راعي العجراء والذيخ

محروم.كوم · #1 01-16-2012, 12:00 PM

السلام علاكم ورحمة الله وبركاته
اليكم هذه السالفه راعي العجراء والدق الامريكي مدري الدونكي ضاعت الطاسه
المهم هو اعزكم الله كلب حجمه كبير تقول قعود من كبره جابه لي واحد من الزملاء
احطه في الاستراحه حارس
المهم قعد بالاستراحه سنه او ازود من سنه ماعنده اخلاف اموره زينه معي
ولكن صتيمه (دلخ) مايعرف وش معنى حراسه مثل ماقالوا مايحرك الرابضه
ويمكن لوا يجي حرامي وطب بالاستراحه عطاه ظهره يحول عليه عاد هالظهر الصغير
تقول فراش بر ماطوي زين من كبره
ويوم صار ذاك اليوم وهو يطلع للشارع ويلقى عمال يسفلتون الشارع وراشين قار
(اسفلت ) وحنا بالشتاء والقار دافي وهو يتمرغ عليه ويتدهن ماخلا شي بجسمه
ماتدهن فيه حتى السانه دهنه لما صار السانه تقول محراك نار يوم دريت يوم جاء الدلخ وهو يدخل بالاستراحه بشكل مختلف
تقول قطعة ليل ضايعة بالنهار راح الليل وخلاها
هالدلخ قعد شهر وهو يلحس بالقار عقب ماتضايق منه
فكر راعي العجراء وش يسوي بهالدلخ وانا اطلع وجيب جركل بانزين وانا اربطه بالشجره وروشه بالبانزين يقال فازع له
لعلها ترويشة القشر شوي يوم تغيرت ملامح هالدلخ وقام يصاوي ويجعر وينابح علي
وعيونه تقادح شرار علي لو ينطلق ان يقطعني تقطيع قصاب
وانا اطلع وخليله الاستراحه

يوم جاء واحد من الربع بالليل وهو يفكه من رباطه ولا قال له شي عقب ماركد من البنزين
ويوم دخلت الاستراحه ودرى فيني يوم جاك ماسح طبلونه وانا ازبن المطبخ واقفل الباب
وهو ينابح كنه يقول كان فيك خير اطلع كانك شجاع اطلع لاتقفل الباب بالصراحه نباحه نغير علي تقول يحاكين
وانا ماغير اقوله بليز تفكى ادري انه امريكي اغديه يفهم كلامي ويسامحني واقول له خلاص ماعاد اتعوده حاولوا معه الربع يطيبون خاطره وياويل من قرب له
الماخوذ يبيني واصوت يالربع تكفون مادون الحلق الا اليدين هاتوا الشوزن ابرميه والربع ماخذينها ضحك وخوف علي ويروح ليلي بالمطبخ المشكله وشلون اسري لهلي
قام واحد من الربع ودخل سيارته عند المطبخ وهو يفتح الباب يوم شافه غافل وهو يصوت لي وانا انفج نفجة ارنب ياطلع فيني خف وسبق لو ادخل سباق 5000متر جبت ماهوب الاول جبت صفر بالرقم القياسي
هو درى اني ركبت السياره وهو ينهبل وينقهر قلت للعيال اذا طلع لاتفتحون الباب خلوه ينطق بالشارع ولاتعطون اكل كود يذبحه الجوع ويذلف عن وجهي
المهم قعدت يومين مدري وين راح بس لا بغيت اجي الز الباب لز وافتح الباب وانا بالسياره
وادخل بسرعه المهم انه راح ويمكن الى الحين وهو يدور علي
السالفه هذي لها اكثر من خمس وعشرين سنه
انتهت السالفه وان شاءالله تكون اعجبتكم وقبل الختام
سبحانك اللهم وبحمدك لااله الا انت استغفرك اللهم واتوب اليك
تحياتي لكم ودمتم

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
احد يطمنا عن راعي العجراء	محروم.كوم	منتدى أخبار المواقع والمنتديات العربية والأجنبية	0	01-11-2012 10:10 AM
راعي العجراء في سوق السمك	محروم.كوم	منتدى أخبار المواقع والمنتديات العربية والأجنبية	0	10-31-2011 12:50 PM
عرس راعي العجراء	محروم.كوم	منتدى أخبار المواقع والمنتديات العربية والأجنبية	0	09-26-2011 02:30 PM
من سواليف راعي راعي العجراء (ثوب العيد والخياط الباسكتاني )	محروم.كوم	منتدى أخبار المواقع والمنتديات العربية والأجنبية	0	09-16-2011 02:10 PM
من سواليف راعي العجراء (عزيمة القعوس لراعي العجراء )	محروم.كوم	منتدى أخبار المواقع والمنتديات العربية والأجنبية	0	09-10-2011 01:40 PM