راعي العجراء والقدر الكاتم بالمطبخ

[محروم.كوم]

السلام علاكم ورحمة الله وبركاته
اليكم هذه السالفه
مع القدر الكاتم في المطبخ
العام الماضي كنت اعزوبي لضروف العمل وعيالي مسافرين
يعني على وزن التيس بالدار والعنز تسرح
المهم اني دخلت البيت ونسيت اني عزوبي ماجبت معي غدا من المطعم من فرحتي بالعزوبيه يوم دخلت البيت واتذكر ان ماهنا غداء اليوم
(وحالي اللي مثل حال العزوبي ... عشاه حب ولا لقاء من يسويه)
قلت الطلعه للمطعم مانيب طالع ماهوب لوا اموت جوع الا لوادخل السجن يفتح الله اطلع بهالحر
وانا ادخل للمطبخ وادور على قدر كاتم ابونفر واحد ابيه اسرع نصفي نوم الا كلي نوم وانا اقطع الطماط والبصل واقطع بعد الملح والبهورات وانا احطها بالقدر مع اللحمه
واصب الماء يوم جيت ابكتم القدر بالغطاء الا البلف حق القدر ماهو فيه يالله دبرك المباركه

وين راح مدري وانا ادور عليه ولا ماهو فيه لا اللي تدور حقت التنسيم ولا المسمار اللي تركب عليه وانا مستعجل
فكر ياراعي العجراء وش تسوي شغل ذهانتك شوي وش تسوي وانا اقلب الغطاء من الداخل وانا اجيب فص ثوم وان الطس (الطس كلمه يونانيه يعني اسكرالفتحه بالعربيه ) بالثوم يوم حسيت اني غلته غول ماعاد يتنفس وانا اقعد احتريه بس يفوح وتستوي اللحمه زين خوش فكره عبقري ياراعي العجراء كل شي بالتفكير تنهي المسأله لو واحد غيرك ياراعي العجراء طبخ بقاعة المغرفه وانا اجهز السفره والسلطه واطلع اللبن شغل مرتب ولا فندق فيفي ستار
واسحب الكرسي واقعد اقابله لي شوي قلت لاتوقعت انه استوت اللحمه اببعده عن النار
وانخج الثوم بالسكين (وانخج كلمه فرنسيه ماتعرفونها يعني بالعربي ادفع او اضغط )الثوم وتطيح بالقدر لما يطلع البخار واكب الرز لعلي دقيت الهوجاس بعيد لاتتصورون اني اهوجس بأم العيال الحين تقولون ماقدر يصبر الا اهوجس بضب شفته بالصمان وماقدرت اصيده اجحر وتحسفت عليه
المهم وانا غارق بالهواجيس الا وفص هالثوم يطلع من الفتحه من قوة الضغط والثوم والماء في سقف المطبخ والظاهر حتى اللحمه اطلعت ولا رده الا السقف وان اطمر من حراره المرقه اللي حولت علي من السقف تقول مطر مع صوت البخار والربشه ابي الباب وانا اصفق بالجدار على حافه الباب من الروعه

المهم اني طلعت وفكيت عمري وارجع للقدر واطفي النار ويوم برد وانا افتح الغطاء
ولا القى الا عظيمات وقشر طماطه وشوي من ملح القصب
وانا امسك راسي ولا فيه صعرورين بالجبهه تقول قرينات انعيمي توهن شاقات من راسه
وانا اطلع واجيب لي المويه واغسل السقف والفرن والدواليب يوم صار المطبخ تقول حوض نخله وانا احط راسي على الوساده ونومه ويوم صار عقب المغرب وللفوال واطلب صحن فول مع التميس ويالله لك الحمد
بلا قدر كاتم بلا كبسه انتهت السالفه
وقبل الختام سبحانك اللهم وبحمدك لااله الا انت استغفرك اللهم واتوب اليك
ارجوا ان اكون وفقت في سرد هذه السالفه
ولا تنسوني من صالح دعائكم فانا بحاجه اليه
دمتم بخير

__DEFINE_LIKE_SHARE__