راعي العجراء يوم العيد عام 1393هـــ

محروم.كوم · #1 10-26-2011, 03:51 AM

السلام علاكم ورحمة الله وبركاته
اليكم هذه السالفه القديمه حصلت لراعي العجراء
واعتقد انها عام 1393 هـ
انتم تعرفون ذك الوقت ان وقت الاعياد تسكر اغلب المحلات وخاصةٍ اول يوم العيد
ماهو مثل الحين تفتح واذا صار ليلة العيد اللي بشتري خبز يشتريه بالليل والسياره
تعبيها بانزين ليلة العيد ماتلقى محطه ومنول الخبز يسمى خبز عايدي 8 بريال
والبلديه مشدده عليهم اللي ينقص من وزن الخبزه تاخذ عليه غرامه يمرهم المندوب
للبلديه على سيكل ثلاث كفرات معه ميزان يوزن الخبز وتلقاهم حريصين على الوزن
والصامولي مايعرفونه من اول فيه بعض المخابز تسويه ولا يشترونه غير الاشوام
حسب مانسميهم اول اي واحد يلبس بنطلون لو سوداني نطلق عليه شامي يعني من الشام
المهم في يوم العيد ارسلني ابو رحمه الله اشتري علف للغنم من الحله فيه واحد يفتح حتى بالعيد مثل الصيدلايات المناوبه ذاك الحين واعطاني اريال12 قرش عيديه و8 قروش لركوب خط البلده ذهابا وايابا كان الركوب بخط البلده 4 قروش المهم رحت للبطحاء اولا
ثم اكملت المشوار على رجولي ثم شريت علف ورجعت لنقطة تجمع الباصات في البطحاء
وركبت العلف في السله العلويه فوق التنده وركبت بالباص اشوي يوم حرك الباص
وبعد مامشى فينا كيلو اوكيلوين يعني تقريبا نصف مشواره وقف فينا على جنب وقال ياجماعه انتم تعرفون ان اليوم هذا يوم عيد وحنا تركنا اهلنا ماعيدناهم ندور الرزق
واليم علشان انه عيد ترا الراكب 6 قروش اللي يبي والا يحول قالوا الركاب ليه ماقلته يوم حنا في المواقف يوم اختنا توك تقوله لابالله نبي ننزل نزل واحد شوي يوم نزلوا اللي بالباص كله هم خفيفين مامعهم علف المشكله انا والعلف وين نروح بس الاولين على قلب واحد مايهم زود قرش او قرشين وانا احول مع اللي حولوا واطلع للسله احول العلف
بس ابي اتاكد هم عوموا على ايش
صاحب الباص يوم شاف الكاب حولوا ويتراجع بكلامه خلاص 4 قروش ولا ارجع امسك سرى من جديد والمشوار انتصف تكفون يالربع اركبوا لو تبون انقص لكم بعد قرش وانا اشاهد المنظر من فوق الباص
النهايه ركب واحد شوي يوم اركبوا كلهم جيت ابحول الا الباص يحرك وانا والعلف فوق
وانا احول مع السلم الخلفي واطق القزازه على الركاب بالخلف ابيه ياقف من حين سواق الباص راعي سرعه وزعل بعد لو يدق فرامل وصلت للنقطه قبل ماياصل هو وباصه

المهم التفت واحد من الركاب وتفاجاء بالمنظر وانا متعلق بالسلم وهو يصيح للسواق
ابك الغليم متعلق بالصدام وهو يوقف ويحول علي يهاوش ويبي يطقني ليه تتعلق
قلت يابن الحلال انا ماتعلقت انا طلعت احول علفي مدري علف الغنم وانت حركت
قال انزل زنزل علفك معك وحطه في باب الباص قلت ابشر بس لانزلته لاتروح وتخليني
وانا انزل واحط العلف مع الركاب
بس فرح بـــ12 قرش طول الطريق وانا افكر ويش اشتري فيها مره اقول ابشتري عمارة المملكه ومره اقول ابا اشتري عمارة الفيصليه وصل الباص وانا ماقررت وش اشتري فيها
الله يرزقنا من عنده
هذا عيدي ذاك اليوم ركوي سلة باص والحمل علف لمعزا لوتجمع حليبها كله
علبه حليب سائل بوني اكثر منها
ولكن يازين من اول قنوعين بكل شي ياليت هاك الوقت يعود واجمع مع 12 قرش 12 قرش ثانيه حتى يصير عندي راس مال وماخلي عنز تقول مبااااااااااااا
انتهت السالفه وارجوا ان اكون وفقت في طرحها لكم والمقصد سعة الصدر
وقبل الختام
سبحانك اللهم وبحمدك لااله الا انت استغفرك واتوب اليك
تقبلوا تحيات
اخيكم راهي العجراء وعمته منيفه
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
راعي العجراء ايام زمان	محروم.كوم	منتدى أخبار المواقع والمنتديات العربية والأجنبية	0	10-14-2011 07:00 PM
عرس راعي العجراء	محروم.كوم	منتدى أخبار المواقع والمنتديات العربية والأجنبية	0	09-26-2011 02:30 PM
سالفة راعي العجراء والحصني	محروم.كوم	منتدى أخبار المواقع والمنتديات العربية والأجنبية	0	09-23-2011 05:10 PM
من سواليف راعي راعي العجراء (ثوب العيد والخياط الباسكتاني )	محروم.كوم	منتدى أخبار المواقع والمنتديات العربية والأجنبية	0	09-16-2011 02:10 PM
من سواليف راعي العجراء (عزيمة القعوس لراعي العجراء )	محروم.كوم	منتدى أخبار المواقع والمنتديات العربية والأجنبية	0	09-10-2011 01:40 PM