يامحمد ابن رشيد ما عنك صديت=مير انها المشيه بغتها شهاتي
لي عشرة اعوامن بعيدن عن البيت =ولا همني بعدي وممشى عناتي
مير انها صارت علومن مباهيت=وامسى الثعل سبعن بعرض الفلاتي
وان قلت لي خلك فانا اقول يا ليت=لكنها سود الرياح العواتي
نفسي جزعها قلت ابخفيه وازريت=والا هناة البال حزة صلاتي
ما نرجي بزين الفعل مكسب الصيت=ولا طلبنا فيه مدحن وشاتي
ان قلت ابقعد يا رفيقي تهقويت=والشور من مثلك كفاية غناتي
دنيا حذفناها بجوف الهشاشيت=يمسون فيها بين ودي وهاتي
حبالهم راحت مزوع ومفاليت=واحد معه شوكه والاخر حصاتي
بلوا عسانا ما نصير الشواميت=نرجي من الرحمن زين الصفاتي
واللي مضى من وقت ما عندنا يبيت=والمقبله تغني عن الفايتاتي
يا حلوها بعض السهول المنابيت=اللي غمرها السيل والجو شاتي
تعيش قاصي ما تمله لو ابطيت=بارضن نسيم زهورها الفايحاتي
فيها العرب نادوا على الزبد والزيت=لشافوا الضيفان وقت البياتي
ما تفقد المرباع لو جيت واقصيت=والضان في مرعى الخلا سارحاتي
من دون مرجوم الرجايب تذريت=واخيام ربعن بالشفا بايناتي
هذا صريح القاف ما عنك خفيت=واسلم وسلم والمقابيل تاتي