((.. الدنيا يا خلي مدرسه .. وسنين عمرنا حصص الالم منهج ندرسه .. والفرح فيها فرص ..))

ريماني غرااام · 10-11-2008, 09:47 PM

اسمحولي اتاخرت عليكم ....

الـــــــــــجــــــــــــــــزء الـــــــــــــــــــــــعــــــــــــــــــــــــ شـــــــــــــــريــــــــــــــــــــن

مرت الأيام وأنا حياتي تمشي على هالحال .. حصوه ابتدت تتزهب .. موزه وريلها ردوا من ألمانيا ولطوف وساروه ردن بيتهن.. عويش من يوم شافني بطي وهيه كارهتني .. شموه كل يوم عن يوم وهيه تبتعد عني تمر أيام ما أشوفها ولأدري عنها ..دخلنا في الشتا البارد .. ونعيش أيام شهر رمضان .. هالاسبوع أول اسبوع من رمضان واللي متعبنا أكثر امتحانات المدتيرم ...
حمدوه : أنا امتحاناتي من باجر لين الأثنين الياي .. عندي يومين اجازه
شموه: امتحان المجتمع الساعه كم؟
العنود: الساعه ثمان فليل
حمدوه: يعلني بلاه شو بييه لو خلاه في وقت الكلاس .. الا دكتورنا مستبطر
حصوه: عنودي في اجازة العيد بنروح نفصل فساتين ما بتروحين ويانا
العنود: بشوف عويش قبل
شمسوه: يالعنز هيه ما تفتكر فيج حتى
العنود: برايها ..
حمدوه: بذمج قالت لج تعالي بنفصل شي حق العيد
العنود: ما يهمني .. ولا أباها تقولي
حصوه: انتن منو تعاين .. خلنها عنكن
حمدوه: خلنا نسير عند الحرمات أبرك .. الحين أمايه بتهزبنا ما سوينا شي حق الفواله
حصوه: قومن
.....
رحنا الخيمه عند الحرمات اللي كانت داخل البيت وخيمة الرياييل كانت جدام بيت أم عبدالله ..
في الخيمه كنا نتابع الحلقه ودخل سالم عندنا..
سالم : السلام عليكم
الجميع : وعليكم السلام
سالم: قومن حطلنا فواله .. رياييل يايين صوبنا
شمسوه: الحين!!
سالم: هيه الحين
شمسوه: عنبوه هذا وقت حد ايي فيه .. ما تم شي من الفواله ...
سالم: سون غيرها يالله .. قومن
رحنا المطبخ وما عرفنا شو نسوي
حمدوه: شو هالحاله .. طالع الساعه كم الناس باجر عندهم دوامات وأهلنا فاتحين خيمهم
العنود: يالله انتن خلصنا الحين بيدخل سلوم والاعليوي بياكلونا
منصور( يدخل): لا منصور اللي بياكلكن
حصوه: هذا اللي ناقص
منصور: تعرفن من عندنا
حموده: منو!!
منصور: ريل حصيص واخوانه
التفتنا كلنا على حصوه اللي احمرت ونزلت راسها على العجينه ..
شمسوه: أوب أوب أوب .. شي اللي يستحون
العنود: يالله راوينا شطارتج الحين
حصوه: عن السخافه وخلصنا
حمدوه: بعااااااااد .. خلصنا!! نشتغل عندج انتي وريلج
حصوه: لاااا إله إلا الله .. وبعدين يعني
حمدوه: خلاص ما بنقولج شي
مانع: أنا كل يوم عندكم ماشفتكن فالمطبخ تسولي شي
حمدوه: قلتها كل يوم عندنا.. يعني هب ضيف لو كنت ضيف جان سوينا لك شي
مانع: مالت عليج
حمدوه: منصور انت ومانع طلعوا الحين لا أقطعكم بالسجين
مانع: خلنا نطلع يابوك .. هذي ساحره تسويها
ضحكنا على تعليق مانع وحمدوه تموت من القهر .. مضيجه .. كملنا اللي فايدينا وطرشنا الفواله ورديت البيت .. غيرت ملابسي ويلست أقرا قرآن لين الساعه ثنتين .. ورقدت
.......
ما رمت أفتح عيني اليوم من الرقاد اللي فيني .. ومالي خاطر على الدوام .. شو فيها إذا ما داومت من بداية الكورس وأنا ما عندي ولا غياب .. سمعت دق على الباب .. قمت فتحت
حمد: شو مب ناويه تروحين الجامعه
العنود: بصراحه ما أروم
حمد: شي يعورج؟
العنود: لالا بس فيني رقاد
حمد: الساعه كم بتخلصين
العنود: 11:30
حمد: احمدي ربج عيل اللي يخلصون وحده وثنتين .. واللي يخلص أربع
كلام حمد شجعني .. وخلاص دام اني نشيت من الرقاد ما بقدر أرقد مره ثانيه .. طلعت كتبي وخلصت و رحت الجامعه ويا حمدوه وشميس وحصوه .. من عقب اللي صار عويش حتى ما ترضا تروح ويايه الجامعه ..
...
عقب ما خلصت كلاساتي رديت البيت على طول .. رقدت لين الساعه ثلاث .. قمت أقرى قرآن وصليت العصر وعقب الصلاه ابتديت أضارب كتاب المجتمع وهالمره صدق الدكتور عطانا كميه كبيره وأنا مصممه أحصل تقدير فيه لأن المساقات الكورسات اليايه بتكون صعبه وهذا مساق واحد ويا مواد التعليم يعني لازم أستغل هالفرصه ..
درست لين أذان المغرب .. توضيت وطلعت في غرفة الطعام .. كانوا كلهم يالسين بيفطرون ..
أم حمد:تعالي بنتي هنيه عدالي
قعدت عدال عموه .. كلت تمره وشربت شوية شوربه وقمت .. رحت صليت .. ماكان لي خاطر على الفطور .. يلست أشاهد التلفزيون عشان أرجع أكمل دراسه .. الساعه ست ونص دخلت حجرتي شفت فيه ثمان مكالمات من سلامه وشيخه .. أكيد بيسألن ليش ما ييت أفطر.. بروح عند الفواله .. يلست على المكتب أحاول أدرس.. الكميه وايد صعبه وكبيره الله يعين حمدوه وشمسوه عندهن امتحان قبله .. عقب أذان العشى قمت تسبحت وصليت التراويح.. في وقت الفواله رحت بيت أم عبدالله دخلت الصاله شفت شمسوه تدرس ..
العنود: السلام عليكم
شمسوه: وعليكم السلام
العنود: هاه شو أخبار الدراسه
شمسوه: لا اتخبرين .. يلست ألعب طول الوقت وعند أذان المغرب حسيت انه ماشي وقت
العنود: وحمدوه
شمسوه: توها ركبت فوق..ان يلسنا رباعه ما بنظوي شي..
العنود: درسي انتي أنا بروح أشوفها
رحت فوق كانت حمدوه منسدحه على بطنها ومغمضه عيونها تحفظ وتكرر اللي قرته ..
العنود: ماشالله ماشالله
حمدوه: آآآآآآه يالعنيدي .. بتخبل
العنود: مايسوى عليج الا درجات دنيا
حمدوه: مالت علينا أون بنذاكر أول بأول .. الإداره تبالها كناري في الانجليزي هب نحن ..
العنود: وايد باقي
حمدوه: ثلاث مذكرات .. ماأدري متى بخلصهن
العنود: انزين خلينا نروح الخيمه بناكل شي وبتردن تكملن
حمدوه: أنا الفطر ما فطرت .. تبيني أروح للفواله .. بتبطين الساع
العنود: أنا بعد ماييت عند الفطر..
حمدوه : ليش؟
العنود: مالي نفس .. قعدت أدرس مجتمع
حمدوه: الله يساعدنا ...يعلني بلاه ما طاع يخففلنا
العنود: أنا بروح أييب لكن شي تاكلنه
رحت عن حمدوه وعلى الدري تجابلت وياحارب أنا نازله وهويركب .. صارلي اسبوع ماشفته .. أول ما شافني وقف وابتسم الابتسامه اللي من أشوفها أتلخبط ما أدري ليش..
حارب: شحالج عنودي
العنود: طيبه طاب حالك..انت شحالك
حارب: يسرج الحال .. وين تبين ؟
العنود: يايه أشوف حمدوه وشميس
حارب: ماشالله مسرع ما تتولهن على بعض .. متلاقيات عند الفطر
العنود: لا اليوم ولا وحده منا يت عند الفطر
حارب: ليش ؟
العنود: حمدوه وشميس عندهن امتحان
حارب: وانتي تآزرينهن ما يتي تفطرين
العنود: أكيد بآزرهن .. وبعد ماكان لي خاطر
حارب: ...........
العنود: بروح الحين ..ممكن؟
انتبه حارب انه كان ساد الدرب جدامي .. سوا حركه ضحكتني عليه وتحرك عني ورحت عنه .. رحت الخيمه عند الحرمات ..
العنود: السلام عليكم
الجميع: وعليكم السلام
سلامه: وين انتي اليوم ماييتي تفطرين؟
العنود:ماكان لي خاطر ..
شيخه: تعالي .. ما أظني كلتي شي ..
العنود: لا أنا يايه أشوف شو مسوين بشل حق حمدوه وشميس
أم حمد: غربلا هالبنات اللي بيجتلن عمارهن
أم عبدالله : تعالي غناتي حطيلكن هريسه من الطبقه ..
حطيت هريس في صحن وحطت لي شيخه صحنين من كل اللي موجود عالفوله .. ورديت الصاله رحت فوق زقرت حمدوه ونزلت كلنا ورديت البيت ورقدت ..
.......
يوم الأحد قمت وقت السحور ومن عقب ما تسحرت رديت الحجره قريت قرآن وصليت الفجر وطلعت في الحديقه مع أن الجو بارد وقعدت أدرس .. الساعه سبع رحت غيرت ملابسي ورحت الجامعه.. الساعه 11:30 كنت في الرسبشن وشفت حمدوه وشميس عند الباب
حمدوه: هلا العنيدي .. زين لحقنا عليج
العنود: بتروحن؟؟!
شمسوه: هيه
العنود: ليش ؟؟!
شمسوه: خلاص ما فيني حيل ما بحظر الكلاس .. علينا امتحان باجر والا نسيتي
العنود: شو سويتن اليوم؟
حمدوه: أنا حسيته صعب شوي ..
شميس: الله كريم
اتصلت حق سليم ورديت البيت .. اتفقنا انا نرد ونرقد ونقوم العصر نبدا دراسه .. وصلت البيت ولقيت حمد في الصاله ..
العنود: السلام عليكم
حمد: مرحبا الساع بالحلوين
العنود: غريبه في البيت من وقت
حمد: خلصت ورديت .. تعبان أبغي أرقد
العنود: انزين روح ارقد
حمد: بصلي قبل
العنود: أنا بعد بتريا الأذان
حمد: زين عيل يلسي ونسيني ..
فريت الكتب والشنطه وقعدت أسولف ويا حمد لين أذان الظهر ..
حمد: يالله أنا بروح المسيد
العنود: أنا بعد بروح أصلي وبرقد لي ساعتين ورايه امتحان باجر
حمد: متى تبين تقومين
العنود: بتوعيني؟!
حمد: هيه .. أنا أحسن منبه في هالبيت
العنود: منبه والا مغثه
حمد: مغثه في عينج هب منج مني أنا اللي بسوي فيج خير
العنود: ههه لا فديتك .. يوم بتروح تصلي العصر وعني
حمد: أوكي .. اتفقنا
...
طلع حمد من البيت وأنا رحت حجرتي .. غيرت ملابسي صليت وانسدحت برقد.. الساعه ثلاث ونص قمت أسمع دق فضيع على الباب... الله يستر بس .. فزيت أربع وفتحت الباب
العنو: شو .. شو صاير
حمد: ماشي بس انتي قلتي لي وعني
تساندت على الباب وتنهدت براحه ..
العنود: يوم قلت لك مغثه..
حمد: لأنج قلتي مغثه كسرت الباب .. لو مدحتيني جان عرفت أوعيج بهداوه
العنود: صليت ؟؟!
حمد: لا بعدني
العنود: يالله روح قبل مايصلون عنك ..
عقب ماصليت العصر .. اخترت الميلس اللي داخل أدرس فيه .. منفتحه نفسي للدراسه ومر الوقت وأنا على حالي ما طلعت ... دخل خليفه الميلس وأنا كنت عاطيه ظهري للباب .. وقف ورايه وأذن ..
العنود: غلطان أخوي الجامع عند الدوار
خليفه: قلنا جامعيه وتدرس بس هب هالكثر
العنود: اهب من عينك قول ماشالله
خليفه: ماقالوا لي قول ماشالله..قالوا لي قولها تي تفطر
انتبهت للساعه ..كان مأذن ..
العنود: ما انتبهت انه أذن
خليفه: مخج وعيونج واذنيج ويا الدراسه .. شقايل بتنتبهين
العنود: خلوف قول ماشالله ..
عطاني ظهره ومشى عني لحقته وربع وأنا أربع وراه ..دخلنا غرفة الطعام ..
حمد:بدال هالربعان تعالوا فطروا وادعوا ربكم
العنود: حمد ولدك يتاوح عليه من الصبح خله يقول ماشالله
حمد: خلوف قول ماشالله .. بتاكل عمتك
خليفه: أنا ما آكل لحم انسان
العنود: قول ماشالله خلوف .. مافيني باجر أخبص في الامتحان
خليفه: مستحيل تخبصين وانتي هذي دراستج
أم حمد: خلوف .. بسم الله من عينك قول ماشالله لا أفرك بهالكوب
خليفه: ماشالله .. ماشالله
حمد: دواك .. ماتيبك غير هزبة أمايه .. تعالي عنودي ..

رحت قعدت عدال حمد أخويه .. صب لي شوربه وعطاني اياها
العنود: فطرت؟؟!
حمد: هيه فطرت
العنود: خساااااره
حمد: ليش ؟
العنود: كنت أريدك تدعيلي ..
حمد: الله يوفقج غناتي ويسهل امتحاناتج
خليفه: أنا بعد أبويه ؟
حمد: دعوه بلا دراسه ما تصير .. لازم تدرس
خليفه: بعد ما تعلم جاد ان ربك يقبلها
العنود: منو قالك انه السديس
يرني حمد من اذني ..
حمد: مب لازم أكون السديس عشا ربي يقبل دعوتي
طلعوا حمد وخليفه وراشد رايحين المسيد وأنا كملت الشوربه ورحت حجرتي ..
... عقب صلاة التراويح..
خلااااااص تعبت .. ما أقدر أستوعب أكثر .. صح اني أراجع اللي درسته .. بس كأني أول مره أقراه .. وطيت كتابي وقمت أتسبح يمكن أتنشط شوي .. طلعت من الحمام شفت حمدوه عندي
حمدوه: نعيماً
العنود: الله ينعم عليج
حمدوه: شو خلصتي ؟
العنود: لا بعدني .. صح مخلصتنه أمس بس من بديت اليوم بعدني ما خلصته
حمدوه: أنا خلاص سطلت
العنود: شميس وين؟
حمدوه: قالت بتروح تتسبح قلت بيي أشوفج .. يعني ناخذ ريست
العنود: أنا بعد تعبت قلت برتاح
حمدوه: ياااالله حصيص المرتاحه .. مساقين بس
العنود: يالله .. الله كريم ..
حمدوه: يالله بنروح معاج بيتنا .. بندرس كلنا مع بعض..
العنود:تعالي بشوف حمد قبل
حمدوه: شو تبينه؟
العنود: بقوله بتم عندكن اليوم طول الوقت
رحنا الصاله شفت حمد وقلت له اني بتم ويا حمدوه وشميس .. رحنا بيت أم عبدالله
حمدوه: السلام عليكم
شمسوه+حصوه: وعليكم السلام
شمسوه(تقرا): وتعتبر دولة الإمارات العربية المتحده .....
العنود: بس بس بس فكينا من الصدعه
حصوه: تعالن فكني منها من الصبح مستويه دكتور تشرحلي
رن تيلفون الصاله وردت عليه حصوه ...
حمدوه: بعدني فصل كامل ما أعرف شي فيه
شمسوه: انتي حتى لو ما امتحنتي باجر بيعطيج A
العنود: مالت علينا نحن..عايف شوفتنا
حصوه: تقولكن أمايه سيرن الخيمه
العنود: أنا مالي خاطر
شمسوه: أنا بعد
حمدوه: قوليلها ما نبغي ..
قعدنا في الصاله ندرس بس كل شوي وحده منا ترمس الثانيه ..
حصوه: أنا بيلس في البلكونه أبرك لي .. حشى ما قدرت أقرا شي من الصدعه
حمدوه: أنا بروح الصاله اللي فوق
... طلعت حصوه وأنا وحمدوه رحنا فوق وشميس تمت في الصاله ..دخلت حجرة شميس وحمدوه اللي في بيت أم عبدالله .. بدينا في الجد والدراسه وما طلعت لين الساعه وحده عقب ما حسيت بيوع ..
العنود: حمدوه يوعانه
حمدوه: توني أقول بنزل بروح أشوف شي ناكله ..
العنود: يابوج مايسوى علينا هالامتحان ... ما كلت شي اليوم .. شربت شوربه وتمرتين
حمدوه: مينونه ..
نزلنا تحت كانت شمسوه طايحه وسرحانه.. وشكلها يفطس من الضحك
العنود:بعطيج اللي تبينه إذا ماكانت تفكر في عليوي ..
حمدوه: ويييييين بنت اختج ما تعرف الرومانسيه
العنود: تعالي تعالي ..
...
العنود( تصرخ): شمسووووووووه
شمسوه: ويعه
العنود: وييييييييين وصلتي؟
شمسوه: حشى فلختيني
العنود: في شو تفكرين؟
شمسوه: مايخصكن
حمدوه: درستي؟
شمسوه: باجر ما بروح الجامعه
حمدوه+شمسوه: ليش؟
شمسوه: عندي كلاسين باجر المجتمع قال لا تحظرون والاحصاء ماعندي غيابات فيه
حمدوه: عيل أنا بعد ما بروح
العنود: أنا وياكن
حصوه( تدخل): شو وياكن ؟؟ شو بتسون ؟
شمسوه: ما بنداوم باجر .. بنكمل دراسه
حصوه: يالمخبل رقدن وقومن عقب السحور
شمسوه: لا أنا مابقدر أرقد وأنا ما خلصت
العنود: اييه أنا يوعانه خلن هالسالفه عنكن ..
حصوه: أنا بعد
حمدوه: قومن خلنا نروح المطبخ ..
مرينا المطبخ التحضيري وما حصلنا شي خذنا بيبسي ورحانا المطبخ اللي برا ..
حمدوه: شو هذا أنا ما أبغي جباب ..
شمسوه: حصوه شوفي شو فالثلاجه
حصوه: مهلبيه
العنود: شو هذا أنا يوعانه
شمسوه: يعلني بلاكن من بشاكير مكثركن وما أقل بركتكن
حصوه: تعالن بنطلب من الكفتريا
ردينا الصاله وطلبنا من الكفتريا وسحبت حمدوه الزوليه وفرشتها جدام باب الصاله .. يلسنا نسولف نتريا الشيخ اسماعيل يتكرم علينا .. الجو بارد يلست متكوره وريولي لحفتهن بالكندوره ولفيت شيلتي عليه ..
العنود: برد يعلني بلاج يا حمدوه ويا شورج
حمدوه: أنا طلعت بروحي ما أمرت عليكن
حصوه: وانتي ليش لابسه هالجلابيه ..
العنود: شدراني انكن بتتخبلن وبتقعدن برا
شمسوه: وين هالأهبل ما هضل ..
كنا يالسات على طرف ما يبين اللي بيدخل البيت بس انتبهنا لليت السياره .. عقب عشر دقايق شفنا سالم يمشي صوبنا و شال كيس الكفتريا .. ولا وحده منا اتوقعت انهم بيون في نفس الوقت ويا اسماعيل
شمسوه( بهمس): يعلللني بلاك يا اسماعيلوه ..
حصوه: أنا ماااالي شغل
العنود: هب هذا شورج .. الحين مالج خص
سالم: السلام عليكم
البنات: وعليكم السلام والرحمه
سالم: منو اللي طالب من الكفتريا؟
..لا جواب...
سالم: أسألكن .. شو صرطتن لسنتكن؟
العنود: م ..ب..سالم ...
سالم: ردن..
شمسوه: حمدوه كانت يوعانه واتصلنا حق اسماعيل .. مالقينا شي في المطبخ
حط سالم الكيس جدام حمدوه وقعد ..
سالم: مره ثانيه تبن شي اتصلن لنا ... لو أنا مالقيته عند الباب منو اللي بييبه منكن
شمسوه: زينب واعيه ما رقدت
سالم: وليش واعيات لين الحين
حصوه: ندرس عندنا امتحانات باجر
سالم: ليش ما تاكلن؟
العنود: انت الله يهداك مسوي زحمه والشارع فاضي ... ما رمنا نرمس
سالم: عشان ما تطلبن مره ثانيه هالحزه
شمسوه: هيه .. لو قلت لك اني أنا يوعانه وطلبت بتفرني بالكيس ..
العنود: عاد هذي غير هذي حمدوووه
استحت حمدوه وحطت عينها في كتابها وما يبين ويهها
سالم: عنودي وشميس ان ما اصطلبتن بساطع بكن الايدار اللي وراكن
حصوه: لالالا حرام عليك كله ولا الايدار
العنود: عنلاتج يالعنز
سالم: يالله انطعين وكملن دراسه .. ما أدري شقايل بتفلحن وانتن رباعه ..
علي: يقولون الشياطين ينربطون في رمضان .. أشوفكم أحرار
سالم: وعليكم السلام ورحمة الله وبركاته
علي : السلام عليكم
الجميع: وعليكم السلام
علي: شو ميلسنكم برا في هالبرد
سالم: ييت لقيتهن بارزات
علي: روعتوني سمعت الا رمسه ما شفت حد منكم
سالم: حارب وين؟
علي: طلع عنا وما رد
حمدوه: روحوا بعيد كملوا رمستكم خلونا نكمل دراسه
علي: الله عاد الشيخه حمده بتحطمين الدنيا ..
العنود: انتوا ماعندكم دوامات باجر؟
سالم: عندنا..
شمسوه: يالله عيل .. روحوا رقدوا
راحوا عنا سالم وعلي عقب ما غلسوا علينا .. وحصوه راحت ترقد وبقينا أنا وحمدوه وشميس .. كل وحده منا عاطيه الثايه ظهرها وعينها في كتابها .. الساعه ثنتين ونص .. شفنا حارب يتمشى في الحوش ويتكلم في التيلفون ..
حمدوه: هذا حرووب
شمسوه: تو الناس ما بغى يرد
العنود: درررررررسسسسسسسسسن
حمدوه: تعالن بنروح صوبه .. بزيغه
شمسوه: ما عندج سالفه
راحت حمدوه ونحن ما تحركنا كنا نشوفها من بعيد .. مشت من وراه وفرته بحصاه .. التفت وراه وطنش ..
شمسوه: ههه والله لو أنا ما تشوفون غير غبرتي
.. تمت حمدوه تفر حارب بالحصى وهو ما تحرك كمل رمسه في التيلفون .. وعقب ما سكر لف معصب.. وقفت حمدوه وصرخت
حارب: اهب.. يالينيه شو موعنج .. وليش طالعه برا هالحزه
حمدوه: هههه يالسين ندرس
حارب: ما تيوز الدراسه داخل
حمدوه: ملينا من داخل .. طلعنا نغير جو
ردت حمدوه صوبنا وحارب يا معاها
حارب: السلام عليكم
العنود+شمسوه: وعليكم السلام
شمسوه: شو هالكشخه حارب.. من وين ياي
حارب: من وين بعد .. عند الرياييل
حمدوه: ماشالله كلكم مطقمين اليوم انت وسالم وعلي
حارب: جيه الا انتن تلبسن شرات بعض
حمدوه: منو كنت تكلم في التيلفون
حارب: مالج شغل ..
سكتنا فتره وأنا ما قدرت أرفع عيني .. يوم يكون يالس ما أقدر آخذ راحتي وايد .. كنت منزله عيوني على كتابي وأشخبط فيه بس ما كنت أقرا ولا أستوعب شي ..
حارب: ههههه شو هذا عنودي .. شكلج يفطس من الضحك
لفيت عليه وطالعته بعيون مستنكره كلامه
حارب: ليش متكوره على عمرج جذيه
العنود: بردانه
حارب: ردن داخل .. قومن
العنود: داخل الجو دافي .. نحس برقاد ..
حارب: ماشي وازنكن على السهر قومن رقدن
حمدوه: أنا ما برقد لين أخلص باقلي عشر صفحات
العنود: أنا برد البيت عقب ما أخلص وبرقد
شمسوه: أنا بصراحه سطلت أبغي أرقد.. بروح أرقد وبقوم الصبح
حارب: متى امتحانكن ؟
حمدوه: باجر الساعه ثمان فليل
حارب: بعده عندكن وقت .. قومن رقدن
شمسوه: بنروح عقب ساعه تقريباً
حارب: عنبوه عنودي بتموت من البرد ... قومن أشوف
شمسوه: مااااااااا نرييييد
حارب: مب بشوركن يالله أشوف جدامي
العنود: لالا أنا مرتاحه ..
حارب: مافينا تطيحين علينا مره ثانيه.. قووووومن ماعندي وقت
شمسوه: انزين روح ماحد قالك تريانا
حارب: شوفن ان ما قمتن أنا براويكن شقايل بتقومن
حمدوه: انزيييين
قمنا ودخلنا داخل البيت .. صدق حسيت بدفاااا ..
العنود: الله الصاله دافيه
راح حارب وما أدري شو عابل في المكيف وحطه على التدفئه ..
شمسوه: لو أنا بموت من البرد متجمده ما بتقولي دخلي داخل ..
حمدوه: ماشااااااااااااالله .. لقطتها على الطاير شمسوه
العنود: شو هيه
حمدوه: خلج في كتابج انتي
شو يقولن هذيلا .. أحس عمري هبلا بينهن ..
حارب: يالله أنا بروح أرقد .. تامرون على شي
العنود: سكر الباب وراك .. لو سمحت يعني
حارب حشى يابوج ما بغيتي وترمسيني..مالت عليه يوم رمستني أمرتني)
شمسوه: ههههههه
حارب: شو يضحكج شميس..
حمدوه: قالوا لك سكر الباب
حارب: مالت عليكن
حمدوه: تصبح على خير
رقع حارب الباب وما رد عليها
العنود: عن شو كنتن ترمسن؟
حمدوه: عن شوو؟
العنود: اللي لقطتيها على الطاير ..
شمسوه: شو هييه؟
العنود:أنا أسألج لا تستهبلين
شمسوه: عنودي درسي خلينا نخلص
العنود: بموت من الفضول والله حسيت عمري هبلا ..
شمسوه: الحمدالله
العنود: على شوه ؟
شمسوه: على كل شي
قهرني .. بصفعهن .. طنشتهن ورديت أدرس .. الساعه أربع لفيت لقيت حمدوه منسدحه تحاول تقرا وشمسوه رقدت على الكنبه
العنود: بترقدن؟
حمدوه: بصراحه أنا فيني رقاد
العنود: ان طلعنا برا بيشوفونا وبيلزمون على السحور وأنا مالي خاطر
حمدوه: ولا أنا .. بتريا الاذان بصلي وبوطي راسي
العنود: تعالي وصليني
حمدوه: مب لازم باتي عندنا
العنود: لاااا .. وصليني ما بييج شي
حمدوه: ماشي سيره رقدي عندنا
العنود: جلبي ويهج بروح اروحي
حمدوه: حووو صبري بوعي شمسوه وبنوصلج.. حشى ماتنرام
العنود: شميس .. شمسوه
شمسوه: هممم
حمدوه: قومي
شمسوه: الساعه كم
حمدوه: الساعه أربع .. قومي خلينا نروح فوق
شمسوه: ما ريد .. خلوني هنيه
العنود: قومي عشان ترقدين وانتي مرتاحه
قعدت شمسوه فتره تحاول تصحصح وطلعنا من الصاله لقيناهم كلهم يتسحرون في غرفة الطعام المجابله
أم عبدالله: شو ياكن بطيتن ..
حمدوه: أصلاً نحن ما رقدنا ..
شيخه: حسبي الله على عدوكن .. شو مقعدنكن لي هالحين
حمدوه: نظارب هالكتب اللي ما رمنا نخلص
سلامه: تعالن تسحرن ..
حمدوه: لا ما نريد ..
شيخه: تعالن .. تعالي العنود
العنود: لالا بروح .. خلاص تعبانه
بوسالم: الله يوفجكن وايسرلكن
حمدوه: آميين .. عمي ..أبويه ادعوا لنا
طلعنا من الباب الوراني ووصلني حمدوه وشمسوه لين البيت .. من بداية رمضان ونحن نقدر نطلع في أي وقت .. هالشهر يعطينا احساس بالأمان ما أدري ليش.. دخلت البيت من الباب اللي ورا ورحت حجرتي على طول.. توضيت وتسننت .. قريت قرآن .. صلت وادعيت ان الله ما يضيع تعبي .. الله يرحم أبويه وأمايه .. عقب ما خلصت انسدحت ببرقد .. من سمعت دعوة بو سالم وأنا قلبي يعورني .. دايمأً أبويه الله يرحمه كان يدعيلي بهالدعوه يوم يوصلني الامتحان .. الله يرحمك يا أبويه ..
.......
الجــــــــــــــــــــــزء الـــــــــواحــــــــــــــــــــــــد والـــــــــــــعـــــــــــــــــشـــــــــــــــ ـرين

الساعه 12 الظهر قمت مختبصه .. ماحد قعدني.. أبغي أراجع بعض الصفحات .. قعدت أدرس من الساعه وحده وما طلعت من البيت .. الساع أربع ونص طلعت ملابسي وخليت لامي تكويهن .. شليت كتابي ورحت عند شمسوه .. أول ما دخلت بيت أم عبدالله شفتها قاعده برا وين كنا البارحه قاعدين ندرس..
العنود: السلام عليج
شمسوه: وعليج السلام
العنود: خلصتي ؟
شمسوه: أراجع بعض الصفحات ..
العنود: هذا منتصف وجذيه الله يعين الفاينل
شمسوه: حشى ذبحنا .. مايقول رمضان وماشي وقت ..
العنود: حمدوه وين ؟
شمسوه: توها كانت طالعه بتطلع لها ملابس
العنود: أحس اني تشبعت .. خلاص
شمسوه:أنا قبلج
العنود: شي عندج امتحان باجر؟
شمسوه: لاء .. يوم السبت .. وانتي؟
العنود: عندي الاسبوع الياي والسبت وثلاثا
شمسوه: شوو؟
العنود: عربي وIT
شمسوه: متى بتخلصين؟
العنود: الخميس الياي عليه رياضيات
شمسوه: انشالله .. خلينا ندخل أنا ما أقدر أدرس خلاص
رحنا حجرة شمسوه طلعت ملابسها .. أذن المغرب رحنا فطرنا وصلينا وعقب رحنا الخيمه ..
أم عبدالله: حشى يا هالبنات ما بغن ياكلن القوت الزين
أم حمد: عويش وين اليوم ؟
آمنه: تقول ما تبغي ؟
أم عبدالله : بالدور تراهن
حصوه: عويش عندها امتحان الحين؟
آمنه: لالا ما عندها
شمسوه: قومن بسكن خلنا نروح
سلامه: أنا راعيهن .. جيه كلن
شيخه : متى امتحانكن ؟
العنود: الساعه ثمان
شيخه : بعدها الساعه ست ونص
شمسوه: لين يخلصن يبالهن ساعه
أم عبدالله: أس قطعيها هالرمسه .. عنبوه تامات ماينعرف لكن ويه من مقفا رضن من هالثريد وهالعيش ..
يلسنا ناكل وكل ما بغينا نقوم نحصل هزبه من عموه..
حمدوه: لااااا إله الا الله
شمسوه: بس تعبت بسطل في الامتحان
أم حمد: برايكن عيل قومن
حمدوه: عقب شو..
خلاص أحس اني مب قادره أوقف من كثر ما كلت .. عقب ما طلعت عنهن رحت البيت ...غيرت ملابسي واتصلت حق نوروه اتولهت على يدوه ..
نوروه: ألو
العنود: السلام عليج
نوروه: وعليج السلام .. هلا والله
العنود: شحالج
نوروه: بخير ونعمه
العنود: انتي وين ؟؟
نوروه: بيت خالي بعدنا ما ردينا
العنود: يدوه عندج ؟
نوروه: هيه
العنود: اعطيني اياها
...
أم غيث: ألو
العنود: مرحبا بهالصوت
أم غيث: فدييت عمرج .. شحالج العنيدي
العنود: يسرج الحال .. انتي شحالج
أم غيث: أنا الحمدالله .. انتي علومج
العنود: علوم الخير والله ..
أم غيث: فدييت عمرج يا بنتي
العنود: يدوه عليه امتحان الحين ادعيلي
أم غيث: الله يسهل امتحانج يا رب .. الله يعينج
العنود: فديت روحج يدوه
أم غيث: الله يوفقج يا رب ..
العنود: برايج يدوه .. أنا بروح الحين تامرين على شي
أم غيث: سلامة قلبج غناتي
العنود: سلمي على اللي عندج
أم غيث: الله يسلمج
سكرت عن يدوه .. ما أدري شو الاحساس اللي خلاني أحس انها كانت تصيح .. يمكن من نبرة صوتها .. فديت روحها ..انتبهت للساعه كانت سبع وربع .. رحت بيت أم عبدالله دخلت بيت سلامه .. رحت حجرة حمدوه
العنود: خلصتي ؟
حمدوه: أتريا هالعنز تييب العباه والشيله
العنود: بسرعه ما فينا نتأخر تحيدينه ..
حمدوه: شميس لين تخلص عاد
العنود: يالله خلينا نروح لها
نزلنا تحت كانت البشكاره توها داخله وشاله عباة حمدوه لبستها وطلعنا شفنا شمسوه توها طالعه من البيت ورحانا صوبها ..
شمسوه: اتصلتن حق الدريول
العنود: لاء
شمسوه: تعالن بروح أييب تيلفوني خليته في بيت يدوه ..
مشينا لين بيت أم عبدالله وأنا أتصل حق سليم ..
سليم: ألو
العنود: ألو سليم تعال بيت بابا عبدالله بنروح الجامعه
سليم: أنا في صناعيه
العنود: شو تسوي في الصناعيه
سليم: هذا سياره سوي تبديل آيل
العنود:انزين برايك
...
العنود: سليم في الصناعيه لين يرد بنتأخر
حمدوه : اتصلن حق غرين
اتصلت شمسوه حق غرين ..
غرين: ألو
شمسوه: غرين تعال البيت بيروح جامعه
غرين: وين جامعه أنا سير كارفور
شمسوه: شو تسوي كارفور
غرين: هدا فيه ماما آمنه .. وماما عايشه
شمسوه: شوووو .. أنا عندي امتحان خلهن في كارفور ورد البيت
غرين: شو هدا .. ماما عايشه يريد شارع كليفه بادين..
سكرت شمسوه
شمسوه: شو هذا منو بيودينا الحين
حمدوه: ليش غرين وين؟
شمسوه: ملتقع يودي عويش وعموه كارفور وشارع خليفه
العنود: والحين ؟
طلعت حمدوه من الصاله ولحقناها .. رحنا الخيمه .. كانت عموه أم عبدالله وسلامه وشيخه قاعدات ..
حمدوه( تصارخ): شو هالحاله كل دريول في مكان
أم عبدالله: واللغثه.. حمدوه شعندج
شمسوه: الساعه سبع ونص وسليم في الصناعيه يعابل السياره وغرين نافد كارفور
سلامه: شعنده في كارفور
حمدوه: مودي عويش وعموه ما أدري شو عندهن
أم عبدالله: واقع بياخذن شي للعيد
شمسوه: ونحن ما نمتحن عشان الشيخه عويش تعيد بلس يديد
شيخه: شميس أس قطعي ..
شمسوه:أمايه نحن من متى ندرس ونداوم آخر شي ما نمتحن بسبتهن ..
حمدوه: يعني عموه تدري انا عندنا امتحان وسليم فالصناعيه .. شو هالحركه البايخه ..
العنود: صبرن بشوف علي والا سالم
سلامه: سالم من متى طالع
شمسوه: لااااااااااااااااا إله الا الله شو هذا ما شي وقت ..
اتصلت شيخه حق علي ..وحظرته عقب موت رضا يودينا ..
شيخه: روحن علي يترياكن في السياره
طلعنا من الخيمه ربعان .. لين نوصل الجامعه بتوصل الساعه ثمان .. وصلنا عند السياره وركبنا ..
حمدوه: يالله تحرك علي فديتك ماشي وقت
علي: أنا أبغي أعرف الدريوليه ثنينه وين ؟؟
شمسوه: واحد متفيج يغير آيل السياره الحين .. والثاني حظرة الآنسه عويش سايره كارفور
العنود: لا تحطين في ذمتج يمكن آمنه تبغي شي
شمسوه: محد غيرها عويش العنز..خلني أدري ان عندها امتحان ان ما طرشت كل دريول مكان ..
وصلنا الجامعه الساعه ثمان ضبط .. نزلنا الرسبشن ومن طلعنا منه نمشي بسرعه ..
شمسوه: عنودي الدكتور ما بيقول شي حق حمدوه انتي لا تتمشين شراتها
العنود: تراني أمشي ما أقدر أكثر عن جذيه
شمسوه: سوي شراتي
العنود: شو؟؟
وقفت شمسوه ورفعت عباتها وتنورتها وروووووووووح ربعت عنا .. أنا بعد شو يخليني ألعب ربعت في طولها وخلينا حمدوه ورانا .. ثمان وسبع دقايق دخلنا المتعدده اللي في سته وستين .. قعدت وعطاني الدكتور الورقه وشمسوه قعدت ورايه .. نحن أول ما دخلنا حصلنا هزبه خفيفه من الدكتور .. الشيخه حمدوه دخلت عقبنا والدكتور ماقالها شي وصلها لين الكرسي عطاها الورقه وقعدت تحل
شمسوه(بهمس): طالعي انتي نحن هزبنا وهيه ماقالها شي
العنود( بهمس): ساحرتنه الينيه.
شمسوه(بهمس): ان ما خبرت سالم عليها ..أنا براويج يا حمدوه
الدكتور: اششششششششششش .. بس يابنات انتوا اللي ورا
من نقع الدكتور سكتنا وابتدينا نحل .. عقب ما خلصنا الامتحان طلعت أنا قبلهن ووقفت ويا منى أترياهن .. طلعن شمسوه وحمدوه في نفس الوقت
العنود: هاه شو سويتن ؟
شمسوه: الحمدالله
حمدوه: يعني
العنود: هب منج .. من الراحه اللي محصلنها هب نحن حصلنا هزبه
حمدوه: انتي شو سويتي ؟
رفعت ايدي بحركة تبين ان الا متحان توب ..
شمسوه: حية فواد من متى تكرين في الكتاب
العنود: قل أعوذ برب الفلق..قولي ماشالله
شمسوه: ماشالله ...
ردينا البيت الساعه تسع ونص ..نزلنا بيت أم عبدالله ورحنا الخيمه عند الحرمات
العنود: السلام عليكم
الجميع: وعليكم السلام
شيخه: هاه بشرن
حمدوه: الحمدالله ..
حصوه: حشى سويتن زوبعه قبل ما تروحن
حمدوه: هيه عيل شو تبينه يحطلنا صفر في الامتحان عزالله مانجحنا
حصوه: انزين الناس يردون يغيرون ملا بسهم .. انتن يايات بعبيكن
شمسوه: دام افتكينا من المجتمع العله خلاااص راحه .. المهم ناكل
قعدنا على الفواله وعقب ما كلت رديت البيت وعلى طول رقدت من التعب .. وباجر ورايه دوام .. شموه.. شموه وين ماتسأل ولا تتصل .. اتولهت عليها مديت ايدي وسحبت التيلفون واتصلتلها ..كالعاده ما ترد .. اتصلت لها مره ثانيه
شموه:ألو
العنود: الحمدالله على السلامه
شموه: ههه الله يسلمج
العنود: انزين قولي عندي ربيعه ما أدري شي عنها .. من عقب ما باركت لج بالشهر ما رمستيني
شموه: عنودي فديت روحج .. أنا في الجامعه وما أقدر أرمسج وايد لأني ما عندي سماعه
العنود: شو تسوين في الجامعه؟
شموه:متواعدين كلنا بنات الشله
العنود: أوكي .. برايج عيل
سكرت عنها وأنا أحس بغصه منها ..شموه تبتعد عني وهالشي أنا أعرفه بس ساكته عنها أبغي أشوف آخرتها لشو بتوصل.. أنا وشموه من أيام الروضه مع بعض ..ما أتخيل حياتي بدونها .. كاتمه في خاطري وساكته عنها وبالنادر ما أتشره عليها .. بالعكس هالشي بيبعدها أكثر.. وأنا هالوقت صدق محتاجتنها فيه .. من وعيت على هالدنيا عرفت أبويه وخسرته .. أمي وخسرتها .. شموه أنا مش مستعده اني أخسرها .. آآآآآآآآههههههههه
أفضل بدال هالوسواس أرقد لأني باجر برد وبدرس..
.....
تمر أيام رمضان بسرعه كبيره وأبد ما نحس بها .. اليوم عليه آخر امتحان .. من قمت عند السحور ما رقدت .. فيني رقاد وباقي عن امتحاني ثلاث ساعات .. امتحاني الساعه وحده ونص .. ما أدري ليش هالامتحانات يوم الخميس .. حابين الجامعه وايد .. كنت قاعده في الصاله ودخل حمد..
حمد: السلام عليكم
العنود: وعليكم السلام والرحمه
حمد: هاه أخبار الدراسه؟
العنود: لا اتخبر .. أحاول أفهم الدرس أحل المسأله تطلع غلط
حمد:أفاااااااااا
العنود: شدراني بهالكتاب العله ..
حمد: لا ما يصير وانتي تنحتين هالكتاب من متى
العنود: ادعى لي انته بس
حمد: الله يوفقج ..
قعد حمد يقرا الجريده وأنا أدرس .. الساعه 12 دخلت الحجره صليت .. غيرت ملابسي ورحت الجامعه .. اتصلت حق روضه أبغي أروح عندها هيه ومنى .. كانن عند النافوره .. رحت عندهن نحاول نفهم بعض ونتساعد .. الساعه وحده ونص دخلنا الصاله الرياضيه نمحتن .. دخلت وقعدت في مكان كلاسنا .. أترياهم يعطوني الورقه وأشوف البنات .. شفت شموه داخله ويا ربعها وتضحك وتسولف ... حسيت بوله كبيييير لها تغارقن عيوني كيف هالانسانه اللي من عرفت الربعه عرفتها والحين ما أدري بشي عنها.. حسيت بالغيره من ربعها أنا الأحق بهالوناسه والسوالف وياها عنهن ..
روضه: العنود .. العنود
العنود: هااا
روضه: الاستاذ يبغي البطاقه
لفيت شفت الاستاذ واقف على راسي من الصوب الثاني .. طلعت له البطاقه وعطيته اياها ..
سلمونا أوراق الامتحان .. من البدايه أول سؤال كان صعب .. مشيت باقي الأسئله باللي أعرفه ودارستنه ..مستوى الامتحان كان واااايد صعب .. توقعته صعب بس مب لهالدرجه .. ماطلعت من القاعه لين آخر الوقت .. الساعه ثلاث ونص .. طلعت وأنا أسمع أذان العصر .. رحت عند النافوره شليت كتبي وأوراقي .. سمعت حد يزقرني لفيت شفتها نوال ربيعة شموه ..
العنود: هلا
نوال: السلام عليج
العنود: وعليج السلام
نوال: شحالج العنود
العنود: بخير ربي يسلمج .. انتي شحالج
نوال: يسرج الحال
العنود:...........
نوال: شو سويتي في الامتحان؟
العنود: الحمدالله
نوال: بتروحين البيت؟
العنود: هيه خلصت
نوال: بغيت أكلمج شوي
العنود: خير انشالله
نوال: في موضوع بخصوص شموه بغيت أكلمج فيه
العنود( بخوف): شو فيها شموه؟
نوال: مافيها شي .. بس انتي قعدي وأنا بتكلم وياج
العنود: بروح أصلي قبل
نوال: خلاص بروح وياج أنا بعد
مشيت ويا نوال رحنا المسيد صلينا العصر .. وطلعنا من المسيد قعدنا عدال المسيد نتكلم
العنود: خير نوال ؟
نوال: ممممممم شوفي العنود .. أنا ما أعرف من وين أبتدي بس لازم أطلع اللي في خاطري لأني أنا انسانه ما أقدر أخلي في خاطري شي على أي حد
العنود( باستغراب): عليه أنا !!؟؟ ليش أنا من وين أعرفج عشان يكون شي في خاطرج عليه ؟؟
نوال: صح ما تعرفيني .. بس أنا أعرفج من شموه
العنود: وشو في خاطرج عليه
نوال: أنا من عرفت شموه صارت غاليه عندي لدرجه ما تتخيلينها .. يعني حبيتها
العنود( باستنكار): حبيتيها!!
نوال: هيه إذا ما كان عند مانع يعني ..
العنود: أوكي هذي مشاعرج أنا مالي دخل فيها

نوال: حتى هيه حبتني .. ومن عرفتها وهيه تتكلم عنج .. بصراحه أنا ما أتحمل علاقتج القويه فيها لهدرجه
العنود: So
نوال: ما أدري
العنود: ما تدريين!! الحين يايه تقوليلي هالكلام عشان في النهايه تقوليلي ما تدرين !!؟
نوال: يعني ممكن تبتعدين عن شموه
العنود: أنا في حياتي ما مر عليه أو سمعت وحده تطلب من الثانيه تبتعد عن ربيعتها .. يايتني تبيني أخلي ربعتي اللي أنا وياها من 16 سنه بس لأنج تغارين ..
نوال: أنا ما تعودت يكون شي في خاطري وما أحصله
العنود: والله شموه مش بدله والا لعبه عشان تكون في خاطرج وتحصلينها .. وهالدلع تدلعيه على حد غيرنا ..علاقتي في شموه ما بتنقطع إلا إذا شموه طلبت مني هالشي بنفسها
نوال: سمعي أنا مثل ما قدرت أبعد شموه عنج كل هالفتره أقدر اني أقطع علاقتج فيها
العنود: جربي وشوفي .. صدقيني محاولاتج فاشله أنا أعرف شموه أكثر عنج ولو قدرتي تخلينها تبتعد مستحيييييل تقدرين تخلينها تقطعني ..
شليت كتبي ولفيت عنها بروح الرسبشن وشفت شموه تمشي صوبنا من بعيد .. بس ما قدرت اتحمل وقفتي .. مشيت بسرعه رايحه الرسبشن وأنا كل دموعي اللي حبستها من بداية ما تغيرت عليه شموه لين اليوم .. طلعتها الحين ..وصلت الرسبشن وأنا منهاره من الصياح .. دخلت الحمام مسحت دموعي وغسلت ويهي أكثر من مره بس دموعي بعدهن ما وقفن .. طلعت من الرسبشن ودخلت مخج .. رحت فوق الطابق الأول وقفت وأنا مجابله الرسبشن وأحاول أهدي نفسي ما أقدر أرد البيت وأنا بهالحال .. رديت الرسبشن مره ثانيه الساعه أربع وربع .. اتصلت حق غرين وسليم كلهم ما يقدرون اييون .. ما أدري شو عندهم من الشغله .. قلت أتصل حق غيث.. منها يردني البيت ومنها أشوفه هالاسبوع ما شفته يوم الجمعه يوم رحت لهم.. __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
ياناس وش فيها الدنيا ماترحمـ	شيخ المزهر	شعر و خواطر	14	04-27-2010 10:56 AM
الدنيا ملعونة ملعون ما فيها إلا ......}	الطيف	الإسلام والشريعة	10	01-19-2010 11:02 AM
لماذا لا يُقبل ان يقال ان منهج حركة فتح هو نفس منهج الوفاق ؟؟؟	محروم.كوم	منتدى أخبار المواقع والمنتديات العربية والأجنبية	0	09-11-2009 05:20 AM
مطلوب أرض للإستثمار تصلح لإنشاء مدرسه أو بترخيص مدرسه	محروم.كوم	منتدى أخبار المواقع والمنتديات العربية والأجنبية	0	06-10-2009 09:00 AM
عمر الدنيا ماجرحت حد .. من أكثر الأغانى التى تعبر عن الحب والحسرة والحزن والفرح.نغمة	محروم.كوم	منتدى أخبار المواقع والمنتديات العربية والأجنبية	1	04-07-2009 10:44 PM