من يحبك كثر ماأحبك أنا.. - الصفحة 13

ريماني غرااام · #1 08-25-2008, 01:19 PM

[align=center]السلام عليكم ...

مشكور اخويه " غرشوب البدو " ..

و نتريا البارت الياي ....

و السموحه ......[/align] __DEFINE_LIKE_SHARE__

da1a3 · 08-25-2008, 03:08 PM

روووووووووووووووعة البارات

ونتريا البقيه

مسموح بالحل __DEFINE_LIKE_SHARE__

NaBth al.RoO7 · 08-25-2008, 04:35 PM

يسلمووووووو ..
نااااااااايس البارت ..

الله يعين شروق .. ؟؟

وع اساس اختك انا كنت اقرا لوحدة نكها ظنون في الم الامارات و عيبتني كتاباتها وحسيت انهم نفس الاسلوب ..

ع العموم يسلموو ع البارت و ع القصه بكبرهااا __DEFINE_LIKE_SHARE__

Grshoob Albdoo · 08-25-2008, 05:58 PM

الفصل العاشر..

في بيت فجر.. الي كانت لاهيه بترتيب البيت وتعديله لأنه ربيعاتها بيزورونها اليوم.. سوت الأكل وجهزت الحلويات ونظفت البيت.. صح عندها خدامتين بس هي تحب ترتب بيتها على مزاجها..
علي: ياحبيبتي خلي الخدامات ينظفن إنتي سيري تعدلي..
فجر: لافديتك الحين بخلص، وبعدين أنا حلوه بدون عدول.. وإلا انت اشرايك..؟؟
علي: انت قمر ياروح علي..
فجر: أمممممممم
علي: في شو تفكرين..؟؟
فجر: أفكر وأقول شو بنسمي أول ولد لنا..
علي: ههههههه سهله على أبوج أو أبوي الله يرحمهم..
فجر: ولو بنيه..؟؟
علي: بصراحه خاطري بإسم وديمه..
فجر: وعععععع مب حلو جديم..
علي: حرام عليج والله إينن..
فجر: خلاص فديتك أسامي الأولاد عليك والبنات علي..
علي: هههههههههه على راحتج..
فجر يلست تلعب بأصابعه وهي سرحانه..
علي: شو فيج حبي.. صاير شي..؟؟
فجر: علي.. ميعاد بنت أخوي حامل..
فجر: والله..؟؟ زين والله يستاهل عزيز، الله يرزقهم بالذريه الصالحه..
فجر: بس انا تزوجت قبلها وللحين ماحملت..
علي لوى عليها: حبيبتي كله بأمر الله.. وإنتي على شو مستعيله.. بعدنا معاريس مامر على عرسنا إلا ست شهور..
فجر: بس والله خاطري في بيبي.. وأخاف إني كبرت على الحمل والولاده..
علي: تعرفين جاسم ربيعي.. حرمته حامل وهي أكبر منج بخمس سنين..
فجر: والله..؟؟
علي: والله ياعمري.. إنتي اصبري والي الله كاتبه بيصير..
فجر: إن شاءالله.. والحين بسير ببدل ثيابي قبل لايون ربيعاتي.. وإنت يالله البس واظهر عسب ناخذ راحتنا..
قام علي وراح عند ربعه وهو في باله كلام فجر، هو أكثر منها خايف إنهم مايقدرون إييبون عيال بسبب سنهم.. بس ماحب يزيد خوفها.. ومثل ماقالها الي الله كاتبه بيصير..

في بيت غاليه..
فاطمه يالسه تتطالع التلفزيون وغاليه يالسه معاها تذاكر.. دخل عليهم أبو غاليه وشكله تعبان..
أم غاليه: منصور شو فيك..؟؟
أبو غاليه: سلامتج بس تعبت من الشغل اليوم..
غاليه: بابا ليش ماترتاح شوي.. دايما متعب نفسك بالشغل..
أبوغاليه: شو أسوي الشغل كله على راسي..
غاليه: عيل عمامي وين وعيالهم وين..؟؟ إنت الله يهداك قسم الشغل عليهم عسب تقدر توازن الشركه وتتقدم أكثر..
أبوغاليه: وكيف يعني..؟؟
غاليه: شوف مثلا تسوي مجموعات وكل مجموعه لها مديرها..
أبوغاليه: وهذا الي صاير عندي..
غاليه: لا بابا انت محطي مسؤول الموظفين، مسؤول الشؤون الإداريه، مسؤول الشؤون القانونيه.. لا أنا مب هذا قصدي..
أم غاليه: فهمينا عيل شو تقصدين..
غاليه: يعني انت الحين عندك مثلا مشروع النفط صح.. تختار قروبين مثلا وتحط على كل واحد منهم مسؤول.. أوكي.. ويبتدون الشغل والبحث والتخطيط.. وطبعا تسوي منافسه من بينهم لأحسن تخطيط وحلول..
أبوغاليه: وبعدين..
غاليه: ولمن يخلصون من كل شي.. انت تشوف منو الي شغله كان أحسن ومنو الي يستحق الشكر والثناء..
أم غاليه: ياربي منج مافمهت.. الحين الي بيفوز بالتخطيط الأحسن شو بيستوي مهو نفس الشي..
غاليه: لا ماما.. الي بيشوفه أبوي هو الي مجتهد أكثر ومخطط عدل، هو الي بيخليهم يكملون المشروع.. ويوم بيكون عندهم مشروع ثاني يرجع بابا يختار قروبات ثانيه ونفس الشي يخليهم يخططون للمشروع ويهندسونه.. وجي بيتغير روتين المكتب وبتكتشف المواهب الخامده ورا المكاتب..وبنفس الوقت بيخف عليك ضغط الشغل..
أبوغاليه: والله ودراستج نفعتج.. حلوه فكرتج بطرحها على المسؤولين وببدأ بتنفيذها إن شاءالله..
أم غاليه: يالله عيل شدي حيلج.. الشركه تترياج..
غاليه: أفا عليكم شوفوني يوم بتخرج شو بسوي بالشركه.. إن ماخليتها تتطور وتصير عالميه ماكون غاليه المنصوري..
أبوغاليه: فاطمه قومي حطي العشا قبل لاتوصلنا غاليه القمر..
غاليه: وليش تروح القمر، هاذوو القمر مجابلنك..
أم غاليه: فديتج والله.. أنا قمر عسى الله لايحرمني منك..
غاليه: لالالالا.. أقصد أنا..
أم غاليه: ههههههههه إنزين نشي ودي كتبج داخل.. وأنا سايره أحط لكم العشا..
غاليه: ماما.. أنا طالبه بيتزا والحين بتوصل..
أبوغاليه: بابا إنتي استويتي كله تاكلين هالأكل.. حرام عليج كلي أكل مفيد..
غاليه: إن شاءالله..
راحت غاليه غرفتها ترتب كتبها وتاكل من البيتزا وهي تسولف عالمسن..
مزيون بوظبي: إنزين إفتحي المايك خلينا نقرقر شوي..
غالية أبوها: رفيق أنا مايريد قرقر مع انت داخل مايك..
مزيون بوظبي: هههههههه تعلقين علي يالدبه..
غالية أبوها: الأوليين ماتمدحوا ولاتغزلوا إلا بالمتان..
مزيون بوظبي: ياعمري إنتي مب متينه..
غالية أبوها: ولاضعيفه.. وسط
مزيون بوظبي: وهذا الي محلنج ياغزالي، كل شي فيج وسط.. جسمج وحلاتج وجديتج ووووو
غالية أبوها: بس بس تعرفني ماحب الغزل الزايد..
مزيون بوظبي: هههههههه انزين ليش تتأخرين بالرد علي..
غالية أبوها: يالسه آكل بيتزا..
مزيون بوظبي: انزين اعزميني.. عيل وين كرم المناصير..
غالية أبوها: هههههههههه أيام الكرم ولت وراحت.. الحين اللهم نفسي..
مزيون بوظبي: ههههههههههه بالعافيه على قلبج غناتي..
غالية أبوها: انزين قولي باجر أكيد بشوفك فالسينما..؟؟
مزيون بوظبي: هيه فديتج خلاص خبرت نصور وبنسير باجر.. وشكله الحبيب مواعد..
غالية أبوها: مواعد منو..؟؟
مزيون بوظبي: شو دراني يلمح ويعق رمسه ويوم أقوله شو قصدك يقولي اسمحلي أسرار القلب..
غالية أبوها: أهاااااا
مزيون بوظبي: وين سرحتي قلبي..!!
غالية أبوها: لا ولا شي.. بس بخليك الحين وبنزل عند أبوي..
مزيون بوظبي: انا بعد بروح بسبح حمدانووو وبرقد..
غالية أبوها: فديته بتييبه باجر وياك..؟؟
مزيون بوظبي: لا ماظن.. أمايه تبي توديه عند عمامي من زمان مب شايفين شيفته..
غالية أبوها: فديته.. ربي يحفظه لكم إن شاءالله.. يالله حبي باي..
مزيون بوظبي: ويحفظج لي.. بــاي فديتج..
بندت غاليه وانسدحت على السرير وهي تتنهد من كثر الأكل.. كلت بيتزا ميديم بروحي أسميني بنتفخ على الفاست فود هذا، صدقه بابا لازم أغير من أكلي..
ونطت من السرير ونزلت تحت وشافت أمها يالسه وأبوها راقد ومحطي راسه على ريل أمها..

غاليه: مرحبااااااا شو يالسين تسوون..
أبوغاليه: تعالي حبيبتي محطيين مسرحية درب الزلق الي فيها طارق العلي..
غاليه: الله وناسه طروق هذا طررر
وراحت وانسدحت على الكنبه الطويله..
أم غاليه: غريبه ماسرتي تييبين المكسرات والعصاير..
غاليه: ماما أكلت بيتزا كامله بروحي وأحسني تشبعت.. صج يوم قال بابا هالأكل ماينفع.. خلاص من باجر مالي غير طبخ الماما..
أم غاليه: الحمدلله يوم اقتنعتي..
ويلسوا يطالعون المسرحيه إلين خلصت.. وكانت الساعه 12 ونص..
غاليه: بابا سهران للحين والله معجزة..
أبوغاليه: باجر ماشي دوام فقلت أسهر وياكم..
غاليه: إن شاءالله كل يوم ماشي دوام عسب نستانس وياك..
أم غاليه: ههههههههه منصور مب يوعان..؟؟
أبوغاليه: لا والله شبعان.. بسير بحط راسي وبرقد..
غاليه: تصبحون على خير بابا وماما..
أبوغاليه: وإنتي من أهل الخير غناتي..
أم غاليه: لاتسهرين وايد..
غاليه: إن شاءالله..
يلست غاليه فالصاله شوي وعقبها سارت المطبخ تتطالع شو فالثلاجه.. بس ماشافت شي يديد فقامت وظهرت من باب المطبخ للحديقه.. كانت الدنيا منوره بنور القمر الي كان مكتمل.. والليله ولا أروع.. غاليه يلست تتمشى بالحديقه وهي مستانسه عالجو الرهيب.. بس خافت يوم سمعت حركه بين االشجر فركضت على داخل وسارت غرفتها..

************______________************ __DEFINE_LIKE_SHARE__

Grshoob Albdoo · 08-25-2008, 05:59 PM

في بيت بوعبدالله وبالذات في ملحق عزيز كانت ميعاد يالسه على السرير تذاكر وعزيز منسدح حذالها ويطالع التلفزيون..
ميعاد: فديتك قصر شوي أبا أحل الواجب..
عزيز طول عليه زياده..
ميعاد: عزيييييييييييز
عبدالعزيز: ههههههههه خلاص بقصر..
ميعاد: اليوم بنسير بيت عمي منصور لاتنسى..
عبدالعزيز: ماقلتيلي من قبل.. شو عندهم..؟
ميعاد: ولا شي.. بس جي بخاطري أزور عمي..
عبدالعزيز: ياسلام شايفتني ماقدر أمشي تقومين تقررين الزيارات على راحتج..
ميعاد عورها قلبها وراحت وحظنت راسه: سامحني فديتك والله مب قصدي، بس اشتقت لعمي وحبيت أزوره، خلاص لو ماتبي كيفك..
عزيز استانس على شعورها بالذنب وحب إنه يتمادى وياها..
عبدالعزيز: لا عادي انتي روحي بس انا بقعد هني.. يعني وين بروح وانا ماعندي ريل أمشي عليها..
ميعاد بدت دموعها تنزل: حرام عزيز أنا ريولك الي تمشي بها..
عبدالعزيز: عيل أنا كان بخاطري نسير نتعشى برع.. بس مدام إنج ريولي الي أمشي بها خلاص برايج لو تبين تسيرين بيت عمي الله يحفظج..
ميعاد: لاحبيبي بنسير المطعم أحسن لاحقين على بيت عمي يعني وين بيروحون..
عبدالعزيز بخبث: يعني بنتعشى برع اليوم..؟؟
ميعاد: من عيوني أعشيك وين ماتبي ولو فالقمر..
عبدالعزيز: القمر عايش وياي بغرفه وحده..
ميعاد: هههههههههه فديتك ياربي.. والحين خلني أسير لعمووه اليوم مايلست وياها وايد..
عبدالعزيز سحبها من ايدها: لا خلج معاي.. أشتاق لج من تطلعين..
ميعاد: يالدلووووع
عبدالعزيز: ههههههههههه
وسمعوا دق على الباب فقامت ميعاد ويلست عدل بس عزيز ماخلاها قعد يسحبها يبا يحرجها جدام أمه..
أم عبدالله: السلام عليكم..
ميعاد: وعليكم السلام.. هلا عمووه، عزيز خوز عني..
عبدالعزيز: ههههههههه انتي الي لاصقه فيني..
أم عبدالله: إنت ماتيوز من سوالفك.. عاد أنا شفتج مانزلتي قلت أيي أشوفج..
ميعاد: فديتج عموه كنت يالسه أذاكر والحين كنت نازله لج..
عبدالعزيز: أمايه شو عندج كله متلهفه على ميعاد وتيلسين وياها أكثر عن عيالج..
أم عبدالله: عشت طول عمري مجابلتنكم والله كان بخاطري بنيه خلني الحين أيلس مع البنات..
ميعاد: الله يخليج لنا ياعمتي..
عبدالعزيز: يلسي امايه.. ميعاد عطيني كوب ماي..
ميعاد: إن شاءالله..
أم عبدالله: بسألج ميعاد ناصر أخوج مب ناوي يملج، من زمان خاطبين ولا عزموا على الملجه ولا على العرس...
ميعاد: أحس ناصر بيهون عن شروق..
أم عبدالله: بسم الله ليش عاد.. انتي سامعه شي..؟؟
ميعاد: لا حشى.. بس ساعات أحس من نيلس كلنا يدخل ويسولف ولا حتى يعبرها.. عزيز تذكر كيف كنت تحرجني أيام الخطوبه لدرجة إني أشرد عنك للحمام..
عبدالعزيز: هههههههههه هيه أذكر..
ميعاد: ناصر خير شر مايكلمها.. مع إنه مزوحي درجه اولى ويعلق على الكل ، بس من خطبها مسويلها طااااااف..
أم عبدالله: الله يهديهم إن شاءالله.. ميعاد أمايه اليوم المغرب بيونا حريم، حرمة وليد الظاهري وبناتها..
ميعاد: عمووه يمكن نظهر أنا وعزيز بالليل..
أم عبدالله: على وين إن شاءالله..؟؟
عبدالعزيز: بنسير نتعشى برع، بس لو ضيوفج مهمين خل ميعاد تجابلهم..
أم عبدالعزيز: لا برايكم سيروا، بجابلهم بروحي..
ميعاد: متى بيون...؟؟
أم عبدالله: الساعه 7
ميعاد: خلاص عزيز اشرايك نروح الساعه تسع، يعني بنتأخر شوي..
عبدالعزيز: على راحتج..
أم عبدالله: زين عيل، والحين أنا بسير بزهب الفواله..
ميعاد: الحين بلحقج عموه..
أم عبدالله بخبث: يوم عزوز وراج ماظنتي بشوفج فالمطبخ..
عبدالعزيز: هههههههه فديت أمايه فاهمتني..
ميعاد استحت وراحت تفر عزيز بالمخده..

***********____________***********

غاليه في سيارتها البورش واقفه عند بيت ربيعتها فتون الي تأخرت عليهم هي ومرام..
غاليه: ياربي منج يافتون اظهري وفكينا...
مرام: نسوي فيها حركة نذاله ونسير..
غاليه: ههههههههه عسب تتأدب..
ويوم ظهرت فتون كانت كاشخه ومتعدله واستغربوا منها غاليه ومرام لأن لبسها كان كله ماركات.. الشنطه والبدله والجوتي والعبايه والشيله والإكسسوارات.. فتون اهلها على قد حالهم مستحيل يقدرون يوفرون لها هالأشياء..
ركبت فتون وسلمت عليهم ويلست تعدل شيلتها، بس هم اسكتوا ولا سألوها عن أي شي.. غاليه تحركت وراحت بهم على السيتي سنتر وين ماكانت مواعده أحمد.. نزلوا ويلسن يتحوطن إلين موعد الفيلم..
مرام: والله من زمان ماظهرنا مع بعض..
غاليه: هيه والله اشتقت لأيام الصياعه وياكن..
فتون: أونه الحينه كبرنا واصطلبنا.. ههههههههههه
غاليه: هههههههه قوموا ندخل مكياجي
ويلسن البنات يتحوطن وهم يضحكون ويتذكرون أيام المدرسه..
وفي نفس الوقت أحمد وناصر وصلوا للسنتر ويلسوا يتحوطون.. وناصر يدور بعيونه على نجود..
ناصر: خييييييبه هاي شو تسوي هني..؟؟ قلت لك نسير مكان ثاني أصريت على السيتي أووووووف
أحمد: منو قصدك..!!
ناصر: غاليه بنت عمي، مافيني على تحقيقاتها..
أحمد: حليلها غاليه شو دراها بموعدك الخفي..
ناصر: سير عني انت الثاني..
أحمد: خلاص لا تعصب لو تبا نظهر يالله..
ناصر: لا خلاص برايها، المهم خلنا نسير نقطع تذاكر الفيلم..
راحوا الشباب ويلسوا ينتظرون بداية الفيلم وهم يضحكون ويسولفون، ووصلوا البنات لصالة السينما ووقفوا يسولفون ويعلقون على غاليه..
غاليه: فشله والله فشله..
فتون: عادي حبيبتي إنتي مب اول وحده يصير فيها جي..
غاليه: لالالا غاليه المنصوري تتفشل بهالطريقه جدام البياعه والناس..
مرام: غاليه عادي شو فيج إنتي.. ههههههههه بس شكلج كان حلو وإنتي مصدومه..
فتون: ههههههههههههههه
ناصر: اشفيها غاليه منصور معصبه..
فتون: ههههههههه غاليه لأول مره بحياتها تتفشل، نحن ياما تفشلنا بالسوق بس هي لأول مره..
ناصر: ليش شو صاير..؟؟
غاليه: تصدق ناصر اشتريت ميك أب من مكياجي ويوم ييت أدفع بالفيزا طلعت مافيها شي.. الحساب زيروووووو
ناصر: ههههههههههههه وشو سويتي..؟!!
غاليه: انحرجت واستوى ويهي طماطه..
مرام: لا والله طماطه خايسه.. هههههههههه
ناصر: ههههههههههه
غاليه: والله الي بتضحك علي مره ثانيه قسما بالله بضربها..
ناصر: خلاص خلاص بنسكت.. أحمد يالله ندخل..
غاليه: ونحن بعد بندخل وراكم.. ناصر لاتيلسون بعيد عنا..

ناصر بضيج: إن شاءالله..
دخلوا صالة العرض ويلسوا كالعاده بالوسط تماما.. وغاليه متخبله مابينها وبين أحمد غير كرسيين..
ناصر انتبه لنجود الي وصلت وشافت غاليه وارتبكت شو تسوي، وماكان من ناصر إلا يصارح غاليه..
ناصر: غاليه الصراحه أنا مواعد نجود هني وهي وصلت وأبيها تيلس ويانا بدون لاتنحرج..
غاليه: وليش تتحراني خليت بيني وبينك كرسي لأني أعرف إنها بتيي..
ناصر: شو دراج..؟؟
غاليه: قلبي دليلي..
وأشرت بيدها على نجود الي شافتها وسارت وسلمت عليها، ويلست بينها وبين ناصر وهي مستحيه..
ناصر: هلا وغلا
نجود: ناصر.. غاليه تعرف السالفه..؟؟
ناصر: هيه.. ولاتخافين مابتقول لحد..
غاليه: نجود اشحالج عساج بخير..؟؟
نجود: الحمدلله ربي يعافيج.. إنتي اشحالج وشخبار الدراسه..
غاليه: الحمدلله تمام..
مرام: بس بس الفيلم بدا..
ناصر: حبيبي تبين بيبسي..
نجود: لافديتك مشكور.. بالعافيه على قلبك..
ناصر: أنا أخذت لج بيبسي وفشار.. بتاكلين الحين..
نجود: بعد شوي..
ناصر: على راحتج حبي..
ويلسوا يطالعون الفيلم وهم مندمجين فيه إلا فتون الي يالسه تتلفت وتتطالع واحد يالس يطالعها بعيد عنهم شوي.. ويسويلها حركات وهي تأشرله يسكت ولا يفضحها..
فتون: أقولكم بسير الحمام شوي..
مرام: وليش ماسرتي مساعه.. الحين بدا الفيلم..
غاليه: اسكتوا حشره.. خليها تروح برايها..
راحت فتون وطلعت برع صالة العرض، وشافت الريال الي واقف كان يطالعها وراحت له..
فتون: جاسم كنت بتفضحني.. حرام عليك ربيعاتي حسوا علي، وغاليه لو شافتك شو بتقول..
جاسم: تولي غاليه.. المهم عندي إنتي فديتج..
فتون: إنزين الحين شو عندك تبا تكلمني؟؟
جاسم: قومي نتمشى شوي..
فتون: لا ياجاسم، أخاف يحسون علي ويدوروني..
جاسم: فتون قومي تمشي وياي، وإلا والله بعصب عليج..
فتون: لالا خلاص بس لانتأخر..
جاسم: أوكي غناتي..
راحت فتون وياه يتمشون نص ساعه واشترالها هديه من باريس غاليري وبعدها ردت للسينما وهي خايفه ومتردده كيف بتفسر تأخيرها.. دخلت ويلست معاهم..
مرام: حشى كل هذا حمام.. ليش تأخرتي..؟؟
فتون: الحمام بعيد وبعدين كان زحمه..
مرام: وشو هالكيس..؟؟
فتون: هااا هيه شفت هالعطر واشتريته وايد حلو الصراحه..
مرام: مب ملاحظه إنج وايد تتشرين هالفترة وإنتوا حالتكم على الله..
فتون: الله وحالتج الي ترفع الراس..
غاليه: مرام فتون بس خلاص، بنتفاهم بعدين..
سكتوا البنات وهم بخاطرهم يكفخون بعض..
وبعد ساعه ونص خلص الفيلم وطلعوا كلهم برع يسولفون، وغاليه وقفت تتطالع أحمد وتضحك عليه، يالس ينشف كندورته بالكلينكس لأنه البيبسي إنصب عليه..
ناصر: أحمد الله يهداك بيبي إنت ماتعرف تشرب بيبسي..
أحمد: خل عنك يالدفش إنت الي مب حاس بروحك وصبيت علي البيبسي.. لاهي بالحب
ناصر: هههههههههههه انزين سير الحمام غسله ونشفه لاتفشلنا..
أحمد: تعال وياي يالدب..
ناصر: نجود بتيلسين مع غاليه والبنات إلين نخلص..!!
نجود: أوكي..
غاليه: يالله تعالوا بنسير نشرب لنا شي..
مرام: لا خلونا ناخذ أيس كريم من باسكن روبنز..
غاليه: أوكي..
وراحوا البنات وطلبوا لهم آيس كريم، ويلسوا يسولفون وغاليه بعدها مع سالفة الفيزا كارد..
مرام: بس خلاص ارحمينا مب نهاية العالم..
غاليه: لحظه بدق لبابا وبقوله..
فتون: يوم بتردين البيت خبريه.. لاتزعجينه الحين..
نجود: يعني اول مره تصير لج إنج تشترين أغراض وماتكون عندج بيزات كافيه.. عادي نحن وايد صارت لنا..
مرام: قلنا لها بس هي المصدومه مب راضيه تستوعب..
فتون: انا بسير الحمام..
مرام: وكم بتقعدين هالمره ساعه..
فتون: إنتي شو دخلج فيني أووووف
غاليه: إنتوا اشفيكم اليوم ذبحتوني.. خليها تروح عقلها في راسها وبتدبر روحها هي مب ياهل..
فتون: صح
وراحت عنهم ومرام بتموت قهر منها.. وغاليه تحاول تهديها..
مرام: ياغاليه أنا متأكده وراها شي.. هاي ماعندها لقمه تاكلها من وين لها كل هالماركات..
غاليه: إذا إنتي متأكده أنا باصمه بالعشر..
مرام: عيل ليش ساكته ويالسه تسكتيني وراج..؟؟
غاليه: لأن لا المكان ولا الزمان مناسبين لهالحوار، أنا بلقى لي فرصه مناسبه وبكلمها..
مرام: لازم ياغاليه تكلمينها وإلا فتون بتضيع..
غاليه: الله يستر.. المهم نجود اشحال المستشفى والمرضى..
نجود: تمام.. أنا ماخذه إجازه أسبوع أرتاح منهم شوي..
غاليه: الله يعينج الصراحه، نجود.. شو بينج وبين ناصر..؟؟
نجود انصدمت وانحرجت، صح ناصر خبرها بالسالفه بس إنها تسألها في ويها وايد إحراج بالنسبه لها..
غاليه: سوري لو أحرجتج..
نجود: أعتقد ناصر قالج..
غاليه: هيه قالي بس حبيت أتفاهم وياج..
نجود: على شو تتفاهمين..!!
غاليه: على مسألة إنه ناصر خاطب بنت عمي.. وبينهم مشروع زواج..
نجود: أدري وقلت له من قبل كيف بتتصرف معاهم، قالي إنه مايبي شروق وإحتمال يفسخ الخطوبه..
غاليه: وإنتي يرضالج هالشي..؟؟
غاليه: أنا ياغاليه أحب ناصر من أول ماشفته بالمستشفى، ورضيت إني أكلمه وهو غريب عني بس لأني متأكده من حبي ومشاعري..
غاليه: أدري وحاسه فيج.. بس مب هاينه علي بنت عمي أشوفها وهي تتحطم جدامي..
نجود: والله مادري شو أقولج بس حبي لناصر فوق كل شي..
غاليه: الله يستر من الي بيصير..
وفي هاللحظه وصلت فتون ويلست وياهن..
فتون: وينها مرام..؟؟؟
غاليه: سارت تييب لها عصير..
نجود: وينه ناصر أنا لازم أروح أخاف اتأخر..
ناصر: ناصر وراج..
نجود: ههههههههههههههه
أحمد: غاليه شوفي شو استوى بكندورتي تبقعت..
غاليه: هههههههههه يعني ماينفع نتمشى شوي..
أحمد: أبداااااااا بسير البيت على طوول..
نجود: خلاص انا بخليكم الحين لأني تأخرت..
ناصر: خلاص بوصلج للسياره.. يالله بنت عمي باي..
غاليه: الله يحفظكم.. بـــاي.
راحوا الشباب ونجود وبقت غاليه مع فتون..
غاليه: فتون خلاص استوينا بروحنا.. كلميني بكل صراحه..
فتون: شو تبين تعرفين..؟؟
غاليه: من وين لج كل هذا..؟؟ ولاتقوليلي أهلي أنا أكثر وحده تعرف حالة أهلج الماديه..
فتون: حشى يابويه محد قادر يلبس ويتعدل إلا وفتحتوله تحقيق، كفايه مرام وحشرتها والحين إنتي..
غاليه: إنتي ربيعتنا ومن حقنا نتطمن عليج..
فتون: تتطمنون علي..!! ليش شو شايفيني ياهل.. وبعدين انا الحمدلله مب قاصر علي شي الحين.. وبلبس الي أبيه..
غاليه بعصبيه: إذا عاللبس تراني ألبس أحسن عنج.. ومب من اليوم أو أمس شراتج.. من يوم إولدتني أمي وأنا ألبس أحسن الماركات..
فتون: تعايريني..!!
غاليه وهي تتنهد: فتون لاتنرفزيني أنا خايفه عليج.. منو هذا..؟؟
فتون: منو تقصدين..!!
غاليه: إنتي فاهمه قصدي، الي يصرف عليج وملبسنج أحلى لبس، الي ظهرتي من السينما وسرتي تشوفينه..
فتون لفت الجهه الثانيه: مايخصج.. هاذي حياتي الي ما أسمح لج تتدخلين فيها..
غاليه: فتون.. أنا غاليه ربيعتج.. كلوزج.. أختج تقولين لي هالكلام..!!

فتون: سوري غاليه.. بس بليز لاتتدخلين في خصوصياتي..
غاليه: على راحتج بس بقولج شي.. لو في يوم إحتجتي للي يسمعج وتشكيله همج.. إعرفي إني هني أنتظرج..
فتون ابتسمت لها: تسلمين لي..
وصلت مرام ويلسوا شوي وبعدها قاموا يتمشون وروحوا على بيوتهم.. غاليه وصلتهم ورجعت لبيتها بس شافت ناصر واقف عند باب بيتها ينتظر..
وقفت غاليه ونزلت من السياره وهي تشوف ناصر يدخن سيجارته..
غاليه: وععع إنت بعدك مع هالخايسه.. الله يخسك بتذبحك..
ناصر: ترانا بنموت في كل الأحوال.. ليش تأخرتي..؟؟
غاليه: يوم بتصير ريلي حاسبني.. إنت الي شو يايبنك هني وبهالوقت..؟!!
ناصر: أبا أتفاهم وياج، أمممممم ممكن ندخل داخل..؟؟
غاليه: أووووووف أنا تعبانه..
ناصر: عاد يالله بلا دلع.. وين أقدر أقعد وياج..!!
غاليه: أوف تعال داخل بس لاتطول..
ناصر: ماااااااالت يالله دشي..
دخلوا داخل ويلسوا بالحديقه.. وناصر خلص سيجارته وفرها فنافورة الماي..
غاليه: أخ عليك يالوسخ..
ناصر: وسخ.. يالله عالرقه.. المهم غلايه ممكن خدمه..؟؟
غاليه: تفضل..
ناصر: أنا قررت اكلم أبوي وأخبره إني أبا أفسخ الخطوبه..
غاليه: الله يعينا من الكارثه الي بتصير..
ناصر: و... أباج إنتي الي تكلمين أبويه..
غاليه: نعم نعم.. وليش إنشاءالله..!! شايفني مينونه أوقف جدام أبوك وأقوله هالشي، والله لا يطير راسي بثانيه..
ناصر: غاليه إفهميني أبويه مايحب حد كثر مايحبج إنتي..
غاليه: ولو.. أساسا أبوك عصبي بدرجه فظيعه وماظنتي حد يقدر عليه.. بس أنا عندي لك راي..
ناصر: قولي..
غاليه: شروق.. إنت لازم تكلمها وتتفاهم معاها..
ناصر: لالا مافيني أواجها.. أحسني بذبحها بكلامي..
غاليه: بالعكس إنت لازم تكلمها وتتفاهم معاها، عسب الرفض يكون منها مب منك.. إنت تعرف لو إنت الي تركتها الكل بيرمس عليها وبتقطع بنصيبها من بعدك..
ناصر: بس.......
غاليه: لابس ولاشي.. أنا بخليها تزورني وإنت تعال وكلمها..
ناصر: متى..؟؟
غاليه: من باجر لو حبيت.. بس لازم تقولها كلام مايجرحها ولو إنه السالفه بحد ذاتها تجرح..
ناصر: خلاص أوكي.. باجر خبريني متى بتزورج وأنا بيي..
غاليه: الله يستر.. والحين مقفاك ولو سمحت..
ناصر: ماااااااااالت.. على فكره نجود تسلم عليج، تقولي وااايد فنانه هالغاليه..
غاليه: فديتني الكل يحبني..
ناصر: ماعندهم نظر.. يالله بــــاي..
غاليه: بـــــاي..
راحت غاليه لغرفتها بعد ماسلمت على أهلها وهي خايفه من باجر والي بيصير فيه.. بس بعد أحسن تكون من شروق ولا من ناصر..
قامت غاليه ويلست على النت وخبرت أحمد بالي صار..
مزيون بوظبي: كل ينام على الجنب الي يريحه، وهو مابيرتاح إلا مع الي يحبها..
غالية أبوها: بس كاسره خاطري شروق، حرام جي يسوي فيها..
مزيون: ياعمري الزواج قسمه ونصيب.. وهو إختار نجود لأنه حسها تفهمه وتقدره.. وهذا المطلوب التفاهم بين الطرفين..
غالية أبوها: الله يسعدهم ويعينج يابنت عمي..
مزيون بوظبي: خلينا منهم الحين.. قوليلي اشرايج فيني اليوم..؟؟
غاليه: ههههههههه قبل الحادث وإلا بعده..!!
مزيون بوظبي: حرااااااام عليييييييج والله إني مفتشل وراد البيت بسرعه، حتى هالطفس حمدانووو انتبه وقالي إنت ياهل ماتعرف تشرب اليبسي..
غاليه: ههههههههههههههههههه
مزيون بوظبي: بس عاد لاتضحكين علي..
غالية أبوها: ههههه خلاص بسكت، س قولي إنت اشرايك فيني أنا..!!
مزيون بوظبي: إنتي..!! إنتي ملاك يمشي عالأرض.. إنتي ورده الكل يحدسها على جمالها.. إنتي روحي الي تمشي عالأرض..
غالية أبوها: وتتوقع الحلاه كلها تاخذ واحد مايعرف يشرب بيبسي ويفشلها جدام الناس.. هههههههههههههههههههه
مزيون بوظبي: حرام عليج والله بس عاد.. وإلا أقولج تراني زعلت..
غالية أبوها: هههههههههه خلاص فديتك بسكت..
مزيون بوظبي: خلاص خلاص مابي أكلمج، ولو تبين تراضيني أبا كيكه من يدج الحلوه..
غالية أبوها: امممممممممم تبيها سوده مثلك وإلا بيضه مثلي..
مزيون أبوظبي: أبيها حمرا مثل خدودج..
غالية أبوها: هههههههههههه أقولك شي.. تراك ماااااصخ..
مزيون أبوظبي: خلاص برايج لاتييبين الكيكه وأنا ببقى زعلان..
غالية أبوها: إزعل برايك... إنت الخسران..
مزيون بوظبي: قد الحركه..
غالية: قدها ونص وثلاثة أرباع بعد..
مزيون بوظبي: خلاص عيل وداعة الله..
غالية أبوها: الله ويــــاك..
وبندت المسن وماتركت له أي مجال.. ومسكت موبايلها وغلقته..
غاليه: أحسن عسب تعرف منو تكلم يالطفس..ههههههههه
وحطت راسها ورقدت لأن باجر بتسير الشركه وفي بالها خطه تعذيبيه لأحمد..هههههههههه

************______________************ __DEFINE_LIKE_SHARE__

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
قلبي يحبك وانت تدري بذلك’ عندك خبر انه يحبك ويهواك ~ new ; ฬđήч Łқ	~ Ƙяạzyo❥	عدسة الاعضاء , كاميرا الاعضاء	7	03-26-2010 10:38 PM
من كثر ماأحبك يقولون مسحور ..!!	محروم.كوم	منتدى أخبار المواقع والمنتديات العربية والأجنبية	0	12-24-2009 12:30 AM
من كثر ماأحبك يقولون مسحور ..!!	محروم.كوم	منتدى أخبار المواقع والمنتديات العربية والأجنبية	0	12-24-2009 12:20 AM
من يحبك.....	دلوعة باباتي	شعر و خواطر	14	03-17-2009 01:37 AM
لا تطلب من احد ان يحبك بل اجعله يحبك	شواقي العين	الإستراحه العامة	12	04-05-2008 08:40 PM