| ||||||
| قصص و روايات تهتم بالقصص المنقوله وقصص الاعضاء الطويلة والقصيرة |
 |
| | LinkBack | أدوات الموضوع | انواع عرض الموضوع |
11-01-2008, 10:42 PM
| رقم المشاركة : [ 31 ] | |
| عضو جديد  |  يسلمووووووو
__DEFINE_LIKE_SHARE__
| |
| ||
 |
|
11-05-2008, 03:03 PM
| رقم المشاركة : [ 32 ] | |
| عضو ماسي ![الصورة الرمزية +[ ملاك الحسن ]+](files/customavatar/avatar634_1.gif){kind=avatar} | بيدي دفتــري بصفحاته البيضاء المعهودة.... قد تبدو صفحاته { فارغة} للجميــــع ... ولكنني أرى // بوضوح // ×× خفاياهم مسطــّرة بها... جلست في مكاني المعتاد...عند هذا { البــاب} .... فتحت صفحـــة جديــــدة من دفتري...وبدأت أخــط مـــا أرى... هــــا هــــي ملامحهم بدأت تظهر لي شيئاًً فشيئاًً........ لـــــــي ولكــــــــــم لخفــــايا قلــوبهُم { بيــــبان } دقـيتهــا البــارحة و // طلـــّيت ×× ××××××××××××××××××××××××××××××××××××××× الجــزء الخـــــــــــامس ][- كــــــانت اتحس بحرارة فويههـــا من الاحراج وهي واقفه بهالمنظر جدامه ..ما كانت تتوقع انها بتجابله ...بس اللي صدمها صدق انه كان مدبر لهاللحظات ...ومطرش ساروه اتنفذ خطته ...منزله راسها وتتمنى لو الارض تنشق وتبلعها ولا انها تنحط فهالموقف ..هي من بعيد وما تقوى تشوفه وتستحي ...فشو حالها و هم بهالقرب من بعض؟؟؟؟ ... مـــــــايد : حصوص بيني وبينج موضوع لازم أحط له حــــد ... حصوص نشف ريجها ...ياربي شو بلاه ميود ...ومب قادره انها حتى ترفع نظرها صوبه ... مــــايد وصوته فيه جدية واضحه ما تعودت عليها حصوص : حصوص بكون صريح وياج وما بجاملج ...انا احبج والكل داري وانتي بعد تدرين ..فليش تتهربين كل ما انحطينا بموقف يجمعنا ؟؟ خبريني ؟؟ والكل داري اني لج وانتي لي ؟؟ خاصه فالفتره الاخيره وايد قمت احس انج اتطنشين وبالعماله...تدرين أجلب المواقف اللي يمعتني بج من بداية احساسي صوبج ...وما لقيت اثبات ولا لقيت خيط ايدلني على احساسج ...هل انج اتحبيني والا مب حاسه بشي صوبي من الاساس الله يعلم بج ...بس انا ابغي يوابج احينه ...قولي اتحبيني والا ؟؟؟ حصوص منصدمة ومب رايمه اتفج عينها رغم انها منزله راسها ...ما توقعت في لحظة ان ميود بيواجهها ....معناته صدق ...رمسة موزان صدق...يحبنيه .....حصوص فحياتها ما حست بالغرابه شرات احينه ...شو يبغيها اتقوله ...انها توها درت انه ايحبها وما كانت تعرف بشعوره أبد ؟؟ والا اتقوله انها كانت تعده شرات ثاني وغيرهم ...مجرد ولد عم ...هذا وهي توه شعور يديد صوب ميود قام أيـيها ....جي والا جي ...مستحيــــــل ومن سابع المستحيلات انها ترمس ....طبعها حشيـــم واتحط لكل شي حد ...وحتى لو كانوا ايحبون بعض ...مالها داعي هالحركات ....وماله داعي هالموقف .... مــــــايد مشى صوب حصوص فجأة وصار جريــــــب منها ..وبدا ايعلي صوته : اسمعي انتي ....(حصوص فجت عيونهاا وهي بعدها منزله راسها ....وميود ما كان أي شي في باله غير رمسة موزان ....حصوص شايفه عمرها عليك ...وانا ما ارضى على خويه وحده اتذله في حبها ...رويتها صورتك وقالت منوه من خوانج ....مسويه عمرها البريئة اللي ما عندها خبر واونها ما تعرف انك اتحبها ....قامن هالجمل ايردن فراسه وهو مب قادر ايود عمره من القهر...سكوت حصوص كيف افسره ؟؟؟ مستحيه اتقولي انها ما اتحبني ...والا مب مسوتليه سالفه وعادتني ولا شي لدرجه انها ما تبغي اترد....) ...ارمسج انا ....صح اني احبج ومساونج بالروح ..بس ها مب معناته انج تخقين عليه واتشوفين عمرج ....فاهمة ( يزاعج عليها )..وانا لي مقدار ولا ارضى ان أي حد ايهينه ....ولو كنتي بنت عمي ...بعدين دامج ما تحبينيه وشله ما رمستي من زمان ؟؟؟؟ عايبنج سكوتج وايد يعني ؟؟؟ كنتي ترومين فأي لحظة اتطرشين أي حد ايخبرني وانا والله اني حتى ما بفتكر فيج ..ارمسج انا ردي عليه ؟؟ حصوص خانقتنها العبره و متغصصه ..وحست بدمعه عند ابواب مدامعها ...زعلانه على منظرها ..وعلى رمسته ...وعليه هو وظنه ...كيف اهون عليك يا ميود واتسمعنيه هالرمسه ...كيف ؟؟؟ ميود قرب أكثـــــر و بعصبيه قبضها من اطراف اصابع يدها بقوة وودرهاا جنه ايفرهن ...وهو يقولها : ما تفهمين شو ؟؟؟ هنيه حصوص ما رامت اتيود عمرها وحست بعمرها انهارت ولا رامت توقف ع ريولها ..دموعها خلاص اعلن الاستسلام ..وهي غطت ويهها بيدينها ويلست ع الارض مغطيه ويهها وضامتنه ..ومستسلمه لدموعها ....رمسة ميود ونظرات الكره فعيونه ونبره صوته ولمسته من اشوي ..اشيا يديده ما تعودت عليها من صوبه ... ميود ما عرف شو ايسوي ...ياربي حصوص اتصيح وبسبتيه ..بالمره ما كنت قاصد اني اوصلها لهالدرجه ....بس كنت ابغيها اتحس وابغيها تعترف انها اتحبينه ...ما رمت ايود عمري ولا وعيت الا وانا اعلي صوتي عليها واهزبها ....( يود راسه بيدينه الهنتين وجنه مصدع ...نزل يده اليسار ع قلبه يتهيس دقاته اللي كانت قويه ومتقاربه ...واليد الثانيه نزلت ع ثمه وغطته وهو يراجع عمره فصمت وايفكر بالرمسه اللي قالها ....نزل يدينه وهو يتصدد يمين ويسار ومب قادر انه يفكر بشي ....وزقرها .. ميــــــود : حصــــوص ... ما لقي يواب غير صوت صياحها .... ميــــــود نزل راسه بياس وخطف عنها ..وراح ... حصة تمت اتصيح وهي متغصصه ...كان احساسها شرات اللي ايعاقبونه بليا ذنب ...شرات متهم بريئ والكل رافض ايصدق انه مظلوم ...احساس صعب انه ينوصف...احساس ما يدركه ولا يعرفه الا اللي ميربنه وانحط في مكان حصة ....صوت صياحها وصل ساره الصغيرونه اللي كانت ورا الباب تسمع الحوار وهب فاهمه شي منه ...وبسرعه سارونه فجت الباب يوم حست ان حصوص تصيح بصوت اعلى ...خافت ان هلها يسمعونها واينازعونها لانها هي مقفله عنها الباب ...ما درت ان اللي فحوص اكبر عن جذي .... ساروه وهي تطلع عند حصوص الي كانت متاجيه ع طرف الباب ..حست بالخوف يوم شافتها اتصيح وتلومت فيها ... سارونه : حصوصي حبيبتي ...لا اتصيحين... ميود زاعج عليج ...والله اسفه هو قاللي هاتيها وقفلي عنها الباب بقولها شي ..ما كنت اعرف انه بيضربج والا ما بفج له الباب ....( حصوص بعدها تصيح ..وراحت سارونه حليلها تلوي عليها وهي تعتذر ) .... ++++++++++++++++++++++++++++++++++++++++++++++++++ ++++ الســــــــــاعة 3 ..بيــــــــت قوم ليلــــــى الاغاني شاله الغرفه ...وليلوه فاجه شعرها ...وتتطالع عمرها في المرايه بغرووور وثقه كبيره ....وطرى ع بالها خلفان حبيب سموي ...فقالت بترمسه ....راحت عند شبريتها وانسدحت ...خذت تيلفونها ولقت فيه مسج من حارب (( اشحـــــالج حيــاتي ؟؟)) ابتسمت ليلووه عشق حارب ايخليها اتحس ان كل البنات يحسدنها ...ونست انها في الواقع معشمتنه بحب بنيه ثانيه ...ومعيشتنه فوهم كبيـــر...وان هالحركه يمكن اتكلفها ثمن غااااالي ... اتصلت فخلفان ... خلفان : هلا مريومي ... ليلى وهي تلعب بشعرها : اهليـــــن ..اشحالك .... وتموا الثنين يسولفون .....والحلوة نست اترد ع حارب..اللي طبعاً لو ما كان فبيت عمه كان بيدق مب الا بيطرش مسج ... ++++++++++++++++++++++++++++++++++++++++++++++++++ + نفـــــــس الوقت فبيــــت بو مـــــــايد ... مـــــايد من يوم دخل الميلس وهو مب في حاله ...متضايج ومتلوم ...وايفكر بالحص والرمسه اللي قالها لها ...وهل رمسته كانت في محلها ...وايفكر بالحص وشو الحال عليها فديتها ...لآيكون بعدها تصيح ...فديتها احساسها رهيف ولا تقهر الرمسه ... وحروب الثاني متحرقص مطرش فوق الخمس مسجات لليلوه ولا ردت ....فكر انه ايدق وايرمسها ع اساس انها واحد ....خلااص حروب وصل مرحله ما يروم يستغني فيها عن ليلوووه ...ظهر تيلفونه ودق ...وماشي رد من ليلوووه ...غريـــــــبه ....وينها ؟؟ ++++++++++++++++++++++++++++++++++++++++++++++++++ +++ الســــــــاعة 4 العصـــــــر بيــــــت رواضـــي توها ريمــــــان مسكره عن رواضي ربيعتها الوحيده ....باجر ان شالله بشوفها في الجامعه ....يقولون نصــور بيــي بـــاجر ....اممممممممم من زمان ما ريته ....الا احيده مزيون وحبوب ....دومها ريمان تمدحه و اتخبرنيه عن مواقفه الطيبه وياهم ...الا اشوفها قامت اتشكى من غيباته عنهم ... انا ما انكر اني احيان افكر فيه ...الا ارفض اني احط أي شي في بالي...قبل يوم كنت اروح لريمان كنت اشوفه هناكي وايتم يستهبل عليه ويسولف يلين تخرج من الثنويه واتغير ....اكيد حس انه لازم انحط حدود للسوالف ...واتوقع انه عادني شرات خته ريمان لا اكثر ولا اقل ...يالله احسن لي وله ... اووووه منوه يدق الباب ...اكيد لطوووف ...من وين لي خت غيرها ^_^ رويض : قربي قربي لطوف لطيفه خت رواضي وهالسنه بتتخرج من الجامعه : اعلووومج دبوووه رويض : الحمدلله ...تعالي يلسي وشله واقفه ويلسن هن الهنتين ع شبريه رواضي ... رواضي : بلاج لطوف ؟؟ لطوف : ولا شي الا انتي بلاج مبتسمه ومستانسه فرحينا وياج ... رواضي : ولاشي ..الا تعالي صح نصور بيي باجر ..خو ريمان ربيعتيه ..وبيسوون عزيمه بتيين وياي ؟؟ لطوف اتطالعها بمكر : هيــــــه سودى الويه هذا اللي مفرحنج قري وقوليلي انج مستقطعه تبين اتشوفينه ... رواضي دزتها : ايه عن السخافه ...لا اتمين اتقولين جي انا مستانسه لني بشوف ريمان .. لطوف : ههههههه علينا تراج كل يوم اتشوفينها في الجامعه ... رواضي : بس عادا فبيتهم غير ....لطوف دخيلج لا اتمين اتعيدين هالرمسه والله ازعل عليج .. لطوف : ههههههه خلاص انزين بسم الله ...الا تعالي شو هالدفتر اللي دومج اتشخطين فيه ( وسحبت لطوف دفتر اخضر رواضي فارتنه ع المخده وتوها يايه اتفجه ) رواضي : لا لا لا ( وتسحبها من يد ختها ) الا هالدفتر ... لطوف : ياللــــــــه اللي يسمعج ايقول حاطه فيه اسرار الدوله العثمانيه ...المهم قومي ويايه المطبخ انسوي كيــك وسويت .. رواضي : متفيجه .. لطوف : دخيلج عادا رواضي بتي ربيعتيه وما فيه اعابل اروحي ... رواضي : خلاص افا عليج ثواني والحقج المطبخ ... لطوف : فديت ختيه دريتبج ما بترديني ..... نشت وباست ختها ع خدها وراحت رواضي : ههههههههههه صدق انج مصلحجيه عوده يا لطوف ... صدت تتطالع دفترها : لالا انت المفروض تنحط فآخر مكان الواحد يوصله ......وتمت اتدور لين اخر شي قالت بتحطه في الكبت بين ثيابها ... ++++++++++++++++++++++++++++++++++++++++++++++++++ +++ الســـــــــاعه 4 ونص العصر ..بيـــت بو مـــــايد في الصــــــــاله ... الكل مستانس ومحتشر ..وحصوص اتشاركهم السوالف اشوي واشوي تصخ عنهم ...شموه حست ان فيها شي ...ربيعتها واتعرفها ...من يوم يت من خاري وهي متغيره ....بس قالت عقب بتتخبرها .... وحتى سارونه الصغيرونه واللي وعدت حصوص انها ما تخبر حد باللي سمعته واللي صار اليوم مستانسه ومندمجه بالسوالف ...قلوب اليهال واتعرفونها ......تموا عربانا اشوي وردوا كلن بيته .... وعند حروب حارب عقب ما رد بيتهم وهو يدخل حجرته وايغني .....شدني الشــــوق يا راعي العيون الغضية ..والوله جرني صوبك وعفت التجافي ...... فديتج يا ليلى من متى مب مرمسنج ....اطرش مسجات ولا ترد وادق الها وطاف اشو سالفتها ؟؟ وقال بيدق بعد مره وبيشوفها.... رن تيلفونها يلين قطع ولا ردت .....اممممممممم شو بلاج ليلوه ..تتغلين عليه اشووو ؟؟؟؟ يمكن مشغوله ؟؟ ماعليه بشوفها فليل ... ++++++++++++++++++++++++++++++++++++++++++++++++++ ++++ الســـــــــاعة 5 ونص العصر .. بيـــت بو حميــــد شموه يالسه فحجرتها واستانست بالزياره لهل حصوص ..وحستهم ناس طيبين ....ومعاملتهم للناس وايد حلوة .....ومن وصلت على طوووول اتصلت فحصوص ..واللي قامت اتخبرها باللي صار وشموه فاجه حلجها ومب مصدقه يللي تسمعه ...امممممممم وحليلج يالحص ...شكلج بديتي اتحبينه ...والله اني خايفه عليها من هالحب الا ساكته عنها ....ما ابغيها تنصدم فيه فيوم ....ولا ابغيها اتحس باللي حسيته .....هيــــــــه جن اللي حسيته اشوي ....احينه انا اعرف مبارك من سنتين وشي ...سنة كامله كنا فيها ويا بعض ..وسنة ونص فراق ...الله يستر من الايام اليايه ... راحت شموه وحطت عمرها ع شبريتها غمضت عينها ...تراوت الها صور واحداث واسامي وقصايد....عيّت انها تنساها ...مواقف من محبة جديمة ويمكن من غلطه كبيره علمتها الكثيـــر ....من المــــــــــــاضي ... عودة للمـــــــاضي ... الليله لي ردت فيها من السفر....كانت هلكانه ...من دخلت غرفتها راحت خذت شاور سريع ولبست بجامتها وانسدحت ....فجأة ذكرت اللي صار اليوم في المطار وراحت صوب شنطتها ..ظهرت الورقه وردت شبريتها ....رقدت ع ظهرها ...وفجت الورقه وهي حاسه بخوف ....ايميله ورقمه ...امايه ....منوه ها ...وليش ايسوي هالحركه .....جسفت شموه الورقه وضمتها ونستها فتره شهور.....الا مره فضولها و شغبها الطفولي اللي كان ساكننها ذاكي الوقت خلاها تتجرأ و تضيفه عندها ع المسن ...ورغم ان عندها تيلفون الا حست انها حركه وايد قويه وكبيره انها اترمسه ...فقالت بترمسه عالمسن وبس ...الا فتره وبتحذفه .....شغلت كمبيوترها ...وكانت الساعه 1 الليل وكان صباح عيــــــد الفطــــــر..وكعادتها ماشي رقاد صباح العيد ههههه..دشت المسن ما لقت حد حتى حصوص محد ....اممممم يللا بضيفه ....من حطت ايميله وضافته على طول حدر ...زاغت شموه هههههه بسم الله ....وعلى طوووووووول رمسها ... من وسط غربة أحزاني أناديه ( مبارك ) : هلا واااااااااااااااااااااااااااالله شوقـــي عليـــكم ماله قياس..أكبر من احساس المودة ( شموه ) : اهلين من وسط غربة أحزاني أناديه : اشحالج شخبارج شو مسوية .. شوقـــي عليـــكم ماله قياس..أكبر من احساس المودة : الحمدلله .. من وسط غربة أحزاني أناديه : وين هالغيبه ما بغيتي اتدشين ؟؟ انا فقدت الامل قلت خلاص... شموه في خاطرها ...اوووه شدراه اني انا ... شوقـــي عليـــكم ماله قياس..أكبر من احساس المودة : انت عرفتني انا منوه اصلن ؟؟ من وسط غربة أحزاني أناديه : رااااااعية لبنان =) شوقـــي عليـــكم ماله قياس..أكبر من احساس المودة : ............................ من وسط غربة أحزاني أناديه : واعلومكم ؟؟ شوقـــي عليـــكم ماله قياس..أكبر من احساس المودة : الحمدلله من وسط غربة أحزاني أناديه : هيه صح ما قلتيلي شسمج ؟؟ شوقـــي عليـــكم ماله قياس..أكبر من احساس المودة : انت شسمك ؟؟ من وسط غربة أحزاني أناديه : وياج مبــــارك ...من العين الا عدنا بيت فبوظبي ..وانتي ؟؟ شوقـــي عليـــكم ماله قياس..أكبر من احساس المودة : اسميه ميراا ( هههههههه ما بقوله اسميه الصجي ) ....ومن العين من وسط غربة أحزاني أناديه : والنعم والله ....جم عمرج؟؟ شوقـــي عليـــكم ماله قياس..أكبر من احساس المودة : 17 وانت ؟؟ من وسط غربة أحزاني أناديه : .19.....هيه صح ....مبـــــــــاركن عيـــــدج ^_^ تموا ذاكي اليوم يسولفون سوالف عاديه ....هو ايخبر شموه عن هله وعايلتهم وربعه ...وهي عن علوم المدرسه ......( شموه تفكر ) ...تمينا فتره طويله ع المسن ...تقريباً 8 شهور ....24 ساعه نرمس بعض....( تبتسم شموه ) ...ما اعرف كيف يا مبارك ...ييت من صدفه و ملكت قلبي ...بس اللي اعرفه انك ما ملكته من فراغ ...طيبة قلبك ...واسلوبك ...و طهارة روحك اللي ما شفتها عند أي حد غيرك يبرتني اني احبك ....اعرف عمريه عدل ...واعرف قلبي ...عمري ما حبيت لا لشكل ولا لجمال ...القلب الصدوق هو اللي يعنيني ...وانت كنت اصدق مثال على القلب الصافي ...اممممم تمينا كل هالفتره من غير لا اشوفه ولا ايشوفني ...ولا قد طلبني ايشوف صورتيه ..ولا قد طلبته اشوف صورته ....يمكن ما اهتميت لان لقيت فيه اشيا واشيا اتعوض عن الشكل .... صدق يلين هاليوم ما لقيت انسان شراتك ...ما قد طريتليه سالفه شينه ...وما قد يبت طاري أي شي يغضب ربي ....بس اكثر شي كان يلفتني..نكاته الحزينه اللي كان يحطها ..... كنت دوم افكر بيني وبين نفسي شو سالفة هالانسان ؟؟؟ كل نكاته حزن و هم وجرح وخيانه وموت!!! بس ما حبيت اعلق ...قلت اودره هو وراحته ......بس يوم اذكر كيف ما كان يستغني عني استغرب ....كنا اقل شي نرمس بعض 3 مرات في اليوم ..اقل شي...وحتى لو ظاهر بيرمسني من مسنجر تيلفونه .....ايام وايام ....بس خبرته ويا الوقت ان اسميه الصجي شما ....... كان دوم ايسمعني قصايده ( شموه تغمض عيونها وتمر ع بالها ابيات قصايده ) ....وكانت كلها حزن في حزن ...شرات نكاته اللي كلها كانت من تاليفه .....وانا ع ذاكي الوقت كان قلبي خـــالي من الحزن ولا اعرف طعمه الحزن حتى ......فما كان يرضيني حاله اشوفه حزين ومستهم .....تعلقنا فبعض انا وهو عقب هالفتره كلها ....ويا الوقت ..حبيته ...وهو حبنيه ...ما قالي اياها بس احساسي دلني عليه .....وتصرفاته كانت واضحه .....اذكر مره عقب ما سمعني قصيدته ....قاللي اشتركي فمنتدانا ....قلت له لا مستحييييل لا اتحاول ما احب شي اسمه منتديات .....سجلت في المنتدى الا ما شاركت بس كنت ابغي اسكته ههههه مرت الايام ....وعقب عشر شهور من اللي بينا كنا ع المسنجر مبارك : شموووه شموه : هلا مبارك : ما قد فكرتي عن الحزن فأبياتي ؟؟ شموه قالت في خاطرها اكيد احينه بيخبرني أخيــــــــراً..: هيه ....دوم كنت اتسائل الا ما حبيت ارمس مبارك : بخبرج سالفه ما تعرفينها عني .......تدرين ...انا من سنين حبيت بنت عمي ..وهي كانت اتحبني ...يعني ترومين اتقولين من الحب اللي ينولد من الطفوله وينضج ويا الوقت ....هلنا كلهم ايعرفون بهالشي .....ونحن عايلتنا كل اسبوع تتيمع فبيت حد من العمومة والا فبيت الوالد العود ...شقولج قبل سنة وشي ...كنا متيمعين فبيت عمي اللي هو بيت بوها .....وهذا اكثر واحد احبه من عمومتيه كلهم ...ولا اعرف جن غلاه من غلاها والا غلاها اللي من غلاه.....المهم فذاكي اليوم يا شموه لاحظت انها ما ظهرت من حجرتها الا وقت العشا ...وطبعاً الرياييل فصوب والحريم فصوب .....الا لمحتها وانا ظاهر كان شكلها متغير و مستهمه ......فنفس الليله وصلني خبر من وحده من يهال العيله ...ان بنات عم البنيه سوّن فيها مقلب ...مزحه ..وقولي جذبه انا يلين يومج هذا ضحيتها ....تدرين ...قالن لها اني ما احبها واني العب عليها ....وكل رمستيه و المواقف الطيبه اللي يمعتنا خريط ....واني مسوي نفس الحركه ويا كل وحده من بنات عمومتيه البقيه ...اتخيلي شموه ؟؟؟ كلهن مره وحده عليها ...وهي للاسف صدقتهن .... شموه : بس كان المفروض تتاكد قبل لا اتصدق ... مبارك : هيه هذا اللي يا في خاطري ...الا هي وثقت فيهن ...اقولج من وصلني الخبر حاولت ارمسها بأي شكل ولا قدرت ...تميت اطرش هالياهل تزقرها الا كل محاولاتي فشلت ....رديت بيتنا وانا فحاله ما يعلمبها غير ربج ....ما رقدت ذيكي الليله ...يلين وصلني ثاني يوم افضع خبر سمعته في حياتي ..... شموه : خير ؟؟ مبارك : توفت ....اتخيلي ... انا انصدمت ...وحسيت بحزن كبيـــــــر ع حال مبارك ...ما قدرت اقوله أي شي غير انه يدعي لها بالرحمه ....اخيراً عرفت سر هالحزن اللي فأبياته و نكاته ....معذور يا مبارك ..معذور وما الومك ... عوده للواقع .... غمضت شموه عيونها وهي تسترجع هالاحداث اللي ما فارقتها رغم كل شي ....متى بنساك يا مبارك ....متى ... ++++++++++++++++++++++++++++++++++++++++++++++++++ ++++ الســـــــــــاعة 8 الليــــــــــل ...بيــــــــت بو نــــــــــاصر ام ناصر وعبدالله والريم وبو ناصر يلوس في الصاله .... الريم : يالله ما اصدق ان نصووور بيي باجر ...فديته والله عبدالله : هيه بدت جذابووه ...البارحه اتقولي مب مستانسه ع شوفه الا تبغي اتشوف الهدايا اللي يايبنها .... الريم فاجه عيونها : انا يالجذاب ..امايه شوفي عبيدات ... بو ناصر : بس يوزوا عن الضرايب ....خوكم ان شالله عقب ساعات بيوصل ع خير ....وهلنا وربعه باجر بيوون عدنا ع الغدا ....عساج ما نسيتي حد يا ام ناصر في العزيمه ..ادريبج دومج تذكرين هلج كلهم وتنسين هلي ... عبدالله : لالا ما عليك بويه انا تميت ع راسها ميود الها لسته ...ومن تسكر عن حد اشطبه من اللسته .. الريم : ههههههههه الله واللسته عادا جنها من يديك...اكيــــــــد ما فيها غير عيال الحاره الفتافيت قوم سعوود وفصووول ^__* ههههههههه عبوووود : مب راد عليج ايقولج الحقران ايقطع المصران ... الريم : ههههههههه وحليلك ..( ونشت عنهم الريم ..) راحت حجرة خوها العود ناصر ...شغلت الليتات ..وتمت تتأمل حجرته ..ما قصرت امايه رتبتها هي والبشاكير الا ما زقرتني اعابل وياهن ....حطت لخوها مصحف ع الكوميدينه ....ودعت في قلبها ...الله يحفظك يارب ويهديك .... ++++++++++++++++++++++++++++++++++++++++++++++++++ ++++ الســـــــــــاعة 11 الليــــــــــــل .....بيـــت بو سلطــــــــان حصوص يالسه ع الشبريه ....واتفكر بختها نوف ...والله اشتقتلها ....عساها بس مرتاحه ويا منصور ....اوووه ..ويا خو مبارك ...شو هالصدف ....الله يعيـــــــنا والله ( وجان يطري ميود ع بالها ) ....والا ميــــــــود جي اتسوي فيــّه ؟؟؟ صدق ما عليه ....اول شي مخلي خته تقفل عليه الباب واتودرني خاري بذاكي المنظر ...وعقب يظهرلي هو وعايبنه ايشوفني جي ...صدق انها اخر مره اعق عباتي فبيتهم ....والا الرمسه اللي قالها ( غطت حصوص عيونها وهي تذكر احساسها ورمسته ) ياويلي ...شو كان يبغيني اقول مثلاً؟؟ هيه حتى انا احبك واااااايه يالفشـــــــايل ....بعدين اذا انا بنفسي مب متاكده من احساسي صوبه ...توني اساساً انتبه لمشاعره ...كيف يتوقع اني بعشقه بهالسهوله ؟؟ والا هو يتحراني اعرف بمحبته .....لا حشااا والله ما عرفت الا من موزان ....( تنهدت حصوص ) هزبني ...وزاعج عليه ...وكله كوم ويوم زخ صبوعي وفرهن كوم ثاني ...حسيت ابها اهانه ...ومن منوه ؟؟ من ولد عمي ....انا حصوص اللي ما اذيت حد واحسب للناس الف حساب ..اييني اللي يقول انه ايحبنيه وايسوي جذي ....اف ...هيه والله صدقتي يا شموه ان المحبه مب هينه ...مب هينه بالمره ..... سكرت ليتات الحجره ...وحطت راسها ثواني ..ويتهيأ الها انها رقدت ..... ما كانت هي الوحيده اللي سهرانه فهالوقت ...ميود من الصوب الثاني ايحاتيها ..ومتلوم ...مب عارف هل اللي سواه صح والا لا ؟؟؟لا والقهر ما خذت منها لا حق ولا باطل....ما رمست ...سويت اللي سويته عالفاضي...... :: من خفايا قلب { منكــــسر } :: { أقســى} لحظـــات العمر نحس ابها نعايشها بليـــلة خلنـــــا فيها جفـــانا والقلب منــــه مكــــــدر }~ مشـــاعر بداخلنــا اتفجر وهي { مكســورة // ذليلة و { الحــزن} اليـــوم قصيــدن ما توفيه / الاسطر غريـــب حبـــن } هيــّمبنا } هز ذيج القلوب الجليلة و غريــــب // حبن انغرس بيـــنا أثمــــر و زهـــّر كلن و ظنيــنه محترنــهـ }~ وان ما جاه يجيــــله * كلــــن يعطـــي بقلب } ودادن } ما منــــه أطـــهر و { أنا } يـــا خلـــي عطيتك الوداد و // دليــــله أوعــــدك و أكـــذب علـــى روحـــي بكلمة {بصبــر ~ وفي بـ ع ـــادك أتعوّق و روحـــــي عليـــــلهـ ْ~ وانت // تحسبني أتعمد واتعنــّى هالبعاد و { أكثــر ما دريت بي من يومها // دمــوع / عيني هميــلهـ واعرفــه { قلبـي ْ~ مــا غلط لكـــنه بيجيلــك معتــذر اليـــوم } معـــك والعمر رحــلة ما هي ْ~ طويــله فكيـــف ْ~ يتمنـــى غيابك قلب منهو //دونك / يحتــضر؟؟ ارضـــى عليــّه يـــاْ { خلـــّي~ بأيـــــامي // القليـــلهـْ { مجبـــــــورْ~ أراضيـــك بلا ذنب وأفتديـــك بالنظــــر ~ْ ++++++++++++++++++++++++++++++++++++++++++++++++++ ++++ __DEFINE_LIKE_SHARE__ | |
| ||
| |
|
11-05-2008, 03:06 PM
| رقم المشاركة : [ 33 ] | |
| عضو ماسي | ++++++++++++++++++++++++++++++++++++++++++++++++++ ++++ الساعــــــة 9 ونص الصبـــــح ....جامعــــة الامـــــارات .. شموه تتمشى فدروب الجــــامعه اروحهــــا ....توها مخلصه كلاسها في الــ66 وسايره صوب مبنــــى 80 .....تمشي ولا شي في بالها غير انها تييب معدل حلو هالكورس....يللا بريك حصوص الساعه 10 بترياها نص ساعه..مب مشكـــله .....اووووه هالكرسي ..ذكريات والله ....( ابسمت شموه ) .وردت الها ذكرى جديمه....تذكر الفصل الثاني من سنتها الاولى في الجامعه ....وهالوقت طبعاً كانوا متفارقين هي و مبارك ....وكانت تحاول تتناساه ....مضى ع فراقهم تقريباً 6 شهور فذاكي الوقت ....كانت خاطفه من هالمكان ...عقب كلاسها ...وسايره بتلاجي حصوص....وشافت بنيه تشابه مبــــارك لدرجة وايد كبيـــره....يالسه ع هالكرسي....وانصدمت طبعاً ....قالت في خاطرها اكيـــد بنت عمه .....وبعد صدفـــه .....اذكر انه قد قالي يشابه عمه وااايد ....حتى انه اللي يشوفه يتحراه ولده ...اكيد هذي بنت عمه اللي يطريه لي .....اخ بس كل ما حاولت انساه يستويلي شي وايذكرني به .....مشيت بسرعه ورحت صوب حصوص وخبرتها .....وتمت ملامح البينه في بالي .........ذكريات والله ....هذا اللي حصلته من حبي لك يا مبارك ....بقايا صدف وذكريات .....ردت شموه لواقع بعيــــد عن خيالاتها.....احسن لي اسير صوب الــ80 بسرعه .... مشت شموه يلين المبنــى ....وقعدت ع طاولة اشوي منعزله وفمكان بعيد اشوي عن حشرة البنات ....ما تعرف وشله رجوع مبارك لحياتها..خل الماضي يرد بكل ما فيه ....أدق التفاصيل قامت تطري عبالها بليا انذار .....ما قامت تقوى انها تتجاهل اللي صار وتقاوم الذكرى ....ولقت عمرها بليا حاسية ترد .....للمــــــــــــــــــاضــي ..... عقب مـــا خبرها مبــــارك بســـالفته ويا بنت عمه ...تعاطفت وياه وايد ...وقالت معذور على الحزن اللي يسكنه ...ولو اني في مكانه بعد ما بتحمل يموت انسان غالي عليه وهو زعلان مني بليا ذنب ...اذكـــــر ذاكـــــي اليـــــوم عــــــاهدت عمــــــري انــــي باذن الله بسعده ..وبحاول قد ما اقدر اني أرد له ولو شي من سعادته ....ما كنت اطمح لحبه ....برغم شعوري صوبه ما كنت اتمنى له غير سعادته ......مضـــت ايام .....وطلب مني انه ايرمسني ع التيلفون ...رفضت و زعلت ...وكنت اشوي وبصيح....يلست اقول في خاطري لا ايكون يتحراني وحده بايعتنها برخص وانا اغليه ومقداره عنديه وايد كبير ....ولو ان خاطريه اسمع صوته ...الا فكرت فهلي ...بويه .....وختيه فطيم وامايه ....نسى السالفه .....الا رد عقب فتره يطريليه اياها ....اذكر مبــــــارك : شموه والله اني عادنج من اغلى الناس ع قلبي ...وتراني اخاف عليج شرات خوفي ع خواتي والله....وصدقينيه ترا اللي يضرج ايضرني ...وانا مستحيل أفكر اضرج في يوم ..مستحيـــــل .... تميت افكر...صدق...مبارك برغم الحركه اللي سواها ويايه في المطار وايد طيب ومحترم ....دوم اقارن بينه وبين الشباب والاجي انه فــــوق و مرفوووج عنهم .....اممممم ارمسه والا لا؟؟؟ ما اظن انه بيضرني ...اعرفه عدل وواثقه فيه ....اممممممم برمسه ...برمسه وان شالله ما يصير الا كل خير..... اذكر اني تميت اتطالع الورقه اللي عليها الرقم وانا خاااااااايفه ....بس فنفس الوقت اذكر الامان والطمانينه اللي سكنوني من صوبه ....ما عرفت اتبع شور قلبي ...والا عقلي....المشكله ان في ذيج اللحظه لقيت قلبي وعقلي يتفقون ع اني ارمسه ......وصار اللي صار...ذيج الليله...دقيتله ...أذكر كنت ارتجف من الخوف ...ومستحيــــــه منه هههههههه وهو يتمصخر عليه ويضحك .....سوالفه كانت شرات سوالفه ع المسن بالضبط....وهذا اللي خلاني ارتاح ...يوم عن يوم تناسيت خوفي ...وقمنا نرمس بعض من التيلفون والمسن .....هزبني وخلاني اشارك في المنتدى ...وانا حبي له كان يزيد من اسلوبه الطيب ومن عفويته ....كانت ايام صدق وايد حلوة ....والاحلى ان كل اللي كنا نقوله ما يغضب ربي ....حتى انه ما قاللي انه ايحبني ...وهذا هو الحب اللي كنت ابغيه ...شي طاهر وعذري ..غاااااااالي وما ينوجد بسهوله ....اكيد كنت احس بالحزن وانا اشوف قصايد مبارك في المنتدى كلها عن بنت عمه المتوفيه ....وهو قد قاللي ان اغلب اللي في المنتدى هله وربعه ....... ما اعرف كيــــف من وسط محبتيه له وفرحتيه بهالاحساس...كنت أحس بلــــوم فضيــــع .......كلما يوصلني بويه المدرسه...كل ما تتمصخر فطيم ختيه ويايه ...كل ما اتدافع عني امايه جدام بويه ...كلما يمدحوني هلي ..تطري عبالي سالفتيه ويا مبارك ..واحس ضميري يأنبني...وفنفس الوقت ...مالي بد منه ...فترة صراع كبيــــرة عشتها اروحي...من غيـــر لاأخبر أي حــــد....حتى حصوص...ادريبها بتلومنيه وبتنصدم ....وبتقوللي كيف انتي اتسوين شي شرات هذا ؟؟؟ يمكن من اعماق قلبي كنت حاسه بالغلط اللي اسويه ...بس فنفس الوقت ما بغيت احرم عمري من اعذب احساس في الدنيا ...محبة من صوبين وعفيـــــفه ....وين الغلط ؟؟؟ الغلط انه يسمع صوتي واسمع صوته ....هيه نعم غلطت ...والمفروض اني اعدل غلطتيه فأقرب وقت ...صح اني ارمسه لكني انسانه زينه ومحترمه ...بس لو درن ربيعاتي والله ما بيرحمني ..بيقولن ماشي وحده ترمس الشباب الا لو كانت صايعه ...وانا ما ابغيهن يقولن هالشي ...اعرف بيحطن فكره في بالهن ما يخوزها العمر...لنهن ما عرفن مبارك ولا عرفني عدل ..... ( ابتسمت شموه ) ما انسى الليله اللي قالي فيها انه ايبحني .....استانست من قلبي ...عقب ما مضت فتره وايد طويله قالها ....وهذا اللي خلاني اثق فيه زود ....انه ايثمن هالكلمه ...وما قالها الا عقب ما تأكد من شعوره واحساسه ....الا انا كنت اراجع عمري وايد ....ارمسه ومن اسكر عنه اصيـــح من اللوم .....ارمسه ومن انزل اتعشى ويا هلي ارد غرفتيه واصيح ....تناسيتهم فتره ...تناسيت كل شي الا هو...واحينه بس قمت احس باللي اسويه ....حسيت اني لاازم ارمس مبارك...لازم اخبره وايعرف ...مب قادره اتحمل ...... اخ ...فنفس اليوم اللي بغيت ارمسه فيه ...واخبره اني متلومه في هلي ...صدمني بشي ما كنت متوقعتنه ....صدمني ...كنت ارمسه ع التيلفون ويالسه ع الارض ...واحاول اشجع عمري وانطق ..وكل اشوي اقول احينه برمس ...احينه برمس .....يلين ما نطق وقاللي : مبـــارك : تدريـــن شموه ....في وحده في المنتدى دومها اتطرشلي رسايل خاصه وملعوزتني ...وانا ما ارد عليها ...اتخيلي لدرجة ان ختيه حنون اتعرفينها ختيه العوده ...قالتلي اتحذر منها ... شموه : انزين يوم انها مب عايبتنك لا ترد عليها .. مبارك وهو جنه معصب : اشو عايبني اكيد مب عايبني ....بس اتعرفين اشو شموه ...( تنهد مبارك ) صح ان بنت عمي اتوفت الا فنفس الوقت بعدها حيه ....فهمتي عليه ؟؟ شموه حزت في خاطرها اشوي : هيه فهمت عليك قصدك حتى لو اتوفت بعدها عايشه فقلبك ... مبارك : لالا ...مب جي .....اسمعي انا ما خبرتج السالفه كلها يوم كنا ع المسن .... شموه : سالفة بنت عمك ؟؟ مبارك : هيه ....اسمعي ...تدرين في الليله اللي وصلني خبر المقلب اللي مسوينه فيها بنات عمها ما قدرت ارقد من القهر اللي فيه ....حزن ما اوصفه لج ....وليش هي صدقتهن دامها اتحبنيه ....المهم ثاني يوم الصبح انا سرت بيت عمي ....ومن بغيت ارمسها ....ياني خوها الصغير وجان ايقولي : تقولك شمســــه اعتبرها ماتت ....انصدمت انا ...لهالدرجه عايفتني ...ومب عاطتني فرصه ....ومن ذاكي اليوم مشيت على امرها ..واعتبرتها متوفيه ...وحده رحلت بليا رجعه ...واسمحيلي شموه ما قلتلج انها بعدها حيه ...خبرتج السالفه شرات ما اخبرها أي حد ثاني...الا حسيت لازم اتعرفين احينه ...لن قامت تستوي اشيا ما الها تفسير ....انتي ويايه شموه ؟؟؟ شموه اللي من الصدمه مب رايمه ترمس بنت عمه حيه ما ماتت و توه يرمس : هيه هيه وياك ..شو هي الاشيا اللي بليا تفسير ؟؟ مبارك : العضوة اللي قلتلج عنها ...اللي كله اتطرشلي رسايل خاصه ...نكهـــا عطنــــي غـــلاك .....انزين وهي ربيعة بنت عمي شمسة.....( شموه سااااكته وما ترمس ) ...انا يا شما عقب ذيج الليله اللي قالت فيها اني اعتبرها ميته ...اتجنبت أي شي يربطني فيها ....ما قمت اسير بيت عمي الا بشكل نادر ....واذا بسير اسلم وبس ....وهي ما اشوفها بالمره ....لكن من يوم ما اشتركنا في المنتدى انا وربعي وعيال عمومتيه ...وهي كل ما اسير هناكي تظهر وتتطالعني من بعيد ....انتي تدرين مضت سنه ونص وهي لا حس ولا خبر .....انصدمت منها ...تتطالعني ووتتبسم ...ولو تدرين بعد انها خطيبة خويه احينه تصدقين شموه ؟؟؟ شموه : نعــــــــــم !!!! مبارك : هيه لا تنصدمين ...مب انا قلتلج الكل كان يعرف اني ابغيها ؟؟؟ ياني بويه جريب وقاللي بنخطبها لك وجنك ما تبغيها بنعطيها خوك...وانا ع طول طرت عبالي رمستها ...اعتبرني ميته .... حشا ما حقت عليه نفسي اخذها ...وانا اعرف لو خطبناها غصبن عنها بيعطوني اياها الا ما بغيت ...لي عزة نفس يا شموه ما تهينها هي ...ولا ارضى المذله ....وقلت لبويه انا مرخصنها لخويه ...انصدم الا ما علق عرمستيه ....خطبوها له ...ووافقت اتخيلي ...والغريب انه عقب ما وافقت ع خويه ...قامت تتصرف بشكل مب مفهوم ابد ......واحينه اتطرش ربيعتها عطني غلاك تتعرف عليه ... حتى اني قطعت المنتدى فتره ورديت اشترك بنك ثاني ..ولكنها بعد عرفتني وقامت اتطرش رسايلها ....شو اسوي شموه خبريني ؟؟؟ شموه : بنت عمك وايد غريبه ...وشله اتسوي كل ها؟؟ لو بعدها اتحبك وشله وافقت ع خوك ....يمكن مجبوره الا بعد واجب عليها تحترم خوك وعمها وبوها ....واذا تحبك كيف اتطرش ربيعتها صوبك ؟؟ مبارك : ما اعرف والله ....المشكله انها مب الا تبغيني اتعرف عليها لا تبغيني ارمسها مطرشه رقمها .... شموه ساكته اللي عرفته اليوم يسكتها سنه كامله هب الا ثواني .... مبارك : شموه ...ابغيج اتعرفين ان عمريه ما بنساج ...والله العظيم انتي الوحيده اللي قدرتي اتظهريني من اللي خواني وعيال عمي ما قدروا ايظهروني منه سنين ....كسرتي الحزن اللي كنت عايشنه ...وشوفي ..بنت عمي اللي هي بنت عمي ما عاملتني شراتج ....والله اني في حياتي ما عرفت بنت شراتج....نـــــــادره والله وما شي منج .....واتاكدي يمكن انتي تتخلين عني الا انا عمريه ما بتخلى عنج ...ولو اشو ما صار مستحيــــل انساج ..... ردت شموه للواقع ويا صوت حصـــــــوه يناديها ... حصوص : حوووه شميــــم وينج ؟؟؟ انتبهت شموه لحصوص ونشت اتسلم عليها : سوري فديتج سرحت اشوي ... حصوص وهي فاهمه ربيعتها عدل : بذبحج ترا انتي وسرحتج ...ادريبج بشو تفكرين ..يللا نشي نشي بناكل النا اشوي غاديه عظمه انتي وانا حالفه انفخج ... شموه : ههههههههه يللا بسم الله .... حصوص : هـــــااااااا من وين تبين تاكلين ؟؟؟ ++++++++++++++++++++++++++++++++++++++++++++++++++ ++++ الســـــــــاعة 12 الظهر ....الجـــــــــــــــــــــامعة ليلـــى يالسه ع الكراسي اللي فمبنى 71 واللي يسمونه مخـــج ( مبنـــى دراسي في جامعة الامارات ) ....كانت ترمس حارب ...واشوي الا وتخطف ريمان جدامها وهي ترمس في التيلفون ومستانسه....مــــالت عليـــــج ....ليلى كانت تحقد ع ريمان وما تعرف ليش اتسبها في خاطرها ...يمكن قامت تعتبرها منافستها .....كل اللي تعرفه انها ما تداني اتشوفها ..... ليلى : ما اعرف خقاقه ع شوو حارب : منوه هاي حبيبتي ؟؟ ليلى : لالا وحده خطفت ...انزين وريمان حليــــلها اتسولف ويا خوله بنت عمها ...... الريم : هيه اقولج مطنشه كلاس الساعه 1 برد البيت ... خوله : ما عليج عند امج .. الريم : ههههههه هيه نصور في البيت تدرين وصل الفير...لا والحبيب ناوي يروح ويا ربعه السعوديه هالخميس عسب جي جدمنا العزيمه ......ورانا عباله ويا ويلج لو ما ييتي .. خوله : افا عليج كلنا بني انا وعلايه وهند وحتى شوق حرمة سالم ... الريم : مرحبا ابكم والله ...خلاص فديتج نترياكم اوكي خوله : اوكي حبوبه يللا سي يوو الريم : سي يووو بباي .. وعند خولـــــــــه ....اللي كانت يالسه في الصاله ...ويوسف توه حادر البيت يوسف : منوه اترمسين ؟؟ خوله : هاي ريمان بنت عمي فديتها .. يوسف حس بنغزه فقلبه من قالت اسمها : اها شو عندها .. خوله : ماشي داقه اتهدد يون يا ويلج لو ما ييتي اليوم ...عزيمة مسويين ترا ناصر واصل اليوم .. يوسف : عنبوو ع طول من وصل بيسوونها .. خوله : ترا بيسير السعوديه هالخميس فقالو بيخلونها اليوم ... يوسف : اها زين زين ... نشت خوله وصدت صوب خوها قبل لا اتكمل دربها : بتي صح ؟؟ يوسف : ها ؟؟ اممممم بفكر ... خوله وهي تمشي : تعال لان كلهم بيوون ... يوسف في خاطره ...اممممممم ما اعرف .......بفكر... ++++++++++++++++++++++++++++++++++++++++++++++++++ ++++ الســـــــــــاعة 2 ...بيــــــت بو نـــــاصر العيله كلها ملتمه والكل مستانس ع شوفة ناصر اللي متغير شكله ....صح محلو ...الا ستايله ستايل اجانب شرات ما يقوله عبود قوم وتس اب ... قوم العم خالد ( بو سالم) وعمومتهم وخوالهم مازرين البيت ...وريمان مستانسه باللمه ..لنها نــــــادرن ما تصير في عايلتهم ....ريمان من يوم درت ان نصور بيسير السعوديه بالخميس قررت اترمسه ....محتاره من حالته ما يقر في البيت بالمره توك ياي انزين واتقول بتسير السعوديه ....لالا يا خويه نحن ما صدقنا انشوفك ....حتى امايه زعلانه الا ساكته ادريبها ههههههههه محد غير عبود ايعطيه في الويه .... يالله ان شالله خيــــر ...... ++++++++++++++++++++++++++++++++++++++++++++++++++ ++ الساعة 4 العصـــــــر ..بيت قوم رواضي ... فحجرة لطوف عقب ما ردن عن ريمــــــــان لطوف : وحليلها ريمان من زمان ما شفتها ..... رواضي : هيه فديتها ....اتصدقين لطوف ...بخبرج سالفه محد ايعرفها يلين احينه غيري وغير ريمان ...وادريبج بتعصبين عليه...ألا ابغيج اتعرفين ... لطوف : خير ان شالله ؟؟؟ رواضي : امممممممممم ....تدرين مستويه السالفه من شهر تقريباً ....انا يالسه ويا بنيه من بنات الجامعه ...( وخبرتها بباجي سالفة الفلاش الضايع ) لطوف ( تشهق ) : وانتي تتحرينها هينه السالفه ؟؟ ابغي اعرف يوم انج مب قد الامانه وشله تحطين صور البنيه عندج ؟؟؟ رواضي تتطالع لطوف ومنصدمه : لطوف اقولج مب قاصده وانتي اتعرفين ان ريموه غاليه عندي و غلاتها من غلاتج ... ومحافظه ع الفلاش من خاطري بعد ...الا تقولين فص ملح وذاب...فغمضة عين والله انه اختفى ..... لطوف : الله يستر ... رواضي : هيه والله يا لطوف ...يمكن ريمان نست السالفه الا انا دوم اذكرها .... ++++++++++++++++++++++++++++++++++++++++++++++++++ +++ اليــــــــــوم الثــــــاني ....جامعـــــــــة الامـــــارت شمــــــوه يالسه في الكلاس وطفرانه ...يتريون السير تأخر ما يـــاهم .....اشوي اييها صوت بنيه ... : لو سمحتــــي...حد بييلس هنيه ؟؟ وكانت ريمان ..... شموه : لالا اتفضلي ... الريم : تأخر السير هالمره ... شموه : هيه ان شالله ما ايينا ... الريم : ان شالله ....جدامه دقيقتين وان ما يا مب من حقه ياخذ الابسنات .... شموه : انتي من بنات العين ؟؟ الريم : هيه وانتي ؟؟ شموه : هيه الا من دارج ...ِشسمج ؟؟ الريم : الريم وانتي ؟؟ شموه : شمــــا .... الريم : يا مرحبــــــا بج والله شمـــا .... بس اللي زعلهم ان السير دخل عليهم ههههههه وتمت ريموه تنتبه ع السير و الشرح ....وشموه اتطرش مسجات لحصوص يتغايضن هن الهنتين ..........وجان يشوفها السيـــــر الريم : على فكره ترا شافج ...يطالعج من طرف عينه شوفي ... شموه زاغت : امايه هيه والله صدقج ..... ++++++++++++++++++++++++++++++++++++++++++++++++++ ++++ الســـــــــــاعه 12 الظهر ... الجــــــــامعة .... ليلى وساميه سايرات صوب حمامات مبنى 80 اكرمكم الله ......ومن دخلن الحمام ليلى فرت قشارها عند سموي وهبطت الحمام وانتوا بكرامه ...سموي حطت اغراض ليلى ع التواليت وتمت تعدل قصتها يلين رن تيلفون ليلى... ومن صدت سموي ع التيلفون بتشوف منوه يتصل ....انصدمت من الرقم وما صدقت اللي اتشوفه ......يودت التيلفون تبغي تتأكد .....معقوله ؟؟؟ رقم خلفان هذا !!!! وجان اتظهر تيلفونها عسب تتاكد اكثر ويوم شافت ان الرقم هو نفسه ....انقهرت بشكل كبيـــــر وحست بالكره صوب ليلوه ...هي من زمان اتغار منها وشاله عليها وبهالحركه جنها اعلنت الحرب بينها وبين سمـــوي .....ما عرفت شو اتسوي من العصبيه ذاكي الوقت غير انها شلت شنطة ليلوه ولابها وحتى تيلفونها وفرتهم ع الارض بحقد وقالت بصوت مسموع وواضح : يالحقيره ......وشلت بعمرها وظهرت وهي معصبــــــه ومفوله بعد .....كانت تمشي ومب عارفه وين تسير من العصبيه ....ومب رايمه اتفكر حتى ....هالحقيره ليلوه كانت متعرفه ع ولد عمه اول شي وعرفتني انا عليه ...عقب تعرفت ع ربيعه حارب شو تبغي منه احين ؟؟ والله ارويج يا ليلوه .....صدق انج كريهه ...الله ياخذج........قررت انها اخر شي اتسير للرباعيه " كافتيريا في الجامعه " ....يلين تهدى اشوي ... وليلى من ظهرت من الحمام اتفاجأت من المنظر اللي جدامها اغراضها مفروره باهمال واضح ...وشنطتها خرسانه من الماي ...شسالفه ....وينها هاي سموي بعد ....حاطه عندها اغراضي وجي اتسوي ....من شلت تيلفونها لقت 2 مسد كولز .....ومن شافت الرقم عضت ع شفتها وفهمت ان سموي شافت الرقم وزعلت ..... ++++++++++++++++++++++++++++++++++++++++++++++++++ ++++ الســـــــــاعة 1 الظهـــــــــر ......بيت بو منصــــــــــور يالس فحجرته وايفكر.....شو هالعيشه اللي انا عايشنها ....اوف ....ما ابغــــي اظهــر واشوفها ....اكيد يايه ...قسم بالله اشوي وبكره خويه بسبتها ...لا اله الا الله .....وهي تتعمــــد اترمسنـــي ....انا بالعماله داومت بعيد عن البيت الا عسب ما اتجابل وياها فنفس المكان ....كــــان مبــــــــارك ....ايفكــــر ومحتــــــار .....ويسمع السوالف خاري والضحك ...وهو في غرفته ايحاول ايقاوم احزانه .....شمسه بنت عمه من 6 شهور ماخذنها خوه .....ماخذ اجازه احينه وكاره عمره ...يا فغرفته يا ظاهر ......قمت حتى ما اظهر للغدا ...لاني ما اسلم من نغزاتها ...رغم ان الكل يتحراني ناسنها ...من اليوم اللي بويه سالني فيه جني ابغي اخذها ورفضت ....الا هي تدري ببقايا احساسي صوبها...وللأسف ما اعرف وين تبغي توصل ؟؟؟ يالله تعيـــــنا وترحمنـــــــا ...... اشوي يسمع حس ميعاد اتدق الباب : مبـــــارك ....بروووووك مبارك بدفاشه : هـــــــــا ميعـــــــاد : عثراااااااا .......يقولك بويه بتغدا اليوم من البيت وموصني اوعيك عن ترقد حزة الغدا .... مبارك : ان شالله ان شالله ... اوف ما يدرون ان رقادي كله تمثيل فتمثيل ....متى تخلص اجازتيه وافتك بس ...... ++++++++++++++++++++++++++++++++++++++++++++++++++ + الســــــــــاعة 1 وربع ......الجــــــــــــامعه ... ريمـــــــــان ورويـــــــــــض مخلصات كلاساتهن ....وقالن بياكلن من الرباعية وعقب بيردن البيـــــــت .....بييلسن اشوي ياخذن علوم بعض وايسولفن .....جي يلين الساعه 2 وبيردن البيت ....عادا اليوم ناصر بيرد ريمان البيت ....وبتوصل رواضي وياها في الدرب ......لنهن فنفس المنطقه اصلن ...... اممممممممم وصلن الرباعية وياويلي ع الزحمـــــــــــــه.....امـــــــــره ماشي مكان ..البنات ماشالله عليهن محتشرات ...ِشي كراسي مفرفره الا طاوله ماشي .... ريمان : افـــــا والحل رويـــــض .... رواضي : ما اعرف تبينا نتريا والا نروح مبنى الـ80 ؟؟؟ ريمـــــان : ما فينـــا نتريا قومي نروح المبنى احسن ... وقبل عن يتحركن ... رواضي : لالا اصبري ريمان ...هذي بنيه تنش من طاولتها ...قومي انسير ونيلس ... ريمان : يللا ومشن يلين الطاوله وقعدن .... ريمان وهي تحط شنطتها : الحمدلله والله ....صراحه ما فيــّه اقبض خــــــط يلين الــ80 .... رويض وهي تعدل قصتها : ههههههههههه صدقج ريمان لمحت شي ع الكرسي اللي عدالها : اوووبس وحليلها البنيه نست بوكها اتصدقين ... رويض : روحي زين لحقيها وعطيها ... ريمان تنش وهي تاخذ البوك : اوكي ....يا ويلج لو رحتي تاخذين لج عيشه بلياي ... رويض :ههههههههه عنبو مب يوع ساكننج ... وظهرت الريم بسرعه من الرباعيه ...اها هذي...ماشالله عليها وين وصلت .....حاولت تسرع من خطاويها .......يلين وصلتها ... الريم : اقول لو سمحتي .... سمــــوي وهي تصد : خير ؟؟ ( واتفاجأت من شافت الريم ) الريم وهي تناولها البوك : هذا بوكج حبوبه نسيتيه ع الطاوله ... خذته سموي وتمت ساكته .ريمان ابتسمت الها وردت عند رويض.....تمت سموي اتشوف ريمــــــان يلين دخلت الرباعيه واختفت عنها .....وهــــــــي اشوي اشوي بــــدت فكــــــــره اتيـــــــها ما طرت عبالها من قبل ..... : أهــــــا ....راعيــة الصــــور ....احيــــنه عرفت كيف أرد لج الصــــاع صـــاعين يا ليلووووه ...!!!!! ++++++++++++++++++++++++++++++++++++++++++++++++++ ++++ وهنـــــا ... أطوي صفحة اليوم بعد ان امتلأت بخفاياهم .. احمل دفتري وانسحب بهدوء...دون أن يلتفت إلي قلب... أقفل خلفي أبواب خفاياهم بسكـــــــون ... لأعــــود في الغد ...و أخط مــا أراه ..في دفتري .... بإذن اللـــه... لـــي ولكـــــم ×× لخفــــايا قلــوبهُم { بيــــبان } دقـيتهــا البــارحة و // طلـــّيت ×× ][ الشمـــــــوخ البسيـــط ][ __DEFINE_LIKE_SHARE__ | |
| ||
| |
|
11-17-2008, 08:36 PM
| رقم المشاركة : [ 34 ] | |
| عضو ماسي | بيدي دفتـــري بصفحاته البيضاء المعهودة قد تبدو صفحاته { فارغة} للجميــــع ... ولكنني أرى // بوضوح // ×× خفاياهم مسطــّرة بها... جلست في مكاني المعتاد...عند هذا { البــاب} .... فتحت صفحـــة جديــــدة من دفتري...وبدأت أخــط مـــا أرى... هــــا هــــي ملامحهم بدأت تظهر لي شيئاًً فشيئاًً........ لـــــــي ولكــــــــــم لخفــــايا قلــوبهُم { بيــــبان } دقـيتهــا البــارحة و // طلـــّيت ×× ××××××××××××××××××××××××××××××××××××××× الجــــزء الســــــادس ][ - عقــب أيـــــام من الأحداث لـــي مرّت .... كــــانت ليلة خميـــــس........وهي واقفة تتأمـــل حديقة بيتهم من غرفتها...مجابله الدريشه وميوده الستاره بيدها ....وسرحـــانة اتفكـــــر فخوهـــا نــــاصر .....اللي من الصبح قبض خط السعوديه هو وربعه ..... الله يهداك يا نصور....ورمستيه وياه ما فادت ...وطرت عبالها سوالفهم ثاني ليله له في البلاد ... كانت يالسه وياه في غرفته .. ناصر : والا رحتوا المزرعه بلياي هاه؟؟ ريمان : هيه والله صراحه استانست انا هناكي...وحسيت ان محد قصرنا غيرك ... ناصر : الا تعالي صح وصلتنا اخبار انج تطبخين احينه ....عبود قاللي مسويه شوربه لذيـــذه وحلف عليّه بعد أيربها .. وجـــــــــان تضحك ريمان : هههههههه ما عليه هالسخيف...وانت فالك طيب ما طلبت ..بس ما ايخصنيه لو صابتك مضاعفات ما بعد التسمم الغذائي... نــاصر : حشا يا بوج دام السالفه فيها تسمم خلي شربتج لج...قلت انا احيدها هاي قرص بيض ماتعرف اتسوي ........ ريمـــان : اقول نصـــور... نــــاصر : قــــولي ... ريمـــان : صدق انك بتسافر هالخميس السعوديه ؟؟ ( وجان ايقولها هيه بعيونه ) ....امممممم انت ما شفت ويه امايه يوم سمعت رمستك ...والله انها زعلت نصور..الا عسب انها ما بغت اتكدر عليك ما طرت لك ....صدق والله انا اقولك لو تأجلها اشوي...عنبوه توّك الا واصل ...ما شبعنا من اليلسه وياك ولا من سوالفك فديتك ...وبعدين نصور انت كل ما توصل البلاد ما تقر فيها ليلتين عبعضهن ويا تقبض خط السعوديه والا البحرين ....وهلنا ترا ملاحظين هب الا انا الا محد يبغي يضايجك... نصور مبتسم : وانتي عادي تضايجيني ؟؟؟ اتطالعته ريمان بإحراج خفيف ...وقبل عن ترمس قالها ...: اسمعي ريمان فديتج ...انا في الغربه واااايد حسيت بضيج ..معاناه ما تتصورينها ...مب اتقولين الدراسه فبلاد ثانيه وناسه وحريه ..لا والله انها مسؤوليه وكراف ....ايسدج ان حتى العيد ماله طعم هناكي....ومن تيينا الاجازة ريمان اول شي انفكر فيه ربعنا الجدام وهلنا...هلي بسلم عليهم وبسولف يلين يملون مني...وربعي بظهر وياهم سفرة أيام أغير جو وراد هب مطول تراني.....وادريبج فديتج اتحاتين الا هالافكار لي تييج مالها داعي ....... انقطعت افكارها من شافت ستيشن سودا هابطه بيتهم .....اووووه منوه ياينا!!! ....وامايه سايره عند حرمه ...وبويه ظاهر وماخذ عبود وياه ......وانا حتى ما اعرف أقرّب الخطّار .....يالفشيله احينه بينزلن اكيد شلة حريّم يايات صوب امايه .....هذي البشكاره سايره صوب السياره عسى اتقولهم ان محد في البيت ما فيه اتقفط جدامهم وعادا العيـــــايز ههههههه وحليلهن .......... اشووف البشكاره راحت عنهن ....وفجوا باب السياره .....امممممم ريال جنه هيه لابس كندوره بيضا....منوه هااا ؟؟؟؟ ( يوم ركزت نظرها شهقت ) هـــــــه ....ها يوسف ولد عمــــي خـــالد ...شو يايبنه ؟؟؟؟ مــــا بنزل له برايه ......( قعدت ع شبريتها .وترواتلها المواقف لي يمعتهم.....ثواني ويتها البشكاره اتقولها ان يوسف يبغي امها ضروري وهي قالتله ان محد في البيت غير ريم وهو قال بيدخل الميلس ..).... ريمان : وانتي الله يهديج وشله اتقولين اني هنيـــه ؟؟ البشكاره : وت مدام ؟؟ ريمان : ماشي خلاص روحي وحطي الفواله وسوي قهوة ودلة زعتر .... ظهرت عنها البشكاره ..ودقت ريمان على امها .... ريمان : مرحبا امايه ....اقولج يوسف ولد عميه هنيه ويبغيج ضروري ايقولون .......البشكاره لــي اتقول منوه بعد لي يقولون الله يهداج هههه ......اشووووه ؟؟؟؟لالا حشا امايه حرام عليج شو أقهويه ؟؟؟ ريـــال طول بعرض تبيني أقهويه ......براااايهن بنات عمي حريم ومسنعات ع قولتج الا انا استحي.....زين يوم انج مسافة الطريج ويايه بيترياج هو ما بييه شر امايه ......ياربــــــــي .....( واتغريت ملامحها من الضيج ) ...خلاص على أمرج فديتج...بس امايه الا اقربله الفواله وظاهره اقولج ترانيه ها مب يالسه له...عن تعصبين خلاف.....اوكي فديتج ...ربي ايحفظج ....( وسكرت عن امها ).... ريمان : اللـــــــــه يعيــــــن ....( وطالعت عمرها ع المرايا ) ++++++++++++++++++++++++++++++++++++++++++++++++++ الســـــاعة 9 ونص ....بيــت بو مــــــايد متيلسات موزان و مهاري وامايتهن عوشه ( ام مـــايد) في الحوي ايسولفن ....وختهم الصغيرونه ساره تلاعب قطوتها وتراوغها ...... ام مـــايد : هالبنيــــه بيـيها السقم من هالقطاو ..يلسي سارونه..( سارونه مسويه طاف وتربع من خاطرها ورا القطوه ومستانسه ...بس ع آخر لحظة شردت عنها القطوة وظهرت فوق اليدار ويلست ) ....هـــا يوم القطو لي هو بسبع أرواح حت من اليهد وانتي عنبو من اصبحتي تروبعين قري بسج يللا ....(وجـــان تتعثر سارونه واتطيح ) مهاري : امايه حرام عليج ههههههه عينج هاي... ام مايد : حشا عليه عيوني بارده فديتج الا هاي ختكن من شطانتها اتعثرت .... موزان : نشي ماما سارونه نشي....( نشت ساره تضحك وبعدها تتريا القطوة تنزلها )... ام مايد وهي ناشه عنهن : لا انا بيشيب راسي من هالبنت..... ودخلت عنهن البيت ... اشوي وانهم ثاني و مايد ظاهرين من البيت ومن انتبهوا ع خواتهم يو ايسلمون .... ميـــود سلــّم وركب سيارته وظهر من البيت الا ثاني حب ايغلس عليهن اشوي ..... ثاني وهو شاق الحلج من وناسته : ماشالله العيايز متيلسات ...هااااه فضيله وسبيــــجه على منوووه الدوووور ؟؟؟(وايسوي حركة استفهام بيدينه وايطالعهن بعبط ) فمنــــوه اتحشووون ؟؟؟ لا يكـــــون ربيعتكن سنـــوته ههههههههههههاي والا هاي طاف دورها من زمان واظن الدور الا على مسعودة ههههههههههههه مهاري : سنوته ومسعوده ربيعاتك يالشيبه ... ثاني : اخس واعقب وانا خو شمــا ..شـــاب راسج ياربي ..لا تفاولين عليه بعدني فعز شبابي .... تم ايغايض مهاري اشوي و ظهر هو الثاني من البيــت .... موزان وهي تتطالع سارونه تلعب : أقول مهاري ... مهاري : هلا ... موزان : بسألج ....شرايج فحصـــوص بنت عمــــي ؟؟؟؟ مهـــاري وهي تتطالعها : من أي ناحية قصدج ؟؟ موزان اتعدل يلستها وتتطالع ختها .....: اممممممم بشكل عام ....اتحبينها والا ما تحبينها ؟؟؟ مهاري مستغربه من رمسة موزان : فديــــــتها والله يا موزان ...احبها وامــــوت فيها بعد ....بس سؤالج غريب اشوي....يعني شو داعي هالرمسه ؟؟؟؟ موزان قربت من مهاري وقالت الها بصوت خفيف : شوفي بخبرج شي ......(ومهاري قربت منها بفضول وقالت الها بنفس درجة الصوت ) : قـــولي موزان : البـــــارحة عقــــب ما سبــــحت سارونة ...لبستها ويلست اسحيلها شعرها ....جان تقولي .... سارونه : مواذي بخبرج سر ....بس لا تقولين انا قلتلج... موزان : اشو عندج ؟؟ قولي ما بنخبر عليج ...أكيد انتي لي جابة الفيمتو ع زولية صالة الحريم صح ؟؟؟ سارونه : لاااااااااااا مب هذا السر ......سر ثاني..... تدرين ميــــودي خوي يحب حصوصي ... اتفاجأت موزان : شدراج انتي ؟؟ حصوص قالت لج محد غيرها صح ؟؟؟ سارونه يودت حلجها : يــــالبي انا قلت حق حصوصي ما بخبر حد .... موزان بفضول وهي تجابل سارونه : ليـــش حبيبي سارونه شو مستوي ؟؟؟منوه قالج ؟؟؟ خبريني ما بخبر حد وبييبلج حواوة واااااايد هالكثر .... سارونه استانست من يابوا طاري العوق : انزيــــــن بخبرج....يوم كانت حصوصي عدنا ...ميود قاللي روحي قولي حق حصوصي تعالي خاري اشوي بقولج شي ...ويوم تظهر حصوصي سكري عنها الباب ( موزان متفاجائة من لي تسمعه وفاجه عيونها ) بعديـــــــن انا سويت جذي وقفلت عنها الباب...وسمعته ايقولها ميودي احبج ..ونازعها بعد زاعج عليها وضربها وهي تصيح تصيح عقب انا فجيت الباب وميودي راح ....قالت لي حصوصي تعرفين شو قالت ؟؟قالت لا اتخبرين حد خليه سر ...وانا بس خبرتج بس ....هو بعده سر صح.... موزان الي ذهلها لي عرفته : هيه حبيبتي بعده سر ....بس عن اتخبرين حد اني اعرف بيزاعجون عليج عقب ..ولا تطرين هالسالفه عند حد ...( وجان اتحط سارونه صبعها ع شفايفها اونها ما بترمس ) واتكمل موزان رمستها ويا مهاري : موزان : اقولج يا مهروه انا تمت الرمسه في بالي....صح ان سارونه ياهل وما تفهم الرمسه ...لكنها ما تجذب ...يمكن ما فهمت كل رمستهم لكنها خبرتني باللي تم في بالها ولقطته من رمستهم .... مهاري : غريـــــــــبه .....وانا اقول تأخرن ساروه وحصوص خاري ذاكي اليوم .....بس ظنج وشله ميود مسوي هالحركه ...لا اتقول ضاربنها ومصيحنها هههههه شو غادي سفاح .... موزان : بالعكس دواها احسن حتى لو دايسنها بريوله .... مهاري : موزان معقوله اتقولين جي عن حصوص بنت عمي ما غيرها... موزان بدت تنفعل : هيه معقوله مرتين بعد ....انتي اتحرينها هينه حصوص وبريه ....ما اتشوفينها اشقايل ذاله خوج ومخلتنه يرابع وراها .....ما تعطيه ويه بالمره والكل ملاحظ هالشي ....والله ما عاشت ولا يابتها امها اللي تذل خوي ...وبيني وبينج انا رحت لميود ورمسته قبل عنها .... مهاري : شو قلتيله ؟؟؟؟ موزان : قلتله لي قلته لج بالضبط ....تستهبل عليه هالحصوص ....عبالها خلاص الدنيا خلت من المزايين ....وبعدين مب من حلاتها ما اعرف اشو عايبنه ميود فيها .... مهاري : امممممممم موزان حرام عليج حصوص حليوه ...شفتيها في العرس ماشالله موزان تقاطعها : كل الخلق حلويين من يتعدلون لكن سمحيلي بنت عمج مب عايبتني بالمره .... مهاري : ما اعرف شقولج والله .... موزان : لا ما اباج اتقولين شي....بس انا ما برتاح الا لو خويه غض بصره عنها ... مهاري : شقصدج ؟؟؟ موزان : لالا لا اتحاتين وشوفي سارونه عن تتعور بنش اشوف البشاكير شو مسويـــات ع العشا ..... ++++++++++++++++++++++++++++++++++++++++++++++++++ ++ بيــــــت بو حميــــــد فغرفة شمامي ......حصوص يالسه تلعب بمكياج شموه ....وشموووه منسدحه ع شبريتها تاكل بوب كورن ..... حصوص : اللـــــه شموه والله هالروج يجنن ...وانتي ما اشوفج اتحطين منه يالهبله ... شمامي : خذته وندمت ...من احطه اتقولين ضاربني بو صفار فبراطمي .... حصوص : هههههههه حرام عليج دبوووه مب لهالدرجه لونه فاتح ... شمامي : والله جنه عايبنج من صوبج حبيبتي ....لنه بصراحه ماله فايده غير انه ايزين سلة المكياج .... حصوص وهي تسكر الروج وترده مكانه وملامح ويها اتغيرت اشوي : شمامي .... شمامي : هلا حصوص وهي تتطالع عمرها ع المرايا : تصدقين ....بيمضي اسبوع ومب شايفه ميــود ...وهو مزعلنيه ولااااا هامنه .... شمامي عدلت يلستها : تعالي يلسي بخبرج شي .... حصوص وهي تيلس حذا شمامي ع الشبريه : ادريبج مب حابه رمستيه ..الا شموه والله هذا لي في خاطري واتعودت اصارحج ... شمامي وهي تبتسم : اسمعيني فديتج حصوص ....انا شرات ختج نوف واكثر ...وهالشي ما يباله رمسه ....وانا مب اني اقولج ان ميود ما يسوى والا شي ....تراه ولد عمج وانتي أدرى به .... ( تنهدت شمامي ) لكن ما ابغي اشوفج اتطيحين فنفس الغلط اللي انا طحت به ....ما بمنعج من احساسج ....اذا الانسان نفسه ما يقدر يحكم احساسه الا بجهد كبيــــر ...بس انتي قمتي تعدين الوقت وتحسبينه ...متى بيراضيج ومتى تشوفينه ومتى ومتى....تدرين هالانتظار هالنوع بالضبط هو لي بيقيد تفكيرج وبيحصر لج احساسج فيه ....واشوي اشوي بتلقين عمرج غرقتي واتغيرتي حصوص : لا شمامي ...قلنا احبه الا مب لهالدرجه عادا .... شمامي : وكيف وانتـــي حصوص لــي من تشوف ميود انخشت وشردت واحينه اشوفج تبين تشوفينه وتبينه يرمسج ويعتذر .... حصوص اللي استغربت من نفسها لثواني ....ما قد يلست ويا عمرها وحللت احساسها شرات ما سوت شموه ....معقوله انا بديت اتغير ؟؟؟ معقوله بتم اترياه واهويس به شرات ما تقول شموه .... حصوص : بس شمامي ....والله اني قبل رمسة موزان ما قد فكرت به جي....واليوم اشوف انه زرع فيه شي صعب اني اخوزه واتجاهله ... شمامي مبتسمه : حبيتيه ....حصوصي انا ما اقولج لا تحبينه ..بالعكس حبيه تراه ولد عمج والأحق بالمحبة ....ياغير انتهبي وانتهبي ع عمرج... حصوص : ان شااااااااااااااالله يدووووه ... شمامي :هههههههههههه ما عليج حصوص : هيه صح في شي ثاني ابغي اقوله .... شمامي : اشو هووو؟؟ حصوص : انا ادري به من زمان و صاخه.... ما حبيت اطريلج الا قلت بخبرج ما اروم ما اقولج .... شمامي : قولي انزين ... حصوص : اممممممم شمامي لو عزمنا ...هل منصور ريل نوف بتيين ؟؟؟؟ شمامي ضحكت بنقمه : تتمصخرين ؟؟؟ اكيـــد لا... حصوص : انزين امج بتي فديتها ... شمامي : برايها امايه اتسد عني ...الا انا معذوره واتعرفينه عذريه عدل .... حصوص : بس انا ما فيه اجابل خواته وهله اروحي ... شمامي : هههههههههههههه اشوفج كرهتيهم....بعدين وين اروحج ....شويخ حرمة سلطان ما تقصر وامج بعد ...وهاتي بنات عمج شو لي يمنعج .... حصوص : ما عليه خير لين غايته .... ++++++++++++++++++++++++++++++++++++++++++++++++++ الســــــــاعة 10 الليــــــــــــــل بيــــــت بو منصـــــــــور .... خوات مبــــارك متيمعات في الصالة تحت وحاطات العشا ....حنان ووفوي وميعاد .....ووياهم ام منصور.....منصور و نوف حليلهم بعدهم في شهر عسلهم ومسافرين.....محمد خوهم ظاهر كالعاده يحاوط ......عبيد فوق فغرفته ...ومبارك بعد في غرفته .....وبو منصـــور يالس في الحوي ... وحزة العشا الكل تيمع فغرفة الطعام الواسعه ...الحريم ع صوب والرياييل ع صوب ثاني ...... ام منصور : ميعاد فديتج امايه قومي ازقري بوج احيده في الحوي متيلس.... شمســـة ( بنت عمهم وحرمة عبيـــد) : برايها توها يايه من المطبخ حليلها ....انا بسير اشوفه .... ظهرت شمسه من غرفة الطعام و دخلت الصاله ..وشافت ان مبــــارك قابض الباب وبيظهر خاري صوب الحوي ... شمســــة : مبــــارك لو سمحت وانت ظاهر ازقر عمي بيتعشا .... مبارك صد وهو مغيض منها ومن انتبه ان محد غيرهم في الصاله قالها بحقد وبصوت خفيف اشوي عن حد يسمعه : جــــب انتي اوكـــي....وانتي اللي لو سمحتي ما ابغيج ترمسينيه ودية ثانيه فاهمه ... وظهر بسرعه بليا حرف زايد .....شمسه ما انصدمت منه ...متعوده ع ردات فعله الغريبه والعجيبه ....ياللــــــه يا مبـــــارك ....معقوله ما نسيت لي استوى من سنيـــن ؟؟؟؟ وردت شمســة بذاكرتها لنفس المكـــــان البعيــــــــد ......المـــــــــاضي.... في الليله لي خطبوها فيها لعبيد ....مضن سنة ونص تقريباً عن الليله لي سون فيها بنات عمها المقلب ....وهن نفسهن ين عقبها بيومين وقالن لها ان السالفه مقلب ...الا هي ما اهتمت و طنشت .... والصدق انها من البدايه ومن الاساس ما حبت مبـــارك....كل السالفه ان محبته كانت اتحسسها بجيمتها وتميزها من بنات العايله ....ماشي محبه بين أي اثنين في العايله غير محبة مبــــارك الها ...كان دوم ايطرش يهال العايله صوبها يغنون الها اهداءات وجدام بنات عمها ...والا يطرشلها وروود وحلاوة ...ومن هنيه حبن انهن ايسون المقلب....ما كان في خاطرهن أي كره أوغيره ...مجرد مزحه واكشن وحركات بنات....ولا درن بانهن قضن على احساس انسان ...وانهن بينسن السالفه وغيرهن بيدفع ثمنها سنيـــن...ما حسبن حسابهن عدل للأسف ...... اول ما وصلني الخبر ان عبيـــد ولد عمـــي خطبني تفاجأت ....بس فنفس الوقت استانست اشوي....لن عبيد شخصيته قويه وحلوة ...ويشتغل عقب ما تخرج من امريكا ...أطيب واحد من عيال عمي ....اممممم ولو انه اكبر عني اشوي...بيني وبينه 6 سنين....وهو اصغر عن خوه منصور بسنه .....صح ان من فكرت في السالفه طرى مبارك ع بالي الا سويت طاف...بما نه هو اصلن نساني وانا عن نفسي مب حاسه بشي صوبه .. ..الله يعلم لو بعده ايحبني .....لالا لو يحبني ما بيخطبني خوه...كان بيرمس وبيحتج عليهم ..... يتني ختيه ناديه واللي هي اكبر عني بشوي الا مب معرسه ع ذيج الايام وقالت لي اصلي الاستخاره ....صليت ووافقت الحمدلله .....ومن خبرت ربيعتيه هدايه ....اقرب وحده من ربيعاتي...قالت لي اول شي اتأكدي ان ماشي فقلب مبارك صوبج عقب وافقي....الا انا كنت موافقه خلاص وما اروم اتراجع ...واصلن ضامنه انه ما ايحس بشي صوبي......بس بعد رمستها كانت تخليني احاتي وافكر ...لازم ابين لمبارك انه شرات خويه مب اكثر ...واني انسانه يديده غير لي يعرفها .....بما اني عقب شهور بملج ع خوه لازم أصفي النوايا...... تتنهد شموس ) .....كنت اتحرى اني لازم اتصرف بسرعه وأبين له اني مسامحتنه وناسيه السالفه ....فقلت اول شي اسويه انه من ايي عدنا مبارك اظهر واسلم عليه من بعيد.....بما ان من يوم السالفه وانا ما اظهر له ولا اسلم عليه.......وفعلن سويتها ...من يا بيتنا تقريباً عقبها بشهر ...ظهرت وسلمت عليه من بعيد ونشدته عن حاله ...كان ياي روحه ....خيبه اذكر كيف كان منصدم من اني ظهرت له ...من نظرته قريت استنكار واضح.....بس قلت خله ايحس من نفسه اني ناسيه الماضي بكل ما فيه ......من يومها وهو كل ما ايينا اسلم عليه .....واساسا في عايلتنا معودينا نسلم على عيال عمومتنا من بعيد ...ومضرينا ع انا ما نتغشا عنهم ..... ويا الوقت دريت من خوي انهم مشتركين فمنتدى وعيال عمومتيه فيه ...فقلت يللا هاي فرصه بعد.....وشاركت ...سألت خويه عن نكات عيال عمي وخبرنيه ....وعرفت نك مبارك ...وشفت فكلمات توقيعه حزن كبير...وتساءلت بيني وبين نفسي ...لا يكون انا السبب ؟؟؟ ولاحظت قصايده اللي في المنتدى...بعد كلها تحمل نفس المغزى.....رمست هداية ربيعتيه وشركتها في المنتدى ....قالت لي انه مبارك بعده ايحبني وهالشي باين وواضح.......تميت افكر وايد ذيج الليله ....ابغي حل يظهرني من هالمشكله ...يلين وصلت لقرار.... هدايه : لالا حبيبتي ما يخصني... شمسه : دخيلج هدوي ها الحل الوحيد .. هدايه : كيف تبيني ارمسه؟؟؟ شمسه : اهم شي اضمن انه ينساني أهم شي.. هدايه : شمسه الحركه وايد عوده والله صعب عليه ارمسه.... شمسه : هدوي ياخي مالي غيرج عن هالحركات .... تميت ارمس هدوي فتره طويله واحاول اقنعها ...بإنها ترمس مبارك وتتعرف عليه من المنتدى عسب يلتهي عني وينساني......يلين وافقت هدوي ولعبت دورها ....للاسف كنا يهال والله ...يهال ولا نفكر صح.....ما قصدت اني ألعب عليه ...لا والله ....بس كنت اتحرى اني بحل هالمشكله جي .....للاسف يلين اليوم ندمانه ع اللي صار ....... هنيه وعت شموس من سرحتها ع صوت عمها بو منصور .... شمسه : هلا عمي .. بو منصور حليله شيبه وكبير : يا بنتيه قومي بنتعشى من متى واقف ازقرج ...لقاني مبارك خاري وقاللي بيتعشون ....داخل من متى الا اترياج تتوايبين لي ... شمسه تحب راس عمها : فديتك عمي ...اسمحلي والله ما انتبهت لك ...( وتمشي وياه يليـــــن غرفة الطعام .....والا مبارك من ظهر من الصاله قبض دربه ) ...... ++++++++++++++++++++++++++++++++++++++++++++++++++ ++ يــــــوم الأحـــــــــد ...الســـــاعة 10 ونص الصبح الجـــــــــــــامعة ..... ريمـــان وربيعتها رواضي يالسات ع طاولة فمبنى 80 ....ريمــــان اتكمل الواجب...ورواضي حادره المسن واتسولف ويا ربيعاتها يلين اتخلص ريمان .... ريمان : هيه صح رواضي ما خبرتج .... رواضي : خيــر ريمان ؟؟ ريمان : من يومين يا عدنا يوسف ولد عمي ..اتصدقين محد عدنا في البيت ... كلهم ظاهرين .....عقب اضطريت اني اظهرله وأقربه اروحي ..... رواضي من سمعت طاري يوسف صدت بلقافه : ههههههه واشو سويتي انتي ؟؟؟ ريمان : اضحكي ما عليج ...اسمعي .... من سكرت عن امايه اتطالعت عمريه في المرايا اول شي لازم اسويه اني اغير لبسيه ...اتخيلي اظهر بالبيجاما !! رحت ولبست لج مخوره ولفيت شيلتيه حولي عدل ....وبيني وبينج كنت حاسه بشوية خوف منه....وانا امشي صوب الميلس اقرى على عمري ( قاطعتها روضه تضحك ) رواضي : هههههههههههه جيه بيذبحج هو والا بيسحرج ... ريمان : اسكتي انتي والله لو تشوفينه بتحسين بغموض كبير ...وانا من ذكرت اللي صار في المزرعه خفت اشوي ....وبعدين انا واااايد استحي منه ....المهم بكمل لج ... فجيت باب الميلس وانا موخيه راسي ....سلمت وهبطت .... يوسف نش هنيه ورد السلام : واعلوج بنت العم ... ريمان وهي بعدها موخيه راسها : الحمدلله بخير وانت اعلومك ؟؟ يوسف : والله بخير وسهاله الا وينها عموه ام ناصر ؟؟؟ ريمان : احينه بتوصل ..ايلس استريح ....( كنت اتلعثم فرمستيه ...نظراته لي تخليني مب رايمه ارفع راسي ) الحمدلله لقيت البشكاره يايبه الفواله وكاشفه الملال ...وتعرفينه ميلسنا ....تجابل الكراسي طاولات صغار موزعه ع طول الميلس ...والفواله محطوطه ع حصير ... شفته مب صاك شي منها...يبت صحنين وحطيت له اشوي من كل شي.....وحطيت له الصحنين ع الطاوله .....ورحت ويلست بعيـــــــد عنه .....وكل هذا وهو يراقبني وانا صـــــاخه ولا اقول شي.... عقب لحظات سكوت .... يوسف : ماشالله حلوه القيمات ....انتي مسوتنها؟؟ ريموه يتها ضحكه لنها ذكرت الشوربه لي مسوتنها الا يودت عمرها : لالا البشكاره والله ... يوسف: هيـــــــــه الا ما قلتيلي أي سنة في الجامعه احينه ؟؟ ريمان : سنة ثانيه .... يوسف :موفقه ان شالله ريمان ....ما تخصصتي ؟؟ ريمان : بعدني ... يوسف : هيـــه ... كنت احاول قد ما اقدر اني اجاوبه باختصار ....ما ابغي اسولف وياه ....وينج يا امايه .... تم يوسف يطالعها ...اصلن هو ما نزل عينه عنها من يت ...مستغل الموقف اللي هم فيه وحابنه .....وجان يذكر رمستها ويا ربيعتها عنه وحب ينقمها ... يوسف : هيه عساج استانستي بس في المزرعه ؟؟ ريمان فقطــت ....شو قصده....لا يكون يوم لحقني يلين المطبخ في المره الاولى؟؟؟...والا المره الثانيه فليل يوم خذ قلاصي ..... ريمان : هيه الحمدلله استانسنا كلنا ... يوسف : لا بس انتي وناستج اشوي كانت غير .... سكتت ريمان ...هالانسان بيخبلني .... يوسف : شكلج اتحبين ربيعتج وايد...( رفعت ريمان عينها صوبه ) لاحظت انج ترمسينها وايد يوم كنا في المزرعه .....اكيد ما بتنسين اتخبرينها اني ييتكم صح ريمانه ؟؟؟ ( يبتسم بخبث ) نزلت ريموه عيونها وريجها نشف ....خيــــــــــــبه !! شداره اني رمستها ؟؟؟ ووشله ايقولي ما بتنسين اتخبرينها اني ييتكــم ....بسم الله ....لا يكون سمعني وانا اسولف الها عنه ؟؟؟؟بس مستحيــــــــــــــل .....محد كان حولي .....يالفضيحه لو انه صدق سمعني .......ما خليت شي ما قلته ....لا ياربي ان شالله ما سمعنيه ان شالله .... يوسف عقب ما حس انه وصل للي يبغيه ....حب يلطف الجو يوسف : خلنـــــــــــا من ربيعتج احين .......اقولج ... __DEFINE_LIKE_SHARE__ | |
| ||
| |
|
11-17-2008, 08:39 PM
| رقم المشاركة : [ 35 ] | |
| عضو ماسي | ريمان رفعت عينها بس ما رمست .... يوسف بابتسامه : ما بتقهوينـــــــي ؟؟؟؟؟؟؟؟ ريم في خاطرها .....لالالالا هالانسان اشو بلاه ....يباني اقهويه بعد ....وايد عليه يوم اني يلست وياك ...اصلن ماا اروم انش من التوتر والخوف ....عقب هالرمسه لي قالها كيف يباني ارد عليه ....الله يسامحج يا امايه ..والله انها اخر مره اقرب بهالانسان والله .... شليت عمريه بغصب وانا مستحيه ومفتشله ...حتى اني حسيت ان مشيتيه اختبصت ....وصلت صوب الدله ...خذت الفنيان وصبيتله اشوي وحطيت له الفنيان ع طرف الطاوله ...وانا ما بيني وبينه غير هالطاوله ..الا ما كنت مجابلتنه ..كنت ع طرف اشوي.....بعدني واقفه ...طبعاً ما بيلس حذاه لو اشو ما ايكون ... شرب فنيانه ...حتى انه بس ذاقه ....و رد ايطالعني وانا بعدني واقفه ... يوسف : انزين بتميــــن جي واقفه ع راسي ؟؟؟؟؟ انا فجيت عيوني وانا بعدني اطالع الارض ...ولا نطقت بحرف ....بس صديت ويهي الصوب الثاني...حس يمكن ان رمسته ضايجتني..... يوسف : انزين هاتي ما بنتعبج أزود عن ما تعبناج بنت العم ....هاتي الدله عنج ..... امبوني ما بعطيه اياها وبعزم عليه الا من شفته نش بياخذها وهو ماد يدينه ...جدمت له ايديني ع طول من الخوف وعطيته اياها وايدني فيها نفضه خفيفه ...هالانسان مسبب اليه عقده ..... واتكمل ريمان السالفة لربيعتها ..... ريمان : اتصدقين رواضي انه تم واقف حسيت به بيقول شي....الا ما قدر ... رواضي اللي اندمجت : وشله ما قدر ... ريمان ابتسمت وتقويمها محلي ابتسامتها : امايه دخلت رواضي : اوووووه شو هذا امج خربت ياخي هههههههههه الا انقذتج على آخر لحظة ( وجان تغمز ) ... ريمان : اقولج من يت امايه رحت احبها ع راسها وظهرت ع طول ...ههههههههه والله يني من ظهرت من الميلس خطفت اربع يلين غرفتيه فوق هههههه واتعثرت عند الباب ..الا اعتدلت وقفلت الباب ورايه وفريت عمريه ع الشبريه وتميت اضحك بليا سبب ههههههههههه رواضي : هههههههه شو بعد بليا سبب تراه خبلج الريال ..... ريمان : صخي انتي ....مستحيل اتجابل وياه وديه ثانيه ... رواضي : ريمان ....شكله سمعج اتصدقين يوم اترمسينيه....ادريبج انتي يوم ارمسج تنسين الدنيا ولي حولج وتاخذين راحتج وايد ....... ++++++++++++++++++++++++++++++++++++++++++++++++++ فنفس الوقــــت ....عند سمــــــوي كانت يالسه في الكلاس واتفكر ......يلين احينه وقلبها حارقنها ع اللي مسوتنه ليلوووه ....لكنها ما رامت توصل لرقم حارب ....كيف اييبه ؟؟ احينه من يوم ما شفت رقم خلفان ع تيلفون ليلوه وانا ما ارمسها ولا هي اترمسني ....ولا فكرت تتصل اتشوفني ...شكلها عرفت عمرها هالحيوانه ....مره وحده لمحتها عند البوابه وسويت عمريه مب شايفتنها ......الا ما ينفع جــــي ..... كل ما ارمس خلفان ما اتجرأ اطلبه رقم حارب...أصلن ما بيعطيني ....امممممممم بحاول ارد المياه لمجاريها ويا ليلوووه ......بقولها سوري ذاك اليوم اتصلوا بي هليه وقالوا ان حد من هليه متوفي عسب جي فريت الغراض وظهرت اصيح...هيه بخرط عليها...وبقولها ان ما كان لي ويه ارمسج لانج مأمنتني ع أغراضج .....هيه بقولها كنت اصيح ومنهاره مب عارفه شسوي ....واستحيت اتصل بج قلت اكيد زعلانه ...بالمره ما ابغي أبين لها اني عرفت بان خلفان يرمسها ......وبتمشي عليها السالفه ان شالله .....وبسحب منها الرقم بطريقتيه .....ما برتــــاح الا وانا اشوف حارب اللي رافعه خشمج بسبته ايدوسج ويساويج بالتراب !!! ++++++++++++++++++++++++++++++++++++++++++++++++++ ++ الســـــــــــاعة 5 العصـــــر ....بيت بو حميـــــد توها شموه مسكره عن ختها فطيم .....حتى فطيم اتقولي بتين عزيمة هل ريل نوف بتكون نوفه واصله ونبا انشوفها .....هيــــه يا فطيم ما تعرفين باللي فيّه ....للاسف ما رمت اصارحج ...اعرف اني بخيّب ظنج لو دريتي ......في حياتي ما ندمت عشي غير اللي صار بيني وبين مبارك .... بحاول قد ما اقدر انه ما ينتبه لوجودي ...و أي مكان يتواجدون فيه هله ما بسيره...الله يعين ... ++++++++++++++++++++++++++++++++++++++++++++++++ الســـــاعة 7 المغرب .....بيت بو سلطـــــان ... حــــارب منسدح ع شبريته ويفكر بليلى ......مب قادر ايفكر بأي شي غيرها .....وما يسده انها ترمسه في اليوم مره ....لا ودقايق بعد وتسكر عنه.....يبا يشوفها جدام عينه ويريح قلبه من الوسواس ...قام يحس انها وهم وحلم ..خاصه عقب رمسة خلفان ...... كانوا ظاهرين يوم الخميس ويتحوطون فمبزره .... خلفان : تعرف ان قد تمشينا هنيه انا وسموي ... حارب : اونه ...وين تبون جدام هالخلق ...وهي مب متغشيه عاااااادي ؟؟؟ خلفان : ههههههههههه هيه عادي اشو متغشيه انت بعد ..اقولك ميوّد يدينها وسوالف... حارب : حلوة هاي ولو حد من الربع شافك يالخام ناوي ع فضيحه شو ؟؟؟ قلنا نرمس اوكي اغلب ربعنا يرمسون ...الا مب جي تظهر عيني عينك....واحلى شي لو حد من هلها شافكم اللـــــــــه يرحمك ...... خلفان : لو حد من الربع شاف بقوله الهل ويايه ..ختيه خالتيه عمتيه ..ان شالله امايه ما يخصهم ....وبعدين تبغي اتقولي انك ما قد شفتها هاي ليلوه ؟؟ حارب : غير الصور لا ؟؟ وانا بصراحه طلبتها اشوفها من بعيد لبعيد بس .... خلفان : ههههههههه طع هذاااا ....وشو تتريون ؟؟؟ حارب : هي مب طايعه اتقولي انها ما قد سوتها واتخاف ... خلفان بمصخره : منووووووه ...ليلوه لي ما قد سوتها ؟؟؟ اصلن يوم اواعد سموي اتكون هي موجوده ....وهالشي صار اكثر عن مره الا ما بغيت اطري لك ........وشايفنها قبلك انا اصلن الا من شفتك عاشقنها قلت برايه ما بقوله ... حارب يالس يذكر رمسة خلفان ويذكر ردة فعله ....عصب على ربيعه وانقهر ...وشله تكذب عليه ليلوه ....يعني هي قبلي تعرف شباب ....انا مب اول واحد شرات ما قالت لي ...ما رمستها انا ولا قلتلها اني دريت .....ودام خلفان شايفنها وشله ما تبغيني اشوفها ؟؟؟امممممممم انا قلت يمكن تخاف تي اروحها ....انزين وشله ما تييب ربيعتها وياها .....اوف والله اني من ذاكي اليوم متضايج ...انا مب الا احب ليلوه الا اموت فيها .....مب عارف شسوي وياها ...لاازم اشوفها ....والا ما برتاح .... +++++++++++++++++++++++++++++++++++++++++++++++++ الســــــاعة 10 ونص الليـــــــل ....بيـــــت بو منصــــــــــور شمســــة حرمة عبيـــــد يالسه فغرفتها اروحها وتتطالع البوم الملجه واااايد تحب تسترجع ذكرياتها ويا عبيـــد لنها تحبه و تحمد ربها دوم انه نصيبها وقدرها ويا هالانسان .....رغم ان مضت فتره قرب السنتين ع الملجه الا انها اتشوف انها كانت صغيــــــــــره وايد ع ذيج الايام ....وغلطت وايد ......وردت لنفس المكـــــــــان بليا حاسيـــة ... للمــــــــــاضي ..... ليلة ملجتها .....عقب ما لبسها عبيد الطقم و اتصوروا ....يلست وياه اشوي عقب ما راحوا المعازيم ....كان يترياها في الميلس ...دخلت عنده وسولف وياها اشوي...لكنها لاحظت انه ما كان يطالعها وايد.... كان ساكت اغلب الوقت.....وتم هالشي في خاطرها ....الا ما رمست...ما كمل وياها 10 دقايق وراح عنها ......تمت اتفكر لا يكون ما عيبته ؟؟؟ لا يكون مب مستانس والا شي ؟؟؟ كان يزورها كل خميس ......وهي تتزهب له وتتعدل وتكشخ من الخاطر....وهو سوالفه كانت عاديه وااايد ....وكل مره ما يطول وياها ....ولا يسولف وايد.....كانت بليا حاسيه عقب كل مره يظهر عنها اتم يالسه في الميلس وتقارن...بينه وبين خوه ( مبـــــــارك ) في الشكل في الاسلوب في المحبه في السوالف ...في الاحساس.....عبيد احلى عن مبــــارك بشكل واضح للكل....بس مبارك في سوالفه ومحبته واحساسه لشمسه وتعبيره عن مشاعره تغلب على عبيد.....كانت هالنتيجه تضايجها ...واتخليها اتحس بالخساره ....جنها غلطت في الاختيار والا تسرعت .... تمت جاتمه هالاحساس عن الكل ....يلين صارحت ختها ندوي في يوم ...... شمسه : ندوي ...اتصدقين....مب مرتاحه ويا عبيـــد....ما اعرف ..احسه جنه عمي يابرنه ياخذني والا شي جي....يلساته ويايه سوالفه احس انها كلها من ورا الخاطر....جنه يجاملكم يوم ايي عندي ... ندوي : شو هالرمسه شموس ...هو ريلج واكيد انه ايحبج وولد عمج قبل كل شي.... شمسه : بس صدقيني انه ما يحبني ...وانا مب مرتاحه وياه ...شسوي ندوي ... ندوي : حبيبتي فترة الملجه شو فايدتها ؟؟ انكم تفهمون بعض ...وتتفاهمون ويا بعض....واي اثنين فترة الملجه يدرسون طبع بعض ويشوفون هل هم متوافقين والا لا...لنهم يرومون يغيرون اكثر عن شي فهالفتره ....سواء فنفسهم والا فحياتهم ....حتى انهم يرومون يكنسلون السالفه بكبرها ..... شمسه : قصدج ان اقدر اغير رايي ... سكتت ندوي وهي زامه شفايفها ما تبغي ختها اتفكر في الطلاق وهي مالجه من شهرين : بس فكري فيها عدل واستخيري أكثر عن مره ..وعطيه فرصه ......ولا تنسين انه ولد عمج .....واذا حسيتي انج بالمره مب مقتنعه فيه وما ترومين اتعيشين وياه بالمره ....من حقج انج ترمسين وتتصرفين ...بعدكم ع البر ترا ......بس فكري فيها وايد شموس.....انتي تراج صغيره ولا تعرفين تفكرين.. واسمعي مني اصبري عليه وودري عنج هالسوالف...ويللا اقري قرآن واستهدي بالله بسير برقد انا.......... تمت شموس تفكر فرمسة ندوي .....يعني ولو اني حرمته بعده شي وقت اني اتراجع فيه ....بعدني انا فبيت بويه .....حاسه بندم وبقهر من معاملته الجافه وياي ...جني خته ولا يعبرني بالمره ...انا مب هذي فكرتيه عن العرس ....كنت اتحرا انه بيحبني شرات محبة مبارك و أزود عنها ..وبيخليني معززه مكرمه من محبته... ( تمت تتقلب ع فراشها ذيج الليله وتصيح مب رايمه تفكر فحل...وهي ما خبرت ختها انه مقارنتها بين مبارك وعبيد وصلتها لهالنتيجه )......تعرف ان ختها بتعصب عليها وبتهزبها ....ومستحيل اترمس هدايه ربيعتيها ....بتقولها محد قالج تتسرعين وبتلومها اكثر ......بعدهن 3 شهور ع العرس .....وهي قد ما تحاول تتهرب من عبيد ....يدق الها ولا ترد ....وهو كان يدق مره و خلاص....ما كان يطرشلها مسجات بالمره ....ومن اييها تحاول قد ما تقدر انها تقصر لقاهم ....حتى انها حاولت تسوي بينها وبينه مشاكل عسب يطلقها ...الا ما قدرت ...والواقع ان عبيد ما كان يحبها قبل عن ايخطبها ...اللهم بوه قاله بخطبها لك ووافق حليله ...انسان هادي ومستهدي...وقال بياخذ وقته ويا شموس واكيد ويا الوقت بيحبها ...كان يتحمل زعلها فآخر فتره ودلعها ويقول هي صغيره وما تعرف معنى العرس بعدها ...وانا بصبر عليها ومقدر هالشي ....وبنت عمي وبتحملها وانا حاس اني في يوم بحبها وبعشقها بعد ).... والا شموس ما كانت تعرف باللي في خاطره .....وباغضتنه وباغضه شوفه ...دوم اتسولف عنه عند هدوي واتقولها انه بارد ولا يحس ولا يعصب وكريه ......يلين مره وهي في قمة ياسها وزعلها طرى عبالها الانسان لي يقدر يظهرها من هالحاله " مبـــــــارك " ......لازم ارمسه ....واقوله اني ما ابغي خوه ....هو بيساعدني اكيد ما بيقصر ادريبه ....للاسف قمت احس اني ابغي مبارك ....قمت اشتاق لأيام محبته لي ...قصايده ونظراته واهداءاته ...فرق كبير بين حالتيه وياه وحالتيه ويا خوه ........بس كيف اوصل لمبارك ...كيف ...... مره وهي ظاهره من غرفتها عطشانه ...شافت تيلفون خوها مفرور في الصاله ...ويتها فكرة انها تاخذ رقم مبارك منه .....خذت التيلفون وربعت غرفتها ....لقت الرقم وكتبته عندها .....وردت تيلفون خوها مكانه ......تمت اتفكر وايد وخايفه من اللي بتسويه ...وفنفس الوقت ...مالها حيـــــله ....... ذيـــــج الليــــــله مبـــــارك كــــــان يرمس شموه ....وهو من زمان مخبرنها انه ينزعج من بنت عمه يوم تظهر تسلم ...ومن ربيعتها في المنتدى........كانوا يسولفون هو و شموه سوالف عاديه ذاكي اليوم والساعه كانت قرب 12 الليل ......يليــــن ما وصل مبــــارك خط ...ورقم غريـــــب..... مبارك : لحــــظة شمامي ...حد يتصلبي هاي ثالث مره ...بس الرقم غريب ...اصبري اوكي بشوف اشو عنده وبردلج ...خلج ع الخط لا تسكرين...... ( وعلّق مبارك المكالمة ) ..... ترومون تقولون ان هالمكالمة نقطة تحول وايد كبيره فحيـــاة ثلاث اشخـــــاص.....شمـــــا ،، مبــــــــارك ،،، شمســـــــه .......وهي السبب لي يخلي مبارك حاقد ع شمسه لهاليوم ....ولو انها ما اتصلت كان بيعاملها معامله عاديه وشرات خته ...لاكنها فلحظة طيش ويهله خربت على عمرها وعليه......... من رد عليها مبارك استغرب ...صوت بنيه !!!! لا وتزقرني بإسميه ؟؟؟؟ شمسه : الووو ..الوووو.....مبــــارك وينك ...بلاك ما ترد ؟؟؟ مبـــارك : منوه انتي ؟؟؟ شمسه ترمس وهي ترتجف من الخوف وتصيح : مبارك اشحالك ؟؟ مبارك شك في الصوت وحس بدقات قلبه ...لا ايكون لي في باله ...بتكون مصيبه كبيره لو انها هي ....... مبــــارك : مـ ...منوه انتي ؟؟ شمسه وهي بعدها تصيح : مبارك انا شموس بنت عمك .....( تفاجأ مبارك وانصدم ) ....دخيلك مبارك لا اتسكر....والله اني ندمانه ع اللي سويته والله ....مــبارك دخيــ..( قطع عليها مبارك رمستها ) مبارك بنبره هاديه من الصدمه والعصبيه : شمســـة انتي حرمة خوي ...واتعرفين منوه عبيد بالنسبه لي...( تم يهزبها من عصبيته ....وتم يذكرها بموقفها وياه من زمان ويقولها تبين اتسوين نفس الحركه ويا خوي ؟؟؟؟ تم نص ساعه رافض انه يسمعها ....بس كان فيه جانب...مستانس ع اتاصلها ....حاولت شمسه تقنعه يسمعها وتستعطفه ...يلين للاسف ....قدرت......) شمسه : والله اعرف اعرف ...بس مبارك اسمعني ....انا ما احب عبيد انا احبك انت والله ما احبه ....اسمع السالفه مالبدايه ....يوم خطبوني استانست قلت لو ما يحبني عبيد ما بيخطبني ....ما فكرت فيك قلت يمكن نسيتني ...بس والله من ملجنا وانا كارهتنه وباغضه شوفه ما ادانيه ...ولا هو ايحبنيه بعد ....ما يعبرني ودوم ايسوي طاف وحتى يوم اييني احسه ياي ايجامل بويه وعمي ...ويوم يتصل ما يتصل من محبته لي لا الا يسالني عن حاليه و ايسكر....والله مبارك انك احسن عنه بألف مره ( شموس بعدها اتصيح ) .....انا اتسرعت والله اتسرعت يوم صدقت بنات عمي من سنة وشي ....المفروض اني ما اصدقهن فيك .....واتسرعت بعد يوم وافقت ع عبيد ....دخيلك مبارك ظهرني من هالمصيبه ......( وكملت شموس رمستها وهي اتصيح وتشاهق من الغصه ) طولوا وهم يرمسون .......مبارك ع قد ما هو زعلان ع خوه من الرمسه لي سمعها ع قد ما هو مستانس لنفسه ....تساهل وياها وحن قلبه.....هم الثنين ( شمسه ومبــارك) موقفهم كان انــــــاني.....وما انتبهوا ع النــــاس اللي بيتضررون من هالسالفه.........مبارك نسى شما ...نسى خوه ....ونسى....عمره ....كل لي ذكره انه ايرمس حبيبته وبنت عمه شمسه .........وشمسه ...نست ريلها ...نست عمها ...نست بوها ..ونست عمرها .....كل اللي كانت تبغيه انها تفوز آخر شي ولا تعيش الندم ........ ++++++++++++++++++++++++++++++++++++++++++++++++ ما كـــــــــانت شمسه الوحيده لي تسترجع احداث ذاكي اليوم ......شمــــــوه الثانيه كانت تراجع اخر ايامها ويا مبــــــارك ...... ذاكي اليوم طولوا مبـــــــارك وشمســه يسولفون......ومبارك نسى ان شمــــا معلقه ع الخط ......من حست شموه ان مبـــــارك أبطى سكرت عنه وقالت برايه اكيد اتصال مهم ..... حطت راسها ورقدت .......ساعــــات الا ويرد تيلفونها يرن مره ثانيه .....نشت من رقادها ع صوت التيلفون .......لقت رقمه ....مبارك يتصل ابها ....ردت عليه وهي رقادها مستحوذ عليها ......... شمـــــا وهي تحط راسها ع المخده : هلا هلا مبارك .... مبارك : شمــــوه ....ما بتصدقين لو قلتلج .....تدرين منوه متصل ؟؟؟؟ اخافج تزعلين لو قلتلج هنيه شموه نشت واعتدلت في يلستها .: خير مبارك شسالفه .... ما انتبه مبارك انه بيجرح شموه برمسته ولا حسب أي حساب لمشاعرها بالمره ...... مبـــارك : شمسه ...بنت عمي متصله ... شموه : منوه شمسه ؟؟ مبارك : لي كنت احبها ....بنت عمي لي كنت احبها ..... هنيه شمــــوه انصدمت ......مستحيــــل لي تسمعه .......انتبهت ع الساعه 3 وشي ......معقوله هم من ذاكي الوقت يسولفون ....وهذا مبارك ما يستحي داق ايقولي هالرمسه .....ما طوّل وياها مبارك ......ع طول سكر عنها وقالها برايج باجر برمسج .......... معقوله لي يصير.....مبارك يرمس حرمة خوه ....كيف؟؟؟و بأي حق يرمسها ؟؟؟وهي بصفتها منوه اترمسه ؟؟؟ افا يا مبارك ...أفــــــا والله .......وانا ....وين رحت ؟؟؟؟ ومحبتك لي وين راحت ؟؟؟ داق مستانس بعد .....ويبشرني.....!!!! ما رامت شموه اتفكر من الحزن لي فيها تمت اتصيح ع مخدتها بحرقه ....هذا لي ضحيت عشانه بثقة هلي ...وحتى عذاب ضميري اتجاهلته عشانه ...وقلت ما عليه ما ابغي ازعله مرتين ...مره مني ومره من بنت عمه ...كنت اقول بترياه لين يهدى باله من سالفه عرس خوه وعقب بقوله انتم ع المسن وبس.....هذا يزايه يا مبارك ....هذا يزايه عقب ما تحملت قصايدك لي كلها عنها ....محبتيه لي عطيتك اياها واحساسي .....وقفتيه وياك ووجودي ...تيازيه بالنكران ؟؟ وفلحظات رجوعها تنسى ما بيني وبينك ولا تحسب حساب لشعوري ....جني بلا جيمه ومقدار عندك .....خيبت ظني يا مبارك .....خيبته ... عقب هالسالفه مبــــــارك تناسى وجود شما لأيام ....وشموه كانت في حاله ما يعلم بها غير ربها ...انصدمت من تصرف مبارك ...والأدهى انه اتصل ابها عقب 5 ايام يقولها كتبت قصيده يديده وابغي رايج فيها .......كانت الكلمات اتدل على فرحته برجوع بنت عمه .....وكانت واضحه ...قاطعته شموه قبل لا ايكملها ......وقالتله برمسك عقب.........كمل يميله وياي وما قصّر ....هذا ما يحس شوو ؟؟؟ معقوله هذا مبارك نفسه ؟؟؟اشو بلاه ؟؟ شو استوابه ......كاش جي داق يسمعني هالكلمات ....والا يتحراني بقره ولا افتهم انها مكتوبه فيها .....خله يروح ايسمعها اياها عيل .......انهارت شموه عقب هالمكالمه ....وخذت قرارها بانها تقطع مبارك ....لانها اكتشفت انه رغم كل الي كان بينهم ...مبارك ما حبها ...او على الاقل ما كان ملكها أبد......في اليوم الثاني شموه دقت له وداست ع قلبها وانهت كل شي بس من غير ما تناقشه باللي سواه او حتى اتقوله كلمة " ليش " .....ما حبت تعاتبه ...لن لي سواه شي ما يكسره العتاب ....واكبر من ان الواحد يغفره لمن يحبه ....هان شموه ولا احترمها ......كانت هذي آخر مكالمه بينهم .....شموه قالتله ما ابغي ارمسك و خلاص ....هو قالها ليش وحاول ايعرف السبب ....يابتله اسباب ثانويه دخلت فيها هلها وجي بس ما قالتله الصدق .......... عقب هالاحداث بينها وبين مبارك بشهر.... خبرت شموه ربيعتها حصوص باللي استوى ....حصوص تمت اتعاتب شموه وحاولت قد ما تقدر انها اتخفف عنها ..... وهــــذي هي سالفة مبــــــارك وشمـــــا ....اللي اختفى من حياتها وظهر الها عقب فترة طويــــــــلة ....هي شافته فعرس نوف وردت الها الاحداث كلها ....سببلها بتصرفاته صدمة نفسيه ومعاناة ....وفنفس الوقت عطاها درس مهم في الحياة...وهو ان الانسان لو مهما يكون المفروض انه ما يرخص بمبادئه و بهله ولو كان في سبيل الحب...... وبالنسبة لمبارك وشمسه بنت عمه ......مبارك وعد شمسه انه يتصرف وانها اتخلي السالفه عليه..وهو قد ما يقدر بيحاول ايكنسل السالفه ..... شمسه كانت حاسه بخوف كبير من اللي سوته ...او ان السالفه توصل لهلها .....قررت انها تخبر ختها ندوي وتعترف الها باللي تحسه وباللي سوته ..... ما تذكر شي من حوارها ويا ختها ندوي قد الكـــف لي ياها ....ندوي صفعتها بقــــو عقب اعترافاتها .....وتمت اتقولها انتي ياهل وغبيه ...وانا قلتلج ترومين تعدلين وضعج وحتى انج ترومين تطلبين الطلاق بس مب انج ترخصين باخلاقج وتسودين ويه بوي ....انتي خاينه وما تستحين ...قلتلج تفتكين من عبيد ...بس مب عسب تاخذين مبارك...ولا ظهرتوا مخططين لكل شي انتي وياه ومتفقين انج اتسوين مشاكل لريلج عسب تتطلقين وياخذج خوه ....وين صارت هاي يا شمسه ....بس قوليلي وين صارت ....لالا انا لازم ارمس بويه لازم ..واخليه ايجدم موعد العرس....والا تراج بتنزلين راسنا و بتضيعين ....تمت شمسه اتصيح وهي تترجى ختها انها ما تييب طاري لعبيد والا بوها ......وافقت ندوي...بس ع شرط انها تقطع المكالمات ويا مبارك ويجدمون موعد العرس....وافقت شمسه وهي بليا حيله .......واكيد ما كانت تظهر لمبارك عقب لي صار ولا قالتله حتى انها رمست ختها ...قطعته فجأة ..... تم الوضع عادي....يلين يا اليوم لي كانوا فيه عبيد ومبارك ومنصور ومحمد ووياهم بو منصور يلوس في الميلس ........ سكر عبيد عن شمسه وهو يضحك ومستانس .... منصور : ضحكنا وياك ... عبيد : بجدم موعد العرس .... مبارك لي انصدم : كيــــف ّ!!؟؟ عبيد : بجدم موعـــد العرس ... مبارك : ليـــش؟؟؟ عبيد ابتسم باحراج خفيف : هههههه الظاهر مستعيلين عليّه ... عصب مبارك وحس بضغطه مرتفع ....حس بحقد وغيره وكره صوب بنت عمه .....وتم يلعن ع شمسه في خاطره....تلعب عليه هاي شو ؟؟؟؟؟؟ شو سالفتها مب انا وهي متفقين على كل شي ....واحينه خويه مسكر عنها اتقوله جدم موعد العرس!!!!!!....والله في حياتي ما بسامحها ع اللي تسويه ....شو من بشر هي ؟؟؟ شايفتني مصخره يا شموس تلعبين بي؟؟؟ تقطعينيه يوم تبين واترديني يوم تبين ....اتخسين الا انتي ..... من ذاكي اليوم ومبارك حاقد ع بنت عمه .....واكثر احساس يراوده من يسترجع لي صار هو الخساره .....خسر انسانه حبها " بنت عمه " وخسر انسانه حبته " شمـــا " وخسر ضميره الصاحي حين غدر بخوه ....وخسر نفسه ويا الوقت .......وتم سجين لاحساسه بالحزن والحقد .... اما بنت عمه .....كانت عقب العرس اتحاول قد ما تقدر اتخلي علاقتها ويا مبارك طيبه وحلوه .....هي غلطت ومعترفه وفاهمه غلطتها عدل .....بس مبارك مب راضي يفهم انهم كانوا صغار ...وما كانوا فاهمين الدنيا عدل....شمسه نفسها عقب اول شهر قضته ويا ريلها عبيد عرفت ان محبتها الخالصه والدايمه محد خذاها قبل عبيد ....عرفت وياه السعاده والحب والتسامح ...صبر عليها وايد وغيرها وايد.....لين صارت ما تستغني عنه ابد ....هو بنفسه اعتذر عن بروده ايام الملجه ...وفسر الها انه كان هالشي طبيعي لن توهم يتعرفون ع بعض ...والله ما كنت آمن بشي اسمه حب بعد الزواج الا من حبيت عبيد وحبنيه .....نساني كل غلطاتي وويا الوقت شفت اني انسانه ثانيه ...وحده عاقل وكبيره وواعية لخطواتها ......بالنسبه لمبارك......كنت أبين له اني عاديه وارمسه بشكل عاااادي الا هو يعتبر كل رمستيه مغايض ....فنفس الوقت ما حبيت اني ما ارمس مبارك عسب ما يفسر سكوتي عإنه مشاعر مكبوته ......يللا ان شالله الوقت كفيل بإنه يوضح كل شي...الله يهديك يا مبارك الله يهديك ....... +++++++++++++++++++++++++++++++++++++++++++++++++ عقب ما مضن ايام ... يوم الاربعا ....الساعه 5 العصــــــــر...... بيت قوم حصوص / بيــــت بو سلطان شموه يالسه في الحوي عند حصوص....يسولفن ويتمصخرن .... حصوص: اقولج ها خويه حروب انا شاكه انه ايحب...24 ساعه يرمس حبيبته بعد وعادا اونه من ايشوفني ايقول ها خليفه واشوي ينسى وايقول انزيييين احمد هههههههههه شموه : هههههههه اتخيلي لو انه ايحب ليلوه مب انتي قلتي يرمسها ... حصوص : ههههه لاااااااا مستحيل وين هو ووين هي....شوفي صح ان حروب مستهتر و ربشه ...بس احسه يستانس ع البنيه الهاديه الرزين والطيبه تلفته واااااااايــــــد.....عادا ليلوه الله لا ايرويج ان شالله ...... شموه : هههههههه خلنا منهم الله يستر ان شالله .....باجر العزيمه صح حصوص : هيه ان شالله ...شو ما غيرتي رايج ؟؟ شموه : لا ان شالله هلي بيسدون عني ... حصوص : حيهم والله وانتي مرحبا بج لو غيرتي رايج .... واشوي ان سياره هابطه بيت قوم حصوص.... شموه تغشت : وي حصوص منوه ياي عندكم ؟؟؟ حصوص وهي تعدل شيلتها : ما اعرف .....( ومن دققت نظرها عرفته ) لاااا شمووووه ها ميــــــود ولد عمي ...... شموه : شو نشرد ؟؟؟؟ حصوص : ههههههههههههه وين نشرد انتي بعد فضيحه خلاص شافنا ... شموه : هيه صح قولي انج تبين اتشوفينه ....سباله هههههههه ما ردت عليها حصوص لنه نزل من سيارته ويا صوبهن .... ميود اول ما شافها بغى يبتسم ابتسامته هاييــــج هههههههههه توه ياي يبتسم الا يوم ذكر انه مزعلنها زم شفايفه اونه معصب .....حركااااات ميود...شموه شافت الحركه وضحكت تحت غشوتها الا حصوص حليلها مب قادره تضحك..... ميود يا صوبهن ووقف ....: السلام عليكن ..... حصوص اونها مسويه عمرها رزين وهاديه : مرحبا ميود وعليك السلام .... ميود في خاطره ...اونج زعلانه ههيهييهههيههييهييييي هاديه ها انا ارويج ان ما حرقتلج اعصابج يا حصيصه ......بسوي عمريه معصب ..... وجان يقول بصوت عالي اشوي : وين عمــــوه ؟؟؟؟ ( خيبه ههههههه جني زودتها اشوي ....خلاص عيل بلا حرق العصاب اليوم ) حصوص فجت عيونها وشموه تضحك عليها : ها ...هيه احينه بزقرها لك .... ميــود : لالا اصبري ( سار صوب سيارته وظهر منها جيستين وحده من عبدالصمد القرشي والثانيه من باريس غاليري ...وسار صوب حصه....) ...يودي ها .....العطور العربيه للوالده والباجيه لج ....واسمحيلنا ع اللي صار آخر مره .....ترا ما قصدنا ...ولو شو ما كان انتي بنت عمي و ع العين والراس .... شموه مبتسمه وحصوص احمرت ....خذت عنه الجياس وهي مستحيه حصوص : وشله متعب عمرك ميود آآآآ مـــايد .... ميود ....في خاطره ....افاااا جان خليتها ميود احلى ...أف منج...... : لا والله ها شي بسيط عسب انصفي النوايا اشوي....ههههههه نعقد هدنه انا وانتي....وصديقتج شاهده .....( ويصد ع شموه وايرمسها ) اشهدي اوكي حصوص راضيه علينا .... شموه تضحك بصوت خفيف اسلوب مايد وايد مرح ..... ميود : سلمي ع الوالده حصوص اوكي..ويللا من رخصتج .. حصوص : افا ما يلست ولا اتقهويت .. ميود : وديه ثانيه ان شالله ..يللا في وداعة الله ... شمــا + حصوص : ربي ايحفظك.... من ظهرت سيارة ميود من البيت شموه عقت غشوتها ....وصدت تتطالع حصوص ..... شموه وهي اتقلد حصوص : افا ما يلست ما تقهويت ما سولفت ويايه .... حصوص : ههههههههههههههههه حشا عادا هاي الاخيره من عندج .. شموه : من عنديه والا غيره تراها في خاطرج ....ها رويني شو يايب شيخج ؟؟؟ حصوص : هههههههه شاخن ركبج ..تعالي تعالي ....( وتمن يفجن العطور واتخبلن عليهن ) حصوص مستانسه ومتأثره : شمامي....والله ما توقعته بيسوي جي شمامي: فديتج والله حصوص تستاهلين كل خير والله ...عساااااااج دوم مستانسه يارب... حصوص : وياج يااااااااااااااااااارب ++++++++++++++++++++++++++++++++++++++++++++++++++ :: من خفايا قلب { متـــألمـ } :: تناسيت { ليــــالي ْ المحبة / بلحظات / رجوعهـ ْ~ ما اذكر انك قٍليــــل الشـــــــان وذليل // يـا صاح } البــــارحهـ // أنكــــرت موّدك وتركتهـ } بروعــهـ تركتني اتسائل ::وين الشوق ؟؟والـــود ويـــــن راح ؟؟ وانــــا / الخيــــانهـ // فــي مرجـــعي ما هي { بمشروعه و { إنت} بالأمــــس بعتني و زوّدت الجــــراح ْ~ خيّبت رجايه وميّزت } غلاكـ } وش هو نوعـــهـ غلا أيام } داويت بهـ عوقـــك وعيّشـــــك // الافــراح .. واليوم ما عادت له لزمه ~ كأنها المشاعر } منزوعــه~ وانا اللي الشـ ع ـــور عنواني و /احساسي قصيـــد فوّاح تصدق } أخايل دمـ ع ـــاتي لأجلــك/ الجرح ورجوعهـ وما اشوف غيـــر قلـــب يحاتيك { ولا اظنهـ استراح / بسمتك // راحتهـ دايـــــم ولو انها للغيــر { مزروعـــهـ~ مـــا كنت أرتضي { دمـ ع ـــاتك ولا {حـــزنك ولا { الصياح وانت تركض لهمــك وتشوفه يوم فرحـــك / واسبوعهـ }~ مــا اقول غير }عســـى} تلقى فيــه الرضـــا والانشراح }~ وخــــذ كـــل أبياتي الللـــيلة ويا الدمــ ع ــــــات } مجمــــوعهـ أبغيك تعرف كمـ عنيت لي وعقبها //سلامـــي والمسراح } ْ يــــــامن داويـــت قلبي و //البـــارحه / نزعتـــه،،من ظلوعــهـْ~ } أرجـــــوك} غــادر ومسمــــوح ،،عـــذرتك، قبــل طلبك السمــاح } ْ~ +++++++++++++++++++++++++++++++++++++++++++ وهنـــــا ... أطوي صفحة اليوم بعد ان امتلأت بخفاياهم .. احمل دفتري وانسحب بهدوء...دون أن يلتفت إلي قلب... أقفل خلفي أبواب خفاياهم بسكـــــــون ... لأعــــود في الغد ...و أخط مــا أراه ..في دفتري .... بإذن اللـــه... لـــي ولكـــــم ×× لخفــــايا قلــوبهُم { بيــــبان } دقـيتهــا البــارحة و // طلـــّيت ×× ++++++++++++++++++++++++++++++++++++++++++ بينـــي وبينكـــم×××× شمــــا ومبــــارك انكشف ماضيهم لكم وبان .... لكن يا ترى هل بيرد القدر ويحطهم في مواجهة قريبة ؟؟؟ حصوص وولد عمها ...بين مشاعر خجوله فقلب حصة وحقد بنت عمها عليها ....شو بيستوي عليها ؟؟؟؟ حــــارب وليلى ....متى تنكشف له ليلى وايعرف الصدق؟؟ وشو بتكون ردة فعله صوب كل من ريم وليلى ؟؟؟ يوسف و ريـــمان؟؟؟هل يمكن يستوي شي من بينهم ؟؟؟ ورواضي؟؟؟ بيتم قلبها خلي والا الايام بعد تحمل لخفايا قلبها نصيب؟؟ انتظر توقعاتكم وآرائكــــــم .... ][ الشمــــــوخ البسيــــــــط ][ __DEFINE_LIKE_SHARE__ | |
| ||
| |
|
| مواقع النشر (المفضلة) |
« (يَ أمَانِينَا مَا عَادينْفّعْنَا صَبرْر .. تعبْنَا ندَوّر لـِ بكْرَا عذرْ ! ,)
|
رواية يوم الله بلاني بالحب حبيت طفلة »
العرض العادي
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| دقيتها لطمه/ورحت زعلان "طبع بدوي" لاضاق لف العمامه||~ | ›• غَنٍجَ اڷشاُمً ‹• | المسنجر وملحقاته , توبيكات , ماسنجر بلس , msn | 8 | 06-29-2010 12:54 PM |
| ليلة البارحة ؟ | محروم.كوم | منتدى أخبار المواقع والمنتديات العربية والأجنبية | 0 | 02-02-2010 09:50 AM |
| البارحة واليوم | نعم نعم | شعر و خواطر | 5 | 04-18-2008 02:14 AM |
| البارحة يوم الخلايق نياما ... | نمر بن عدوان | تراحيب وتهاني | 26 | 01-24-2008 07:03 AM |
الساعة الآن 03:31 PM
- اخبار رياضية
- اخبار الامارات
- اخبار ريال مدريد
- اخبار برشلونه
- العاب فلاش
- مسلسلات وافلام
- مسجات
- فيديو كليبات
- سيارات للبيع
- ارقام سيارات
- ارقام هواتف
- هواتف للبيع
- حيوانات للبيع
- قوارب ويخوت للبيع
- ملابس واكسسوارات
- ساعات ومجوهرات
- اناشيد اسلامية
- نغمات اناشيد
- نغمات اسلامية
- ادعية اسلامية
- رقية شرعية
- قران كريم
- ديبيات اسلامية
- اذكار المسلم
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208 209 210 211 212 213 214 215 216 217 218 219 220 221 222 223 224 225 226 227