من سواليف راعي راعي العجراء (ثوب العيد والخياط الباسكتاني )

محروم.كوم · #1 09-16-2011, 02:10 PM

السلام علاكم ورحمة الله وبركاته

اليكم قصتي وثوب العيد والخياط الباسكتاني

في يوم من الايام عزمت وقررت وانا في كامل قواي العقليه ان افصل ثوب للعيد بعد مرور حول كامل على تفصالي للثياب

رحت للخياط لاني معزم هالسنه اني اتروش وحط شامبو واتدلك بصابون و بالفيري والكلوركس وذلك

قبل العيد بيوم والبس للعيد ثوب جديد وشماغ جديد والفنيله والسروال مش مهم ماني مغيرهن مندسات تحت الثوب ومحد شايفهن وبعدين ماهن مبطيات بالحيل لهن تسعه شهور وهن علي بالنسبه للفنيله لونها مثل بين عشوين لاهي صفراء والاهي سودا بالحيل يعني باقي به نصف عمر وبالنسبه للثاني لا لك عليه شوي لونه

تقول حفرة غيار زيوت باقي فيه ربع عمر

قلت خلهن لعيد الاضحى اغيرهن مرة وحده واشتري جدد وارميهن بالدرام حق البلديه

المهم رحت للخياط دخلت المحل ولا الخياط بسكتاني

السلام علاكم وعلاكم السلام

قلت ابي ثوب للعيد ابي تفصاله زين حتى اجيك السنه الجايه وافصل عندك

قال مافيه مشكله ان معلم تفصيل 17 سنه كل مقاسات نفر انا معلوم

قلت توكل على الله خذ المقاس

اخذ المقاس قال بعد خمسه يوم تحصل الثوب خالص

قلت مافيه مشكله بس اهم شي التفصال

قال خلاص ان شاءالله تفصال 100%

بعد يومين وانا رايح وجاي من عند باب الخياط احتري متى يجي اليوم الخامس من فرحتي بالثوب من زمان مافصلت ثوب

الخياط عن بيتنا من جنوب واذا بغيت اروح لمشوار في الشمال اوالغرب اروح اول للجنوب امر من عند باب الخياط ثم اروح لمشواري بالشمال وعلى هذه العاده

ودي اكشخ واقول مفصل ثوب وابي اسوي مثل التاس اللي يعلقون ثيابهم بالسياره ابا اعلق مثلهم بالدتسن قيل مايجي العيد

الدتسن اللي معي ذهين شوي صار يدل الخياط مثلي قبل مايطلع للمشوار يمر على الخياط

يحسبني ناسي

يوم جاء اليوم الخامس والاي عند الباب قبل مايفتح الصبح والعيد باقي عليه شهر وزود مابعد دخل رمضان

المهم يوم فتح وانا ادخل علاه السلام علاكم وعلاكم السلام

ابي ثوبي حق العيد

بأسم من

قلت ماسرع نسيت انا راعي العجراء وعمتي منيفه

قال انا اللحين فيه معلوم شوي يوم جابه

قلت غمض ابا اتقوس الثوب عندك والا ادخل تحت الطاوله قال مافيه مشكله صديق روح خلف

الثياب المعلقه وغير الثوب رحت ورا الثياب المعلقات وفسخت الثوب ويوم لبست الثوب ولاه قصير من قدام وطويل من وراء اليا شفته من وراء تقول لية خروف ساكني ومن قدام تقول مضله مبسط

قلت ليش كذا طويل من وراء قصير من قدام قال لا ثوب مقاس100% قلت يابن الحلال وشلون 100% وهو من ورا نسافت قلابي ماعاد به دتسن ومن قدام تقول بلكونة بيت شعبي

قال هذا تفصال مضبوط بس انت كرش كبير يشيل الثوب من قدام

قلت يابن الحلال انا يوم اجيك تفصل ثوب جيتك انا وكرشتي تفصل علاها انا مافسخت كرشتي بالبيت وجيتك بدونها انت لازم تاخذ مقاس الكرش

المهم قلت مابغى الثوب عطني افلوسي اروح لخياط ثاني قبل العيد يخلصه وابا علقه بالدتسن

قال مافيه فلوس بعدين انا خساره

فلت مافيه فلوس قال لا قلت مافيه مشكله صديق وانا اخلي الثوب الجديد علي واقعد عنده بالمحل

شوي يوم دخل زبون ومعه عياله يبي يفصل عنده قال مضبوط تفصاله قلت هذا تفصاله

طويل من وراء قصير من قدام هو زين شوفت عينك

وجي يضحك وياخذ يعياله ويطلع

قال ليه كذا انت يجلس وتخلي الزبون يطلع انت يقطع رزق

قلت الثوب ماجبته من خياط ثاني ماهو زين تفصيله حتى اقطع رزقك وقعدت عندك اطرد الزبون الثوب تفصيلك انت ولازم اعلم الزبون عن زين تفصيلك

وبعد اشفيه انت خوف انت تفصيلك 100% ولازم اعلم زبون

قال خلاص رفيق خذ افلوس وخذ ثوب بعد

قلت لا انا ابغى فلوس والثوب خليه عندك علشان انت مافيه خساره

اعطاني فلوسي ورحت عند خياط ثاني وعلمت الددتسن الخخياط الجديد وقلت له لاوصيك احفظ الدرب

انتهت السالفه وارجوا منكم ان تستروا على ماوجهتم من راعي العجراء

والمقصد المشاركه معكم والسواليف واذا كنت مضايقكم بهذه السواليف ارجوا ابلاغ المشرفين لكي تحذف مواضيعي كلها والمعذره مقدما

وفي النهايه

سبحانك اللهم وبحمدك لااله الا انت استغفرك واتوب اليك
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
من سواليف راعي العجراء (عزيمة القعوس لراعي العجراء )	محروم.كوم	منتدى أخبار المواقع والمنتديات العربية والأجنبية	0	09-10-2011 01:40 PM
من سواليف راعي العجراء (الشايب الحمقي والقميريه)	محروم.كوم	منتدى أخبار المواقع والمنتديات العربية والأجنبية	0	09-08-2011 05:20 PM
اهداء من راعي الوسط الاسود لعيون راعي الاستاندر	ولد_4800_زعبيل	أستراحة الفيديو المنوع	12	02-16-2009 02:56 PM
لعيووووووونك يا راعي استاندر قطر ولعيون كل راعي استيشن اهداء من هل الفتكات كلهم	ولد_زعبيل_VTC	سيارات و دراجات	34	12-30-2008 08:21 AM