[العنا وش هو العنا .. غير أنتيـﮯ وجروحك وأنـا ! ] - الصفحة 13

احلــ بنوته ــــى · 03-13-2008, 01:10 PM

[B]نتريا التكمله[/B] __DEFINE_LIKE_SHARE__

سحــر الغــرام.. · 03-13-2008, 04:01 PM

الســــــــــــــــــــــــــــــــــــــــــلاااا اام علييكـــــــــــــــــــــــــــــــــــــــــــــ ــــــم..

مشكور اخوي المنصوري ع القصه الرووعـــــه ..

بصرااااحه القصه وااااااااااااااايـــــــــــــــــــد حلووه..
ومن كثر ما هي عايبتني كل شوي اقراها من اول ...... ""متفيييييييييجـــــــه""

يالله لا اتطول علينا نبي التكمله بسرررررررررعه

"ثانكس حياتو"..

سحـــــــــر الغـــــــرام..
__DEFINE_LIKE_SHARE__

galby_usoonk · 03-13-2008, 04:52 PM

تسلمـ اخويـ ع ها القصة الطر ونترقب البارات اليايه ان شاء الله __DEFINE_LIKE_SHARE__

هيمـان يالمنصوري · 03-13-2008, 05:38 PM

اسمحولي لاني طوووووووولت علييييييكمــ

ولعيوونكم.. ها البارت ........

مع خالص احتقاري محبوبتك [ لعام 2007 ] .. الجزء الثامن

سعيد خلى لعكاز ع الارض واخر ما توقعه شوفت علايه .. وصد الصوب الثاني ..: قم عبود روحنا ..

وتم يمشي وهو يعري وعبود انصدم لانه مشى سعيد بدون عكاز وهو تقريبا من 3 شهور الا يتعالج علاج طبيعي من عقب الحادث ...

علايه وهي تصيح بصوت اعلى ..وتقول من بين دموعها ..: نامت عيونك ياخلي البال وانا عيوني ماغفت والله .. بايت وبي هم وبي ولوال .. من ظلم ناس ما تخاف الله

سعيد من قالت بداية كلامها وقف بس تام عاطنها ظهره وعبود تام متنح يطالع علايه اللي تصيح وتقول بيت الشعر وبين سعيد اللي عق العكاز وقام يمشي بروحه ..

علايه بالم وهي تتذكر حبها الوحيد وكيف عانت من عقبه :

وان جيت تسال كيف صار الحال .. حالي عدم من من بد خلق الله

من زود حبن صار لي غربال .. يامن يعين القلب يا اهل الله

خلي رحل والحب بي ما ازال ... ياكيف انسى ياعباد الله

دمعي على فرقاه ابد همال .. انوي الفراق وقال لي يالله

وعقب نزلت راسها وتمت تصيح بهدووء ... وكل حد سكت ... سعيد من حس بالهدوء وقالها بصوت مجروح

سعيد قالها بيت شعر كان دوم يقولها اياه : حب الغوامي دعاني مولعن وانوح .. وابجي ودمعي على الخدين نضاحي .. شيبني الشاب عقلي وزادت الجروح ..ياصاح مادري متى من الهم برتاحي ؟

(( لها ذكرى عزيزه ع قلبي ها القصيده ))

سعيد ماتحمل يشوفها جدامه وكمل كلامه جان يقوول : ياشوق روح بعيد لبعيد ياشوق .. روح وتناسى ودك اللي نساني

علايه تمت تصيح بهدوء : يامن عطيته حب ماطاقه الشوق .. روحي وعمري وليتني بعمر ثاني ويامن سقاني السم في فرحة الشوق .. ويامن وفيته وللاسف ما اوفاني ... حسبي على عشقن تمناك ياشوق .. عمري عذاب وفرحتي به ثواني .. بعت الامل ياشوق . خلاص ياشوق انسى وتناسى ود مايعود ثاني

سعيد اللي يالس يشوفه ويسمعه فوق طاقته رفع عينه وطالعها بنظراته وجنها يودعها بنظراته اصلا هو مول ماكان حاط بباله ها الموقف وانه ممكن يلتقي بعلايه مره ثانيه في حياته ...بس الدنيا دوراه ... وقال لها ... والم الفراق يعذبه هو اكثر مما يعذبها لانه هو السبب ... :

واللحين روح بعيد ولبعيد ياشوق .. يعلك سعيد وطول عمرك تهاني ...

ورد يقول وهو يمشي للباب .. : ودعتكم وياليت ما كان .. يوم الوداع القلب ممحون ... وتسالني ويش الذي كان ..؟؟ لي مفارق احبابه وش يكون ؟؟

ومشى وهو يعري ... وصوته يبين انه بيصيح : عبود قم روحنا

عبود منصدم من اللي يستوي وسعيد كمل دربه .. وعلايه هني انتهت .. خلاااص ...

عبود يتقرب صوبها : انتي علايه حبيبة سعوود

علايه رفعت عيونها وهي محمره وخشمها احمر ..: هيه .. وانته عبود ... ايش ايش

عبود يتذكر سالفة ايش ايش .. : هههههههه هيه انا

علايه : فرصه سعيده انا بسير

ومشت جدامه ... وهي مب متحمله اللي استوىىى وعبود شل عكاز سعيد وركض عندها ..

عبود : علايه ممكن اتدشين المسن برمسج شويه

علايه وهي تصيح : كيف

عبود : بدش بايميل سعوود اوكي وانتي دشي دخيلج برمسج

علايه تتجدمه : على الله ...

وطلعت وحصلت حمد واقف ويا سعيد ...وطلع عبود

سعيد يحاول يتدارك الالم .. ورمس حمد : ياريالل وينك ..؟؟ مب دعمتني وجسحتني وماقمت تسال ولاتنشد

حمد عاطي ظهره للباب ويدوخ : اسمحلنا والله هاك اليوم ظلام وماريتك وانته تمشي ( مب جنه متعمد )

سعيد : يالله هانت بس تراني بتم اعري على طوول .. لانه الركبه تعبت

علايه سمعته وشهقت من الصياح ... ومشت شويه وطلع ابوها وراها ..

بو محمد : علايه

من زقرها كلهم صدو صوبها حمد وسعيد وعبود .. واتجدم لها بو محمد

بو محمد زايغ عليها كانت بتموت من الصياح ومن غير ايدها اللي معلقتنها .. ويبهتها فيها يرح هني حمد زاغ ..

بو محمد ميت من الزيغه : شو استوى لج ؟؟؟

علايه تصيح : طحت من ع الدري وانته تعرفني انا كيف اندبغ

بو محمد : الله يهدااج يا عليا شو ماتشوفين

هني حمد ارتاح ....وعبود فول وخاطره يضرب حمد ... ويضربها بعد لانها ماقالت الصدق ... وسعيد مايبا يشوفها مايبا يتذكرها

علايه تمت تصيح وسارت وحضنت ابوها وتمت تطالع سعيد .. سعيد عوره قلبه من الخاطر صد الصوب الثاني وتم يصيح من الخاطر ومشى عنهم وهو يعري .. وحمد شافه وابتسم " احسن تستاهل ... يعلكم بزياده انته وعلايه ها اللي كنت ااابا اوصله .."

عبود شاف بطي ابو سعيد ياي صوبهم وع طول حمد لف الصوب الثاني وتم يشمي بسرعه ومايبا يتجابل ويا ابو سعيد " افففففففف وانته يالشيبه المخرف شو يايبنك " ؟
واتجدم لبو محمد وبعد بو محمد علايه من حظنه وسلم عليه

بطي : هاا ما من شر نشوفكم هني

بو محمد : خير ان شالله ياين نسوي فحوصات للوالده ولعليا فيها السكري

صد بطي على عليا اللي تصيح بصوت واطي وميوده ايدها اللي متعوره وغمضته : الله يعافيها ان شالله .. وشو فيها تصيح وايدها متعوره

ببو محمد : امم هيه الله يهداها دوم تنجلب ومانتبهت للدري وطاحت

بطي : لاحووول طيحة العود مشكله .. يالله اجر وعافيه ان شالله اتحملي على عمرج يابويه

بو محمد : وانتو شو عندكم هني .. ؟؟

بطي : ولدنا هني من 3 شهور يتعالج

بو محمد : حليله الله يعافيه ان شالله

بطي يزقر سعيد اللي كان يدمع وعاطنهم ظهره ..

بطي : ابويه سعيد تعال

سعيد صد وع طول عينه التقت بعلايه اللي تطالعه من الصبح .. واتجدم وهو يعري .. وشافه ابوه بليا عكااز واستانس ....

بطي : سعوووود تروم تمشي بليا عكااز

سعيد يحاول مايبين انه يصيح : هيه يابويه توه الا اكتشفت ها الشي ...

عبود : هيه الا توه

بطي مستانس : الحمدلله ع سلامتك .. ياوليدي ...

سعيد وصل لهم وسلم على ابو محمد وع طول صد صوب علايه اللي تمت تصيح من خاطرها .. وسعيد قلبه عوره

سعيد مب متحمل يشوف علايه جي " فديتج والله ياعليوه ... يالسباله اتولهت عليج بس مجبور والله مجبوور .. لا اتمين اتصيحين بس عاااد ... احس اني نذل لاني خليتج .. بس انا مب باييدي شي امايه مستحيل توافق ... ولا ابويه ... "

علايه هني مارامت تتحمل وتمت تتذكر مواقف يوم حمد يعترف لها بكل شي .. ويوم غايه تتنذل فيها .. ويوم حمد يعق عليها كلام ويضربها ضرب اليهد ....... واليوم يوم شافت سعيد ... وفجاه دوخت وطاحت عليهم

شلها بو محمد وركض بها داخل .....

وكشف عليها الدكتور واللي توقعه الدكتور طلع صح .. علايه اتعرضت لنوبة السكري وتحتاج انها اتم تحت الملاحظه عندهم ...

بو محمد حزين ع حال بنته : لاحول ولا قوة الا بالله ...

بطي كان واقف وياه : لاتخاف يا ريال ان شالله بتنش بالسلامه

بو محمد : ان شالله

بطي : سير انته الفندق ارتاح مابتنش هي اللحين

بو محمد : بسير اخبر امها

بطي : ورودو لها اخلاف ..

سعيد تم برع وماحب يدش ويشوف علايه وهي بها الحاله ....

عبود تم واقف وياه : مسكينه ماتستاهل

سعيد : انا مالي خص

عبود طالعه :وحد قالك انته شي

سعيد : لا مب جي

عبود :اممم هي شكلها اتحبك وايد

سعيد يتهند : ياريال خلها على الله

عبود : والله غامضتني ..بس ها اللي اسمه حمد موول ما ارتحت له

سعيد : شو تبااه

عبود :قاهرني ياريال

سعيد مشى عنه وهو يعري ويسير لفندقهم اللي كان قريب من المستشفى ولكن فندق قوم علايه يسيرون له لازم بالسياره ..

من عرفو اهل قوم عليا بانه علايه في المستشفى تمت امها اتصيح وسارت لها ع الطول واتمزر المستشفى ... كانت ام محمد وام حمد وام حمدان وغايه وروضه وبو محمد وبو حمد وحمد وحمود اخوها واليده ..... لكن حمدان وبو حمدان تمو عند اليهال في الفندق .....

ام محمد تصيح .... واليده تدعيلها ... ويالسين الحريم يسولفون في سوالف عاديه في الاستراحه يقضون الوقت اللي يخطف بطيء وايد في المستشفى لكن الدكتور قالهم ماشي فايده من يلستهم لانها بتم تحت الملاحظه تقريبا لمة 48 ساعه يعني يومين .... فكلهم اترخصو لانه يلستهم مامنها فايده ..

الساعه 3ونص – فجر ميونيخ –

في الشقه يالس سعيد يطالع المنظر من البلكونه ويفكر في علايه ... حس بايد ع جتفه وكان ابوه .. وصد وراه يطالعه ويبتسمله ابتسامه باهته

بطي : شو فيك يابويه

سعيد يطالع للمدى البعيد : تعبان شويه

بطي : شو يعورك

سعيد : اممم ماشي

بطي : شو ماشي وتوك اتقول شي

سعيد : خلااص ماشي ..بس ابويه ابا ارد البلاد في اقرب وقت

بطي : والعلاج

سعيد : باجر بتخبر المستشفى عن حالتي واذا يستوي اترخص ترانا على اقرب طياره بنرد البلاد

بطي : على خير ان شالله .. ( ويمشي عنه ) يالله لا اتم واعي سير وط راسك وارقد

سعيد يفكر في علايه ويحس بانه موقف امس بالنسبه له جنه حلم : ان شالله

وسارو يرقدوون وسعيد مب مهتني في رقاد لانه حلم انه هو وعلايه كانو في مكان يغطيه بكبره الثلج ومحد فيه يعني مهجوور وعلايه تصيح ع الارض وحاطه ايدها ع ثمها ويطلع دم وسار لها سعيد وهي وقفت وقالت له : لاتخليني ... سعيد كان يدمع وحضنها وخاست فانيلته دم من ثمها ... وباسها ع راسها وقالها : مجبوور اخليج .. وطاحت ع الثلج وهو مشى عنها في ممر طوويل واستوى المكان عقب ظلاام وموحش ..

- المستشفى – المانيا –

حمد من الساعه 7 هو وام محمد وبو محمد يالسين عند علايه ... حمد ماياه رقاد لانه يحس بالذنب . بس يقول في خاطره " ياربييه شو سويت بها ..؟؟ انا احبها .. ( وبضعف ) والله احبها بس هي ماتستاهل وربي ماتستاهل ... خلها اتموت في فصوول مالها لا وشافت حبيبها السابق سعيد ( ويحيس حلجه باستهزاء ) هــه مب قلب عليها فندق ... "

وتاميين بو محمد وام محمد واليده على اعصابهم .. بنتهم لين اللحين مانشت ...

بو محمد : الله يهديها كنت اذكرها دوم بالابره .. وهي ماتهتم لين ماياها اللي ياها

اليده : وبعد تراها ماتحاسب على اكلها تلقط الا من ها البهانس وهاك سيرها ماتقول صحتي وانا مريضه ماعليها من شي

ام محمد : تراها اتشوفهم كلهم ياكلون وهي تاكل وياهم

بو محمد : بس هي اتعرف انه هي غير يعني هي مريضه لازم تاخذ الحبوب واالابر في موعدنهن اناا اشوفها تاخذ ابرة الصبح في أي وقت تباه الا ع هواها ..

ام محمد : شو نسوي الله يعافيها ان شالله .. الله يقومها بالسلامه ( جان اتدمع ع حال بنتها )

- الفندق – المانيا –

غايه بتموت .. وترمس فيصل ... وقررت انها تسير حجرة امها وتشل موبايل امها واللي فيها فيها ...

دشت الحجره

غايه : السلام عليكم

الكل : وعليكم السلاك

غايه : على وين ان شالله ؟

حمدان يطالعها : بنسير عند عليا وغصبا عن عينج بتيين

غايه بعناد : مابا

حمدان : مب كيفج

غايه اتصد على امها : امااااايه عاد رمسيه مابا اسير

ام حمدان : خلها على هواها ماتبا اتسير

بو حمدان : زيارة المريض واجب

غايه : وهي شدراها اني اييت .. هاي شكلها بتموت خلااص

كلهم استغربو من كلام غايه .. وحمدان فول ... بس كانت غايه اتحس بعمرها مضغوطه .. يعني صورة فيصل مب محصلتنها .. وكلام فيصل مخبلنها .. ومجلتها اللي موعدها قريب ملعوزنها .. وحمد بتصرفاته اللي تنرفزها وغزله الماصخ ينفرزها ... وحمدان وبتمليحاته الغير مباشره تقهرها ...

حمدان معصب وبيتقرب منها وبصوت حازم : غصبا عنج بتطوفين جدامي .. صح وبمر بج السوق اليوم تتزهبين حق الملجه وع حساابي امره

ام حمدان عصبت : بتخبرك انته شحقه مستعيل ع مجلة اختك جنها الا طايحه في جبدك

حمدان : ماعليه نازعيني اللحين عشانها بس بعدين بتقولين والله وريحتنا منها

غايه طالعته بعيون مذهوله تخاف ينطق بشي جدام ابوها وتمت اتطالعه بنظراتها وتترجاه ..بس هوو حن عليها وقبض مذهبه وظهر عنهم عن لايخبر امه وابوه ويطلع حرته وع طول طلعت غايه وراه وهي اتدمع وسارت تتلبس

- المانيا – المستشفى –

سعيد رخصه الدكتور وقال له تقدر تكمل علاجك هناك دام انك قدرت تمشي بليا عكاز ها الشي فرحهم واايد وبشروو امه ... وسار عبود يحجز لهم على اقرب طياره وحصل حجز بالباجر فليل ... واستعدوو كلهم ...

عند قوم علايه الاوضاع مثل ماهي لاجديد ... شوي ويشوفون قوم حمدان وبوحمدان وام حمدان وغايه يايين

حمد حس انه متولهه ع غايه لانه اتعود عليها وها الكمن يوم ماسولف وياها .. وغايه كانت طول الوقت معصبه ومب طايعه اتطالع في ويه حد وحمدان اخوها محمق عليها ...

يلسوو شوي وعقب ..

حمدان : يالله انا وغايه بنترخص بوديها السوق عشان تتزهب للملجه مااشي وقت جريب وبنسافر

ام حمدان : لاتبطون وهالله هالله في اختك

حمد : انا بيي وياكم

غايه باعتراض : لا والله شحقه عيل ليش نسوي ملجه دام انك بتشوف الفستان والاغراض

كلهم استغربو اسلوب غايه الجاف ... وحمد لاحظ ها الشي ... وافتشل جدامهم كلهم

حمدان يلطف الجو : ماعليك منها من زين اللي بتاخذه الا فستان عنقاش

غايه : هيه امره جان بتاخذ ها الفستان العنقاش حق حرمتك مب لي انا غايه بنت حارب

بو حمدان : والنعم ... خذلها امره تاخذ اللي تباه

حمد يطالعها بنظره خايسه ومنزل راسه ويهز ريله بعصبيه " طالعو السخيفه كيف اترمسني ... دواج عندي قامت تستقوي وتركب ع راسي .. "

وظهر حمدان ويا اخته غايه ...

ام محمد : بو محمد خلنا اندش نطالعها يستوي

بو محمد : هيه يستوي بس مابتنش اللحين

ام محمد غامضتنها بنتها : خلني ادش شوي عن خاطري

بو محمد : دشي شويه انزين

ودشت ام محمد داخل ... وعقب شوي خطفوو بطي وولد سعيد وعبود .. ومن شاف حمد هاييل يايين نقع الشرده وسار صوب الكفتيريا ...

وسلمو الرياييل ع بعض والحريم سارو بعيد ..

بطي : ها بو محمد شو حالها بنتك

بو محمد وشكله تعبان : والله لين اللحين مانشت

بطي : الله يعافيها ان شالله شو قالو عنها بالظبط

بو محمد : بعيد الشر عنك قالو انه يتها نوبة سكري ... ( وبعتاب ) الله يهداها ماتنتبه لصحتها ماتاخذ الابر في وقتهن والاكل تخبص من هذا ومن هذاك ..

سعيد تام قلبه مقبوض عليها ومب رايم يتحمل اكثر من جي ها الموقف اللي امس استواله اكبر من طاقته واللي يسمعه عن حبيبته الاولى والاخيره .. مب رايم يتحمله فقرر يطلع ويرد البلاد باسرع وقت ويبتعد عن علايه مايبا شي يذكره بها ..

عبود تام متحسر ع الحب الكبير وكيف يروح بغمضة عين ... وهو يبا علايه تنش بالسلامه لانه عنده رمسه وايد يبا ايقولها اياها ع المسن ..

بطي : الله يعافيها ان شالله وتقوم بالسلامه ...

بو محمد : ان شالله ... ها متى بتسافرون

بطي : الليله الفجر

بو محمد : يالله توصلون بالسلامه

بطي : تامرنا بشي بو محمد

بو محمد : لا سلامتك امرره ... وسلم ع الاهل

بطي : الله يسلللللللمك ...

واترخصو عنه وسعيد طول الوقت ساكت وصدق كان مهموم من الخاطر ...

- السوق –

تقريبا غايه ماخلت شي من الاغراض وخمت السوق ها كله عناد في اخوها لانه يقهرها وقالت هي بعد بتقهره ..

غايه : بعدني اابا

حمدان يعرف انها تستفزه : هههه وحياتج عسل ع قلبي يوم انه ها زهابح لانج بتفكينا

غايه عصبت وكل ما اتطوف ع بدي ولا نعال ولا اكسوارا شلته تقهره ... وعقب حطته جدام الكاشيره وطالعت اخوها بنظره : ادفع

حمدان يطلع الفيزا : هه من عيوني تراه ها الزهاب حق العرس والملجه بالمره

ودفع وغايه مول مب متحمله اسلوب حمدان

حمدان شال الاجياس : اممم بتكون الملجه عقب مانرد باسبوع زهبي عمرج .. والعرس عقب 3 اسابيع ... يعني خمي السوق بكبره ما اوصييج

غايه كانت تمشي جدامه ووقفت من سمعت كلاامه وبقهر : ان شاااااااااااااللله ( ومدت الكلمه )

وتمت تكمل حواطه وهي تتشرى وماخلت شي ها كله عناد في اخوها ..

- المستشفى – ميونيخ – الساعه 2 فليل

سعييد كان يحوط في الممر وبباله شي ... طبعا يبا يشووف علايه للمره الاخيره في حياته ... رفع ايده وطالع ساعته وشاف انه ماشي وقت لازم يطلعون الساعه 4 عشان يسيرون المطار ويخلصون الاجراءات .. ووقف جدام حجرة علايه ... ومتررد من اللي بيسويه .. لانه يعرف انه ها الشي غلط .. وشي جريء وهو سعيد بروحه يستحي ويتلوم ..

" افففففف انا خبله ادش عليها جي ومحد وياها .. والله مب حلوه ..بس خلني اجبر ها اللعين ( وياشر ع قلبه ) عشان اودعها للمره االاخيره .. خلني اشوفها للمره الاخيره .. "

دش سعيد بهدوء وماكانت لابسه شيله وشعرها يتناثر حولها بهدووء وويها مصفر وقصتها القصيره نازله ع وييها .. وشكلها جنه ياهل ومبتسمه بهدووء . سحب شيتلها من ع الطرف وحطها ع راسها وهو يبتسم اول مره يسوي ها الحركه .." هههه انا اهبل والله بس مافيني اخذ اثمها ... بس ها الشي غلط وخلني اطلع "

سحب سعيد الكرسي بهدوء وتم يطالعها ...

علايه ترمس وهي راقده : هممم .. أحبك والله

سعيد ضحك لانها ترمس وهي راقده .. وقال بصوت واطي وحزين : وانابعد ..

علايه حركت صبوعها شوي ... وفتحت عينها وهي ترمش بسرعه لانها رقدت وايد والليت اللي فوق راسها قوي .. سعيد استانس لانها نشت ..

علايه بصوت واطي : ابااا مااي

سعيد صب لها ماي وناولها وشربته ..

علايه عقب ماشربت ناولته القلاص وحطه ع الكمدينو ..بس استوعبت علايه شوي وقامت اتدمع ... : ليش ياي ؟

سعيد استغرب منها : هاا ... ماشي

علايه وصوتها بدى يعلى : اقوولك ليش يااي

سعيد : شوو فيج عليوه

علايه صدت عليه بطريقة غريبه وعيونها حمر ..: اصلا خبرني انته منو ؟

سعيد مبقر . : هااااا .. انا سعيد

علايه استوعبت : اها سعيد ... ؛( ونزلت راسها بحزن ) انته شوو اهون ؟

سعيد : الحمدلله ع كل حال يالله اسمحيلي بسير

علايه قامت تصيح : لا لاتسسير تم ويايه

سعيد قرر يطلع قبل لاتخونه دموعه ها المواقف مول مايحبها ..: ياي اسلم عليج قبل لا ارد البلاد .. وبس

وسار يمشي صوب الباب .

علايه تصيح : سعيد انا احبك ... واذا ودك تاكد شف الله كيف ليدينك هداني ... وطلبتك اخر طلب

سعيد عاطنها ظهره : اطلبي اللي تبينه علايه ...

علايه تصيح وبالم ومركزه ع نقظه في الحجره وتامه تشوفها وترمس وجنها تفكر في المدى البعيد : يوم بترد وبتعرس وبتييب بنوته حلوه سمها علايه اوكي

سعيد قامت عيونه تحرقه وصد صوبها : ان شالله ... من عيووني وانتي بعد لو يبتي ولد صغيروني حلو سميه سعيد ..

علايه تصييح من خاطرها ونشعت المغذي اللي في ايدها : انا مابعرس انزيييين .. ماابعرس ...

سعيد ماعرف شو يسوي وكيف يهديها وطلع الدم من مكان الابره لانها نشعت الابره بقووه وسار صوبها وسحب كلينكس وتم يمسح على مكان الدم وهي تمسح بايدها الثانيه دموعها ... : خلني سعيد .. دخيلك ساافر ... مااتحمل اشوفك هني ....

سعيد كان منزل راسها ويمسح مكان الدم وطاحت دمعه من دموعه ع ايدها .. وشل بعمره وع طول ظهر من الحجره ...

علايه تمت تطالع ايدها مكان الدم . ومكان دمعة سعيد ... وتمت تصييح ودشت عليها النيرس وتمت تهديها وتعطيها الدووا وجي ..

وع الصبح يوو قوم امها واستغربو انها نشت لكنها كانت ساكته وتطالع صوب الدريشه وهااديه واييد ... والدكتور زقر بو محمد

ورد دش بو محمد وطلع كل اللي عندها وبدا يشرح لهم حالة علايه ..

بو محمد : ام محمد اسمعي طيحة البنت كانت نوبة سكري وها الشي قال لي الدكتور أثر ع ذاكرتها .. يعني البنت مابتروم تتذكر الاشياء وايد ولازم حد دوم يذكرها .. وبتنسى بسرعه ويبالها برامج لتنشيط الذااكره .. وبيعطونها ادويه وحبوب

تمت ام محمد اتصيح واليده دمعت .... ودشوو عندها ...

ام محمد سارت وحضنتها ..: فدييييييييييييت عمرررررج

علايه حضنت امها ..وتمت هاديه وتدمع ... وسارت اليده تسلم عليها

اليده : الحمدلله ع سلامتج

علايه : الله يسلمج

ام محمد : انتي شوو احسن اللحين امايه

علايه : انا احسن هيه ...... امايه بسير اصلي

ام محمد استغربت ..: شو تصلين اللحين الساعه 11 ..

علايه : االصبح ... الصبح اطمني ماخرفت انا الدكتور شرحلي حالتي قبل لايشرح حق ابويه ...انا نسيت اصلي الصبح

بو محمد : يعني يابنتي انتي تعرفين بس بتنسين لانه بتكون الذاكره

علايه تقاطعه : ادري .. والله ادري .. خلوني بنش اصلي ...

وسارت تيدد ولبست شيلة لصلاه وفرشت السياده وبدت تكبر ... بس طولت وايد وماركعت وكلهم تمو يشوفونها .. وقطعت صلاتها ويلست ع الارض وتمت اتصييح وركضت وحضنت امها

ام محمدزاغت عليها

ام محمد : بلااااااج ياعليا شو فيج

عليا : أأ ...أأ .. ماعرف اقول شي في الصلاه نسيت صورة الفااتحه ...

وتمت اتصيح في حظن امها واليده قبضتها من ايدها وتمت تقرا عليها وعلايه طايحه ومغمضه عيونها وعقب يودها الابو وتم يحفظها الايات القصار من اول ... مع انها هي حاظفه 5 اجزاء من القران بس اللحين مول ماتحيد شي منهن

بو محمد : حفظتي بابا

عليا وهي تعيد الايه مره ثانيه جدامهم .. ويوم خلصت

بو محمد : شااطره ماشالله عليج يالله صلي فديتج

وفعلا نشت علايه اتصلي وصلت ويوم سلمت

بو محمد : بارك الله فيج

ام محمد : ها شو تحسين اللحين

علايه :احسن ... ( ونزلت راسها )

بو محمد : انتي بس يبالج حد يذكرج بالاشياء اللي نستيهن

علايه : انا زينه .... بس ... ابا اروح

ام محمد : انا حتى احسن انه نروح احسن تمينا هني واستانسا واللحين لازم انجابل بنتنا

علايه : انا مافيني شي

ام محمد : صح انه مافيج شي ...بس خلونا كلنا انرد بتكون ملجة حمد وغايه قريبه ويبالنا نزهب ونجابل بيتنا

بو محمد : ها الوالده شو رايج

اليده : هيه نروح يالله بسنا بسنا ....... مالنا غير دارنا ..

بو محمد : خلاص انا برمس الرياييل وبنتشاور ع الرده

علايه طول الوقت ساكته وعيونها تلمع بالدموع وهي تتذكر مواقفها الاخيره .. وجرح الفراق في قلبها بعده مابرى ... وضرب حمد ونذاله غايه للحين تذكرهم ...

سار بو محمد اتشاور ويا الرييايييل وكلهم وافقو وقررو يردون على اقرب طياره وسارو وحجزو وحصلو رده باجر العصر ......

-المستشفى – رخصو علايه وخلوها اترد الفندق وطبعا عقب ماوصفو لها مليون دوا ووالابر وحالتها لله علايه اول ماوصلت الفندق فتحت الاب توب ودشت المسن وعلى حظها ماحصلت حد اون لاين وبندته وسارت تسبح وعقب طلعت وتمت اتنشف شعرها وكان الباب ملايم .. وحمد كان طايف وشاف باب حجرتها مفتوح وفتحه بشوي شوي وشافها وهي تنشف شعرها بالفوطه وعقب سحبت السشوار وتمت تسشور بكلتها وخلتها نازله على عينها يوم صدت شافت طرف حد عند الباب لبست شيلتها ع السريع وفتحت الباب وانصدمت بحمد واقف عند الباب وكان منزل راسه

عليا بعصبيه : شو تبا ؟

حمد رفع راسه وتم يطالعها : أأ .. ماشي بس كنت ابا اقولج

عليا تطالع ساعتها : نوو تايم فكني من الصدعه

حمد عصب : جب

عليا : جب جبك

ورقعت الباب في ويهه ... وتقول في خاطرها " أخر زمن انا اسوي ( ...) خواشيق ..."

( هع هوو مثل شعبي بس شوو طفس لوول .. طووفوو اكيد اتعرفونه )

وردت فتحت الاب توب وحصلت فيصل اون لاين وهي ماتعرف منو ها ؟

دش فيصل وكان نك نيمه .. [ غرتك دنيا .. والله وانتهيت واستحل القلب غيرك ياهوى . وانته يامضي ع نفسك جنيب .. مستحيل الحب يجمعنا سوى ] : اخبرج ما اتصلتي

علايه شكلت وكان نك نيمها .. [ بعد ذاك الود للفرقى نويت ؟؟ خذ غرامك قلبي للفرقى نوى ...!! ] وعقب تي كلمه I love u بس الالوان وشكلها نعومي

وفجأه كلهم غيروه نفس النك والنيم وخلوه [ مستحيل ارجع لو مت وحييت .. ابعد وببعد ...ولكني هويت !! ... ]

فيصل : يالله تقليييييييد

علايه : اخويه انته منو تباا ؟

فيصل : انتي مب غايه ؟؟

علايه فتحت ثمها .: لا اخويه انته غلطان فمان الله

فيصل : عيل عليا

علايه بقرت : ايييييييه انته من وين تعرفني

فيصل : علايه انا شو قلت لج انتبهي لعمرج ..

علايه : لحظه انا مب فاهمه شي ..

فيصل : عليا اللي ماتعرفينه انه غايه رمستني من ايميلج ... ااول امس اتوقع

علايه : جييييييييييييه السالفه عيل

فيصل : ليش شو استوى ؟؟

علايه : اول خبرني انته فيصل صح

فيصل : لا لا اخخووه

علايه : صددق

فيصل: هههههههه طالعو صدقت لا فيصل بلاج

علايه : برب طشونه

وسارت تدور في الفولدرات مالها وحصلت سجل المحادثه مال فيصل وغايه وتمت تقراها وهي مندصمه شويه ودشت ميروه اختها ... وركضت تبوسها ...

ميره : عليوووووووه اتولهنا عليج

علايه اونه مستحيه : شكرا ... شكرا

ميره توايج في الاب توب : شوو تسوين

علايه تسكر الشاشه شويه : ونتي شلج ؟

ميره : اووهووو كله تجعموني

علايه : اطلعي وسكري الباب انا بطيح برقد شويه

ميره تمشي صوب الباب : ع فكره يوم انتي محد كل حد خذ لاب توبج ...

علايه : منو

ميره صوب الباب : حمد وغايه وانا هزبت حمد بس ماسوى لي سالفه

وطلعت ميره وسكرت الباااب .. وهني ها الساعه وضحت لعلايه السالفه ...

علايه : باك

فيصل : ولكم .. يالله ها الكثر طشونه انتي منو ترمسين

علايه بحزن : ما ارمس حد بس اكتشف شي

فيصل : ليش خبريني شو استوى

علايه كتبت له السالفه كلها ع المسن ...

فيصل : صدددددددق ضربج الحقيييييييييييييييييييييييير

علايه : هيه والله فيصل انا مابا مشاكل سو لي بلوك وديليت

فيصل ملتوم فيها : والله اسف

علايه : انته مالك خص

فيصل : بس انتي اترومين تسيرين تخبرين بس انا مب مخلنج

علايه : لو ابا اسير اخبر جان خبرت من زمان بس انا مابا والله فوق

فيصل : والله مب عارف شو اقولج

علايه: لاتقول شي بس سوو لي بلوك وانتهى مافينا ع المشاكل

فيصل : خلاص اوكي اللي يريحج بس بين فتره وفتره لو استوى أي شي طرشي لي ايميل ومثل ماقلت لج انا مابسكت

علايه : ان شالله خلااص ... بس لاتسوي شي مافينا ع الصدعه

فيصل : ان شالله

علايه : عيل برايك

فيصل : مع السلامه

وع طول سوت علايه بلوك وديليت وارتاحت من هم فيصل وسكرت الاب توب ووطته حذالها وحطت راسها ومن كثر التعب رقدت __DEFINE_LIKE_SHARE__

راعيه الفتك البرتقالي · 03-13-2008, 06:43 PM

ثااااااااااانكس

ونترى التكمله __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
الفقع والفياض الغنا .........................؟	محروم.كوم	منتدى أخبار المواقع والمنتديات العربية والأجنبية	0	02-21-2010 10:30 PM
شتات العنا روجيه فيت ليجندري	jnoon	اغاني , شلات , هبان	0	06-14-2009 10:07 AM
اه العنا - محمد المزروعي	@ العامري @	نغمــات للهــواتف	29	07-10-2008 08:58 AM
اهـ العنا بيـ طاليــ....	@ العامري @	تصاميم الاعضاء	35	05-23-2008 02:58 PM
راشد الماجد_اه العنا	عسوولة ترتووب	المواضيع المكرره	4	05-15-2008 07:38 PM