سالفة:مقاضي يوم ثالث.. قوافي

محروم.كوم · #1 11-30-2011, 11:50 PM

السلام عليكم ورحمة الله وبركاته
هلا بمن حل وأطل
و
صبحكم/مساكم الله بالخير
هذي سالفه قديمه جداً سمعتها من احد كبارنا الغاليين
وهو ان فيه رجال كان عنده حلال كثير من الغنم وهو باب رزقه وكل كم يوم يروح للبر يشوف الحلال ويجيب متطلبات الراعي ويسأل عنه ولين جا الشتاء حط له خيمه وقعد لين يجي الصيف..
كان متزوج من حرمتين والثنتين يبيلهم ابغض الحلال إلى الله لكن مطول باله عليهم عشان بزارينهم ولعل الله يهديهم..
كل يوم وتقريباً كل فرض صلاة صوتهم يسمعه سابع جار من الهواش اللي ماله داعي وافتعال المشاكل وكل وحده تحط اللوم على الثانيه لعله يطلقها وتتربع على عرشها وحدها..
مل منهم وبيوم وهو معصب حلف يمين انه بيجيب الثالثه وبيحطها ببيت لحالها وبيخلي الثنتين مكومات بها البيت واللي جايزً له تقعد ولاااااا بيت ابوها مفتوح وطلع وقعد له يومين بالمسجد وتركهن..
ويوم ابطى عليهن خافن انه ينفذ كلامه..فسوو جلسة مصالحه وهدنه لين يطيح اللي براسه ويتراجع عن حلفه ثم يرجعون مثل ما كانو والبقاء للأقوى..
ارسلو له واحد من البزران ان فيه شي ضروري يجي ويوم جا تعهدوله بأنهن عقلن وخلاص مهوب سامع إلا كل خير..
راحت ايام وجت ايام وهم لين الحين خايفين ورجلهن يدخل البيت مثل ألأسد ويطلع أسد وبلبده بعد..
ويوم جا وقت طلعته البر تسابقو بالحتسي ونبي نروح معك وكانو أول يعيوون يروحون معه..
الرجال ما كذب خبر ونصب خيمتين للحريم زود على الاوله وراحو..
ويوم اصبحو ولين الفطور من كل النعم ويتسابقن من تقهوي ومن تحط ومن تشيل وسم وابشر والغداء متى تامر والعشاء مثل..
وكل وحده تحتري متى يقول بس تراي هونت وتراجعت عن الحلف..
كل يوم ثالث يروح يجيب اغراض لهم من الديره القريبه ويوصي الراعي على عياله والراعي مهوب غريب من جماعتهم..
وليمنه جا يقوله الراعي انهم من رحت وهم ملا سن لين تتعب السنتهن..

المهم انه بتل منتفخ عليهن ولا يحاتسيهن إلا من طرف خشمه وذولا قايمين بالخدمه على اكمل وجه لين بداء يضحك معهن ويسولف وزادن بالمجاكر بالطبخ والتهلي والترحب..
انتهى صبرهن خلاص جت وحدةً منهن وسألته إن شاء الله راضين علينا ؟؟؟
قال :
كل الرضى والحمد لله.
قالت :
هونت تعرس وتبي تكفر عن حلفك إن شاء الله؟؟
قال:
ايه ابكفر عن حلوف مهوب حلف واحد يومني من هاك السنين وانا احلف أبعرس ولا أعرست!!!
وثالثتكم عليكم من قبل البر وترا يوم ثالث له ولمقاضيكم هههههههه..
ما أمداه إلا والعجاج من خيامهم طالع وكمل ضحكه وطل عليهم بالخيمه وقال:
اليوم ثالث بروح اجيب المقاضي....
تحياتي
اختكم
..قوافي..
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
سالفة:عرس حي العطايف..قوافي	محروم.كوم	منتدى أخبار المواقع والمنتديات العربية والأجنبية	0	11-03-2011 09:10 AM
سالفة:سوق حلة القصمان.قوافي	محروم.كوم	منتدى أخبار المواقع والمنتديات العربية والأجنبية	0	10-20-2011 01:00 AM
سالفة:طين جدي.قوافي	محروم.كوم	منتدى أخبار المواقع والمنتديات العربية والأجنبية	0	10-11-2011 08:30 PM
سالفة:دجيجات.امي...قوافي	محروم.كوم	منتدى أخبار المواقع والمنتديات العربية والأجنبية	0	09-12-2011 12:00 AM
سالفة:طير المدعى..قوافي	محروم.كوم	منتدى أخبار المواقع والمنتديات العربية والأجنبية	0	09-03-2011 01:10 AM