الدخان والديك ...

محروم.كوم · #1 08-20-2011, 06:50 PM

بسم الله الرحمن الرحيم

الاخوة والاخوات المكشاتيين والزوار الكرام

السلام عليكم ورحمة الله وبركاته

سالفتنا اليوم هي سالفة لها حول 30 سنة او اكثر شوي

وصارت في الرياض في حي الشميسي

وابطالها الثلاثة كلهم ماتوا
الله يغفر لهم ويرحمهم وجميع امواتنا واموات المسلمين

قولوا آميييييييييييييييييييين

نبدأ بالسالفة

كان فيه واحد من عيال عمي الله يرحمه متغرب عن اهله ,,, اهله في القرائن وهو في الرياض يدرس

المهم كان له خوي مثله مغترب اهله في الشعراء

وهم ربع بالحيل واكثر من الاخوان

المهم الاثنين كانوا يدرسون ويشتغلون علشان يغطون تكاليف السكن والمعيشة

وكل يوم البيت على واحد منهم ينظف ويطبخ ويصلح الشاهي والقهوة وعلى هالحالة

وكانوا الاثنين يدخنون من زمان

المهم تعرفوا لهم على واحد عيّار ودلى يسير عليهم

وهم ما يقصرون يقومون باللازم

وهو كل ما اشتهى شي قالهم عن سالفة صارت لواحد من ربعه

ويجيب فيها طاري الطبخ والنفخ

يوم من الايام قالهم عن طريقة لتبطيل الدخان ( وكان مشتهي له مرقة ديك )

وهي ان واحد من ربعه سواها وما شاء الله عليه من يومها وهو ما رجع للتدخين ابد

(( الطريقة طبخ ديك في مرقته وبعد تعب شديد جداً يشربون المرقة وبعدين ياكلون اللحمة وعقبها خلاص يكرهون الدخان ))

علمهم الطريقة وهم ما صدقوا على الله

اتفقوا انهم يسوونها لكن بدونه :d

راحوا الربع لسوق مقيبرة ( سوق قديم في الرياض )

وشروالهم ديك وجابوه لم البيت ذبحوه ونتفوه وطبخوه على مرقة بس

يوم انهم شبوا على الديك

خذا كل واحد منهم عسيب نخلة اخضر وصاروا يتلاحقون في البيت

وكان بيتهم له درجتين وشوي راقين مع ذا الدرجة وشوي محولين مع الثانية

وخذ يا ضحك واستهبال لين استوى الديك

وهم تعبانين مرة وبطونهم طايحةٍ من التعب والضحك

المهم تقابلوا على القدر

وكل واحد منهم يغرف له من المرقة ويرشخ ( الشرب بصوت عالي من طرف الاناء )

خلصوا المرقة وهم يتناتفون الديك ولا يبقى منه الا عظامته

ويقعدون يسولوفون ويضحكون ويبدون يدخنون

يقول الله يرحمه العادة ان حنا ندخن على بكت واحد

ذيك الليلة من الوناسة دخنا لنا على بكتين او 3

الله لايعيد راعي الديك ولا وصفته

وسلامتكم

,,,
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
لماذا ال**** يرى الشياطين والديك يرى الملائكة	محروم.كوم	منتدى أخبار المواقع والمنتديات العربية والأجنبية	0	05-21-2010 11:20 PM
الأعمى والديك !	محروم.كوم	منتدى أخبار المواقع والمنتديات العربية والأجنبية	0	03-02-2010 05:10 PM
الله يــرحم والديك	مزيونة الغربيه	شعر و خواطر	6	07-01-2009 09:52 AM
ادخل الله يرحم والديك	محروم.كوم	منتدى أخبار المواقع والمنتديات العربية والأجنبية	0	05-17-2009 09:50 AM
مثل ما تعامل والديك تجازى من أبنائك!!	» βỊη άℓ đόόŁα «	قصص و روايات	4	01-23-2009 08:20 AM