|
إنضمامك إلي منتديات استراحات زايد يحقق لك معرفة كل ماهو جديد في عالم الانترنت ...
انضم الينا
#1
| ||
| ||
السلام علاكم ورحمة الله وبركاته اليكم هذه السالفه زواج راعي العجراء وشهر الغنم (العسل) في سنة من السنين من سكان الديره في البيوت الشعبيه (الطين) وكان هذا البيت من ناطحات السحاب ذلك الوقت ( دورين وروشن) لارفعت راسك من رفعه تطيح اذانك ماهوب اشماغك والعقال بس 0 ولكن مافيه حوش للغنم والغنم ذاك الوقت مانستغني عنهن اذا ماسمعنا ريحتهن ولا شمينا اصواتهن بالدار (مدري ايهن اللي للريحه والسمع ركبوهن على بعضهن حتى تطلعوا بجمله مفيده ) شفتواشلون مستدير راسي علشان ماعندنا غنم بهالوقت صرنا من ضحايا التطور المهم الغنم مالهن حوش وقررت الوالده الله يرحمها تحطهن بالسطح ماغير نبلش بعلفهن من الرقي والتحويل وانتم خابرين الدرج من اول مافيه بلاط ومن كثر مانرقا ونحول بالما صارت الدرجه ساقي واحيان شلال مهيب هذي سالفتنا السالفه زواج راعي العجراء وشهر العسل قرر راعي العجراء الزواج واستعد بتجهيز وحده من الغرف اللي في الدور الثاني واستخدامها لعش الزوجيه اخذ راعي العجراء شهر وهو يبني هذا العش مره ينقل حصير ومره قشاش وقراشيع وقطع من بواقي القماش وصار مايشيلها بيديه طلع له منقار يشيلها فيه حتى يثبت انه يبني عش الزوجيه وانه قادر على اسعاد زوجته المهم تزوج اخيكم بالله وجاب الزوجه عنده في البيت وحطها بهالغريفه غرفه الاحلام الورديه البنيه متلبسها احسن ماعندها وحاطه مكناج مدري بطناج اللي يحطونه الحريم على وجيههن اللوان واشكال اليا شفته تقول علبة تشكيله زيتيه امرحنا ذيك الليله بالغريفه ماعندنا اخلاف يوم اطلعت الشمس الا والغنم مراكض بالسطح وملاحق والسقف من الاثل والعسبان ومن فوقهن الطين ومع المراكض الا والتراب حق السطح يحتحت علانا وحنا نوما ينزل علانا من مراكضهن وياغافل لك الله يوم اصبحنا وقمنا وانا اطالع بزوجتي ولاي و ش اطالع حفارة قبور اقلب يسار يمين ولا ماتشوف عويناتها من التربات ومع المكناج غاديه كنها طاسة غرش فيها عفوط متروكه في امراح شادين اهله من سنين وذاريتها السوافي وانا انقز للمرايه الا وجهي ورقبتي مليس عليه الطين تليس ماغر جفني يرتفع وينزل تقول جفن حريبلا وانا اضحك على نفسي قالت الحرمه وشو هاللي ينزل علانا قلت هذا سلو وش عرفك انتي في اوربا وهذا ثلجهم مثل القطن الحين نتزحلق انا وياك مع الدرج انتم عندكم مثلنا في ديرتكم ضباب وثلوج على طول العام هذه سالفتي وانتظر ردودكم ارجوا انت تحوز على رضاكم سبحانك اللهم بحمدك استغفر اللهم واتوب اليك |
مواقع النشر (المفضلة) |
| |
المواضيع المتشابهه | ||||
الموضوع | كاتب الموضوع | المنتدى | مشاركات | آخر مشاركة |
راعي العجراء وشبيه جاكي شان | محروم.كوم | منتدى أخبار المواقع والمنتديات العربية والأجنبية | 0 | 09-30-2011 01:30 PM |
عرس راعي العجراء | محروم.كوم | منتدى أخبار المواقع والمنتديات العربية والأجنبية | 0 | 09-26-2011 02:30 PM |
سالفة راعي العجراء والحصني | محروم.كوم | منتدى أخبار المواقع والمنتديات العربية والأجنبية | 0 | 09-23-2011 05:10 PM |
من سواليف راعي راعي العجراء (ثوب العيد والخياط الباسكتاني ) | محروم.كوم | منتدى أخبار المواقع والمنتديات العربية والأجنبية | 0 | 09-16-2011 02:10 PM |
من سواليف راعي العجراء (عزيمة القعوس لراعي العجراء ) | محروم.كوم | منتدى أخبار المواقع والمنتديات العربية والأجنبية | 0 | 09-10-2011 01:40 PM |