رّوآيه " هآيـم فيّ بحـر آلشّوق وُ لذة هيآمك " - الصفحة 252

«ضَحِيًة حِبُيًبُيً ..}● · #1 01-26-2013, 06:47 PM

.

.

.

البارت الـ ثلاثين

فتحت عيني واشوف روحي ومبتسمه . . حابه عمري وحابه كل شي فيني . . المكياج نفس ما اتفقت معاها . . الاسود المركز ع العين عدل من فوق وتحت مع تدرج لون الوردي الفاتج والغامج والبنفسج والروج الوردي الغامج . . سوري يا جماعه بس كنت ملكه . . وانا امدح عمري انرسسسمت لي ابتسامه عريضه لما حطو ع التسريحه الي لامه شعري كلها ع فوق تاج يلمع يلمع يلمع . . صديت ع اليمين ولقيت دموعها تنزل ورى بعض . . مديت ايدي لها . .

انا : عنودي عااد . .

عنود تبتسم : كبرتي يا مهور . .

انا : مسحي دموعج عن تخربين المكياج . .

ميره يت صوبي وتبتسم : فديت بنت عمممممممي . .

انا ابتسم : فديت روحج . .

ميره تبتسم : شرايج فالتسريحه . .

تسريحه ميره بحكم ان شعرها قصير كانت غير عني . . انا شعري كله مسواي له كيرلي ومرفوع بطريقه مرتبه مع تاج . . اما ميره شعرها كيرلي ومجمع كله ع ينب ونزل ع رقبتها بصوب اليمين بطريقه وايد كلاسيكيه . . مكياجي ومكياجها ماكان نفس الشي بالضبط ! كان نفس الالوان بحكم ان الكوشه لونها تدرجات الوردي والابيض . .

قمت من بعد ما خلصت وساعدتني عنود البس عباتي وشيلتي . . وخلود ساعدت ميره تلبس عباتها وشيلتها . . ومن بعدها طلعنا ب سيارتين . . انا وعنود ركبنا مع شهاب وميره وعبدالله وخلود ركبو مع عبدالله . . رادين راك . .

اطالعت ايدي كنت ارجف بقوه . . رصيت ع ايدي ماقدرت اتحمل ومن رفعت عيني شفت شهاب يطالعني من الجامه الجدامية . .

شهاب : مهور ما بتفجين الغشوه عشان اشوفج . .

عنود كانت قاعده جدام : مهووور للحين ما فصختي الغشوه تبين الشيله تخيس المكياج . .

انا نزلت الغشوه وابتسمت ابتسامه ارتبااااك واضحه . .

شهاب يطالعني : بسسسسسم الله ماشاء الله . . " يبتسم " عنود من هالغاااويه . . ؟؟؟

عنود : هاي اختتتك . .

شهاب يبتسم : ماحيد عندي اخت بهالجممممال . .

عنود ادق جتفه : اذكر الله

شهاب : لا إله إلا الله .. "يبتسم " شوفيج بتصيحين . .

انا : مابصييييح شو يصيحني ان شاء الله

عنود : هههههههههه خلها لا تلعوزها يا شهاب مش وقتك تخرب علينا المكياج

انا : جب شهاب اوكيه جب ولا بتصل ف رقوي بخليها ع الخط

شهاب : يا شين ما طريتي . .

انا ابتسم . .

تلفوني ناستنه ف حجرتي لكن وصيت عنود تخبر اميه يودونه القاعه لان احنا على طول بنروح القاعه . . بعد ساعه وربع تقريبا وصلنا القاعه . .

ساعدتني عنود عشان اصعد الدري مع انها روحها مسكينه تعبانه ماتروم تشيل روحها . . تساعدني لان ركبولي الطرحه مع التاج والطرحه وايد طويله ف كانت تساعدني فيها . .

اول ما وصلت الحجره ( الي فالقاعه ) شفته يترياني وانصصصصصصدمت ماتوقعت . .

مشيت بسرعه وسرت صوبه . .

يدي يبتسم : مهره وصلت صح . .

انا : يا عيون مهره وقلب مهررررررره وروح مهره . . " صديت ورى " عنود خلينا شويه . .

ابتسمت عنود وطلعت . .

انا قعدت ع الارض وحطيت راسي ع ريله . . ما افتكرت ب تسريحه ولا افتكرت ب مكياجي الي بيخيس والله ما افتكرررررت . . قسم بالله كنت محتاجه لشوفته . . كنت احاتي اقول متى بشوفه وكيف وكيف ! وفديت روح الغااااالي متعني لين عندي ويترياني . . يعلني ماخلا من هالشوووووفه . .

يدي : قومي ابويه خلينا نتكلم

نزلت دمعتي غصب وحس فيها لانها طاحت ع ايده . .

يدي : ليش ابويه تصيحين ليش يا مهره . .

انا : ماعرررررف خايفه من كل شي يددددديه خااايفه

يدي : قومي اول قومي عن تخيسين وتخربين عمرج . .

انا خزت عنه ومسحت دموعي . .

يدي مسك اييدي : انتي قويه وبنت ريال قوي وحفيده رياآآآل قوووي . . ماتنزل دموعج بسهوله . . انتي تربيتي تكونين قويه وشجاعه وماتخافين ولا تندمين ع اي شي تسوينه . .

انا : يدي اخاف هالتجربه تكون فاشله

يدي : انتي صليتي استخاره . . ؟

انا : هيه . .

يدي : خلاص انتي متوكله على الله والله كاتبلج كل شي بحلوه وشره وهاي الدنيا يا ابويه مش كل يوم تعيشينها حلوه لازم بتشوفين صعوبات ومشاكل واشياء مره ماتوقعتيها تطلع لج لكن قولي الحمدلله وتصبري وخلج قووويه واعرفي ان وراج اهل و وراج عزوه يحمونج طول ما انتي حيه وانتي ماعليج خوف بنت عن عشره رياييل . .

انا ابتسمت ...

يدي يحط ايده ع ويهي : بالبركه يا ابويه تستاهلين . .

انا اغمض عيني : فديتك يالغالي . .

دخلت اميه : مهره اميه يـيتي ؟

انا ابتسم وسرت صوبها وحظنتها . . ماقدرت اصيح بعد لان دخلت عنود ودخلت ميره . . ميره ما راحت الحجره الثانيه لان باب الحجره مقفول وسارو يزقرون الفلبينيه تفتحه ف يت عندي تقعد لين يييبون المفتاح . .

اميه ابتسمت . . : الله يحرسج يا اميه من كل عين . .

يدي : امين . . وين سيف ؟

عنود : سار يديه . . قال حق عبدالله يترياك وعبدالله تحت يترياك . .

يدي يبتسم : يالله انا بسير اميه مهره بشوفج فالعرس . . بتلاقيني موجود وياهم . .

انا ابتسم : بترياك . .

وسرت صوبه وبست راسه واميه وعنود سحبوه بالكرسي وطلعو . .

شوي دشت رقوي ويايبه الباقه . .

رقوي تشوفنا : الللللللللللللله شحلااااااااااااااااتكم . . تخبلووووووووون والله

انا ابتسم واطالع ميره : دام رقوي قالت ان نحن حلوات خلاص احنا حلوات . . ماتجامل تعطيج فالويه . .

ميره : هههههههه . . هاي باقتي صح ؟

رقوي : هيه . .

انا منصدمه : لا تقولين هاي باقتي ؟

رقوي : هييييه . .

انا قمت وسرت صوب الباقه : لا مسسستحيل انا ماكنت اباها جيه . .

رقوي : انزين ليش حلوه ..

انا : لالا بس انا ماكنت ابا جي . . ليش الورد واااااااايد . . وشوفي لونه كيف باهت . . انا قلتله غيييير راويته نفس الصوره وقلتله ابا شراتها . .

ميره : انزين مهور بعدها حلوه والله ما تبين انها باهته . .

انا : ميروه انا قلتله ابا وردي وكلها وردي ويسويلي اياها ع شكل قلب ويحط فالنص ورده وحده بيضاا . . شوفي كيف الورد شكثثثثثثره شكله دفششششش

رقوي طنشتني وسارت صوب ميره : قومي بساعدج تلبسين الفستان يالله خلصييييني عشان اسير أتمكيج . .

شيخه تدخل وتشوفنا وتسمي بالرحمن وتبوسنا وتحظنا . .

شيخه : يالله رقوي دورج روحي تمكيجي انتي اخر وحده باقيه انا بساعدهم . .

انا اطالعها : الساعه كم الحين . .

شيخه : 7 وربع . .

انا سرت صوب شنطه اغراضي وفتحته ولقيت تلفوني وشفت مس كولات ومسجات بس ما جيكت ع شي ودقيتله ع طول . . .

شيخه وميره طلعو سارو الحجره الثانية . .

انا : الووو . . .

وليد : لالاا . . ما بلبس هاي شهاب اطلع من حيااااتي . . الووو

انا مبوزه وساكته . .

شهاب : ياللللللله

وليد : ششششهاب انططططططب . .الوووه ؟

اانا : ولييد . .

وليد : شوه فييييج . . شو صاير . .

انا : خرب لي الباقه ما سواها شرات ما ابا . .

وليد : الهرم ردي طرشيلي رقمه بلعن خيره . .

انا : هو فاشل انا قلتلك هو فاشل ما بيسويلها اياها شرات ما ابا اصلا حسيت انه ما يعرف . .

وليد : انزين تامرين امر احين بروح اسويلج نفسها ف محل ثاني . .

انا : شو تروح الحيننننن ماشي وقت . .

وليد : بندي برد اتصل فيج . .

انا : وليد لحظه انا مش متصله عسبت تقوليبيي بييبلج باقه ثانيه ابيك تواسيني بس وترفع معنوياتي . .

وليد : نفس الصوره الي راويتيني ايااها صح . .

انا : هيه . .

وليد : يالله بندي برد اتصل فيج . .

انا : لحظه

وبند عني . .

دخلت عنود : ليش ما لبستي فستانج . . يالله عشان تتصورين . .

انا : الحين بياذن العششا بصلي وعقب بلبسه . .

عنود : شفيج مبوزه . .

تبطل الباب . .

خلود : عنود صقوري ميت صياح يباج . .

دخل صقوري وهو لابس كندوره بنية غامجه وهو فديته مربرب وابيضاني طالع حبييييييييييييبي كيووووووووووووت . .

انا ابتسمت : حيااااااااااتي انننننتااااااااه تعااااااااال عند مهاااااااالي . .

صقوري كان يصيح ويركض فجاه لما تكلمت سكت و وقف . .

انا : تعااااال . .

عنود : وابويه بلاه ولدي تيبس . . صقوري هاي خالوه مهاااري . .

انا : الوللللد .. انا مهااااري تعال . .

الولد تام واقف وما يتكلم . .

عنود : بسم الله عليك الرحمن حبيبي ههههههههههههههه

انا : هههههههههههههههههه حياتي شو فيك . .

مديت ايدي : تعال بعطيك كاااااكام . .

ابتسم وتجدم . .

انا : احين عرفني . .

شليته وحطيته ف حظني وهو بعده تام يطالعني بس . .

عنود : شفيج ..

انا : شوفي الباقي شو مسوين فيها

عنود تسير صوب الباقه : حلووه مهور مافيها شي بس وايد عوده ..

بطلت الصوره ف الفون وراويتها : احين بالله عليج هاي نفس هاي

عنود : لا مايخصصصها موليه . . لكن بعد حلوه . .

انا : ما حبيتها عنود ليش جي لازم يخترب شي . .

عنود : لا تددقين ع الباقه الحين ونشي يالله اذن . . صلي عشان ازهبج . .

تميت اطالعها وتنهدت وعقب نشيت صليت واستغفرت وقريت الاذكار . . وشفتها عقب ورايه . .

دخلت اميه وتمو يساعدوني ولبسوني الفستان بشويش وعلى نصايح الأم والاخت العوده يعيدونها ويزيدونها عشره آلااااااف مررره . .

لبست حلق فص ألمآس لا هو كبير ولا صغيير . . يعني متوسط وباين شكله . . بحكم ان عندي 3 خبقات فالاذن حطيتها فالخبقه الثانيه والخبقه الثالثه فص وايد صغير . . وركزت ع امي ان يوم بيلبسني وليد الحلق يبطلون عني الحلق الثاني عشان بس يبين الطقم الي بلبسه وما يطلع شي مش مرتب . . .

لبست ساعه جفنشي وخاتم واحد بس وعطروني وغرقوني ب دهن العووود لين ما بدت الاصوات تعلى وبديت احس ان القاعه تمتلي وتميت خااااايفه حيل . . شوي شوي الكل بدا يطلع عني ويخفون لان بيجابلون الحريم . . . وفجاه اندق الباب الوراني . . مش باب القاعه ! الباب الي من ورى . .

وقفت عند الباب : منوووووو

شهاب : اناا شهاب . .

بطلت الباب وتفاجئئئئئت بلي جفته . . .

انا : شو ها . .

شهاب : باقتج . . هي الي فراسج ولا ؟

انا ماعرفت ارد عليه . .

شهاب : ها شقوله !! هي الي فراسج . . ترا دقينا خط لين الشارجه نسوق 200 عشان نوصل . . وليد طرش الصوره لربيعه وربيعه سار يحجزها واحنا سرنا خذناها وييينا . .

انا ابتسمت : يا عمري يا وليد . .

شهاب يبتسم ويبوس راسي . .

انا :ادخخل . .

شهاب دخل شوي وعقبها شافني بالفستان وتم سسسسسااااااكت حسيته انصدم وانا استحيت شوي لكن هو جي انصدم وتبرقت عيونه فجاه . .

شهاب يبوس راسي : الله يتمم لج ع خير يا اختيه . . زين اني دخلت حياتج فالوقت المناسب وشفت وخيتي عروس . .

انا ابتسم : الله يخليك لي طول العمر . .

شهاب يبتسم : انا بروح اكيد الخبل متخبل . .

انا : هههههه اوكيه . .

وراح . .

وانا لين اتسحب بالفستان واوصل لتلفوني جان يدق قبل لا ادق . .

انا : الوو . . توني بدقلك . .

وليد : اوكيه ؟ مشى حالها ؟ حبيتيها ؟

انا ابتسمت : وايد . .

وليد : والله ولا تتمصخرين

اانا : والله . .

وليد : آآآآآآآه الحمممممدلله . .

شهاب : انزيييين حررررك لين متى بتم واقف اهني . .

وليد : شحقه اخوج يشوفج وانا ما اشوفج بصعد .. !!

اانا : ياوييييييييييلك والله

وسرت صوب الباب بسرعه وقفلته . .

شهاب : انزل انزل اانا بسسسسوق . .

وليد : خليني اشوفج عاد

شهاب : ماتشوفها يلااااا بلا منككككر . .

وليد : انزين شو كانت خبرني . .

انا : ههههههههههه وليد عاااااااد خلاص لا تسسسسساله . .

وليد : انزين بندي بساله من وراج

شهاب : لاتخافييييين ياوخيتي مابقوله ولاشششي . .

انا : مششكور وليد

وليد : جب شهاب شوي . . ع شو مشكور . .

انا ابتسمت : ع الي سويته . . وايد عنت لي الحركه وما بنساها . .

وليد : انا مابغيت شي يخرب عليج يومج . . ابي كل شي مثل ما رسمتيه ومثل ما تبينه . . ولا باقه تسوى انج شوي بس تبوزين . . كله ولا الغاليه . .

شهاب : رووووووح . . انطلللللللق

انا استحيت لان جدام شهاب هههههههههههههههههههههههه وتميت جي متفشله ماعرف شقول . .

اندق الباب : خلاص بخليك الحين . . .

وليد : أقري ع عمرج انزين . .

انا : ان شاء الله . . .

وليد : مع السلامه . . .

وسكرت عنه ودخلو البنات عندي وتمو يونسوني ويسولفون وياي ويخبروني عن ربيعاتي الي ياييين وشوي عنود دخلت وماسكه ايد شهد وانا قمت ع طول . .

انا : شهووووووود عمري . .

شهود تبتسم وتحظني : حياتي قلبي . .

انا : فدييييتج والله . . كنت اباج تسوينها وماتين والله كنت بزعل . .

شهد : وانا اروم افوت ؟!! شهالجمااال شهالحلى . . الله يحفظج ياااارب

انا ابتسم : عقبالج

انقلبت ابتسامه شهد . . .

انا :أن شاء الله كل شي بيصير خير واحنا البنات ف راسنا فكره لا تتوقعين ان نحن بنخليكم جي . .

شهد تبتسم من ورى خاطرها : الله كريم حبيبتي الي الله كاتبه بيصير المهم انتي خلج الحين سيده الحفل وابتسمي وفرفشي وماباج تنزلين وتنزل دموعج !!!

خلود : ماعليج من مهووووور ما تنزل دموعها ماجد شفناها تصصصيح . . تيود تيود عمرها

انا ابتسم . . : شفتي كيف انا قوية شهود

شهد تبتسم وتمسك ايدي : حياتي والله . . بروح اشوف ميرووه عيل

انا : اوكيه . . ليكون بتروحين !!!!

شهد : شو يلسني انا يييت بشوفكم و بروح واخاف حد من الحريم الكبار يشوفني ويضايق

رقوي : مهور ماعليج منها تتحرانا بنهدها هالخبله . .

خلود : هههههههه هيه والله ماعليج بنخليها يالسه ويانا وين مانروح

شيخه : دخول الحمام زي خروووووقوووو !!

وضحكنا كلنا وعقبها طلعو . .

ويت المصوره وقعدت اتصور ألف صصصصصوره والف حركه وماحسيت بالتعب صراحه لاني اموت ف شي اسمه تصوير يعني الموضوع عاآآآآآآآيبني ع الاخيييير . .

وعقبها دخلت امي وقعدت اتصور ويا امي ودشت عنود وتصورت وياها و ويا الولد بروحنا وعقب تصورت ويالبنات . . وكنت ابا اتصور ويا ميروه بس صعبه ماقدرت تطلع من غرفتها وانا ماقدر اطلع من غرفتي . .

من بعد ما خلصت تصوير قعدت وتميت اتريا . . خبروني ان ميروه الحين بتنزل . . كان خااطري اشششششوفها لكن ماقدرت لكن قلتلهم يصورونها فيديو طول ما تنزل وعقب حد يييني يراويني . . شوي واندق الباب ودخلت . .

انا : شمممممماني . . انتي وينجججججج . والله اني مستغربه من غيااااابج . .

ييت صوبي وحظنتني ع طول وتمت تصيييييييح ماتتكلم . .

انا : شماني شفيج خرعتيني . . شصااااااير

>

<

>

عمي حمد : شما ماشاء الله عليج احسن من باقي البنيات مكياجج خفيف ولبسج ساتر مش شراتهن هالمستخفات . .

مروان : خلهن ابويه يستااانسون البنيااات

عمي حمد : متى بتروحين ابويه ؟

شماني تبتسم : الحين بس بلبس ذهبي وبخلص . .

عمي حمد : هيه هيه . . ترى ميره بتنزل بالاول . . خلج لين ما تنزل وينزل وراها مايد يشلها واظهري ويانا . .

شماني تطالع مروان الي كان مشغول بالبي بي . .

شماني : عمي بشوف بنت عمي مهره بعد

عمي حمد يعلي صوته : شتبيييييين تشوفينها هاااااي . . هاي ذلت حميّج ذل . . لعوزته كرهته عيشته الفقير بلشته ف مصايب خليييها تولي . .

شماني : مروان . .

مروان يطالع عمي حمد : ابويه خل حرمتي ع راحتها

عمي حمد : امففففف عليك انت ريال انتتتتته .. شورك ب شور حرمتك؟ ماعندك شوووور عليها

مروان : لا ابويه عندي شور الحمدلله .. بس بنت عمي الثاني غاليه ع حرمتي وهن بنات عم ما يصير تحظر لوحده وتروح عن الثانيه . . " يطالع شما " دشي داخل يالله خلصي عسب اوصلج . .

عمي حمد : انت روح شوف ولد عمك مايد عااااااابله مرتبك بروحه , انا بوصلها . .

مروان : بيوصلج ابويه يالله روحي خلصي . .

>

<

>

انا : يعني ماتعرفين نكد عمي شو الي يضايقج خليه برايه يقول عني الي يقوله

شماني : مش بس جي مهره . . طول الدرب وهو يعصب علي ويطيح فيني ويقولي ياويلج لو تميتي لين ماتنزل مهره وبتشوفين شي ماشفتيه وان ما رام عليج مروان انا اروم عليج . . ليش يكرهج مهاري هالكثر لييييييش . . " تصيح اكثر " ومروان حتى ما اتصل فيني . . شاف ابوه كيف يكلمني وكيف ااانا كنت خايفه ويبين علي اني مابا اركب معا عمي لكنه مول ما قال شي جنه يبا الفكه ويبا حد يوووووصلني . . اصلا انا لما رديت حتى من الصالون ما قالي كلمه وحده حلوه ما قالي حلوه ولا قالي عيبتيني ولا مدحني . .

انا امسح دموعها . . : بس ارحمي عمري خربتي مكياجج والله خربتتتتتتيه . .

شماني : اسسفه لاني انكد عليج حتى ف عرسج . .

انا : حبيبتي انتي انا موجوووووده لج كل وقت كل وقت كل وقت متى ما تبيني .. ودري عنج هالكلام ومروان صدقيني مش متعمد اعرفه ولد عمي اكيد في شي او ماخطر ف باله او الف شغله ف راسه

شماني : اصلا من حملت . . " تصيح "

انا اطالعها : من حملتي شوه صار . .

شماني : وايد اتعب فالحمل ف كل ما يي صوبي اتلوع وارجع واخليه يروح بعيد . . احس الحمل سوا حاجز كبير بينا . . حتى ما صار يرقد معايه فالغرفه مهور " تصيح " يرقد فالصاله ويخلي عموه تعصب وتيني تقولي انتي شو مسويه ف ولدي . . ويوم اقوله لا تروح لا ترقد برا عموه تعصب يقولي لا تستوين ياهل وتصيحين ع كلام الكل . . وانا كنت مكبوته وتعبانه وما اتكلم وانتي مشغوله ف زهبتج وماكنت ابا انكد عليج والحين لما عمي زاد زاد انا ماتحملت . .

انا احظنها قو . . والله عورت قلبي . . شماني رهيفه و وايد حسسساسه ومش قد الي يصيرلها وماتروم . . مروان المفروض يوقف وياها الله يهديه . .

انا اطالعها : شوفي حياتي لازم بين اثنين

شماني تقاطعني : ادري بين اثنين واول زواجهم مشاكل حفظت كلامج وفاهمتنه عدل والله ولانه ف بالي انا صابره مهاري . .

انا ابتسم : حياتي انتي . . بتشوفين وانتي طالعه وراده البيت ومروان بيشوفج بيستسمح ع كل ها . . مروان طيب وقلبه طيب وغييير عن اخوانه . . وتلاقينه يتجنبج عشان ما يجرحج ولا يضايقج ومن يحس نفسه اوكيه بيييج وبيراضيج وبتشوفين وبتكلميني بعد فالمسن وبتاكديلي . .

شما تبتسم : الله يسمع منج . . انا اسفه دومني اخرب عليج

انا : حياتي افا عليج والله . . وبعدين عمي حسباله ان ميروه بتنزل وعقب مايد بينزل يشلها ؟

شماني : هيه

انا : ههههههه حليله بيخيسسسسسس عيل . . لان ميروه بتنزل وعقب انا بنزل وراها وعقب بينزل وليد واخر شي بينزل مايد . .

شماني : هههههههههههههههههههه . .

دخلت رقوي . . : مهوووووور . . صورتلج تعالي شوووووفي . . بسرعه لان بتنزلين وراها . .

اميه : يالله مهره . .

انا : امييه ماقدر واي قلبي . .

رقوي : شوفي الفيديو عشان تتهيئين ..

انا : وخري ماروم اشوف شي الحين احس قلبي بيطيح من مكااااانه . .

اميه تي صوبي وتمسك ايدي وتنزل دموعها وتبوس ايدي ويبهتي وتدعيلي : يالله ماماتي . .

انا احس براحه كبيره بوجودها . . الله لا يحرمني منج يالغاليه . .

انا : انزلي ويايه الله يخليج. .

اميه : لا ماماتي بتنزلين روحج ما يصصيير . .

دشت خلود : مهور يالله سكرو الليتات . .

انا احس خلاص اتيبست مكاني . . عطوني الباقه وبعدها مشيت شوي شوي وغمضت عيني وخذت شهييييييييييييييييييييييق وزفير ومن تبطل الباب . . بدت زفتي . .

حد منكم شاف في الدنيا بدرمقبلٍ يمشي و من حوله بشر

من حلاه يزف للناظر ضياه ان ظهر للناس و لا ما ظهر

هذا ما هو بدر ليل يختفي مع طلوع الصبح و بزوغ الفجر

او بدر يصبح بعد مده هلال هذا بدر مكتمل طول الشهر

هي عروس النور في هذا الزمان هي ملاكٍ بس في صورة بشر

من غلاها انقول صلوا على الرسول يا اللي شفتوها بقلبٍ او نظر

بدت خطواتي تمشي . . برغم الازعاج والصوت والتاثير الا اني اسمع دقات قلبي اقوى . . كنت اتصنع ابتسامه قوه . . ابتسامه حياه يديده . . ابتسامه كنت اشوف فيها ويه وليد . . ابتسامه تخليني احس اني خلاص . . ودعت كل شي عانيته وبطوي كل شي ورايه وبعيش حياه يديده وسعيده باذن الله . . .

كنت اتصدد واصد للناس وابتسم . . والي اعرفهم عدل واهلي ابتسملهم واضحك واطرشلهم بوسه . . شفت نورة .. شفت نظراتها تجاهي كانت تطالعني بنظرات غريبه فظيعه احس بتاكلني بعيونها . . . المفروض تطمن الحين وتفتك مني ليش هالنظرات الي مالها معنى !! مع نفسسسسسج . . كملت مشي لين وصلت الكوشه الاولى الي صوب ميره وابتسمت لها لانها طالعه ملاااك وهي فالكوشه . . وقفت عدالها واهلنا يصلون ع النبي ويهللون ويزغرطوووون . . . وخذنا صوره مع بعض . . وبستها وبعدين رحت الكوشه الثانيه الي بيني وبينها حاججز . . وقعدت . . وبعدها قامو الناس يييون ويسلممممون وكثرو الزحمه صوبي . .

وشوي بدا الرقصصص واشتغلن البنات هززز بالفرررررحه . . . كنت احس بالفرح بعيون كل الي يحبوني . . ابتسامتي ما كانت تفارقني وكنت احس بشعور مااااااااا ينوصف من روعته وخاصه لما شفت بنات السكول كلهم مانسوني ويو عندي واتخبلو وياي . . وتصورنا مع بعض . . كيف الايام ركضت جذيه ؟ امس انا وياهم نضارب ونتحرطم ع الابلوات والامتحانات والتقارير والمشاريع . . امس كنا ع الطاولات والكراسي و بـ زي رسمي ونتمصخر ونضحك ونشوف مجلات سوى ونشوف صور فسسساتين ونتخيل بعض فيهم . . . سبحان الله كيف الايام تركض والواحد ما يحسب لها حسسساب . . رمشه عين انا كبرت وصرت حرمه وصرت عروس وهذيل المخابيييل ويايه ع الكوشه !!

ابتعدو وانتشرو لان اتسكرت الليتات وبنات عمي لبسن شيلهن وعبيهن وغطو ميره . .

انرسمت لي ابتسامه حزينه لاني وانا اشوفه يمشي ويتقرب صوبي تخيلت ابوي ع يمينه . . بلعت ريجي وقويت عمري . . لان عمي سعيد وشهاب وهو يقود يدي تكفيني وزود . .

وصل صوبي هو اول واحد . . وابتسم ابتسامه عريضه وباس راسي وعقبها باس خدي اليمين

وليد يهمس لي : مبروووك . .

تميت ساكته ارجف وقلبي يرجف ماتكلمت ..

يا عقبه يدي وانا نزلت ليدي وبست راسه وبست ايده وقبضت روحي عشان ما اصيح . . فديت الغالي . .

يدي : هالله هالله عليها ياوليد . . حطها ف عيونك وسكر عليها . . هذي الغاليه . . هذي مهره بنت المرحوم . .

وليد: في عيوني ومسكر عليها عيوني وقلبي وكل شي . .

يدي : ما ينخاف عليج و وليد معاج ما ينخاف عليج يالغاليه . .

وبسته مره ثانيه وحظنته وبلعت ريجي وقمت لان شهاب غصبني و وقفني وحظني . .

شهاب : لا تخربين التهريج الي في ويهج يالغبيه . .

انا : هههههههه تهريج . .

جد خلاني اضحك . . !!

شهاب : الي هو ذا كله الي فيج الي مغيرنج ومخلنج حلوه وانتي تروعين بلد ..

انا ابتسم : هههههههههه الله يسامحك . .

شهاب : بالبركه ياخيتي . . بالبركه . . . شيخ وخذا شيخه . . تستاهلون بعض . .

و وقف عدال وليد . . وحرك يدي صوبهم بعد . .

ياني عمي سعيد وباس راسي ويبتسم : بالبركه ابويه بالبركه .. . ها يوم السعد عندي

انا ابتسم . .

وقف عدالي عمي وتصورنا كلنا صوره جماعية وقبل لا تصور ! مسك وليد ايدي بقوه ورص عليها جنه يطمني يقولي لا تضعفين انا معاج . .

بعدها يو سلمو علي مره ثانية . . ويدي وصا وليد علي مره ثانية . . ولما بغو يردون

يو البنات وتمو ينثرووووووووون علينا بيزات . .

رقوي : شهاب ليش ما نثرت بييييييزات

شهاب يطالعني : عوذ بالله . . من ذي . .

رقوي : انا بقولك انا منو بعدين اوكيه يالخايس . .

شهاب ابتسم . . وطلع من جيبه وتم يفرررررر ويفر ويفر . .

والعالم تجمعت صوبنا وضراااايب يلقطوووووون . .

لما صديت جفت وليد يطالعني ويبتسم . .

انا اطالعه : خلك ماسك ايدي عن يطيحوني

وليد : اباهم يطيحونج عشان اشلج . .

انا اطالعه : يالحممممار .

وليد يبتسم . .

وبعدها ابتعدو وراحو وعيني ع يدي وهو يغيب عن عيني وتنهدت . .

بعدها يو اهاليتنا مره ثانيه وتمو يسلمون ع وليد وعلي . .

وعلى هالحال لين الليتات تسكرت مره ثانية . .

وليد يطالعني : بووه . .

انا ابتسم . .

وليد : ابا اكحل عيوني فيج . . ايا اشوفج 5 دقايق ع بعض من غير ما حد يقاطعني . .

انا منحرجه خلاااااااااص ماعرف شقول وهو قابض ايدي وانا ارص بقوووه وقرمشته

وليد : اخخخخ . .

انا : عيل اسكت

وليد يبتسم : ليش تستحين ؟؟

انا اطالعه : وليد عااااد

وليد : قولي تستحين

انا : لا ماستحي

وليد : عيل انتي عذاب اليوم . . ع ذ آآآآآآآآآآآآآآآآآآآآآآآآآآآآآ ب . . ّ!!!!

انا ابتسمت . . .

وليد : ولا تبتسمين لانج تعذبيني اكثثر . .

انا اطالعه : وليد عاد خلاص . .

وليد يصد : ليش سكرو الليتات . .

انا : بيدخل مايد . .

ودخل مايد

وليد : ليش محد غطاااااااااج !!!!!!!!!!

انا : اششش صوتك عالي لا تفضضضحنا . . ترا الممر الثاني ع طول يودي ع كوشت ميره ما يمر فيه صوبي . . وبعدين شوف الظلام انا ما اشوفك ..

وليد : انا اشوفج .. يعني لو بستج الحين محد يشوف ؟

انا : وليد والللللله

وليد تقرب وباس خدي . .

انا : حممممار والله

وليد : هههههههه .. .

انا انتبهت ان فاجييين الشاشه العوده الي مجابلتني ع ميره ومايد ! واحنا موصين القاعه ان لما ينزلون الريايييل هالشاشه تتسسسكر . .

انا : وليد يويلك لو صدييييت جدام . . خلك جي تطالعني . .

وليد : ليييش . . شسالفه

انا : مش مسكرين الشاشه وميره فيها . .

انا تميت اطالع و وليد يطالعني ما يتحرك . .

يت رقوي صوبي : شوفيج تأشششششرين حشرتيني ..

انا : ياحيوانه قوليلهم يسكرون الشاشه . .

رقوي : اووووووووييييييييه اوكيه بقولهم . .

وسارت . .

وانا تميت اطالع ميره وهي ترجف وترقص ترقص من الرجفه واضح هههههههههه . . ومايد وعمي حمد وعمي خالد ومروان و و و و و و انصدمت لما شفت سيف . . . !

بلعت ريجي وخازت ابتسامتي . . وليد بعده ملاحظه انه يطالعني واحاول ابين اني عادي لكن ابتسامتي لا ارادي تلاشت . . كانت عيونه غييير . . ملامحه غيير . . باس راسها وحظنها وماعرف شقالها و وقف عدالها وتصورو كلهم . وبعدها الشاشه تسكرت . .

وليد يطالعني : شفتيه . .

انا صديت صوب وليد ع طول . .

وليد يبتسم : سيف . . كنتي تشوفينه . . .

اتمنيت الارض تبلعننننننننننننننننننننننننننننننننني ولا انحط فهالموقف . .

انا كنت ارمس بشكل متقطع : كنت اشوف . . شو يصير . . ماكنت ابي اشوفه . .

وليد ابتسم : مضايجه . .

انا : طبعا لا . . انا مش ندمانه ع شي وليد . . مش ندمانه ع شي ابدا .

وليد يبتسم : اعرف والله . .

يا عمي خالد صوبنا . .

و وقفت و وقف وليد . . وسلم علينا وباس راسي . . و وصانا ع بعض وراح . . توقعت من باب المجامله عمي حمد يمر لكن مع الاسف كمل طريجه وطلع . .

وليد يطالعني : برايه . .

انا : برايه ما يهمني اصلا . .

وليد : ادري يحز ف خاطرج

اانا : منه هو !! لا والله ما يحز ف خاطري شي منه ابدا . . برايه

من عقب ما طلعو الريايييل . .

اميه و عنود : يالله عشان تلبسها الطقم . .

قام وليد وقمت . .

انا : عنود بطلي حلقي اول . .

وليد ابتسم . .

انا صديت اطالعه حسيت افف فشله . .

عطوه الحلق ودخلاه عدل ماشاء الله عليه وسكراه بعد . .

عنود : ماشاء الله وليد ما لعوزتنا . .

وليد : مدرب ماعليج . .

انا اطالعه : مدرب مع امنوه

وليد : شفت ف قوقل بلاج

اميه : هههههههههههههههههههه

عطوه القلاده ولبسني اياها عدل بعد وهمس ف اذني : ياويل حالي . .

ابتسمت ابتسامه احرررراج . .

وبعدها مشينا صوب الكيكه. . عطونا السيف . .

انا : خلنا نبدا من الطبقه الثانية . . الاولى عوده . .

وليد ماسمعني ف سوالي طاف وبدا من فوق وشوي شوي قصيناها لين تحت . . حطت لنا عنود ف صحن وعطت الشوكه لـ وليد . . كلا منها شوي وعقب حطالي قطعه صغيره وكلت منها . . ومن الصوب الثاني سمعنا صوت ضحك من الخاطر . . عرفت ان شي صار صوب ميره . . حسيت مش حلو لاني ماعرف شو يصير معاها ولا ادري شو استوى وادري انها تحس بنفس الشعور . .

شربنا العصير سوى ومن بعدها يلسنا . . وتمو يصورونا . .

رقوي : ههههههههههههههههه تخيلي مهور . . ميروه طيحت الكيكه ع كندورة ميود . .

انا + وليد : هههههههههههههههههه

وليد : شو سوا . . انا لو مكانه بعطيها كف صراحه . .

رقوي : ميود مفففففففهي ههههههههههههههه بس ع لسانه لا عادي لا عادي هههههههههههههه

انا و وليد تمينا نضحك من قلب . .

عقبها بشوي . . يو يابو ستاره خفيفه جدامنا عشان بينزفون ميره ومايد . .

وليد : تتحدين اني ابوسج مره ثانية . . .

انا ابتسم : وليد عاد خلاص . .

وليد تقرب مني وباس خدي وابتسم . . : مهور . .

انا اطالعه ومستحيه ومبتسمه ابتسامه خفيفه . .

وليد : احبج . .

انا انحرجت وبلعت ريجي ونزلت راسي باحرررررراج . .

رفع راسي ب صبعه وخلاني اشوفه : انا احححبج . . تعرفين شو احبج؟

تبطلت الستاره ونزل وليد ايده عني . .

ام وليد : وليد . .

وليد انصدم . .

انا اطالعه : قوم . .

وقف وليد . .

وحظننننننته من قلبها وتمت تصيييييييييييييح . . : بالبركه حبيبي . . الله يهنيك فديتك وتشوف الحياه الي تحلم فيها وتباها . .

عقبها يت صوبي وحظنتني : ماوصيج ع ولدي حبيبي . . لا تضايقينه لا تكدرين خاطره تراه يتحمل ويبلع وايد ما يقول . .

انا ابتسم : لا توصين . . .

خلود وشيخه : يالله يالله . . ززززززفه تايم . .

ابتسمت وقمت و وقفت عداله وبدال ما يمسك ايدي مسك خصري ومشينا سوى . .

الزغاريط من كل صصصصصوب . . وينثرون علينا ورد وفلوسسس . . وكل شوي نوقف ف نص الكوشه عشان يون يسلمون علينا والي يصيييييح والي والي . .

والحمدلله عدت ع خير وصعدنا فوق بسسسلام . . قلنا حق المصوره تتريا شوي لان كنا تعبانين . . قعدنا مال 5 دقايق مع الاهل والي يتكلم ويوصي ويعيد الرمسه الف مره وعقبها من خلونا لحالنا قمنا عشان نتصور . .

هالمره حسيت ان وليد وايد مرتبك . . وايد واضح عليه الربكه . . ماقولكم اني كنت جريئه لا والله مرتبكه ومستحيه ومفتشششششششله موت وهو بارتباكه خلاني ارتبك اكثر . .

هاي اول مره نتصور فيها سوى لان فالملجه ما تصورنا كانت ملجتنا فالمحكمه بس . . اول مره يشوفني فيها جذذذيه عروسسس وبهالكشخه وبهالعري ويلمسني ويتصور ويايه ويحظني . . . عشان جي يمكن الشي كان بزياده من صوبه ومن صوبي . .

مع اني وايد كنت احاتي هاللحظه قلت اكيد بيتمصخ وبيسوي شي لكن ارتباكه خلاني اطمن انه ما بيتهور . . !!!

كنا نطبق كل حركه يقولونها بالحرف الواحد . .

ختمناها بصورة انه قاعد ع كرسي عريض احمممر .. وانا قعدت ع ريله وحطيت ايدي اليمنى حواليه ع جتفه وايدي اليسرى متشابكه مع ايدينه الهنتين . . وعيونا تناظر ف بعض . .

وليد : احبج . .

جكككككككككككككككك . . .!

صورتنا . . .

انا ابتسمت وردلي الابتسامه وعقبها كنت يايه اقوم بس رص علي ماخلاني اقوم . .

انا اطالعه . . كنا بقرب فظيع وكنت مفتشله من الفلبينيات الي يالسات يشلون عده التصوير . .

وليد باسني ع يبهتي وع خشمي وبعدها اطالعني وابتسم وباس ايدي . .

انا بلعت ريجي : حيوان شوف كيف يطالعونا . .

وليد : شعلي منهم . . " يبتسم " . .

سويت عمري اكح عشان اقوم وقمت . . حسيت قلبي خلاص يعلن انه بيرفع الرايه البيضا . .

اندق الباب ودخلت عنود . .

وليد : عنود واقفتلي فالبلعوم اليوم

عنود : ههههههههههههههه افا . .

وليد يبتسم . .

عنود : يالله ميره و مايد ركبو السياره . . " تطالعني " ما بتبدلين الفستان ؟ ميروه فستانها خفيف تروم تتحرك فيه . . انتي ماترومين . . .

وليد : انا موجود . .

عنود تبتسم : اهني مانروم نقول شي عيل . .

انا ابتسمت باحراج . .

عنود : متى السفر ؟

دخلت اميه . .

وليد : بنتم ف قصر الامارات هالليله . . العصر الطياره . .

اميه : هيه احسن عشان ترتاحون شويه ولا واحد فيكم رقد هاليومين عدل . .

وليد : حاولت اآخر السفر ليلتين بس ماشي حجوزات ومايد استعيلني بعد

عنود : لا جيه زين . . يعني خلاص ها اخر يوم نشوفكم فيه ؟ من قصر الامارات ع المطار ع طول صح . .

وليد : هيه ان شاء الله

يت امي صوبي وحظنتني وتمت تصيح . .

وليد : لا تصيحين امايا . . بنتج تراها بنتي الصغيره وبحطها ف عيوني

امي : وانا واثقه فيك ياوليد واعرفف . . انت ما خيبت ظني فيك قبل وادريبك ما بتخيب ظني بعد . .

دخلو البنات عندي وتمو يحظنوني ويصييييييحيون وجلبو الدنيا مناحه ..

رقوي تصيح : اصلا انتي اكثر وحده بشششششتاقلج

وليد : شوفي ويهج ههههههههههههههههههههههه

انا : وليييد ياحمار

رقوي : مابببرد عليه خ يوووووولي . .

خلود : خلاص خلييي مهرو بتخيسينها بدموعج . .

وسلمنا ع بعضضضضض للمره الاخيره وغطوني لين ركبت سياره وليد المزينه وقعدت جدام .. وركب وليد وتم يضربلهم هرنات وحرررك . . وطبعا قبلنا تحركو مايد وميره . . و ورانا انطلقو المسيرررررره .. شباب العايله كلهم بسييايرهم ورانا ويدقوون هررنات وموقفين الشارع وتمو ورانا يدقققققون ومرتبشششششششين حييييييل مال ربع ساعه فالدرب وعقب خلاااااص . .

انا صديت اشوف : الله يحفظهم يااااارب . .

وليد يبتسم ويمسك ايدي : ما بغو يخفون علينا شوي . .

انا اطالعه وابتسم وجي مستحيييييييييييييه . . احس غيييييير . .

وليد : ليش مستحيه . . تحسسيني اول مره بتكونين فيه ويايه بروحنا . . " يبتسم " كله نتم بروحنا اصلا نحن " يطالعني "

انا ساكته ومارمس وبس شاقه الحلج من الاحراج . .

وليد : كان يومج مثل ما تبينه ؟

انا اطالعه : هيه الحمدلله . .

وليد : اكيد . .

انا : هيه

وليد : ماتبين نعيده مره ثانيه

انا : هههههه لا واللللله . .

وليد : كل شي بسوي لعيونج . . " يبتسم " امري ادللي انتي بس . .

انا ابتسمت ومارديت عليه . .

تم ماسك ايدي ويلعب باصابعي . . وانا شليت البي بي وصورت ايدي وايده سوى وحطيتها دي بي وابتسمت . .

على طول سوتلي عنود بنق وقالتلي شلي الصوره عن العيد . . وسمعت كلامها وشلت الصورة . . ماشي مجال للنقاش مع عنود !

فتحت محادثه شماني شفتها كاتبتلي . . " سوري لاني رحت بسرعه . . من عقب ما زف مروان مايد قالي اطلعي بنرد "

>

<

>

ركبت السياره شماني وهي متغشيه . .

وحرك مروان السياره ورد البيت من غير ما يكلمها . . نزلو سوى ودخلو الحجره ومن بدلت عباتها يا صوبها . .

مروان يطالعها : انا ماحب اللون التركواز . . وانتي لابسه فستان تركواز . . انا ماحب المكياج الهادي وانتي حاطه مكياج هادي . . انا ماحب الشعر الملوم . . وانتي لامه شعرج كله . .

شماني تمتزر عينها دموع . .

مروان يتقرب منها : مع ذلك انتي قمر . . ماتوقعت التركواز بهالحلات وهو عليج . . ماتوقعت المكياج الهادي يراويني كيف انا متزوج ملاك ما يحتاج تحط ولا شي حتى ف ويها . . ماتوقعت الشعر الملموم ممكن يراويني حلاج ومفاتنج وكيف انتي اميره . . سمعت اختيارج لكل شي وماحبيت اشوف واحبطج واقولج ان كل الي اخترتيه انا ما احبه . . وبعدين انتي مش متعدله لي متعدله للعرس ! ف ما حبيت اعطيج رايي واضايقج وادري لو تكلمت كان ارحم من انج تشوفين سكوتي . . وانج تشوفيني عيني بعيده عن عينج . .

شماني تنزل دموعها . .

مروان : انا احبج بكل حالاتج . . حتى بالحاللات الي توقعت اني ماحبها وشفتها عليج . . " يبوس راسها " انا ادري اني غلطان . .

شماني : مسموح ولد عمي ولا عليك عيب ..

مروان : صدج لي طول فتره الحمال بنا حاجز صغير بينا وصدقيني الغلط مش منج وانا عارف . .

شماني : انا بعد غلطااانه

مروان : لأا انتي ما منج غلط ابد . . لا تعقين عليج اللوم . . انا مابا منج الا شي واحد

شماني : ولك الي تباه ولد عمي

مروان :انج تسامحيني

شماني : مسامحتنك ومحلل دوم . .

مروان ابتسم وحظنها . . : ادري انج صابره علي . .

شماني وصوتها شوي مبحوح من الصياح : انا ابيك انت الي تصبر علي بعد وتتحمل حمالي وما تتغير علي وتبتعد عني ..

مروان : فدييييت هالحس . . انتي ماطلبتي شي والله ما طلبتي الاحقج . . !!! اشوفج شوي !

"cut”

>

<

>

وليد : ودري عنج البي بي وخلج معايه . .

انا اطالعه : لحظه اخر شي بس . .

ماقدر افوت ههههههههههه لازم اقرى شصاااار وادري كل وحده بتعبر وبتكتب شصار معاهاَ

وفتحت القروب . . ولقيت عنود كاتبه . .

>

<

>

عنود : حبيبي قوووم .. .

عبدالله يفتح عينه بتعب : شفيج . . بتربين ؟

عنود: أي اربي . . بعدني باقلي 3 شهور . . لكن قوم تعبانه اليوم وايد تحركت . . همزلي جتوفي شوي . .

عبدالله : من عيوووني . .

وتلحف وكمل رقدته . .

عنود : عبااادي . . قوووووم والله اني هلكانه حرام عليك . .افركني ب فكس انزين . .

عبدالله وهو راقد : ان شاء الله حبيبي

عنود : استغفر الله . .

>

<

>

انا : ههههههههههههههههههههه . .

وليد يطالعني : شو يضحكج . .

انا ابتسم : سالفه بنات مايخصصصك . .

وليد : بشل البي بي بفره برع والله . .

انا : خلاص اخر شي . .

>

<

>

مايد يطالعها : مبرووك . .

ميره : الله يبارك ف حياتك " تبتسم "

مايد : شو احساسج . . ؟.

ميره : ماا فيني احساس للحين . .

مايد : مستوعبه ان انا سويت الي فراسي وخذتج رغم عنااادج وخشمج الطويل

ميره : لا واللللللله . .. يعني السالفه سالفه عناد كانت

مايد : عيل تتحرين حبنا فيج ؟؟؟

ميره : مايد ترمس جد .. وقف السياره بنزل . .

مايد : هههههههههههههههههههه

ميره تصارخ : وقف السياره واللللله بنزل عادي

مايد : وين تنزلين بفستانج انتي مينونه !!!!!

ميره : مايد اذا ما وقفت السياااااااره انا ببطل الباب . .

مايد يمسك ايدها : امزح معاج

ميره : خوووووووز ايدك عننني

مايد يطالعها ويسوق : والله امزززززح معاج والله . . " يبوس ايدها " يالله عاد ..

ميره : اصلا يبين من عيونك انك ماخذني بس جي سالفه عناد وتبا تكسر راسي . .

مايد : هوصح هالشي في بالي بعد لكن اني احبج سبب اقوى . .

ميره تبتسم : ما يضحك

مايد : ادري ان ما يضحك . .انا ماقلتلج اضحكي .

ميره : انزين . .

وهدت ايدها عنه . .

مايد يبتسم : الارض مش شايلتني من الفرحه . . " يطالعها " واخخخخيرا ما بغيتي يا حيوانه !!!!

ميره : ميود لا تسسسبني . .

مايد : ماعليه بطلعه من عيونج اصبري . .

ميره : شو تقصد . .

مايد : بتعرفين ان شاء الله فالوقت المناسب

ميره : ردني البيت

مايد : ههههههههههههه البيت هاه . . انتي الحين حرمتي . . " يبتسم " بيتج عندي انا . .

ميره : انا مش مسافره معاك خلاص . .

مايد : ع كيفج هو . . شالنج غصب شالنج . .

ميره : انت اشوفك كله ماشي بشور الغصب

مايد : حرمتي غصصصبن عليج تسمعين كلامي

ميره : لاتقول غصصصصب والله مش غصب بعاند وووووو

مايد بتسم : عاااااندي وسوي الي تبينه بس حطي ف بالج انج بتكونين ويايه انا وبس وبروحنا ومالج مفر . . يعني عنااااادج عقيه بحر . .

ميره : ايوووا اطلع ع ححححقيقتك

مايد : اوووه ماشفتي شي بعدج

ميره : اصلا انا ادري انك من داخلك واحد وصصصصصصصخ و واحد

مايد يقاطعها : ايوا انتي الي اطلعي ع حقيييييقتج وولي رايح فيني بصراحه . .

ميره سكتت . .

مايد : كممملي كملي اشوف .. واحد وصخ وواحد متزوج لان يبا زواااااااج بس وف باله زواااااج بس . ٌ,قولي هالكلام اشوف

ميره : مابقول . .

مايد : لا قولي

ميره : قلتلك ما بقووووووول . . .

مايد : . . .

ميره : . . .

مايد : ..

ميره : حتى ف ليله عرسنا تهزبني

مايد يطالعها : احين انا هزبتج . . ؟ انا قلتلج شي . . انتي الي ماكلتني بقشوري . .

ميره مسكت ايده وحطتها ع قلبها وخلته يسكت مره وحده . .

ميره : سمعت . . اسمع قلبي بس كيف يحبك . .

مايد يطالعها : كيف شو . .

ميره تبتسم : كيف يحبك . .

مايد يبتسم : كيف شوو . .

ميره تبتسم اكثر : جب . .

مايد : كيف شوووو . .

ميره بصوت واطي : كيف يحبك . .

مايد يبتسم : ووووووفديت القلب وراعيه القلب وصوت القلب وروح القلب . .

>

<

>

شل فوني . .

انا : وليييد هاااات بس بكمممل هالشي وخلاص بعطيييييك . .

وليد حطاه ف جيب كندورته . . : طماع . . ابيج مشغوله فيني بس . .

انا : يالله عاد وليد ..

وليد : ياحماره انتي بفستانج الابيض وهالحلا كله جدام عيني وتبيني اخليج مشغوله ف البي بي واسكت . . . !!!

انا : . . .

وليد : تبينه ؟

انا : . .

وليد طلعه من جيبه : اندوج لا تبوزين . .

انا شليت الفون وحطيته ف المكان الي ينحط فيه الاكواب فالسياره . .

وليد يطالعني . .

ابتسمت له وقبضت ايده وشبكت اصابعي فاصباعه . .وعلى طول باس ايدي . .

وليد : فديتج . . .

انا اطالعه : وليد انت احلى شي صارلي . . انت غيرت فيني اشياء واااايده ماتوقعت ف يوم تتغير .. زرعت فيني الامل مره ثانيه . . زرعت فيني ان الدنيا حلوه وبعدها بخير . . " اطالعته " زرعت فيني الامان والحنان وزرعت فيني كل شي حلوو . .

وليد ابتسم بحنان ومد ايده وتقربت منه وحطيت راسي ع جتفه وحظني . . تم يمسح ع راسي بشويش وباس يبهتي . . ماقدرت اغمض عيني لاني خفت ارقد وماقدر ارقد وانا لابسه عدسه . . كنت ابي اغمض عيني عشان امنع الاحراج والاحساس المحرج لكن ماقدرت اضطريت اخلي عيني مبطله وتامه مبتسمه مثل الهبله وهو كل شوي يبوس يبهتي ويبوس ايدي . . .

.

.
__DEFINE_LIKE_SHARE__

«ضَحِيًة حِبُيًبُيً ..}● · 01-26-2013, 06:48 PM

السلام عليكم ورحمه الله وبركآته

عوده بعد غيآب اسبوع . .
عدت امتحاناتي ع خير وباذن الله افرح بالنتايج . . .

كتبت لكم البارت مثل ما وعدتكم يكون خفيف وحلو . .
البارت 23 صفحه . . يعني زدت لكم 3 صفحات مارمت ازيد اكثر اعذروني . . .
اترقب رايكم وانتقادكم بصدر رحب . . .

اشكر اخواني الي ينقلون كلامي من تويتر . .
واشكر كل الي يشجعني بكلامه سواء اهني او بـ تويتر . .

ترقبوني باذن الله الويكند الياي . .
ضحيه
__DEFINE_LIKE_SHARE__

زهرة الجلاس · 01-26-2013, 07:22 PM

سـلااامــي عليـج ع البــارت العجيــب ...

و الاحـداث طر ( مهـور و وليد ) ...
تسلميــن الغــلا ...
__DEFINE_LIKE_SHARE__

الاسلام ديني · 01-26-2013, 08:05 PM

رووووووووعه البباااارت ..

وننننااسسسسه
نترييآآاج حبيبتي ... __DEFINE_LIKE_SHARE__

! ĐįƠЯ ƒάṦђịǑη ! · 01-26-2013, 08:16 PM

مشككوره على البارت الحلووو

عمهم حمممد هذااا اككككرههه لو يموت احسن
حليله يدهم طييب
العرس كان حلو بس لو بدون سيف وعمهم حمد احسن
وليد يضحك ويا حركاته مع مهره .. الله يسعدهم ويبعد عنهم المتوحش سيف
مايد وميره تحححفه حتى بعد عرسهم يتضاربون هههه ... الله يسعدهم خخخخ ^^

رقوي وشهاب >> توم & جيري ههههههه

نتريا البارت الياي ^^ تقبلي مروري __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
خادمة "تذبح" طفلة مخدومها بحفر الباطن	محروم.كوم	منتدى أخبار المواقع والمنتديات العربية والأجنبية	1	04-16-2013 02:04 AM
المرور""""""""للايجار """"""" فالمرور """"""4 شقق.. غرفتين+3 غرف ((65الف_150الف))	محروم.كوم	منتدى أخبار المواقع والمنتديات العربية والأجنبية	0	01-20-2012 04:10 PM
بلاك بيري تورش 9860 فل تتش مع بن ممير """"""""""""""""""""""	محروم.كوم	منتدى أخبار المواقع والمنتديات العربية والأجنبية	0	10-28-2011 11:00 AM
""""""""مطلوب لكزس lx570 الدفع كاااش """"""""""	محروم.كوم	منتدى أخبار المواقع والمنتديات العربية والأجنبية	0	07-19-2010 03:50 AM
"""""""""""""""""""""""""""فساتين زفاف راقية ومميزة """"""""""&am	محروم.كوم	منتدى أخبار المواقع والمنتديات العربية والأجنبية	0	07-13-2010 12:00 AM