[العنا وش هو العنا .. غير أنتيـﮯ وجروحك وأنـا ! ] - الصفحة 3

هيمـان يالمنصوري · 03-04-2008, 06:24 PM

تسلمون على الردود

وسموحه علقصور

ولا هنتووووووو

اخوكم هيماني __DEFINE_LIKE_SHARE__

هيمـان يالمنصوري · 03-04-2008, 06:29 PM

علايه تبنجت عيونها على حمود ... هذا ابوووووه ...

علايه نشت بسرعه وسارت الحمام .. كلهم استغربوو .. تمت تصيح وتصيح وغسلت وييها مره ومرتين و3

المهم لبست كويتي لونه تركوازي لين الركب وتحته بنطلون جينز وتحت الكويتي ايد طويله لونها بيج يناسب الورد اللي في الكويتي ولبست سكارف تركوازي .. وحطت بودره واتجحلت وحطت المرطب .. ولبست النظاره الشمسيه البنيه عشان ماتبين عيونها انها صايحه وطلعت وهي غاويه وكانت طالعه قصتها ع طرف

ام عليا : ماشالله عليج .. ماشالله ..

عليا ابتسمت وهي تخفف على نفسها : امايه عادي اظهر بليا عباه

ام عليا : انا عادي عندي بس شوفي ابوج

عليا : امم مافيني اسير واقوله انا بظهر جي واذا انهزبت تراني انهزبت ..

ام عليا : هههههههههههه على هواج

طلعت علايه في الممر وشافت روضه ... ومن شافتها روضه دشت الحجره .. علايه عرفت انه مب منها من اخوها ( جامبو الجبار حمد ) ..

طاف بو عليا ووياه بو حمد وهم يرمسون صد بو عليا وابتسم وكان شكله مستانس علايه حمدت ربها انه ماقالها شي ..شافت الشغاله اتدز اختها الصغيره ريم برع سارت علايه خذت ريم عنها وتمت تحوطها وشافت رفيعه طالعه من الفندق تركض وشلتها ... وطلع حمد يركض وراها ... ومن شاف علايه انقبض قلبه ... كانت طالعه حلوه .. وقفت علايه ع حيلها وهي شاله ريم ورفيعه يعني هنتين وتبغي تتوازن عن اتطيح ... لانه دوم تنجلب

حمد يود عمره وخلى عمره عادي ويطالع ايدها اللي ملزقتنها وقلبه مقبوض : هاتيها عنج ماترومين لهن هنتين

علايه بهدوء ناولته رفيعه وشلت اختها ونزلت بها تحت .. حمد حظن رفيعه بهدوء وهمس في اذن رفيعه .. : احبها

نزلت علايه وهي تفكر في سعيد " ثره جي السالفه تلعب بقلبي .. تحبني ( هيه ) وتاخذني ( لا ) .. حرام عليه جان اني حبيتك ها الكثر ... "

شافت حمود اخوها ع السكيت وياي مسرع .. ووقف حذالها وتم يخربط وهي مب رايمه تلقط الرمسه ...بالها مب وياها .. حمود خذ لفه على علاييه ويود راسها وصد براسها الصوب الثاني .. وقالها : هذاااااا هوو البدووي .. مرحبااااااااااا الساااااع

صد بطي ع حمود وضحك : ههههههههه مرحباااا الساع .. جيف الحال ؟

حمود يطنز ويرمس شراتهم : بخييييير وسهااااله ..

بطي يمسح ع شعره : ههههههه مب هين انته

وصد على علايه اللي كانت ميوده ريم ..: شحالج اميه ؟

علايه رفعت النظاره الشمسيه لانها كانت لابسه عدسات طبيه شفافه : بخير الحمدلله وانته شحالك
بطي : بخير وسهاله ربي يعافيج ياحيكم والله ريحة البلاد

علايه ابتسمت . وحمود طبعا مايسكت : تعطيني ناقه

بطي : ههههههههههههههه افا عليك اعطيك ناقه حامل جان تبا بعد

حمود : خل الحامل لك اباها صاحيه اخافها تربي وتموت

بطي : ههههههههههههه خلاص تم

حمود ابتسم

بطي : يالله عيل بخليكم فمان الله

علايه : ربيه يحفظك

نزل حمد وشاف ابو سعيد هني اتبنج ... قلبه تم يدق بسرعه وبلع ريجه مليون مره من الزيغه " هذا شو يايبنه هني ؟ شو يسوي ... ليش يرمس قوم علايه ؟؟"

ورد حمد صوب قوم ابوه ويسمع ابوه يرمس في التيلفون .. : هيييييه زين زين يوم عزمتوو .. والله انه ها الدار غاويه وماعليها كلام .. شو الخضره .. شو البراد .. بتستانسون والله .. عقب اسبوع .. هيه زين .. خل ها التركي " حقي " يحجز لكم ويانا .. وبنسير وبنرد كلنا رباعه .. ههي خلاص تم ..

وسكر عنهم ..

حمد : منو ترمس ابويه ؟

بو حمد : ارمس عمك حارب بييون هني ويانا

حمد بطريقه عفويه : غايه بتي ؟

بو حمد قام يسوي حركاته : هاااا .. هااااا.. اشوف بدينا هيه اتطمن غايه بتي .. يعني شو بيخلونها تحرس البيت

حمد نزل راسه : لا مب جي

بو حمد حط ايده ع جتف حمد :اذا كانت على هاييج اللي ماتنطرى انساها انته اللحين حمد الريال اللي كل حد يعتمد عليك انا ماقسيت عليك الا عشان احصل حمد القبلي .. مابعدتك عنا الا عشان اباك تنسى كل شي استوى لك قبل .. انته غالي ياحمد غالي ..

حمد حظن ابوه : والله مابتعرف اللي في قلبي

بو حمد بعده شوي وطالعه : خبرني شو فيك انا ابوك

حمد وهو مشوش : خلااص ماشي

بو حمد : غايه في خاطرك ياحمد

حمد : هيه في خااطري اباها من خاطري ..

بو حمد : تعالي امايه شو فيج

حمد صد وراه وحصل علايه " لااا ليش دوم انحط في مواقف وياها .."

علايه ترد تحط النظاره ع عيونها عشان ماتخونها دموعها وهي كل ماتشوف حمد تتذكر فراقها ... وتدوس ع قلبها وبصوت خفيف : مافيني شي

بو حمد : تعالي عندي ..

اتجدمت علايه وهي تير ريولها .. : هلا

بو حمد : ولدنا معرس اللحين .. وبنفتك منه .. هههه وانتي هااا متى ناويه تفكينا

علايه رفعت راسها : بالبركه عليكم خطبة حمد وانا خلوني بعيد

بو حمد زعل : افاااا شو ها الرمسه .. عمج يبا يشوفج عرووس

ويا بو عليا .. : ها اشوف عليا موقفه هني

بو حمد :لا شفتها تمشي وزقرتها .. – وصد على علايه – اخبره ؟

علايه ابتسمت : ههه برايه خبره

بو عليا رد قلبه ينغزه : شوو

بو حمد : اسمع بنتك اونها ماتبا العرس

بو عليا : احسن بتفتك من الصدعه

عليا : هيه صح

بو عليا غير رايه : يالله ماعندنا بنات يتم بليا عرس امره من تخلصين المدرسه وحد ايي ويخطبج ع طول بنيوزج .. لو كان ريال زين ..

حمد لا ارادي : لا

كلهم صدو عليه .. ومستغربين ..

بو حمد : شو لا

حمد اتوهق : لا يعني بعدها صغيره من تخلص الثنويه

بو عليا : هههههههه عاد اللي يسمع الخطاطيب واقفين طوابير عند الباب ..

عليا وهي تمشي عنهم : هيه والله ..

ودشت داخل واحصلتهم تقريبا كلهم في الممر وسارت صوب روضه ... وهمست لها : بعدج مابترمسيني

روضه طالعتها بفشله : والله ماعرف ها حمد اخويه

علايه حطت ايدها ع جتف روضه : ماعليه حبيبتي انا مابيي صوبج عشان ما اسوي لج مشاكل ويا اخوج بس والله انا تراني ما أأكل ههههه

روضه : هههههه ادري فديتج بس ماعرف هو تراه هفات اللي ياه مب شويه

واتفاجو به واقف جدامهم روضه ماتت من الزيغه

علايه بخوف : انا اللي رمستها مب هيه

حمد ينقل نظراته بين علايه وروضه ... ومد ايده وسحب روضه ومشى وياها وخلو علايه في الممر وكلهم كانو طالعين .. تمت تمشي علايه بهدوء ووتتذكر سعيد وتبتسم شويه .. وتبوز شويه .. وتضحك شويه .. كل ماتتذكر موقف من مواقفها وياه .. وتمت تمسح على ايدها اليمين تبا اتدفي عمرها وتمت تتبعهم بهدووء وصلو سوق حلوو واايد هادي .. وتمو يتمشون لحريم وحمد كان ويا اليهال .. وعلايه يالسه اتطالع المحل من ورا الجامه وعيبها قلب فيه حجر في النص وايي عليه شي لولبي يلتف بالفصوص .. وتمت تطالعه والجو كان باره ..

صوت رجالي وراها : عيبج

علايه وبدون لاتصد عليه لانه حفظت حسه .. : هيه

حمد : بكم ؟

علايه :850 يورو يعني تقريبا بيي بـ 4 الاف وشي

حمد : اها .. يناسب الخطيبه

علايه صدت عليه وابتسمت ومشت عنه ...

حمد ماتحمل يرمسها جي .. " يعني انا حمار مب كفايه اللي ياها ... بس تستاهل اتبديه عليه .. "

تمت تمشي وتطالع ورن تيلفون امها اللي كان عندها كانت فطوم بنت عمها ..

علايه كانت حاسه انها محتاجه فطوم اكثر شي وفتحت التيلفون بسرعه وبصوت عاالي .. : حبيبة ألبييييييي

فطوم مستانسه : ويييييييه عليوه .. توحشتك برشا برشا ..

علايه : دبه دبه دبه ..

فطوم : هههههههه والله تولهت علييييج

حسن اخو فطوم : كلنااا علييوه كلناااا

علايه حطي سبيكر .. : جب انته ياالدب ..

حسن : عليوه اتعرفين وين سايرييييين

علايه : اهىء اهىء ادري بوظبي .. يالخايينين يعني جان اترييتو شهر شو بيستوي عليكم

فطوم وميثا اختها الكبيره : ههههههههه مانروم كلهم هناك وشو وناسه

علايه : اييييييه بس بس بصيييييح اقولكم سلمو ع نادي الضباط وقولو له اني احبببببببه والله احببببببه

حمد كان يمشي ورا وشال رفيعه وسمع اخر شي ( والللله احببببببببببه )

علايه شافته وقالت الا تخسس به : وبعد اني اتولهت عليه والله يعافيه ان شالله لو يبا صحتي بعطيه لو يبا عيوني بعد

حمد هني ماااات " هاي منو ترمس ؟؟ واللعنه تلعنها مالي خص ... "

حسون ك بسم الله عليج منو ها الميهود ؟

علايه :ههههههههههه اسولف

حسون : علايه شو الشقر

علايه : يعيبنك ...

حسون : افا علييج صوبنا عيل

علايه : تباهن

حسون : هههههههه لا مافيني

ميثا : عرسه شهر 11 ويقول جي .. .

علايه : جب انزين وانتي شهر 1

ميثا: الله يغربل ها العرس مانباه

فطوم : اخبررررررر ..

وقطع الاتصال شافت رصيد امها كان 1.28 فلس وكان فيه 70 درهم

علايه : خييييييييييبه كيف يطيرن البيزات ..

وسكرت التيلفون وسارت صوب قوم امها وخبرت امها انها خلصت رصيدها

ام عليا : وييه حسبي الله ع بليسج انتي وفطيم .. وعلى خرفاتكن – سوالفكم –

علايه : ههههههههههههه والله اتولهت عليها حرام عليج

ام عليا : هههه ماعليه بنطرش من عند ابوج رصيد

علايه : قصدج تصرقين

ام عليا : ههههههههههههههه سيري طرشي لي

علايه : مب اللحين جي ينجك .. يوم بنسير الشقه بسوي عمليات الصرقه

ام عليا خلاص اوكي

وتمو يتمشون شويه وسارو اشترو عشا وردوو البيت وكل حد باله مشغول من صوب

علايه اليوم تعلن الحداد على قلبها ..

وحمد .. يدعي ربه يوفجه في حياته ويا غايه ... ويدعي ربه انه ينسيه الماضي من بداية حبه لعلايه لنهاية حادث سعيد ...

وصلو البيت وتعشو وقامو ينسحبون للحجر بهدووء .. وعلايه سارت فتحت شنطتها الخاصه وضربت الابره في ايدها واتخدرت ووطت راسها ومادرت بعمرها

.................................................. .................................................. ...........................

الجهه الثانيه من البلاد .. – الامارات – دبي

بوحمدان يالس وياام حمدان ..

ام حمدان : ها شوو رديت ع العرب ..؟

بو حمدان : خلاص ردينا عليهم وقلنا لهم انه البنت يباهم ولد عمها

ام حمدان : زين ماسويت ..بس انا بعدني متهوبه ( زايغه ) من حمد

بو حمدان : اذا على سوالفه القبليه تراه اللي كان يحبها خلاص نساها .. حرام عليكم الولد اتعذب والخلق قامو يعايرونه وابوه سفره خاري وبعده عن اهله واتغرب ومب مكفنكم ؟

ام حمدان ماعرفت شو تقول : تراها هاي حياه .. وعمر بنتك بتعيشه ويا ولد عمها

بو حمدان يقاطعها : سمعي دام انه ولد عمها قال يباها خلاص غويه مابتسير لاي حد غريب .. وان رخصها تراه ماعندنا اخلاف انها تعرس

ام حمدان : على هواكم .. بس تراه

بو حمدان عطاها نظره : شو ؟

ام حمدان : غايه مب موافقه .. اوين الريال مب صاحي

بو حمدان عصب : وهي العرس بشورها .. جان ولد عمها وقالت عنه جي .. عيل شو خلت للناس هاي مافيها خير بنتج .. وينها ؟؟ ( ونش من مكانه )

ام حمدان تلحق عليه وتيوده من ايده ..: حلفت عليك ماتقول لها شي اتصيح في الحجره عايفه الولد ماتباه الصراحه وياها حق قبل بغى يموت عشان وحده ومحد تم ماعرف عن سالفته صدق انه مب صاحي ..

ودخل حمدان ولدهم العود وعمره 22 كبر حمد .. وشاف ابوه معصب وامه ميود ايد ابوه .. واستغرب ..

حمدان : السلام عليكم شو مستوي

الكل :: وعليكم السلام

بو حمدان : طالع اختك تبا تسود ويهنا وترد ولد عمها

حمدان غمضه حمد : حرام عليها والله انه حمد اصطلب وغدى ريال وتراه قبل كان ولد مراهق بطيشه واللحين قبض مذهبه

بو حمدان : تسمعين .. اسمعي ولدج

حمدان يود امه ويلسها : امايه اذا على حمد تراني انا دوم وياه .. والله اتغير .. حرام عليكم حسو به ها الفقير ماتم حد ماعايره .. عاشق ومينون .. بس عاد ها كله من زمان وكان طيش شباب .. انا بعد كنت اقص على عمري واسوي عمري احب .. بس طبعا انا ما اتخبلت وسرت اضارب الخلق .. امايه افهمي حمد اللحين اتغير .. والله انه اتغير

ام حمدان : انا ماقلت شي بس اختك ماتباه

بو حمدان : مب كيفها .

حمدان : انا برمسها ..

بو حمدان : سير فهمها بارك الله فيك

وسار حمدان وركب الدري وهو يرتب الكلام في باله كيف بيرمس اخته . دق الباب عليها وماترد .. تم يدق وفتحته .. وانصدم من شاف اخته غايه بنت حلوه ماشالله عليها ونعومه وايد وعمرها 19 والشهر الياي بدش الـ 20 .. وهي تدرس في التقنيه ..

حمدان انصدم من شكلها : انتي بلاااج ؟

غايه صاحت بعصبيه : مااباااه .... ماباااااه ..

حمدان : غايووه حطي عقلج في راسج .. هذا ولد عمج من لحمج ودمج
غايه تصيح وتقاطعه : على عيني وعلى راسي ماقلت شي بس ماباه هو كان يحب قبل ومينون

حمدان عصب وعطاها طراق .. : شو مينووون انتي المينونه اللي بتردين واحد شراته ..

غايه : ماابااه .. ماابااه

حمدان : مب كيفج حمد شيخ الرياييل ولو يباج خدامه عنده بنخليج خدامه تفهمين

غايه : والله يخسي ... ( وتصيح )

حمدان ماهان عليه يقسي قلبه اكثر ع اخته وحظنها : حبيبي غايووه بس عااد والله صياحج مابينفع .. سمعيني نحن بنسافر وياهم وانتي شوفي عمرج بترتاحين ولا لا .. وصلي انتي استخاره ..

غايه : ورديتو هاذيلاك

حمدان : غويه فيصل ريال والنعم ( جان تزيد الريس غايه ع الصياح ) .. وهو اخويه قبل لايكون ولد يرانا .. بس تراه ولد عمج احسن لج من الغريب اانا عاشرت فيصل بس ماعرف كيف يتعامل ويا امه وخواته في البيت لكن ولد عمج عارفينه وعارفين طباعه حمد طيب وينحط ع الجرح يبرى .. انتي ماتعرفين حمد .. انتي ماسمعتي عنه االا الشين .. وماعرفتي عنه الزين

غايه تصيح وتمسح دموعها : وهذا فيه شي زين بعد .. خل يسير يخطب اللي متضارب عشانها .. ( وقامت تزاعج ) خل يسيرررررر ..

حمدان : غايه صلي انتي الغاليه واستخيري ربج

غايه معانده : ماباه .ز

ويوم رفعت راسها لقت ابوها واقف ونظراته ناريه .. : سمعيني ماتبين منو ؟

غايه وهي تشهق : مابا حمد

بو حمدان : ومنو تبين ؟

غايه : يعني انا كانو يايين يخطبوني وكنت عادي بوافق .. (وتنش تيود ايد ابوها ) ليش تسير وتشاور عمي .. لييش ؟؟

بو حمدان : ها الواجب .. وانا سويت الواجب .. وزين يوم اني شاورته لانج طلعتي في خاطر ولد عمج

غايه تزاعج : انا مب في خاطره .. في خاطره اللي كان يبا يموت عشانها ..

بو حمدان : وتبين فيصل .. !! ا

غايه متردده : ماعرف بس مابا حمد

بو حمدان : يعني تبين فيصل

غايه تحط ايدها ع راسها : ماعرف .. ماعرف

بو حمدان غمضته بنته وسار ويودها ويلسها حذاله ع الشبريه : سمعي بنتي .. احسن من ولد عمج مابتلقين بغض النظر عن ماضيه ولكن بعده ريال وتفز له رياييل .. انشدي بو محمد كيف يحب حمد ( قصده خليفه بو عليا ) واتخبري عنه الرياييل في الفريج وكلهم بيقولون لج انه اصطلب .. انتي استخيري ربج وردي عليه خبر ..

غايه هدت شووووويه : اوكي

وطلع حمدان وبوحمدان وهم يتشاورون في ها السالفه .. ع طول غايه نقزت قفلت الباب ودشت المسن .. وماشافته اون لاين .. ويايه بتطرش له ايميل .. ودش اون لاين

غايه : فيييييييصل

فيصل : ما من بينا كلام خلاص

غايه : والله اني احايلهم مابا ولد عمي

فيصل : غويه اتصلي جي ماينفع

غايه تصيح من خاطرها : اوكي

دورت غايه تيلفونها وع طول اتصلت ع رقم فيصل .

شله فيصل وفي صوته ضيجه . : غويه

غايه وبتموت من الصياح : هممم

فيصل غمضته : بس عااد .. بس ها النصيب

غايه : لاااااا انا ( تشهق ) أأ ح ... بك

فيصل دمع .. : حتى انا والله احبج وانا خطبتج بس ردوني

غايه تصيح من خاطرها : والله مب لعيبن فيك .. لانه ولد عمي اونه مارخصني

فيصل : اعرف .. ( وخانته دموعه )

غايه : هاالمينون انا ابتلي به لييييييش ؟؟

فيصل وصوته مول يبين انه تعبان . : خلاص غايه ها النصيب ومكتوب لنا جي

غايه . : يعني خلااص

فيصل : غويه فديت خشمج راسي يعورني واحس انه مخنوق .. اتصلي اخلاف باي

وبند في وييهاا .. حس فيصل بطعن في رجولته لانه حبيبته اللي حبها اتقدم لها وردته .. ع طول فر التيلفون وفتح الكمدينو وطلع البخاخ ورش كمن رشه .. واتحلف ورقد

لكن غايه تمت تطالع التيلفون مذهوله وهي تدعي ربها انه حمد يهون عنها .. وطلعت صورة فيصل في لاب توبها وتمت تمرر صبوعها على ويهه وهو يبتسم .. فيصل ماشالله عليه وسيم وايد شعره طويل وبني .. وفيه غمازات كان جميل بمعنى الكلمه احلى عن غايه وطافها في الحلاه ..بس فيصل حبها من خاطره من يوم كانو صغار وهي تلعب وياه .. وتمناها تكون حرمته .. وصح انه تواصل وياها بالمسن .. وبالمسجات ساعات ونادر اوقات الضروره يرمسها في التيلفون بس كانت مرات تنعد ع الاصابع ..

تمت غايه تطالع صورته وهي تتحسر على سنين حبها وتصيح بالم وبحسره ... ومن التعب ومن كثر ما صاحت غفت عينها ورقدت ..

وع الساعه 2 الا عشر .. رن تيلفون غايه .. ورن وماشلته ..

ورد يرن ع الساعه 2 بالظبط .. وهني انتبهت لتيلفونها وشلته وصوتها كله رقاد .. : الوو

فيصل : عيوني

غايه فزت من مكانها .. واستوعبت انه فيصل وتمت تصيح ومايسمع الا صوت نصخها وهي تصيح

فيصل : غايه طلبتج

غايه بدون تردد : عطيتك ..

فيصل : ابا اشوفج فديتج دقايق ..

غايه انصدمت من طلبه : متى اللحين ؟؟

فيصل : هيه اطلعي عن باب سكتكم الصغير من ورا البيت

غايه : بس اللحين ظلام واتروع

فيصل : والله مابطول .. ( وبحزن ) لاتحرميني من اخر طلب اطلبه منج

غايه هني ماتت من الصياح .. وسكتو ودمع فيصل

غايه : خلاص بدبر عمري وبرد اتصل لك

فيصل : اترياج

وبندت عنه وسارت تغسلت وفتحت الباب وحاطت داخل البيت وتمت تحط اذنها ع كل حجره وتسمع اذا في حد واعي ولا لا .. وعقب ردت حجرتها واتصلت لفيصل وقالت له دقايق وبتظهر ..

سارت لبست شيلة مال البيت ورتبت عمرها شويه .. وطلعت تمشي بشوي شوي على اطراف اصابعها .. وفتحت باب السكه الصغيره وتوها بتفتحه ويطلع لها في ويهها ..: بووووو

غايه ماتت من الزيغه وضربته بالخفيف ع جتفه : بغيت امووت وياويهك

فيصل ضحك : ههههههه تستاهلين .. ( وبحزن ) عيل بتخليني .. ؟

غايه مارامت تتحمل وصاحت ..

فيصل دمع وياها مارام يتحمل الموقف ها الشي اكبر منه ومنها وسحب كيس كبير ودش بيتهم وحطه بين الزرع ... ورد ظهرخاري وغايه تامه ساكته وتصيح ...

فيصل : ماروم اتم اطالعهن واتذكرج وانتي بتكونين لواحد غيري

غايه تصيح من خاطرها : ليش ؟؟ لاتقول جي

فيصل : خلاص الغاليه .. خلااص بس ها الشي اللي كنت ابا اعطيج اياه

ولف عنها .. __DEFINE_LIKE_SHARE__

هيمـان يالمنصوري · 03-04-2008, 06:34 PM

ولف عنها ..

وصوت رجولي وراها : غايوووووه

غايه صدت وهي منصدمه .. واتجدم حمدان لها وعطاها طراق من الخاطر ... وتمت تصيح .. فيصل مات من الزيغه وقال انا اليوم ميت .. ميت

واتجدم له حمدان وهو لابس وزار وفانيله ووقف جدام فيصل : هاي اخرتها

فيصل : ...............

حمدان ماتحمل وتم يضرب فيصل من خاطره وفيصل مايسوي شي .. لنه يدري انه غلطان ... حمدان يوم شاف انه فيصل مايقاومه وكان ساكت والجرح اللي فيه اعظم .. قرر يخليه لكن عقب شوو طلع من ثمه دم واترضض .. غايه ماتحملت اتشوف فيصل ينضرب جدامها ركضت داخل وهي تدري انه ياينها الدور ..

حمدان عقب ماشبع من ضرب فيصل وقف فيصل نفس الطير الجريح جدامه : مشكور

حمدان ميود عمره : فيصل نش من جدامي مافيني ارتكب فيك جريمه

فيصل صاح جدام حمدان ويوده من ايده : دخيلك لاتاذيها انا السبب

حمدان دفر فيصل وسكر باب السكه وصيخه من تحت ومشى كالوحش الكاسر ... ودش على غايه وهي ميته من الصياح وقفل الباب .. وبعصبيه : انتي تعرفين شو سويتي

غايه لاجواب غير الدموع ........

حمدان : اتعرفين ولا ماتعرفين

غايه : بس .. خلااااااص

حمدان اتجدم لها وضربها ضرب اليهد ... وهو يضربها : سودتي ويهنا ... يالسباله

ويضربها اكثر .. وغايه تحس بالم الفراق اعظم واقوى من الم الضرب ...

حمدان وهو يضربها : تبيني اخبر ابويه .. هاااااا ( ويمطها من شعرها )

غايه تهز راسها لا ...

حمدان يضربها زود وزود .. : عيل ولد عمج بتاخذينه وانتي سباله ... سامعه وانتي شوو ؟

غايه تزاعج من الالم : سباااله

حمدان : وبنخلي كل شي يستوي بسرعه من نرد من السفر .... وانا تراني مابخبر ابويه ولا ااميه مب عشان سواد عيونج .. لانه اخاف عليهم يستوي بهم شي وينصدمون من سوات بنتهم الوحيده

وظهر عنها بس شل تيلفونها ولاب توبها عنها .. وسار عند تيلفون الصاله وشل الواير ودش حجرته وكسر لاب توبها ... وكسر موبايلها وظهر البطاقه وكسرها ... ومارام يرقد هاييج الليله .. لافيصل .. ولا حمدان ... ولا غايه ..

.................................................. .................................................. ............................................

الجهه الثانيه من الارض – النمسا –

حمد نش وهو مصحح .. وحاس بانتعاش .. وشاف اخته روضه تلبس مريامي وطاف وضرب روضه على راسها بس جي مال سوالف ..

حمد :ههههههه غريبه ماقلتي شي

روضه : مب فايجه

حمد : ههههه هبلا

مريامي وبلغتها الطفوليه : لوضه ..

روضه وهي تتأف ملت من مجابل اليهال : هااااه

مريامي : انا ما احب اختج كله تصيحني

حمد اونه معصب : وينها عنوود ؟؟ تبيني اضربها

مريامي وهي تزاعج : لاااااااا

حمد بنفس طريقتها : عييييييييل

مريامي : هاي اللي تمشي ويا روضه

حمد باستفسار .. : علايه ؟

مريامي : هيه هااي

روضه : ليش هاي ختاه ( اونه اختها ) ماتسوي شي

مريامي تصيح : ما احبها ..

وسمعو حد يدق ع الباب .. وكانت علايه لابسه جلابيه عاديه وشيلة الصلاه وشاله صحن فيه خبز خمير وطاسه فيها دبس .. وحمد فتح لها الباب .. وشاف بساطتها ... واتساند ع الباب وقرر يغلس عليها

حمد : خير فيه شي

علايه : كل خير ان شالله

حمد ابتسم على برود اعصابها .. : شو تبين؟؟

علايه ابتسمت : انا مب يايه اشحت .. دوك ها خبز خمير ودبس من صوب يدتي ..

ولفت بتروح ... جان تزقرها روضه ..

روضه : صبري ..

علايه صدت وابتسمت من خاطرها : هلا والله ( وبصوت واطي ) اخيرا استويتي ما تخافين من جامبو الجبار

حمد يطالعها وهي ترمس بصوت واطي ..

ويت روضه ويودت ايد علايه وصدت ع ورا وعيبت على حمد : يالله جابل مريوم انا بسير اقولها كلمة راس

حمد بعدم اهتمام : برايج

شويه ورد يصد عليها : لااااااااا ياويلج

روضه ركضت وسحبت ايد علايه ونزلت بسرعه وهي تضحك وتفكر شو بتكون ردة فعل اخوها ودشو غرفه مال الالعاب .

روضه سكرت الباب واتساندت عليه . وعلايه يلست ع كرسي مال طاولة المكعبات وتطالعها باستغراب

روضه : هههه بخبرج شي

علايه ابتسمت : خبريني اشياء مب شي

روضه : لا هو شي واحد امس عرفته بعد

علايه : اوكي قولي

روضه : اممم حمد اخويه نحن ضارين نسافر كل صيف بس هو يتعذرنا وها المره اتعذرنا في البدايه وعقب من عرف انكم انتو اللي بتسيرون عزم ويانا ... ( وهي تتحرك من مكانها وتيلس ع الكرسي مال المكعبات بعد ) وطبعا ها لشي كل حد استغرب منه ... وقلنا اكيد السالفه فيها " ان " .. لين ماكشف لي امس انه يحبج ... ومن زمان بعد ... تتخيلين انتي ها الشي .. حمد اخويه اللي كان يحب هايج لدرجة الخبال .. يحبج من قبلها واللحين يحس انه يحبج ..(وبنظره حالمه ) امممممم اتصدقين والله انه احسن له من هاذيج الله يغربلها غربلت حياتنا كلنا ..

علايه ابتسمت بالم وتذكرت كلام حمد البارحي وردت تحس بالتعب بالتدريج .. : بس حد اخوج خطب

روضه انصدمت ها الخبر يديد عليها واول مره تسمعه ومن علايه : شوووووووووو

علايه : هيه حمد اخوج خطب ..

روضه : كيف ؟؟ ومتى .. ؟؟ ومنووو ؟؟

علايه : اتوقع انها بنت عمج

روضه ماعندها الا ها البنت عم : غويه ؟؟؟ ( وانصدمت ) لاااااااااااا كيف جي ... و فـ ...

وع طول اتدراكت الموقف وسارت حضنت علايه : والله سووري ماكنت قاصده والله ماكنت ادري انه خطب بس كيف هو يقول لي امس انه يحبج وهو خطب غويه ..

علايه تبتسم على الجرح .. : كل شي جايز

روضه ردت تعتذر لعلايه واستسمحت منها وردت تركب لدري وحمد كان يترياها على اعصابه ويبا يعرف شو اخته خبصت

دشت روضه وعطته نظره ويلست ع الكرسي اللي مجابل التلفزوين وتمت تهز ريلها بعصبيه .. سار حمد ويلس وياها : انتي شو قلتي

روضه انفجرت : تخطب وماتخبرني

حمد نقع من الضحك : هههههههههههههههههههههههههههههه هيه

روضه : كيف امس تقول لي انك تحب علايه واتخطب ؟

حمد انصدم : رديتي تقولين لها اني احبها

روضه : شو افهم من كلمة رديتي هاي ؟؟ يعني انته جد مخبرنها من قبل

حمد نزل راسه وسار صوب البلكونه وبألم : هيه

روضه : شو كانت ردت فعلها ..

حمد : علايه مب لي وانتهينها

روضه اتجدمت له وحنت عليه : اتفكر في هاييج

حمد : روضه لازم ارمسج

وسحبها من ايدها ويلسو في البلكونه .. وشرح له قصته من بداية حبه لعلايه لنهاية امس ...

.................................................. .................................................. ............................................

الجهه الاخرى – الامارات – دبي

غايه في حجرتها ماظهرت ... كيف بتجابل اهلها ... وويها كله مشوه ... مرزق ومخضر .. ماشي الا انها تجذب وتقول انها طاحت من ع الدري فليل ... ولكن دموعها وحزنها هن اللي بيفضحنها ..

نزلت بشوي شوي .. وطافت جدام حجره حمدان ماحصلته وحصلت بقايا لاب توب وموبايل .. وحطت ايدها ع ثمها من الصدمه ماتوقعت نهاية ممتلكاتها الخاصه حطام ... وتمت تلم قطع بقايا الاب توب والموبايل وتصيح بألم ..

نشت من مكانها وطالعت من بلكونه حمدان انه سيارته ماشي يعني ظهر برع البيت ... واتذكرت الجيس اللي وطاه فيصل ونزلت تربع بسرعه وشافتها امها وانصدمت من ويهها وخبرتها غايه بحزن انها طاحت ع الدري فليل .. وطافت ع العيوز ..واترخصت اونها بتسير المطبخ اللي برع .. وسارت شلت الجيس وركضت حجرتها وقفلت الباب ..

فتحت الجيس الكبير وكان فيه هدايا غايه اللي يابتهن لفيصل .... وتمت اتطلع بوكس بوكس.. بحسره ... وتصيح بالم اكبر ...

اما عن فيصل فمن دش الحجره ماظهر منها خذ له بندول نايت ورقد رقاد وكل ماينش يرد ياخذ بندول نايت ... وعلى ها الحال لين فليل ... وباجر دوام ولازم ينش بس هووو شكله مب ناوي يداوم .. ومن غير يحس انه متكسر من الضرب اللي ياه ...

بيت غايه يالسه في حجرتها ولمت الاغراض وحطتهن مفرقات في الكبت وعلى اساس انه اغراضها وردت تتلحف وغمضت عينها وسمعت دق قوي ع الباب

نشت تفتحه ودش حمدان ويطالعها من فوق لين تحت ... : زهبي شنطتج جدمنا موعد الطياره وبيكون ورا باجر

غايه بهدوء وتهز راسها باستسلام : ان شالله

حمدان : ع فكره رمست ابويه انج موافقه ع حمد وقلت له العرس يكون من نرد من السفر يعني على اول شهر 9 انتي زاهبه ... وتقنيه انسي لانه بسحب اوراقج

غايه انصدمت

وظهر حمدان وتم الباب مفتوح وغايه تمت تطالع الممر وطافت امها وهي شاله وياها " ثمول " ... ويلست غايه بهدوء ع الشبريه ويلست امها اتحط لها ع مكان الرضات في جسمها ...

.................................................. .................................................. .........................................

الجهه الثانيه – النمسا –

علايه يالسه تتعدل لانه بيظهرون بيسيرون التلفريك ... فوق اليبل .. واليوم علايه لبست احمر لانه تموت ع اللون الاحمر ... ومالبست عباه اليوم لانه لابسه شي طويل ... وظهرت في الصاله

بو عليا : يلله ع الحمر

عليا : ههههههه غاوي صح

بو عليا : هيه ماشالله غاو ي

وميره اللي لابسه احمر بعد : ياسلام يعني انا بعد لابسه احمر ومحد قال لي شي

اليده : انتي بعدج ياهل ...

عليا يلست وياهم ويسولفون .. شويه وبو عليا يقول : علايه ترانا بنسير المانيا نوديج المستشفى

علايه زاغت : ليش ؟

بو عليا حط ايده ع جتفها وطلع يمشي وياها لين برع ..: عشان نطمن عليج بابا ..

علايه ابتسمت : اوكي

ونزلو تحت وحصلو عايله قوم بو حمد زاهبين .. ويت روضه صوب علايه . : ها اشوف الحمر يزقر من بعيد ..

علايه : هههههههههههه هيه على هواج

روضه تشوف فوق اليبل : الله بنعفد فوق

علايه : صخي يدتي ميته من الزيغه

روضه : ههههههه حليلها ...

علايه : عيل وين حمد ما اشوفه

روضه : علايه ؟

علايه : هممم

روضه : انتي صدق كنتي اتحبين واحد بدوي غير

علايه صدت بطريقه سريعه ع روضه وطالعتها بنظره ومشت عنها وهي تسب حمد في خاطرها " كله منك فضحتني ... كله منك ... (وتمشي بعصبيه ) وينك ياسعيد .. محتاجتنك .. والله محتاجتنك "

وياها حمود اخوها : عليووه اكوه مرحباا االسااع

علايه غصبا عنها ضحكت : وينووه ؟

حمود :ويا قوم ابويه ..

علايه تمت تطالع وهي قلبها ناغزنها انه ها ابو سعيد بس ماتشوف حد وياه .. وويوم صدت مالقت حمود اخوها ثره حمود سار له .. وتمت علايه تمشي ورا الحريم .. شوي ورد لها حمود

حمود : علايه ..

علايه وهي مصدعه : هاااه

حمود : مرحبا السااع اليوم بيسافر

علايه بحزن لانه خابت ظنونها ..: الله وياه

بس لاحظت في وجود مرحبا الساع ع قولة حمود اخوها.... يعني بطي اللي علايه حاسه بانه هو ابو سعيد ... حمد يختفي عن الساحه .. وماتشوفه ولاحظت هاك اليوم بعد انه حمد رجع ع ورا من شاف بطي ... وتمت الافكار تيبها وتوديها

روضه اتجدمت لعلايه وهي حاسه بالذنب : زعلانه

علايه وهي تكابر : لا عادي ..بس هاي حياتي الخاصه ومحد يروم يدخل فيها

روضه : انزين انا اسفه

علايه : لا عادي لا تتاسفين

روضه تبا تغير السالفه : قوم عمي بيون باجر

علايه : قصدج خطيبه حمد

روضه وهي مفتشله : ههيه

علايه بعدم اهتمام : زين ... زين

روضه : بس تعرفين احس انج بتحبين غايه

علايه : انا اصلا ما اكره حد

روضه وهي مصره اترد ع السالفه : وع كل اللي سواه حمد ماتكرهينه

علايه بعصبيه : روضه بس عاد انتي شو تبين توصلين له بالظبط . قلت لج اني ما اكره حد وخلاص

وتمت معصبه وها الشي ياثر عليها ... ومن وقفة الشمس .. سارت وسحبت شنطتها الصحيه وسارت بعيد شوي وسحبت الابره وبطلت عن ايدها .. ويايه بتضرب الابره وحمد لمحها وشافها وهي تتويع وعقب تمت تمسح ع مكان الابره وردت ايد البدي مالها .. حمد انصدم .. هي شو مشكلتها ؟؟

حمد مارام يتم على اعصابه ويشوفها وهي تتويع .. اتجدم لها : عليا

عليا بتعب : هلا

حمد : شو فيج

عليا : مايخصك

حمد : انا ارمسج ردي عليه

عليا : مافيني شي

حمد : بتقولين لي ولا لا ؟؟ وشو ها الابره

علايه ترد الابره مكانها وتسكر الشنطه اللي مليانه ادويه : مالك خص

حمد عصب : نفاد

وسارت تمشي عند قوم امها " هه اونه يحبني هذا أي حب خبرني ؟ حب بالضرابه جنه ؟ "

وركبو التلفريك وهن عباره عن تلفريك طويل مقسم 3 اقسام ولكل قسم باب القسم االاول احتلوه العرب واستوى زحمه .. وتمو مستانسين وهم يطالعون المناظر الغاويه من فوق وعلايه متجاهله حمد ..

وحمد بيموت وبيعرف علايه شو فيها ...

وصلو فوق وانتشرو في البقعه الغاويه وعلايه انشغلت بالتصوير .. وحمد تم يرمس في التيلفون وكان يرمس حمدان ولد عمه

حمد : ها تبوني باجر اييكم ..؟؟

حمدان : لا عادي مانبا نعبل عليك

حمد :لا عباله ولاشي كل شي عشان الخطيبه يهون

حمدان : هههههههههه يعني كل ها عشان خاطر غايوه ( وهو متحسر على حمد .. )

حمد : لازم نداري زوجة المستقبل

حمدان : دام انك مشتط جي شورايك اتعرسون قريب

حمد : كيف يعني

حمدان : يعني ع بداية الدوامات

حمد : بيكفيها تتزهب في شهر

حمدان : هيه بعد شو

حمد : بس انا احيد انه البنات يالله يالله يسدنهن 6 شهور لين مايتزهبن

حمدان : مب ع كيفها .

حمد استغرب من حمدان : اها والله انا ماعندي اخلاف شاور االعروس ..

حمدان : العروس ماعندها مانع

ودش حجرة غايه وهي يالسه ترتب اغراضها بهدوء

حمد : يعني تم

حمدان : تم امره

حمد : يالله بخبر ابويه

حمدان : ههههههههه مستعيل

حمد : امم شو نسوي يالله انته شد حيلك

حمدان : وين ياريال بعدنا مالقينا بنت الحلال

حمد : مكودات بس خل العيوز تشغل الرادار

حمدان : ههههههههههه ماعليه بنشوف نحن

حمد : عيل خلاص ولد العم نشوفك باجر

حمدان : على خير ان شالله

وبندو عن بعض .. وصد حمدان على غايه وخبرها .. وطبعا غايه ماتروم تحط عينها في عين اخوها واستوت هاديه اكثر من الللازم ... والالم يعصر قلبها .. ظهر حمدان ونشت وقفلت الباب ... وتمت تصيح .. كل يوم على ها الحال يا ساكته يا تصيح .. وفتحت سدتها الخاصه بالمفتاح وطلعت ظرف وفي الظرف صوره فيصل وحضنت الصوره وتمت تصيح من خاطرها " ماتم لي االا ها الصوره ... والله احبك ياروح غايه ... " ودست الصوره بين ثيابها ... وسكرت الشنطه ولازم اتسير واتخبر فيصل انها بتسافر .. وهي بتموت وتبا تتطمن عليه .. سارت كتبت رساله قصيره وايد بس عشان محد يجكها .. " هلا فيصل .. انا اسفه والله .. وتراني احبك والله وانا باجر مسافره لاتنساني ... " وربعت الستيكر الصغار وتمت تحوط في الحجره ومب عارفه شو تسوي اخوها في البيت ... سارت وزقرت الشغاله وقالت لها اعطيني تيلفونج ... وطرشت غايه مسج ع تيلفون فيصل انه بتطرش له ستيكر .. وها تيلفون الشغاله يعني لايرد يتصل عليه ولاشي وطمنته انها بخير ...

غايه : ميري ها وديه بيت ماما عايشه ..

ميري : انجين ..

غايه : اعطيه بابا فيصل .. قولي له هذا من عند بابا حمدان

ميري: انجين

وسارت ميري وحصلت ام فيصل يالسه وفيصل يالس يتريا الشغاله ودشت ميري

ميري : السلام عليكم

وردو السلام عليها ..

فيصل نش واتجدم لها

ميري : هذا من باابا همدان .. هق انتي ..

فيصل : سحب الورقه .. وقراها وتغير ويهه

فيصل معصب : متىى في سافر ؟

ميري : اليوم فجر

فيصل ضرب بايده ع اليدار ...

ام فيصل زاغت ع ولدها واتجدمت له : خير يابويه شو في الورقه

فيصل : ماشي ( وصد ع ميري ) ميري صبري شوي اوكي

وسار فيصل وكتب ورقه لغايه .. " احبج والله ياغويه ومستحيل انساج ... ليش يبون يبعدونج عني مب كفايه اني ماعرف اخبارج . ماروم اعاتب والوم ..بس اعرفي انه قلبي فيج مجنون .. "

وحطت الورقه في صندوق صغيروني وشكله مال كاكاو عشان محد يجك السالفه

ونزل بسرعه ع الدري وهو يطوف دريه . ودرتين .. وعطا الصندوق ميري ..

فيصل : هذا حق ماما غايه .. اوكي لاتعطينه حد ثاني معلوم

ميري بصوتها لمزعج : ايوه معلوم هدا هق ماما كايه ...

فيصل : هيه زين يالله توكلي

وظهرت ميري وقبضته امه .. : يا فيصل شو فيك يامايه وانته من 3 ايام مب ع بعضك

فيصل : تعبانه يامايه

ام فيصل : وليش ماداومت اليوم

فيصل : حتى باجر مابدوام ..

ام فيصل : وليش ؟

فيصل : يامايه قلت لج تعبان خلاص

ام فيصل : عشان بنت فاطمه ردتك جانك تبانا نخطب لك من باجر امره بنخطب

فيصل صد ع امه : عرس مابعرس ارتحتوو

وشل سويجه وطلع برع بالسياره وهو يحوط وفيه ضيجه ... فيصل اتعود وجود غايه في حياته دوم من يوم هم صغار وغايه هي ملازمه فيصل ... حلاة فيصل غطت على حلاة غايه لانه فيصل وسيم من الخاطر ... ولكن اطباع غايه خلت فيصل يحبها .. وكبرو ويا بعض وحبو بعض ..

ام فيصل تمت مستهمه على ولدها وخاصه انها سمعته يقول للشغاله اعطيه ماما غايه ... وسفر .. وما سفر .. تمت تحاتيه ويالسه على اعصابها وسارت تتصل حق بنتها موزه .( معرسه وماخذه ولد خالتها )

ام فيصل : الوو السلام عليج

موزه : وعليكم السلام .. هلا امايه

ام فيصل : شحالج

موزه : بخيير الحمدلله وانتي ؟

ام فيصل : بخيير

موزه : خير اميه بلاه صوتج

ام فيصل استغبت : اخوج ياميه من يوم ردوه قوم الـ ... وهو متغير وتم شكله ذاوي .. فيه شي الولد استوى مب صاحي

موزه : اميه تراه شي مب هين وكلنا نعرف انه فيصل كان يحب غويه لكن ولد عمها الله يهداه

ام فيصل : اتصلي له بارك الله ورمسيه وعقليه

موزه : انا بعقله .. فيصل عاقل ويعرف اللي يسويه

ام فيصل : لالا انتي بعدج رمسيه

موزه : ان شالله ..

.................................................. .................................................. ........................................

عليا كانت يالسه وتشخبط في ورقه من الملل عندهم 12 الا عشر ... وطبعا كل الناس رقوود .. حطت قطعة الواير لس وحاولت تشبك وماطاع يستوي ...

ظهرت هي والاب توب وطبعا المكان ظلام ... وتتريا انه يشبك بس ماشي فايده ... وطلعت برع الفندق .. ماشي ارسال ... وتمت متاففه ويلست في نص الشارع ... وحطت الاب توب جدامها وتربعت تحت وحطت ايدها ع خدها وتترياه يلقط ارسال .. عشان تشبك بالنت ...

وسمعت صوت من البلكونه وكانت روضه ... : عليووووه يالساحره

علايه تضحك : هههههههه ابا القط ارسال ابا ادش النت

روضه : رمسي مارتن ؟؟؟ بس مب اتمين جي بسم الله والله اول شي اتحسبتج وحده من قوم بو حرفين ( اونه تقصد الجن )

علايه : رويض والحل ؟

روضه : تعالي حجرتنا يالسين رواحنا

علايه : وين اخوج ؟

روضه : امم من ظهر مارد لين اللحين

علايه : اوكي بيي

ويايه بتنش وكان اصلا حمد واقف وراها وهي ماتدريبه ... وشلت الاب توب جان يتقرب حمد من اذنها ويزااعج ... علايه قفزت ومن الزيغه شلت الاب توب وضربته ع ايده

علايه انتبهت انه حمد : اوييييييييييه انته

حمد يهوس على ايده : خييييييييييييبه جونقر مب علايه

علايه : حد قالك تسوي جي تستاهل

حمد : بخبر حرمتي سويتي لي " واوا "

علايه بصوت واطي : ياشين الدلع عليك

حمد عرف انها تتحرطم : نعم

علايه : ها لاماشي

حمد : وشو ميلسنج في نص الطريج لوتي سياره وتدوسج

علايه : انته شو يعورك

حمد يقلدها : انته شو يعورك ..

علايه : اتوكل انزين

حمد : انتي شو تسوين هني ؟

علايه : ابا اشبك بالنت

حمد : لقط ؟
علايه : للاسف لا

حمد يودها من ايدها ويلسها في الطريج . : ايلسي عيل خلينا نخبص

علايه تمت تشوفه وتبغي تحسسه انه اللي سواه غلط يوم قبضها من ايدها ..

وروضه تشوفهم من البلكونه وحاطه ايدها ع خدها وتطالعهم ..

حمد : وانتي شو تشوفين يالله دشي داخل

علايه مطت الاب توب عنه : وانا بعد بدش داخل

حمد مط الاب توب من الصوب الثاني : ايلسي لااه خلج ويايه

علايه اونه عصبت : حمد

حمد يبتسم : عيونه

علايه استحت : عيب عيب ..

حمد : هههههههه اتدرب حق المدام

علايه ابتسمت وهي تحس انها مب فاهمه لها الحمد : زين

حمد : لو طلبت منج شي بتسوينه

علايه تفكر : ممم حسب

حمد : اابا عصير برتقال سيري هاتي لي

علايه : اوكي بس عقب بدش داخل

حمد : اوكي ....تم

مشت علايه وهي تتحرطم ع حمد .. وحمد ع طول قام ينبش في لاب توبها وعاد لاب توب علايه معفس ع سطح المكتب مليون شي .. وفي المستندات صور وحاله .. وفتح الصور وانصدم بعلايه في الصور ... كانت ملكة جمال شويه عليها .. تم يطالع الصور وهو كل ماتطوف صوره يفتح ثمه من حلاتها تامه جنها عروسه مال اليهال من حلاتها .. بس لفتت نظره صوره كانت يالسه ولابسه بدي بني كت وفاله شعرها .. وقصتها القصيره نازله ع عيونها وشعرها قاصتنه مدرج ومسشور ع برع ع طوله .. وواحد يالس وياها وشكله المكان في شقه وياكلها كيك .. دقق حمد في الملامح وع طول يا بباله سعيد ..... ومن الغصه سكر لاب توبها بقوه ويوم يت علايه وهي شاله الكوب نش حمد من ع المكان وشل عنها القلاص مال العصير ....

حمد بعصبيه : لانج انتي اللي يايبتنه جزيت من العصير ... ( وشل العصير من ايدها وفر القلاص ع الارض .. وانكسر الزجاج وتناثر العصير .. )

علايه تامه مبتهته ومنصدمه من تصرف حمد الغريب ... ومشى عنها حمد في الظلام وروضه وهي متروعه من تصرف حمد تامه متنحه وتطالع ...

علايه زاعجت باعلى صوتها ونبرة صوتها ممزوجه بالالم ويبين انها بتصيح .. : انته صدق انك مب صاحي ومينوون .. اكرهك حمد اكرهك ...

ونزلت وشلت الاب توب بعصبيه ...

حمد وقف ويشوفها وهي اتطوف حذاله ولاحظ عصبيتها ودموعها اللي كانت تمسحها بيدها ... وصورتها ويا ها الواحد تتراوى له ومستنكر على علايه ها الشي .. صح انه انصدم انها تحب .. وكان يعتبرها ملاك بس انها تلتقي بسعيد في شقه ها الشي الوحيد اللي مخه عجز انه يتخيله .....قلبه عوره ع عمره اللي قضاه يحب فيه علايه ... واخر شي تطلع جي ...

دشت علايه وهي تصيح ونشت اليده وتمت تقرى عليها وع بالها اليده انه علايه تعبت عنثر المرض ...لين ماغفت عينها ..

.................................................. .................................................. ............................................

الامارات – فجر مدينة دبي –

غايه ماتنهت في رقاد كانت كله تحلم كوابيس ... صلت الفجر وتمت تدعي ربها انه تتغلب ع محنتها وترد ولد عمها حتى لو ماتاخذ فيصل بس اهم شي انها ماتاخذ حمد .... فتح حمدان الباب وشافها ع السياده تدعي وتصيح

قلبه عوره .. وخاف انه لو تم اكثر يحن عليها ... رجع حجرته وهو يفكر انه يخلي عرسهم اقرب من جي لانه قام يحس انه هم اخته مثل الطوق .. مب رايم يتهنى في رقاد ولا اكل ... وباله دوم مشغول عليها ... وقرر انه تتزهب اخته من هناك وكل شي يكون على حساب حمدان ومن يردون يسون لهم العرس وحمدان عليه كل شي .. المهم من يردون من السفر تعرس وتسير ببيت ريلها ...........

غايه خصلت من صلاتها ونشت وتلبست وظهرت في الحوي بتسير تعطي الشغاله شيلتها وعباتها عشان تكويها ... وكان فيصل يالس يفكر فيها ويدوخ فوق البيت .. هو من متى مودر دواخه عشان غايه واللحين رد لها من يوم استوت السالفه .... تم يطالع غايه وعيونها ولمعة الحزن اللي فيها وكانت ترمس الشغاله بهدوء وفجأه وجنه حد نبها وقالها صدي فوق ...

صدت غايه وابتسمت ونزلت دموعها غصبا عنها ... فيصل من انتبهت له غايه تم يطالعها وقالها بحركة الشفايف .. " احبج لاتنسيني .. "

غايه نزلت راسها وحطت ايدها ع ثمها تكتم شهقتها .. ودشت داخل ... فيصل رد اتساند ع اليدار وهو يفكر فيها وبيموت بيسوي أي شي بس عشان يكسب حب حياته له ....

دشت غايه الحجره وتمت تتنفس بسرعه ... ودشت الحمام تمسح دموعها واتعوذت من الشيطان ودشت الشغاله وحطت عباتها وشيلتها ... وسارت تحط ميكب خفيف يعني خط جحال مايبين ... وبودره خفيفه وقلوس شفاف ..

دشت ام حمدان عليها

ام حمدان : ها غويه انقفضتي

غايه : هيه خلاص

ام حمدان : توه اخوج يرمسنا ويقول انج مستعيله وتبين العرس من نرد وماعندج اخلاف صدق ها الكلام

غايه اتفاجات من تصرف حمدان المتهور ... ويايه بتقول " لا"

بس شافت حمدان متساند ع الباب ورا امها ويطالعها بنظرات جنه يقول لها " ياويلج "

وتمت غايه ساكته فتره وهي متردده ... لكن تحت ضغط نظرات اخوها .. قالت بصوت واطي : انا ماعندي اخلاف اللي تبونه سووه

ام حمدان عورها قلبها ع بنتها الوحيده : لا اللي انتي تبينه بيستوي ..

حمدان بنبره عصبيه : لا البنت ماعندها شور .. وتقبض سيدها قيدها .. نحن اهلها نحن ادرى بمصلحتها وانا اشوف انه العرس من ني وايد احسن لها .. واعتبرو عرس غايه هديه مني لها ...

غايه كظمت غيضها تصرف اخوها يخليها تفقد اعصابها .. : لا ليش نستعيل

ام حمدان : هيه ماله داعي العيله

حمدان : يوم الرياييل يرمسون البنت ماتتكلم .. وانا حمد خبرته وهو موافق ويبا العرس اليوم قبل باجر

وظهرعنهم وهو محمق على غايه من الخاطر ... " كيف خدعتينا بطيبج .. كيف ياختي يا بنت امي وابويه ... وليش ... انتي غايه اللي مانتوقع منج الزله يطلع كل ها منج .. ياحسافه .. "

وشويه وركبو كلهم السياره وتوجهو لمطار دبي الى ميونيخ ....

.................................................. .................................................. ............................................

اليده نشت الصبح ويودت بو عليا

اليده : تراها بنتك دوم اسمعها تصيح فليل ... ودها الدختر طالعها شو منه تشكي ؟

بو محمد : ليش ؟ هي قالت لج شي

اليده : ويده انته ماتطالع ويها مصفر وكل يوم فليل تتويع .. وتصيح .. اكيد فيها شي

بو محمد : ان شالله بنوديها المانيا وبنطالعها

اليده : هي احسن والله انه فواديه ينقبض من اسمع صياحها..

بو محمد غمضته بنته ..ودشت عليهم عليا بابتسامه اتعودت عليها .. ودشت عقب ام محمد ويلسو يتريقون ...

عليا : ها ابويه اليوم وين بنسير ؟ نبا مكان بعيد وحلو

بو محمد : بنوديكم ان شالله " زا لامسي "

علايه : امم هيه اوكي ...

وسارت تتلبس بس ها المره لبست عباتها المسكره وتحتها البنطلون وحطت ميكب خفيف يناسبها وحطت أي شدو تركوازي .. وقلوس وردي وطلعت ناعمه وايد .. ويالسه اتدور في الاكسسوارات ولقت خاتم فيه فصوص تركوازيه يلتف بشكل حلزوني غريب .. وها الخاتم هديه من فطيم ...

وطلعت علايه الصاله

ام محمد : عليا تعالي امايه شلي ريم واظهرو خاري

عليا :ان شالله ..

ميره : علايه اليوم انتي حلوه

عليا استانست وصدت على امها ..: واخيرا حد مدحني اعترفوو .. اني جميله ..

ام محمد : هههههه انزين منو قال انج خسفه

علايه تفكر : امممممممم محد

ام محمد : عيل خلاص اظهري انتي وخواتج انا بقفل البيبان وبلحقكم .. ميره شلي شنطة اختج

وطلعت علايه واختها وهن يسولفن سوالف عاديه .. ومن ظهرت لقت ابوها ويدتها وبو حمد وحمد وام حمد يسولفون .. ومن طلعت علايه كلهم صدو صوبها

بو محمد زقرها : تعالي عليا

علايه اتجدمت وهي متعمده انها تطالعهم كلهم الا حمد وحمد ماشل عينه عنها

بوحمد : ها علايه بتسيرين اليوم

علايه تضحك : هههههههه عيل شو بتخلوني بروحي

بو حمد : بنخليج ويا حمد تحرسون لين مايوصلون قوم حارب " ابو حمدان "

علايه : الصراحه ماروم اطوف " زا لامسي "

حمد بعناد : ولا انا اروم اطوف " زا لامسي .. "

هني صدت عليه علايه وطالعها حمد بنظره احتقار ..

علايه تغير السالفه : متى بنسير

بو محمد : اللحين خل تي امج

اليده ترمس بو حمد : ترانا نحن بنخطف ع الدار الجريبه من ها البلاد بنودي عليا نطالعها في الدختر

بو حمد باهتمام : ليش عسى ماشر

علايه تطالع ابوها بترجي انه مايخبرهم ... وابوها فهم نظراتها .. : لاماشي هي دوم تصيح من راسها يعورها وقلنا بنخطف بنكشف عليها

ام حمدان حست انه فيه شي : فديتج الله يعافيج امايه

ويت روضه من بعيد وهي ميوده رفوع من ايدها .. وعنود ميود مريامي ..

روضه : يالللللله نبا نسير تعبت من ها البلاوي

كلهم ضحكو لانه شكلها صدق متلعوزه

ركبو كلهم السيايير وانطلقووحمد متلعوز من امس مارقد والسبه صورة علايه.. ويت بباله فكره انه يخبر بو عليا ع علايه واللي فيها فيها .... بس تراجع لانه يحس انه هو بعد غلط وتم محتار قلبه مشتعل نار ... ومب متخيل لين اللحين انه علايه تطلع من ها النوع ...

وعقب انشغل وهو يفكر في غايه اللي ماشافها من زمان بس يتذكر انها حليوه وطيوبه وكيف بتكون حياتهم ويابعض وخاصه انه حمد ساعات يحس انه يكن لعليا اعظم درجات الحب .... وساعات يحس بالاحتقار

لين ماوصلو المدينه وكانت ها المدينه فيها عرب اكثر وتمو واقفين عند بحيرة البط وفيها قوارب والمكان حلو وايد ... يلست علايه ويا اليهال وتفر الخبز للبط وهي مستانسه وعقب يوم شافتهم مطولين شلت الام بي 3 ويلست تسمع اغاني وتمشي ع الممشى وهي تتذكر سعيد

" ااااه كيف احبك ... طافن عليه 9 شهوور من اخر مره رمستك فيها ... ليش كرهتني في الفتره االاخيره ... اكيد حمد .. هو السبب .. ( دمعت ) ياربييه والحادث اللي سمعت انه سواه طلع صدق .. والمجرم جدامي ... ااخ ماروم اسوي شي ... سعيد بعادك حطمني ... غيابك صعب .. واالاصعب وجودك واناا في الحالتين اتعب واعاني ... تركني بدون سبب .. اهم شي اني وفيت لك ياغناتي ... ( رفعت راسها للسما ؟) اذكرني ياروحي .. ولو دقيقه .. "

قطع تفكيرها صوت جلب ينبح عليها جان تركب ع الحد مال البحيره وهي ميته من الزيغه والعيوز اللي كانت ويا الجلب تضحك عليها

علايه تسوي بايدها حركه انه حوشيه :goo,,,

وطاف واحد اجنبي .. ومد ايده انه بينزل عليا من فوق وعليا ميته من الزيغه ... وبتقول بصوت عالي : الله يغربلكم يالجلاب شو تبون بي ؟؟؟ نشوو عني .. زين جي مفضحيني

الولد : انتي من الامارات

علايه شكلت : هااااااه

الولد : ههههههههههههههههههههههههههههههههههه

علايه : اييييييه بصييييييييييح

الولد : انزين انزلي مابيسوي شي جربي

علايه تطالعه : ع ضمانتك

الولد ميت من الضحك .: هيه اعطيج السيفتي من عندي

علايه يايه بتحط ريلها نبح اكثر ... وردت مكانها بسرعه وماتوازنت وكانت بتطيح في البحيره ع وراها جان يسحبها الولد من عباتها لين ماتجدمت ع جدام وطاحت ع الولد .................

يخررررررررررب بييييييييييييت الفشله

علايه يوم استوعبت السالفه والجلب تم يشمها نشت بسرعه ع حيلها والولد ميت من الضحك ودمعت عينه من الضحك : هههههههههههههههههههههههههههههههه وربي تحفه ...

ويا حمد من شافها اتكودت وخاطره يضحك بس عصب لانه طاحت ويا الولد ... ومن شافت حمد ركضت واندست وراه والجلب وراها .. وكل ما ايي الجلب من صوب يبا اييها هي تدز حمد .. وحمد كان مفول من العصبيه بس يوم شافها اتحركه ع كيفها تم ميت من الضحك .. يحس انها لعبت به...

حوشه حمد ويته العيوز تستمح من حمد وقالت له انه الجلب لفته السلاسل اللي نازله من شنطة البنت .. جان تفصخ السلاسل من الشنطه وحطتهن في ايد حمد عشان يناولهن الجلب

علايه : امره خذ كل شي بس خلني دخيلك

حمد : عليوه بس خلاص ساروو

وصد عليها ... وهي بسها انتهت ايدها ترتجف من الزيغه حمد طالع ايدها واستغرب رجفة ايدها

حمد : شو هااااا

علايه : شوو

حمد تقرب منها وايد وبصوت واطي : ايدج

علايه : شو

حمد : طالعي كيف ترتجف ...

علايه : من الزيغه والله ( وتنهدت براحه )

حمد كان قريب منها وايد وبهمس : فديتج

علايه هني حست بشي غلط يستوي وانتبهت للمجرم واقف جدامها وبعصبيه : ان قلت ها الكلام مره ثانيه ياويلك

حمد يصفر : اها مفهوم سيدي

علايه تبا تاخذ بقضا سعيد وقضاها من حمد بس مب عارفه كيف بس اتذكرت بحزن " سعيد مايباني ليش ادافع عنه ؟؟ بس انا احبه ....ولكنه اعترف انه مستحيل ياخذني ........... بس ... لازم انساه ... "

عدى ها اليوم حلو ع الكل باستثناء حمد اللي يخطط لكشف حقيقة علايه ويبا يوصل ل لاب توبها بشتى الطرق

.................................................. .................................................. ............................................

ارض النمسا ..

وصلت عايلة بوحمدان وغايه الالم يحاصرها ... تعبت وايد ها الكمن يوم ... امها حست بشي مستوي ..بس سكتت .. وصلو نفس الفندق اللي ساكنين فيه قوم بو حمد ونزل حمدان االاغراض ... وحمد كان واقف برع ويترياهم .. وكان الوقت ع المغرب عندهم .. كانت غايه ورا السياره تنزل شنطه متوسطه وتمشي لين داخل حمد من شافها ارتاح لها وسلم ع حمدان وعمه ومرت عمه وعقب سار صوب غايه

حمد : هلا غايه

غايه كارهتنه وحاسه ودها تذبحه : اهلين

حمد مد ايده : هاتي بشل عنج

غايه : لا مب مشكله مب ثجيله

حمد : ترديني

غايه طالعته وحست انها حنت له شويه : لا

حمد استانس : عيل هاتي

وشل عنها الشنطه ونزلت لهم روضه .... ومن شافت روضه غايه استانست .. لكن غايه من شافت روضه فجت مناحه كلهم استغربو ها الشيي باستنثاء حمدان اللي كان حاس انه عشان فيصل وتم يطالعها بغضب

روضه دخلت غايه حجرتهم وسكرت الباب وهي حاسه بشي.... صياح غايه مب طبيعي :بسم الله عليج غويه شوو مستوي

غايه تشاهق : هــ ...هـــ ددددـــمووو حيي.....ااااا..تييييييي

روضه غمضتها ولمت غايه في حظنها وانفتح الباب ودشت رفوع الصغيرونه ويلست في ثبان روضه وتطالع غايه بخوف من صياحها ..

غايه : حمدان دمرني وبعدني عن فيصل .. عرف اني احب فيصل ويحبني عشان جي يبا ايوزني حمد..

روضه انصدمت : اووووووووونه متى استوى ها كله ...

غايه خبرت روضه السالفه ... بس كان فيه طرف ثالث يسمعهم ومصدوم .. __DEFINE_LIKE_SHARE__

قلب حاير · 03-05-2008, 12:24 AM

ثانكس ع االبارت الحلو ونتريا التكمله __DEFINE_LIKE_SHARE__

هيمـان يالمنصوري · 03-06-2008, 05:03 PM

تسلمين على الرد

ولاهنتي __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
الفقع والفياض الغنا .........................؟	محروم.كوم	منتدى أخبار المواقع والمنتديات العربية والأجنبية	0	02-21-2010 10:30 PM
شتات العنا روجيه فيت ليجندري	jnoon	اغاني , شلات , هبان	0	06-14-2009 10:07 AM
اه العنا - محمد المزروعي	@ العامري @	نغمــات للهــواتف	29	07-10-2008 08:58 AM
اهـ العنا بيـ طاليــ....	@ العامري @	تصاميم الاعضاء	35	05-23-2008 02:58 PM
راشد الماجد_اه العنا	عسوولة ترتووب	المواضيع المكرره	4	05-15-2008 07:38 PM