¨°o.O (صوب عوشه قلبي اتعلق..انتفظ من شلة الرمشي) O.o°¨

Grshoob Albdoo · 10-31-2008, 11:51 AM

---------------------------------------------------------------------------------
بعد ما وصلوا عوشه ومحمد الفندق كانت الساعه 9 ونص
محمد يلس وحط ايده على خده ويطالع عوشه .. وهي تطالعه متروعه .. شو اقول شو ارمس طول الدرب ساكت ما اعرف شو بلاه ... كيف هالشخص طبعه انا ما ادري ؟!
عوشه تسأل نفسها : ليش يطالعني جييه .. ياربي شو السالفه .. شو قالوله في الغرفه اللي سارلها
محمد : اسمعي انا برقد هني في هاي الحجره وانتي ارقدي هناك اوكي لا تصدعيني
عوشه منصدمه ومب عارفه شو تقول تمت ساكته
محمد شل شنطته وحطها في الحجره الثانيه .. وصك الباب ورد طلع
محمد : يالله قومي لبسي انا ابا اتعشى يوعان
عوشه والدموع في عيونها : وانا مب يوعانه
محمد بعصبيه : غصبن عنج بتاكلين
عوشه : ان شاء الله
محمد : تم يالس يتريا عوشه بثيابه وهي دشت سبحت ولبست وهي متضاايقه من اللي يسويه فيها محمد
عوشه : لا إله الا انت سبحانك اني كنت من الظالمين .. ياربي تخلي قلبه شويه رهيف عليه ..
طلعت عوشه وما حصلت محمد ويتها زيغه : وين سار سارت تدوره في الحجره
حصلت محمد طايح على الشبريه وفي ايده ابره
عوشه ياها خبال يوم شافته جييه : وتصرخ محممممممممد وتربع صوبه .. يودته من راسه .. محمد شو فيك محمد
محمد كان تحت تأثير الابره .. يفتح عيونه بصعوبه ويرد يسكرها ..
عوشه ميوده ايده وتصيح شو فييك خبرني شو ياك قولي .. حست بأنه ايده بااارده شلت الابره وعقتها تحت ولحفته باللحاف .. شويه وغفل محمد ..
عوشه تمت تصيح صياح تتحرى محمد فيه مرض ومخبي عليها ..
عوشه نشت تطالع الابره اللي ظاربنها في ينبه ..
وتذكرت انه ابوها ياخذ ابر سكر بس مب نفس الابره اللي في ايدها ..
عوشه وهي لابسه ثيابها : شو فيييييييه ياربي شو داس عني وتمت تصييح .. شلت الابره وعقتها في الزباله .. وبطلت ثيابها .. ويلست حذاله .. تطالعه وتمت تقرا عليه وتمسح على راسه .. تمت تطالع ويهه ..
اتصل في حد ؟ لا لا بيخافون
شويه وتبا تحط ايدها على صدره تبا تشوف قلبه؟
قربت ايدها بشوي شوي شافت قلبه ينبض بنبض طبيعي ..
وراقد كأنه مرتاح .
اتنهدت ومسحت عيونها .. ياربي تعافيه .. وتهدييه لي يارب
-----------------------------------------------------------------------------
وفي المستشفى كانت الساعه 1فليل الكل تعبان وخليفه في العنايه
سيف : والله والرفجه لأسير وياه واخاويه لين يرد صاحي
ام خليفه تصيح : متلومه فيكم وما اعرف شو اقول ..
سيف: والله ما تقولين شي هذا خويه وعضيدي .. وسندي كيف ما اوقف وياه .
ام خليفه وهي تصيح : بارك الله فيكم بارك الله فيكم
سيف : من باجر الصبح ان شاء الله بطلع التقرير من المستشفى وبشوف الدكاتره شو يقولون ولا تحاتين انتي يالغاليه
ام خليفه : يعليكم ذخر لنا ياربي
مايد : وانا بعد ما اتركم ان شاء الله وياكم وياكم هذا اخويه سرنا وينا وياه ما بنفارجه ان شاء الله
ام خليفه صاحت : الله يخليكم لبعض ياربي
مايد : بقدرت الرب وبدعواتج يا اميه
ام خليفه : الله يعافيه ويصرف عنه كل عوق ياربي ..
سيف : الحين لازم تسيرون ترتاحون شويه عشان الصبح بعد ني نتطمن عليه
ام خليفه : وين ارتاح وين قلبي بيه الراحه وهو طايح هنيه وصاحت
سيف : لا تقولين جيه يا اميه ربج بيفرجها
سيف يقول حق اخت خليفه : اختي يوم بتسيرين البيت عطيها عصير برتقال يمكن ترتاح شويه
شمسه : ان شاء الله
مايد : يالله نسير
-----------------------------------------------------------------------------------------------------
عوشه كانت تنبش في ثياب محمد وتطالع وين محطي هالابر يمكن تحصل ورقه ولا شي خاص بهالدوى اللي خذه
نبشت وما حصلت شي ..
يمكن حاطنهن في شنطته الصغيره
تمت تدور وحصلتهن في سدت الكبت مفتوحه .. شهقت يوم شافتها ..
كيس شفاف فيه ابرتين.. والكيس الثاني صغيييير فيه
عوشه تشهق شو هاااااااا تمت ترتجف .. ؟ مخدرااااااااات ؟
عوشه عقت عمرها على الارض وتمت تصيح بقو ظربتها نوبه صيااح ..
ومحمد ولا يسمعها .. متخدر
صدت صوبه بغيييض وعيونها كلها متروسه دمووع .. شو تسوي الانسان اللي بتقضي عمرها وياه مدمن مخدرات ..
تمت تصيييح وتصيح .. وصدفه طرى عبالها سيف
عوشه تصييح : وينك يا سييف تي وتشوف شو صارلي وينك يا سيف وينك ..
محمد راقد وما يسمع شي ..
عوشه سارت حجر تها وتمت تفكر شو تسوي بالاكياس اللي شافتهن ؟ ياربي من وين يابهن كيف طاف بهن في المطار شو السالفه
عوشه ركضت صوب حجرت محمد وخذت اكياس المخدرات وتلثمت بشيلتها .. ولبست النظاره وسارت صوب الحمام .. وجبت المخدرات في البالوعه ويرت عليهم السيفون .. وعقت الاكياس في الزباله .. والابر كسرت القواطي وعقتهن في الزباله
عوشه تبا تصييح وتخلص دموعها شو هالريال اللي ابتلشت فيه .. معقوله بو محمد كان يبا يفتك من ولده وشافني انا ويوزني اياه معقول .. شو اقول حق ابويه الحين شو اقول حق خالد وامي وسالم وبنت خالي فطوم ؟ شو اقول حق ربيعي اللي يو يباركولي .. معقول يا محمد ..
تمت تتذكر كيف قدر محمد يطوف هالشي في المطار كيف ؟
تتذكرت انه هو خلاها عند الرسبشن ودخل حجره في الفندق وكان يقولها انه بيخلص الاوراق ..
عوشه : والله اني غبيه وما عندي حاسيه .. أي اوراق هذي اللي يخلصها غبيه والله اني غبيه تمت تصيح لين رقدت على الغنفه في الصاله
-----------------------------------------------------------------------------
والصبح في البلاد ...
سيف ومايد ساروا عند الدكاتره وتطمنوا على حالة خليفه وخبروهم انه الصبح الساعه 6 استقرت حالته وطلعوه من العنايه المركزه
مايد : الحمد لله لك يارب ..
سيف : الحمد لله ... يالله تعافيه وتصرف عنه ما يانس ..
مايد : آمين
سيف : أبا همتك الحين يا الغالي أباك تكون ليه عون في سيرتنا
مايد : والله يا الغالي انا حاظر والسيره ما تسوى رمستك هذا خليفه الغالي ..
سيف : لين الحين يتخيل لي كيف طاح ياربي موقف صعب الصراحه
مايد : لا تطريه وتفاول بالخير
سيف : الله يعافيه ياربي ..
مايد : سيف ما اعتقد امه تقدر تسير لانها منهاره بشكل فضيع ..
سيف : لا الا نوديها يمكن خليفه يشوفها ويهدى شويه ..
مايد : ورضيعته ؟
سيف : والله ما ادري انا اقدر اوديهم على حسابي ما عندي أي مشكله
مايد : فيك الخير يا الغالي
سيف : الحين يالله نسير صوبه
مايد : يالله
مشوا وساروا صوبه وحصلوا ام خليفه واصله ويا بنتها ..
اول ما دشوا عليه كان الدكتور عنده
خليفه كان صاد الصوب الثاني .. والدكتور يشخص حالته
الكل دش سيف كان يطالع خليفه كانه ما شافه من سنيين .. نقزت عليه امه واخته وتموا حاظنينه ويصيحون
خليفه : كلامه كان خفيف وما ينسمع اميه
ام خليفه : عيون امك روحها
سيف ما قدر يتمالك نفسه دمعت عيونه
خليفه قالها بصعوبه : شحالج
ام خليفه تصييييح وهي حاظنتنه : حالي انا لا تنشد عنه حالي هو حالك يالغالي شحالك شو يعورك يعله فيني ولا فييك
خليفه : لا تقوليج جيه ..
خليفه كان يطالع سيف ومايد ونش من حظن امه وساروا سيف ومايد صوبه .. سيف قلبه كان متقطع على حال خليفه ... ويهه طبيعي بس علامات المرض مبينه عليه ..
خليفه حظن سيف ويقولها بعصوبه : ادري انك عتبان عليه
سيف : لا تقول جيه يالغالي
مايد حب يكسر الجو الحزين ..: بخيييييير ما شاء الله عليييييك ما فيك شي هاه لا تتدلع علينا عاد
خليفه ابتسم وكان يحب مايد بأسلوبه الفكاهي هذا : تعال خلني احظنك
مايد حس بغبنه وسار صوب خليفه وحظنه
خليفه وهو متحاظن ويا مايد : هاي آخر مره اسوق فيها درجات وياكم
مايد حس بقلبه يتقطع والكل كذالك
مايد وقف
خليفه وهو مبتسم ابتسامة مرض : الدكتور ما قصر قالي عن حالتي بالتفصيل وانا راضي ولله الحمد

مايد ما عرف شو يقول وام خليفه زادت في صياحها
خليفه صد صوب امه : امايه .. انا جدامج بعدني اتكلم وقلبي يدق ..احمدي ربج الكريم .. اني غديت بخير
سيف يطالعه ويقول في خاطره ما شاء الله عليك الله يثبتك ويعاطيك على قد نيتك ياربي
خليفه يتنهد : ما فيني شي انا اليوم بظهر
سيف : لالالا شو هالكلالام
خليفه صد صوب سيف : وشو فايدة اليلسه هنيه الحمد لله انا اتكلم وبخير .
سيف : بيعطونك علاجك بيحاولون يسولك علاج طبيعي
خليفه : وليش العلاج الطبيعي .. ايدي مكسوره والجبس فيها بعد شو له العلاج
مايد : استغفر ربك يا خليفه هاذا امره .. وقال ربك اسعى يا عبدي بسعى معاك .. وانته المفروض تعالج لجل صحتك مب لجل شي ثاني ..
سيف عصب : توك راضي بقسمته وفي دقيقه ضعف ايمانك شو فيك يا خليفه .. شو فييك

خليفه ساكت ..
شمسه يت ويلست عدال اخوها ..وتصيح : خليفه ما نبا الا صحتك يا خويه لا تكون عنيد بيعالجونك وبتغدي بخير يا خويه
خليفه يود ايد اخته .. : ان شاء الله يالغاليه ان شاء الله بس ما اباج تصيحين
شمسه تمش دموعها من تحت الغشوه : ان شاء الله
مايد : نحن لازم نسير صوب الوزاره
خليفه : أي وزاره ؟
مايد : بعدين بتعرف
خليفه : مايد خبرني ..
سيف : يالله نستسنح منك الحين
خليفه : خبروني أي وزاره ؟
سيف : فمان الله
ظهروا سيف ومايد وساروا صوب الدكاتره عشان يشوفون شو بيسون في سالفة خليفه
----------------------------------------------------------------------------------------- __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
تدوير شاشة 5530 فى وضع أفقى بدلا من الرأسى	محروم.كوم	منتدى أخبار المواقع والمنتديات العربية والأجنبية	0	04-30-2010 11:10 AM
ياربى شو هالصورة اذا قدرت اتعلق على الصوره علق	محروم.كوم	منتدى أخبار المواقع والمنتديات العربية والأجنبية	0	04-20-2010 01:30 AM
ياربى شو هالصورة اذا قدرت اتعلق على الصوره علق	محروم.كوم	منتدى أخبار المواقع والمنتديات العربية والأجنبية	0	04-19-2010 11:40 PM
ياربى شو هالصورة اذا قدرت اتعلق على الصوره علق	محروم.كوم	منتدى أخبار المواقع والمنتديات العربية والأجنبية	0	04-19-2010 11:30 PM
يا اخواني لا اعرف كيف اغير الصورة الرمزي لصورة من عندي م لكمبيوتر	محروم.كوم	منتدى أخبار المواقع والمنتديات العربية والأجنبية	0	06-15-2009 09:40 AM