
أبوغاليه: هشام هدي أعصابك.. بنت خالتك كانت جدامك ومحد منعك عنها.. أنا قلت لك عن مرضها وإنت الي تركت البلاد وسافرت، ودورت ريال فيكم يضحي علشان بنتي مالقيت.. كلكم قلتوا تعيش من بينا ولا إنا نفقدها.. بس كل هذا لمصلحتكم مب لمصلحتها هي.. كل واحد فيكم فكر بنفسه قبلها..
هشام: لا..أنا فكرت فيها وللحين أبيها.. والدليل إني ماتزوجت، عمي أنا أبيها.. ومب مرخصنها تتزوج غيري وأنا ولد خالتها وأحق بها..
أبوطلال سحبه من إيده ويلسه مره ثانيه..
أبوطلال: إقعد أشوفك.. أنا الي مب موافق على زواجك منها.. ياخوي سامحني بس أنا أبا أشوف عياله وعيال عياله..
أبوغاليه: مسموح ياخوي، وأنا عارف إن هذا شعوركم كلكم.. وبنتي خلاص ياها نصيبها والله يوفقها..
ناصر: بس للحين ماقلت لنا ياعمي.. منو المتقدم لها..؟!!!!
أبوغاليه: المحامي خالد الخيلي..
الكل سكت يوم قال الإسم.. محد قدر يعترض ولا يقول شي، خالد والنعم فيه ماينعاب وينشرى بفلوس الدنيا..
هشام: بس أنــا..!!!!!!
أبوغاليه: هشام... بسألك سؤال واحد.. تقدر تصبر عن العيال خمسين سنه..؟؟ تعطيني ضمان إنك مابتتزوج عليها علشان العيال..؟؟
هشام سكت ونزل راسه..
أبوغاليه: أنا أعرف إنك تموت عاليهال.. ودايما الشباب ينادونك بوهزاع.. وإنت بعد تتمنى غاليه وتبيها زوجه لك.. بس لو إنحطيت بين هالخيارين بتختار العيال.. صح..؟؟؟!!!
هشام وهو شوي ويصيح: وحتى ولو.. المهم غاليه تكون زوجتي..
أبوغاليه: يعني ناوي تتزوج عليها عقب فترة..
خليفه: إنت إنسان أناني..
ناصر: يعني ياهشام تبا تاخذها وبعد فتره تتزوج عليها.. يعني من الحين ناويلها عالجرح..؟؟
هشام:.....................................
أبوحميد: ياخوي دامك موافق وهلك موافقين.. توكل على الله ورد عالريال.. وخلنا نفرح بوردة العيله..
الكل قاموا يهنون منصور ويباركون له.. ومنصور مستانس لفرح إخوانه له.. إلا هشام الي يالس يتجرع الألم ومحد حاسس فيه.. كان ممكن إنه ياخذ غاليه فهاللحظه.. بس مثل ماقال خليفه هشام أناني وصار مثلهم دور مصلحته قبل مصلحة غاليه
...

إنتشر خبر خطوبة غاليه من المحامي خالد، والكل بدون إستثناء فرحوا لها.. وأحمد من وصله الخبر عوره قلبه.. حس نفسه نذل لأنه ماقدر يضحي مثل خالد.. وخدع نفسه بكلمة إنه يضحي علشانها.. بس الندم بداخله قاعد ياكله.. بس شو بيسوي..!! كل شي قسمه ونصيب..
خالد ماحب يطول فالخطوبه وملج بعد أسبوعين.. وسووها حفله راهيه وحلوه في بيت منصور.. ومابقى حد من الأهل ولا الأصدقاء ماحظرها.. وماشاءالله عليها غاليه كانت قمه فالروعه والحلاوه، وحددوا العرس فالصيف يعني بعد شهرين ونص.. وكان أهم شروط غاليه إنها تكمل دراستها..
اليوم غاليه مجهزة مفاجأة حق خالد.. اليوم يوم ميلاده، راحت السوق وإشترت له أحلى الهدايا.. ورتبت الميلس والفواله وأهم شي كيكتها الحلوه..
وصل خالد وإستقبلته غاليه بكل حفاوه وترحاب.. كانت لابسه بدله حمرا وشيله بعد حمرا.. هاللون وايد يحبه خالد.. ودخلته الميلس وهو متخبل على شكلها كانت قمر 14..
يلس خالد على كنبه وهي يلست عالكنبه الثانيه.. يلس يطالعها وهي منزله راسها وتلعب بطرف الشيله..
خالد: أنا خلاص إستويت ريلج يعني تعالي إيلسي حذالي..
غاليه: مابي أستحي..

خالد: أفاااا.. تعالي عن الدلع..!!
غاليه: خالد لاتحرجني.. يوم بتعود عليك بقعد جريب منك..
خالد: ونحن مالجين من أسبوعين وكل ماييتج شردتي عني.. تعالي..
غاليه ترددت ورفعت راسها تتطالعه..
خالد وهو يأشرعلى المكان الفاضي حذاله: تعـــــالي..
قامت غاليه وراحت ويلست وخلت من بينهم مسافه بسيطه..
خالد مسك إيدها: وحشتيني..!!
غاليه سحبت إيدها: ماتشوفشي وحش..!!
خالد: هههههههههههه حياتي والله..
غاليه تغير الموضوع: أنا مساعه دقيت لك ولارديت علي..
خالد: كنت مع ربعي ونسيت التلفون فالسياره، ومن رجعت وشفت سبع مس كولات قلت فخاطري خلاص الحين وراي حرمه مب لازم أنسى تلفوني..
غاليه: هههههه زين عيل غير أسلوبك..
خالد: أممممممم وإنتي بعد لازم تتغيرين..
غاليه مستغربه: أغير شو..!! شوفيني مب عايبنك..؟؟
خالد: لا فديتج كل شي فيج عايبني.. بس كل ماشفتج ماشوف شعرج، حتى يوم الملجه حلفتي علي ماأدخل.. مادري ليش..!!
غاليه: لا عيب تشوفه قبل لانتزوج..
خالد: ههههههههههههه ونحن الحين شو..؟؟
غاليه: بس ملجه..
خالد: يعني زوجج ولا ماخلوني أهلج أقعد وياج بروحنا..
غاليه: أمممممممممم مادري..!!!!
خالد طالعها بنظره خبيثه: لو تحبيني شيلي شيلتج..
غاليه بنظرة أقوى: أنا للحين ماحبيتك..
خالد: هههههههههههههههههههههههه
خالد من كثر ماضحك شرق بالهوى..
غاليه: صحه صحه حبيبي..
خالد: كح كح.. على قلبج ياحبيبتي.. شوفي قلتي حبيبي يعني تحبيني..
غاليه: هههههههههههه
خالد مل منها: على راحتج حبيبتي.. بس خوزي عني بتفاول أحسن لي من الدلوعه..
ويلس خالد ياكل وغاليه تضحك عليه، ويوم خلص قام ورجع مكانه..
غاليه: خلك مكانك أنا بسير وبرجع..
خالد: على أمرج دلوعتي..
غاليه: دلوعتك..؟؟
خالد: مب عايبنج..!!
غاليه: بلى وايد حلو..
خالد وهو يبتسم لها: خلاص دلوعتي سيري..
راحت غاليه تييب الكيكه الي كانت محطيه عليها صورة خالد، وقالت للخدامه تجهزها لها.. وصعدت هي لغرفتها وخوزت الشيله وعدلت شعرها وحطت وردتين حمر فوق إذنها اليمين.. ونزلت وراحت الميلس وشافت أبوها ظاهر من عند خالد..
أبوغاليه: منو هالغزال..!!
غاليه بدلع: بنت منصور فديته..
أبوغاليه: حبيبتي والله.. وينج مخليه ريلج بروحه..؟؟
غاليه: الحين بسير له.. ليندا ييبي الكيكه..
أبوغاليه: ياسلام وأنا مالي كيك..؟؟
غاليه: أمممممممم بعدين..
منصور مشى عنها: الله يرحم أيام كان الغلا كله حقي..
غاليه: ههههههههه فديت باباتي كل عمري فداك..
أبوغاليه: ماظنتي الريل بيخلي حقي شي..
ودخلت غاليه الميلس وهي تدف العربه الي محطيه فوقها الكيكه، وخالد ما إنتبه للكيكه وهو يطالع غاليه الي كانت فاله شعرها القصير وكان شكلها أحلى بوااااايد..
غاليه حطت الكيكه جدامه ويلست حذاله عالكنبه.. خالد يلس يطالعها بنظرات حب وهي مستحيه..
غاليه: بس عاد نزل عينك..
خالد: ههههههههههه
خالد وهو يضحك نزل عينه وشاف الكيكه وإستغرب..
خالد: شو هذا..!!!!
غاليه: كــل عــام وريـــلي بخير..
خالد تم ساكت شوي وهو يتذكر وبعدين إبتسم لها: وإنتي بخير يابعد عمر ريلج..
غاليه: يالله مب ناوي تقطع كيكتك..؟؟
خالد: وأهون عليج تقطعيني بالسكين..!!
غاليه: تراني يايبه السكين بلاستيك علشان مايعورك..
خالد: هههههههههه على قولة أبوج مايغلبج شي..
وقطع خالد الكيك من على جهة وخلى الباجي بيوديه حق أهله، ويلس يأكلها أونه بدال حفلة الملجه الي مادخلها ولا أكلها من الكيك..
غاليه بعد ماخلصوا من أكل الكيك.. راحت وطلعت من زاوية الميلس ثلاث أكياس كبيره..
خالد: شو هذا بعد..؟؟
غاليه: مايستوي عيد ميلاد بدون هدايا..
خالد: زين ماما كان خاطري في سيارة أوتوماتيك يبتيها لي..؟؟
غاليه: هههههههههههههه
خالد: ياسلام من زمان محد دلعني..
وفتح أول كيس وكان فيه مخده كبيره عليها صورة غاليه يوم الملجه وصورة خالد.. وعليها عبارة.. عسانا مانتفارق يوم..
خالد: آمين يارب عسى الله لايفرقنا..
غاليه: يالله إفتح الي بعدها..
وفتح خالد الكيس الثاني وكان صغير شوي وكان داخله قلم وبزم الكندوره وميداليه عليها صورته..
خالد: واااااااااااايد حلو ذوقج.. تسلميلي..
غاليه: الحين وصلنا للأخيره..
وفتح خالد آخر كيس الي كان أكبر منهم كلهم، وكان داخله صندوق كبير وبداخل الصندوق مكينه صغيره لتنظيف كراسي السياره، وتعليقة على شكل آية الكرسي تتعلق فالسياره.. وعلبه صغيره داخها دبله فضيه..
خالد: زين سويتي لأني للحين ماإشتريت لي دبله..
غاليه: عيبتك الهدايا..؟!!
خالد: عيبتني وااااااااايد.. والي عيبني أكثر الأيادي الحلوه الي يابت لي الهديه.. عسى الله يخليج لي إن شاءالله..
غاليه: ويخليك لي يـــارب..
وبعد نص ساعه روح خالد وخلى غاليه بروحها تتذكر كلام خالد وتعيش أيام يديده تحس بطعمها أحلى وأحلى مع مر الأيام..

مرت الأيام على الكل حلوه وسعيده.. ناصر تزوج نجود وسافروا ماليزيا شهر العسل، وماشاءالله جميلة حامل للمره الثانيه.. وشروق مرتاحه ومستانسه مع ريلها.. وأحمد ملج وبيتزوج بعد غاليه بأسبوعين..
والأهم من كل هذا فجر أمس ولدت ويابت أحلى توأم فالدنيا.. ولد وبنت مثل القمر الله يحفظهم لأهلهم.. ولدت فالشهر السابع لأن الحمل وايد تعبها لأنها كبيره فإضطروا يسوون لها عمليه ويولدونها.. وهي للحين تعبانه بس أحسن من أمس..
غاليه: ياربيه ياعموه لو تشوفينهم إشحلاتهم يهبلون..
فجر بتعب: والله محد أهبل غيرج.. فاطمه قولي للدكتور إني تعبانه ومب قادره أتحرك..
جميله: عادي حبيبتي أنا كنت جي مثلج.. بس الحمدلله يومين وعدا الموضوع على خير..
غاليه: أشوفج مستويه دلوعه.. ماما ماعليج منها خليها تولي..
أم غاليه: حرام عليج خليها تتدلع.. وإنتي سيري نادي لها النيرس، خليها تعطيها مهدئ..
طلعت غاليه برع ونادت النيرس وهي راجعه شافت علي رايح لليهال..
غاليه: علي علي..
علي: هلا غاليه شخبارج..؟؟
غاليه: الحمدلله.. مبروك عاليهال.. يتربون في عزكم إن شاءالله..
علي: الله يخليج يابنت منصور.. شفتيهم..؟؟
غاليه: هيه شفتهم.. البنيه تشبهك والولد يشبه عمووه..
علي: ههههههه على طول طلعتي الشبه..
غاليه: تعال بنروح نشوفهم.. حرمتك يالسه داخل آي وآي تعبانه أبا مسكن.. أفففففف مللتني..
علي: ههههههه حرام عليج.. خليها تتدلع، إنتي ماشفتيها كيف كانت بتموت من الألم عالولاده، الله يعينها يارب..
وراحوا وشافوا اليهال وبعدها رجعوا للغرفه ولقوها فاضيه..
غاليه: عاد عندج ثلاث أسابيع ترتاحين فيهم، وبعدها تقومين مثل السبال أقصد الغزال..
فجر: محد سبال غيرج.. وبعدين شوعندج بعد ثلاث أسابيع..؟؟
غاليه: أفااااااااااااااااااااااا نسيتي تاريخ عرسي..؟؟ 07\07\2007
علي: ألف ألف مبروووك ياغاليه.. عساج تتهنين وتتوفقين طوووول العمر إن شاءالله..
غاليه: الله يخليك ياريل عمتي.. وعقبال عيالكم..
أم غاليه: وشو بتسمونهم اليهال..
علي: أمهم مختاره ومخلصه.. وأنا وحليلني مالي شور..

فجر: خل عنك أنا شاورتك الأسامي وإنت وافقت..
علي: هههههههههه بنسميهم حمد وهند..
غاليه: الله وايد حلوين.. الله يخليهم لكم إن شاءالله..
فجر: قوليلي خلصتي كل تجهيزات العرس..؟؟
غاليه: الحمدلله كل شي تمااااااااااام..
أم غاليه: الأسبوع الياي بنحطي زينة العرس.. وبتبتدي حشرة البنات الي بيخيسون عندنا..
غاليه: أي بنات كلهن عرسن عني.. الباجيات شذا ومروى..
أم غاليه: ويدوتج أمس إتصلت وقالت إنهم بيون هاليومين..
غاليه: فديت يدوه تولهت عليها وااااااايد..

ومرت الأسابيع الثلاث مثل البرق وغاليه مابين التجهيزات للعرس ومابين خالد.. الي بدت تتقرب منه وتحبه..
أسبوع العرس كان حافل بالعزايم والتجمعات الحلوه، ومع إنه بيت أهل غاليه هو بيت العروس والمفروض كل الذبايح والفرق عند المعرس، بس أبوغاليه من فرحته ياب فرقة حربيه ويويله.. وكل يوم يدقون لنص الليل والجو ربشه وحلوو.. وكل يوم يذبح ويسوي العشى ولا الغدا ويوم يوزع عالجيران.. ويوم عالفقراء.. ويوم للموظفين الي عنده فالشركه.. دبي كلها إرتبشت لربشة المناصير..

ووصلنا لليوم المنشود، يوم العرس.. 07\07\2007
غاليه قامت الساعه عشر وبدت تجهز الأغراض لهاليوم، وكانت مجهزة شنطة السفر والشنطه الي بتروح فيها الفندق أول يوم من أمس.. سبحت وتدخنت وتعطرت ونزلت تحت وشافت أمها الي يلست تيبب من شافتها..
أم غاليه: فديت عروسنا الحلوه.. عسى الله يهنيج طول عمرج..
غاليه حظنت أمها: الله يخليج لي إن شاءالله.. وينه بابا..؟؟
أم غاليه: برع عند اليويله.. وإنتي تجهزتي..؟؟
غاليه: هيه كل شي جاهز.. الظهر إن شاءالله بتغدا وبرتاح شوي.. وعلى العصر بسير الفندق لأن راعية الصالون بتيي لي هناك..
وفعلا على العصر غاليه كانت فالفندق وياتها الماكييره شمس من بوظبي وبدت تحطي لها المكياج من بعد ماخلصت خبيرة الشعر من التسريحه..
على الساعه سبع تقريبا غاليه كانت مخلصه كل شي ومب باجي غير تلبس الفستان..
غاليه: ياربي ليش تأخرن البنات..؟؟ الحين منو الي بيلبسني الفستان..!!
شمس: لاتلبسين الحين.. إصبري لأذان العشا.. صلي وإلبسي، علشان الله يبارك لج فحياتج..
غاليه: معاج حق.. وأصلا مب باجي وايد عن الأذان..
ومن أذن الأذان صلت غاليه ووصلت مروى..
غاليه: زين وصلتي أبا ألبس الفستان وبروحي ماأقدر..
مروى: إن شاءالله بلبسج.. بس بصلي بالأول.. وإنتي إدخلي الحمام الحين لاتتوهقين بعدين..
غاليه: هههههههههههه إن شاءالله..
وخلصوا البنات لبس فساتينهم وعدلت خبيرة الشعر التسريحه الي إختربت شوي..
شمس: ماشاءالله عليج وااايد جميله.. وإستايلج أسطوري..
غاليه: تسلمين..
مروى: من صغرها وهي تحلم بالعرس الأسطوري وشكله اليوم بيتحقق..
غاليه: الله يعدي هالليله على خير..
وصلوا باجي البنات وبدوا يتجهزون لنزلة العروس لقاعة الأفراح..
غاليه: أحس بيغمى علي..
أم غاليه: بسم الله عليج.. شدي حيلج والله بيساعدج..
غاليه: إن شاءالله..

الناس يالسين ينتظرون العروس.. وتبندت كل الأضواء وإستوى الجو هدووووء.. وإبتدت الدخله بأصوات أقدام تمشي، وبعدها صورة جرس ساعه يدق بقوه وبطء.. وبعدها إنفتح الباب وطلعوا أربع بنات صغار لابسات فساتين ورديه كيوووت ونزلوا من الدري ومشوا إلين وصلوا للكوشه ويلسوا عالمخدات الي محطينها جنب كرسي العروس، وكل هذا على صوت موسيقى هاديه كلاسيك، وبعدهم دخلوا على موسيقى أهدأ أربع راقصات باليه نزلوا وبدوا يرقصون حركات الباليه في نص القاعه.. ويوم خلصوا رجعوا للدري من تحت ووقفوا ينتظرون نزلت العروس لهم..
وفي هالحظه إنفتح الباب وكانت غاليه واقفه ورا الباب وكانت محطيه وصلة شعر على شكل رولات نازله على كتفها باللون الأحمر.. ومكياجها المتعدد الأوان على ألوان الصيف كان رهييييييب.. وفستانها كان مخصر شوي ومن تحت منفوووش.. كانت واقفه مثل الأميره الي تنتظر تنزل لشعبها.. وبدت الدخله على صوت شاعر يشعر لغاليه، وهي واقفه تنتظر يخلص..

اليوم ليله من ألف ليله وليله *** اليوم كلنا بنزف شيخة الحلوين
هللوا معي يالحضور ورحبوا*** بغاليه.. وردة ولا كل الورود
غاليه بنت القمر وأخت النجوم*** من رآها مالقى غير الفرح
يالله عسى الفرحه دايم تدوم *** وتبقى طول الدهر فحب وسعاده

ومن خلص الشاعر شعره، بدت غاليه تنزل على الدري بكل هدوء.. على أغنية عبدالمجيد عبدالله..

خل عينك تناظر شوف منهو ظهر **
بين كل العذارى له شعاع عجيب **
الله أكبر عليها والجمال الرهيب **

غاليه كانت مجهزة حق كل شي.. وطالبه هالأغنيه مخصوص علشان دخلتها.. ومن وصلت لنص القاعه قاموا راقصات الباليه يرقصون حواليها وهي واقفه تبتسم بكل هدوء وفرح..
وبعدها كملت للكوشه ويلست وكل البنات حواليها مستانسين لها.. الكل عيبتهم دخلتها وحسوها فريده من نوعها.. الكوشه كانت عباره عن قصر ملوكي بحديقته والكرسي الي يلست عليه غاليه كان على شكل مرجيحه فالحديقه..
محد مصدق نفسه إنه في قاعه أفراح.. القاعه كانت مزينه بالورود والأزهار بكل أنواعها.. كل القاعه ورود وحركات رهييييييبه..
على الساعه 12 ونص قالوا المعرس بيدخل.. طبعا غاليه مانست ريلها وكانت مجهزة له بعد أبيات شعريه يدخل عليها..
دخل خالد ومعاه إخواته البنات على صوت شاعر وشاعره..

الشاعر: اليوم جيتج يابعد كل الأحباب حامل قلبي لج هديه..
عساني أقدر أسعدج وأهنيج وكل عمري فدا روحج..

الشاعره: إنت عندي كل الوجود إنت بدنيتي حلم وتحقق..
ياعسى ربي يهنينا ونبقى حبايب طول الدهر..

ووصل خالد للكوشه ويلس يطالع غاليه فتره بسيطه وبعدها باسها على جبهتها..
خالد: عسى الله يقدرني وأسعدج طول العمر..
غاليه نزلت راسها وبعدها وقف خالد معاها وصوروا وقصوا الكيك وشربوا العصير.. وكل الأهل معاهم بفرح وسعاده.. كانت ليله من أحلى الليالي.. تكلمت عنها دبي لأسبوع كامل..
وعلى الساعه وحده ونص زفوا المعاريس لغرفتهم فالفندق وهالمره مب على صوت الموسيقى.. كان على صوت صياح أم غاليه الي محد قدر يوقف دموعها على فراق بنتها.. وبالعافيه خلوها تودر غاليه الي كانت ماسكتها بالقوو..
خالد سكر الباب بعد ماظهروا كلهم وخلصت المصوره تصوير.. وراح وفصخ بشته وحطاه على الطاوله.. وراح ويلس مع غاليه عالسرير ورفع شعرها من على ويها وباسها على خدها..
خالد: الحمدلله شفتج بشعر طويل..
غاليه وهي مسحيه: ههههههههه لاتستانس وايد.. آخر مره تشوفه جي..
خالد: فديت روحج، دلوعتي.. شو تتمنين فهاللحظه..؟؟
غاليه وهي منزله راسها: أتمنى نعيش طول العمر فسعاده..
خالد: آمين يارب.. وأنا ما أتمنى أنام وأصحى إلا على صوتج، آكل من إيدج، أروح معاج كل مكان.. حتى الدوام باخذج وياي..
غاليه: ههههههههههه مينون..
خالد: مينون حبج.. مينون في عيونج الي مدوختني.. مينون ومغرم فأحلى ماخلق ربي..
غاليه: بس عاد خالد ترى أستحي..
خالد: بعدج ماشفتي شي.. والله لا أصبحج وأمسيج بغزل.. أفرش لج الأرض ورد وزهور علشان ماتتعب ريولج الصغيره..
غاليه وهي تناظر عيونه: إنت وااايد رومانسي..
خالد: أرجع وأقول لج عسى الله يقدرني وأسعدج طول العمر..

وإنتهت ليله من الحب والفرح.. ليله توجنا فيها بطلتنا أحلى عروس.. وأحلى قمر.. وليله سعيده بتتبعها ليالي أسعد وأحلى مع قلوب حطت الحب هدفها، وبتعيش وبتموت للحب....

النهـــــــــــــايه

لحظه لحظه..

وين رايحين.. نحن للحين ماخلصنا..!!

هــذي نهاية البدايه.. ولازال المشوار أمامنا..

وأتمنى هالبارت تعيبكم..

ولاتبخلون علي بتوقعاتكم للبارت القادم..

وآسف عالتأخير.. البارت كانت جاهز بس
ضروف الجامعه هي حرمتكم من البارت

والسمـــــــوحه عالقصـــــــــور..

(غرشوب البدو) __DEFINE_LIKE_SHARE__

Grshoob Albdoo · 09-11-2008, 03:31 PM

الجزء الثاني والعشرين..

نرجع نتذكر شوي شو صار آخر البارت السابق..

دخلت غاليه البيت وهي تحس نفسها بتموت من الشوق للبيت الي عاشت فيه أحى سنين عمرها من الطفوله للمراهقه ولحد ماتزوجت خالد وطلعت عنهم...
غاليه: البيت فاضي وينهم..!! بابا.... ماما وينكم..؟؟؟؟
خالد: يمكن طالعين..؟؟
غاليه: لا بابا مايحب طلعات الليل..
خالد: شو دراج.. إفتكوا منج والحين بيجددون شبابهم..
غاليه عطته نظره ونطت على المطبخ وهو وراها، شافت الخدامات يالسات يسولفن ومن شافوها قامن يسلمون عليها..
ليندا: ولكم غاليه..
ميري: كيف هالك غاليه..
غاليه: الحمدلله شخباركم إنتوا..؟؟ وين بابا وماما..
ليندا: بابا واااايد مريض في داخل مستشفى..

غاليه من سمعت الخبر صرخت ومامداها تتكلم ولاحتى تعبر عن الي بداخلها إلا وصوت أمها وراها..
أم غاليه: غااااااليه..!!!!!!!!!!!!!
غاليه لفت عليها وشافتها داخله عليهم تركض، غاليه سبقتها وراحت لها وحظنتها بكل قوتها وهي تبوسها وتصيح..
أم غاليه: فديتج والله.. رحتي وخليتي فراغ كبير بحياتنا..
غاليه: وينه أبوي وليش فالمستشفى..؟؟
أم غاليه: شو فيج..!! أبوج بصحه الحمدلله..
خالد وهو يبوس عمته على راسها: الخدامه قالت لنا إنه مريض..
أم غاليه: لا مريض ولا شي.. يتدلع علينا شوي.. وإنتوا شو الي رجعكم بسرعه باجي لكم أسبوعين..
غاليه: قلبي كان يقولي أبوي فيه شي..
خالد: وماقدرنا نتأخر هناك وهي بهالوساوس..
أم غاليه وهي تدخل بهم داخل: الله يهداج ياغلووي جي تخربين سفرتكم.. أبوج الحمدلله باجر بيظهر..
غاليه: وهو ليش فالمستشفى..؟؟
أم غاليه: مافيه شي.. الضغط شوي إرتفع واليوم إستقرت حالته..
خالد وهو يقعد ويسحب وغاليه وراه: الحمدلله على سلامته..
أم غاليه: الله يسلمك ياولدي..
غاليه: وليش ماخبرتوني..؟؟ أنا مب بنته ولا شو..!!
خالد: حرام عليج وين تبينهم يشغلون بالج هناك..!!
أم غاليه: الحين صار الي صار وكل شي عدا على خير.. إنتوا قولولي شخباركم عسى تهنيتوا هناك بس..
خالد: والله أحلى وناسه.. بلاد حلوه إن شاءالله بوديج فيوم..
أم غاليه: دامكم إستانستوا أنا إن شاءالله ملحوق علي..
غاليه: قوم وديني لأبوي..!!
خالد: غاليه حبيبي وين بتلقين زيارات الحين..
ام غاليه: خلاص فديتج من أصبح أفلح..
غاليه مدت بوز ولفت بويها الصوب الثاني..
أم غاليه: هههههه وأنا الي قلت بيعقلها العرس..
خالد: والله كانت عاقل.. بس شكلها تبا تتدلع عليج شوي..
غاليه وهي تقوم: أنا بسير حجرتي..
خالد: وين سايره..؟؟ قومي خلينا نروح البيت وباجر بييبج هني..
غاليه وهي منصدمه: إنت روح خلني مع ماما..
ام غاليه: لاتفظحينا وسيري ورا ريلج..
غاليه: ماما برقد هني اليوم وباجر بروح أسلم على بابا وبعدين بروح بيتهم..
أم غاليه: لا بالمره ييبي أغراضج وتعالي عيشي هني.. وبعدين إسمه بيتج مب بيتهم..
خالد: عمتي خليها على راحتها..
ام غاليه: لا... قومي سيري ورا ريلج لبيتج.. وباجر الصبح مروا علي وبنسير المستشفى..
غاليه تضايجت من ردة فعل أمها، يعني خالد راضي هي ليش مكبره السالفه..!!!!
خالد: وعمي منو الي راقد عنده..؟؟
ام غاليه: مره خليفه ومره سعيد ماقصروا الصراحه..
خالد: خلاص عمتي نحن بنسير وبنمر عليج الصبح..
غاليه سلمت على أمها وراحت ورا خالد.. كانت حاسه بضيج، هي صح محطيه في بالها إنها بتروح تسكن مع خالد بس والله صعبه بعد هالعمر أزور بيت أبوي كأني ضيفه..
خالد كان يسوق السياره وهو ساكت، ماحب يضايج غاليه بأي كلمه لأنه يعرفها يوم تسكت يعني تفكر في كل شي.. وأكيد هي الحين يالسه تحسب الصح من الغلط..
وصلوا البيت ودخل خالد السياره ويلس يطالع غاليه..
غاليه: شو فيك..؟؟
خالد: نحن يايين من شهر العسل يعني لازم نكون نضحك ومستانسين..
غاليه مستغربه: أكيد ياقلبي.. وليش متصور إني زعلانه..!!
خالد وهو يسمك إيدها: لأني أحسج مضايجه من ظهرنا..
غاليه تلعب بصبعها بدبلته: فالبدايه بس.. لكن يوم حسبتها في راسي لقيتها مب حلوه إنك ترجع بيت أهلك بروحك..
خالد وهو يسحب خدها: فديت العاقل أنا..
غاليه: آآآآآى حبي يعور..
خالد: فديتووو أنا.. يالله إنزلي وخلينا ندخل عليهم..
نزلت غاليه وخالد خلى السياره مفتوحه عشان الخدم يشيلون الشنط..
دخل خالد قبلها وهو يصرخ بصوت عالي: أناااا وصلت..
غاليه بعدها مادخلت وسمعت أصوات ركيض وصراخ من داخل.. وأول مادخلت شافت خالد حاظن خواته الثنتين، ومن شافوها ودروا أخوهم وراحوا لها يسلمون عليها..
خلود: الحمدلله عالسلامه.. نورتوا البلاد..!!
غاليه: الله يسلمج حبيبتي...
حنان: أكيد يبتوا لي هدايا..!!
خالد: لا طبعا.. ماتذكرناكم خير شر..
حنان: أفااااااااا
غاليه: هههههه ماعليج منه، يبنا إشكثر..
حنان: فديت حرمة أخويه..
غاليه: هههههههههههههه
خالد: وينهم أهل البيت منخشين..
خلود: أبويه راقد طبعا وأمايه فالمطبخ تزهب لراشد العشا.. وآخر العنقود رايح بيت الجيران..
خلود ترمس وغاليه في قلبها تقول أنا متعوده بروحي فالبيت الحين ماشاءالله البيت مليان..
خالد: ورشود مسويله راس بعد.. وينها حرمته ماتطبخ له..!!
حنان: رايحه بيت أهلها زعلانه..
خالد: ياربي منهم ومن مشاكلهم.. وعلى شو مضاربين هالمره..
غاليه ماحبت تسمع السالفه أكثر: وينه المطبخ بسير بسلم على عمووه..!!
خالد: تعالي بوديج..
وراحت غاليه ورا ريلها للمطبخ وشافوا ام خالد واقفه تزهب العشا وعاطيتنهم نص ويها..
أم خالد لفت تبا تاخذ الصحن وإنتبهت لحد واقف، ومن رفعت راسها شافت خالد واقف مبتسم كعادته..
أم خالد: خااااااالد..!!!!
خالد راح لها وباس راسها وهي سحبته تلمه لصدرها وتبوسه..
أم خالد: حمدلله عالسلامه متى وصلت..؟؟
خالد: قبل شوي..
أم خالد: فديت روحك ياربي.. ووينها حرمتك..؟؟
خالد يستهبل: راحت بيت أهلها بترقد عندهم..
أم خالد بطيبه زايده: حليلها أبوها فالمستشفى زين يوم يلست عند أمها..
غاليه: عمووه انا هني خالد يقص عليج...
أم خالد شافت غاليه وراحت لها تبوسها، وغاليه باستها على راسها وحظنتها..
أم خالد: ماعليه ياخالد يصير خير.. تلعب علي..
غاليه: ههههههههه أدبيه عدل بالعصا..
خالد: أفااا ريال بلحيتي وأمي تضربني بالعصا..
أم خالد تمسكه من أذنه: وأكسر راسك بعد..
خالد: آي آي خلاص التوبه التوبه..

غاليه: ههههههههههههههههههه
أم خالد: فديتكم والله نورتوا البيت برجعتكم..بس مب جنكم رجعتوا من وقت..؟؟
خالد: غاليه قالت تبا ترجع إشتاقت لكم وأنا ماقدرت أرد لها طلب..
أم خالد: فديتج حبيبتي تستاهلين سلامة الوالد..
غاليه: الله يسلمج عمووه..
ياتهم خلود وهي مضايجه وتنافخ: أمايه حطي العشا لولدج رشود، عنبوا محد قادر يكلمه إلا وصرخ فيه..
خالد: وليش أم حمد تركت البيت..؟؟
أم خالد وهي تهز راسها: ماشي عقل.. بس شو أقول الله يهديهم إن شاءالله..
غاليه: خالد وين غرفتنا أبا أرتاح..!!
أم خالد: فديتج تعبانه.. خالد ودها غرفتها.. وتعالوا تعشوا..
غاليه: مشكوره عمووه بس أكلنا فالطياره وأنا عني بطني متروس، لو خالد يبا خل يتعشى..
خالد: هيه والله أحسني يوعان، أصلا من شميت ريحة الأكل طار فوادي على طباخ الغاليه..
أم خالد: ههههههههههه الحين لاتقولي الغاليه لاتلخبط بيني وبين حرمتك..
غاليه: ههههههههههه كلنا غاليات على قلبه..
خلود: تعالي عيل أنا الي بوديج غرفتج.. وأمايه الله يخليج سكتي ولدج لأني ماصدقت أرتاح من حرمته يطلعلي هو..
وراحت مع غاليه غرفتها.. بيتهم ماشاءالله كان كبير وحلو.. طابقين، الطابق الي تحت كله ميالس للحريم وصالات.. وملحق أبو وأم خالد.. وفوق غرف النوم.. أول ماركبت غاليه فوق خلود تدليها عالطريج..
خلود: شوفي حبيبتي من تصعدين الدري تاخذين يمين وتمشين سيده وتلفين يسار بتلاقين ملحقج، والجهة اليسار نفس الإرشادات بتلاقين غرفة راشد.
غاليه: يعني دايما آخذ يمين.. وبعدين ألف يسار..
خلود: عليج نور...
وراحت معاها لغرفتها وفتحت الباب ودخلوا.. غاليه وايد عيبتها صالة الملحق، ديكورها كان رهيب.. كانت الصاله واسعه وايد.. كانت مثل الخيمه وتحتها يلسات شعبيه مريحه بتلفزيونها وطاولاتها وكل شي.. والخيمه واليلسات كانن باللون الوردي مع الأسود..

خلود: شو رايج بغرفتج ياعروستنا..؟؟
غاليه: وايد روعه الصراحه.. ذوق منو..؟؟
خلود: الصاله ذوقي أنا وحنان.. بس الغرفه ذوق حبيبج خالد..
غاليه راحت للغرفه وفتحت الباب وأول مادخلت تخبلت على الغرفه الهاديه الي مأثثنها خالد لها..
غاليه: صراحه خبااااال. وايد عيبتني..
الغرفه كانت زاويتين.. أول شي على اليمين كان السرير البني وملحقاته من كبت وطاوله وغيره ومزين ومجهز مع الديكور الي كان على هيئة كهف.. الحركه كانت حلوه وعيبت غاليه.. الجهة أو الزاويه الثانيه الكنبات الراهيه الحلوه بديكور عجيب كلها إستايل غربي روووعه..
غاليه: صراحه تناسق ولا أروع..
خلود: يعني عيبج..!!
غاليه: إلا خبل فيني، ماشاءالله عليكم ذويقين..
خلود: قلنا لازم نبهرج بنت المنصوري مب أي شي يعيبها..
غاليه: حبيبتي والله.. أنا كل شي من طرف خالد وأهله أحبه..
خلود: وتحبين خالد طبعا أكثر شي..
غاليه استحت وضحكت بهدوء وراحت ويلست عالسرير..
خلود: أخليج تبدلين وترتاحين.. وبسير بشوف خالد وينه.. ماتبين عشا صح..؟؟
غاليه: لا حبيبتي تسلمين..
طلعت خلود وغاليه يلست تتطالع الغرفه الي عيبتها من الخاطر..
فصخت عبايتها وطلعت ثيابها من الكبت الي كان مرتب عدل، خذت لها بيجامه سبورت ورديه وراحت تسبح..

فالصاله الي تحت خالد كان قاعد مع أهله ياكل ويخبرهم عن السفريه..
ام خالد: الحمدلله يوم إنكم إستانستوا..
خالد: الحمدلله.. هاااا راشد شو سالفتك اليوم بعد..!!
أم خالد: إنت خلك منه.. إدخل إرتاح وباجر بتكلمه..
راشد وهو يقوم عنهم: معاها حق، مشاكلي ماتخلص..
خالد وهو يطالع راشد الي يصعد الدري: لايكون زعل..
أم خالد: خله يزعل.. مب قاصر غير بنت عويش تمشي البيت على هواها..
خالد: لا شكلها السالفه كبيره هالمره..!!
خلود: لا كبيره ولا شي.. ست الحسن تبا تطلع في بيت بروحها وهو مب مستعد.. والحين تبي تستولي على بيتنا..
خالد: مافهمت.. شو تستولي عالبيت..؟!!
حنان: يعني تامر وتنهي على كيفها..
خالد: محد يامر وينهي هني غير أمايه وأبويه، يوم بيصير لها بيت بروحها تتحكم به.. هذا الي قاصر عيال أمس يمشونا على هواهم..
أم خالد: قلنا لأبوك الله يهداه بعده صغير عالعرس.. قال لا خلونا نفرح به بدل خالد الي مب راضي يعرس..
خلود: بس رايه اكبر عني بسنتين يعني المفروض تكون عاقل..
أم خالد: وهو اكبر منها بسنتين بس عقله عقل ياهل..
خالد: فكونا من سيرتهم.. اليازيه وينها..؟؟
حنان: وين بتكون في بيتها.. صار لنا أسبوع ماشفناها..
خالد: والله هالبنيه من عرست نستنا..
أم خالد: معذوره ياخالد.. ماشاءالله يابت عيالها ورا بعضهم، والحين مب قادره تظهر بسبتهم..
خالد: محد قالها تفرخ كل سنه واحد.. الحين وصلت ثلاثه وبعد شهرين بتييب الرابع مب حرام جي، وصحتها ماتحاتيها..
أم خالد: الله بلاها بهالريل، مايقول الدنيا غلت والمصاريف زادت، هو كيف بيقدر على كل هالمصاريف..!!
خالد: خلي المصاريف على صوب.. التربيه أول شي، منو الي بيربي هاليهال وهو لاهي عنهم طول الوقت..
خلود: الله يهديهم بس..
خالد: خلاص عيل أنا بطلع برقد.. تصبحون على خير..
أم خالد: وإنت من أهله.. دير بالك على حرمتك..
خالد وهو يتبسم: من عيوني..
وصل خالد غرفته وتوقع تكون غاليه راقده.. بس من دخل قابلته ريحة البخور الي تعود يشمها في إيطاليا وحس نفسه رجع لشهر العسل.. من دخل الملحق شافه مظلم إلا من ليتات خفيفه على شكل فوانيس معلقه بالخيمه كانت عاطيه الجلسات الشعبيه منظر رومانسي..
دخل الغرفه ولقاها نفس الشي مظلمه بس كانت بدل الليتات شموع، دور بعينه على غاليه ولقاها قاعده عالكرسي الهزاز الي جنب السرير.. إقترب منها وكانت مثل الملاك النايم.. خالد مسكها وشالها على إيدها وهي حست فيه وتمسكت برقبته وصار ويهه في ويها وهو شالنها..
خالد بإبتسامه ساحره: أحلى حركة رومانسيه.. بس للأسف ملاكي فيه رقاد اليوم..
غاليه إبتسمت له: مافيني رقاد.. بس غفلت شوي..
خالد حطها عالسرير ولحفها: والله..!! خلاص إرتاحي هني وانا ببدل ثيابي وبرجع لك..
غاليه وهي تتثاوب: حطيت لك بيجامتك على الكنبه..
خالد أخذ بيجامته ودخل يسبح، تسبح عالسريع وظهر وشاف غاليه ساحبه اللحاف على راسها وراقده..
خالد: هههههههه وين الي مابترقد..!!
راح خالد ورقد يمها وتغطى وهو حاس براحه إنه خلاص صار في بيته وبين أهله.. وأهم شي الحلم تحقق..

باليوم الثاني إنتشر خبر رجوع غاليه وخالد من شهر العسل، والكل حاول يكلمها بس هي كانت نسيانه تفتح موبايلها...
الساعه تسعه الصبح قامت غاليه من الرقاد وشافت خالد راقد في سابع نومه.. بدت تصحيه مثل ماتعودت وهم بروما.. كانت تبوس إيده وريوله وويه إلين يحس فيها ويقوم..
خالد: أحلى صباح لأحلى قطوه تلعب بريولي..
غاليه: ههههههههه شو يعني أنا قطوتك..
خالد: أنا قلت أحلى قطوه..!!
غاليه: يكون صلحتها يعني.. يالله حبي قوم بدل وخلنا ننزل تحت نتريق وبعدين أبا أزور أبويه..
خالد وهو يتمدد بكسل: متذكر حبيبي.. إن شاءالله الحين ببدل وبننزل..
غاليه خلته وراحت تطلع لها الجلابيه الي بتلبسها اليوم، هـذا أول يوم لها هني يعني لازم تكون كاشخه.. طلعت جلابيه عنابيه كانت مخصره من الصدر وتبدأ توسع من الخصر وتحت.. وكانت فيها حركات وشك باللون الذهبي.. الجلابيه كانت روووعه عليها، ويلست تحطي مكياج عنابي بس هادي شوي يعني مش أوفر.. وكثرت من الجحال علشان يبين ملامحها العربيه الأصيله..
وسحبت شيلتها العنابيه ولمت شعرها القصير على فوق ولبست الشيله..
طلع خالد من الحمام وكان يبا يقول شي بس من شافها سكت ويلس يتأملها..
غاليه وقفت وهي تتدلع: حلو حبيبي..!!
خالد إقترب منها وهو بعده يتأملها: تبين الصراحه..!!
غاليه: هيه.. بس خلك بعيد لاتقترب.. ورانا ميت شغله وشغله اليوم..
خالد: ههههههههه لا بس صج حبي.. شكلج بدوي أصل..
غاليه: هههههههههههههههههههههههههههه
خالد: يعني أول مره أشوفج بالجلابيه والجحال بزياده على عينج، صبري بييب الكاميرا..
غاليه: هههههههههه والله إنك متفيج..
خالد: تعالي فالصاله عند الخيمه بيكون أحلى..
طلعت غاليه الصاله ويلست فالخيمه.. وسوت كذا وضعيه بينت أصالة العرب فيها..
خالد: والحين يابنت النشامى شيلي الطرحه خليني أشوف الحلاوه على أصولها..
غاليه وهي تفصخ الشيله: إنت مينون ومتفيج ورانا ناس تنتظرنا تحت..
خالد: والله والله آخر صوره..
ويلس خالد يصورها وهو متخبل عليها.. وده بس يقعد طول اليوم يصورها ويشوفها..
غاليه رجعت تلبس شيلتها..: يالله أنا يوعانه خلنا ننزل..
ونزل خالد تحت وهو ماسك إيدها ويسولف وهي ميته من الضحك، كانت غاليه نازله ومب منتبهه لأهل زوجها وهم يالسين يطالعونهم تحت.. وقبل لاتحطي ريلها على آخر الدري أم خالد كانت يالسه تيبب والبنات يرحبون فيها..
غاليه إستحت وويها صار أحمر.. وخالد مستانس ويلصق فيها بزياده، غاليه باست عمتها على راسها ووقفت تكلمها وهي مستانسه.. وإنتبهت على خالد يسلم على أبوه فراحت لعمها وباسته على خده وراسه..
أبوخالد: هلا والله بقمرنا.. إشحالج بنتي عساج مرتاحه..!!
غاليه وهي تيلس يمه: الحمدلله بخير.. إنت إشحالك عمي..!!
أبوخالد: يوم شفتج خلاص شفت الخير..
غاليه: الخير في ويهك ياعمي..

خالد: هيه خلاص الغلا كله لغاليه الحين، وإلا خالد طار طيره..
خلود: زين عرفت مقامك..
حنان: ههههههههههههههههههههه
خالد: واليازيه وينها.. لايكون ماتدري إنا وصلنا..!!
أم خالد: بلى تدري.. وبتيينا عالغدا..
غاليه يالسه معاهم وياتها ضيجه، يعني لازم أرجع هني وأتغدا عندهم.. والله ولهانه على ماما وبابا بخاطري أقعد وياهم..
خالد: غاليه.. وين سرحتي..!!
غاليه تبتسم له: لا معاكم..
خالد: يالله قومي نروح نتريق بسرعه علشان نروح لأبوج..
غاليه قامت وراه وراحوا يتريقون، وعلى الساعه عشره كانوا فالسياره مع أم خالد ومروا على أمها وودوها معاهم..
غاليه كانت يالسه ورا مع أمها وعمتها جدام مع خالد..
أم غاليه همست لغاليه: شاطره يوم خليتي عمتج تقعد جدام..
غاليه إبتسمت لها وسكتت هي فخاطرها بس تبي تشف أبوها ولاهمها منو الي يقعد ورا ولا جدام..
وصلوا المستشفى وغاليه متخبله خلاص تبا تدخل على أبوها، شافت ناصر وخليفه برع واقفين يسولفون ومن شافوهم راحوا لهم..
ناصر: هلا بالمعاريس.. حمدلله عالسلامه..
خالد: الله يسلمك الشيخ.. شخباركم عساكم بخير..
خليفه: نورت البلاد برجعتكم..
غاليه: تسلم ياخليفه.. أبويه وينه..!!
خليفه: صبري حطيته في مخباتي.. أفففف شق كندورتي وطاح..
غاليه بنرفزه: خليييييفه..!!!!!!!
خليفه: ههههههههههه يعني وين بيكون في غرفته.. سيري عنده..
خالد: خليفه لاتحرق أعصابها.. روحي غاليه الغرفه..
غاليه مشت بسرعه ودقت الباب خفيف ودخلت، لقت عمها أبوحميد وعبدالله وجميله وخالتها مريوومه وبنتها ميعاد، وطاحت عينها على أبوها الي كان يالس عالسرير ومحطيين له أوكسجين ووايرات حق القلب على صدره.. غاليه حطت يدها على قلبها أول مره تشوف أبوها ضعيف جي..
مروى: غاااااااااااااليه..
أبوغاليه من سمع الإسم لف على الباب وشاف بنته واقفه ودمعه خانتها ونزلت على طرف عينها.. غاليه من شافها أبوها ركضت له وحظنته بوله الدنيا كله.. وقعدت في حظنه تصيح وهي تقول كلمات مب مفهومه..
أبوغاليه: حبيبي متى وصلتي..؟؟ وليش رجعتي بسرعه..!!
غاليه تمسح دموعها: قلبي كان شاك إنك تعبان فقلت لخالد يرجعني علشان أتطمن عليك..
أبوغاليه وهو حاظننها بكل قوته: والله مشتاق لج ياشمعة البيت..
أبوحمبد: تعالي ياغاليه خلي أبوج لاتعبينه..
راحت غاليه لعمها وسلمت عليه، وسلمت عالكل بسرعه ورجعت ويلست على سرير أبوها..
خالد: إنزين أنا هني رحبوا فيني.. ولا بس غاليه الي غابت عنكم!!
أبوغاليه: حمدلله عالسلامه يالنسيب.. شخبارك..؟؟
خالد وهو يبوس عمه: الحمدلله كل شي تمام.. إنت طمني على صحتك اليوم إن شاءالله أحسن..!!
أبوحميد: الحمدلله اليوم أحسن عن قبل.. شوف ويهه راد شباب..
غاليه: أشوفه عاد محلو.. شو السر يابوغاليه..؟؟
أبوغاليه: هههههههههههه
عبدالله: شخبارج ياغاليه عساج مرتاحه، لو أذاج خالد خبريني..!!
غاليه: الحمدلله أنا وايد مرتاحه..
أم غاليه: والله المفروض نسأل خالد عن أخباره، بنتي دلوعه أكيد أذته..!!
غاليه تتطالع أمها بعين: ماعليه الله كريم..
أم غاليه: ههههههه دام هذا ردج يعني الحمدلله عقلتي..
خالد: ومنو مثل غاليه.. بالعكس حبوبه وطيوبه وتسمع الكلام..
غاليه وهي تعطيهم ظهرها: عيل ليش ماعطيتني المصاصه يا بابا..
أبوغاليه حظن بنته: ههههههههههه فديت بنوتي الحلوه، محد له شغل فيها.. كيفها تسوي الي تبيه..
غاليه طلعت لسانها لأمها وغمزت لخالد بعين وحده..
أم غاليه: قويه ماتنغلب..
خالد: خلاص غاليه.. خلي عمي يرتاح وبنرجع له العصر..
غاليه بضيج: لا خلني هني إنت روح.. وأنا بالليل برجع البيت..
أم غاليه: لا ياغاليه عيب.. روحي مع ريلج تغدي وإرتاحي والعصر تعالي مره ثانيه..
أم خالد: هيه أحسن بعد.. لأن اليازيه بنتي بتيينا عالغدا وتبا تسلم عليج..
خالد وأمه والباجين كلهم طلعوا ووقفت غاليه أونها تسلم على أبوها وأمها قبل لاتروح..
غاليه: ماما أبا أقعد معاكم.. والله مشتاقة لكم..!!
أم غاليه وهي تحظنها: ماعليه بس روحي الحين، أهل ريلج بيزعلون عليج لو مارحتي..
غاليه: خالد مابقول شي أعرفه..
أبوغاليه: حبيبي روحي مب حلوه في حقنا.. وأنا إن شاءالله بظهر باجر وبعزمكم عالغدا، وبتقعدين معانا لليل..
غاليه رضت بالواقع وسلمت عليهم وراحت.. كانت حاسه إنها غريبه في بيت عمها، للحين ماتعودت على حياتهم.. وفي نفس الوقت مشتاقه لأهلها.. تبا تقعد معاهم وتخبرهم عن سفرتها.. __DEFINE_LIKE_SHARE__

Grshoob Albdoo · 09-11-2008, 03:35 PM

بعد الغدا غاليه يلست مع اليازيه وعيالها، وعمتها والبنات راحوا عنهم... وخالد يلس فالميلس مع أخوه راشد..
اليازيه: وشخبارها إيطاليا..!! من تزوجت مارحتها..
غاليه وهي تشرب الشاي: والله تمام.. إستانسنا هناك وايد..
اليازيه وهي تأكل بنتها الكبيره من الكيك: أنا لو منج بقعد أكثر عن الشهر..
غاليه: شو أسوي قلبي عورني على أبويه ورجعت أشوفه..
اليازيه: الله يقومه بالسلامه.. ومتى بيسوون لج غدا بيت أهلج..؟؟
غاليه: أول مايظهر بابا إن شاءالله.. وين سار خالد ماشرب الشاي..
اليازيه: خليه يالس مع راشد، يبا يفهم منه ليش مايرجع حرمته، والله ياغاليه رايه وايد عنيده وصعبه مع إنها مب ياهل..
غاليه حست اليازيه من النوع الي وايد يتكلم وفي كل شي، وهي ماسألتها عن حرمة راشد بس هي خرت كل السوالف..
غاليه: الله يهديها إن شاءالله..

اليازيه: لا والي يقهر إنه رشود ماشي على هواها.. وعادي يبيعنا بسبتها..!!
غاليه: أنا ما أحب أمشي ريلي على هواي.. أحبه تكون له شخصيته القويه الي تفرض رايها طول الوقت..
اليازيه: الله يكملج بعقلج.. ويهدي حرمة رشود..
دخلت عليهم خلود وهي شايله صحن الفواكه..
اليازيه: زين يبتي لي فواكه.. عطيني الصحن..
خلود: مب حقج حق اليهال.. وبعدين بسج من الأكل بتنتفخين..
غاليه: حرام عليج خليها تاكل عليها بالعافيه..
اليازيه: الله يعافي قلبج حبيبتي إنتي..
خلود وهي تقعد: لاتعطيها ويه، تراها من توصل تخم البيت خمام..
غاليه: الي أعرفه الحامل تاكل أكثر علشان تغذي الياهل..
اليازيه: صح لسانج..
خلود: بس أختي تاكل عن عشره مب إثنينه..
غاليه: هههههههه حرام ياخلود..
اليازيه: خليها بس عسى ربي يرزقها بريل وتحمل من أول أسبوع وتاكل عن عشرين..
غاليه: ههههههههههههههههههه
خلود: خالد تعال شوف يزووي شو تقول عني..!!
دخل خالد ويلس يم غاليه وشكله مضايج..
اليازيه: ماعليك منها.. فديت أخوي المعرس..
خالد يبتسم بدون نفس: الله يخليج لي إن شاءالله.. الله يهداكم بسكم من الظرابه..
خلود: خالد هي الي تبتدي بالظرابه..!!
اليازيه: خل عنج عاد..
خالد: إنتي اليازيه ماتكبرين..!! تزوجتي وللحين عقلج صغير..
اليازيه: الله يسامحكم وأنا أتحراك بتفزع معاي..
خالد: حرب هي أفزع عليج..!! غاليه قومي خلينا نطلع غرفتنا..
غاليه: إن شاءالله..
وقامت غاليه قبله، بس تمت واقفه يوم تكلمت اليازيه..
اليازيه: كلمت رشود..!! شو قالك بيسوي..؟؟
خالد وهو ماسك غاليه من جتفها: ولا شي.. أونه أنا برجعها بس لحد يزعلها.. والي تبيه لازم تسوونه حقها..
خلود: تخسي إلا هي.. يعني تبا تتأمر ومحد يرد عليها..
خالد: خلود.. خلاص سكري عالموضوع وانا إن شاءالله بشوف له الحل الي يريحنا كلنا..
طلع خالد مع غاليه للغرفه وكان يفكر فالسالفه، وهي حسته مضايج بس ماحبت تتدخل، دخلت الحمام وبدلت ثيابها ولبست تي شيرت خفيف وراحت إنسدحت عالسرير..
خالد: بترقدين..؟؟
غاليه: هيه والله أحس فيني تعب..
خالد: خلاص فديتج إرقدي وانا بسير الصاله أطالع التلفزيون..
غاليه خلته يروح لأنها تحسه يبا يفكر على راحته.. فما حبت تتدخل في خصوصياتهم من أول يوم وحطت راسها ورقدت..

مر يومين على رجعة غاليه والحمدلله أبوها تحسنت صحته وطلع من المستشفى.. ومن أول ماطلع وغاليه حاشره الدنيا على راس خالد، تبا تسير عندهم وتقعد لها يومين.. وخالد مايبيها تتعود كل مادق في بالها تسير وترقد في بيت أهلها.. هذا بيتها وواجب عليها تراعيه وتهتم فيه..
في بيت أبوغاليه الي كان مسوي عزيمه أهليه على سلامته.. الشباب في الميلس.. والبنات فصالة الحريم يسولفون وينتظرون الغدا..
غاليه: ماما.. بابا وينه..؟؟
أم غاليه: فالميلس بعد وين بيروح..
غاليه: خليه يدخل يرتاح توه طالع من المستشفى..
أم غاليه:مايبي.. يبي يقعد مع إخوانه وعيالهم..
ميعاد: خلي الريال يستانس بسه من حكرة المستشفى..
غاليه: وشروق وينها..!! تولهت عليها من ليلة عرسي ماشفتها..
شذا: يعني وين بتكون، أكيد في ربوع الفجيره..
غاليه سكتت وهي تفكر في طريقه تقنع فيها أهلها وريلها إنها تقعد عند أهلها يومين.. قامت غاليه وراحت المطبخ تييب لها ماي، وشافت ناصر الي كان واقف يسولف مع الطباخ..
غاليه: السلام عليكم ولد عمي..
ناصر بفرح: هلا والله بوردة العيله، حي الله ببنت منصور..
غاليه: الله يحييك ياناصر.. شخبارك وشخبار نجود..!!
ناصر: بخير الحمدلله، إنتي اشحالج عساج بس مرتاحه..!!
غاليه: الحمدلله كله تمام..
ناصر: دووم ياربي مرتاحه ومستانسه..
غاليه: شو تسوي هني..؟؟
ناصر: أشوف الطباخ شو مسوي..
غاليه: وأبويه وينه..؟؟ أبا أدخل أسلم عليه..
ناصر: تعالي محد غريب.. كلهم عمامي وعيالهم..
غاليه: بس..!!
ناصر: يعني منو بيينا غيرهم.. هيه صح ريلج المحترم بعد..
غاليه بخجل: أوكي خلاص يالله طوف جدامي..
راحت ورا ناصر الي دخل قبلها وهو يسوي إعلان..
ناصر: أعزائي الحضور يسعدني أن أقدم لكم وردة عيلتنا الي غابت عنا فترة بسيطه بس كانت مثل الدهر.. غاليه منصور..
دخلت غاليه وهي تضحك على خباله..: بتصير أبو وللحين مينون..
راحت غاليه وسلمت على أبوها وعمامها ومرت من جدام خالد الي إبتسم لها بهدوء.. ويلست مع عمها أبوحميد..
غاليه: شخباركم شباب عساكم طيبين..!!
خليفه: بشوفتج كل شي بيحلى..
غاليه: للحين لسانك ماتغير..
سعيد: وليش يتغير.. إن الله جميل يحب الجمال..
عبدالعزيز: شوف منو الي يدافع..
أبوحميد: بس خلاص أذيتونا بحشرتكم.. غاليه شخبارج عساج بس مرتاحه ومستانسه..
غاليه: الحمدلله ياعمي كل شي تمام..
خليفه: لاتسألها شوف ويها الي منور وإنت تعرف.. وإلا أقولك خلنا نسأل خالد أكيد هو بيجاوبنا..
ناصر: هههههه الله يخسكم بسكم أذيتوا المعاريس..
غاليه: إنت لسانك طويييل..
سعيد بخبث: بس ماجاوبتنا ياخالد.. إنت مرتاح..!!
خالد كان هادي بطريقه غريبه: شو تتوقع شعور واحد ملك القمرفي يده..؟؟
من خلص خالد جملته خليفه قام يصفر بإعجاب وهو يضحك والكل يعق رمسه.. الي يقول مستخف خالد.. والي يقول الله يهنيكم، وكلن يعق الرمسه الي في خاطره، وغاليه إستحت منهم..
غاليه: صج ماصخين.. أنا بسير بتغدا..
مشت غاليه وخليفه يعلق ويصفر..
عبدالعزيز: خليفه.. بس عاد عيب..
خليفه: شوف شوف راح وراها مب قادر يصبر هههههههههه
غاليه كانت تسمعه يوم قال هالرمسه ولفت على ورا شافت خالد طلع وراها وسكر الباب..
غاليه: تبا شي..؟؟
خالد كان يطالعها وهو ساكت، حسته يبا يقول شي بس مب عارف كيف يبدأ.. بس هو إبتسم لها ومسح على خدها..
خالد: لاحبيبي سلامة قلبج.. سيري تغدي وأنا من أخلص بدق عليج وبقولج يالله نروح..
غاليه بضيج: الله يخليك ياخالد أبا أقعد لليل هني.. والله متولهه عالكل.. وأبويه للحين مايلست معاه ساعه وحده..
خالد: عمري كل يوم بييبج هني.. و.....
غاليه قربت منه وهي دمعتها فطرف عينها، مسكته من كم كندورته وهي تسحبه لها.. خالد رفع راسها بيده وشاف دمعتها الي خانتها ونزلت..
خالد وهو مستغرب: ليش تصيحين..!! أنا مب قصدي أجرحج أو..
غاليه طاحت على صدره وهي تصيح: أنا مابي شي.. بس أبيك تخليني أقعد مع أبويه اليوم.. عمري مافارقت أهلي طول هالمده وحاسه قلبي ينجلع من فراقهم.. خالد الله يخليك تحملني إلين أتعود عالوضع اليديد.. الله يخليك..
خالد عوره قلبه عليها، ماتخيلها متعلقه فأهلها لهالدرجه، وكره نفسه لأنه غصبها على شي وهي ماقدرت تتحمله..
خالد لمها بقوه لصدره: خلاص حبيبي لاتصيحين.. إقعدي معاهم كثر ماتبين.. بس الله يخليج دموعج هذي غاليه علي، إوعديني ماتنزلينهم مره ثانيه..
غاليه هزت راسها إنها موافقه.. وخلته وراحت بعد ماباسها على خدها.. مسك قبضة الباب يبا يدخل بس شاف عمه منصور واقف في ويهه وهو مبتسم..
خالد: عمي.. أنا...!!
أبوغاليه: ههههههه سمعت كل شي..
ومشى عنه وهو يضحك: والله يعينك على بنتي دلوعه وكل الي تبيه بتحصله..
خالد حس من كلام عمه كأن غاليه كانت تتدلع عليه بزياده علشان تاخذ الي تبيه.. ماعليه ياغاليه أنا اليوم بعلمج كيف الدلع

وإن شاءالله البارت تعيبكم

ومسوحه ع القصور ...

(غرشوب البدو) __DEFINE_LIKE_SHARE__

Roo7 wlhana · 09-05-2008, 08:28 AM

الصرااااحة طررر
تسلم خوويه ع البااارت الروووعة

نترقب اليااي __DEFINE_LIKE_SHARE__

NaBth al.RoO7 · 09-05-2008, 12:38 PM

طررررررررررررررر ... نااايس هالبارت و اخيرا غالية تزوجت ..

نتريااا البارت الياي ..

تسلم غرشوب ع البارت .. __DEFINE_LIKE_SHARE__

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
قلبي يحبك وانت تدري بذلك’ عندك خبر انه يحبك ويهواك ~ new ; ฬđήч Łқ	~ Ƙяạzyo❥	عدسة الاعضاء , كاميرا الاعضاء	7	03-26-2010 10:38 PM
من كثر ماأحبك يقولون مسحور ..!!	محروم.كوم	منتدى أخبار المواقع والمنتديات العربية والأجنبية	0	12-24-2009 12:30 AM
من كثر ماأحبك يقولون مسحور ..!!	محروم.كوم	منتدى أخبار المواقع والمنتديات العربية والأجنبية	0	12-24-2009 12:20 AM
من يحبك.....	دلوعة باباتي	شعر و خواطر	14	03-17-2009 01:37 AM
لا تطلب من احد ان يحبك بل اجعله يحبك	شواقي العين	الإستراحه العامة	12	04-05-2008 08:40 PM