مرااحب
الجزء الثامن والاخير
الفصل الاول
في البداية كانت 10 اجزاء عقب طولت الاجزاء
واستوت 8
^ــ^


مر الاسبوع بسرعه وهذا الجمعه وبعد الصلاة .

خالد : يالله عسب مانتاخر.
ام خالد :خلاص حط هالكيس فالسياره وخلصنا.
خالد : انتوا تم شي ما شليتوه معاكم؟؟
بو خالد : يالله ركبوا نصكم سيارتي والنص الثاني فسيارة خالد.
فالسيارة خالد موزه واحمد وريم .
احمد : احسن شي انا خلينا الشياب هناك / خالد ارفع الصوت .
خالد : انا انسان ما احب الازعاج .
موزه : خالد خل عنك ارفعه شوي كلنا يينا سيارتك مش عسب تقولنا ما احب الازعاج .
خالد : وانتي يالدلوعه ما بغيتني ارفع الصوت؟
ريم : انا دلوعه خلاص مرة ثانيه ما بركب سيارتك بروح مع ابوي بخليه يرفع الصوت .
خالد يضحك: تقدرين انتي يادلوعة امج // يالله شو بغيتوا احط لكم .
موزه : منوعات او مقاطع .. ع كيفك ؟
خالد : اوكيه هذا شريط توه يديد سمعووه.
موزه: خالد .
خالد : هلا .
موزه : دامنا بنروح العين مرة وحده خلنا نروح مبزره.
خالد : شوووو؟؟؟
موزه : دخيييلك متى عاد كلنا نطلع مع بعض .
خالد : كسرتي خاطري .
ريم : هيه نبغي نروح مبزره .
خالد : كلموا ابوي اذا وافق بنروح .
موزه: انته ان قتله بيواقف.
خالد :عيل ما بقوله .
موزه: خآآآآآلد بليييز .
خالد : امرنا لله بنقوله لكن اظني بيرفض لا تنسين ان يدي ويدتي معانا ومافيهم شده مشاوير طويله .
موزه : لا تقوول والله بخاطرنا .
خالد : بنشوف .
...................

مهره : امايه اليوم ابغي اظهر من البيت .
ام مهره : انا شو قلتلج قبل ماشي يعني ماشي .
مهره : دخييلج يا امايه ما احب يلست البيت اضيق .
ام مهره : يمكن حد من خوالج ييء عنا اليوم لو محد يء بنظهرج.
مهره : يالله بنصبر وبنشوف ..
حمدان حرق تليفون مهره يدقلها وهي ما ترد يطرشلها مسجات ماترد عليه لين ما يأس وتعب ووقف...
....................

حمد : انزين راشد وهاي علومك .
راشد : خلاص اعتزلنا الحب وخليناه لك.
حمد يضحك : اعتزلت الغراام و انا بعد ليتني ما احبيت .
راشد : ليش استوى شي بينك وبينها !!!!!!!
حمد : وهو في شي عسب يستوي ؟؟؟
راشد : انزين ليش تقول ليتني ماحبيت ؟
حمد : كله افكر فيها و كل ما اتذكر ايام اللي كنت فيها ما احب راااحت باال يااخي.
راشد : صدقت نحن ليش نحب ونعذب اعمارنا وعقب ناخذ وحده ثانيه ,, مادري؟؟
حمد: مش بإدينا لو بإيدي احين بتزوجها .
راشد : الولد استوى ما يستحي ومستوي رومنسي صدق تحبها من الخاطر؟
حمد : هااي الدنيا ياخوك تغيرنا احين منوه كان تخيل ان روميو وجوليت العايله يستوي بهم كذيه ؟؟
راشد : صدقت انا ما عمري ما تخيلت بس ربك ,, الله كريم .
حمد : اللي يسمع رمستنا يقووول سكااارى .
راشد : رح زين انا بكامل قواي العقليه وما سوى الحب فيه شي ,, انت اللي سكراان.
حمد: ليتني والله سكراان فالحب.
راشد : ذكرتني بساالفة بروح اكملها .
حمد : أي ساالفه ؟؟
راشد : ما بحرقها عيك مفااجاة .
حمد : عاد انته مفاجآآآتك تخوف .
راشد : شبح شوو// يالله ترقب مفآآجئة الموسم .
حمد : تسوي اعلاان شوو؟
راشد : حمد انا بروح برااايك .
حمد : باي .
..........................

خالد: يالله تعالوا شوفوا خالد بيحلب الناقه.
موزه : لا عقب بترفسك .
خالد: ع بالج اني اول مره احلبها ؟
احمد يضحك : يالله بنشوف .
اليده : هني الدنيا ..
اليد : دوم اقولج تعالي معنا انتي اللي تقولي لا .
اليده : انا ما احب الدرب الطويل فالسياره .
خالد: شو رايكم عقب نروح مبزره ؟؟
بو خالد : ويين الله يهديك يدك ويدتك مافيهم شده .
خالد: يدي ويدتي بيحطون ريولهم فالماي الحار وبيريحونها .
اليده : صدقه خالد بنروح وبحط ريولي فالماي الحار .
بو خالد : احين بنروح لين جبل حفيت بتعبين ياامي.
اليده : لا ان شاء الله ما بتعب .
بو خالد: خلاص تمام.
ريم : هيه عااااشوا بنروح مبزره .
موزه : حلووو اف لو شجون كانت معانا بتحلا السالفه ,,, صح العين,, مهره بخليها تيء بدقلها ..
مهره انصدمت من الرقم : الـــــوه مرحبا .
موزه : الوه مرحبا الساع اشحاالج مهااري ؟؟
مهره : ياامرحبا والله بخير ربي يسلمج ومن صوبج الغاليه ؟؟
موزه : الحمد الله ,,, مشغوله شي ؟؟
مهره : لا والله ملاانه يالسه برروحي .
موزه : انزين احنا اليوم بنروح مبزره وقلت خلني اتصل بمهره ونشوفها .
مهره :قولي والله .
موزه : والله .
مهره : خلااص انا بشوف امي وبرد عليج .
موزه : اوكيه بااي .
مهره :بااي.
موزه بخاطرها : حراام شجون بتزعل ليتها كانت معاي .
مهره : ياربي شو اسوي ؟؟؟ هيه سيف
سيف: الــــوه
مهره :الوه مرحبا
سيف : مرحبتين بلاااج انتي ؟؟
مهره : سيف تذكر موزه ؟؟
سيف : أي موزه ؟؟؟
مهره : اف عليك من كثر البنات ماتذكر ,,, اللي فبوظبي ؟؟
سيف : هيييييه اللي خليتج تتعرفين عليها ؟
مهره : هيه هي ذكرتها ؟
سيف : نسيت سالفتها ,, بلاااها ؟؟
مهره : اليوم بيروحون مبزره .
سيف: وخير ياطير ؟؟؟!!
مهره : اف منك وهذا اللي كان يقول ...
سيف : انزين شو تبغيني اسوي اروح مثلن واغازلها هناك ؟؟
مهره : لاطبعا بس هي اتصلت فيني وقالتلي تعالي وانا قلت فرصه بخلي امي تروح معاي وتشوفها ع انها ربيعتي وعقب نقولها تخطبها لك شو رايك؟؟؟
سيف : وبهالسهوله ؟
مهره : هيه انته ليش معقدها هاي اول خطوة .
سيف : انزين رووحوا .
مهره :لا والله سيف اذا البنت ما كانت تهمك خلااص .
سيف : صبري خلني اتذكرها ,, ممم تصدقين بعدها بخاطري.
مهره : عيل يالله اتصل باختك وقولها اليوم بنروح مبزره .
سيف : مبزره لا .
مهره : سيف لا تعقدها .
سيف : خلااااص بقولها يالله باي.
مهره : باااي واتريا ردك .
سيف : زين .
................

شجون : واحين تقوليلي والله انج خاينه .
موزه : شجوون سمعي انا ما كنت بروح مبزرة يت الفكره فالسياره عقب قلت فرصه اشوفها .
شجون :هيه صدقت .
موزه : والين احينه ما ردة عليه اذا بتروح والا لا يمكن ما تقدر .
شجون : ويمكن تقدر.
موزه : شجـــــــون فديتج .
شجون : خلاص ما استوى شي سلمي عليها اذا يت وشفتيها .
موزه : فديتج انا والله يووصل .
شجون :عيل ما بطول عليج بخليج مع البوووش .
موزه : هههه احينه بنروح مبزره .
شجون : يالله عيل ببباي.
موزه : فمان الله .
..............

ام مهره : مـــــــــــــهره .
مهره : هلا اماية امري.
ام مهره : يالله تلبسي بنظهر .
مهره : ويـــــــــــــــن ؟؟؟!!
ام مهره : اتصل سيف قال كلهم اليوم بيرووحون مبزره واحينه بيينا بيودينا .
مهره : عآآآآآآآآآآش خالي سيف دقيق واكون جاهزه .
ام مهره : يافرحتج ..
مهره بخاطرها : ان شاء الله تكون شجون يايه وحمدان بعد واشوووفه ..بدق لموزه يوم نووصل .
......................

حمد يالس برووحه ويفكر : بلاه رااشد شو هالمفاجاه ,,, كييفه شو يعني بتكون ,, اخ والله ان حالك ياراشد يقطع قلبي الله يسامحها وديمه ع اللي سويته فيك ,,اخاف يستويبي شرات راشد احب عقب اخذ وحده غيرها مستحييل حد ياخذتج مني يامووزه ولين احينه ما اعرف اذا تحبني والا لا بس هاليومين بعرف .
حمد : الــوه هلا
شجون : اهليين .
حمد : بلااج ؟؟؟
شجون : ضااايقه .
حمد: ضايق من شووو؟؟
شجون : يرضيك يعني موزه فالعين وانا فالبيت .
حمد : موزه فالعين ليييش؟؟
شجون : كلهم سااروا عزبتهم عقب راحوا مبزره .
حمد : اهااا ,, والمطلووب؟؟؟
شجون :اقولك يرضيك تقولي والمطلوب ؟؟!!!!!!
حمد يضحك : ليش ما رحتي معااهم ؟؟
شجون : موزه قالتلي وانا قلت لا.
حمد : دامج قلتي لا عيل يلسي فالبيت ,, ترى البيت حلووو .
شجون : تتمصخر حضرتك؟؟
حمد : انتي انسانه فاضيه يالله قلبي ويهج ؟
شجون: هذا وانا قلت حمد طلعت .. ,, باااي
حمد : باااي.
.................

ام مهره : وينهم ؟؟؟
سيف : مادري عنهم انا قتلهم تعالوا اليوم مبزره واللي يبغي اللمه بيء.
ام مهره : يعني انته اللي قلت ومحد بييء صح؟؟
سيف يضحك : والله مادري عنهم.
مهره : انا ربيعتي يايه من بوظبي هني بدقلها بشوف وينها ؟؟
ام مهره : من بووظبي وانتي شو عرفج عليها ؟؟ وانت يااسيف ويااها شكلكم لاعبينها عليه صح؟؟
سيف: أي لاعبينها ؟؟ لا وانا صدق دقيت ع الكل .
مهره : الوووه مرحبا
موزه : مرحبتين
مهره : ها وين انتوا ؟؟؟
موزه : فالمبزره .
مهره : ونحن بعد ,, انتوا أي صووب؟؟؟
موزه : صوب العاب اليهال .
مهره : عيل بييج احينه ..
موزه: اتريااج.
ام مهره : وين؟؟؟//قالت بييج ماشي انثبري مكانج .
مهره : احينه البنت يايه من بوظبي وقالتي اييها تقولي ماشي مايستوي يامايه والله البنيه حبوبه .
ام مهره : وانا شو يخصني بالبنيه كله منك ياسيف يبتنا هني.
سيف : انزين انتن روحن عندها وانا بسير .
ام مهره : ماشــــــــي ادري انتوا الاثنين متفقين .
مهره : دخييلج يامايه ,,سيف قول شي ؟؟
.................

ام راشد : ياراشد الله يهديك كم مره قتلك بعدك بعدك ع العرس.
راشد : ياأمي ,, ياماما ,, يايمه ,, واخر شي بلهجتنا ياامايه ,, ابويه وافق انتي ليش معانده؟؟؟؟
ام راشد : لا حـــــول خلاص لك اللي بغيته .
راشد : فاليومين لو سمحتي ؟؟؟
ام راشد :انته ليش مستعجل؟؟؟؟؟
راشد يتطالع امه : ريااال وبيغي يخطب مافيها شي .
ام راشد : احس ورااك سالفه ؟
راشد: اعوذ بالله ماشي سالفه ولا يحزنون يالله انا بروح .
ام راشد : تعااال حتى ما سالت من بنخطب لك ؟؟

راشد : عااادي أي وحده مافرقت ,,, وطلع من عندها..
ام راشد : أي وحده خلاص عيل لك اللي بغيته بخطبلك احلى البنات وما بلاقي احسن عن بنت اخوي .
..............................

مهره : اف تعبنا اليوم وااايد .
ام مهره : انا اللي تعبتوني انتي وسيف .
مهره : ياامايه شو رايج فموزه ؟؟
ام مهره : بنيه رزينه واهلها طيبين .
مهره : وانا بعد اقول شراتج .
ام مهره : كيف تعرفتني عليها .
مهره : تذكرين يوم رحت مع سيف بوظبي .
ام مهره : انزين ؟؟؟!!!!!!
مهره : رحنا منتزه ولقيتها هي وبنت عمها بس اليوم مايت بنت عمها .
ام مهره : أيـــــوا ..
مهره : تنفع لسيف صح ؟؟
ام مهره : شووووو وانتي شو يخصج فالسوالف ؟؟
مهره : لا يعني اقول بس؟
ام مهره :ماشي اقول والا ما اقول ما ابغيج ترمسين بهالسوالف .
مهره : حاااضرين بس فكري فيها واذا حد بيخط لسيف محد غيرج لانج شرات امه اللي هي يدتي الله يرحمها .
ام مهره : الله يرحم الجميع وقتلج سكري هاي السالفه .
مهره : ان شاء الله.
........................

باليوم الثاني تحديدا عقب الغذى ...

اليد وبوخالد وبوراشد يالسين في الميلس .
بو خالد :الله حيه ببوراشد .
بوراشد : الله يحيك .
بو خالد : ليش مايبت العيال بيستانسوا .
بوراشد :ايام الله ماخلصت وانا ياك اليوم بروحي وطالبنك طلب واتمنى انك ماتردني .

بوخالد : تم افا عليك لا يردك الا لسانك .
بوراشد : نبغي القرب منكم نبغي بنتنا موزه لولدكم راشد .
بو خالد :ان شاء الله مايستوي الا الخير ياخوي اذا عني وعن ابوي موافقين بس لازم نشاور البنت وامها والا شو تقولون ياجماعه ؟؟
اليد : عين العقل والخيره فيما اختاره الله .
بوراشد : خذوا راحتكم واحنا مش مستعجلين ونتريا الرد .
بو خالد : ان شاء الله ما بطول عليكم .
......................

شجون : وبعد شو قالت ؟؟؟
موزه : هذا كل اللي قالته .
شجون: يابختكم استانستوااا.
موزه : يالله ان شاء الله المره اليايه بنروح رباااعه .
شجون: قلتي هي ومنوه معاها ؟؟؟
موزه : امها لو شفتيها بعدها حلوه بتقولين خوات ماشاء الله عليها .
شجون: تشااابه امه ؟؟
موزه : هيه فيها شبه ,, وخالها سيف يشبه ام مهره .
شجون : ليش هو بعد كان موجود ؟؟؟ شفتيه؟؟
موزه : ماشفته الا يوم شلهم وبعد من بعيد بس اذكر يوم كان فبوظبي .
شجون : اهاااااا,,, تدرين دقتلي اليوم الصبح مهره ويلسنا سوالف.
موزه : زين والله ..// شجون احين بسكر امي تبغيني .
شجون : اوكيه عيل باااي .
موزه :بايات.
ام خالد دخلت الغرفه وسكرت الباب من وراها .
موزه مستغربه : هلا امايه .
ام خالد : اكيد كنتي تكلمين شجون .
موزه : وفي حد غيرهااا .
ام خالد : المهم سمعي يابنيتي اليوم خطبوج من ابوج ويدج ,, وهم وافقوا مبدئيا لين يسمعون الموافقه منج وقالي ابوج اقولج .
موزه مستغربه !!!!!!!!
ام خالد : احين انتي ما عدتي ياهل خطبج بو راشد لولده .
موزه انصدمت : هاااااااااااا
ام خالد : احنا ما بنجربج بشي اني ما تبغينه فكري وردي علينا .
موزه ساكته .
ام خالد : انا بخليج احين وبظهر .
ام خالد ظهرت من الحجره وموزه ربعت من وراها قفلت حجرتها بالمفتاح مرتين .
موزه: راااشــــــــــــد !!!!!!! احينه صدق السالفه والا احلم رااشد خطبني ؟؟؟ عيل وين وديمه ؟؟؟ ويـــــــــــــن حمد ,,,, شو السالفه احين افرح احزن والله مادري .. ماتوقعت هالشي !!!!!!!!!!!!!!!!!!!!

الا ياحبي السامي لقيتك باول ايامي تعال وجدد احلامي
ترى قلب الهوى سهران

.......................................


اليوم الثاني .. بعد ردة الدوامات
انتشرت سالفة خطبت راااشد ..

راشد تغدى ودخل حجرته يبغي يرقد وما يدري عن اللي حوله ياها اتصال.
راشد : احين برقد من داق هالوقت ؟؟؟؟
حمد :الو
راشد : هلا شو بغيت .
حمد يصارخ : انا شفت نذاله لكن شراتك ماشفت .
راشد مستغرب: بلاااااااك انته
حمد : وتسوي عمرك ماتعرف ؟؟؟
راشد: حمد لا تصارخ انا مش اصغر عيالك .
حمد : عيل هاااي مفاجاتك ياراشد وتقولي خوي عمري .
راشد : حمد انته بلااك تونا كنا اوكيه شو السالفه .
حمد يصاارخ: مابقول غير رووح الله يهنيك معااها
سكر الخط ومن القهر رمى تليفونه وانكسر وظهر من البيت .
راشد مستغرب : يهنيني معاااها ؟؟؟؟!!!!!!!! شو السالفه ليكوون جن هذا والا يمزح بدقله ,,,, مغلق ,,, قال مفااجاة ليكووون ,,,,,,, لااا
راح يربع عند امه .

نهاية الفصل الاول
ترقبوااا احداث الفصل الاخير