رواية حلم سرآب في رحلة عناء بقلمي : أسرار قلب =) - الصفحة 13

Shamma_HA · 11-01-2013, 08:50 PM

Yeeeeees .... Waiting __DEFINE_LIKE_SHARE__

أسرار قلب · 11-01-2013, 10:27 PM

أعتذذذذذذذر عالتأخييييير >< طوفوا الاخطاء الاملائية

((21))

مزعجٌ الصمت ..
مزعجٌ إختفاء الحقيقة ..
مزعجٌ أن نكون وسط كذبة إستمرت طويلاً ..
في اليوم الثاني – الصبح [ بيت سيف ] ..
يلست مكاني وأنا بعدني منصدمه من أمس لين اليوم !
ودانة إلي ماتروح من بالي معقولة سيف يبي يرد لها ونكون
نحن الخمسة في نفس البيت !

أنا لازم أدور حل وأحل هالمشكلة قبل لا تزيد المشاكل أكثر ..
فكرت وايد .. ماحصلت حل قررت أروح المستشفى اليوم عسب
أشوف إذا حالتي الصحية تحسنت ولا ؟
طبعا سيف عادي عنده روحي بس لاتتأخرين ..
وصلت المستشفى ورحت عند الدكتور أشوف الفحوصات وإذا حالي
أوكيه ولا .. طبعا سحبو مني دم عسب الفحص طلعت من الغرفه

وشفت وحده غريبه ما أعرفها بس سألتني : لو سمحتى تعرفين وين دكتور محسن ؟
رديت : لا والله ما أعرف ..
ردت : أها مشكوره ..
قلت : هههه لا شكر على لا واجب ..
ضحكت : ههههه حلوه منج . . . . عسى ماشر سلامات ؟
رديت : الشر ماييج حبيبتي والله ماشي فحوصات ..
رن فونها : أوك السموحه على الازعاج " وتحرك ترد عالفون "

تحركت أنظر دوري عسب أرمس مع الدكتور ..
كان زحمه وشعور ما احبه لما الموجودين يطالعونك لي شجيه يطالعوني !!!
تأففت بصوت مسموع وقلت : يالله صبرك ..
" وحده من الحريم : خير بنيتي شو بلاج ؟
رديت : ها ولا شي ..

شوي وييه دوري دخلت عند الدكتور ويلس يتكلم معاي
عن الادوية والاكل الي لازم اكله باختصار نصائئئئح ونصااااااااااائئئئئئئح
وبعدها ظهرت .. قلت برد البيت وأنا طالعه شفت البنت الي شفتها وسألتني عن الدكتور واقفه
وشكلها مضايقه او في شي .. رحت صوبها : خير اختي شو صار معاج ..
ردت علي وصوتها في نبرة حزن : ولا شي بس مضايقه مشاكل عائليه واحاتي كيف برد البيت ..
واضح منها انها بعدها ماتسوق او من عايلة بسيطه مدري ليش حسيت جيه يمكن من مظهرها
البسيط وملامحها البريئة : زين حبوبه شرايج اوصلج معاي ؟
ردت : لآ لاااا مقددر ..

استغربت ليش جيه كأنها خايفه : ليش عادي والله حياج بوصلج " ومسكت ايدها "
كانت متوتره : بس مقدر أظهر أخوي بيسوي لي سالفه ..
يلسنا نمشي : برايه عيل بتميين هنيه لي متى ..
ردت : بعد 3 ساعات بييه اخويي ..
إنصدمت : شووووه !!! بتيلسين هنيه 3 ساااعااات !!
نزلت راسها : ماعندي حد ثاني وأخوي مشغول فالدوام ..

تحركنا لين ما ظهرت عقب قلت : مب مشكله انا بوصلج ..
ردت : مقدر والله ..
قلت : زين كلمي اخوج ..
طلعت فونها تتصل على اخوها .. : ألوو .. علي .. بروح مع ربيعتي هيه الي بتوصلني ..
لا لا على طول برد البيت .. ان شاء الله .. أوك .. مع السلامه ..
ردت علي : خلاص قال عادي لان مشغول ..
ابتسمت : يالله تعالي بوصلج ..
\

/

\

/

\

/

( بيت بو حمد )
في غرفة حمد البنات يالسات ..

شوق : أووووووووووووووف أول مره احس جيه اشتقت لحمد مع انه احيانا اكره ..
آمون : هههههههه الحين انتي ليش يايبتناا هنيه فالحجره !!
شوق : جيه مدري من الشوق ..
آمون : هههههههه زين شواقه عيل وينها ميثووه ..
شوق وتفكر : مدري يمكن عندها شي اليوم ..
عنود : خخخخ شو هالشي اكيد كاره عمرها مع سيف واهله .. " شوق طالعتها بنظره "
آمون : اييه حرام علييج ليش انتي جيه مب نحن كنا فرحانين فالبداية ..
شوق ومتنرفزه : هذييي يبالهاا ضرب عنوودووه ميثوه مرتاحه مع ريلها ولاتقولين جيه ..
عنود وتضحك : هههههههههه جب والله أنها مب مرتاحه ..

دخلت أم حمد : بلاكن يالسات في حجرة الصبي !
آمون : خالو شوق مشتاقه لأخوها حمد عس بجيه هههههه
أم حمد وتضحك : ها عيل منو الي قالت مابشتاق له وروح مانباك وهالرمسه ..
شوق وتضرب آمون عالخفيف : انتييييي لازم تفتنين عن مشاعري ..
الكل ضحك .. عنود : ههههههههههههه الله عالمشااعر ..
أم حمد : يالله ظهرن من الحجره ويلسن فالصاله معانا..
البنات : أن شاء الله .. " عقبها ظهرت ام حمد وبدأت الضرابه بين شوق وآمون "
شوق : هذيييييييييي بذبحهااا كله تنقل الرمسه ..
آمون وتركض تبي تظهر من الحجره : ههههههههههههههه باااااااي ..
عنود وتضحك : ههههههههههه خااااالووووووووه شوووق تبي تضرب آمون ..
شوق : جذااااااااااااااااااااابه ..

( فالصاله )

أمون داخله وتضحك : ههههههههه ههههه " وتتنفس " ههههه
أم حمد : بسم الله شوفيكن اليوم ..
أمون وتيلس : هههه ماشي شوق استخفت ..
دخلت شوق : شوفيني أنا !! والله أنا مضايجه اصلا .. "ويلست عند امها "
خالتها : شوق مضايقه افا من شو مضايقة ؟
شوق : حمدد راح وخلاني بروحي وفطووم كله دوااام ..
خالتها وتضحك : ههه عس بجيه خلاص صبري هالاسبوع رادين ..
شوق وتتأفف : اوووف متى كل مره يغيرون رايهم ..
أم حمد : خليهم زين على راحتهم .. عيل وينها ميثه مامرت اليوم ؟
شوق : والله ما ادري ماترد علي ..
\

/

\

/

\

( في السياره )

طالعتها ساكته وماتتكلم اظن بعد هاللفه بيتهم : زين ماقلتي شو اسمج ؟؟
البنت : خوله ..
ابتسمت لها عسب لاتحس بضيقه : عاشت الاسامي وأنا ميثه ،
خوله ومستحيه : والله معرف شو اقولج تعبتج معاي ..
ردييت : لآ شووو عادي نفس دربي اصلا ..
ردت : هذاا البيت ..
بركنت السياره وقلت : مب بعيد عني يعني نفس الشعبيه .. خلاص أي وقت تبين حد يوصلج خبريني ..
خوله : لا مابي اتعبج معاي ..
رديت : والله عادي .. بعطيج رقمي عطيني فونج ..
مد ايدها تعطيني الفون .. وعقب سجلت رقمي لها ، : أي وقت اتصلي وبوصلج ..
خوله بهدوء : ان شاء الله ..

قلت : والله انا مستانسه اني حصلت حد معاي قريب من بيتي على الاقل اذا تمللت امر عنج صرتي اربيعتي ..
ضحكت لاول مره : هههه هيه حياج بيتنا ومشكوره وايد مدري شو كان بيصير معاي فالمستشفى بروحي ..
رديت : العفو حبوبه وأنا انصدمت صراحه كيف يخلونج بالساعات بروحج فالمستشفى ومحد راضي يردج ..
خوله : ماعندي حد غير اخوي الكبير الي يسوق عسب جيه ومب اول مره ..
انصدمت : ليش كل مره يخلونج بالساعات فالمستشفى ..

حركت راسها بمعنى هيه : دوم جيه أحايا احاتي اروح مكان وما احصل حد يردني البيت ..
كسرت خاطري : يعني طول عمرج محبوسه فالبيت ..
ردت : هيه بالنادر اطلع وحتى دراستي فالجامعه وقفت من كم شهر لأن أخوي مب طاعي يوصلني الجامعه ولا اني اتم في السكن مع ربيعاتي ..
قلت : اسحميلي صراحه اخوج فضيع لي شجيه يعني ..
قالت : لا هو معذور ماعندنا حد يشتغل غيره مايقدر يوقف شغله ..
رديت : أهاا السموحه ماكنت أدري..
خوله : لا عادي يالله السموحه على الازعاج .. في امان الله
قلت : الله وياج حبوبه .. "يلست اطالعها لين مادخلت البيت مدري ليش حسيت بالمسؤوليه لاني وصلتها كأنها إختي الصغيره "

حركت السياره عسب ارد البيت شفت فوني شوق متصله 5 مرات ..
اتصلت .. : هلا شوق ؟؟
شوق : وييييييييييييييييننننننجج !!
رديت : بلاج شوي شوي هههه راده البيت ..
شوق : تعبببت وأنا اتصل .. افااا مابتمرين عندنا اليوم ؟
قلت : المره اليايه إن شاء الله ..
شوق : اووووووف زيييين ..
قلت : بلاج مضايقه ؟
شوق : مااشي بس جيه ..
ضحكت : هههههه او كماماتي يالله عيل برمسج عقب ..
شوق : زين تحملي من روحج ..
رديت : من عيوني في أمان الله ..
شوق : بااي "وسكرت "
\

/

\

/

\

/

\

(( دخلت البيت كانت لأول مره مرتب ))

التفت شو السالفه اليوم مرتبين البيت ومنظفينه فالعاده أنا إلي أنظف ..
دخلت المطبخ محد .. رحت الغرفة وبدلت ثيابي ورحت أسوي لي شي اشربه ..
سويت جاي وقهوه وحطيت الصينيه فالصاله اذا حد يبي يشرب ..
ويلست آكل بسكوت وأطالع مسلسل ياباني في اللاب ،

شوي واسمع صوت سيف : عساس تاكلين شي عدل كيف ماتبين تمرضين علينا ..
أنا اسوي عمري ما اسمع طاف لاني حاطه سماعه ،
سيف : مممممم الظاهر ماتسمع زين نوووره .. نوووره ؟؟
دخلت نوره : شو تبي ؟؟
سيف : اقولج نوره كلمتي دانه ..
أنا هنيه جيه بدون ما احس بعمري التفت .. عقب رجعت اطالع فاللاب اوني ما سمعت ..
نوره : هيه كلمتهاا زين ليش مهتم الحينه ؟ ؟
سيف وبهدوء : عقب بنرمس ..
أنا ساكته ..

نوره : زييييين متى ناااوي تنقلووون !!!
سيف : قلت عقب بقولج في ناس تسمع ..
نوره وتضحك : ههههه زين اميه بعدها معصبه عليك ..
سيف : والله مدري ليش تكرهوني
نوره وتفكر : واضح ليش وبعديين زوجناك وبعد مب عايبنك يعني البنات ماقصروا ساره وشيماء لما خبروني عن ميثه ..
يوم قالت جيه تذكرت قبل لما انخدعت ووافقت على سيف وكان السبب نوره وشيماء وساره ..
حزتها رجع حقدي على ساره صحيح ان الي صار صدمه وانتهى من زمان بس جرح من انسان
عزيز عمرنا ماننساه .. وشيماء الي خربت بيني وبين سعود حتى للحينه سعود مارمسني من يوم سافر..

وأنا هنيه أحاتي شو صار معاه وليش تأخر ..
تذكرت خوله هيه يمكن اخوها وعدم اهتمامه يقارب سعود وطريقة تعاملة معاي اخر فتره ..
يلست أفكر في امور وايد .. أنا ضحيت في وايد امور ودراستي علشان سيف ييه الوقت
الي ادور طريقة ارد حياتي مثل ما كانت مب ذنبي ان انسان عاجر في حياته ومايقدر يتقبل العلاج ..

شوي وترد نوره حجرتها ..
وسيف يتجدم صوبي وشل الللاب مني .. : بسج مسلسلات ..
شليت السماعه وقلت : ها ؟
سيف : خخخ اوونه ماتسمع اقولج في موضوع لازم نرمس عنه ..
أول ماقال جيه ييه في بالي دانه ورشود ولدهم ..
سيف ويطالعني يترى رد مني ..
قلت : كيفك سو الي تباه مايهمني اصلا ..
سيف : شو بلاج ماقلت شي شو الي كيفي ..
وقفت : كيييفك في كل شي تبي تسويه ولا تاخذ رايي في موضوع من اليوم ورايح لانك من البداية ماتطلب رايي والحينه مابيغير شي ..
تحرك رحت الحجره وسكرت الباب ..
قهرررررر لييش جيييه صااار اوووف انسدحت على الشبريه شوو الحينه مييثه ..
تذكرت ان فوني فالصاله .. قمت من مكاني وظهرت من الحجره اشل فوني وارجع شفته بعده مكانه ..
خذيت فوني ويايه برد ..
سيف : سعود كلمني ..
أنا ومنصدمممه : مممممممممممممتىىىى ؟؟؟؟؟؟؟؟؟؟؟؟؟؟؟؟؟؟
سيف وماسك ضحكته : يالخبله هذا الموضوع الي كنت برمسج فيه ..
انا ومنصدمه وانا عبالي بيكلمني في شي ثاني حسييت باحرااج ومتفشله على كيفي فسرت الي كان بيقوله !!
سيف : خبرني اقولج بعد اسبوعين راد ..

أنا وبخوف : سيف والله احاتي طول وايد برع البلاد ..
سيف : لاتحاتين مافيه الا العافيه وبيرد لكم كم شغله وراد ..
أنا ومب مستوعبه : شو هالشغله الي طول فيها جيه ..
سيف : مدري المهم لاتحاتين ورمس امج وابوج بعد ..
أنا وقلبي مب مطمن : مع ان احساسي يقول في شي غريب فالموضوع
سيف : احساس اونه ..
تذكرت الي قلته له وعلى طول تحرك من مكاني ورديت الحجره ..
اتصلت في اميه ..

أميه : هلا أميه ميثه شحالج ؟
رديت : أهليييييين سعععععوووود رمسكم ؟؟؟
اميه : هيه رمسناه وسلم عليج ..
قلت بحزن : لييش مارمسني ..
اميه : المره اليايه ان شاء الله لاتحاتين .. خبريني كيف حالج وحال ريلج ..
رديت : الحمدلله ماشي الحال باجر بمر عندكم ..
اميه : حياااج اميه كلهم بيمرون باجر ..
قلت باستغراب : منو ؟؟
اميه : عمج بو عبدلله والعيال وبيت عمج حمد وعيال عمج الله يرحمه ..
قلت : هيه يبون يشوفون ابوي حليله يستانس يوم يشوفهم .. زين مب مشكله بكلم سيف وبمر عندكم ..

اميه : اذا محتايه شي ولا فخاطرج شي انا موجوده وام مايد بعد خبرتني اقولج اذا محتايه شي ..
رديت : فديتهاا اشتقت لهاا ولميووود حبايبي والله ..
اميه : هيه تدرين ميود مدرسه فالعين ماتروم تمر علينا مشغولين تقول باقرب فرصه بتمر يمكن باجر اذا الله راد..
تحمست : هييييييه جااااانزيييييين ,..
أميه : شخبار سيف ..
رديت : بخير .. لاتسالين عنهم وايد ..
اميه وتضحك : ههه كيف ماتبيني اسأل هو بحسبة ولدي سلمي عليه وعلى الباقيين كلهم ..
رديت بقهر : زين الله يسلمج ..
أميه : ههه يالله عيل تامرين بشي بروح اعابل فالمطبخ ..
قلت : هييه خبري حمودي باجر بمر عنده وبشوف يدرس ولا لعبب ..
اميه وتضحك : هههه لالا يدرس شاد حيله منصور بعد لما يمر يدرسه ..
تذكرت منصور مدري اخباره : هيه شحاله منصور .. ((سيف دخل وسمعني يوم قلت شحاله منصور ))

اميه : الحمدلله بخير ..
رديت وانا اسوي عمري مب منتبه لسيف : هيه هيه زين ..
اميه : يالله عيل تحملي من روحج ..
أنا : ان شاء الله في أمان الله ،
اميه : الله وياج " وسكرت " أنا حطيت الفون على الطاوله .. وسيف كان يطالعني ،

سيف : هممم منصور ولد عمج ؟
التفت صوبه : هيه ..
سيف : اهاا شكلج وايد مهتمه وتسإلين عن حاله بعد ..
رديت : ليش مايستوي اسأل ،
سيف باستغراب : لييش !! حلوه هذي
لحظتها تمنيت فوني يرن أي شي المهم ما اكمل كلامي مع سيف ..
سيف وبعصبيه : تراه والله انا الغلطان وايد مخلنج على راحتج واليوم تاخرتي وماقلت لج شي !!
رديت : تاخرت لاني وصلت ربيعتي ..
سيف : ومنو قال اني اريد اسمع اعذارج ؟؟

قلت وانا متنرفزه : زيين خلني بحاالي ..
سيف : لا والله !!!!!!!!
رجعت خطوه لورا : شو يعني اذا عصبت بخاف منك ترى ماتروم تتحرك من مكان فالاساس ..
لما حسيت بلي قلت انصدمت من عمري كيف اقول له جيه !!
سيف منصدم ويطالعني !!!!

أنا تميت ساكته ..
سيف : حلو حلو ميثه ترجعني لذكريات سفرتنا الي الناس استغربوا راحوا كم يوم ورجعوا اكيد صاير شي بينهم مايدرون اني في ذاك اليوم اكتشفت حقيقة الي تزوجتها والي للحين يالسه تكمل مسرحيتها ..
قاطعت عليه : والله ماكان قصدي اقول جيه ..
سيف : هه شو الي ماقصدج لا كنتي قاصده كل حرف ومب اول مره ولانسيتي ..

( ادري يقصد لما كنا مسافرين )

سيف معصب بس ماسك عمره : صحيح اني ما اروم امشي مثل الناس لكن مايعني انج تستهينين بريلج انسة ميثه ..
آنا هنيه خفت : ويعني ؟
سيف : يعني التزمي حدودج احسن لج لانج بديتي تعصبين الواحد بكلامج وتصرفاتج .. أنا مب مجبور استحمل هالشي ..
قلت بتوتر : ليش تكبر الموضوع ..
سيف : انا ماكبرت الموضوع انا اقولج الصج .. تدرين ليش انا صابر ؟
تميت ساكته ..
سيف : بس علشان خاطر سعود ومعزته عندي ..

حسيت بان اهاني مدري شو شعوري بالضبط لكن تمنيت لو ماكنت موجوده هنيه فالاساس ..
سيف : هه ولا شو ابي فيج وعندي غيرج ..
كلامه جرحني لكن مب منهمن شيمااء هيه الي ورطتني والحينه مرتااحههه .. هيه ونووورهههه الي
بسببهم يزرعون في داخلي حب الانتقام لكن انا مب مثلهم انا ميثه غير ومستحيل اصير شراتهم ..
سيف : ليش ساكته ؟
قلت : اضحك في داخلي على حالك ..
سيف كان مصدوم !!

كملت كلامي : محد يبي يتم معاك الكل تخلى عنك امك ونوره وحرمتك ..
سيف انجرح من كلامي بس ولا كان تأثر : انزين كملي كلامج ..
قلت وانا معصبه واذكر كل الكلام الي كانوا يقولونه لي : والسبب لانك مب مثلههههههم من بعد الحااااادث لأنكك صرت انسان عاجر وانا شفت عليك والحنيه الكللللللل يحححس اني مظلووومه فيييك ..
سيف تم يطالعني وكاني صبيت عليه ماي بااردد ..

دخلت نوره وقاطعت عليناا : سيييييييييييفففففففففف سيييييييييييفففف اميييييييييه فالمستشفى ..
سيف والتفت لها : شوووووووه !!!!!!
نوره وبخوف : والله خاااايفففففه عموووه من شوي كلمتني تقوول امكم فالمستشفى تعباانه ..
أنا ما اعرف شو اقول ولا شو اسوي ..
سيف : ايييي مستشفى !!!!!!!!.؟؟
نوره : مدررررري يالله نروووح .. " تحركوا يبون يظهرون "

أنا : بوووصللللكم .. دقييقه واجههزز ..
سيف التفت لي : بعد الكلام الي قلتييه !! مالج حق تفكرين فينا او تحاتين ..
أنا انصدم تشو يقصد ..

" عقب ظهروا "

تميت واقفه مكاني مدري نزلت دموعي حسيت بشعور فضيع ماقدرت امسك عمري ..
\

/

\
مجرد كلمات قد تجرحنا ببساطه !
ربما لم نكن نقصدها ..
أو كانت مجرد حقيقة مؤلمه ..
/

\

/

\

/

|

|

[ بيت بو عبدلله ] ،

ساره يالسه مع أمها وأبوها وعبدلله مع ولده زيود يطفرون في ناصر ..
ناصر : اووووووف بو زيود والله بضربه ..
عبدلله: هههههههه هيييييه شوو تظرررب ولدي فديييته ..
ناصر : اوووف ..
أم عبدلله : شوي شوي عالياهل ،
عبدلله : زيوودي شوف يدووووه قولهاا يدوووه ..

أم عبدلله : فديييته رووح يدوه عطني اشله عنك ..
عبدلله : هاج ، " زيود مستانس ويلعب مع ام عبدلله "
ساره : أميه تعرفين شي عن ميثه ..
أم عبدلله : لآ والله ليش ماترمسينهاا ..
ساره ومضايقه : لا ارمسها بس مب وايد احيانا ..
ناصر : تدرون أحمد كان يبي يخطبها ..
الكل انصدم !!!!!!!!!!!!!!!!!!!!!!!!!!
بو عبدلله : شووو تقول نااصر ؟
ناصر ويبتسم : بس محد كان يعرف غيري الله يرحمه ..
الكل : آميين ..
ساره وبحزن : محد يردي شو بيصير له ، عسى ربي يسكنه في جناته ..
ناصر : آمين ..
عبدلله : اوووووهووو رديييييييناا ليش تضايقوون بعمركم الله يرحمه جيه انتو مابتغيرون شي ..
ام عبدلله : صحيح كلامك ادعوا له مايفيد غير الدعاء ..
ساره : غيروا الموضوع ، أنا بروح أحط لي شي اكله يالله اميه " عقب راحو المطبخ "..
عبدلله : ناصر تعال شوي برمسك في موضوع ،
\

/

\

/

\
مر الوقت وتاخر الوقت قريب نص الليل ،
في بيت سيف ، في الحجره ميثه يالسه مكانها كان الدنيا ظلمت حولها ،

طالعت الوقت .. وينه تأخروا شو صار معاهم .. مدري اتصل ولا اتصصل .. ولا ..
خلاص بتصل .. ضغط على اسم سيف ويلست انظر يرد علي بس ماشي رد ،
كنت بسكر بس على اخر لحظه رد : ليش متصله ؟
أنا بخوف : شو صاار ؟؟
سيف : ماصار شي يالله بسكر ..
رديت بسرعه : سييييف كيف حالها عموه ..
سيف : الحينه تقولين عموه ؟
قلت : مب موضوعنا هذا طمنيني على الاقل ..
سيف : مافيها شي بخير بس تعبانه شوي ارتحتي ؟
رديت : سلامات ماتشوف شر " سكر في ويهي "

يلست اطالع فوني .. انا ليش اتصصصصصصلتتتتتت !!
حطيت راسي عالمخده بررقدد خلالاص مييثه رقدي ليش تحاتين مايستاهلوون ..
ماحسيت بعمري الا صج رقدت ،

نشيت على صلاة الفير وصليت يلست اقرا قران .. علشان قلبي يرتاح ،
والحمدلله حسيت براحه رغم كل شي احس ان في امل ان حياتي ترجع مثل قبل ..
رحت المطبخ وكليت شي . . تذكرت كلام الدكتور لازم اكل عدل مثل الناس ،
رجعت الحجره وشغلت الليت يلست انظف المكان وعقب رحت الصاله ..
محد موجود !!

يلست اطالع فوني كان مسج من سيف عالساعه 2 الفير ،
فتحت المسج ( اقولج سوي شي اكله يوعان )
قلت في بالي كأني قريت المسج متاخر !! احسس شو يعني بيموت من اليوع مثلا ..
سبحان الله زين اني رقدت ،
فريت فوني ويلست اشرب جاي حليب ..
مر الوقت .. محد فالبيت !!

ساعه ساعتين ثلاث قرييب يأذن الظهر .. ويينه محد في البيت غيري !!!!!!!!
سرت حجره نوره الحجره مقفوله دقيت الباب محد يرد ..
يمكن بعدهم في المستشفى ،
... : شو ادوريين ؟؟
أنا خفت : بسسسسسسم الله
... : ماتقع انج ل هالدرجه مافيج احترام لي ..
انا : سيف انت هنيه ؟؟
سيف بعصبيه : بععععددد لج ويه ترمسيني ؟؟؟ " وراح الحجره "
ورحت الصاله ليش كله يرفع صوته علي جيه ويعصب ..

شوي واسمعع صوته : مييييييييييييثثثثه تعالي كوي لي الكندوره ..
انا : لا والله جدددددد !!
" تحركت وانا اتافف " دخلت عنده وشليت الكندوره اكويهاا في البخار ..
سيف : نوره عند اميه في المستشفى اليوم بيظهرونها ..
رديت : مايهمني ..
سيف : مييثه !!
قلت : شووو انت قلت بان لا احاتي ولا اسال عنكم ولا ..
قاطعني : شوي شوي عالكندوره ..
ردييت : زيين

خصلت كواي وعطيته يلبس طبعا كالعاده انا هنيه خلصت مهمتي كيفه يلبس بروحه ..
سيف : شو يعني مابتساعديني البس بما اني مثل ماقلتي انسان عاجر ..
قلت : انت قلت مب محتاي لي فكيفك " طلعت من الغرفه "

سمعت فوني يرن " ام مايد "
رديت : هلالالالالالالالالا..
أم مايد ومستانسه : اهلييناات حبيبتي شحالج ؟
رديت : الحمدلله لج وحشه ..
ام مايد : حبيبتي والله وانا بعد عساج مرتاحه ..
مدري شو صار فيني يلست ارمسها وانا اصيح حسيت بأني محتاجه حد يكون معاي ..
ام مايد ومستغربه : بلاج ميثه لي شجيه صوتج تصيحين ؟؟
مسحت دموعي : لا ما اصيح ..

ام مايد : يالله ماترومين تقصين علي فيج شي عسى ماشر شو صاير معاج ..
رديت : ماشي مضايقه ماعندي حد احس بالوحده هنيه .. وكل شي ضدي ..
أم مايد ومستغربه : عيل وينه ريلج واخته وعموه عنج ؟
رديت : يكرهوني ومقدر اقولج الباقي ..
ام مايد ومنصدمه : شوو !! عيل يبالها رمسه لا انا مستحيل اسكت وانتي جيه مضايقه ..
قلت : فديتج ماعلي برايه شحالج انتي وميود ؟
ام مايد : لا مب براايه انا اليوم بمر بيت عند اخوي وامج تعالي اريد ارمسج ..
ابتسم :ان شاء الله ..

ام مايد : والله انا ما ادري انج مضايقه ولا ييتج لين البييت واشلج ويااي ..
ضحكت : هههه حبيبتي والله ..
أم مايد : يالله بسكر ولا تنسييين بمر عندكم عقب ..
انا ومستانسه :اوك ما انسى اتريااج ..
ام مايد : يالله في أمآن الله ..
أنا : الله وياج " وسكرت "
\

/

\

/

\

( العصر ) بيت بو سعود ،
كانت ميثه يالسه مع ام ميود والبنات يسولفن ..
طبعا ميثه قبل لاتروح كلمت سيف وزين ان وافقه ..

شوق : هههههههههههههههه ميثووه سكتي ..
انا واضحك :هههههههه زين مابقول فضايحج ..
آمون : لالا قوووووووولييييييييي ..
شوق واطالع امون بنظره : ويلوومووني ليش اكرهاا ..
الكل : ههههههههههههههههههههههههه
أمون واطالع ميثوه : ويلوموني ليش احبهاا ..
انا واضحك على خبالهن : هههههههههههههه شو شاربين اليوم ؟
أم ميود : هههههه هذا كله تاثير قهوه أم سعود ..

أميه : لا حششى قهوتي مافيها شي العييب فيهن ..
شوق : افااااااا عموووه افااا ..
أميه : ههههه بروح ايلس مع الحريم انا شو ميلسني عن هالبنات ...
أم ميود وتوقف : خذيني ويااج " ولحقتها "
أنا : ههههههه ماعلي ام ميووودي مسموحه ..
عنود : بنااات شووفو الصور ريمووه تقهررررر ..
يلسنا نطالع الصوت ..
فجأه أنا قلت : مالت على حظي يوم سافرت ماصورت غير كم صوره وكل وحده اخس عن الثانيه..
البنات : ههههههههههههههههههههههه هههههههه
شوق : ههههه حاسه فيج والله الله يعينج ..
شويه وتدخل ساره : شو تسوون ..
أنا لا ارادي تغيرت ملامحي ..
هيه حست في هالشيء ،
شوق : ماشي نطالع الصور تعاالي يلسي معاناا ..
" يلست حذالي "

أمون : الله حلوووووووووووووو المنظررر .. آآخ يالقهر
عنود : لآ جد يبالناا نساافر شرايكن ؟؟
شوق : عااد منو بياخذناا !!
أنا : هيه واتم انا بروحي الله يسامحكم ..
شوق : هههههههه لا لآ افا عليج ناخذج ويانا ..
رديت : سكتي لاتعورين قلبي ..
مرر الوققت بدوون ما احس استان سمعاهم وايد ..
ليتني دووم معاهم ، سلمت على الكل وييه الوقت الي ارد البيت
مافيني اتاخر ، " شغلت سيارتي ورجعت البيت ماطولت وصلت على اذان المغرب "

دخلت البيت سرت الصااله انصدمت يوم شفت ام سيف ودانه وسيف موجودين !!!!!!!!
انا ومنصدمه : س سلام ع عليكم !!
دانه : هذي وصلت ..

كأأت بكمل لكم عقب ..
رايكم وتوقعااتكم ..

=)
__DEFINE_LIKE_SHARE__

ميمو2 · 11-01-2013, 11:20 PM

الله يعين ميثه علي ام سيفوه شكلها تمثل انها مريضه علي شان سيفوه يرجع دانوه وسيفوه سخيف __DEFINE_LIKE_SHARE__

Shamma_HA · 11-02-2013, 11:52 AM

واايد حلو البارت ،،، بس كننت أتمناه أطول عن جيه .. هم طيبت ميته وايد مخربه عليها و سيف واايد كريههه -.- __DEFINE_LIKE_SHARE__

أسرار قلب · 11-02-2013, 12:16 PM

المشاركة الأصلية كتبت بواسطة ميمو2

الله يعين ميثه علي ام سيفوه شكلها تمثل انها مريضه علي شان سيفوه يرجع دانوه وسيفوه سخيف

هيه والله
منوره ميمو حياج كل يوم
ومشكوره

المشاركة الأصلية كتبت بواسطة Shamma_HA

واايد حلو البارت ،،، بس كننت أتمناه أطول عن جيه .. هم طيبت ميته وايد مخربه عليها و سيف واايد كريههه -.-

انتي الأحلى،
انتو لو تصبرون علي كنت بكمل ،
ومنوره حبوبه ، شكرا على المتابعة __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رواية ابتسامة ملاك \| بقلمي	صَمْتَ ـآلْمَشٌآعِرُ	قصص و روايات	3	11-02-2012 06:23 PM
رواية احبك خنجر بصدري اذا شلته يأذيني [ بقلمي ]	دلع الخيال	استراحة قصص وابداعات الاعضاء	7	04-02-2012 04:41 AM
رحلة بريه الى شرمة ____لؤلؤة الخليج	محروم.كوم	منتدى أخبار المواقع والمنتديات العربية والأجنبية	0	01-22-2012 07:50 AM
رواية احبك خنجر بصدري اذا شلته يأذيني [ بقلمي ]	دلع الخيال	استراحة قصص وابداعات الاعضاء	0	01-14-2012 08:16 PM