وش تفيد الملامه دام دمي سفيح .!~

[ملاك الروح] · 10-01-2009, 04:20 PM

[align=center]مالوم قلبي لي رسى في موانيك
او سالت الدمعه لوصلك تنادي
الطيب ورد منبعه في اراضيك
والسعد شوفك يا بعد هالعبادي
ادعي عسى المولى يحفظك ويبقيك
يا أغلى مخلوق سكن في فؤادي

بيت بو سلطان ..

ع رنه المسج اللي اللي صحت مهره من الكابوس اللي كان تحلمه ..

كانت حالمه انها تمشي في مكان اخضر .. و فجاة شافت مايد يضحك عليها بسخريه و يستفزها .. و بعد لحظات شافت المكان الاخضر تحول للون الاسود و الحمر ..

نشت من رقادها .. و هي تسمي ربها .. كانت خايفة من الحلم .. خذت فونها ... شافت مسج من مايد .. اللي كان نكه " ماخذن قلبي " وكان المسج

مالوم قلبي لي رسى في موانيك
او سالت الدمعه لوصلك تنادي
الطيب ورد منبعه في اراضيك
والسعد شوفك يا بعد هالعبادي
ادعي عسى المولى يحفظك ويبقيك
يا أغلى مخلوق سكن في فؤادي

فرحت من خاطرها يوم قرت المسج .. لكن بنفس الوقت كانت خايفة .. تبي تعرف شو سالفه هالحلم ...
اتصلت للريم .. لكن ما ردت عليها .. كانت راقده ..
فردت و اتصلت ع فون البيت .. فكانت تتمني مايد اللي يرد عليها و يصبح عليها ..

رن رن رن ..

مهره : صباح الخير ..
مايد : صباح النور باحلى طله ..
مهره : شحالك يالغلا ..
مايد : بخير دام اني سمعت صوتج .. و من صوبج فديتج..
مهره : عسا حالك مديم .. بخير ربي يعافيك ..
مايد : وياااااااج ..
مهره : عيل وين الريم .. ادقلها ما ترد ..
مايد : الحين انتي داقه تبيني والا تبين الريم ..
مهره : هااا ..
مايد : يلا اختاري واحد منا ..
مهره : اباك انته ..
مايد : ياااربي .. عساني ما انحرم من هالصوت ..
مهره : آمين ..
مايد : انزين مهاري .. بسألج سؤال ..بس جاوبيني بصراحه ..
مهره : ... اوك ..
مايد : تحبيني ..
مهره : يب ..
مايد : شو يب ... تحبيني والا لا ..
مهره : هيييييييييه ..
مايد : شو هييييه ..
مهره : احبك ..
مايد : يعلني ما اصحى من الحلم ..

مهره سرحت بفكرها للحلم اللي ازعجها من قبل دقايق ..

مايد : مهاااري .. حبيبي ...
مهره : .........
مايد : مهااااري ... حبيبي ... حبيبي ..
مهره : هلا ..
مايد : يتهنابه اللي ماخذ عقلج ..
مهره : والله محد خذا عقلي ..
مايد : عيل وين سرحتي .. اكيييد فيني ..
مهره : مااايد ..
مايد : لبيه ..
مهره : لبتك روحي .. تفتكر في يوم بتنساني ..
مايد : مستحيل انساج .. انسى روحي ولا انساج .. انسى اتنفس ولا انساج .. انسى العالم بكبرة ولا انساج .. انتي دنيتي .. انتي حياتي .. انتي شفتي حد ينسى حياته و شريكه عمره ..
مهره : حبيبي ..
مايد : قلبي فداج ..
مهره : تسلم فديتك .. حلمت حلم.. و الصراحه ازعجني هالحلم ..
مايد : وبشو حلمتي .. ليكون حلمتي بغيري ..
مهره : لا بس حلم انتي بمكان اخضر .. و فجاه شفتك و انته كنت تشوفني بسخريه .. و تضحك علي .. و عقب لحظات تحول اللون الاخضر للون الاسود و الاحمر ..
مايد : ( في هالوقت خاف انها كشفت امره ) امممممم .. يمكن كان شي مضايقنج و سيدة رقتي ..
مهره : لا .. امس موول ما تضايجت .. ولا حطيت بخاطري من حد .. بس ماادري احس ورا هالحلم شي ..
مايد : الصراحه ماادري ... مهره .. هذي الريم بخليها ترمسج ..
مهره : اوك ..
مايد : تامريني بحايه قبل ما اعطيج اياها ..
مهره : سلامتك حبيبي ..
مايد : يا حلات هالكلمه منج .. ربي يسلمج ..

وعط الفون للريم اللي كانت توها ناشه من النوم و بيدها كووب كوفي ..

الريم : مرحب ..
مهره : مرحبتين .. وينج من الصبح ادق لج ما تردين ..
الريم : كنت راقده ..
مهره : اكييد من السهر اللي سهرتيه امس ... هااا قوليلي بشو كنتي سهرانه .. اكيد تفكرين بحبيب القلب ..
الريم : سكتي عني ... امس طول اللي سلطان فديته مسج ورا مسج .. لين الفجر ..
مهره : لهاي الدرجه هب قادر يستغني عنج .. يا ويل حالي من حبك ... ( و تمت ساكت ) انزين الريم متى بتونا ..
الريم : عقب ما يردون من صلاه اليمعه ..
مهره : ميوود بيي وياكم ..
الريم : اعتقد لا ..
مهره : منو قالج ما بيي ..
الريم : انا بحرمه من الطلعه اليوم ..
مهره : الريم .. انا زعلانه منج ...
الريم : افا زعلانه .. و زعلانه من منو .. من الريم بنت راشد .. و شعنه زعلانه ..
مهره : انا شو كنت قايلتلج من فتره ..
الريم : اممم .. ما اذكر الصراحه انتي كل يوم قايلتلي شي ..
مهره : ابا صورة ميوود ..
الريم : تبينها بشرط ..
مهره : وشو شرط ..
الريم : تيبيلي صورة سلطان ..
مهره : ماطلبتي شي .. بعطيج سلطان بكبره جان تبين ..
الريم : اباه .. عطيني اياه ..

بهالوقت سلطان كان خاطف صوب مهره .. و مهره تاشر ع سلطان و تحط الفون سبيكر ..

مهره : شو تبين ..
الريم : اباااااااه اقولج ..
مهره : انزين شو اللي تبينه ..
الريم : سلطان فديت روحه ..
سلطان : وانا بعد اباج .. بس انتي اللي هب راضيه تردين علينا خبر ..
الريم : .....
سلطان : افا جنج ما تبين تسمعين صوتي ..
الريم : منو قال .. اصلن صوتك يسوى اصوات الانام كلهم ..
سلطان : الريم ..
الريم : لبيه ..
سلطان : متى بتردين ع ابوج خبر ..
الريم : عقب يومين ..
سلطان : جيه ليكون ما تبيني ..
الريم : منو قال ما ابيك .. انا ابيك .. و من اليوم لو ما عندك مانع ..
سلطان : فديت روحج والله .. عيل سيري رمسي عميه و قوليله موافقه ..
الريم: ان شاء الله .. غالي و الطلب رخيص ..
سلطان : الريم ..
الريم : الريم كلها تحت امرك ..
سلطان : تسلمين فديتج .. اممم انتي من صدق تبيني والا بس عشان انا احبج ..
الريم : اممم .. الصراحه الصراحه .. عشان ما اكسر خاطرك فيه ..
سلطان : اونه .. يعين انتي ما تحبيني ..
الريم : سلطان حبيبي الحب ايي عقب الزواج .
سلطان : يعني الكلام اللي كنتي تقوليلي اياه ما كان من خاطرج ..

الريم : منو قاال ... اصلن الحب شي صغير عليك .. انته قدرك اكبر من الحب ...
سلطان : الصراحه حيرتيني وياج .. انتي تحبيني من صدق والا لا ..
الريم : و ربي يا سلطان اني احبك ... واموت فيك .. حتى المشاعر ما اروم اوصفها من غلاك .. و من كثر حبي لك فكري بفكر .. حتى العوال لو بغو يرمسون .. حبنا انتشر و لم القلب بوصاله ..
سلطان : الريم غلايه الحين ترمسن ابوج ... و خلاص بملج عليه الخميس الياي ..
الريم : ان شاء الله ..
سلطان : الحين بخليج .. بسير اجهز للصلاه .. شي في الخاطر ..
الريم : سلامتك يا الغالي .. ومن صوبنا شي في الخاطر ..
سلطان : هيييه ..
الريم : امر ..
سلطان : ما يامر عليج عدو .. احبج و اموت فيج .. و يلا عااد سيري عند عميه و رمسيه ..
الريم : انزين الحين بسير له ..
سلطان : وناااسه ... يلا عيل .. فـ داعة الله ..
الريم : داعه الرحمن ..

و بندت عنه .. و على طوول اتجهت الي ابوها عشان تعطيه الموافقه ..

الريم : ماما وين بابا ..
ام مايد : ابوج في مكتبه يالس ..
الريم : انزين انا بسيرله تامريني بحايه ..
ام مايد : سلامتج يالغلا ..

و سارت المكتب عند ابوها ..

دقت الباب بكل خفه .. كل دقه تعبر عن خجلها و مدى حبها لسلطان .. صدق انها ما خذت وقتها بالتفكير .. لكن شتسوي حبيب القلب شاغلنها بكل وقتها ..

دق دق دق

بو مايد : حياج الريم حياج ..
الريم : كيف عرفت اني انا ..
بو مايد : اعرفج من دقتج ..
الريم : شحالك بابا ..
بو مايد : بخير ربي يعافيج وانتي اخبارج ..
الريم : طيبه طاب حالك .. بابا ..
بو مايد : عونج طال عمرج ..
الريم : عانك الرحمن فديتك .. بابا انا ( ونزلت راسها ) موافقه ع سلطان ..
بو مايد : يعني بهالسرعة مستعليه تروحين عني ..
الريم : لا .. بابا بس انته تعرف البنت لازم تعرس .. عشان يكون وراها سند بحياتها ..
بو مايد : دام انج قلتي جييه .. انا ابد هب خايف عليج .. سلطان ولد ويحبج و بيدير باله عليج اكثر من اي حد غيره ..
الريم : وانا بعد بحطه بعيوني و بوسط قلبي ..
بو مايد : عاااشت بنتي عاااشت ..
الريم : ههههه .. بابا .. اليوم نبا نظهر ..
بو مايد : وين بتسيرون ..
الريم : اي مكان .. ملينا ..
بو مايد : بعده الاجازة ما بدت و مليتي .. عيل باجر بتعرسين ... و سلطان طول الوقت بيكون في شغله .. ويا منو بتميم ..
الريم : ويا عيالي ..
بو مايد : جييييييه تتحرين من تسيرين عند سلطان بيكون عندج عيال ..
الريم : لا بابا .. انا اول شي بسكن ويا عميه في البيت .. و عقب لين ما اييون العيال يمكن نستقل في بيت بروحنا ..
بو مايد : زين والله .. والحمد لله انه ربج رزقج بخاله مثل ام سلطان و عم مثل بو سلطان .. و من صدق بيديرون بالهم عليج مثلنا .. و بيعاملونج احسن معامله .. و بيعاملونج احسج و احن معامله .. و بيظهرون الحب و الحنان اتجاهج ..
الريم : انزين بابا انا بخليك الحين .. بسير اجهز للصلاه .. تامرني بحايه ..
بو سلطان : اسالج .. صليتي الاستخارة قبل ما تقررين موافقتج ..
الريم : هيه ابويه ..
بو سلطان : عيل خلاص توكلي .. وربي يوفقج بحياتج و يهنيج ويا ريل ..
الريم : تسلم يالغالي .. لو اقدر اعوضك لو بشي من اللي عطيتونا اياه انته و ماما .. ما بقدر .*.. لانه اللي سويتوه بحقي اكبر .. و الصراحه لو سرت بيت سلطان ما بنسى شي من فضلكم .. و دوم تبكونون في راسي ..

بو سلطان : ( يحضن الريم ) فديت تربيتج يا بنتي .. يعل ربي يرزقج بعيال مثلج ..

وظهرت من عند ابوها و سارت و سبحت و جهزت للصلاه ..

في بيت بو سلطان :..

بو سلطان : يلا سلطان انزل بسرعه تاخرت ع الصلاه ..
سلطان : بابا والله بتلحق ع الصلاه لا تخاف ..
بو سلطان : اليوم اليمعه .. ويلا عااد انزل والا ما بنيوزك الريم ..
سلطان : كله ولا الريم .. خلاص خلاص انته سير المسيد وانا بلحقك ..
بو سلطان : بس لا تتاخر .. وان تاخرت خلاص الريم بنعافها ..
سلطان : بابا . خلاص الحين نازل ..

سلطان كان نازل من فوق واللي يشوفه يقول اليوم بيعرس .. كان الصراحه سامته بسفرته الحمره و كندورته الكركميه.. و الساعة البيضة اللي مرصعه بالالماس الفضي .. و ريحه عطره اللي انتشرت في ارجاء البيت ..

ام سلطان : ماشاء الله ع سلطوون .. غااادي قمر .. سميت به الرحمن ..
سلطان : يالغاليه هب اسويت احلى عن بو سلطوون ..
بو سلطان : فديتي دووم حلوو ..
ام سلطان : مثل ما يقولون هذا الشبل من ذاك الاسد ..
سلطان : لا اانا احلى عن بابا ..
بو سلطان : يلا لااااه خلنا من كلامك هذا .. وخلنا نسير المسيد ...

و ظهروا و ساروا المسيد ..

في المسيد عقب الصلاه صوب الباركناتبو سلطان شاف بو مايد ..

بو سلطان : السلام عليكم ..
بو مايد : عليكم السلام و الرحمه ..
بو سلطان : شحالكم ..
بو مايد : الحمد لله .. ومن صوبكم ..
بو سلطان : بخير ربي يعافيك .. ميوود شحالك ..
مايد : تمام عمي .. عمي عيل سلطان وينه ..
بو سلطان : في المسيد بعده ..
مايد : هذووه وصل ..

وصل سلطان و توايه ويا مايد و تخاشمو..

مايد : بابا عيل انته سير ويا عمي وانا و سلطان بنمر ع ماما و الريم و بنيكم بيت عميه ..
بو مايد : انزين عيل ..

وساروا بو سلطان و بو مايد بيت بو سلطان اكييد كل واحد بسيارة .. و ساروا مايد و سلطان بسيارة سلطان لانه مايد ياي ويا ابوه بالسيارة ..
وسلطان طول الدرب جاذبه عقله بشريكه عمره الريم .. اللي من صد حواليه يشوف خيالها .. اللي خطفت قلبه و امنها عليه ..

وصلوا الشباب بيت بو مايد :..

بيييييييييب بيييييييييييييب بيييييييييييييييب ..

مايد : عيل اانا بسير بييب مفاتيح السيارة وبزقر ماما و الريم ..
سلطان : اوك اترياك ..

يت الريم و سيدة حدرت سيارة سلطان .. ما كانت تعرف انها سيارة سلطان لانهم الحبايب مطقمين بالسيارات كل واحد منهم لكزس بيضة و مضلمة بالفضي ..

الريم : وشعنه تاخرت علينا .. ووينه بابا ..
سلطان : مرحب الساع و القلب خفاق ..
الريم : ( انصدمت من شافت سلطان ) مرحبتين .. سوري ما دريت انك صاحب السيارة ..
سلطان : عادي تراني انا اللي بوصلكم ..
الريم : انزين انا بظهر الحين بسير ازقر ماما ..
سلطان : مايد سار يزقرها .. و بتسير وياها .. وانتي بتسيرين وياي ..
الريم : انزين بخلي البشكارة تي ويانا ..
سلطان : شو تخافين مني ..
الريم : لا ما خاف .. بس انا بنت وانته ولد و الشيطان ثالثنا ..
سلطان : دام جيه .. عيل من اشوفها بخليها تي ويانا ..
الريم : انزين ..
سلطان : سولفت .. ونسيت اسال عن احوالج ..
الريم : ههههههه ... انا بخير دامني شفتك ..
سلطان : عسا حالج مديم ..
الريم : وياااك .. ومن صوبج شحالك ..
سلطان : بخير دام الابتسامه انرسمت ع شفايفج ..
الريم : دووم ان شاء الله ..
سلطان : ويااااج ..
الريم : ربي يسمع منك ..
سلطان : تعالي تعالي ...
الريم : هلا ..
[/align] __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
«غيماريش الوصل» على صفيح ساخن	راعـــ الــحــب ـــي	رياضة محلية و عالمية	1	05-10-2010 09:37 PM
التحاليل الاخبار##تفيد او لا تفيد	محروم.كوم	منتدى أخبار المواقع والمنتديات العربية والأجنبية	0	05-10-2010 10:30 AM
خــيل شـيخ حـرب......	محروم.كوم	منتدى أخبار المواقع والمنتديات العربية والأجنبية	0	10-13-2009 01:30 AM
كلاب صـيد.مـدربات.للبيع	محروم.كوم	منتدى أخبار المواقع والمنتديات العربية والأجنبية	0	07-06-2009 06:40 AM
صـدى صــوؤؤتك ..!$	ღЯмşħ αℓ3ίήღ	شعر و خواطر	4	02-19-2009 04:05 PM