راعي العجراء ,,,, سالفتين لاتفوت عليك

محروم.كوم · #1 12-23-2011, 11:40 AM

السلام عليكم ورحمة الله وبركاته
اليكم بعض السوالف او المواقف المضحكه مع راعي العجراء
مع بعض الاخوان الطيبين
مرة من المرات عزم راعي العجراء في شراء ابل يوسع صدره عندهن كل ماصار له فرصه يروح ويهيجن عندهن على نغمات الرغاء ويحن للماضي العتيق وان حصل له فرصه يبكي فلا مانع بكمية قليله من الدموع لاتتجاوز اللتر الواحد اسبوعيا تنفيس عن الصدر وترويح عن الخاطر
المهم اني بديت بتجهيز مكان لهن يبعد عن المدينه حوالي 90 كيلو واحضرت مواسير وشبك وحدادين يعني شغل مرتب
وفي يوم من الايام وانا في الموقع كان معي واحد من اصدقائي حضر شخص في سيارته ونزل من السياره وهذا الشخص اول مره اشوفه
السلام عليكم
ردينا وعليكم السلام
قال يالاخو وش تصلحون هنيا
رديت عليه بسرعه
قلت مسبح
خويي اللي معي حط شماغه بفمه وراح يركض للخيمه ومدد من الضحك
الرجال اخذ يناضر فيني تقل ما اعجبه كلامي
قلت له ياعم وش اتوقع ابسوي انا في بر وحاط شبك يعني واضح ياغنم يا ابل
لو انا اللي سألتك عن هذا يمكن اتقول هذا حضري وش دراه عن الشبوك والحلال
هذا حده حمام قطيفي ودجاج
وتخب عليه
بس انت ياخوي راعي حلال وتدري عن شبك وحط بالبر
وش ضنك يصير له
الرجال اخذ بخاطره مني شوي ولزمت عليه بالقعده والفنجال واخذها ضحكه
معي ومزحه
المهم رحت لخويي ولاه بالخيمه يفحط برجليه وميت من الضحك يقول وشلون رديت عليه بهالسرعه
قلت شوفة عينك شبك وبر انت وش ضنك ابا احط
وصار هالرجال جار لنا بالبر وصار يتعلل عندنا ونتعلل عنده وهو بالحقيقه رجال طيب
وصارت مزحه بيننا لاقال شي قات هه تراي ابحط مسبح
ثم صارت ضحكه
والسالفه الثانيه
كنت في مقناص بالشمال بالشتاء انا وواحد من اصدقائي وكانت الشمس حاره شوي والضل براد ومع هالدوران من الفجر قلت لصاحبي وش رائك نضحي
ونسوي الدله والفطور
ونريح شوي عقب هالتعب والدوران
من الفجر وحنا على ضهر هالموتر
قال ماعندي مانع شف لك محل زين ووقف دورت ذاك المحيل وقفت السياره وقعدنا في ضلها وشبينا النار وصلحنا الدله والفطور
وكان بالقرب منا كمب شركه تبع ارامكو كما اعتقد
وبينما نحن جالسي نتقهوى الا وراعي جيب شاص اعتقد انه خمس وثمانين او ست وثمانين ذلك الوقت

موديل نفس السنه او بعده بسنه المهم الشاص جديد وهو يتجه يمنا وياقف ويسلم لزمنا عليه ابن الحلال بفنجال ونزل سلم علينا وجلس وصبينا له فنجال وافطر معنا واخذناها سواليف
مع هاللحية الغانمه وان شعيب فلان وين الطلحه الفلانيه الديره هذي كم تبعد عنا ومن هالكلام
وهو يقول هه حصلت شي لقيتو حباري هديتوا عليها
القطاء وش اخباره حذر ماهو حذر
المهم انبسطنا مع هالرجال الطيب لنا اسبوع ماغير وجهي ووجه خويي بالصراحه
جلسه معه ماتنمل
قلت له هالشركه اللي هنيا يدورون بترول
قال مالك لوا
قلت اجل وش يدورون
قال يدورون ديزل
خويي اللي معي كان الفنجال ماده لفمه وهو يشرق فيه ويقوم من مكانه ويروح خلف السياره وخذ يالكحه مع الضحك وقعد يكح حتى صفا راسه من الكح
وهو مايدري ان خويي اسباب الشرقه من الديزل
انا فشلت من الرجال
قلت وش يدورون قال ديزل
قلت بلا هابلكم الديزل بالغلا
قال انت شفت ياخوي غلاه
مايدري ان الديزل من البترول
رد خويي وجلس معنا وكل مايشوف وجههي يقوم يروح يضحك ويكح ويرجع
بالصراحه خشي على خويي لايجيه شي
فلت الحين الطحال بينقز مع افمه
انتهت السالفه وارجوا ان اكون وفقت في طرحها لكم وعساكم استمتعتم بها
وقبل الختام
سبحانك اللهم وبحمده لااله الاانت استغفرك اللهم واتوب اليك
تحياتي للجميع
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
راعي العجراء والخروف	محروم.كوم	منتدى أخبار المواقع والمنتديات العربية والأجنبية	0	11-17-2011 03:30 PM
راعي العجراء في سوق السمك	محروم.كوم	منتدى أخبار المواقع والمنتديات العربية والأجنبية	0	10-31-2011 12:50 PM
عرس راعي العجراء	محروم.كوم	منتدى أخبار المواقع والمنتديات العربية والأجنبية	0	09-26-2011 02:30 PM
من سواليف راعي راعي العجراء (ثوب العيد والخياط الباسكتاني )	محروم.كوم	منتدى أخبار المواقع والمنتديات العربية والأجنبية	0	09-16-2011 02:10 PM
من سواليف راعي العجراء (عزيمة القعوس لراعي العجراء )	محروم.كوم	منتدى أخبار المواقع والمنتديات العربية والأجنبية	0	09-10-2011 01:40 PM