من يحبك كثر ماأحبك أنا.. - الصفحة 18

Grshoob Albdoo · #1 08-27-2008, 10:57 PM

اليوم الأربعاء وغاليه قايمه من الصبح كالعاده تتمشى فالبيت وتسولف مع يدتها وتشرب معاها الشاي..
غاليه: أميه وين الشباب محد منهم قعد..!!
أم منصور: لا فديتج بعدهم، بس سلطان قام وراح الدوام وبيرجع الظهر.. وناصر وأحمد يمكن بعد شوي بيقومون..
غاليه يلست تفرفر بالتلفزيون وهي ملانه، الجو فالفجيره حلو بس المشكله محد يساعدها هني.. البنات مايقومون غير الظهر، ولايرضون يظهرون من البيت إلا المغرب.. يعني اليوم يضيع بدون فايده، والحين أحمد وصل بس للحين راقد.. وانا الي إفتكرته بيقوم من الفير علشان يشوفني..
ما لحقت هالفكره تطري على بالها إلا وسمعوا صوت أحمد..
أحمد: إحم إحم,, ممكن أدخل..!!!!
أم منصور: حياك تفضل.. البيت بيتك..
دخل أحمد وباس أم منصور على راسها ويلس يتريق معاهم، وعينه على غاليه الي كانت لابسه بدله كويتيه ورديه تبرز خدودها الورديه.. أحمد كان بخاطره يسولف معاها وياخذ راحته، بس يدته مال أول يعني أكيد مابيعيبها..
غاليه: أحمد للحين راقد..؟؟
أحمد: هيه.. أظن مارقد إلا الفير.. أنا خليته ورقدت أذكره كان يالس يرمس بالتلفون..
أم منصور: هالولد شاقي عمره بالتلفون هذا.. ليل نهار على إذنه..
غاليه: خليه يطفي شوقه..
أحمد: هههههههه يدووه عندكم مزرعه هني..؟؟
أم منصور: هيه الغالي عندنا.. لو تبا غاليه بتوديك لها..
أحمد تشقق: عاد غاليه أكيد مب فاضية لي..
أم منصور: وهي شو وراها من تقوم الصبح تكون ملانه، كل البنات راقدات ومايقومون معاها..
غاليه: أنا عادي بوديك.. بس ناصر راقد منو بيروح ويانا..!!
أحمد: ليش أنا باكلج.. كلها ساعه بنسير نطالع المزرعه ونرجع..
أم منصور: أسميج دلوعه.. سيري مع الولد والمزرعه كلها عمال يعني أمان..
غاليه الي استانست: خلاص بلبس عباتي وبرجع لكم..
أحمد: وأنا بغير ثيابي وبرجع لكم..
راحت غاليه تلبس عباتها وتتعدل زياده، ولمن رجعت الصاله شافت واحد عاطنها ظهره.. كان لابس جينز أسود وقميص أخضر، غاليه استغربت منو هذا الي يكلم يدتها..
غاليه: السلام عليكم..
والتفت لها الريال ومن شافته غاليه نقعت من الضحك..
غاليه: أحمد والله ماعرفتك..!!
أحمد: ليش مب حلو..؟؟
غاليه وهي تتطالعه عدل: لا بالعكس.. بس أول مره أشوفك جي..
أحمد: خلاص لانضيع الوقت خلنا نروح..
غاليه: يالله يدووه تبين شي..؟؟
أم منصور: لا فديتج.. ديروا بالكم على الطريج ولاتتأخرون هناك..
أحمد: إن شاءالله..
طلع أحمد ووراه غاليه الي كانت مستحيه، أول مره تمشي مع أحمد بروحهم.. مشوا بين كم بيت من بيوت فريجهم.. وهم ساكتين ولاتكلموا حتى ربع كلمه..
وجريب المزرعه أحمد نطق ومبين من صوته إنه مرتبك..
أحمد: أي طريج ناخذ.. يمين أو يسار..
غاليه: يسار.. وعلى طول المزرعه في ويهنا..
أحمد: ههههههههههههههه
غاليه: ليش تضحك..؟؟
أحمد وهو يفتح باب المزرعه لها: أول مره نظهر بروحنا ومب لاقيين رمسه نقولها..
غاليه: هههههههههه دايما نقول متى نقعد مع بعض.. والحين مب قادرين نرمس كلمتين على بعضهم..
أحمد: ماشاءالله المزرعه واااايد عوده..
غاليه: هيه.. عمي بدر وايد يحبها ويراعيها بعيونه..
تمشوا أحمدوغاليه فالمزرعه وهم يسولفون ويضحكون ومب مصدقين عمارهم إنهم يتكلمون فيس تو فيس لساعات بدون إزعاج..
غاليه: تعال بوديك مكان واايد حلوووو
وراحوا عند الجلسه الشعبيه الي مسونها عمها بدر.. ويلسوا تحتها وأحمد يتأملها بكل إعجاب..
غاليه: هاااا شو رايك..؟؟
أحمد: الله يهداج الحين هذا مكان حلو.. قولي حلو شوي عليه، مكان رومانسي وشاعري..
غاليه: كيف يعني..؟؟
أحمد: المكان جدا شاعري، ياخذك لعالم غير.. يحسسك بالحب الي تارس قلبك للغير..
غاليه: بس بس ماروووم عالحب هذا كله..
أحمد: ههههههههههه بعدني ماقلت شي..
غاليه: أنا ماتحمل الحب.. بروحي رومانسيه..
أحمد: غاليه.. اشتقتيلي..؟؟
غاليه وهي منزله راسها: واااااايد..
أحمد: ومحد عوضج بغيابي..
غاليه: أبداااااااا
أحمد: ولا حتى الي أحلى عني..!!
غاليه فهمت عليه: لو قصدك سلطان، صدقني جماله هذا ماهز فيني ولا شعره..

أحمد: يعني تعترفين بقوة وسامته..
غاليه: هههههههه أقولك البنات متخبلات عليه.. مايرقدن الليل إلا لمن يشوفونه..
أحمد: وإنتي..؟؟ ماحرك فيج شي..!!
غاليه: أممممممم ما أنكر إني أعجبت بشكله بسسسسس
أحمد بغيره واضحه: لهالدرجه شكله عايبنج..؟؟
غاليه: هههههههههه وايد أحب غيرتك.. صدقني شكله بس عيبني، بس لاشخصيته ولا أسلوبه جذبوني..
أحمد: ليش..؟؟
غاليه: واحد امبين عليه إنه مابقت بنيه مارابعها، ولابقت علاقه ماجربها، مستحيل يجذب غاليه المنصوري.. وأنا حسيت عليه يباني تحدي.. يبا يثبت لتفسه إنه يقدر ياخذ الي يبيه..
أحمد سكت عند كلامها هذا، كبرت فعينه أكثر.. فعلا بنيه تستاهل كل تقدير.. ربي يحفظها لي يارب..
وقطع عليهم لحظة الصمت صوت سلطان من ورا أحمد..
سلطان: السلام عليكم..
غاليه+أحمد: وعليكم السلام..
سلطان: عسى ماقطعت عليكم شي..؟؟
غاليه: أبدااا حياك تفضل..
سلطان: إنتوا الي تفضلوا عالبيت.. الساعه صارت 12 ونص، ويدووه تدور عليج..
أحمد: والله ماحسينا بالوقت..!!
غاليه: ثلاث ساعات فالمزرعه..؟؟ والله الوقت مر بسرعه..!!
سلطان: العاده ساعه وحده وتتعبين.. بس الظاهر اليوم الوقت مع أحمد نساج الدنيا..
أحمد انحرج وانقهر منه.. بس غاليه عصبت وكانت بترد عليه، بس هو عطاهم ظهره وراح للبيت..
طول اليوم وسلطان يتحاشاهم، من رجع البيت تغدا بروحه وراح يرقد للعصر وبعدها راح كليته وبالليل ظهر عند ربعه ولارجع إلا الساعه3 الفير بعد ما رقد الكل..
سلطان وايد حز في خاطره رمسة غاليه الي سمعها، يعني معقوله أكون لهالدرجه طايح من عينها.. كل الي أبينه لها من حب وموده تجازيني إنها تقول عني مغازلجي ومابقت علاقه ماجربتها..
وهالأحمد من وين ظهر لي بعد.. وكل هالحب الي من بينهم محد حس فيه.. وخلوهم يظهرون مع بعض.. آآآآخ يالقهر، يوم دق قلبي لبنيه تظهر مرتبطه وتكرهني بعد..
لكن لا.. والله ماكون سلطان إن ماخليتج تحبيني ياغاليه.. والله لاأخليج تحلفين براسي وتتمنين حبي وقربي..
أحمد كان صاحي يوم دخل سلطان بس ماحسسه بشي وهو يدري بشعوره تجاه غاليه فما حب إنه يحتك فيه.. فقرر إنه يتحاشاه إلين يرجعون دبي بالسلامه..

باليوم الثاني أحمد وناصر قاموا من وقت وطلعوا يتمشون فالجو الهادي، الجو كان مغيم والهوا خفيف وزخات مطر تطيح عليهم..
ناصر: لازم أدق لغاليه أوعيها، تحب المطر..
مسك موبايله ودق لغاليه يصحيها.. بس ماردت عليه ورجع يدق مره ثانيه وبعد ماردت عليه..
أحمد: يمكن راقده.. خلها بتقوم بروحها..
ناصر: يمكن.. تعرف شو بخاطري.. كورن فليكس..
أحمد: هههههههههه الي يسمعك يقول صعب تلاقي هالأكله..
ناصر: لا بس يدوه ماتاكل هالأكل، وسلطان يايب بس لغاليه وهي الطماعه ماتخلي حد ياكل منه..
أحمد انقهر: أهااا عيل البنات شو ياكلن..؟؟
ناصر: لا البنات مايقومون الصبح..
أحمد: أمممممم قوم نوصل الجمعيه ونشتري منه، وإنت تاكل من الي في البيت واليديد لغاليه..
ناصر: أوكي..
وراحوا الشباب للجمعيه ورجعوا ولقوا غاليه بالصاله بروحها..
ناصر: ليش ماتردين عالموبايل..؟؟
غاليه: كنت أسبح وظهرت من الغرفه بدون لا أشيك عليه..
أحمد: صباح الخير غاليه منصور..
غاليه: صباح النور والسرور.. تعالوا تريقوا..
أحمد: يبت لج كورن فليكس..
غاليه: بس الي هني بعده في شي..!!
أحمد: لا هذاك ناصر خاطره فيه.. إنتي كلي من هذا.. نصوور سير ييب الجديم وكل منه..
قام ناصر وسار المطبخ وأحمد قعد يطالع غاليه وبخاطره شي..
غاليه: شو هالنظرات..؟؟
أحمد: عيل سلطان هو الي ياب لج الكورن فليكس..؟؟
غاليه: يدوه قالت له إييب لي منه..
أحمد بعصبيه: وأنا الحين يبت لج واحد يديد.. ولو شفتج تاخذين منه شي بزوالج..
غاليه بدلع: وأهون عليك..!!
أحمد يلس يطالعها شوي ولف راسه بعيد عنها ونفخ الهوا الي بصدره بقوه..
أحمد: ما أقدر على دلعج هذا..
غاليه: ههههههههههه لاتحاتي باجي اليوم وباجر والسبت بنروح تحمل شوي..
أحمد: من عيـــوني..
غاليه بهمس: فديــــــت عيـــــونك..
أحمد: ما أسمعج إرفعي حسج شوي..
غاليه رفعت صوتها شوي: أكرهــــــــك.. هههههههههههههه
أحمد: ههههههههههههه والله إنج نذله.. المهم لو شو ماصار سلطان لاتظهرين وياه أبداااااااااا
غاليه: حااااااااااظر سيدي..
أحمد: أقولج فاتج المطر اليوم.. أنا وناصر نتمشى والمطر على روسنا خفيف خفيف..
غاليه: الله.. الجو الرومانسي الي تمنيت إني أمشي فيه أنا وحبيبي..
أحمد: إحم.. نظهر الحين.
غاليه خذت صحن الكورن فليكس وقامت: قلت حبيبي..
أحمد: وين سايره..؟؟
غاليه: أحقق أمنيتي..
وغمزت له بعينها وراحت، وهو قعد يطالعها شوي وهي تمشي وبعدين استوعب السالفه وأخذ صحن البلاليط وراح وراها..
شافها واقفه تحت المطر في حوش البيت وهي حافيه.. وتتطالع فوق والمطر يطيح في عينها.. راح ووقف وراها..

قالت يازين المطر.. قال المطر جيتها
لين السحب حاصرتها من هناك وهنا..

قلت لسنا الشمس علمني لامريتها
أبغي أشوف السنا لامنه عانق سماه..

خلتني البارحه وأنا ماخليتها..
غنيت لحن المفارق والهجر والعنا..

للحين وأنا ضلوعي بيتها بيتها
ماغيرته السنين وماتغيرت أنا..

غاليه التفتت عليه وهو يغني وراها وابتعدت عنه لأنها كانت وايد قريبه منه..
غاليه: وايد روووعه صوتك..
أحمد: مب أحلى عنج.. تعالي نتمشى..
غاليه: هههههه تحت المطر..
بس مالحقوا يخطوا خطوتين إلا وناصر وراهم..
ناصر: وين سرتوا يالس أدوركم..
غاليه: ناصر مطر.. تعالي إمشي ويانا..
ناصر: ههههههههههههه أنا مشيت وخلصت.. وإنت احمدوو ما شبعت من المطر.. يالله تعال براويك السي ديات الي اشتريتهم..
وراح ناصر وأحمد وقف يطالع غاليه..
أحمد: والحين بينسحب الأمير.. وبيخلي أميرته بروحها..
غاليه: والأميره بتنتظر الموعد القادم..
أحمد: هههههههههههه إدخلي داخل لاتبردين إنتي حافيه.. غاليتي ترقص حافية القدمين.. ترقص ترقص..ههههههههه..
غاليه: هههههههههه
أحمد: بشوفج داخل..
ودخل وهي وقفت ثواني زياده تتأمل المطر، ويوم حبت تدخل شافت سلطان داخل البيت وهو يتأملها.. ومشى بكل هدوء ووصل لها وهو يطالعها بعيونه الي فيها جاذبية الدنيا كلها..
سلطان: أول مره أشوف الي أحلى من المطر النازل.. خدج الي يتلقى المطر أحلى من المطر..
غاليه بكبرياء: لو سمحت كلامه ماااصخ وأنا ما أسمح لك تتجاوز حدودك معاي لأي سبب..
سلطان: حتى لو كان الحب هو السبب..
غاليه تصنمت في مكانها: أي حب..؟؟
سلطان: حبي لج.. غاليه أنا أحبـــج..
غاليه وقفت تتطالعه وهي منصدمه من إعترافه.. أكثر عن دقيقه وهي واقفه، وعقبها عطته ظهرها ومشت عنه وسارت داخل..
ومالقت حد فالصاله غير يدتها وسارت لها وطاحت في حظنها..
أم منصور: بسم الله عليج غاليه.. شو فيج..؟!!
غاليه: من زمان ما حظنوني بابا وماما..
أم منصور: ههههههههه وايد مدلعينج أهلج.. فديتج يالغاليه..
دخل سلطان ولقى غاليه في حظن يدته واستانس إنه قدر يأثر عليها..
سلطان: شو هالحب.. شو هالحنان.. عطوني شويه..
ودخلوا ناصر وأحمد واستغربوا من غاليه وحركتها..
ناصر: شو عندها دلوعة العيله..
غاليه: يدوه بسير حجرتي تبين شي..؟؟
أم منصور: سلامتج يالغاليه..
أحمد: خير شو صاير وياها..؟؟
أم منصور: مادريبها ياتني وطاحت علي تقولي مشتاقه لحظن أمي وأبوي..
ناصر: هههههههه غاليه أكبر دلوووووعه..
أحمد: يمكن اشتاقت لأبوها اعرفها وايد تحبه..
دخل أحمد غرفتهم ويلس على السرير يفكر.. يعني كانت من بينهم لحظه حلوه وهي واايد استانست على صوته وسوالفهم تحت المطر.. وفجأة تدخل البيت تدور على حظن أبوها..!!! شي مايدخل العقل..!! شو الي صار لها من تركتها..؟؟!!!!!!!
ورجع يفكر ويفكر وما لقى لأسئلته جواب.. وقرر يواجه غاليه، بس مالحق يسوي شي لأن ناصر وسلطان دخلوا عليه وهم مقررين يروحون كورنيش خورفكان..
ناصر: اليوم الخميس وأحلى كورنيش يكون هناك..
أحمد: بروحنا..؟؟
سلطان: لا البنات معانا..
أحمد: أهااا
ناصر: ليش متردد..؟؟
أحمد: لا بس عندي صداع.. عندكم بندول...؟؟
سلطان: أكيييييد..
ناصر: خلاص نحن بنظهر وإنت ييب البندول وإلحقنا..
أحمد: أنا ببدل كندورتي.. أبا ألبس السوده..
ناصر: عجيب عجيب اليوم على منو ناوي..؟؟
أحمد: ههههههههه لا تخاف نيتي بريئه..
ناصر: مزيون بوظبي ونيه بريئه.. no way
أحمد: ههههههه يالله طوف جدامي..
وظهروا من الغرفه بعد مابدل أحمد كندورته، وشافوا البنات فالصاله يالسين وحس بغاليه مضايجه.. شوي ووصل سلطان وعطى أحمد الحبوب..
غاليه بخوف: شو هذا..؟؟
أحمد: بندول راسي يعورني..
غاليه صرخت: لاتشربه..
الكل استغرب من غاليه وصرختها، بس هي تداركت الموضوع..
غاليه: لا بس قصدي عندي أحسن من البندول.. تعال المطبخ..
وراح وراها أحمد وهو مستغرب فخذت عنه الحبوب وفرتها فالزباله وعطته غيرها وهي تحكيله عن شروق والي سمعته..
أحمد: مب معقوله..!! وكيف ماخبرتوا أي أحد..؟؟
غاليه: مادري بس خفت عليك يوم شفته يعطيك الحبوب..
أحمد: وأنا ماقلت لج ماتظهرين وياه..!!
غاليه: لمن تأكدت إنك ويانا وافقت..
أحمد: فديتج والله..
غاليه: خلاص خلنا نروح..
أحمد: بس ماقتيلي ليش الضيج الي أشوفه بعينج..؟؟
غاليه: مافي شي.. الله يخليك سكر عالموضوع..
وطلعت بسرعه وهو وراها وشافوا الكل ينتظرهم وراحوا بسرعه للسياره..
وفالسياره الشباب يسولفون بروحهم والبنات ساكتات يسمعون سوالفهم، وغاليه تتطالع أحمد طول الوقت وتتحاشى النظر لسلطان.. سلطان شغل المسجله وكان محطي أغنية الجسمي..

بلغ حبيبك وقله باخذك منه..
هذا هو الحل ومالي أي حل ثاني..
ماأقدر أصبر وأشوفك بس وأستنى..
كل يوم عنك بعيد يزود جناني..

غاليه حست إنها المقصوده بس معقوله حس بالعلاقه بينها وبين أحمد..!! ياربي شو هالمصيبه أنا شو الي يفكني منه.. أخاف يفضحني هالنذل..
تمشوا الجماعه عالكورنيش لنص الليل وماودهم يرجعون من حلاة الجو.. المهم يوم رجعوا البيت لقوا مفاجأة تنتظرهم.. مفاجأة وااايد كبيره..

وسموحه (غرشوب البدو ) __DEFINE_LIKE_SHARE__

%كشخة% · 08-27-2008, 10:56 PM

مشكوررررررررررررر والله ...

ربي يعطيك الف الف الف عافية ...

نتريا الباجي *_^ __DEFINE_LIKE_SHARE__

NaBth al.RoO7 · 08-28-2008, 12:46 AM

شو المفاجاة ؟؟!
بليز كملووها ..

صراحه البارت حلووو ..
وعيبتني غالية و مواقفها ويا احمد و سلطاان .. و الله يعينها ع اللي يايها ..

نترياا البارت الياي ..؟! بليز لا تاخرونها .. __DEFINE_LIKE_SHARE__

Roo7 wlhana · 08-28-2008, 05:40 AM

كملهااااااا بلييييييز خيووو

والصراحة القصة كستريييييييييم __DEFINE_LIKE_SHARE__

Grshoob Albdoo · 08-28-2008, 03:40 PM

الدنيا ليل والجو مظلم في بيت أم منصور العود.. فالصاله كل البنات يالسات على أعصابهن، والشباب مب موجودين..
بعد ماطلعوا من البيت عالكورنيش بحوالي ساعه، بدر طالح عليهم ونقلوه عالمستشفى ولمن ارجعوا وصلهم الخبر فراحوا الشباب وبقوا البنات ينتظرون أي خبر يوصلهم عن عمهم..
وعلى الساعه وحده ونص اتصل ناصر لمروى وطمنهم إنه عمه بخير.. تطمنوا البنات شوي وراحوا لغرفهم يرتاحون، بس غاليه بقت فالصاله تنتظر أي حد يرجع لها.. بعد ساعه تقريبا وصلوا الشباب وشافوا غاليه راقده بالصاله..
ناصر: غاليه.. غاليه قومي سيري داخل ارقدي..
غاليه: عمي شخباره..؟؟
أحمد: لاتحاتين.. هو بخير والحمدلله.. ياته غيبوبة سكر، الظاهر كان مهمل الدوا..
غاليه: الله يقومه بالسلامه..
ناصر: يالله قومي سيري داخل..
غاليه: إن شاءالله..
قامت غاليه وسارت غرفتها وهي بعدها متوتره من أشياء وايده، أولها سلطان الي خايفه منه وايد.. وعمها المريض الي مب عارفه شو تسوي له.. وأحمد الي لايمكن تتركه لو شو ماصار..
باليوم الثاني.. الكل راح المستشفى يتطمنون على عمهم.. الي قام بالسلامه الحمدلله وكان يالس ويضحك وياهم، وغاليه يالسه على سريره وتأكله..

غاليه: الحين لازم تخلص هالأكل كله، ومن اليوم ليومين زياده محد غيري بيأكك..
بدر: ههههههههه حاظر ياأمي..
غاليه: هيه جي أباك شطوووور..
أم منصور: ههههههههه
ناصر: غاليه اليوم عيل ماشي طلعه..!!
غاليه: لالالالا إنتوا روحوا أنا بقعد هني مع عميه فديته..
أحمد: عيل بيفوتج.. نبا نسير المنتجع الي في دبا..
غاليه: والله..!! أممممم لالا عمي أولى منه..
بدر: هههههه لاحبيبتي سيري معاهم، وأنا بقعد هني..
غاليه: والله مب سايره.. ماتنفع الروحه بدون قمرنا بدر..
أم منصور: ههههههه مينونه هالبنيه..
أحمد: صج مابتروحين..؟؟
غاليه: هيه.. مالي نفس..
مروى: عيل نحن بعد مب رايحين.. بنيلس فالبيت أحسن لنا..
شروق: ولو إنه يمدحونه هالمنتجع بس برايه.. لأنه بدون غاليه ماينفع..
غاليه: فديتكم والله.. عيل خلاص اليوم بنتغدا فالمزرعه..
أم منصور: يوم أقولكم مينونه محد صدقني..
غاليه: يدووووه.. ماشي مجال للنقاش اليوم يعني اليوم غدانا فالمزرعه.. والحين عميه إشرب هالشوربه الحلوه..

على الساعه 2 ونص الظهر الكل كان فالمزرعه يالسين وينتظرون الغدا.. أم منصور والشباب يالسين على جهة والبنات منعزلات بروحهن..
مروى: ليش ماعزمنا نسايب المستقبل..!!
شذا: منو..؟؟
مروى: يعني منو غير زايد، وإلا شو رايج شروق..
شروق بحيا: أسميج ماصخه.. بس جب أشوفج..
ناصر الي سمعهم: شروق.. دقي لميثه خليها تيينا هني، وتييب زايد وياها بالمره، خل نتعرف عليه..
شروق الي قامت من مكانها: أنا بسير للأرانب أحسن لي, قسما بالله إنكم ماصخين..
غاليه: ههههههههه ونحن شو قلنا.. نبا نتعرف عالأوادم..
شروق: سيروا بيتهم تعرفوا..
وراحت عنهم شروق بعيد عند الأرانب ويلست بكل ضيج الدنيا تنافخ.. هو شو مايحس بكل بساطه يبيني آخذ غيره، بكل سهوله يقولي سيري تزوجي.. لازم يوم عنده ست الحسن نجود اكيد مرتاح في بعادي.. اوووف لو يرجع بالزمن لورا كنت بتملكك للأبد ياناصر..
وفي عز ماهي سرحانه سمعت صوت حركه من وراها وخافت، قامت نقزت ولزقت بسور الأرانب.. وشافت في ويها سلطان الي كان واقف يطالعها..
سلطان بكل هدوء: سوري خوفتج..!!
شروق: لا بس كنت سرحانه.. حطوا الغدا..؟؟
سلطانه: هيه..
شروق: أوكي بسير بشوفهم..
بس سلطان وقف في ويها وماخلاها تروح..
سلطان: شروق... إنتي ليش خايفه مني..؟؟
شروق وهي مرتبكه: وليش أخاف..!! إنت ولد عمي وعادي..
سلطان وهو يتقرب منها: بس كلما شفتيني نقزتي.. ليش أنا شكلي يخوف..؟؟
شروق: بالعكس إنت إنسان وسيم ومستحيل حد يخاف منك..
سلطان ابتسم بغرور: أدري.. وأدري بعد أي بنيه أتمناها لازم أوصل لها لو كانت بنت منو..
شروق: الله يهنيك.. والحين اسمحلي أنا بروح لهم..
سلطان: شروق.. أبا منج خدمه..
شروق: نعم..
سلطان: أنــا أحب وحده وأباج تساعديني أوصل لها..
شروق: والله..!! منــو..؟؟
سلطان وهو يركز عينه فعينها: غـــاليه..
شروق شهقت بقوه وردت واسكتت، غاليه.. معقوله هالمجرم يبا غاليه.. والله لا أذبحه قبل لاياخذها..
شروق: اشمعنى غاليه..؟؟
سلطان: قلبي دق لها دون عن الكل..
شروق: والمطلوب..؟؟
سلطان: تبينين لها حبي.. وإني بسوي المستحيل علشانها، وأباج تقولين لها سلطان الي يبيه بيحصله ولو على جثته.. ولو ماصار الي أبيه والله مابيصير خير.. وإنت فاهمه معناة كلامي عدل..
شروق هني ماقدرت تتحمل وقامت تركض بسرعه عنه وهي قلبها خلاص طايح من الخوف، المجرم يهدد.. تاجر المخدرات الخسيس النذل يبي غاليه ويهددهم بعد..
وصلت شروق للبنات وهي ميته خوف وراحت وسحبت غاليه من مكانها وراحوا بعيد عن الكل..
غاليه: بسم الله شو صاير.. ؟!!
شروق حكت لها السالفه وهي تصيح ومب قادره تمسك نفسها..
غاليه: الحيوان.. شو يتحراني بضاعه عنده وإلا من ممتلكات أهله الخاصه، والله ماكون بنت منصور لو ما أدبته..
شروق: غاليه لاتتهورين إنتي نسيتي إنه تاجر مخدرات وممكن يسوي فيج أي شي..
غاليه: يخسي النذل الي مب مرباي..
ناصر من وراهم: منو الي مب مرباي..؟؟
غاليه وشروق اسكتوا وناصر اقترب منهم..
ناصر: شو السالفه..؟؟ وليش شروق خايفه..؟؟ ومنو الي بتأدبينه..!!
غاليه: مايخصك بالسالفه.. وبليز لاتتدخل..
ناصر عصب: إنتوا هني فحمايتي.. يعني أتدخل في كل شي.. يالله أشوف خبروني شو السالفه..
غاليه مالقت حل غير إنها تخبره بكل شي من الي سمعته شروق قبل يومين إلين سالفته الحين وهو يهدد..
ناصر: نحن وين عايشين في نيويورك.. أقصاها الفجيره، أي تجار مخدرات وأي خرابيط..؟؟
شروق: لاتتحرانا يهال.. أنا بإذني سمعته، وهو يقول البضاعه وحقك ومادري شو..
ناصر: سلطــــان... مستحيــــل.. وبعدين هو شو يبا بغاليه..؟؟
شروق: يعني شو يبا.. يا حب أو زواج..
ناصر: أنا بكلمه..
غاليه: أخاف يعصب ويكبر الموضوع..
ناصر: عيل شو تبوني أسوي.. ألم قشارنا ونشرد على دبي.. نحن رياييل ولازم نتفاهم.. شو فوضه الدنيا يهدد بنات عمه..
راح ناصر وهو معزم ينهي السالفه مع سلطان قبل الليل.. تغدوا الجماعه ويلسوا للعصر وبعدها إرجعوا على البيت العود..
غاليه والبنات ماحبوا يروحون مكان وقرروا يرقدون شوي.. وغاليه وشروق مالهم سيره غير عن الي بيصير والمشكله الي ممكن تكبر من بينهم..
على المغرب ناصر شاف سلطان يدخن سيجاره بالحوش فراح له ويلس معاه، بس مانطق ولا بكلمه..
سلطان: خاطري أسافر.. صار لي أكثر عن سنه ماظهرت من الفجيره..
ناصر: شكلك وايد مشغول.. حتى دبي أو بوظبي ماتوصلهم..!!
سلطان: تعرف مشاغل الحياة وايد..
ناصر: والتجاره والبضايع ماخذه كل وقتك..
سلطان استغرب: ياريال أنا وين والتجاره وين..راس مالي مزرعة أبوي..
ناصر: سلطان نحن رياييل ونفهم بعض.. خلنا نتكلم بصراحه..
سلطان فر السيجاره: خير ياناصر شو عندك..؟؟
ناصر خبره بالي سمعوه البنات وعن الشكوك الي بداخلهم.. ناصر يحكي وسلطان مبين عليه الصدمه واول ماخلص ناصر السالفه سلطان انفجر يضحك بصوت تردد صداه بكل مكان..
سلطان: وأنا أقول بلاها شروق كل ماشافتني قامت تتنافض.. هههههههههههههههه والله إنهم يهاااالوو
ناصر: شو السالفه وليش تضحك..؟!!!!
سلطان: الله يسلمك أنا كنت أكلم ربيعي عن بروجيكت التخرج، وهو مسافر برع الدوله وكنت اوصيه على شغلات أحتاجها من هناك، وأهم شي تكون أشياء حلوه ومحد عنده مثلها، عسب أقدر أسوي أحلى بروجكت.. والظاهر البنات إلتبس عليهم الأمر..
ناصر: يمكن. والله مادري شو أقولك بس أنا بعد شكيت بالسالفه وقلت مستحيل سلطان يسوي جي..
سلطان: ههههههههه والله عليهم سوالف..
ناصر: هذا وخلصنا منه.. ممكن أعرف شو تبي من غاليه..

سلطان انصدم وانحرج وتلون ويهه، معقوله خبروه عن هالسالفه بعد..
سلطان: البنيه وايد عايبتني وأنــا.......
ناصر: سلطان لاتكمل.. أعرف إنك تحبا، بس غاليه ماتصلحلك..
سلطان فار دمه: وليش عاد، أنا شو ناقصني عسب ما تصلحلي..
ناصر: سلطان إهدا.. غاليه ماتصلح لأي حد مب بس إنت.. بنت عمي مريضه بالقلب ولاتقدر تتزوج ولاتييب عيال..
سلطان وكأنه حد صب عليه ماي بارد، يلس ساكت وهو يطالع ناصر.. كان بين المصدوم والي مب مصدق.. معقوووووله غاليه مريضه ولاأقدر أتزوجها..!! كيف..؟؟ ليش..؟؟
ناصر: أدري الخبر وايد قوي عليك.. بس هذي الحقيقه..
ناصر تنهد ورجع يكمل..
ناصر: غاليه كلنا حبيناها وتمنيناها.. بس مانقدر نحرمها من الحياة.. كفايه إنها عايشه من بينا..
سلطان أخيرا نطق: وهي تعرف هالشي..؟؟
ناصر: لا... وأتمنى ماتقولها شي..
سلطن وقف وعطى ناصر ظهره..
ناصر: على وين..؟؟
سلطان: الله يخليك حاب إني أقعد بروحي..
ناصر خلاه يروح بدون لايوقفه وهو حاسس بالي داخله، قبل سنين مر ناصر بنفس الموقف.. حب بكل قلبه وعواطفه.. بس هالحب انجلع من قلبه مثل طلعة الروح.. وهالإحساس يعذب.. وهو يعرف شعور سلطان بهاللحظه، فخلاه بروحه يتقبل الصدمه ويبلعها..

رجع ناصر داخل ولقى الكل يالس.. وأم منصور حاشرتنهم..
أم منصور: اليوم الساعه عشر محد يقرب من التلفزيون سمعتوني..
شذا: هيه البرايم اليوم لازم ماتبين أي إزعاج..
أحمد: ههههههههههه والله صج إتابعينه يدوه..
أم منصور: هيه أتابعه.. وأشجع هالحليو أحمد الكويتي..
مروى: عيايز آخر زمن..
أم منصور: عيز حيلج يالدبه..
ناصر: ههههههه عاد مراوي مالج شغل بيدوه، إن شاءالله أحمد يكون الأول...
أم منصور: هيه فديتك صوت له..
ناصر: هههههههه حاظرين من العين..
أحمد: وينه سلطان..؟؟
ناصر: مادري قال بيظهر شوي وبيرد..
مر باجي اليوم بكل هدوء وسلام.. وسلطان تحاشى يجابل غاليه، بس آخر الليل كانت ظاهره من المطبخ سايره لغرفتها وشافته في الصاله منزل راسه وشكله مهموم..
غاليه خافت منه.. بشو يالس يفكر.. والله شكلي بذبحه وبفتك منه..
سلطان رفع راسه وشافها ويلس يتأملها.. هو نظراته كانت حزن على شفقه.. على حب، بس الليت كان خفيف وهي فسرت نظراته تحدي وغرور.. والله ماكون غاليه إن ماراويتك نجوم الليل بعز الظهر..
غاليه: تصبح على خير..
سلطان مارد عليها.. وخلاها تمر من جدامه وتسير لغرفتها.. واول ماسكرت الباب تنهد بكل قوه وغصب نزلت دمعه حااااره من عينه حرقت له ويهه..
سلطان: تصبحين على ألف خير، ياحبي الي مات قبل لاينولد.. __DEFINE_LIKE_SHARE__

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
قلبي يحبك وانت تدري بذلك’ عندك خبر انه يحبك ويهواك ~ new ; ฬđήч Łқ	~ Ƙяạzyo❥	عدسة الاعضاء , كاميرا الاعضاء	7	03-26-2010 10:38 PM
من كثر ماأحبك يقولون مسحور ..!!	محروم.كوم	منتدى أخبار المواقع والمنتديات العربية والأجنبية	0	12-24-2009 12:30 AM
من كثر ماأحبك يقولون مسحور ..!!	محروم.كوم	منتدى أخبار المواقع والمنتديات العربية والأجنبية	0	12-24-2009 12:20 AM
من يحبك.....	دلوعة باباتي	شعر و خواطر	14	03-17-2009 01:37 AM
لا تطلب من احد ان يحبك بل اجعله يحبك	شواقي العين	الإستراحه العامة	12	04-05-2008 08:40 PM