<div align="center"><s>الجـــــــــــــــــــــــــزء الثــــــــــــــــــــــــــــاني</s></div>


يوم الجمعه... عقب العشا
الريم ظهرت من حجرتها وسارت المطبخ تييب لها شي تاكله ويظهر في ويها راشد
الريم: مرحبتين بللي ما ينشاف
راشد: اهلين اقول ريموه سيري عند البشكاره خليها تزين دله جاهي حليب سرعه
الريم: ليش عند عندك
راشد: هيه بن عروه
الريم: ماحيد حد من ربعك اسمه بن عروه
راشد: زايد ابوكشه عندي يعني منو غيره
الريم من سمعت زايد تذكرت يوم كانت على المسن..عفست ويهها وسارت
سارت صوب المطبخ وخبرت البشكاره وظهرت..

حميد كان يالس في الميلس وياهم وظهر عنهم وشاف الريم وهي يايه
حميد: ريموه
الريم: عيونها
حميد: تسلم عيونج.. بوسنيده يبا اللاب توب مالج
الريم: اووف اكيد بيخربونه
حميد: خلاها تتحرطم وسار فوق حجرته
الريم ودت اللاب توب ..
في الميلس راشد وزايد تمو ينزلون صور يوالتهم في عرس واحد من ربع زايد... وزايد كان يايب سيدي فيه برنامج توضيح صور
فتمو يلعبون بالفيديو مال التيلفون في اللاب توب لين ماصار جنه مصور بكيمره فيديو عاديه....
عالساعه 3 تقريبا زايد سار عن راشد وفي ذيج الحزه الريم كانت راقده لانها كانت وايد تعبانه فدش راشد عليها حصلها راقده فحط اللاب توب عالطاوله وظهر
...................
زايد عنده اربيع وايد يعزه اسمه هزاع وهو من هل الوثبه
وكان عازم زايد وراشد على يلسة بيت شعر مورا الضو فيه وعشاهم قعود..... وطبعن هذي الاغراءات خلت زايد وراشد يسيرون غصبن عنهم..... فكانو مواعدينه يوم السبت بعد صلات المغرب ....
........
الريم كانت واعيه الصبح وحصلت اللاب توب محطوط على الطاوله قامت غسلة ويها وسبحت وظهرتلها ذيج الدراعه المخوره دخنتها وعطرتها سحت شعرها وعقب حطت دهن عود على خشمها وظهرت تسلم على ابوها وامها
نزلت حصلت ابوها يالس خاشمته ويلست تتريق
الريم: ابويه وين اليميع مختفين محد هني
بو حميد: والله اخوانج في سبات عميق ... وخواتج نفس الشي وامج تعابل في المطبخ مع البشكاره
الريم: خلاص عيل بسير اساعدها انا
بوحميد: لا الحين بتي سارت بس تهد على البشكاره مادري شمخربه وين سايره بتسيرين ريحتج عود وبتردين ريحج امحق
الريم: فديتك ابويه اصبر دقيقه وبي اوكيه
بوحميد: ماعليج مني جان بتسيرين حجرتج سيري
الريم: فديتك ابويه ما بتاخر عليك
سارت تربع حجرتها تشيك على اللاب توب
وهي يالسه تبطله تمت تطالعه نظيف ولا لا
اول ما فج حصلت على الدسك توب فيديو منزل
فجته...
وتمت تطالع
الريم: هذا هذا زايد...

وهذا بوسنيده وياه
وزايد يالس ايول من الخاطر في الفيديو والريم متسمره يالسه تطالع
ولا شوي يدش عليها راشد ولا ترقع شاشه اللاب توب وقلبها يدق بقو
راشد: بلاج كسرتي اللاب توب
الريم وهي متلعثمه: لا لا مـ ـ ـا شـ ـ ـي
راشد: اقولج ابا اللاب توب شوي
الريم: ليش
راشد: ماشي ابا امسح شي
الريم في خاطرها ..والله هالشباب... حاطنها عسب اشوفها؟؟؟؟
راشد: حو ايه يبي شوي وشله عنها وهي ساكته
راشد: اقول انتي ما سرتي اليوم الكليه ليش؟؟؟
الريم: ماعندنا شي اليوم.. اوبن دي ويمكن اسير عقب اذا اربيعاتيه سارن
راشد: لا تسرين اكيد ماعندهم سالفه
الريم: لا اربيعاتيه اللي في الجامعه بين وابا اشوفهن صار ليه مده ماشفتهن
راشد: على راحتج...
.................................................. ......................
سلامه سارت ويا ابوها اروحهم لان العنود ما كان لها خاطر تسير

سيارة ابوها مافيها مخفي...
وهم ظاهرين واصلين عند الاشاير الا ايهم واحد يدق لهم هرن من ورا
وسلامه يالسه تقول لابوها: حرام عليك قفطتنا باب دبة السياره مبطل
ابو حميد: شو
وينزل من السياره يسكر الباب
سلامه طالع ابوها وتضحك
بوحميد سوالها طاف ومشى
...........................................
في بيت ابو سيف..
نهيان كان يالس في المعرش ويالس يتقهوا ويا ابوه
وعقب ماتقهوا وسولف ويا ابوه..
نهيان: يلا ابويه تامرينيه بشي
ابو سيف: ابدا سلامتك.. الا وين بتسير
نهيان: بسير الصناعيه اشوي بسير ابدل التوايرماتشوفهن كيغف متسحتات من تحت؟؟
ابوسيف: سير الله يحفظك
نهيان سار صوب سيارته ستيشن 2005
ركبها وسار صوب الصناعيه وعقب سار صوب المول وعلى طريقه شاف سيارت بو حميد سعيد... فدق له هرن...
ويوم التفت على السياره كانت في وحده غرشوبه وياه..
نهيان في خاطره... اسميهن بنات سعيد غراشيب
.....................................


زايد رد البيت وسار حجرته يزهب الكندوره اللي بيلبسها يوم بيسير الوثبه
ظهر كندورته الختم وغترته اليديه وعطاها البشكاره تكويها
المغرب ظهر زايد وخطف على راشد عسب يسيرون ارباعه ...
زايد شاف عمه يالسه فنزل يسلم عليه وسلم على خالته اللي يالسه
يدور يمين يسار ماحصل حد يالس وياهم فنشد عن راشد فشافه في ويه
راشد: خشمك
زايد: وينك مابغيت تظهر
راشد:عروس عروس
زايد: ههه دمك ثقيل قم اركب السياره
راشد: لحظه خلنيه بيلس ويا ابويه وامايه شوي
زايد: بنتخر على العرب يامال الزين
راشد: تراك بذيت خفاي خلاص هب رايح وياك
زايد: الله يعينكم على هالصبي
ام حميد: قم راشد اخرت ولد عمك
راشد نش وتجدم زايد..
راشد ركب عدال زايد..
وسارو صوب الوثبه وكانو كله سوالف وتنكيت...
.................................................. .........................
في هالوقت سارت الريم واختها شمه صوب الكليه
اول مادشت الريم الكليه دقت على رويض على اساس انهن بيتلاقن
الريم: هلا رويض وينج
روضه: توني داشه وينكن انتن
الريم: من شوي داشين..
روضه : اقول تعالن صوبي انا في الويتنق رووم
الريم: خلاص ماعليه
سارو صوبها وتمو يسولفون وطماشه كانت السيره......
يوم شافت الريم سلامه بنت عمها زختها وتمن يسولفن
الريم: اقول يالخايسه ليش تعقين اللاب توب مالج عند كل من هب ودب
سلامه: نعم ؟؟ كيف يعني
الريم: امس يوم ارمسج واوني معصبه اخر شي ظهر اللي ارمسه اخوج
سلامه: نعم؟؟؟ متى
الريم: امس الصبح
سلامه: اوووووو هذا زيودو الطفس
الريم: قوليله ترا هالحركات مب حلوه
سلامه: الله يستر كلم منو بعد ... يحيج بنت عمه انتي الا اربيعاتيه اكيد فظحني جدامهن.... الا شو قالج
الريم: ماشي تم يسال انا منو وسلم وبس اصلا انا تروعت ظهرت
......................
الريم تموت في اليواله ووايد تستانس يوم تشوف يوالة حد محترف على قولتها
عقب ماردو فليل ...


الريم كانت يالسه على اللاب توب ومشغله الريل بلير وكان خاطرها تشوف اليواله لانها كانت شي يوالتهم كانت عجيبه
بعدين اتذكرت انه يمكن مامسحهه من الزباله ففجت الزباله وحصلته ...سوتله كوبي وحطته في ملف مخفي في ماي دكيمنت..
وتمت تطالع ... يوالتهم عجيبه تخبل ...
......................................

في الوثبه....
الكل يالس وزايد وراشد يالسيين ويا هزاع وشباب يقربون له...
اليلسه كانت وايد حلوه دلال رسلان وكلهم بنياسينهم.... والضو موراه وبيت الشعر .. الجو يعني كان عجيييب
هزاع: اقول زايد عدلنا قصيد
زايد : والله مادري ماعنديه شي الحين
راشد: احيدك انت على الدقه تقصد
زايد:ههه انزين عنديه وحده ..
هزاع: قل
زايد:
لي صاحــبن ماعاد ينشــاف.. وانا بدونه يا عرب صـرت مـــاشــوف
حتى خيالــه عليــنا ماطـاف.. من عذابه اجروحي باصـفها صـــفوف
ماهو مــن النــاس الخــفاف.. حشى عليه اللي بالعزوالحلى موصـوف
انــا احـــبه بزود واســراف.. واستحي لا قلت احبه وانا اير الحـروف
بس الــهوا صـــار ينـــعاف .. يوم الذي توده عليك يــا خــويه مايروف
ليـــه علــينا الغلـــى ماراف.. وانا لو الود ودي اكحــل العــين بالشوف
وسلامتكم...

هزاع: مافيك حيله يابو سعيد..
راشد: صح السانك..
زايد: صح بدنك
الشباب: الله لايهينك..
زايد: تسلمون..
هزاع: عد عد قصيده ثانيه..
زايد: والله انه ماعنديه شي الحين .. بس شرايكم انيول في خاطريه ايول
هزاع: فالك طيب..
زايد: وين ساير استريح انا بسير ايب مسكبه مالتيه وبشغل المسجل...
وشغل زايد مسجل سيارته وتمو الشباب كلهم ايولون..

عقب يلسو.. وقعدوا يسولفون وحطو العشا
زايد: تزهبوا الحين بتستوي معركا مع القعدان
هزاع: الله يقطع بليسك
حمدان:والله انا ناوي على نيه
زايد طقع لهم وقعد ياكل من الخاطر
وحمدان طلع تيلفونه وقعد يصور زايد وهو ياكل ومحد منتبه له...
ويقرب من ويهه ..
وعقب ما تعشو ..
حمدان: اقول شباب شفتو الفيديو اليديد
نقز راشد: اشوف اشوف..
راشد: الله يلعنك شو هذا .. زايد الحق الحق شوف
زايد يا يطالع واول ماطالع ير التيلفون يبا يمسحه وحمدان ماسك التيلفون وقاعد يحلف: والله ما تمسحه والله مامسحه.... بفظحك بنزله في النت
زايد: والله لردها فيك ماعليه هين حمدانوه
حمدان: برايكم.. انا بسيرالحمام وبرد ..هزاع وين الحمام؟؟
هزاع: سير سيدا بتحصل حجره على يمينك دشها بتحصل داخلها حمام

زايد متسند على المركه وقرب من راشد: اسمع اول مابيضهر من الحمام روعه وانا بصوره اوكيه
راشد اوكيه...
راشد اندس ورا الباب وزايد جهز التيلفون
اول ماظهر... راشد:بووووو حمدان وهو متروع وقده طاير من مكانه قال:اعقب.....
زايد: عاش بو سنيده الحين بنشوف اللي صوره بتطلع فالنت
وتم يرويها الشباب وكلهم يطنزون وتمو يتمصخرون عليهم....
وتمو يداعسون
سعيد((واحد من الشباب)) :منو يداعس
زايد: هزاع عطني نيسانك بداعسه
فر عليه هزاع السويك
ركب السياره زايد...
زايد: اقول فول بفول
سعيد: فول بفول
زايد: قومه
سعيد : اوكيه
زايد مصع اسعيد ..... وتمو يداعسون ويدورون وشلون على تايرين كلهم كانو مرتبشين واللي يصور واللي يشجع ... ومن هالسوالف
وعلى الساعه ثلاث فليل زايد وراشد قضبو خط العين
........