| ||||||
| قصص و روايات تهتم بالقصص المنقوله وقصص الاعضاء الطويلة والقصيرة |
 |
| | LinkBack | أدوات الموضوع | انواع عرض الموضوع |
|
#1
08-15-2008, 03:27 AM
| |||
| |||
| السلام عليكم  حبيت انزللكم اليوم قصه بس مش انا كاتبتنها هي واصلتنيه من ربيعته وانا قريتها و عيبتنيه و حبيت انزللكم اياها .. ((.. الدنيا يا خلي مدرسه .. وسنين عمرنا حصص الالم منهج ندرسه .. والفرح فيها فرص ..)) الجزء الأول ** آه يا دنيا ضعنا في دربك وتهنا والقدر محتوم ومن غدرك شربنا ** فتحت عيني وركزت نظري للسقف أفكر... كل اللي صار قاعد يمر جدامي ... فلم كامل للشهراللي طاف... خلاص هذا آخر يوم لي في هالبيت بطلع منه وهالشي مب بكيفي هذا المقدر والمكتوب لي اني أعيشه في هالدنيا.... قمت ودخلت الحمام شفت شكلي في المرايه بصراحه عيوني خلاص صارن كور سود من كثر اليصاح أحس نفسيتي زفت.... طلعت من الحمام وطلعت من حجرتي بكبرها مشيت في الممر وأحاول قد ما أقدر ما ألف صوب الغرفه.... طلعت من الممر ودخلت الصاله كل شي على حاله ما تغير شي.... وقفت فتره أتأمل المكان شفت الريوق مكانه والمسجل يشتغل أحمد العجمي يقرا قرآن البيت نظيف ومرتب كل شي حسب ما تعودت أشوفه يوم أنش الصبح الا شي واحد شي واحد من راح غير مجرى حياتي كلها خلف وراه جرح مستحيل يبرى خلف وراه حياه يديده خايفه منها مجهوله بالنسبه لي بس مجبوره عليها ومالي بد منها هالشي هو وجود الوالده توفت وخلتني في هالدنيا وحيده مالي حد ليتج شليتيني يا أمايه وياج ليتني ما عشت هاليوم ولا شافته عيني ليش خليتيني... ليش؟.... ليش؟ آآآآآآآآآآآآآآآآآآه يا ربي ترحمني يارب بس لو كان هالشي حلم أصحى منه ويردني للواقع للواقع اللي كنت عايشه فيه من قبل ... قطع تفكيري منصور ولد اختي شيخه عمره 15 سنه منصور: خالوه شو فيج العنود: هاااه لا ماشي متى نشيت ؟ منصور: توني .... تعالي بنتريق العنود: لا فديتك ما أشتهي انت تريق منصور: إذا ما ييتي أنا ما بتريق العنود: منصور عندي شغل وايد اتريق انت منصور: خالوه أنا يوعان إذا ماييتي أنا ما باكل شي ابتسمت أدري ما بيخليني الا لين أتريق... منصور غلاته غير وأدري اني أنا غاليه عنده من رديت من المستشفى عقب ما توفت أمايه وهو عندي في البيت ما رد بيتهم ويدتي أم أمايه بعد ما روحت من البيت الا أمس ولا تدري اني بت في البيت بروحي ويا منصور والا بتجلب البيت عليه .... يلسنا نتريق صب لي كوب حليب وعطاني اياه منصور: تعرفين عنادي أتمنى لو تين تسكنين عندنا ما تسيرين بيت خالي حمد العنود: مايصير يا منصور أنا ما برتاح في بيتكم عشان أبوك...وبعدين مب من بعد المدى منصور: حتى بيت خالي حمد بصراحه عموه آمنه نحسه العنود: منصور شو هالرمسه منصور: خلاص ما قلنا شي سكت عني منصور ويلس يتريق .... منصور يستوي ولد اختي وعندي أخت ثانيه اسمها سلامه وأخويه حمد كلهم أخواني لكن من أبويه أنا وحيدة أمايه توفي أبويه من سنتين ومن شهر لحقته أمايه وليتها شلتني وياها..... استغفر الله العظيم ..... أدري ان حرام أقول هالكلام بس شو أسوي صرت وحيده في هالدنيا.... حمد أخويه ما بيقصر ويايه بس ما أدري أحس اني بكون غريبه في بيته حرمة أبويه ما أتوقع اييني شي منها بس المشكله الكبيره في حرمت حمد أحسها ما تستلطفني ما أدري ليش .. تمنيت اني سرت ويا يدوه أمس بس عقب الاجتماع اللي صار بين أخويه حمد وخالي غيث وعمي سالم استقروا اني أتم ويا حمد ... حمد مارضى أعيش في بيت يدوه وخالي خضع لهاشي عقب موت أدري كان يباني أكون وياهم بس حمد مستحيل يغير رايه لأن أبويه وصاه عليه قبل لا يغيب ... وهوه لا خليت منه من عقب ما غاب الوالد ما خلاني أحتاج شي ويتم أي شي في خاطري ... عمي محمد ما علق بيني وبينكم أحسن ... عمي انسان ما همه غير نفسه في هالدنيا وما أشوفه الا من عيد لين عيد وأحياناً تخطف أعياد ما أشوفه ..... قطع تفكيري حمد أخويه كان فاتح باب الصاله حمد: السلام عليكم العنود+ منصور: وعليكم السلام وقفنا سلمنا عليه أنا ومنصور العنود: حياك حمد قرب حمد: جريب فديتج .... رتبتي أغراضج نزلت راسي يلس عدالي ولف ايده على جتوفي من ورا وجربني منه حمد: عنودي غناتي كل انسان هذا مصيره وهالضيج ما أبغي أشوفه على ويهج عشان خاطري هزيت راسي وما قدرت أرمس وخايفه دموعي تطيح حمد: أنا خليتج أمس ويا منصور وتعرفين اني خليتج وأنا مب مقتنع الا عشانج كنتي مضايجه وافقت لج على هالشي العنود: مشكور أخويه حمد: أغراضج كلها رتبيها وطرشيها ويا الدريول وانا بيي عقب ما أطلع من الشركه وبشلج ويايه العنود: انشالله منصور: أنا بساعدها حمد: يا بعدي ولد راشد ريال ما تقصر العنود: حمد.. لامي وسليم وين بيسيرون حمد: سليم بنخليه حق العزبه ولامي بنسفرها رفعت راسي وبنظرة ترجي قلت له العنود: حمد أبغي لامي ما أبغيها تسافر حمد: ليش ؟ العنود: أنا بكون عندكم مستحيل أأمر على البشاكير عشان جيه أبغيها اتم وأنا بدفع لها معاشها رفع حمد عينه بنظره حرقتني حمد: العنود أنا مب عيزان عنج وعن معاش بشكارتج الا خمسميه هن وجانج تبينها بنخليها العنود: اسمحلي حمد ومشكور ما تقصر حمد: أنا قلت حق آمنه تخلي البشكاره تنظف لج الحجره والحجره اللي فاضيه عندنا هيه اللي تحت عدال حجرة أمايه العنود: مشكور حمد يبتسم: يالله أنا بسير تامرين على شي العنود: تسلم فديتك طلع حمد عنا ورديت حجرتي عشان أرتب أغراضي دخلت الحجره ويابت لي لامي الشنط وطلعت عني يلست على الشبريه مب قادره أتحمل وأتخيل اني بطلع من هالبيت بطلع وبخليلي في كل ركن من أركانه ذكرى عشتها ويا أمايه وأبويه الله يرحمهم هالبيت اللي عشت فيه طفولتي وياهم بحلوها وبمرها مجرد التفكير بهالشي يحسسني اني مخنوقه مب قادره أتنفس انسدحت وأنا أفظي اللي بقى في خاطري من دموع والعبرات اللي كتمتها جدام حمد أخويه حطيت المخده على ويهي خايفه لا يدخل منصور في أي وقت بس اللي دخل هو( حمدوه بنت اختي سلامه عمرها 19 وشمسوه بنت اختي شيخه عمرها 19) .. من أول ما طاحت امايه الله يرحمها تعبانه ما خلني شمسوه: عنادي العنود( بصوت مخنوق): هاااا حمدوه: عنودي فديتج لا تصيحين من سمعت هالكلمتين من حمدوه انفجرت فريت المخده وطحت في حظنها أصيح أحاول أغسل صدري من الضيج اللي أحسه خانقني.... من الخوف اللي أعيشه.... أحساس لا يمكن يتخيله الا اللي عايش هالشي.... أحس اني عايشه في مكان بدون أمان ... أحس بالخوف ساكن فيني ... احساس الانسان اللي عايش فب هالدنيا بلا أم وبلا أبو أحساس فضيع يحس الواحد من عقبه انه خلاص حياته مالها قيمه ووجوده مجرد هم ويكون ضيف ثجيل وين مايسير... حمدوه: عنودي فديت روحج بسج من الصياح قطعتي قلبي العنود: حمدوه ليش خلوني؟.. ليش ؟ حمدوه: هذا بأمر ربج حرام عليج اللي تسوينه الا تعذبينهم وتعذبين عمرج وتعذبينا وياج العنود: حمدوه خلاص خلاص ما أقدر أتحمل أحس اني مخنوقه شمسوه: حرام عليج عنودي استغفري ربج وقولي لاحول ولا قوة الا بالله صبر جميل والله المستعان العنود: لا حول ولا قوة إلا بالله حمدوه: قومي غسلي ويهج قومي العنود: قبل ويهي أبغي أغسل الهم اللي في صدري حمدوه: غناتي العنيدي محد فينا عايش في هالدنيا بلا هم العنود: صعب هالاحساس .. صعب والله صعب شمسوه: ندري انه صعب انتي احمدي ربج الله عوضج بأهل طيبين خالي حمد ما يخليج محتايه شي خالج غيث ويدتج محد أطيب عنهم وغلاتج عندهم فوق ما تتخيلين ... انتي لو تشوفين غيرج مثل حالتج بس بلا أهل كل اللي عندهم بلا رحمه العنود: الحمدالله شمسوه: قومي فديتج قومي..نحن لين الحين ما رقدنا لأني أدري إذا رقدنا هالعنز ما بتنش لين العصر العنود: فديتكن ليش تعبتن عماركن انتن من متى ويايه شمسوه: جب يالله لا ترمسين دام هذي رمستج وبعدين نحن هب ياييات عشان سواد عيونج يينا عشان نساعدج في ترتيب الأغراض والا نسيتي انج بتصيرين يارتنا العنود: لا ما نسيت بس أنا من يومي يا رتكم شمسوه: بس الحين غير البيت مجابل ما يباله لفه وسكه عشان نوصل العنود( تفر شمسوه بالمخده): وايد عليج شمسوه: هههه يالله فديتج قومي بدينا نرتب أنا وشميس وحمدوه كل الأغراض حطيت ملابسي كلهن وكل شي أحتاجه صارت الحجره ما فيها شي غير أثاث الحجره خلاص لازم ما أخلي شي في الحجره لأن كل هالأغراض بحتاجها حمدوه: خلصنا الحين من ترتيب الملابس كلها وكل أغراضج شو باقي العنود: بشل الذهب والأوراق من الخزنه حمدوه: وين الخزنه؟ العنود( منزله راسها): في حجرة أمايه الله يرحمها حمدوه: ووين المفتاح؟ العنود: هذوه دخل منصور منصور: عنودي خالج غيث يبغيج العنود: متى وصل؟ منصور: توه يترياج في الصاله العنود: الحين بيي طلع عنا منصور ولفيت عليهن شمسوه: سيري طالعي خالج وأنا بييب لج كل الأغراض اللي في الخزنه العنود: لا برايه بسير أشوفه وبرد الحين شمسوه: لا انتي عطيني المفاتيح وسيري شلت شمسوه المفاتيح وطلعت أدري انها ما تباني أسير حجرة أمايه لأنها متأكده من اللي بيصير لي طلعت من حجرتي سرت الصاله أشوف خالي غيث العنود: السلام عليكم غيث: مرحبا الساع فديييت هالويه شحالج غناتي العنود: الحمدالله بخير غيث: خلاص رتبتي كل أغراضج العنود: هيه خلصت توني غيث: ماشالله سريعه العنود: لا بس حليلهن بنات اختي يساعدني لامي رتبت أغراضي وخليتها تكمل الباقي اللي عليها في المطبخ غيث: اندوج يودي عطاني كيس فيه كرتون ورفعت عيني أطالعه بعين مستغربه منه العنود: شو هذا؟؟ غيث: تيلفون خذت لج اياه اليوم والبطاقه داخل بعد منصور: الله أنا أبغي تيلفون بعد غيث: بعدك ياهل وتصيح التيلفونات العنود: بس أنا ما أحتاج التيلفون غيث: منو قال مب انتي بيبدا دوامج عقب شهر ونص تقريباً وبعدين أمايه ونوروه اختي بيرمسنج وما بنتصل على بيت أخوج فضيحه العنود: مشكور خالي تسلم غيث: أنا بسير الحين عنج تامرين على شي العنود: وين انشالله؟ غيث: حشى... بسير سعيد يترياني ( سعيد اخو شما ربيعتي ربيع غيث الروح بالروح) العنود: لا ماشي دوم انته تسير له خله هوه ايي والا حرم غيث: محد قال حرام بس اتصلي وقلت له بييك العنود: اتصل له وخله ايي عندنا اتريقوا نحن داخل ما بنطلع غيث: لا الشيخه مشكوه على كرمج نحن بنسير نتريق برا العنود: وين بتسيرون؟ غيث: بعدنا ما قررنا منصور: أنا بسير وياكم العنود: انت كمل لعب منصور: لا لا بسير وياهم غيث: يالله هبابنا عيل منصور: خالوه شلي البلي ستيشن وياج العنود: انشالله طلعوا عني منصور وغيث ويلست أرتب البلي ستيشن وحطيتها في كيس ويا الأشرطه وخليتها على طرف أنا انسانه ما أستغني عنها أحب ألعب بها وخصوصا يوم ألعب ويا منصور والا خالي غيث طلعت من الصاله وسرت صوب حجرتي ولفيت لقيت شمسوه بعدها في حجرة أمايه وسرت عندها العنود: خلصتي شمسوه: طلعت كل اللي في الخزنه واللي في الكبت وحطيته في هالصندوق العنود: مشكوره شمسوه سكرت شميس الخزنه من عقب ما فظتها كلها كنا بنطلع من الحجره بس لفيت وشفت صوره أبويه معلقه سرت صوبها وشليتها وطلعت من الحجره قفلتها وخليت المفتاح في الباب دخلت الحجره ويا شمسوه وأنا بعدني لا ويه على صورة أبويه ويلست على الكرسي أحس بحزن كبير يفتفت قلبي من داخل حمدوه: عنادي خالج روح؟ العنود: طلع ويا منصور بيسيرون يتريقون شمسوه: ماشالله ماشالله ما عيبتهم عيشة البيت وهذا منصور مرابع غيث يتحرى عمره ريال العنود: خالي ياب لي تيلفون حمدوه: والله .... وينوه بشوفه شليت الكيس اللي فيه التيلفون طلعت الكرتون والضرف اللي فيه البطاقه وفتحت كرتون التيلفون وحصلت على طرف الكرتون فلوس شليت الفلو س حسيت بالحراج والضيج من هالشي من اليوم بديت أحس نفسي عاله على غيري شليت الفلوس ونزلت راسي وكأنهن حسن باللي فيني حمدوه: عنودي غناتي ما فيها شي إذا خذتي من عند خالج فلوس العنود:أحس اني عاله على غيري شمسوه: احمدي ربج حد يعطيج مالت علينا حنينا على التيلفون بالموت وبالمذله عطونا واحد العنود: المهم وصلكن حمدوه : وبعدين انتي منو قالج انج عاله على غيرج معاش يدي الله يرحمه التقاعدي بيمشي وانتي بنت وحده يعني ثلاث آلاف وخمسميه بيكفنج وزياده وبعدين الباقي من المحلات وبيوت الاجار ما أتوقع ان خالي حمد بياخذ الفلوس عنج من عقب ما يوصلنج قبل وفات أمج العنود: أدري وحمد فديته ما يقصر بس بعد ما أدري أحس اني بتم عاله على غيري شمسوه: وبعدين أنا لقيت فلوس في الكبت وفي الخزنه يوصلن عشرة آلاف انصدمت ما كنت أدري ان أمايه مخليه فلوس في الخزنه أصلاً أنا صار لي فتره طوييييييله ما فتحتها ... جنها كانت حاسه بانها مودعه .... العنود: شميس شو أسوي بهن شمسوه: شو بعد خلي خالي يفتح بهن حساب في البنك العنود: يصير خير كملنا لف الأغراض كلها اتأكدت من كل شي وطرشت أغراضي ويا سليم ولامي بيت حمد وخليت الصندوق اللي فيه الأوراق والفلوس ويايه شمسوه وحمدوه روحن قبل صلاة الظهر وعقبهن بنص ساعه دخل عليه حمد حمد: هاه غناتي خلصتي العنود: هيه خلصت طرشت الأغراض ويا الدريول ولامي ويلست أترياك حمد: يالله ......... **ذوقك حلووذوقك رفيع..ويعجبني الحسن البديع ...ماانته حلو انته فضيييع .. طيييييرت عقلي من حلاك** طلعوا من البيت ولف خليفه صوبي خليفه: تشوفينه أخوج شقايل يظارب العنود: تستاهل عيل تتطنز عليه وهو يخاف عليك خليفه: يوعان قومي سوي لي شي آكله العنود: شو تبغي ؟ خليفه: أي شي العنود: انشالله خليفه: بسرعه باقي ساعه ونص وبيأذن نبغي نسير العزبه عند يدوه العنود: شورايك نسير ونشل الفواله ونيلس عندها بعده وقت عن الأذان خليفه: أنا بيلس ألعب وبترياج بسرعه العنود: انشالله طلعت أحاول أتهرب من الضيج اللي فيني بأي طريقه أحاول أدور أي ش يلهيني عن الحزن اللي انا فيه دخلت المطبخ سويت قهوه وماعرفت شو أسوي أسهل شي البلاليط سويته بسرعه وحطيته في الطبقه ورتبت صحن فواكه وخليت البشكاره توديه السياره وأنا سويت عصير ليمون وصبيته في الدبه وشليتها وطلعت سرت الصاله لقيت خليفه يلعب ومندمج العنود: يالله خلوف خلصت خليفه: يالله هاتي شيلتج وخلينا نطلع العنود: شل هالدبه وأنا بيي دخلت حجرتي وطلعت لي شيله ملونه من شيل الصلاه الصغار تناسب كندورتي وشفت تيلفوني فيه مس كول من بيت شموتي قلت بتصلها يوم برد البيت طلعت من الصاله ومشيت لين السياره خليفه السبال ما ترياني طلع السياره من الكراج وسار لين الباب ومشيت هالمسافه كلهاركبت السياره العود: تعرف انك سباااااااااال خليفه: لا والله غزااااال العنود: عنبوه تخليني أمشي هالدرب كله خليفه: عادي خفي شوي العنود: وانت شعليك طاعمني خليفه: سكتي سكتي الحين اللي يسمعج يقول درام هب جنج تامه مسطره العنود: برايني وصلنا العزبه عقب ربع ساعه وأنا وخليفه ناقر ونقير أعرف ان خليفه يحاول قد ما يقدر يطلعني من اللي أنا فيه وما يقصر ... وقف خليفه السياره عدال عموه كانت يالسه عدال العزبه عقب ما طلعت من الزرب ووياها عموه ظبيه (أم عبدالله، وأم آمنه يعني يدة خليفه)"عبدالله ماخذ اختي شيخه يعني أبو منصور وشمسه وسالم اللي يدرس في أمريكا... وولدها الثاني راشد ماخذ اختي سلامه وعيالهم علي 23 وحصوه 24 وحمدوه 19... و بنتها موزه ماخذنها واحد من أهلهم وعندهم ثلاث بنات عفاري 19 سنه لطيفه 17 سنه وساره ثلاث سنوات وولد واحد... وأصغر واحد من عيال أم عبدالله عمره يمكن 20 اسمه حارب مب معرس بس على اعتقادي انه خاطب" نزلنا من السياره وسرنا صوب العيايز العنود: السلام عليكم أم حمد: وعليكم السلام مرحبا الساع سلمت على عموه ظبيه ويلست عدالها العنود: شحالج عموه أم عبدالله: الحمدالله شحالج بنتي العنود: يسرج الحال ام عبدالله: ماشالله يايين العزبه اليوم خليفه: أبويه وأمايه ساروا دبي وشلوا اخواني قلنا بني العزبه نتفري وغرشوبتنا تغير جو أم حمد: زين ماسويتوا العنيدي من متى ما طلعت من البيت وقفت وسرت صوب السياره و نزلت الفواله ويلست أم عبدالله: ماشالله شو هذا ؟؟ العنود: بلاليط ما مداني أسوي شي... يوم قلنا بني العزبه قلت بسوي أي شي سريع وبني عند عموه أم حمد: ما تقصرين بنتي فتح خليفه الطبقه ومد ايده بياكل وشلت أم عبدالله القب اللي عدالها وظربته خليفه: آآآآآآآآآي شعندج يدوه أم عبدالله: عنبوه بتاكل من الطبقه ما فيك صبر خليفه: يعني منو بياكل غيرنا دامنا رواحنا ومحد بيي بناكل مب لازم نحط في صحون وينغسلن بعدين أم حمد: وانت شعليك بتغسلهن خليفه: حشى حشى ما يسوى علينا حطولنا في صحن أبرك العنود: هههههههه تستاهل خليفه: تضحكين هذي ثاني مره تضحكين عليه بس والله أنا أراويج أم عبدالله: شو بتسوي ثرك خليفه: أنا خليفه ولد حمد أم حمد: حرام ين طاحتها ظربه يتنظرب يا خلوف خليفه: لا لا ما تهون علينا العنيدي نظربها حطيت صحن جدام خليفه وصحن ثاني جدام عموه وقطعت الفواكه وحطيت الصحن جدامهم مبدئياً مرتاحه من عموه ظبيه وعموه أم حمد... يلسنا ناكل بما اني كنت يوعانه كلت بصراحه من الخاطر... يلست أطالع الصحرا والعزب اللي عدالي كانن عزبة أم حمد وعدالها عزبة أم عبدالله أشوف مناظر حولي وأفكر في حياتي اللي تغيرت تغير جذري مب عارفه شو بيكون مصيري سمعت عموه أم عبدالله تزقرني العنود: هاه عموه أم عبدالله: بلاج أمايه؟ العنود: مشي عموه أم حمد: بنتي بلاج مويمه؟ العنود: مافيني شي عموه خليفه: عنودي تعالي برمسج العنود: شو مشى خليفه عني وركب السياره وفهمت من هالحركه انه يبغيني أركب وياه في السياره ... ركبت السياره وسكرت الباب شغل خليفه السياره وتحرك أنا بصراحه كنت أبغيه يتحرك ما أبغي أيلس في هالمكان ... بس عقب دقايق قام خليفه يسرع ويصعد العراقيب بشكل جنوني خفت منه عادي ننجلب في أي وقت العنود( تصارخ): خلوف... خلوف خلوف: أنا أراويج يالسباله العنود: حرام عليك خلوف ردني ردني عند عموه خليفه: مااااشي بأدبج عشان ما تضحكين عليه مره ثانيه العنود: خلاااااااص ما بضحك بس ردني خليفه حرام عليك بصراحه خليفه وايد زودها بحركاته كنت خايف لدرجة اني أحس الموت بين عيوني وخليفه ما مسولي سالفه ايزع وينزل وأنا بموت من الخوف والصريخ ... أحس ان قلب بيطلع العنود( تقبض ايد خليفه): خلوف فدييييييييتك ردني عند عموه خليفه: بعدني ما شفيت غلي منج العنود: خلاص قلت لك ما بضحك دخيلك الشيمه خليفه: هههههههه خلاص رد خليفه صوب عموه بس بعده مسرع واللي قاهرني من هذا كله انه يضحك ضحك فضيع وصلنا ونزلت بسرعه من السياره ويلست عدال عموه وأنا دموعي تهدد انها بتنزل ...أم حمد وأم عبدالله من نزل خليفه هن محتشرات وخليفه يلس على طرف وهو يضحك ضحك هستيري ام عبدالله: ما عليهه يالهرم جرب ان ما كفختك على راسك بهالعيره خليفه: هههههههه يالديايه ياعنيدي أم حمد: عنبوه لو انجلبتوا تتحرا عمرك بتعيش أم عبدالله: حشى طار قلبي العنود: سبال مب منك من اللي يركب وياك أنا شو اللي خلاني أصدقك وأركب وياك خليفه: عطشان من كثر الضحك أم عبدالله: تعال شرب ماي اندوك خليفه: بعدني ما طار عقلي أيي عندكن وانتن متحلفاتلي حارب: شو عندكم؟؟ من سمعت صوت ريال كان توه نازل من سياره ستيشن توني حسيت به من الخوف اللي كان فيني ما حطيت في بالي سياره عندنا والا غيره .. بسرعه تحجبت ولفيت كنت بسير أركب السياره أم حمد: وين تبين العنيدي تعالي أم عبدالله: تعالي هذا الا أخوج حارب حارب: شحالج العنود العنود: الحمدالله بخير ربي يسلمك يلست وأنا قافطه ومنزله راسي ومب قادره أتحرك حارب : هاه خلوف شو مسوي ؟ خليفه: ما سويت شي حارب : وصلت لقيت العيايز يتحرطمن ويقرن تقول حد بيذبحهن خليفه: يالله يالله هذا الا عرض بسيط أم عبدالله : هيه بغيت تجتل عمرك وتجتل عمتك وياك وتقول بسيط حطت عموه ايدها على صدري وقبضت ايدي أم حمد: حسبي الله على عدوك يالسبال جانك طيرتلها حمامة فوادها حارب: زخها زخها خلوف رفعت راسي شفته يطالعني قهرني يستخف دمه السبال لا ويبتسم بعد أم عبدالله: أنا ان ما قلت حق أبوك يشل عنك السياره .... اصبر انته عليه خليفه: لا يدوه دخليج ما فيني أتم بلاها أم حمد: لا لا لا سلامة راسك انت ما بتتأدب الا لين يشلونها عنك ... انت جدامنا هاي سواياك من ورانا شو تسوي خليفه: انتن محد يسوي شي جدامكن .... عنودي عطيني كوب ماي سرت عطيت خليفه كوب الماي ورديت وسحبته من ايده يلسته عدالنا ويلس على طرف بعيد عن أم عبدالله أم عبدالله: وين بتسير يعني امره ما بنساها خليفه( يرمس بصوت خفيف ويلف صوب العنود): الله يستر منج تسوينها أم عبدالله: شعندك تتحرطم خليفه: ماشي أقول حق العنود صبي لي عصير صبيت له كوب عصير وصبيت في باقي الأكواب ووزعهن خليفه ... وصبيت لي كوب ويلست أشرب متلذذه العصير كان بارد أم حمد: برد الله عليج دنيا وآخره العنود: أجمعين انشالله أم عبدالله: ماشالله شو هالعصير الطيب خليفه(يرمس مثل العيايز): ماشالله ماشالله تسلم ايديج بنت سيف عساج عالقوه حارب : بلاك حست لسانك أم حمد: قوموا قوموا بيأذن الحين خلونا نرد البيت قمنا أنا وخليفه وعموه ركبنا في النيسان وحارب وأمه ركبوا سيارتهم وردينا البيت ووصلنا في نفس الوقت ... كان بيت أم عبدالله عدال بيت حمد أخويه يفصل بينهن ايدار مشترك بس ... دخلنا البيت وخليفه طلع سار يصلي مشيت أنا وعموه في الممر اللي يوصل حجرنا دخلت حجرتي توضيت وصليت ويلست أقرا قرآن وعقب شوي دخلت عليه عموه سكرت المصحف و وقفت أم حمد: ماشالله عليج يابنتي برايج كملي قرايه العنود: لا عموه خلصت أم حمد: خليفه وين سار؟ العنود: ما أدري والله يمكن رد وفي حجرته أم حمد: ما لقيته وأنا بسير بيت أم عبدالله وما بخليج اروحج العنود: عادي عموه بسير الحين الصاله أطالع التلفزيون خليفه يمكن سار يصلي وبيرد خليفه( يدخل): انا رديت أم حمد: أنا بسير عند ظبيه لا تطلع عن عمتك خليفه: لا لا ما بطلع برايج سيري بس لا تبطين أم حمد: ألقاك تحاسبني ياولد حمد خليفه: شو أسوي أبويه طلع وخلا عندي بنتين أمانه ولازم أراعيهن أم حمد: هههههههه خليفه: يايهااااا عيبتها العيوز قلنا عنها بنت أم حمد: خلوف اصطلب عني طلعت عنا عموه ويلس خليفه عدالي انتبه للتيلفون خليفه: ماشالله القى تيلفون عندج العنود: اليوم يابلي اياه خالي هدية النجاح وعشان يقدرون يرمسوني في أي وقت خليفه: ماشالله يالله صوريني وحطيها على الشاشه يوم بتسيرين الجامعه لا تغيرينها العنود: بعدك ياهل وهاي رمساتك خليفه: طال عمرج ريال مب ياهل السنه اليايه ثانويه عامه العنود: يالله شد حيلك خليفه: لو شو ما سويت مابييب نسبتج حشى ملقمينج الكتاب العنود: هب هباك الرب خليفه: لا وعلمي بعد العنو د: الله أكبر من عينك خليفه: قومي خلينا نطلع العنود: وين بنسير؟ خليفه: الصاله بنشوف فلم ... والا نطلع نلعب ريشه ورا في الحديقه العنود: لا لا حر خليفه: بسير الدكان بييب لنا شي نتقرض يوعان شي تبيين العنود: انت دوم يوعان؟! خليفه: بما انج بتمين في بيتنا خلاص .. تتحملين يوعي العنود: وليته طالع فيك خليفه: مب أحسن عنج طلعت ويا خليفه دخلت الصاله وخليفه طلع يلست أترياه وقلت بتصل حق شموتي اتولهت عليها وأنا أتصل أدعي ربي ما يرد عليه سعيد أستحي منه بس خاب ظني سعيد: مرحبا العنود: ألو السلام عليكم سعيد: وعليكم السلام ورحمة الله وبركاته العنود: شما موجوده سعيد: لحظه سمعته يزقر شموه وهو يالس عند التيلفون وشموه العنز تصارخ من بعيد بس الصدمه يوم سمعته يقولها عنودج متصله... كيف عرفني؟!! أنا أول مره أتصل من بيت حمد!! دقايق ويتني شموه شما: مرحبا الساع ... شحالج غناتي العنود: غنة الدنيا من حسج قولي آميييين شما: حشى شو عندج تدعين .. هذا يزاتي أرحب بج العنود: أولاً وينج عن التيلفون ملتقعه عنه بغيت أموت يوم رد أخوج عليه ثاني شي شدراه اني أنا العنود سكتت عني شموه وأسمعها ترمس سعيد أخوها وردت ترمسني شما: هههههههه يقولج سعود أونه حفظ صوتج من كثر ما تتصلين بيتنا وإذا خايفه يوم يرد عليج يقولج لا تخافين ما ياكل ولا يهازب العنود: احترق ويهي الله ياخذ عدوج ... خلاص أنا ما بتصل على بيتكم مره ثانيه شما: هههههههههههه ما يسوى عليج تعرفينه أخويه خريش العنود: متى بيطلع لج تيلفون؟؟.... خلاص ما أبغي أتصل على بيتكم شما: خلاص بقوله تقولك العنود طلع لي تيلفون وبيطلع لي العنود: ليش أوزع تصاريح أنا شما:هيه ( سمعت سياره تدخل البيت شكله خليفه رد) العنود: برايج هذا خلوف توه راد بيلس وياه شما: وين الباقي عنج؟ العنود: ساروا دبي شما: وليش ما سرتي ؟ العنود: مالي بارض على الحواطه شموه ... وين أبا عنبوه ( اللي أقصده المده من وفاة أمايه مب طويله وأنا أحوط) شما: أوكي أخبرج شو رايج تيين عندي باجر الحين البيت مجابل العنود: سمعي برمسج عقب أوكي شما: برمسج على الساعه عشر انزين العنود: أوكي سكرت عن شموه وفي نفس الوقت انفتح باب الصاله لفيت على الباب وأنا أبتسم أكيد هذا خليفه ... بس انصدمت هذا مب خليفه من الصدمه ما تحركت من مكاني مب مستوعبه هذا كيف دخل هنيه وليش ما دق الباب لا ويغني بعد... وقف ونزل راسه وأنا عقب ما استوعبت حظرتي قبظت الجريده وفتحتها بكبرها وغطيت ويهي ... حظرتي فاله الشعر وبلا شيله .. ما تكلمت طلعت من الصاله ... والشيخ حارب بدال لا يطلع دخل وسكر الباب وراه ونقع من الضحك .. طلعت من الصاله وسرت حجرتي يلست فيها وأنا منقهره منه .. على أي أساس يدخل الصاله من غير لا يدق الباب ... شو وكاله من غير بواب... تميت في الحجره وما طلعت ... رد خليفه من الدكان ودخل عليه الحجره أول ما شفته ارتحت لأنه رد .. خليفه: ليش يالسه في الحجره ؟ العنود: خالك يالس في الصاله خليفه: ويعني ؟! العنود: شو ويعني أنا أستحي خليفه: تونا كنا في العزبه ويالس ويانا ما استحيتي العنود: أنا كنت بسير السياره الا عموه ما خلتني وبعدين نحن الحين في البيت يعني دامه موجود أقدر أدخل في الحجره بس في العزبه ماعندي مكان أسير مسكني خليفه من شعري بس بدون ما يعورني خليفه: خطفي خطفي سرت أييب فلم يديد خلينا نسير نشوفه العنود: لا لا بشوفه عقب ما يروح خالك خليفه: خالي يوم شافه قال بيشوفه ويانا العنود: بشوفه عقب خليفه: لا برده باجر العنود: عادي بطرش سليم اييبه ورا باجر خليفه: عنودي لا تعاندين يالله أشوف طلعت ويا خليفه وسرنا الصاله بس تميت ساكته وأول ما دخلت الصاله تميت منزله راسي وما تحركت يلس خليفه عدالي وطلع لي من الكيس أنواع وأشكال من الحلاوه والشبسات و شاني لفيت صوبه خليفه: يالله انطعيي أباج تمتنين عشان ما يقولون خليفه ياكل أكلج عنج حارب : خلوف تعال شوفdvd ما عرفت له خليفه: أنا ما أعرف له عويش ورشود ظارين يركبونه ( لف على العنود) تعرفيله؟ العنود: ما أدري خليفه: قومي شوفيه وقفت وسرت صوب التلفزيون لفيت ولقيت خليفه يلعب بالتيلفون والشيخ حارب يطالع تقول أول مره يشوف بنات .. ما يستحي انزين نزل عينك ... بصراحه من نظراته ما قدرت أتحرك ارتبكت يوم نزل راسه يلست أعابل الوايرات خلصت ورديت مكاني أتريا الفلم يبدا خليفه: ليش ما تاكلين ؟ العنود: باكل شل خليفه الشاني مالي بيفتحه لفيت صوبه العنود: لا تفتحه ما أحب الشاني خليفه: شو تبين عيل؟ العنود: ليش ما اشتريت لي بيبسي ؟ خليفه: أتحراج تحبين الشاني شراتي العنود: لا أنا ما أداني أروح ريحته .. وين تباني أشربه خليفه: لحقتي هالثور اللي عدالي حارب : خلوف اصطلب لا أسطعك الحين ما علقت ولا قلت شي وحارب اتصل حق الدكان وطلب اثنين بيبسي ... احترق ويهي وما رديت عليه ... أصلاً ما عرفت شو أقول ... بدا الفلم ويلسنا نتابعه ووصل راعي الدكان ودخلت البشكاره يايبه البيبسي وحطته جدام حارب ... شكلها متعوده عليه شل وحده فتحها وحطها على الطاوله ولف صوبي حارب : اندوج خذت البيبسي وقلت له مشكور أظني حتى ما سمعها ... من عقب نزلوا كل المخدات من على الكراسي وطاحوا يشوفون الفلم وانا يالسه وراهم ... هالوضع ريحني باخذ راحتي بالأكل وبفتك من الدوربين اللي مركز عليه ... عقب نص ساعه أذن أذان العشى وباقي خمس دقايق وبيصلون الناس وهالاثنينه مندمجين ما تحركوا ... شفت الرموت كنترول على الطاوله ... شليته وبندت التلفزيون .. لفوا عليه اثنينتهم .. خليفه: ليش بندتي التلفزيون ؟ العنود: الصلاه حارب: خلوف يايبين امام في بيتكم ؟ خليفه: يا بنت الناس بعده وقت العنود: لا ماشي باقي يالله قوموا طلعوا عني هم الاثنينه .. ويلست أرتب الصاله وأنا منقهره من حارب .. منو يتحرى نفسه هذا .. لا ويطنز بعد.. بصراحه ما ارتحت له .. أوووه أنا شو أباه .. خله يولي لاه ما افتكرت فيه *** 
__DEFINE_LIKE_SHARE__
 |
|
08-15-2008, 03:46 PM
| رقم المشاركة : [ 2 ] | |
| عضو ماسي  |  تسلمين اختي على القصه ويعطيج العافيه ونترقب الزووود تحياتي الجاسي __DEFINE_LIKE_SHARE__ | |
| ||
| |
|
08-16-2008, 12:52 AM
| رقم المشاركة : [ 3 ] | |
| عضو ماسي | تسلمين
ونتريا اليديد ولا اطولين علينا ok __DEFINE_LIKE_SHARE__ | |
| ||
| |
|
08-16-2008, 04:12 AM
| رقم المشاركة : [ 4 ] |
| عضو جديد  | مشكورين على المرور و فالكم طيب الحين بنزلها .... و السموحه __DEFINE_LIKE_SHARE__ |
|
| |
| |
|
08-16-2008, 04:14 AM
| رقم المشاركة : [ 5 ] |
| عضو جديد | *** طلعوا حارب وخليفه ساروا يصلون والعنود بعد دخلت حجرتها... حارب يوم شاف العنود في الصاله استحى ونزل راسه بس هالنظره اللي يت على السريع ركزت الصوره في باله العنود ماشالله عليها بنت حلاتها كانت من صوب امها على قولتهم خذت جمال عن بنات عايلة أبوها كلهن بياضها يكفي شعرها صح مب طويل بس ناعم والقصه كانت وايد حلوه... كان فيه شي في ملامحها تجذب اللي يشوفها ...عقب الصلاه طلعوا خليفه وحارب من المسيد وردوا البيت ...وفي الدرب كانوا يتمشون ... حارب : أقول خلوف خليفه: هاه حارب : عمتك بتم عندكم ؟ خليفه: هيه سكت حارب عن خليفه وما تكلموا وصلوا البيت ودخلوا الصاله ولقوا كل شي رد مثل ما كان والصاله مرتبه *** دخلت أصلي العشى وقبل ما أطلع من الصاله كانت عموه توها تدخل مشيت وياها وسرنا نصلي عقب ما خلصت صلاه طلعت سرت المطبخ أشوف البشكاره شو سوت عشى وقلت لها تحط العشى أنا وخليفه ما نبغي بس خليتها تحط العشى حق عموه ... رديت أدخل الصاله لقيت خليفه وحارب توهم يدخلون الصاله خليفه: يدوه ردت؟ العنود: هيه .. في حجرتها تصلي شفت خليفه ساير صوب الكراسي بينزل المخدات العنود: لا الشيخ ارتاح محلك خليفه: نعم العنود: هلكت من كثر ما أرتب المخدات وايد ثجال خليفه: منو عبلج تردينهن انتي العنود: لا ماشي ايلس على الكرسي خليفه: ياهو عزر معزر علينا سكت عني ويلسوا على الكراسي.... مشيت صوب التيلفون بتصل بيت اختي شيخه اتولهت على منصور من طلع ويا خالي اليوم الصبح ما شفته متعوده عليه ايي ويا سالم ربيعه يلعبون في بيتنا ... اتصلت وردت عليه شمسوه شمسوه: ألو العنود: ألو السلام عليكم شمسوه: مرحبا الساع بالخاله العزيزه ...شحالج العنود: الحمدالله شحالج انتي شمسوه: بنشكر الله العنود: شو تسوين؟ شمسوه: ملانه يالسه أجلب هالتلفزيون العنود: منصور وين ؟ شمسوه: ما أدري المغرب كان بيت يدوه يلعب بلي ستيشن في حجرة عمي حارب العنود: انتي ما تقوليلي اخوج شو عنده ما ييلس شمسوه: على قولته أقيم الألعاب يوم ألعب عند غيري..وبعدين منو هنيه يالس أنا وحمدوه دوم هناك الا رديت أتسبح ويلست ويا حصيص العنود: اتولهت عليه ظاريه أيلس وياه دوم شمسوه: مسودة الويه وما اتولهتي عليه أنا العنود: لا والله بس تعرفين منصور متعوده دوم أيلس وياه..وانتي اليوم الصبح شفتج بسني ما أروم أجابلج أكثر شمسوه: قومي تعالي عندنا الحين العنود: لا خليها باجر شمسوه: بنشوف لين باجر العنود: انشالله... برايج بخليج أنا الحين شمسوه: خلاص جلبي ويهج ... توه فلم بادي على إم بي سي 3 بسير بيت يدوه أشوفه العنود: انزين زولي سكرت عن شمسوه ولفيت شفتهم شغلوا الفلم ويكملونه العنود: لا والله... خلوف عيد لين ما بندته أنا خليفه: والله نحن مب مسؤولين عنج يالسه ترعدين في التيلفون ونحن نترياج العنود: مايخصني انا ماطولت الا عشر دقايق ... عيد الفلم خليفه: وانتي شو تبينه منصور تسالين عنه العنود: اتولهت عليه حارب : وانتي ما لقيتي غير منصور الخريش تتولهين عليه خليفه: من نفس طينتها حارب : منصور في بيتنا العنود: لا تحاولون عيدوا عاد خليفه اللي ما شفته من الفلم ودخلت علينا عموه وخليت البشكاره تييب لها العشى يلست وياها عشان ما أخليها تاكل بروحها... عقب ما خلصت عموه على الساعه 10 سارت ترقد وأنا دخلت حجرتي غيرت ثيابي ولبست بجامه وانسدحت على الشبريه واتصلت حق نوروه خالتي بس السباله ما ردت عليه أكيد بدت سهرتها على النت .. عقب اتصلت حق خالي غيث غيث: ألوو العنود: السلام عليكم غيث: وعليكم السلام العنود: شحالك غيث :الحمدالله شحالكم انتوا العنود: حد وياك غيث: هيه العنود: برايك عيل غيث: شي في خاطركم العنود: لا بس كنت أبغي أرمسك غيث: انشالله العنود: الله يحفظك سكرت عن غيث وأنا طفرانه ومضايجه أحس اني وحيده ... نوروه ما ترد .. غيث عند ربعه .. خليفه يالس ويا حارب في الصاله وأنا ما أقدر أطلع جدامه... أخاف أتصل في شموه يرد عليه سعيد.. وهالمخبل حمدوه وشمسوه ما فكرن اييني أنا براويهن باجر.. انتبهت على تيلفوني يرن كانت شموه متصله العنود: هلا والله .. صدق هذا وقتج شمووه: ليش العنود: ملانه يالسه بروحي شموه: ليش يعني؟ العنود: حارب ياي وخليفه يالس وياه بصراحه ما استلطفته شموه: منو حارب لا يكون ولد أم عبدالله العنود: هو ما غيره شموه: حرام عليج هذا الرحيم بس حطيه جدامج ويلسي طالعيه والله انه حلو العنود: انتي دواج من يخبر مطوور على سواياج ( مطور ولد خالة شموه وخاطبنها) شموه: يااالله فديت هالطاري العنود: علني بلاج يالعنز شموه: عنز ريلج العنود: أخبرج شو رايج انتي تيين عندي باجر شموه: ليش يعني؟؟ العنود: ما أدري أنا ما أقدر أطلع شموه والله أنا أستحي أرمس حمد شموه: أول مره أشوف وحده تستحي من أخوها العنود: أنا .. هاه بتين؟ شموه: أوكي بحاول .. بيي أشوف حجرتج اليديده العنود: أمحق بروحي مضايقه منها شموه: ليش صغيره العنود: لا مب صغيره بالعكس كبيره وأثاثها يديد بس فيها شبرييتين وانا كانت حجرتي بشبريه وحده .. وحاطه كفر عود على شبريه والثانيه جردا بدون شي .. وماشي أي ديكور في الحجره .. تعرفين مفكره أغير الألوان أبغي أغير نفسيتي شموه: حظرتج وصلت السيره لين عندج ورديتيها.. العنود: خلاص .. أنا بحاول في يوم أخلي غيث يوديني بوظبي بسير ايكيا شموه: انزين انتي أي لون تبينها العنود: أمممم ما أدري ما حددت بعدني شموه: شو رايج في الأحمر الدمي العنود:ما أدري خير شموه: عنودي باقي شهر عن الدوام ونحن ما سوينا شي العنود: وما بسوي شي شموه: لييييش؟؟ العنود: يالله يا شموه أمايه ما كملت شهرين .. أسير ألبس وأشتري ثياب يداد شموه: عنودي حبيبتي الحي أبقى من الميت العنود (عيونها تدمع): اللي عندي بيكفيني تحيديني ملابسي أشتريها وما ألبسها.. كل اللي عندي شكله يديد شمموه: اللي يرحج رمست وشموه تقريباً ساعه وسكرت عنها .. انسدحت على الشبريه وتلحفت في نفس الوقت اللي دخل حمد عليه الحجره.. حمد: رقدتي؟؟ العنود: لا بعدني حمد: تعشيتي؟؟ العنود: ما خليت شي ما كلته ويا خليفه اليوم حمد: يايب لكم بيتزا ويايه قومي كلي العنود: أحيد حارب في الصاله حمد: عادي الا حارب بتتعودين عليه من يرد من الدوام يزبن في بيتنا العنود: لا ما عليه حمد أصلا أنا ما أشتهي حمد: اييج راي بخلي عويش تتيب لج منه طلع حمد عني وسكر الباب وراه أما أنا قمت وسرت صوب التواليت وسحيت شعري شوي وأنا أفكر .. دخلت عويش الحجره ووقفت عند الباب وكانت تشوفني بنظرات ما قدرت أفهم معناها العنود: هلا عويش حياج عويش: تعشيتي؟ العنود: كلت حلويات يوم كنت أشوف الفلم .. بس حمد أصر أني آكل بيدزا عويش: لأنها ميوبه حقج انتي وخليفه.. نحن كلنا في الطريج العنود: تعالي يلسي يلست ويا عويش كلت شوي من البيدزا ..كانت ساكته وما تكلمت حبيت أكسر الصمت العنود: شو سويتي اليوم؟ عويش: كالعاده أتشرى للدوام العنود: خلصتي أغراضج عويش: أنا مافي شي عندي يسمونه خلصتي .. أنا ما أحدد قبل ما أشتري الشي اللي يدش بالي أشتريه .. وأحب التجديد يعني بين فتره وفتره أشتري يديد العنود: حلوو .. تغيرين نفسيتج بعد عويش: تعالي أراويج اللي اشتريته ابتسمت أول مبادر ه تطلع منها .. حبيت أسير وياها.. أبغي أتجرب منها بأي طريقه .. يمكن أحس أكثر بالراحه العنود: أستحي أطلع بالبجامه عويش: عادي.. ما فيها شي أنا أطلع بالبجامه طلعت ويا عويش وركبنا فوق دخلنا حجرتها .. بصراحه انصدمت .. الأكياس اللي على السرير واااايد العنود: ماشالله عليج ما خليتي مكان عويش: أنا اليوم أول مره آخذ شي أحط في بالي اني بلبسه للجامعه... عشان جذيه خذت وايد العنود: يالله طلعي راويني يلسنا نطلع اللي في الأكياس .. بصراحه أغراضها كلها حلوه .. التنانير والبوديات .. العنود: بصراحه واااايد حلو عويش: وانتي؟ العنود: أنا شو؟ عويش: ما اشتريتي شي.. والا نسيتي انج بتبدين الدوام عقب شهر العنود: أنا مب محتايه شي يديد بس أبغي أفصل عباه وشيله لأن اللي عندي جدام عويش: شووو ... شو ما تشترين يديد.. لا حبيبتي عمتي لازم تكون من مستواي .. ما أبغي البنات يقولن عنج لوث انصدمت وما عيبني اسلوبها في الكلام.. شو يعني لوث .. يعني إذا لبست البدل الجديمه اللي عندي بكون لوث .. ليش ؟؟ .. شو هالتفكير.. أصلاً ما فكرت في هالشي ولا يا على بالي العنود: لا لوث ولا شي انتي ما شفتي شكلي .. يوم بنبدا الدوام احكمي عويش: حتى لو كانت البدل اللي عندج مرتبه وحلوه بس ما بتكون على الموظه العنود: مايهمني المهم أكون مرتبه ومحتشمه عويش: أنا أهم شي عندي ألبس أي شي يديد وما أحب وحده تلبس شي قبلي العنود: أنا ما يهمني هالشي رن تيلفون عويش كانت وحده من ربعها متصله يلست ترمسها وأنا طلعت عنها ودخلت حجرتي منقهره منها بندت الليت وانسدحت برقد .. بعدني منقهره من أسلوبها ويايه.. عويش بعهدها ما تغيرت .. الكم سنه اللي ابتعدت فيهن عنها وما احتكيت فيها اتوقعت انها بتتغير فيهن بس بعدها مثل ما هي .. ما تحبني وما أدري ليش وهالشي يبين في عيونها.. عقب التفكير فظلت اني أرقد بدال هالتفكير اللي بدون فايده .............. أتمنى يكون هالبارت الطويل عيبكم وشجعكم انكم تكملون القصه مرحباااااااااااااا... بصراحه استانست وااايد على ردودكم وتشجيعكم ... سوري عالتأخير بس هالأيام عندي ظروف الامتحانات اللي ما ترحم... مابطول عليكم .. بنزل بارت يديد اليوم وانشالله يعيبكم ... ** تقول الناس نفسك وش بلاها .. وش اللي عالشقا منك حماها.. ولا يدرون باللي متعبني .. وعيني شالذي كدر سماها ** نشيت من الرقاد وأنا أحس ان في حد يلعب بشعرى ويمطه بطلت عيوني لقيتها ريمووه .. ظحكت وشليتها طيحتها عدالي ويلست ألعب وياها يمكن نص ساعه .. عقب طالعت الساعه لقيتها الساعه 11 قمت طلعت لي ثياب عشان أتسبح وسمعت ازعاج خاري في الممر فتحت الباب .. شفت حمد وآمنه واقفين ويا عموه والبشكاره واقفه وخايفه التفت حمد صوبي وأشوفه معصب العنود: حمد بلاكم أم حمد: العنيدي .. أمايه ما شفتي ريموه العنود: هذيه عندي آمنه( تصارخ): عندج!! وليش ما ترمسين ؟؟ ليش منطبه العنود: ما أدري انكم تدورونها نشيت من الرقاد لقيتها عندي حمد: الحمدالله ياربي شفت آمنه يايه صوبي وأنا كنت واقف عند الباب دخلت الحجره وطالعتني بنظره حرقتني .. شلت ريموه وطلعت وسكرت الباب وراها .. حسيت بألم فضيييع يسكن في أعماقي.. ألم يزيد قلبي حزن فوق الحزن .. طحت على الشبريه وأنا ويهي على المخده .. أحاول أكتم دموعي .. بعد دقايق دخلت لامي الحجره وفي ايدها المدخن .. اتعودت تيب لي المدخن في حجرتي كل جمعه في هالوقت لامي: أنودي العنود: هاااا لامي: are you fine? العنود: yes .. I am fine لامي: you want any thing العنود: no thank you… you can go طلعت عني لامي ودخلت أتسبح عقب ما خلصت يلست أقرا سورة الكهف ... سمعت الإقامه قمت وصليت وعقب ما اتأكدت ان الرياييل ردوا من صلاة الجمعه طلعت.. اللي أعرفه ان كل جمعه يكون الغدا في بيت حمد أخويه والجمعه اللي وراها في بيت أم عبدالله والعايله كلها تيتمع .. على ما أعتقد ان الغدا عندنا اليوم.. دخلت الصاله ... شفت حمد وعويش وآمنه يالسين حمد: حيالله العنيدي .. شهالحلاه اليوم العنود( مبتسمه): أي حلاه .. لا حلاه ولا غيره ( حمد يموت على العنود يوم تبتسم .. ابتسامتها تزيدها حلاه على جمالها) يلست عدال حمد من اليمين .. أبغي أقوله ان شموه بتييني اليوم ومب عارفه كيف.. أخاف آمنه ما ترضى بهالشي.. بيتها ومن حقها... العنود: أأ.. حمد حمد: عونج العنود: عانك الله .. بغيت أقولك .. شموه ربيعتي بنت محمد بن سعيد بتيني اليوم حمد: مرحبابها الساع .. تبيني أييب لج شي العنود: لا ما أبغي شي .. بس قلت أقولك يعني ... حمد( يقاطعها): عنودي.. اتصرفي هنيه مثل ما كنتي تتصرفين قبل ما تتين عندنا العنود: مشكور حمد يلست شوي وياهم وعقب طلعت من الصاله .. قلت بسير أخلي لامي تسوي لنا كيك أو أي شي ***** طلعت العنود من الصاله وحمد متلوم فيها.. اخته وغاليه عنده.. وماهانت عليه من موقف آمنه اليوم .. آمنه: بعدها الا توها... وقامت تعزم ربعها حمد: آمنه خافي ربج .. البنت يتيمه آمنه: الحمدالله خايفه ربي حمد: يعني ربيعتها بتيها.. شو صار انجلبت الدنيا..ترها عويش كل اسبوع ووحده من ربعها عندها آمنه: وشو اييبها بعد حمد: لا حووووووووول عويش: أبويه حمد: عونج عويش: أبويه العنود ما بتشتري شي حق الجامعه .. وأنا بصراحه أباها تسير تشتري.. البنات بيتمن يطنزن عليه .. عمتج وعمتج آمنه: الا بتفضحج جدام ربعج حمد: وليش تفضحها ... تخسي وحده تتطنز على العنيدي وأنا عايش طلع حمد عنهن من الصاله وسار الميلس الصغير اللي عدال الصاله مشتبك في نفس البيت .. متعودين الرياييل يتغدون فيه **** شفت لامي طالعه من حجرتي عقب ما غسلت الحمام .. قلت لها ان شموه بتي وخليتها تسوي لنا كيك.. رديت صوب الصاله وسمعت كلام عويش ويا حمد أخويه..تضايجت وما حسيت بنفسي الا وأنا أرد حجرتي ويلست فيها.. أمس وأنا أفكر عاهدت نفسي قد ما أقدر ما أصيح .. أحاول أقاوم بس ما أقدر .. كرهت في نفسي هالشي.. نفسي هالحساسيه الزايده اللي عندي تطلع .. بس أنا من صغري ما تعودت على هالكلام ..حاولت منع الدموع بس أحس كل دقيقه تمر دموعي تكثر .. انتبهت ان حد دخل الحجره .. ولأن باب الحمام مفتوح .. دخل الحمام.. دخلت حمدوه بنت اختي سلامه الحمام من شفتها نزلت راسي وغسلته أكثر من مره .. أحاول أخفي أي أثر للدموع حمده: مرحبااااااا العنود: هلا والله حمده( منصدمه): عنودي شو فيج؟ العنود(تبتسم): مافيني شي حمده: تصيحين وتقولين ما فيج شي العنود: خلينا نطلع من الحمام انتي طلعنا من الحمام وأنا حاطه الفوطه على ويهي أمسحه حمده: عنودي .. شو مضايقنج؟؟ العنود: حمدوه صدقيني ما فيني شي حمده: انزين على راحتج.. بس أنا يايه أزقرج على الغدا العنود: مالي خاطر حمده: لا يابوج مافينا من يلسنا على الغدا العيايز يتخبرن عنج ابتسمت لها وطلعنا من حجرتي وسرنا حجرة الطعام لقيت الكل يالس يتغدا أم حمد: العنيدي بنتي تعالي عدالي هنه شيخه: علني ماخلا من هالشوف .. شحالج غناتي هويت سلمت على سلامه وشيخه سلمت عليهن ويلست عدال عموه.. قلت لقمتين ونشيت أم حمد: يالله يا عنود .. شو ياج ما كلتي العنود: عموه بسني شبعت أم حمد: وانتي شو كلتي عشان تشبعين العنود: والله صدق مالي خاطر قمت وسرت غسلت ايدي ودخلت الصاله فتحت لي غرشة بيبسي ويلست أشرب .. دخل منصور الصاله العنود: انت وين يالسبال منصور: أمس سرت ويا خالج غيث بيتهم تميت ويا عيال خاله العنود: ولا حتى فكرت فيني منصور( بهمس): أنا ما أداني أيي هنيه .. عموه آمنه عله العنود: منصور عيب هالكلام منصور: بس ولا يهمج .. بييج بس من الباب اللي ورا العنود: عادي لوحتى من الدريشه المهم أشوفك عقب الغدا .. الحريم ين ويلسن في الصاله .. وعقب ساعه كل حد رد بيته .. دخلت حجرتي وحاولت أرتب فيها.. بس ما في شي أقدر أغيره.. حجرتي في بيتنا كانت كلها عيناوي .. وهالحجره بيج غامج .. حاولت أحط شي من التحف والبروايز .. طلع شكل الحجره لوعه .. رجعت البوكسات كلها في الكبت .. وما اهتميت .. شموه مقدره ظروفي .. طلعت الكمبيوتر من الكراتين .. شكل الكراتين في الحجره ما يساعد .. بس خليته على الأرض..انتبهت لتيلفوني كانت خالتي نوره تتصل العنود: ألوووو نوره: السلام عليكم العنود: وعليكم السلام ..وينج يالقاطعه نوره: أمس التيلفون كان صامت وما حسيت به .. العنود: طبعاً مع فلانه وعلانه على المسن نوروه: شو تبيني أسوي .. بروحي في البيت ملانه .. غيث يطلع وأمايه عند الحريم .. وبنات خالي أيلس وياهن لين المغرب ونفترق بعدين.. طوول الوقت ملانه العنود: أمس منصور كان عندكم نوره: حليله ونسني شوي .. سوالف العنود: فدييته ياربي نوره: عنودي تعالي عندي اليوم العنود:ما أروم نوره: شو ما ترومين من بعدنا عنكم .. بطرش لج الدريول العنود: وييين خط ربع ساعه نوره: عنلاتج زاد.. جان ربع ساعه سويتيها خط العنود: لا والله بس شموه بتي العصر والمغرب بسير بيت أم عبدالله نوره: شو عندج هناك العنود: أمس وعدت شموس اني أييهن .. وهم كلهم في بيت واحد( بيت سلامه وبيت شيخه وبيت أم عبدالله في حوطه وحده) نوره: صدق ما منج فايد .. ليش ما تدخلين المسن العنود: ما عندي نت نوره: يالله يالنحاسه .. لاحقتني وين ما أسير العنود: نوروه متى بتملجين نوره: ما أدري أجلو الحفله طبعاً بس أسمعهم يقولون بيملجون في المحكمه بس..بيني وبينج أحسن العنود: ليش؟؟ نوره: ما أدري ما فيني على حفله وغيره وربعان ومشترى انا الجامعه ما سويت لها شي العنود: وشو تتريين باقي شهر عنها نوره: غيث معند مب طايع يوديني .. العنود رمسييه خليه يودينا .. انتي بيسمع منج العنود: انا عني ما أبغي شي نوره: شو ما تبغين شي انتي بعد.. مب جنج بتداومين في الجامعه ويانا العنود: بعد مالي خاطر أسير أشتري والله نوره: عنودي غناتي .. أنا أدري انج حزينه.. بس هذا مايمنع انج تشترين وتلبسين العنود: نوروه والله أنا العيشه ما أشتهيها وين بسير أشتري وأفصل نوروه: انزين انتي ما بتسيرين شو رايج أنا أسير آخذ لج العنود: لا لا أنا ما أبغي غير عباه وشيل بسس نوروه: مب على كيفج.. سمعي برمسج فليل أسمع أمايه تزاقر العنود: فدييت روحها .. سلمي عليها سكرت عن نوروه ودخلت أتوظا عشان أصلي العصر .. صليت وعقب طلعت عند لامي قلت الها تروح تتريا شموه عند الباب وأول ما توصل تدخلها الحجره ورديت داخل البيت شفت راشد طالع من حجرتي راشد: عنودي أبويه يباج العنود: وين.. في الصاله؟ راشد: هيه روح عني ولحقته ودخلت الصاله حمد: تعالي العنود العنود: خير حمد شفته يأشرلي على المكان اللي عداله .. سرت صوبه ويلست في المكان اللي أشر لي عليه حمد: انتي بداومين الشهر الياي في الجامعه؟ العنود: انشالله حمد: الاسبوع الياي بوديج بوظبي واخذي اللي تبينه وهالاسبوع آمنه وعويش بيسيرن دبي سيري وياهن وتزهبي للجامعه العنود: مشكور حمد أنا عندي اللي أحتايه وإذا بغيت شي بقولك حمد: لالا أنا أباج تاخذين للجامعه وما أبغي حد يكون أحسن عنج العنود: انشالله طلعت من الصاله ورحت حجرتي وسكرت الباب.. كنت متأكده ان حمد طلبني عشان هالسبب .. أنا أبغي أعرف ليش ما يخلوني على راحتي .. سمعت دق على الباب وانفتح من عقبه شموه: السلام عليكم العنود: وعليكم السلام هلا والله .. مرحبا ملايين رحت صوبها سلمت عليها .. متوله عليها من الخاااطر .. سكرت الباب وقعدنا في الحجره شموه: ليش ما ييتي تتريني عند الباب العنود: حمد كا ن يبغيني دقيقتين ودخلن لامي وبشكارة قوم شموه شالات بوكس أحمر كم كبره حطنه في الحجره وطلعن العنود( منصدمه): شو هذا؟ شموه: شوفيه فتحت البوكس شفت كفرين لونهن أحمر دمي وأغراض حق ديكور الحجره لونهن أحمر وبيج العنود: شمووووووووه شموه: هذي هديتج .. والا نسيتي انا تخرجنا من الثانويه العنود: مانسيت بس هذا وايد شموه: لا وايد ولا شي .. من متى أفكر أسوي لج هديه أمس يوم رمستج عرفت ان هالشي اللي تحتايينه العنود: ومتى سرتي؟؟ شموه: من وصلت تسبحت وصليت وكشخت وييتج العنود: وهذا كله خذتيه اليوم العنود: هيه .. ما تهونين عليه يالسه في حجره مب مرتاحه منها رفعت عيني صوبها شفت نظرة الحنان في عيونها.. سبحان الله اللي ياخذ ويعوض.. خذ مني أمايه وأبويه .. بس عوظني بحمد وغيث` ويدوه ونوره .. وبربيعه مستحيل ألقى شراتها في هالزمن .. ربيعتي شموه.. حتى بنات خواتي فديتهن ما قصرن ويايه العنود: مشكوره شموه .. والله مب عارف شو أقولج أكثر شموه: لا تقولين شي .. وخلينا نقوم نرتب الحجره العنود: خلي الحجره بتعبل منها بروحي .. قوليلي وين سرتي اليوم شموه: ماسرت مكان سعود ماطاع يحوطني .. وداني ايكيا وهوم سنتر ولايف ستايل العنود: ماخذتي شي حق الجامعه شموه: قالي المره اليايه انفتح الباب وشفت لامي يايبه الفواله .. يلست ويا شموه على الأرض ناكل ونسولف .. ماحسيت بالوقت.. الوقت وياها يمشي بسرعه .. قبل أذان المغرب قامت شموه بتروح العنود: شموووه والله ما شبعت منج شموه: مره ثانيه .. وبينا التيلفون.. ما فيني أتأخر أمايه بتاكلني العنود: والله في خاطري وايد سوالف شموه: وليش ما رمستي من الصبح العنود: تحيدينها ربيعتج .. شموه: أعرفج لين ما تحرقج السالفه وتبردين منها .. اطلعينها وساعتها تكون بدون فايده العنود: انتي محد يفجلج حلجج .. تصرطين الواحد بقشوره شموه: أحيدج ساكته وبالعه لسانج .. العنود: بس بس سكري السالفه شموه: الساعه 11 بتصلج اللي في خاطرج ان ما طلعتيه والله لا تعرفيني ولا أعرفج العنود: انزين يالله ذلفي طلعت عني شموه ورديت داخل صليت وسرت الصاله شفت راشد يلعب بلي ستيشن العنود: رشود راشد: هاااااااااه العنود: عويش وين؟ راشد: ساروا بيت يدوه العنود: بسير هناك ما بتسير راشد: لاء سرت حجرتي سحيت شعري ولبست شليتي وطلعت من البيت .. بيت أم عبدالله فيه ثلاث فلل .. وحده فيها سلامه اختي والثانيه شيخه والثالثه فيها أم عبدالله وحارب.. بوعبدالله الله يرحمه كان ما يحب انهم يفترقون عشان جيه بنوا هالفلل الثلاث في حوش واحد .. وبين بيت حمد أخويه وبيتهم باب مشترك ..دخلت بيتهم شفت الحرمات كلهن يالسات في طرف الحديقه ووياهن علي (ولد اختي سلامه أخو حمده عمره 20 سنه) .. سرت صوبهن __DEFINE_LIKE_SHARE__ |
|
| |
| |
|
| مواقع النشر (المفضلة) |
العرض العادي
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| ياناس وش فيها الدنيا ماترحمـ | شيخ المزهر | شعر و خواطر | 14 | 04-27-2010 10:56 AM |
| الدنيا ملعونة ملعون ما فيها إلا ......} | الطيف | الإسلام والشريعة | 10 | 01-19-2010 11:02 AM |
| لماذا لا يُقبل ان يقال ان منهج حركة فتح هو نفس منهج الوفاق ؟؟؟ | محروم.كوم | منتدى أخبار المواقع والمنتديات العربية والأجنبية | 0 | 09-11-2009 05:20 AM |
| مطلوب أرض للإستثمار تصلح لإنشاء مدرسه أو بترخيص مدرسه | محروم.كوم | منتدى أخبار المواقع والمنتديات العربية والأجنبية | 0 | 06-10-2009 09:00 AM |
| عمر الدنيا ماجرحت حد .. من أكثر الأغانى التى تعبر عن الحب والحسرة والحزن والفرح.نغمة | محروم.كوم | منتدى أخبار المواقع والمنتديات العربية والأجنبية | 1 | 04-07-2009 10:44 PM |
الساعة الآن 06:07 AM
- اخبار رياضية
- اخبار الامارات
- اخبار ريال مدريد
- اخبار برشلونه
- العاب فلاش
- مسلسلات وافلام
- مسجات
- فيديو كليبات
- سيارات للبيع
- ارقام سيارات
- ارقام هواتف
- هواتف للبيع
- حيوانات للبيع
- قوارب ويخوت للبيع
- ملابس واكسسوارات
- ساعات ومجوهرات
- اناشيد اسلامية
- نغمات اناشيد
- نغمات اسلامية
- ادعية اسلامية
- رقية شرعية
- قران كريم
- ديبيات اسلامية
- اذكار المسلم
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208 209 210 211 212 213 214 215 216 217 218 219 220 221 222 223 224 225 226 227