( .. آهــ العنـــٍٍــِِـــا بـــٍِـــي طالــــٍٍـــِِي .. شايــــِِـــٍٍــــل همومــ كبـــٍٍـــٍـــا - الصفحة 34

حشاكل مشاكل · 06-23-2008, 04:21 PM

البااااااااااااااااااااااااااااااااااااااااااااااا اااااااااااااااااااااااااااااااااااااااااااااارت __DEFINE_LIKE_SHARE__

وردة تفائل · 06-24-2008, 12:22 AM

متــى بتكملييين القصهــ غلاااااااااااي ؟؟؟؟؟ __DEFINE_LIKE_SHARE__

غـــلاي.. · 06-24-2008, 02:00 AM

[align=center]الجزء التاسع ...

هرنات سيارة مانع واهله في بيت بو سالم.. الرياايل رحبو في الرياايل ودخلو الميلس .. اما الحريم رحبو وفي ام مانع واخته .. والكل مستانس عليهم .. يلسو سوالف وفواله وخربطان مني منااك .. وعرفو شموس وحبووها واايد . وااايد ..
في الميلس..
اللي ياي من الريايل .. مانع وعمه بو سلمان لانه ابو مانع شرات مانعرف انه متوفي وولد عمه سلمان ..
بو سلمان : والله ياخوي يابوسالم نحن اليوم يايين طالبين منكم القرب
فجوو عيونهم كلهم .. واولهم سالم وفي نفس الوقت استانس ..
يكمل رمسته بو سلمان : بغينا بنتكم شمسه لولدي مانع ..
مانع مستانس وسالم بعد وفارس كلهم مستانسين لاختهم وماراح يلاقون احسن عن مانع ..
بو سالم : والله ياخوي بو سلمان انتو ناس والنعم فيكم ومانع ربيع سالم من زمان وماله داعي نسال عنه .. لكن
تعرفون لازم نشاور البنت و نشوف شو رايها في الموضوع ..
بوسلمان : اكيد ياخوي هذا الكلام السنع ونحن مانرضى ناخذ البنت وهي مهب راضيه اهم شي رضاها ..
بوسالم: عيل ان شاء الله خير ياخوي ..
وكملو سواالف بعدها عن مواضيع كثيره ..
وفي نفس الوقت صوب الحريم اتصل سالم وقال لامه ليش يااين وجي وام سالم فرحت واايد لكن ماخبرت حد ..

اتوكلوو قوم مانع لبيتهم .. واتيمعوو الاهل .. في الصاله العوده..
ورمسو عن السالفه طبعا شموس ماتوقعت ابدا انه مانع طالبنها للزواج ..
الكل فتح عينه ومستانس بعد في نفس الوقت .. واكثر وحده شموس ..
بوسالم يطالع شمسه بنته : واكيد نحن ماراح نرضى الا اذا بنتنا رضت..
سالم : انا ادري بشمسه راح ترضى همها انه الريال يكون زين ويخاف ربه
شمووس مستحيه اول مرة يرمسون عنها وعن اللي تباه جي يدام الكل ..
شموه عدالها ترمس بصوت خفيف: يااحيج اونــج انخطبتي وصرتي عروووس
شموس: بعدني ماوافقت عشان اصير عروس صخي .
شمووه: ههه مابصخ عرررروس واحلى عرووس ياشمووس هع هع .. واتظهر لسانها لها ..
فارس سمع شمووه وهو كان يالس على طرف شموس من اليسار وشموه على طرف شموس من اليمين ..
فارٍس : وبعد في عندنا عروس واحلى عروس اللي هي انتي شمووه ..
شموه: احم (استحت ) ..
فارس: ههههههههههههه شفيج سكتي
شموه: انا لا عاادي
فارس:عااادي ؟ قولي اي شي زين
شموه تحاول تشرد من نظراته الذباحه: عادي برمس .. شو يعني
فارس يطالعها ويحاااول انه عينه اتيي بعينها : انزين رمسي انا مهب زاخنج
شموه: فروووس عااد لاتخبل فيني
فارس: هههه انتي اللي مخبله فيني وفي عقلي وقلبي وكل شي بحيااتي .. قلبتيها من فوق لتحت ..
شمووه: احم (استحت ) .. وترمس شموس: شوفي اخوج قوليله يسكت انا استحي ..
شموس : ههههههههههههه فارس تقولك اسكت هي تستحي
تقرصها شمووه .. وفارس يضحك .. : هههههههههههههه
.. توكل بعدها الكل على بيته .. وكل حد ارتااااح وريح باله ..
فارس في غرفته .. حب يطرش مسج لشمووه .. ويعترف بحبه لها مره ثانيه ويشوف رده فعله تعصب شرات كل مره والا ..
( شما رقدتي ؟.. ) ..
شما قرت المسج وفزت من على الشبريه .. وكانت شواقه عندها ..
شموه: شواقه طرش مسج شوفي ...
شواقه : عطيني انا برد عليه
شموه: جب جب انا برد عليه
شواقه: هههههه مشكله اللي يحبووون ويخفون عنا
شموه: احم مايخصج
(لا بعدني يالسه اسولف مع اختي شواقه .. وانت متى بترقد .. وليش واعي للحين ؟.. )
فارس استانس انها تساله .. ورد عليها ..
( افكر فيج وماروم ارقد الا يوم اقولج تصبحين على خير .. )
شمووه : اويييييييه شوفي شو كتب .. اهئ اهئ فديتــــــــــــــه اااه يافارس.. احبك .. للاسف انا ماقدرت حبك لي ..
شواقه: عااشت العاشقه تتفدى بعد ..
شموه: هههه ويا ويهج .. شو ارد عليه قولي ؟؟
شواقه: اممم قولي انا بعد افكر فيك وماقدر ارقد الا يوم اقولك وانت من اهله
شموه: جب شو هالرمسه عيب ... تتفكرين انا وفارس شراتج انتي وعبود العشااق .. هع هع
شواقه: احلى عشااق وتتمنون تكونو شراتنا ..
شموه : سكتي اشوي افكر شو ارد عليه..
شواقه: اوكي بسكت .. والا اقول انا بظهر بروح اناام احسن لي ..
شموه: اوكي وسلمي على عبود
شواقه: حمااارة شوعرفج برمسه
شموه: انا توامج ولو اختي العزيزة ..
شواقه:هههه فديتج .. امواااااااااااااح .. تبوس اختها وتروح عنها ..
شموه طرشت لفارس ( اممم وانت من اهله .. الحين تروم ترقد ..؟ )
فارس يضحك عليها .. (لا ماروم ..ههه اريد اقولج شي .. )
شموه قلبها بدا يدق عسى ماشر شو بيقول ( امممممم خير فرووس قول اللي عندك ) ..
فارس ياويل حالي فرووس بعد ( ان شاء الله ياعيون فروس ... شماا .. أنــا أحبــج ) ..
شمووه من قرت المسج ماعرفت شو صار فيها حست بشي غريب ويلست تصييييييييييح
شموه ترمس عمرها : واخيرا واخيرا ردت لي الحياه من اول ويديد.. ااه يافارس.. انا بعد احبك والله والله والله ..

فارس يالس ينطر مافي اجابه .. خاف لانها تكون زعلت من صراحته .. امممم رد طرش لها ..
( شماا زعلتي من الرمسه اللي قلتها )..
شمووه قرت الرساله وهي تمسح دموعها( اممم لا مازعلت .. بس افكر .. )
فرووس ارتاح انها ردت عليه ( احم احم اكيد تفكرين فيني .. صح وفي رمستي .. امم شورايج شما ؟. )

شمووه تقول : ههه ويا ويهك فرووس اااه رايي من راايك انا بعد احبك بس عيب اقولها جي .. ( امممم افكر باللي تفكر فيه .. رايي من راايك )..
فرووس طاار من الفرحه يوم قرا المسج يعني تحبني ؟؟ والا شووو يالله ارمسي اوووف
(انزين شو هو اللي رايج من راايي ؟ )
شمووه ااخ عليه يبا يلعب باعصابي ( احم اللي قلته .. فاارس انا بنام . احلام سعيده)..
فارس يطالع المسج ويضحك .. ااخ عليج تبغين تشردين .. طرش لها ( نوم العوافي واحلام سعيده فيني .. )
قرت المسج ورقدت وهي حدهاا فرحااااااااااانه من فارس .. حست انها صارت ملكه ومافي شي بيبعدها عنه ..

اما في غرفه شواقه .. العشااق عايشين الجو ..
عبود: ماروم اصبر .. بس فيصل يقولي انطر لين مايعرسون مريامي وقوم حمد .. بعدين املج..
شواقه: وانا جي راايي من راي فيصل .. على شو مستعيل انت ؟
عبود : احم علييييييييج حبيبتي
شواقه: ههه ماراح اطير .. بعدين نطرت هالسنين كلها انطر نص السنه هاي ..
عبود : عشانج اسوي المستحيل .. اممم انزين شواقه يالله حياتي روحي رقدي ..
شواقه: اوكي عبوودي .. تامرني بشي ..
عبود: سلامه قلبج .. بس ديري بالج على عمرج ..
شواقه: ان شاء الله الغالي .. وانت بعد ..
عبود : ان شاء الله حبيبتي .. يالله مع السلامه
شواقه: مع السلامه ..

مرت 3 ايام على الاحداث اللي صارت .. فارس علاقته بشماا صارت قويه .. لكن للحين ماقالت له كلمه احبك .. اللهم تلميح .. وهو يعرف انها تحبه لكن ينطر الكلمه منها .. شواقه وعبود عايشين حياتهم من احلى مايكون .. مريامي ونواري مشغولات في التجهيزات .. لانه ملجتهم صارت قريبه ومع بعض.. من بعد ماقنعو اهل محمد ريل مريامي لانه اشوي عاداتهم غير عن عادات قوم بو سالم وبو فيصل وبوحمد .. وحمد يرااكض من مكان لمكان للتجهيزات مره ومره للدوام .. اما فيصل وحصوو احلى عرساان.. وينطرون المولود اللي في بطن حصوووه .. حامل صار لها شهر ونص ..ومستانس الكل عليها .. شموس وافقت على مانع .. ومانع استانس واايد .. وحددو الملجه مع ملجه عبود وشواقه بعد عرس قوم حمد ونواري ومريامي ومحمد .. ..

بدت الدوامات .. والكل انشغل فيها .. البنات اول سنه لهم في الجامعه ووايد هلكانات ومشغولات .. عبود بعد اول سنه له في التقنيه وشاد حيله في الدراسه .. واشوي خف اتصالات مع شواقه لانه هي عليها دراسه وهو عليه دراسه .. وفارس ينطر من شمووه كلمه عشان يتقدم لها ويريح باله ...

فارس خطف على الجامعه يشل البنات (شموه وشواقه وشموس ) لانهم خلصو وماحد عندهم يشلهم ..
فارس: سنه لين ماتيوون انا من متى انطركم ..؟
شموس : قول لهاي بنت خالتك شماا المحترمه اخرتنا
فارس يطالع شموه من المنظره : اوه اوه خلاص عيل دام شما ماخرتكم ماروم اقول شي هههه
الكل :هههههههههههههههه
شموس : هي لازم احم احم
شواقه: عاااشت احم احم
شموه: بس سكتو بلا مصااخه سخيييييييفااات
فارس: هي والله سخييييفااات بعاقبكم وماراح اخذكم ويانا .. انا وشموه بنروح المارينا نتمشى ..
شموس وشواقه:لاااااااااااااااااا
شموس : خذنا الله يخليك
شواقه: والله مانقول شي حرام فارس
فارس: بوسووني
شموس نقزت له وباسته .. فارس يطالع شواقه : يالله بوسي ..
شموه: لأ والله شو تبوسك بعد
شواقه: هههه عادي ولد خالو ونفس اخوي
شموس: تغار ههه ويحق لها
فارس:هههه خلاص ماريد شواقه تبوسني انتي بوسيني
شموه: سخييف ..واستحت مارامت تقول شي
الكل : ههههههههههه
فارس: فديت اللي يستحي .. ولسانه طويل بعد
شموس : هي عاد كل شي ولا شماا ماتروم تقول لها شي ..
شموه: مالكم خص فيني
فارس: حتى انا . افااا والله
شموه: فاااااااارس بس عااد
فارس: عيون فارس وروح فارس وقلب فارس .. امري تدللي ..
شموه خلاص ذاااااااااااااااااابت من رمسته ..: مصختها ويا ويهك
شواقه: عااش فاارس .. بدل قيس وليلى . .فارس وشماا .. ههههههههه
فارس: ياليت والله بس اختج ماتظهر منها الكلمه .. مستخسرتنها علي
شموه اطالعهم مستحيه ومعصبه على فارس بنفس الوقت ..
قروو يروحون المارينا .. بركن السيارة .. ونزلن البنات مع فارس..
يمشن البنات يداام .. وفارس ورا لحقهن ..
قرب صوب شماا .. وزخ ايدها واخرها عنهم ..
شما : فارس شل ايديك
فارس: حبيبتي وكيفي ..
شماا: فارس عاد بليز تعرف انا انحرج
فارس: ههه وتعجبيني يوم تنحرجين ..
شما سكتك ماتروم تقوله شي ..
فارس: ايديج خشنه
شما عصبت : لاتزخها عيل .. ايدي ناعمه بس انت اللي ماتعرف اتميز
فارس : هههههههههههههههههه امزح وربي امزح .. اسف حيااتي ..
شماا : فارس عيب عليك .. لاتقول هالرمسه
فارس: انزين احبج حراام ..
شمووه ماتعرف وين تحط ويهها من المستحـى وماتروم تقول شي .. تحاول تشل ايدينها من فارس لكن هو اقوى عنها ..
دخلوو المول .. شموس وشواقه راحو ويلسو في الكوفي قبل فارس وشمووه .. وبعدهم وصلو شموه وفارس..
شموس : ليش تأخرتوو
شواقه اطالع ايدينهم .. وتسوي حركه لشموس عسب تنتبه ..
شموس : ااااااااااااااااااااااااووويه فارس.. شل ايديك عيب
فارس شلها بسرعه : ههه شفيج عادي شموه بتصير حرمتي صح شماا
شما ويهها قاااااااااافط من الخاطر .. : وين ايلس..
شواقه : ههههههههههههه غيرت السالفه .. واه واه واه
فارس: حسابي معاج بعدين يالحلوة
شموه تحاول ما اطالعه.. : فارس نحن بمكان عام ..
فارس: ادري
شموه: انزين عن الحركات عاد
فارس: ان شاء الله عيوني ..

طلبو لهم ويلسو سوالف.. وفارس ماحب يزعج شمووه يعرف انها تعصب من حركاته ..

في بيت بو فيصل ..
وصل حمد عند اخته يوصل لها شي ..وهو ظاهر من البيت ..
حمد : هلا نواري ..
نورة استانست من شافت حمد : هلا وغلا حمد
حمد : توج يايه ؟
نوره: هيه . امم حياك اتفضل
حمد : لا الغاليه انا مشغول ياي بس لحصوه ايب لها شي وارد الدوام.. ان شاء الله يوم ثاني ..
نواري: افا حمد مايصير
حمد : نواري سمحي لي وربي يوم ثاني .. كفايه انه شفنااج
نواري : احم خلاص براحتك
حمد : تامريني شي ؟
نواري: سلامتك
حمد : الله يسلمج الغلا .. تحملي على عمرج
نواري: ان شاء الله . باي
حمد : بااي ..

تروح نواري لحصووه .. وسيده اتزخ بطنها اللي بعده مانتفخ ..
حصوه: ايييه نواري ماحب هههه
نواري: اونج هههههه ها شحال النونو وام النونو وابو النونو ..
حصوه : والله كلنا بخير وعافيه ... بو النونو اليوم ماعنده دوااام ويالس في البيت
نواري: هي شفته الصبح وقال لي .. وينه الحين هوو ؟
حصوه: في الغرفه راح يغسل ايدينه ..
نواري: اهاا زين زين .. يالله عيل نشي وزقري ريلج عشان نتغدى ..
حصووه: اوكي نترياج روحي بدلي ثيابج ..
نواري: اوكي باااااااي
حصوه: باااي

يظهرون فارس وشواقه وشموه وشموس من المول ومروحين البيت.. عقهم البيت وراح هو عند ربيعه يبغيه بشغله .. البنات سيده على غرفهم ..بيرقدون ومايبغون غدا ..

فهود رد من المدرسه ومالقى حد موجود ..الكل راقد .. فقال احسن شي يروح يشوف شموه يمكن واعيه تشتغل على الاب .. فتح غرفتها وشافها بعد نايمه .. وهو ظاهر صادف اخووه حمد ..
حمد: ها فهود راد من المدرسه
فهود: لا من الديسكو هيه من المدرسه يعني من وين
حمد :انزين اسال بسم الله كلتني
فهود: انت ليش ياي البيت ؟..
حمد : لا والله البيت بيتك وانا مب داري ..
فهود:هههههه هيه بيتي لو تسمح اطلع برع
حمد : والله انت متفيج .. منو من البنات اليوم طرشت لك رساله وخلتك تستانس ..
فهود: ههههه تعرف انا دوم يطرشن لي رسايل ودومي فرحان .. بعدين مب فهد اللي يستانس عسبت رساله ..
حمد : نعم نعم استاذ فهد .. انزين روح روح ارقد انا بروح ارقد تعبااان
فهود: من شو تعبان؟ من نواري هههههه
حمد : سخيف مايخصك في خطيبيتي ..
فهود: انا بروح اقولها ماترضى عليك
حمد : حليلك رضت وخلاص ههههههه
فهود: عادي تسوي لك خلع
حمد:ههههههههههههه بعدنا ماعرسنا تسوي خلع
فهود: عادي مع نواري يصير .
حمد : اقووول فهد روح ارقد انت وااايد تعباان شكلك ..
فهود:ههههههههههه تبا تفتك مني .. برررررررروح وانت بعد روح نام لاتطول وتحلم وتسرح
حمد : سخيف باااي
فهود: هههههه باي..
وكل حد اتجه لغرفته يرقد من بعد هاليوم المتعب بالنسبه لهم .. [/align] __DEFINE_LIKE_SHARE__

غـــلاي.. · 06-24-2008, 02:00 AM

[align=center]الجزء العاشر ..
بعد اسبوع ملجه حمد ونواري .. ومريامي ومحمد .. الكل متحمس .. والكل فرحان.. البنات مع دوامهن وشغلهن في الجاامعات والتقنيه الا انهن من سوق لسوق ..ومن محل لمحل .. ومشغولين بالتجهيزات ..

يوم الخميس الملجه .. واليوم الاربعــا ظهرو البنات مع فارس كان هو الوحيد اللي مش مشغول .. وخذهن للمحل يشلن فساتينهن ..
شموس : يااالله ماصدق.. وناااسه احس
شمووه: هههههه يالله في نص السنه ملجتج عاد بتتخلبلين من الخاطر
شموس : هههه ويا ويهج
شواقه: فارس حط ريلك على البترول
فروس : ان شاء الله
شمووه: لا شو تبا تروحنااا مينون انت
مريامي : الله يخليك فارس ورانا ملجه باجر
نواري: هي والله حراام خف السرعه فااارس
فارس:ههههههههههههههههههههه انزين .. بل بل خوافات ..
شموه: أكيــد نخاف.. مافينا بعد .
فروس : ماراح يصير فيج
شموه: يمكن يصير فيني شي
فروس: ماراح اسامح عمري
نواري ومريامي يطالعن بعض مش فاهمات شي .. اما شموس وشواقه وفروس وشموه يضحكون لانهم فهموو ..
وصلو المحل .. خذو الفساتين .. وقالو لفارس بناخذ لفه اشوي في بوظبي مول .. وطبعا فارس وافق ..
في محل إنزو .. يالسه شموه تشوف البدلات اللي منزلينها .. وقرب منها فارس.. شمووه تفكر امم اقول له والا لا .. مادري والله مش متأكده . .بس انا ادري انها بنت .. اوووف برمس واللي فيها فيها ..
فارس : اللون البنفسج واايد حلو عليج ..
شموه اطالعه
فارس: شفيج ..؟ مب عايبنج اللون ؟.
شموه: فرووس ممكن أسالك سؤال..
فارس: سألي حياتي .. شو عندج ؟.
شمه: اممم فارس في يوم ... اممم مرة مادري جانك تحيد .. انا دخلت غرفتك وماكنت ادري انك موجود .. وو.. اممم .. وسمعتك ترمس وحده ..
فارس.. ويهه انجلب واتذكر ذاك اليوم عدل .. شموه تكمل رمستها : فارس كنت تكلم وحده.. ؟
فروس : امممم شما .. انا من يوم انولدت وفتحت عيني على الدنيا .. وانا احبج .. واكيد تحيدين كم مرة قلت لج ايام المدرسه وايام الجامعه وكل يوم عيني تنطق احبج .. بس انتي ماكنتي تحسين فيني .. خطبج حميد .. ورضيتي عليه بدون ماتعرفينه عدل .. المهم الناس يقولون شما انخطبت .. اتضايجت وااايد .. وااااااااااااايد وماقدرت اسوي شي .. ادري انج راح ترفضيني لانه اشوف عيونج كانت تقول ماريدك يافارس خوز عني .. و .. اممم في عرس اختج حصوو شفت ربيعتكم ..
شمووه ترد ذاكرتها وتتذكر دانه ربيعتهم .. فارس يكمل كلامه : ربيعتكم دانه .. اممم عيبني جمالها .. ورقتها .. قلت احم .. قلت بتعرف عليها يمكن انساااج ..
شما فتحت عينها لكن ساكته تنتظره يخلص كلامه .. فارس: خذت رقمها من شموس بدون ماتدري .. وجذبت عليها .. مع اني بعد كل مكالمه الوم نفسي واسب عمري ليش اسوي في البنت جي .. واصيح حبي اللي هي انتي ياشما .. وهي قالت لي انها تحبني .. وخذتنا الاياااام ورمسنا بعض.. ليوم .. يوم الحادث .. قلت لها اني انا كذا كذا .. انصدمت وايد ربيعتكم .. وماصدقت.. واللي زعلها هو اانتي .. اممم ماقدرت تيلس في الامارات وانا ادري اني انا السبب لكن ماعرفت شو اسوي كنت اريد احرق قلبج شرات ماحرقتي قلبي .. وسافرت لامريكا عند اخوها .. شفتها في المطار نفس اليوم للي كنت بسافر فيه مصر .. وقالت لي .. وقالت اني انساها وانها ماتبا تشوفني .. واني جرحتها واايد .. انا صرت صغير بعينها .. بس بس حبج اعماااني وخلاني شرات المينون .. ومن ذاك اليوم وانا ماعرف شي عن البنت .. بس اتمنى تسامحني .. واتمنى انج انتي تسامحيني .. شماا الله يخليج .. انا احبج وماريد اخسرج .. وليتج تتفهمين موقفي ..
شماا دموووعها في عينها .. وماتعرف شو ترد عليه ..معقوله ربيعتنا يا فارس ااااااااه : الله يسامحك ..
روحت عنه صوب البنات .. وفارس اتضايج واايد .. اوووف شو ها بعد ماصارت اوكي معاي الحين زعلت مرة ثانيه .. وزعلها شين .. ياشما والله مادري شو اسوي عشان ارضيج ..
وصلووو البيت ونزلوو وشموس قررت تنام عند البنات اليوم .. بما انه باجر عندهم يوم مفتوح في الجامعه وماراح يروحن الجامعه .. اما نواري ومريامي بيروحون وبيردن بسرعه عشان الملجه .. لازم يكونن في البيت عسب الحرمه اللي بتعدلهن بتي من وقت ..
فليل في غرفه شموه ..
يالسه شموه اطالع عمرها في المنظره .. وشموس وشواقه يالسات عالاب ..
شموه: بقولكم شي ..
شموس وشواقه : شووو.؟
شموه: دانه ..
شواقه: بلاها دانه ؟.
شموه: تعرفون ليش سافرت دانه عند اخوها ؟.
شموس ارتبكت لانها تعرف السالفه .. بس ماوضحت لهم .. شواقه: اكيد لانها تبا تدرس هناك احسن لها
شموه: لاااا .... شموس قلبها يرقع.. معقوله شما عرفت ..
شموه تكمل رمستها : سافرت عشان فارس..
شواقه: وشو له فارس .. اقول رمسي عدل ..
وتقول لهم السالفه من اولها .. وشموس صاخه .. تقول ليش يافارس قلت لها ..
شواقه: معقوووله .. وليش ماقالت لي ..
شموس :امممم انا ادري بكل ها
شموه: تدرين وصاخه..
شموس : ادري اخوي غلط وادري انها هي بعد غلطت .. بس ماقدرت اقول لكم .. ماريد انه دانه ولا فارس يطيحون من عينكم .
شموه: عذبني يوم قال لي .. صحيح انه دانه غلطانه .. بس ليش اختارها هي .. شو ذنبها ..
شموس : شماا ماريد هالشي يخرب بين علاقتكم .. فارس يحبج وانتي تحبينه ..
شمووه : وربيعتنااا اللي سافرت وابتعدت عناا عشان فعايل اخووج .. انا ماانكر انها غلطانه هم الاثنين غلطانين بس ليش ليش.. ويلست تصيح ..
شواقه: بس شمووه حبيبتي .. انتي تعرفين انه فارس يحبج ويموت فيج وماعرف شو يسوي ... انا ادري انهم غلطانين لكن لازم تنسين الماضي .. والحين دانه بخير .. ومن يومين كلمتها وقالت انها فرحاانه واايد والحمدلله ..
شموه: اااااااااااه يافارس مشكلتي احبه .. والله احبه .. بس برايه بخلي يتعذب هاليومين ولا بعطيه سالفه عسب يحس مره ثانيه الناس مش لعبه بايدينه ..
شموس : هههههههه اونج تتغلين على اخووي
شواقه: و تحبه .. هع هع بس عمرها ماقالت احبك شو هالحب الغريب..
الكل :هههههههههههههههه
شموه: سخيفااااااااااااااااااات يالله نرقد باجر الملجه لازم نكون كاشخات وعيونه مش متورمات ..
شموس: اوكي ..
شواقه: انا عندي مكالمه بعدين بنام
شموس:هههه مكالمه ياااويل حالي .. سلمي عليهم
شواقه: يوووصل ويا ويهج
وتظهر شواقه لغرفتها .. بترمس عبود وبترقد بعدها.. اما شموس وشموه سولفن لين تعبن ورقدن بعدها ..

في بيت بو سالم .. في غرفه فارس ..
فارس يفكر .. وماخذه التفكير .. الحين شمووه بتزعل وادري فيها نحيسه ماترضى بسرعه ..يااربي ... شو اسوي .. بطرش لها مسج بشووف ..
طرش لها ( حبيبتي سهرانه والا راقده؟.) .. طبعا شموه ماردت عليه لانها راقده..
عصب فارس .. اكيد الحين معصبه علي ومسويه لي طاف .. يالله ..

صار الصبح .. وفي بيت بو حمد ..
البنات ناشات من وقت .. عالساعه 11 وربع.. وحمد توه نازل من فوق
شمووه: الف الصلاه والسلام عليك ياحبيب الله محمد
شموس وشواقه: كلولوولولولولولوللوولش ..
حمد :هههه بسم الله من الصبح ..
شموه: فديت روحك ياخوي تعال ببوسك ..
يروح حمد صوب شموه .. تبوسه وتنش شواقه تبوسه ..
حمد:شو مستانسات ..؟
شموس وشموه وشواقه : اكيييييييييييييييييييييييييييد
حمد : انا بعد والله احس خلاص واخيرا باخذ راحتي وياها ..
شموس :ههههههه حليلك يا حمد .. الخطوبه صعبه صح
حمد : ماشالله انتي شكلج بعد متعذبه من الخطوبه هههههه
الكل ضحك على شموس .. الا شموس .. انحرجت..
حمد : امزح بنت خالتي .. لاتزعلين انتي الغلا ..
شموس : احم احم .. شكرا ..
حمد : عفوااا.. هههههه
شموه: عااشو بخبر نواري تقول الغلا ..
حمد : طاع ويهج شموس شراتكم انتو .. اختي هااي
شموس : صح انتي اللي مادري وين تفكيرج ..
الكل :ههههههههههه
حمد : يالله انا بظهر تامروني بشي .؟
شموس وشواقه وشموه: سلامتك ..
حمد : يالله عيل في امان الله ..
البنات : مع السلامه

يظهر حمد لمشاويره .. النبات قررن يسترخن اشوي لين مايوصلن مريامي ونواري .. عشان يتعدلن معاهن .. راحت شموه فوق تشوف مبايلها..
فتحت المسج .. وضحكت .. احبك يافارس بس خلك اشوي.. بعذبك .. هههههه

اهل محمد .. وصلو بوظبي عالظهر .. وطبعا البنات في الصالون والاهل في بيت قوم بوحمد .. وشالين البيت شله .. من الوناسه .. الملجه راح تكون بيت بوحمد .. يعني نواري بتي بيت بو حمد .. احسن لهم ..
والبيت امتلى .. والبنات فوق يتعدلن .. فارس يتصل لشماا وماترد لانه البنات عندها .. وهو قلبه حارقه .. اخر شي عطت شموس ترد عليه ..
شموس : هلا فارس..
فارس يطالع الرقم : شموس .. ؟ اممم وين شماا ..
شموس : فروس عيب اهل محمد والحرمات هني في الغرفه شو متصل لشما وتباها .. بعدين اتصل .. يالله بااي مشغولين نحن ..
فارس: شموس بليز برمسها عالطاير ..
شموس : يحطون لها ميكاب ..
فارس: احم حلوة صايرة والا .؟
شموس :ههههههه اسميك متخشع تخشيع ياخوي ..
فارس: سلمي عليها وقولي لها فارس يقول احبج ..
شموس: انسان فاضي .. اوكي بوصل لها الكلام .. باااي
فارس: بااي
تروح شموس عدال شموه وتقرب من اذنها ..
شموس : فارس يقول احبج ..
شموه : ااااااااااه فديت اخوج .. قولي له انا بعد احبك ..
شموس : انزين ويالسه ادق على رقمه بتتصل فيه ..
شموه: ايي صدقتي يالغبيه
شموس: انتي قلتي لي
شموه: وصدقتي ويا ويهج ..
شموس : انتو غير عن الناس .. تضحكون
شموه: انزين ماقلنا لج تعاي ضحكي ههههه
شموس: ماعندج سالفه بروح يا دوري في الشعر ..

عالمغرب الكل خلص .. البنات ولا اروع.. كل وحده احلى عن الثانيه . طبعا مريامي ونواري ولا اجمل .. ماشالله عليهن بدون شي جميلات والحين محلوات اكثر واكثر ..
مريامي .. فستانها ذهبي .. فيه شك من فوق لين الخصر .. وبعد الخصر يصير الفستان ضيج لين الركب .. وينتفخ يصير منفووش .. بطريقه فنانه .. والتسريحه نص فله .. يعني نص تسريحه ونص مفتوح.. مع فير على الخفيف .. وميكابها بني وذهبي واسود ..
نواري.. فستانها اخضر على عشبي.. نفس موديل مريامي .. بس اللون غير .. والتسريحه كامله يعني الشعر كله .. مع خصلات حلوة نازله .. والميكاب .. اخضر على اسود وفضي..
شموه فستانها اسود وفضي .. بسيط وحلو .. وميكابها اسود وفضي .. والروج احمر .. على الموضه .. وشعرها مسوته سشوار مع رول .. من تحت ..
شواقه.. فستانها اسود وفوشي .. نفس موديل شموه .. وميكابها اسود وفوشي على وردي فاتح .. والروج وردي .. وشعرها تسريحه لانه طويل ..
شموس .. فستانها بنفسجي واخضر .. بعد نفس موديل شموه وشواقه .. والميكاب بنفسج على اخضر واسود .. وشعرها فله نفس شمووه لانه قصير .. ويليق له الفله اكثر عن التسريحه ..

حصووه .. مسويه فستان حلو .. للحمل .. وبطنها يدامها روعه.. لونه احمر .. بسيط وفيها حركات حلوة بسيطه.. وميكابها احمر واسود .. وشعرها فير كامل ..
فطيم اخت فارس.. لابسه فستان ازرق على سماوي .. وميكابها ازرق على اسود وفضي .. وتسريحتها حلوة فيها شغل واايد .. اما فاطمه حرمة سالم .. فستانها لونه برتقالي .. ومسويه شعرها فله مع بااف ولابسه تاج .. وميكابها واايد روعــه..

البنات شادات الحيل ويرقصن .. حصوه بخاطرها ترقص بس امها وحرمه خالها ماخلنها لانها حامل .. ومن قبل فيصل محذرنها ماترقص..

فارس يتصل على شمووه وتشوف الرقم ماترد .. راحت صوب الصاله اللي عند المطبخ .. تعدل شعرها .. وفجاه حست ايد مسكت جتفها .. تلف .. وتشوف فارس..
شموه: فاارس اظهر الله يخليك عن حد يشوفنا .. فااارس .. وبنفس الوقت مستحيه انها عاريه وشعرها ظاهر يدامه
فارس يزخها من جتفها ويضغط عليها : ليش ماتردين علي.. تتعمدين تعذبيني ..
شما : اه فاارس شل ايديك يعور اااه
فارس يطالع ايديه ويخف عليها .. : شماا .. انا بظهر الحين بس بتصل فيج فليل ردي علي .
شما : اوكي اوكي بس اظهر مافيني حد يشوفني وياك الحين وبهالشكل ..
فارس لف عنها وبغى يظهر .. رد مره ثانيه .. يشوفها ومستانس .. ابتسم ..
شمووه: فااارس الله يخليك
فروس: احم .. ويقرب صوبها .. ويزخ ويهها .. بايدينه ويلمسها ..
شموه ذابت وماتعرف شو تسوي .. وبغت تصيح .. تخاف حد يشوفهم ..
فارس: محلوه .. ويغمز لها ..
شموه الدموع في عينها .. : انا بظهر .. وتشل ايدينه وتروح تبا تفتح الباب .. يحط ايدينه على الباب ..
فارس: شمووه لاتخليني اخطفج واشرد
شمووه: لا الله يخليك لاتسويها
فارس: عيل اهدي ..
شموه تهدي اشوي اشوي ... : فارس مايصير حرام تشوفني جي ..
يعق سفرته ويحطها على جتفها وشعرها .. فارس: جي زين
شمووه : شوتباا ؟..
فارس مره ثانيه يقرب صوبها ويزخ ويهها ويمسح الدمعه اللي نزلت من عيونها . : لاتصيحين مابسوي فيج شي .. انا احبج .. شما احبج
شما تحط ايدينها على ايدينه وتنزل ويهها وعيونها تحت .. : فاارس .. أنــا بعد أحبك ..
وتخليه حاير بالكلمه وتظهر من الصاله تركض لفوق من الباب الخلفي.. تروح غرفتها تعدل الميكاب وشكلها ..
فارس بعده في الصاله .. ويطالع المكاان ويتذكر شو صار ويااه .. شما قالت لي احبك .. لا مستحيل .. هاا شو .. اوووه قالتها هي قالتهاا اااااااااه شمووه حمارة تذبحني وتروح .. سفرتي عندهاا يالله من وين اخذ الحين سفره

شموه تشم السفره و تقول .. حليله كيف بيروح عند الريايل .. .. اتصل فيها فارس..
فارس: اقول سفرتي عندج ..
شموه بخاطرها تضحك ومستحيه لانها قالت له احبك : اوكي بطرشها مع نوريه .. (البشكاره )
فارس: انطرها حيااتي ..
شموه: احم اوكي ..

وتروح تحت عند نوريه قالت لها تبخرها مره ثانيه وتكويها وتعطيها لفارس.. وراحت نوريه سوت اللي قالته له شموه ووصلتها لفارس..

عند الحريم .. دخلو مريامي بالاول .. يلست اشوي .. ودخل محمد بعدها .. صورووو واستانسو وقطعو الكيك وشربو العصير .. وراحو الميلس.. دخلو نواري من بعد .. يلست اشوي ودخلو حمد ..
من بعد ماشربو العصير وكلو الكيك ..
حمد : نواري .. خلاص بنروح
نواري مستحيه ماتعرف شو تقول له .. : امم عكيفك
حمد : مليت اريد اكون وياج بروحنا
نواري ماردت..
حمد :هههه شفيج سكتي ..
نواري: لا عاادي ..
حمد : شمووه شموووه ..
يت شموه له .: هلا
حمد : قولي لامي بنروح خلاص..
شموه: اوكي لحظه
راحت شموه خبرت امها .. وامها سوت لهم درب يدخلون على الميلس الثاني يصورون ..
كل حد انفرد مع حرمته .. صوروو ودارت بينهم احلـى الحوارات .. خلصوو وكل حد توكل على بيته ... وعلى شباريهم يشوفون اليوم اللي مر عليهم كان من احلــى الايام ..
بالنسبه لحمد ونواري.. سوالف بالليل في الفون .. ونفس الشي محمد ومريامي ..
عبود وشواقه .. مغااازل اخر الليل وعايشيين الجو .. فيصل وحصووه دلع وسوالف.. وفيصل مايروم يشوف بطنها يذوووب من الخاطر .. شموس رقدت وهي تفكر في مانع خطيبها ومانع نفس الحاله .. فارس يفكر في الكلمه ( وأنــا بعد أحبك ).. ويقوول يالله من متى وانا انطرها واخيرا.

في غرفه شمووه سرحانه في فارس..
تشوف الفون .. اوييه هذا فارس..

فارس: ساعه لين ماتردين
شموه: احم كنت سرحانه
فارس: فيني ؟
شموه: اممممممم هيه
فارس: فديت روحج..
شموه: احم ..
فارس.. شحالج ..
شموه: بخير .. وانت ؟
فارس: تمام من شفتج .. وسمعت صوتج ..
شموه: يعله دووم
فارس: حبيبي بعدج زعلانه ..
شموه تذكرت ..: اممم لا مش زعلانه بس ماريدك تتهور مرة ثانيه ..
فارس: من عييوووني ..
وكملو سوواالف حلوة وذكريات .. لين رقدووو .. [/align] __DEFINE_LIKE_SHARE__

خوية الشقا · 06-24-2008, 02:59 AM

|[ يوووووووووووو ..
حلاته بآأرتين مره وحده تعويض هيع ..
احدآأث حلوه صآأآأرت ..
بس ان شالله دآأنه تنسى كل اللي صآأر ..
تسلم يمنآآآج غلاي ع الباآأآرتين ..
ونرقب اللي عقبهم =] .. ~ __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
" آهـ .. آهـ .. آهــ .. "	محروم.كوم	منتدى أخبار المواقع والمنتديات العربية والأجنبية	0	05-28-2009 10:50 PM
آهــ .. وآلـــف آهــ مـــــن كســـرة الـ ـ خ ــ ـ ـ ـاطر	صعب تفسيري	الإستراحه العامة	23	01-15-2009 01:51 PM
{ أهــ منك من جمالكـ حتى دمع ـك [جُـٍاذٍبيهُ]...New PiC	س™	المسنجر وملحقاته , توبيكات , ماسنجر بلس , msn	30	02-22-2008 03:54 PM