آه يا زمن - الصفحة 2

هيام القلب · 07-14-2008, 03:33 PM

مشكووووووووووووووووريهـ فديتج عالبارت ^^

اترياج فالبارت الياي^_^

بليييييييييييز لاتبطين علينا

اترياج غناتي __DEFINE_LIKE_SHARE__

mnasj · 07-14-2008, 05:48 PM

الحين بنزل البارت __DEFINE_LIKE_SHARE__

mnasj · 07-14-2008, 05:50 PM

الجزء الثالث

خلص هاليوم الي كان بالنسبه للكل معجزه ربانيه.. وردوا البيت وطبعا فاطمه من شوقها للنت ما بدلت وراحت على طول وقعدت على النت.. ودخلت الجات .. شافت عيناوي أصيل موجود .. استانست,..
عيناوي أصيل: هلا والله تو ما نور الجات .. وينج فديتج اترياج من متى..
عيون المهى: شو اسوي توني راده من بيت يدوتي.. اشحالك؟؟
عيناوي أصيل: كيف تسألين عن حالي وانتي الي مالكه احوالي كلها.. والله تعبان من غيرج.. ما ارتاح غير يوم ارمسج..
عيون المهى: لا والله.. حتى انا كنت كله افكر فيك.. ومشكور على الإيميل وايد استانست يوم قريته
عبناوي أصيل: ها ابسط شي اروم اسويه عشان ابين لج مدى شوقي الكبير لج..
عبون المهى: تسلم لي والله..
وخذتهم السوالف وتأخر الوقت وهي مب حاسه.. طلعت من النت وراحت حطت راسها ونامت.. تتريا يوم السبت بفارغ الصبر عشان اتخبر ربيعاتها عن هزاع..
يوم الجمعه بعد ما رد ابوها من صلاة اليمعه ويلسوا عشان يتغدون.. صار الي ما كانوا متوقعينه ابدا.. والي الكل تفاجأ من هالشي..
فاطمه: أمي نسيت اخبرج يمكن باجر يودونا رحله..
ام خالد: وايد زين.. ما قالو وين بيودونكم
فاطمه: اظني وندر لاند..
بو خالد: وينه خالد..شو مايبا يتغدى؟؟
ام خالد: انا زقرته والله مادريبه
فاطمه: خلووه احين معرس يتغلى.. هههههه
خالد: انا اتغلى.. مادري على شو عاد.. قومي بقعد اهني بتغدى..
فاطمه: ايلس هناك انزين المكان فاضي الا هني يعني..
خالد: ههه . هي عناد الا هني..
فاطمه: اففف شو هالأخو لا بوجوده ولا بعدمه مرتاحبن..
خالد: ههههههههه.. يلا عن الرمسه الزايده اشوف..
غيرت مكانها فاطمه وتوها يايه تقعد رن جرس البيت.. الكل استغرب منو ياينهم هالوقت...
ام خالد: جولي.. سيري فتحي الباب..
فاطمه: كان مقرر حد ايي بيتنا اليوم؟؟
بو خالد: لا .. انا روحي مستغرب منو الي ياينا هالحزه.. خل اروح اشوف..
توه قام بوخالد يروح يفتح الباب.. الا يشوف الباب يفتح ويدخل عليهم فيصل:السلام عليكم

فطوم: فيصل حبيبي (ركضت في حضن اخوها) .. شو هالمفاجأة..
الكل قام مستغرب مب مصدقين فيصل رد.. وبدون ما يخبرهم.. يا ترى شو صاير.. وسلم على الكل وقعد وياهم على السفره
فيصل: اخخخخ.. ياني مشتاق لغداج يما.. شو بلاكم جيه تتطالعوني جني شبح.. انا فيصل شو بلاكم..
ام خالد: فيصل: شو الي ردك قولي بصراحه الصيف بعده ما يه .. يعني اجازتك مب الحين؟
فيصل: لا والله.. يعني لازم اييكم بس في الصيف.. خلاص بروح احين وبرد في الصيف..
فطوم: لالالالا انا ما صدقت اشوفك وين اتروح
فيصل: فديتج.. كلام يرد الروح..
بو خالد: ام خالد .. بلاج على الولد خليه يتغدى.. خذتيه بشراع وميداف
ام خالد: ما عليه اتغدى انت احين وعقب الغدى بتفاهم وياك..
فيصل: وييييييه.. الله يستر.. شو بيسوون فيني..
الكل تغدى ويوم خلصوا غداهم راحوا قعدوا في الميلس يريون فيصل ايي عشان يسألونه ..
خالد:فيصل صدق خبرني شو السالفه..
فيصل:دخيلك خالد والله انا روحي مب عارف شو اقول لهم..
خالد: قولهم الي صار.. بس انت خبرني اول شو صاير..
فيصل: طردوني من الكليه.. والسفاره الإماراتيه قالولي ارد البلاد واكمل دراستي هني في كليه دبي للطيران الي فاتحينها..
خالد: لا والله.. كيف صار ها كله؟؟
فيصل: تعال بنسير الميلس وهناك برمس مافيني يتحروني اتفق وياك..
راحوا الميلس ولقوا الكل يترياهم.. ام خالد وبو خالد وفطووم..
بو خالد: تعال فيصل وانا ابوك .. خبرنا شو صاير..
فيصل: والله مادري شو اقول لكم.. بس السالفه ومافيها بإختصار انطردت من الكليه هناك وراح اكمل هني في كليه دبي..
ام خالد: ويدييييه.. ليش؟
بو خالد: صخي انتي خليني ارمس ويا الولد. ليش ابوي؟
فيصل: ماشي اتضاربت ويا واحد اجنبي هناك.. وهم اكيد بيوقفون ضدي..
بو خالد: شو سبب الضرابه؟؟
فيصل: ماشي تم يرمس عن العرب والمسلمين ويهينهم ما رمت اسكت الصراحه فار دمي.. ما لقيت عمري غير طايح عليه ضرب..
ام خالد: حسبي الله عليهم من اوادم... المهم انت ما صابك شي.. ودراستك دامك راح اتكمل هني وايد احسن وابرك .. اتكون عندنا اهون من انك اتكون بعيد عنا.
بوخالد: وانا اقول نفس هالرمسه. يلا عساه خير.
خالد: عسى ان تكرهوا شيئا وهو خير لكم..خلاص عيل من رخصتكم انا طالع تامروني بشي
بو خالد: وين ساير .. نحن ما انصدق نلاك قاعد في البيت اشوي
خالد:ههه ماروم اذا يلست شوي زياده بختنق لازم استنشق هوا برع اشوي بعد
فيصل: الا صدق الي سمعته خالد بياخذ خوله.؟؟؟!!!!
ام خالد: هي صدق.. بس انا مادري ليش مب مرتاحه وما ودي الصراحه
فيصل: ليش يما انزين هم محيرين لبعض من زمان ..
ام خالد: مادري والله بس قلبي قارصني.. اخاف هالبنت تنظلم والله .. اخوك خالد اعرفه ما بيتغير .. ومافي حرمه تستحمل تصرفاته
فيصل: لا يمكن يتغير شو دراكم انتوا ..
ام خالد: الله يسمع منك ..
فاطمه: اقول فيصل تعال غرفتي اشتقت لك ابا اسولف وياك.ز ولا بتشوف عمرك علي احين ما ترمس بنت 15 سنه وانت عمرك 24 ماشاء الله
فيصل: شو قالولج انا مريووم. هههههه
ام خالد: ايه لا ترمسون عن بنتي.
فطوم: اوووه ما ترضى عليها بعد. تعال تعال سوالف شياب هاي..
فيصل: هي والله صدقج.. خلنا نروح.
سار فيصل ويا فطوم عشان يسولف وياها : ما بدخل حجرتج لين تذكرين شي..
فطوم: اممممم.. give me five?
فيصل: شاطره.. يلا احين بدش.. اللللللللله شو هالتغيير في غرفتج متى غيرتي الصيف الماضي ماكان جيه..
فطوم: توني من فتره بسيطه.
فيصل: لا بعد ذوقج حلو ها.. خلاص انا اباج تفرشن لي غرفتي..
فطوم: خلاص بس بشرط..
فيصل: شو شرطج بعد؟
فطوم: انا ابا اسير السينما.. يقولون منزلين فلم يديد وايد حلو..
فيصل: خلاص تم.. انزين خبريني سوالفج .. قولي لي؟؟
فطوم: ماشي سوالف.. بس اخر شي سويناه هو وصلنا النت في بيتنا..
فيصل: اووه زين تطورتوا ماشاء الله
فطوم: لا والله تتطنز يالأجنبي المستعرب..
فيصل: هههه.. يحليلج والله يا فطم طم..
فطوم: انزين قولي شو كنت اتسوي هناك.. شو الأجواء الي كانت .. شو كنت اتسوي قولي..
فيصل: بخبرج شي.. بس لا اتقولين حق حد..
فطوم: الللله كشخه اسرار.. ومن منو اخوي حبيبي.. لا قول ما بقول حق حد..
فيصل: روحي ييبي الهاند باج مالي..
فطوم: ثواني..
فيصل بصوت عالي: حاسبي لا اتطيحين وانتي تركضين.. ههههه يحليلج والله
فطوم: هي هي هي هي .. هاك.. هي هي هي
فيصل: طاع الي يشوفج يقول راحت ماراثون.. ليش تركضين جيه بسرعه.. هههه طاع شكلها شقايل تتنفس..
فطوم: يلا خبرني بلا رمسه زايده..
فيصل: شوفي هالصوره وقولي لي شو رايج فيها؟
فطوم: الللله منو هالحلوه.. اوب اوب من ورانا.. منو اعترف
فيصل: ههههه.. شيطانه.. هاي هنوف الكويتيه .. كانت ويانا في نفس المنطقه ساكنه..
فطوم: اهاااا.. يعني قصدك هاي الحب مالك..
فيصل: هي للأسف..
فطوم: وليش للأسف.. ؟؟
فيصل: خلاص ابتعدت عنها احين هي بعيده عني..
فطوم: انزين ليش ما اتقول حق امي خل تخطبها لك؟؟
فيصل: اتنكتين انتي.. اصلا امي خبرتها من اول ما حبيتها .. امي رافضه رفضا باتا هي وابوي.. ليش انها ساكنه هناك يعني مستويه اجنبيه..
فطوم: لا والله مب سبب.. بس امبين عليها بنيه زينه..
فيصل: وايد زينه بعد... وهي وايد اتحبني بعد.. بس انا بعد ماروم اعصي اهلي..
فطوم: يحليلك.. متعذب.. وليش انا اخر من يعلم.. دام ان هالسالفه من زمان ليش ما خبرتني؟
فيصل: بس لأنج كنتي اصغر ما تفهمين.. احين شوي كبرتي احسج..
فطوم: ويا هالويه(فرت عليه المخده الي حذالها.. وهو رد فر عليها المخده.. وتموا يتضاربون بالمخدات لين ما دخلت عليهم ام خالد)
ام خالد: عنبوووو.. شو يهال انتوا.. شو هالحركات
فطوم: انا مايخصني هو الي بدا..
فيصل: انا ولا انتي يالجذابه.
فطوم: وينج يا مريوم اشتقنا لجملتج... بخبر عليكم امييييييييي
ام خالد: هههه .. الله لا يغير عليكم هالوناسه يا رب
فطوم+فيصل: آميييييين
فطوم: تدري شو احلى شي على ردتك هاي؟
فيصل: شو ؟؟؟
فطوم: انك من اليوم وساير انت الي بتوديني واتردني من المدرسه.
فيصل: هههه .. اتنكتين ماشاء الله.. ولا بعد واثقه اني بوديها وبردها.. مادري دريولج انا

فطوم: افااا بزعل منك..
فيصل: اتهددين بعد.. ازعلي عادي.. شو يعني؟؟
فطوم: عادي وشو يعني ؟؟ ما عليه ؟؟ شوف منو بيرضى احين..

البقيه تأتي...
تابعونا.. ابا رايكم ما اشوف آراء وايده __DEFINE_LIKE_SHARE__

غرور طفله · 07-14-2008, 07:46 PM

وآآآآآآآآآآآآآآآآآآآآآآآآآآآآآآآآآآآآآآآآآآآآآآي كشخه ..

اتمنى اختي تنزلين البرات الرابع اليوم بعد ..

اتوووقع وحده من ربيعات فطوم بتحب فيصل.

تسلمين غلآيهـ ويعطيج العآفيهـ .. __DEFINE_LIKE_SHARE__

mnasj · 07-15-2008, 04:48 PM

الجزء الرابع

صارت الساعه 11 فليل .. يعني موعد فطووم ويا هزاع في الجات.. طبعا فطووم كانت شوي متخوفه انها تدخل الجات لأن احين اخوها فيصل موجود.. ماراح تقدر تاخذ بالرمسه شرات اول.. دخلت الجات وما لقت يومها هزاع.. استغربت.. دخلت على ايميلها لقت ايميل منه مكتوب فيه(حبيبتي.. انا اليوم يمكن اتأخر لين ما ادخل النت لأن ربيعي مسوي حادث بروح له المستشفى .. بس دخلت النت على السريع عشان اكتب لج هالرساله عشان ما تنتظرين على الفاضي.. مشتاق لج وايد.. اشوفج باجر.. ياي
هزاع مجنون f) طبعا فاطمه يوم قرت هالرساله استانست وااايد من الكلام الي فيها.. حبيبتي ومشتاق.. ومجنون f .. حست انه هزاع فعلا يحبها.. ولو ما يحبها جان ما دخل النت رغم الظرف الي فيه عالسريع عشان يقول لها هالكلام.. سمعت صوت فيصل يزقرها سكرت الصفحه بسرعه ودخلت على موقع العاب .. ودخل عليها فيصل.
فيصل: شو اتسوي الحلوه هني؟؟؟
فطووم: العب.. من الملل.. ما ياني رقاد قلت خل العب اشوي..
فيصل: افا ملانه وانا موجود.. ودري عنج النت شو تبين به.. تعالي يلسي عندي .. خبريني سوالفج.. وين اتسيرين وين اتيين..
فطوم: خلاص ثواني بس..
فيصل: اترياج في الغرفه..
بندت فطوم النت وركضت على غرفه فيصل.. : مرحباااا.. ممكن اتعرف..؟
فيصل: اممم.. لحظه اشوف حلوه ولا مب حلوه؟
فطوم: ترارا.. شو شفت؟
فيصل: لا حلوه.. زينه .. تعالي خل اتعرف عليج..
فطوم: لا لا .. عيب شو تتعرف علي.. انت اكيد عندك خبره في هالسوالف معلووووم..
فيصل: ويا هالويه.. جب وايد عطيتج ويه..
فطوم: ههههههه
فيصل: خبريني شو اخباركم؟؟ شو اخبار مريومه مشتاق لها الصراحه؟
فطوم: والله مريوم هالمصريه من دخلت الطب وهي احسها متخبله..
فيصل: هههه ليش عاد؟
فطوم: مستويه دكتوره صدق.. اول ما تدخل البيت.. لا اتسوون جيه بيصيبكم هالمرض.. لا تلعبون بها مب زين.. حطو ها هناك.. اففف اتعور راسي
فيصل: هههه يحليلها اتجرب عليكم..
فطوم: تتحرى عمرها داشه مركز ابحاث..
فيصل: ههههههه... لا تتحراكم فيران تجارب..
فطوم: هي والله.. شووو شو قلت.. فيران.. وانا مب منتبهه اقول هي والله.. محد فار غيرك..
فيصل: عدااااال مادري انتي شو..
فطوم: فيصل؟؟بسألك سؤال؟
فيصل: اسألي يا عمري..
فطوم: فيصل.. ليش هني يوم البنت اتحب الكل يعيبها.. لكن اذا الواحد حب محد يعيبه.. ليش يعني البنت ما عندها قلب يحب..
فيصل وهو مستغرب من سؤالها: ليش منو قالج حرام البنت اتحب.. خل اتحب بس لا اتحب غير ريلها.. لأنها جان حبت اي واحد ثاني ما تضمن هالإنسان بيتم وياها ولا يلعب عليها .. فحرام اتعذب عمرها.. وهالشي يأثر على سمعتها .. لأن البنت من طبعها الحبا.. واذا حبت واجهرت هالحب الناس تعتبره انها فصخت الحيا مثل ما قالوا.. شو الي خرج تسألين هالسؤال؟
فاطمه وبإرتباك: ها.. لا بس جيه.. مجرد سؤال؟؟
فيصل: اقول جني عطيتج ويه وايد.. وانتي وراج مدرسه.. يلا سيري ارقدي عيل
فطوم: اوكي.. بون وي..
فيصل: اوووب فرنسيه الإخت.. بون وي.. وانتي من اهله وانا بتم عربي
راحت فاطمه غرفتها عشان ترقد وكلام فيصل كان يدور في راسها .. كانت ترمس في سرها: معقوله يعني ممكن انه يلعب علي.. لالا ما ظني.. كيف بيلعب علي.. قالي اول مره يدخل الجات.. قالي كل شي عنه.. افففف.. راسي دار... برقد احسن لي
رقدت فاطمه لأن عندها مدرسه ولاز م اتقوم من وقت.. على الساعه 6 الصبح قومتها امها عشان تزهب للمدرسه.. وكعادتها قامت واتزهبت وراحت المدرسه.. بس هالمره فيصل الي وصلها.. شافت نوال سياره فاطمه وشافت فيصل.. ركضت صوب فطوم عشان تسألها عنه..
نوال: هلا والله فطووم.. اشحالج؟
فطوم: اهلين.. والله بخير .. انتي اشحالج..؟
نوال: بخير.. الا اقولج منو ها الي وصلج ؟
فطوم: اخوي فيصل..
نوال: ماشاء الله عليه وايد حلو.ز
فطوم: لازم طالع علي..

نوال: انت كل الناس طالعين عليج.. كم عمره؟..
فطوم: 24 سنه.. شو تبين تخطبينه انتي.؟
نوال: ههههه.. اسميج انتي محد يسألج شي.. انزين قالت لي خدوي انها علمتج على الجات شو سويتي فيه..
فطوم: دخلت اقولج ... ونااااسه.. تعرفت على واحد مال بوظبي اسمه هزاع.. عمره 19 بس حبوب سوالفه حلوه...
نوال: انزين .. دوم اتسولفين وياه؟؟
فطوم: هييييه تقريبا بس البارحه ما لقيته طرشلي ايميل قالي ماروم ادخل لأن ربيعه مسوي حادث مادري شو..
نوال: لا بعد يقولج كل شي..
فطوم: هيه كل يوم يطرش لي ايميل يكتب فيه شو سوى في اليوم بالكامل.. وانا بعد نفس الشي.. اقولج ما يخش عني شي مووول..
نوال: كشخه جيه والله.. اففف هاييل شله ندوي ما ادانيهم .. شكلي اخر شي بتضارب وياهم.
فطوم: حرام عليج .. شو بلاج عليهم..
ندى: هلا والله فطووووم اشحالج؟؟
فطوم: الحمد لله انتي اشحالج.. ؟
ندى: بخير.. (تمت تتطالع نوال بنص عين من فوق لتحت) اقول تعالي اتمشي ويانا احسن من هالأشكال..
نوال: اييييه.. ندوي شو قصدج بهالأشكال.. شو شايفه عمرج علينا؟
ندى: شو بلاج ترمسين جيه.. عفان الله اتركب الكملات تركيب..
نوال:ندوووي صخي احسن لج..
ندى: ههه.. بنات طاع منو يهددني.. شريفه مكه..
نوال صفعت ندى.. وطبعا ندى ما بتسكت لها ردت الصفعه.. وزادت الضرابه حاولت فاطمه اتفرق بينهم بس ما قدرت.. نادوا على الأخصائيه الي سحبتهم وياها للغرفه..
فطوم: حشى مدرسه اولاد مب بنات..
هند: هههه.. هاييل توم وجيري مال المدرسه ندوي ونوال.. معروفين بضرايبهم
فطوم: انزين ليش هالعداوه من بينهم؟
هند: ما تعرفين؟
فطوم: لا ما عرف حشى علي..
هند: ويييييه علي تعالي خل اقولج.. سلمج الله (دق الجرس) اففف.. ما عليه بكمل عقب روحي.. هاي نوال كانت اتعرف واحد واتحبه.. وااايد .. بس عقب ندى الخايسه استولت عليه.. خلته يخون نوال.. من يومها هاييل ما يدانون ودوم ضرايب..
فطوم: وانا اخر من يعلم يحليلي..
هند: يلا روحي هذي نفرتيتي وصلت.. روحي قبل لا اتوقفج على ريل وحده..
فطوم: الله يغربل ابليسج.. ههه.. عن تسمعج بس..
راحت فطوم الصف كان عليها فيزيا.. طبعا كعادتها عواش.. دووووم تتأخر على الحصه وتتوقف.. لكن هالمره نزلوها الإداره .. يحليلها.. وفطوم قاعده حذال خدوي.. كانت تكتب لها رساله في الإستكرات الصفر..
فطوم: خدوي.. شو اقوله اليوم.. اسامحه ليش انه ما دخل الجات ولا شو؟
خدوي: لا خليه شوي.. اتغلي عليه.. سوي عمرج زعلانه ومادري كيف..
فطوم: بس حرام كاسر خاطري..
خدوي: لا لازم اتسوين جيه عشان اتشوفين غلاتج عنده.. ولا تدخلين ساعات.. خليه يمووت عشانج..
فطوم: بس اخاف يمل مني عقب ..
خدوي: لا ما بيمل ما عليج..
فطوم: خشي خشي الورقه قامت نفرتيتي اتشك..
خدوي ما قدرت اتزخ عمرها يوم سمعت اسم نفرتيتي تمت تضحك.. قومتها المدرسه عشان اتجاوب على السؤال لكن طبعا هي مب مركزه فما عرفت الجواب.. والكل ضحك على شكلها وهي قافطه..
وانتهى الدوام الدراسي وردت فطوم البيت.. واول شي سوته دخلت على النت اتشوف .. لقت واصلتلها رساله وبطاقيت بريديتين.. من هزاع طبعا
الرساله: هلا والله اشحالج فاطمه؟؟ والله مشتاق لج وايد.. انا في الكليه والصراحه كله افكر فيج.. ما اتغيبين عن بالي.. شو مسويه فيني اعترفي.. ساحرتني ولا شي... مشتاق لج وايد الصراحه... دخليج دشي اليوم الجات اترياج..
هزاع)
فطوم: لا ما بطرش له... بجرب بسوي الي قالته لي خدوي..
سمعت امها تناديها عشان تنزل تتغدى وياهم..سكرت الصفحه.. نزلت ركض .. لقت الكل قاعد لكن في كرسي فاضي هو كرسي خالد استغربت.. العاده هو يتغدى وعقب يظهر.. شو الي مأخرنه.. فطوم: اقول الا وين خالد؟؟
فيصل: مادريبه من البارحه ما رد؟
فطوم: وافديته اخوي.. وينه ؟؟
ام خالد: هههههه.. طاع اونها خايفه على اخوها.. اتصلت فيه اطمنوا قالي بيتغدى بيت ربيعه معزوم اليوم عنده
فطوم: اخوي العود ها شقايل ما بخاف عليه..
فيصل: والله انتي الوحيده الي مادري طالعه على منو جيه حنونه وطيبه
ام خالد : يعني على منو .. اكيد على امها
بو خالد: هي والله وا فديت امها انا . اصلا احلى شي يوم تيلس تاكل واتجابل ويها... شوف شوف.. يالله يعني شوفها يفتح النفس
فيصل+فطوم: اوه اووووووه..
ام خالد: بو خالد عاااااد
فيصل: زين جيه خليت البنت تستحي هههه...
ام خالد:بنت اونه.. عيب عليك.. شو بنت ما بنت
فطوم: ههههههههههه.. هزئووووه
فيصل: انا براويج عقب...
وخلصوا غداهم وساروه قعدوا كلهم في الصاله وتموا يسولفون..
فيصل: امي احين صدق خلد بياخذ خوله؟؟
ام خالد: دخيلك فصوول لا اتذكرني بهالسالفه روحي راسي عورني .. ما عرف شو اسوي
بو خالد: شو شو اتسوين.. باركيلهم ولاخلاص..
ام خالد: بلاك انت مب طايع تفهم .. انا الود ودي اليوم ياخذها قبل باجر.. بس تدري انا من شو اخاف.. من ولدك ها.. الي ما منه امان..
فيصل: امي تفائلي بالخير.. ان شاء الله ما بيصير الا كل خير .. يمكن الله هداه..
فطوم: امي خوله بنت زينه تعرف كيف تتصرف ويا خالد..
ام خالد: انتي لا تتدخلين في هالأمور.. بعدج صغيره على هالسوالف خلج في دراستج..
فيصل: صدقها امي,, وبعدين فطوم ما عادت صغيره امي.. كبرت ماشاء الله .. حرمه بيت
فطوم: ها جيه انتي دوم .. اتجعميني واتسكتيني.. مادري اذا ما شاركتكم في هالمواضيع في شو تبوني ارمس.. اذا رمست عن المدرسه سكتوني واذا عطيت رايي في موضوع بينكم اتسكتوني شو اسوي ارمس منو خبروني؟؟؟
ركضت فاطمه صوب غرفتها وهي اتصيح.. دومها اتحس بالنقص.. اتحس كأن امها ما تهتم لكلامها أو لرايها..
ام خالد: ها شغلج انتي بس.. صياح في صياح.. وين ساير فيصل؟؟ خلها خل تتأدب عشان ما تتدخل مره ثانبه في هالأمور؟
فيصل: امي اسمحي لي اقولج شي تراج بتصرفج ها راح اتضيعين فطووم.. فطوم مب صغيره.. فطوم ماشاء الله عليها عقلها كبير وتفهم.. لازم اتعاملينها على انها حرمه عشان اتحس بالمسؤوليه واتحس انها كبرت.. ترا زمن فطوم غير عن زمن مريوم يوم كانت صغيره
ام خالد: احين انت ياي اتعلمني كيف اربي عيالي.. ترا انا نفس الشي ربيتك .. مال اشوفك ضعت.. الا قول انك ضعت يوم انك سافرت برع البلاد وجابلت هالبنات الي لعبن لعقلك؟
بو خالد: ام خالد.. خلاص خلصنا من هالموضوع ليش اتردين تفتحينه على الولد.. خليه ينسى على الأقل.. ما قال شي.. صدقه الي قال.. لازم اتغيرين معاملتج ويا فطوم انا ملاحظ هالشي بعد..
ام خالد: والله فطوم بنتي وانا اعرف كيف اربيها .. ما بتون انتوا اتعلموني.. مثل ما ربيت كل الي قبلها بربيها.. ما اشوف حد ضاع فيهم ..
فيصل: انا ساير عند فطوم.. الله يهديج امي
ام خالد: والله وطال لسانك يا فيصل..
بو خالد:. خلاص.. بس صدعتوا راسي.. الواحد ما يصدق يرتاح له شوي في هالبيت..
راح فيصل غرفه فطوم وقف عند الباب سممعها اتصيح تم يدق على الباب ما كانت اترد عليه.. تم يحاول لين ما فتحت فطوم الباب..
فيصل: فطومه.. حبيبتي.. لا تزعلين من امج.. تراها ما تقصد اتزعلج.. بس لازم تسكتين يوم تعرفين انها ما اداني هالشي
فطوم: امي ليش جيه.. ليش كله اتحب اتصارخ علي...كله تعتبرني طويله لسان..
فيصل: لا اتقولين هالرمسه.. امي اتحبج ترا..
فطوم: شو اتحبني وهي ما تدري عني.. من يوم ما كنت صغيره ليومك هذا ولا مره كان عندنا مجلس امهات ولا حفله في المدرسه واشوفها اتيي.. مب شرات باقي رباعتي امهاتهم دووم ايوم المدرسه يسألون عن عيالهم.. ولا يخبروني سوالفهم ويا امهاتهم كيف يمزحون وياهم.. اما انا كله اتجعمني واتسكتني.. يوم اقولها خاطري ارمس وياج تعرف شو اتقولي..
فيصل وعيونه مليانه دموع: شو؟
فطوم: اتقول لي انتي مب صاحيه.. كيف تبين ترمسين وياي وانا حرمه غديت في الخمسين احين.. وانت بعدج ياهل في شو تبين ترمسين وياي.. روحي مب فايجه.. والله قالت لي هالكلام.. واتقولي انها اتحبني؟؟ وين الحب فيصل..
خذاها فيصل في حضنه وتم يهديها: فطووووم.. بعد لو شو ما صار تراها امج الي يابتج لا تزعلين من كلامها.. ترا بعدها اتحبج والله.. ما تعرفين هي اشكثر احين ندمانه ليش خلتج اتصيحين.. بس لأنها هي اكبر ما تقدر اتيي واتقولج سامحيني...
فاطمه حاولت اتغير الموضوع عشان ما تكدر على اخوها: انزين.. خلنا من هالسالفه.. انت متى ناوي اتودين يالسينما.. ؟؟
فيصل: اممم.. شو رايج اليوم.. ؟
فاطمه: خلاص اوووووكي..
فيصل: يلا قومي غسلي ويهج وريحي لج ساعه ارقدي وانا على صلاة المغرب بقومج واجهزي بنسير السينما وعقبها بنتعشى وبنتمشى عند البحر وبنرد .. بعد شو تبين زياده..؟؟
فطوم: مابا زياده.. جيه وناسه..

في بيت العم خليفه
غانم: اقول خوله انتي من صدقج احين موافقه؟؟

خوله: هي من صدقي ليش هالمواضيع فيها لعب يعني؟
غانم: لا بس مادري انا الصراحه قلبي مب مطمن.. تدرين كيف خالد بتتحملينه؟
خوله: ما عليك بيتغير عقب الزواج؟؟ وبعدين لا تنسى اني محيريني له من زمان.. يعني ما اقدر ارفض.. لأني ما اقدر اتخيل في يوم اني اخذ واحد غير ولد عمي
غانم: والله انا اتمنى لج كل التوفيق..
عبدالله: السلام عليكم..
خوله: هلا والله اخوي.. اشحالك؟
عبدالله: بخير.. تعالي بغيتج في سالفه؟
خوله: خير ان شاء الله..
غانم: يعني انا ممنوع ايي..
عبدالله: انت اسمك خوله؟
غانم: لاهههههه.. بس بغير اسمي مو مشكله..
عبدالله: ههههههه.. يا دمك.. يلا تعالي المكتب اترياج.
خوله وهي تغمز حق غانم: بخبرك عقب..
غانم: اركضي..
خوله: نعم عبدالله.. شو السالفه؟
عبدالله: يلسي ابا اكلمج... بسألج سؤال وجاوبيني بكل صراحه ولا اتخشين عني اي شي.. انا اخوج العود ومابا غير كل خير لج..
خوله: اسأل اخوي؟
عبدالله: انتي موافقه من خاطرج على خالد.. ولا حد ضاغط عليج.. اذا حد ضاقت عليج خبريني.. بحاول اني احل السالفه..
خوله: لا.. انا موافقه من نفسيمحد جابرني..
عبدالله: خوله .. مره ثانيه اسألج حد جابرج ولا مب شرط حد.. في شي جابرج تاخذينه.. ترا بعدج صغيره والي يتمنونج وايدين..؟
خوله: لا مقتنعه من نفسي محد جبرني.. وين بلقى احسن من ولد عي اخذه..
عبدالله: بس يا خوله ترا خالد ما ينفعج.. بيعذبج صدقيني.. خالد مب مال مسؤوليه؟
خوله: لا ما عليك بيتغير عقب الزواج.. كل الرياييل جيه قبل الزواج.. عقب الزواج كل شي يتغير.. ؟شو نسيت عمرك!!
عبدالله: لا ما نسيت عمري.. بس انا ما كنت لدرجه خالد.. وانا ريال واعرف الرياييل والي من نوع خالد ما بيترك سوالف العزابيه مالته صدقيني..
خوله: لا ان شاء الله.. عمتي بعد ما بتخليه على راحته شو تتحرى..
عبدالله: ادري عمتي عمرها ما راح اتقصر.. حتى لو انج ما بتكونين وياها في البيت بس بعد ما بتقصر في حقج ابد..
خوله: عبدالله.. صاير شي؟؟ سامع شي ؟؟ خبرني؟؟
عبدالله: لا بس خايف عليج.. وبعدين الي اسمعه عن خالد وسوالفه ما تسرني ما اطمني.ز
خوله: لا ان شاء الله بيتغير ما عليك..
عبدالله: انتي مب صغيره.. انتي وحده فاهمه وادرى بمصلحتج.. والله يوفقج يا اختي
خوله: تسلم والله اخوي.. الله لا يحرمني منك..
اليده: يا عيال.. وينكم يا عيال..
خوله: ايه قوم يدو تزقرنا .. خل انشوف شو بلاها..
عبدالله: ههههههه انا حاس هاي لعبه من الاعيبها..
كل الي في البيت نزلو تحت عشان يشوفون بلاها اليده.. ليش تنادي علهم جيه.. كل واحد نازل ومتخوف..
الكل: شو صاير يدووووو؟؟؟؟

البقيه تأتي؟؟
يا ترى شو صااااار؟؟
شو بلاها اليده؟؟
وشو اخر تطورات فاطمه مع هزاع؟ __DEFINE_LIKE_SHARE__