راعي العجراء وقل الدبره

محروم.كوم · #1 05-12-2012, 07:50 PM

السلام عليكم ورحمة الله وبركاته
اليكم هذه السالفه بعنوان

(راعي العجراء وقل الدبره)

في يوم من الايام قالت والدتي رحمها الله تعالى
ياوليدي منتب رايح لذيك الجهه تقصد جنوب الرياض حي العزيزه تودين عند اختي
ودي اشوفها وحنا ساكنين بالشمال بالرياض قلت الاباكر ان شاءالله ابا روح عند ربعي بالسويدي في الاستراحه
وباسهر معهم باكر خميس الا اذا انتي تبين الليله مايخالف قالت لا ماودي اكلف عليك يامل الجنه ياميمتي قلت اجل باكر ان شاءالله بعد صلاة المغرب نمشي
طبعا الكلام هذا قبل الجوالات
المهم يوم صار من باكر وانا اروح لحي العزيزيه وانتم عارفين شوارع العزيزيه مثل جبنة البقره الضاحكه كل شوارعها مثلثات
شوارعها شطف تحصل الشارع رايح للغرب ماتدري الا وجهك شمال
او جنوب تروح جنوب يبترم راسك ولاك بالشمال وانا قليل روحه لذيك المنطقه الى الحين وانا اضيع فيها (ارجوا مايزعلون علي سكان العزيزيه) والله اني لارحت يمه اني اتدوكر وتضيع الطاسه ولا ضاعت الطاسه مالقاها الا بصندوق تدسن رايح للحاير عاد يالله متى ياقف اخذ طاستي منه
حتى البيت اللي فيه خالتي مادله زين خالتي كل اسبوع في بيت واحد من عيالها
المهم عرفت البيت بعد جهد جهيد من الدوران نزلت الوالده ودخلت شوي وسلمت وتوكلت على الله يوم جيت اطلع من البيت الا الوالده تصوت لي قالت لارجعت من الاستراحه لاتنساني قلت لا ان شاءالله مانيب ناسي قلت ياوليدي اربط شماغك حتى ماتنسى
قلت ابشري وهذي ربطت الشماغ عارف ان الوالده حريصه ماتنام الافي بيتها
المهم مشيت ورحت للاستراحه وعينت من الله خير لعب كوره طائره من نوع كنكورد مدري جامبوا
وتعشيت قلت للربع يالله ابمشي قالوا تونا خلها لما تتم الساعه ثنتين ونمشي سوا باقي نصف ساعه على الثنتين
قلت مايخالف يوم تمت الساعه ثنتين ولاي ماشوف الارض من التعب وانا استاذن والبس شماغي يوم لبسته ولا هذي الربطه
واقعد افكر انا رابط الشماغ لشي وشو هالشي مدري يمكن عيالي قايلين جب معك خبز لا
ماهو خبز هم يبون عشاء اجيب معي لا المهم طول الطريق وانا افكر بالربطه
وياطولك من مشوار ياعيوني تقول لمبات ريوس يالله يسفرن وحدة من عيوني الظاهر انها نامت اسمعها تشخر وعيني المفتحه تقول لعيني اللي نايمه ياحظه على هالنومه واشوف عيني المفتحه كل شوي تثاوب جاها النوم
المهم يوم وصلت البيت ودخلت والشماغ على ربطته قالت المعزبه جبت امك يوم قالته وانا اصفق الجبه يوم نزت (يعني ارتاعت)العين اللي نايمه وهي تقحص ماتدري وش السنع تحسبه صفقت باب
وانا اسمي عليها اشو ارتحت
ولا العين بدت تنتفض من الروعه
صار عليه تشويش مثل التلفزيون من اول لاصك وانتهى البث
وجه المعزبه اشوفه تقل بيت نمل وينقلون له تالي عشى افغاني
وانا اركب السياره وجيك راجع للعزيزيه وخذ يادوران حتى لقيت البيت يوم وصلت ودق الباب الا امي قاعده بالحوش ضايق صدرها علي ولا الساعه ثلاث او ثلاث وشوي الفجر
هه وين انت وراك ابطيت علي وانا اعلمها بالسالفه وربطت شماغي مافكيته
اخاف انسى اني ابا روح للبيت
انتهت هذه السالفه وارجوا ان اكون وفقت في سردها واخراجها لكم
وقبل الختام
سبحانك اللهم وبحمدك لااله الا انت استغفركاللهم واتوب اليك

دمتم بخير والسموحه على القصور
محبكم ابو جلنبوا
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
راعي العجراء والمطازيز	محروم.كوم	منتدى أخبار المواقع والمنتديات العربية والأجنبية	0	04-24-2012 12:20 PM
راعي العجراء الذهين	محروم.كوم	منتدى أخبار المواقع والمنتديات العربية والأجنبية	0	02-15-2012 01:40 PM
عرس راعي العجراء	محروم.كوم	منتدى أخبار المواقع والمنتديات العربية والأجنبية	0	09-26-2011 02:30 PM
من سواليف راعي راعي العجراء (ثوب العيد والخياط الباسكتاني )	محروم.كوم	منتدى أخبار المواقع والمنتديات العربية والأجنبية	0	09-16-2011 02:10 PM
من سواليف راعي العجراء (عزيمة القعوس لراعي العجراء )	محروم.كوم	منتدى أخبار المواقع والمنتديات العربية والأجنبية	0	09-10-2011 01:40 PM