[العنا وش هو العنا .. غير أنتيـﮯ وجروحك وأنـا ! ] - الصفحة 32

هيمـان يالمنصوري · 04-28-2008, 07:51 PM

السلام عليكم

شحالكم ؟؟

... والسموحه ع التاخير

..

ولعيونكم بنزل لكم ها البارت .. وان شالله ينال اعجابكم ..
مع خالص .. احتقــاري .. محبوبتك لعام [ 2007 ] .. - البارت الـ 16 -

يا اليوم الثاني وسافرو علايه وسلطان وحسب طلب علايه تبا تسير النمسا ... صح انه ها الدار لها ذكريات تعيسه بس هي عشقت النمسا حبتها بحلوها ومرها ... وصلو للفندق اللي بيستقرون فيه ومن وصلو ع طول رقدو من التعب ...

وع المغرب نشووو من الرقاد وكانت علايه ناشه قبل سلطان .. ويالسه تطالع التلفزيون .. وسلطان طالع من الحمام وكاشخ وينشف شعره بالفوطه ومن طلع علايه يلست تشوفه .. صح انها تسولف وياه بس تحس انها تستحي منه لين اللحين ..وتحس به اخوها الكبير مب ريلها وضحكت على ها الافكار وطالعها سلطان وهي تضحك

سلطان مستغرب : بسم الله عليج بلاج تضحكين ؟

علايه تحط ايدها ع ثمها : لا ولا شي ..

سلطان يغمز لها : عليناا ..

وسار يمشي صوبها ويلس ع الارض وتربع بحيث انه عاطنها ظهره وعطاها الفوطه وصد عليها : نشفي لي شعري

علايه ابتسمت له وتناولت الفوطه وبدت تنشف شعره .. سلطان صد عليها : بس جي .. طلعتي رخوه ..

علايه فرت الفوطه في ثبانه : رخوه هااه .. نشف بروحك ..

ونشت عنه بتسير تبدل ثيابها .. وتم يضحك عليها .. دشت علايه تبدل ثيابها لبست تنورة جينز و بدي طويل لونه برتقالي وعليه بنت كيووت يعني ثيابها مايخصها انها عروس وجنها توها بنت صغيرونه .. رفعت شعرها بطريقة " مالي بارظ " وطلعت وايد كيووت وحطت ميكب وطلعت في الصاله ..

سلطان من طلعت تم يشوفها وعلايه اونه مب مستوله سالفه ..

علايه صدت عليه : فيه شي ؟

سلطان ينش من مكانه ويسير صوبها : هيه

علايه تطالع عيونه وهو يطالعها : شو

سلطان : ان شالله بتطلعين جي

علايه : انا لابسه شي ساتر

سلطان : اسمحيلي اذا قبل بيت اهلج يخلونج تظهرين بليا عباه تراني انا ماابا حرمتي تظهر جي

علايه ماتضايجت بس لمست في شخصيته شي ثاني .. انه يغار عليها .. ابتسمت له .. جان يحط ايده في قصتها وتم يردها ع ورا وهي تبتسم وعقب باسها ع يبهتها : يالله سيري البسي عباتج بنظهر شوي ..

علايه : ان شالله ..
سارت لبست عباتها وشيلتها وطلعت وياه وشي طبيعي سلطان مابيفجها تم قابضنها من ايدها ... هو صار له 3 ايام وياها ويحس انه مايبا يفارقها .. وانها شي مقدس في حياته ... وعلايه كانت تحس انها مابتروم تتاقلم وياه وبيكون صعب انها تتفاهم وياه .. بس من عرست وعاشت وياه حست انها اتجاوزت كل الحدود وانها عايشه حياه ولا احلى وياها السلطان وهي بروحها تقول ..

" لو كنت ماخذه غير سلطان ما اتوقع اني بكون مرتاحه كثر اللحين !! "

تم يتمشى سلطان وعلايه بين الاجانب وطبعا لازم يطالعونهم .. كان الجو مغيم وباارد .. وها الشي خلى سلطان يلم علايه في حضنه ع الكرسي اللي مجابل البط ... ويطالعون البط وهم ساكتين ...
سلطان : عليوه ..

علايه : همم

سلطان : مرتاحه ويايه ؟

علايه صدت عليه : انته شو تخربط

سلطان : مجرد سؤال

علايه : هيه مرتاحه فديتك

سلطان : يعني مابيي يوم وبتقولييين

علايه تقاطعه : اششش.. دام اني رضيت من البدايه لاتتوقع اني في يوم بيي وبقولك خلاص

سلطان كان كل يوم يبا يكسب علايه له عن تتغير عليه في يوم وتطلب انها تبتعد عنه لانه مايتخيل حياته بدونها .. سلطان كان يحب علايه ضعف الاضعاف ... صح انه علايه حبته بس سلطان بزياده ...

فديت علايه والله صبرتي ع الظلم .. ونلتي قلب يحبج ومستحيل يكرهج ... الله يهنيكم ..!!

.................................................. .................................................. ......................................

عقب اسبوعين .. – البلاد- دبي –

دش فليل بو محمد البيت وهو معصب ووده يكسر كل شي جدامه ... ويزاعج من قمة راسه ...

بو محمد : ام محمد .. ام محمممممممممممد

وتطلع اليده من الصاله الثانيه : خير شو بلاك تباغم ياخليفه شو ياك ؟

بو محمد : ابا ام محمد

اليده : شو مستوي ؟؟

بو محمد معصب ويلس ع الكرسي ويهز ريله بعصبيه : ازقريييها

اليده : انزين اصبر طشونه بيروحون الحريم اللي في الميلس وبتي .. لاتحرق اعصابك شو مستوي ؟

دشت ام محمد وهي مبتسمه .. بو محمد نش بعصبيه

بو محمد معصب : ايلسوو خلوني اخبركم عن اهل ريل بنتي اللي قاصين علينا ويتحسبونا مابنعرف عن سواياهم الخايسه .. عيل هاي سواه يسوونها فيني وفي بنتي ... يخلونها تاخذ مريض بالثلاسيميا .. ومابتييب عيال واذا يابت تراهم بيكونون مرضى شرات ابوهم ..... بنتي البجر اللي ربيتها وكبرتها واستانست يوم عرست .. بتقضي عمرها ويا واحد مريض .. ومابتييب لنا عيال صاحيين .. ( ويصد على ام محمد وعيونه حمر وبهدوء ) مابتشوفين عيال بنتج يا ام محمد مابيشوفون الدنيا عيالها ... ( ودمع هني ورد يعصب ) لكن والله ماا اخليها عنده دقيقه ووووحده اللحين بتصل له يرده البلاد ومابتم وياه بنتنا نباها ... بنطلقها منه وبنخليها تشوف حياتها بعيد عن واحد مريض وفيه ستين عله ...

ام محمد دوم ساكته .. لكن ها المرم تمت تصيح .. وتصيح ... واليده صاحت .. كيف جي شو استوىىى ؟؟

بو محمد بألم : عيل انا انا خليفه الــ .. يقصون عليه ... مالقو الا بنتي ياخذونها ... لكن اللحين بحجز لهم خلهم يردوون ولا انها اتم وياه دقيقه وحده ولادقيقه

اليده تنش تيوده من ايده : حلفت عليك بالله ياخليفه ماتتصل له لين مايردون ارواحهم من السفر .. حرام عليك تكسر قلب بنتك .. توها عروس .. حرام ياخليفه خاف ربك البنت بعد مريضه .. ع الاقل خلهم ها الشهر ... واخلاف ماعليه .. شلها عنه ..

بو محمد بألم : ليش تحلفين يامايه ..ليش ؟؟ انا ابا بنتي ... هم مافكروو انهم بيحزنون قلب امها وابوها .. وفكرو بولدهم وسعادته

اليده : عليا اصيله لو بغت اتم ويا ريلها تراها بتم وبعدين.. هذا نصيبها في ها الدنيا تعيش وياه بدون يهال .. والله بيعوضهم بخير

بو محمد : لا تخسي عليا اتم وياه خلهم يردون من شهر العسل وانا لي كلام ثاني هاذيج الساعه والله يصبرني لين مايردون .. والله يامايه لو مب حلافج جان انا سايرلهم هناك وشليتها عنه ..

وظهر عنهم بو محمد وهو متضايج من الخاطر وتمت ام محمد تصيح ..

ام محمد : استغفر الله .. ليش يستوي جي .. الولد كان طيب واهله طيبين .. ليش يقصون علينا وع البنت

اليده تهدي ام محمد : ماعليه ان شالله خير .. وصدقيني بنتج اكيد عرفت ولو ماتباه جان اتصلت لكم من اول يوم وقالت ماباه .. بس هي تباه .. لاتكسرون قلب بنتكم هو يباها ... ياحصه ماتدرين به .. كيف يحبها وحاطنها في عينه .. يوم اتصلت لي عليوه هاك اليوم ... رمسته .. والله من رمسته وربي شاهد انه بيموت عليها من كثر مايحبها .. ( وتدمع اليده كله ولا علايه .. ولا انه حياتها تنهدم ) ولا انتي عايبنج انه بنتج اتم مطلقه بيت ابوها وماتدرون بييها نصيبها اخلاف ولا لا ...

ام محمد لاجواب الا الدموع قلبها انفطر على بنتها ..

.................................................. .................................................. ......................................

فليل .. – النمسا –

علايه وسلطان ياليسين يلعبون بلي ستيشن ... وحاطين " كراش " ومتحمسين ...

علايه تشرب الكوكاكولا .. جان يسحبها سلطان من ايدها ويشرب من وراها ..

علايه تطالعه بنص عين : امررررره حاسدين الفقير

سلطان مهوس ستارت ويشرب الكوكاكولا وخلصها كلها : اااااااااااااااح .. انتعاااش ..

وعلايه تطالعه بنص عين : جب جب

ونشت بتسير تيب لها وحده ثانيه ...

سلطان : اييه الطويله هاتي لي وياج ..

علايه تدور في الثلاجه : جب بو راس لاترمسني ..

سلطان ينش لها : ههههه بو راس هاااه ...

جان تطلع علايه الكوكاكولا الاخيره .. ويسحبها عنها سلطان ويرفعها فوق بايده : جانج حرمه هاتيها ..

علايه تمت تنقز تباها بس مارامت توصل .. : انزين ماشي لفت ..

سلطان : عطلان فيه دري .. ( وجسف ركبته ) اركبي ..

علايه : ههههههههههههههه بس عاد سلطون والله عطشانه ..

سارت فتحت السده مال المطبخ ولقت " بيباات " وعطته واحد وشلت واحد .. وحطو الكوكاولا ع الطاوله وحطو البيبات داخل وتمو يشفطوون وكل شوي يرفعون عينهم يطالعون بعض .. ويوم خلصو سار سلطان وانسدح ع الغنفه يحس انه بطنه انترس وسارت طلعت علايه كيمرتها وتمت تصوره وهو يدري بها انها تصوره بس مب مسولها سالفه وتام منسدح ع بطنه ومغمض عينه .. عقب حطتها ع المكتبه مال التلفزيون وركضت صوبه ويلست ع الغنفه يعني رصته شوي وصورتهم الكيمره وهم يضحكون .. كانت احلى من صور العرس كلهن .. كان شكلهم كيووت واايد
طافن الايام ع سلطان وعلايه احلى منهم ماشي ... قامت تصريحات الحب من علايه تبين ... قامت تقوله .. أحبك !... كل يوم لازم يسمعها ... حتى هوو كان لازم كل يوم يقولها ... وقبل لايروحون بيوم .. كانو سايرين مطعم تركي ويالسين يتغدوون ...

دشيت انا واخويه اللي اصغر عني المطعم التركي بنطلب لنا ...

سلطان يرمس اخويه : هاااه وين ابوك

اخويه حمود : هني بيبركن السياره وبيي

ويصد سلطان على علايه : تعرفنا عليهم يوم ساير اصلي الجمعه ..

علايه ابتسمت بحيا ..

سلطان يرمس حمود اخويه : وين اماكن سرتو لها ؟؟

فواغي اللي هي " انا " .. احم رزيت بويهي ورمسته : سرنا وايد اماكن . .ٍسرنا زالامسي .. والحديقه .. ويورو بارك

سلطان يرمسني : سرتو عند الثلج ..

فواغي مستانسه : هيه سرناا ..

سلطان يصد على علايه : هااه شو رايج

علايه بحيا : شو خلاص نحن بنروح باجر ..

حمود اخويه طلع عني وتميت انا اشوفهم كانو حلوين الريال والبنت وشكلهم وايد كيوت ...

فواغي بدفاشه : انتو يايين شهر العسل ..

سلطان صد على علايه وعلايه استحت : هههههههه هيه فواغي بحركتها المعتاده ( يعني انا هع ) : يااااااالللللللله .. ياللللله .. اووووووونه .. اووووووونه

علايه وهي ميته من المستحى : ههههه بس عااد

سلطان : اوونه احمرت عليوه تستحي ..

علايه مستحيه : ههههه يالله خلصنا

سلطان يمسح ثمه بالكلينكس : يالله فديتج

ونشو ويودو ايد بعض .. وطافو حذالي .. سلطان يرمسني : يالله مع السلامه .. وسلمي على ابوج ..

فواغي تبتسم لهم : ان شالله يوصل واتحملو على عماركم ..

علايه ترمسني : ان شالله حبيبتي وانتي بعد ..

حط سلطان ايده ورا ظهر علايه وظهرو من المطعم ويا حمود اخويه ناخذ الطلبيه وانا في بالي فكره عن ها الثنينه انه بكتب لهم قصه وفعلا .. كتبتها ... !! كانو اساس فكرة قصتي ها الثنينه اللي شفتهم ..

لاااا مب النهايه ... كملوو لوول

.................................................. .................................................. .....................................

اليوم الثاني ع الصبح وصلو المطار ... لاسلطان ولا علايه يدرون باللي مستوي في البلاد ... كانت مشتعله حمى الوطيس بين الاهل وخاصه اهل علايه ... يوم خلصو الاجراءات خطفو بيظهرون علايه شافت ابوها وهو ياي صوبهم كان سلطان ميود ايد علايه ..

سلم بو محمد عليهم ع السريع ويود ايد علايه ومشى عن سلطان .. سلطان استغرب شو السالفه .. وعلايه بعد استغربت ..

علايه : ابويه اصبر سلطان ..!!

بو محمد معصب: جببببب ولا كلمه .. ماباج تشوفينه

علايه شويه وبتنهار شو ها الرمسه اللي تسمعها : شوو ما اشوفه ابويه هذا ريلي ..

بو محمد يقوي قبضة ايده عليها : انا قلت لج سلطان هذا بيطلقج وهو حمار وبتردين انتي عندنا فاهمه ...

علايه تبا تخوز ايدها من ايد ابوها : لا مابخليه انزين ( وتصيح ) مابخليه

وشافت عمها ساير يمشي صوب سلطان اللي كان واقف مكانه ومنصدم ويطالع علايه وابوها وهم يبتعدون عنه .. ومن شاف علايه تصيح انقبض قلبه حس انه فيه شي ..

احمد بضيج ويسلم ع سلطان ويحط ايده ع جتف سلطان اللي سرحان ويطالع علايه ويا ابوها : سلطان يبونك اتطلق علايه واليوم قبل باجر

سلطان لسانه انشل .. علايه حياته وعمره ..؟؟ يبونه يطلقها .. مستحيل

سلطان بعصبيه : مستحيل هاي حرمتي كيف اخليها ..

احمد بضيج : ابوها راكب راسه ومب راضي يسمع لحد

سلطان بدى يفقد اعصابه وياشر على عمره : وانا يا احمد ؟؟ وانا ؟؟ شو حياتي من عقبها .... كيف بحيا بدونها خبرني ..

احمد : خلاص ياسلطان الكلام مامنه فايده طلقها ..

سلطان ماسوى سالفه لاحمد وكمل دربه وهو يدز عربة الشنط وقلبه مشتعل نار .. مستحيل يتخلى عنها .. حط الشنطه في السياره ودق سلف وسار صوب بيت قوم علايه ... ونزل .. وكان وراه احمد ..

احمد يركض صوبه : سلطاااااان .. سلطاااااااان .. دخيلك رد .. اخويه معصب اللحين مابيروم يتفاهم وياك رد ياسلطان

سلطان دش الميلس ع طول وكان ابو محمد يالس في الميلس يدري انه سلطان بيدش ..

بو محمد واقف ويطالع سلطان اللي واقف عند الباب : هاي سواه تسويها ياسلطان ؟؟ افا والله افا

سلطان بالم ومب متخيل انه بيفارق علايه : عمي .. خلني افهمك بو محمد يعلي صوته :لاتفهمني ولاشي ... ابا طلاق بنتي واللحين

سلطان بعناد : لا مب مطلق هاي حرمتي

بو محمد : وهاي بنتي قبل لاتكون حرمتك

سلطان بدى يضعف : عمي والله ماغلطت في حقها

بو محمد بدى يضعف هو الثاني : ادري ياسلطان بس غلطت انك ماخبرتنا ... انا ابا اشوف عيال بنتي

سلطان : لو قلت لكم عن مرضي بتوافقون ؟

بو محمد سكت لو كان يعرف انه سلطان مريض اكيد بيرده ..

سلطان يكرر السؤال : لو قلت لكم عن مرضي بتوافقون ..

احمد ساكت ويطالع ...

بو محمد : ها الكلام كله ماينفع .. نبا الطلاق

دشت اليده وهي محتشره ع ولدها : انته ماتخاف ربك في بنتك ... بتموت من الصياح .. تباهم يطلقون وهم توهم رادين من شهر معرسين .. هاي بنتك من لحمك ودمك .. تبا اتطلقها .. ياخليفه .. الطلاق ابغض الحلال .. استهدي بالله .. الريال شارنها .. والعيال تراهم بييون بس مابيكونون صاحين ..

بو محمد دمع : انا اشوف عيال بنتي مب صاحين ليش ؟؟ ليش اعذبهم في ها الدنيا ... خبريني يامايه ليش اعذب بنتي وعيالها ؟؟

سلطان تم منزل راسه ... وفجأه اتدش علايه والشيله ع جتفها .. ولابسه العباه ... ووقفت حذال ابوها .. وهي بتموت من الصياح

بو محمد مب متحمل : طلقها يا سلطان طلقها ..

علايه تصيح وصدت على سلطان اللي كان يطالعها : ماروم ياعمي ماروم

بو محمد عصب : طلقها اللحين ولا من بينا المحاكم

احمد يهدي الوضع : سلطان .. روح اللحين واخلاف يصير خيرسلطان بدى يضعف ويطالع علايه اللي تصيح : كيف اروح واخليها . كيف فهمني .. تبوني اسير عنها ... ماروم والله ماروم

علايه انهارت من سمعته ويلست ع الغنفه وغطت وييها بايدها وتمت تصيح ..

بو محمد : انته جذااب .. جذاااب .. خدعتونا ... فيكم .. قالو لنا الريال صاحي وزين مادرينا انه الريال مريض

علايه تصيح ومب رايمه ترمس ...

اليده : ياخليفه استهدي بالله ... الطلاق مب حل

بو محمد : امبلا الطلاق احسن حل وبنتنا بتشوف حياتها من عقبك ...

سلطان ياشر على عمره وصاح : وانا ياعمي انا ؟؟؟ انا شو اسوي من عقبها .. خبرني ... تبوني اخليها ... اتعرف لو تطلب عيوني اللحين بعطيك اياها .. بس خل بنتك عندي .. ماروم اطلقها

بو محمد بعناد : عيل من بينا المحاكم ..

علايه انهارت خلاااص ... وتطالع احمد بعيونها انه تحرك سوو شي ؟؟

احمد ماحب يشوف ها المواقف ..: سلطان ان شالله يصير خير اخلاف ... روح اللحين

سلطان انهار : مابروح لين ماتي علايه ويايه ... نشي عليا

عليا رفعت راسها وعيونها حمر ... وتطالع ريلها وتطالع ابوها ...

بو محمد يطالعها ..: تمي علايه

شويه ويسمعون هرن برع .. كان عمر اخو سلطان الصغير ياي عنده من عقب اتصال احمد ...

احمد : عليا اطلعي برع ..

بو محمد : لاتمي والبسي شيلتج لانه بيطلقج اللحين

علايه وهي تصيح تحجبت واليده اتطالع .. ودش عمر وهو مستعيل ..

عمر : السلام عليكم ..

وسار سلم على بو محمد واحمد وسلطان .. ووقف حذال سلطان اللي دموعه تطيح وهو مستغرب ..

عمر زايغ : خير مامن شر ..

بو محمد : نبا طلاق بنتنا اللحين

سلطان مصر : مب مطلق بو محمد عصب : بتطلق ولا شووو ؟ ( واتجدم له )

وتسير اليده وتيوده من ايده : خله ياخليفه .. خله بارك الله فيك بيطلجها اخلاف .. رد واكسر الشر ..

عمر بهدوء : نبا نسمع راي البنت .؟؟ ( ويصد صوبها ) عليا ...

علايه رفعت راسها وعيونها حمر : تبين الطلاق ولا راضيه ..

علايه تطالع ابوها وابوها يحذرها بنظراته : ماعرف

سلطان انصدم ماتوقع انها تقول جي هو واقف في ويه ابوها وبيتحدى العالم كله عشانها وهي اخرتها تقول " ماعرف "

بو محمد : بنتي مالها شور

عمر : نبا راي البنت .. شي من الثنينه .. يا تبينه .. او لا ... ؟؟ ارمسي عليا ..

عليا تطالع سلطان وتتذكر احلى شهر مر عليها : هيه

وطلعت تركض برع وسار وراها عمها ... بو محمد ماتوقع انه بنته تبا واحد مريض ... واليده استانست من رد علايه ..

اليده : سمعت بنتك تباه وهو يبااها .. حرام تحرق قلبهم يا خليفه .. ( وتصيح ) حراام .. ماغمضك الريال بلحيته يترجاك يبا حرمته ...

عمر حضن اخوه ويهديه ... بو خليفه فتح العقم مال الكندوره ويلس ع الغنفه ...

سلطان مسح دموعه وسار حبه ع راسه : عمي والله وانا احلف بالله ... انه ماتخيل حياتي بدونها .. عمي ( وبتوسل ) اترجاك ... ماروم اطلقها

خليفه : ...............

اليده : خليفه خلهم يتوكولون ع الله وانته عندك محمد وميره وريم والله بيطول بعمرك لين ماتشوف عيالهم .. وان شالله بعد عليا بتشوف عيالها .. بس لاتكسر قلوبهم ... ولاتراني بحلف عليك

بو محمد اتسسلم ورفع راسه : لاتحلفين يامايه .. الله يهنيهم ( ولف بويهه )

سلطان استااااااااااااااااااااانس من الخاااااااااطر وحضن عمه .. خليفه تم بارد .. بس عقب حضن سلطان وتم يصيح لانه يحس انه ظلم بنته ..عمر تم مستانس ... وسارت اليده تبشر الام واحمد وعلايه ...

علايه دشت الميلس ... من شافها سلطان ع طول سار لها وحضنها بقوووووه وهي تمت تصيييح

سلطان : مابطلقج عليووه .. بتمين وياايه .. بتميين ..

علايه مستحيه لانه حضنها جدام عمها وابوها ويدتها واخوه ..وبصوت خفيف: بس سلطان

سلطان يخوزها عنه وهي تمسح دموعها وسارت تحب راس ابوها وقالت له في اذنيه : ماكنت ابا ازعلك .. بس بعد ما اتوقع انك ترضى اني اكون مطلقه ... ولقب مطلقه يلصق بي وانا توني بنت 18 ..

احمد يسمعهم ويبا يلطف الجو: جذااابه دشيتي الـ 19 ..

عليا تضحك وتمسح دموعها : ههههه انزين جب ..

بو محمد حضن بنته وباسها ع راسها ..

علايه : راضي عليه يابويه

بو محمد :راضي عليج فديتج

عمر : احم نترخص عنكم

عليا بصوتها المبحوح : اقرب عمر تتغدى عندنا

عمر يطالع سلطان : اممم يتريونكم في البيت

عليا تصد ع سلطان : نروح ؟

سلطان يبتسم لها ويطالع بو محمد اللي اتجلب حاله 180 ..

بو محمد : سيرو بارك الله فيكم ..

احمد وامه واخوه تم يطالعونهم عقب ماسلمت عليا على اهل البيت .. وعقب مامرن اخس ساعتين عليهم كلهم .. ردت علايه ويا سلطان .. بيت الزوجيه ...كان بيت علايه وسلطان بو طابيقين بس صغيرون شوي .. يعني على قدهم ... وروعه من داخل ... كانو اهل سلطان هناك .. يعني امه واخته واخوه عمر .. لكن ابوهم متوفي من زمان .. و اخوه العود ومرته ماييو ...

علايه دشت وشافتهم كلهم واقفين يتريونهم ... ع طول سارت سلمت على ام سيف .. اللي هي ام سلطان بعد ..

وطبعا حسب طلب سلطان انه مايبا حد يعرف عن السالفه اللي استوت توه ... وخاصه امه ... دشت علايه وشكلها يبين انها متضايجه .. وحتى سلطان .. بس يحاولون انهم يضغطون على عمارهم عشان مايعرفون الاهل شي

عقب الغدا يالسين كلهم ويشربون جاهي

ام سيف : هاااه شو الدار اللي نهيتو لها .. ان شالله غاويه

سلطان يشرب الجاهي ويطالع علايه : يالللللله يامايه اسكتي لاتتخبرين ... عينج اتصح من الخضره اللي تطالعينها ... بس ها المره استانست دام انه عليوه ويايه

علايه من سمعت اسمها صدت عليهم : جنكم تحشون فيني

ام سيف : هههههه الا يغازلج ...

علايه احمرت ...

عمر بنقمه : ههههه طالعووو والله مستانسين .. ثره جي يوم يعرسون انا اول مره اشوف سلطون متشقق جي ..
يالله امايه هزي طولج واتنقي لي احلى بنت في الامارات كلها اول شي بنسوي تراي يعني نرمسها في الفون وعقب نطلع وياها .. واذا عيبتني باخذها ..واذا ماعيبتني بخلي سلطون ياخذها الثانيه .. عن اتطيح في جبدي

علايه تضحك : ههههه انزين عادي عندي ..

سلطان : لا والله

نوره : يالله بيتضاربون

علايه : هيه لو يبا ياخذ ثانيه ماعندي اخلاف .. بس بعد يخليني اشوف حياتي
وقبل لايركسلطان عصب : لمي ثمج واسكتي فاهمه

ام سيف تطالع عمر اللي يضحك بصوت خفيف : غربلا ابليسك ياعمور زين جي خليتهم يتضاربون والسبه رمستك الخايسه

عمر يهز راسه : افااااا بس افا ... انا ( وياشر ع عمره ) عمور حبيبش نظر عينش ... رمستي خايسه ...

ام سيف : هيه يالله قم عن الهذره الزايده وصلنا البيت خلهم يرتاحون توهم واصلين

نوره تظهر تيلفونها اللي يرن في الشنطه .. : هذا ريلي متصل .. وصلوني البيت ع دربكم

عمر : عيل يالله طووفوو

عليا : تعالونا كل يوم

عمر يصد عليها : بنت 19 ماترمس .... اللحين هاااي ( وياشر عليها ) كبري ... والله حاله .. ( ويصد ع سلطان ) انته منو قاص عليك تاخذ ياهل ..

عليا تطالعه بنص عين : انته انته ... !! عوذ بالله منك

ام سيف تيوده من ايده : ماعليج يامايه من رمسته خل يولي ..

عمر : ههههه ماعليه مرددوده يالوالده ...

نوره : طوف فكنا انا خطبتها لاخويه ..

عمر : وانا لو قلت ابا اعرس ان شالله بنت كم بتخطبينلي .. بنت 13 سنه .؟؟

نوره : هيه بنت عمتك مابتقولك لا

عمر : عوذبالله من ها الطاري .. اقولكم يالله نروح

ام سيف : هههههههه احسن تستاهل من نيب لك طاريها تشرد امره

عمر : ههههه انزين ورايه مشاوير يالله بوصلكم ..

مشو كلهم لين الباب وسلمو عليهم لين باب عمر السياره ...

عمر : عليووه زهبي عمرج كل يوم انا عندكم .. مب تقولين عمور ماقال ...

عليا : هههههههههه ان شالله نترياك

ورحو عقب اهل سلطان وسكرو الباب وردو الصاله ..

سلطان : ماشالله اشوفج داقه سوالف وياه ..

عليا : عليه سوالف

سلطان يدقق في ملامحها : اتعرفين شفت موتي اليوم

علايه نزلت راسها : دخيلك انسى .. خلنا نبدى صفحه يديده ..

سلطان : والله ماتعرفين شو صابني هاذيج الساعه لا ومن قلتي ماعرف .... هني انا انتهيت ...

علايه نزلت راسها وتلعب بظفورها : بس نحن بعد غلطنا

سلطان ييلس حذالها ويرفع قصتها عن عينها : انا اباج .... ولو خبرتهم اني مريض اكيد بيردوني .. وكان رايج الاهم في السالفه كلها وانتي رضيتي ... بس اكيد اهلج بيرفضون .. وانا باخذج انتي ماباخذ اهلج كلهم عشان جي شاورتج في ها السالفه .. ولا انتي لج كلام ثاني ؟

عليا : لا مب جي ... صح انه رايي هو الاهم في سالفتك .. بس ع الاقل يكون عندهم علم بالشي

سلطان : يكون عندهم علم بالشي .. وتبينهم يردوني .. وما اخذج

عليا تصد عليه : دام انه انا وانته ويا بعض اللحين ليش نرمس في ماضي بيتعبنا ؟؟

سلطان يبتسم : فديتج والله ... احبج عليوه والله احبج

عليا تبتسم بحيا لين اليوم تحس انها تستحي منه : ههه انا بعد

ونشت عنه .. : بسير ارتاح شويه

سلطان : ههه اوكي انا بعد ...
وسارو يرقدون لين المغرب ................

.................................................. .................................................. ......................................

غايه يالسه في حجرتها والملل يحيط بها من كل صوب .. كل ماحاولت تقضي شغله تحس انها تخلص بسرعه وما ا اسرع ماترد حجرتها وتيلس بروحها وترجع تفكر في ماضيها .. حياتها قبل .. كانت تسير الكليه وترد .. كانن عندها ربيعاتها وناسه سوالف .. كان عندها فيصل .. تقضي يومها فليل وياه ع النت ... حياتها وايد اتغيرت .. سارت صوب الدريشه وتمت تطالع الحوي وتشوف عيال عمها يلعبون خاري ... رن تيلفونها في ايدها رنه وحده وبندوو ...

هزت راسها " افففف ناس فاضيه ..؟؟ وانا بعد فاضيه ..."

يت ببالها فكره جهنميه ... ع الاقل بس تسمع صوته . بس تطمن عليه وتبرد قلبها بحسه ... هي تعرف انها متزوجه .. وتعرف انه اللي تسويه غلط ... بس شيطانها قوي .. ههههههه

سارت قفلت باب حجرتها واتصلت على رقم فيصل .. تامه حاطه ايدها ع قلبها .. هي تعرف انه بيرد لانه مايعرف رقمها اليديد ... بس ليش ها المره مارد ... !!

تم يرن لين ماقطع بروحه محد يرد .... تمت تهز ريلها بعصبيه .. " انا شو ابا فيه . انا متزوجه ..؟؟ هههههه انا اقص ع منو اونه متزوجه ... !! "

سارت تكتب له مسج [خدعـــني بكلماتة من اول ما تلاقينا .. قالي يا اعز الناس احبـــك حييييل صدقني .. و للأسف صدقتــة .. ولا ادري عن الحب الي يخفية .. مشيت دروب كــذبــاتـــة .. وشوف وين ودتني.. غايه ]

تمت تتريا ربع ساعه ومحد رد عليها ويوم ياست فرت التيلفون وفتحت الباب وظهرت ثيابها بتسبح ودشت الحمام .. شويه ويدش حمد دورها وماحصلها ... تم يطلع اوراق من السده .. شويه وسمع صوت مسج .. سار وبطبع فضولي شوي عشان يطالع المسج بس انصدم ... من قرا المسج .. تم يقراه مره ومرتين وثلاث ... معقوله !!

[حلاتك لي عشقتني تعشقني لـ يوم الدين ..
غرام نسكن ضلوعة حشيمة من مجانينة ..
جفا يجمع معزتنا ولا عشق يذل اثنين ..
واخر شي مكتوب : فيصل ]

بتهور وبحركه جنونيه .. اتصل حمد ع نفس الرقم من تيلفون غايه ... ع طول شله فيصل ..

فيصل : الووو .. الوو

حمد ساااااااااكت ومايرد بولا كلمه وبس ينسمع صوت نصخ حد ع الطرف الثاني

فيصل : خلاص ياغويه انسيني ياحرمه انتي معرسه اللحين .. واذا شي في خاطرج قوليه اللحين لانه بسكر ..

حمد بند في ويهه وع طول بحرقة .. وبألم .. فر التيلفون بكل غضب ع اليدار .. قام يتعوذ من الشيطان .. ويفرك ايده بعصبيه وساير وراد في الحجره .. مب متخيل موول انه غايه تخونه ...!! .. غايه .. بنت عمه .. يعني حرمته ..

تم يتردد في باله اسم فيصل ... فيصل ...
حمد صد بعيون ناريه صوب باب الحمام ... يترياها بس تطلع .. رجع بذاكرته لورا شوي .. في هاك اليوم المشؤؤم تحت المطر في عز البرد ... ظلم اعز انسانه له .. والسبب ... غايه .... كانت تترجاه يصدقها .. وجذبها .. كانت تترجى رحمته عقب الظرب .. كان يهينها اكثر .... لو ماجذبت غايه جان هو خذ علايه اللحين وعاش وياها احلى ايامه بعيد عن ها الكآبه ... بس اااااخ ...

حاست غايه مفتاح قفل الحمام عشان تطلع من الحمام وتبتعد عن بخار الماي اللي كتم على نفسها ماكانت تتدري انه في شي اكبر من بخار الماي بيكتم على نفسها وللابد ...!!

طلعت غايه وهي تشوف حمد يطالعها ومافيه اي اكشن طبعا كالعاده طالعته بنظره احتقار وسارت صوب التواليت وبطلت الفوطه عن شعرها الخرسان وتناثر على وييها وجتفها .. بنعومه .. طالعت غايه انعكاس حمد في الجامه بس ماتعرف ليش قام قلبها يدق بقو من شافت شي اسود صغيرون طايح ع الارض ...

غايه بصوت مرتجف .: أأأ .. حـحـ ...مــد .

حمد بهدوء : ياعيون وروح وقلب حمد .. __DEFINE_LIKE_SHARE__

6ominko0o · 04-28-2008, 07:52 PM

yaaaaaaaLa 3aaD waiN iL tKmLa __DEFINE_LIKE_SHARE__

هيمـان يالمنصوري · 04-28-2008, 08:03 PM

نزلت التكمله وانتمنى ان البارات يعجبكم

وفي الويك اند بنزل البارات الياي

ولا هنتـــــــــــــــــــــــو __DEFINE_LIKE_SHARE__

قلب حاير · 04-28-2008, 11:36 PM

مشكور اخوي ونتريا الباقي __DEFINE_LIKE_SHARE__

شمس المغيب · 04-29-2008, 04:24 PM

يسلمووو خويه

مافيك حيله __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
الفقع والفياض الغنا .........................؟	محروم.كوم	منتدى أخبار المواقع والمنتديات العربية والأجنبية	0	02-21-2010 10:30 PM
شتات العنا روجيه فيت ليجندري	jnoon	اغاني , شلات , هبان	0	06-14-2009 10:07 AM
اه العنا - محمد المزروعي	@ العامري @	نغمــات للهــواتف	29	07-10-2008 08:58 AM
اهـ العنا بيـ طاليــ....	@ العامري @	تصاميم الاعضاء	35	05-23-2008 02:58 PM
راشد الماجد_اه العنا	عسوولة ترتووب	المواضيع المكرره	4	05-15-2008 07:38 PM