..{ ما هقيتے أכּ الهوى عذبے .[قلوبے الرجالے --« .. بقـلم [ فنون الغدر ] - الصفحة 20

7zen · 01-23-2009, 03:51 AM

اتمنى منج الغلا انج اتنزلين لنا كذه بارت..

والسموحه منك.. __DEFINE_LIKE_SHARE__

Grshoob Albdoo · 01-23-2009, 09:11 PM

تسلمينـ...

ونتريـــــــــــا زود منجـ... __DEFINE_LIKE_SHARE__

~ . دمـ آلــغزال . ~ · 01-23-2009, 09:31 PM

{.. البــْــٍـــُـاأإرتٍ 19

*//~ ودي أبكـــي لين ما يبقى دموووع ,, ودي أشكـــي لين ما يبقى كلاأإم ,, من جروح صــــــــارت بقلبـــــي تنوح ,, ومن همــــوم حرمت عيني المنـــــــــاام
و انطفتــــــ في دنيتي كــل الشموع والهنــــا ما يوم في عيني ينــام ...]

حميد .. على طول فزز من مكانه .... كان يتحرى عمره يحلم ... بس بعد .... على طووول ظهر من غرفته وسار برررع ..

حميد ( منصدم من يية علي .. بعده مو مستوعب ) : علي !!!

علي ( ومبين عليه التعب ) : هيه علي يا اخوي علي ..

حميد : خير عسى ما شر ؟!! شصااير ؟!

علي : حميد يا اخوي .. انا مسافر انا والاهل ..

حميد ( لا ارادي ) : الهام !!!!!!!!!!

علي ( اللي انصدم من جرأة حميد .. بس بعد ما بغا يكبر السالفه .. ودمعت عينه غصبن عنه ) : هيه الهام يا حميد .. الهام يا اخوي .. بترووح منا .. الهام بتتخلى عنا ..

حميد ( اللي تخبل ) : انت شتقول ؟! علي شفيها الهام !!

علي ( وغصب عنه ) : مريضه .. مريضه حيييييل ... لازم نسافر باقرب وقت عشان تتعالج ... بنسافر اليوم !

حميد ( اللي حس ان روحه بتطلع ) : لا تخبل فيني .. وترمسني بالالغاز ..... شصاااااااير !!!

علي .. وتم يخبره بكل اللي صار .. بس حميد ما قدر يتحمل .. كان حميد يتقطع .. فالبدايه ما صدق !! قال اكيد علي يحاول ينتقم ولا شي ... بس بعد الاصرار صدق ....

حميد ( ما اهتم لوجود علي .. دمعت عينه غصب عنه .. بعد ما ساند ظهره ع اليدار ويلس عالارض وهو يظرب صدره بايد ) : اه .. لييش ؟!! لييييييييييش يا علي انا حظي ردي جي فهالدنيا ... ليش كل ما فتحت لي باب لقيت رييييح ..

علي : حميد .. الله يهداك .. انا ياي ارمسك .. عشان تساندني ... مو تسوي بعمرك جي .. الله يخليك يا اخوي .. ما اتحملي اشوفك جي !

حميد ( وبضعف ) : انا اللي محتاج حد يساندني يا علي مب انت ! تعبت وانا اكتم واكتم .. تعبت وانا ابدل حزني بضحكه تخفيها .. تعبت وانا احرق دموعي .. حتى ابين بعين الكل القوي اللي ما يهزه ريح .. بس لين متى !!!!! خلاص انا ما عدت اقدر اكتم اكثر من جي ..... ما اقدر يا اخوي .. ما اقدر ..! ( وبجرأأأأة مالها حد ) : تبغي الصراحه .. الهام انا حبيتها هي حبيتها ... وكنت ناوي اخطبها ..! بس لا انت ولا اختي اللي هي اختي .. ولا حد وقف بصفي .. كلكم ما تبون ليه الخير .. ليش !! شو شسويت بهالدنيا عشان ها كله يرد عليــــه !! ليش يا علي اشوووف الكل يظحك .. وانا دايم الحزن صار ما يفارقني .. .. وفالنهاايه !!!! يطلع فيها ( وهني ما قدر يكمل وتم يصيح وجنه طفل ) و ع طول علي سار لحميد .... وبعد ما قومه من ماكنه .. حظنه باقوى ما عنده ...

علي : انا ما استاهلك يا حميد والله ما استاهلك ولا استاهل الهام ... ولا استاهل وجودي فهالدنيا ......... الحين عرفت اني حقييير ونذل ..... خلاص يا حميد .... اوعدك من الحين ان الهام لك وحدك !! بس يا اخوي ... لا تصيح .. انا هني مساندك ... وانته بعد خلك وياي .. تراني محتاجك ... لا تاخذ بكلامي فالميلس .... والله يا حميد اني من يومها وانا كله ادخن .. ولا راقد وحالتي حاله ...

حميد ( اللي بعد من علي وتم يظرب الليدار باوى ما عنده ) : ااااااااااخ ... قهر بداخلي والله قهرررررررر .. علي ... اترجاك .. بسافر وياكم .. ما اتحمل والله ما اتحمل ... انا بموت لو تميت هني !!

علي ( غصب عنه ) : اسمحلي يا حميد .. ما يصير ... وانته ادرى ...! خلاص .. انا الحين لازم اسير .... طيارتنا بعد 3 ساعات .. على ما اسير البيت وازهب اغراضي ع السريع واروح المطار ..! دعواتك يا اخوووي ..

حميد ما قدر يعلق فاكتفى بسكووتهـ

علي ( مد يده لحميد ) : فمان الله ..

حميد : الله وياكم .. دقلي اول ما توصل .....!

وعلى طووول روح علي بدون ما يرد على حميد .. اما حميد فمن روح علي وهو يالس عند الباب ... ما كان قادر يشل عمره .. حس بألم فظييييع ... حس انه يتقطع من داخله ...!

*//~ حبيبــي أنا بأنتظـار ياحبيبــي ,, حبيبــي أنـا بختصـار خايف حبيبي .. خايف غدر الزمان يطوي الحب اللي كان ,, أيه خايف مالزمــان يأخذ مني الأمـان .. وأعيش بعــدك غريب في ها لحــياة ,, تدرى الهــوى فيه الغروب .. وشـموع نشعلــها وتذوب .. بصمت وندم صمت وندم ,, وتدري الكــلام له ألف باب .. وبحر السكوت خوف وعذاب
,, و آه وألــم .. آه وألــم ...]

..
..

فبي ابو علي .. وبعد ما زهبو الهام وعلي اغراضهم .... وقبل لا يظهرون من البيت ..!

سلطان : اووب اووب من قدج يالدبه .. سايره لندن عيل ها خخ ؟

سيف : اسميك انته متفيج .. فديتج والله الهامي .. البيت بدونج ابد مب حلوووو ..

الهام ( وهي تتطالع ابوها .. وخانتها دمعة نزلت من عيونها ) : عاد هالله هالله بابووي ... لا تخبلوون فيها .. هذا الغالي

ابو علي ( اللي مو مرتاح لهالسفره من البدايه ) : ربي يحفظج يا بنتي ... بس .. قبل لا تسافروون .. متأكدين انكم مو خاشين عني شي ...!! تراني مو مرتاح لهالسفره ..!

الهام وعلي يتطالعون بعض ..... وتوه علي بيرمس .. تسبقه الهام : همم لا ابويه اتطمن انته تدري ان ملجتي من راشد وانلغت .. وتدري اني ثانويه عامه والضغوطات عليه زاايده .... بسير اغير جو كمن يوم ان شاءالله ورادة لكم ....

ابو علي : والامتحانات !! احيدها هالاسبوع انا !!

علي ( اضطر يجذب ع ابوه ) : لا ابووويه .. اجلو الامتحانات ... امسات قاري فالجريده ..

ابو علي : أ..أأ بس ..

الهام ( تقاطعه ) : لا بس ولا شياته ... انت بس ادعي ان الله يوصلني بالسلامه ...

ابو علي : تروحون وتردون بالسلامه ان شاءالله ..... يا علي هالله هالله فاختك .. لا تقصر عليها فشي .. وان احتجتوا ما يردكم الا لسانكم

علي : ما اتقصر ابويه ....

سلطان : ها ما اوصيكم .. لا تنسون الصوغات ..

سيف : هي الهامو وحياتج ... فخاطري النكدر مالهم .. هاللي يابلتج اياه ربيعتج

الهام (والدمع بعينها ..... ههه .. هذا اذا رديت لكم اصلا ...! ) : ان شاءالله .. يالله مع السلامه

وبعد ما سلمت الهام على اهلها .. وبعد ما سلم علي .. اتوكلو ع المطاااار

*//~ هلي وان دارت الدنيا عليـــــه !! اوصيكم على روحي وصيــه ,, انا مسافر وخلو قليبي عندكم .. غصب عني ترا لا مو بيديه ..؟ اعذروني اذا سالت دمعتي .. واذكروني اذا طالت غربتي ... يا دنيا لعبة الشاطر لعبتي .. صرت للناس حمال الأسية ,, يا دهري لا تحملني البلاوي ,, انا {المجـروؤح} مالاقي اليداوي .. تراني ع السفر ما كنت ناوي .. حكم حكم القدر غصبا عليه ،،، هلي دمعات عيني بطرف رمشي .. واذا غمضت عيني دموعي تمشي .. هواكم دمر قليبي هواكم ,, شيصير اكثر من اللي صار فيه ....!! ...]

..
..

فبيت ابو سعود ! وين ما كانت الضرابه ناقعه بين سعود وابووه !!

ابو سعود : الحين !! الحين مب عايبتنك اليلسه هني ! ولا ما تحيد يوم نقولك بنطللعك بيت تسكن فيه انته ومرتك ... ولا خلاص قامت تجرجك هاللي عندك !

سعود : ابوويه لو سمحت ... لا تدخلون ميره فالسالفه ! .. وعاد خلاص هذا انا الحين غيرت رايي .... خلاص ما ابا ايلس اهنه ... انا لي حرمتي .. ولي ولدي الحين .. ومن حقي اكون لي اسره خاصه فيني ...!

ابو سعود : وجي ان شاءالله نحن مب اهلك هني ؟! ( وبضحكه استهزاء ) هه انت يوم بتعرف معنى الاسرة !! هاييك الساعه تعال واجهني ! ياللي ما تستحي على ويهك .. صدق اني ما عرفت اربييييييك ..

سعود ( عصب ) : لا لا .. اصفعني ... // اسمعني يا ابوي .. انا ما عدت ياهل .. انا ريال طول وعرض .. وكاهي اللحيه ... وفوق هذا متزوج وعندي ولد ..

ابو سعود : اوووووووه .. ذليتنا تراك .. ما يسوا علينا هالولد .. اللي من يبته وانت انا عندي ولد وانا عندي ولد !

وفهالوقت ام سعود تدخل البيت .. بعد ما كانت فبيت ام صقر . : هاه ! هاه ! شعندكم صوتكم واصل لآخر الفريج

سعود : سألي ابوي الكريم ( وبضكه استهزائيه ) هه شهالبيت اللي مافيه الا المشاكل ! عن اذنكم
( وتوه بيظهر ) : اوه وقبل لا اظهر .. حبيت اقوللكم .. اللي يمس مرتي ترااه يمسني .. فمان الله ..

ام سعود ( ما تدري شالسالفه ) : وا قردي !!! راح ولدي !

ابو سعود : خله يولي !! يا عساها روووحه بلا رده ....! مدام انه بيتم ع هالحاله .! وبنشوف الحين من وين بيطلع البيت ..

ام سعود : الله يخليك يا راشد .. لا تسويلنا مشاكل .. حرام عليك .. ما تشوف العيال تفرقوا .. حجميد وصار ما ينشاف فالبيت مووليه .. وسعود ومرته والولد راحو ولا اظني يردون ... والبنات الله واعلم منهم ...

ابو سعود : شسويلهم يعني !! كل اللي يبونه عطيتهم اياه .. قد قالولي نبي شي وقلتلهم لاء !
هه وهذي اخرتها .. يجازوون الخير بنكراان ...!!

ام سعود : بتم مثل ما انت !! ما تتغير ! احياتك كلها شغل .. فلوس .. فلوس شغل ..... عط عيالك شويه من وقتك .. حسسهم انك مهتم .. ! قد مره سألت الريم عن امتحاناتها .. شفتها فاهمه شي .. محتاجه مساعده فشي !! حميد ... من متى وهو ما يحضر الدوام مثل ما تقول ... ما فكرت فيوم تسأله عن السبب ! ما فكرت انك توقف وياه وتعرف اللي مضاايج به ... جواهر ... فقيره هالبنيه ... من وفاة المرحوم وهي مو محصله حد تشكيله .. من صغرها وهي متعلقه فيك انته ويدها الله يرحمه .. بس يدها ورااح .. وانته ..

ابو سعود ( يقاطعها ) : وانا شوو ! اووووووووف .. مافي شي ينطاق هني !!

ام سعود ( اللي انصدمت ) : حتى انا يا راشد !!!!!!!

ابو سعود اكتفا بنظراته لأم سعود و ع طول ظهر من البيت ...

من بعد ما ظهر ابو سعود ع طول توجهت ام سعود لاقرب غنفه وبعد ما يلست سالت عيونها دموع القهر !! وفجأة طرا ع بالها حميد .. اللي من قامت وهي ما سمعت لها حس .... وقررت انها تسير لغرفته ... عل وعسى تحصله راقد .......... بس انصدمت لما راحت وما حصلته .. وع طول دقتله .. بس للأسف ما يررد ..

ام سعود ( منصدمه ) : واقردي .. هذا ويينه ...!! .. واحسرتي على عيالي اللي ظاعو مني
ااخ عليكم من عيال .. متى تعقلوون بس !! > خلني ادق لام صقر اشاورها ..

..
..

فبيت ابو صقر التلفون يرررن

تررررررن .. ترررررررن .. تررررررررن ..

يوسف : ألووووه // هلا هلا خالووه // هاه ! لا اميه محد // لا ما ادري والله .. اظني ظهرت هي وفطيم .. محمد ما ادري وين مودنهم // لا لا كيف اظهر وياهم وانا وراي امتحانات وحاله ! // هي هي ..والريم شو مسويه ! // يالله الله يكون في عونا .. // خلاص ما عليه خالوه .. يوم بتي بخبرها // مع السلامه

بعد ما سكر يوسف التلفون .. توه يصد ويشوف صقر فويهه ..

يوسف ( نقز ) : باسم الله .. انت من وين طلعتلي !!

صقر : هههههههههههه .. الله يكملك بعقلك

يوسف : صقووور .. والله مليت .. طفرت .. من الفجر وانا ادح فهالكتب !

صقر ( يتطنز ) : هههههه .. وحليلك .. ومسكين حالك يا يسووف ههههههههههه

يوسف ( حايس بوزه ) : هي هي اطنز شوراك انته !

صقر ( وهو يطالع ساعته ) : المهم انا الحين مب فاظيلك .. ههههه ما نرمس مال المدارس نحن ههههههههههههه .. يالله انا طالع فمان الله ..

يوسف : وين بعد ! حرام عليكم مخليني مثل الخبله فهالبيت برووحي !

صقر : يالله ما بطول .. بسير بس بشوف حميد ... وعقب بييب الشوق من بيت عموه وبيي !

يوسف : كديييينــــا

..
..

طلع صقر عن يــوسف ع اساس انه يسير عند حميد ... بس تم يدقله عشان يلاقيه بس ما رد عليه !! ودق المره الثانيه والثاله !! و نفس الحاله  { هذا وينه ..! شفيه ما يرد ؟! لا يكون بعد شي صاير له ؟ لا حول ولا قوه متى بس يعقل ....! خلني اسير امر ع شوق ابرك .. وبنشوف هذا شو اخرته !

عقب ما وصل صقر بيت عمته ام شوق .. نزل عشان بالمره يسلم على عمته ... وبعد ما دخل البيت : السلام عليكم يا اهل البيت ..

ام الشوق ( وهي طالعه من المطبخ هي وشوق ) : هلا هلا صقر ... تعال تفضل يا ولدي ..!

صقر : زاد فظلج عموووتي ...

شوق : ها عيل قلت بتتأخر !!

صقر : كنت بمر ع حميد .. بس خلاص ما حصلته !! ههههه جنج الا تبين الفكه الغاليه !

شوق ( وهي تغمز لصقر ) : هي بعد شوه ... 24 ساعه مجابلتنك !!

ام شوق ( انصدمت ) : شوق .!! هذا ريلج يا بنتي ...!

صقر ( اللي فيه ظحكه ) : لا والله ... خلاص عيل .. لا تراويني ويهج .. خلج هني فبيت امج احسن لج ..

شوق ( تكمل التمثيليه ) : يكون احسن بعد ... واتمنى انك ما تدقلي وتحشرني ... اذا تبي الصراحه .. حتى حسك مليت منه

ام شوق ( وهي تظرب خدها بكفها ) : واقردني ... انتو اتخبلتو !! شوق .. صقر !! شفيكم يمه ...

صقر : ما تشوفين بنتج عموووه .. خلاص مدام ان هالشي يريحها خلها اتم هني .. ولا بتشوف رقعه ويهي ..

شوق : ويكون احسن بعد لو تزيد عليها ورقة طلاقي ..

ام شوق ( وهني ما قدرت تتحمل .. كانت مثل البهيمه بينهم .. مب عارفه شتسوي .. ولا شتقول ) : حرام عليج .. انتش شتقولين ؟؟ تبين تخربين بيتج بايديج ؟!

شوق ( ما قدرت تتحمل منظهر امها جي .. وحزتها نقعت من الظحك هي وصقر) : هههههههههههههههههههههههه .. امي انتي الحين من صدقج مصدقه !!

ام شوق ( دمعت عينها ) : خايفه يكون مصيرج نفس مصيري يا امي ...!

صقر : افااااااااا .. افا عمووتي .. ماشي ثقه يعني ..! انا شوق ما اخليها لو شوو يصير .. واذا في شي بيفرقنا .. فهو الموت ..!

ام شوق ( وهي رافعه ايدها .. تدعي ) : الله يحفظكم .. الله يحفظكم .. الله يبعد عنكم عين الحسوود ...

شوق ( اللي حضنت امها وباستها ع راسها ) : اامين .. والله يحفظج .. ويخليج لنا ..

ام شوق ( وجنها تتذكر سالفه الجيس اللي فايدها ) : ويييه .. صح .. ولدي صقر .. اسمحولي بتعبكم وياي .. لو ما عليكم اماره .. اباكم تمروون بيت اخويه راشد .. عطو حق ام سعود هالجيس ..

صقر : افا عليج ... يالله عيل .. بنتوكل الحين ..

شوق : ما تامريني بشي ثاني امايه ؟!

ام شوق ( وهي تغمز لشوق ) : ديري بالج ...! ومثل ما وصيتج

صقر ( مستغرب ) : شووو ه !

شوق : لا لا ماشي .. لا تحاتين امي .. يالله فمان الله ..

بعد ما طلعو صقر وشوق .. وركبو السيارة .. صقر اول ما شغل السيارة

شوق : هممم .. اقول صقر ..

صقر : لبيييه حياتي ..

شوق : لباك قلبي يا قلبي ..

صقر : لبيتي حايه .. اامري ..

شوق : تحبني ؟!

صقر : اكيد احبج حبيبي .. شو اللي يخليج تسألين هالسؤال ..!

شوق : لا ماشي فديتك .. بس بغيت اتأكد من قدري بقلبك ..

صقر : لا والله ..! عيل تبين تعرفين قدرج بقلبي ..

شوق : يا ليت ..

صقر اللي زاد من سرعته .. وتم يتجاوز كذا سيارة ....شوق تمت تحن عليه وتحاول فيه انه يخفف السرعه وهو احلى طااف .... لدرجه انه كم مره بغا يدعم .. اما شوق فهي شوي وبتصيح .. : انت تخبلت !! صقر .. خف من سرعتك .. تبغي تموتني ........

صقر ( على عناااااد ) : ما اباااا .. مب انتي تبين تعرفين قدرج بقلبي ...!

شوق ( دمعت عينها ) : خلاص ما ابي اعرف منك شي !! بس خفف السرعه ... وين راح عقلك

صقر ( اللي لاحظ على شوق خوفها .... خف السرعه ) : وياج يا شووق .. عقلي وفكري وقلبي وكله وياج ..

شوق : شصاار فيك يا صقر ؟! انت صدق تخبلت ....!

صقر : وعرفتي الحين قدرج بقلبي ..! لــحد الجنووون يا جنووني ..

شوق : يا ربيــــــــــييي .. هذا اللي بيخبل فيني .. صدق انك متفيج ...

صقر ( وتوه وصل جدام بيت ابو سعود .. وعقب ما بركن ) : حبيبي ... زعلانه ..!

شوق ( احلى طاف ) : بسير اودي الجيس ...!

صقر : ما عليه انا اوريج ... المهم لين ما اتيبين الجيس .. انا بسير الملاحق .. اليوم الصبح نسيت بوكي هناك ..!!
شوق بدون ما تعبره .. نزلت من السياره ودخلت الفيلا .. اما صقر فتم يظحك على شوق { ههههههههههههه ... الله يعينج علي يا مرت صقوور هههه ....]

سار صقر للملاحق ... واستغرب لما شاف الليتات مفتوحه بس يوم دخل الغرفه اللي فالملحق لقا حميد هناك !! واللي زاد به صدمته !!

صقر ( يوعي حميد ) : حميد !! اييه .. قوووم لاه !! من الصبح وانا ادورك ..

حميد ( يهذي ) : علي .. هممم .. علي .. الهام شحالها ؟؟ شو صار ؟؟

صقر ( يظرب حميد ع كفه ع الخفيف ) : ايه حميدووه .. قووم .. انا صقر .. أي علي واي الهام واي خرابيييط ؟!! يا يا عمي .. الساعه 9 بالليل ...

حميد : هاه ؟؟ هااه ؟؟ خلني بررقد ... انا تعبان .. ابا ارقد ..

صقر : أي رقاد فهالوقت .. بلاك مستوي ديايه !! هههه قوم .. اظن حتى ولا صليت !

حميد : بعده ما اذن .. بعده وقت ..ّ!

صقر : عن أي اذان ترمس ..!

حميد : الظهر بعده ما اذن .. يالله سكر الستاره ابا ارقد ..

صقر ( اللي تم يتطالع الليت وهو فاج عينه ) الحين هالليت صار شمس هههههههههه .. ها بلاه يهذي!! خخخخخخ .. زين ... عقب ما تقوم دقلي فاهم !

حميد : زين زين ..

..
..

طلع صقر .. وركب سيارته .. وتم شوي يتعبث بالمسجل .. لين حصل اللي يبيه .. وفنفس اللحظه ركبت شوق السياره ...! وما ركبت الا ع اغنيه تسوى عيوني .. اللي كان مشغلنها صقر ومعلي الصووووت ..!

وش فيك تسألني اذا كنت غالي...غالي وتسوى من غلاتك عيوني
كــل ماتمــر ايـامنــا والليالي...يزداد حبك بي ويكثر جنوني

ودي احطــك من الــوله ياغــزالي...في داخل عيوني واغمض جفوني
واسرح واسافر بك في دنيا خيالي...واقطف لك ازهار الفرح من غصوني

انت الـغــلا كــلــه فـأول وتــالي...وانت حياتي وانت عمري وكوني
والناس ماتسواك يار اس مالي...لو بينك وبين البشر خيروني

صقر ( وهو يتنهد .. متعمد ) : اااه ... يحليلها الحين مها .. من هدتني هالاغنيه وهي مالها حس

شوق ( تحتررررررق ) : همم .. مها عيل ها !!

صقر : ااخ .. ما ادري ليش كل ما ادقلها ما ترد عليه ...! ومزهب الاغنيه ... توني اوني بسمعها ..

شوق ( طنقررت .. وفولت ع الااااخر ) : اووووووف .. وقف السيارة اشووف .. سرررررعه وقف السياره .. انا مب تامه هني وياك ..!

صقر ( وبكل برود ) : لا لا حليلها موصتني عليج احطج بعيووني .. واحسره ما ادري ع شووو ؟! فديتها هي الي تستاهل اني احطها بعيووني ؟!! ااخ بس لو تعرف هي كيف غاليه عندي ..!

شوق ( تمت تصيح ) : وانا اللي يايبتلك اخبار حلوه .. اوف منك .. ما احبك زين .. ودني بيت امي .. خلاص ما ابي اسير وياك .. بسرررررررررعه ودني بيت امي ..

صقر ( بدون أي اهتمام .. تم يغني بصوت عالي ويا عيضه ) :

قدرك كبير ومنزلك دوم عالي...كل يوم يكبر ياغلاي وفتوني
وان كنت تسال عن ودادك ياغالي...تعال وانظر منزلك في عـيــوني

شوق ( اللي سكرت المسجل ) : كرهتها ع الاغنيه ع كثر ما كنت احبها .. ولا ابي اسمعها مره ثانيه .. اوكيه ..

صقر ( عاد الاغنيه ) : عاد انا تعيبني ... كيفي .. وبرد اشغلها مره ثانيه ههههههههههه

شوق على دموعها الاربع اربع تمت لين ما وصلو البيت ... وتوها بتنزل .. يودها صقر .... : تعالي ..

شوق ( وبدون ما تصد له ودموعها ع خدها ساايله ) : في شي بعد تبي تعترفلي فيه غير مها ...!

صقر ( لا مها .. و لامريم .. ولا نوف بياخذووني عنج .....!

شوق ( تصد له بسرررعه وهي فاجه عينها ) : وبعد في مريم ونوف !!!

صقر ( يقهرها ) : هي هاييل اتعرفت عليهم يوم كنا فبرج العر .. شو غرنوقات ...

شوق ما قدرت تتحمل أي كلمه ع طول دخلت تركض لغرفتها وهي تصيــــــح

..
..

على صوت مؤذن الفجر قام حميد من رقاده وهو بعده مو مستوعب { .. استغفر الله .. أي اذان هذا !
( وبعد ما شاف الساعه ) .. خييييييييييبه ... الفجر ..! ما صليت امس لا الظهر ولا العصر ولا المغرب ولا العشا ! مب رقاد جــــي .! استغفر الله .. استغفر الله .. مب الهام اللي بتنسيني ربـــي ! لا اله الا الله .. خلني اسير المسيد اصلي ..!

..
..

كان خاااشع في صلاته ولأول مره بيحياته يصيح خشووع لربه .. كان حاس انه انه مبتعد عن دينه فالفتره الاخيره واايد .. مشاكله .. همومه لهته ... مرض الهام ... خذا عقله !!!!! { .. الله المستعان .. الله يصبرج ويصبرني على بعادج يا الهـــام .. ]

بعد ما طلع حميد من المسيد .. حس انه توه منولد من اول ويديد ....! نسى الهام للحظه ...... وقرر انه يسير يتمشى ع الكورنيش .. يغير جوو شوي ... وع الكورنيش تم يمشي ويمشي ويمشي .. ابد ما وقف !! ما حس بالتعب ابدا ..! كان مخلي مبايله فالسيارة حتى عشان محد يحشره ...! وع وقت الشروق تم يناظر حميد الشمس ... تم يتذكر كيف كانت حياته قبل وكيف هي حياته الحين ....! صارت حياته مثل حياة شيبه عمره 70 سنه ماله اهميه فهالحياه ..! اهله واقرب الناس تخلوو عنه .. ماله وجود ...! محد مهتم له ! حياته ومماته ..... ما تفرق ... هذا حميد والشيبه فيهم نفس الجانب {.. اااخ ... ليت الزمن يررد ورا .. ليتني قدرت اصلح اغلاطي .. ليتني ما لعبت ع الحبلين .. ليتني ما لعبت ع سااره !! يمكن جان ها كله ما صار لي ....!!! ( وبظحكه استهزاء ) هه .. مب من شي من دعاوي بنات خلق الله عليه ..! بس الغريب ليش حبيت الهام بالذات ! على كثر البنات اللي مروا بحياتي .. عمري ما فكرت اني احب وحده منهم !!! ليش الهام الوحيده اللي خذت عقلي جي بكل سهوله !!! .. ااخ .. ما ادري ليش هالانسانه كل ما انساها لحظه ارد اتذكرها من اول ويديد .. وجنه الشريط ينعاد علي ....! ,,,, شسوي ياربي ؟؟؟ شسوي ؟؟ رحمة الله عليك يا يدي .. كنت انت الوحيد اللي تقدر توجهني .. وتواسيني .. بس هذا انت ورحت عني يالغالي .. ياخوووفي بس تروحين عني انتي بعد يا االهام ....!
( وبعد ما دمعت عينه .. مسح دمعته وهو متغصص ) : الهام .. الهام .. الهام .. الهام ... لين متى ؟! انا بتم معذب روحي عشانها .. اووف .. خلاص .. انا لازم انساها .. لازم اشلها من بالي ( بس !! تذكر رمسه علي ) لااء !! كيف انساها .. الهام بترد .. وبتكون ليه ... خلاص .. انا اذا كنت بنسى شي لازم انسى هالحزن اللي ملازمني ليل ونهار .. بس الهام ... انسى روحي ولا انساها ...!

( تم حميد يناظر الساعه .. وكانت الساعه 6 ) : هممم مدام عندنا هني ست اكيد فلندن الساعه 2 الفجر .. يعني وصلو من زمان .. خلني ادق اشوفهم ...! ولا لاء فظيحه .. اوف أي فظيحه انا بدقلهم .!!

..
..

سار حميد وركب سيارته .. وبعد ما شل مبايله .. شاف عدة مكالمات لم يرد عليها .. من صقر ومن ابوه ومن الريم ...! سوا كاف حقهم كلهم ... ودق ع رقم علي .... بس استغرب لما عطاه مغلق ...!!!!
{.. هذا شفيه غالق مبايله ( وهني تم يوسوس ) لا يكون صاير لالهام شي .......................! __DEFINE_LIKE_SHARE__

~ . دمـ آلــغزال . ~ · 01-23-2009, 09:47 PM

{.. البــْــٍـــُـاأإرتٍ 20

..

..

*//~قبل انتـفارق سطرتلك يميني آخر رسالة حب أودعك فيهــــــا .. هذا قدرنا بالهوى صدقني الايام ماتمشي على مانبيها ودعتك الله وإن قسيييت أعذرني وعيوبي اللي تعرفها..استرها وان كان عذبتك معي سامحني وانسى ذنوبي واغفرهـــــــــــــا...]

..

..

" لحظه المغرب " وفي وقت تموت فيهـ الشمس مجبورة تكابر !! ودها ترجع وتعطي الناس من نووره

--> كان الفراق مقطع قلبه ...! يقرا الرساله ... ودموعه ع الخد سياله ..!! للحين مو مستوعب خبر وفاتها [ كيف تروح وتتركني !! كيف ؟! لا مستحيل ...... هي سايره تتعالج .... وبترجع .. مو بكيفهم .. الهام ما ماتت .. ما مااااتت ... انا اللي مت .. انا اللي موتني الخبر ...!! انا اللي مت .. اااه اناااا !!!! ااه ]

رد مره ثانيه يقرا الرساله مثل المينون وجنه للحين مو مستوعب

[ حميد ....! ..ادري اني عذبتك وايد ,, بس مو بيدي صدقني .. الفراق كان قدر ومكتوب ! ما كنا مكتوبين لبعض .. ولا حبنا قدر يتوفق ... خلاص يا حميد ... القطار فاتنا ! ما نقدر نسوي شي الحين .... أبيك تعرف حبيبي .. اني ما كتبت هالرساله الا وانا حاسه ان يومي اقتررب ... تأكد ان حبي لك فاق كل القمم ...! وادري ان حبك لي مو شوي ... بس انا طلبتك .. ان كنت صدق تحبني ! اترجاك تعيش حياتك .. ما اطلب منك تنساني ,, لأني ادري ان هالشي مستحيل .. وادري انك ما تقدر على هالشي ! بس ادعيلي واذكرني بالخير !! وانت بعد الله يوفقك يا حميد ... صدقني حتى لو كنت حية وما كنت من نصيبك فأنا ما كنت بتمنالك الا كل الخير ...! عشاني .... اتزوج فاقرب فرصه ! ولا تنسى تسمي اول بنت لك باسمي ............ هالله هالله فاخوي تراه يحبك وايد لو شو يسوي !! ,,,, لا تنسى تزورني فمقبرتي ! تراني فانتظارك

وانطفت شمعتي ..

حبيبتك للأبد : الهام .....!

ما اكتفى حميد ... رد يقرا الرساله للمره الثالثه والرابعه .. وهو فوده بس ان يطالع الورقه ويحصلها فاظيه عشان بس يرتاااح !! وده انه حد يصفعه ويقوووله قوم من رقادك .. تراك تحلـــم .... وده ووده .. بس مو بيده ! الموت مكتوب ... ولا أحد يقدر يغير المكتوووب .......!

حميد من تأثير الصدمه توجه للمطاار ... وجنه يتنظر شي مهم ...! كان يدور بين الناس .. يتمنى فخاطره يحصل بينهم الهام يااايه ....!
فجأة مبايله يرررن ..... [.. رقم علي .!! هي اكيد هو داقلي عشان يقولي ان الخبر كان مجرد مقلب !!

علي ( بنبرة كلها حزن و آسى ) : ألووووه !!

حميد ( وبعده ما فقد الأمل ) : هلا علي ... انت متصل عشان تقولي ان السالفه بكبرها مقلب صح !!

علي ( ما قدر يقاوم دموعه ) : حميد ... انت وينك !

حميد ( يظحك مثل المينون ) : هه .. انا فالمطار بعد وين ..! قاعد اتريا

الهام ( وهني رد يصيح ) انا اتريااا الهام اتييي ... الهام سارت تتعالج وبترررد .. انا اعرف .. اصلا الهام تحبني مستحيل تروح وتخليني بروحي

علي : حميد يا حميد ... الهام ماتت .. انت ليش ما تفهم ...! حرام عليك اللي تسويه فعمرك !! الحين كملت اسبوع ع وفاتها ..... وانت بعدك مو مصدق !

حميد ( عصب فجأه ) : صدق انك مب صاحي ... الهام سافرت تتعالج وبترد ... فمان الله !

سكر حميد التلفون عن علي ... وتم يتريا فالمطار ...... الأمل موجووود .. بعده منتظر يية الهااام ! من وفاتها .. وهو كل يوم ساير المطار يتريااا !!!

رد يتذكر قبل اسبووع لما اتصل فيه علي ... وخبره بانه رد البلاد ...

حميد : كيف ترد البلاد !! امسات انته مسافر ,, تتمصخر انته ؟

علي ( وبدون أي كلمه ثانيه ) الهام توفت يا حميد .................! فالطيارة ونحن سايرين .. توفت .. واطرينا ان ناخذ اول طياره نرد فيها البلاد ...!

حميد ( تم يظحك عباله علي يتمصخر ) : ههههههه .. حلووه .. بس لا تعيدها مره ثانيه .. استهدي بالله .. مب زين تفاول ع اختك يا اخوي !

علي ( دمعت عينه ) : السالفه ما اقدر اتمصخر فيها ..! حميد .. الهام من ركبنا الطيارة وهي تكتب فالاوراق ... ما خلتني اشوف شي .. بس كل اللي اعرفه انها طلبت مني اعطي هالرساله لاختك ان صار فيها شي !!

حمبد ( مصدوم ) : علي ......! انت تخبلت ولا قاعد تتمصخر ..

علي ( عصب ) : اقووولك انا مو قاعد اتمصخر وياك ... حميد .. راحت الغاليه ... راحت الهام !! خلاص .. ما اقدر اكلمك الحين ... مع السلامه !!

هاك اليوم .. سكر علي عن حميد .. وخلا حميد مصدوووم فمكانه .. بعدين عرف حميد ان يوم اتصل بعلي وحصل التلفون مغلق .. علي كان فالطياره .. من جي ما قدر يرررد !!

انصدم حميد من الخبر ...!! ما كان قادر يستوعب ! لدرجه انه ظرب عمره باقرب حصا له !! بس عشان يصحصح !! ما اهتم للدم اللي يسييل من ويهه .....! ورد يظرب عمره !! بس ماشي فايده ... هني انفجر حميد ... وانفجرت دموعه وياه ...! وبعد يوومين ... يته الريم اللي وصلت له رساله الهام : هذي الرساله لك مو لي ... بس الظاهر انها ما قدرت تقول لخوها ان الرساله حقك !! ( بعد ما مسحت دموعها ) الله يرحمها .. والله يصبرك يا اخوي ....! ادعيلها ..

ما صحا من هالذكرى حميد الا ع صوت الشرطي اللي كان يكلمه ..

الشرطي : لو سمحت اخوي .. تنتظر حد هني !

حميد ( توه استوعب ) : ها .. أ.أأ ... هي .. هي ..

الشرطي : من وين يايه الطيارة اللي تنتظرها ..!!
حميد : لندن .!

الشرطي : اسمحلي يا اخوي .. مافي أي طيارة يايه من لندن !! الظاهر انك مخربط !

حميد ( استسلم للأمر الواقع ) : ها .. لا خلاص الحين برووح !! ااه .. يالله يا قلبي سرينا ..!

طلع حميد من المطار .. والود وده انه يقضي باجي عمره فيه لين ما ترجع الهام ...!

ما يدري انها راحت بلاااا رده ...!

*//~ لا تلوح للمسافر .. المسافر راأإح ,,, لا تنادي للمسافر .. المسافر راااح ... يا ضياع اصواتنا فالمدى والريح , القطار وفاتنا ,, والمسافر رأإأح .. يالله يا قلبي تعبنا من الوقوف, ما بقى بالليل نجمة ولا طيوف ،، ذبلت أنوارالشوارع وإنطفى ضيّ الحروف ..يالله يا قلبي سرينا ضاقت الدنيا علينا..!! القطاروفاتنا ,,

{... والمساأإفـر رأإأإأإأآآح ~.....]

..

فبيت أبو علي زوايا البيت كلها تشكي فراقها .... البيت صاير كئيب من بعدها ... مرت ايام العزا مثل الدهر ...! سلطان من صوب مب قادر يفتح كتبه .. وسيف من صوب ولا طايع يروح المدرسه ... والأبو حالته حاله ... من وفاة بنته وهو مصدوم .. لا قادر يتكلم .. ولا قادر ياكل .... حتى الشغل مو قادر يروح له ....... تظارب مع علي من بعد ما عرف السالفه !! ..... اما علي .. فهو كان دايم يلوم نفسه !! كان حاط فباله انه هو سبب موتها !! للأسف ايمانه بالله كان ضعيــــف .. نسى ان الموت .. قدر مكتوووب .......}

..

..

فركن من أركان دبي ... عليا بعد ما درت بالخبر من عليا .. سالت دموعها غصب عنها ...! : بلل نحن كل اللي طمحنا له ان نأذيها ونأذي مشاعرها ..... ماتت مره وحده !! الله يرحمها .. الله يرحمها .. الله يرحمها ...! يا ربي اغفر لي يا ربي ... يا رب استغفرك يا رب ...

عليا ( استغربت من ردت فعل سارة ) : ايه سوير ...! من صجج انتي ! ليش تصيحين ! نحن حقج بعدنا ما خذناه يا عيووني ! بعدنا ورانا مشوار ..

سارة : خلاص يا عليا .. انا خذيت حقي .. اكوه متعذب ... ياما تعذبت انا .. والحين يا دوره .. بس بس .. الحين حسيت ان الهام مالها ذنب .. والله انها غامظتني ..!

عليا: ( تهز جتف سارة ) / ايي انتي .. اصحي ...... شقاعده تخربطيين !! انتي بجي قاعده تهدمين كل اللي بنيه ..!

سارة : وهو فيه شي اصلا عشان نهدمه ..! اصلا خططنا وكلها فشلت .. والريم .. مب سهله .. ولو حاولنا نسوي فيها شي بعد ما بنقدر .. وبعدين انا فكرت .. ولقيت ان الريم مالها ذنب ...! ليش نسوي فيها جذي !

عليا ( بتحدي ) : لا والله .. اسمعي زين يا سوير ... اذا انتي استسلمتي تراني بعدني ما استسلمت !!
ولا برتاح لين ما اشووف الريم تتعذب !! انا عمري ما انسى اليوم اللي رماج فيه مثل الجلبه ..! واذا انتي بتسكتين تراني ما بسكت ...!

..

..

كانت تتصفح الكتاب على امل انها تفهم شي .. باجر عليها امتحان كيمياء !! بس للأسف .... ما قدرت . لانها اساسا ما تداني هالماده خير شرر ... بس تذكرت فجأة ان الهان كانت تعيبها هالماده !! وتذكرت لما الريم يابت درجه مب حلوه فامتحان الكيمياء فالفصل الاولى كيف عاتبتها الهام ع درجتها !

فجأأأأة دخلت عليها جواهر وهي تصيييح :
ريمو .. ريمو الحقي ... امي وابوي قاعدين يتظاربون تحت !

الريم ( مسحت دموعها ) : اشووووه ...!

وع طول الريم ظهرت من غرفتها ونزلت تحت لوين ما كانوا يتظاربون اما جواهر فمن الزيغه تمت توايج من صوب الدري وهي تصيح ..

ابو سعود ( يزاعق ) : وبعدين وياج ..! خلاص كم مره اقوولج سالفه سعود هذي تسكرينها ,,,

ام سعود ( تصيح ) : هذا ولدك .. خاف ربك .. تعبت وانا ادقله واحاول وياه وهو مب طايع يرد البيت ..!

ابو سعود : هي .. معلوم .. لاعبه براسه هالسوسه اللي وياه ..! مب لو يدري ان نحن حرمنا مروان منها عشانه ! بس طلع لا هو اللي يستحقها ولا هي اللي تستحق انها تاخذ واحد اعلى منها !

ام سعود : يا راشد .. مهما يكون هذا ولدك ! ومرته ام حفيدك !

ابو سعود : ولا اتشرف انه يشل اسمي هالحفيد مدام انه ياي من طرف ميره !

الريم ( عصبت .. ما قدرت اتم ساكته اكثر ) : بااااااس ... حرام عليكم !! ولا قلتوا عندنا بنت عليها ثانويه عامه .. طايحينلنا كل يوم ظراابه .. كل يوم نفس الموال لازم ينعاد . والله حرام عليكم .. انتو بدال ما ترمسون فهالسالفه اللي مالها معنى .. سيروا شوفوا حميد وحالته !! سيروا اسألوه عنه !! شوفي وينه ! صارله كمن يوم وهو ماله حس فالبيت !! انتو شوووووا !!

جواهر ( اللي من سمعت اختها ترمس .. تشجعت ونزلت تحت ) : هه .. كنت اتحرى اني انا بس الياهل فهالبيت .. بس طلعوا شي يهال غيري فهالبيت ...!

ابو سعود ( توه ياي بيصفعها .. بس حس ان ايده تشللت ... ما قدر .. تذكر ابوه يوم كان يقوله .. تحمل .. الا جواهر .. محد يمد ايده عليها ) : استغفر الله .. للأسف الظاهر امكم ما عرفت تربيكم !!

ام سعود ( باستهزاء ) : وليش ما ربيتهم انت ... ولا ما عندك وقت !!
ابو سعود : جااااااااب .. روحي يام سعود وانتــي ...

الريم ( تقاطعه .. وهي تصيح ) : لاااء .. حرام ... لاااء .. بعد كل هالسنين !! ليش ؟ شو صار عليكم ؟؟

ام سعود ( ولا سوت سالفه للريم ) : يالله طلقني ... طلقني يا ابو

سعود .. انا طووول عمري وانا صابره .. مو لشي .. عشان عيالي بس ...! وانت انت تتحراني ما اعرف عن مرتك الثانيه ..

جواهر + الريم .. فاجات عيونهم : اشووووووووووووه !!

جواهر : حرمه ثانيه ... ( تمت تصيح جواهر ) لاااء .. ما ابي ... ابي امي وبس .. لاء .. ما اصدق ... ( وع طول ركضت لغرفتها ... وهي تصيح ..! )

ابو سعود : اوهوووووووو ..

ام سعود ( دمعت دمعة حسرة وندم وهي تشوف حالة عيالها بس كانت مجبورة ) : طلقني يا ابو سعود وريحني ... ما اظن اني بفيدك كثر ما مرتك الثانيه بتفيدك

ابو سعود ( وتم يطالعها من فوق لتحت ) : انتي اللي اخترتي هالشي .... انتي طاااالق .. طالق .. طالق ..!

..

..

فبيت ابو صقر كانت الشوق قاعده فالصاله هي و ام صقر يسولفون .. وبعد لحظات من السوالف ... دخل البيت صقر .. : السلام عليكم ..

ام صقر + شوق : وعليكم السلام والرحمه ..

صقر ( من بعيد ,,, وهو متوجه لغرفته ) : شوق ... تعالي اباج شوي ...!

شوق ( تمت فمكانها احلى طاف )

ام صقر : شووق يمه .. ريلج زقرج ..!

شوق ( تسوي رووحها توها استوعبت ) : ها .. أ..أ.. لا ما سمعته .. الحين بسير له !

وبعد ما سارت له شوق الغرفه ..

شوق ( يلست ع الشبريه بدون ما ترمس )

صقر ( اللي بدوره سار ويلس ع الارض جدامها ويود ايدها بكل خفه ورومنسيه ) : شو حبيبي للحين زعلانه منس !

شوق : يهمك !!

صقر : اكيد يهمني .. حبيبي انا احبج .. ولا عمري فكرت احب غيرج !

شوق ( تصد عنه الصوب الثاني بعد ما تير ايدها ) : لا والله .. ومها ومريم ونووف شو مكانهم فقلبك !

صقر ( نقع من الظحك ) : انتي للحين تذكرين اساميهم .. اذا انا نسيت اساميهم !! ونسيت السالفه بعد !! خخخخخخخخخخ

شوق : لو انت نسيت انا مانسيت ..

صقر ( رد يود ايد شوق ) : تغارين حياتي ؟
شوق ( بغروور ) : لاااا ..

صقر ( قام من مكانه ) : زين عيل بسير عند مهووي ابرك لي .. محد يغار علي كثرها ..

شوق ( يرته وردت يلست ) : ما بتسير مكااان ..

صقر : عيل توج ما تغارين هههههههههه

شوق : يعني ما شي فايده .. جاكني جاكني ..

صقر : اكيييييد ههههه ..

شوق : صقر ..!

صقر : ااامري .. لبيييه ..

شوق ( وهي منزله راسها ) : أنا حامل ..!

صقر ( منصدم ) : هااااااه !

شوق : من قال ها سمع هههههههه

صقر : انتي من صجج .. بيصير عندنا ولد !

شوق : ههههه واشدراك انه ولد .. مو يمكن بنت ...!

صقر : ولد .. بنت ما تفرق.. يا سلاااااام بصير اب .. لا لا الصراحه ما اصدق ... شوق .. احبج .. انا احبج .. اااه .. اموت فيج .. فديتج والله .. ما تدرين شكثر ونسيتي بالخبر ...!

شوق : ههههههه ... بس عاد .. لا تحرجني ..

صقر : لا والله .. عيل انا مو مخلنج تظهرين من هني الا وتقوليلي كلمه حلوه !

شوق : همممم ما ابي .. بعدين بتتكبر عليه ههههه

صقر : شتبين اكثرمن جي ! يحقلي اتكبر .. يالله عاد شوقي .. كلمه وحده بس ..

شوق ( تجرب منه وتهمس له ) : احبـ ـ ـ ـ ــك ههههه

وع طووول ظهرت من الغرفه .. وسارت للصاله وين ما انصدمت !!

شوق : الريم !! جواهر !! شو يايبنكم هني !

جواهر ( بحزن ) : الظاهر كلكم ما تبونا !

ام صقر : لا جواهر فديتج .. لا تقولين جي يا اميه ... شوق .. الريم وجواهر بيتمون هني جم من يوم ! قولي للشغاله تزهب لهم الغرفه !

شوق : ان شاءالله ا.....!
الريم : والله تصدقين عموووه .. قامو يتظاربون جدامنا .. ما قالوا هاي وراها ثانويه عامه .. محد افتكر ..

ام صقر ( وهي تهدي الريم من صوب وجواهر من صوب ) : خلاص حبايبي .. انتو لا تشغلون بالكم .. سالفه وبتعدي ع خير ان شاءالله ..

جواهر : عمووه .. نحن ما عندنا حد فالبيت .. اميه ع طول سارت يمعت ملابسها وظهرت من البيت .. وابوي من عقب الظرابه بعد طلع من البيت ... و سعود طلع هو ومرته من البيت من متى ولا قام يدق فينا حتى ! وحميد .. من متى ولا شفناه بعد ! ..

ام صقر ( دمعت عينها .. وبسرعه مسحت دمعتها قبل لا يلاحظوون ) : الله كريم .... الله كريم ..!

وهني صقر يظهر من غرفته : اووه .. شالطاري ! هلا والله ببنات العم ! شيايبنكم فايام الامتحانات .... ( لاحظ صقر انهم مو ع بعظهم .... وبعدها لاحظ الشنط .. عرف ان السالفه فيها ان !

صقر : خير !! شصاير !!

..

..

قام فجأة ع كااابوس .. ما قدر يكمل رقاده ... ع طول رد الصاله ... ورد يشرب السم اللي من وصل للشاليه وهو يشرب فيه ..! تذكر فجأة رساله الهام .... ورد مره ثانيه يراجعها من اول ويديد ..! ما بجاله منها غير هالرساله ! على الله يصبح ويمسي عليها !! ...... تذكر انها طلبت منه يزورها !! وقام حميد .. وبحالته اللي ما تسر .. وظهر للمقبره .. فنص الليالي .. وفعمق الهدوووء .. ظهر حميد من الشاليه .. ركب سيارته وساق باسرع ما عنده .. كان الشارع فاظي .... واستغل الفرصه ... لين وصل المقبره .. ما قدر يدخل من الباب .... خاف الحارس يشووفه .. اطر انه يشقح من فوق السور ..!

دخل المقبره .. وبدا يدور بين القبر قبر قبر .. ما قدر يميز بين القبور بالليل .. ولكن فجأة حصل القبر اللي بغا يوصله .. حصل قبر الهام .. وبدون ما يحس .. ارتما على تراب ثراها .. وقام يصيح مثل الياهل

حميد : ليش خليتيني فهالدنيا لحالي ! ها ؟! خبريني ليش ؟!!! انا احبج الهام .. وانتي بروحج اتعرفين ! بس انا ما اقدر اعيش فهالدنيا بدونج .. لاني عايش لج .. ارجعي الهام .. ارجعي .. وداويلي جرحي .. ( بس تأثير الكحول اثر فيه وخلاه يظحك فجأة ) ههههههههههههههه .. كيف ترجعين انتي موجوده اصلا .. انتي فبيتكم ( وهني نسى اهو ليش ياي اساسا ) : اووه .. انتي منوه ! هههههههه ؟؟ شكلي مغلط فالعنوان ( وبعد ما قام وقف ) : السلااااام عليكم يا اهل القبور .. ههههههههه رحتوا حليلكم ههههه .. لا لا نحن لاحقيين ( وهني حط ايده على حلجه وشهق باقوى ما عنده ) : اويه .. انا شو اقول .. استغفر الله ... اوه خليني اسير بيتنا احسن .. اكيد يدي يترياني فالبيت ! هههههه مسكين .. الحين من ادخل وبيودني بنصايحه اللي ما تخلص هههههه ( وبعد ما رد يطالع مقبره الهام ) : ههههههه .. يالله انا رايح .. سلمي سلمي .. ههههههه .. ( و توه بيمشي خطوتين .. ويطييح في مكانه ...!

*//~ تعب دمعي وهو سايل(ن) كل ليله على محجر عيوني ..! تعب ( قلبي ) منجروووح عادت تمسيني كل ليله وتسير واكتم عبراتي ,, تعب كلي .. وكل مافيني تعب .. وتعبت انا اكثر من دمع(ن) بعيوني .. بالنهايه انا تعودت على الأحزان ...! بلا أحدن .. بلا خلااااان ؟ تعبت امشي ادور طريق لنهايات همــي ! تعبت وأنا ارحل منديرتي لديرة أوهاأأأمــــــي ,, تعبت احن للحاضر اللي من اوله يعزيني .. اجل كيف اطلبه هاليوم انه يواسيني !!!! تعبت وانا ابكي وذكرهم أكثر يبكيني ...! ...]

..
..

... اشرقتشمس وكل فرد من البشر ودع الامس وابتدى يوم جديد .. وبعد ما قامت جواهر من رقادها ... استغربت فالمكان اللي هي فيه فالبدايه .. بس بعدين تذكرت اللي صار امس .. وبعد مال صدق لقت الريم بعدها راقده ..

جواهر ( بهمس ) : ريموووه .. ريموووه نشي يالله .. عشان نلحق ع الامتحان ..!

الريم : اوكيه .. اوكيه !! انتي سيري وانا يايه وراج .!

جواهر : لعبيها ع غيري .. يالله نشي بسرررررعه .....؟

بعد ما قامو الريوم وجواهر .. وساروا الصاله ... لقوا هناك ام صقر و محمد وصقر وحرمته ويوسف وفاطمه قاعدين يفطروون

جواهر ( بابسامه خفيفه ) صباح الخير !

الكل : صباح النور

ام صقر : حياكم بناتي لا تستحون .. تعالو يلسوا ..

جواهر سارت ويلست حذال فاطمه .. اما الريم فكانت مستحيه : همم لا عموه مشكوره .. انا بسير اراجع شوي .. بس من و بيوصلني !

محمد ( بدون ما يعطي فرصه لحد ) : انا بوصلكم اليوم ..!

صقر : اوكيه .. احين .. لان عندي شغل ظروري اليوم

الريم : اوكيه عن اذنكم عيل ..

شوق : وين تعالي ! ريامي فديتج مب زين تسيرين وانتي بطنج خالي !

الريم : لا ما عليج لا تشيلين هم ..

يوسف ( يقوم من الطاوله ) : اوكيه عيل ريمو انا بيي براجع وياج ..!

الريم : اوكيه ^^

جواهر : همم ها فطوم ذاكرتي زين !

فاطمه : يعني وانتي ؟

جواهر : يعني بعد خخخ

فاطمه ( تهمس لجواهر ) : عاد ما اوصيج هالله هالله ببنت عمج فالامتحان .. ههههه

صقر : اشوووه ! لا لا مول ما سمعت !

ام صقر : لا يكون تتغشوون انتو بعد !

فاطمه : لا لا حشا علينا ..! عيب .. استغفر الله ! نحن ما نغش اميه

شوق : هي صح انا اقول جي بعد ههههههه

صقر ( تلفونه يرن ) : انا استأذن ...!

..

..

صقر : ألووووه // هي أنا صقر .. نعم اخوي في شي ! // اشوووووووووووه !!

كـــــــــــــــــــــــــــــــــــــــــــت __DEFINE_LIKE_SHARE__

{ ذلتهـِم ع ـيوني ..~* · 02-01-2009, 06:07 PM

القصــِه رووعه ْ

بــِس البـآإرتـآإت عورت قلبي وربي انيي صحت عليهــِم .. { وأآإيـــِد متآثره } $\38.gif$

تسلميــن الغلـآإ ولـآ اتطوليـ،ن علينا .. ^.* __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
أنتـِـِـِي الأمـَـَـَـَـآاכּ . . أنتـِـِـِـِي الح ’ ـنآاכּ ,’ ~ ♥‏	я o ό о 7 i	نغمــات للهــواتف	9	05-23-2010 12:32 AM
مَصِآفُحُ آلْـﭭـآلطَﭕـًכּ مِعُنآ آلآכּ	محروم.كوم	منتدى أخبار المواقع والمنتديات العربية والأجنبية	0	10-13-2009 07:50 AM
مقاطع ذيب الشوامس (( بنت فنون الغدر )) الجزء 14	مقاطع ذيب الشوامس	قسم المقاطع	11	09-03-2009 02:22 AM
بليـــــــــــز ابـــــــــي اغنيه ميحد حمد فنون الغدر (لا تتصلي)	الغلا88	نغمــات للهــواتف	3	02-27-2009 12:26 PM
·!¦[·«● يا قلب لاتنحني لحد وش لك في رجل فنون الغدر دارسنه ^_* ●»·]¦!·	Moon_AlMuhairi	هواتف , مسجات , وسائط , برامج , ثيمات , نغمات , بلوتوث	17	01-15-2009 10:35 AM