من يحبك كثر ماأحبك أنا.. - الصفحة 24

العاشق · #1 08-30-2008, 02:31 PM

يسلمووووووووو __DEFINE_LIKE_SHARE__

Grshoob Albdoo · 08-30-2008, 05:45 PM

الجزء السابع عشر..

لك حروفي قصيـد ولك قصيـدي شـعـــور

ولك شعــــوري خفـوق نبضـه الحَيّ إنتـي

ولك غلا في صَميم الروح حَاضر حضور

واشهـــد انــك بقلبي وْلا عـن العيـن غبتيميعاد من أمس فالمستشفى على ولاده، ووايد تعبانه وعمتها وإختها وبنات عمها كلهم معاها ويدعون الله يقومها بالسلامه، بس الي مب قادر يمسك نفسه هو عزيز، رايح راد على كرسيه وهو شوي يدعي لها وشوي يتأفف إنه محد طمنه عليها..
غاليه: عزيز إن شاءالله بتقوم بالسلامه، إنت هدي أعصابك..
عبدالعزيز: من أمس وهي داخل حتى ماخلوني أدخل عليها..
أم غاليه: ماعليه ياولدي، هاي الولادات جي تطول..
عبدالعزيز: مابي عيال مابي شي بس ميعاد تقوم بالسلامه..
مروى: لاتحاتي إن شاءالله بتقوم..
ومرت الساعه.. والساعه الثانيه، وآخر شي طلعت لهم أم عبدالله تبشرهم وهي تصيح..
عبدالعزيز: أميه ليش تصيحين.. ميعاد صار لها شي..؟؟؟؟
أم عبدالله وهي تمسح دموعها: الحمدلله ولدت ويابت بنيه..
عبدالعزيز: المهم ميعاد شو أخبارها..!!!
أم عبدالله حظنت ولدها: الحمدلله هي والبنيه بخير..
عبدالعزيز: عيل ليش تصيحين..؟؟ أكيد فيها شي..؟؟
أم عدالله: والله مافيها شي.. بس فديتها من أمس هني ووايد تعبت..
أم غاليه: خلاص عزيز قالت لك مافيها شي..
عبدالعزيز: أبا أتأكد.. أميه ليش تصيحين..؟؟
أم عبدالله: قطعت قلبي ميعاد وهي تولد، كانت تصيح وتقول ياليت أمي معاي فهاليوم..
أم غاليه: الله يرحمها إن شاءالله..
عبدالعزيز: فديتها ياربي.. أميه بدخل عندها..
أم عبدالله: لا فديتك مايدخلون حد عليها.. بعد شوي بيودونها غرفتها وهناك تقدر تشوفها..
مروى الي أثر فيها الموقف يلست تصيح في حظن غاليه..
غاليه: نحن ناقصينج إنتي الثانيه.. بس سكتي..
أم غاليه: مروى تعالي حبيبتي..
مروى فهاللحظه اشتاقت لحظن أمها.. وماعرفت شو تسوي فحظنت خالتها وهي بعدها تصيح..
أم غاليه: لو أمكم راحت.. نحن كلنا أمهاتكم.. مروى أنا الي ربيتج من بعد أمج، يعني أنا في مقامها..
عبدالعزيز راح بعيد عنهم والبنات يلسوا يهدون مروى، وغاليه طلعت عنهم برع تحاول تتصل فأحمد الي مسكر تلفونه ومب راضي يرد عليها من امس.. ياربي ناصر شو قاله، وليش مب راضي يكلمني..؟؟ عسى الله يجعله خير..
بعد ساعه ونص سمحت لهم الدكتوره يدخلون على ميعاد بس بدون لايتعبونها..
عبدالعزيز مسك إيدها ويلس يمسح على شعرها ينتظرها تقوم، وفي هاللحظه دخلت عليهم النيرس يايبه البنيه الصغيره، إشحلاتها كانت وحمرااا..
أم غاليه: ماشاءالله عليها نسخه منك ياعزيز.. تعال شوفها..
عبدالعزيز راح لها: فديتها ياربي.. إنتي يالسباله ليش عذبتي ماما..
غاليه: ههههههههه أونها تفهم الحين..
عبدالعزيز: لابنتي ذكيه على أمها، والحين بتقوم بتكفخني..
مروى: هههههههه قول عنيده على امها..
عبدالعزيز: لو سمحتوا محد له خص بعناد حرمتي..
أم عبدالله: بس سكتوا لاتوعون ميعاد..
غاليه: بس ماقلت لي شو بتسمونها..؟؟
عبدالعزيز: إن شاءالله على المرحومه يدتها.. عائشه.
أم غاليه: تستاهل المرحومه تتسمى عليها..
ميعاد طلعت منها ونه خفيفه وسمعها عزيز وراح لها..
عبدالعزيز: عمري إنتي.. يعورج شي..؟؟
ميعاد فتحت عينها وشافت عزيز يطالعها وهو مبتسم، ولفت راسها وشافت الكل يالس يطالعها..
ميعاد بصعوبه: أبا ماي..
أم عبدالله يابت لها الماي وساعدتها علشان تشربه..
ميعاد: أنا وين..؟؟
عبدالعزيز: إنتي هني فالمستشفى..
ميعاد: يعني بعدني أعيش..!!
عبدالعزيز: بسم الله عليج.. فديتج الحمدلله الله قومج بالسلامه..
ميعاد وهي تغمض عينها: والله شفت الموت ياعزيز..
عبدالعزيز مسح على راسها: فيني ولافيج يالغاليه..
ميعاد: خلاص الحمل الياي عليك إنت..
عبدالعزيز: هههههههههههههههه
أم غاليه: حمدلله على سلامتج حبيبتي..
ميعاد: الله يسلمج خالووه.. وينها بنتي..؟؟
عبدالعزيز: أميه ييبي عواشه..
ميعاد: يعني اقتنعت بإسم عائشه، كنت تقولي لا أبا إسم يديد..
عبدالعزيز: الي إنتي تبينه أنا اسويه لج من عيوني..
ميعاد: عطني بشيلها..
أم عبدالله: بعدج تعبانه، صبري شوي وبخليج تمسكينها..
ميعاد: انزين ييبيها بشوفها..
أم غاليه شلت البنيه ووقفت عدال ميعاد الي راقده عالسرير، ميعاد مدت إيدها ومسكت بنتها.. ويلست تمسح على شعرها..
ميعاد: عزيز وايد تشبهك.. التعب لي والشبه لك..
غاليه: يقولون الي تحب زوجها وايد يظهر اليهال على أبوه..
ميعاد: لو أدري ماحبيتك علشان يظهرون علي..
عبدالعزيز: ههههههه خلاص المره اليايه لاتتطالعيني..
ميعاد: أي مره يايه..!!! إستريح، قلنا المره اليايه عليك إنت..
أم عبدالله: يالله الحين من غير مطرود على بيوتكم، وباجر تعالوا..
عبدالعزيز: هيه صح يالله خلوها ترتاح..
أم عبدالله: إنت أول واحد..
عبدالعزيز: أفااا
أم عبدالله: أدريبك بتقعد هني تكلمها وتشاغلها وهي بروحها تعبانه..
عبدالعزيز: انزين غاليه يودي موبايلي صوري لي عواشه.. ناصر وعبدالله يبون يشفونها..
أم عبدالله: وأنا ليش قلت لك تروح، أدري بحركاتكم..
غاليه: خلاص بس صوره وحده.. هه يود تلفونك..
عبدالعزيز: فديتها ياربي اشحلاتها..

وطلعوا كلهم ورحوا على بيوتهم.. كانت الساعه بعدها ثلاث ونص الظهر، وغاليه محاظرتها الساعه خمس، فقررت تروح البيت مع أمها.. وترتاح شوي وبعدين ترجع للجامعه..
أم غاليه يلست بالصاله مع أبوها تحكي له عن ميعاد والبيبي..
أبوغاليه: الحمدلله على سلامتها..
أم غاليه: والله إنها قطعت لي قلبي وهي تذكر أمها وتصيح..
أبوغاليه: الله يعينها..
غاليه: بابا.. بتروح تزورها فالمستشفى..
أوغاليه: لا بنتظر الين ترد البيت وبسير لهم..
غاليه: ماما.. عيل عموووه أم عبدالله بتتعب، جميله من صوب وميعاد من صوب.. وعاد ميعاد أم الدلع كل شوي أبا وأبا..
أم غاليه: ههههههههه لا جميله بترد بيتها هاليومين..
غاليه: زين بعد..
أبوغاليه: أنا بسير بريح ساعه وبرجع للشركه..
أبوغاليه راح عنهم، وغاليه راحت لصقت فأمها..
غاليه: ماما بقولج شي بس ماتعصبين علي..
أم غاليه: إنزين قولي بس خوزي عن كندورتي يلستي عليها..
غاليه: الله والكندوره أبو تيله.. إنتي حرمة منصور المنصوري تلبسين هالخلاجين..
أم غاليه: عايبتني وأرتاح فيها إنتي شو خصج.. المهم قوليلي شو تبين تقولين..
غاليه: أممممممم بصراحه ماما ليش أنا محد يخطبني..؟؟
أم غاليه انصدمت: حبيبي بعدج صغيره..
غاليه: لا مب صغيره.. شروق نفس عمري وإنخطبت مرتين، ومروى الحين سمعت عمر يبا يخطبها..
أم غاليه: عمر... ولد عمتج ماغيره..

غاليه: هيه.. عمووه تبا تاخذ بنات المرحومه كلهم..
أم غاليه: بس عمر وايد عود عليها.. هو كم عمره..
غاليه: يمكن يبا بيبي يربيها.. عمره تقريبا 26
أم غاليه: ومروى بعدها 19 سنه..
غاليه: أحسن ماما.. فهالعمر يقدر يتصرف معاها..
أم غاليه: الله يهنيهم يارب..
غاليه: وإنتي الحين ليش تغيرين السالفه..؟؟ قوليلي لايكون في حد يخطبني وأنا مادري..!!
أم غاليه تغير لونها: والله تعرفين أبوج يحبج ومايبا يفارقج، يعني لو في حد تقدم لج مابيقولج..
غاليه: فديت أبويه والله.. بس أنا صج مستغربه، كل هالجمال والحلاه والدلال ومحد خطبني..
أم غاليه تبا تنهي الموضوع: يمكن بسبة دلعج هذ محد يبيج..
وقامت عنها وسارت الغرفه وغاليه تتحرطم عليها..
دخلت أم غاليه الغرفه وتحس نفسها منهاره وودها تصيح، راحت وتسدحت عدال ريلها وهي تمسح دموعها..
أبوغاليه: بسم الله عليج شو فيج..؟!!!
أم غاليه خبرته بالي قالته غاليه لها قبل شوي، منصور من الضيج عطاها ظهره ورقد.. يعني شو تبينا نرد عليج ياغاليه، كيف تبيني أقتل أحلامج بداخلج.. حرام والله حرام..

ليــتك معي يوم الهـوى نود نسناس

من الــفرح والله ما تـدمـــع العـــــــين

نــاس على تعذيب ناس لهـم نـــاس

وهــذا الهـوى ياخـــذ قــلـوب المحبينفي بيت أحمد.. الي من يومين مب عارف شو يسوي، ماخذ إجازه ويتهرب من غاليه.. بس لمتى..؟؟ أكيد فيوم لازم يواجها.. بس المصيبه غاليه ماتعرف عن مرضها وهو وايد متعلق بها كيف بتحق عليه نفسه يتركها..
دخلت عليه أخته هيا، الي هي أصغر عنه بسنتين ومخطوبه لولد عمها من صغرهم..
هيا: زين الشباب شو عندك سرحان..!!
أحمد: هلا هيوونه.. تعالي إدخلي..
هيا دخلت ويلست عالكرسي الي مجابلنه وهو متسدح عالسرير..
هيا: غريبه اليوم يالس فالبيت ومب مشغل النت، وصار لك يومين إجازة، خيرشو صاير لك..؟؟
أحمد: سلامتج بس أغير جو تعبت من الشغل..
هيا: تعبان من الشغل وبنعديها.. لكن تعبان من النت.. مستحــــيل..
أحمد مايخبي شي على أخته حتى عن غاليه مخبرنها، بس هي ماتدري عن التطورات الأخيره الي صارت لأنها لاهيه عنه بالتجهيز لحفلة ملجتها بعد يومين..
أحمد: إنتي خبريني شو سويتي للملجه..؟؟
هيا: أممممم خلصت الفستان وحجزت صالة العرس، وكل شي جاهز تقريبا..
أحمد: الله يوفقج إن شاءالله..
هيا: أحمد شو السالفه..؟؟؟
أحمد: مافي شي بس تعبان ومتملل بروحي..
هيا: ووينها أم الدلع عنك..!!
أحمد عوره قلبه من قالت هالكلمتين، هو من خبرها عن غاليه وهي دايما تسميها أم الدلع..
هيا: وين سرحت..!! أحمد شي صاير بينك وبينها..؟؟
أحمد تنهد بقوه وخبرها كل السالفه.. وهيا منصدمه من الكلام..
هيا: معقووووله..!!!! كل هالحلاوه والدلع وآخر شي تنحرم من أحلى شي بحياتها..
أحمد: شفتي عاد.. مب هي بس، انا بعد بنحرم منها.. والله ياهيا إني أحبها من كل قلبي..
هيا: عيل لاتتخلى عنها..
أحمد: كيف..؟؟ قوليلي كيف..؟؟ أهلها ماراح يخلونها تتزوج.. ولو وافقوا أنا بعيش بدون عيال.. وتعرفين إني أموووت عاليهال..
هيا: موقفك غريب.. تحبها وفي نفس الوقت مب راضي تضحي..
أحمد: أنا ماقلت إني مابضحي.. أنا...
هيا: إنت محتار من السالفه.. أنا لو ياني فارس الحين وقالي هيا أنا ماقدر أتزوجج لأني مافيني عيال.. والدكتور قالي هالشي.. والله لأبيع عيال الدنيا كلهم وأشتريه بعمري كله..
أحمد: وأنا بعد بفدي غاليه بروحي.. بس أخاف فيوم تعاند وهي أكبر عنيده وتحمل علشان بس ترضيني وفالنهايه تروح عني.. لالا مابقدر أتحمل.. أنا بسوي مثل ناصر.. بضحي علشان أخليها تعيش بينا.. بمنحها الحياة بدل الزواج، وهي يوم بتعرف هالشي بتقدر موقفي..
هيا قامت من مكانها وهي تتطالع أخوها: هذا قرارك..؟!!
أحمد: هيه.. وصدقيني حياتها أهم مني..
هيا بحزن: إنت صح بتهديها الحياة وبتضحي علشانها، بس صدقني إنت بتعطيها فوق هالحياة جرح.. جرح عمرها الأيام ماراح تداويه..
وطلعت عنه هيا وخلته يصيح،، هيه نعم يصيح، يصيح كل لحظه حلوه عاشها مع حبيبة عمره.. يصيح الذكريات الي صارت مثل الشوكه تنغرس في قلبه كلما إنذكر طاري غاليه..

نرجع لغاليه الي تحس نفسها خلاص بتنهار وهي تحاتي أحمد وليش يتهرب منها.. تتصل فيه بدل المره مليون ولايرد، تطرش لها إيميلات طووول الوقت وهو مب راضي يرد.. راحت له الشركه ناصر خبرها إنه ماخذ إجازة مفتوحه.. ياربي ليش كل هذا قاعد يصير..!! أنا لازم أعرف شو السالفه.. لازم أحط لقلقي حد..
وراحت غاليه وبدلت ثيابها ولبست عبايتها وطلعت، قعدت تلف بالسياره وهي تحاول تفكر بحل للمشكله الي هي فيها.. وقامت وطرشت مسج لأحمد..

(( رد علي وإلا قسما بالله الحين بسير بيتكم.. والله يا أحمد بسير، وإنت تعرف غاليه عدل، يمينها ماينزل الأرض..))

وماكملت دقايق إلا وتلفونها يرن، بس الرقم غريب وماتعرفه، يمكن أحمد عنده رقم ثاني..!!
غاليه: ألووو
أحمد: السلام عليكم..
غاليه: وعليكم السلام.. يعني مابتيي إلا بالعين الحمرا..
أحمد: ..................
غاليه: مب حرام عليك الي سويته فيني.. صار لي أسبوع أدورك.. أحمد شوفيك.. وإلا نسيت دلوعتك..
أحمد: غاليه..
غاليه: فديت إسمي الي طالع منك.. أحمد أحبك..
أحمد يود على قلبه يالله ياغاليه لاتصعبين علي الموضوع بروحي منهار..
أحمد: ممكن أشوفج الحين..
غاليه: أنا عالبحر تعال..
ماكمل الربع ساعه من بندت عنه إلا هو جدامها.. نزل من السياره ووقف وراها وهي عاطيته ظهرها..
غاليه: والله لك وحشه تهز الروح هز..
أحمد:.....................
غاليه: فديت روحك ليش ساكت..؟؟ دخيلك قول أي شي بس لاتسكت..
أحمد: غاليه.. يمكن الي بقوله مابيعيبج، بس مصيرها الأيام بتثبت لج وين الصح من الخطأ..
غاليه وهي تلتفت عليه: بسم الله شو صاير..؟؟
أحمد: غاليه... أنا حبيتج من قلبي وتمنيتج زوجه لي بالحلال.. وإنتي كنتي بالنسبه لي الهوا الي أتنفسه..
غاليه: حبيتج وتمنيتج وكنتي..!! أحمد شوفيك قولي الرمسه على طول لاتلف ولاتدور..
أحمد أخذ نفس عميق: غاليه إحنا مب لبعض..
غاليه وهي مب مستوعبه: شـــــو..!!
أحمد: غاليه مافي نصيب من بينا.. صدقيني مب منج ولا مني، بس الله مب كاتب..
غاليه تحاول تقوم من الصدمه بس مب قادره..
غاليه: إنت شو قاعد تقول..؟؟ شو الي ماشي نصيب، أحمد أنا غاليه أنا الحب أنا الدلع.. كيف ماشي نصيب..
أحمض: أدري والله أدري.. بس كل هذا علشانج مب علشاني.. والله ياغاليه إنج جوهرة وتنشرين بفلوس الدنيا بس أنا......
غاليه قاطعته وهي تصيح: بس شو...؟؟ قولي ليش بتتركني وإنت تموت علي، ليش ماتقدر تاخذني.. ليش..؟؟
أحمد: غاليه الله يخليج هدي أعصابج.. أنا..
غاليه: إنت شووو..؟؟ إنت علقتني فيك وخليتني ما أرقد الليل بسبتك، إنت خليتني ما أحس بالدنيا إلا وإنت معاي، والحين بكل بساطه تقولي ماشي نصيب..!!
أحمد: صدقيني ياغاليه الأيام بتثبت لج إن كل هذا لمصلحتج..
غاليه تمسح دموعها بكل كبرياء: خلاص يا أحمد.. غاليه ماراح تصيحك بعد اليوم.. وكل دمعه نزلت كانت تغسل حبك من داخلي..
وقفت غاليه ووقف أحمد وراها.. وشافها وهي تروح جدامه وهو واقف مثل الميت الي يشوف روحه تطلع جدامه وهو مب عارف كيف يرجعها..

وين رايح بهالسهوله هانت العشره عليك..
وين رايح إنجرح صوتي وأنا أنادي عليك..غاليه كانت تسوق بسرعه وهي مب حاسه بنفسها، ليش ياربي الي يالس يصير لي ليش.. أحب وأستانس وأعيش أيام حلوه وفجأة كل هذا يختفي من حياتي وأنجرح من أعز الناس.. أنجرح منك إنت يا أحمد.. أنا شو سويت فيك علشان تجازيني بالجرح، حبيتك ووفيت لك.. معقوله كان يلعب فيني وأنا الهبله صدقته..!! لالا أحمد صادق فحبه.. و أنا متأكده من هالشي.. بس ليش..؟؟ شو السبب الي خلاه يتخلى عني وعن حبه..
غاليه كانت تسوق بدون وعي منها.. وماحست بنفسها إلا وهي جدام شركة أبوها.. وقفت السياره فالمواقف وطارت لأبوها، ماكانت قادره تمسك دموعها وكل الي شافها عرف إنها تصيح وشي صاير، وهي ما سوت إعتبار لأي حد راحت على طول على مكتب أبوها لقته مع موظفين إثنين والمحامي خالد.. غاليه من دخلت عليهم أبوها إنقبض قلبه..
أبوغاليه: غاليه حبيبتي شو فيج..؟؟ غاليه كلميني شو صار معاج..؟؟
بس غاليه ماردت عليه ويلست عالكرسي تصيح.. فراح لها منصور وحظنها..
أبوغاليه: خلونا بروحنا.. خالد إزقر لي ناصر بسرعه..
غاليه: لا بابا مابي حد.. أبيك بروحك..
طلعوا كلهم وبقت غاليه تصيح في حظن أبوها.. كانت منهاره ومب قادره تتكلم، ومنصور كان محترق من الموقف شو الي يصيح حبيبة قلبه بهالطريقه.. فمسكها ورفع راسها..
أبوغاليه: حبيبي هدي أعصابج وقوليلي شو صاير..!! حد زعلج..؟؟
غاليه: بابا.. ليش أنا محد يحبني.. ليش أنا الكل يبتعد عني..؟؟؟
أبوغاليه: حبيبتي أنا أحبج.. أنا أفديج بروحي..
غاليه: كلهم خلوني وأنا محتاجة لهم.. ناصر وهشام وكلهم مايبوني ليش أنا بالذات لييييييييش..!!!!
منصور حس ببنته تهذي ومب حاسه بنفسها فقرر يسكت ويعرف شو الي مزعلنها..
غاليه: وأنا حبيته هو دونا عن الكل.. هو بعد حبني وعشنا أيام حلوه، واليوم ياي يقولي ماشي نصيب..!! يقولي أنا ماأقدر أتزوجج..
منصور انصدم من الموقف بنتي تحب... غاليه الصغيره دلوعتي الغاليه تحب....!!!!!!!!!!!! عيل ويني عنها وعن حبها.. ومنو هالنذل الي جرحها..!!!
غاليه: بابا.. هو راح يكلم ناصر فالسالفه وإنه يبا يخطبني ومن يومها وهو متغير علي.. شو قاله ناصر عني.. شو الي سمعه وخلاه يغير رايه..؟؟
أبوغاليه من وصلت بنته لهالنقطه فهم السالفه كلها، وعرف إنه الي تحبه بنته عرف بمرضها علشان جي تركها.. ياربي شو أقولها، كيف أساعدها..!!
أبوغاليه قام وراح ياب لها كوب ماي وعطاها تشربه، غاليه كانت حاسه بعطش فظييييييييع وشربت الماي مره وحده..
أبوغاليه وهو يمسح على شعرها: والحين خبريني منو الي تحبينه؟؟
غاليه وهي تبلع ريجها: أحمد..
أبوغاليه وهو منصدم: الموظف عندي وربيع ناصر ماغيره..
غاليه هزت راسها ولانطقت.. أبوها قام ووقف يطالع من الدريشه وهو يحاول يجمع الرمسه الي بيقولها بدون لايجرح فيها بنته..
غاليه: حبيته من سنه تقريبا.. من كنت فالثانويه..
أبوغاليه: وكنتي تكلمينه وتطلعين معاه..؟؟
غاليه: لا بابا مستحييييييييييل.. بس كنت أكلمه فالمسن وأشوفه يوم يكون مع ناصر..
أبوغاليه رجع ويلس ولم بنته لصدره بحنان، كان حاس إنه بعيد عنها فهالمرحله من حياته، وبعد يحس نفسه السبب في جرحها..
أبوغاليه: غاليه.. لو أنا إختبرتج وحبيت أتأكد من صدقج وحبج لي، بتحاولين تنجحين فإختباري..؟؟
غاليه وهي مستغربه:أكيد.. بحاول أسوي كل الي أقدر عليه علشان أثبت لك وأنجح فإختبارك..
أبوغاليه: ولو رب العالمين هو الي كان يختبرج ويختبر إيمانج وقوتج، شو بتسوين..؟؟
غاليه: نفس الشي ويمكن أكثر بعد.. لأنه ربي وانا عايشه علشان أرضي ربي ووالديني..

أبوغاليه: والله مايبتلي شخص إلا إذا كان يحبه..
غاليه ابتسمت: كنت دايما تقولي هالجمله وأنا صغيره..
أبوغاليه حط إيده على خدها ويلس يطالعها، عيونها كانت كلها براءة وحزن..
أبوغاليه: غاليه.. إنتي تعرفين إنه قلبج مريض، ونحن من صغرج نحاول نعالج..
غاليه: هيه أعرف..
أبوغاليه: والله سبحانه وتعالى إختبر صبري وقوة إيماني فيج إنتي..
غاليه: وإنت نجحت في إختباره لأن محد صبر كثرك..
أبوغاليه: والحين دورج إنتي.. بيكون عندج صبر أو لأ..!!
غاليه: صبر على شو..؟!!!!!!!
أبوغاليه: أنا لمن تزوجت أمج تزوجتها عن حب، حبيتها بكل جوارحي، ولمن الله رزقنا فيج زاد حبي لها بس إنتي كنتي مريضه وسكتنا وتحملنا..
غاليه كانت تسمع أبوها عدل لأنه أول مره يكلمها بهالطريقه..
أبوغاليه: وبعد ولادتج بسنه أمج حملت مره ثانيه وكنا وااايد مستانسين وبالذات إنه الفحوصات أثبتت إنه فيها ولد.. بس الفرحه ماكملت، يوم إكتشف الطبيب إنه الياهل الي في بطنها مريض ومشوه..
غاليه شهقت وحطت إيدها على حلجها..
أبوغاليه: وكان لازم ننزل الجنين.. وهذا الي صار، أمج أجهضت الياهل، وانتظرنا الحمل الثاني بفارغ الصبر، بس أمج طولت الين كملتي إنتي الثلاث سنين..
غاليه: وبعدين شو صار..!!
أبوغاليه: حملت أمج وكملت الحمل تسع شهور على خير، ووقت الولاده ولدت بولد مثل القمر، بس الدكتور طير فرحتنا يوم قالنا إنه الياهل فيه نفس مرضج.. هذا غير إنه طلع فيه ثلاسيميا..
غاليه رجعت تصيح مره ثانيه وأبوها بعد صاح..
أيوغاليه: بس الله رحمه وتوفى بعد شهر من ولادته.. وسوينا فحوصات ومابقت مستشفى ماسرنا لها والنتيجه وحده.. عيالنا بيكونون كلهم مرضى بسبب القرابه الي من بينا..
غاليه: يعني لو كان لي إخوان بيكونون مرضى..
أبوغاليه: أو معاقين.. فأنا وأمج قلنا حرام نييب عيال ونحرمهم من أحلى شي فالحياة وهو الصحه.. وعشنا معاج إنتي أحلى سنين عمرنا ونحن نشوفج تكبرين من بينا مثل الورده..
غاليه: بس شو الإختبار الي قلت إني لازم أجتازه..؟؟
منصور زادت دقات قلبه وهو حاس إنه الي خباه عن غاليه عشرين سنه الحين لازم ينكشف..
أبوغاليه مسكها من كتفها بقوه: غاليه إنتي.. إنتي ماتقدرين تتزوجين، لأن الحمل والولاده خطر عليج.. ويمكن يؤدي لوفاتج لاقدر الله..
غاليه يلست تطالع أبوها بعيون فارغه، لاهي منصدمه ولاهي حزينه.. تتطالعه وكأنها تطالع الفراغ, كانت بداخلها ألف سكين تطعن قلبها المريض.. كانت مثل الجثه الميته..
أبوغاليه: غاليه تونا نتكلم عن الصبر وقوة الإيمان..
بس غاليه ماردت عليه ولاتحركت.. وهو بدا يهزها ويحاول يخليها تتكلم وهي مب قادره تنطق بولا حرف..
أبوغاليه: أنا ربيتج عالصبر والتحمل الله يخليج لاتكسريني أكثر..
غاليه رفعت راسها ويلست تتطالع أبوها مره ثانيه وهالمره نطقت..
غاليه: علشان هالشي ناصر وهشام تركوني ونحن صغار..
أبوغاليه: أنا الي صارحتهم يوم حسيت بتعلقهم فيج..
غاليه: وأكيد ناصر واجه أحمد بالحقيقه يوم راح يخطبني منه..!!
أبوغاليه: هيه
غاليه: .............................
أبوغاليه: خلي إيمانج بالله قوي والي الله كاتبه بيصير..
غاليه وقفت في مكانها وهي تتطالع أبوها الي دمعته على خده، ومشت خطوتين ورجعت تتطالع أبوها.. بس ماشافته كانت الدنيا تدور فيها وهي مب قادره تتوازن، وفجأة الدنيا ظلمت بعينها وطاحت..
طاحت على حافة الطاولة وعورت لها راسها، منصور ركض لبنته ولمها لصدره وهو يصرخ.. كان مب عارف على شو يصرخ... على بنته وإلا على الجرح الي سببه بإيده لها..

وهذا البارت ونزلته لكم..

وإن شاءالله يعيبكم وينال اعجابكم ..

والسمـــــــــــــوحه عالقصـــــــــور..

(غرشوب البدو) __DEFINE_LIKE_SHARE__

NaBth al.RoO7 · 08-31-2008, 01:51 PM

نااايس ...
البارت حلوو ..

حليلهااا غالية
والله كاسرة خاطري ..
اكيد احمد بيضحي لاجلهاا ..

ونترياا البارت .. __DEFINE_LIKE_SHARE__

الصدى · 08-31-2008, 04:32 PM

ثاااانكس على البارت الحلو ونتريا التكمله
__DEFINE_LIKE_SHARE__

Grshoob Albdoo · 09-01-2008, 03:08 PM

الجزء الثامن عشر...

مر أسبوع على طيحة غاليه فالمستشفى، وهي حالتها كل يوم تسوء أكثر عن قبل.. مب راضيه تتجاوب مع العلاج وكله ساكته ولاينسمع لها صوت.. من طاحت ونقلوها عالمستشفى الدكتور قالهم إنه إنهيار عصبي..
أمها وأبوها تعبوا من إنهم يحالون يطلعونها من الحاله الي هي فيها، بس ماشي فايده.. طول الأسبوع أبوها يحاول بكل الطرق إنه يخليها تنطق ولو بحرف واحد.. بس هي تجاوبه بشي واحد وهو الدموع..
دخل ناصر غرفة غاليه فالمستشفى هو ونجود، شافها يالسه عالسرير وماسكه فإيدها ورده حمرا.. كان لونها شاحب وسواد عيونها الي عمرهم ماشافوه اليوم مبين بكل وضوح الدنيا..
ناصر: شخبار غاليتنا اليوم..؟؟
أبوغاليه: الحمدلله ماتشوفها مثل البدر المنور..
ناصر: وين بدر عمي الله يهداك.. هــاي حدها هلال..
نجود: خل عنك عاد، غاليه قمر 14.. محد يتحداها..
أم غاليه: حياج نجود حبيبتي تعالي هني..
راحت نجود وسلمت على فاطمه ويلست تمسح على إيد غاليه الي كانت تلعب بالورده الي فإيدها وكأنها بعالم ثاني، ولاحاسه بناصر ونجود يوم دخلوا ولا بالرمسه الي يقولونها..
نجود: غاليه حبيبتي.. شو رايج أول ماتظهرين نروح كلنا السينما، حبيبج توم كروز منزل فيلم يديد..
ناصر: عاد انا قلت لنجود مستحيل أشوف الفلم بدون غاليه..
نجود: أنا صح غرت شوي، بس يالله علشانج بس بسكت..
أبوغاليه: ياسلااام سينما.. وغلايتي أكيد تبا تروح.. صح حبيبي..؟؟
غاليه رفعت راسها واطالعت أبوها شوي ورجعت تتطالع ناصر لأكثر من دقيقه وهو مستغرب شو تقصد بنظراتها.. شو الي تبا تقوله له ومب قادره..
ناصر: عمي أبوي يسلم عليك، ويقولك اليوم بيمر عليك..
أبوغاليه: إن شاءالله خير.. ناصر تعال برع أبيك بسالفه..
طلع ناصر مع عمه برع ويلسوا على كراسي الإستراحه، منصور كان شايل مسباح في يده ويالس يسبح وهم يمشون.. ومن يلسوا إلتفت على ناصر..
ناصر: عمي شو يقولون الدكاتره عن حالة غاليه، أحس مب قاعده تتقدم فالعلاج..!!
أبوغاليه: غاليه رافضه العلاج، علشان جي حالتها ماتتحسن..
ناصر: وليش كل هذا ماعرفت..؟؟

أبوغاليه: يعني إنت ماتعرف السبب..؟؟
ناصر: شو دراني ياعمي.. الود ودي أعرف علتها وأعالجها..
أبوغاليه: وأحمد.. ماخطبها منك..؟؟
ناصر الي إنصدم: أحمد..!! كلمني فالموضوع وانا خبرته عن حالتها وقلت له لايفكر فيها ولايتقدم رسمي لأنه ماشي فايده..
أبوغاليه: والحب الي كان من بينهم.. ماكنت تعرف عنه..؟؟
ناصر هني وقف الدم في عروقه، أحمد وغاليه يحبون بعض..!! كيف ومتى..!! وكيف أنا ماحسيت بهم..؟؟
ناصر: والله ياعمي أنا ماعندي علم بالسالفه إلا الحين..!!
أبوغاليه: غاليه ياتني وهي منهاره ويلست تصيح وتقولي عن الحب الي كان من بينهم وآخر شي قالت إنه راح يكلمك ومن هذا الليوم وهو متغير عليها وبعدها قالها ماشي نصيب..
ناصر: علشان جي صار لها الي صار..!! بس أحمد..!! والله ماتوقعت.. ولو كنت أحس بأي ميول منه لها كنت وقفته على طول، بس والله ياعمي مالي دخل بالسالفه..
أبوغاليه: أعرف ياناصر ماله داعي تحلف..أمممم إنت تعرف أحمد عدل وواثق منه..
ناصر: طبعا.. ربيعي من سنين وقلوبنا على بعض وشرفي من شرفه..
أبوغاليه: ناصر.. كلمني شو تعرف عن أحمد..؟؟
ناصر: كل خير ولد مؤدب ومحترم، ولد ناس طيبين، ولو هو مب زين ماكنت أنا رابعته..
أبوغاليه: عيل محد بيطلع غاليه من حالتها غيره هو..
ناصر: بس ياعمي غاليه الحين عرفت كل شي.. يعني صعب تتقبل تشوف الإنسان الي حبته ولاتقدر تتزوجه في ويها..
أبوغاليه بنبره حزينه ومكسوره: عيل كيف أطلعها من السجن الي هي فيه.. كيف أخليه ترجع للحياة من يديد.. ناصر غاليه يالسه تموت جدامي وأنا مب قادر أسوي لها شي..
ناصر عوره قلبه على عمه: خلاص ياعمي أنا بكلم أحمد وبقنعه إيي هني ويكلمها وبنقعد مع غاليه بس بروحنا.. وإن شاءالله بنقدر عليها..
ناصر خلى عمه وراح لبيت أحمد على طول.. دق الجرس وظهرت له الخدامه وقال لها تزقر له أحمد وهو دخل الميلس ينتظره..
بعد دقيقتين أحمد دخل الميلس وهو يعدل غترته الي لبسها بسرعه وطلع يشوف منو الي يبيه..
أحمد: ناصر..!! بسم الله إشفيك شو صاير لك..!!
ناصر: وليش خايف..؟؟ حرام إني أزورك..!!
أحمد: مب حرام حياك البيت بيتك.. وعلى الراس من فوق بعد..
ناصر: إنزين روح ييب لي قهوه تعدل الراس وتعال..
راح أحمد وهو قلبه يدق يحس السالفه فيها غاليه.. رجع أحمد بالقهوه ولقى ناصر يرمس فالتلفون..
ناصر: آسف بس إضطريت إني أظهر من المستشفى بسرعه، خلاص إنتي مناوبتج الحين خلصي شغلج وبكلمج بعدين.. باي..
أحمد وهو يمد عليه بالقهوه: إنت كنت فالمستشفى..
ناصر: هيه.. عند غاليه بنت عمي..
أحمد: شخبارها الحين عساها بخير..!!
ناصر: وليش مادق لها تتطمن على أخبارها..؟؟
أحمد إستغرب منه: كيف أدق لها الله يهديك إنت بعد.. إنت طمني عنها..
ناصر: أحمد.. أنا عرفت كل شي.. غاليه خبرت عمي وهو طلب مساعدتي..
أحمد حط دلة القهوه على الطاوله ويلس مع الكرسي وهو منزل راسه ومب عارف كيف يواجه ناصر..
ناصر: ليش سكت..!! أنا ياي أعرف السالفه من أولها لآخرها..
أحمد: مالي ويه أطالعك.. أحسني خاين في نظرك..
ناصر: إنت ماسويت شي علشان تقول خنتك، إنت حبيت ونيتك شريفه والدليل إنك خطبتها مني..
أحمد: أنا بحكي لك كيف تعارفنا وإنت إحكم..
ويلس أحمد يحكي حقه كل شي، وناصر يسمعه بكل هدوء، وشرب بدل فنيال القوه ثلاثه..
ناصر: وليش ماقلت لي أنا رفيجك وكل سوالفي عندك، وإنت الحين تخبي علي كل شي..؟؟
أحمد: سامحني ياخووي بس هاي كانت رغبتها..
ناصر: يعني يوم كنا نشوفها فالسينما والمولات.. ويوم رحنا الفجيره كله كان مواعيد من بينكم..؟؟
أحمد: وكل شي كان جدامكم ماسوينا شي حرام وإلا بالغش والدس..
ناصر: محشوم عن الحرام ياأحمد.. بس الحين انا ياينك في طلب وأتمنى إنك تساعدني..!!
أحمد: عيوني لك.. والله إطلب الي تبيه مب مقصر..
ناصر: مب حقي.. حق غاليه..
أحمد: عيل لو تطلب الروح ترخص..
ناصر: أباك تروح معاي المستشفى وتحاول إنك إطلع غاليه من الحاله الي هي فيها..
أحمد نزل راسه: مالي ويه أجابلها..
ناصر: عيل وينه الي بيسوق روحه علشانها..!!
أحمد: أسوق روحي وعمري كله لها.. بس إني أواجها بعد الي سويته، أحس إني بزيد الطين بله..
ناصر: بالعكس غاليه تحبك.. وإنت الوحيد الي بطلعها من عزلتها..
أحمد يلس يفكر كيف بيواجها وكيف بتكون ردة فعلها، ممكن ماتتقبل وتنتكس حالتها بزياده..
أحمد: أوكي.. بس إنت تدخل قبلي وتهيأها لدخلتي، مافيني أصدمها وأدخل مره وحده..
ناصر قام: خلاص تم.. قوم إلبس وإلحقني بسيارتك..
أحمد: شايفني يربان ولا مالك نفس توصلني..
ناصر كان واقف عند الباب يبا يطلع يوم قال أحمد هالرمسه، إلتفت عليه بكل حزن الدنيا..
ناصر: مادري بس أحس فهالحظه إني شايل عليك من الخاطر، عمري ماتخيلتك تخبي علي إنك تحب.. ومنو بنت عمي غاليه.. الله يسامحك..
وطلع وخلى أحمد مضايج من حالة ناصر، وقام بعدها ولبس وراح وراه للمستشفى ووصل لغرفة غاليه بس يلس برع، وشاف العم منصور وحرمته طلعوا من الغرفه وراحوا للإستراحه الثانيه بدون لاينتبهون لأحمد الي كان يالس..
وداخل الغرفه ناصر كان يحاول يكلم غاليه وهي ماسكة ورقه في إيدها وتشخبط عليها بالقلم.. كانت شيلتها طايحه على كتفها وشعرها مب مرتب، بس ماكانت حاسه بنفسها ولا بأي شي ثاني..
ناصر قام ورفع شيلتها ولبسها.. وهي ولا كأنه حد مسكها ولا كأنه ناصر أساسا موجود بالغرفه..
ناصر: غاليه.. تعرفين منو ياي يزورج..؟؟
غاليه ماردت عليه وحطت الورقه الي في إيدها عالطاوله وسحبت غيرها وكملت شخابيط..
ناصر: غاليه سمعيني، برع في واحد يالس ويبا يدخل يشوفج.. تعرفين منو..!!!!
غاليه: ...............................
ناصر: أحمد..
غاليه من نطق ناصر إسم أحمد رفعت راسها بسرعه ويلست تتطالعه، ناصر شوي ارتاح من ردة فعلها..
ناصر: إنتي تبين تشوفين أحمد..؟؟
غاليه إبتسمت إبتسامتها الطفوليه الحلوه.. وهزت راسها هيه.. ناصر إستانس وقام وراح للباب وزقر أحمد..
أول مادخل أحمد وطاحت عينه على غاليه حط يده على قلبه، كان شكلها غييير عن غاليه الي تعود عليها، كان لونها أصفر وشاحب.. وضعفانه واااايد وعيونها مبين عليها التعب.. وغاليه من شافته ماحست بعمرها أبدا.. إبتسمت له وحاولت إنها تقوم من مكانها أو تسوي أي شي ومب عارفه..
ناصر راح لها: لالا خلج يالسه..
أحمد: غاليه لاتحركين إرتاحي مكانج..
غاليه هزت راسها هيه.. وهي طايره من الوناسه..
ناصر: تعرفين ليش أحمد هني.. يبا يسلم عليج ويقولج حمدلله عالسلامه..
أحمد: وطبعا ناصر لازم يخرب علي..
غاليه طلعت منها ضحكه خفيفه وناصر إستبشر خير..
أحمد: حمدلله على سلامتج.. ماتشوفين شر..
غاليه هزت راسها بس..
أحمد: الأخت هنديه تهز راسها.. أتشاااا بابا أتشاااا
غاليه: هههههههههههههه
أحمد: هيه جي ضحكي.. يالله نعيد مره ثانيه.. شخبارج غاليه عساج بخير..
غاليه بصوت خفيف: زيــنه..
أحمد: الحمدلله على كل حال... أمممممممم يالله متى بتقومين وبتسوين لي كيكه..؟؟
غاليه إبتسمت إبتسامه عريضه: الحـــين..
ناصر: ههههههههه الحين.. لالا خلج مرتاحه هذا بس يبا ياكل..
أحمد: إنت مايخصك أنا وياها بنتفاهم..
غاليه وريجها ناشف: أنا.. أنا مب زعلانه منك..
أحمد: والله..!!
غاليه: هيه.. ناصر أبا ماي..
ناصر: من عيوني..
وعطاها كوب ماي شربته دفعه وحده..
غاليه: أنا طيحتي هني لأني إكتشفت الي مخباي عني طول هالسنين..
ناصر: هذا أمر الله.. وماتدرين الخير وين..!!
غاليه: والنعم بالله..
أحمد: غاليه.. أنا حبيتج من كل قلبي والله يشهد على كلامي، ومب معناته إني قلت ماشي نصيب يعني إني بدون قلب ولا أحس..
غاليه: أدري والله أدري..
أحمد: وصحيح إني تركتج بس أنا مثلج قررت ما أتزوج من غيرج، قررت إني أبقى بدون زوجه.. لأني عرفت فيج كل بنات الدنيا، وصعب ألقى لج بديل..
غاليه: لا ياأحمد.. لاتحكم على نفسك هالحكم.. إنت من حقك تتزوج ومن حقك تشوف عيالك وعيال عيالك..
أحمد: بس أنـــا.......
غاليه: أحمد.... لو تحبني تزوج، وعيش حياتك وأنا بدعي لك من كل قلبي ربي يسهل لك كل خطاويك..
أحمد نزل راسه وتم ساكت ماعرف بشو يرد عليها، وهو يشوفها تضحي التضحيه الي هو ماقدر يضحي بها علشانها..
ناصر: غاليه معاها حق.. الدنيا لازم تستمر والحياة ماتوقف أبد..
غاليه: أحمد.. إوعدني إنك تتزوج وتعيش حياتك وأهم شي بنوتك تسميها علي.. غالية أحمد..
أحمد: إن شاءالله.. وسامحيني ياغاليه على كل شي.. سامحيني لو غلطت بحقج أو زعلتج بيوم..
غاليه: مسموح.. وأنا مب شايله بخاطري عليك ولازعلانه من أي شي بعد..
وقف أحمد وطلع عنهم يحس نفسه مايقدر يتحمل أكثر، راح بيته وهو يفكر في كلام غاليه، معقوله غاليه هالملاك البريء تتحمل الصدمه وتضحي علشاني وأنا ماقدرت أسعدها.. ياربي ليش حطيتني فهالموقف الصعب..!! ليش..!!

مر يومي على طلعة غاليه بالسلامه من المستشفى وأهلها وربيعاتها مافارقوها ولا لحظه، طول الوقت حد معاها.. أمها أبوها فتون مرام.. بنات عمها بنات خالتها.. العيله كلها عندها.. وعاليومين منصور يسويلهم عزيمه عالعشا وإلا الغدا ويجتمعون كلهم..
بس غاليه تغيرت من يوم ماظهرت من المستشفى، مب هي غاليه الي يعرفونها دايما سرحانه ومالها نفس لأي شي.. وإبتسامتها الحلوه الي ماتفارقها إختفت.. وحلت مكانها إبتسامه رسميه ترضي فيها الكل إلا نفسها..
اليوم الجمعه وأبوغاليه مسوي عزيمه عالعشا وعازم الكل عليها.. إخوانه وإخواته وعيالهم، وقال لغاليه إنه عنده مفاجأة لها..وقبل لايحظرون كلهم، غاليه طلعت الحديقه تغير جو شويه.. راحت لنافورة الماي ويلست عندها وهي شايله دفترها الصغير الي ماعاد يفارقها.. ويلست تشخبط فيه وتكتب كل الي بخاطرها ولاتقدر تقوله لأحد..
خلصت غاليه كتاباتها وحطت الدفتر على جنب، وفصخت نعالها وحطت ريولها فالماي.. ويلست تغني بصوت عالي وهي مب حاسه بنفسها..

فقدتك يا أعز الناس.. فقدت الحب والطيبه
وأنا من لي فهالدنيا.. سواك إن طالت الغيبه
رحلتوا من بقى وياي.. يحس بضحكتي وبكاي
وحتى الجرح في بعدك.. يغزيني وأهلي به
أنا من لي فهالدنيا.. سواك إن طالت الغيبه
غاليه كانت تغني وهي عاطيه ظهرها للباب ولاحست بالي دخل عليها ووقف يسمعها ويده على قلبه.. غاليه كانت تغني بكل إحساس وحب.. ومن سمعت الي وراها يتنحنح يبا ينبها لوجوده نقزت وطلعت من النافوره وهي تتحراه ناصر أو أي حد ثاني من العيله..
بس من إلتفتت تشوفه وقفت متصنمه في مكانها معقوله.. إنت.. غاليه إبتسمت إبتسامتها الرسميه الي ماعادت تفارقها..
غاليه: هلا والله.. منوره دبي بطلة المزيون سلطان..
سطان: شخبارج ياغاليه.. حمدلله على سلامتج..!!
غاليه: الله يسلمك من كل شر.. يعني إنت المفاجأة الي قال لي عنها أبوي..
سلطان: هو عازمنا صح بس ماظنتي إني أنا المفاجأة، أعتقد يقصد يدتي..
غاليه بفرح: هي يايه وياك..؟؟
سلطان: هيه أبوي قالي أزقر الخدامه تنزل أغراضنا، والحين بروح بدخلها..
غاليه: عمي بعد..!! خلاص روح دخلهم وأنا بنادي الخدامه وبيي وراك..
راحت غاليه داخل تزقر ليندا وشافت أمها في طريجها وقالت لها يدووه يات ونطت برع تستقبل يدتها..
أم منصور: فديـــــت هالويه ياربي.. عسى الله لايحرمني من طلتج الحلوه..
غاليه: يدووووه وحشتيني وااااااااااايد
أم منصور: حبيبتي إشحالج الحين عساج أحسن..؟؟
غاليه: الحمدلله على كل حال.. عمي بدر شخبارك..!!
وراحت تبوس عمها وتستقبله، ودخلتهم للبيت داخل ويلست معاهم وياتهم أمها وسلمت عليهم ويسلت وياهم يسولفون..
غاليه: أسمع صوت الجرس أكيد حد من البنات وصل..
راحت غاليه تفتح الباب وهي مستانسه.. بس سلطان لاحظ تغير حالتها ونفسيتها، مب هذي غاليه الي أعرفها.. البيبي الحبوبه الي كله تراكض وتناقز.. هذي حتى إبتسامتها غير وردودها علينا رسميه ومالها معنى..
رجعت غاليه ومعاها عمتها فجر وريلها وبنات خالتها شروق وشذا.. سلموا على يدتهم وعمهم ويلسوا يسولفون..
فجر: إشحالك أخويه عساك طيب ومرتاح..!!
بدر: الحمدلله بخير ونعمه.. إنتوا إشحالكم عساكم طيبين..
فجر: الحمدلله على كل حال..
غاليه: أميه وينه أبويه..؟؟
أم غاليه: موجود حبيبتي، الحين بينزل..
أم منصور: ماشاءالله شو هالبيت الحلو الغاوي، عاد أنا لاتحطون حجرتي فوق، ماروم على الدري..
أم غاليه: أفا عليج أمايه أحسن حجرة فالبيت حجرتج ومحطيينها لج تحت بدون لاتوصينا..
غاليه: يدووه كم يوم بتقعدون عندنا..؟؟
أم منصور: أنا بقعد إلين تطردوني..
فجر: عيل بتقعدين هني العمر كله..
بدر: لالا نحن مانصبر عنها.. حدها يومين بس..
أم منصور: شو يومين أنا بقعد هني شهرين ولو عيبتني اليلسه بمدد شهرين زياده..
بدر: تبطرت أمي علينا..
سلطان: أفااا وأنا منو بيقعد عندي وبيونسني فالفجيره..!!
أم منصور: تزوج وحرمتك بتسليك..
بدر: خلاص مابنرجع البلاد إلا والدبله في إيد البنيه..
فجر: ههههههههه حار أخويه..
أم غاليه: ههههههه يالله نسير غرفة الأكل ويالله الشباب على الميلس وغداكم بيوصلكم هناك..
راحوا كل في سبيله وغاليه يلست مع عمتها تسولف معاها، تحس عمتها متغيره عليهم اليوم بس مالها نفس تسألها شو الي شاغلنها..
ميعاد: غاليه بنتي رقدت بوديها حجرتج..
فجر: حطيها في غرفه قريبه بتودينها فوق وين بتسمعينها..
ميعاد: صح.. خلاص بحطها فالغرفه الصغيره الي حذالنا..
غاليه: أممممم وينها مروى للحين ماوصلت..؟؟
ميعاد: قالت بتتأخر شوي، مادري شو عندها فالبيت..
فجر: إلا تعالي صج عمر حميج يبا يخطب مروى..؟؟
ميعاد: يقول.. بس مادري أحسها مابتوافق.. أنا قلت بسألها ولو موافقه بقولهم بس مب حلوه يتقدمون رسمي ومايستوي النصيب..
غاليه: صح.. ونحن عيله وحده وممكن تصير حساسيات..
ميعاد: الله كريم.. وينها جميله للحين مايات..؟؟
غاليه: قالت لي بتوصل بعد شوي.. لأن عبدالله راح شوي عنده شغله صغيره وبيرجع..
وبعد نص ساعه الكل كانوا موجودين يتعشون ومستانسين، يضحكون ويسولفون والكل يعلق ويضحك ماعدا فجر وغاليه..
أم غاليه: فجر فديتج شو فيج..؟؟ أشوفج ساكته..!!
فجر: هااا لا بس...
غاليه: عمووه شوفيج.. شي صاير..؟؟
فجر: أممممممم هيه
غاليه: شو..!! قولي..
فجر: انا.. أنا حامل..
الكل صرخ مره وحده وإشتل المكان بالتهاني والصراخ، والصوت وصل للشباب فالميلس..
ناصر: بسم الله منو يصرخ جي..!!
أبوغاليه وقف: لايكون شي صاير..!!
علي: لا ياعمي إستريح..أكيد فجر خبرتهم..
عبدالعزيز: شو تخبرهم..؟؟
علي بإبتسامه عريضه: إنها بتصير أم وبصير أبو..
أبوغاليه: والله... مبرووك تستاهلون كل خير..
وقاموا الشباب يباركون لعلي وهو طاير من الوناسه..

بعد العشا غاليه إنسحبت من القعده وطلعت برع، صايره ماتحب الجمعات ولا السوالف والضحك، تغيرت شخصيتها وإستوت إنطوايه بشكل فظيع..
غاليه راحت الحديقه تدور مذكرتها الي نستها يوم وصلت يدتها، راحت للنافوره ولقت سلطان عاطنها ظهره ويالس، إقتربت منه وهو ماحس فيها.. ووقفت وراه وتوايج من فوق جتفه تبا تشوفه شو يسوي.. لقته ماسك مذكرتها بس مسكرنها ويعصرها بين إيديه بقوه وشكله يفكر ولا حاس الدنيا..
غاليه: إحم إحم ممكن آخذ مذكرتي..
سلطان رفع راسه وشافها ويلس يطالعها فترة وهو ساكت.. وهي حست إنه قرأ مذكراتها..
غاليه: أكيد قريت دفتري..!!
سلطان بصوت مبحوح: ليش كل هالحزن ياغاليه، الدنيا بعدها بخير..
غاليه سحبت دفترها: هههههه ادري.. وبعدين هالكلمات بس يوم أكون مضايجه.. يعني مب كل يوم..
سلطان: حتى ضحكتج من ورا خاطرج..
غاليه بدلع: ياسلااام ياطبيب علم النفس..
سلطان إبتسم لها: غاليه.. نحن إخوان، وأي شي تبينه من عيوني.
غاليه: ماتقصر ياولد عمي..
سلطان قام وراح عنها داخل يوم شاف مروى يايه صوبهم، سلم عليها بكل برود ودخل الميلس، مروى على طول راحت لغاليه الي يلست مكان سلطان ودمعتها على خدها..
مروى: حبيبي ليش تصيحين..؟؟
غاليه: أنا ما أصيح.. بس الهوا البارد دخل في عيوني..
مروى: هوا بارد..!! نحن داخلين عالصيف وإنتي تقولين لي صيف، شو شايفتني هنديه..
غاليه: هههههههههههههه لافديتج.. بس إنتي تبالغين.. وأنا غزال مافيني أي شي..
مروى الي مب مقتنعه: أوكي يالغزال.. بعديها هالمره، والحين قومي يدووه تناديج..
راحت غاليه مع بنت عمها وهي مضايجه.. ياربي كيف بجابل هالناس كل يوم، كيف بكمل كليتي وأنا بهالحاله.. الحمدلله بابا وقف لي هالكورس لأني صج مالي خلق أداوم..
رجعت غاليه لداخل البيت وهي تغصب نفسها على إبتسامتها البايخه الي ماعادت تخدع أي أحد..

في شركة أبوغاليه..

ناصر وأحمد كانوا معتفسين بالأوراق الي عندهم، يبون يخلصون شغلهم بسرعه لأنهم ماخذين باجر إجازة وبيطيرون على عوافي.. ودهم يغيرون جو بدل الشغل والملل، ومن بعد المشاكل الأخيره ناصر حب إنه يظهر أحمد من حالة الحزن الي هو فيها ويوديها عوافي يتسلون لهم يومين مع الربع والشله الي إنقطعوا عنهم من فترة طويله..
أحمد: ناصر شوف هالورقه أحسها محتاجه تدقيق من المحاسبه..
ناصر: أممممم محتاجين لمساعده.. تعرف رقم البنات فالمحاسبه؟؟
أحمد: هيه لحظة شوي..
ومسك التلفون وإتصل بالقسم، وردت عليه وفاء وقالها لو هي فاضيه أو وحده من البنات إتييهمم لمكتب ناصر محتاجينها ضروري..
ورجع يكمل الشغل مع ناصر، وبعد خمس دقايق ياتهم سلمى الي للحين بداخلها جرح من أحمد..
سلمى: السلام عليكم..
ناصر+أحمد: عليكم السلام..
ناصر: تعالي ياسلمى محتاجين مساعدتج..
أحمد بداخله ماشي غيرج يطرشونها والله للحين أحس السوالف الي من بينا ما إنتهت..
سلمى راحت ويلست وعطاها ناصر الأوراق.. سلمى يلست تدقق فالأوراق وتعطيهم تعليقاتها وهي بداخلها قلب ماوقف دق من يوم قالولها أحمد يبي وحده تساعده، ومع إنها مقرره إنها ماتتقابل معاه ولاتعطيه ويه، بس ماتدري ليش من قالوا أحمد محتاج مساعده نقزت مره وحده وراحت له..
ناصر: سلمى.. سلمى.. شو فيج..!! خلج معانا..
سلمى: هااا آسفه بس إندمجت فالأوراق..
أحمد: سلمى خذي هالورقه بعد ودققيها..
سلمى خذت الورقه ويدها ترتجف حتى ناصر إنتبه لرجفتها بس أحمد كان يعطيها الورقة وهو يطالع ورقه ثانية..
سلمى: أممممم في أوراق ثانيه..؟؟
ناصر: شكلج مستعيله..!!
سلمى: لا بس قلت باخذهم مكتبي وبدققهم على راحتي..
أحمد بإستهزاء: وهني ماتاخذين راحتج..!!
سلمى اقهرت منه: مب قصدي بس......
ناصر: على راحتج ياسلمى، بس تخلصين الأوراق قبل نهاية الدوام، لأنا باجر إجازة وبعدين ويك إند..
سلمى: إن شاءالله.. كلها ساعتين والأوراق بتكون عندكم..
أحمد: ساعتين مب يومين.. أدريبج لج سوابق فالتأخير..
سلمى وقفت وهي مقهوره ومنجرحه من أحمد، بس ماردت عليه وناصر عطاه نظره وخلاه يسكت..
ناصر: السموحه ياسلمى.. تفضلي على مكتبج.
راحت سلمى وهي ماسكه دمعتها بالقوه، ومن سكرت الباب ناصر مسك أحمد من جتفه..
ناصر: حرام عليك البنيه شو سوت لك..؟؟
أحمد: مادري.. بس أحس من أشوفها لازم أعق عليها رمسه..
ناصر: بس مبين عليها تعزك وايد..
أحمد مستغرب: تعزني منو قالك..!!
ناصر: يا أحمد بدون لاحد يقولي.. كلامها حركاتها، ولاحظت وهي تاخذ لأوراق منك يدها كانت ترجف.. ياخي يكفي إنها متحمله كلامك الي مثل السم..
أحمد: هذا الي قاصر بعد ترد علي..وبعدين هي من النوع الهادي الي مستحيل يرد على حد..
ناصر: ههههههههههه والله إنك ماتعرفها.. لسانها أطول عنها، ومره ندى قالت لي إنها مابقى حد ماهزبته..
أحمد: سلمى..!! معقووووله..!!!!!!
ناصر: هيه سلمى.. وإشمعنى إنت الي ساكته عنك مادري..
أحمد سكت ويلس يطالع الدريشه وهو يفكر.. معقوله سلمى تحبني وأنا مب حاس فيها، بس هي تشتغل هني من قبل لا أحب غاليه ليش ماحسيت فيها..
ناصر: حووووووووه بسك لاتفكر وايد.. فكر بعدين خلنا نخلص شغلنا..
وبعد ساعه دخلت عليهم ندى وهي شايله الأوراق الي خلصتهم سلمى..
ناصر: ووينها سلمى..؟؟
ندى: ياسلاام وندى ماتنفع..!!
ناصر: ندى على الراس من فوق.. بس نحن عطينا الأوراق لسلمى..
ندى: أمممممم سلمى مادري شو الي مضايج فيها، وحليله مراجع واقف يسألها ردت عليه وهو مسكين ماسمعها ويوم سألها مره ثانيه صرخت فيه..
ناصر: ههههه والله بنخسر عملاؤنا بسببها..
أحمد: سلمى وايد هاديه كيف جي تسوي..
ندى وهي مستغربه: سلمى.. هههههههههههههه والله لو قلت لي إبليس أهدا منها بصدقك بس سلمى مستحييييييييل..
ناصر: ههههههههه الله ياخذ عدوج.. بس هي وااايد هاديه مع أحمد، لدرجة إنه مايصدق عليها هالكلام..
ندى بنظره خبيثه: الله أعلم بالنفوس..
أحمد: شو قصدج..؟؟
ندى: أممممممم ولا شي.. يالله تامروني بشي ثاني..
ناصر: سلامة راسج..
ندى: باي..
ندى طلعت وأحمد سرحان وحاير ومب عارف شو يسوي..
ناصر: لاتفكر وايد، قوم ورا ندى شوف شو الي تبا تقوله..
أحمد كأنه ينتظر حد يقوله قم، نقز وراح ورا ندى ومسكها قبل لاتوصل للمكتب..
ندى: هههههههههه
أحمد: ليش تضحكين..؟؟
ندى: السالفه مايبيلها إثنين يفتون فيها، الي فداخلك صح..
أحمد: يعني سلمى..................
ندى: هيه سلمى تحبك ومن زمان مب من اليوم ولا أمس..
أحمد: وإنتي شو دراج..!! إحساس..؟؟
ندى: لا مب إحساس.. هي بلسانها إعترفت لي فاليوم الي صرخت فيه عليها.. وخليتها تستأذن في نص الدوام وتروح البيت..
أحمد: هيه تذكرت هذاك اليوم..
ندى: لو إنت تبادلها أو بديت تميل لها.. ترى هي طيبه وتستاهل كل خير..
أحمد سكت شوي وبعدين شكرها وراح عنها رجع لناصر وهو سرحان حتى باجي الشغل خلصه ناصر بروحه..

نرجع لغاليه الي يالسه في الصاله مع يدتها وعمها بدر، كانوا يالسين ينتظرون منصور يرجع من الشركه علشان يتغدون مع بعض..
أم منصور: منصور متى بيرجع والله يوعانه..
بدر: أمييه قلنا لج تغدي قلتي لا بنتظر ولدي..
أم منصور: هيه بنتظره، عيل أخلي ولدي يوعان وأنا هي أتغدا أشبع..
غاليه: خلاص يدووه كلها ربع ساعه وإن شاءالله بيكون هني..
دخلت عليهم أم غاليه: عمووه أحط لج الغدا، إنتي راعية سكر وضغط مب زين ماتاكلين..
ام منصور: لالا توني كليت مع غاليه بسكوت وكيك..
بدر: هههههههههه الله والأكل..
غاليه: أميه إنتي حطي الغدا وأبويه الحين بيوصل..
بدر: وينه سلطان تأخر..!!
غاليه: راح مع سعيد وخليفه..
أم منصور: سعوود وخلووف هالسبلان وينهم، من ييت ماشفتهم غير اول يوم..
أم غاليه: وإنتي بتصيدينهم.. هالإثنين رايحين فيها حتى اهلهم مايشوفونهم..
ام منصور: غاليه تعرفين أرقامهم..؟؟
غاليه: لا.. بس بدق على مروى وباخذ رقم خليفه..
راحت غاليه تتصل لمروى وتاخذ عنها الرقم، ويوم رجعت لقت أبوها واصل ويسلم على أمه.. راحت وسلمت عليه وعطت يدتها التلفون بعد مادقت على خليفه..
أم منصور: السلام عليكم..
خليفه: وعليكم السلام.. نعم الوالده آمريني..
أم منصور: الوالده.. لا الغالي انا داقه اتعرف.. ممكن..؟؟
الكل إنفجر من الضحك على أم منصور الي تعرف تلعبها صح، وأولهم خليفه الي مات على روحه من الضحك..
خليفه: هههههه ماظنتي خلصوا غراشيب دبي وحولت على العيايز..
أم منصور: أنا صج كبيره بالسن بس مب عيوز.. وعندي بيزات ومستعده أعيشك بنعيم..
خليفه: لو على البيزات الحمدلله ماعلي قصور..
أم منصور: زيادة الخير خيرين..
خليفه: هههههههه لاحووول شو هالبلوه اليوم..
أم منصور: انا بلوه يالخام..
خليفه: يدوووووووووووووووه
أم منصور: ماعليه أنا تقولي عيوز وبلوه.. هاااااا
خليفه: فديتج يدووه سامحيني ماعرفتج..
أم منصور: الحين أباك إتييني..
خليفه: ماطلبتي من عيوني.. كلها عشر دقايق وأنا عندج..
بندت أم منصور وشافت الكل ميت من الضحك على سوالفها..
أبو غاليه: والله أميه إختربتي.. تعرفين بعد فالمغازل..
أم منصور: أفا عليك إنت بس.. بس زين ولدكم طلع ريال ولا ركض ورا الفلوس..
غاليه: خليفه ماتهمه البيزات..
بدر: الله يخليه لكم إن شاءالله.. وعسى سلطان معاه..؟؟
أم منصور: هيه سمعت صوته يوم يكلم سعيد..
أم غاليه: يالله قوموا تغدوا..
وتغدوا الجماعه مع بعض وبعدها يلسوا يشربون الشاي وسمعوا أصوات الشباب برع.. غاليه لبست شيلتها ويلست بعيد عن يدتها لأنها تعرف خلوف زين بيقعد يتلزق بيدته وبيلزق فيها..
دخل أول شي سلطان ووراه سعيد وخليفه منخش وراهم..
سلطان: السلام عليكم..
الكل: وعليكم السلام..
أم منصور: وينه مسود الويه خلوووف..!!
سلطان: يدووه طلبتج..
أم منصور: أبدااا لاتتوسط له.. وينه أقولك ظهره لي..
سعيد: ماشي فايده لازم ينداس في بطنك..
وطلع خليفه من وراهم وهو ماسك سعيد يحتمي فيه..
خليفه: يدووه فديتج سامحيني.. بسويلج الي تبينه، بوديج كل مكان.. بستوي لج دريول بس الله يخليج إلا عصاتج..
أم منصور: دام بتصير لي دريول خلاص بسامحك..
خليفه: والله..؟!!
وكان بيروح يعفد على يدته ويبوسها بس سلطان مسكه..
سلطان: صبر صبر.. يدوه اول شي عطيه الأمان.. أعرفج فجأة تخونين..
أم منصور: مااااااالت عليكم.. عليكم الأمان.. والله لو مامعزة المرحومه كنت براويك شغل الله..
خليفه راح ليدته بسرعه ويلس يبوسها ويحظنها والكل يضحك عليه..
أم منصور: خووز عني بسني من الحباب..
خليفه وهو يبوس يدها: كم يدووه عندي وغاليه علي .. بس وحده..
أبوغاليه: ياللواااات..
سلطان: هههههههههههههه خالتي ماشي قهوه..
أم غاليه: بلى فديتك فيه قهوه..
وعطته الفنيال: ماشاءالله عليك تشرب قهوه، عيال اليوم مامنهم فايده ودروها القهوه..
غاليه: قولي ماعرفناها علشان نودرها..
أبوغاليه: أنا إسمحولي بسير برقد شوي، العصر وراي شغل..
أم منصور: سير فديتك ربي يحفظك.. خلوف عطني دلة القهوه أشوفك..
خليفه: يدووه إنتي من كم يوم هني، ليش ماتيين بيتنا تغيرين جو..
أم منصور: والله ركبي تعورني مافيني أغير المكان كل شوي..
سعيد: مابتغيرين البيت يدوه.. من بينهم يدار واحد وحتى في باب فالحديقه..
أم منصور: والله..؟؟
خليفه: هيه يدووه.. بيتنا وبيت عمي متلاصقين.. بس بيت عمي بوجاسم شوي بعيد..
أم منصور: خلاص عيل اليوم بالليل بسير عندكم..
غاليه: نعم نعم.. شو هالصرقه عيني عينك.. تسرقون يدتي من بينا وجدام عيني بعد..
خليفه: إنتي جب جب.. مب يدتج بروحج..
أم منصور: خلووف ويعه لاتسكت بنت عمك هالشكل..
سعيد: هاااي دلوعه ماعليج منها.. موقفه هالكورس من الجامعه وباركه لي فالبيت.. أمحق تعب الي فيج..
غاليه: مايخصك فيني كيفي..
أم منصور: سعوود مايخصك في بنت عمك، إسكت يالله..
غاليه: أنا بسير برقد.. ويدوه بسير معاج فالليل بيت عمي..
أم منصور: إن شاءالله فديتج..

طلعت عنهم غاليه ويلست في غرفتها، هي مافيها رقاد بس مالها نفس تقعد معاهم وسلطان نظراته كلها شفقه عليها وهذا الشي واااايد يزعجها..
على المغرب غاليه نزلت تحت ومالقت حد بالصاله غير أمها..
غاليه: عيل الدنيا فاضيه.. وينهم الشعب..
أم غاليه: يدتج راحت المطبخ مادري شو تبا تييب.. وأبوج راح الشركه، وعمج بدر طلع مع عمج بوحميد..
غاليه: وسلطان وينه..؟؟
أم غاليه: راح مع أبوج الشركه يقول تعب من اليلسه فالبيت..
غاليه: أميه كنت أبا أسألج.. جاسم متى عرسه..؟؟
أم غاليه: الأسبوع الياي.. بس مابيسوون عرس.. حفله بسيطه بس..
غاليه: وليييش.. الواحد كم مره بيعرس..!!
أم غاليه: خالتج تقول هذي رغبة العروس.. ماتبي عرس..
غاليه: فتون أم الكشخه والخقه ماتبي حفله.. غريييييييييبه..!!
أم غاليه: أنا بسير المطبخ أخاف يدتج تظارب الخدامات وإطفشهن عني مافيني أيب غيرهن تعودت عليهن..
غاليه راحت ورا أمها المطبخ وسحبت يدتها وخلتها تتجهز لأنهم بيروحون بيت عمها.. بعد نص ساعه كانوا في بيت بوحميد يسولفون، بس غاليه ماطولت معاهم إستأذنت وطلعت عنهم، راحت بيتها وخذت مفتاح سيارتها وطلعت فيها..
غاليه من ظهرت من المستشفى وهي حابسه نفسها فالبيت ماتبي تظهر ولا تبي تجابل حد.. واليوم حست بنفسها لو ماظهرت بيستوي فيها.. فقامت وراحت تتمشى عالبحر.. الجو كان هادي وحلو.. وقفت بسيارتها عالبحر وهي مشغله سي دي أغاني وتسمعه وهي سرحانه فالبحر..

[color=#FF0000]إوعدني عني ماتغيب.. تبقى هنا جنبي قريب..
محتاج أنا مثلك حبيب.. يفهم عيوني وضحكتي..
فيك إنت حلمي من زمان.. وإنت الهوا وأدفا حنان..
تلقى معاك روحي الأمان.. ياأغلى بشر في دنيتي..[/color

غاليه بندت السياره ونزلت تقعد عالبحر، لقت لها كرسي ويلست عليه وهي مب حاسه بالي حواليها، كانت يالسه وهي تشكي للبحر حزنها وضيجها.. كانت تبا تفر همومها عالبحر بس كانت تحس البحر مليان هموم ومشاكل..
ليش يادنيا ماترحمين.. ليش تعطي باليمين وتاخذين بالشمال، عطيتيني أحسن أب وأم.. عطيتيني البيزات والبيت وكل شي، بس حرمتيني من أغلى شي فالدنيا.. حرمتيني من الصحه.. ليش ياربي ليش، إستغفر الله انا شو يالسه أقول.. هذا حكم الله وقدره، وأنا لازم أصبر على الي الله كاتبه..
(( الســــلام عليــــكم ))
حست بصوت حد يسلم عليها وكأنه ياي من بعيــــــــــد، الصوت هزها وصحاها من أفكارها وهمومها.. إلتفتت وشافت الريال الي سلم واقف ويبتسم لها.. إبتسمت له بالرغم من دمعتها الي على خدها..
غاليه: وعليكم السلام.. أستاذ خالد!! شو تسوي هني..؟؟
خالد: مب إتفقنا على خالد بس..
غاليه: آسفه.. خالد، شو تسوي هني..؟؟
خالد: هذا مكاني كل يوم أقعد هني هالوقت.. بس اليوم شفت غزال سرحان محتل مكاني..
غاليه: هههههههه عيل إسمحلي اليوم سويت إحتلال على منطقتك..
خالد: المكان وصاحبه تحت أمرج.. كم غاليه عندنا.
غاليه: الله يخليك.. تعال إقعد ولا تبيني أروح وإنت تقعد بروحك..
خالد يلس عالطرف الثاني: لالا أبدا خليج مرتاحه، ولو تبين أنا الي بمشي..
غاليه: لا بالعكس.. خذ راحتك..!!
سكتت غاليه ورجعت تتطالع البحر.. وخالد يلس يطالعها ولاحظ الحزن الي تارس قلبها ومبين على ويها.. كسرت خاطره، كل هالجمال والعز وتغزيها كل هالهموم والمشاكل..
خالد: غاليه..
غاليه رسمت إبتسامتها الرسميه: نعم..!!
خالد انصدم منها: معقوله ياغاليه.. ليش جي..!!
غاليه مستغربه: شو..!!
خالد: كل شي فيج تغير.. ضحكتج.. كلامج.. أسلوبج.. برائتج..!!
غاليه: أنا مثل ماأنا ماتغيرت..!!
خالد: غاليه الي عرفتها من سنتين مب هي غاليه الي يالسه جدامي.. غاليه منصور ضحكتها تنسمع من آخر الدنيا، كشختها ومرحها وسوالفها تحبب الكل فيها.. والحين ماشوف غير شبح إبتسامه بالغصب تظهر على ويها..
غاليه وهي تتنهد: شو تباني أسوي، وإنت شايفني جدامك بدون مستقبل ولا أحلام.. كل أحلامي ماتت جدامي وأنا واقفه أتفرج عليها.. كل شي ضاع وأنا.. وأنا ضعت..!!
خالد: لا ياغاليه.. الدنيا ماتوقف عند تحطم الأحلام.. الدنيا تستمر وتمشي، ونحن عايشين في إمتحان من رب العالمين والي يخسر فالإمتحان يخسر دنيته وآخرته..
غاليه بخصه في حلجها: خالد إفهمني.. أنا مهما درست وتعلمت وإشتغلت وشغلت أكبر المناصب فالبلاد بظل.. بظل وحده مريضه اليوم أو باجر بتموت..
خالد: بسم الله عليج من طاري الموت.. غاليه (( إعمل لدنياك كأنك تعيش أبدااا.. وإعمل لآخرتك كأنك تموت غداا..))
غاليه: مافهمت..!!
خالد: يعني كلنا بنموت فيوم من الأيام صح.. المريض وغير المريض، أنا يدي مريض من هو توه شباب، يعني من كان أبوي بعده فالعشرين.. تخيلي الحين يدي مريض من أكثر من ثلاثين سنه.. وسبحان الله للحين عايش..
غاليه: سبحان الله..
خالد: الي أبي أقوله لج.. الإنسان مايعيش لنفسه بس، يعيش للي معاه أكثر من نفسه.. أبوج كل يوم يكلمني ودمعته على خده، يقولي غاليه يالسه تموت جدامي وأنا مب قادر أسويلها شي..
غاليه: حرام.. بس أنا أسولف معاهم وأضحك علشان ما أحسسهم بشي..
خالد: إنتي بس تسولفين وتضحكين لكن شوفي نفسج، إوقفي جدام المنظره لو دقيقه وسألي نفسج هل انا غاليه الأوليه..؟؟ شوفي لبسج.. شوفي مكياجج.. شوفي ضحكتج الي ماتت..
غاليه نزلت راسها وشوي وبتصيح..
خالد: وأهم من هذا كله.. شوفي كلامج، بالأول بابا وماما.. والحين أميه وأبويه، أبوج واااااايد مضايج من هالكلمه، يقولي تحسسني كأني السبب فالي قاعد يصير لها.. علشان جي غيرت معاملتها معانا..
غاليه: فديت أبويه والله مب قصدي أزعله.. بس أنا........
خالد: إنتي فكرتي في أبوج وكيف بترضينه، وطلعتي من المستشفى وبديتي تتكلمين وتسولفين معاهم بس... بس بدون نفس بدون روح..
غاليه مسحت دمعتها: خلاص ياخالد.. إوعدك إني أعيش مثل قبل وأحسن بعد.. وأسعد أبويه وأميه..
خالد: إن شاءالله يارب.. وأنا كل يوم أقعد هني لو تبين تقولين لي أي شي وتحكيلي أنا مستعد أسمعج..
قامت غاليه وودعته وراحت لسيارتها، ركبت السياره وراحت على طول على البيت وهي تبا تغير أشياء وايد بحياتها، تبا تسعد الغير.. تبا تعيش أحلى سنين عمرها ولو كانت الأخيره..
دخلت البيت وماشافت حد فيلست تدورهم..
غاليه: بـــابــــــــا... مــــامـــــــــا وينكم..!!
طلع لها أبوها من غرفة الأكل وهو مصدوم من الي يسمعه..
أبوغاليه: أنا هني بابا تعالي..
غاليه راحت له وحظنته: فديـــــــتك إشتقت لك مووووت..
أبوغاليه: فديت روحج وانا بعد إشتقت لج..
غاليه: ووينها فاطمه المنصوري، أكيد يالسه تاكل ولا تترياني..
أم غاليه: هههههههههههههه تعالي هني ياأم لسانين..
وراحت غاليه وباست أمها وحظنتها بقووو
أم غاليه: هههههههه بسج ذبحتيني..
أبوغاليه: يلسي فديتج تعشي معانا..
غاليه: أممممممممم أوكي بس بشرط..
أبوغاليه: عيوني لج.. إنتي آمريني بس..
غاليه وهي تيلس على ريول أبوها: أبا أقعد على ريول بابا وماما تعشيني مثل ماكنتوا تسوون وأنا صغيره..
أبوغاليه: هههههههه ولو إنج بتكسرين ريولي.. بس يالله كل شي علشانج يهون.. تعالي يافاطمه أكلي هالدلوعه..
أم غاليه: ههههههههههههه والله هالبنيه ماتكبر أبد..
ويلسوا يتعشون وهم يضحكون ومستانسين للتغير الي بدا على غاليه، وإن شاءالله كل حياتها تكون ضحك وفرح..

وتم بحمدالله البارت الثامن عشر..

وأنتظر ردودكم الغاليه على قلبي..

ومره ثانيه السمــــــوحه عالقصور..

وفإنتظار آراؤكم الحلوه وتعليقاتكم وأفكاركم

(غرشوب البدو) __DEFINE_LIKE_SHARE__

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
قلبي يحبك وانت تدري بذلك’ عندك خبر انه يحبك ويهواك ~ new ; ฬđήч Łқ	~ Ƙяạzyo❥	عدسة الاعضاء , كاميرا الاعضاء	7	03-26-2010 10:38 PM
من كثر ماأحبك يقولون مسحور ..!!	محروم.كوم	منتدى أخبار المواقع والمنتديات العربية والأجنبية	0	12-24-2009 12:30 AM
من كثر ماأحبك يقولون مسحور ..!!	محروم.كوم	منتدى أخبار المواقع والمنتديات العربية والأجنبية	0	12-24-2009 12:20 AM
من يحبك.....	دلوعة باباتي	شعر و خواطر	14	03-17-2009 01:37 AM
لا تطلب من احد ان يحبك بل اجعله يحبك	شواقي العين	الإستراحه العامة	12	04-05-2008 08:40 PM