راعي العجرا ..... ودك اللي مايعرف يسولف يسكت

محروم.كوم · #1 05-31-2013, 04:40 PM

السلام عليكم ورحمة الله وبركاته
اليكم هذه السالفه
بعنوان
ودك اللي مايعرف يسولف يسكت
والسكوت ابلغ من الكلام

فيه شايب عنده ثلاثه عيال او اربعه وكان الكبير اقل ذكاء والكلمه الي على السانه يزتها ماتعوق معه
زينه والا شينه وكان دائم يضع ابوه في موقف احراج
المهم الولد كبر وصار شخصيه وسكبه ويحب يلبس ويجخ ولكن عقليته نصف مكينه ماعندك احد
وفي يوم من الايام قرر الولد الزواج وقال لبوه يبه انا الحين صرت رجال كبرت وودي اعرس
وابيك يايبه تخطب لي بنت اكمل بها نصف ديني
الابو احتار ووقع بموقف محرج من يبي يزوجه وهم عارفين انه مامن تكانه ولا يشد فيه الظهر
واكثر جماعته عارفين عنه المهم الابو وده يزوج عياله كلهم بس واقف بدربهم هالكبير ماهوب مزوجهم ومخلي الكبير هو الاول ومع هذا هو اللي طارح موضوع الزواج
فكر الابو وشلون يخطب له من بنات هالديره وهم يعرفونه زين هو وخباله
قال الابو لولده شف نبي نسافر للديره الفلانيه ماهي بعيده عنهم بالحيل والابو يعرف فيها ناس من جماعته بس قليل الاتصال بهم ويقدرونه ويحترمونه الابو ماعليه كلام محبوب عند الجميع
قال الولد مايخالف اللي تشوفه يبه بس اهم شي اني اعرس
سافروا الى الديره هو واخوانه ويوم وصلوا الديره وهو يخبر واحد من جماعته عنده بنت حول الزواج
قال الابو للولد خذ البس البشت والثوب الجديد والعقال ورتب عمرك زين والولد ماهو ناقصه سكبه وتزيين بس شف اذا دخلنا عند فلان لاتفتح افمك بكلمه بس طالع وسكت لا تهرج ولاتقول غير السلام
عليكم قال ابشر بس فيه زواج مانيب فاتح افمي بكلمه
المهم وصلوا بيت ارجال اللي عنده بنت وضيفوا عليه ويعلمونه بالسالفه انهم جايين يخطبون للولد قال راعي البيت هذي الساعة المباركه وابشروا باللي انتم جيتوا على شانه
الولد قاعد بصدر المجلس ماغير يبحلق بعيونه ولا فتح افمه بكلمه
شاف الرجال راعي البيت هالرجل الثقيل السكبه الشخصيه الوسيم المتعافي قال هذا الرجل السنع لبنتي قال راعي البيت الليله عشاكم عندي وباجمع ربعي وجماعتي الليله وهو يقوم ويذبح لهم
ويوم اجتمعوا الجماعه ويقعدون يسولفون ويتناقشون ويسالون عن بعض واش اخبار الربع الي جيتوا منهم وفلان وشلون اموره ومن هالكلام والولد العريس بصدر المجلس ماتكلم ولا كلمه مثل ماوصوه ابوه واخوانه انه مايفتح افمه بكلمه
المهم زانت السواليف وكان وقتهم على نهاية الوسم وانتم عارفين الاولين لارزنامه ولا تقويم مايعرفون الا بجتهادتهم الشخصيه وحسباتهم
قال واحد من الضيوف يالربع المربعانيه دخلت والا توه قال واحد باقي له يومين قال الثاني الا داخله قال الثالث باقي عليه خمسة ايام وهالعربس يسمع السوالف ومسكت ماغير يبحلق بعيونه ويوم زاد النقاش وكثر الحديث ويقوم العريس ويتنحنح له ساعتين ماتكلم
قال يالربع الله يمسيكم بالخير
قالوا ياهلا
قال انتم اختلفتوا عند دخول المربعانيه ولا وصلتوا لحل كل يعطي من راسه صوت
اللي يقول دخلت واللي يقول توه والعلم الاكيد عندي
ابوالرجال واعياله تعجبوا من زين منطق اخوهم والدخول مع الرجاجيل بااسلوب مغاير ماتعودوا عليه من اخوهم وهم يتناظرون بينهم بين مصدقين ومكذبين اكيد في اخونا عرق قاطع وشبك
قال واحد من الضيوف
علمنا طال عمرك العلم الاكيد
قال المربعانيه داخله لها اسبوع مايحتاج خذوا العلم الاكيد
اخوان الولد تعجبوا من اخوهم وكلامه والبشت والسكبه ماجت من فراغ اخونا اعقل مننا بس حنا يمكن محطمينه
قال يالربع ابعطيكم الدليل ان المربعانيه داخله لها اسبوع
ابو العروس فرح ان خطيب بنته بهالرزانه والكشخه وعلومه طيبه ويعرف بالطوالع والنجوم
هالسكبه ماجت بلاش
قال واحد من الضيوف وشلون عطنا الدليل ان المربعانيه داخله

قال قبل كم ليله رحت اقضي حاجتي عند النخله (تكرمون ) ويوم طالعت ولاه يطلع منه بخار
وهو مايطلع هذاك بخار الابالمربعانيه وعرفت ان المربعانيه داخله
وانتم تتجادلون على المربعنيه
قال ابو العروس قم لابارك الله فيك انت ومن جابك هذا حكي يقال بمجلس الرجاجيل
دور الابو وعياله ولا هم غايصة بهم الدنيا ماكملت معروفك وسكت
وهم ياخذون اخيهم ولا يردهم الاديرتهم ويمكن بعد تعدوها من الفشيله

انتهت السالفه
وارجوا منكم السموحه على بعض الالفاظ الغير جيده بالسالفه ولكن القصه هذا محتواها
ارجوا عدم المؤخذه
انتهت السالفه

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
راعي العجرا وبقايا الذكريات (مبارة في كرة القدم )	محروم.كوم	منتدى أخبار المواقع والمنتديات العربية والأجنبية	0	05-13-2013 01:10 PM
راعي العجرا والتفحيط والموقف المحرج	محروم.كوم	منتدى أخبار المواقع والمنتديات العربية والأجنبية	0	04-12-2013 04:10 PM
راكب اللي راعي العجرا قد ساقه(جديد)	محروم.كوم	منتدى أخبار المواقع والمنتديات العربية والأجنبية	0	12-12-2012 01:40 AM
سحاب نجد - راعي شقراء - يسولف عليكم	محروم.كوم	منتدى أخبار المواقع والمنتديات العربية والأجنبية	0	12-11-2012 01:20 PM
راعي العجرا وغصة اللحمه	محروم.كوم	منتدى أخبار المواقع والمنتديات العربية والأجنبية	0	11-26-2012 02:00 PM