من يحبك كثر ماأحبك أنا.. - الصفحة 17

Grshoob Albdoo · #1 08-27-2008, 04:45 PM

على الساعه سبع ونص غاليه راحت لأمها المطبخ وهي لابسه البدله الكويتيه العنابيه وفاتحه شعرها وشكلها كان واااايد حلووو..
أم غاليه: غلوووي سيري البسي شيله لايدخلون عيال عمج..
غاليه: ماما محد فالبيت.. أنا أباج تسكرين لي السحاب..
أم غاليه وهي تسكره لها: ووينهن بنات عمج..؟؟
غاليه: كل وحده مشغوله.. ماما أنا يوعانه مابنتعشى قبل لانسير فوق..
أم غاليه: يدوتج تقول خلي البنات يطلعون عالسطح يستانسون، وإنتوا ودولهم العشا فوق..
غاليه: أوكـــي.. خلاص أنا بسير بخلص عدول وباخذ البنات وبنسير فوق..
وفهاللحظه سمعوا صوت سلطان محتشر.. غاليه انخشت ورا الطاوله وأمها غطت عليها..
سلطان: الله ياخذ شركم.. السلام عليج عموووه
أم غاليه: هلا بسلطان.. بلاك حاشر البقعه..
سلطان: هاذولا عيال دبي خقاااااقين يقولون لي سلاحك تعبان، عيل ليش ماتييبون سلاحكم وياكم لو إنتوا يويله..
أم غاليه: إنت طحت بسعيد وخليفه، هاذولا ميانين..
سلطان: خلاص عمووه أنا بسير أتزهب تبين شي..
ام غاليه: سلامتك يالغالي..
راح سلطان وقامت غاليه من مكانها وهي تحمد ربها إنه ماشافها وهي ماتدري إنه شافها وزادته خبال..
راحت غاليه الغرفه ويلست تحطي على ويها شوية مكياج، والبنات يتعدلون ويتكشخون.. وغاليه سرحانه في كلام سلطان لها اليوم الصبح.. وتذكرت أحمد واشتاقت له.. ياربي بخاطري أشوفه أو أكلمه.. حرام والله بخاطري..
شروق: غلوووووووي وين سرحانه..
غاليه: لاسرحانه ولا شي.. شو عندج تصارخين..؟؟؟؟
شروق: أي شيله بتلبسين؟؟ لأني أبا شيلتج البيج مع الذهبي..
غاليه: أوكي خذيها أنا بلبس العنابيه..
خلصوا البنات لبس وطلعوا على السطح.. وخذولهم زاويه وحطوا الكراسي فيها ويلسوا عليها.. وماشاءالله كانوا بنات الجيران عن اليمين وعن الشمال.. والشباب تحت عند بيت بن ضاحي الي كان مجابل بيت يدتهم..
غاليه: اشكثرهن هالبنات.. والله وناسه.. حظهم يقعدون فوق ويشوفون اليوله..
شروق: هههههههه حلوه حياتهم هني..
غاليه: خلونا نتعرف عليهم..
مروى: لاتفضحينا غلوي خلج ساكته..
غاليه: أوين فضيحه عادي.. بنتعرف على بنات مب شباب..

وعلى السطح الثاني البنات كانوا يالسات..
ميثه: نواري شوفي البنيه الي هناك مثل القمر.. ياربي اشحلاتها..
نوره: ميثوه شكلهم مب من هني.. يمكن يايين زياره..!!
ميثه: هيه صح.. أمي تقول أم منصور يايينها عيالها من دبي..
غاليه الي سمعت رمستهم: قلت لكم خلونا نسلم عليهم.. السلام عليكم جيرانا..
ميثه: وعليكم السلام.. اشحالكم عرب زايد..
غاليه: ربي يخليج ويبجيج.. إنتوا اشحالكم عساكم بخير..
ميثه: الحمدلله بخير.. إنتوا من دبي صح..؟؟
غاليه: هيه.. الشيخه ماعرفتينا على نفسج..!!
ميثه: أنا إسمي ميثه وهاي أختي نوره..
نوره: مرحبا الغاليه..
غاليه: مرحبتين الشيخه.. عساج بخير..
نوره: بخير وعافيه الحمدلله..
غاليه: وأنا غاليه المنصوري.. وهاذولا شروق وشذا بنات خالتي، وهاي مروى بنت عمي..
مروى: مرحبا ملايين بأهل الفجيره..
نوره: ربي يخليكم إن شاءالله.. وإن شاءالله تعيبكم اليوله..
مروى: أخوي خليفه مشارك وياهم.. وسعيد ولد عمنا بعد..
ميثه: الله يوفجهم إن شاءالله..
وبدت اليوله وصخوا البنات فوق يطالعونهم.. كانوا الشباب اول شي منقسمين لحزبين متجابلين.. وبدت الأغنيه الأولى الي الكل يال عليها.. والجو كان ربشه ولا أرووووع..

جيتك على الموعد ولاجيت... وش عن لقانا مانعنك...
كنك عن الموعد تخليت.. ياويل يالي عاشقنك..وماشاءالله عليهم كل واحد من الشباب كان أحلى عن الثاني.. وسعيد وخليفه مميزين لأنهم يداد في المجموعه.. بس الي صج بارز من بينهم هو سلطان ماشاءالله عليه.. سلطان يحب الكنادير الملونه الي تبرز هيبته.. ولابس اليوم كندوره كركميه وسفره حمرا.. وكان شكله رووووعه..
والكل مرتبشين وإيولون.. وكل واحد يستعرض مهاراته وحركاته اليديده الي متعلمنها.. وسعيد وخليفه يسوون حركات مشتركه مع بعض ويتخققون بحركاتهم عسب يخبلون فالبنات..
ويوم خلصت الأغنيه يلسوا شوي يرتاحون ويتعشون.. ووصل عشا البنات الي قاموا ياكلون..
غاليه: ميثه نوره حياكن ويانا عالعشا..
ميثه: مشكوره حبيبتي متعشيين..
شروق: أوكي لاتاكلون بس تعالوا اقعدوا جريب منا..
نوره: إن شاءالله.. بس كيف بنظهر من البيت وتحت كله شباب..
غاليه: وليش تظهرون اشقحن من السطح..
ميثه: هههههههههه غاليه إنتي مينونه ممكن نطيح..
غاليه: تعالي من هني.. السطح مشترك وعادي..
ميثه: أممممم بدق لامي وبسألها..
دقت ميثه لأمها الي وافقت وبدوا المغامره لسطح الجيران.. وغاليه وشروق وقفوا لهم يساعدونهم..
ميثه: والله لو طحنا ياغاليه ياويلج منا...
غاليه: هههههههه لا أنا بمسكج..
والحمدلله وصلن البنات بالسلامه وتعرفوا على أم غاليه وأم عبدالله.. ويلسوا يسولفون ويتعشون معاهم..
غاليه: منو توها تقول متعشيه وشبعانه.. هههههههههه
ميثه: يالزطيه.. باكل غصبن عليج..
ام غاليه: غاليه عيب.. خلي البنات ياكلن..
مروى: كلوا بسرعه لايبدون اليوله..
وخلصوا البنات أكلهم ورجعوا يقعدون عالكراسي ويسولفون ويضحكون، وماشاءالله عليها ميثه واااايد حبوبه وتحب السوالف على عكس نوره الهاديه الي ماينسمع لها صوت..
مروى: شوفوا هناك الي لابسين كنادير سود.. الطويل أخوي خليفه والأقصر شوي سعيد ولد عمنا..
ميثه: ماشاءالله عليه سعيد جمييييييييل..
مروى: هااا ميثووه عينج على ولد عمنا..
ميثه: ياليت ياخذني دبي وأغير عيشتي..
غاليه: هههههههههههههه ماله داعي خلج هني أبرك لج..
ميثه: أفاااا وأنا تحريتج بتقولين باخذج لأخوي..
غاليه: بسم الله علي.. لا أبد ماطرالي أبتلي فيج.. وبعدين حبيبتي أنا وحيده أهلي لا أخو ولا أخت..
ميثه: حظج مب نحن من كثرنا مب قادرين نتذكر أسامي بعض..
شذا: هههههههههه ماشاءالله عليكم..
غاليه: يالله اسكتوا إبتدت المنافسه..
شذا: ياسلام سعيد أول واحد..
ابتدت اليوله والكل مرتبش بدوها بسعيد الي يال بكل حماس والكل تخبل عليه وعلى يولته.. وبعد يالوا ثلاثه ومن بعدهم وصل دور سلطان الي ابتكر لهم احلى وأغرب الحركات.. وخليفه كان من بعد سلطان بإثنينه.. وبعد ماشاءالله عليه يال بكل حلاوه بس آخر شي طاح عنه سلاحه..
شروق: حرااااااااام طاح سلاحه..
مروى: حليله خرب على نفسه.. الله يعينا مايحطي حرته علينا ويردنا البيت اليوم بالليل..
غاليه: ههههههههههه
ميثه: لا عادي.. بيكمل المسابقه، شو تتحرون برنامج الميدان شو..
غاليه: عيل كيف يقررون الفايز..؟؟
نوره: الحكام يشوفون احسن واحد ويتوجونه الفايز..
شروق: الله يوفجهم كلهم..
وعلى الساعه عشر ونص خلصوا كلوا اليويله وبدا الحكام يتشاورون عسب يختارون منو هو فارس الميدان..
غاليه: مايندرى منو هو فارس الفجيره فاليوله...!!!!
مروى: هههههههههههههه
ميثه: لاتتطنزين فديت شبابنا ماشي مثلهم..
وبعد نص ساعه من المشاورات طلعت النتيجه والكل على أعصابه.. الكل ينتظر الفايز. الكل متحمس..
والفايز هووو...
((سلطان))

سلطان هو الفايز للسنه الثالثه على التوالي، الكل استانس له وباركوا له، ماشاءالله عليهم عندهم روح رياضيه..
غاليه: حليلهم عيال عمامي مافازوا..
شذا: مره ثانيه إن شاءالله..
ميثه: إنتوا إلين متى بتقعدون هني..؟؟
غاليه: بابا والشباب ماخذين إجازه الأربعاء والخميس وطبعا الويك إند الجمعه والسبت، يمكن عالسبت بالليل نحن مروحين على دبي..
ميثه: خلاص عيل غداكم باجر عندنا..
شروق: مشكوره حبيبتي بس ماله داعي..
نوره: أفا عليكم إنتوا ضيوفنا، والحين صرنا ربع ولازم نكرمكم..
غاليه: لايرد الكريم إلا اللئيم.. خلاص موافقين.. نحن بس وإلا أهلنا كلهم..؟؟
ميثه: الكل طبعا.. حياكم على الراس والعين..

***********____________***********

باليوم الثاني الكل قام من صباح الله خير وبالذات البنات الي خافن من ضرب يدتهم لهم.. وغاليه هي الوحيده الي ماقامت..
أم منصور: عيل وينها غاليه البارحه من صباح الله نشت..!!
شروق بخبث: يمكن يبالها ضربة خيزران مثلنا أمس..
مروى: قومي لها يدووه..
أبوغاليه: يالشريرات مالكن شغل في بنتي أنا بسير بوعيها..
راح منصور لبنته الي كانت متكوره على نفسها ومب قادره تتحرك وتإن تحت اللحاف..
أبوغاليه: بسم الله عليج حبيبتي شو صار فيج.. يعورج شي.. غاليه بابا ردي علي..
غاليه: بابا خاصرتي تعورني.. آآآآآي والله بموووت..
أبوغاليه فز من مكانه وركض لأخوه بدر..
أبوغاليه: بدر شغل السياره غاليه تعبانه..
البنات كلهم قاموا يشوفونها شوفيها والشباب يالسين ينتظرونها.. بعد خمس دقايق طلعت غاليه مع امها وأبوها وعمها بدر للمستشفى.. المستشفى كان شوي بعيد عن البيت.. وغاليه تزيد آلامها وبدت تصارخ وهي بحظن أمها..
بدر: إستحملي شوي ياغاليه خلاص وصلنا..
وصلوا المستشفى ونقلوها على غرفة المعاينه، والدكتوره هناك فحصتها وسوت لها تحاليل سريعه..
الدكتوره: إنت أبوها..؟؟
أبوغاليه: هيه.. دكتوره بنتي شو فيها..؟؟
الدكتوره: بنتك فيها الدوده الزايده ولازم نستأصلها حالا وإلا بتنفجر..
أبوغاليه: الزايده.. خلاص بحولها على دبي..
الدكتوره: حالتها ماتتحمل لازم نسويلها العمليه وإلا ممكن تموت..
أبوغاليه استسلم للأمر ووقع عالعمليه.. ويلس مع حرمته ينتظرون تخلص العمليه.. واتصل بوغاليه بأهله وخبرهم بالي صار..
أم منصور: فديتها بنيتي، بدر قوم ودني عندهم..
بدر: أمي وين بتسيرين أول ماتقوم بالسلامه إن شاءالله بوديج لها..
ناصر: خلاص أنا والشباب بنسير عندهم..
أم منصور: عيل لازم كلنا نروح حرام نخليها بروحها..
بدر: خلاص عيل بنسير وياكم.. بس البنات يقعدن هني..
وراحوا الجماعه كلهم وبقوا شروق وشذا ومروى وميعاد..
شروق: تعلوا نسينا نعتذر من ميثووه ونواري..
ميعاد: خلاص سيري لهم وخبريهم..
شروق: يالله مروى نروح..
مروى: لالا أنا خايفه على غاليه ومابي أروح بيلس أنتظر أي خبر..
شذا: لاتتطالعيني أنا ما أحب أدخل بيوت ماعرفها..
شروق: مااالت محد يعتمد عليكم..
ولبست عبايتها وشيلتها وسارت لبيت جيرانهم.. ودقت الباب ووقفت تنتظر.. بس محد فتح فرجعت ادق الجرس مره ثانيه.. ووقفت.. ووقفت.. ووقفت.. وبعد دقايق انفتح الباب فجأة وطلع واحد طويل وهي من الخوف ردت على ورا..

زايد: السموحه ماكنت أعرف إنج ورا الباب.. الجرس خربان..
شروق وهي مستحيه: ميثه هني..!!
زايد: هيه.. حياج تفضلي..
شروق: لا مشكور بنتظرها هني..
زايد التفت على ورا وهو يصارخ: ميثاني.. ميثاااااااني وريل..
ميثه: آآآآآآمين يارب إييني ريل وأفتك منك..
زايد: مادري منو الي يبيج.. تعالي في وحده تبيج عند الباب..
وصلت ميثه: شرووووق هلا وغلا حياج..
زايد سار داخل عنهم..
شروق: لاحبيبتي مب داخله..
ميثه: أنا قلت غاليه أول وحده بتوصل عالغدا لأنها مفجوعه، بس إنتي ييتي والغدا بعده ماسويناه..
شروق: أنا يايه أعتذر لأنا مابنقدر نتغدا عندكم..
ميثه: ليش عسى المانع خير..؟؟
شروق: غاليه فالمستشفى، طلعت عندها الدوده الزايده والحين فالعمليات..
ميثه: فدييييييييييتها... حرااااااام، ماتشوف شر إن شاءالله..
شروق: الشر ماييج يالغاليه.. والحين اسمحيلي بسير بنتظر أي خبر عنها..
ميثه: أوكي.. بس طمنيني عليها..
راحت شروق لبيتهم ودخلت ميثه البيت ولقت زايد وهو يالس فالحوش..
ميثه: بسم الله يني حضرتك..
زايد: لا عفريت.. هه هه هه
ميثه: ياربي على ثقل دمك.. خوز عني بسير لنواري..
زايد: انزين اصبري، أممممممم منو هالبنيه..
ميثه: هاي بنت من دبي أهلهم هني ويايه تزورهم..
زايد: منو بنته..
ميثه: أففففف تعرف أم منصور.. مادري شو تقرب لها..
زايد: أهاااا
ميثه: خلصت تحقيقك يالله بروح لنواري..
راحت ميثوه لنواري تخبرها بالي صار وزايد ظهر من البيت وهو يفكر في شروق..

نرجع للمستشفى.. أبوغاليه واقف يدعي لبنته وهو خايف عليها، وأم غاليه تقرا قرآن بكل هدوء..
دخلوا عليهم الشباب وراحوا لهم..
ناصر: عمي بشر عسى خير..
أبوغاليه: مادري بعده محد طمني بشي..
بدر: إن شاءالله خير يارب..
أبوحميد: منصور خبرتهم عن قلبها..
أبوغاليه: هيه قلت لهم.. يارب تقومها لي بالسلامه..
أم منصور: إن شاءالله بتقوم بالسلامه ياولدي لاتحاتيها..
أم غاليه: الله يسمع منج ياعموووه..
يلسوا الجماعه ينتظرون أي خبر يوصلهم عن غاليه..
وطلع لهم الدكتور بعد أكثر من ساعه وهو مبتسم..
الدكتور: تطمن يا أخ منصور، بنتك بصحه وسلامه والعمليه نجحت.. حمدلله على سلامتها..
أبوغاليه من خلص الدكتور كلامه.. خر على الأرض وسجد سجدة شكر لله.. وإخوانه إرفعوه وهم يتحمدون له بسلامة بنته..

بعد ساعه من طلعت غاليه من غرفة العمليات الكل كان يالس وياها ومحاوطنها بالمستشفى..
غاليه: ماما.. أبا مـــاي..
أم غاليه: إن شاءالله حبيبتي..
ناصر: غاليه.. شو سالفة هالدوده..؟؟
غاليه بتعب: شو دراني شكلي أكلت دوده خايسه..
ناصر: ههههههههههههههه
غاليه: سلطان.. مبرووك الفوز تستاهل كل خير..
سلطان: الله يخليج يابنت عمي.. المهم قومتج بالسلامه..
غاليه: بابا..
أبوغاليه: أدري الي بتقولينه.. متى بظهر..
غاليه: ههههههه فاهمني..
أبوغاليه: حبيبي هاي عمليه يعني اصبري يومين..
غاليه: بصبر بس بشرط..
أبوغاليه: عيوني لج..
غاليه: نقعد فالفجيره بعد يومين عسب أعوض عن هاليومين الي بقضيهم فالمستشفى..
أم غاليه: لهالدرجه حبيتي الفجيره..؟؟
غاليه: لا حبيت يدووه أكثر..
أم منصور: فديتج حبيبتي يلسي عندي كثر ماتبين لو سنه..
أبوغاليه: خلاص حبيبتي بنقعد زياده المهم صحتج..

غاليه قعدت فالمستشفى من الخميس إلين السبت الصبح، وطبعا العاشق المتيم سلطان مافارقها ودايما يزورها ويهديها الورود والحلويات.. وفي مره صور لها الأرنبه غاليه وكتب عليها حمدلله على سلامة أغلى البشر.. وطرش لها بالبلوتوث.. ووايد استانست عليها.. هو يعتقد إنه بدا الطريج لقلبها وطلبها من أبوها إنها تبقى هني يعني إنها تبا تكون وياه..

************_____________************

في بيت أم منصور الي كانت يالسه تزهب الغدا لعيالها ومعاها بناتها وحرمة ولدها..
أم غاليه: بسير بشوف غاليه.. عمووه منو هالبنات الي زايرينها..؟؟
أم منصور: بنات فاطمه حرمة سعد الشحي..
أم غاليه: أهااا فديتهن والله طيبات..
أم حميد: سيري شوفي غاليه وعزمي البنات يتغدن هني..
أم غاليه: مايحتاي تلاقي غاليه ربطتهن عسب يتغدون..
راحت أم غاليه وشافت الي توقعته، غاليه مب راضيه تخليهن يروحون على بيوتهم..
ميثه: خالووه شوفي بنتج اللزقه خليها تفجني..
أم غاليه: ههههههه لا حبيبتي إنتوا اليوم بتاكلون عندنا..
ميثه: نبيج عون صرتي فرعون..
غاليه: ماما مب فرعون يالفيل..
نوره: هههههههه خلاص لو تغدينا عندكم باجر إنتوا تتغدون عندنا..
غاليه: وليش باجر اليوم عالعشا..
ميثه: خل إنتي همج على بطنج..
أم غاليه: خلاص عيل دقوا حق الوالده وخبروها..
وطلعت أم غاليه وخلت البنات يسولفون..
ميثه: يوم طاحت غاليه بالمستشفى في ناس تعنوا وخبرونا بالسالفه، وأخوي الي شافهم تخبل عليهم، وكل يوم ينشد عن علومهم..
شذا: منوووووووو؟؟؟
مروى: شروق هي الي راحت تخبركم..
نوره: ههههههههههه والله إنج خايسه ياميثوه ليش تحرجين البنيه..
شروق وهي ذايبه فثيابها: ماااالت عليج يالدبه..
الكل ضحك على شروق الي وااايد تستحي..
ميثه: إلا بسألكم وينه الغاوي سعيد ماشفناه من يوم العرس..
شذا: وإنتي شو تبين في سعيد..؟؟
ميثه: حبيبتي إن الله جميل يحب الجمال..
مروى: والله إنج سوالف ياميثووه..
ميعاد: الحين بييج الفارس المغوار.. متعودين هالوقت يخلصون غدا ويمرون يسلمون على غاليه وبعدها يرقدون..
نوره: المزيون سلطان شو يقرب لكم..
غاليه: ولد عمنا.. هو أخو بابا بالرضاعه..
نوره: أهااا يعني مب لزم..
مروى: لا بس بالرضاعه..
وبعد خمس دقايق من السوالف والضرابه وصلوا الشباب الي دخلوا عليهم وهم ميتين من الضحك..
غاليه: ضحكونا معاكم..
خليفه: يقولكم غرشوب دبي رقم 2 الي هو سعيد.. وبالمناسبه أنا رقم واحد.. إحم إحم..
مروى: مطول بالرمسه.. يالله اخلص..
خليفه: جب جب يالسوده.. المهم اليوم سار صوب الزرعه يبا يستهبل عالمزارعين..
سعيد: حلفتك بأغلى شي بحياتك ماتكمل..
غاليه: حراااااام قولنا..
سعيد: لا ماشي.. سمعتي الي بنيتها مابيها تنهدم..
مروى: خقااااااااااق
ناصر: غاليه اشحالج اليوم.. إن شاءالله أحسن..؟؟
غاليه: الحمدلله واااايد أوكي ومن باجر بظهر وياكم..
سلطان: لاتستعيلين المهم صحتج..
غاليه: لاتحاتي صحتي فوووق الريح..
خليفه: خلاص عيل بنسير نرقد.. ولاتنسين مراوي تصحيني العصر لأن عندي موعد مهم..
ميعاد: حتى هني مواعيد.. إرحم نفسك شوي..
خليفه: إنتي يودي الي فبطنج لايطيح ومايخصج فيني..
عبدالعزيز: مايخصك في حرمتي.. يالله خلونا نظهر..
وراحوا الشباب وبقت غاليه والبنات سوالف للعصر.. وظهرت شروق مع نواري وميثوه توصلهن للباب..
ميثه: على فكره أنا ماكنت أمزح يوم رمست عن زايد أخوي..
شروق: شو قصدج..؟؟
ميثه: أخوي وايد معجب فيج.. ويمكن بدا يحبج..
نوره: والله ياشروق عمره ماتكلم عن بنيه كثر ماتكلم عنج، مع إنه ماشافج غير ثواني..
شروق: إنتوا الحينه شو تبون..؟؟
ميثه: أمممممم نباج حق أخونا..
شروق: شو يعني..؟؟!!!
نوره: يعني تعالي اليوم زورينا وبتعرفين..
شروق: عقب هالرمسه كلها وتبوني أزروكم لالالالالا
ميثه: ههههههه حساسه البنيه..
نوره: حبيبتي لاتخافين أخوي مب من النوع الي يلعب، ويحسج مناسبه له ونحن بعد..
شروق: يصير خير..
ميثه: خلاص نحن بنروح واليوم بالليل تعالي تعشي عندنا. بروحج..
شروق: يصير خير..
رجعت شروق للبنات وهي سرحانه فالي صار.. هي للحين بداخلها حب ناصر ماتقدر تغامر بحب يديد يكن تفشل فيه.. وبعدين إنها تسكن بعيد عن أهلها لالا صعبه.. وليش لأ..؟؟ يمكن بهالطريقه بنسى ناصر وبقدر أعيش بدونه..
وصحت من أفكارها على صوت سلطان وهو واقف فالمطبخ يرمس فالموبايل ولاحس فيها..
سلطان: هااا عادل الحين شو قلت.. لالا مايخصني في مشروعك أنا أتكلم عن بضاعتي أنا..
والتفت على ورا يتطمن إنه محد يسمعه: شوف يا عادل هالبضاعه وايد غاليه وأنا دفعت فيها دم قلبي لاتخليني أندم عليها..
شروق خافت أي بضاعه وأي فلوس الي يتكلم عنها، هو يشتغل فالديوان ولاخصه فالتجاره..
سلطان: خلاص الغالي اول مايوصلك أي خبر خبرني.. وأكييييد سهمك محفوظ.. ههههههههه يالله بــاي..
شروق من حسته بيظهر من المطبخ على طول انخشت في غرفة الخدامات وسوت نفسه توها طالعه وشايله الفوط..
شروق: هلا سلطان..
سلطان: هلا بنت عمي.. اشحالها غاليه..؟؟

شروق: تمام.. سوري بسير بوديلها الفوط..
راحت شروق عنه وهي ميته من الخوف، بخاطرها تقول لأي حد بس مب عارفه، يعني هو ممكن يكون تاجر مخدرات أو أي شي ثاني.. ياربي شو هالورطه.. أكلم منو..؟؟ أقول لمنو..؟؟

***********_____________************

وإن شاءالله يعيبكم البارت..

والسموووووحه عالقصوووور..

(غرشوب البدو) __DEFINE_LIKE_SHARE__

da1a3 · 08-27-2008, 06:40 PM

الله يخليك الله يخليك كملها رووووووووووووووووعة

نتريا الياي

بس لا تبطي علينا __DEFINE_LIKE_SHARE__

NaBth al.RoO7 · 08-27-2008, 06:52 PM

يسلمووووووووووووو .. نتريااا التكملة ... __DEFINE_LIKE_SHARE__

NaBth al.RoO7 · 08-27-2008, 08:42 PM

حليلها غالية .. الحمدلله ع سلامتها .. بس غريبة انه احمد ماياها ع بالي بيها يوم بيدري او يوم بيقوله ناصر ..
عيبتني يدتهم >> هع هع ..
احس ان المزرعه روعه ..
نبا نعرف شو نهاية قصه سلطان ويا غالية ؟؟! __DEFINE_LIKE_SHARE__

Grshoob Albdoo · 08-27-2008, 10:55 PM

شكرا ع المرور

الجزء الثالث عشر..

اليوم الأحد وغاليه وأهلها للحين فالفجيره مع شوية تعديلات.. أبوغاليه وأمها وعمها أبوحميد وعمتها فجر وميعاد وعزيز رجعوا دبي، وبقوا الباجيين مع يدتهم أسبوع زياده على رغبة غاليه، وناصر أخذ إجازه ويلس وياهم وكلم أحمد الي قرر يلحقهم بعد يومين..
اليوم غاليه مع بنات عمها قرروا يطلعون السوق لأن ثيابها خلصت وطبعا ماتحب تغير اللبس نفسه فالأسبوع الواحد مرتين..
أم منصور: غاليه.. شو عندج بتسيرين السوق..؟؟
غاليه: فديتج يدووه خلصت ثيابي وبشتري غيرهم..
أم منصور: بنغسلهم حقج.. ليش هالفسق..!!
شروق: هههههههه يدوه هاذي غاليه المنصوري مستحيل ماتغير وإلا تتكشخ..
أم منصور: ومنو الي بيوديكم..؟؟
غاليه: ناصر وإلا خليفه..
خليفه: اسمحولي أنا وسعوود بنسير نتمشى..
ناصر: خلاص أنا الي بوديكم..
غاليه: يدووه عندكم بيتزا هني..
أم منصور: شو هذا بعد..!!
غاليه: يدوووه أكل..
سلطان: ههههههههههه كيف بتفهمينها الحين..
غاليه: خلاص يدووه بييبلج منه عسب تجربين..
سلطان: أمممممم مايبيلكم مرشد سياحي..
ناصر: هيه صح أنا لا أدل السوق ولا البيتزا.. خلاص نروح سيارتين..
سلطان: وليش سيارتين أنا سيارتي ستيشن بتكفينا كلنا..
ناصر: منو الي بيروح ويانا..؟؟
غاليه: أنا وشروق وشذا ومروى وإنت وسلطان..
ناصر: خلاص عيل كلنا مع سلطان، والحين سيروا تلبسوا وخلونا نطلع علشان مانتأخر..
راحوا البنات يتلبسون بسرعه وهو مستانسات، من وصلوا الفجيره ماراحوا مكان غير المزرعه ومن بعدها طاحت غاليه فالمستشفى، واليوم بيشوفون المناطق البعيده..

بعد نص ساعه البنات كلهم مع ناصر وسلطان فالسياره، البنات ورا يسولفون ويضحكون وسلطان وناصر يسولفون بروحهم..
ناصر: تعرف ياسلطان حياتكم هني وايد بسيطه وحلوه.. أتمنى أعيش هني وأريح..
سلطان: وأنا عكسك.. بخاطري أحول على دبي، وأجرب العيشه هناك..
ناصر: شو رايك نتبادل أسبوع، إنت تسير هناك وأنا أبقى هني..
سلطان: ههههههههههه خلاص موافق، بس مب الحين فالإجازة لأني علي بروجكتات الكليه للتخرج..
ناصر: ههههههههه خلاص عيل بنلتقي آخر السنه..
غاليه: سلطان شغل لنا شي نسمعه..
سلطان: حاظرين يالغاليه..
وشغل لها أغنيه الجسمي (حلو على قلبي هواكم) وغاليه وااايد تحب هالأغنيه واندمجت فيها ويلست تغني وراه والبنات يسولفون عنها وهي تغني وحاشرتنهم..
شروق: غلوووي ويع على هالصوت بسج إسكتي..
شذا: هههههههه خليها تغني.. توها ظاهره من عمليه..
غاليه: فديت بنت عمي الي فاهمتني مب هالبقره شروووق..
مروى: ههههههه سلطان شو هذا المبنى..؟؟
سلطان: هذي القلعه لو تبون بوديكم لها..
غاليه: لالالالا ما أحب الأماكن التاريخيه..
ناصر: ههههههههه خلاص عيل بنوديج المتحف..
غاليه: لالالالا
سلطان: هههههههه لا اليوم بنسير السوق وبعدين بنروح ناخذ لنا بيتزا وبنروح ناكلها عالكورنيش..
غاليه: إنت صح الصح..
شروق: هيه.. ياي على هواج..
ووصلوا الشباب مركز شومارت.. ونزلوا وبدوا البنات يتشرون والشباب وقفوا يسولفون..
غاليه: شروق شو رايج بهالبنطلون واااايد عايبني..
شروق: الصراحه عذاااب.. باخذ نفسه بس أسود..
غاليه: بالعكس الأبيض أحلى.. بس أحسن عسب لانتشابه فاللبس..
شذا: غاليه.. أبا أشتري هالبودي.. بس مب عارفه شو آخذ وياه..!!

غاليه: خذي تنوره.. شوفي هالتنوره البيج رووووعه..
مروى: أنا باخذ لي سكارفات..
غاليه: وين الإكسسوارات..؟؟
شروق: هناك سيري شوفيهم...
واشتروا البنات كل الي في خاطرهم بس غاليه طبعا ماتشبع.. راحت لناصر الي كان لاهي بالتلفون وسلطان واقف يدخن سيجاره..
غاليه: وععععع تدخن ياولد عمي..
سلطان: هههههه لا بس أتسلى شوي.. أنا مب مدمن بس ساعات تدق في راسي وأدخن..
غاليه: طحت من عيني..
وسوت حركه كأنها تفره من عينها ودوس عليه بريلها.. سلطان حرقته الحركه وحس بقلبه بحترق، بس سكت عنها..
غاليه: ناااااااصر..
ناصر: غاليه لحظه شوي.. نجود دقايق وأكلمج.. والله بس شوي.. حبيبي ثواني بس..
غاليه: مابنخلص اليوم..
ناصر: هههههههههه يالله باي حبي.. هاااااا الدبه شو تبين..؟؟
غاليه: دبه نجودووو... المهم في مكان ثاني بنروح له وإلا بس خلاص..؟؟
ناصر: ليش إنتوا ماخلصتوا..؟؟
غاليه: أخذت لي بس أربع بدل وبخاطري أشوف مكان ثاني..
ناصر: سلطان في مكان ثاني نروح له..
سلطان: طبعا فيه، نادي البنات وخلينا نروح..
راحت غاليه تزقر البنات وإظهروا كلهم للسياره، ووداهم سلطان أماكن ثانيه تشروا واستانسوا وبعدها خذوا البيتزا وراحوا على الكورنيش وكلوا واستانسوا ماعدا سلطان، الي للحين حركة غاليه قاهرتنه..
سلطان وناصر قاموا يتمشون شوي والبنات بعدهم ياكلون، ويوم رجعوا كانت شروق واقفه بعيد تكلم ميثه بالتلفون وهي تضحك.. راح سلطان ووقف عدال البنات ويسمع ناصر وهو يسولف معاهن، واقتربت شروق ووقفت بعيد عن سلطان تخبر غاليه عن ميثه الي بتزورهم باجر هي وأختها..
وسلطان اقترب من شروق كان قصده إنه يقعد، بس مايعرف ليش شروق خافت ونقزت بعيد عنه وراحت لغاليه..
غاليه: بسم الله عليج شو فيج..؟؟
شروق: ....................
سلطان: ليش خفتي.. أنا ماسويت شي..!!
شروق وهي مرتبكه: لا بس فاجأتني وخفت..
سلطان: لافاجأتج ولا شي، بس شكلج حساسه.. ههههههههه
شروق غصب ضحكت: هههههههه يمكن..
وقعد سلطان يسولف مع ناصر بس غاليه ماطافت عليها الحركه، وحست بشروق فيها شي أو صاير وياها شي..
غاليه: قومي شروق خليما نتمشى عالكورنيش شوي..
شذا: انا بعد بمشيي وياكن..
مروى: لالا أنا وياج بنمشي الجهة الثانيه..
تفرقوا البنات عالكورنيش وبقوا الشباب يسولفون..
غاليه: أمممم يالله خبريني..
شروق: والله ياغاليه من يومين أبا أقولج بس خايفه..!!
غاليه: من شووو..؟؟
وخبرتها شروق بالي صار.. وغاليه الي انصدمت بس ماحبت تكبر الموضوع..
غاليه: وليش تفترضينه شي مب زين.. يمكن مب قصده شي..
شروق: البضاعه بتوصل.. وحصتك محفوظه.. وخل السر من بينا.. هذا كله شو معناته..!!
غاليه: مادري بس لانظلمه..
شروق: أنا خايفه وأبا أرجع البلاد..
غاليه: يالغبيه إنتي الحين في عندج مشروع زواج هني..
شروق: غاليه أنا وايد متردده في هالسالفه، ماودي أعيش بعيد عن أهلي..
غاليه: الله والبعد كلها ساعه ونص.. فرصه وياتج لاتضيعينها من يدج... وفكري عدل قبل لاتقررين هذا قرار مصيري..
شروق: أدري.. يالله خلينا نرد البيت يدووه بروحها..
ورجعوا البنات كلهم وركبوا السياره ورجعوا البيت.. بس كانوا هاديين بشكل فظيع وكل يفكر بشي.. ناصر ساكت ولاوده يتكلم، وسلطان للحين مقهور من غاليه، وشروق وغاليه يفكرون في سلطان والي ممكن يصير وياه..

في بيت أم منصور الي كانت يالسه فالصاله مع سلطان وهو يحكيلها عن المزرعه والي فيها.. دخلت عليهم غاليه وهي مصدعه.. كانت لابسه بنطلون جينز أزرق واسع والقميص أبيض طويل للركبه وشيله بيضا..
دخلت وباست يدتها ويلست تشرب شاي وياها.. وسلطان ماشال عينه عنها قطعها من فوق لتحت.. بس عينه بعدها فيها غضب عليها من أمس..
أم منصور: أنا ما أعرف شو الي يعيبكم فهالصراويل.. إلبسوا كنادير مثل الأوادم..
غاليه: أميه العوده خليني على راحتي..
أم منصور: والله أنا خايفه عليكم.. ولو أنج عايشه معاي هني كنت بصلبج عدل..
غاليه: هههههه الحمدلله إني مب عايشه هني، وإلا ما أتخيل نفسي أصبح وأمسي بالمخاوير..
أم منصور: شوفيهم بنت ييرانا ميثه ونوره يوم يزورونا حلاتهن بالكنادير.. لكن ولدي منصور هو الي يبا ضرب.. الي دلعج..
غاليه: أميه خل عنج هالرمسه وقوليلي وينه ناصر..؟؟
سلطان: ناصر ظهر برع يسولف بالموبايل..
أم منصور: وناصر هذا مايشبع من التلفون.. سير إزقره لي..
سلطان قام وسار ينادي ناصر الي بند التلفون وراح ورا سلطان ليدته..
سلطان: أمي عصاتج جاهزه..!!
أم منصور: طبعا جاهزه..
سلطان: عيل هاذوه نصووور أيوده لج..
ناصر: شو تيودني خلني أقولك.. أنا ريال لحيتي تارسه ويهي أنضرب..
أم منصور: إنت ماتقولي شو عندك ماسك هالتلفون الصغير وترمس فيه ليل مع نهار..
ناصر: بعد شو نسوي يدووه مشاغل..
سلطان يهمس له: مشاغل القلب..
ناصر: جب جب إنت..
غاليه: ناصر وين بنسير اليوم..؟؟
أم منصور: وإنتي بس.. من تشوفين هالولد قلتي له وين بنروح.. إقعدي فالبيت ريحي ملايكتج.
غاليه: أميييييييه خلينا نظهر ونستانس.. يلسة البيت تجلط..
أم منصور: لا تظهرونها اليوم، خلوها بشوفها كيف بتظهر..
غاليه: عاااااادي باخذ سيارة نصور وبظهر.. أنا عندي ليسن يوديني أي مكان أباه..
أم منصور: الله وأكبر عليج.. شو تبين به الليسن توج صغيره..
غاليه: يدووه أنا أسير الجامعه يعني لازم سياره..
أم منصور وهي تقوم عنهم: والله هالبنيه خربوها أهلها..
وراحت عنهم وغاليه مستغربه: يعني البنات هني مايسوقون..؟؟
سلطان: هههههههه بلى بس يدوه ماتظهر ولاتشوف الي يصير فالبلاد..
ناصر: أمس أنا وسلطان بالليل يالسين نخطط.. واتفقنا نوديكم اليوم دبا.. بنسير من العصر لليل وبنرد..
غاليه: خلاص عيل بخبر البنات وبنتجهز.. بس شروق مابتروح ويانا..
ناصر: ليش عاد..؟؟
غاليه: أمممممممم ميثوه عازمتنها..
ناصر: وإشمعنى شروق بس..!!
غاليه: أقولك الصراحه..
ناصر: أكـــــــــيد..
غاليه: أخو ميثوه العود أعتقد إسمه زايد، شاف شروقو وعيبته ويبا يتقدم لها..
ناصر: ويوم هو يباها هي ليش تسير بيتهم.. المفروض تستحي على دمها ولاتروح لهم..
غاليه: وشو فيها يعني..؟؟
ناصر: فيها ونص.. فيها إنه عيب يطالع بنات الناس ويقعد يعزمهن على بيته.. هذا ماعنده خوات مايخاف الله..
سلطان: لا ياناصر إلا زايد.. ريال والنعم فيه.. ولد عرب وناس ومرباي أحسن عنك بعد..
ناصر: ولو شروق مالها طلعه لبيتهم.. وبتيي ويانا غصبن عليها..
وخلاهم وطلع.. وسلطان مستغرب من تصرفه..
غاليه وهي مقهوره: يعني هو وفسخ خطوبته منها ليش بعد يالس يتحكم فيها..
سلطان: ناصر كان خاطب شروق..!!
غاليه: هيه.. بس خلاص كل الي من بينهم إنتهى..
سلطان: بس بعدها بنت عمه وشرفه من شرفها، والحين سيري خبريها بالي صار وخليها تعتذر للبنات..
غاليه: أممممممم بسألك إنت ليش معصب علي؟؟
سلطان: مب معصب، بس حركتج البارحه باااااايخه مثلج..
غاليه: أي حركه؟!!
سلطان وهو يعيب عليها: طحت من عيني.. وتدوسيني بريلج بعد..
غاليه: خلاص عيل وقف تدخين وأنا أرجعك لعيني..
سلطان: ياليااااهل.. انا بظهر وخبري يدووه إني بسير المزرعه..
غاليه: تشااااو تشااااااو
ظهر سلطان وهو يضحك.. والله هالبنيه عسل لو بس أقدر أملك قلبها.. بس شكلها مالها فالحب وأهواله.. أو يمكن تحب واحد من دبي ولا ودها تخونه.. أنا لازم أكشف سرها..
وعلى العصر طبعا الكل طلع على دبا وشروق مبرطمه عليهم وهي مقهوره من ناصر وإلي سواه فيها.. ماله حق يتحكم فيها.. وإلا يمكن يغار من زايد.. لالالالا هو عنده نجود شو يبا فيني أنــا..
ووصلوا ولقوا لهم مكان عالبحر هادي ومريح.. يلسوا فيه وهم يسولفون ويعلقون إلا شروق الي معصبه من ناصر وسلطان إلي يدور على طريقه يدخل بها قلب غاليه..
ناصر: غاليه أحمد بيوصل اليوم بالليل..
غاليه: والله.. الظاهر ماقدر يفارقك أكثر عن جي..
ناصر: هههههههههه تدرين عاد الحب هذا..
غاليه: عيل يباله كيكه..!!
ناصر: خله يولي بعد تتعنين،علشانه إنتي بروحج توج ظاهره من المستشفى..
سلطان شدته الرمسه وانتبه لها..
غاليه: ههههههههههه خله إييب وياه حمدان..
سلطان: منو أحمد هذا..؟؟
ناصر: لا ما أعتقد بييبه وياه.. أحمد هذا ربيعي من أيام المدارس والحين يشتغل ويانا بالشركه..
غاليه: قال يشتغل ويانا.. إنتوا الإثنين تشتغلون عند بابا..
ناصر: جب جب إنتي دبه فيلووو
غاليه: بس لا.. ماصخ، شروق مروى شذا قوموا نسير بعيد عن هالغلس نصوووور..
شروق وهي تقوم: أحسن بعد فراقهم عيد..
ناصر: منو الي فراقه عيد..؟؟
شروق وهي تسير بعيدعنه: الي يتدخل في حياة الغير..
سلطان: ههههههههه يعني ناصر..
ناصر: قولي الي بتقولينه ماشي مواعد وغراميات إلا ليمن يخطبج، مسودة الويه، لها عين بعد ترمس..
شروق ميته قهر منه ومن كلامه بس ماتروم ترد عليه، الي يقوله عين الصح.. هي تروح لهم وهي تعرف إنه زايد يبا يشوفها، وإخواته يمهدون الطريج للخطوبه، المفروض لاتروح لهم ولاشياته، بس هي المستخفه الي كل يوم راحت وزارتهم..
على المغرب الجماعه شالوا أغراضهم ورجعوا للبيت وغاليه منهده من التعب بس لازم تشوف أحمد قبل لاترقد.. راحت وتسبحت ولبست تنوره حمرا وقميص أحمر بكاروهات سودا وشيله حمرا وطلعت الصاله ويلست مع يدتها..
أم منصور: ماتبون عشا.. وإلا أكلتوا فالطريج..؟؟
غاليه: أنا يوعااانه..
أم منصور: عيل زقري البنات وخليهن يتعشن..
غاليه: أي بنات أميه.. البنات الحين في سابع نوووومه..
ناصر: أحسن لهم خل يرقدون علشان يقومون الصبح..
ويلسوا كلهم يتعشون وناصر طلع برع ينتظر أحمد الي قاله إنه خلاص وصل.. وناصر برع يدله على الطريج..
غاليه قامت تغسل إيدها وتييب دلة القهوة ليدتها، ويوم رجعت تدخل الصاله شافت أحمد يسلم على يدتها.. طار فوادها وحست صينيه القهوه بتطيح من إيدها..
أحمد: ماشاءالله أشوف الفجيره أدبت بنت منصور وخلتها تشيل صينية القهوه..
غاليه: هههههههههههه تتطنز..
أم منصور: خلها تتسنع.. أدبتها من يات هني.. إلا هالصراويل مب راضيه تودرهن..
أحمد: هههههههههههههه أي صراويل بعد..
غاليه: هههههههه الجينزات..
أحمد: ياحليلج يايدوه.. من كثر ماناصر صدع لي راسي بالرمسه عنج قلت لازم آخذ إجازه وأيي أشوفج..
أم منصور: فديتك ياولدي.. الله يخليك لأهلك إن شاءالله..
أحمد: ناصر إحجز لي بأي فندق لأني ماعرف الفنادق هني..
أم منصور: وليش الفنادق والبيت إش كبره..!!
أحمد: لا يدوه.. البيت فيه بنات وفشله.. أنا برقد بالفندق، كلها يومين عادي بيمرون..
سلطان: الله يهداك وإنت بترقد في وسط البنات.. الملحق الي برع فاضي من ظهر صالح أخوي في بيت بروحه وهو فاضي.. بنرقد فيه أنا وإنت وناصر..
أحمد وهو مفتشل: والله مادري..
أم منصور: بس خلاص بترقد مع الصبيان فالملحق..
غاليه: عيل أنا اسمحولي بسير برقد لأني من قمت الصبح مب راقده..
أم منصور: سيري فديتج حطي راسج وارقدي..
ناصر: وإذكري الله وسمي..
سلطان: ولاتنسين تتعوذين من الشياطين الي وياج بالغرفه..
غاليه: هههههههههه حشى ياهل رايحه ترقد مب بنيه عوده..
أحمد: هههههههههههه وتغطي عدل..
غاليه: بعد إنت بتستوي علي كبير..
راحت غاليه وهي مستانسه لأن أحمد بيكون معاها بآخر يومين بالمزرعه، عالأقل يبتعد عنها سلطان شوي.. __DEFINE_LIKE_SHARE__

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
قلبي يحبك وانت تدري بذلك’ عندك خبر انه يحبك ويهواك ~ new ; ฬđήч Łқ	~ Ƙяạzyo❥	عدسة الاعضاء , كاميرا الاعضاء	7	03-26-2010 10:38 PM
من كثر ماأحبك يقولون مسحور ..!!	محروم.كوم	منتدى أخبار المواقع والمنتديات العربية والأجنبية	0	12-24-2009 12:30 AM
من كثر ماأحبك يقولون مسحور ..!!	محروم.كوم	منتدى أخبار المواقع والمنتديات العربية والأجنبية	0	12-24-2009 12:20 AM
من يحبك.....	دلوعة باباتي	شعر و خواطر	14	03-17-2009 01:37 AM
لا تطلب من احد ان يحبك بل اجعله يحبك	شواقي العين	الإستراحه العامة	12	04-05-2008 08:40 PM