راعي العجراء وضحايا العيد

محروم.كوم · #1 10-14-2012, 12:50 PM

السلام عليكم ورحمة الله وبركاته
اليكم هذه السالفه
بعنوان راعي العجراء وضحايا العيد
قبل سنتين يوم ارتفاع اسعار الضحايا سالني واحد من اصحابي عن عدد الضحايا اللي اريد ان اشتريها للاضحيه فقلت له اربع كل عام قال ومتى تشتريها قلت قبل العيد بيوم او يومين
قال بس هالسنه الضحليا غاليه اقل شي بالف وخمسمائه ريال قلت الشكوى لله وش تبيني اسوي اقولهم يرخصونها انا ابشتري اربع قال لا يالخبل
قلت وش السوات قال اشترها ثالث العيد يطيح بالوحد 200 الى 250 يعني بتوفر الف ريال قلت لاصار كذا الا اباصبر الى يوم رابع العيد اذا بترخص
المهم جاء يوم العيد وانا ماعندي ضحايا رحت وصليت العيد وانا ضايق صدري ياليت شاري لو وحده حتى احس بطعم العيد حميسه وشوي وكبده بس مايخالف نبي نعدي هالعيد على خير والجيران بيروحون لنا طعمه ونبا نشوي ونعين من الله خير
المهم طلعت للحوش واخذت منقد للشوي وشبيت النار وصلحت القهوه والشاهي والسكاكين والساطور وقعدت احتري طقه الباب والا كلش والم وعلى هبة الاستعداد انا وعيالي وريحة الشوي اشمها من بعيد الله والعالم تجينا الريحه من العليا وانا ساكن بالروضه
المهم الساعة سبع ونصف ماطق احد الباب الجمر بدا يرمد وانا ازيد حطب تمت الساعه ثمان ونصف ماطق الباب يالله اني داخل عليك وش السوات وعيالي يبه متى يجي العيد
مايدرون اننا بقلب العيد بس هم يحترون الذبح والشوي قلت اصبروا شوي بيجيكم الشوي والاناسه الحين بس انت اطمر جب الشبك وسياخ الشوي من امك وخلها تغسلها زين
ومايمديك ترجع الا واللحم وصل ونبدا الشوي راح الولد وجاب الشبوك وحطها الا والباب يطق
ارررررررحب ياهالصوت حس ماينقطع
قلت ابشروا والله باللحم والشوي وفلة الحجاج ماقلتلك ياجلنبوا ماتجيب الشبك والا سياخ الا واللحم جاي
وانا اطمر وافتح الباب الا حرمة ٍ شحاذه ولاها تقول ماتعطين لحيمه من ضحياكم الله يجزاك خير ويخليلك عيالك ويرحم موتاكم وانا امسك راسي قلت لها راجعين بعد ثلاثة ايام وتلقين المعامله خالصه في درج الحوش

والله ياخالتي مابعد ضحيت ان شاءالله ثالث العيد
قالت وراكم هالسنه كل شارعكم ماضحوا كل من طقيت عليه الباب قال ماضحيت
قلت يعني ما راح تجيني الحيمه
اشوى اللي علمتين ماتحراء طقة باب
وهي تروح وانا ادخل للبيت وطالع الساعه ولاها عشر وزود وين ووين سوق الغنم الحين
بس تدري وشلون على بنده ابشتري بددل الكبده كبود وبدل الفخذ الواحد خمسه
وادخل وشتري كبود دجاج لهن سنتين مثلجات بفرنسا وسنه عند التاجر وثلاثة اشهر في بنده واشتري فخوذ دجاج وهذا هو الشوي اللي يقولون
وعيد ياسعيد
ويوم صار ثالث العيد والاذبايح في قل السوق شبه فاضي واللي بالف وخمسميه صارت بالفين وانا اشتري اربع وجيك ادربي هالدميجه
انتهت السالفه وارجوا ان تكون اعجبتكم
وقبل الختام سبحانك اللهمم وبحمدك لااله الانت استغفرك اللهم واتوب اليك
دمتم بحفظ الله ورعايته ولا تنسونا من صالح دعائكم ومن ردودكم على هذه السالفه
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
راعي العجراء والخروف	محروم.كوم	منتدى أخبار المواقع والمنتديات العربية والأجنبية	0	11-17-2011 03:30 PM
راعي العجراء يوم العيد عام 1393هـــ	محروم.كوم	منتدى أخبار المواقع والمنتديات العربية والأجنبية	0	10-26-2011 03:51 AM
عرس راعي العجراء	محروم.كوم	منتدى أخبار المواقع والمنتديات العربية والأجنبية	0	09-26-2011 02:30 PM
من سواليف راعي راعي العجراء (ثوب العيد والخياط الباسكتاني )	محروم.كوم	منتدى أخبار المواقع والمنتديات العربية والأجنبية	0	09-16-2011 02:10 PM
من سواليف راعي العجراء (عزيمة القعوس لراعي العجراء )	محروم.كوم	منتدى أخبار المواقع والمنتديات العربية والأجنبية	0	09-10-2011 01:40 PM