راعي العجراء وسائق الحيب

محروم.كوم · #1 11-02-2011, 12:00 PM

السلام علاكم ورحمة الله وبركاته
اليكم هذه السافه
والتي حصلت لي قديم عام 1395 هـ تقريبا
تعطلت سيارتي على الطريق والسبب البطاريه لم تكن جيده انتظرت قليل انتظر من يعطيني اشتراك فلم اجد
فالتفت الى السايد الثاني فوجدت شخص سيارته جيب ابو شنب واقف عند البقاله قلت ابا روح يمه وابا اقول يدفني بصدام الجيب رحت للرجال السلام علاكم وعلاكم السلام ياخوي
انا سيارتي متعطله من البطاريه ووقفه بعرض الشارع مالبقتها زين تكفى يالاخو ماتعطيني اشتراك والا تدفها
قال ابشر بسعدك وين سيارتك قلن هذيك سيارتي قال خلاص روح عند السياره وانا ابا اديور وجيك وقلت ونعم يالنشمي الله يكثر من امثالك
اثر الرجال عليه قل صح ماهو مضبوط شكله معطيها وانا مدري عنه وانا اروح واركب بالسياره اتحراه يجي
الرجال شغل الجيب وانا اشوف وحرك ووقف عند التقاطع وديور يوم دريت ولا الرجال جاي مسرع يمكن يمشي 60 او70 كيلو بالساعه اشوفه بالمرايه قلت يبي يهدي الحين الرجال وصل السياره ماهدى على سرعته وانا التفت وتمسك بالمرتبه وهو اللي يقشعني انا وسيارتي

ولاها ناقزه عشرين متر بوسط الخط مدخل الشنطه على المرتبة الخلفيه وانا ابحاول انزل من السياره ضهري ضارب بالدركسون وبطني منخض من الصدمه بس ماقدرت احول رجليني متخالفات مدري ايهن اللي قريبه عند الباب الرجل اليمنى احس انها هي اليسرى الا وهو يقرب عندي مره ثانيه مطلع راسه من القزازه افتح السوتش وحطه بواحد ياخي ادري اني ابا احطه بواحد بس عطني فرصه
وش ضنك ابا حطه ريوس وانت مدخل الشنطه على المرتبه قلت له بس ماعاد ابيك تدف
قال لا ولا يهمك وانا امسك بالدركسون بس اشوى من اول المسافه قريبه مايمده يسرع
وهو اللي يصفق بالسياره ووهو اللي ينقزها لاشفته تقول مضراب كيرم وهي تشتغل السياره الله والعالم ان السوتش مافتحته بس من الروعه غصب اشتغلت
وانا على طول امشي ماوقفت ولا قلت له ولا شكرا
وانا اللي اروح اطالع بسيارتي ولاها قصيره مخبون منها خبنة ثوب
المهم قلت لواحد من ربعي عن السالفه وهو اللي يضحك علي قال مالقيت يدف سيارتك الا هذاك الرجال انت ماشفت الجيب ماهنا عاير ماحك فيه ولا عمره صحى لاوموتره جيب كملت
قلت المشكله ان السياره بيالها 2000 ريال ولو اني شاري بطاريه 70 ريال اخف علي
ولكن ماشاءالله كان ومقدر فعل
ومن عقبه لاشفت جيب تجيني ام الركب مع نفاضه اقول هذا هو عسى مايدف سيارتي يحسبه الى الحين ماشتغلت
انتهت السالفه وارجوا ان اكون وفقت في سردها لكم والله يحفظكم
وقبل الختام
سبحانك اللهم وبحمدك لااله الا انت استغفرك واتوب اليك
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
راعي العجراء في سوق السمك	محروم.كوم	منتدى أخبار المواقع والمنتديات العربية والأجنبية	0	10-31-2011 12:50 PM
راعي العجراء وشبيه جاكي شان	محروم.كوم	منتدى أخبار المواقع والمنتديات العربية والأجنبية	0	09-30-2011 01:30 PM
عرس راعي العجراء	محروم.كوم	منتدى أخبار المواقع والمنتديات العربية والأجنبية	0	09-26-2011 02:30 PM
من سواليف راعي راعي العجراء (ثوب العيد والخياط الباسكتاني )	محروم.كوم	منتدى أخبار المواقع والمنتديات العربية والأجنبية	0	09-16-2011 02:10 PM
من سواليف راعي العجراء (عزيمة القعوس لراعي العجراء )	محروم.كوم	منتدى أخبار المواقع والمنتديات العربية والأجنبية	0	09-10-2011 01:40 PM