( .. آهــ العنـــٍٍــِِـــا بـــٍِـــي طالــــٍٍـــِِي .. شايــــِِـــٍٍــــل همومــ كبـــٍٍـــٍـــا - الصفحة 22

غـــلاي.. · 06-13-2008, 02:16 AM

[align=center]الجزء السادس ..

عاليوم الثاني انتشر خبر خطوبه حمد ونواري على العايله والفريج والكل .. وطبعــا ماوقفت التباريك والتهاني لقوم ام فيصل وام حمد .. حمد حب يستعيل بالملجــه لانه ان شاء الله في اجازة الربيع يبا يعرس .. ونواري ابدا ماعندها اي مشكله من بعد مارمستها مريامي وقالت لهااا انه حمد جي قراره .. وفي نفس الوقت اهل خطيب مريامي محمد رمسو اهل مريم ويبون يملجون وبعد اسبوع من الملجه يعرسون .. هم جي عاداتهم وتقاليدهم .. وام حمد وبو حمد بعد ماشاورو حمد ومريامي .. ردو موافقه وقالو ان شاء الله في بدايه شهر 10 وعلى نهايه شهر 9 راح يملجون ويعرسون .. وراح يكون قبل رمضان ..
وطبعا مريامي من الحين بدت تتجهز وتروح يمين ويسار ودبي والشارجه وحتى العين عشان تتشرى .. ومعاها نواري اكيــد .. أما قوم حصوو وفيصل ردوو الامارات والكل استانس في ردتهم واكثر واحد هو حمد لانه واايد مع حصووه ..
في بيت بو فيصل الكل يالس حتى فيصل وحصووه .. ماعدا الوالد ..
عبير: لا ماما مش هاي البنت هييج اللي شعرها اقصر جي اريده
ام فيصل: حبيبتي بس واايد قصير شعرها
عبير: ماما الله يخليج اريد شعري مثلها
نواري: يماا خليها بعدها صغيره
ام فيصل: يا يمه حلات البنت في شعرها هي تباه كله مقصوص مب حلو
حصووه: خالو الحين الكل جي يقص شعره على قولتهم مو ضه العصر بعدين هي بعدها ياهل عادي
عبير: هي ماما الله يخليج
عبود : امي خليها تقص شعرها وفكينا من حشرتها وسمعي شو ابا اقول ..
ام فيصل: قول ياولدي شو عندك ؟
عبود يطالع فيصل ووحصووه ونواري: امي البنت من زمان محيره لي وانا الحين اريدكم تروحون وتخطبوونها لي رسمي اريدها قبل لاحد ايي يخطبها
ام فيصل : بس بعدكم صغار ياولدي ..
عبود : امي سالفه خطوبه لا اكثر عشان يدام الناس يعني انها تكون خطيبتي ، وان شاء الله بعدين بعد ماتخطف كم سنه من الدراسه في الكليه وهي بعد لين تخطف على دراستها كم سنه في الجامعه يصير خير ..
فيصل: صح يماا احسن جي عشان ماحد يرد لبيت عمتي ويخطبهاا
حصووه: وخالو هالفتره الخطاطيب زادو على بيتنا وشما راحت ومافي حد الحين غير شووق يعني لو تروحون وتخطبونها رسمي احسن
نواري : هي امي انا جي راايي بعد
ا م فيصل: خلاص انا برمس ابوك وبرد عليك خبر وان شاء الله ابوك ماراح يرفض
عبود ينش يبوس راس امه : مشكوره حبيبتي والله فديتج يا اغلى ام
ام فيصل: حبيبي انت والله كل شي عشانك يهوون
نوااري: هي هي بديينا بالتفرقه الحين عبود كل شي عشانه يهون وانا لاا
ام فيصل : ههه لا يابنتي بعد انتي غاليه .. والحين بتروحين عني بيت ريلج من بيبقا لي في البيت انتي الونيسه كنتي
نواري وعيونها دمعت : امايه انا مابروح مكان بعيد الا بيت عمتي وكل يوم ان شاء الله بييج .. وهاي حصووه عندج والحين عبود بيخطب وبعد كم سنه بيعرس وبييب شواقه هني بعد شو تبين
ام فيصل: الله يخليكم لنا ان شاء الله
الكل : امين ..
فيصل : يالله امي انا وحصوه نستأذن بنروح بيت عمتي
نواري: انا بيي وياكم
عبود: قري مكانج انتي مخطوبه لولدهم عيب ماتروحين
نواري: انزين حمد مش موجود في الدوام
عبود: هيه صح يالله عيل نشي هههه خلاص فرجت
فيصل : تراني مش موجود عسب تقولها نشى والا قري هههه ويا ويهك صاير رياال
ام فيصل :رياال ولا كل الريااييل فديته
فيصل: هي ماشالله على ولدج ههههه
ام فيصل :روح روح خل عنك ولدي فديته
عبود حاظن امه : روح روح خل عنك انا فديتني
الكل : ههههههههههههههههه
ظهرو فيصل وحصووه ونواري لبيت ام حمد ..
في بيت بو سالم .. في الصاله يالسه شموه وشمووس سوالف وضحك
شموس : شو مابتروحين بيتكم
شموه: طرده يعني هههه
شموس : هههه لا بس الحين قوم حصو بيون لكم
شموه: بروح وانتي معاي
شموس : ادري بييي هههههه
شموه: ماشالله تعزمين عمرج على بيتنا هههههه
شموس : ويا ويهج انزين يالله نروح فوق اريد اتلبس
شمووه: اوكي بس اريد القيم بوي مالتي
شموس : هههه يااهل تراج اممم وين عقيتهاا امممم هيه في غرفه فرووس
شموه قلبها وقف من طرت فرووس: انزين روحي هاتيها ..
شموس : لاروحي انتي ماحد في الغرفه هو ظهر وماراح يرد الحين
شموه : وين يروح
شموس : وانا ادري .. ماعرف اتخبريه
شمووه: ماعرف اتخبريه ... تبينه يزفني اخوج صاير ماينطاق
شموس : والله انتي مش فاهمه اخوووي اااخ عليج
شموه: شو قصدج
شموس : ولا شي يالله نروح فوق
راحو فووق وبعدين كل وحده اتجهت لمكان .. شمووس راحت غرفتها تتلبس وشمووه راحت غرفه فارس على اساس هو ماحد .. وكانت لابسه مخووور واايد حلوة عليها وعاقه العباه والشيله على جتفها ودخلت غرفته وهي ماتدري ولا شموس يدرون انه فارس موجود وكان يرمس في الفون
فتحت الباب .. وسمعت .. (فارس: حبيبي انتي ماحد يروم لج حتى قلبي ....
انصعقت .. تمت فاجه ثمهــا ماتعرف شو تسوي وليش اصلا جي كانت رده فعلهــا حس عليها فارس وشافها .. سيده سكر الفون في ويه دانه ..
فارس: شمااا خير
شماا انتبهت على شكلها فحطت الشيله على راسها وبعدها فاجه عينها وثمها: هاا لا
وتركض برع تصييح من اللي شافته فارس ماعرف شو يسوي يقول يالله اكيد سمعت شو هااي الحين بتكرهني زياااده وانا من بعد ماشفتها طيبه معااي اوووف .. يرن فونه ودانه تتصل لكن يقول برايها توولي ماريدها .. ظهر للصاله اللي فوق شاف مافي حد .. نزل تحت ركب سيارته وظهر من البيت .. اما شماا من بعد ماشافت اللي يدامها ركضت لغرفه شموس تصيح .. معقوله فارس يرمس وحده فارس يحب لاااا معقوله .. ما اصدق مستحيــل .. اهئ اهئ .. انا شو اريد .. مالي خص انا مخطووبه .. اوووف معقوله انا انخطبت بس عشان اغايض فارس .. والا شووو .. انا احبه .. هي احب فااارس والله احبك يافارس .. بس شو اسوي شو اسوي ..
شموس : بلاج شمووه
شمووه: هاا لا ولا شي
شموس : شو ولاشي وتصيحين
شموه: لا ماشي بس طحت في غرفه فارس وريلي تعورني
شموس مصدقه حليلها : حلفي تعورتي واايد الحين بتصل في ابوي ياخذج المستشفى
شموه: لا فديتج ماله داعي بس جي عوار بسيط وبيروح
شموس : اوكي مسحي دموعج حبيبتي ..
شموه: اوكي يالله كملي شغلج ..

في شووارع بوظبي يتحوط فارس ومب عارف ليش شمووه جي سوت .. معقوله تحبني .. لا لا شموه عمرها ماحبتني يمكن مستغربه بس انه انا مارمس بنات وانصدمت .. اممم بس عيونها تقول انها تحبني .. يالله مادري مادري .. شمااا انتي شووو تحبيني والا لاا .. اذا تحبني ليش رضت على حميد .. واذا ماتحبني ليش صاحت بهالطريقه .. يالله ياااارب شو اسوي
يرن فونه ويشووف رقم شموس ..
فارس: هاا
شموس : فارس وين انت
فارس: انا هني ليش
شموس : تعال وصلني انا وشموه بيت خالو
فارس يقول بخاطره اووف ماريد شمووه تشوفني بس انا اريد اشوفها : اوكي الحين ياي.. اتزهبن .. واول ماادخل السياره تركبن اوكي لاني مستعيل ..
شموس : اوكي باي
فارس: باي

شمووه : شموس ليش اتصلتي لفارس يمكن مشغول
شموس : لا مش مشغول بعدين تشوفين ماحد في البيت منو بيينا
شموه: امم صح اوكي خلاص

في بيت بو حمد
شواقه ترمس عبود في الفون : وليش مب ياي وياهم شو تتغلى
عبود : ههه فديتج والله حبيت ايلس مع امايه بيي ماعليج
شواقه: انطرك تعاال
عبود : فديت اللي تنطرني
شواقه: عبوووووووووود
عبود : عيون عبوود
شواقه: بس عااااد
عبود : هههههههههه شواقه حبيبي ليش ماروحتي مع شموه عند شموس
شواقه : كنت نايمه ويت خبرتني وقلت ماريد بكمل رقاد
عبود : هييييه ماشالله عليج وايد ترقدين
شواقه: هههه شو اسوي .. اقول عبود بسكر فيصل وحصو ونواري ومريامي يوو صوبي اوكي
عبود : اوكي انا الحين بيي
شواقه: يالله باي
عبود : باي
يلس فيصل قبال شواقه .
فيصل : شوقووو الحين وين ناوين تدرسوون ؟
شواقه: امم جامعه زايد خلاص
نواري: احسن لكم والله عن تروحون الامريكيه
مريامي : صح والله انا بعد جي اقول
شواقه: هيه خلاص اقتنعنا
فيصل: وشو ناويه تدرسين
شواقه: اممم بزنس
فيصل: حلوووو اشتغلي في شركه بوسالم بعدين
شواقه: ههه يبالي
حصووه: متى بتي شموه؟
شواقه: مادري يوم كلمتها كانت شموس تتلبس يعني الحين
حصوه: فديتها شموس بتي معاها
شواقه: هيه
كملو سوالفهم عن الجامعه وشو المخططات لانه باقي اسبوعين وتبدا الدوامات ..

في بيت بوسالم .. فارس في السيارة ينطر شموس وشموه
شموس : هلا فارس
فارس: هلا
شموه: مرحباااا
فارس يطالعها من المنظره : مرااحب
وتموو ساكتين .. ماحد له خاطر يرمس .. شموس طاير عقلها بماانع وشموه وفارس كلن له اهمومه ..
فارس يطالع شمووه من المنظره يشووف عيونها منفخه من الصياح .. لين شافته شمووه وسيده لفت ويها عنه .. تم محبط .. حليله مايعرف شو يسوي ..
رن فون فارس وشموه تشوفه .. سكر .. رن مره ثانيه .. ومايرد ..
شموس : رد انزين
فارس: امم لا ها واحد كريه ومالي نفس له
شموه تقول بخاطرها مالك نفس والا تخاف ترد عليها يدامنا
شموس : انزين رد عليه وقوله انا مشغول بعدين برمسك
فارس: اوووف شموووس خلاص بس ... وغلق الفوون
شموس : بسم الله انا شو قلت عصبت .. وليش غلقته
فارس: مايخصج واكرمينا بسكوتج
شموس فضلت انها تسكت ولا تحصل هزااب اكثر .. وشمووه تقول تعصب على اختك عشان وحده خايسه .. افا يافارس .. ماهقيتها منك .. ياولد خالتي ..

وصلو البيت نزلهم وراح عنهم .. تمت شموه تتطالع السيارة وهي ظاهره ..

دخلو الفله ..
شموس وشموه: مرحبااا
الكل : مراحب هلا والله
حصوه: زين ييتو متنا من اليوع
شموس :هههههه غريبه خالو ام حمد للحين مش متعيشه هي وشيبتها
عبود : خبرج عتيج .. ماحد الشياب
شموس : وينهم
حصووه: رايحين عرس قوم بو مبارك ..
شمووه: هيه صح امايه قالت انا نسيت
شموس : وانا اقول ليش بيتنا فاضي هههه
شواقه: يالله نروح نتعشى ..
الكل : يالله ..
وتوجهوو لغرفه الطعام ..
فيصل: شوو وينه فارس
شموس : مادري نزلنا وروح
فيصل: بتصل به خله يتعشى معانا
شموس : مادريبه معصب
عبود شك .. : شو بلاه معصب
شموس : مادري
يتصل فيصل لفارس
فيصل: الووو
فارس: هلا فصوول
فيصل: وينك ليش مانزلت مع البنات
فارس: امم حبيت اتمشى اشوي في السياره
فيصل: عسى ماشر فيك شي ..؟
فارس: ههه لا والله مافيني شي بس جي دق براسي
فيصل: اهاا خلاص يعني مهب ياي
فارس: لا السموحه واستسمح من الكل
فيصل: اوكي برايك عيل
فارس: يالله مع السلامه
فيصل: مع السلامه .. امم يقول مهب ياي بيتمشى ماله خاطر للاكل
شموه هيه لازم زعلت الغاليه شلون بييك نفس للاكل .. شموس تقول شو سالفتك فارس اكيد صاير شي معاك .. عبود يقول .. اممم مادري احس في سالفه وراك يافارس..

فهود ينطر باسل يرد عليه .. كان فهود واقف عند باب غرفته نازل تحت من بعد مازقرووه للعشا
باسل: هلا فهوود
فهود : ها بشر موجودين اليوم
باسل: هيه موجودين .. ماعليك انت كل شي تمام ..
فهود: فديتك والله عيل اخليك تكمل شغلك .
باسل: اوكي باي
فهود: باي

فهود اتفق مع باسل انه يصور حميد هو ويشرب وفي حظنه ريما ربيعته .. عشان يخلي حمد والغير يصدقوون الرمسه اللي يقولها عن حميد ..

في الشقه حميد مستاانس عالاخير والكاس بايده هوو وريماا وسوالف وضحك وبوساات وحضن داافي .. وكل الشباب اللي موجودين معاهم وحده الا باسل ..
يظبط الكاميرا على حميد وطبعا مايروم يصور في فونه لانه ماراح تظهر الصورة واضحه .. فخذ معاه كاميرا دجيتال ويصور فيها وماحد حاس فيه ..

في السيارة عند فارس..
دانه : انزين ليش ماترد علي
فارس: اووف دااانو مالي نفس بس سكتي
دانه : وليش ان شاء الله مالك نفس
فارس: دااانو سكتي عاااد مالي خلقج
دانه : لا لازم تسمعني . فارس انا احبك والله .. الله يخليك افهمني ..

فااارس: يالله دااااااااااااااااااااااااانوو بس بس ماريد ارمس خلاص وسكر الفون في ويها ..
فارس معصب وحط ريله على البترووول وطير السياارة وهو فيهاا .. ومايشوف حد يدااامه .. يمشي بأقصــى سرعه ممكنــه .. ومعصب وااايد لدرجه انه نزلت الدمعه من عيــنه.. يقوول بصوت مسموع .. ااااه ياشماا .. احبج ومب قادر انساج حتى لو اني ارمس ربيعتج ولو ارمس الف بنت .. احبج وانتي الوحيده اللي نزلت الدمعه عشااانها .. احبج ومالي غيرج احسج تحبيني .. بس ماترومين تقولين .. احس بكلام عينج .. احس برعشه شفااتج .. وكان مروح خط دبي .. وقريب من الشهامه .. فجاه يدخل في سيارة يدااامه .. وكان الحادث فظيــع
الكل تيمع .. وفارس ينصب الدم منه .. ويناازع ويقوول شماا شمااا .. والسيارة محطمه على الاخير .. والناس حووله يحاولون يظهرونه من السيارة .. وصلت سياير الشرطه والاسعااف.. وكانت اقرب مستشفى هي مستشفى الرحبه .. بسرعه بسرعه يحاولون ينقذوونه .. نظفو جروحه .. ودخلو غرفه العمليات ..

سالم موصل اهله البيت من العرس والا يرن فونه ..
الريال : مرحبا وياي سالم اخو فارس ؟
سالم : مراحب اخوي هيه سالم اخو فارس خير ان شاء الله ؟
الريال : والله ياخوي اخوك سوا حادث قريب الشهامه والحين هو في المستشفى دخلوه غرفه العمليات تعال لو تسمح ظروري ..
سالم : شووو فااارس وين متى وكيف ؟
الريال: والله ياخوي ماعرف شو اقولك بس انت تعال احسن . .
سالم : خلاص الحين ياي .. باي
ام سالم: خير ياولدي شو صاير
سالم : ها امي لا خير يالله نزلي وانا الحين ياي بس في مشكله في الشركه وفارس مش عارف يحلها .. ..
ام سالم حليلها على نياتها : خلاص بويه لاتتاخر ..
سالم : ان شاء الله الغاليه ..
نزلت ام سالم وخبرت فاطمه انه سالم بيروح قريب وبيرد .. وفاطمه ماتمت تحاتي وقالت اكيد شغل والحين راد ..
في بيت بو حمد ..
يالس حمد مع شموه وشواقه ومريامي يسولفوون ..
حمد : اووف كل ها وانا مش موجود حراام ماشفت نواري
شموه: هيه انت تحااتي نواري ماتحاتي السوالف
حمد : هههههههه هيه احاتي نواري
شواقه: ماشالله على الحب
الكل : ههههههههههههه
سالم اتصل في حمد ::
حمد : هلا والله بسالم
سالم : حمد انا عند بيتكم بسرعه اظهر بنروح الشهامه فارس مسوي حاادث الله يخليك ..
حمد يوقف والكل تم يطالعه : شووو متى كل ها صار ؟
سالم : مش وقته تلبس واظهر
حمد : اوكي خبرت فيصل
سالم : هي والحين ياي هو وحصووه ونواري ..
حمد : اوكي الحين ياي

مريامي : خير حمد شو فيه ؟
حمد : فارس مسوي حادث والحين في المستشفى ياالله بروح البس انا
شمووه انصعقت من سمعت الخبر وشواقه تصيح ومريامي تقول : حمد بني ويااك
حمد : بسرعه لبسن عبيكن
شمووه تصيح : لااا فااارس لاااا
مريااامي : هدي شمووه فديتج الله يخليج بتين روحي لبسي عباتج ..
راحن البنات يلبسن عباتهن .. شموه تقول كله مني ماقلت له تعال انزل تعشى بيتنا .. وهو متضايج عشاني .. اوووف ماراح اسامح نفسي يافارس .. حبيبي احبك

ركبو مع سالم وكان فيصل وراهم وسيده على مستشفى الرحبه .. وصلو ونزلو وفي قسم الطواري يسالون لين دلوهم على قسم العمليات .. وخبروهم عن حاله فارس..
الدكتور : والله ياخويه الشاب ماصابه شي غير كسر في الايد .. ونزيف بسيط الحمدلله بقدره الله تعالي قدرنا نساعده ووصل في الوقت الازم .. وعنده جروح بسيطه في الظهر وعليه بالف عافيه ..

سالم : طمنتنا يا دكتور يعني هو الحين بخير
الدكتور : ايوا ماشالله عليه جسمه قوي ويتحمل وهالله اخدوو على غرفه خاصه يرتاح فيها
فيصل: تسلم دكتور ماقصرت
الدكتور : عليه الف عافيه والحمدلله على سلامته
الكل : الله يسلمك ..

صوب البنات شمووه ميته صياااح .. وشواقه تهديها .. من بعد ماعرفت القصه كامله من شموه .. عرفت انه شموه تحب فارس .. طبعا شموه اعترفت لها .. وعرفت شو صار معاهم .. انها سمعته يرمس بنيه .. وقالت لها بعد انه فارس قبل كان يحبها واعترف في حبه لها .. ولامتها شواقه ليش رضت على حميد .. لكن الحين مافي فايده.. [/align] __DEFINE_LIKE_SHARE__

0oبركان الغلاo0 · 06-13-2008, 02:30 AM

الله ع الشاطرين اللي ما ايون الا جيه ..

شطوووره غلااي .. يلا كملي لين اقرا هالبارت .. __DEFINE_LIKE_SHARE__

ra3ie alvtc · 06-13-2008, 03:06 AM

هههههههههههه

الله والله انه طرر

وانا اشهد

تسلمين ختيه هالبارت الطرر

عاشو الابطال فارس و شمووه

تسلمين ختيه

ونتريا البارت اليديد

بسرعه حطيت

لا تبطين علينا اوكـــي

^^ __DEFINE_LIKE_SHARE__

غـــلاي.. · 06-13-2008, 03:16 AM

[align=center]ههههه ماشالله عليككن ...

اممم البارت الياي بعد قريب بس بعد يوم والا يومين .. ان شاء الله

مشكورين عالمرور وعالمتابعه[/align] __DEFINE_LIKE_SHARE__

0oبركان الغلاo0 · 06-13-2008, 03:19 AM

اييييييييييييييييييييييييييييييييييييييييييييييييي يييه

يلا كملي غلووووووووووووووووي ..

توقف عند الاكشن .. تقهر

يلا لا تبطين __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
" آهـ .. آهـ .. آهــ .. "	محروم.كوم	منتدى أخبار المواقع والمنتديات العربية والأجنبية	0	05-28-2009 10:50 PM
آهــ .. وآلـــف آهــ مـــــن كســـرة الـ ـ خ ــ ـ ـ ـاطر	صعب تفسيري	الإستراحه العامة	23	01-15-2009 01:51 PM
{ أهــ منك من جمالكـ حتى دمع ـك [جُـٍاذٍبيهُ]...New PiC	س™	المسنجر وملحقاته , توبيكات , ماسنجر بلس , msn	30	02-22-2008 03:54 PM