××لخــفايا قلوبهـم {بيـبـان} دقيتها البارحة وطليت - الصفحة 6

+[ ملاك الحسن ]+ · 10-20-2008, 07:57 PM

ريم في خاطرها ....وينج يا خوله الله يهداج .......قالت بتسير اتييب الجرج ولا ردت ......وبعدين قالولنا بنظهر الصبح...وشله أخروها يلين عقب الغدا ..... استغفر الله نظرات يوسف من قوتهن احس ابهن وانا ما اطالعه ....

وهنيه نش يوسف وطبعاً من أول ما يلس عندهن ما نطق بشي الا احينه : علــى فكـــرة ...( صدوا صوبه كلهم عدا ريم اللي رفعت حايبها ...)

يوسف : ترا يتريونكم ...

ام سالم : وابويه عليك وشعنه ساكت الله يهديك ....

يوسف وهو يمشي عنهم : توني الا اذكر... " شـــل قشاره وظهر "

ام سالم : بينني هالصبي ...

ام ناصر : هههههه حليله جاد انه نسى..

هند ترمس علايه وهي اتطالع ريمان : هيه بينسى يوم هاي يالسه ومظهره قصتها ...عقي الشيله مره وحده .....

سمعتهن ريمان الا ما عطتهن ويه ...هي كانت رافعه قصتها وشيلتها طايحه اشوي فظاهره قصتها ...هي ما تسوي جي عسب تلفت حد الا اتعودت ع جي .....

نزلت خوله وهي لابسه عباتها ....وهنيه دخل خوهن الصغيرون : يلا بابا ايقولكم يللا انقفضن .

نشن الحريّم ولمن قشارهن وظهرن ع السيايير ...وام سالم تمت اتوصي البشاكير ....ريمان وهي يالسه ورا ع الدريشه و فجت الجامه ..لان خوله ناولتها مجلة .... يت بترفع الجامه عقب ما راحت خوله ... وانتبهت له انه يطالعها ويدقق فملامحها ...بنظرة طويـــــــلة ....استغفر الله ...صدت ويها الصوب الثاني ورفعت الجامه ......وهو راكب سيارته ...وبعده يطالعها ....

يوسف في خـــاطره : بيـــــــــنا الأيــــــــام يـــــا بنت العم !!!

++++++++++++++++++++++++++++++++++++++++++++++++++ ++++

الســــــــاعة 4 ونص العصــــــــر

واقفة جـــدام مرايـــا من مرايـــــات الصالون .....أول مرة ايعيبهـــا مكياجها ......اتطالع الفستان ...عينــــاوي وكله كرستالات ....ما تم الها غير التسريحة ... اممممممممم حصوص اتفكر .... ارفعه ؟؟؟ والا اسويله حركة من جدام واودره مفتوح ....ممممممممممممم خلاص بفتحه احلـــى ...وبخليها اتسويلي حركه خفيفه صوب القصــة ....

موزان تتطالع حصوص ....وهي مب رايمه اتحدد موقفها منها ....صح انها بنت عمها ...بس هي مقهورة منها لانها دوووم اتســـوي طاف لخوها ..وتتعمد تتجاهله ....بس اللي ما تعرفه موزان ان حصـــوص ولا عندها خبـــــر بهالموضوع ..وبالنسبة لهلها ...يمكن هم فاهمين السالفه و حاسين بمشاعر مايد صوب حصة ...الا الرمسة فهالسوالف يتجنبونها .....والكل يتحراها تدري ......والا حصوص من يوم خبرتها موزان وهي بعدا مب مصدقة ....حتى انها مب قادرة اتفسر هالشعور اللي فيها .....مستانسة وخايفة فنفس الوقت ......

مهرة خت موزان وهم يعابلون شعرها ( بصوت اشوي عالي ) : موزان .." صدت موزان صوبها " .....توه مـــايد يتصــــل يقول انه بيخطف علينا وبيوصلنا بيت عمــــــي ...

جاوبتها موزان بعيونها ....وقالت في خاطرها أدريبه يبغي ايشوفها ......" وطبعاً موزان يالسه تتريا دورها يسوون لها تسريحه من ايخلصن غلامتين ...

والا حصة اللي كانت يالسة وبينها وبين مهروه كرسي ...حست بقلبها ايفز من رمسة مهرووه .....اونه ...شو يبى بعد ايوصلنا .....لا ايكون يبى يشوفني ...( نزلت راسها وهي مستحية من هالافكار اللي قامت اتييها على غفلة )....

++++++++++++++++++++++++++++++++++++++++++++++++++ ++++

الســـــــــــــــاعة 5 العصـــــــــر .......قرب المزرعة ...

هل ريمان اشوي وبيوصلون المزرعة ....ريموه امبونها متضايجة واللي زاد ضيجها ظهور هاليوسف .......وكانت هي وخوها عبود وبوها وامها فسيارتهم ....و يوســف محد وياه غير خوانه الصغارية فسيارته ....وسالم وياه حرمته وامه وخواته هند وعليا .... وأخيراً العم خالد (بو سالم ) ومحد وياه غير خوله بنته .....وما ننسى الدريول اللي شال وياه الدراجات ....

وصلوا أخيــراً .....نزلوا وكل واحد فيهم شل قشاره وياه .......ريمان حطت اغراضها داخل الغرفة اللي بتبات فيها ويا امها وبنات عمها ....وهي ظاهرة من الغرفة تمت تتامل هالبيت اللي بانينه فنص المزرعه بس اشوي على صوب ....صح انه بسيط لكنه واســــــع فنفس الوقت ....فيه حول الخمس غرف ...غير الصالة ... امممممممم تغير المكان والله ....مرتب والمزرعه واسعه ماشالله وخضرا ....وهواها نظيـــف وايرد الروح ......ابتسمت ريمان ...وكملت طريجها تبغي تروح لين السيارة و اتعاون امها .....لان بعدهم ما نزلوا كل اغراضهم ....ومن اوصلت اتفاجأت به واقف وحاط يده ع سيارته والثانيه يمسح ابها لحيته ... ويطالعها جنه كان يرتياها ..استغفر الله وايد غريب هالانسان ...محد خاري غير ام ريمان ووياها حرمة عمها يظهرن الاغراض وايعطونها الصغاريه يسوقونها داخل ....والا بنات عمها الثلاث كانن يرتبن الاغراض في البيت ....

ريمان تجاهلت نظراته ووجوده بالمره وراحت صوب امها : امايه تبيني اشل وياج شي ...

ام ناصر : هيه فديتج خذي هالجيسه ووديها المطبخ ....( وكانت ثجيلة اشوي )

ريمان وهي تتطالع الجيسة : وشو حاية هالصحون كلها جنا سايرين البر ..ماشالله مطبخ عمي مزهب وايسد ...

ام ناصر : وابويه عليج ....وجنه قصرنا صحون والا شيات شو تبينا انسوي ؟؟

ريمان ( ابتسمت ) : فديت ويهج ..خلاص احينه بوديها تبيني ايي ودية ثانيه و أشل شي ؟؟

ام سالم : لالا بنتيه برايج ..

وخطفت ريموه عنهن وسارت صوب المطبخ اللي كان ورا البيت ....الجيسه ثجيله عليها .....وهي يالله يالله اتشل عمرها ...ههههه استاهل منوه قاللي اسير واعرض خدماتي ....

فجأة رفعت حايب يوم سمعت خطى حد يمشي وراها ....افا !! منوه يتبعني ؟؟؟ انتبهت لظله وعرفته ...لا حـــــــول ....شو يبى مني ؟؟؟ بسوي طاف احسنلي وبكمل دربي ..يالله ما تم شي ع المطبخ ...وتوها ريمان تدخل المطبخ وهي حاسة بخوف طفيف فقلبها ..خاصة ان " يوسف" ما نطق بحرف ......دخلت ... وهو وقف عند الباب...امممممممم وين احط الجيسه ؟؟ خلاص بحطها عند الوعيان .....وحطتها ع طالة محطوطه آخر المطبخ ....وهي متخوفه من انها اتصد وتجابله عسب اتكمل دربها .....بس خلاص مالها بد من انها اتشوفه اليوم ...وبعده ليلهم طويـــــل وقعدتهم بتطول في المزرعة ....توها بتصد ما وعت به الا وهو ايي صوبها بسرعه ...زااااااااغت ريمان هنيه وشهقت ....ياويلي شو يبا ...

يوسف وهو يطالعها : نسيتي هذي ...

ريمان وهي اتحس بقلبها ينبض بقو وابتعدت عنه اشوي بس الخوف كان واضح فصوتها : خير ؟؟

يوسف ( وبنبرة هــــادية وبرود) : هـــذي ..... ورفع ايدينه .. وكانت مجلة ريمان ..

ردت ريموه نصخها واتطمنت اشوي ..بس توها اتمد يدها بتاخذ المجلة ...والا يوسف ايفرها ع الطاولة ....ويظهر بليا حرف ......

وريمان تطالع باب المطبخ وهي فاجة عيونها ...وحاسه ويها حار من الخوف .....

: يالله بالستـــــر .... ما حسيت غير بقلبي بيظهر من مكانه ...لا اله الا الله ..

تمت ريموه فترة دقايق في المطبخ ...تبغي تضمن انها من تظهر ما تتجابل ويا يوسف بأي شكل ....

++++++++++++++++++++++++++++++++++++++++++++++++++ ++++

الســــــــاعة 6 ونص المغرب ......

حصوص ...و مهاري ..وموزان ..يترين حارب ....اللي تاخر عليهن اشوي .....وهن كلهن ماشالله عليهن ظهرن حلوات ..الا حصوص ظاهرة غيـــــــــر ....المكياج محلنها واااايد ...وظاهرة كيوووت ....

مايد يتصل بموزان وايقولها انه وصل ....

ظهرن البنيات .....وركبن عند ميـــــود ....يلست موزان جدام وراها مهاري ...وحصوص ورا مايد ...وبينهن ساروه الصغيروة ....

سلمن ورد مايد السلام .....وانتبه ع حصوص انها متغشية...وفي خاطره .( مسودة الويه ...مستحية اونها ...ما عليج حصيصة ).....

مهاري وبليا قصد حليلها : وشله متغشية حصوص ؟؟ بتستحرين وبيخترب مكياجج ...عقي غشوتج يلين نوصل البيت ...

حصوص انحرجت ولا عرفت بشو اترد ...هي مستحيه من مايد ...بس فنفس الوقت قالت فخاطرها ترا الا البارحه شايفني ..يللا بعقها وانا لله وانا اليه راجعون ...رفعت غشوتا وحطتها ع راسها ...هنيه ميود ما صدق خبـــر ...وتم يتطالعها من المرايا...حست به حصوص وانحرجت ....لا حوووول ...

ميود وهو قاصد برمسته : محلوييـــــن ما شالله ....

موزان فهمت عليه و مهاري ضحكت ....ولا تعليق من حصوص اللي ماتت مستحى ...

موزان : أقول الحص ..

رفعت حصوص راسها : هلا

موزان : منوه بيودينا القاعه ؟؟

مايد ارتز : افا والله ..جيه انا وين رحت ؟؟

موزان وهي توجه رمستها له : بتودينا ؟؟

مــايد وباصرار : نعـــــــم....وعن حد يتعذر عقب ( قاصدنها بعد )

رفعت حصوص عينها جدام وطاحت لثواني عينها بعينه وابتسم ...وااااااايد انحرجت حصوص اليوم ....وتمت اتقول في خاطرها ...لالا مب قاصرة فشايل أزود عن جذي ...انت يا ميوود هذا ويهي جني ركبت عندك ... كلها رمستك نغزات فنغزات ..مسود ويه ..

وصلهن بيت عمه ..واللي هو بيت حصوص .... وع الساعة 7 ونص ظهروا صوب القاعة كلهم ....و نوف حليلها ركبت ويا حارب خوها اروحها ويلست ورا عسب فستانها ....

++++++++++++++++++++++++++++++++++++++++++++++++++ ++++

الســـــــــــاعة 7 ونص

شمـــــوه يالسه ترتب مكياجها وعندها ختها المعرسة فطيم .. يت عسب تحظر عرس نوف اللي هي ربيعتها فنفس الوقت .....شموه لابسه فستانها البرتقالي ...ورافعه شعرها ...ومكياجها خفيف ...وظاهرة حلوة ....و ختها فطيم بعد كاشخة ....

شموه : شرايج فطيم ؟؟

فطيم : حلوة ماشالله

استانست شموووه ...

شموه : ابغي اشوف حصوص ..داقة تتخقق ههههههههه اتقولي ظاهرة ملكة جمال ...

فطيم : حليلها الحص ...بس اتوقع معازيمهم وايد شموووه ....

شموه : هيه امبونهم ماشالله عليهم ..

فطيم : بس هالمره لا تنسين انهم ماخذين من برا العايلة ...ونسايبهم ما شالله يوم الملجه وكانوا تارسين البيت فشو تتوقعين اليوم ؟؟

شموه : هيه صح ...يللا ان شالله خير ...بتسوقين يلين القاعه ؟؟؟

فطيم : هيه ان شالله ...

++++++++++++++++++++++++++++++++++++++++++++++++++ +++ __DEFINE_LIKE_SHARE__

+[ ملاك الحسن ]+ · 10-20-2008, 07:58 PM

الســـــــــــاعة 8 ونص ...

محتشرة ع الدريول ...ومعصبة ....

ليلوه : وينه الله ياخذه ..قايلتله الساعه 8 بظهر لازم يستهبل ...

وهي واقفة عند باب الصالة لمحها خوها العود ....نايف 29 سنة ومعرس ...ودومه ضرايب وياها ..لانه يعترض ع لبسها وطلعاتها الزايدة ....

شافها كاشخه آخر كشخة ...وكلها تتلامع ع بعضها ...عباتها شيلتها ...وحتى مكياجها ...كل اللي فيها يلفت النظر ....

نايف وهو بدى يعصب : ع وين ان شالله ؟؟؟

ليلى لوت بوزها : أوووف ..بسير عرس ربيعتيه ...

نايف : لا والله ؟؟ اسمعي انتي كل يوم وعرس ربيعتيه والا ملجة فلانة ....ماشالله اخافج مرابعة نص بنات العين بس ..

ليلى : وانت شو يخصك ( وبدت اتعلي حسها ) يوم تبغي تتحكم سير عند حرمتك قبل واصلبها ...

هنيه نايف حس انه بيصفعها ع ويها وبيأدبها ...يودها من ايدينها بقوو ...

نايف : اسمعي انتي ...لا يكون ع بالج بوج متوفي يعني خلاص مالج ولي ولا رقيب ...ترا بعدنا عايشين سمعتي والا لا ...وانا ترا ما عليه من امايه وبزاها الزايد لج ...والله يا ليلوه لو اني بس شميت خبر عنج ما تلومين الا عمرج وما بيحصل خير .....وفر يدها وراح عنها وهو يتحسب عليها

ليلى : الله ياخذه كسر ايديني .....وهو شو ايخصه صدق .....جان يبغي يتحكم عنده حرمته ...

هي ثواني ويوصل دريولهم ....ركبت السيارة وبغمت عليه يلين قالت بس.... حشرة هالانسانة ...

++++++++++++++++++++++++++++++++++++++++++++++++++ ++++

الســــــــاعة 9 الليـــــــــل _ المزرعـــــــــــــــــة ...

هالوقت العايلة كانت متيمعة ع العشــا داخل البيت..الحريم ع صوب والرياييل ع صوب ....وعقب العشـــــا الكل يلس جدام البيت ....البقعه ماشالله منورة من الكشافات ....بس في جوانب مظلمة من المزرعة على الاطراف........فارشين حصيرهم ....ومتيلسين .....بو ناصر وياه بو سالم ...وسالم وياه خوه يوسف عبدالله خو ريمان عقبه ام سالم وام ناصر وحذاهم الصغارية خوان سالم وعقبهم البنيات ....ريم ..خولة ...هند...علاية ....

بو سالم ( العم خالد ) ايسمعهم قصايدة ...وهم مستانسين عليه ...وايصفقون هههههههههه خاصة ان قصايدة كلها مصخرة ....وعبود خو ريمان ما يودر عمه في حاله وايلعوزه ...والكل مستانس على عبوود ....

ريمان حاولت انها ما تظهر من البيت الا ويا امها وحرمة عمها عسب تتجنب اتجابل ويا يوسف ....والحمدلله غير ذاكي الموقف العصر ما استوا بينهم شي...الا نظراته لها اللي ما تخلص ....

العم خالد ....من يقصد عليهم بقصيدة غزل يتم يتطالع حرمته ام سالم ويغمزلها هههه والكل يضحك عليهم ....

عبود : طالع ها الشيّاب مصدقين عمارهم ....بويه ..ما تغار ؟؟؟ غازل امايه وحليلها ..

هههههههههههه الكل ضحك عليه الا ام ناصر ..

ام ناصر : ما عليك أسود الويه ..تتمصخر على امك ..

عبود : أصلن خلاص ما تليق عليج هالسويلفات ..كبرتي ..

ريمان : لالا ما ارضى على امايه فديتها بعدها فعز شبابها ...

يوسف : صدقها الريم ..( تتطالعه ريمان ..هذي اول مره يرمس فيها ) ..فديتج عموووه توج شباب..

عادا ام ناصر استانست : فديتك والله ولدي..هب هذا ( وهي تأشر على عبود ) يغث القلب ..

عبود : فديت قلبج عيل ...

وتمو يتناقرون هو وامه ....والا يوسف من سكت عنهم رد يسرح فريم من يديد ...ريموه حاسه بنظراته الواضحة لكنها تحاول تستانس بهالظهره ...خاصة ان هند وعلايه ملتهيات بالسوالف اليوم ولا أذنها ....

++++++++++++++++++++++++++++++++++++++++++++++++++ +++

الســـــــــاعة 9 ونص قـــاعة العرس

الكل مستانس و كاشخ .....شموه من وصلت عقت عباتها و تمن هي وريمان يسلمن ع اللي يعرفنهن ...وشويخ تيلس ويا نوف فغرفة العروس اشوي وتظهر اتسلم اشوي......وبنات عمهن موزان ومهاري بعد مب مقصرات .....

حصوص عرفت شمامي ع خوات المعرس...وستانست عليهن حليلهن طيبات ....وبنات عم المعرس بعد يايات وكاشخات ...والعرس كان ربشة ماشالله ...

حتـــى ليلوه ظاهرة حلوة ومرتبشة ويا ربيعتها سموي اللي خطفت عليها وخذتها ....

سموي : تعاالي ....احينه منوه خواته ؟؟

ليلوه : عنده خت وحده غير العروس ...هاي ام فستان عيناوي ..

سموي : هيـــه حلوة ماشالله ..عسى خوها مزيون شراتها ..

ليلوه بخقه : أكيـــــد حبيبتي ..

سموي : تعالي هاي مب جنها من بنات الجامعة ؟؟

ليلوه : هيه لاحظت اكثر عن بنيه ويانا في الجامعة ....

ع الســــــاعة 10 ...دخلوا العروس ...وكانت حلوه ماشالله عليها ...مكياجها سموكي على وردي ...وفستانها منفوووش وعليه فصوص وكرستالات باحجام مختلفه .....وحصه اتطالع ختها واشوي بتصيح ....وشموه يالسه وياها اتهديها ....

شموه : عنبو يا حصوص هدي هدي

حصوص ( اتمش دموعها ) : والله نوفوه غاليه عليه ياخي ..

شموه : اللي يسمعج احينه ايقول ما غير قصابها البنيه الليله ...هذوه بيت ريلها الا فرة حصاة ..

حصوص وهي تغايض شموه : لا اتخليني أذكرج يوم عرس فطيم ختج شو سويتي ...

شموه : ههههههههههههه نذلوه خلاص انزين ...

حصوص : تدرين شموه ..

شموه : هاه ؟؟

حصوص : قومي بنرقص ؟؟

شموه : هههههه روحي استحي

حصوص : حرام عشان نوف حليلها بنسير عندها بنلسم عليها وع الخفيف بنرقص ما بنطول عسب تستانس ..

شموه : يللا ولو اني خايفة أبدع فوق هههههههههه ( تضحك ويااها حصوص )

شموه : شرايج انقول حق بنات عمج يرقصن ويانا ..

حصوص :هيه والله صدقج ...تعالي بناخذهن ويانا

لمت حصوص بنات عمومتها وبنات خوالها ..وسارن فوق الكوشة عند نوف اللي استانست من شافتهن مستانسات وايسولفن وياها ويرقصن هدى خوفها حليلها ...والبنات سون لها جو ....خاصة حصوص...مرة ترقص مصري ..ومره هندي ..ومره تنعش

شموه : ايه انتي حصيص..اثبتيلج على شي ما عرفنالج ياخي

ويضحكون ع حصوص

حصوه : وهي اتظهر لسانها حق شموه واتكمل رقصها ..

في هالاثناء حارب يرمس ليلوه ...

حارب : أقولج عن تظهرين ثواني بيدخلون المعرس وبندخل عقبه ....

ليلى تبا تتهرب منه بأي طريقة وهي اصلن بتتم ما بتظهر : ما اقدر خويه حاشرني يباني ارد البيت ...

حارب : لالا ماشي امره هاذوه ها المعرس بيدخل احينه ...و ع الاقل شوفيني واظهري ما بشوفج حتى

ليلوه بيــاس : خلاص اوكي شسوي بتم عشان خاطرك ..

حارب : فديتج والله ..عادا ابغي رايج فيولتيه ...

ليلوه : هههه ان شالله

وسكر عنها .....

البنيات لبسن عبيهن وتسترن....

ثواني وان المعرس يدخل ....وماشالله عليه منصور هيبة ...دخلوا وياه حارب وسلطان خوان نوف وحصوص .....ومن شافته ليلوه و فيدينه السلاح عرفته ..

ليلوه : فديييييييييته سموي هذوه راعي الكندورة البيضااا اللي قابض سلاحه ...

سموي منبهره من جماله : هييييييييه حلووو والله احلى عن خواته ..

ليلى بخقه: اكيد دامه ايحبني بيظهر مزيون ...( وصدت اتطالعه وهو ايول )

سموي حاست بوزها بشماته وقالت في خاطرها : وين هو وين انتي ...هو حليله عاشق البنيه وانتي قاصه عليه ...حليله ايول من خاطره ...كشخه يولته ....وانتي يا ليلوه من ايعرف انج هب راعية الصورة عليه انه بيتف ع ويهج وبيسويلج اكبر طاف ...

انقهرت سموي من ليلوه بشكل خاصة من شافت وسامة حروب وجماله ...ويولته وهي تعرف انه ايول عشان خاطر ليلوه .....سوري ..عشان خاطر ( الريــــــم )

ارتبشن البنات من شافن يولة حارب ....خاصة انه نزل وسار ايول صوب خته حصوص وهي اتصفق له ....والبنات اللي تتفداه واللي تدعي ربها ان ريلها ايكون بوسامته ....واللي مستانسه ع حركاته ....وليلوه ما خازت عينها عنه واتخبلت عليه باختصار ....

غطوا نوف بغطوتها البيضا لان بيدخلون خوان المعرس وعيال عمها....بيسلمون عليه وبيوولون ........

وحصوص من سمعت ان ميود بيدخل ربعت عند شموه اتخبرها ....

شموه : أيــه لااااااااازم اتروينيه أيـــــاه ...

حصوص متحرقصه : اوكي

دخلوا خوان المعرس وميود وياهم وعيال عمومتهم الثانيين ما دخلوا .....خوان المعرس كانوا 3 وميود الرابع ...

شموه تتطالع وحصوص مهوسه ع يد شمووه

شموه تتطالع حصوص: ايه اشوي شوي يديني لا اتقطعينها مب ميود حشا عنتر بن شداد غادي...

حصوص : آه يا شموه اتخيلي هذا ايحبنيه انا ....يا ويل حالي والله العظيم

شموه : اشوي اشوي ع عمرج يا بوج ...وينه هذا روينا ااياه ...

والشباب قدهم بيركبون الكوشه ..

حصوص وهي تأشر : شـــــــــــــــــوفي ...هــــذوه راعي الكندورة البنية ...مزيــــــــون صح ....ما اعرف كيف موزان اتقول انه ايحبنيـــه ومن يوم ......( فجــــأة الحســـــوس كلهـــا ضــــاعت ...وانعدمت الاصوات......وشمـــــوه مــــا قدرت انها تسمــع باجي رمسة حصــــوص ...وحست ان كل اللي في القاعة صخوا....والاغاني ع ربشتهــا مــا قامت تسمعهن ...افكــــــــــارها اتشتـــتت....ونظراتها مصدومــــــــــة .....تطالع اللي يصيـــــر جدامهــــــا وجنه حلــــــم من وســــط أحلامها اللي قامت اتيــــــــها من فترة .....تشــــــــوفه وتتــــــأمله.. وجنـــــه ياي من المستحيـــل.....لا يــــاربي .....مستحيــــــــــل ......هــــذا ...مــ ..مــــبـــــــــــــارك ....!!!!!!!!!

:: من خفايــــا قلب { مصْــــــدوُم }::

دارت ابنـــا الايـــام يــــا / خِلـــي والسنيــــــن ْ

مثـــل مـــا سنيــــنكـــ و هالْقــــِدر } دار

وامضن ع ذاكـــ الفْـــراق دمعات و ونيـــــــــن

وامضـــــن عـــى خلــــِك { أصعب } الاقدار

شـــوف هجران الامـــــــــس وصلنـــا لويــــن !!

ولا اظن تذكرني // نسيـــــتنــــا // باختصـــــار

مــــا كنــّي فـــــي يوم سكـنتـــــك الـــ ع ــــين

ولا كنـــت لقلبي غلاهـ و // أصْدق جــــــــار

مــــا تذكــر شعــوري حين ابتدى من} عـــامين ؟؟

ولا اسمــي ؟؟ وهمســــي ؟؟ وفرحــة الانتصــــار ؟؟

صدمتنـــــي البـــارحة تدري وقبلها // مرتيـــــن

وانــــا بيــن واقـــعي و بيـــــنك محطة " احتــــضــار"

جالسة بوسط // جرحـــي // و أذكرك يالظنيــــــن

ورغم قساك مـــا نسيـــتك و لا أيــــام الجـــــوار

مـــــاهنت رغم الجفـــا ولا كــــــان يا زيـــــن

لازلت } أشــوفك رمز المحبــــة و الاختـــــــيار

ولازلت أرقب وصــــالكـ / ســاعة/ يبيـــــن

توضـــــحلي خافي امورك وتفسر الذي } صــــار

واحس به } دفــا } صوتكـ في حِنــــاياي / دفيــن

و// شـــــــوف بيــــت ودّك ما غطاهـ الـ غ ـــبار

واذكر قلت لي : غلاكـ يتلي غلا الوالديـــــــن

وقوافيــــــك اللـــــــي / تنــــافس أشعــار شــ ع ّـــــار

{ويـــــنهـ } ؟؟ يـــا غريــــمي حبن ملا الشرايين ؟؟

واللــــــــه إنـــــي فيك من } العــــام} محتـــــــار

][ تصــدق انـــي أتخوّف احاكيك بحرفيـــــن !!!

لانـــــي لا جيــــت أبحكي { تعقــــد} الحـــوار ][

++++++++++++++++++++++++++++++++++++++++++++++++++ ++++ __DEFINE_LIKE_SHARE__

+[ ملاك الحسن ]+ · 10-20-2008, 08:00 PM

الســـــــــــــــــاعة 11 الليــــــــل المزرعـــــــــــــة

نشت ريم عطشــــــانة ....وتبغي تشرب مـــا ....في البداية استصعبت الفكرة .....بس يوم حست انها مب قادرة ترقد من العطش قالت الا تنش وتشرب .....وخاصه ان الكل رقووود لنهم ناشين من الصبح ...ومنهم اللي من صلاة الفيـــــر مــــــا رقــــــد....ياربي كيف بسير اروحي .....فكرت اتدق لخوها عبود ....طرشت له مسج عن اتوعي اللي حولها .....

" عبــــــود تعال ويايه المطبخ عطشـــــــــانة و اخاف اسير اروحـــــــي "

ثواني ويوصلها الرد :

" مــــن العميل 113 الى بشكارة القاعدة حوّل ...ديايووه بوج وعمج وعيالهم سهارى خاري ...وعن الرمسة الفارطة نصاص الليالي ..حوّل "

حمـــــــار ....

استقوت ريموه وشلت بعمرها ولفت شيلتها ...من ظهرت شافت بوها وعمها منسدحين خاري ...وبوها كان تقريباً راقد ...وعمها على وشك ...

بو سالم : مرحبـــا بنتي

ريمان : هلا عمي اشحالك

بو سالم : بخير وعافية ..اشعنه ما رقدتي ؟؟

ريمان : لالا راقده الا نشيت عطشانه ...

بو سالم : هيه فديتج سيري شربي ...هذوه بوج شرب حليب يلين طاح راقد ..

ريم : هههههههههههههههه ( وراحت المطبخ )

ريم اتدندن : يـــــامن على الحسن زااااد ....حسنة جمال واناقه هههههههههه وتضحك ع عمرها ..صدق اني جديمة ...وين القلاصات ؟؟؟ اهااا هاذن .....صبتلها ماي وشربت ......وصبتلها مره ثانيه .... وخذته وياها عن تعطش فليل...ويوم يت بتظهر

سمعت صوت اشوي بعيد ...لكنه عالي

: حقــــــــي ؟؟

زاااااااغت ريموه : امايه !!

: بلاج بسم الله عليج ؟؟ بلاج فلختي.. اقولج حقي صبيتي الماي .؟؟؟.

ريمان .........هذي ثاني مره ايسويها فيّه ..وفنفس المكان ...شو سالفتك ياخي ....لا اله الا الله ..

ريمان : اصبلك ماي ؟؟

يوسف : اها يعني مب حقي ..هيه صبيلي ...

ريمان حطت قلاصها الي صبته ع الطاولة ... وراحت بتييب له قلاص ...غسلته وصبتله ...صدت وهي منزله عيونها ..و اتمد قلاص الماي

ريمان : تفضل ....

بس ما سمعت له حس ...رفعت راسها ...وينه بسم الله ؟؟؟ ؟؟ توه هنيــــه ....وين قلاصي ؟؟؟انتبهت ان قلاصها اللي صبته حقها وحطته ع الطاوله مب موجود .....ففهمت انه خذاه ....ضحكت ريمان هههههه والله انه غريب وخذت القلاص اللي فيدينها ودخلت داخل ......وهو تم ايطالعها من بعيد ويشرب الماي ....

: اممممممممممممم والله وكبرتي يا الريم

++++++++++++++++++++++++++++++++++++++++++++++++++ ++++

فنفس الاثنـــــــاء.......قـــــاعة العرس ...

شموه ...بعدها فوسط ذهولها ....

حصوص : بلاج ؟؟؟

شموه : هذا مـ مــبارك ....هو شموه ...( قالتها وهي ترجف )

حصوص : لااااا هـــــا ميـــــــود ولد عمي ...

شموه وهي تاخذ نصخ : مب ميـــــــود ...اطري الطويل العريض اشوي راعي الكندورة البيضا ...اللي ميود عصا...بموت حصـــــــوه ...لحقي عليه ...

حصوص : شو بييـــــبه مبارك هنيه ؟؟؟

شموه وهي تهز راسها بنفي : والله هو حصوص والله انه هو ...( حست شموه انها مب رايمه اتطالعه ....وهو سلم على خوه ...وتم ايووول ....دورتلها ع الطاوله اللي وراها كرسي ويلست ...وهن كانن .....قرب الدري اللي يظهر ع الكوشه ......تمت ترتقل ...وقلبها ايدق بقوو..وفيها صيحــــة ....يالله شو يابك يا مبارك .....شو يابك ؟؟؟

حارب بصوت عالي: برووووك ما فيك حيله ...

هنيه حصوص صدت ع شموه وهي فاجه عينها ...هيه والله هو مبارك ؟؟؟ يــــــا هالصدف ...معقولة انه خو منصور ....حليلج يا شموه ...وراحت عندها ...

شموه : دخيلج حصوص ازقري فطيم قوليلها انسير احينه ..والله مب قادره

حصوص : ان شالله ان شالله خلاص شموه ما صار شي ...

شموه ميودة عمرها غصب عن تصيح ...ومب مصدقة اللي تشوفه ...ترفع عيونها اشوي تلمحه ايفز قلبها ....وتنزل عينها بسرعه ....يضحك وايسولف ومرتبش ...

شموه في خاطرها ...مستانس .....

ما تمت شموه عقب اللي صار .....يتها ختها فطيم واستغربت حالتها وردتها البيت .....

ظهروا الشباب ...وعقبهم المعاريس ..........

ميود وهو ظاهر لمح حصوص ....ابتسم الها ابتسامة الغباء نفسها ههههههههههه ضحكت عليه ...وطبعاً كانت لابسه عباتها وشيلتها ....

ميود : عرب ما طاعوا يركبون عندي اليوم و خلوا حروب يوصلهم القاعه...

صخت حصوص وصدت عنه مفتشله ههههههههه ما عليك ميود ...واتغشت لنها بتركب سيارتهم ...... يا ويلي يا شموووه ادريبها اكيد اتصيح ....

++++++++++++++++++++++++++++++++++++++++++++++++++ ++++

الســــــــــــاعة 1 ونص الليـــــــــل

موزان يالسه ويا خوها ميود وايسولفون في الصالة...امبونها مهرة وامهم وبوهم وياهم ...الا كلهم ظهروا يرقدون ......

ميـــــود : شفتيها فديتها حصووووصي ظاهرة اتينن.

موزان : هيه ماشالله ...

موزان : اممممممم أقولك ميــــود...

ميـــــــود : هلا

موازن ...طبـــــــها حصوه .....ما تباها ...

ميــــــــود صد عليها يطالعها..............

وهنـــــا ...
أطوي صفحة اليوم بعد ان امتلأت بخفاياهم ..
احمل دفتري وانسحب بهدوء...دون أن يلتفت إلي قلب...
أقفل خلفي أبواب خفاياهم بسكـــــــون ...
لأعــــود في الغد ...و أخط مــا أراه ..في دفتري ....
بإذن اللـــه...

لـــي ولكـــــم

×× لخفــــايا قلــوبهُم { بيــــبان } دقـيتهــا البــارحة و // طلـــّيت ××

][ الشمـــوخ البسيــــــط ][ __DEFINE_LIKE_SHARE__

+[ ملاك الحسن ]+ · 10-24-2008, 04:49 PM

بيدي دفتــري بصفحاته البيضاء المعهودة....
قد تبدو صفحاته { فارغة} للجميــــع ...
ولكنني أرى // بوضوح // ×× خفاياهم مسطــّرة بها...
جلست في مكاني المعتاد...عند هذا { البــاب} ....
فتحت صفحـــة جديــــدة من دفتري...وبدأت أخــط مـــا أرى...
هــــا هــــي ملامحهم بدأت تظهر لي شيئاًً فشيئاًً........

لـــــــي ولكــــــــــم

×× لخفــــايا قلــوبهُم { بيــــبان } دقـيتهــا البــارحة و // طلـــّيت ××

×××××××××××××××××××××××××××××××××××××××

الجـــــــــــــزء الرابــــــــــــــــع ][ ~

الســــاعة 2 الليــــــــل ....بيت العم بو مــــــايد ..

يالس في غرفته وايفكر .....ورمسة خته اترد في باله .....

ياربي يا موزان ....كيف تبيني أطب حصوص وانساها ؟؟ وانا حبــي الها هب من يومين ثلاث....من جم سنة وانا أحبها .....استرجع لثواني رمســة موزان ...

موزان : ....طبها حصوص ....ما تباها ..

صد عليها مــايد وهو فاج عينه : شو هالرمسة بعــــــد !!! وكيــف انتي بالذات اتقولين هالرمســـة ؟؟وانتي أكثر وحدة اتعرف اني احبها ....وبعدين شو داعي هالرمسة ؟؟

موزان عضت بوزها بقهر وردت عليه ورمستها فيها اشوي من العصبية : انت اسمعني ولا ترمس يلين أخلص رمستيه ....( رد مايد ظهره ع الكنبة وخذا نصخ ورده )...أولاً انت ما تلاحظ انها بالمره ما تعطيك ويه ؟؟؟ ما تلاحظ انها اتخقق عليك وشايفة عمرها ...بعدين امسات وحن نتحنى رويتها صورك صور صلالة اللي عندي ...جان اتقولي منوه من خوانج !!! اونها يعني ما اتعرفك ...( مايد رفع حايب ) ..وغير عن جي ..يوم قلتلها انك اتخبر عنها واتشكى منها ومن تطنيشها ....سوّت عمرها البريئة واللي ما ايخصها ....واللي قهرني صدق يوم اونها اتقولي انها مب عارفه انك اتحبها ...وتمثل دور المصدومة ....تخيل انت بس...

ميــــود استغرب لثواني ....هو يعرف ان خته مستحيل تجذب عليه....واذا هالرمسه صدق..معقولة يعني حصيص ما تعرف اني احبها ؟؟ يمكن احرجتها موزان وما حبت اتبين ردة فعلها ....ادريبها انا انها خجول....

مايــــــد وبأسلوب يدافع فيه عن حصة : أكيد انتي احرجتيها والا ما بتقول جي ...

هنيه موزان نشت : اوكــــي ...انا اللي عليه سويته ...خويه ولا ارضـى عليك وحدة اتذلك عسب محبتها ...وانت بكيفك عادا ....( ومشت عنه )...

نفض راسه من هالافكار اللي يته ...لالا مستحيل حصوص مب خقاقة ..اعرفها انا ......

تم ايفكر اشوي وايقلب الافكار في راسه ...بس في النهاية قرر انه بيتجاهل رمسة موزان الى حين ...حط راسه ..و رقد

++++++++++++++++++++++++++++++++++++++++++++++++++ ++++

الســــــاعة 2 و ربع الليــــــــــل

لابسه بيجامتها عقب ما تسبحت ....نشفت شعرها أي كلام ويلست ع كرسي التواليت .....من أكثر عن نص ساعة وهي بنفس هالوضعية .....يدها ع خدها ...واليد الثانية تلعب ع سطح طاولة التواليت بعشوائية ...ونظراتها ضـــــــايعة بانعكاس ملامحها ع المرايا اللي مجابلتنها ......واتفكـــــــر

سبحــــان الله....كنـــت يـــائسة تمـــــاما ً من إن الايام تجمعنا مرة ثانية ...أنــــــا ومبـــــــارك ...وآخر شي اشوفه فآخر مكـــان توقعته ...فعرس نوف... ظهرت لي فغمضة عيـــن ...مثـــل مـــا ييتنـــي أول مــــرة ......وكالعـــــادة انا اغرق فأحزاني وانت ولا حتى انتبهت لوجودي ( ابتسمت شموه بحسرة ) وكيف بتنتبه!!!! ....يالله شو استوى عليــــــك يا مبــــــارك فهالفترة ؟؟؟ اشو اخبــــــــارها بنت عمــــــك ؟؟ عســاها بس مرتاحة ....وانت اشــو الحـــال عليــك ...شكلك مستانس ومرتاح .... الحمدلله .....

بس اللي مب مستوعبتنه هالصدف اللــــي لفّت قصتيـــه ويـــــــاك من بدايتها ......امممممممم ( غمضــت عينـــــــها ...وسرحت لبعيــــــــــــد......لمكــــــــان من يرحل عنــــــــه صعـــب يرجعله ثاني...رغم شوقـــه الجتــّال لــه ...لانه بكل بســـــــاطة ...أبعـــــــد مكان عرفـــــــه الوجود... و رغـــم الذكريــــات اللي صورها تروح و ترد علينــــا ....مكـــــان البعـــد نفســـه أبعـــد عنـــــه ....مكــــــــــان يسمــــــــــى .....بالمــــــــــاضــــــي .....

قبـــــــــل سنتيـــــــن ونص ......في ربـــــــوع لبنـــــــــــان ...

شمــــــوه ويا ختها فطيم وريلها...يتمشون فالاسواق.....وحميـــد وياهم ..خوهم الصغير ..كان نونو حليله ....امهم حليلها يالسه في الفندق ويا ياراتها في الشقه اللي مجابلتنهن ..عيايز واستانست عليهن.....بو شمــوه مايــا وياهم ......

شموه مستانســــــة واااايد بالجو الحلو .....ادخلوا مطعم ع الغــــدا ....ويلسوا ع طاولة فـــي زاويـــــة المطعم .... شمـــا وخوها حميـــــد حذاهــــا ....وايجابلونها فطيم وريلها ....

طلبوا لهم الغـــدا....اتريوا اشوي لهتهم سوالفهم ...

من الصوب الثـــاني كــــــان مبــــارك ....يالس ويــــا ربعه....وسوالفهم شاله المكان ...

مبــــارك : أقولكم ....ثوانــــي وبيــي ....

فيصــل ربيعه : وين تبا ؟؟

مبــــــارك : اشـــــوي بسير باخذ شي وبييكم ..

هالوقت عند قوم شمـــــــوه ...

حميـــــد : سموتي ..

شما : هلا حبيبي ..

حميد : أبا عتكليــــم ...

شمــوه : هههههههههه وقته هذا ..انزين حبيبي اصبر عقب الغدا...

وجان ايبوز حميـــــد : مـــابا احين ...

واتطالعت شمـــوه ختها فطيم بقلة حيله

محسن ريل فطيم : خلاص خذيله حليله ..وجنه ما كل غداه بنزعل عليه ..

نشت شموه ونش حميد مستانس ....

مبـــارك كــــان مـــاخذ الغرض اللي يبغيه ....وقده بيدخل ....يود قبضة الباب ولا انتبه ع البنيه اللي واقفه ورا الباب دز الباب بقوة وضرب البنية ع راسها ...هي نفسها ما كانت منتبهه عليه وهو ياي لانها اتطالع خوها حميد وتسولف وياه وهي تمشي ...

وحليلها شمــــــــوه الضربــــة كـــــانت قــــــوية

شموه ميوده راسها ومغمضه عيونها بقو من أثر الضربة ...

مبــــارك عقب ما انتبه ع اللي سواه افتشل من عمره : اسمحيلي ختيه والله ما ريتج ...وياي مستعيل مب حاسب حساب ...

شمــــــوه وهي مغطية عيونها بكفوفها : ...................( مب رايمة ترمس)

حميـــــد : سمـــــــوه ...عورج ريال ؟؟

مبـــــارك في خاطره ...بلاها ما ترمس شكلي نفدت عين البنيه ..والا شو ها ميودتنه ....اوووه راسها ...

مبــــارك : سلامات ختيه والله هب قاصد ...

شمـــوه هنيــه خازت يدينها و طالعت الريال ومب قادره اتفج عينها عدل من الصداع ...يا فضيحتيه مواطن بعد ..وردت اتنزل عيونها وديه ثانيه ..

شموه: مسمــــوح خوي مب مشكله .....

يودت ايدين حميد بسرعه وظهرت ...

مبــــارك دخــــل داخل المطعم وصد وراه يطالعها من ورا اليزاز وهي تمشي ميوده راسها .....ههههههههههههه وحليلها عورتها ....صدق اني دفش !!!

كــــانت هذي أول مــــره يتلاقون فيـــــها ........ابتسمت شمـــوه وهي تذكـــر الموقف ...ودموعها بــدن يتيمعن في عينها ....

وردت.... للــــــــــماضي

عقبها بجم يـــوم ......قوم شمــــــــــوه غيــــروا المدينة اللي هم فيها و اتوجهـــوا صوب الشمــــال ...الى مديـــــنة طرابلس اللبنانية ...وهي تختلف عــن العاصمـــة الليبيـــــة " طرابلس "....

الفندق اللي قعدوا فيــــه ...كــــان قريب من الشــــــاطي وشمـــــوه استانست فيــــه وايــــد ....بس ذيـــــج الليلة مـــا تمشوا لانهم واصلين الليل وتعبانين ....فنزل محسن اييـــب العشا ...

شمـــوه : فديتج فطيم ...

فطيم : هلا ..

شمــــوه : قومي اشوي ننزل انشوف السوق هنيه ..

فطيم : استهدي بالله وين تبين هالوقت ..

شموه : دخيــــلج الا اشوي ..

فطيم : خليــــــها لباجر شمــــوه ...

شمـــــوه : عن خـــاطريه والله هب يايني رقاد ...

فطيـــم : ..اصبري اوكي برمس محسن وبخبره تبين السوق اشوي ...

عقب مـــا رمســـت فطيم محسن واستأذنته ظهرن يتمشن صوب السوق ..اللي ما كـــان بعيد ....وحميد راقد فودروه عند امهم حليلها ...

وصلن عند محلات مفتوحه ع بعضها شرات المعرض ...شمــــوه عيبنها الإكسسوارات اللي عندهم فخذت الها جم قطعــــة ....

شمــــوه : اشرايج فذاكي حلـــو صح ؟؟ بــاخذه حـــق حصـــوص اتحب الذهبـــي ..امبونها حاشرتنيه تبــــا عقـــد ذهبـــي...لا وقايله ابغي اشوفــه قبلج في الامارات هههههههههه

ضحكت فطيم ع خبال شموه وحصوص ....

....لفتتــــه الرمســــة الاماراتية واستانس ...حيهم والله هل الــــدار..امبونه ماشي ويا خواته في السوق...خوانه الثلاث يتحوطون ويا ربعهم وهو فروا عليه البنات.....وياه فضـــول ايصد وايشوف منوه هالبنيه وكيف شكلها ...كانت عاطتنه الظهر...لقافة شبــــاب ههههه.....أبغي اشوفها ياخي ....ماشي غير اسير بخواتي صوب المحل ...

مبــــارك : أقولكن بنيات ..

حنـــان + ميعاد + وفــــاء ( خوات مبــــــارك ) صدن صوبه ..

حنان ( ختـــه العودة أكبر عنه بسنتين ) : هلا

مبـــارك : تعالن صوب هالمحل اشوي ...

وفـــاء ( اصغر عنه بسنة ) : هذا المحل؟؟؟ ( وهي مستغربة كله اكسسوارات ) شو تبغي منه كله سوالف بنات ..

مبـــــارك يبغي ايرقعها ... : إحـــــــــم ..لا بس ...شـســمه ..هيه ( طرت عباله شمسه بنت عمه )...مـــا تبن تاخذن لبنات عمكن ؟؟؟

ميعاد ( أصغر البنات وهي اصغر عن مبــارك بأربع سنين ) ...: هيـــــه والله صح ..

ومن ساروا صوب المحل ...احتشرن خواته من الإكسسوارات الحلوة اللي عندهم ...وانشغلن بالمشترى ...وهو كل اشوي يصد يبا ايشوفها ...الا هي مشغولة ويا فطيم ....

فطيم : شمـــــوه يللا ....محسن يبغينا انرد ايقول اتاخرتن ..

شمــوه : لا حرام الا اتشرينا من محل واحد ..

فطيم : عندج يومين بطولهن ...

شموه : خلاص اوكي يللا ..(.وخطفن بيروحن ...)

مبــارك اتحسر لانها ما صدت صوبه مشت من الصوب الثاني ولا رام انه ايشوفها ....

راعي المحل برمسته اللبنانية : إزا بتريدي .... ( يزقر شموه )

صدت شموه ووياها فطيم ..

فطيم : جنه يزقرنا ؟؟ ( وجان يرفع راعي المحل جيسه فيها اغراض شموه ) ...يالخبله ...متشريه ودافعه وحاطتله الاغراض بعد ..مب كرم عليــــج هههههههه

شمـــوه : اووووه نسيت ...ما عليج انتي اتمصخري ...( وراحت اتييب الاغراض )

ومبـــارك ما يحتـــــــاي ..من أول ما سمع راعي المحل يزاقرها وهو عيونه مركزات عليها ..... اوووووه ...هـــذي نفسها اللي عورتها بالباب من جم يوم ...وحليلها والله ....يالله رب صدفة خير من ألف ميعاد .....والا اقولكم ..خير من ألف وفـــوي ما فيّه ع لسان ميعادوه ...

شموه خذت الاغراض ولا انتبهت لمبارك ومشت يلين ختها فطيم وردن الفندق ....

نرد للواقـــــــــــــع ....

ابتسمت شمــــــوه وهي تذكر ثاني مره شافها فيها مبارك ....ودموعها ينزلن على مهل ....طبعاً هي ما شافت مبارك هالمره ولا رفعت عينها ع الريال اللي واقف ويا خواته.....لكنها تذكــــره وهو ايخبرهـــا هالسالفه وهي منصدمه منه ومن الصدفة وتضحك عليه ........وتذكـــر كيف انه تمصخر عليها لنها نست اغراضها ......

سمعت تيلفونها ايرن ........فارتنه ع الشبريه ....ولا نشت من مكانها وتمت ع نفس وضعيتها ....ادريبج حصـــوص اتدقين اتحاتيني .....الا سمحيلي فديتج مب رايمه أرد عليج ....لنــــي لو رديــت ما بقدر أيــود عمريه عن الصيــــاح .....وكانت فعلن حصوص متصله ...لنها اتعرف ان شموه اتصيح ومب راقده ...دقت يلين احينه أكثر عن 7 مرات .....

حطت شموه راسها ع يدينها و صـــــاحت بحرقــــه وهي تذكر بــــــاجي الاحداث ....

وسرحت مره ثانيـــة وخذت عمرهـــا.....للمـــــــــاضي ...

اليـــوم اللي عقبه .... نزلوا هل شموه الصبح وهالمره وياهم ام حميد تمشوا صوب الاماكــــن الأثرية صوب قلعة طرابلس .....عقبها ردوا للســــــوق واتشروا ....صلوا الظهر فمسيد وعقبها ردوا للسوق ودية ثانيه......

ام حميـــد وهي تعبانه من المشي : علني فداكم بسكم من الحواطه اريولي عورتني ...

فطيم : فديتج امايه ...تبينا انرد الفندق ...

ام حميد : لالا فديـــتج خطفونيه الفندق وبرايكم كملوا مشتراكم ...

محسن : عمـــوه عادا انتي ما تظهرين ويــــانا ...انزين جنج تعبانه شرايج بنسير هالمطعم ونتغدا اشوي عقب بنرد الفندق شو قلتي ؟؟

ام حميـــد : خلاص يا ولدي اللي تشوفه ...

شموه : انزين بس قبـــل أبغي آخذ كتاب من متــى أدوره ...

فطيم : شموه الله يهداج ...وقتها ثقافتج احينه ...

محسن : هههههههه انزين هذي ها المكتبة الا ورانا ما عليه سيري انتي و خذي وياج حميد ..ومن تاخذين اللي تبينه ترانا هنيه فهالمطعم ....

شمــوه : ان شــــــالله

راحوا هلها والمطعم كان مجابل المكتبة .....

من دخلت استانست هي ع الكتب وتمت تتمشى بين اقسام المكتبة واللي كانت كبيرة اشوي وحميد حليله وراها ...امبونها يايه بتاخذ كتاب الا خذت 3 ..ونست الكتاب اللي تبغيه من الاساس ....فيوم ذكرتـــه ...تعايزت اتدوره وسألت واحد من اللي يشتغلون هناكي عسب ايدوره ....وراح ايشوفه حقها ....ووقفت هي صوب الكاشير ....ياها ريال ثاني من اللي يشتغلون في المكتبة غيره اللي سائلتنه وحط الكتاب ع طاولة قرب الكاشير وراح ...توها اتمد يدها بتاخذ الكتاب الا استغربت من ايد ثانيه تيود الكتاب ......صدت شمـــا صوبه وهي مستغربه ....وهو من شــــافها مـــا صدق علـــى الله .....بعد هي نفسها هالمره .!!!!...

مبــارك بابتسامة : تبين الكتاب ؟؟

حميد يطالع بلا تعليق

شموه استغربت منه بس حست انها شايفتنه فمكان ....ويوم ذكرت نزلت عينها مفتشله ....اوووه هذا اللي دعمني بالباب من جم يوم ....يالفضيحه شو يابه هنيه بعد ....

ما واحت شموه اترد عليه ....لنها من صدت صوبه تبغي ترمس قاطعها صوت ثاني

عامل المكتبة : اتفضلي ...( وناولها الكتاب ) وكان الريال هالمره هو اللي موصتنه ايدور الكتاب...ففهمت انه الريال القبلي يايب الكتاب لمبــارك ...والريال الي توه يايب الكتاب يايبنه حقها ...ابتسمت وهي منزله عينها من فهمت انهم يبون كتاب واحد ...

مبارك حاسب قبلها ومن خذا جيسته صد صوبها وقال وهو يبتسم وبنبره هــادية : هـــذي ثالث مره ..

شمـــوه اللي كانت سرحانه : نعــم ؟؟

مبارك مزل راسه وهو يضحك وخذا اغراضه وظهر ...

شموه في خاطرها ...بلاه بسم الله ...لاايكون تمصخر عليــّه بس...جليل الحيا...وحليلي والله ..

حاسبت شموه وظهرت من المكتبة وحميد وياها وسارت صوب المطعم ويلست ويا هلها ....

ومبارك كان واقف صوب المكتبة يترياها تظهر ...فكر انه يرمسها ..وعقب تراجع ...لا حشا مب اسلوبي هذا ....من ظهرت و وياها خوها الصغير تم ايشوفها يلين ما دخلت المطعم .....امممممممم توني انتبه انها حليوة ...امبين عليها انها طيبه بعد ....الله يعلم بها ...برايها بنت الناس ...

وخطف مبارك ومشا بياخذ غدا لهله وبيرد الفندق ....وهو فدربه ما خازت صورة البنيه عن باله ....

وتم مستانس ....وهو صـــدق طيـــب مبـــارك وحبـــوب ...ومب من الشباب اللي يرقمون والا يرمسون البنات ....الا استغرب من هالجرأة اللي يته فجأة وخلته يرمسها من اشوي ....

في شي مـــا تعرفونه عن مبـــارك ....وهو انه ما يداني البنات بالمره ...ولا يعطيهن ويه بعد ...الا استغرب من عمره ومن هالطمانينة والامان اللي يحسهم صوب هالبنية ....

اللــــــــــه اكبـــــــــر ...اللـــــــه اكبـــــــر ...أذن الفير ..شلت شموه راسها وكان ثجيل من الصياح ...دخلت اتوضت ..وصلت .....وعقت عمرها ع الشبريه ورقدت من اليهد .....ما تبغي تذكــــــر البـــــــاجي ....يسدها اللـــــي يـــــاها البــــارحة

++++++++++++++++++++++++++++++++++++++++++++++++++ ++++

الســــــــاعة 6 الصبـــــــــح ...المزرعـــــــــــــة ...

ريمـــــــــوه امبونها اتسوي الريـــوق ويا خوله وعلايه بنات عمها خالد وشوق حليلها حرمة سالم ولد عمها اتعاونهن....وهند باختنها برقده .....وام سالم وياها ام ناصر يتمشن صوب النخل

ريموه سوت دلة حليــــب بالزعتر وقالت بــــس ههههه اصلن هي اشو تعرف غيره .....صبتلها كوب ودقت لرويــــــــــض اشتاقت الها واااايد الدبة .....خذت كوبها وظهرت عنهن .....

يوسف واقف صوب باب البيت وبما ان المطبخ ورا البيت ما شاف ريموه ...الا صوتــها وصله ..وكان واضـــح ....

ريمــــــــان : أهليـــــــــــــــن والله بغناتي وحياتي و شباصتيه بعد ههههههههه

رويض : هلا هلا بريمان ها شو اتسوين عساج مستاااانسه ...

ريمـــان وهي تمشي :....والحمدلله مستانسه ماشي حالي ...

استغرب يوسف وتسائل منوه اترمس هاي ؟؟وليش جي اترمسه ؟؟؟خذا عمره ع صوب اشوي ع اساس لو ريموه يت ما تشوفه ...

رويض : اشتقت لج وااااااااااايد ريموه ...

الريم : هيه اشوفه تيلفوني احترق من الشــــوق الواضــــح ....ما ايخصني انا اشتقت اكثر ...

رويض : هههههههه خلاص انتي انزين ....

الريم تضحك وهي تدخل البيت ....

يوسف رفع حايبه وبدا ايشك ....منوه اترمس هذي ؟؟؟؟دخل البيت يبغي يسمعها الا ما لحق عليها ودخلت الغرفه ..انقهر و ظهر خاري ....

ما طولت ريموه ويا رويض و قالت بترمسها عقب لنها دخلت الغرفه وخافت اتوعي هند ...

++++++++++++++++++++++++++++++++++++++++++++++++++ ++++

الســــــــاعة 9 الصبح .....بيــــت بو مـــــايد ...

ميــــــــود ياي من العزبة ومحتشر....وايدور امه ....عقب ما يته فكره ايحط فيها النقاط ع الحروف

....حدر الصالة ...لقى ساروه الصغيرونه منسدحه وتتطالع رسوم .. ووياها خوه ثـــاني 23 سنة..

مــايد : السلام عليكم

ثاني : وعليــــك السلام ..

مــــايد وهو يرمس ساروه : وانتي سودا الويه ما اتردين السلام ؟؟؟

ساروه فاجه حلجها ومندمجه هههههههه

ثاني : خلها هذي لو ذبابه تدخل وتستاجر وتبات فحلجها ولا حست ..

مــــــايد : هههههه الله يسقمك ....وينها عيل امايه ؟؟

ثاني : احيـــــدها متيلسه ويا الوالد في الحوي ...

مــــايد : لا بويه ظاهر وما ريت حد خاري

ثاني : عيل اكيــــــد في المطبخ ...

مـــــايد :خلاص بسيرلها عيل ...

من وصل المطبخ لقاها تهازب البشاكير ....

مـــــــايد : هههههه هدي هدي الوالده بلاج محتشره ( وحبها ع راسها ) .

ام مــــــايد : مســودة الويه هـــذي ازاقر عليها من ساعة ولا ترد ...اتصومخ الحمارة ...

البشكارة وهي اتدافع عن عمرها : بابا ميود انا ما يسمع ماما ....هيه ييجي يسوي قرقر يقول ليش ما يردي ..

مـــايد : وااابوي ...شو ميود بعد اصغر عيالج انا ؟؟؟ برايها امايه سماح سماح هالمره ...الا يطولي فعمرج بغيتج فسالفه ...

ام مــــــايد : خيـــر ولدي ؟؟

مـــــــايد : بغيـــــتج اتعزمين قوم عمي بو سلطان باحر ع الغدى ...

ام مـــــــايد : شو المناسبة فديــتك ؟؟

مـــــــــايد : اممممم هب لازم منـــاسبة عزميهم ويزاج الله خيــــر ...نبغي نتيمع ويا عمي وحارب وسلطان ....

ام مــــــــايد : خلاص فديــــتك ...انت تفـــــاهم ويا بــوك وان شالله خير ..

مــــــايد وهو يترجاها شرات الصغاريه : امـــــايه حبيبتي دخيلج جنج اتحبينيه عن تنسين ..

ام مـــــــايد وهي تضحك : هههههههههههههههههه اشو بعد جنج اتحبيني هذي ..خلاص ان شالله روح وانت متطمن ...

مـــــايد حب الها راسها وظهر وهو يغنـــــــي ....مستحيـــل انساك والقالك بديــــل .... ركب موتره وســـار صوب ربعه ...

وهو في الدرب وايفكر .....مستحيل أفوت الفرصـــة... بــــاجر ان شالله كل شي بيبيـــــــــن ......

++++++++++++++++++++++++++++++++++++++++++++++++++ ++++

الســـــــــاعة 2 الظهــــــــر ....بيت بو حميـــــــــد

بو حميـــــد وام حميــــــد وشمــــــــوه وحميــــــــد يلوس ع الغدا ....الكل سمى بالرحمن وكل ..الا شموه ..خذت الها لقمتين وتمت صـــاخة ...

حمــــيد : شموتــــي أبغي جــــــــوس

ام حميــــد : وابوي ...اشو ها بعد ؟؟

بو حميـــد : جوس جوس يبغي عصير ولدج ..

وطبعاً بو حميــــد يمشي حاله في الانجليزي ..الا ام حميد حليلها ...

ام حميـــــد : عطيه الســــــــوج بالله عليج ..

ضحكوا عليها

ابتسمت شمـــوه ..: ان شالله فديـــــــتج..

صبتله عصيـــــر برتقـــال وناولته اياه ..خذاه وتم يشرب .....تمت اتفكــــــر ... ياتـــرى ....حميـــــد يــــذكــــر اللي استـــوى ....والا كان ياهل و ما يفهم ....

وردت لذكريــــــــــــاتها ...للمــــــــــاضي...

مطـــــــــــار دبــــــــــــي

قوم شمــــــوه وصلوا البــــلاد ع خيـــــــــر ....فطيــــم وام حميـــــــد و محسن وشموه و حميــــد يتريون بو حميــــــد أيـــيــــــهم ....

يلسوا ع الكراسي ....

من الصوب الثاني كان مبــــــارك .... وكانوا يايـــــن ع نفس الرحله ...وشافها في الطياره الا هي من ركبت الطياره رقدت ولا انتبهت ...تم يطالعها ومتحرقص من يوم هم في الطياره ...وايفكر بطريقه يتواصل فيها وياها .....هـــذي المــــره الرابعــــه والله مـــا بطوفها ...لازم أعرف هالبنيه .....بس كيف ياربي كيف ....

ميـــــعاد : ذليتنا ياخي ...وينه ها ربيعك اللي حشرتنا به ...

ام مبـــارك وبو مبارك وخوانه الثلاث واللي منصور ريل نوف واحد منهم و وفوي راحوا البيت يايينهم عيال عمهم ....تموا مبـــارك وميعاد و حنان ..ع اساس ان هاييل مبارك بيردهن البيت ...وطبعاً المفروض انه يظهر ورا هله على طول ...يا غير مبارك جذب على ختــــه وقالها انه يتريا ربيعه وبيظهرون ....

مبـــارك : اقولج انتي شرايج اتسيرين السياره ...شو قلتي حنون بعطيج السويج وخذي هذي وياج أذتني ..

حنـــان : اوكي خلاص ..

خذت حنان السويج وراحن هي وميعاد ....بيشغلن السياره اللي بركنها لهم ولد عمهم وبيترين مبارك.....

اشوي لمح شما اتنش ووياها فطيم ...استانس وقال فرصه ...وشاف الياهل يربع وراهم ...قال ماشي غيره هو بيساعدني ....على طول قطع من المجله اللي في ايدينه وظهر قلم من مخباه ..كتب شي ع الورقه بسرعه ....اممممم شو اكتب الها ...حط رقمه ...امممممم يمكن ما عندها تيلفون ...فكتب ايميله بعد ...ما يبغي ايضيع أي فرصه تربطه فيها ....تم وراهن الا بعيد اشوي بحيث محد ينتبه ....دخلن فطيم وشموه الحمام ...ويوم توه حميد بيدخل زقره مبـــــارك وسار عنده بسرعه .....

مبارك : شسمك انت يالشاطر ؟؟

حميد : حمــــيت ..

مبـــارك : هيه ..انزين اقولك بخيـــت خذ هذي الورقه ...وعط ختك اللي لابسه الوردي انزين ....

حميد : منوه سمـــوه ...سموه لابسه احمر ..

مبـــارك ...يا هالبلشه ....والله لابسه وردي البنيه والثانيه متنقفبه ...ههههههههه مشكله هالياهل ..

مبارك : حبيبي ...عطها اللي مب حاطه شيله ع ويها ..

حميــــد : انزين ...أقولها من عند ريال ؟؟؟

قبل عن ايرد عليه مبـــارك ظهرت شموه من الحمام خااايفه ...لنها تحيد حميد يمشي وراها ودخلن و تريته وبعده ما دخل فظهرت اتشوفه عن ايكون ضايع والا شي.....واتفاجات يوم شافته قرب الحمام واقف وحذاه نفس الشخص اللي كل مره اتشوفه فمكان يالس بحيث انه ايكون ع مستوى حميد وايرمسه .....

رفع مبارك راسه وشافها ...ابتسم ...وقال شي لحميد ..ما قدرت تسمعه لانهم بعاد ...يا حميد يركض صوبها ..و أشر لها ع الريال اللي نش وتم ايطالعها ...

حميد : سمـــوتي يقولج ريال هذا ...هذي حقج ..

شموه زاااغت وهي اتشوف اللي في يدينه ياربي عن ايشوفني محسن وايقول تغازل ....طالعت الريال ابتسم الها وراح ....وعلى طول دخلت الحمام ودخلت حميد وراها ....سمعت باب الحمام اللي دخلته فطيم ينفج فسحبت الورقه من ايدين حميد بسرعه وحطتها فشنطتها .....وقلبها اتحسه اشوي وبيظهر من مكانه ....

ظهرن من الحمام وهالمره حميد جدامهم ههههههه.....

لمح مبــــارك ريال ايي صوب شمـــا والحرمه اللي وياها ...اظن هذا بوها ...

شموه مستانسه اتسلم على بوها ...وتلوي عليه ....

وشاف مبارك الياهل اللي دومه ويا شموه ياي يربع صوبهم ولوى على بوه ....

ترياهم لين ظهورا ...اوووووه ....نسيت خواتي ...وخطف مبارك بسرعه صوب سيارته ....

آآآه ليــــــــتني بس نسيتك ذيـــــج اللحظــــة ...ليتنــــــي قطعت الورقة وفريتها يا مبــــارك ولا كــــان اللي كــــــان ...مستغربه من عمري والله ....كيف سويت اللي سويته ....استغفر الله رب العالمين ...كيف انا اللي حفظت عمريه عن الغلط سويت جي عشانك...يارب شل هالمبارك من عقلي وقلبي ومن حياتي بعد ........

ام حميــــد : بلاج بنتيه ؟؟

اتنبهت شمــــــــوه : هـــا امايــــه ؟؟

ام حميــــد : بسم الله عليــــج ما تبيـــــــــن سلطة علني فداج ؟؟

شمـــــــا : هيه فديتج حطيلي اشوي ...

++++++++++++++++++++++++++++++++++++++++++++++++++ ++++ __DEFINE_LIKE_SHARE__

+[ ملاك الحسن ]+ · 10-24-2008, 04:51 PM

الســــــــــــــاعة 3 ونص العصـــــــــر سيــــارة خلفان

خلفان يطالع ربيعـــــه اللي نزل من السياره عسب ايرمس هالليلى اللي عايبتنه ....غريبه يا حروب ..او ل مره بنيه اتعيبك جي ..عنبوه شو مسوتلك ....

قال بيتصل لسموي ايسولف وياها اشوي ....

وعند حارب اللي ميت من الفرحة ...

حـــــارب : عيبتــج والله ؟؟

ليلـــى : وااااااااايد ماشالله عليك ..

حـــــارب بخقه : احم احم فديتني والله ...فديتج انتي بعد ...ليلووووووه ...طالبنج طلــــــبة ...

ليلـــى : آمـــــر عيوني لك ...

حــــــارب : فديـــــــت عيونج والله ....بغيت أشوفج ..ولو من بعيد علني فداج ..

ليلى اتوهقت : لالا مستحيــــل مستحيــل

حــــــــارب : افـــــا ومن اشو خايفه ..اقولج والله من بعيد والله يني ما بقرب صوبج ...وفي المكان اللي تبينه دخيـــــــــــــلج

ليلـــى : حــــــــروب انا ما أقــــدر جي بتستوي لي مشــــاكل ...وانت لو اتحب لي الخير لا تطلبها مني وديه ثانيه ....

حــــــارب بخيبة رجــا : خلاص مب مشكله ...

ليلـــى : ما ابغيك تزعل عليـــه الا قدّر موقفيه والله صعبه ..

حارب : ما عليه حياتي مب مشكله بخليج احينه ذليت ربيعي وهو يتريا ...

وسـكر حارب عنها وهو اشوي زعلان

ركب عند خلفان وسمعه ايرمس سمووي .....ياترى احينه اللي احسه صوب ليلى معقوله ان خلفان ايحسه صوب سموي ....ومن سكر خلفان عن سموي ...

حـــارب : أقول خلفان ....

خلفان وهو يسوق : هــلا

حـــــــارب : اممممممم....انت اتحب سموي ؟؟

خلفـــــان تفاجئ من سؤال حارب ونقع عليه من الضحك : هههههههههههههههههههههه لا اتكون عشقت ليلوووه بس ؟؟

حارب انزعج من مصخرة خلفان : احيـــــــنه رد ع سؤالي اتحبها والا لا ؟؟

خلفان : جـــان تبغي الصدق ....انا متعود عليـــها ومب اكثر ..

حارب : يعني ما تحبها ...

خلفان : مـــــا يخص المحبة ...

سكت عنه حــــــارب وهو يفكر يوم انها رضت اتطرشليه صورها ...وشله تتهرب مني يعني ...شو بيستوي عليها لو شفتها من بعيد ؟؟؟؟؟؟؟؟؟؟؟؟؟؟؟؟؟؟؟

++++++++++++++++++++++++++++++++++++++++++++++++++ ++

غرفـــــــــــــة ليلــــــــــى ...

من سكــــــــرت عنـــه دقت لربيعها الثاني وتمت اتسولف وتضحك وياه ....حتى انها تتفق وياه ع يوم ايشوفها فيه ..

سمعــــت حـــــد يــــدق البـــــــاب

ليلى : لحظة فديتك رشــــــود ....منوووووووووووه ؟؟

: انا العنود فجي الباب ...( العنود حرمة خوها نايف )

ليلى : اووووووووف وتسير صوب الباب .....هــاه شو تبين ؟؟؟؟

العنود : ممكــــــن ادخل ؟؟

ليلى : لا مـــا فيه ادخلج قولي شو عندج ترانيه اسمعج ...

العنود وبصوت هادي : ليلى ما ينفع ارمسج من ورا البيبان جني اطلبج ...ابغيج فموضوع

ليلى : استغفر الله ..اذا نفس الموضوع الأولاني ..فانا آســـفه ما ابغي اسمعج

العنود وهي تحذر ليلى بخوف: أدريبج اترمسينه ليلى ..ترا والله لو درا نايف ما بيتم فيج ضلع صاحي

ليلــى : اتهدديـــــني يعني ؟؟

العنـــــود : ليلـــى الله يهداج لو انــــــي أبغي لج الشر ( وخفت صوتها) جان من أول مـــا سمعتج ذاكي اليوم ترمسينه خبرته ...الا الله يهداج انا اعرف نايف عدل صدقيني ما بيرحمج ...

ليلى : خلاص انزين مشكورة وما تقصرين ....تبين شي بعد ؟؟؟

العنود : الله يهديـــج ان شالله ...وراحت عنها ....

العنود تتحرى ان ليلى اترمس ريال واحد وما درت انهم ما ينعدون ...من ذيج المره اللي سمعتها فيها اترمسه في الحوي وما خبرت نايف ....الا يت اترمسها بالهداوة وباسلوب ...لكنها قامت تفقد الامل فليلوه ..اللي صدق شكلها بايعه الدنيا وبايعه عمرها وياها .....

ليلى : هلا فديتك ...لالا هاي حرمة خويه الطفرة يون سمعتج وما ادله اشووو ....لالا طز فيها شو اتروم اتسوي ...اممممممممم انزين اقولك ......بغيت رقم خلفان ولد عمك ....لالا بس وحده تبغي اترمسه ....هيه ..انت لا تخبره خلها مفاجأة حقه ...ياويلك لو قلتله ليلى خذته هو ما ايعرفني اصلن ....هيه اوكي .....خلاص طرشه

++++++++++++++++++++++++++++++++++++++++++++++++++ +++

الســــــــــاعة 5 العصـــــــــر بيــــــت بو ســــــالم .....

يوســــــف يالس فغرفته فبيت بوه هالغرفه اللي ما يسكنها الا دقايق من عمره ..عقب ما كانت ملاذه اللي ما يظهر منه .....وايفكــــر بالريم ....قبل عن ايردون البيت ....وقبل الغدا في المزرعه ...كان يتمشى خـــــاري المزرعه ويمشي حذا اليدار ....وريمان داخل المزرعه اتمشى واترمس رواضي .....وهي اتمشى يت صوب يدار المزرعه وتمت تمشي.....فهي كانت داخل ويوسف خـــاري ويفصل بينهم يدار ....سمع ضحكتها واتحرى انه يتوهـــم ..الا من ركـــــز تأكـــــــد انها هـــــي ....ترمس حد ....زيــــــن يـيتي والله يـــــــابج .....

الريـــــــــــم : هيــــــــه الحمدلله بيـــــي اليوم ....أحينه بنتغدى وامــره بنويه ......اقولج كلــــه كـــــوم وولـــــد عمـــــــي كـــــــوم ثـــــاني ...( هنيه يوسف قرب من اليدار اكثر وبهدوووء عن اتحس به ريمان )...لالا مب سلوم حليله ...هذا يوسف ..( يوسف من سمع طاريه يدينه بدت ترتجف ) اول شي من رحنا بيت عمي يلسنا في الصاله وهو يلس وياينا ...وهلنا كلهم في الميلس اقولج تم يطالعني طول اليلسه ولا نطق ...الا اخر شي قال على فكرة يتريونكم وظهر ......وعقب في السياره من ركبت حسيت به يطالعني ...رواضي اتخوف نظراته والله ....جن وراها مغزى محد ايعرفه غيره .....( ابتسم يوسف بغصة ) ...والا من صلنا المزرعة ....كنا انسوق الاغراض داخـــل .....يوم يــيت صوب السيارة تم ايطالعني جنه يترياني ......اشو معجب انتي بعد هههههههه .....المهم من رحت اودي جيسه ناولتنيه اياها امايه المطبخ ...حسيت بحد يمشي ورايه ..وانه هو ....وما نطق بكلمة ..يلين دخلت المطبخ ....صديت عسب اظهر الا يا صوبي مطير خوفني فلخت والله ...هههههههههههه لا تضحكين رواضي حرام عليج ما ايضحك ههههههههه.....( يوسف ....في خاطره ...مخلتني مصخره يالريم ...ظهرتي الا شراتهم كلهم ...) المهم لالا عطاني مجلتيه حليله امبوني ناستنها في السياره .....وامممممممم شو بعد ....هيه البارحه نشيت عطشانه بسير اشرب ما فليل قولي يمكن الساعه 11 انزين..... قاللي عبود بوج وعمج خاري ....فظهرت وانا متطمنه ....من وصلت المطبخ شربتلي كوب ماي ورديت اصب كوب غيره ....الا اسمعه من ورايه ايقولي حقي؟؟؟ ههههههههههههههه رواضي بس ( ايدين يوسف يرتجفن أقوى عن قبل وهو عاض شفايفه من القهر ويمشي عسب يسمعها ) لالا اسمعي ...صبيتله الكوب من ييت بناوله ...لقيته ماخذ الكوب اللي انا صابتنه لي وظاهر .....روااااضي اخر مره اخبرج شي كله تتمصخرين .....لالا صدق رواضي ....احس شي بلاه ابن عمووو .....( يوسف في خاطره ...ليتج لو تعرفين ) ...ما اعرف والله ...انا دوم يوم افكر فيه اقول وشله عازل عمره عنــا وساير فصوب ..اظن عمي خالد زعله وايد يا رويض .....

اشوي اشوي كان حس ريمان ايخف عن يوسف ....يلين تلاشى لانها الظاهر مشت من الصوب الثاني ............يوسف عقب اللي سمعه حاول انه يتحاشى الريم بالمره ويبتعد عنها ...حتى انه شل بعمره عقب الغدا ورد قبل الكل بيت ابوه .....

يوسف : مـــــا عليـــــه يالريـــــم ...في يــوم بتفهميـــــن بلاه ولد عمج !!!!

++++++++++++++++++++++++++++++++++++++++++++++++++ +

الســـــــــاعة 8 و نص المســــــــــــا بيت بو حميـــــــد

شموه عقب الغدا اتصلت لحصوص وتمت تتعذر منها ع البارحه ...لنها ما تمت في العرس أولاً ولنها ما ردت ع اتصالاتها ثانياً .....وحصوص عذرتها .....تعرف حالة شموه وتعرف باللي فيها ...ولو هي ما عذرتها منوه بيعذرها ...شموه قالت لحصوص اتييها تبى اتسولف وياها ...ومن عقب المغرب حصوص كانت فغرفة شموه .....

شموه والحص يسولفن ويتمصخرن ويضحكن ..

شمــــــــوه : بس تصدقين حصيص .....

حصوص : هاه ؟؟

شمـــوه : أظن انه عرّس مبارك ...

حصوص : اممممممممم ما اظن لان محد من خوان منصور معرس قبله ....بس يا شموه الله يسامحه مبارك ....وانتي الله يهداج لا اتمين اتفكرين فيه .....شوفي انتي امبونج هاديه مستهديه ...ومن شفتيه ردت لج احزانج ....صح قبل كان فيج اشوية حزن الا البارحه صراحة اتلعوزتي من الهم ....عسب جي يا شموه خلي هالقصه كلها ورى ظهرج ....

شمـــوه : اتصدقين من البارحه وانا استرجع ذكرياتي وياه ..

حصوص : شفتي ...انتي اتيبينه لعمرج ...المفروض تلبسينه شموه ولا تحسبين حسابه ....من متى احينه وهو مفارقنج ؟؟؟ سنة وشي ...صح والا لا ؟؟؟ لو كــان يبغي ايرد كان بيرد فأي لحظة علني فداج .....الا هو شكله لعّاب من البدايه ....لعوزج وياه عالفاضي ...وصدقيني لو انه ايحبج ما بيخلي ذكرى بنت عمه تلغيج من حياته ....اعرف ان رمستيه اشوي بايخه ...بس شموه البارحه انا دعيت عليه من قهريه ( شموه تتطالع حصوص وهي فاجه عيونها ) والله صدق...خاصه عقب ما ظهرتي وايد حزت فخاطريه ....تميت اتطالعه واقارن بينج وبينه ...انتي عشتي فاحزانج وهو ميت من الفرحه ......والله ولا يسواج شموه .....ايهبي

شموه : افا يا حصيـــــص ...اذا انا ما دعيت عليه

حصوص : انتي تدرين اشو ...مشكلتج انج وفيـــّه ومب طايعه اتصدقين اللي سواه فيج ...رغم انه مضت عليه فترة .....كنت دوم اسمعج وانتي تنسينه اسبوع واتردين اتيبين طاريه .....هــــذا يــــا شمـــوه لنج اصلن ما لغيتيه من حياتج ...انتي اتقولين ناستنه ...والصدق انج دافنتنه فذكراج ....والله يعلم بج الهرمه يمكن اتحبينه بعدج (ضحكت شموه من مزاح حصوص ) هههه صدق شموه صدق ...الشي لو دفنتيه مرده حد بيكشفه وبيظهر فيوم ...الا لو لغيتيه من حياتج محد يروم ايرده...وان رد ما بيكون له أي معنى ولا تاثير.....

شموه : فديتج ياحصوص صدق انج فاهمتني ....

حصوص ابتسمت : آه بس شسوي ...الله بلاني بج ...

شموه : يالخايسه " وفرت عليها مخده "

حصوص : ما عليه تبين تضاربين بالمخاد... أرويج ..." وضربتها شموه بالمخده الثانيه ع راسها ." ههههههههه تمن هن الثنتين يتضاربن بهالوسايد ...ويتضاحكن الخبايل هههههههه

++++++++++++++++++++++++++++++++++++++++++++++++++ +++

الســــــــــــاعة 9 الليـــــــــــــل ....

خلفان و حارب يتمشون في المول ..وجان اييه رقم غريب ......

خلفان : منوه متصل ...اقولك حروب اتعرفه هالرقم ؟؟؟

حارب وهو يتطالع تيلفون خلفان : لا ما احفظ الارقام انا ..

خلفان برد بشوفه منوه : الوووو

واللي كانت متصله هي " ليلى " خذت رقمه من ولد عمه اللي عرفته قبل عن سموي تعرف خلفان ....لأن.في البدايه ليلى تعرفت ع ولد عمه ..عقب قالها ولد عمه ابغي اعرف وحده من ربيعاتج ع ولد عمي ..وكانت سموي .......واكيد داقه من رقم غير عن اللي حارب ايعرفه .....والسبب حب التملك اللي عندها ...تحب اتحس انها الكل في الكل وان محد فهالدنيا احلى والا احسن عنها ...وسموي خبر خيـــــــر ولا بتخبرها طبعاً

ليلى : الوووو

خلفان : هلا والله منوه ؟؟

ليلى : وياك مريم ....

خلفان : منوه مريم ؟؟

ليلى : لو ما تعرفنيه.. احين بتعرف وين المشكله ..؟؟

خلفان : ههههههههههه صدقج شو ورانا نحن غير ان نتعرف ....( وصد يطالع حارب اللي ابتسم وحرك راسه بنفي )

++++++++++++++++++++++++++++++++++++++++++++++++++ +

بيــــــــــــــــت بــــو نــــــــــــاصر .....

عبـــود ايدور الريم ....وينها هاي ؟؟؟؟ايدق الها ما ترد عليه ....راح غرفتها ما لقاها ......فقرر آخر شي يسال البشاكير .

...

وظهر الحوي لقــــى البشكاره اتنظف ويالله يالله اتخم الحوي

عبود : تعالي انتي قنديل برميل ما ادلج منوه ...وين ريم ؟؟؟

مربيل ( البشكاره ) : داخل كتجين ..

عبود : شـــــــوه !!! ريموه في المطبخ ....ههههههه وسار صوبها

لقاها ميوده ورقة فيدينها وشي تطبخ ع النار ......

عبود : السلام عليكم الشيفه ريم ..

طالعته ريم بطرف عينها ...

عبود : بلاج بلاج ...مب الريال يقولون له شيف خلاص انتي شيفه ههههههههه

الريم : احلف انت بس...تعال تعال ..".وخذت اشوي من اللي تطبخه بملعقة صغيره " تعال قولي شرايك

عبود : حشــــــــا عليه

الريم : عبود حرااااااااااااااام

عبود : انزين لا اله الا الله ..توكلنا على الله ...اللهم آتنا في الدنيا حسنة وفي الآخرة حسنة وقنا عذاب النار ....يارب سامحني على ذنوبي يارب ....( خذا الملعقه عنها ) اللهم اني اعوذ بك من الخبث والخبائث ......بسم الله ..

الريم : عبود عادا

عبود : ها ها بشرب بشرب ..وشرب عبود .......تفووووووو " ههههههههه عبود تف الي شربه " علتج العــــلة اشو ها ؟؟

الريم : لاااااااااا تتمصخر صح ....من متى وانا في المطبخ عليها...

عبود : والله الطحالب طعمها احــلى ...اخيج

الريم : حرام عليك هالشربه كلهم يمدحونها ..

عبود : بسم الله ع الشوربة ....ههههههههه اتقولين غير ماي مصدي ....بعدين تعالي شربه كلها سكر ؟؟

الريم فاجه عيونها : لاااااااااا تقوووول ..." وراحت اتظهر الملح اللي حطته " ..هذا حطيتله هب ملح ؟؟؟لالا هو ملح.... الملح ناعم والسكر خشن وعود ..

عبود : يالخبله ....شي فرق بين البورده وبين الملح ..واللي فيدينج سكر مطحون يا حلوة هههههههههههههههههه راجعي حساباتج ....المهم ترا نويصر بيي عقب يومين

الريم : فديـــــــــته خويه العود قول والله ..

عبود : والله بيــي ....يللا انا بظهر احينه بسير صوب بيتزا هت بييب لج مرغريتا مالتج ..وانتي بليز يعني ما نبى نحول مطبخنا مختبر فيزيا ...

وظهر عنها وهي تضحك عليـــــــــــــه و ع عمرها ...ما عليه مسود الويه ...ويربت تاخذ اشوي من اللي سوته واتذوقه

الريم : وع هههههههه صدقه عبدالله ....

++++++++++++++++++++++++++++++++++++++++++++++++++ +

السبــــــــت الصــــبح

حصوص من درت ان قوم عمهم عازمينهم ع الغدا وهي كل اشوي اتفكر اشو تلبس شو اتسوي ..كيف تتصرف ....اتصلت ع شموه .....

حصوص : عازمينا قوم عمي شموووووووووووه

شموه اللي شبه راقده : اعرف انزين ....عوشه حرمة عمج عزمت امايه بعد

حصوص : ياااااااااااااااااي يعني بتين ويانا فديتج شموه نشي نشي يللا ...

شموه : ناشه ناشه ........

حصوص مستااااااااااانسة

++++++++++++++++++++++++++++++++++++++++++++++++++ ++++

الســـــــــــــاعــــة 2 الظهـــــــر بيــــــــت بو مـــــــايد

الغدا محطوط في الميالس ....وحارب وسلطان وبو سلطان عندهم مايد وثاني وبو مايد اللي عزم بو حميد وحميد بعد ....ومتيمعين في الميلس بيتغدون .....وعند الحريم ...يالسه شموه ...وياها الحص ..وموزان ومهاري وياهم وساروه الصغيرونه ..وشويخ حرمة سلطان ...واكيد ام مايد وام حميد وام سلطان .....لمة الحريم كانت احلى واحلى ...وكل هنتين ايسولفن رواحهن والا ايسولفن كلهن مره وحده ...وعادا الحريـــــــــــم......

مـــــــايد عقب الغدا قرر ينفذ خطته في إنه يواجه الحص ..وايحطها في الأمر الواقع ....اليوم بيخليها اتقر اذا اتحبه والا اشو بالضبط .....سار و زقر ساروه خته ..وقالها ازقري حصوص قوليلها تعالي برويج شي وهاتيها عند باب الفله الوراني صوب المطبخ ......وفعلن ..راحت ساروه وزقرت حصوص عقب ما تغدت وقالتلها برويج شي ...

مهاري : شو عندج سارونه ..

ساروه : ما اخبرج سر ...يللا تعالي حصوص...

نشت حصوص وهي تضحك ههههههه : اشوي وبييكم ....

دومها تلعب ويا ساروه فما حطت شي فبالها .....

موزان شكــــت في الموضوع ...وشموه ولا طرى عبالها مستانسه بالسوالف...وبالحلاوة اللي تاكلها .....

ساروه تحاول تسحب حصوص يليـــــن المكان الموعود .....من وصلت عند الباب ...ظهرت حصوص ووقفت خاري عند باب الوراني للفلة ومجابله المطبخ ...

حصوص : ها سارونه شو السالفه ؟؟

سارونه : احينه بتعرفين هههه ضحكت ودخلت تركض وقفلت الباب بالمفتاح وحصوص خاري مستغربه ...

حصوص اتدق الباب واتحاول اتفجه : ساروه ماما عيب ما ايووز فجي الباب ....

: .... احـــم احــــم

حصوص عاطيه ظهرها للي وراها ومجابله الباب ......يا ويلي ......ريال ...وانا بهالمنظر .....( كانت عاقه عباتها ولابسه تنورة وقميص وحاطه شيلتها ع راسها ....بما انهن ييلسن في الصاله وما يدخلون الرياييل ....حست هنيه ان ريجها نشف

: حصوصــــي

لااااااا ....هذا ميــــــود!!! ....صدت صوبه ع طول وهي تتحجب واتحاول اتغطي جسمها بشيلتها و منزله راسها ....ما عليج يا ساروه ...

مايد : سامحيني ع الحركه ...بس اضطريت اسوي جي ...

حصوص رفعت حايبها ..معقوله هو موصي ساروه ....مشكور يا ولد العم عالحركة الحلوة .....كيف يشوفني وانا بهالمنظر ....كيف يخليها تقفل الباب عني .... الله يسامحك يا ميــــــود ..

مـــــــــايد : حصـــــــــة ...

حصوص زعلانه من خاطرها ومفتشله ع منظرها ....

مـــــــايد : حصوص بيني و بينج موضـــــوع لازم أحط له حـــد ....

من خفايا قلب { مظلــــوم } ::::

يحسب اني تجاهلتــه وانه // آخــر همـــــــــــي

ما درى انه هوايــــه وغــــلاه يجــــري بدمـــي

ما درى بشـــوقن { أضمـــه } ما درى بي وبهمي

أذكـــره بوحدتــــي أذكـــره وانا ويا } امـــــــي

والخافق من { زود { عشـــقي أخافه ما يضمــي

وهو بظنونه نيرانن جرحي \\ بالحطب ترمـــي

يخدعـــــه // صمـتي / ويصدق ومنه ياخذه علمي

ما درى فصمتـــي عذابــــي ومنه أرتوي } سّمـــي

الحب} ...الولع }...كل يومن وله إسمن أسمـــــي

قولو له\\ بلياه ضميري ريح المــــــوت يشمــــي

تقولون والا أقول ؟؟ أنـــا ما ارتضـــي ظلمـــــي

وهنـــــا ...
أطوي صفحة اليوم بعد ان امتلأت بخفاياهم ..
احمل دفتري وانسحب بهدوء...دون أن يلتفت إلي قلب...
أقفل خلفي أبواب خفاياهم بسكـــــــون ...
لأعــــود في الغد ...و أخط مــا أراه ..في دفتري ....
بإذن اللـــه...
لـــي ولكـــــم

×× لخفــــايا قلــوبهُم { بيــــبان } دقـيتهــا البــارحة و // طلـــّيت ××

][ الشمــــــــــــوخ البسيـــــــط ][ __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
دقيتها لطمه/ورحت زعلان "طبع بدوي" لاضاق لف العمامه\|\|~	›• غَنٍجَ اڷشاُمً ‹•	المسنجر وملحقاته , توبيكات , ماسنجر بلس , msn	8	06-29-2010 12:54 PM
ليلة البارحة ؟	محروم.كوم	منتدى أخبار المواقع والمنتديات العربية والأجنبية	0	02-02-2010 09:50 AM
البارحة واليوم	نعم نعم	شعر و خواطر	5	04-18-2008 02:14 AM
البارحة يوم الخلايق نياما ...	نمر بن عدوان	تراحيب وتهاني	26	01-24-2008 07:03 AM