المشاركة الأصلية كتبت بواسطة بس كيفي~

	أحم أحم أآببببا بببببآأرت =) حدي متحمسسسه شو بيخبرهآأ منصور ؟؟؟

البوح العاشر .~
أرجوان .~
بالسيارة . . تميت ساكته . . ومنصور نفس الشيء . .
عرفت أنه هالسيارة مأجرنها . . عشان يكون هو اللي يوصل أهله . .
بعد فترة وقف جدام كوخ ريفي حلو وبسيط . .
منصور: أرجوان أنا أبا أقولج شيء بس لا تتفاجئين . .
سكتت أبا يكمل . .
منصور: ولا تزعلين مني لأني ما قلتلج هالكلام
أنا: زين قوول . .
أبا أعرف هو شو مخبي . . ؟!
منصور [ يتنهد ] : أنا تراني متزوج
سكتت .. توقعت هالشيء . . عيل عمره 31 ومب معرس وين عقلج يأرجوان وينه ؟!
أنا: أدري . .
منصور [ يطالعني بصدمة ] : تدرين !
أنا: مو معقولة تتريا حب الطفولة بدون ما تتزوج
منصور: أرجوان أرجوج لا تزعلين أنتي تدرين أني متعلق فيج مابي أخسرج
أنا: هي تدري انك تزوجت عليها
منصور: لا ما درت اليوم بقولها
أنا: خايفة
منصور: من شو !!
أنا: مادري
منصور[ يمسك إيدي ] : لا تخافي حبيبي أنا معاج
أبتسمت له وأنا داخلي يتحرق كيف يعني في وحده بتشاركني فيه !!
.
.
ديمة . ~
من بعد ما أحرجوني . . ركبت لغرفتي
طليت عليها جفت غاية راقدة . . رحت أجوف جوري وشفتها هي بعد متعمقة برقادها
قررت أركب فوق لغرفة بدور . . أكيد مب راقدة . . بس زعلانة عسب بترد البلاد وهي ما شافت شيء من لندن . . كسرت خاطري والله
بس عقب غيرت رايي ورحت صوب غرفة جنان
دقيت الباب . .
جنان: حياك . .
دخلت . .
أنا: ليش حياك . . ليش مب حياج !؟
تتطالعني . .
جنان: حياج تفضلي
أنا: عيل أبوج قال أنج راقدة . . فاتج قاعدين تحت ويضحكون علي [ وبوزت ]
جنان[ تضحك ] : ليش ؟!
أنا: ابوج حضرته يظن اني بعمر 13 -14 . . ويقول لأبوي ماله داعي تتحجب احينه بعدها صغيرة . . [ أغطي ويهي ] فشلني وربي فشلني
جنان : أنزين ليش ما تتحجين لا تقولين لي بعدج صغيرة أدري أنج كبرتي
أنا: صح كبرت
جنان: أنزين حاولي تقتنعي وتتحجبين . .
أنا: إن شاء الله . . اليوم ما بنخلص من ه السالفة . . غيريها
جنان: بغيرها . . [ تمسك إيدي ] تعالي معاي . .
رحت معاها لطرف مرسمها اللي بالغرفة . .
جنان: برويج شيء وأبا رايج أوكي
أنا: أوكي . .
كشفت عن لوحة كبيرة . . أتفاجأت أدري أنها رسامة بس ما دريت أنه رسمها متحرف . . إبداااااااااع
جنان: هاللوحة مفاجأة لأبويه . . مسوتها له وناويه أعطيه له . .
أنا: جنون ما شاء الله عليج . . عيني عليج باردة . . والله خباال
جنان [ بحيا ] : تسلمين . .
أنا: تدرين أبوج وايد حلو . . [ أضحك ] مادري هو صدق حلو . . ولا الرسم اللي محلنه
جنان: أبوي وايد جميل [ تتطالعني ] ما تشوفيني جميلة [ بحيا ] ترا طالعه عليه . . بس وينه اللي ينتبه . .
أنا: جنون عن منو ترمسين !
جنان: عن وحده ينقال لها أمي . . تركت أبوي وسببت له جرح كبير . . [ تبتسم ] تركته وهو يحبها . . وتعقد من كل الحريم . .كلهم في عينه خوانات . . إلا أنا . . لأني ربات إيده
أنا : ليش تركته . .؟!
جنان: ما أدري . . ولا أبي أدري

رحت لها ودزيتها . .
أنا: يلا عاد أفرديها . . أقولج ما بتقردنيني لأبوج . . ترا حلو . . وجميل . . زوجيني له
كنت أقولها بروح فكاهية ما كنت أقصد أي كلمة . .
جنان: أفا عليج . . إذا بتفكين عنه عقدته اللي سببتها أمي . . بزوجج له . . بس ترا ما يغرج عمره .. ترا بعده شباب
أنا: أفا عليج . . خليه علي
جنان : زين بنشوف
أنا: زين متى بتعطينه الرسمة !
جنان: بأقرب وقت إن شاء الله
أنا [ بمزح ] : عاد ما أوصيج لو تزوجت أبوج ترسميننا
جنان: من عيوني . . يا حرم أبوي المصون

صدق ضحكت ع أفكاري . .
.
.
مريم .~
ردينا البلاد . . والصراحة ملل . . ما كان ودي أرجع . . خوفي والله بنت الذين ترد تلعب ع أخوي مرة ثانية وأنا بعيدة . . أكيد هي ساحرتنه . . ولا مسوية له عمل . .
خليتها تولي . . ها اللي قاصر أفكر فيها . .
بطلت اللاب ودشيت المسن
جفت شوق داخله . .
أنا: شوااق
شوق: هلا عمري أخبارج ؟!
أنا: زينة وأنتي أخبارج ؟!
ترييت ما ردت . . دزيت لها تنبيه . .
أنا: شو تسوين !
شوق: قاعدة ع الشات . .تعالي جربي
أنا: شوق تدرين ما أحب . . وبعدين أخاف أهلي يدرون .
شوق: محد بيعرف إلا لو أنتي خبرتيهم . . وأنتي تخافين ما تقولين
أنا: يعني أهلج يدرون أنج تدخلين الشات وعادي عندهم
شوق: هي عادي عندهم . . وبعدين هم واثقين فيني
أنا: زين بدخل بس ما أبا حد يعرف اسمي
شوق: زين دخلي باسم مستعار وبقولهم أنج ربيعتي ومحد بيعرفج . . أصلاً كل حد بالشات ما يقول معلومات صح عنه
أنا: زين بدخل الحينه طرشي لي الرابط
شوق: زين
طرشت لي الرابط . . وعلمتني كيف أدخل وكل شيء
سجلت نك نيمي . . المها .. ما أدري ليش !!
وبدت سوالفي مع الشات بهاللحظة
بالشات . .
شوق : يا جماعة ترا اللي داخلة بنك المها ربيعتي
حسيت بانسيابية . . يسألوني وأرد عليهم
اسمي اللي عرفوه . . مها . . أو المها
عرفت واحد نك نيمه . . فارس . . طلب مني أكلمه ع الخاص
بس رفضت . . لين ما أصر . . وقالت لي شوق . . عادي رمسيه ما بيأكلج
فارس: هلا وغلا
أنا: أهلين
فارس: ترا أسمي فارس وعمري 23 قريب بتخرج من الجامعة
أنا: والنعم
فارس: أنا حاب اتعرف عليج أكثر
أنا: ليش تبي تتعرف علي أكثر !
فارس: أدري أنج مب راعية شات . . أبيج تتركين الشات ورح أكلمج بأي مكان تبينه إيميل مسن ولا فون
خفت شنو فون . .!
ما عرفت شو أكتب
فارس: مها ترا أنا أبيج ع سنة الله ورسوله . . حاب أتعرف عليج أخذ عليج وتأخذين علي . . باقي لي كورس واحد وأتخرج من الجامعة وبكون مكون نفسي وجاهز للعرس
أنا: يعني عادي عندك تتزوج وحده ما تعرفها
فارس: مها ترا أقولج لازم نأخذ ع بعض قبل . . وصدقيني بتتعودين علي . . ولو ما صار هالشيء بنترك بعد وصدقيني ما رح أوقف بطريقج
أنا: بفكر
فارس: فكري وهذا إيميلي لو فكرتي ضيفيني ولا ما تبين أنسيني . . ,,,,,@hotmail.com
قررت أطلع من الشات . . نسخت الايميل وسيفته عندي بس ما ضفته بالمسن
وسكرت اللاب وطلعت وأنا خايفة لوحد درا شو بيصير !!
.
.
مايد .~
طلعت من المستشفى . . وأصريت على ذياب وخالد يوصلوني لين شقتي
ذياب : يا ريال أنت تعبان شقا بتقعد روحك !
أنا: ما عليك لا تحاتيني . . [ ابتسم له ] محتاي أقعد بروحي شويه
ذياب: زين وخل فونك مفتوح عشان نطمن عليك
أنا: تأمر يا ولد العم
خالد: ولا تفكر وايد . . أنا إن شاء الله قبل السفر بمر عليك
أنا: مشكور ما يحتاي
خالد: إلا يحتاي . . يلا سير ودر بالك
خليتهم ومشيت للشقة . . مفتاحها مخلنه عند الحارس
شليته عنه وركبت الدري لفوق . . ودخلت شقتي . .

[
أنا رحــت المكــان اللي جمعنــا مـن قبــل عامين
بغيت أصبر مع الذكرى وأعيد أيام تذكارك

تصدّق!! شفـت يا عمري رسوم إبها حـروف أثنين
ولقيت أن الجدار اللي لمسته يحمل أسرارك

بدأ بذاك المكــان اللي تحيــده كـــل شــيء إيلين
نعـم يشفق على حالي ويتخبّــر عن أخبارك

وعطرك هو ترى عطرك ولو قد صار له سنتين
أشمّـه بـس في الواقـع أشــم بغيبتـــك نارك

قعدت أتخيّلك تطلع وأشوفك بس ما أعرف وين
ولكن وين يا عمــري وإنتــه بعيــد في دارك

بدت تخنقنــي العبرة وأنا أصـارع دموع العين
ياليتك عشت هالموقـف بتعرف كيف مقدارك

سهرت يلين ما بيّن عـن إطلـوع الفجــر ثلثين
أسامــر نجمــة غيابك وأكلّمهــا عن أعذارك

طلعت من المكان وكن قلبــي منقســم قسمين
في عيني صورتك وإنته قبالي تسمع أشعارك

عرفت أن الزمـن قاسي ولكــن فرقـة القلبين
صعيبه يابعد عمري وفي وسط الروح تذكارك
. .. . . . . . . . . . .. . . .. . . .. . . . . . . . . . . . . ]

حطيت رأسي ع المخده .. صدق بكل مكان له ذكرى . .
اهنه ياما ذاكرنا مع بعض . . مع نالوه . .
اهنه ياما قعدنا وضحكنا . . وصورتنا . .
طلعت من الشقة . . أحس بخنقة . .
جفت نالوه توها ياية . .
منال: مايد [ اتي صوبي ] شحالك؟! وينك مختفي
أنا: موجود . .
منال: كسرت قلبك . .
أنا: وما يتصلح لو مهما صار
منال: تصدق للحين ما دقت علي . . ما سألت عني . . نانا اللي ما تصبر عني . . يومين ما أدري عنها شيء . . وغالقة فونها بعد
[ ابتسمت يعني مرتاحة بزواجها لهالدرجة ]
منال: مايد تدري منوه عندي بالشقة ؟!
أنا: منوه ؟ ليكون . .
قاطعتني : لا مب هي . . خالوه عوشة ويا ولدها أحمد . . ما دري شعندهم . . حياك ويانا
أنا: لا منال سيري لهم أنا أحس بخنقة بروح اتمشى شويه . .
منال: رحت تشوف نتايجك !
أنا: لا . . ليش نزلت
منال: هي نزلت . . اسمها مثل العادة بأول القائمة . .
أنا: الله يوفقها
خليتها وطلعت . .
الجو فيه برودة . . والله لو درت أني مب لابس شيء ثقيل لبهدلني . . يا ترى بتمين جي ولا بتتغيرين علي . .
قررت أروح الجامعه أشوف النتايج وعقب أروح بيت عمي . .
ع الأقل ما عندي أي ذكريات معاها اهناك
.
.
أرجوان .~
نزلت مع منصور . . وقلبي يرقع
ما كان ودي ألتقي فيها . . ع الأقل مب ه الفترة
شفت عموه [ أم منصور ] قاعده وبناتها الثنين يمها
سلمت عليهم . .
منصور: عيل فاطمة وين ؟!
عموه: فوق بغرفتها ويا عيالها
[ وعندهم عيال !! ] يا ربي أنا شلي خلاني أدخل عليهم به الطريقة . .
وعقب مسكتني عموه تسولف . . بعد ما رخصت لبناتها يروحون فوق
عموه: عيل وينها أمج ؟! ما شفتها بالحفلة !
أنا [ بغصة ] : أمي عطتج عمرها قبل 7 سنوات
عموه : الله يرحمها يا بنتي [ تحط يدها ع ريلي ] سامحيني والله ما قصدت ولا أعرف أنها توفت
أنا: الله يرحمها . . مسموحة عموه
عموه [ تبتسم لي ] : والله أني استانست انج صرتي حرمة ولدي
ابتسمت لها . .
عموه: بقولج شيء قبل لا ايي منصور . . ترا مابيج تتعرضين لفاطمة أبد . . تراها شرانية وما تنطاق . . عادي تسوي سواياها وتعقهم عليج . . وتقلب الموازين عليج
[ كلام عموه خوفني . . ] . .
أنا: لا تحاتي عموه
عموه كانت تبا تقول شيء . . بس قطعها نزول منصور . . مع وحده [ فاطمة ] . .
فاطمة [ تتطالعني ] : احينه ما لقيت تاخذ غير هذي ع رأسي . .
منصور [ يهديها ] : فاطمة ودريها عنج تعالي معاي
فاطمة : ما سايرة لين أعرف من وين تعرفها
منصور: امشي معاي وبتعرفين
فاطمة : شوف باجر تراها سفرتنا للبلاد . . يا أنا يا هي
منصور: ذكري ربج يا فاطمة ودحري الشر
فاطمة : قولها هي تدحر الشر داخله وشالة ريال من مرته وعياله وتبيني أسكت
منصور [ بصوت يخوف ] . . : فاطمة
أنا نقزت من صوته . . نفس الصوت اللي كان يرقزني به يوم أكون فوق البيذامه . . صوت عصبي بالحيل . . استغربت من روحي . . يوم صغيرة ما خفت من الصوت استانس لا صرخ علي واحين اخاف . .
فاطمه [ بخوف ] : شو
منصور [ يقرب منها ويلصقها باليدار ] : هذي مرتي . . وبتكون إن شاء الله ام ولدي اللي ما قدرتي اتيبيه لي .. باجر بترجع معاي البلاد . . إياني وإياج تتعرضين لها . . ولا بزوالج . .
فاطمه : هذا يزاتي أغار عليك
منصور: ما طلبت منج تغارين . . ومن يوم ورايح لازم تتعودين ع وجودها يمي وبقربي . . إن شاء الله بحضني . . ماله داعي تغارين
فاطمة [ تدمع ] :هذا يزاتي لأني بس يبت لك بنتين . .
منصور: أقول سيري فوق عند بناتج أحسن لج [ يطالعني بعد ما سارت ] أرجوان البيت بيتج أنا بروح اييب أغراضج من الفندق وبنبيت اهنه اليوم وبإذن الله باجر بنتوكل للبلاد
أنا: منصور مابا أرد من غير ما أشوف أهلي
منصور [ يطالعني ] : ما طلبتي .. العصر انتي عندهم
أنا: مشكور
وطلع ..
أنا: عموه صدق كسرت خاطري فاطمة . . حرام مب ذنبها انها بس اتيب بنات . . ه الشيء بيد الله سبحانه ما بيدها
عموه [ بهمس ] : تسوي تحديد جنس المولود ما تبا أولاد . . هي روحها اعترفت لي
أنا[ شهقت ] : ومنصور يدري
عموه: لا ما يدري وهذا اللي كاسر ظهري . . ما أروم أقوله
أنا: الله يكون بالعون
عموه: لا تغرج دموعها تراها دموع تماسيح . .
[ ما عرفت شو أرد . . يعني يا اصدق فاطمة انها مالها ذنب . . يا أصدق كلام عموه . . والله العالم من فيهم صادق ] . .
.
.
بدور .~
أنا: يعني عزّمت . .
خالد [ يحط أغراضه بالجنطة بكل دفاشة ] : هيه . . الطيارة بعد ساعه
[ قمت ورتبت أغراضي وسويت له طاف ] . .
خالد : زين تعالي سوي مالي
أنا: كلن له إيد تسوي لعمره
خالد [ ايي صوبي ] : لا والله
أنا [ أحط البلايز ع السرير ] : هي والله
خالد : لهذي الدرجة زعلانة
أنا: لا مب زعلانة . . بالبلاد بتحبسني بالشقة . . ولا بجوف أخوانك وبجي ما بتغار علي . . بتريحني من غيرتك الزايدة
خالد: بدور
أنا [ أشل الجنطة من ع طرف وأبطلها ] : خلني أجهز جنطتي عشان أسوي مالتك ونطلع الطيارة باقي لها ساعه
خالد: زين بخليج وبزقر لج جوري ولا ديم تساعدج
أنا: زين . .
خالد [ اي ويحضني ] : ما يهون علي زعلج حياتي
أنا: . . .
خالد: أحبج . . [ يهدني ] يلا بروح وبردلج . .
أنا [ ابتسمت له ] . .
.
.
سلطان.~
اليوم قمنا من النوم من وقت . . فقررنا نسير نتمشى بالهايد بارك . . لأنه الجو حلو . .
وغرام . .
سمية . . لابسة قميص طويل للركب لونه أحمر وبنطلون جينز . . ومحطية سكارف أسود ع رقبتها . . ولابسة سكارف أحمر . .
سمية [ مسكت إيدي ] : خل نتمشى بلاها القعدة
أنا: أوكي حياتي
ومشينا ع الخفيف . . أوقات تحط رأسها ع إيدي . . وأوقات تسولف . .
أنا: حياتي اليوم كلمت أمي وقالت لي انهم بالبلاد
سمية [ تتكلم بدون ما تتطالعني ] : صدق . .
أنا: هيه حبي . .
سمية: لا تقول نحن بنرد بعد
أنا: جوفي اليوم الخميس . . الخميس الياي نحن بالبلاد
سمية: يعني باقي أسبوع . . وناسة
أنا: شنو الوناسة . . لندن . . الجو . . ولا [ بهمس ] قربي
حطت رأسها ع إيدي [ لأني طويل وهو شوي قصيرة ] . .
سمية: كل شيء حلو . . وأنت أحلى شيء حصل
أنا: فديتج يا عمري
سمعنا صوت رعد . . نقزنا . .
سمية: أميييه
ضحكت عليها . .
سمية: لا تضحك أدريبك روحك خفت بعد
أنا: توه الجو شحلاته . . شو ياب السحاب احينه !!
[ وفعلاً الجو تغير فجأة . . السحاب لونه أسود . .]
سمية [ تلصق فيني ] : برد . . خل نرد الفندق . . عن يطيح مطر ولا شيء
أنا: زين . . بس لازم نمشي لين نطلع . . عقب بنأخذ تاكسي يردنا
سمية: زين
وبالطريق ونحن نمشي . . بدا يطيح مطر وكل ماله ويزيد . .
سبحان الله كأنه الوقت الحينه المغرب مب الصبح . .
شوي شوي يزيد المطر وسمية لاصقة فيني لصقة . .
وقفنا برع . . وع طول حصلنا تاكسي . .
ركبناه . . وسمية لزت بعيد . .
أنا: تعالي يمي بدفيج
سمية: زين
قربت مني . . وحضنتها . . حسينا بدفوة . .
لين وصلنا الفندق . . وشغلنا نظام التدفئة ع طول
رجنا بدلنا ملابسنا ولبسنا لبس ثقيل . .
وقعدنا يم الدفاية . .
سمية [ قاعدة يمي ] : نحن لو تامين بالإمارات وايد أحسن . .
أنا: هي والله نحن وين ولندن وين . .
سمية : بررد
أنا: مع أنج متلحفة باللحاف . .
سمية: شو أسوي برد برد
أنا: تعالي أنا بدفيج زيادة . . [ أفتح لها حضني ]
يات صوبي . . وقعدتها ع ريلي . . وشليت اللحاف وغطيت به ريلها وريلي
سمية: بنام
أنا: نامي
وتمينا ع نفس الوضعية ونمنا . .
.
.
حسين .~
كنت قاعد أطالع روضة وهي تمشي بالخيل . .
ما شاء الله عليها . . لها قدرة رهيبة في تعاملها مع الخيل . .
كل هذا عشان طقوسها اللي تسويها . . نفعتها وايد
يبالها تعلمني . . بس خوفي تعصب علي . .
فجأة بدا المطر يطق . . هذي أول مرة يطيح المطر ونحن بلندن . .
روضة: مطر
أنا: هيه وناسة . . أول مرة
روضة : هيه
بدا الجو يتغير . . السماء تسود شوي شوي . . والمطر يزيد ويزيد
أنا: روضة . . خل نرجع الخيل وندخل داخل . . المطر قوي
روضة: أوكي
بالوقت اللي يات فيه تنزل . . دوى علينا صوت رعد قوي . .
خلا الخيل ينقز . . ويتحرك بكل همجية . . يركض بصورة سريعه وعشوائية
وروضة عليه خايفة وتصيح . .
روضة: حسييييييييييييييييييييييين
حاولت أصارخ . . أبا حد ايي يساعدنا بس ماكو حد قريب
شكلهم من شافوا المطر دخلوا ونسونا . .
روضة: حسين شو أسوي خايفة ؟!
رحت يمها . .
أنا: حاولي تنقزي . . وأنا بمسكج . . ولا الخيل يعقج يلا
بنفس الوقت اللي يا الخيل يمي . . نقزت ومسكتها . .
روضة: أييييييييي
انا:شوفيج
روضة: ريلي تعورني . .طحت عليها
أنا: ترومي تمشي ولا !
روضة: ماروم . . تعورني
أنا [ أخليها تتوازن علي ] : بمشيج لين داخل
روضة: والخيل
أنا: برايه الخيل بيهدأ روحه وبنخبرهم . .
روضة: زين
أمشيها . . شوي شوي لين طلعنا من الاسطبل . .
وثيابنا تبللت من الخاطر . .
.
.
ذياب.~
دخلنا البيت بعد ما طاح المطر
سبحانك يارب ولك الحمد على هالنعمة
راحوا بدلوا ملابسهم . . وعقب ردوا
أبويه: أدعوا ربكم بهالمطر . . ترا الدعوة مستجابة
حمدان [ واقف عند الجامة ] : مايد
أبويه: ع الباب
أنا: هي هذوه
بطلوا له الباب وحصل نزاعة من أبويه لأنه ياي بهذا الجو
مايد: عمي أنا طالع من البيت مساعه ماشي كان
أبويه: زين دش خل حد من الشباب يعطيك ثياب . . بتمرض وتعال بخلي الخدامة تسوي لك شيء دافي
مايد: ماله داعي
حمدان: له داعي [ يمسكه ] أنا بعطيك يلا امش معاي
وشله وراحوا . .

تقرب خالد من أبوي
خالد [ يعطيه فونات ] : هذيل فونات بنتك
أبويه: أرجوان !!
خالد: هيه
أبويه: وأنا أقول شحقه مقفلات أثرهم عندك !
خالد: أبويه انا بعد شوية بسير المطار . . حهزت أغراضي
أبويه: خل المطر يخف . .
خالد: عادي يبه شوفه شوي وبيوقف . .
أبويه: إن شاء الله . . دير بالك ع روحك ولا بنت الناس
خالد: إن شاء الله . . [ وراح فوق]
إتي ديمة ومعاها جنان بنت العم سعيد
ديمة: بررد بررد . .
مع أنها ما مخلية شيء ما لابستنه . .
أبويه: أنتي المرة بنخليج بالبلاد . . حلات لندن بمطرها وثلجها وبرودتها . .
ديمة [ تحضن أبويه ] : اسكت الوالد خل أنعم شوية بحضنك الدافي . .
أبويه: طاعوا حتى شعرها معطتنه بكبوز . . !
أنا: أنا ما أحس ببرد . .
ديمة: لأنك عديم إحساس . .
الكل ضحك . .
أنا: وينه حسين . . إنتي يبالج حسين يعلق عليج ويسكتتج . .
أبويه: هيه والله محد يعرفلج غيره [ يسكت ] صح وينه . . ليكون بعدهم بالاسطبل . .
أنا: هيهك صج . . ليكون برع أنا ما شفته من مساعه
عمي عبدالله: بنتي روضة
أبويه: سير بسرعه . . عن يكون صاير لهم شيء . .
وأركض برع واجوف حسين من بعيد مساند عليه روضة . . شكلهم تعبان . . وملابسهم مبللة
انا: حسيين . .
رحت صوبه . .
حسين: متعورة . .
تقرب منها عمي عبدالله وشل بنته ع طول . .
وأنا ساندت حسين . . ودخلته داخل . .
شكلهم بيمرضون من المطر . .
أبويه: شو صار ؟!
حسين : الخيل نقز من الرعد وتم يركض فيها . . وعقب نقزت وريلها التوت . . مادري [ يعطس ] الحمدلله . .
أبويه: شكله هذي أعراض زجام . .
تقرب منا مايد
مايد: خلوه يبدل ثيابه . . شكله تعبان . . عن أتيه حمى
أبويه: ذياب وده غرفته ساعده يبدل وأنا بروح أييب لهم شوربة حارة . . تدفيهم
دخلته الغرفة ويا مايد . . ساعدناه بملابسه
ولبسناه بدله ثقيلة . .
وهو ما على لسانه غير
حسين: مافيني شيء
وشكله صدق صدق تعبان . .
عمي عبدالله: مايد يا ولدي تعال شوف ريل روضة تقول تعورها . . وما أروم أوديها المستشفى في هذا الجو
مايد: إن شاء الله
وطلع معاه . .
.
.
أرجوان .~
لما شفت المطر يطيح . . بزيادة . .
ومنصور تأخر خفت عليه وايد . .
وتميت أحاتيه . .
لين ما دخل . . فرحت له ع طول
أنا: خوفتني عليك والله
منصور: لا تخافين أنا جدامج ما فيني شيء
انا [ دمعت عيوني ]: خفت لا يصيبك شيء
منصور [ يفتح حضنه ] : تعالي
ما صدقت رحت له ركض . . ولميته
منصور [ يمسح ع ظهري ] : حبيبي لا تخافين . .
فاطمة: خوش خوش . .
بعدت من حضن منصور ع طول ونزلت راسي
منصور: نعم شبغيتي
فاطمة: عندنا يهال . . ماله داعي تسوون جي جدامهم بتخربونهم
منصور: يعني ما فهمتي الكلام اللي قلته . . ما قلت مالج خص فينا . . لو شفتيها بحضني ما تتنصخين بولا كلمة . . ! وبعدين وينهم اليهال
فاطمة: خليتهم فوق . .
منصور: زين فارقي سيري عندهم
فاطمة [ تتطالعني ] : هذي عدسات . .؟! من وين !
أنا : . . .
منصور: هذي عيونها
فاطمة: قاصة عليك . .
منصور: والله
فاطمة: ليكون هذي بنت أجنبية . . [ بخبث ] بنت حرام
منصور [ يمسكها من شعرها ] : يا ويلج لو كررتي هالكلام مرة 2 . .
فاطمة: تضربني عشان بنت الحراااااااااام
منصور: لا تخليني أطلقج . .
فاطمة [ بخوف ] : لا خلاص
منصور: حسبالي . . قومي سيري شوفي بناتج . . عن يصير فيهن شيء ترا ما برحمج
فاطمة: ليش يعني تحبهم أكثر مني . .
منصور: كيفي بناتي وحر
فاطمة: دام تحبهم ليش تعايرني اني ما اييب أولاد . . [ تتطالعني ] ليش تزوجت علي !
منصور: كيفي . .
فاطمة [ تروح فوق ] . .
أنا: منصور . .
منصور [ يحضني ] : ما عليج منها . .
أنا : هدني عن حد ايي
منصور: محد بيي . . تمي إهنه لا تروحين . . ما أطيق الدنيا دونج
أنا: فديتك يارب . . أنا اهنه دوم . . ما بخليك إن شاء الله
منصور: علني فداج . .
.
.
علياء .~
قاعدة مع عذوب بالغرفة . .
توه رادين من غرفة رواض وريم . .
مايد ولد عمنا قال انه بس فيها التواء خفيف . . وما بحاجة لمستشفى
أنا: عذبة ما خبرتيني صح . . شو قال الدكتور . . رديتي من المستشفى وما قلتي لي
عذبة: ماشي . . قالوا أنه الدم ناقص بريولي . . ويمكن يزرعون لي نخاع . .
أنا: زين يعني فيه أمل . .
عذبة [ تهز رأسها ] : الأمل ضعيف . . الدكتور يقول وايد متأخرين . . المفروض عقب الولادة ولا بعمر سنة ولا سنتين . . من الحينه بعد 18سنة . .

أنا: ليش شو محتاجين !
عذبة: محتاجين متبرع . . بس لازم يكون متطابق لدمي بس ما نقدر نسويها الحينه . . بنرجع البلاد . . يمكن بالأجازة الياية
أنا: ليش نطول !
عذبة: يمكن ما أمشي ع طول . . فيها نوع من الخطورة . . يمكن جسمي ما يتقبل الخلايا اليديده
أنا: أنا اللي بتبرع لج . . وجسمج غصب عنه يتقبل جسمي . . قصوره بعد يرفضني
عذبة [ تضحك ] : لا والله
أنا: هيه ولا ترا بختار لي حد ثاني توأم لي . .
عذبة: فديتج ياربي
أنا: زين ارتاحي شوي . . أنا بطالع المطر من الجامة
عذبة: لا تقعدين يمها عن يصير شيء
أنا: زين بقعد ع الكرسي اللي يمها
عذبة: أوكي
قعدت ع الكرسي الهزاز . . ومسكت قصة أجنبية خذتها من المكتبة الي بالبيت . . وقعدت أقرأ

[ريح ﺎلمطر جدد حنين ﺎلعاشقين كلن توجہ ناظره يم ﺎلسماء كلن تذكر في حياتہ غايبين ﺎلقاع ممطوره و داخلهم ظمآ $]
.
.
العصر بتوفيت لندن . ~
أرجوان .~
بعد ما وقف المطر . . تغدينا وريحنا شوية . .
وعقب طلعنا لبيت أهلي . .
ماسكة عمري . . خفت يقولون لي مانبيج . .
خفت خالد يتهجم علي نفس هذيج المرة . .
خفت وايد أنه يصير اي شيء . .
منصور: حبي لا تخافين . .
أنا: إن شاء الله
منصور: يلا سمي بالرحمن ونزلي وأنا معاج
[ سميت ربي بداخلي . . وعقب نزلت ]
حطيت ايدي بيد منصور . .
دقيت الجرس . . وعقب دخلتني الخدامة
وخبرتها تقولهم انه منصور وياي عشان لو حد يتحجب . .
أول ما دشيت شفت أبويه . . ركضن له وحضنته
أنا: أبويه . . اشتقت لك
تميت فترة بحضنه . .
ما بعدني عنه غير . .
ذياب: ياخي شوفي ريلج شقا يطالع أبويه .. مات من الغيرة
قمت من حضنه . . وأنا مستحيه . .
أنا: ذياب بالحيوان فشلتني
ذياب: طاعوا الحبيبة بدال لا تقولي ولهت عليك تسبني
أنا: أبويه وينهم ؟!
أبويه: أختج ديمة مع جنان . . لاصقة فيها وايد . . وعندهم شغل فوق . . جوري بالمطبخ مع غاية وأم سهيل يسوون حلويات وتعلمهم . . حسين مريض مزجم ومحموم من المطر
أنا: سلامته والله . . الله يعينه
حمدان: ميود يا الحيوان أقولك بلاها الشقة تم إهنه دامك ما قادر تدخلها . . [ وسكت يوم شافني ]
دخل معاه مايد اللي يوم لمحني . . رد ع ورى . . بس مسكه حمدان وهمس له بشيء . .
حس منصور بهذا الشيء وإطالعني يبا يشوف ردة فعلي ..
ما أخفي عليكم . . دقات قلبي طبول . . بس نظرتي علقتهم ع منصور . . مابا أشوف نظرات مايد . .
أبويه: مايد حمدان تعالوا سلموا ع النسيب
حمدان [ يوايه منصور] : شحال النسيب
منصور: يسرك الحال
مايد [ مد ايده وسلم ع السريع بدون ولا كلمة ] : أنا بروح
حمدان: هيه بنروح نقعد بالحديقة
أبويه: ماكو طين ولا ماي !
حمدان : الخدم مسحوا الكراسي توهم . . وكنا طالعين بنقعد برع
منصور: زين شلوني بدربكم أنا بسير وبخلي أرجوان عندكم لين بالليل
أبويه: زين تسوي أشتقنالها
تمنيت أنه منصور يغير رأيه ما أبيه يروح مع مايد . . ما أبي يصير أي أحتكاك بينهم !
بس راح معاهم . .
ذياب [ لما شاف نظراتي عليهم شدني لحضنه ] : ولهت عليج تومي
أنا [ ابتسم عكس اللي داخلي ] : حتى انا
أبويه [ يقرب مني ويبوسني ع رأسي] :سامحيني يالغلا . .
أنا: مسموح يالغالي . . مافي بنت تشيل على أبوها [ سكتت ] أبويه برجع البلاد مع منصور باجر
أبويه: هذا ريلج وملزومة تكوني معاه . .
أنا: جي الرأي
أبويه: هيه . . تصادفتي ويا مرته !
أنا: تدري أنه معرس !
أبويه: هيه أدري . . وأدري أنه بخاطرج من يوم صغيرة . . ومحد بيسعدج غيره
أنا[ ابتسمت له ] . .
.
.
ديمة .~
بعد ما طلعت من غرفة جنان . . مريت ع غرفة ابوها . . لأنها قالت لي أشوفه وين . . واخليه بالغرفة . . ع ما تنزل اللوحة تحت . . وتسويها له مفاجأة بس ماشفته داخل . . فمريت المكتب
دقيت الباب . .
بو جنان : تفضل
دخلت وسكرت الباب
أنا: سلام عليكم
[ كنت لابسة . . جينز وقميص طويل أبيض . . ومحطية كاب ع راسي . . ]
بو جنان: وعليكم السلام
قعدت ع الكرسي اللي جدام المكتب وهو كان قاعد بالمكتب . . المهم
انا: شحالك ؟!
بو جنان : تمام
أنا [ أعق الكاب ع المكتب وأكشش شعري ]
بو جنان: أبي أفهم شو الي فيج .؟!
أنا [ بحيرة ] : شو فيني !
بو جنان: شعر بوي . . حركات صبيانية . . وعرفت بعد أنج تلعبين كورة ويا أخوانج صح هالكلام !
أنا: صح . .
بو جنان: عندج عقد نفسية من شيء ؟!
أنا: انا مو مريضة
بو جنان: العقد مب مرض . . ها شيء نفسي . . مب جسدي
أنا: ما فيني شيء ؟!
بو جنان: شو اللي خلاج تكونين بوية !
أنا [ بسرعه ]: انا مو بوية . .
بو جنان: عيل شو . . شو تسمين هالنوع ؟
أنا: احب أكون ولد . . بس ما أقلد الاولاد بكل شيء . . حركاتهم . . حبهم للكورة . . السيكل . . الرياضة العنيفة . . بس
بو جنان: تؤمنين أنج أنثى
أنا: هيه . .
بو جنان [ سكت وعقب قال ] :حد حاول يتحرش فيج ؟!
انا[ صدمني السؤال ما كنت متخيلة أنه يسألنيهذا السؤال ] . .
مرت ببالي كل اللي حصل لي . .
أنا: هيه . .
.
.