>>((شـــــــــــوق زايــــد))<<

النيادي مجنون · #1 08-03-2008, 03:27 AM

مرحبا الساع
شحالكم شخباركم
هاذي القصه قريتها وعيبتني وحبيت انزلها لكم

الجزء الاول
زايد بن سعيد من صغر سنه معروف انه ولد ابوه تعلم من ابوه السنع والفزعه عند المشدات وهو شـــــــــــــاعـــــــــر
..زايد عمره 22 سنه يدرس في الجامعه وهو وايد ويا ولد عمه راشد بن محمد اللي عمره 21سنه
ويدرس بعد في الجامعه…
زايد كان واعي الضحى عالساعه 11 تقريبا ودش الحمام يسبح عشان يسير الجامعه..
ضهر من الحمام وشيك على تيلفونه اللي فيه 5 مكالمات لم يرد عليها..3 ربعه وثنيتين راشد
قام ودق على راشد
راشد: مرحبا ملايين بولد عميه
زايد: مرحبا الساع بوسنيده ..
راشد: مصبح ادق عليك ليش ماترد
زايد: كنت راقد توني ناش انت شعندك من صباح الله خير مأذي العرب
راشد: ومنو ها العرب اللي اذيتهم؟؟؟
زايد: انا يامال الزين
راشد: وانته الحين استويت عرب... الا اخويه
زايد: الا اقول
راشد: قول
زايد: قل تم
راشد: تم وانا بومحمد
زايد: حلو.. اخطف عليه
راشد: ليش وين سيارتك..
زايد: هنيه في البيت بس ابا نسير الرباعه..
راشد: فالك طيب يالشيخ اليوم اصلا دومانه مع بعض... ايه صح انا قلت تم بس على شرط
زايد: اطلب وانا اخوك وش شرطك
راشد: ههه تغدينيه على حسابك
زايد: مره ماطلبت..
راشد: يلاا تلبس وبمرك
زايد: ترتيب..
راشد: تامرنا بشي الغالي
زايد: ابدا سلامتك الطيب
راشد: فداعة الله....

زايد تلبس ونزل شاف امه يالسه فدنق على راسها.
زايد: السلام عليج ام زايد
ام زايد: وعليك السلام يابعد روح ام زايد
زايد: فديتج والله يعلني ماخلى منج
ام زايد: فديتك زيود اقرب تريق
زايد: انا مابتريق الا اذا لقمتينيه
ام زايد: وانت صغيَر القمك
زايد: خلاص عيل انا بسير
ام زايد: والريوق.. والله ان ماتريقتك لزعل عليك
زايد: فديتج والله امزح.. وحد يقدر على زعل الغاليه
تريق زايد وباس امه قو وقام .
زايد ولد امه البجر وهي وايد تحبه وماتحب حد يزعله ابد.
عنده 3 خوات سلامه 19 سنه
والعنود 16 سنه
واليازيه 8سنين
وعنده اخو واحد محمد 5سنين

راشد كان من ساعه ظاهرمن البيت بس كان يحوط ومشغل المسجل ومطول على الاخير
ومستانس ...راشد دومه ربشه ويحب يسوي مقالب وحركات
راشد الوسطاني في اخوانه
اخوه العود حميد عمره 25
واخته شمه 23
وبعدين اهو 21
وعقبه الريم 20
ميثه 18سنه
سعيد 15
وساره 10 سنين

راشد راعي بنات ودوم يرفع ضغط ابوه لانه مايسمع الكلام بس هو وايد يحب اهله ومايحب احد يغلط عليهم
راشد دق على زايد عسب يسيرون الجامعه
زايد: مرحبا باخويه بوسنيده
راشد: مرحبا بك ملايين وان زادن لا باس
اقول زيود تزهبت
زايد: مره اترياك
راشد: زيود اتكشخت
زايد: ايه يلا اترياك
راشد: زيود كاشخ امره
زايد: بوسنيده انت فيك شي
راشد: ياخوك عقب الجامعه بنشوف غراشيب يعني لازم تظبط امورك
زايد: الله يلعنك خلص تعال لا ادق سيارتيه سلف واطبك
راشد: افا افا ياولد سعيد ماتوقعتهامنك
زايد: رشودوه ترا والله ماليه بارض لمصاختك بتيني ولا
راشد: عند الباب انا الحين بعمي عيونك بالفول ليت
زايد: صدق انك ماتعرف السنع وصكر في ويهه وركب السياره

راشد: انا تصكر في ويهي ياولد شمه
زايد: عاد الا امايه تاج راسك
راشد: فديتها خالتيه ماسلمت عليها خلنيه بنزل اسلم عليها
زايد وهو اير راشد: ياولد الحلال تاخرت على الدوام..
راشد: الحين منو اللي مايعرف السنع ؟؟
زايد: لا حول
راشد: خلاص خلاص بنسير بس اذا سالتني خالتيه ليش ماسلم عليها ولا مرها بقولها ولدج هب راضي...
زايد: الحين انا اللي بستوي مانعنك من وصل خالتك عشان مره وبس عشان ما تاخر من الجامعه
عيل والله لا اقوللها انك انت اللي ماتبى تسلم عليها
راشد: خلنا نسير الجامعه احسن.....
زايد: تراك ماتيي الا بالعين الحمرا
راشد طالع زايد بنص عين ولف ويه

زايد شاعر ومعروف اهو بين كل اللي يعرفونه انه السانه متعلق بالقصيد ويعد دوم القصيد في حزة الموقف
في بيت سعيد....بوزايد

ام زايد يالسه تقهوا مع بنت عمها ام سيف
ام سيف يايبنها ولدها نهيان 20 سنه وهو هب ماخذ شي هالكورس اونه يستريح من الجامعه
نهيان عق امه وسار وقالها يوم تخلص تدق له
العنود واليازيه كانو في مدارسهم..وحمود كان في الروضه وسلامه كانت في الكليه ويوم الاربعا اهي تظهر من وقت يعني على الساعه وحده تقربيا

ام زايد: انتو شخباركم اربكم طيبين
ام سيف : والله بخير وسهاله مع هالعيال ونحايلهم نبي نيوزهم وهب راضيين
ام زايد: هذا شرع العيال كلهم يوم هم صغار يبون العرس وامره يوم يدخلون الجامعه مايبونه
ام سيف: والله سيف لو يسمع كلامي ويعرس ابرك له
ام زايد: كم قد له سيف الحين
ام سيف: حول السته وعشرين
ام زايد: قده شيبه
ام سيف: بسم الله على ولديه ماهب شيبه.. الا ريال ينحسب لكلامه الف حساب
ام زايد: الا اقول ام سيف اخبار بنياتج قدلهم شهر بيتنا ما شمو ريحته
ام سيف: والله تدرين يا شمه البنات الصغار في المدارس و علايه نبيها في الجامعه واول ماتي ادور الشبريه
ام زايد: الله يعطيهم الصحه والسلامه وخليهم لج ولبوهم
ام سيف: تسلمين .. الا زايد ماله حس هالايام وينه
ام زايد: والله في ذا الجامعه وعقبها يسير ويا ولد عمه كل واحد ناشب في ريول الثاني
ام سيف: ههههه ...
ام زايد : هذا تيلفوني يدق اكيد سلامه نسيت اطرش لها الدريول
ام سيف: عيل انا استسمح منج بعد الناس قدهم صلاه
ام زايد: وين ام سيف غداج اليوم عندنا
ام سيف: اسمحيليه ام زايد والله العيال في البيت وشيبتنا اخافه يزعل عليه عقب شاللي بيرضيه
ام زايد: اذا السالفه فيها شيبتكم ابويه سيري يحفظج الرحمن
ام سيف : يلا الغاليه تامرينا بشي
ام زايد: ابدا سلامتج بس خلي البنيات يون والله ماشفتهن من مده
ا م سيف : فالج طيب بالباكر بتحصلينهن عندج

وسارت ام سيف

سلامه كانت توها يايه من الكليه عقت عبتها وبدلت وتيددت وصلت عقب حدرت تحت للغدا
ابو زايد: مرحبا بللي ما تنشاف
سلامه: هلا ابويه خشمك..
ابو زايد: اليوم زايد ماعنده الا محاظره وحده ليش ماعود البيت؟؟
ام زايد: ساير ويا راشد بيتغدون خاري
ابو زايد: سلامه تغدي بلاج ماتغدين
سلامه: مادري صح يوعانه بس ماليه خاطر في الغدا
ام زايد: مطاعم ماشي
سلامه: امايه دخيلج بدق على الكوخ
ام زايد: بو زايد تسمع هالرمسه
بو زايد: هذي النعمه جدامج ليش ما تاكلين منها
سلامه: ما يهنالي الا اكل الكوخ
بو زايد: هيه يومه هذا اربيعج الهنيدي يسويه
سلامه: يخسي ذاك بو ريحه
بوزايد: دامه بو ريحه شو تبين فكله
سلامه: والله انا باكل اكله ماباكل الريحه
بوزايد: انزين سيري طلبي حد زاخنج
ام زايد: تقول هالرمسه يا بو زايد وانا يالسه ؟؟
سلامه: برايكم تناقرو وانا بسير ادق...
شردت سلامه منهم وسارت ادق على الكوخ...

زايد وراشد كانو توهم ظاهرين من الجامعه وسايرين صوب المول
زايد: شغل غنيه حمد العامري اليديده..منهوالذي ذليت لجله..
راشد: أي وحده... هذي
زايد: هيه هذي ...
راشد شغلها...
وزايد تنهد بصوت عالي
راشد: بلاك زيود
زايد: والله هالغنيه عجيييبه
راشد طول على الاخير ومسرع...
....... زايد تعيبه بنت عمه الريم اخت راشد بس هو ابدا مايحب يبين لراشد ...

نزلو وتمو يتمشون في المول
راشد: تشوف هذي اللي معها شنطه بيضه
زايد: ايه... شيفه جنها بشكارتنا
راشد: الله يقطعك اقسم بالله انها غرشوبه
زايدوهوياشر على راعية محل شعرها فلافل وســــــــــــــوده: شف شف بوسنيده وحده غرشوبه
راشد وهو يتلفت يدور: وينها وينها
زايد :ذيج
راشد: الله يخسك انا الحين مستواي ذا العبدات ... امحق ولد عم في ذمتيه
زايد: ااسمحليه والله اليوع ذابحنيه ..خلنا نسير نتغدا وعقب نصيع على كيف كيفنا ها شقلت
راشد: يلا عيل ...
وسارو يتغدون وعقب صاعو على قولتهم... وطبعا ماخلو بنيه في المول الا ورقموها وعقب ردو البيت.

الريم كانت يالسه في حجرتها.. مشغله المسجل ومنسدحه على الشبريه....
الريم.. اربيعتيه رويض من مده مادقيت عليها احسلي ادق عليها اسلم
شلت تيلفونها ودقت على ربيعتها روضه...
دق دق محد رد....
الريم:صدق اني متفيجه ادق على العرب هالوقت والناس ارقود
نزلت تحت تدور شي تشربه...
وشافت اخوها راشد توه داش البيت...
الريم: ييت والله يابك تعال اقعد ويايه ..
راشد : والله ودي بس زيود في الميلس بسير صوبه بس ياي ادور البشكاره عسب تسويلنا جاهي حليب
الريم: افا عليك انا بسير اسويه ..
راشد : خلاص عيل بسير انا..
الريم: اقول بوسنيده..
راشد: عونج
الريم: عانك الله.. ماتبون شي ثاني
راشد: اذا في مابنقول لا انا وولد عمج ماهمنا الا كروشنا
الريم: هههههههههه
سرات الريم تسويلهم
راشد سار صوب زايد...
زايد: بلاك تخرت عليه بغيت اسير
راشد: هالبشاكير ما حصلتهن يعلهن الدحق
زايد: هب لازم خلنا بنشوف الفلم بشغله..
راشد: لا اتريا احلى جاهي حليب ذقته في حياتك ياي على الطريق
زايد: ليش منو مسويه
راشد: محد
زايد: رشودوه
راشد: بشكارنا بيسويه
زايد: لايكون هذا بو ريحه
راشد: هيه هو
شوي حد يدق الباب وتروعو من الدقه
زايد: هذا شكله بشكاركم... دش دش محد غريب...
راشد: يالخايس جب
زايد: تستحي من الهنيدي هذا
الريم تسمع حشره داخل وابطى عليها راشد ماظهر
راشد وهو ساير صوب الباب.. سوري ريموه ابطيت عليج
الريم: لا ماعليه بس اقول ماحطيت سكر السكر هنينه في الصحن الصغير.. تسلمين
زايد من بعيد: شحالج يابنت العم
راشد: ملقوف ما عليج منه
زايد: رد السلام واجب
راشد: تقولك بخير بخير اسكت عاد ..... دش راشد وهو مطنقر
زايد: بلاك ماقلنا شي ... منو هذي الريم ولا ميثه
راشد: مايخصك
زايد: بلاغلاسه
راشد: الريم .. ارتحت خلنا نشوف الفلم
زايد: اقول ليش تقول احلا جاي حليب
راشد: اوف منك...
وتمو يطالعون الفلم.. وزايد خلص الدله... ومستانس

والسموووحه __DEFINE_LIKE_SHARE__

da1a3 · 08-03-2008, 03:50 AM

يلا أبي الباراااااااااااااااااااااااااااات

؟؟؟؟؟؟؟؟؟؟؟؟؟؟؟ __DEFINE_LIKE_SHARE__

النيادي مجنون · 08-13-2008, 03:11 PM

السموحه على التأخير
على اذان المغرب.. في حوش بيتهم
بو حميد: اقول ام حميد ترا انا بسير اصلي وعقب بسير عند قوم بو عبدالله عازمني على العشا.. تامريينه بشي
ام حميد: لا سلامتك بس تحمل على عمرك
بو حميد: يلا عيل وداعت الرحمن...
الريم يالسه هي وامها وسارو تلعب عدالهم
شمه وهي توايج من الباب: رييييموووو تعالي اشوي اباج
الريم: شو
شمه: اقول الريم شفتي الجرج مال تيلفوني.. ما حصلته
الريم: مادري ماشفته وجرجي بو سنيده شالنه ومادري وين دسه
شمه: تيلفوني مفضي والحين انا بظهر كيف جي؟؟
الريم: مادريبج شلي مال امايه
شمه: بليز حياتي ريماني بس قولي لمايه تعطيج اياه ابا اسير البس
الريم: امايه بتسير وياج
شمه: هيه اكيد...
الريم سارت صوب امها يابت الجراجه وعطتها شموه وسارت عقب برا عند امها
الريم : ميثوه وينها
ام حميد: ظنيه عليها امتحان... والله مايندرا بها صاكه على عمرها في هالحجره ... وتقول انها تدرس.. الله يوفقها خلاص اخر سنه وبتفتك...
ام حميد وشمه وفطامي سارو صوب السوق يبون يفصلون عبي وشيال
الريم يلست تحوس في البيت هب عارفه ش تسوي...
وسارت صوب حجرت ميثه
الريم: ميثوه... ميثوه فجي الباب
ميثه: ها
الريم: الناس يقولون نعم.. وبعدين الاخت وايد طربانا صمختي اذنيه من صوت المسجل
ميثه: صمخت اذنج... دشي دشي
الريم: انتي اونج تدرسين
ميثه: والله مصبح ادرس خلينا نسولف شوي
الريم: شعندج
ميثه: ماشي ماشي
الريم: رمسي يالدبه
ميثه: والله ملانه ماعنديه شي بس كنت ابا اسولف وياج
الريم: حتى انا والله ملانه كلهم سارو السوق وودرونيه انا وياج في البيت
ميثه: اشرايج نسير نتمشى خاري
الريم: وين في الحوش
ميثه : هيه
الريم: حر..
ميثه: انتي ما تستانسين الا وانتي مثلجه بس يلا ماعليه يلسي يلسي
الريم: الا ماخبرتج شفتي الكيمره اللي عند رشود
ميثه :كيمرة شو؟؟
الريم: كيمرة ديجتال رهيبه
ميثه: يالبطره هو حتى الكمبيوتر ماييلس عليه اونه راعي كيمرة ديجتال
الريم: خبرج عتيج يالشيخه الحين هو تحصلينه معسكر عالمسن
ميثه: من وين له ياحسره
الريم: ش كثر الكوفيات مالت النت
ميثه: وانتي صح من وين لج كل هالمعلومات
الريم: من بنت عميه الشيخه سلامه
ميثه: دامها تخبرج عن اخوج ما خبرتج عن اخوها
الريم: بلا سخافه هب فاظتلج انا .... وقامت الريم من عند ميثه وسارت حجرتها
ميثه في خاطرها.... هذي بلاها كل ما طريتلها هالصبي تعصب اللي يقول ماكان حبيب الطفوله؟؟؟

زايد كان في الصناعيه وشاف حميد هناك اخو راشد العود

زايد نزل يسلم على ولد عمه حميد
حميد : مرحبا بالقاطع
زايد: ماعاش من قطع بني عمه
حميد: انت اختفيت قلنا يمكن عرست ولا شي
زايد في خاطره ...وين اعرس والعروس عندكم.... : الفال لك انت العود عرِِس ونحن مره عقبك
حميد: خلنا نحصل عروس

الريم كانت يالسه في حجرتها وماتدري هي ليش سوت جي بس دوم يوم حد ييب طاري زايد تضايق..

دقت عليها رويض اربيعتها يوم شافت رقمها
الريم: هلا
روضه: هلا مليون .. اخبارج
الريم: لا باس انتي اخبارج.. من مده ما سمعنا هالصوت
روضه: بخير وسهاله... ننشد عنكم
الريم: نحن هني نشقح
روضه: هي صح ريموه قولي تم
الريم: تم وانا بنت محمد
روضه : تعالي انت وامج عرس ختيه
الريم: كم مره اخبرج انا عن هاالموضوع
روضه : احيدج قلتي تم ووعد الحر دين
الريم: فالج طيب بس اذا امي اقتنعت اوكيه
روضه: اتمنى الصراحه خاطري تحضرينه...
الريم: خلاص عيوني بحاول والله
روضه: واخابرج بعد
الريم: ماشي اخبار
روضه: مانخطبتي
الريم: فال الله ولا فالج تدعين عليه بالشقى
روضه: افا ليش
الريم: شبا في العرس الله يبعدنا عنه
روضه: مرد المره بيت ريلها
الريم: في شرعكم هب في شرعنا
روضه: انزين ماباركتيلي
الريم: على شو
روضه: نجحت واخيرا في المساق اللي معذبني
الريم: هيه والله شو دوامكم في الجامعه هالايام احسه مب حلو
روضه: الله يخليج اللي يقول دوام التقنيه طر..

الريم: هيه والله حلو وعموما مبروك عالنجاح كم يبتي
روضه : سي
الريم: المهم افتكيتي
روضه: اقول حياتي بخليج الحين يزقروني ظنيه بويه يباني
الريم: برايج عيل بس ها لاتقطعين
روضه: ان شالله حياتي وداعت الرحمن
الريم: وداعة الله

اليوم لي عقبه

في بيت بو زايد.....
سلامه كانت في حجرتها داشه المسن ويالسه تسولف ويا اربيعاتها
والعنود يالسه تطالع نجوم الخليج
ومحمد الصغير يالس يلعب قيم بوي
بو زايد وام زايد محد سايرين الجمعيه ايبون اغراض البيت...
سلامه... يالسه ترمس ميثه اللي كانت توها مخلصه دراسه ويالسه على كمبيوتر ابوها
سلامه: مرحبا ملاييين وان زادن لاباس
ميثه: مرحبا ببنت عميه الغاليه
سلامه: ش حالج ميثاني
ميثه: اشقح وانطح انتي اخبارج
سلامه : والله مانشكي باس ولا قد صابنا الياس .. ماغير معسكرين عالمسن طول اليوم
الا اخبارها الريم قوليلها الخايسه ليش مادق ولا تسال ولا احنا على بالها لعنبو حيها بنات عم نحن
ميثه: شوي شوي عليه اوكي بوصلها الرمسه.. بس هب على اساس نكن ارباعه؟؟
ومخبرتنها بعد ان اخويه فاج له ايميل ومادري شو
سلامه:ههههههههههههههههههههههههههه
انتي لو تعرفين دواهي اخوج ما كان رمستي
ميثه : فديته والله شفيه مب مالي عينج
سلامه: وهو اكيد مافيه شي من القصور لان دمنا واحد بس... الاخ فاج ثلاث ايميلات عنبوه وكلهن درازن من وين ملقط هالايميلات
ميثه: هههههههههه واخوج اربه اخير عنه
سلامه: ياحليله اخويه عنده واحد ومشي حاله فيه
ميثه: انتي يالخبله يوزي عن هالسوالف ..انتي حاطه جواسيس يتجسسون عليهم شو؟؟
سلامه: لا والله العصفوره تخبرنيه المهم الحين شلتيه الكريمه دشت بكون شوي مشغوله عنج
ميثه: برايج عيل
سلامه : خلاص يوم تشوفين الريم قوليلها يالقاطعه سلامه تباج في موضوع خطير
ميثه : اوكيك

زايد دش البيت وشكله من الصبح واعي..
سلامه ادقدق على اللاب توب ومانتبهت لزايد وهو داش
يا شوي شوي من وراها وروعها.. واللا تفر اللاب وتنقز من مكانه
سلامه: الله يخسك روعتني..
زايد وهو منسدح من الضحك على شكلها...
زايد: حشى لو مروع قطوه ما نقزت شراتج
سلامه: ماتعرف تنكت من وين ياي انت
زايد: احوط ادور الغزلان من صباح الله خير
سلامه: الغزلان جدامكم ولا ماتشوف
زايد: وينهم
سلامه: انا
زايد: دخيلج تراني اليوم متفيج لا تخليني اطنز عليج
سلامه: شو هب ماليه عينك
زايد: اقول سيري سيري سويلي شي اكله
سلامه: شو تبا
زايد: بيض
سلامه: ان شالله.. بس لا تصك الكمبيوتر
زايد: وقطعي طماط ورشي عليه ملح
سلامه: زين
اول ما لفت ويها مسك زايد اللاب وتم يطالع ش السالفه
وحصل حشره في المسن زايد ووبنات وايد .... الله يعينه

في هذا الوقت كانت الريم داشه تبا تهزب سلامه يوم تقول عنها قاطعه
وزايد يرمس ويا هذي ويغلس على ذيج وهن مب داريات ش السالفه
الريم: مرحبا
زايد: مرحبتين...
الريم: منو القاطع الحين انا والا انتي
زايد: اقول انتي منو؟؟
الريم : بعد نسيتي بنت عمج يالخايسه والله مافيج خير يالله باي
زايد: لحظه لحظه
الريم: نعم شو؟؟
زايد: كنت اغلس عليج
الريم: ماحيدج غلسه
زايد: انتي ميثه ولا الريم
الريم: صدق ماعندج مذهب باي
زايد: لحظه لحظه انا مب سلامه
الريم: منو وحده من ربيعاتها الغلسات
زايد: لا انا زايد
الريم تمت تطالع الشاشه منصدمه
الريم: اقول... يوم تشوف سلامه خلها ادقلي
زايد: منو اقولها
الريم: الريم..
زايد: ش حالج بنت العم
الريم: بخير وسهاله .. الحين انا بظهر تامرنا بشي
زايد: سلامتج الغاليه..
الريم ظهرت من المسن وهي معصبه ومنصدمه...
مايستحي... والله مايستحي __DEFINE_LIKE_SHARE__

♕ وليد الجسمي ♕ · 08-13-2008, 05:01 PM

تسلمين اختي على هالقصة بصراحة امبين عليها وااايد روعة

ربي يعطيك ألف عافية

نتريا البارت __DEFINE_LIKE_SHARE__

بحر_الحب · 08-24-2008, 12:08 AM

يسلمو

نتريا الباااااارت __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
أطيــاف الدخون الملون الجــديد مع أم زايــــد حياكم الله دوم	محروم.كوم	منتدى أخبار المواقع والمنتديات العربية والأجنبية	0	02-09-2010 10:50 PM
غلا زايــــد ..,	♥الشاعره الرومنسيــهـ♥	شعر و خواطر	4	08-21-2009 07:49 PM
عــــادات عــــرب زايــــد..... !	أم عفراء	التراث والحضارة	11	08-16-2008 12:54 AM
ماذا قاال الشيخ زايــــد قبل وفاااتـــه	da1a3	الشيوخ و رؤساء الدول	3	07-10-2008 11:48 PM
ابـــــا فزعتكم يا أعضااء منتديات استراحة زايــــد..	صقردبي	الإستراحه العامة	3	04-27-2008 01:21 AM