إِنَّ رُوحِـــــــيٍ قَرَرَت " البـَوّحَ " عَن أشَـــواقِها . . ~ - الصفحة 3

forza alain · #1 02-20-2013, 02:58 PM

رووووووووعه بارت

تسلميييين فيني دوده
ابا اعرف شسالفه
وتسلمييين مره 2 __DEFINE_LIKE_SHARE__

أشواق تائهة · 02-27-2013, 08:08 AM

البوح الرابع
.
.

أرجوان .~
.
.
نزلت للمكتب انتبهت أن الكل موجود ماعدا جوري ، حمدان وحسين وديم وذياب و خلود ومرته بعد موجودة وبعد مرت عمي سالم وغاية بنتها، لفيت رأسي يمين ويسار كنت خايفة إن سهيل ولد عمي يكون موجود وأنا مب لابسة شيلة بس ما شفته .~
أنا: السلام
الكل: عليكم السلام
دخلت ووقفت يم ديمة ،
حمدان: تفضل أبويه الكل موجود
أبويه: جوري بعدها نايمة
أنا: هيه توني قبل لا أيي خطفت يم غرفتها
أبويه: زين ، اليوم جامعنكم عشان شيئين الأول إنه حرمة عمكم وعيالها ب يسكنون عندنا ه الفترة أنا طلبت من الخدم يجهزون لهم الغرف أتمنى محد منكم يزعجهم بأي شيء ولا يضايق بهم ولا شيء سمعتوا
الكل: سمعنا
مرت عمي: عيالك عيالي وعيالي عيالك محد منهم بيزعلنا ولا شيء
أنا: هيه أبويه ، غاية بعيوننا وهي أختنا
أبويه: وسهيل
ذياب: سهيل ولد عمنا
أبويه: هو بيكون بداومه الصبح يعني مارح يضايق عليكم أنتوا البنات
أنا: عادي أبويه بنلبس شيلنا يوم بنطلع برع غرفنا سهيل أبد ما رح يسبب لنا إحراج ولا يضايقنا
أبويه: جي وايد أوكي
حمدان: آمر أبويه قلت تبانا بشيئين
أبويه: هيه صح ، اليوم الصبح لما . . .
[ . . . لما دخل الشركة الصبح . .
لقا أخوه قاعد يخلص شغله . .
وما حصل حمدان
بو حمدان: عيل حمدان وين
عبدالله : راح لغاية تعبانة بالمستشفى
بو حمدان: سلامات عسى ما شر
عبدالله: والله ما أدري هو سار لهم
بو حمدان : خير إن شاء الله
وعقب الإخوان قعدوا يكملوا شغلهم . .
[ ترا غرفتهم كبيرة وايد و ب أخر الطرف محطين 3 مكاتب واحد لحمدان و أبوه وعمه . . ]
بعد فتره ..
دخل عليهم حد
هو : السلام عليكم
الكل: عليكم السلام والرحمة حياك تفضل
راح وقعد صوب مكتب سلطان [ بو حمدان ] . .
هو : عبدالله تعال إقعد معانا
[ عبدالله يا وقعد وياهم ]
هو : شحالكم خواني
سلطان [ بو حمدان ] : بخير أخوي طمني عنك
هو : الحمد لله بصحة وعافيه بس . . .
سلطان: تفضل قول اللي عندك يا علي
هو [ علي أخوهم ] : أنا ياي عشان أكلمكم إنتوا إخواني لين متى بنظل بعاد عن بعض
سلطان [ بنبرة كلها جدية ] : بس ما نحن إللي قطعناك يا علي ولا نسيت
علي : أدري يا أخوي بس أنا غلطان والظفر أبد ما يظهر من اللحم
سلطان : محتاج شيء فلوس شيء آمر ما يغلى عليك شيء
علي: لا يا أخوي أدري إن ما يغلى علي شيء الفلوس موجودة وزياده الحمد لله بس ناقصني إنتوا
سلطان: شو قصدك ؟!
علي: نرجع مثل قبل خل عيالنا يعرفون بعض خل يعرفون إن عندهم أعمام ونجتمع مثل قبل
عبدالله: نحن نجتمع في بيت سلطان كل جمعه وأحيان ببيتي
علي: تستقبلوني باجر ويا عيالي
سلطان: البيت بيتك يا أخوي
[ قام علي يسلم ع سلطان وضمه سلطان عشان يبين له أنه ما في شيء يبعد الإخوان أبد ]
.
.
.
]

حسين .~

أبويه : هذا كل الي صار باجر بإذن الله عمكم علي بييون بيتنا مع عيالهم أتمنى إنكم تستقبلون بحفاوة وما أوصيكم
أنا: يبى هو عنده عيال كبري
أبويه : أحيد عنده مريم كبر جوري ومها كبر ديمه والباقي ما أعرفهم
أنا: ما أدري ليش ماكو أولاد كبري بالعايلة ><"
أرجوان : ياي بوقت غلط هههههه
حمدان: غريبة حسين ما قلت أبا أرقد . . !
أنا [ يا هي حالة ] : قلت اليوم الخميس بتم شوية تدري يايين لنا ضيوف خل نقعد وياهم
[ أسير صوب مرت عمي ] : ولا شو الرأي خالوه ؟!
خالوه عايشة [ أم سهيل ] : ع راحتك حسون دامك تعبان طبنا مب لازم تتعب روحك عشاننا
أنا: لالا تعبكم راحة خالوه أنا اليوم بضحي بنومي وبسهر ويا غاية
[ أطالعها ] بلاعبج بلي ستيشن ولا بالأيباد بنلعب اليوم ماكو نووم
أبويه: أخافك بنص اللعبة تغط في نوومٍ عميق [ أسميه يابها بالفصيح خخخخ ]
والكل ضحك ع كلامه

أنا: زين أبويه أعلنها حرب يا أنا يا إنت تتحدى
أبويه: أتحدى لو تميت سهران تلعب ويا غاية وونستها وما رقدت ل تجوف 2000 درهم بجيبك

أنا [ وأنا فاتح عيوني وأردد ألفييييييييييييين ] : والله
الكل يضحك
أبويه: إيه شو فيك ؟! كأنك ما شايف خير
أنا: زين أبوي أتحداك [ أأشر ع غاية ] يالله سيري زهبي عمرج ولحقيني ع الصالة اللي فوق بنلعب ليين الفجر [ أطالع أبويه ] متى أخر وقت محطنه ببالك
أبويه : الساعة 2 وما بقبل بقبل 2
أرجوان: حرام أبويه هو ناش من الصبح عسب المدرسة خلها قبل
أبويه [ يفكر ] : الساعة 12 .. زين
أنا: وايد زين وو سير الحينه جهز بيزاتك وودعهم عسب خلاص باجر بيصيروا من ممتلكاتي الخاصة وواوو
الكل يضحك
أما أنا ما علي منهم سرت غرفتي وجهزت البلي ستيشن والأيباد والشرايط وكل شيء يونس عندي وناوي أطلع غاية من الجو الكئيب اللي عايشتنه
.
.
جنان . ~
لندن .. الساعة 3 ظهراً

أنا قاعدة بالغرفة مالتي أرسم . . لابسة قميص أبيض وجينز وطبعاً القميص غدا روحه لوحة فنية من الألوان هذي عادتي أحب أشخبط وايد . . الله يعينه باباتي لو شافني كذا مرة يشتريلي هذا اللي يلبسونه فوق الثياب يوم يرسمون بس ما أحب ألبسه

طق طق طق .. ~ إندق الباب
شليت الغطا وغطيت فيه رسمتي ما أبا باباه يشوفها لأنه مفاجأة له
أنا : هلا باباه حياك
أبويه: شو تسوين ؟!
أنا: مفاجأة لك باباه
أبويه [ دخل الغرفة وقعد ع سريري ] : ترسمين
أنا: هيه أرسم
أبويه: باين من اللوحة اللي ع ثيابج وع ويهج
أنا: هههه
أبويه: كم مرة أقولج لبسي شيء عسب ما أتي الألوان ع ثيابج بس إنتي عنيده مدري ع من طالعة
أنا: في مثل يقولونه [ كل فتاة بأبيها معجبة ] وأنا منهم إنت عنيد وورثت العناد حقي
أبويه [ يقوم ] : عادي أجوف الرسمة ؟!
أنا: لا مفاجأة [ أمسكه ] مفاجأة
أبويه: زين عيل أنا بروح أريح بغرفتي إذا تبين شيء تعالي
أنا: تغديت
أبويه: هيه خليت الخدامة تحطي [ يمط خشمي ] ما أدري متى تتعلمين لج طبخة تسدين فيها يوع أبوج
أنا: هههه أبويه أنا دلوعتك
أبويه : دلوعتي الغالية إنتي يالله حبيبي تعبان بنام أوكي
أنا: نوم العافية
أبويه: لا تنسى توعيني عقب ساعة عسب أصلي العصر
أنا: من عيوني

طلع أبويه ورحت للوحتي أكلمها لازم أنهيها بسرعة . . أونس بها أبويه

أرجوان .~

قاعدة أرتب مع خالوه عايشة أغراضها بالغرفة بعد ما سهيل وحمدان راحوا يابوا الأغراض
ويقولون إنهم ما صادفوا عمي سالم مما سهل عليهم الأمر

أنا: إنزين خالوه خلاص رتبت الثياب بالكبت وحطيت القرآن ع الكوميدينو يم السرير غيرنا الشراشف واللحاف أممم حطيت لج بعد ماي بالثلاجة [ أأشر لها ]
خالوه: طلعي دبة وحدة حطيها برع ما أحب أشرب بارد
أنا: إن شاء الله [ وسرت طلعت الماي ] خالوه عقب بروح أييب أكواب أوكي
خالوه : إن شاء الله حبيبتي
غاية: نانا عندي طلب
أنا: آمري الغالية عيون نانا لج تدللي إنتي بس
غاية: أبا أرقد عندج بالغرفة
أنا: أفا عليج تفداج الغرفة وراعيتها
غاية: لا أباها راعية الغرفة عقب ما أخلص من حسين بيي بنام عندج أوكي
خالوه: أسميها يا أرجوان غاية تحبج متوالفة وياج وايد حتى أكثر من ديمة مع أنها بعمرها بس تحبج أكثر منها
غاية: ما أحبها أكثر منها أحبهم نفس الشيء بس نانا غير
خالوه : سيري عند حسين يالله يترياج
غاية: زين بروح [ تتطالعني ] إترييني بالليل بنام عندج أوكي
أنا [ إبتسمت لها ] : إن شاء الله حبيبتي
وطلعت
خالوه: تعتبرج قدوتها
أنا: فديتها والله

طق طق طق ..~ الباب

خالوه: منوه
. . : أنا سهيل
رفعت شيلتي المححطاية ع كتفي ولفيتها
خالوه: حياك سهيل إحدر
سهيل : سلام عليكم [ يطالعني ] أووه ما أدري إنه حد عندج
أنا: عليكم السلام لا عادي ولد عمي البيت بيتكم
سهيل: شحالج أرجوان
أنا: الحمدلله بخير
خالوه: هاه سهيل شو بخاطرك
سهيل: ماشي إماية أطمن عليج ولا ممنوع
أنا: لا ما ممنوع عيل أنا بترخص خالوه تبين شيء
خالوه: سلامتج
أنا: بعد شوي بطرش الأكواب لج
خالوه: لا إتعبين روحج
أنا: لا تعب ولا شيء

وطلعت من عندهم ورحت المطبخ غسلت كوبين
أنا : أمينة ودي هالأكواب لغرفع خالوه عايشة أوكي
أمينة : إن شاء الله
أنا: شو مسوية عشا الله
أمينة : مسوين باستا
أنا: الله باستا من زمان ما كلت باستا من إيدج والله إشتاقيت لها
أمينه تضحك ع أسلوبي
أنا: زين يالله بسرعة ودي الأكواب وردي بسرعة حطي لنا عشا بروح أجوف ديمة وجوري وأبويه جهزي كل شيء أوكي

أمينة كانت شالة الأكواب
أنا: [ شليت الأكواب ] هاتيهن بوديهم إنتي عليج بالعشا ما أوصيج
أمينة تضحك

رحت وديت الأكواب و خالوه تدعيلي وأنا أردد من وراها آمين [ من زمان فاقدة هالإحساس ] أم تدعي لعيالها من كل قلبها إن الله يحرسهم ويحميهم ويبعد عنهم كل سوء ..
رحت غرفة جوري
جفت الغرفة باااااااردة ثلج وظلام
خليت الباب مفتوح عساس يدخل شوية ضوء . .
أنا: حوري جوري يالله قومي الحينة بأذن العشاء
جوري [ تتحرك ] : قمت قمت
أنا: للحينة تعبانة
جوري: لا عادي شوية أرتحت
أنا: سلامتج يا روحي . . يالله قومي صلي وتعالي تحت قوم خالوه عايشة عندنا
جوري: صدق غريبة اليوم مب الجمعه
أنا: لا هم بيناموا عندنا
جوري: صدق عيل وناسة بيزيد أعضاء فريقنا أجوف ديمة ما يات عندنا أثاري غاية بالسالفة
أنا: جوري أنتي العاقل بليز يعني غاية وايد هادية خفي عليها إنتي وديمة أخاف تطلع من بيتنا مخبلين فيها
جوري: هههه لا ما نقدر هههه
أنا: يالله حبيبتي قومي صلي ونزلي تحت يقولج اليوم العشا باستا
جوري: ههههه وأنتي عشقج الباستا
أنا [ بإبتسامة شاقة ويهي ] : هيه وا فديت كل الباستا أموت فيهن
جوري: ههههه
طلعت من غرفتها ورحت صوب غرفة ذياب أقعد وياه .~ مشتاقة له حييييييييييييل توأمي العزيز

بعد ساعة جي تقريباً الساعة 8 ونص

حطوا العشا وأنا طبعاً تلذذت بالباستا والكل كل طبعاً بس أنا أكثر وحدة تعشق الباستا فيهم وقبل لا يبدو ياكلوا قعدت أصور الباستا اللي مرتبة بطريقة حلوة بفوني وكامي الكانون والكل يضحك علي بس أنا أعشق شيء إسمه تصوير وباستا فما بالك بإنهم مجتمعين مع بعض ههه

.
.

جنان .~

بعد ما وعيت أبويه خليته ورحت لغرفتي أحس بضيقة بقلبي . . مشتاقة لحد يضمني غير أبويه أبا حد يكون قريب مني أكثر من أبويه . . ما أبا أقول إني مشتاقة لأمي لا . . أمي أكثر وحدة أذت أبويه وأنا مستحيل أفكر أشتاق لوحده أذت قلبي أبويه قلبي وروحي وإللي يأذيه يأذيني
تميت أفكر وأفكر وأفكر وعقب رديت للوحتي أكملها .~

حسين .~

بعد ما تعشينا ردينا كلنا للصالة اللي فوق وأنا ناوي أييب 2000 درهم اللي وعدني أبويه بهم . . وفوق هذا كله ناوي أونس غاية وأونس أهلي كلهم . . حطيت البلي ستيشن وركبت القيرات . .

حطيت شريط كورة هذا المتوافر . . هههه أدري أتبارى ويا بنت بس شو أسوي كل شرايطي مال الأولاد

أبويه: يعني تتبارى ويا بنت حط شيء ثاني غير الكورة هي شو دراها بالكورة
أنا: أبويه ما عندي [ طالع غاية ] تبين ريس [ سباق ] سيارات
غايه: هيه هذا أحسن من الكورة
طبعاً الأي باد شلته ديمه تلعب أسمنها ما مخليه حقي شيء بس يفداها .~
أنا: زين يالله نبدأ وبليز قبل لا تبدو إنقسموا منو يشجعني ومنو يشجع غاية
أبويه : بنجوف منو الأفضل وبنشجعه
وبدينا اللعب
و الربشة إمتلت طبعاً بما إن ديمة ويانا مرة تشجع غاية ومرة أنا و شوية تقولها عطي رييييييييييس .. مصطلحاتها صبيانية بحته اللي يجوفها ما يقول إنها بنت . . من كثر ما إنها تقعد ويا أخواني . .

بعد ما خلصنا اللفة الأولى كانت باقية لفتين زيادة .. كنت أنا سابق غاية . .
ديمة : غاية عطيني بفوزج
غاية: ياليت ما عرف ألعب بيغلبني
سهيل: أفا أختي تنغلب لالا عطيني بفوزج عليه
أنا: لا ماشي خلوها هي تلعب
ديمة: أبويه عادي نلعب بدالها صح
أبويه: هيه عادي لعبي بدالها دامها ما تبا
أنا: زين بس عطيها الأي باد تلعب

طبعاً يقولكم أرجوان هادية واايد ويالسة تصورنا يمين يسار . . حماس ديمة . . أبوية . . ذياب . . والكل ما غفلت عن واحد منا . . وإذا حد إنتقدها تقول
أرجوان : للذكرى عقب برويهم عيالكم يضحكون عليكم
الكل ضحك ع عبارتها
لعبت الريس هذا ويا ديمة وسوتها بنت أبوها وغلبتي يوم أقولكم حركاتها شبابية مب بناتية
وعقب سهيل وحمدان إتباروا وحمدان غلب سهيل والفرق بس كذا ثانية ..
وعقب غيروا الشريط للكورة والحماس بزيادة

خاصة ويا ديمة اللي كانت تبا تلعب كورة بس محد عاطنها مجال

لين ما يات الساعة 11:50 محد كان تام غيري والشباب
البنات كل وحدة راحت ترقد نانا وجوجو حتى خالوه عايشة من مساعة راقدة
جفت ديمة تتطالعنا وهيه لامة إيدها وع ويهها مرسومة ملامح العصبية
أنا ضحكت ع شكلها

ديمة [ بعصبية ] : ما يضحك ما يضحك
أنا: إلا يضحك هههههههههههههههههه
حمدان: [ يودر القير ] تعبت خلاص أووف بسير أرقد
سهيل: هههه باجر الجمعة ورانا صلاة لازم نقوم من وقت
أبويه: [ يثاوب ] ديمة باجر ب تلعبين يالله سيري رقدي
ديمة: بسير أرقد أحسن لي تصبحون ع خير
الكل: ونتي من أهله

أنا: إنزين أنا ما فيني رقاد شو أسوي ؟!
أبويه: [ يطالع ساعته ] الحينة الساعه 12 يالله شو خفاش تساهر بالليل سير إرقد
أنا : ال 2000
أبويه : إبشر باجر هم عندك

قمت وبست رأسه وقلتلهم
أنا: تصبحون ع خير

وسرت أرقد وأنا أفكر أسميني إستانست من اللعب مع خواتي وسويت لهم جو ربشة .~
عمرها ما همتي الفلوس كثر ما همني
الحماس بعين غاية وهي تلعب وعقب يوم توهقت وما عرفت تغلبني
والحماس عند ديمة وعصبتيها يوم ما لعبت كورة
الوناسة بعين نانا وهي تصور

والضحك اللي ضحكته جوري مع إنها تعبانة
الفخر اللي بعيون أبويه وهو يجوفنا مع بعض

__DEFINE_LIKE_SHARE__

forza alain · 02-27-2013, 02:54 PM

روووووووووووووووووووووووعه بااارت
جد جد روووووووووعه فنتك تسلميييييين __DEFINE_LIKE_SHARE__

همسات قلبي تجرحني · 03-01-2013, 04:07 PM

من البداية مبين عليها كشخة .. وفي أكشنات بتصير

نبا باااااااااااارت أشواااااااقوووه
بلييييييييييز __DEFINE_LIKE_SHARE__

أشواق تائهة · 03-03-2013, 02:57 PM

ماكو بارت قرييييييييييييب .. تعبانة شوية ووضغط دراسة . .

لو قدرت إن شاء الله بنزل ..

همسات ماكو بارت . .

قريب إن شاء الله __DEFINE_LIKE_SHARE__

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
المرور""""""""للايجار """"""" فالمرور """"""4 شقق.. غرفتين+3 غرف ((65الف_150الف))	محروم.كوم	منتدى أخبار المواقع والمنتديات العربية والأجنبية	0	01-20-2012 04:10 PM
بلاك بيري تورش 9860 فل تتش مع بن ممير """"""""""""""""""""""	محروم.كوم	منتدى أخبار المواقع والمنتديات العربية والأجنبية	0	10-28-2011 11:00 AM
""""""""مطلوب لكزس lx570 الدفع كاااش """"""""""	محروم.كوم	منتدى أخبار المواقع والمنتديات العربية والأجنبية	0	07-19-2010 03:50 AM
"""""""""""""""""""""""""""فساتين زفاف راقية ومميزة """"""""""&am	محروم.كوم	منتدى أخبار المواقع والمنتديات العربية والأجنبية	0	07-13-2010 12:00 AM
"""""للبيع باترول سوبر سفاري موديل 99 ديزل """""""""	محروم.كوم	منتدى أخبار المواقع والمنتديات العربية والأجنبية	0	04-28-2009 02:40 PM