][أحبك لو بعيد الدار عنك][

دانة الكويت · #1 03-15-2008, 03:12 PM

السلاااااااااااااااااااااااااااام عليكم..

هذي قصتي احطها بين ايديكم

واهي قصة كويتية اماراتية

انتشرت وايد بالكويت بالبلوتوث <<صرت مشهورة احم احم

ما ابي اطول تفضلو ..

لحظة هع اول شي هذي القصة كاملة للي يبي ينزلها ع الوورد

الملف فيه القصة ع الوورد+ع الملاحظات <<للموبايل+اغنية احبك لو بعيد الدار عنك

http://www.2shared.com/file/5439059/dc422b2d/____.html

«®°·.¸.•°°·.¸¸.•°°·.¸.•°®»البارت الاول«®°·.¸.•°°·.¸¸.•°°·.¸.•°®»

تدور أحداث هالقصة في الكويت وفي بيان بالذات عايلة كبيرة تقريبا يدهم ابو محمد متزوج ثلاث حريم مريم و سارة ومنيرة..مريم تكون اول زوجة لابومحمد ويعزها واايد واهي تكون بنت عمه اللي كانو اهلها محيرينها حقه بس مريم توفت عقب ما تزوجها بو محمد بعشر سنين ويابت منه ولدين محمد وفيصل محمد كان عمره 10 سنين بالضبط يوم تتوفى امه وفيصل كان عمره ثلاث سنين .. عقب ما توفت مريم ضاقت الدنيا بسالم اللي اهو بومحمد كان يحبها حب مو طبيعي وما يتخيل حياته بدونها وعاش سنة من الحزن والالم يتحمل فراقها بس اخته ما رضت تشوف اخوها بهالحالة وضغطت عليه عشان يتزوج بس اهو رافض الفكرة...

خالدة:انت لازم تتزوج ما يصير تتم بهالحالة
سالم:انا جم مرة قايلج هالموضوع منتهي
خالدة: مو عشانك عشان العيال حراام منو يهتم فيهم ومنو يداريهم؟؟
سالم: ليش اهمه مثقلين عليج كاج قاعده فالبيت لا شغل ولا مشغله
خالدة: مو قصدي جذي انا مو دايمه لهم لازم تييبلك وحدة تعطف عليهم وتربيهم
سالم:الله يطول بعمرج ويخليج لهم وفكينا من هالموضوع الله يخليج
خالدة: وعمرك انشالله بس انت لازم تتزوج يعني لازم تتزوج
سالم: وبعدين يعني ؟؟ ما خلصنا انا ما راح اييبلهم مرت ابو تهاوشهم او تطوول لسانها عليهم
خالدة : هههههههههه
سالم: قايل نكتة ؟؟ ليش تضحكين؟؟
خالدة: مشكلة انتو الرياييل تعممون الشي ع الحريم كلهم .. سالم الحريم في منهم الزينة وفي الشينة واذا عن جذي انا باخطبلك اطيب مره بهالعالم ما تهاوش عيالك ولا تقوولهم أي كلمة
سالم: زين يصير خير
خالدة: يعني موافق؟؟
سالم: على شنو؟
خالدة: ع الحرمة اللي باخطبها
سالم: بسم الله مداج تلقينها
خالدة: افا عليك جاهزة للحلوين
سالم: زين يلا روحي حطيلي الغدا حدي يوعاان
خالدة: تامر امر

بعد اسبووع راحت خالدة حق بيت ام منيرة عشان تخطبها لاخوها .. منيرة حرمة طيبة واايد وكانت متزوجة بس ريلها توفى وما يابت منه عيال ومن عقبها واهي قاعدة ببيت اهلها ..اهمه يصيرون جيران بيت بومحمد وكانت واايد مع خالدة المهم خطبوها لسالم وتزوجها وكانت واايد حنونة على عيال مريم وتعاملهم جنها تعامل عيالها ..

فيصل كان ينادي منيرة ويقولها يمه بس محمد لا كان ما يقول حق احد يمه حتى عمته خالدة ..

مرت الأيام وحملت منيرة كان سالم مستانس واايد من هالخبر لان منيرة كانت تحبه حيل وكانت تقريبا نفس مريم ومرات كان يناديها مريم بس اهي ما تزعل لانها تقدر مشاعره وتعرف شكثر يحب مريم زوجته الاولية.. مرت التسع اشهر بسررعه وولدت منيرة ويابت بنت مثل القمر فيصل كان مستانس واايد بس محمد لا .. محمد واايد حساس وما يحب احد يشاركه في ابوه المهم منيرة كانت مصممه انها تسمي البنت مريم وسالم ما عارض لانه كان يتمنى هالشي ..

وعقب 19 سنة من زواج منيرة وسالم كثرو عيال سالم من منيرة صار عنده 7 عيال منها أربع بنات وثلاث صبيان الكبيرة مريم وعقبها خالد و طلال بعدين شوق وشذى اللي اهمه توأم وما يفرق بينهم الا حبة الخال اللي في خد شوق وهذا اللي محليها اكثر من شذى مع انهم كلهم حلوين وبعدين دانة واصغر واحد علي...

عيال سالم بالترتيب:
محمد 29 فيصل 22 من زوجته مريم
ومريم 19 وخالد 17 وطلال 16 وشوق وشذى 14 ودانة 10 وعلي 5 سنوات
كانو كلهم على قلب واحد جنهم من ام وحدة ومنيرة ما كانت تفرق بين عيالها وعيال مريم ..
فيصل ومريم كانو حيل مع بعض وفيصل كان قريب من الكل ودايمن ينكت وكان يحب دانة اخته وايد ونفس الشي خالد وطلال الا محمد كان دايمن مع ابوه في شغله وكان ابوه يعتمد عليه واايد...

سالم وتوه راد من الشغل:منيرة .. منيرة وينج حطي الغدا بسرعه ميت من اليوع
مريم: يبا امي رايحة بيت يدتي دقت عليها خالتي وقالت لها يدتي تعبانة
سالم: زين وانتي شنو مهنتج قومي خلصيني حطي الغدا
*بومحمد من رياييل اول ما يحب الخدامة تحط ايدها بشي وخاصة الاكل بس تنظف وتغسل*

مريم: انشالله يبا
محمد: يا ربي شهالجو حر مووت انا برووح انام تامرني بشي يبا؟
بو محمد: ما يامر عليك عدو بس ما تبي تتغدى ؟ مريم راحت تحط الغدا الحين
محمد: لا يبا مو مشتهي قولهم يخلوللي اذا قعدت باكل
محمد واهو رايح غرفته الا خالد وطلال توهم رادين من المدرسة
خالد: قوة يبا شلونك
طلال : وينك الغالي ما تنشاف
بو محمد: انا اللي ما انشاف انتو اللي وينكم كل ما اسأل عنكم طالعين
خالد: يبا بعد تدري دراسة وحالة لازم نغير جو
طلال: اسكت الحين اللي يقول مقطع الدراسة
خالد: اعللم اقوول شسويت؟؟
طلال: لا لا دخيلك خلاص توبة ما اعيدها
فيصل واهو نازل من الدري : هههههههه انا اعرف اقوول؟
خالد: أي قوول
طلال واهو يطالع خالد بنظرة
وفيصل ميت من الضحك
بومحمد : خلصونا من هالسخافة وين البنات ما أشوفهم
شوق: ادري ادري تسألون عني الأميرة وصلت
طلال : خخخخ مشكلة الواثقين من اعمارهم
شوق: يبا شوفه
طلال واهو يقلدها: أي يبا شوفه
شوق: ارووح اساعد مريم احسللي
بو محمد: ما صارت غدا لو تطبخون خروف جان خلص
مريم واهي تحط السفرة: كاهو يبا دقايق بس طلول وخويلد روحو بدلو هدومكم ونزلو بسرعه
خالد: نعم ما سمعت اصغر عيالج طلول وخويلد؟؟
بو محمد: خلصوني سمعو كلام اختكم وروحو
فيصل: واااااااااااااااااااااااككك تستاهلون
طلال: لا تخاف مردودة
بومحمد: روحو يلا ولا ترى بنتغدى عنكم
طلال وخالد: لا لا لا
بو محمد: وانت قووم خلصني روح ناد اخوانك
فيصل: انشالله

اول ما حطو الغدا ولا الكل متيمع ع السفرة الا محمد اللي كان نايم ومنيرة اللي كانت في بيت امها تغدو وخلصو بومحمد راح ينام بداره وشوق وشذى راحو يدرسون وعلي ودانة قاعدين يرسمون وخالد راح ينام بداره ما بقى بالصالة الا مريم وفيصل وطلال ..

طلال: مريووم امي وين ما اشوفها
مريم: امي راحت بيت يدتي يقولون تعباانة
فيصل: افا وليش ما قلتيلي
طلال: من متى امي هناك؟
مريم: من الصبح اول ما رحتو المدرسة
فيصل: دقي عليها شوفيها
مريم: حاولت بس جهازها مغلق
طلال: الحين ادق عليها واشوف
الجهاز مغلق او خارج منطقة التغطية....الخ
طلال: مغلق
مريم: شفت قايلتلك
طلال: الحين ادق على بيت يدتي
طلال:الووو
جمانة: نعم
طلال:أأأ
جمانة: نعم منو ؟؟
*جمانة تصير بنت خال طلال وخالهم متوفي وعياله عايشين عند يدتهم وجمانة كبر طلال واهو يحبها حيييل*

طلال: انا طلال امي وينها
جمانة قلبها طاح ببطنها اهي بعد تحب طلال : هلا هلا والله بطلال وينك ما تنشاف
طلال: موجود انتو شلونكم؟؟ شخباركم؟؟
جمانة: ما نسأل الا عنكم
مريم وفيصل قاعدين يشوفون طلال ويضحكون.. طلال اللي كان بعالم ثاني :تسأل عنكم العافية
جمانة وويها صار احمر:عسى العافية ما تفارقكم
طلال: ولا تفارقكم يا رب
مريم: فيصلو مو جنه طلول طول واهو يقرق؟؟
فيصل: هههه خليه شوي مع حبيبة الروح هذي اكيد جمانة
مريم: طلول خلصني ابي التلفون
طلال واهو يكلم مريم بصوت واطي: ويعه خليني شوي
مريم: لا ما في خلص الحين ولا اعلم ابوي
طلال: زين زين خلاص اقوول جمانة
جمانة: هلا
طلال: هلا فيج بس بغيت اسأل عن امي اهي عندكم؟؟
جمانة: لا طلعت مع عماتي للمستشفى عند يدتي
طلال: المستشفى ليش خير شصاير؟؟
جمانة: الخير بويهك يدتي شرقت واهي تشرب الماي وودوها المستشفى
طلال: اها خلاص عيل اخليج الحين
جمانة: بااي
مريم: طلول أي مستشفى شسالفة؟؟
طلال: وي عاد بدت العيوز
مريم: انا عيوز؟؟ خلصني شصاير؟؟
طلال: يدتي شرقت وهي تشرب ماي وودوها خالاتي المستشفى
مريم: لا والله
طلال: أي مو مصدقة تبين ادق مرة ثانية
مريم: طلول!!!
طلال اللي بعالم ثاني من كلم جمانة انا رايح داري اذا ردت امي قعدوني

مريم: هذا شفيه ما يحس؟
فيصل: انقلبت حالته من كلم جمون
مريم: فيصلو قووم ودني المستشفى
فيصل: زين برووح اخذ دوش وبعدين
مريم: اوكي على ما البس بعد

مريم لبست وراحت غرفة شوق وشذى ..
مريم: شواقي سمعي انا برووح المستشفى عند يدتي يمكن اتأخر غدا محمد بالميكروويف واذا قعد ابوي قولوله اني رحت عند يدتي
شوق: انشالله
شذى: شفيها يدتي؟
مريم: شرقت وودوها المستشفى
شذى: اها
مريم: ع العموم انا برووح مع فيصل درسو عدل واذا خلود قعد قولوله ان فلوسه ع الرف اللي بداري اوكي؟
شوق: اوكي
مريم: اي بعد دانووه عندها امتحان رياضيات باجر.. درسوها
شوق: زين
مريم: يلا باي
راحت مريم وفيصل حق المستشفى عقب ما دقو على جمانة وقالتلهم اسم المستشفى..

اول ما وصلو هناك شافو منيرة واقفه عند باب المستشفى وميتة من البجي مريم على طوول راحت عند امها..
مريم: يمه شفيج
منيرة واهي تحاول تكون قوية جدام بنتها: ولا شي انتي ليش يايه؟
فيصل: يمه *قلتلكم ان فيصل كان يناديها يمه* قولي شفيج
مريم: يدتي فيها شي؟
منيرة: يدتج عطتج عمرها
فيصل : لا حول ولا قوة الا بالله انا لله وإنا إليه راجعون

مريم ما كانت متعلقة بيدتها وايد بس كانت تحبها
فيصل: يلا يمه تعالي
منيرة:وين
فيصل: البيت بعد وين
منيرة: لا ماني رايحة البيت برووح بيت امي
مريم: ليش تروحين هناك
منيرة: انتي تدرين ان عيال خالج ما عندهم احد غير يدتج وانا ما راح اخليهم راح اقعد عندهم
مريم ما حبت تناقش امها بالموضوع لانها كانت وايد متضايقة:براحتج يمه
فيصل: زين يلا امشي خليني اوديج
مريم: خالاتي وين؟
منيرة: عند غرفتها
فيصل:انا بروح اشوف

راح فيصل وسلم على خالات اخوانه وعزاهم وسأل الدكتور
الدكتور: الشرقة يت مع انخفاض شديد بالسكر وتوقف التنفس
فيصل: متى بناخذها
الدكتور: الحين خلوها بالثلاجة وباجر الساعة 9 نطلعها
فيصل: انا لله وان اليه راجعون
الدكتور: الله يصبركم على فراقها

* منيرة عندها ثلاث خوات واخو واحد توفى بحادث اهو وزوجته وولده الكبير قبل خمس اشهر وقعدوا عياله عند يدتهم اللي اهمه جمانة كبر طلال وعبدالله كبر دانة*

مريم قعدت عند امها في بيت يدتها وفيصل راح البيت قال حق ابوه شصار وابوه ما وافق ع الفكرة ابد ..
بومحمد: مالها قعدة هناك عقب العزا ترد البيت
طلال: بس يبا عيال خالي ما عندهم احد
بو محمد: اهي مو ملزومة فيهم لا اختهم الكبيرة ولاشي
طلال: هذول عيال اخوها
بو محمد: عندها خوات اهي وراها بيت وزوج وعيال مو فاضيتلهم

الكل سكت
يوم الدفن الكل كان موجود سالم ومحمد وفيصل وخالد وطلال حتى علي راح المقبرة..
منيرة ومريم وجمانة وخالاتهم كانو بالعزا وشوق وشذى كانو يروحون العصر لأن كانت عندهم امتحانات بس اهمه ما كانو مع يدتهم واايد لانها كانت مره كبيرة ومخرفة شوي..

خلص العزا وبومحمد نطر عقب العزا شهر والحين بيروح اييب مرته من بيت اهلها..

بالغرفة الثانية كانو محمد وفيصل قاعدين يسولفون..
فيصل: والله هالمره حبوبة وطيبة ليش تعاملها جذي
محمد: حبوبة وطيبه اوكي بس خلت ابوي ينسى امي
فيصل: عمره ابوي ما نسى امي
محمد: ما تشوفه شوي ويموت عليها ما يبيها تقعد في بيت امها
فيصل: عيب عليك هذا أبوك
محمد: انا ما قلت شي
فيصل: لو انت مكانه بتسوي مثل ما يسوي
محمد: لو
دخلت عليهم مريم: محمدوه ابيك بموضوع
فيصل: شقصدج يعني اطلع؟
مريم: اللبيب بالإشارة يفهم
فيصل: ما راح اطلع عناد
محمد: بتطلع وغصبن عليك
فيصل: افا
مريم: يلا قير أوت
فيصل: زين زين بس نصيحة لا تتكلمين انجليزي مرة ثانية حده مو لايق
مريم: يلا خلصني

طلع فيصل وسكر الباب وراه..
محمد: خير مريوم شبغيتي؟؟
مريم: لحظة شوي
وتروح مريم تبطل الباب جان يطيح فيصل لانه كان متسند على الباب ويتسمع
محمد: هههههههههه حركات
فيصل: اوف صادتني
مريم: عيب عليك
فيصل: زين باطلع بس حطي ببالج اني راح اعرف الموضوع عاجلا او اجلا
مريم: زين الحين اقلب ويهك

هالمرة راح فيصل من صج وعلى طول مريم بطلت الموضوع..
مريم: محمد انت لي متى بتتم جذي
محمد: شقصدج؟
مريم: انت فاهم قصدي زين
محمد: ما لقيت الإنسانة المناسبة
مريم: عمرك بيصك ثلاثين وانت بعدك ما تزوجت واذا على المره انا مستعده ادورها لك
محمد: مريوم مو جنه تو الناس
مريم: مو تو الناس ولاشي .. ابوي بيشوف عيالك وانا ابي اصير عمه
محمد: زين بس اهم شي تكون خلوقة وحلوة
مريم: بس؟؟
محمد: أي بس شتبين بعد
مريم: لا اقوول يعني ما تبيها تكون طويلة مثلا
محمد: هههه انتي متعقدة من القصر لا عادي ما يهمني اهم شي تكون خلوقة ومملوحة
مريم: اوكي

طلعت من غرفة محمد واهي تطالع فيصل اللي يتمنى يعرف شصار بينهم..
سالم راح اييب منيرة من بيت امها ..منيرة ما طاعت اترد وياه ومصرة على رايها وبومحمد قاللها اذا ما رديتي راح اتزوج عليج واهي ما عندها مانع بالعكس اهي راحت تخطب له لانها مستحيل تخلي عيال اخوها بروحهم بومحمد ماكان يبي يتزوج عليها بس لما شافها مصرة على رايها حب يعاندها...

خطبت منيرة سارة حق سالم وتزوجها ..محد عارض الزواج من العيال بس البنات كانو شوي متحسسين من الموضوع ومنيرة كانت تحترق من داخل بس ما حبت تخلي عيال اخوها بروحهم.. مرت سنة وحدة على زواج سالم.. ومنيرة ردت بيتها عقب ما تزوج سالم من سارة لأن اختها الكبيرة بدرية قررت تبيع بيتها وتقعد عند عيال اخوها اهي وعيالها ..

مريم:محمد محمد عندي بشارة
محمد: ها الغالية شعندج
مريم: لقيتها
فيصل: منو؟؟
مريم: انت مالك شغل ها محمدوه شقلت؟؟
محمد: دامها بنت حلال توكلنا على الله
فيصل: اها السالفة فيها زواج افا بوجسوم انا اخوك
محمد: ما حبيت اقولكم الا لما القى البنت
طلال: الله زواج ابي اتزوج
مريم: طلول استح على ويهك
خالد: ومنو سعيدة الحظ اللي راح اكون حماها؟
طلال: امحق غرور البنت ما راح تتزوجك راح تتزوج محمدوه
خالد: من قال اني مغرور الغرور يتهنى فيني اصلن
مريم:محمدوه خل عنك هاليهال وتعال ابيك
دانة: شنو؟ منو؟ شالسالفة؟
طلال: سكتي يا الملقوفة انتي
دانة: انا مو ملقوفة صح صوصو
طلال: منو صوصو هذا
فيصل: احم احم
خالد: هههههه هالكبرك وتقولك صوصو
فيصل: ادري محترين دانوتي ما عليج منهم يولون
فيصل كان يموت في دانة اخته يحبها واايد واهو كان اللي مسميها

في غرفة مريم..
محمد: ومنو البنت؟؟
مريم: هذي رفيجة فطوم بنت خالتي فوزية
محمد: جم عمرها
مريم:28
محمد: يعني اصغر مني بسنتين بس مو جنها كبيرة؟
مريم: شفت عمرك انت بالاول
محمد: العمر كله انشالله شفيج علي
مريم: خخخ ما قلت شي هالبنت حلوة وخلوقة وخجولة لابعد درجة حسب طلباتك
محمد: زين
مريم: ما تبي تعرف شنو اسمها؟
محمد: مو لازم
مريم: يكون احسن
محمد: لا قولي
مريم: هههههه اسمها نورة
محمد: خلاص راح اكلم ابوي عنها انتي كلمي امج عشان تخطبونها
مريم: ترى كلمتها عنك
محمد: شنو
مريم: أي عشان اشوف رايها اذا موافقة او لا
محمد: والله
مريم: أي شفيك عادي
محمد: وشقالت؟
مريم:تقول حياكم الله
محمد: خوش والله تتفقون واهلكم ما يدرون
مريم: مالك شغل تبيها ولا لا؟؟

محمد: زين برووح اكلم ابوي

بومحمد وسارة كانو قاعدين فالصالة دخلت عليهم شوق..
شوق:قوة يبا
بومحمد:هلا ببنيتي
شوق: يبا طلبتك
بومحمد: عطيتج
شوق: يبا ابي لابتوب
بومحمد: يا غالي والطلب رخيص اليوم خلي واحد من اخوانج يوديج واشتري اللي يعجبج
شوق: ربي لا يحرمني منك يا الغالي .. وصعدت فوق

دخل عليهم محمد..
محمد: يبا ابيك بموضوع
بومحمد:شعندك
محمد واهو يطالع سارة مرت ابوه
بومحمد: سارة قومي جهزيلي الحمام ابي اسبح
سارة: انشالله
بومحمد: ها وليدي شبغيت
محمد: يبا انا اناوي اكمل نص ديني
بومحمد: واخيرا ما بغيت
محمد: ولقيت بنت الحلال
بومحمد: من بنته؟
محمد: والله ما ادري بس مريوم تعرفها
بومحمد: لازم نخلي منيرة وسارة ومريم يروحون يكلمون امها واذا وافقوا نروح نخطبها
محمد: خلاص عيل قوول لخالتي
بومحمد: اليوم اكلمها
محمد قام وباس راس ابوه: ربي يطوللي بعمرك

كلم سالم منيرة واستانست واايد من هالخبر ودقو على اهل البنت وخذو موعد عشان يزورونهم وصج راحولهم ووافقو وراحو العيال ويا ابوهم عشان يخطبون البنت رسمي ..
مريم: واخيرا
محمد: اللي يقول قاعد على جبدكم
فيصل: أي قاعد على جبدنا ما اقول الا الفال لي انشالله
الكل: هههههههه

مرت الايام اسرع من البرق الحين صارت 3 سنين من تزوج محمد وصار عنده ولد سماه جاسم وعمره سنة ومريم تزوجت واحد من برا العايلة وصارلهم سنة من تزوجو وفيصل خطب بنت اخو سارة مرت ابوه وبقى على عرسهم ست اشهر اما سارة واللي صارلها اكثر من3 سنين متزوجة سالم ما حملت وهالشي مفرح منيرة واايد.. خالد تخرج من الثنوي بنسبة 85% واختار كلية الشرطة لانه ماله خلق يجابل الكتب اكثر من جذي ولأن الشرطة يعجبون البنات واايد وطلال اللي الحين باخر سنة ثنوي شاد حيله عشان اييب نسبة زينة عشان يتزوج جمانة اما شوق وشذى بثاني ثنوي ودانة صار عمرها 14 وعلي كبر وصار 9 سنوات ..

شوق عقب ما شرت اللابتوب صارت ما تنشاف اربع وعشرين ساعه عليه وصارت ما تدرس واايد..

قاعدين البنات مع امهم بالصالة..
شوق:يما خنروح الامارات
منيرة:انشالله
شوق:يما
منيرة:ها
شوق:يما اذا ما تزوجت اماراتي باخذ ريلي ونروح هناك
منيرة:يصير خير
دانة: يما
منيرة: شتبين انتي بعد
دانة: ترى بتيي رغوده بعد شوي
منيرة: مع امها؟
دانة: آي دونت نو
منيرة: تكلمي عدل وويعه
دانة: ما ادري بس مو تقولين ما قلتلج تراني عطيتج خبر
منيرة: اصلن انا بطلع فإذا بتيي امها قوليلها امي معزومة
دانة: اوكي مامي
منيرة: وويعه
يرن الجرس
دانة:هذي رغوده بباي
رغد عمرها 15 بين شوق ودانة وكانت اهي ودانة ثنائي مزعج دايمن يسوون مقالب واهمه ما يحبون علي دووم يطقونه ..

اول شي راحو غرفة شوق واللي كانت ع اللابتوب تكلم سلطان الاماراتي..
رغد: السلاااااااااااااااااااااااااااااااااااااام
شوق: وعليكم .. ريموووه ما يت؟
رغد: نو
شوق: طلعو برا ترى مالي خلقكم
دانة:تراج احلى اخت بالدنيا
شوق: ادري من قبل لا اعرفج
رغد: حبيبتي شوق
شوق: من الآخر شتبوون
دانة: نحبج
شوق: الزبدة
رغد: الزبده ولا الجبن كاااااااااك
دانة: ههههههههههه عجييييييبة بس ما تضحك
شوق: اففففففف شتبون؟
رغد: رجاء لا تتأففين
شوق: لا والله حلفو؟؟ طلعو برا
دانة: رغوده سحبي كلمتج
رغد: سو سوري
شوق: عاد اذا ما قلتولي شتبوون والله يا ويلكم
دانة: نبي ..رغوده شنو تبين؟
رغد: امممممم ماكياج صح دانووه؟
دانة: بلييييييييييييز شواقي انتي اطيب وحده
شوق: ؟؟ شتبون فيه؟؟؟
رغد: شي خاص
شوق: نو
دانة: بلييييييييييييز
رغد: لو ادري بتذليني جذي جان يبت من بيتنا
شوق: اذا ما قلتولي ما راح اعطيكم
دانة: انزين نبي نلعب نسوي بروفا حق عرس فيصل
شوق: بشرط
رغد: طلبي اللي تبين
دانة: أي شي تبينه بنسويه
شوق: انزين تنسخون دفتري العربي لاني غايبة الاسبوعين اللي طافو مع ان خطوطكم تلوع الجبد بس شنسوي وووو....
دانة: دفتر عربي؟؟
شوق: اذا ما تبون براحتكم
رغد: امبلى نبي بس قولي شنو بعد
شوق: امممممم جني مشتهيه حلاو
دانة: منو بيودينا الجمعية الحين؟؟ بليز شوق نبي شي نقدر نييبه
شوق: مو مشكلتي كافي انكم خذيتو من وقتي الثمين
رغد: مو مشكلة كل شي عشان مخططنا يهون .. حلاو شنو؟
شوق: شوباشوبس فراولة
دانة: انزين بس عطينا الماكياج
شوق: نو حبيبتي حدها قديمه لازم مقدم
رغد: يلا عاد لا تصيرين سخيفة
شوق: اوكي روحي اخذيه من التواليت
واول ما خذوه طلعو ركض وسكرو الباب..

راحوا غرفة دانة وخربطوا على ويوههم بالماكياج حطو حوالي عيونهم لون اسود طبعا عقب ما حطو اساس ابيض مثل الطوفا وروج احمر فاقع وحطو على ضروسهم لون اسود <<مخططهم يخرعون علي.. اللي كان يلعب بلايستيشن بالصالة الصغيرة اللي عند المطبخ ولما خلصو لبسو هدوم سودا وباقو عباية من غرفة مريم ولما خلصو وتأكدو ان اشكالهم تخرع ..
رغد: اتخيل شكله مسكين والله
دانة: يستاهل السخيف
رغد: تدرين شنو ناقص؟
دانة: شنو؟
رغد: باروكة
دانة: تصدقين عاد ان امس فيصل شاري وحده
رغد: صج؟
دانة: أي جنه يدري عنا خخخ يلا امشي داره
رغد: انا بوقف بالممر اتأكد ان محد موجود وانتي دشي داره واخذيه انزين؟
دانة: اوكيشنات
وسوو الخطة..
دانة دشت الغرفة وعفستها لما لقت الباروكة
وطلعت..
دانة: كاهي
رغد: باعرف اهو ليش شاريها
دانة: المهم خذيناها
لبستها رغد وكان شكلها حييل يخرع لان الشعر كان كثيف وطاير لي فوق ولونه ابيض..
اما دانة فخذت نقاب من عند امها ولبسته بعدين رفعته لي فوق صار ما يغطي ويهها بس يغطي شعرها ..
وراحو حق المطبخ..
فيصل كان داش المطبخ بيشرب ماي واهمه كانو يتهاوشون ياخذون سكينة وياهم او لا ومندمجين بالهوشة ..فيصل كان يستانس وايد منهم ومن سوالفهم دش عليهم فيصل واللي اخترع بس لما سمعهم يتهاوشون عرف انهم دانة ورغد
لانهم كانو معطينه ظهرهم ..
فيصل: بو
دانة نقزت من الخرعه
رغد: واي يمه
فيصل قعد يضحك على اشكالهم لانها كانت تفطس من الضحك وخاصة على دانة شلون نقزت ..
فيصل: هههههههههه
دانة: صوصو حرام عليك خرعتني
فيصل: خخخخ الشياطين شيخططون عليه؟
رغد: خخخخ وانت شكو
فيصل: افا انا عضو المنظمة وياكم
دانة: سر ما نعلم
فيصل: هذا وانتو بايقين الباروكة من غير ما تستأذنون خلاص ييبوها
رغد: شنو بتسوي اصلن
دانة: رغوده خليه معانا
فيصل: شنو بتسوون انتو
رغد: ما تعلم احد؟
فيصل: نو
دانة: نبي نخرع علي
فيصل: خخخخخ حرام اليوم عيد ميلاده
رغد: عادي ..يلا شنو بتسوي
فيصل: الحين اوريكم بس اول شي دانووه شكلج ما يخرع وايد عندي قناع بسيارتي بييبه لج
دانة: اوكي
رغد: بس سؤال انت شتسوي بالباروكة والقناع؟؟
فيصل: خخخخخ عشان نخرع واحد من الربع .. سمعوني عدل اذا شفتو علي يطلع من الغرفة سيدا دشو انزين؟
رغد ودانة: انزين
وراح فيصل ياب القناع وعطاه دانة بعدين دش على علي اللي كان مندمج باللعبة ومسكر الليت شافه جان يطلع من غير ما يحس فيه وطق الباب من برا وكل ما يطلع علي عشان يفج الباب ما يلقى احد.. سوا فيصل هالحركة ثلاث مرات وبعد عشر دقايق دش عليه..
فيصل ومسوي شكله خايف: علي ليش مسكر الليتات؟
علي: بس
فيصل: ما سمعت صوت مساع؟
علي: لا
فيصل: غريبة كل اللي بالبيت سمعو احد يطق عليهم الباب ثلاث مرات وكل ما يطلعون ما يلقون احد
علي: صج؟
فيصل: أي ليش انت ما سمعت؟
علي: امبلى
فيصل: اكيد يني
علي: لا اصلن ما في ينانوه
فيصل: من قال انت ما تدري عيل
علي: ما ادري عن شنو
فيصل: لا مابي اقوللك بعدين ما تنام بالليل
علي ومسوي روحه مو خايف واهو ميت من الخوف: لا قول عادي انا ريال والريال ما يخاف
فيصل: اكيد
علي: اكيد
فيصل: بس شوف هالسالفة محد يدري عنها الا ابوي وما قالها حق احد غيري لان اذا الكل درى راح يقولون خل نطلع من البيت
علي: ليش بيتنا شفيه؟؟
فيصل: بيتنا مبني فوق مقبرة
علي: جذاب
فيصل: قلتلك راح تخاف
علي: لا مو خايف كمل
فيصل: وبعدين راح واحد وبنى فوق هالمقبرة بيت واجره على ابوي بسعر رخيص وتعرف ابوي اول ما كان عنده فلوس فعشان جذي وافق
علي واهو ميت من الخوف:وبعدين
فيصل واهو يزيد من خوف علي : بس بعدين ابوي تزوج امي وهدم البيت القديم بس ما شال الاساس مال البيت القديم لان اذا شاله بيطلعون الارواح اللي بالمقبرة
علي: يعني ما شال الاساس؟؟
فيصل: لا بس قبل تسع سنين بالضبط وبيوم ولادتك المشئوم الطوفا مالت هالغرفة اللي احنا قاعدين فيها تهدمت وابوي كان يعرف السبب بس ما علم احد
علي: وشنو السبب؟
فيصل: لا تصير غبي ويا ويهك الارواح طلعت من المقبرة
علي: ها
فيصل: عاد انا لقيت بذاك اليوم ورقة من جلد خروف محطوطة بهالدار مكتوب عليها بلون احمر اتوقع انه دم
علي: شنو مكتوب؟
فيصل: مكتوب "نتلاقى بعد تسع سنين"..
علي حده والبجي
فيصل: انت مو خايف صح؟
علي: لا انا ريال
فيصل: عيل قوم ييبلي ماي
علي: انزين
طلع علي وفيصل راح الصالة ودشو دانة ورغد حق الغرفة اللي كانو فيها وخذو معاهم مسجلة صغيرة..
علي راح المطبخ وصب ماي وراح حق الغرفة وسكر الباب وما انتبه على دانة ورغد واول ما سكر الباب..
علي واهو يرجف: وين فيصل.؟؟!!
دانة مغيرة صوتها : تعال يا علي
رغد: اليوم صار عمرك تسع سنين
علي مخترع طاح منه الماي وقعد يبجي ويقول : الله يخليكم لا تاخذوني انا ريال
راحو ووقفو عند الباب عشان ما ينحاش
__DEFINE_LIKE_SHARE__

» [ ™S a s a ] ~ · 03-15-2008, 05:01 PM

دبآآ كمليها بليـــززززز

روعه دبووووووووتي نزلي البآآرت اللي عقب __DEFINE_LIKE_SHARE__

دانة الكويت · 03-15-2008, 11:13 PM

دانة قاعدة تضحك على شكله: نياااااهاااااااااهااااااا بس بشرط
علي: وما تذبحوني؟
رغد: نفكر
دانة: اول شي تروح الجمعيه تشتري حلاو شوباشوبس فراولة
رغد : بعدين تشتري من باسكن روبنز حق اختك دانة وبنت خالتك رغد
علي: انشالله
دانة: وتقول لامك انك تبي من برجر كنج وتشتري وجبتين رويال حجم كبير وتحطهم بغرفة دانة
علي: بس ما تسوولي شي؟
رغد: وتحل واجبات دانة لمدة شهر
علي: الله يخليكم لا تذبحوني انا ترى ريال
دانة: وتشيل جنطة دانة وتسوي جدولها كل يوم
علي: انزين
دانة: الحين تعال قول شنو طلباتنا
بطلت المسجل عشان تسجل كلامه..
علي: اييب حلاو شوباشوبس واطلب رويال حجم كبير حق دانة ورغد واحل واجبات دانة لمدة شهر واسوي جدولها واشتري من باسكن روبنز..

دانة: انزين والأهم من هذا كله انك ما تعلم احد ولا بيكون يوم موتك..
رغد: والحين نفذ طلباتنا ولا بنذبحك وندفنك هني
علي: انشالله .. وطلع واهو يبجي
واول ما طلع فطسو من الضحك على شكله..
دانة: واي شكله يموت من الضحك
رغد: يستاهل يقولج لازم تعلمينهم العين الحمرا
دانة: زين امشي خل نغسل وننسخ دفتر شوقو على ما تيي طلباتنا خخخخ
رغد: بريئات واايد خخخخ
اما علي واللي خذا من امه فلوس طبعا من غير ما تسأله لانه اصغر واحد ودلوع امه واليوم عيد ميلاده وقال للسايق يوديه الجمعيه ..

وشرا كل الاغراض اللي طلبوها البرد والحلاو والوجبات واول ما رد راح سيدا غرفة دانة..
طق الباب وحط الاغراض وطلع بسرعه
دانة : تعال علي شنو هذا
علي: هدية
رغد: هههههههههه
دانة: هديه خخخخخ
علي: دانووه عندج واجبات؟
رغد: ليش بعد؟
علي: انزين شرايج أسوي جدولج مال باجر؟
دانة: لا ما يحتاي انا اسويه
علي: لا انا بسويه
رغد مو قادرة تتحمل من كثر الضحك
علي خذا جنطة دانة وراح الصالة عشان يحل على راحته ..
وفي الصالة دشت مريم اللي كانت ياية من بيت ريلها عشان تنام عند امها لانها من زمان مو يايتلهم..

اول ما دشت لقت علي يفكر ويبجي<<مو عارف الحل خخخ ويمه جنطة دانة
مريم: علي شفيك؟
علي: مريووم امانة تعرفين حل هالمسألة؟
مريم: شنو هذا ؟ مو فاهمها؟ هذي سهلة تجمع الزوايا وتشوف يساوي 180 درجة.. بس انتو يعطونكم جذي؟ هذا مال متوسط
علي: لا هذا مال دانووه
مريم: وليش انت تحله؟ اهي قالتلك؟.. لانها تدري ان دانة دوم مخططاتها شريرة
علي: لا .. ومن الخوف قعد يبجي
مريم: علي انت ريال والريال ما يبجي
علي: مابي اقول بعدين يذبحوني
مريم: منو؟ دانووه
علي: لا دانووه مالها شغل
مريم: عيل؟
علي: مريووم تبيني اموت؟
مريم: لا وي اسم الله عليك قوللي محد راح يذبحك انا راح احميك<<ما لقت غير هالكلمة خخخخ
علي: ما تعلمين احد وما تقولين اني قلتلج
مريم: انزين
علي: طلعو روحين من المقبرة وقاللولي انفذ طلباتهم ولا يدفنوني
مريم: رغد هني ببيتنا؟
علي: اي
مريم عرفت السالفة لانهم مو اول مرة يسوون هالسوالف ودايم اهي تخرب عليهم
مريم: وشنو طلباتهم؟
علي: احل واجبات دانة لمدة شهر واسوي جدولها واشتري حلاو شوباشوبس فراولة وباسكن روبنز ووجبتين من برجر كنج .. مريووم بييون يدفنوني لا تخليني بروحي
مريم: اعلمك فيهم هذول ما يتوبون
علي: لا تروحين بيذبحونج بعد .. فهد يبيج <<فهد ريلها

مريم: انت مينون؟ من قاللك ان في ارواح اصلن
علي: فيصل يقول بيتنا بانينه فوق مقبرة
مريم: حلو والله فيصل وياهم بعد.. قوم وياي
علي: وين
مريم: علي يا الخبل ماكو ارواح يقصون عليك وبعدين انت ريال والريال ما يبجي ولا يخاف صح؟
علي: اي
مريم خذت علي وراحت حق غرفة دانة واللي كانو ياكلون اللي يابه لهم علي ومستانسين بس لما دشت مريم..
مريم: دانووه ورغد وويعه
دانة: شنو
رغد: شالسالفة
بس لما شافو علي
دانة: يا الفتان ما مدانا نتهنى بالاكل
رغد: حشا خواف ما يخلي شي بقلبه لازم يطلعه
مريم عطتهم زفة محترمة وخلتهم يسطرون دفاتر علي كلها ويسوون واجباته ويغسلون الحوش ..

اهمه ساكتين ما قالو شي لانهم يعرفون لو قالو كلمة زيادة جان تضاعف العقاب..

كتبو واجباته وسطروله دفاتره وراحو الحوش يغسلونه مع انه كان نظيف بس شيسوون حكم قراقوش "مريم" واللي قهرهم زيادة ان امس كان الجو غبااااااار يعني الحوش وصخ ع الاخر...

رغد: واي تكسرت ايدي
دانة: واجباتي ما سويتها
رغد: محد استفاد كثر شوق
دانة: اي والله جيس حلاو كامل وسوينالها دفترها ..
رغد: رفعي بنطرونج بفج الماي
دانة: اول شي ييبي المساحة
رغد: كاهي وراج يالعمية
رغد ودانة من كثر اندماجهم بالشغل سوو الحوش صالة تزلج يحطون الماي ويتزحلقون واول ما سمعتهم كوماري..
كوماري:سنو انتي سوي انا اللم مريوم <<شتسوون انا بعلم مريم
دانة: لا بليييييييييز
رغد:اييبلج فلم شاروخان
كوماري: هادا بجه في مسكل وازد<<اليهال مشاكلهم وايد
فيصل توه راد البيت وشافهم وشاف كوماري تزفهم...
فيصل: واككككككك يغسلون الحوش
رغد: كله من علي الفتان
فيصل: خخخخخ علم مريوم عليكم صح؟
دانة: وحكمت انا نكتب واجباته ونغسل الحوش
فيصل: احسن تستاهلون من قاللكم تخرعون الياهل بعيد ميلاده
رغد: لا يعني انت مالك شغل
فيصل: معلوم مالي شغل دانوتي انا سويت شي خخخخ
دانة: لا صوصو ما سويت
فيصل: يلا عاد ما اوصيكم نظفو عدل
__DEFINE_LIKE_SHARE__

دانة الكويت · 03-15-2008, 11:14 PM

][...الفصل الثاني...][
محمد: يبا يبا البشارة
بومحمد: خير انشالله
محمد: توقع منو بيي باجر؟
بومحمد: منو؟
محمد: عمتي خالدة
بومحمد: صج الله يبشرك بالشهادة
محمد: آمين توها داقة علي وتقوول انها بتيي باجر ع الساعة خمس
بومحمد: والله ولهت عليها

خالدة تزوجت إماراتي وسافرت الإمارات يوم تروح هناك كان عمر مريم سنتين والحين عندها ثلاث عيال وبنت أكبرهم البنت اسمها لولوه عمرها الحين 19 كبر خالد وبعدين هادي عمره 17 اكبر من شوق وشذى بسنة وعقب هادي أحمد عمره 9 كبر علي وسالم اصغر واحد عمره7 ..

شوق تعرفت على إماراتي من اربع اشهر وصار وقتها كله تكلمه ع المسنجر اهي ما كانت واثقة من حبه لها بس تعرف انها كانت تمووت فيه ولما سمعت الخبر على طوول دقت على بنت خالتها ريم عشان تقولها ..ريم اصغر من شوق بسنتين بس اهمه حيييل مع بعض وكل وحده اسرارها عند الثانية حتى شوق علاقتها بريم اكثر من شذى اختها مع انها اختها التوم وهالشي يضايق شذى واايد بس شوق عندها اشياء وايد مشتركة مع ريم اما شذى غير عنهم شذى وجمانة بنت خالهم مع بعض اما دانة واللي اهي كبر ريم كانت واايد مع رغد اخت ريم وكانو ثنائي مزعج مع ان رغد اكبر من دانة بسنة يعني بالمختصر خالتهم فوزية عندها ثلاث بنات وولد البنات فاطمة كبر مريم وبعدين جاسم كبر شوق وشذى وبعدين رغد اصغر منهم بسنة واكبر من دانة بسنة واخر وحده ريم كبر دانة واهمه يحبون الامارات وااايد :
شوق:الووووو
ريم: ها
شوق:ريموو وويعه ردي عدل
ريم: انشالله ها بنت خالتي شتبين امري تدللي
شوق: انزين خلاص شلونج؟
ريم: بخير
شوق: قولي مبرووك
ريم: على شنو
شوق: قولي مبرووك
ريم: مبرووووووووووووووووووووووووووووووووووووووووووووووو وك
شوق: عمتي باجر بترد من الامارات
ريم: عمتج؟
شوق: أي
ريم: من وين طلعت هذي
شوق: جب واحترمي نفسج
ريم: سوري بس انتي من متى عندج عمه؟
شوق: من زمان سالفة طويلة
ريم:اهاا يا حظج عندها عيال
شوق: ما ادري والله
ريم: انزين قلتي حق حبيب الروح؟
شوق: واي فديته لا الحين بقوله
ريم: يلا عيل
شوق: اوكيك بباي
ريم: باي
على طول شبكت ع المسن عشان تقوول حق سلطان..

شوق: سلطان
سلطان: هلا وغلا
شوق: عمتي بتيي باجر من الامارات
سلطان: عندج عمه بالامارات؟
شوق: أي ولا مرة بحياتي شفتها اهي متزوجة اماراتي
سلطان:امي امس ترمس اختي وخبرتها انا بنروح الكويت باجر
شوق: صج
سلطان: هذا اللي سمعته
شوق: وناااسة
سلطان: وليش ونااسة
شوق: راح اشوفك
سلطان: هيه
شوق:روح اسأل امك متى بتيوون
سلطان: بعدين مالي خلق شوقو ابا صورتج
شوق:وانا بعد ابي صورتك
سلطان: يصير خير
شوق: يعني لا
سلطان: انا قلت اول
شوق: انزين بشرط
سلطان:شو شرطج
شوق: تدزلي فيديو وانت تييول
سلطان:انتو البنات ما ادري شو تحبون باليولة
شوق:انزين؟
سلطان: ما اعرف
شوق:بليييييييييز بشوفك وانت تييول
سلطان:ما اعرف
شوق:خلاص ما في صورة
سلطان: لا والله
شوق: مابي مابي مابي ابي تييول عشان خاطري بلييييييز
سلطان:لا شواقي صدقيني ما اعرف
شوق: خلاص انزين الحين برووح ويا امي بنشتري اغراض حق البيت عشان عمتي
سلطان: شواقي اول ما نوصل الكويت راح اخطبج على طووول
شوق:يصير خير
سلطان : يلا اخليج الحين
شوق: بااي
راحت شوق وهي طايرة من الفرحة بتشوف سلطان حدها مو مصدقة وما قدرت تنام ذيج الليلة..

كان يوم الاربعا وكان يصادف اخر اسبوع في عطلة الربيع "الكويتيين يسمونها عطلة خمستعش لانها 15 يوم" الكل مستانس اتصلو على مريم عشان اتيي وجهزو البيت وبخروه وسنعوه.. الحين الساعة 4 الكل تجهز عشان يروحون المطار..

بومحمد الدنيا ما تشيله من الفرح بيشوف الغالية اخته ما شافها من 25سنة الكل وصل المطار شوق كانت تنطر سلطان اللي قاللها انه راح يلبس دشداشة بيضا وغترة ووصفلها شكله واهي قالت له انها راح تلبس جينز وبلوزة حمرا وبترفع شعرها ..

في المطار..
بومحمد: مو جنهم تأخرو؟؟
محمد: لا توها الساعة تصير خمس
فيصل: انشالله الحين يوصلون
مريم: وينها عمتي يلا

خالد وطلال وشذى كانو قاعدين بالكافيه ..
دانة وعلي وجاسم ونورة وسارة مرت ابوهم كانو في البيت..

اما مريم ومحمد وفيصل ومنيرة وسالم(بومحمد) كانو ينطرون خالدة على احر من الجمر وشوق كان كل همها انها تشوف سلطان ..
واخيرا وصلت الطيارة الكل كان يشوف الصالة اللي ييون فيها الواصلين ..

وصلت خالدة مع ريلها سيف وعيالها هادي واحمد ولولوة وطبعا اول شي سلمت على اخوها الغالي وعيال اخوها ومنيرة مرت اخوها.. وطبعا الدموع شي اساسي حتى لولوة دمعت

شوق بهاللحظة كانت رايحه المطعم تشتري لابوها ماي بس الصدمة كانت لما شافت سلطان ما توقعته بهالجمال طويل وورزه مع انه شوي ضعيف بس كان شكله حلو وطبعا الغترة الاماراتية المميزة..اهي ما تدري ان هذا سلطان بس كانت حاسة..

بومحمد:نورت الكويت
سيف: بوجودكم الغاليين
بومحمد: ما بغيتو تييون
خالدة:حبيت اسويها مفاجئة بس محمدوه لازم يعلم

محمد: افا عليج عمتي
سيف: سلمو على خالكم
لولوة: خالي شحالك؟ ربك الا بخير
بومحمد: بخير الغالية وانتي علومج؟
لولوة: بخير دامكم بخير
سيف : وينه المخبل لازم يختفي
خالدة: حرام عليك قاللي يوعان وقلتله يروح المطعم
فيصل: منو هذا
خالدة: ولدي هادي
مريم: زين انكم ييتو والله اشتقنالكم
لولوة: اشتاقت لج العافيه
احمد: امايه يوعان
منيرة: يلا حبيبي الحين نروح البيت مزهبتلكم ذاك العشا

سيف: تسلم ايدج
منيرة: هذا الواجب

شوق كانت بالمطعم اللي كان فيه هادي.. شوق وهي تكلم روحها هذا اكيد سلطان بس شلون اكلمه راحت صوب الريال اللي عبالها سلطان مرت من عنده ولا مريم تناديها ..
مريم: شوق شوق تعالي بسرعه
شوق:زين كاني يايه
راحت شوق صوب مريم وسلمت على عمتها وعيالها
خالدة: فديتج ما احلاج
شوق مستحية
خالدة: عاد شكلي بتلخبط بينج وبين شذى
مريم: الفرق بينهم حبة الخال
خالدة: طالعه على عمتج
خالدة عندها حبة خال وبنفس مكان شوق كان شكلها وايد حلو صغيرة ولونها اسود ولان خدها ابيض فطالع غاوي على قولة الاماراتيين

بهاللحظة دقت منيرة على خالد عشان اييون ويسلمون على عمتهم لانهم كانو بالكوفي شوب
ويرن تلفون شوق: احبك لو بعيد الدار عني جداك....
شوق: الووو
شذى: وينكم قاعدين ندوركم
شوق واهي تدورهم شافت وراها ولا سلطان : ها
شذى: شنو ها أقولج وينكم؟
شوق:.................
شذى: كاني لقيتكم باي
شوق:............
خالدة:وهذا ولدي هادي ..هادي سلم على خالك
هادي واهو منصدم : ها
سيف: سلم على خالك
هادي واهو يطالع شوق: مرحبا مليون ولا يسدن في ذمتيه شحالك خالي
بومحمد: بخير ونعمة
هادي:دوم هب يوم
شذى وخالد وطلال سلمو على عمتهم
خالد: ها ما تعرفنا على عيال عمتنا
خالدة: هذي لولوة
خالد: قوة لولوة
لولوة: الله يقويك
خالد: شلونكم
هادي: يسرك الحال ولا يضرك
منيرة: يلا خلونا نروح البيت الحين
الكل: يلا
خالد : انا باخذ عمتي بسيارتي
بومحمد: لا انا اللي باخذها
خالد: براحتك عيل انا باخذ البنات
بومحمد: لولوة وشذى وشوق بسيارة خالد
فيصل: وانا باخذ احمد وطلال ومريوم
بومحمد: وانا باخذ ام هادي بوهادي وام خالد(منيرة)
محمد:وانا منو معاي؟
مريم : محد
هادي: وانا شو بتخلوني هني؟؟
محمد: لا تعال معاي
منيرة: يلا توكلنا على الله

تحركت السيارات الا سيارة محمد تأخرت شوي..
في سيارة خالد..
شذى: وين شوق؟
مريم: ويييي اهي قالتلي برووح الحمام
خالد: لا والله
شذى: مريوم دقي عليها
احبك لو بعيد الدار عنك :الوو وينكم
مريم: سوري نسيت
شوق:لا والله
مريم: شوفي محمد ما مشى ردي وياه
شوق: هين اوريكم باي

دقت على محمد على طول
شوق:الوو
محمد:هلا بشواقي
هادي فز قلبه هذي شوق
شوق:محمدوه راحو عني نسوني
محمد: هههههههه
شوق: لا تضحك انت مشيت ولا بعدك
محمد: لا انا بماكدونالز
شوق: خلاص انا يايتلك الحين
محمد:اوكي انطرج

وصلت شوق وما تدري ان هادي موجود.. اصلن ما انتبهت عليه كانت شوي وتبجي..

محمد: شدعوه كل هذا؟ هههههههه صج بنات لو نواري تسوي جذي جان ذبحتها
شوق: أي من قدها نواري بعد تخيل لو نسيتوني باقعد بروحي
محمد: بسج دلع عاد يلا تبين تاكلين ولا نرووح؟
هادي:لا ما تبي شي
شوق ما تدري ان هادي عندهم اول ما شافته مسحت دموعها وسكتت
محمد: يلا تأخرنا على نواري
هادي: منو نواري
محمد:هذي راس المال مرتي الغالية ام جاسم
هادي: الله الله كل هذا حب
محمد: احم احم عندنا بنات هني

هادي طالع شوق بنظرة ذاابت البنت

طلعو من المطار هادي طول الوقت واهو يشوف شوق ومو مصدق ان شوق اللي طول الوقت كان يكلمها بتكون يوم من الايام قريبة منه لهالدرجة شوق تصير بنت خاله معقولة؟
وشوق بعد طول الوقت ساكتة ومصدومة ما توقعت ان سلطان اللي اهو هادي يكون ولد عمتها..!! __DEFINE_LIKE_SHARE__

دانة الكويت · 03-15-2008, 11:27 PM

وصلو البيت وأول ما شافو شوق الكل قعد يضحك ..
شوق: أي ضحكو لو انتو مكاني شنو راح تسوون وراحت فوق
هادي واهو ميت من الضحك على شوق: شوي شوي لا تطيحين على ويهج

شوق عصبت وراحت غرفتها وقعدت تبجي شوق كانت واااايد حساسة وتبجي على أي شي ..

سارة: مرحبا الساع تو ما نور البيت
طلال: اووه سويرة والله تعرفين اماراتي
بومحمد:منو سويرة استح على ويهك هذي مرت ابوك مو اصغر عيالك
طلال: عادي ميانة
بومحمد: عيب يا ولد
هادي: ها وين راح ننام؟؟
منيرة: شكلك دايخ البيت بيتكم بأي مكان تبون
خالد واهو يطالع لولوة : انا مستعد اتنازل عن داري
شذى: لولوة بتنام عندي انا
علي: واحمد ينام عندي
سارة: وانا بنام عند دانة وداري ينام فيها بوهادي وأم هادي
خالدة: لا اخاف نكلف عليكم
منيرة: لا كلافة ولاشي
بومحمد: وهذي المشكلة وحليناها
هادي: يا الله نسيتوني بالمطار والحين بتنسوني اذا ما تبوني ترى ارد الامارات الحينه
طلال: لا افا ترد وفيصل موجود لا ما توقعتها منك فيصل يطلع وانت تدخل صح فصيل؟
فيصل: ها أي افا عليك.. طلول شغلك بعدين
الكل يضحك

مريم ونورة واهمه طالعين من المطبخ : يلا تفضلو ع العشا
نورة : جاسم روح ناد بابا تلقاه فوق بداره
جاسم: انثالله ماماه
جاسم راح ينادي ابوه

الكل تيمع ع السفرة الا شوق اللي داخت ونامت
هادي: وين راحت شوق؟
شذى: مسكينة نامت واهي يوعانة
لولوة: فديتها اكيد زعلت الله يهداج مريوم
مريم: شسوي يعني الواحد ما ينسى
بومحمد:خلصونا من هالسالفة واكلو شوقو تتدلع
منيرة: بروح اشوفها
دانة: لا يمه قعدي انا خلصت الحين أروح اشوفها
هادي طول الوقت يشوف شذى: سبحان الله نسخة من بعض
راحت دانة غرفة شوق ..
دانة: شواقي شواقي قومي ما تبين عشا
شوق: لا دانووه مابي انتي سكري الليت والباب وطلعي
دانة: بتنامين بهدومج ؟؟ قومي بدلي
شوق: مالي خلق تعبانة يلا روحي
دانة: زين برووح

صارت الساعه 10 مريم ردت بيت ريلها الكل كان تعبان ويبي ينام الا هادي كان قاعد بالصالة يشوف التلفزيون ..
فيصل: ما تبي تنام؟
هادي: لا والله ما فيني نوم

فيصل: براحتك اذا بغيت تنام غرفتي ثالث وحدة ع اليمين
هادي: اوكي
طلال: صدتكم شتسوون؟؟
هادي:نغازل خخخخ
طلال: الله وين البنات ما اشوف احد
فيصل واهو رايح داره: ما راح يخليك بحالك
طلال:اقوول
هادي: هلا
طلال: لا ولاشي
هادي: لا قوول شبغيت
طلال:ولاشي استعبط
هادي: يا ريال خل عنك هالسخافة
طلال واهو يسوي نفسه بنت :سخافة لا مستحيييل مستحيييل جرحت مشاعري
هادي: هههههه
طلال: يحليلك
هادي: يحليلك انت
طلال: شفيك ما سبيتك يحليلك يعني ياحلاتك
هادي: ادري ادري
طلال: ما تبي تنام ؟
هادي:شو فيكم انتو مضايقكم لا ماابغي انام
طلال:زين براحتك متى ما تبي تنام روح غرفة فصيل
هادي: اصغر عيالك فصيل اسمه فيصل
طلال: لا يحوشك اصغر عيالي عمره 26 عيل انا جم عمري
هادي: هههههههههه
طلال: لا تضحك أسنانك تلوع الجبد
هادي: عدال من حلات اسنانك
طلال: انا افرش اسناني 3 مرات باليوم واروح طبيب الاسنان خمس مرات باليوم
هادي: قايل نكتة ويا ويهك
طلال: ومن قاللك اني قايل نكتة مابي اقول نكتة
هادي: يكون احسن
طلال: تصبح على خير بروح انام
هادي:وانت من اهل الخير

لحد الحين اهل الامارات ما حفظو اساميهم وما يفرقون بين شذى وشوق صارت الساعة 3 وهادي ما قدر يقاوم نام ع القنفه اللي بالصالة ..

شوق حست باليوع لانها ما تغدت ولا تعشت قامت من فراشها وراحت المطبخ عشان تسوي شي تاكله بطلت الثلاجة وطلعت خبز وجبن وسوت بيض لانها كانت يوعانة واايد وشهيتها مفتوحة وطبعا سوت لها كوب نسكفيه لانها ما تستغنى عنه وراحت صالة التلفزيون عشان تاكل ..

اول شي بطلت الليت والتلفزيون بس الصدمة كانت لما شافت هادي نايم احتارت شتسوي تقعده عشان ينام فوق او تخليه نايم.. سكرت الليت وصعدت فوق عشان تييب لحاف حق هادي يابت له وراحت غرفة الاكل عشان تاكل على راحتها وما تزعج هادي ..

بالصالة هادي حس بالدفا وعيز يقوم يروح فوق .. بعد نص ساعة خلصت شوق من الاكل بس ما بغت تنام لان ما بقى على اذان الفير الا شوي ودت المواعين المطبخ وصعدت دارها فجت اللابتوب وعلى طول شبكت ع المسنجر واول ما شافت سلطان مو شابك تضايقت نست انه تحت في بيتهم بس ريم بنت خالتها كانت شابكة فقعدت تسولف معاها..
احبك يا بعد هلي:
ولكمووو
I can't stop thinking about him;
يسلموو

احبك يا بعد هلي:
عسا ما شر ما تشبكين بهالوقت الا اذا في شي
I can't stop thinking about him;
ما في شي بس شبعانه

احبك يا بعد هلي:
اهاا انزين الحمدلله على سلامة عمتج
I can't stop thinking about him;
الله يسلمج عويييييييييييش سلطان هادي

احبك يا بعد هلي:
ها
I can't stop thinking about him;
هااادي عندنا في البيت

احبك يا بعد هلي:
منو هادي
I can't stop thinking about him;
ولد عمتي

احبك يا بعد هلي:
لا والله حلفي
I can't stop thinking about him;
والله
احبك يا بعد هلي:
انزين عادي شنو يعني

I can't stop thinking about him;
مالت اقولج هاادي
احبك يا بعد هلي:
منو هادي

I can't stop thinking about him;
ريموو هادي اهو سلطان
احبك يا بعد هلي:
منو سلطان

I can't stop thinking about him;
يا الغبيه سلطان بيي الكويت صح؟
احبك يا بعد هلي:
أي صح

I can't stop thinking about him;
انزين سلطان يطلع ولد عمتي
احبك يا بعد هلي:
خخخخخخخخخخ وااااااااااكككككككك ههههههههههه

I can't stop thinking about him;
شفيج والله من صجي
احبك يا بعد هلي:
الله يتمم عليج احلى فلم هندي

I can't stop thinking about him;
ريموووه اقولج انا مومصدقه
احبك يا بعد هلي:
شوقو لا تقصين علي

I can't stop thinking about him;
والله من صجي
احبك يا بعد هلي:
وينه الحين

I can't stop thinking about him;
نايم تحت
احبك يا بعد هلي:
وانتي شنو

I can't stop thinking about him;
شنو اللي شنو
احبك يا بعد هلي:
اهو يدري ان انتي شوق؟

I can't stop thinking about him;
أي
احبك يا بعد هلي:
يا حظج والله باجر انا عندج

I can't stop thinking about him;
شتبين انتي
احبك يا بعد هلي:
افاا انا اللي

I can't stop thinking about him;

انزين خلاص
احبك يا بعد هلي:
خوفي تغارين

I can't stop thinking about him;
روحي لاااه بروح تحت
احبك يا بعد هلي:
سلمي ع الحبايب

I can't stop thinking about him;
باي
احبك يا بعد هلي:
خخخخخخ بايات

نزلت تحت مرة ثانية لقت هادي قاعد اول ما شافته حاولت تروح عنه بس ما قدرت..
هادي:شوق..؟
شوق:هلا
هادي:شواقي انتي مصدقة اللي قاعد يصير ؟؟
شوق: لا
هادي: ما توقعتج ابد تكونين قريبة مني لهالدرجة
شوق: ولا انا سلطان
هادي: سلطان هههههههه
شوق: ليش ما قلتلي ان اسمك هادي؟
هادي: اخاف تسحريني خخخخ
شوق: هههههههه
هادي: فديت ه الضحكة
شوق: ..................
هادي: ما توقعتج بهالجمال
شوق ويهها يعكس الوان
هادي: بلاج؟
شوق:..............
هادي: يا ويل حالي من اللي يستحون
شوق: هدوي بس عاد
هادي: تصدقين واايد تتشابهون انتي وشذى
شوق:بس يفرقنا حبة الخال
هادي: محليتج وااايد
شوق: لا.. يعني انا مو حلوة؟
هادي: من قال ليش تفهمين غلط؟
شوق: اها عبالي بعد
هادي:هههههههه __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
شرح أحبك ليه ما أحبك - يامعلمني أحبك حيل أحبك {وسائط صوتيه شعريه جديده	محروم.كوم	منتدى أخبار المواقع والمنتديات العربية والأجنبية	0	06-11-2010 03:30 AM
مطلوب ارشفه تحتسب بعدد الزوار الفلوس بعدد الي يدخلو المنتدي التفاصيل بالموضوع	محروم.كوم	منتدى أخبار المواقع والمنتديات العربية والأجنبية	0	04-18-2010 09:10 PM
كل زين اشهاده وانتم بعيد منوتي ليتك معي وان سهرت الليل اهوجس بك واعيد هل لاجلك مدمعي	Al-Rayyani	سيارات و دراجات	12	10-19-2009 09:43 PM
حتى آسمك لآ بغيت آنطقه يطلع لي آحبك يا آحبك	ملك الشباب	هواتف , مسجات , وسائط , برامج , ثيمات , نغمات , بلوتوث	13	10-14-2008 09:35 PM
بعيد الدار - محمد عبيد الكعبي	الميهود	طلبات الاعضاء	0	01-10-2008 12:56 AM