++::بعد ماجفيت ترجع تقول احبك وانا احبك::++

مزيون دبي · #1 01-11-2008, 03:21 PM

هاي القصة شفتها في أحد المنتديات فحبيت أنقلها لكم....
ع فكرة هاي القصة تصيح من الخاطر وتعور القلب...

الجزء الاول

فى بيت بوزايد العايله متجمعه على العشا الا شخص واحد و هو زايد ...زايد عمره 23 سنه يشتغل فى شركه ابووه شكله يجنن شعره اسوود سواد الليل و يلقبونه بمزيون العين من كثر حلاه حتى الشباب يموتون منه .وطبعا من ناحيه البنات يموتن فيه خاصه البنات للى فى عايلتهم من بنات عم و الا بنات خال..
ام زايد: زايد اوووه زايد ((تصرخ علشان يسمعها))
زايد((يفتح الباب)): هلا امااايه
ام زايد: تعال ياولدى تعشا
زايد: نازل الحين ((سكر الباب ))

ام زايد اول مادخلت الصاله شافتهم ياكلون و صرخت عليهم لانهم اتريوا اخوهم الكبير
ام زايد: شو هذا بعد ما تتريون اخوكم
فهد: شو فيج امااايه حتى انا ولدج دلعينى
عبدالله: بالله عليك بدلعنا نحن مستحيل
ام زايد: اخوكم العود هذا
ساره: وطبعا احلى واااحد مب صح شباب
ام زايد: بسم لله على ولدى قل اعوذ برب الفلق ميرى ميرى ((تصرخ على الخدامه))
ميرى: يس مدام
ام زايد: سوى دخوون يالله بسرع
ميرى: حط عود
ام زايد: لا بس انتى يبى المدخن

فى هالوقت دخل زايد و الكل يضحك على ام زايد
زايد: اماااااااااايه شفيج
ام زايد: اختك بتعطيك عين
زايد: ههههههههههه لا و لله
ساره: و لله جانك مب اخونا حشى عوذ بالله
زايد: امااايه اشفيج مب زين
ام زايد: عين الشاب نشاب ياولدى
زايد: لله يهديج ياامااايه ((يلتفت على اخوانه)) يالله تعشوا
ساروه: امايه خلينا انسير باجر بيت خالوه
ام زايد: لا مافينى كلنا بنتجمع بيت يدج
زايد: انا اسير بعد
فهد: بعد شو لازم تسير
ام زايد: ليش مفكر انك ماتسير قصورك بعد
عبدالله : يمكن عنده شغل
ساروه: شو شغله بعد
زايد: بسم لله كلتونى بسير خلاص
ام زايد: هيه بعد شو باجر الساعه 9 الصبح بنسير عندهم
زايد: خيبه حتى يسير الصبح لله يهديج
ساروه: احسن الصبح فريش
زايد: بس جب انتى اوووين فريش
ساروه: اماااايه شوفيه يقولى جب
ام زايد: برااايه لو يكسرلج راسج بعد ماعليه لسانج مارمت عليه
زايد: ههههههههههه ايوااااا
فهد: امااايه و انا
ام زايد: لله يخليكم لى ان شاء لله ابوكم لله يرحمه ربى رياييل و النعم فيهم .
.
يترحمون على ابوهم ...............

زايد:الحمدلله على كل حال يالله بسير غرفتى انا باجر وراى شغل
ام زايد: باجر عند بيت يدك
زايد: هيه نعم الغاليه
عبدالله: زايد
زايد: هلا بوحميد
عبدالله : اريد تلفون ..
زايد: وتلفونك
عبدالله: ما اريده ..
زايد: بطران انته الا من ثلاث اسابيع مغيرنه
عبدالله: يا اخى كل اسبوع ينزلون شى يديد
فهد: عن البطره يالله ما شى تلفون بسير اريد يالله اخليكم
ساروه: هههههههههههه ديايه من الحين ترقد
فهد: ديايه فى عينج ولله تعبان من الشغل زايد يهد حيلنا من الشغل
زايد: قول و لله يعنى مدير قسم على الفاضى حاطنك
عبدالله: هيه على الفاضى ..
ام زايد: بسر ارقد انا اتناقروا انتوا يالله
زايد: تصبحين على خير امايه
ام زايد: و انته من اهل الخير ياولدى

الكل سار غرفته علشان ينشون من وقت لان لازم باجر يسيرون بيت يدهم ..الكل فى سبات الا شخص واحد و هو زايد للى قاعد يفكر فى مشاريعه .همه الوحيد الشغل ماكان يفكر فى اى شى ثانى ..بعد تعب رقد زايد وصار فى سابع نومه ...

الصبح الساعه 80 ام زايد من صباح لله خير توعى عيالها علشان يسيرون بس حليلها ماقدرت ادق على باب غرفه زايد لان قلبها حاس انه كان امس يعدل فى مشاريعه فخلته اشوى يرقد نزل فهد و عبدالله الصاله شافوا ساروه قاعده تاكل
فهد: بسم لله عليج اشوى اشوى لا تغصين
ساروه: يالله الواحد مايقدر ياكل
عبدالله: لا كلى شوى شوى مب جذا تقولين ملغوثه
سارووه: اماااااااااااايه تعالى شوفى ((تصرخ))
ام زايد: بس جب قطعى اخوج راقد
ساروه: انزين يحسدونى
ام زايد: اخوانج مابياكلونج
ساروه: انزين اتريوا زايد يوم بينزل

الا و اشوى كان زايد نازل من فوق وطبعا ابتسامه حلوه على ويهه تشرح القلب ..
زايد: صبحج لله بالخير
ام زايد: زان صباح ياولدى
فهد: السلام عليكم
زايد: و عليك السلام شحالكم اليوم
ساروه: زايد هذيل بيحسدونى
زايد: لا اله الا لله اصبحنا و اصبح الملك له
ساروه: شوفهم
زايد: ساروه انتى اول سنه جامعه يعنى كبرتى عقلى عاد عن حركات اليهال هذى
ساروه: انزين
عبدالله: زايد شو عن موضوعى
زايد: يصير خير ((يلتفت على امه)) متى تبون تسيرون
ام زايد: متى ما بتسرحنا ترانا سايرين
زايد: خلاص عيل بتريق و بنطلع
فهد: اماايه صح منو بيكون عند يدى اليوم
ام زايد: كلهم ياولدى كل خوالك و خالاتك
زايد: لا و لله غريبه و لا مره استوت
عبدالله: هيه و لله صح غريبه
ساروه: ياى بشوف البنات كلهم
زايد: هيه زين علشان الرمسه و الكلام الفاضى
ساروه: لا و لله
زايد: هيه و لله رمسه الحريم فاضيه ماعندهن الا يرمسون عن هذى وشو سوت و من هالسوالف الفارطه..
ام زايد: تريق ياولدى و خلها عنك

على الساعه 10:00 طلع زايد واهله صوب بيت يده و الكل كان متجمع اهناك..اول مادخلوا حوش البيت شافوا سيارات خوالهم نزلت ام زايد و ساروه ساروا صوب الصاله قبل زايد و فهد و عبدالله ..اول مادخلن سلمن على الحريم وساروه ماصدقت على لله شافت بنات خالها حمد و قعدت تسولف وياهم الا و اشوى بنت خالتها نوره للى تموت من تشوف زايد ..وقفت جدام ساروه و اطالعها بنظرات احتقار وغرور و تحدى
نوره: هلا سويره و ينه زايد
ساروه: و لله يا موزه يجنن الفلم ((مطنشه نوره))
نوره: ايييييييييه ارمسج انا
ساروه: شو تبين ((تصرخ بصوت عالى))
ام زايد: شو فيج ساره
ساروه: شوفيها اماايه
فهد: سارووه برايها خلاص
نوره: منو رمسك انته
فهد: على ما اظن انتى قاعده ترمسين اختى
موزه: خلاص عااااد ((طاحت عيونها فى عيون عبدالله))
عبدالله: هيه صدقها موزوووه بس عااد
ام سالم: يا اختى اشفيهم العيال اليوم

((دخل زايد و سالم وخليفه فى نفس الوقت ))

هودوا الشباب و دخلوا و قعدوا مع خوالهم و خالاتهم كلهم فى صاله وحده ..ونوره من الصبح قاعده اطالع زايد للى ما معبرنها و لاشى ..دخل يدهم و الكل وقف يسلم عليه ومن بعدها تغدوا و ارتفع الشيبه علشان يرتاح ووصاهم انهم مايطلعون من البيت لين العصر يباهم يتعشون و ياه

ام سالم: سالم وين رحت
سالم: رحت اغازل
ام سالم عنلاتك من ولد شو تغازل بعد
زايد: ههههههههههههه عيب ياريال لا تمس جذا جدام البنات
ساروه: هيه صح لا ترمس جذا مب زين
زايد: قلتلج رمسى
ساروه: لا
زايد: عيل
ساروه: زايد
زايد: هلا
ساروه: و لله انك تقهربى
زايد: هههههههههههه مشكلتج
ام زايد: بعد شو يقهربج بعد
ساروه: الحمدلله يار بان اخوى طلع حلو مب نذل
عبدالله : ههههههههههههههههههههههههههههههه حلوه منج سارووه
زايد: لا و لله مب نذل بعد
نوره: شفت اختك شوقالت عنك
زايد((يطالعها باستغراب)): انتى اشلج فى اختى
انصدمت نوره من رده فعل زايد و قررت تسكت لا ايها كلام اكثر ..ومن بعدها لا رمست و لا قالت حتى كلمه كل البنات كانن يطالعن زايد لانه احلى واحد فى العايله ..الا موزه للى كانت تحب عبدالله من كانوا صغار بس عبدالله ولا على البال ماكان يفكر فيها الفرق كان بينهم بس اربعين يوم ..فى هالوقت دخلت حمده بنت خالهم مع امها و خواتها شوق و مريم ..
حمده: السلام عليكم
ام ناصر: السلام عليكم
الكل: و عليكم السلام و الرحمه
ام زايد: شحالج يا ام ناصر عيل وينه ناصر و خليفه
ام ناصر: الحين بيدخلون ماشاء لله عليكن يا بنات كل و حده احلى عن الثانيه
ام سالم: لله يخليهن يارب و نشوفهن معرسات
ام زايد: ان شاء لله
زايد: ان شاء لله بيعرسن و بنشوف عيالهن بعد
ام خالد: و انته يازايد ماتريد تعرس
زايد: مستحيل
الكل انصدم شو مستحيل ...زايد مايريد يعرس و فى هالوقت دخل ناصر و خليفه ..ساروه كان فخاطرها اتشوف خليفه اخر مره شافته كان عمره سبع سنوات ويوم دخل رفعت راسها شافت واحد طويل و عيونه عسليه وكان لابس كندوره كركميه رووعه وريحه العود انتشرت فى المكان التفت خليفه على ام زايد بعد ماسلم
خليفه: شحالج عموووووووووووووووووووووووووووووه
ام زايد: اشفيك تصرخ
خليفه : احبج و لله تصدقين عاااد من متى ما شفتج
ام زايد: تندله البيت و الا ارسمه لك
زايد: وين تعرفين ترمسين امااايه
ام خالد: خلها تحاول ياولدى
خليفه: عموووه اشتقتلج ((شاف ساره باستغراب)) انتى منو
ساره انقبض قلبها من شافها و سالها معقوله تذكر كل البنات الا انا ياربى شوفينى سارووه بس ركزى نزلت سارووه راسها ماقدرت اتجاوب
فهد: وابوى عليك هذى اختى ساروه
خليفه((فتح عيونه)): سوووويره
ناصر: ماشاء لله عليج عروس
ساروه: تسلم و لله ناصر ((تلتفت على خليفه)) احسن عن بعض الناس
وقف خليفه من مكانه ساير صوب سارووه : تذكرين اخر كلمه قلتها لج
ساروه: شو
خليفه: شفتى منو للى فيه الخير
ساروه: يالله قول عااااد
ام زايد: مايتغيرون هالاثنين
عبدالله: امااايه انا يوعان
ام زايد: عنبوك توك ماكل
زايد: بير ماشاء لله
حمده: شحالكم ((واطالع زايد))
زايد: اقول شباب خلونا انسير الميلس عن الحريم
نوره: ليش
فهد: اجسن و لله علشان نرتاح
سالم: امايه يالله برايج
ام سالم : برااايكم
بعد ماطلعوا الشباب من الصاله ساروا الميلس وقعدوا يسولفون وطلب ناصر من زايد يغتى حتى لو مقطع واحد وقعدوا يحاولون فيه بس ماشى فايده .
زايد: شو عنز قالولكم اطرب
سالم: ورفجه بس مقطع انزين
خليفه: مقطع واحد يالظالم
فهد: زايد يالله عااااد
زايد: عبدالله
عبدالله: هااا شو
زايد: انته غن عنى
عبدالله : لو امووت يالله غن انزين
زايد: يالله امرى لله ((اوعدنى عنى ما تغيب تبقى هنا جنبى قريب ..محتاج انا مثلك حبيب تفهم عيونى و ضحكتى ..فيك انته حلمى من زمان و انته الهو و ادفى حنان تلقى معاى روحى و الامان نحن بشر فى دنيتى .))
سالم: رووووووووعه و لله
زايد: تسلم و لله
فهد: فى منو الاغنيه
زايد: سير لالالاه حد قالك انى خبله احب بنيه
ناصر: خيبه اشفيك على البنات
زايد: مافينى شى بس انا ما اريد حد
خليفه: انته عكس للى عدالك
زايد: منووووه
عبدالله: منو بعد سالم الهاملى
سالم: بتتعذرون عنى بعدين
زايد: يا اخو ياسالم مب زين للى تسويه فى بنات الناس و انا اخوك شو بتستفيد جان انته و الا خليفه للى طايح فى المول
خليفه: ماشى شغله شو نسوى بعد ..بس البنات يازايد هن للى يسون حركات
عبدالله : صح انا اصغركم ((يطالع اخوه زايد)) تسمحلى اخوى انى ارمس
زايد: هيه نعم
فهد: يالله قول ياعبدالله
عبدالله: صح انى اصغركم بس عمرى انا الحين 20 سنه يعنى فاهم كل شى صدقونى للى تسونه غلط و انا ما اوجه رمستى هذى حق سالم بس حقكم كلكم و لله ..
زايد: صدقت يا اخوى ها سالم شو الراى
سالم: ما اعرف شو اقولكم
زايد: شورايك اندير مشاريع اهلنا ابرك من سوالف البنات و هالخرابيط
ناصر: بخاويك ياولد عمتى
زايد: بارك لله فيك و الباقى
سالم: بخاويكم انا بعد
الكل ابتسم لانهم اتفقوا ولاول مره على شى بتستفيد منه العايله على الساعه خمس العصر بعد اذان العصر اجتمعوا شباب و بنات عدال يدهم بو محمد ..يدهم عنده بنتين ثلاث اولاد ((ام زايد و ام سالم .....محمد وسعيد وحمد)) ام سالم عندها سالم و ميره و نوره وموزه و الصغير هزاع للى عمره 6 سنوات .....محمد عنده خالد ناصر وخليفه و حمده.... وسعيد بعده ماعرس لانه اخر العنقود ويدرس قى بريطانيا ..............وعلى العصر الكل يبحلق فى الثانى يوم وصل بومحمد الكل وقف احتراما لهيبته للى معروف عنه بقوه شخصيته بس حنون و قلبه طيب ماشى اطيب عنه ..
بومحمد: شحالكم يا عيالى
الكل: الحمدلله
محمد: اقوول ابوويه سعيد ما اتصل فيك
بومحمد: لا و لله ياولدى
زايد: كم رقم خالى انا بتصل فيه
بومحمد: و لله ما اعرف ياولدى و شخبار عمومتك
زايد: الحمدلله بخير يسرك حالهم يدى
بومحمد: محمد متى معزمين تيوزيون خالد
محمد: و لله ما ادرى ياابووويه
بومحمد: هوه وينه خالد
سالم: اكيد فى الشغل
محمد: هيه صح اليوم اتصل يستسمح منك يا ابويه ويقولك انه باى على المغرب
بومحمد: لله يوفقه
الا و اشوووى دخل خالد للى بشابه يده يوم كان شباب فى قوه الشخصيه و الطيبه بس خالد فى شى انه واايد يحب يسولف وينكت بس ميره من شافته انتفضت بالقو لان هذا الشخص تحبه بكل جوارحها تحب الارض للى يمشى عليها يوم شافته حطت ايدها على قلبه ..خالد انتبه لها و علشان ما يستوى مشاكل ما عطاها ويه و سلم على يده و قعد عداله
بومحمد: شحالك ياولدى
خالد: تمام الشيبه
بومحمد: عنلاتك شيبه شو
خالد: هههههههههههههههههه شو اسولف ((التفت على زايد)) هلا بوسلطان شحالك
زايد: و لله تمااام
خالد: ماشاء لله المعزبى الناس كلها تطرى مشروعك للى بتسويه فى العين
زايد: لا و لله و صلك الخبر
ام زايد: اى مشروع
فهد: اماايه عن للقافه ههههههههههههههههههههه
ام زايد: بس يالله
بومحمد: شو من المشاريع
زايد: مشروع تجارى بسوى مووول
محمد: واايد يباله يا زايد
خالد: تبانى اساعدك حاضرين
زايد: مشكور و لله يا خالد
محمد: خالد
حالد: نعم ابوويه
محمد: ها مب معزم تعرس
خالد: ابوويه ما اريد
امنه((حرمه خالد)): ياربى من هالولد كم عمرك الحين
خالد: 24 سنه يعنى صغير
ام سالم: شو صغيره لازم تعرس علشان نفرح فى عيالك
خالد: شو تبون فينى هذوه زايد والا سالم و الا فهووود و عبوود و نصور و خلووف يوزوهم
زايد: انا مابا
سارووه: ليش ههههههههههههههههههههه
بومحمد: سارووه اشعنه ليش بعد
ساروه: يدى انا اعرف ليش زايد مايريد يعرس
زايد: رمسى ليش
سارووه: لانه مايقدر يفارق حبيبه قلبه
من سمعت نوره و حمده الرمسه هذى انصدمن و التفتن على زايد للى قعد يغايض ساروه: هيه حبيبه قلبى و حبيبه عمرى و حياتى وروحى
حمده: منووو
زايد((باستغراب)): امااايه ليش ..؟؟
حمده: لا ماشى
ناصر: حووه اشفيج
محمد: هابويه وين
بومحمد: ماشى بسير عند ريال بتخاوينى
محمد: هيه ان شاء لله
ام زايد: نحن الحريم بنسير عند يارتنا ام احمد
سارووه: امايه لا تتاخرين
ام زايد: وابوى انا على البنات

طلعن الحريم صوب بيت ام احمد وقعدوا الشباب و البنات فى الصاله عااد كيف بيفتكون من صدعه خالد للى مابيخلى شى فى البنات الا و خلى كل وحده يا اتصيح يا تزعل ...
خالد: ياربى كم راسى يعورنى
حمده: كل بندول انزين
زايد: مايريد بندول
فهد: عندى فكره شباب شو رايكم باجر انسير العزبه
عبدالله : هيه و لله
ناصر: فكره و لله بس البنات بيسيرن
خليفه: لا بنربطهن فى الزريبه
ساروه: شو قاعده على راسك
خليفه: انتى بنت مب بنات
ساروه: لا قاعدين على راسك
خليفه: هيه شو بتسوين
ساروه: لا و لله ماتدرى
خالد: اييييييييييييييه بس جب انتوا الاثنين
ساروه: ما بسكت
خليفه: لا تستكتين ((يطالعها بنظرات تحدى))

ماقدر ساروه تستحمل جدام نظراته لان خليفه بنظره وحده كان يعق طيرها من سماها بسره حطت ايدها على عيونها: بتشوف
خليفه((يضحك)): شو بتسوووين
زايد: هههههههههههههههههههههه خلوف خلها بتصيح
خالد: لا و لله عاد انا ابشوفها تصيح
ميره: حرام عليكم
خالد((يطالع ميره و يبتسم)): ليش
مير((مستحيه)): بس لانها اصغركم
خليفه: يالله سارووه
سارووه: شو يعنى تتحسبنى اخاف منك
خليفه: هههههههههههههه تضحكينى ساروه تراج
فهد: شو رايكم احط لكم فلم احسن عن الضرابه ((يغلس بهم ))
ناصر: لا يبوك للى جدامنا فلم هندى بعد شو تبا
عبدالله: هيه و لله تعالوا انطالع الاحداث
خليفه: هاساروووه ((رن تلفونه))

ليوم للى اتجمعوا فيه علشان يسيرون صوب العزبه فى رماح ....وفى الطريق عااااد البنات مسويات صدعه للى تريد تركب مع خالد و للى تريد زايد و الكل يضحك عليهم ..اول ماوصلوا العزبه ....الشباب نزلوا الحريم و بومحمد كالعاده قعد فى مكانه المفضل ...
عاد خليفه تراهن وياسالم منو بيسوق الدراجه اسرع و طلبوا من زايد وخالد يراقبونهم بالنسيان ..وباقى الشباب قاعدين عدال بومحمد و الحريم و البنات ... بدوا يتسابقون وكل واحد مطير عن الثانى الا و اشوى ما انتبه خليفه حق الحصى للى كان واايد كبير و سارووه يوم شافته وقفت و حطت ايدها على قلبها ..بس خليفه ماقدر يتحكم بالدراجه و انجلبت و طاح خليفه على العرقوب ..ناصر ركض حق اخوووه و امه وقفت اتشوف بومحمد طمنهم انه بيكون بخير و هو قاعد يرمس شاف حد يركض تحسبه فهد و الا عبدالله بس كان للى يركض سارووه ..كانت تركض بسرعه و طاحت شيلتها و شعرها طار فى الهوا و هيه تركض باقوى ماعندها و قلبها يدق يريد يعرف شوصار فى خليفه ....خالد انبهر وزايد نفس الشى ..يوم وصلت مسكوها علشان ما تنزل بس كانت اقوى ..نزلت بسرعه صوب خليفه للى كان طايح يوم تقربت منه : خليفه قووووم يالله قووم انا اسفه ثانى مره مابغايضك
خليفه((يفتح عيونه)):سارووه
ساروه: هيه سارووه قوم يالله
خليفه: ما اروم اقوم
سارووه: قوووم عااااد ((وتصيح بصوت عالى وحطت ايدها على ويها))
خليفع قعد يطالعها اول مره يشوفها حلوه جذيه ..قعدت اتصيح الا وهو قاعد عدالها يوم لفت شافته : خليفه انته بخير
خليفه: هيه بخير
زايد: لا و لله
ساروه: غبى خوفتنى
خليفه((يرفع حواجبه ويضحك)): لا و لله ان شاء لله دوم
خالد: يالله قوم الوالده خايفه عليك
خليفه: ان شاء لله

الكل كان خايف عليه ووصلوا عند بومحمد ..
محمد: ها خليفه
خليفه: لا تحاتى انا بخير
ناصر: كله تمثيل هههههههههههههههههههههههه
عبدالله: المنافس الاول حق عادل امام
زايد: ليته عادل امام الا طارق العلى ..
قعدوا يضحكون و ما انتبهوا الشباب انهم رجعوا بدون سارووه ..خليفه قعد يلتفت وينها هذى راحت شاف صوب البنات ماشاف حد..
خليفه: وين ساروه
الا و اشوى ساروه وصلت ..وقعدت صوب امها وحطت راسها على جتف موزه

موزه: شوفيج حبيبتى
ساروه: ماشى و لله ((تحاول تبتسم ))
موزه: اكيد
ساروه: هيه قومى بسير اغسل ايدى
موزه: يالله
سارن علشان يغسلن ايدهن وموزه تعرف شو فيها ساروه بس ما تقدر ترمس علشان ماتجرحها
موزه: خلينا نتمشى
ساروه: و لله فكره
قعدن يتمشن الا و اشوووى لمحه ساروه خليفه قاعد بس هذا شو يسوى يرمس عمره شو خبله تقربت ساروه منه و سمعت كلام طاح على راسها ماقدرت تسوى شى الا انها تسمه بس كان خليفه يرمس ربيعته لطيفه للى يحبها وووعدها انه يخطبها هذا الشهر
خليفه: حبيبتى و لله بعطيج للى تبينه
لطيفه:استحى وياراسك
خليفه: هههههههههههه تستحين من شو من ريلج وياهالويه
لطيفه: احلى عن اى بنت عرفتها
خليفه: انزين ((التفت شاف ساروه ورد على التلفون)) اكلمك بعدين
لطيفه: ليش منو عندك شو مواعد
خليفه: لا بنت عمتى اهنيه
لطيفه: ليش شو تبا هذى بعد لا و لله هاللى ناقص يالله اختار انا او هيه
خليفه : شوفيك يا ولد الناس
لطيفه: انزين شو تبا فيها
خليفه: اكلمك بعدين
لطيفه: اكيد
خليفه: اكيد
بعد ماسكر خليفه تقرب من ساروه للى كانت منصدمه من للى سمعته بس قعدت اطالعه بنظرات و نزلت راسها
خليفه: تعالى ساروووه انتى و موزوه
ساروه:...............................
موزه((تسحب ساروه)): تعالى نقعد

بعد ماقعدوا .............
خليفه: ببشركم
ساروه: بشو
خليفه: انا بخطب
موزه((حطت ايدها على ثمها)): لا و لله
خليفه: هههههههههههههههههه بلاج هيه و لله
ساروه: منو
خليفه: ربيعه حمدووه اختى و الحين بسير ابشرها يالله خلونا انسير انا انحرقت
ساروه((بعدها قاعده)): انا بقعد اشوى وبلحقكم
موزه: خلاص بقعد وياج
خليفه: براحتج يالله يا سنوايت سى يو

بعد ماسار خليفه و ابتعد اشوى صوب اهله التفت ساروه صوب موزه و حظنتها و هيه تصيح حرام انا احبه موزه و لله احبه حراام
موزه: ادرى
ساروه: حرام و لله شو هالانسان
وبالصدفه سمعها ناصر و ابتسم بس مايقدر يغير للى يباه خليفه حتى لو على قطع ارقاب فيها .. مشى ناصر وهو يفكر فى ساره للى تحب خليفه بس ليش هذا الحب ماظهر الا الحين ..سار صوب يده وابووه وشافهم يضحكون على زايد للى طفر بنوره للى انقهرت وسارت
زايد: ههههههههههههههههههه هبله و لله
سالم: مب جانك اتسب اختى ههههههههههههههههههههههههههه
خالد: طااااااااااااااااف ههههههههههههههههه
خليفه: حوووووووووووووووووه ابشركم
ام خالد: يالله ياربى من هالتبشيرات ارمس
خليفه: انا بخطب
بومحمد: بس انته صغير ياولدى
خليفه: اريدكم تشوفون عيالى
خالد: شو يعنى
خليفه: مب قصدى شى بس انا اريد اخطب
ام زايد: منو ناوى تخطب
خليفه: انتى يا مي يونيفرسال
امزايد: بهالفنيال شو فيكس بعد
خليفه: هههههههههههههه ماقلت فيكس
ام سالم: بلاج ياحرمه ميس مال الشعر
زايد: هههههههههههههههههههههههههههه كملت و لله امى فيكس و خالوه ميس اووين
خالد: يدى بطنى يعورنى
محمد: بس عااد ههههههههههههههه
بومحمد: وابوى عليك انته بروحك يبالك غسال
حمده: شو فيكم تضحكون على عماتى
ام زايد: فديتج ياربى
حمده: يعنى ملكه جمال العالم
ميره: هيه خالووه يعنى جذا قصده خليفه
ام خالد: وين ساره و موزه يابنات
ميره: هذن يتمشن بيان الحين مع صدعتهن
الا و اشوى وصلت ساروه وموزه و ناصر رفع راسه وشاف عيونها منتفخات ..ونزلت ساروه راسها
خليفه: خلونى اقول عااد
بومحمد: قول ياكثر ما تقول
خليفه: اريد اخطب بنت سعيد بن سالم
محمد: و لله ناس و عرب
خليفه: متى
((سمعوا صوت حد يصيح ))
ام زايد: شوفيج ساروووه
سارووه:...................................((تصيح على جتف امها))
بومحمد((خايف)): بنتى اشفيج تعالى اهنيه صوبى
ساروووه:.............................((تصيح و منزله راسها))
ام زايد: ماعليه ابوويه بتسكت
سكتت سارووه و هيه تتالم من داخل و تتعذب و خليفه يطعنها فى الثانيه مليون مره ويجرحها بكلامه ...
خليفه: يا سلام يعنى بخطب بعد اسبوع
بومحمد: ان شاء لله
زايد: مبرووك
خليفه: لله يبارك فيك
نوره: مبروووك خليفه عقبال ماانشوف عيالك
خليفه: لله يبارك فيج ((يلتفت على اخته للى اطالع ساروه)) حمدوووووه
حمده: شوووو
ناصر: فى حياتى ماشفت ادفش عن اختى ..
حمده: لا و لله
زايد: اتحمل عاااد ههههههههههههههههههههههههههه
خليفه: ساروه يالله غنى
ساروه:............................................ ....
ام خالد: يابنتى اشفيج
ساروه:.......................................
بومحمد: سويره اشفيج غناتى
ساروه: مافينى شى يدى
بوخالد: لا شكلج مب عايبنى اصلا ..
ساروه: خالووه و لله مافينى شى

بكمل لكم القصه المره اليايه اذا لقيت أقبال على القصه

والسمووووووووحه [/size][/size]
__DEFINE_LIKE_SHARE__

مزيون دبي · 01-12-2008, 02:15 AM

افا وين الردود __DEFINE_LIKE_SHARE__

.:.الهواويه.:. · 01-12-2008, 03:40 AM

تســـلمين ع القصه ونتريا التكمله __DEFINE_LIKE_SHARE__

مزيون دبي · 01-12-2008, 07:31 PM

تسلمين ع المرور __DEFINE_LIKE_SHARE__

Some One · 01-12-2008, 10:03 PM

تسلمييين ع القصه ونتريا التكمله^^ __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
ببقى احبك لين قلبك لي يبوحِ(ي)وابقى احبك دوم وفي بالي طيوفك	porshcia	عدسة الاعضاء , كاميرا الاعضاء	10	06-05-2010 06:00 PM
احبك احبك احبك للوفاااء والله يعلم ( لعشاااا الاستااندر )	مغرم على الاستاندر	سيارات و دراجات	28	11-14-2009 03:00 PM
احبك ... احبك...احبك وبكل حواس الحب ...احبك	m3soolat	الشعر المنقول	8	02-02-2009 04:36 PM
كيف تقول كلمه احبك ب 100 لغه =)	ήoOήY	نادي محروم للغه الانجليزيه	2	04-16-2008 10:25 PM
كيف تقول للحبيب...احبك!!!!!	شاطر شاطر	شعر و خواطر	12	01-09-2008 08:02 PM